UzbekAI

Ўзбекистон Республикаси Вазирлар Маҳкамасининг

қарори

МАЪМУРИЙ РЕГЛАМЕНТИ

СХЕМАСИ

НИЗОМ

Экологик аудит соҳасини тартибга солувчи айрим норматив-ҳуқуқий ҳужжатларни тасдиқлаш тўғрисида

Ўзбекистон Республикасининг «Экологик аудит тўғрисида»ги Қонунига мувофиқ, шунингдек, ишлаб чиқаришнинг экологик назоратини амалга оширишда экологик аудит фаолиятини самарали ташкил қилиш ҳамда экологик аудиторлик хизмати соҳасини малакали мутахассислар билан таъминлаш мақсадида Вазирлар Маҳкамаси қарор қилади:

1. Ўзбекистон Республикасининг «Экологик аудит тўғрисида»ги Қонунига мувофиқ:

атроф-муҳитга таъсир кўрсатиш хавфи кам бўлган ёки унчалик кўп бўлмаган (локал таъсирга эга) экологик аудит субъектларининг фаолиятига нисбатан экологик аудит ихтиёрий тартибда ўтказилиши;

атроф-муҳитга юқори ва ўртача таъсир кўрсатиш хавфига эга бўлган экологик аудит субъектлари ҳар йилги мажбурий экологик аудитдан ўтказилиши;

экологик аудиторлик фаолияти экологик аудиторлик ташкилоти томонидан амалга оширилиши;

экологик аудиторлик ташкилоти штатида асосий иш жойи экологик аудиторлик ташкилоти бўлган камида тўрт нафар экологик аудитор мавжуд бўлишини таъминланиши шартлиги;

экологик аудиторга унда экологик аудиторнинг малака сертификати мавжуд бўлиши талаби қўйилганлиги маълумот учун қабул қилинсин.

2. Белгилансинки:

экологик аудиторнинг малака сертификатини бериш учун малака имтиҳонини ташкил этиш, малака сертификатини бериш, экологик аудиторлар ва экологик аудиторлик ташкилотларининг реестрларини юритиш бўйича Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги (кейинги ўринларда — Экология вазирлиги) ваколатли орган ҳисобланади;

малака имтиҳонини ташкил этиш ва ўтказиш учун Экология вазирлиги ҳузурида имтиҳон комиссияси ташкил этилади.

3. Қуйидагилар:

Экологик аудиторнинг малака сертификатини бериш бўйича давлат хизматларини кўрсатишнинг маъмурий регламенти 1-иловага мувофиқ;

Экологик аудиторлик ташкилотлари реестрини юритиш тартиби тўғрисидаги низом 2-иловага мувофиқ тасдиқлансин.

4. Экология вазирлиги:

бир ҳафта муддатда имтиҳон комиссиясининг шахсий таркиби ва унинг низоми тасдиқланишини;

икки ҳафта муддатда Ўзбекистон Республикаси Рақамли технологиялар вазирлиги билан биргаликда экологик аудиторнинг малака сертификатини бериш бўйича давлат хизматлари Ягона интерактив давлат хизматлари порталига интеграция қилинишини;

экологик аудиторлар ва экологик аудиторлик ташкилотларининг реестрлари Экология вазирлигининг расмий веб-сайтига жойлаштириб борилишини таъминласин.

5. Ўзбекистон Республикаси Ҳукуматининг айрим қарорларига 3-иловага мувофиқ ўзгартиришлар киритилсин.

6. Экология вазирлиги манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда мазкур қарорга мувофиқлаштирсин.

7. Мазкур қарорнинг бажарилишини назорат қилиш Ўзбекистон Республикаси экология, атроф-муҳитни муҳофаза қилиш ва иқлим ўзгариши вазири А.А. Абдухакимов зиммасига юклансин.

Вазирлар Маҳкамасининг 2023 йил 19 августдаги 402-сон қарорига 1-ИЛОВА

Экологик аудиторнинг малака сертификатини бериш бўйича давлат хизматларини кўрсатишнинг

1-боб. Умумий қоидалар

1. Мазкур Маъмурий регламент (кейинги ўринларда — Регламент) экологик аудиторнинг малака сертификатини бериш, қайта расмийлаштириш бўйича давлат хизматларини кўрсатиш тартибини белгилайди.

2. Ушбу Регламентда қуйидаги асосий тушунчалардан фойдаланилади:

ваколатли орган — Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги;

талабгор — малака сертификатини олиш учун мурожаат қилган Ўзбекистон Республикаси фуқароси;

экологик аудитор — экологик аудиторнинг малака сертификатига эга бўлган жисмоний шахс;

экологик аудиторнинг малака сертификати (кейинги ўринларда — малака сертификати) — экологик аудиторнинг малакасини тасдиқловчи ва экологик аудиторлик фаолиятини амалга ошириш ҳуқуқини берувчи ҳужжат;

Экологик аудиторлар реестри — ваколатли органнинг расмий веб-сайтига жойлаштириладиган экологик аудиторнинг малака сертификатига эга бўлган экологик аудиторлар рўйхати.

3. Малака сертификатини бериш ва қайта расмийлаштириш бўйича хизматлар давлат хизматлари маркази ёки Ўзбекистон Республикаси Ягона интерактив давлат хизматлари портали (кейинги ўринларда — ЯИДХП) орқали кўрсатилади.

4. Экологик аудиторнинг малака сертификати ушбу Регламентга 1-иловага мувофиқ схема бўйича берилади.

5. Малака сертификатини олиш учун талабгор қуйидаги талабларга жавоб бериши керак:

экология ва атроф-муҳитни муҳофаза қилиш соҳасига оид (биолог, геолог, гидролог муҳандис, ер геодезия ва картографияси муҳандиси, шунингдек, сув, атмосфера, ер ва ер ости бойликлари муҳофазаси мутахассисликлари) олий маълумотга;

атроф-муҳитни муҳофаза қилиш соҳасида ёки турдош соҳаларда кетма-кет камида уч йиллик иш тажрибасига эга бўлиш.

2-боб. Малака сертификатини бериш бўйича давлат хизматларини кўрсатиш тартиби

6. Талабгор малака сертификатини бериш бўйича давлат хизматларидан фойдаланиш учун давлат хизматлари марказига бевосита ўзи ёки ишончли вакили орқали мурожаат этади ёхуд ЯИДХПда давлат хизматларидан электрон шаклда фойдаланиш учун рўйхатдан ўтади.

7. Талабгор давлат хизматлари марказига бевосита ўзи ёки ишончли вакили орқали мурожаат этган тақдирда, давлат хизматлари маркази ходими талабгор номидан, ЯИДХП орқали мурожаат қилган ҳолларда эса мустақил равишда ушбу Регламентга 2-иловага мувофиқ шаклдаги анкетани электрон шаклда тўлдиради.

Анкета давлат хизматлари маркази ходими томонидан тўлдирилганда, талабгор ундаги маълумотларнинг тўғрилигини текширгандан сўнг, уни ўз электрон рақамли имзоси (кейинги ўринларда — ЭРИ) билан тасдиқлайди.

Давлат хизматлари маркази ариза берувчи ўз ЭРИсини шу жойнинг ўзида олиши учун барча зарур шароитларни таъминлаши шарт.

Анкетани ЭРИ билан тасдиқлаш имконияти бўлмаган ҳолларда, тегишли маълумот идентификация қилишнинг бошқа воситалари (дактилоскопия, электрон имзо ва бошқалар) билан ҳам тасдиқланиши мумкин.

8. Қуйидаги ҳужжатлар ваколатли орган томонидан тегишли давлат органлари ва ташкилотларидан мустақил равишда, шу жумладан, «Электрон ҳукумат» тизими идоралараро интеграциялашув платформаси орқали сўраб олинади:

паспорт (идентификацияловчи ID-карта) ёки шахсни тасдиқловчи бошқа ҳужжатлар;

талабгорнинг белгиланган шаклдаги фотосурати;

экология ва атроф-муҳитни муҳофаза қилиш соҳасига оид (биолог, геолог, гидролог муҳандис, ер годезия ва картографияси муҳандиси, шунингдек, сув, атмосфера, ер ва ер ости бойликлари муҳофазаси мутахассисликлари) олий маълумот тўғрисидаги диплом ёки олий маълумот ҳақидаги хорижий ҳужжатни тан олиш тўғрисида ваколатли давлат органининг гувоҳномаси нусхаси;

иш стажи тўғрисидаги маълумотлар;

жисмоний шахсларнинг фамилияси ва (ёки) исми ўзгартирилган бўлса, бу ҳақидаги маълумотлар.

Давлат хизматлари маркази ва ваколатли орган ўртасида ахборот алмашинуви ЭРИни қўллаган ҳолда, фақат идоралараро электрон ҳамкорлик орқали амалга оширилади.

9. Талабгор давлат хизматлари марказига бевосита ўзи ёки ишончли вакили орқали мурожаат этганда, унинг анкетаси давлат хизматлари маркази ходими томонидан тўлдирилиб, талабгорнинг ЭРИси билан тасдиқлангандан сўнг реал вақт режимида, бироқ бир соатдан ошмаган вақт ичида, ЯИДХП орқали мурожаат қилганда эса автоматик тарзда ваколатли органга электрон шаклда юборилади.

10. Талабгорнинг малака сертификатини бериш тўғрисидаги мурожаатини кўриб чиқиш бўйича давлат хизмати кўрсатилганлиги учун базавий ҳисоблаш миқдорининг бир баравари миқдорида йиғим (кейинги ўринларда — йигим) ундирилади.

Талабгор давлат хизмати кўрсатилиши учун ЯИДХП орқали мурожаат этган тақдирда, йиғим суммасининг 90 фоизи миқдорида йиғим ундирилади.

Йиғим суммаси қуйидаги тартибда тақсимланади:

а) давлат хизматлари маркази орқали мурожаат этилганда:

18 фоизи — Ўзбекистон Республикаси Адлия вазирлигининг Давлат хизматларини ривожлантириш жамғармасининг шахсий ғазна ҳисобварағига;

0,5 фоизи «Рақамли ҳукумат лойиҳаларини бошқариш маркази» давлат муассасасининг Иқтисодиёт ва молия вазирлиги ҳузуридаги Ғазначилик хизмати қўмитасидаги махсус ҳисобварағига;

қолган маблағлар — ваколатли органнинг бюджетдан ташқари жамғармасига;

б) ЯИДХП орқали мурожаат этилганда:

10 фоизи Ўзбекистон Республикаси Адлия вазирлигининг Давлат хизматларини ривожлантириш жамғармаси шахсий ғазна ҳисобварағига;

11,75 фоизи (шундан 0,5 фоизи ягона биллинг тизими орқали давлат хизмати кўрсатилганда) Рақамли технологиялар вазирлиги ҳузуридаги Рақамли технологияларни ривожлантириш жамғармасининг электрон ҳукумат ва рақамли иқтисодиётнинг идоралараро лойиҳаларини молиялаштириш бўйича махсус ҳисобварағига;

қолган маблағлар ваколатли органнинг ҳисобварағига ўтказилади.

Йиғим тўланганлиги ахборот-коммуникация тизимлари орқали тасдиқланади.

11. Талабгор давлат хизматларидан фойдаланишда уларни кўрсатишнинг ҳар қандай босқичида бош тортиш ҳуқуқига эга. Талабгор давлат хизматларидан фойдаланишдан бош тортганда, унинг анкетаси кўриб чиқилмасдан қолдирилади ва тўланган йиғим қайтарилмайди.

3-боб. Малака имтиҳонини топширишга рухсат бериш ёки рухсат беришни рад этиш тўғрисида қарорлар қабул қилиш тартиби

12. Ваколатли орган мурожаат келиб тушган кундан бошлаб ўн иш куни мобайнида талабгорга малака имтиҳонини топширишга рухсат бериш ёки рухсат беришни рад этиш тўғрисида қарор қабул қилади.

13. Рухсат бериш ёки рад этиш тўғрисида қабул қилинган қарор ҳақида ваколатли орган талабгорни уч иш куни ичида электрон шаклда хабардор қилади. Рухсат беришни рад этиш тўғрисида қарор қабул қилинган тақдирда, унинг асослари кўрсатилади.

Талабгор томонидан анкета тегишли равишда расмийлаштирилмаганлиги, йигим тўланмаганлиги, талабгорнинг ушбу Регламентнинг 5-бандида назарда тутилган талабларга мувофиқ келмаслиги, шунингдек, ушбу Регламентнинг 51-бандида назарда тутилган ҳолат талабгорга давлат хизматлари кўрсатилишини ҳамда малака имтиҳонини топширишга рухсат беришни рад этиш учун асос ҳисобланади.

Давлат хизматлари кўрсатишни бошқа асослар бўйича рад этиш тақиқланади.

14. Мурожаати рад этилган талабгор рад этиш учун сабаб бўлган камчиликларни бартараф этганидан сўнг ушбу Регламентда белгиланган тартибда ваколатли органга ўн иш кунида қайта мурожаат қилишга ҳақли.

Талабгор белгиланган муддатда қайта мурожаат қилганда йиғим ундирилмайди.

