📅 2023-yil 18-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 18 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 18 сентября 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 18 September 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
МАЪМУРИЙ РЕГЛАМЕНТИ
СХЕМАСИ
СЎРОВНОМА
Тиббиёт ва фармацевтика ходимларини аттестациядан ўтказиш ва уларга малака тоифалари бериш бўйича давлат хизматларини кўрсатишнинг маъмурий регламентини тасдиқлаш тўғрисида
Ўзбекистон Республикаси Президентининг «Давлат хизматлари кўрсатиш инфратузилмасини такомиллаштириш ва аҳолининг давлат хизматларидан фойдаланиш имкониятларини кенгайтириш чора-тадбирлари тўғрисида» 2021 йил 24 июлдаги ПФ-6269-сон Фармонига мувофиқ тиббиёт ва фармацевтика ходимларини аттестациядан ўтказиш ва уларга малака тоифалари бериш бўйича давлат хизматларини кўрсатиш тизимини янада такомиллаштириш мақсадида Вазирлар Маҳкамаси қарор қилади:
1. Тиббиёт ва фармацевтика ходимларини аттестациядан ўтказиш ва уларга малака тоифалари бериш бўйича давлат хизматларини кўрсатишнинг маъмурий регламенти иловага мувофиқ тасдиқлансин.
2. Белгилансинки, талабгорлар ушбу қарор билан тасдиқланган маъмурий регламентга мувофиқ тиббиёт ва фармацевтика ходимларини аттестациядан ўтказиш ва уларга малака тоифалари бериш бўйича кўрсатиладиган давлат хизматларидан фойдаланиш учун Давлат хизматлари марказлари ҳамда Ўзбекистон Республикаси Ягона интерактив давлат хизматлари портали (кейинги ўринларда — ЯИДХП) орқали электрон шаклда мурожаат қиладилар.
3. Ўзбекистон Республикаси Соғлиқни сақлаш вазирлиги:
а) Рақамли технологиялар вазирлиги ва Адлия вазирлиги билан биргаликда:
ушбу қарор билан тасдиқланган маъмурий регламентга мувофиқ давлат хизматларини кўрсатиш ЯИДХП орқали жорий этилишини таъминласин;
ЯИДХПда давлат хизматларини кўрсатишнинг ҳар бир босқичида мурожаатлар кўриб чиқилишини кузатиб бориш тартибини жорий этсин;
б) тиббиёт ва фармацевтика ходимларига тегишли малака тоифаси берилганлиги тўғрисидаги сертификатларнинг навбатдаги малака тоифаларини беришда ҳамда амалдаги малака тоифасининг муддати тугагунга қадар ҳисобга олинишини таъминласин;
в) манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.
4. Тизимида даволаш-профилактика ташкилотлари бўлган вазирликлар ва идоралар:
бўйсунувидаги тиббиёт ва фармацевтика фаолияти билан шуғулланувчи ташкилотлар томонидан навбатдаги аттестациядан ўтадиган ҳамда навбатдан ташқари аттестациядан ўтиш хоҳишини билдирган;
аттестациядан ўтганига беш йил тўлган ва беш йил давомида амалдаги малака тоифасини ҳимоя қилмаган ёки малакасини оширмаган тиббиёт ва фармацевтика ходимларини навбатдаги аттестацияга жалб этиш чораларини кўрсин.
5. Ўзбекистон Республикаси Президентининг «Маъмурий ислоҳотлар доирасида соғлиқни сақлаш соҳасида давлат бошқарувини самарали ташкил қилиш чора-тадбирлари тўғрисида» 2023 йил 20 июндаги ПҚ-197-сон қарорига мувофиқ тиббиёт ва фармацевтика ходимларининг назарий билимлари, амалий кўникмалари, касбий маҳоратини аттестациядан ўтказиш ва уларга малака тоифалари бериш функцияларини амалга оширувчи давлат муассасаси шаклидаги Тиббиёт ва фармацевтика ходимларининг малакасини баҳолаш маркази ташкил этилганлиги маълумот учун қабул қилинсин.
6. Тиббиёт ва фармацевтика ходимларининг малакасини баҳолаш марказига аҳолининг декретирланган гуруҳлари, шу жумладан, фаолияти озиқ-овқат хом ашёси, озиқ-овқат маҳсулотлари ва ичимлик сувини ишлаб чиқариш, сақлаш, ташиш ва сотиш, болаларни ўқитиш ва тарбиялаш, аҳолига коммунал ва маиший хизматлар кўрсатиш билан боғлиқ бўлган шахслар учун ишлаб чиқариш санитарияси ва гигиеник ўқитиш бўйича пулли курслар ташкил қилиш ҳуқуқи берилсин.
7. Мазкур қарорнинг бажарилишини назорат қилиш Ўзбекистон Республикаси соғлиқни сақлаш вазири А.Ш. Иноятов зиммасига юклансин.
