📅 2023-yil 31-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 31 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 31 августа 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 31 August 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Жазони ижро этиш муассасаларида маҳкумларнинг ҳуқуқлари ва қонуний манфаатларини ишончли ҳимоя қилиш тизими такомиллаштирилганлиги муносабати билан Вазирлар Маҳкамасининг «Озодликдан маҳрум этиш жойларидан озод қилинган шахсларни ижтимоий-маиший таъминлаш ва ишга жойлаштириш тизимини янада такомиллаштириш бўйича амалий чора-тадбирлар тўғрисида» 2018 йил 17 июлдаги 543-сон қарорига ўзгартиришлар киритиш ҳақида
Сўнгги йилларда мамлакатимизда маҳкумлар учун қулай шарт-шароитлар яратилиши уларнинг ҳуқуқ ва эркинликларига риоя этилиши ҳамда шаъни ва қадр-қиммати ҳурмат қилинишини таъминлаш борасида кенг кўламли ишлар амалга оширилмоқда.
Шу билан бирга, маҳкумлар билан тарбиявий ишларни самарали ташкил этиш орқали уларнинг тузалиш йўлига ўтишига кўмаклашиш, шунингдек, жазони ижро этиш муассасаларида меҳнатга жалб этилган маҳкумларга ҳақ тўланадиган иш даврини уларнинг умумий меҳнат стажига қўшиб ҳисоблаш тизимини жорий этишда замонавий ахборот технологияларидан кенг фойдаланиш зарурати юзага келмоқда.
Ўзбекистон Республикасининг «Ўзбекистон Республикасининг айрим қонун ҳужжатларига маҳкумларнинг ҳуқуқлари ва қонуний манфаатларини ишончли ҳимоя қилишга қаратилган ўзгартиш ва қўшимчалар киритиш тўғрисида» 2023 йил 15 февралдаги ЎРҚ-817-сон Қонунига мувофиқ, шунингдек, маҳкумларнинг ҳуқуқлари, эркинликлари ва қонуний манфаатларини таъминлаш мақсадида Вазирлар Маҳкамаси қарор қилади:
1. Ўзбекистон Республикасининг «Ўзбекистон Республикасининг айрим қонун ҳужжатларига маҳкумларнинг ҳуқуқлари ва қонуний манфаатларини ишончли ҳимоя қилишга қаратилган ўзгартиш ва қўшимчалар киритиш тўғрисида» 2023 йил 15 февралдаги ЎРҚ-817-сон Қонуни билан:
жазони ижро этиш муассасаларининг озодликдан маҳрум этишга ҳукм қилинган шахслар меҳнатига ҳақ тўлашга доир харажатлари ижтимоий солиқ бўйича солиқ солиш объекти этиб белгиланганлиги;
ижтимоий солиқ тўланган давр озодликдан маҳрум этишга ҳукм қилинган шахсларнинг умумий меҳнат стажига қўшиб ҳисобланиши;
маҳкумларнинг тузалиш йўлига ўтганлигини аниқлаш мезонлари белгилаб берилганлиги маълумот учун қабул қилинсин.
2. Ўзбекистон Республикаси Ички ишлар вазирлиги Рақамли технологиялар вазирлиги ва Вазирлар Маҳкамаси ҳузуридаги Солиқ қўмитаси билан биргаликда уч ой муддатда:
жазони ижро этиш муассасаларида меҳнатга жалб этилган маҳкумларнинг ҳақ тўланадиган ишга жалб этилган даврига оид маълумотларни юритишни назарда тутувчи ахборот тизимини (кейинги ўринларда — ахборот тизими) жорий қилсин;
жазони ижро этиш муассасалари томонидан маҳкумларга ҳисобланган ижтимоий солиқ тўловларини электрон тартибда солиқ органларига тақдим этиш амалиётини йўлга қўйсин.
3. Белгилансинки, ахборот тизимини жорий этиш доирасида:
Ўзбекистон Республикаси Ички ишлар вазирлиги — буюртмачи ҳисобланади;
бош пудрат ташкилоти қонунчилик ҳужжатларида белгиланган тартибда тендер (танлов) савдолари асосида аниқланади;
ахборот тизимини жорий этиш билан боғлиқ харажатлар Ички ишлар вазирлигининг бюджетдан ташқари маблағлари ҳисобидан амалга оширилади.