Талабгор ўн иш куни ўтгандан кейин мурожаат қилган тақдирда, мурожаат янгидан берилган деб ҳисобланади ва талабгордан йигим ундирилади.

15. Талабгорнинг аризасини қайта кўриб чиқишда илгари малака имтиҳонини топширишга рухсат беришни рад этиш тўғрисидаги хабарномада кўрсатилмаган янги асослар бўйича малака имтиҳонини топширишни рад этишга йўл қўйилмайди.

Малака имтиҳонини топширишга рухсат бериш тўғрисида қарор қабул қилинганда, ваколатли орган малака имтиҳонини топширишга рухсат берилган талабгорлар рўйхатини имтиҳон комиссиясига тақдим этади.

16. Ваколатли орган томонидан малака имтиҳонини топширишга рухсат берилганда, малака имтиҳонини ўтказиш санаси, вақти ва жойи тўғрисида имтиҳон ўтказилишидан камида ўн кун олдин тегишли давлат хизматлари марказига (ўзи мурожаат этганда) ёки талабгорга ЯИДХП орқали (электрон тарзда мурожаат этганда) электрон шаклда хабарнома юборилади.

Давлат хизматлари маркази ваколатли органдан электрон шаклда хабарнома келиб тушган кунда уни талабгорга анкетада кўрсатилган электрон манзил бўйича юборади. Давлат хизматлари маркази талабгорнинг сўровига кўра хабарномани қоғоз шаклида ҳам бериши лозим.

Малака имтиҳонини топширишга рухсат бериш рад этилган талабгорга ундирилган йиғим қайтарилмайди.

4-боб. Имтиҳон комиссияси

17. Малака имтиҳонини ташкил этиш ва ўтказиш учун ваколатли орган томонидан доимий фаолият юритувчи, жами тўққиз нафар аъзодан иборат таркибда имтиҳон комиссияси ташкил қилинади. Имтиҳон комиссияси раис, раис ўринбосари, комиссия аъзолари ва котибдан иборат бўлади.

Имтиҳон комиссияси таркибига ваколатли органнинг ходимлари ва бошқа давлат бошқаруви органлари ҳамда нодавлат нотижорат ташкилотларининг вакиллари жалб этилиши мумкин.

Имтиҳон комиссияси тўғрисидаги низом ва унинг шахсий таркиби ваколатли орган томонидан тасдиқланади.

18. Имтиҳон комиссияси куйидаги асосий функцияларни амалга оширади:

малака имтиҳонини ўтказиш тартибини тасдиқлаш;

малака имтиҳони саволларини тузиш;

малака имтиҳони ўтказиладиган сана, жой ва вақт бўйича таклиф тайёрлаш;

малака имтиҳонини ўтказиш;

малака имтиҳони натижаларини расмийлаштириш.

19. Имтиҳон комиссиясининг мажлислари зарурат бўлганда, лекин ҳар чоракда камида бир марта ўтказилади, талабгорлардан ариза келиб тушмаган ҳоллар бундан мустасно. Имтиҳон комиссиясининг котиби комиссия мажлисларини ташкил этиш ва ўтказиш учун масъул ҳисобланади.

Имтиҳон комиссиясининг мажлиси унинг аъзоларининг камида учдан икки қисми иштирок этган таркибда ва раис ёки раис ўринбосарининг иштирокида ўтказилади.

20. Имтиҳон комиссиясининг қарори баённома билан расмийлаштирилади. Баённома мажлисда раислик қилувчи томонидан тасдиқланади ва иштирок этган барча аъзолар томонидан имзоланади.

5-боб. Малака имтиҳонини ўтказиш тартиби

21. Малака имтиҳони камида уч нафар талабгордан иборат гуруҳнинг шаклланишига кўра, бироқ ҳар чоракда камида бир марта ўтказилади. Малака имтиҳонини ўтказиш санаси ваколатли орган томонидан белгиланади.

22. Малака имтиҳони тест кўринишида компьютер воситаси орқали олинади. Малака имтиҳонининг тест саволлари имтиҳон комиссияси томонидан тасдиқланади.

Малака имтиҳонининг тест саволларига киритилган соҳалар бўйича мавзулар ваколатли органнинг расмий веб-сайтига жойлаштирилади.

Имтиҳон комиссияси раисининг имзоси қўйилмаган тест саволлари ҳақиқий эмас деб ҳисобланади.

Малака имтиҳонининг тест саволлари мазмуни қонунчилик ҳужжатларига киритиладиган ўзгартириш ва қўшимчаларни ҳисобга олган ҳолда даврий равишда қайта кўриб чиқилади.

23. Талабгор томонидан шахсини тасдиқловчи ҳужжатлар (паспорт, идентификацияловчи ID-карта ёки шахсини тасдиқловчи бошқа ҳужжат) тақдим этилган тақдирда, унга малака имтиҳонини топшириш учун рухсат берилади. Ушбу ҳужжатлари бўлмаган ёки малака имтиҳонига кечиккан талабгор имтиҳонга келмаган ҳисобланади ва навбатдаги малака имтиҳонини топширишга рухсат берилган шахслар рўйхатига киритилади.

24. Малака имтиҳонининг тест саволлари қуйидаги йўналишлар бўйича жами 50 та назарий саволлардан иборат бўлади:

ўсимлик ва ҳайвонот дунёсини (шу жумладан, муҳофаза этиладиган табиий ҳудудларни) муҳофаза қилиш соҳасида — 10 та;

чиқиндилар билан боғлиқ ишларни амалга ошириш соҳасида — 10 та;

атмосфера ҳавосини муҳофаза қилиш соҳасида — 10 та;

сув ва ер ресурслари муҳофазаси соҳасида — 10 та;

экология ва атроф-муҳитни муҳофаза қилиш соҳасига тегишли техник жиҳатдан тартибга солиш соҳасидаги норматив ҳужжатлар бўйича — 10 та.

Ҳар битта тўғри жавоб учун бир балл берилади.

25. Малака имтиҳони натижаларини ижобий деб эътироф этиш учун асос бўладиган тўпланган баллар йиғиндиси 40 баллдан кам бўлмаслиги керак.

26. Малака имтиҳони ўтказилаётган вақтда қонунчилик ҳужжатлари ва йўриқнома материаллари, маълумотномалар ҳамда махсус адабиётлардан фойдаланиш, бошқа талабгорлар билан гаплашиш, шунингдек, алоқа воситаларидан фойдаланиш ман қилинади. Ушбу талабларни бузган талабгорларга малака имтиҳонини ўтказиш тартиби бузилганлиги бўйича далолатнома расмийлаштирилиб, улар аудиториядан чиқариб юборилади ҳамда малака имтиҳонини топширмаган деб ҳисобланади.

Малака имтиҳонида бегона шахсларнинг иштирок этишига рухсат берилмайди.

Малака имтиҳонининг шаффофлиги ва холислигини таъминлаш мақсадида малака имтиҳонини ўтказиш жараёни узлуксиз равишда видеоёзувга (овозли) туширилади ва ушбу видеоматериаллар ваколатли органда камида бир йил сақланади.

27. Малака имтиҳони натижалари имтиҳон ўтказилган куннинг ўзида эълон қилинади.

Малака имтиҳони натижалари имтиҳон ўтказилган санадан сўнг бир иш кунида имтиҳон комиссиясининг баённомаси билан расмийлаштирилади ҳамда ваколатли орган раҳбарига топширилади.

Имтиҳон комиссияси баённомасида қуйидагилар кўрсатилади:

имтиҳон комиссиясининг таркиби;

малака имтиҳонини муваффақиятли топширган талабгорлар рўйхати ва уларнинг тўплаган баллари;

малака имтиҳонини топшира олмаган талабгорлар рўйхати ва уларнинг тўплаган баллари.

28. Малака имтиҳонини ўтказиш бўйича ҳужжатлар (тест саволлари ва уларга жавоблар), шунингдек, имтиҳон комиссиясининг баённомалари ваколатли органда беш йил мобайнида сақланади.

29. Малака имтиҳонини топшира олмаган талабгор йиғимни тўлаш шарти билан малака имтиҳонини топшириш учун ҳужжатларни мазкур Регламентга мувофиқ қайта тақдим этишга ҳақлидир.

Малака имтиҳонини топшира олмаган талабгорларга йиғим қайтарилмайди.

6-боб. Малака сертификатини бериш тартиби

30. Имтиҳондан муваффақиятли ўтган шахсга ушбу Регламентга 3-иловага мувофиқ шакл бўйича экологик аудитор малака сертификати берилади.

31. Ваколатли орган имтиҳон комиссиясининг баённомаларини қабул қилиб олганидан сўнг бир иш куни мобайнида белгиланган тартибда QR-код қўйилган малака сертификатини расмийлаштиради ҳамда уни ўз ЭРИси билан тасдиқлаб, тегишли давлат хизматлари марказига (ўзи мурожаат этганда) ёки талабгорга ЯИДХП орқали (электрон тарзда мурожаат этганда) электрон шаклда юборади.

32. Давлат хизматлари маркази ваколатли органдан малака сертификати электрон шаклда келиб тушгандан сўнг ўн дақиқа мобайнида уни талабгорнинг электрон манзилига юборади ҳамда талабгорни бу ҳақда ахборот-коммуникация тизими орқали хабардор қилади. Давлат хизматлари марказига талабгор ўзи келиб мурожаат қилган тақдирда, талабгорнинг сўровига кўра унга малака сертификати электрон ёки қоғоз шаклида беради.

Малака сертификати ваколатли орган томонидан талабгорга ЯИДХП орқали электрон шаклда юборилганда, у автоматик равишда талабгорнинг электрон кабинетида намоён бўлади.

Малака сертификати ҳисобга олиш серияси ва рақамига эга бўлади ҳамда беш йил муддатга амал қилади.

7-боб. Апелляцияларни кўриб чиқиш

33. Малака имтиҳони натижаларига кўра қабул қилинган қарорлар натижаларидан норози бўлган талабгорлар малака имтиҳони натижалари эълон қилинган санадан бошлаб ўттиз календарь кун мобайнида ваколатли органга апелляция бериш ҳуқуқига эга. Апелляция ёзма шаклда тақдим этилади. Апелляцияни кўриб чиқиш муддати ўн беш иш кунидан ошмаслиги лозим.

34. Апелляцияни кўриб чиқиш учун ваколатли орган томонидан Апелляция комиссияси ташкил қилинади. Апелляция комиссияси таркиби ваколатли орган раҳбарининг буйруғи билан тасдиқланади. Апелляция комиссияси таркибига имтиҳон комиссияси таркибига кирган шахслар киритилмайди.

Апелляция комиссияси беш иш кунида берилган апелляцияни талабгор иштирокида кўриб чиқади. Апелляция комиссиясининг иши баённома билан расмийлаштирилади. Баённома апелляция комиссиясининг барча аъзолари ва талабгор томонидан имзоланади.

Апелляция комиссияси апелляцияни кўриб чиқиш натижалари бўйича қуйидаги қарорлардан бирини қабул қилади:

имтиҳон комиссиясининг қарорини ўзгаришсиз қолдириш ва апелляцияни қаноатлантиришни рад этиш;

имтиҳон комиссиясининг қарорини бекор қилиш ва малака сертификатини бериш тўғрисида.

35. Имтиҳон комиссиясининг қарорини ўзгаришсиз қолдириш ва апелляцияни қаноатлантиришни рад этиш тўғрисидаги қарор қуйидаги ҳолларда қабул қилинади:

апелляция ушбу Регламент талаблари бузилган ҳолда тақдим этилган бўлса;

апелляцияда келтирилган сабаблар ўз тасдиғини топмаса.

36. Имтиҳон комиссиясининг қарорини бекор қилиш ва малака сертификатини бериш тўғрисидаги қарор малака имтиҳони ушбу Регламент талаблари бузилган ҳолда ўтказилган тақдирда қабул қилинади.

37. Малака сертификатини бериш тўғрисида қарор қабул қилингандан сўнг ваколатли орган талабгорга малака сертификатини беради.

38. Қайта апелляцияга йўл қўйилмайди.

8-боб. Экологик аудиторларнинг малакасини ошириш

39. Экологик аудиторлар ҳар икки йилда бир марта экологик аудиторларнинг малака ошириш курсларидан ўтишлари шарт.

40. Экологик аудиторларнинг малакасини ошириш Марказий Осиё атроф-муҳит ва иқлим ўзгаришини ўрганиш университети ҳузуридаги Атроф-муҳитни муҳофаза қилиш соҳасида фаолият кўрсатаётган ходимларни қайта тайёрлаш ва уларнинг малакасини ошириш маркази ёки белгиланган тартибда аттестациядан ва давлат аккредитациясидан ўтган нодавлат таълим ташкилотлари (кейинги ўринларда — таълим ташкилотлари) томонидан шартнома асосида амалга оширилади.

41. Малака ошириш курслари ваколатли орган томонидан тасдиқланган ягона ўқув дастури асосида ташкил этилади.

