📅 2023-yil 14-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 14 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 14 августа 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 14 August 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Олий таълим муассасаларининг иқтидорли талабалари учун айрим номли давлат стипендиялари жорий этилганлиги муносабати билан Ўзбекистон Республикаси Ҳуқуматининг айрим қарорларига ўзгартириш ва қўшимчалар киритиш тўғрисида
Ўзбекистон Республикаси Президентининг « Жисмоний тарбия ва спорт соҳасида кадрларни тайёрлаш ҳамда илмий тадқиқотлар тизимини янада такомиллаштириш чора-тадбирлари тўғрисида » 2022 йил 3 ноябрдаги ПҚ-414-сон ҳамда « Буюк шоир ва олим, машҳур давлат арбоби Заҳириддин Муҳаммад Бобур таваллудининг 540 йиллигини кенг нишонлаш тўғрисида » 2023 йил 25 январдаги ПҚ-20-сон қарорларига мувофиқ Вазирлар Маҳкамаси қарор қилади:
1. Ўзбекистон Республикаси Ҳукуматининг иловага мувофиқ айрим қарорларига қуйидагиларни назарда тутувчи ўзгартириш ва қўшимчалар киритилсин:
жисмоний маданият ва спорт йўналишлари бўйича кадрлар тайёрловчи олий таълим муассасалари охирги икки курсида ўқиётган талабаларга Паҳлавон Маҳмуд номли давлат стипендиясини тайинлаш;
тарих ва география йўналишлари бўйича кадрлар тайёрловчи олий таълим муассасалари охирги икки курсида ўқиётган талабаларга Бобур номли давлат стипендиясини тайинлаш;
Паҳлавон Маҳмуд ҳамда Бобур номли давлат стипендиялари миқдорини белгилаш.
2. Мазкур қарорнинг бажарилишини назорат қилиш Ўзбекистон Республикаси олий таълим, фан ва инновациялар вазири И.Ю. Абдурахмонов зиммасига юклансин.
Вазирлар Маҳкамасининг 2023 йил 14 августдаги 384-сон қарорига ИЛОВА
Ўзбекистон Республикаси Ҳукуматининг айрим қарорларига киритилаётган ўзгартириш ва қўшимчалар
1. Вазирлар Маҳкамасининг «Ўзбекистон иқтидорли ёшларини тақдирлаш ва моддий рағбатлантириш тўғрисида» 2008 йил 13 октябрдаги 226-сон қарорига 3-иловада :
а) 2-банд қуйидаги таҳрирда баён этилсин:
«2. Олий таълим муассасалари бакалавриат босқичи талабалари учун Ўзбекистон Республикаси Президентининг давлат стипендиялари Ўзбекистон Республикасидаги давлат, нодавлат ва хорижий олий таълим муассасалари, шу жумладан, қўшма таълим дастурларида бутун ўқиши давомида фақат аъло баҳоларга ўқиётган Ўзбекистон Республикаси фуқароси бўлган охирги курс талабаларига тайинланади ва тўланади.
Ўзбекистон Республикаси Президенти давлат стипендиялари ҳар бир олий таълим муассасасининг бакалавриат босқичидаги бир нафар битирувчи курс талабасига тайинланади ва тўланади.
Беруний, Ибн Сино, Навоий, Улуғбек, Имом ал-Бухорий ва Ислом Каримов номли давлат стипендиялари (кейинги ўринларда — номли давлат стипендиялари) Ўзбекистон Республикасидаги давлат, нодавлат ва хорижий олий таълим муассасалари, шу жумладан, қўшма таълим дастурларининг охирги икки курсида ўқиётган талабаларга тайинланади ва тўланади.
Бобур номли давлат стипендияси тарих ва география йўналишлари бўйича Ўзбекистон Республикасидаги давлат, нодавлат ва хорижий олий таълим муассасалари, шу жумладан, қўшма таълим дастурларининг охирги икки курсида ўқиётган талабаларга тайинланади ва тўланади. Бунда ушбу номли давлат стипендияси сони тарих ва география йўналишлари бўйича кадрлар тайёрловчи олий таълим муассасалари учун алоҳида биттадан белгиланади.