4. Вазирлар Маҳкамасининг «Озодликдан маҳрум этиш жойларидан озод қилинган шахсларни ижтимоий-маиший таъминлаш ва ишга жойлаштириш тизимини янада такомиллаштириш бўйича амалий чора-тадбирлар тўғрисида» 2018 йил 17 июлдаги 543-сон қарорининг 4-бандига иловага мувофиқ тузалиш йўлига ўтган ёки ўтмаган тоифадаги маҳкумлар билан тарбиявий ишларни амалга оширишни назарда тутувчи ўзгартиришлар киритилсин.
5. Мазкур қарорнинг бажарилишини назорат қилиш Ўзбекистон Республикаси ички ишлар вазири П.Р. Бобожонов зиммасига юклансин.
Вазирлар Маҳкамасининг 2023 йил 31 августдаги 430-сон қарорига ИЛОВА
Вазирлар Маҳкамасининг «Озодликдан маҳрум этиш жойларидан озод қилинган шахсларни ижтимоий-маиший таъминлаш ва ишга жойлаштириш тизимини янада такомиллаштириш бўйича амалий чора-тадбирлар тўғрисида» 2018 йил 17 июлдаги 543-сон қарорининг 4-бандига киритилаётган ўзгартиришлар
1. Олтинчи-еттинчи хатбошилар қуйидаги таҳрирда баён этилсин:
«а) тузалиш йўлига ўтмаганлар — уларга тарбиячилар бириктирилиб, маънавий қиёфасини яхшилашга доир чора-тадбирлар амалга оширилади, уларни содир этган жиноятидан пушаймон бўлишга ва қонунга итоаткор турмуш тарзига риоя қилишга ундайди;
б) тузалиш йўлига ўтганлар — уларда мустақил меҳнат кўникмасини уйғотиш ва ижтимоий фаол ҳаётий позициясини ривожлантириш мақсадида уларга нисбатан тўлиқ ижтимоий мослаштиришга қаратилган чора-тадбирлар амалга оширилади»;
2. Саккизинчи хатбоши чиқариб ташлансин.
3. Тўққизинчи — ўн учинчи хатбошилар тегишлича саккизинчи — ўн иккинчи хатбошилар деб ҳисоблансин.
Ўзбекистон Республикасининг Бош вазири А. АРИПОВ
Тошкент ш.,
2023 йил 31 август,
430-сон
Oʻzbekiston Respublikasi Vazirlar Mahkamasining
qarori
Jazoni ijro etish muassasalarida mahkumlarning huquqlari va qonuniy manfaatlarini ishonchli himoya qilish tizimi takomillashtirilganligi munosabati bilan Vazirlar Mahkamasining “Ozodlikdan mahrum etish joylaridan ozod qilingan shaxslarni ijtimoiy-maishiy taʼminlash va ishga joylashtirish tizimini yanada takomillashtirish boʻyicha amaliy chora-tadbirlar toʻgʻrisida” 2018-yil 17-iyuldagi 543-son qaroriga oʻzgartirishlar kiritish haqida
Soʻnggi yillarda mamlakatimizda mahkumlar uchun qulay shart-sharoitlar yaratilishi ularning huquq va erkinliklariga rioya etilishi hamda shaʼni va qadr-qimmati hurmat qilinishini taʼminlash borasida keng koʻlamli ishlar amalga oshirilmoqda.
Shu bilan birga, mahkumlar bilan tarbiyaviy ishlarni samarali tashkil etish orqali ularning tuzalish yoʻliga oʻtishiga koʻmaklashish, shuningdek, jazoni ijro etish muassasalarida mehnatga jalb etilgan mahkumlarga haq toʻlanadigan ish davrini ularning umumiy mehnat stajiga qoʻshib hisoblash tizimini joriy etishda zamonaviy axborot texnologiyalaridan keng foydalanish zarurati yuzaga kelmoqda.