42. Малака ошириш курслари якуни натижаларига кўра Экологик аудиторлар реестрига экологик аудиторларнинг малака оширганлиги тўғрисидаги тегишли маълумотлар киритилади. Бунда таълим ташкилотлари томонидан малака ошириш курсларини муваффақиятли тугатган экологик аудиторлар рўйхати малака ошириш курси тугаган кундан бошлаб уч иш кунидан кечиктирмай, Экологик аудиторлар реестрига тегишли ёзувлар киритиш учун ваколатли органга юборилади.

9-боб. Малака сертификатини қайта расмийлаштириш тартиби

43. Илгари берилган малака сертификатида кўрсатилган маълумотлар ўзгарган тақдирда, талабгор малака сертификатини қайта расмийлаштириш учун ўн иш кунида давлат хизматлари марказига бевосита ўзи ёки ишончли вакили орқали мурожаат қилади ёхуд ЯИДХП орқали электрон шаклдаги тегишли мурожаат юборади.

Анкетага киритилган маълумотларнинг ҳаққонийлиги ахборот тизимлари ёрдамида автоматик равишда текширилади.

44. Анкетада хато маълумотлар кўрсатилган тақдирда, мурожаат автоматик равишда рад этилади ҳамда бу ҳақда талабгорга онлайн тарзда электрон шаклда жавоб қайтарилади.

45. Ваколатли орган талабгорнинг мурожаати келиб тушган кундан бошлаб беш иш кунидан кўп бўлмаган муддатда дастлаб берилган малака сертификатининг рақами ва амал қилиш муддати билан малака сертификатини қайта расмийлаштиради ҳамда ушбу Регламентнинг 31-бандида белгиланган тартибда талабгорга юборади.

46. Ваколатли орган малака сертификатини қайта расмийлаштиришда реестрга тегишли ўзгартиришлар киритади.

47. Малака сертификатини қайта расмийлаштириш учун талабгор қайта имтиҳондан ўтказилмайди ва йиғим ундирилмайди.

48. Малака сертификатининг эгаси ушбу сертификат қайта расмийлаштирилгунга қадар унда кўрсатилган фаолиятни илгари берилган малака сертификати асосида амалга оширади.

10-боб. Малака сертификатини бекор қилиш тартиби

49. Малака сертификати қуйидаги ҳолларда бекор қилинади:

малака сертификати эгаси томонидан сертификатни бекор қилиш тўғрисида мурожаат этилганда;

малака сертификати эгаси вафот этганда;

малака сертификати эгаси ўз вақтида малака ошириш курсидан ўтмаганда;

малака сертификати эгасини белгиланган тартибда муомалага лаёқатсиз ёки муомала лаёқати чекланган деб топиш тўғрисидаги суд қарори қонуний кучга кирганда;

ваколатли органнинг малака сертификатини бериш тўғрисидаги қарори қонунга хилоф эканлиги исботланганда;

малака сертификати эгаси томонидан экологик аудит хизматидаги фаолияти мобайнида олинган махфий ахборот хўжалик юритувчи субъект раҳбарининг ёзма рухсатисиз учинчи шахсларга тақдим этилганда, қонунчилик ҳужжатларида назарда тутилган ҳолатлар бундан мустасно;

малака сертификати қалбаки ҳужжатлардан фойдаланган ҳолда олинганлиги исботланганда;

малака сертификати эгаси сохта экологик аудит хулосасини тузганлиги исботланганда.

50. Ушбу Низомнинг 49-банди иккинчи — бешинчи хатбошиларида назарда тутилган ҳолларда малака сертификати ваколатли органнинг қарорига мувофиқ бекор қилинади.

Мазкур Низомнинг 49-банди олтинчи — тўққизинчи хатбошиларида назарда тутилган ҳолларда малака сертификати суд томонидан бекор қилинади. Ваколатли орган малака сертификатини бекор қилиш тўғрисида судга ариза билан мурожаат қилган кундан эътиборан бир иш кунидан кечиктирмай, малака сертификатини бекор қилиш ҳақида ариза билан судга мурожаат қилиш асосларини, қонунчиликнинг аниқ нормаларини кўрсатган ҳолда бу ҳақда малака сертификатини олган шахсни ёзма шаклда хабардор қилади.

51.Ушбу Низомнинг 49-банди еттинчи — тўққизинчи хатбошиларида назарда тутилган асослар бўйича малака сертификати бекор қилинган шахс ушбу малака сертификатини бекор қилиш ҳақидаги суд қарори қонуний кучга кирган пайтдан бошлаб уч йил мобайнида малака сертификатини қайта олиш учун малака имтиҳонини топширишга қўйилмайди.

52. Малака сертификатининг бекор қилинганлиги тўғрисидаги маълумотлар ваколатли органнинг расмий веб-сайтида эълон қилинади.

11-боб. Экологик аудиторлар реестрини юритиш тартиби

53. Ваколатли орган Экологик аудиторлар реестрини юритади ҳамда унда экологик аудиторлар тўғрисида қуйидаги маълумотлар кўрсатилади:

фамилияси, исми, отасининг исми;

паспорт ёки идентификацияловчи ID-карта маълумотлари ва яшаш манзили;

иш жойи;

малака сертификатининг серияси, рақами, берилган санаси ва амал қилиш муддати;

малака ошириш курсларидан ўтганлиги тўғрисидаги маълумотлар;

малака сертификатини қайта расмийлаштириш ва бекор қилиш тўғрисидаги маълумотлар;

ваколатли орган зарур деб ҳисоблайдиган бошқа қўшимча маълумотлар.

54. Экологик аудиторлар реестридаги қуйидаги маълумотлар ваколатли органнинг расмий веб-сайтига жойлаштирилади ҳамда барчанинг танишиши учун очиқ ҳисобланади:

экологик аудиторнинг фамилияси, исми ва отасининг исми;

малака сертификатининг серияси, рақами, берилган санаси ва амал қилиш муддати;

экологик аудиторлар малака оширганлиги тўғрисидаги маълумотлар;

малака сертификатини қайта расмийлаштириш ва бекор қилиш тўғрисидаги маълумотлар.

12-боб. Якунловчи қоидалар

55. Ўзбекистон Республикаси Адлия вазирлиги, унинг ҳудудий бошқармалари ва давлат хизматлари марказлари ушбу Регламентнинг талаблари ижроси бўйича давлат органлари ва бошқа ташкилотларнинг фаолиятини доимий назорат қилади ва мониторинг олиб боради.

56. Талабгор давлат органлари ва бошқа ташкилотлар ходимларининг хатти-ҳаракатлари юзасидан қонунчилик ҳужжатларида белгиланган тартибда шикоят қилиши мумкин.

57. Ушбу Регламент талабларининг бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Экологик аудиторнинг малака сертификатини бериш бўйича давлат хизматларини кўрсатишнинг маъмурий регламентига 1-ИЛОВА

Экологик аудиторнинг малака сертификатини бериш бўйича давлат хизматларини кўрсатиш

Босқичлар Субъектлар Тадбирлар Бажариш муддатлари 1-босқич Талабгор Малака сертификатини олиш учун давлат хизматлари марказига ўзи келган ҳолда ёки электрон шаклда ЯИДХП орқали мурожаат қилади. Талабгорнинг хоҳишига кўра 2-босқич Давлат хизматлари маркази ёки ЯИДХП Талабгор давлат хизматлари марказига мурожаат этганда, унинг анкетаси давлат хизматлари маркази ходими томонидан тўлдирилиб, талабгорнинг ЭРИси билан тасдиқлангандан сўнг ёки ЯИДХП орқали мурожаат қилганда — анкета талабгор томонидан мустақил равишда тўлдирилиб, сўнг ваколатли органга электрон шаклда юборилади. Давлат хизматлари маркази орқали мурожаат қилинганда реал вақт режимида, бироқ бир соатдан ошмаган вақтда, ЯИДХП орқали эса автоматик тарзда 3-босқич Экология, атроф-муҳитни муҳофаза қилиш ва иқлим ўзгариши вазирлиги (ваколатли орган) 1. Талабгорга малака имтиҳонини топширишга рухсат бериш ёки рухсат беришни рад этиш тўғрисида қарор қабул қилади. 1. Мурожаат электрон кўринишда келиб тушган кундан бошлаб ўн иш кунида 2. Рухсат бериш ёки рад этиш тўғрисидаги қарор ҳақида ваколатли орган талабгорни электрон шаклда хабардор қилади. 2. Қарор қабул қилинган санадан кейин уч иш кунида 3. Малака имтиҳонини топширишга рухсат берилган талабгорлар, малака имтиҳонини ўтказиш санаси, вақти ва жойи тўғрисида тегишли давлат хизматлари марказига (ўзи мурожаат этганда) ёки талабгорга ЯИДХП орқали (электрон тарзда мурожаат этганда) электрон шаклда хабарнома юборади. 3. Малака имтиҳони ўтказилишидан камида ўн кун олдин Давлат хизматлари маркази 4. Ваколатли органдан келиб тушган электрон шаклдаги хабарномани талабгорга анкетада кўрсатилган электрон почта манзили бўйича юборади ва талабгорни бу ҳақда ахборот-коммуникация тизими орқали хабардор қилади. 4. Ваколатли орган томонидан электрон шаклда хабарнома келиб тушган кунда 4-босқич Талабгор Белгиланган сана ва вақтда шахсини тасдиқловчи ҳужжат билан (паспорт, идентификацияловчи ID-карта ёки шахсини тасдиқловчи бошқа ҳужжат) билан имтиҳон ўтказиладиган жойга етиб келади. Имтиҳон ўтказиш санаси уч нафар талабгордан иборат гуруҳнинг шаклланишига кўра, лекин камида уч ойда бир марта белгиланади 5-босқич Ваколатли орган ҳузурида ташкил этиладиган имтиҳон комиссияси 1. Малака имтиҳонини ўтказади ва имтиҳон натижаларини эълон қилади. 1. Имтиҳон ўтказилиши белгиланган куни 2. Малака имтиҳони натижаларини баённома билан расмийлаштиради ва ваколатли органга топширади. 2. Бир иш кунида 6-босқич Ваколатли орган 1. QR-код қўйилган малака сертификатини расмийлаштиради ва уни ЭРИси билан тасдиқлаб, тегишли давлат хизматлари марказига (ўзи мурожаат этганда) ёки талабгорга ЯИДХП орқали (электрон тарзда мурожаат этганда) электрон шаклда юборади. 1. Имтиҳон комиссиясининг баённомаси қабул қилиб олингандан сўнг кейинги бир иш куни мобайнида Давлат хизматлари марказлари ёки ЯИДХП 2. Малака сертификатини электрон шаклда талабгорнинг электрон почта манзилига юборади ва талабгорни бу ҳақда ахборот-коммуникация тизими орқали хабардор қилади. 2. Малака сертификати электрон шаклда келиб тушгандан сўнг ўн дақиқа мобайнида 3. Давлат хизматлари марказига талабгор ўзи келиб мурожаат қилган тақдирда, талабгорнинг сўровига кўра унга малака сертификатини электрон ёки қоғоз шаклда беради. 3. Талабгорнинг сўровига кўра

Экологик аудиторнинг малака сертификатини бериш бўйича давлат хизматларини кўрсатишнинг маъмурий регламентига 2-ИЛОВА

АНКЕТА фотосурат (электрон ҳамкорлик асосида маълумотлар базасидан олинади) Анкетани тўлдириш қоидалари: анкета электрон шаклда тўлдирилади; барча саналар араб сонларида келтирилади; анкетанинг барча саволларига тўлиқ жавоб берилиши лозим; анкетанинг барча қаторлари тўлдирилиши лозим (тўлдирилмаган қаторнинг мавжудлиги бутун анкетанинг тўлдирилмаганлигини англатади). Т/р Талабгор тўғрисидаги маълумотлар 1. Фамилияси (ўзгарган бўлса, ёзилиши керак) 2. Исми (ўзгарган бўлса, ёзилиши керак) 3. Отасининг исми (ўзгарган бўлса, ёзилиши керак) 4. Тугилган йили ва санаси автоматик тўлдирилади 5. Доимий яшаш жойи бўйича рўйхатга олинган манзил автоматик тўлдирилади 6. Паспорти ёки идентификацияловчи ID-картасининг серияси ва рақами автоматик тўлдирилади 7. Электрон почта манзили (мавжуд бўлса) 8. Телефон рақами Талабгорнинг электрон рақамли имзоси

Экологик аудиторнинг малака сертификатини бериш бўйича давлат хизматларини кўрсатишнинг маъмурий регламентига 3-ИЛОВА

Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги Ҳужжат рақами: Ҳужжат яратилган сана: ЭКОЛОГИК АУДИТОРНИНГ МАЛАКА СЕРТИФИКАТИ ЖШШИР: _______________________ Фотосурат (электрон ҳамкорлик асосида маълумотлар базасидан олинади) Ф.И.О.: _______________________ Паспорт (идентификацияловчи ID-карта) серия рақами: _______________________ Қачон берилган: _______________________ Сертификатнинг амал қилиш муддати: _______________________ ______________________________________________ 0000 (Ваколатли орган мансабдор шахсининг Ф.И.О.) Мазкур ҳужжат Вазирлар Маҳкамасининг 2017 йил 15 сентябрдаги 728-сон қарори билан тасдиқланган Ўзбекистон Республикаси Ягона интерактив давлат хизматлари портали тўғрисидаги низомга мувофиқ шакллантирилган электрон ҳужжатнинг нусхаси ҳисобланади. Электрон ҳужжатнинг нусхасида кўрсатилган маълумотлар тўғрилигини текшириш учун repo.gov.uz веб-сайтига ўтинг ва электрон ҳужжатнинг ноёб рақамини киритинг ёки мобил телефон ёрдамида QR-кодни сканер қилинг. Диққат! Вазирлар Маҳкамасининг 2017 йил 15 сентябрдаги 728-сон қарорига мувофиқ электрон ҳужжатлардаги маълумотлар қонуний ҳисобланади. Давлат органларига Ягона интерактив давлат хизматлари порталида шакллантирилган электрон ҳужжатларнинг нусхаларини қабул қилишни рад этиши қатъиян тақиқланган. QR-код

Вазирлар Маҳкамасининг 2023 йил 19 августдаги 402-сон қарорига 2-ИЛОВА

Экологик аудиторлик ташкилотлари реестрини юритиш тартиби тўғрисида

1-боб. Умумий қоидалар

1. Мазкур Низом Экологик аудиторлик ташкилотлари реестрини (кейинги ўринларда — Реестр) шакллантириш ва юритиш тартибини белгилайди.

