📅 2023-yil 11-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 11 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 11 сентября 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 11 September 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Вазирлар Маҳкамасининг «Селекция ютуқлари синовларини ўтказишни ташкил этиш чора-тадбирлари тўғрисида» 2014 йил 29 декабрдаги 369-сон қарорига ўзгартиришлар ва қўшимча киритиш ҳақида
Мамлакатимизда интеллектуал мулк объектларини яратиш ва инновацион фаолиятни ривожлантириш, интеллектуал мулкни рўйхатга олиш тизимини соддалаштириш ҳамда бу орқали илм-фан ва ишлаб чиқаришни ўзаро боғлаш мақсадида комплекс чора-тадбирлар амалга оширилмоқда.
Шу билан бирга, интеллектуал фаолият натижаларини ҳуқуқий муҳофаза қилиш бўйича тартиб-таомилларни енгиллаштириш, бунда аҳолига хизмат кўрсатувчи давлат органлари ва ташкилотларининг фаолият йўналишларини аниқ белгилаш ҳамда уларни моддий жиҳатдан таъминлаш долзарб вазифалардан ҳисобланади.
Ўзбекистон Республикасининг «Селекция ютуқлари тўғрисида»ги Қонунига мувофиқ ҳамда Ўзбекистон Республикаси Президентининг «Интеллектуал мулк соҳасини янада ривожлантиришга оид қўшимча чора- тадбирлар тўғрисида» 2022 йил 26 апрелдаги ПҚ-221-сон қарори ижросини таъминлаш мақсадида Вазирлар Маҳкамаси қарор қилади:
1. Вазирлар Маҳкамасининг «Селекция ютуқлари синовларини ўтказишни ташкил этиш чора-тадбирлари тўғрисида» 2014 йил 29 декабрдаги 369-сон қарорига иловага мувофиқ қуйидагиларни назарда тутувчи ўзгартиришлар ва қўшимча киритилсин:
патентга лаёқатлилик экспертизасини ўтказиш билан боғлиқ қонунчиликдаги айрим тушунчаларни бир-бирига мувофиқлаштириш;
селекция ютуқларини рўйхатдан ўтказишга доир талабномалар бўйича ихтисослаштирилган ташкилотлар томонидан патентга лаёқатлилик экспертизаси ўтказилишини молиявий жиҳатдан таъминлаш.
2. Ўзбекистон Республикаси Адлия вазирлиги 15 кун муддатда селекция ютуқларини рўйхатдан ўтказишга доир талабномалар бўйича ўтказилган патентга лаёқатлилик экспертизаси юзасидан ихтисослаштирилган ташкилотларга тегишли маблағлар мазкур қарор талабларига мувофиқ қоплаб берилишини таъминласин.
3. Ўзбекистон Республикаси Қишлоқ хўжалиги вазирлиги манфаатдор вазирлик ҳамда идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.
4. Мазкур қарорнинг бажарилишини назорат қилиш Ўзбекистон Республикаси қишлоқ хўжалиги вазири А.Б. Воитов ва Ўзбекистон Республикаси адлия вазири А.Дж. Ташкулов зиммасига юклансин.
Вазирлар Маҳкамасининг 2023 йил 11 сентябрдаги 461-сон қарорига ИЛОВА
Вазирлар Маҳкамасининг «Селекция ютуқлари синовларини ўтказишни ташкил этиш чора-тадбирлари тўғрисида» 2014 йил 29 декабрдаги 369-сон қарорига киритилаётган ўзгартиришлар ва қўшимча
1. 1-бандда :
биринчи хатбоши қуйидаги таҳрирда баён этилсин:
«1. «Селекция ютуқлари тўғрисида»ги Ўзбекистон Республикаси Қонунига мувофиқ талабномада кўрсатилган селекция ютуғининг патентга лаёқатлилик экспертизаси, шу жумладан, синовларнинг қуйидаги ихтисослаштирилган ташкилотлар томонидан ўтказилиши маълумот учун қабул қилинсин:»;
учинчи хатбошидаги «Ўзбекистон Республикаси Ветеринария ва чорвачиликни ривожлантириш давлат қўмитаси» сўзлари «Ўзбекистон Республикаси Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси» сўзлари билан алмаштирилсин.
2. 2-банд ўз кучини йўқотган деб ҳисоблансин.
3. 3-банд қуйидаги таҳрирда баён этилсин:
«3. Белгилаб қўйилсинки, ҳайвонларнинг янги зотлари бўйича талабномада кўрсатилган селекция ютуғининг патентга лаёқатлилик экспертизаси Ўзбекистон Республикаси Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси томонидан ҳайвонларнинг янги зотлари яратилган ташкилотлар — чорва наслчилиги субъектларида ўтказилади».
4. Қуйидаги мазмундаги 3 1 -банд билан тўлдирилсин:
«3 1 . Селекция ютуқларига доир талабномалар бўйича патентга лаёқатлилик экспертизасини ўтказиш учун тўланган давлат божининг (патент божининг) селекция ютуқларини рўйхатга олувчи давлат органига тегишли қисми ушбу экспертизани ўтказган ихтисослаштирилган ташкилотга тўлиқ ўтказилади».