Паҳлавон Маҳмуд номли давлат стипендияси жисмоний маданият ва спорт йўналишлари бўйича Ўзбекистон Республикасидаги давлат, нодавлат ва хорижий олий таълим муассасалари, шу жумладан, қўшма таълим дастурларининг охирги икки курсида ўқиётган талабаларга тайинланади ва тўланади. Бунда ушбу номли давлат стипендияси сони жисмоний маданият ва спорт йўналишлари бўйича кадрлар тайёрловчи олий таълим муассасалари учун алоҳида биттадан белгиланади.
Тўлепберген Қаипбергенов ва Ибройим Юсупов номли давлат стипендиялари Қорақалпоғистон Республикасидаги давлат, нодавлат ва хорижий олий таълим муассасалари, шу жумладан, қўшма таълим дастурларининг охирги икки курсида ўқиётган талабаларга тайинланади ва тўланади. Бунда ушбу номли давлат стипендиялари сони Қорақалпоғистон Республикасидаги ҳар бир олий таълим муассасаси учун Тўлепберген Қаипбергенов ва Ибройим Юсупов номли давлат стипендиялари бўйича алоҳида биттадан белгиланади»;
б) 13-банд қуйидаги таҳрирда баён этилсин:
«13. Ўзбекистон Республикаси Президенти ва номли давлат стипендиялари танловларида ғолиб бўлган талабаларга Ўзбекистон Республикаси олий таълим, фан ва инновациялар вазири томонидан тасдиқланган қуйидаги гувоҳномалардан бири берилади:
«Ўзбекистон Республикаси Президентининг давлат стипендияси соҳиби»;
«Беруний номли давлат стипендиясининг соҳиби»;
«Ибн Сино номли давлат стипендиясининг соҳиби»;
«Навоий номли давлат стипендиясининг соҳиби»;
«Улуғбек номли давлат стипендиясининг соҳиби»;
«Имом ал-Бухорий номли давлат стипендиясининг соҳиби»;
«Ислом Каримов номли давлат стипендиясининг соҳиби»;
«Бобур номли давлат стипендиясининг соҳиби»;
«Паҳлавон Маҳмуд номли давлат стипендиясининг соҳиби»;
«Тўлепберген Қаипбергенов номли давлат стипендиясининг соҳиби»;
«Ибройим Юсупов номли давлат стипендиясининг соҳиби».
Гувоҳномалар талабаларнинг ўқиш жойида тантанали вазиятда топширилади».
2. Вазирлар Маҳкамасининг «Олий таълим муассасалари талабаларига тўланадиган стипендиялар миқдорларини белгилаш ҳамда стипендиялар тайинлаш ва тўлаш тартибини такомиллаштириш чора-тадбирлари тўғрисида» 2020 йил 31 январдаги 59-сон қарорида :
а) 5-банднинг биринчи хатбошиси «Имом ал-Бухорий» сўзларидан кейин «Бобур, Паҳлавон Маҳмуд» сўзлари билан тўлдирилсин;
б) 1-илованинг 10-банди биринчи хатбошиси «Имом ал-Бухорий» сўзларидан кейин «Бобур, Паҳлавон Маҳмуд» сўзлари билан тўлдирилсин;
в) 2-илованинг «Стипендия номи ва қўшимча тўловлар» устуни 2-позицияси «Имом ал-Бухорий» сўзларидан кейин «Бобур, Паҳлавон Маҳмуд» сўзлари билан тўлдирилсин.