2. Мазкур Низомда қуйидаги асосий тушунчалардан фойдаланилади:

ваколатли орган — Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги;

экологик аудитор — экологик аудиторнинг малака сертификатига эга бўлган жисмоний шахс;

экологик аудиторлик ташкилоти — экологик аудиторлик фаолиятини амалга оширувчи юридик шахс.

3. Реестрга киритиш ваколатли орган томонидан бепул амалга оширилади.

2-боб. Реестрни шакллантириш ва юритишнинг асосий вазифалари

4. Реестрни шакллантириш ва юритишнинг асосий вазифалари қуйидагилардан иборат:

экологик аудиторлик ташкилотлари рўйхатини шакллантириш ва манфаатдор шахслар учун улар тўғрисидаги маълумотлардан электрон фойдаланиш имкониятини яратиш;

экологик аудиторлик ташкилотлари томонидан экологик аудиторлик хизматларини кўрсатиш ҳақидаги маълумотларнинг ягона электрон базасини яратиш;

экологик аудиторлик ташкилотларининг ҳолати ва салоҳияти тўғрисидаги маълумотларни тизимли жамлаб бориш;

экологик аудиторлик ташкилотларининг қонунчилик ҳужжатларида белгиланган талабларга мувофиқлиги тўғрисидаги маълумотлар мониторингини юритиш имкониятини яратиш.

3-боб. Реестрни шакллантириш тартиби

5. Реестрни шакллантириш ва тизимли юритиш ваколатли орган раҳбарининг буйруғи билан белгиланган масъул ходим (кейинги ўринларда — масъул ходим) томонидан амалга оширилади.

Экологик аудиторлик ташкилоти давлат рўйхатидан ўтказилгандан кейин Реестрга киритиш ҳақида ваколатли органга мазкур Низомга иловага мувофиқ шакл бўйича ариза билан ихтиёрий равишда мурожаат қилади.

6. Ариза экологик аудиторлик ташкилоти томонидан бевосита, почта орқали ёки электрон шаклда ваколатли органнинг электрон ёки почта манзилига олинганлиги тўғрисида хабардор қилиш шарти билан тақдим этилади. Электрон шаклда тақдим этилган ҳужжатлар электрон рақамли имзо билан тасдиқланади.

7. Экологик аудиторлик ташкилотининг аризаси ваколатли орган томонидан қабул қилингандан сўнг беш иш куни ичида кўриб чиқилади.

8. Экологик аудиторлик ташкилоти томонидан тақдим этилган аризада:

камчиликлар мавжуд бўлмаган тақдирда, масъул ходим томонидан имзоланган ҳамда ваколатли орган раҳбари томонидан тасдиқланган хулосага асосан экологик аудиторлик ташкилоти Реестрга киритилади ва экологик аудиторлик ташкилотига унинг Реестрга киритилганлиги ҳақида (реестр рақамини кўрсатган ҳолда) хабарнома юборилади;

камчиликлар мавжудлиги аниқланган тақдирда, уч иш кунида ваколатли орган бу ҳақда асосларни кўрсатган ҳолда, экологик аудиторлик ташкилотини ёзма равишда хабардор қилади.

9. Экологик аудиторлик ташкилоти томонидан Реестрга киритмасликка асос бўлган камчиликлар бартараф этилганда, аризани қабул қилишда такроран рад қилинишига йўл қўйилмайди.

4-боб. Реестрни юритиш тартиби

10. Реестр электрон маълумотлар базаси шаклида ваколатли органнинг расмий веб-сайтига жойлаштириш орқали юритилади.

Реестрнинг шакли ваколатли орган томонидан тасдиқланади.

11. Реестрда экологик аудиторлик ташкилоти тўғрисида қуйидаги маълумотлар кўрсатилади:

давлат рўйхатига олиш рақами;

солиқ тўловчининг идентификация рақами (СТИР);

жойлашган ери (почта манзили);

телефони рақами;

электрон почта манзили ва расмий веб-сайти (агар мавжуд бўлса);

экологик аудиторларнинг жамоат бирлашмаларига аъзолиги (агар аъзо бўлса);

ташкилот раҳбари ва экологик аудиторларнинг фамилияси, исми, отасининг исми;

экологик аудиторнинг малака сертификати берилган санаси, рақами ва амал қилиш муддати;

экологик аудиторлик ташкилотининг Реестрга киритилган санаси;

экологик аудиторлик ташкилотининг Реестрдан чиқарилиш асослари ва санаси (агар мавжуд бўлса).

Реестрга киритилиши зарур бўлган маълумотлар экологик аудиторлик ташкилотлари аризасида кўрсатилган, шунингдек, ваколатли орган томонидан ўзаро маълумот ахборот ҳамкорлиги орқали белгиланган тартибда олинадиган бошқа ваколатли органлардаги қўшимча маълумотлар асосида мустақил юритилади.

12. Реестрга киритилган маълумотлар ўзгарган тақдирда, экологик аудиторлик ташкилоти томонидан ушбу ўзгаришлар ҳақида ўн иш кунида ваколатли органга ўзгаришларни тасдиқловчи маълумотлар тақдим этилиши лозим. Бундай маълумотлар ваколатли органга тақдим этилганда, беш иш кунида масъул ходим томонидан имзоланган ҳамда ваколатли орган раҳбари томонидан тасдиқланган хулоса асосида Реестрга ўзгартиришлар киритилади.

13. Экологик аудиторлик ташкилоти қуйидаги ҳолларда Реестрдан чиқарилиши мумкин:

экологик аудиторлик ташкилоти томонидан Реестрдан ихтиёрий чиқариш тўғрисида ёзма мурожаат қилинганда;

экологик аудиторлик ташкилотининг фаолият тури ўзгарганда;

экологик аудиторлик ташкилоти тугатилганда;

экологик аудиторлик ташкилотининг қонунчилик ҳужжатларида экологик аудиторлик ташкилотига қўйилган талабларга мувофиқ эмаслиги аниқланганда.

14. Масъул ходим томонидан имзоланган ҳамда ваколатли орган раҳбари томонидан тасдиқланган тегишли хулоса санаси Реестрга киритиш ёки ундан чиқариш санаси ҳисобланади.

15. Реестрни юритиш давомида тўпланган барча ҳужжатлар ваколатли органда беш йил мобайнида сақланади.

5-боб. Реестрдан маълумотлар тақдим этиш

16. Ваколатли органнинг расмий веб-сайтига жойлаштирилган Реестр маълумотлари барча фойдаланиши учун очиқ ҳисобланади.

17. Реестрдан маълумотлар манфаатдор шахсларнинг мурожаатларига асосан ҳам берилиши мумкин.

6-боб. Якунловчи қоидалар

18. Ваколатли орган маълумотларнинг Реестрга тўғри ва ўз вақтида киритилиши ҳамда ундан доимий равишда маълумотлар олиш имкониятининг яратилиши учун масъул ҳисобланади.

19. Мазкур Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Экологик аудиторлик ташкилотлари реестрини юритиш тартиби тўғрисидаги низомга ИЛОВА

Ўзбекистон Республикаси экология, атроф-муҳитни муҳофаза қилиш ва иқлим ўзгариши вазирига ________________________га (Ф.И.О) __________________________дан (ариза берувчи Ф.И.О) Экологик аудиторлик ташкилотлари реестрига киритиш учун АРИЗА Сиздан ___________________________________________________________ ни Сиздан __________ (экологик аудиторлик ташкилотининг тўлиқ номи) ____________ ни Экологик аудиторлик ташкилотлари реестрига киритишингизни сўрайман. Экологик аудиторлик ташкилоти тўғрисида қуйидаги маълумотларни тасдиқлайман: жойлашган ери (почта манзили) ______________________________________ телефон рақами (коди билан) _________________________________________ СТИР рақами ______________________________________________________ электрон почта манзили (мавжуд бўлса) ________________________________ расмий веб-сайти (мавжуд бўлса) _____________________________________ экологик аудиторларнинг жамоат бирлашмаларига аъзолиги (агар аъзо бўлса) __________________________ _ (жамоат бирлашмаси номи) экологик аудиторларнинг малака сертификати рақамлари 1) _____________________ 2) _____________________ _______________________ Ташкилот раҳбари имзо ёки электрон рақамли имзо ўрин ______________________ (Ф.И.О)

Вазирлар Маҳкамасининг 2023 йил 19 августдаги 402-сон қарорига 3-ИЛОВА

Ўзбекистон Республикаси Ҳукуматининг айрим қарорларига киритилаётган ўзгартиришлар

1. Вазирлар Маҳкамасининг «Экологик назорат соҳасидаги норматив-ҳуқуқий ҳужжатларни тасдиқлаш ҳақида» 2015 йил 8 октябрдаги 286-сон қарорида :

а) 1-банднинг тўртинчи ва бешинчи хатбошилари қуйидаги мазмундаги тўртинчи хатбоши билан алмаштирилсин:

«Экологик хизмат тўғрисидаги намунавий низом 3-иловага мувофиқ тасдиқлансин.»;

б) 4-илова ўз кучини йўқотган деб ҳисоблансин.

2. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартиришлар киритиш тўғрисида» 2017 йил 14 ноябрдаги 915-сон қарорига 1-илова 65-бандининг «г» кичик банди ўз кучини йўқотган деб ҳисоблансин.

3. Вазирлар Маҳкамасининг «Давлат бошқаруви ва маҳаллий давлат ҳокимияти органларида хизмат автотранспорт воситаларидан фойдаланиш тизимини тубдан такомиллаштириш чора-тадбирлари тўғрисида» 2021 йил 29 апрелдаги 258-сон қарорига 1-илова изоҳининг тўққизинчи хатбошиси қуйидаги мазмундаги тўққизинчи-ўнинчи хатбошилар билан алмаштирилсин:

«****** Мактабгача ва мактаб таълими, Қишлоқ хўжалиги, Сув хўжалиги, Қурилиш ва уй-жой коммунал хўжалиги, Иқтисодиёт ва молия, Камбағалликни қисқартириш ва бандликка кўмаклашиш, Оила ва хотин-қизлар қўмитаси, Агросаноат мажмуи устидан назорат қилиш инспекцияси, Кадастр ва Адлия бўлимларига, шунингдек, Солиқ инспекцияларига 1 тадан навбатчи хизмат автотранспорт воситалари белгиланади.

Ушбу иловада белгиланган энг юқори нарх (базавий ҳисоблаш миқдорига нисбатан) меъёрлари давлат бошқаруви ва маҳаллий давлат ҳокимияти органлари томонидан харид қилинадиган электродвигателли ва гибрид қувватли автотранспорт воситаларига нисбатан ҳам татбиқ этилади».

Ўзбекистон Республикасининг Бош вазири А. АРИПОВ

Тошкент ш.,

2023 йил 19 август,

402-сон

(Қонунчилик маълумотлари миллий базаси, 21.08.2023 й., 09/23/402/0632-сон)

lex.uz

Oʻzbekiston Respublikasi Vazirlar Mahkamasining

qarori

MAʼMURIY REGLAMENTI

SXEMASI

NIZOM

Ekologik audit sohasini tartibga soluvchi ayrim normativ-huquqiy hujjatlarni tasdiqlash toʻgʻrisida

Oʻzbekiston Respublikasining “Ekologik audit toʻgʻrisida”gi Qonuniga muvofiq, shuningdek, ishlab chiqarishning ekologik nazoratini amalga oshirishda ekologik audit faoliyatini samarali tashkil qilish hamda ekologik auditorlik xizmati sohasini malakali mutaxassislar bilan taʼminlash maqsadida Vazirlar Mahkamasi qaror qiladi:

1. Oʻzbekiston Respublikasining “Ekologik audit toʻgʻrisida”gi Qonuniga muvofiq:

atrof-muhitga taʼsir koʻrsatish xavfi kam boʻlgan yoki unchalik koʻp boʻlmagan (lokal taʼsirga ega) ekologik audit subyektlarining faoliyatiga nisbatan ekologik audit ixtiyoriy tartibda oʻtkazilishi;

atrof-muhitga yuqori va oʻrtacha taʼsir koʻrsatish xavfiga ega boʻlgan ekologik audit subyektlari har yilgi majburiy ekologik auditdan oʻtkazilishi;

ekologik auditorlik faoliyati ekologik auditorlik tashkiloti tomonidan amalga oshirilishi;

ekologik auditorlik tashkiloti shtatida asosiy ish joyi ekologik auditorlik tashkiloti boʻlgan kamida toʻrt nafar ekologik auditor mavjud boʻlishini taʼminlanishi shartligi;

ekologik auditorga unda ekologik auditorning malaka sertifikati mavjud boʻlishi talabi qoʻyilganligi maʼlumot uchun qabul qilinsin.