Ўзбекистон Республикасининг Бош вазири А. АРИПОВ
Тошкент ш.,
2023 йил 11 сентябрь,
461-сон
Oʻzbekiston Respublikasi Vazirlar Mahkamasining
qarori
Vazirlar Mahkamasining “Seleksiya yutuqlari sinovlarini oʻtkazishni tashkil etish chora-tadbirlari toʻgʻrisida” 2014-yil 29-dekabrdagi 369-son qaroriga oʻzgartirishlar va qoʻshimcha kiritish haqida
Mamlakatimizda intellektual mulk obyektlarini yaratish va innovatsion faoliyatni rivojlantirish, intellektual mulkni roʻyxatga olish tizimini soddalashtirish hamda bu orqali ilm-fan va ishlab chiqarishni oʻzaro bogʻlash maqsadida kompleks chora-tadbirlar amalga oshirilmoqda.
Shu bilan birga, intellektual faoliyat natijalarini huquqiy muhofaza qilish boʻyicha tartib-taomillarni yengillashtirish, bunda aholiga xizmat koʻrsatuvchi davlat organlari va tashkilotlarining faoliyat yoʻnalishlarini aniq belgilash hamda ularni moddiy jihatdan taʼminlash dolzarb vazifalardan hisoblanadi.
Oʻzbekiston Respublikasining “Seleksiya yutuqlari toʻgʻrisida”gi Qonuniga muvofiq hamda Oʻzbekiston Respublikasi Prezidentining “Intellektual mulk sohasini yanada rivojlantirishga oid qoʻshimcha chora- tadbirlar toʻgʻrisida” 2022-yil 26-apreldagi PQ-221-son qarori ijrosini taʼminlash maqsadida Vazirlar Mahkamasi qaror qiladi:
1. Vazirlar Mahkamasining “Seleksiya yutuqlari sinovlarini oʻtkazishni tashkil etish chora-tadbirlari toʻgʻrisida” 2014-yil 29-dekabrdagi 369-son qaroriga ilovaga muvofiq quyidagilarni nazarda tutuvchi oʻzgartirishlar va qoʻshimcha kiritilsin:
patentga layoqatlilik ekspertizasini oʻtkazish bilan bogʻliq qonunchilikdagi ayrim tushunchalarni bir-biriga muvofiqlashtirish;
seleksiya yutuqlarini roʻyxatdan oʻtkazishga doir talabnomalar boʻyicha ixtisoslashtirilgan tashkilotlar tomonidan patentga layoqatlilik ekspertizasi oʻtkazilishini moliyaviy jihatdan taʼminlash.
2. Oʻzbekiston Respublikasi Adliya vazirligi 15 kun muddatda seleksiya yutuqlarini roʻyxatdan oʻtkazishga doir talabnomalar boʻyicha oʻtkazilgan patentga layoqatlilik ekspertizasi yuzasidan ixtisoslashtirilgan tashkilotlarga tegishli mablagʻlar mazkur qaror talablariga muvofiq qoplab berilishini taʼminlasin.
3. Oʻzbekiston Respublikasi Qishloq xoʻjaligi vazirligi manfaatdor vazirlik hamda idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.
4. Mazkur qarorning bajarilishini nazorat qilish Oʻzbekiston Respublikasi qishloq xoʻjaligi vaziri A.B. Voitov va Oʻzbekiston Respublikasi adliya vaziri A.Dj. Tashkulov zimmasiga yuklansin.
Vazirlar Mahkamasining 2023-yil 11-sentabrdagi 461-son qaroriga ILOVA
Vazirlar Mahkamasining “Seleksiya yutuqlari sinovlarini oʻtkazishni tashkil etish chora-tadbirlari toʻgʻrisida” 2014-yil 29-dekabrdagi 369-son qaroriga kiritilayotgan oʻzgartirishlar va qoʻshimcha
1. 1-bandda :
birinchi xatboshi quyidagi tahrirda bayon etilsin:
“1. “Seleksiya yutuqlari toʻgʻrisida”gi Oʻzbekiston Respublikasi Qonuniga muvofiq talabnomada koʻrsatilgan seleksiya yutugʻining patentga layoqatlilik ekspertizasi, shu jumladan, sinovlarning quyidagi ixtisoslashtirilgan tashkilotlar tomonidan oʻtkazilishi maʼlumot uchun qabul qilinsin:”;
uchinchi xatboshidagi “Oʻzbekiston Respublikasi Veterinariya va chorvachilikni rivojlantirish davlat qoʻmitasi” soʻzlari “Oʻzbekiston Respublikasi Qishloq xoʻjaligi vazirligi huzuridagi Veterinariya va chorvachilikni rivojlantirish qoʻmitasi” soʻzlari bilan almashtirilsin.
2. 2-band oʻz kuchini yoʻqotgan deb hisoblansin.
3. 3-band quyidagi tahrirda bayon etilsin:
“3. Belgilab qoʻyilsinki, hayvonlarning yangi zotlari boʻyicha talabnomada koʻrsatilgan seleksiya yutugʻining patentga layoqatlilik ekspertizasi Oʻzbekiston Respublikasi Qishloq xoʻjaligi vazirligi huzuridagi Veterinariya va chorvachilikni rivojlantirish qoʻmitasi tomonidan hayvonlarning yangi zotlari yaratilgan tashkilotlar — chorva naslchiligi subyektlarida oʻtkaziladi”.
4. Quyidagi mazmundagi 3 1 -band bilan toʻldirilsin:
“3 1 . Seleksiya yutuqlariga doir talabnomalar boʻyicha patentga layoqatlilik ekspertizasini oʻtkazish uchun toʻlangan davlat bojining (patent bojining) seleksiya yutuqlarini roʻyxatga oluvchi davlat organiga tegishli qismi ushbu ekspertizani oʻtkazgan ixtisoslashtirilgan tashkilotga toʻliq oʻtkaziladi”.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 11-sentabr,
461-son