Ўзбекистон Республикасининг Бош вазири А. АРИПОВ
Тошкент ш.,
2023 йил 14 август,
384-сон
Oʻzbekiston Respublikasi Vazirlar Mahkamasining
qarori
Oliy taʼlim muassasalarining iqtidorli talabalari uchun ayrim nomli davlat stipendiyalari joriy etilganligi munosabati bilan Oʻzbekiston Respublikasi Huqumatining ayrim qarorlariga oʻzgartirish va qoʻshimchalar kiritish toʻgʻrisida
Oʻzbekiston Respublikasi Prezidentining “ Jismoniy tarbiya va sport sohasida kadrlarni tayyorlash hamda ilmiy tadqiqotlar tizimini yanada takomillashtirish chora-tadbirlari toʻgʻrisida ” 2022-yil 3-noyabrdagi PQ-414-son hamda “ Buyuk shoir va olim, mashhur davlat arbobi Zahiriddin Muhammad Bobur tavalludining 540 yilligini keng nishonlash toʻgʻrisida ” 2023-yil 25-yanvardagi PQ-20-son qarorlariga muvofiq Vazirlar Mahkamasi qaror qiladi:
1. Oʻzbekiston Respublikasi Hukumatining ilovaga muvofiq ayrim qarorlariga quyidagilarni nazarda tutuvchi oʻzgartirish va qoʻshimchalar kiritilsin:
jismoniy madaniyat va sport yoʻnalishlari boʻyicha kadrlar tayyorlovchi oliy taʼlim muassasalari oxirgi ikki kursida oʻqiyotgan talabalarga Pahlavon Mahmud nomli davlat stipendiyasini tayinlash;
tarix va geografiya yoʻnalishlari boʻyicha kadrlar tayyorlovchi oliy taʼlim muassasalari oxirgi ikki kursida oʻqiyotgan talabalarga Bobur nomli davlat stipendiyasini tayinlash;
Pahlavon Mahmud hamda Bobur nomli davlat stipendiyalari miqdorini belgilash.
2. Mazkur qarorning bajarilishini nazorat qilish Oʻzbekiston Respublikasi oliy taʼlim, fan va innovatsiyalar vaziri I.Y. Abduraxmonov zimmasiga yuklansin.
Vazirlar Mahkamasining 2023-yil 14-avgustdagi 384-son qaroriga ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar
1. Vazirlar Mahkamasining “Oʻzbekiston iqtidorli yoshlarini taqdirlash va moddiy ragʻbatlantirish toʻgʻrisida” 2008-yil 13-oktabrdagi 226-son qaroriga 3-ilovada :
a) 2-band quyidagi tahrirda bayon etilsin:
“2. Oliy taʼlim muassasalari bakalavriat bosqichi talabalari uchun Oʻzbekiston Respublikasi Prezidentining davlat stipendiyalari Oʻzbekiston Respublikasidagi davlat, nodavlat va xorijiy oliy taʼlim muassasalari, shu jumladan, qoʻshma taʼlim dasturlarida butun oʻqishi davomida faqat aʼlo baholarga oʻqiyotgan Oʻzbekiston Respublikasi fuqarosi boʻlgan oxirgi kurs talabalariga tayinlanadi va toʻlanadi.
Oʻzbekiston Respublikasi Prezidenti davlat stipendiyalari har bir oliy taʼlim muassasasining bakalavriat bosqichidagi bir nafar bitiruvchi kurs talabasiga tayinlanadi va toʻlanadi.
Beruniy, Ibn Sino, Navoiy, Ulugʻbek, Imom al-Buxoriy va Islom Karimov nomli davlat stipendiyalari (keyingi oʻrinlarda — nomli davlat stipendiyalari) Oʻzbekiston Respublikasidagi davlat, nodavlat va xorijiy oliy taʼlim muassasalari, shu jumladan, qoʻshma taʼlim dasturlarining oxirgi ikki kursida oʻqiyotgan talabalarga tayinlanadi va toʻlanadi.
Bobur nomli davlat stipendiyasi tarix va geografiya yoʻnalishlari boʻyicha Oʻzbekiston Respublikasidagi davlat, nodavlat va xorijiy oliy taʼlim muassasalari, shu jumladan, qoʻshma taʼlim dasturlarining oxirgi ikki kursida oʻqiyotgan talabalarga tayinlanadi va toʻlanadi. Bunda ushbu nomli davlat stipendiyasi soni tarix va geografiya yoʻnalishlari boʻyicha kadrlar tayyorlovchi oliy taʼlim muassasalari uchun alohida bittadan belgilanadi.