2. Belgilansinki:

ekologik auditorning malaka sertifikatini berish uchun malaka imtihonini tashkil etish, malaka sertifikatini berish, ekologik auditorlar va ekologik auditorlik tashkilotlarining reyestrlarini yuritish boʻyicha Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi (keyingi oʻrinlarda — Ekologiya vazirligi) vakolatli organ hisoblanadi;

malaka imtihonini tashkil etish va oʻtkazish uchun Ekologiya vazirligi huzurida imtihon komissiyasi tashkil etiladi.

3. Quyidagilar:

Ekologik auditorning malaka sertifikatini berish boʻyicha davlat xizmatlarini koʻrsatishning maʼmuriy reglamenti 1-ilovaga muvofiq;

Ekologik auditorlik tashkilotlari reyestrini yuritish tartibi toʻgʻrisidagi nizom 2-ilovaga muvofiq tasdiqlansin.

4. Ekologiya vazirligi:

bir hafta muddatda imtihon komissiyasining shaxsiy tarkibi va uning nizomi tasdiqlanishini;

ikki hafta muddatda Oʻzbekiston Respublikasi Raqamli texnologiyalar vazirligi bilan birgalikda ekologik auditorning malaka sertifikatini berish boʻyicha davlat xizmatlari Yagona interaktiv davlat xizmatlari portaliga integratsiya qilinishini;

ekologik auditorlar va ekologik auditorlik tashkilotlarining reyestrlari Ekologiya vazirligining rasmiy veb-saytiga joylashtirib borilishini taʼminlasin.

5. Oʻzbekiston Respublikasi Hukumatining ayrim qarorlariga 3-ilovaga muvofiq oʻzgartirishlar kiritilsin.

6. Ekologiya vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda mazkur qarorga muvofiqlashtirsin.

7. Mazkur qarorning bajarilishini nazorat qilish Oʻzbekiston Respublikasi ekologiya, atrof-muhitni muhofaza qilish va iqlim oʻzgarishi vaziri A.A. Abduxakimov zimmasiga yuklansin.

Vazirlar Mahkamasining 2023-yil 19-avgustdagi 402-son qaroriga 1-ILOVA

Ekologik auditorning malaka sertifikatini berish boʻyicha davlat xizmatlarini koʻrsatishning

1-bob. Umumiy qoidalar

1. Mazkur Maʼmuriy reglament (keyingi oʻrinlarda — Reglament) ekologik auditorning malaka sertifikatini berish, qayta rasmiylashtirish boʻyicha davlat xizmatlarini koʻrsatish tartibini belgilaydi.

2. Ushbu Reglamentda quyidagi asosiy tushunchalardan foydalaniladi:

vakolatli organ — Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi;

talabgor — malaka sertifikatini olish uchun murojaat qilgan Oʻzbekiston Respublikasi fuqarosi;

ekologik auditor — ekologik auditorning malaka sertifikatiga ega boʻlgan jismoniy shaxs;

ekologik auditorning malaka sertifikati (keyingi oʻrinlarda — malaka sertifikati) — ekologik auditorning malakasini tasdiqlovchi va ekologik auditorlik faoliyatini amalga oshirish huquqini beruvchi hujjat;

Ekologik auditorlar reyestri — vakolatli organning rasmiy veb-saytiga joylashtiriladigan ekologik auditorning malaka sertifikatiga ega boʻlgan ekologik auditorlar roʻyxati.

3. Malaka sertifikatini berish va qayta rasmiylashtirish boʻyicha xizmatlar davlat xizmatlari markazi yoki Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali koʻrsatiladi.

4. Ekologik auditorning malaka sertifikati ushbu Reglamentga 1-ilovaga muvofiq sxema boʻyicha beriladi.

5. Malaka sertifikatini olish uchun talabgor quyidagi talablarga javob berishi kerak:

ekologiya va atrof-muhitni muhofaza qilish sohasiga oid (biolog, geolog, gidrolog muhandis, yer geodeziya va kartografiyasi muhandisi, shuningdek, suv, atmosfera, yer va yer osti boyliklari muhofazasi mutaxassisliklari) oliy maʼlumotga;

atrof-muhitni muhofaza qilish sohasida yoki turdosh sohalarda ketma-ket kamida uch yillik ish tajribasiga ega boʻlish.

2-bob. Malaka sertifikatini berish boʻyicha davlat xizmatlarini koʻrsatish tartibi

6. Talabgor malaka sertifikatini berish boʻyicha davlat xizmatlaridan foydalanish uchun davlat xizmatlari markaziga bevosita oʻzi yoki ishonchli vakili orqali murojaat etadi yoxud YIDXPda davlat xizmatlaridan elektron shaklda foydalanish uchun roʻyxatdan oʻtadi.

7. Talabgor davlat xizmatlari markaziga bevosita oʻzi yoki ishonchli vakili orqali murojaat etgan taqdirda, davlat xizmatlari markazi xodimi talabgor nomidan, YIDXP orqali murojaat qilgan hollarda esa mustaqil ravishda ushbu Reglamentga 2-ilovaga muvofiq shakldagi anketani elektron shaklda toʻldiradi.

Anketa davlat xizmatlari markazi xodimi tomonidan toʻldirilganda, talabgor undagi maʼlumotlarning toʻgʻriligini tekshirgandan soʻng, uni oʻz elektron raqamli imzosi (keyingi oʻrinlarda — ERI) bilan tasdiqlaydi.

Davlat xizmatlari markazi ariza beruvchi oʻz ERIsini shu joyning oʻzida olishi uchun barcha zarur sharoitlarni taʼminlashi shart.

Anketani ERI bilan tasdiqlash imkoniyati boʻlmagan hollarda, tegishli maʼlumot identifikatsiya qilishning boshqa vositalari (daktiloskopiya, elektron imzo va boshqalar) bilan ham tasdiqlanishi mumkin.

8. Quyidagi hujjatlar vakolatli organ tomonidan tegishli davlat organlari va tashkilotlaridan mustaqil ravishda, shu jumladan, “Elektron hukumat” tizimi idoralararo integratsiyalashuv platformasi orqali soʻrab olinadi:

pasport (identifikatsiyalovchi ID-karta) yoki shaxsni tasdiqlovchi boshqa hujjatlar;

talabgorning belgilangan shakldagi fotosurati;

ekologiya va atrof-muhitni muhofaza qilish sohasiga oid (biolog, geolog, gidrolog muhandis, yer godeziya va kartografiyasi muhandisi, shuningdek, suv, atmosfera, yer va yer osti boyliklari muhofazasi mutaxassisliklari) oliy maʼlumot toʻgʻrisidagi diplom yoki oliy maʼlumot haqidagi xorijiy hujjatni tan olish toʻgʻrisida vakolatli davlat organining guvohnomasi nusxasi;

ish staji toʻgʻrisidagi maʼlumotlar;

jismoniy shaxslarning familiyasi va (yoki) ismi oʻzgartirilgan boʻlsa, bu haqidagi maʼlumotlar.

Davlat xizmatlari markazi va vakolatli organ oʻrtasida axborot almashinuvi ERIni qoʻllagan holda, faqat idoralararo elektron hamkorlik orqali amalga oshiriladi.

9. Talabgor davlat xizmatlari markaziga bevosita oʻzi yoki ishonchli vakili orqali murojaat etganda, uning anketasi davlat xizmatlari markazi xodimi tomonidan toʻldirilib, talabgorning ERIsi bilan tasdiqlangandan soʻng real vaqt rejimida, biroq bir soatdan oshmagan vaqt ichida, YIDXP orqali murojaat qilganda esa avtomatik tarzda vakolatli organga elektron shaklda yuboriladi.

10. Talabgorning malaka sertifikatini berish toʻgʻrisidagi murojaatini koʻrib chiqish boʻyicha davlat xizmati koʻrsatilganligi uchun bazaviy hisoblash miqdorining bir baravari miqdorida yigʻim (keyingi oʻrinlarda — yigim) undiriladi.

Talabgor davlat xizmati koʻrsatilishi uchun YIDXP orqali murojaat etgan taqdirda, yigʻim summasining 90 foizi miqdorida yigʻim undiriladi.

Yigʻim summasi quyidagi tartibda taqsimlanadi:

a) davlat xizmatlari markazi orqali murojaat etilganda:

18 foizi — Oʻzbekiston Respublikasi Adliya vazirligining Davlat xizmatlarini rivojlantirish jamgʻarmasining shaxsiy gʻazna hisobvaragʻiga;

0,5 foizi “Raqamli hukumat loyihalarini boshqarish markazi” davlat muassasasining Iqtisodiyot va moliya vazirligi huzuridagi Gʻaznachilik xizmati qoʻmitasidagi maxsus hisobvaragʻiga;

qolgan mablagʻlar — vakolatli organning budjetdan tashqari jamgʻarmasiga;

b) YIDXP orqali murojaat etilganda:

10 foizi Oʻzbekiston Respublikasi Adliya vazirligining Davlat xizmatlarini rivojlantirish jamgʻarmasi shaxsiy gʻazna hisobvaragʻiga;

11,75 foizi (shundan 0,5 foizi yagona billing tizimi orqali davlat xizmati koʻrsatilganda) Raqamli texnologiyalar vazirligi huzuridagi Raqamli texnologiyalarni rivojlantirish jamgʻarmasining elektron hukumat va raqamli iqtisodiyotning idoralararo loyihalarini moliyalashtirish boʻyicha maxsus hisobvaragʻiga;

qolgan mablagʻlar vakolatli organning hisobvaragʻiga oʻtkaziladi.

Yigʻim toʻlanganligi axborot-kommunikatsiya tizimlari orqali tasdiqlanadi.

11. Talabgor davlat xizmatlaridan foydalanishda ularni koʻrsatishning har qanday bosqichida bosh tortish huquqiga ega. Talabgor davlat xizmatlaridan foydalanishdan bosh tortganda, uning anketasi koʻrib chiqilmasdan qoldiriladi va toʻlangan yigʻim qaytarilmaydi.

3-bob. Malaka imtihonini topshirishga ruxsat berish yoki ruxsat berishni rad etish toʻgʻrisida qarorlar qabul qilish tartibi

12. Vakolatli organ murojaat kelib tushgan kundan boshlab oʻn ish kuni mobaynida talabgorga malaka imtihonini topshirishga ruxsat berish yoki ruxsat berishni rad etish toʻgʻrisida qaror qabul qiladi.

13. Ruxsat berish yoki rad etish toʻgʻrisida qabul qilingan qaror haqida vakolatli organ talabgorni uch ish kuni ichida elektron shaklda xabardor qiladi. Ruxsat berishni rad etish toʻgʻrisida qaror qabul qilingan taqdirda, uning asoslari koʻrsatiladi.

Talabgor tomonidan anketa tegishli ravishda rasmiylashtirilmaganligi, yigim toʻlanmaganligi, talabgorning ushbu Reglamentning 5-bandida nazarda tutilgan talablarga muvofiq kelmasligi, shuningdek, ushbu Reglamentning 51-bandida nazarda tutilgan holat talabgorga davlat xizmatlari koʻrsatilishini hamda malaka imtihonini topshirishga ruxsat berishni rad etish uchun asos hisoblanadi.

Davlat xizmatlari koʻrsatishni boshqa asoslar boʻyicha rad etish taqiqlanadi.

14. Murojaati rad etilgan talabgor rad etish uchun sabab boʻlgan kamchiliklarni bartaraf etganidan soʻng ushbu Reglamentda belgilangan tartibda vakolatli organga oʻn ish kunida qayta murojaat qilishga haqli.

Talabgor belgilangan muddatda qayta murojaat qilganda yigʻim undirilmaydi.

Talabgor oʻn ish kuni oʻtgandan keyin murojaat qilgan taqdirda, murojaat yangidan berilgan deb hisoblanadi va talabgordan yigim undiriladi.

15. Talabgorning arizasini qayta koʻrib chiqishda ilgari malaka imtihonini topshirishga ruxsat berishni rad etish toʻgʻrisidagi xabarnomada koʻrsatilmagan yangi asoslar boʻyicha malaka imtihonini topshirishni rad etishga yoʻl qoʻyilmaydi.

Malaka imtihonini topshirishga ruxsat berish toʻgʻrisida qaror qabul qilinganda, vakolatli organ malaka imtihonini topshirishga ruxsat berilgan talabgorlar roʻyxatini imtihon komissiyasiga taqdim etadi.