Oʻzbekiston Respublikasining “Oʻzbekiston Respublikasining ayrim qonun hujjatlariga mahkumlarning huquqlari va qonuniy manfaatlarini ishonchli himoya qilishga qaratilgan oʻzgartish va qoʻshimchalar kiritish toʻgʻrisida” 2023-yil 15-fevraldagi OʻRQ-817-son Qonuniga muvofiq, shuningdek, mahkumlarning huquqlari, erkinliklari va qonuniy manfaatlarini taʼminlash maqsadida Vazirlar Mahkamasi qaror qiladi:
1. Oʻzbekiston Respublikasining “Oʻzbekiston Respublikasining ayrim qonun hujjatlariga mahkumlarning huquqlari va qonuniy manfaatlarini ishonchli himoya qilishga qaratilgan oʻzgartish va qoʻshimchalar kiritish toʻgʻrisida” 2023-yil 15-fevraldagi OʻRQ-817-son Qonuni bilan:
jazoni ijro etish muassasalarining ozodlikdan mahrum etishga hukm qilingan shaxslar mehnatiga haq toʻlashga doir xarajatlari ijtimoiy soliq boʻyicha soliq solish obyekti etib belgilanganligi;
ijtimoiy soliq toʻlangan davr ozodlikdan mahrum etishga hukm qilingan shaxslarning umumiy mehnat stajiga qoʻshib hisoblanishi;
mahkumlarning tuzalish yoʻliga oʻtganligini aniqlash mezonlari belgilab berilganligi maʼlumot uchun qabul qilinsin.
2. Oʻzbekiston Respublikasi Ichki ishlar vazirligi Raqamli texnologiyalar vazirligi va Vazirlar Mahkamasi huzuridagi Soliq qoʻmitasi bilan birgalikda uch oy muddatda:
jazoni ijro etish muassasalarida mehnatga jalb etilgan mahkumlarning haq toʻlanadigan ishga jalb etilgan davriga oid maʼlumotlarni yuritishni nazarda tutuvchi axborot tizimini (keyingi oʻrinlarda — axborot tizimi) joriy qilsin;
jazoni ijro etish muassasalari tomonidan mahkumlarga hisoblangan ijtimoiy soliq toʻlovlarini elektron tartibda soliq organlariga taqdim etish amaliyotini yoʻlga qoʻysin.
3. Belgilansinki, axborot tizimini joriy etish doirasida:
Oʻzbekiston Respublikasi Ichki ishlar vazirligi — buyurtmachi hisoblanadi;
bosh pudrat tashkiloti qonunchilik hujjatlarida belgilangan tartibda tender (tanlov) savdolari asosida aniqlanadi;
axborot tizimini joriy etish bilan bogʻliq xarajatlar Ichki ishlar vazirligining budjetdan tashqari mablagʻlari hisobidan amalga oshiriladi.
4. Vazirlar Mahkamasining “Ozodlikdan mahrum etish joylaridan ozod qilingan shaxslarni ijtimoiy-maishiy taʼminlash va ishga joylashtirish tizimini yanada takomillashtirish boʻyicha amaliy chora-tadbirlar toʻgʻrisida” 2018-yil 17-iyuldagi 543-son qarorining 4-bandiga ilovaga muvofiq tuzalish yoʻliga oʻtgan yoki oʻtmagan toifadagi mahkumlar bilan tarbiyaviy ishlarni amalga oshirishni nazarda tutuvchi oʻzgartirishlar kiritilsin.
5. Mazkur qarorning bajarilishini nazorat qilish Oʻzbekiston Respublikasi ichki ishlar vaziri P.R. Bobojonov zimmasiga yuklansin.
Vazirlar Mahkamasining 2023-yil 31-avgustdagi 430-son qaroriga ILOVA
Vazirlar Mahkamasining “Ozodlikdan mahrum etish joylaridan ozod qilingan shaxslarni ijtimoiy-maishiy taʼminlash va ishga joylashtirish tizimini yanada takomillashtirish boʻyicha amaliy chora-tadbirlar toʻgʻrisida” 2018-yil 17-iyuldagi 543-son qarorining 4-bandiga kiritilayotgan oʻzgartirishlar
1. Oltinchi-yettinchi xatboshilar quyidagi tahrirda bayon etilsin:
“a) tuzalish yoʻliga oʻtmaganlar — ularga tarbiyachilar biriktirilib, maʼnaviy qiyofasini yaxshilashga doir chora-tadbirlar amalga oshiriladi, ularni sodir etgan jinoyatidan pushaymon boʻlishga va qonunga itoatkor turmush tarziga rioya qilishga undaydi;
b) tuzalish yoʻliga oʻtganlar — ularda mustaqil mehnat koʻnikmasini uygʻotish va ijtimoiy faol hayotiy pozitsiyasini rivojlantirish maqsadida ularga nisbatan toʻliq ijtimoiy moslashtirishga qaratilgan chora-tadbirlar amalga oshiriladi”;
2. Sakkizinchi xatboshi chiqarib tashlansin.
3. Toʻqqizinchi — oʻn uchinchi xatboshilar tegishlicha sakkizinchi — oʻn ikkinchi xatboshilar deb hisoblansin.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 31-avgust,
430-son