Pahlavon Mahmud nomli davlat stipendiyasi jismoniy madaniyat va sport yoʻnalishlari boʻyicha Oʻzbekiston Respublikasidagi davlat, nodavlat va xorijiy oliy taʼlim muassasalari, shu jumladan, qoʻshma taʼlim dasturlarining oxirgi ikki kursida oʻqiyotgan talabalarga tayinlanadi va toʻlanadi. Bunda ushbu nomli davlat stipendiyasi soni jismoniy madaniyat va sport yoʻnalishlari boʻyicha kadrlar tayyorlovchi oliy taʼlim muassasalari uchun alohida bittadan belgilanadi.
Toʻlepbergen Qaipbergenov va Ibroyim Yusupov nomli davlat stipendiyalari Qoraqalpogʻiston Respublikasidagi davlat, nodavlat va xorijiy oliy taʼlim muassasalari, shu jumladan, qoʻshma taʼlim dasturlarining oxirgi ikki kursida oʻqiyotgan talabalarga tayinlanadi va toʻlanadi. Bunda ushbu nomli davlat stipendiyalari soni Qoraqalpogʻiston Respublikasidagi har bir oliy taʼlim muassasasi uchun Toʻlepbergen Qaipbergenov va Ibroyim Yusupov nomli davlat stipendiyalari boʻyicha alohida bittadan belgilanadi”;
b) 13-band quyidagi tahrirda bayon etilsin:
“13. Oʻzbekiston Respublikasi Prezidenti va nomli davlat stipendiyalari tanlovlarida gʻolib boʻlgan talabalarga Oʻzbekiston Respublikasi oliy taʼlim, fan va innovatsiyalar vaziri tomonidan tasdiqlangan quyidagi guvohnomalardan biri beriladi:
“Oʻzbekiston Respublikasi Prezidentining davlat stipendiyasi sohibi”;
“Beruniy nomli davlat stipendiyasining sohibi”;
“Ibn Sino nomli davlat stipendiyasining sohibi”;
“Navoiy nomli davlat stipendiyasining sohibi”;
“Ulugʻbek nomli davlat stipendiyasining sohibi”;
“Imom al-Buxoriy nomli davlat stipendiyasining sohibi”;
“Islom Karimov nomli davlat stipendiyasining sohibi”;
“Bobur nomli davlat stipendiyasining sohibi”;
“Pahlavon Mahmud nomli davlat stipendiyasining sohibi”;
“Toʻlepbergen Qaipbergenov nomli davlat stipendiyasining sohibi”;
“Ibroyim Yusupov nomli davlat stipendiyasining sohibi”.
Guvohnomalar talabalarning oʻqish joyida tantanali vaziyatda topshiriladi”.
2. Vazirlar Mahkamasining “Oliy taʼlim muassasalari talabalariga toʻlanadigan stipendiyalar miqdorlarini belgilash hamda stipendiyalar tayinlash va toʻlash tartibini takomillashtirish chora-tadbirlari toʻgʻrisida” 2020-yil 31-yanvardagi 59-son qarorida :
a) 5-bandning birinchi xatboshisi “Imom al-Buxoriy” soʻzlaridan keyin “Bobur, Pahlavon Mahmud” soʻzlari bilan toʻldirilsin;
b) 1-ilovaning 10-bandi birinchi xatboshisi “Imom al-Buxoriy” soʻzlaridan keyin “Bobur, Pahlavon Mahmud” soʻzlari bilan toʻldirilsin;
v) 2-ilovaning “Stipendiya nomi va qoʻshimcha toʻlovlar” ustuni 2-pozitsiyasi “Imom al-Buxoriy” soʻzlaridan keyin “Bobur, Pahlavon Mahmud” soʻzlari bilan toʻldirilsin.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 14-avgust,
384-son