16. Vakolatli organ tomonidan malaka imtihonini topshirishga ruxsat berilganda, malaka imtihonini oʻtkazish sanasi, vaqti va joyi toʻgʻrisida imtihon oʻtkazilishidan kamida oʻn kun oldin tegishli davlat xizmatlari markaziga (oʻzi murojaat etganda) yoki talabgorga YIDXP orqali (elektron tarzda murojaat etganda) elektron shaklda xabarnoma yuboriladi.

Davlat xizmatlari markazi vakolatli organdan elektron shaklda xabarnoma kelib tushgan kunda uni talabgorga anketada koʻrsatilgan elektron manzil boʻyicha yuboradi. Davlat xizmatlari markazi talabgorning soʻroviga koʻra xabarnomani qogʻoz shaklida ham berishi lozim.

Malaka imtihonini topshirishga ruxsat berish rad etilgan talabgorga undirilgan yigʻim qaytarilmaydi.

4-bob. Imtihon komissiyasi

17. Malaka imtihonini tashkil etish va oʻtkazish uchun vakolatli organ tomonidan doimiy faoliyat yurituvchi, jami toʻqqiz nafar aʼzodan iborat tarkibda imtihon komissiyasi tashkil qilinadi. Imtihon komissiyasi rais, rais oʻrinbosari, komissiya aʼzolari va kotibdan iborat boʻladi.

Imtihon komissiyasi tarkibiga vakolatli organning xodimlari va boshqa davlat boshqaruvi organlari hamda nodavlat notijorat tashkilotlarining vakillari jalb etilishi mumkin.

Imtihon komissiyasi toʻgʻrisidagi nizom va uning shaxsiy tarkibi vakolatli organ tomonidan tasdiqlanadi.

18. Imtihon komissiyasi kuyidagi asosiy funksiyalarni amalga oshiradi:

malaka imtihonini oʻtkazish tartibini tasdiqlash;

malaka imtihoni savollarini tuzish;

malaka imtihoni oʻtkaziladigan sana, joy va vaqt boʻyicha taklif tayyorlash;

malaka imtihonini oʻtkazish;

malaka imtihoni natijalarini rasmiylashtirish.

19. Imtihon komissiyasining majlislari zarurat boʻlganda, lekin har chorakda kamida bir marta oʻtkaziladi, talabgorlardan ariza kelib tushmagan hollar bundan mustasno. Imtihon komissiyasining kotibi komissiya majlislarini tashkil etish va oʻtkazish uchun masʼul hisoblanadi.

Imtihon komissiyasining majlisi uning aʼzolarining kamida uchdan ikki qismi ishtirok etgan tarkibda va rais yoki rais oʻrinbosarining ishtirokida oʻtkaziladi.

20. Imtihon komissiyasining qarori bayonnoma bilan rasmiylashtiriladi. Bayonnoma majlisda raislik qiluvchi tomonidan tasdiqlanadi va ishtirok etgan barcha aʼzolar tomonidan imzolanadi.

5-bob. Malaka imtihonini oʻtkazish tartibi

21. Malaka imtihoni kamida uch nafar talabgordan iborat guruhning shakllanishiga koʻra, biroq har chorakda kamida bir marta oʻtkaziladi. Malaka imtihonini oʻtkazish sanasi vakolatli organ tomonidan belgilanadi.

22. Malaka imtihoni test koʻrinishida kompyuter vositasi orqali olinadi. Malaka imtihonining test savollari imtihon komissiyasi tomonidan tasdiqlanadi.

Malaka imtihonining test savollariga kiritilgan sohalar boʻyicha mavzular vakolatli organning rasmiy veb-saytiga joylashtiriladi.

Imtihon komissiyasi raisining imzosi qoʻyilmagan test savollari haqiqiy emas deb hisoblanadi.

Malaka imtihonining test savollari mazmuni qonunchilik hujjatlariga kiritiladigan oʻzgartirish va qoʻshimchalarni hisobga olgan holda davriy ravishda qayta koʻrib chiqiladi.

23. Talabgor tomonidan shaxsini tasdiqlovchi hujjatlar (pasport, identifikatsiyalovchi ID-karta yoki shaxsini tasdiqlovchi boshqa hujjat) taqdim etilgan taqdirda, unga malaka imtihonini topshirish uchun ruxsat beriladi. Ushbu hujjatlari boʻlmagan yoki malaka imtihoniga kechikkan talabgor imtihonga kelmagan hisoblanadi va navbatdagi malaka imtihonini topshirishga ruxsat berilgan shaxslar roʻyxatiga kiritiladi.

24. Malaka imtihonining test savollari quyidagi yoʻnalishlar boʻyicha jami 50 ta nazariy savollardan iborat boʻladi:

oʻsimlik va hayvonot dunyosini (shu jumladan, muhofaza etiladigan tabiiy hududlarni) muhofaza qilish sohasida — 10 ta;

chiqindilar bilan bogʻliq ishlarni amalga oshirish sohasida — 10 ta;

atmosfera havosini muhofaza qilish sohasida — 10 ta;

suv va yer resurslari muhofazasi sohasida — 10 ta;

ekologiya va atrof-muhitni muhofaza qilish sohasiga tegishli texnik jihatdan tartibga solish sohasidagi normativ hujjatlar boʻyicha — 10 ta.

Har bitta toʻgʻri javob uchun bir ball beriladi.

25. Malaka imtihoni natijalarini ijobiy deb eʼtirof etish uchun asos boʻladigan toʻplangan ballar yigʻindisi 40 balldan kam boʻlmasligi kerak.

26. Malaka imtihoni oʻtkazilayotgan vaqtda qonunchilik hujjatlari va yoʻriqnoma materiallari, maʼlumotnomalar hamda maxsus adabiyotlardan foydalanish, boshqa talabgorlar bilan gaplashish, shuningdek, aloqa vositalaridan foydalanish man qilinadi. Ushbu talablarni buzgan talabgorlarga malaka imtihonini oʻtkazish tartibi buzilganligi boʻyicha dalolatnoma rasmiylashtirilib, ular auditoriyadan chiqarib yuboriladi hamda malaka imtihonini topshirmagan deb hisoblanadi.

Malaka imtihonida begona shaxslarning ishtirok etishiga ruxsat berilmaydi.

Malaka imtihonining shaffofligi va xolisligini taʼminlash maqsadida malaka imtihonini oʻtkazish jarayoni uzluksiz ravishda videoyozuvga (ovozli) tushiriladi va ushbu videomateriallar vakolatli organda kamida bir yil saqlanadi.

27. Malaka imtihoni natijalari imtihon oʻtkazilgan kunning oʻzida eʼlon qilinadi.

Malaka imtihoni natijalari imtihon oʻtkazilgan sanadan soʻng bir ish kunida imtihon komissiyasining bayonnomasi bilan rasmiylashtiriladi hamda vakolatli organ rahbariga topshiriladi.

Imtihon komissiyasi bayonnomasida quyidagilar koʻrsatiladi:

imtihon komissiyasining tarkibi;

malaka imtihonini muvaffaqiyatli topshirgan talabgorlar roʻyxati va ularning toʻplagan ballari;

malaka imtihonini topshira olmagan talabgorlar roʻyxati va ularning toʻplagan ballari.

28. Malaka imtihonini oʻtkazish boʻyicha hujjatlar (test savollari va ularga javoblar), shuningdek, imtihon komissiyasining bayonnomalari vakolatli organda besh yil mobaynida saqlanadi.

29. Malaka imtihonini topshira olmagan talabgor yigʻimni toʻlash sharti bilan malaka imtihonini topshirish uchun hujjatlarni mazkur Reglamentga muvofiq qayta taqdim etishga haqlidir.

Malaka imtihonini topshira olmagan talabgorlarga yigʻim qaytarilmaydi.

6-bob. Malaka sertifikatini berish tartibi

30. Imtihondan muvaffaqiyatli oʻtgan shaxsga ushbu Reglamentga 3-ilovaga muvofiq shakl boʻyicha ekologik auditor malaka sertifikati beriladi.

31. Vakolatli organ imtihon komissiyasining bayonnomalarini qabul qilib olganidan soʻng bir ish kuni mobaynida belgilangan tartibda QR-kod qoʻyilgan malaka sertifikatini rasmiylashtiradi hamda uni oʻz ERIsi bilan tasdiqlab, tegishli davlat xizmatlari markaziga (oʻzi murojaat etganda) yoki talabgorga YIDXP orqali (elektron tarzda murojaat etganda) elektron shaklda yuboradi.

32. Davlat xizmatlari markazi vakolatli organdan malaka sertifikati elektron shaklda kelib tushgandan soʻng oʻn daqiqa mobaynida uni talabgorning elektron manziliga yuboradi hamda talabgorni bu haqda axborot-kommunikatsiya tizimi orqali xabardor qiladi. Davlat xizmatlari markaziga talabgor oʻzi kelib murojaat qilgan taqdirda, talabgorning soʻroviga koʻra unga malaka sertifikati elektron yoki qogʻoz shaklida beradi.

Malaka sertifikati vakolatli organ tomonidan talabgorga YIDXP orqali elektron shaklda yuborilganda, u avtomatik ravishda talabgorning elektron kabinetida namoyon boʻladi.

Malaka sertifikati hisobga olish seriyasi va raqamiga ega boʻladi hamda besh yil muddatga amal qiladi.

7-bob. Apellyatsiyalarni koʻrib chiqish

33. Malaka imtihoni natijalariga koʻra qabul qilingan qarorlar natijalaridan norozi boʻlgan talabgorlar malaka imtihoni natijalari eʼlon qilingan sanadan boshlab oʻttiz kalendar kun mobaynida vakolatli organga apellyatsiya berish huquqiga ega. Apellyatsiya yozma shaklda taqdim etiladi. Apellyatsiyani koʻrib chiqish muddati oʻn besh ish kunidan oshmasligi lozim.

34. Apellyatsiyani koʻrib chiqish uchun vakolatli organ tomonidan Apellyatsiya komissiyasi tashkil qilinadi. Apellyatsiya komissiyasi tarkibi vakolatli organ rahbarining buyrugʻi bilan tasdiqlanadi. Apellyatsiya komissiyasi tarkibiga imtihon komissiyasi tarkibiga kirgan shaxslar kiritilmaydi.

Apellyatsiya komissiyasi besh ish kunida berilgan apellyatsiyani talabgor ishtirokida koʻrib chiqadi. Apellyatsiya komissiyasining ishi bayonnoma bilan rasmiylashtiriladi. Bayonnoma apellyatsiya komissiyasining barcha aʼzolari va talabgor tomonidan imzolanadi.

Apellyatsiya komissiyasi apellyatsiyani koʻrib chiqish natijalari boʻyicha quyidagi qarorlardan birini qabul qiladi:

imtihon komissiyasining qarorini oʻzgarishsiz qoldirish va apellyatsiyani qanoatlantirishni rad etish;

imtihon komissiyasining qarorini bekor qilish va malaka sertifikatini berish toʻgʻrisida.

35. Imtihon komissiyasining qarorini oʻzgarishsiz qoldirish va apellyatsiyani qanoatlantirishni rad etish toʻgʻrisidagi qaror quyidagi hollarda qabul qilinadi:

apellyatsiya ushbu Reglament talablari buzilgan holda taqdim etilgan boʻlsa;

apellyatsiyada keltirilgan sabablar oʻz tasdigʻini topmasa.

36. Imtihon komissiyasining qarorini bekor qilish va malaka sertifikatini berish toʻgʻrisidagi qaror malaka imtihoni ushbu Reglament talablari buzilgan holda oʻtkazilgan taqdirda qabul qilinadi.

37. Malaka sertifikatini berish toʻgʻrisida qaror qabul qilingandan soʻng vakolatli organ talabgorga malaka sertifikatini beradi.

38. Qayta apellyatsiyaga yoʻl qoʻyilmaydi.

8-bob. Ekologik auditorlarning malakasini oshirish

39. Ekologik auditorlar har ikki yilda bir marta ekologik auditorlarning malaka oshirish kurslaridan oʻtishlari shart.

40. Ekologik auditorlarning malakasini oshirish Markaziy Osiyo atrof-muhit va iqlim oʻzgarishini oʻrganish universiteti huzuridagi Atrof-muhitni muhofaza qilish sohasida faoliyat koʻrsatayotgan xodimlarni qayta tayyorlash va ularning malakasini oshirish markazi yoki belgilangan tartibda attestatsiyadan va davlat akkreditatsiyasidan oʻtgan nodavlat taʼlim tashkilotlari (keyingi oʻrinlarda — taʼlim tashkilotlari) tomonidan shartnoma asosida amalga oshiriladi.

41. Malaka oshirish kurslari vakolatli organ tomonidan tasdiqlangan yagona oʻquv dasturi asosida tashkil etiladi.

42. Malaka oshirish kurslari yakuni natijalariga koʻra Ekologik auditorlar reyestriga ekologik auditorlarning malaka oshirganligi toʻgʻrisidagi tegishli maʼlumotlar kiritiladi. Bunda taʼlim tashkilotlari tomonidan malaka oshirish kurslarini muvaffaqiyatli tugatgan ekologik auditorlar roʻyxati malaka oshirish kursi tugagan kundan boshlab uch ish kunidan kechiktirmay, Ekologik auditorlar reyestriga tegishli yozuvlar kiritish uchun vakolatli organga yuboriladi.

9-bob. Malaka sertifikatini qayta rasmiylashtirish tartibi

43. Ilgari berilgan malaka sertifikatida koʻrsatilgan maʼlumotlar oʻzgargan taqdirda, talabgor malaka sertifikatini qayta rasmiylashtirish uchun oʻn ish kunida davlat xizmatlari markaziga bevosita oʻzi yoki ishonchli vakili orqali murojaat qiladi yoxud YIDXP orqali elektron shakldagi tegishli murojaat yuboradi.

Anketaga kiritilgan maʼlumotlarning haqqoniyligi axborot tizimlari yordamida avtomatik ravishda tekshiriladi.

44. Anketada xato maʼlumotlar koʻrsatilgan taqdirda, murojaat avtomatik ravishda rad etiladi hamda bu haqda talabgorga onlayn tarzda elektron shaklda javob qaytariladi.

45. Vakolatli organ talabgorning murojaati kelib tushgan kundan boshlab besh ish kunidan koʻp boʻlmagan muddatda dastlab berilgan malaka sertifikatining raqami va amal qilish muddati bilan malaka sertifikatini qayta rasmiylashtiradi hamda ushbu Reglamentning 31-bandida belgilangan tartibda talabgorga yuboradi.

46. Vakolatli organ malaka sertifikatini qayta rasmiylashtirishda reyestrga tegishli oʻzgartirishlar kiritadi.

47. Malaka sertifikatini qayta rasmiylashtirish uchun talabgor qayta imtihondan oʻtkazilmaydi va yigʻim undirilmaydi.

48. Malaka sertifikatining egasi ushbu sertifikat qayta rasmiylashtirilgunga qadar unda koʻrsatilgan faoliyatni ilgari berilgan malaka sertifikati asosida amalga oshiradi.

10-bob. Malaka sertifikatini bekor qilish tartibi

49. Malaka sertifikati quyidagi hollarda bekor qilinadi:

malaka sertifikati egasi tomonidan sertifikatni bekor qilish toʻgʻrisida murojaat etilganda;

malaka sertifikati egasi vafot etganda;

malaka sertifikati egasi oʻz vaqtida malaka oshirish kursidan oʻtmaganda;

malaka sertifikati egasini belgilangan tartibda muomalaga layoqatsiz yoki muomala layoqati cheklangan deb topish toʻgʻrisidagi sud qarori qonuniy kuchga kirganda;

vakolatli organning malaka sertifikatini berish toʻgʻrisidagi qarori qonunga xilof ekanligi isbotlanganda;

malaka sertifikati egasi tomonidan ekologik audit xizmatidagi faoliyati mobaynida olingan maxfiy axborot xoʻjalik yurituvchi subyekt rahbarining yozma ruxsatisiz uchinchi shaxslarga taqdim etilganda, qonunchilik hujjatlarida nazarda tutilgan holatlar bundan mustasno;

malaka sertifikati qalbaki hujjatlardan foydalangan holda olinganligi isbotlanganda;

malaka sertifikati egasi soxta ekologik audit xulosasini tuzganligi isbotlanganda.

50. Ushbu Nizomning 49-bandi ikkinchi — beshinchi xatboshilarida nazarda tutilgan hollarda malaka sertifikati vakolatli organning qaroriga muvofiq bekor qilinadi.

Mazkur Nizomning 49-bandi oltinchi — toʻqqizinchi xatboshilarida nazarda tutilgan hollarda malaka sertifikati sud tomonidan bekor qilinadi. Vakolatli organ malaka sertifikatini bekor qilish toʻgʻrisida sudga ariza bilan murojaat qilgan kundan eʼtiboran bir ish kunidan kechiktirmay, malaka sertifikatini bekor qilish haqida ariza bilan sudga murojaat qilish asoslarini, qonunchilikning aniq normalarini koʻrsatgan holda bu haqda malaka sertifikatini olgan shaxsni yozma shaklda xabardor qiladi.

51.Ushbu Nizomning 49-bandi yettinchi — toʻqqizinchi xatboshilarida nazarda tutilgan asoslar boʻyicha malaka sertifikati bekor qilingan shaxs ushbu malaka sertifikatini bekor qilish haqidagi sud qarori qonuniy kuchga kirgan paytdan boshlab uch yil mobaynida malaka sertifikatini qayta olish uchun malaka imtihonini topshirishga qoʻyilmaydi.

52. Malaka sertifikatining bekor qilinganligi toʻgʻrisidagi maʼlumotlar vakolatli organning rasmiy veb-saytida eʼlon qilinadi.

11-bob. Ekologik auditorlar reyestrini yuritish tartibi

53. Vakolatli organ Ekologik auditorlar reyestrini yuritadi hamda unda ekologik auditorlar toʻgʻrisida quyidagi maʼlumotlar koʻrsatiladi:

familiyasi, ismi, otasining ismi;

pasport yoki identifikatsiyalovchi ID-karta maʼlumotlari va yashash manzili;

ish joyi;

malaka sertifikatining seriyasi, raqami, berilgan sanasi va amal qilish muddati;

malaka oshirish kurslaridan oʻtganligi toʻgʻrisidagi maʼlumotlar;

malaka sertifikatini qayta rasmiylashtirish va bekor qilish toʻgʻrisidagi maʼlumotlar;

vakolatli organ zarur deb hisoblaydigan boshqa qoʻshimcha maʼlumotlar.

54. Ekologik auditorlar reyestridagi quyidagi maʼlumotlar vakolatli organning rasmiy veb-saytiga joylashtiriladi hamda barchaning tanishishi uchun ochiq hisoblanadi:

ekologik auditorning familiyasi, ismi va otasining ismi;

malaka sertifikatining seriyasi, raqami, berilgan sanasi va amal qilish muddati;

ekologik auditorlar malaka oshirganligi toʻgʻrisidagi maʼlumotlar;

malaka sertifikatini qayta rasmiylashtirish va bekor qilish toʻgʻrisidagi maʼlumotlar.

12-bob. Yakunlovchi qoidalar

55. Oʻzbekiston Respublikasi Adliya vazirligi, uning hududiy boshqarmalari va davlat xizmatlari markazlari ushbu Reglamentning talablari ijrosi boʻyicha davlat organlari va boshqa tashkilotlarning faoliyatini doimiy nazorat qiladi va monitoring olib boradi.

56. Talabgor davlat organlari va boshqa tashkilotlar xodimlarining xatti-harakatlari yuzasidan qonunchilik hujjatlarida belgilangan tartibda shikoyat qilishi mumkin.

57. Ushbu Reglament talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Ekologik auditorning malaka sertifikatini berish boʻyicha davlat xizmatlarini koʻrsatishning maʼmuriy reglamentiga 1-ILOVA

Ekologik auditorning malaka sertifikatini berish boʻyicha davlat xizmatlarini koʻrsatish

Bosqichlar Subyektlar Tadbirlar Bajarish muddatlari 1-bosqich Talabgor Malaka sertifikatini olish uchun davlat xizmatlari markaziga oʻzi kelgan holda yoki elektron shaklda YIDXP orqali murojaat qiladi. Talabgorning xohishiga koʻra 2-bosqich Davlat xizmatlari markazi yoki YIDXP Talabgor davlat xizmatlari markaziga murojaat etganda, uning anketasi davlat xizmatlari markazi xodimi tomonidan toʻldirilib, talabgorning ERIsi bilan tasdiqlangandan soʻng yoki YIDXP orqali murojaat qilganda — anketa talabgor tomonidan mustaqil ravishda toʻldirilib, soʻng vakolatli organga elektron shaklda yuboriladi. Davlat xizmatlari markazi orqali murojaat qilinganda real vaqt rejimida, biroq bir soatdan oshmagan vaqtda, YIDXP orqali esa avtomatik tarzda 3-bosqich Ekologiya, atrof-muhitni muhofaza qilish va iqlim oʻzgarishi vazirligi (vakolatli organ) 1. Talabgorga malaka imtihonini topshirishga ruxsat berish yoki ruxsat berishni rad etish toʻgʻrisida qaror qabul qiladi. 1. Murojaat elektron koʻrinishda kelib tushgan kundan boshlab oʻn ish kunida 2. Ruxsat berish yoki rad etish toʻgʻrisidagi qaror haqida vakolatli organ talabgorni elektron shaklda xabardor qiladi. 2. Qaror qabul qilingan sanadan keyin uch ish kunida 3. Malaka imtihonini topshirishga ruxsat berilgan talabgorlar, malaka imtihonini oʻtkazish sanasi, vaqti va joyi toʻgʻrisida tegishli davlat xizmatlari markaziga (oʻzi murojaat etganda) yoki talabgorga YIDXP orqali (elektron tarzda murojaat etganda) elektron shaklda xabarnoma yuboradi. 3. Malaka imtihoni oʻtkazilishidan kamida oʻn kun oldin Davlat xizmatlari markazi 4. Vakolatli organdan kelib tushgan elektron shakldagi xabarnomani talabgorga anketada koʻrsatilgan elektron pochta manzili boʻyicha yuboradi va talabgorni bu haqda axborot-kommunikatsiya tizimi orqali xabardor qiladi. 4. Vakolatli organ tomonidan elektron shaklda xabarnoma kelib tushgan kunda 4-bosqich Talabgor Belgilangan sana va vaqtda shaxsini tasdiqlovchi hujjat bilan (pasport, identifikatsiyalovchi ID-karta yoki shaxsini tasdiqlovchi boshqa hujjat) bilan imtihon oʻtkaziladigan joyga yetib keladi. Imtihon oʻtkazish sanasi uch nafar talabgordan iborat guruhning shakllanishiga koʻra, lekin kamida uch oyda bir marta belgilanadi 5-bosqich Vakolatli organ huzurida tashkil etiladigan imtihon komissiyasi 1. Malaka imtihonini oʻtkazadi va imtihon natijalarini eʼlon qiladi. 1. Imtihon oʻtkazilishi belgilangan kuni 2. Malaka imtihoni natijalarini bayonnoma bilan rasmiylashtiradi va vakolatli organga topshiradi. 2. Bir ish kunida 6-bosqich Vakolatli organ 1. QR-kod qoʻyilgan malaka sertifikatini rasmiylashtiradi va uni ERIsi bilan tasdiqlab, tegishli davlat xizmatlari markaziga (oʻzi murojaat etganda) yoki talabgorga YIDXP orqali (elektron tarzda murojaat etganda) elektron shaklda yuboradi. 1. Imtihon komissiyasining bayonnomasi qabul qilib olingandan soʻng keyingi bir ish kuni mobaynida Davlat xizmatlari markazlari yoki YIDXP 2. Malaka sertifikatini elektron shaklda talabgorning elektron pochta manziliga yuboradi va talabgorni bu haqda axborot-kommunikatsiya tizimi orqali xabardor qiladi. 2. Malaka sertifikati elektron shaklda kelib tushgandan soʻng oʻn daqiqa mobaynida 3. Davlat xizmatlari markaziga talabgor oʻzi kelib murojaat qilgan taqdirda, talabgorning soʻroviga koʻra unga malaka sertifikatini elektron yoki qogʻoz shaklda beradi. 3. Talabgorning soʻroviga koʻra

Ekologik auditorning malaka sertifikatini berish boʻyicha davlat xizmatlarini koʻrsatishning maʼmuriy reglamentiga 2-ILOVA

ANKETA fotosurat (elektron hamkorlik asosida maʼlumotlar bazasidan olinadi) Anketani toʻldirish qoidalari: anketa elektron shaklda toʻldiriladi; barcha sanalar arab sonlarida keltiriladi; anketaning barcha savollariga toʻliq javob berilishi lozim; anketaning barcha qatorlari toʻldirilishi lozim (toʻldirilmagan qatorning mavjudligi butun anketaning toʻldirilmaganligini anglatadi). T/r Talabgor toʻgʻrisidagi maʼlumotlar 1. Familiyasi (oʻzgargan boʻlsa, yozilishi kerak) 2. Ismi (oʻzgargan boʻlsa, yozilishi kerak) 3. Otasining ismi (oʻzgargan boʻlsa, yozilishi kerak) 4. Tugilgan yili va sanasi avtomatik toʻldiriladi 5. Doimiy yashash joyi boʻyicha roʻyxatga olingan manzil avtomatik toʻldiriladi 6. Pasporti yoki identifikatsiyalovchi ID-kartasining seriyasi va raqami avtomatik toʻldiriladi 7. Elektron pochta manzili (mavjud boʻlsa) 8. Telefon raqami Talabgorning elektron raqamli imzosi

Ekologik auditorning malaka sertifikatini berish boʻyicha davlat xizmatlarini koʻrsatishning maʼmuriy reglamentiga 3-ILOVA

Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi Hujjat raqami: Hujjat yaratilgan sana: EKOLOGIK AUDITORNING MALAKA SERTIFIKATI JSHSHIR: _______________________ Fotosurat (elektron hamkorlik asosida maʼlumotlar bazasidan olinadi) F.I.O.: _______________________ Pasport (identifikatsiyalovchi ID-karta) seriya raqami: _______________________ Qachon berilgan: _______________________ Sertifikatning amal qilish muddati: _______________________ ______________________________________________ 0000 (Vakolatli organ mansabdor shaxsining F.I.O.) Mazkur hujjat Vazirlar Mahkamasining 2017-yil 15-sentabrdagi 728-son qarori bilan tasdiqlangan Oʻzbekiston Respublikasi Yagona interaktiv davlat xizmatlari portali toʻgʻrisidagi nizomga muvofiq shakllantirilgan elektron hujjatning nusxasi hisoblanadi. Elektron hujjatning nusxasida koʻrsatilgan maʼlumotlar toʻgʻriligini tekshirish uchun repo.gov.uz veb-saytiga oʻting va elektron hujjatning noyob raqamini kiriting yoki mobil telefon yordamida QR-kodni skaner qiling. Diqqat! Vazirlar Mahkamasining 2017-yil 15-sentabrdagi 728-son qaroriga muvofiq elektron hujjatlardagi maʼlumotlar qonuniy hisoblanadi. Davlat organlariga Yagona interaktiv davlat xizmatlari portalida shakllantirilgan elektron hujjatlarning nusxalarini qabul qilishni rad etishi qatʼiyan taqiqlangan. QR-kod

Vazirlar Mahkamasining 2023-yil 19-avgustdagi 402-son qaroriga 2-ILOVA

Ekologik auditorlik tashkilotlari reyestrini yuritish tartibi toʻgʻrisida

1-bob. Umumiy qoidalar

1. Mazkur Nizom Ekologik auditorlik tashkilotlari reyestrini (keyingi oʻrinlarda — Reyestr) shakllantirish va yuritish tartibini belgilaydi.

2. Mazkur Nizomda quyidagi asosiy tushunchalardan foydalaniladi:

vakolatli organ — Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi;

ekologik auditor — ekologik auditorning malaka sertifikatiga ega boʻlgan jismoniy shaxs;

ekologik auditorlik tashkiloti — ekologik auditorlik faoliyatini amalga oshiruvchi yuridik shaxs.

3. Reyestrga kiritish vakolatli organ tomonidan bepul amalga oshiriladi.

2-bob. Reyestrni shakllantirish va yuritishning asosiy vazifalari

4. Reyestrni shakllantirish va yuritishning asosiy vazifalari quyidagilardan iborat:

ekologik auditorlik tashkilotlari roʻyxatini shakllantirish va manfaatdor shaxslar uchun ular toʻgʻrisidagi maʼlumotlardan elektron foydalanish imkoniyatini yaratish;

ekologik auditorlik tashkilotlari tomonidan ekologik auditorlik xizmatlarini koʻrsatish haqidagi maʼlumotlarning yagona elektron bazasini yaratish;

ekologik auditorlik tashkilotlarining holati va salohiyati toʻgʻrisidagi maʼlumotlarni tizimli jamlab borish;

ekologik auditorlik tashkilotlarining qonunchilik hujjatlarida belgilangan talablarga muvofiqligi toʻgʻrisidagi maʼlumotlar monitoringini yuritish imkoniyatini yaratish.

3-bob. Reyestrni shakllantirish tartibi

5. Reyestrni shakllantirish va tizimli yuritish vakolatli organ rahbarining buyrugʻi bilan belgilangan masʼul xodim (keyingi oʻrinlarda — masʼul xodim) tomonidan amalga oshiriladi.

Ekologik auditorlik tashkiloti davlat roʻyxatidan oʻtkazilgandan keyin Reyestrga kiritish haqida vakolatli organga mazkur Nizomga ilovaga muvofiq shakl boʻyicha ariza bilan ixtiyoriy ravishda murojaat qiladi.

6. Ariza ekologik auditorlik tashkiloti tomonidan bevosita, pochta orqali yoki elektron shaklda vakolatli organning elektron yoki pochta manziliga olinganligi toʻgʻrisida xabardor qilish sharti bilan taqdim etiladi. Elektron shaklda taqdim etilgan hujjatlar elektron raqamli imzo bilan tasdiqlanadi.

7. Ekologik auditorlik tashkilotining arizasi vakolatli organ tomonidan qabul qilingandan soʻng besh ish kuni ichida koʻrib chiqiladi.

8. Ekologik auditorlik tashkiloti tomonidan taqdim etilgan arizada:

kamchiliklar mavjud boʻlmagan taqdirda, masʼul xodim tomonidan imzolangan hamda vakolatli organ rahbari tomonidan tasdiqlangan xulosaga asosan ekologik auditorlik tashkiloti Reyestrga kiritiladi va ekologik auditorlik tashkilotiga uning Reyestrga kiritilganligi haqida (reyestr raqamini koʻrsatgan holda) xabarnoma yuboriladi;

kamchiliklar mavjudligi aniqlangan taqdirda, uch ish kunida vakolatli organ bu haqda asoslarni koʻrsatgan holda, ekologik auditorlik tashkilotini yozma ravishda xabardor qiladi.

9. Ekologik auditorlik tashkiloti tomonidan Reyestrga kiritmaslikka asos boʻlgan kamchiliklar bartaraf etilganda, arizani qabul qilishda takroran rad qilinishiga yoʻl qoʻyilmaydi.

4-bob. Reyestrni yuritish tartibi

10. Reyestr elektron maʼlumotlar bazasi shaklida vakolatli organning rasmiy veb-saytiga joylashtirish orqali yuritiladi.

Reyestrning shakli vakolatli organ tomonidan tasdiqlanadi.

11. Reyestrda ekologik auditorlik tashkiloti toʻgʻrisida quyidagi maʼlumotlar koʻrsatiladi:

davlat roʻyxatiga olish raqami;

soliq toʻlovchining identifikatsiya raqami (STIR);

joylashgan yeri (pochta manzili);

telefoni raqami;

elektron pochta manzili va rasmiy veb-sayti (agar mavjud boʻlsa);

ekologik auditorlarning jamoat birlashmalariga aʼzoligi (agar aʼzo boʻlsa);

tashkilot rahbari va ekologik auditorlarning familiyasi, ismi, otasining ismi;

ekologik auditorning malaka sertifikati berilgan sanasi, raqami va amal qilish muddati;

ekologik auditorlik tashkilotining Reyestrga kiritilgan sanasi;

ekologik auditorlik tashkilotining Reyestrdan chiqarilish asoslari va sanasi (agar mavjud boʻlsa).

Reyestrga kiritilishi zarur boʻlgan maʼlumotlar ekologik auditorlik tashkilotlari arizasida koʻrsatilgan, shuningdek, vakolatli organ tomonidan oʻzaro maʼlumot axborot hamkorligi orqali belgilangan tartibda olinadigan boshqa vakolatli organlardagi qoʻshimcha maʼlumotlar asosida mustaqil yuritiladi.

12. Reyestrga kiritilgan maʼlumotlar oʻzgargan taqdirda, ekologik auditorlik tashkiloti tomonidan ushbu oʻzgarishlar haqida oʻn ish kunida vakolatli organga oʻzgarishlarni tasdiqlovchi maʼlumotlar taqdim etilishi lozim. Bunday maʼlumotlar vakolatli organga taqdim etilganda, besh ish kunida masʼul xodim tomonidan imzolangan hamda vakolatli organ rahbari tomonidan tasdiqlangan xulosa asosida Reyestrga oʻzgartirishlar kiritiladi.

13. Ekologik auditorlik tashkiloti quyidagi hollarda Reyestrdan chiqarilishi mumkin:

ekologik auditorlik tashkiloti tomonidan Reyestrdan ixtiyoriy chiqarish toʻgʻrisida yozma murojaat qilinganda;

ekologik auditorlik tashkilotining faoliyat turi oʻzgarganda;

ekologik auditorlik tashkiloti tugatilganda;

ekologik auditorlik tashkilotining qonunchilik hujjatlarida ekologik auditorlik tashkilotiga qoʻyilgan talablarga muvofiq emasligi aniqlanganda.

14. Masʼul xodim tomonidan imzolangan hamda vakolatli organ rahbari tomonidan tasdiqlangan tegishli xulosa sanasi Reyestrga kiritish yoki undan chiqarish sanasi hisoblanadi.

15. Reyestrni yuritish davomida toʻplangan barcha hujjatlar vakolatli organda besh yil mobaynida saqlanadi.

5-bob. Reyestrdan maʼlumotlar taqdim etish

16. Vakolatli organning rasmiy veb-saytiga joylashtirilgan Reyestr maʼlumotlari barcha foydalanishi uchun ochiq hisoblanadi.

17. Reyestrdan maʼlumotlar manfaatdor shaxslarning murojaatlariga asosan ham berilishi mumkin.

6-bob. Yakunlovchi qoidalar

18. Vakolatli organ maʼlumotlarning Reyestrga toʻgʻri va oʻz vaqtida kiritilishi hamda undan doimiy ravishda maʼlumotlar olish imkoniyatining yaratilishi uchun masʼul hisoblanadi.

19. Mazkur Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Ekologik auditorlik tashkilotlari reyestrini yuritish tartibi toʻgʻrisidagi nizomga ILOVA

Oʻzbekiston Respublikasi ekologiya, atrof-muhitni muhofaza qilish va iqlim oʻzgarishi vaziriga ________________________ga (F.I.O) __________________________dan (ariza beruvchi F.I.O) Ekologik auditorlik tashkilotlari reyestriga kiritish uchun ARIZA Sizdan ___________________________________________________________ ni Sizdan __________ (ekologik auditorlik tashkilotining toʻliq nomi) ____________ ni Ekologik auditorlik tashkilotlari reyestriga kiritishingizni soʻrayman. Ekologik auditorlik tashkiloti toʻgʻrisida quyidagi maʼlumotlarni tasdiqlayman: joylashgan yeri (pochta manzili) ______________________________________ telefon raqami (kodi bilan) _________________________________________ STIR raqami ______________________________________________________ elektron pochta manzili (mavjud boʻlsa) ________________________________ rasmiy veb-sayti (mavjud boʻlsa) _____________________________________ ekologik auditorlarning jamoat birlashmalariga aʼzoligi (agar aʼzo boʻlsa) __________________________ _ (jamoat birlashmasi nomi) ekologik auditorlarning malaka sertifikati raqamlari 1) _____________________ 2) _____________________ _______________________ Tashkilot rahbari imzo yoki elektron raqamli imzo oʻrin ______________________ (F.I.O)

Vazirlar Mahkamasining 2023-yil 19-avgustdagi 402-son qaroriga 3-ILOVA

Oʻzbekiston Respublikasi Hukumatining ayrim qarorlariga kiritilayotgan oʻzgartirishlar

1. Vazirlar Mahkamasining “Ekologik nazorat sohasidagi normativ-huquqiy hujjatlarni tasdiqlash haqida” 2015-yil 8-oktabrdagi 286-son qarorida :

a) 1-bandning toʻrtinchi va beshinchi xatboshilari quyidagi mazmundagi toʻrtinchi xatboshi bilan almashtirilsin:

“Ekologik xizmat toʻgʻrisidagi namunaviy nizom 3-ilovaga muvofiq tasdiqlansin.”;

b) 4-ilova oʻz kuchini yoʻqotgan deb hisoblansin.

2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida” 2017-yil 14-noyabrdagi 915-son qaroriga 1-ilova 65-bandining “g” kichik bandi oʻz kuchini yoʻqotgan deb hisoblansin.

3. Vazirlar Mahkamasining “Davlat boshqaruvi va mahalliy davlat hokimiyati organlarida xizmat avtotransport vositalaridan foydalanish tizimini tubdan takomillashtirish chora-tadbirlari toʻgʻrisida” 2021-yil 29-apreldagi 258-son qaroriga 1-ilova izohining toʻqqizinchi xatboshisi quyidagi mazmundagi toʻqqizinchi-oʻninchi xatboshilar bilan almashtirilsin:

“****** Maktabgacha va maktab taʼlimi, Qishloq xoʻjaligi, Suv xoʻjaligi, Qurilish va uy-joy kommunal xoʻjaligi, Iqtisodiyot va moliya, Kambagʻallikni qisqartirish va bandlikka koʻmaklashish, Oila va xotin-qizlar qoʻmitasi, Agrosanoat majmui ustidan nazorat qilish inspeksiyasi, Kadastr va Adliya boʻlimlariga, shuningdek, Soliq inspeksiyalariga 1 tadan navbatchi xizmat avtotransport vositalari belgilanadi.

Ushbu ilovada belgilangan eng yuqori narx (bazaviy hisoblash miqdoriga nisbatan) meʼyorlari davlat boshqaruvi va mahalliy davlat hokimiyati organlari tomonidan xarid qilinadigan elektrodvigatelli va gibrid quvvatli avtotransport vositalariga nisbatan ham tatbiq etiladi”.

Oʻzbekiston Respublikasining Bosh vaziri A. ARIPOV

Toshkent sh.,

2023-yil 19-avgust,

402-son

(Qonunchilik maʼlumotlari milliy bazasi, 21.08.2023-y., 09/23/402/0632-son)

lex.uz