Вазирлар Маҳкамасининг 2023 йил 18 сентябрдаги 477-сон қарорига ИЛОВА
Тиббиёт ва фармацевтика ходимларини аттестациядан ўтказиш ва уларга малака тоифалари бериш бўйича давлат хизматларини кўрсатишнинг
1-боб. Умумий қоидалар
1. Мазкур маъмурий регламент (кейинги ўринларда — Регламент) тиббиёт ва фармацевтика ходимларини (кейинги ўринларда — талабгор) аттестациядан ўтказиш ва уларга малака тоифалари бериш бўйича давлат хизматларини (кейинги ўринларда — давлат хизмати) кўрсатиш тартибини белгилайди.
2. Малака тоифалари Ўзбекистон Республикаси Соғлиқни сақлаш вазирлиги тизимидаги Тиббиёт ва фармацевтика ходимларининг малакасини баҳолаш маркази (кейинги ўринларда — ваколатли орган) томонидан ташкилий-ҳуқуқий шаклидан ва идоравий бўйсунувидан қатъи назар, тиббиёт ва фармацевтика фаолияти билан шуғулланувчи барча ташкилотларда фаолият юритадиган шифокорлар, фармацевтлар, «Олий ҳамширалик иши» мутахассислигига эга бўлган ҳамширалар, ўрта тиббиёт ва ўрта фармацевтика ходимларига, шу жумладан, Ўзбекистон Республикаси ҳудудидаги тиббиёт ва фармацевтика ташкилотларида фаолият юритаётган чет эл фуқаролари ва фуқаролиги бўлмаган шахсларга (кейинги ўринларда — тиббиёт ва фармацевтика ходимлари) берилади.
3. Ушбу Регламентда қуйидаги асосий тушунчалар қўлланилади:
малака тоифаси — аттестация натижаларига кўра берилган тиббиёт ва фармацевтика ходимларининг назарий билими, амалий кўникмалари, касбий малакаси даражасини тасдиқловчи ҳамда уларни моддий рағбатлантириш учун асос бўладиган даража;
малака тоифаси берилганлиги тўғрисидаги сертификат (кейинги ўринларда — сертификат) — тиббиёт ва фармацевтика ходимларига малака тоифаси берилганлигини тасдиқловчи ҳужжат;
талабгор — ташкилий-ҳуқуқий шаклидан ва идоравий бўйсунувидан қатъи назар, барча ташкилотларда меҳнат қиладиган тиббиёт ва фармацевтика ходимлари.
4. Тиббиёт ва фармацевтика ходимлари ҳар беш йилда бир марта малака тоифасини бериш бўйича навбатдаги мажбурий аттестациядан ўтказилади («Олий ҳамширалик иши» мутахассислигига эга бўлган ҳамширалар, ўрта тиббиёт ёки фармацевтика ходимлари бундан мустасно).
Илгари аттестациядан ўтмаган ва ишга янги қабул қилинган шифокорлар ҳамда фармацевтлар ёки олий таълим ташкилотларини битириб, биринчи бор ишга кирган шифокор ва фармацевтлар мутахассислиги бўйича уч йил иш стажига эга бўлгандан сўнг малака тоифасини бериш мақсадида мажбурий аттестациядан ўтказилади.
Тиббиёт ва фармацевтика ходимлари ўз хоҳишига кўра навбатдан ташқари малака тоифасини бериш бўйича аттестациядан ўтказилиши мумкин.
Навбатдаги малака тоифасини бериш бўйича мажбурий аттестациядан, шунингдек, навбатдан ташқари аттестациядан ўтган шифокор ва фармацевтлар навбатдаги мажбурий аттестацияга беш йилдан сўнг жалб этилади.
Шифокор ва фармацевтлар малака тоифасини бериш бўйича мажбурий аттестацияга ўз муддатида жалб этилиши учун шифокор ва фармацевтлар фаолият кўрсатаётган ташкилот раҳбари шахсан жавобгар ҳисобланади.
5. Қуйидагилар навбатдаги малака тоифасини бериш бўйича мажбурий аттестацияга жалб этилмайди:
фан номзоди, фалсафа доктори (Doctor of Philosophy (PhD) ёки фан доктори (Doctor of Science (DSc) даражасига ҳамда Олий аттестация комиссияси томонидан берилган катта илмий ходим, доцент ва профессор илмий унвонига эга бўлган олий тиббий таълим ташкилотларининг шифокор ва фармацевтлари;
тиббиёт ёки фармацевтика фаолияти билан шуғулланаётган ва қонунчиликка мувофиқ пенсия ёшига тўлган шифокор ва фармацевтлар;
тиббиёт ёки фармацевтика фаолияти бўйича уч йилдан кам бўлган иш стажига эга шифокор ва фармацевтлар;
ҳомиладор аёллар, улар ҳомиладор бўлган даврда ҳамда ишга чиққанидан кейин бир йил давомида;
ҳомиладорлик ва туғиш ҳамда болани парвариш қилиш таътилларида бўлган аёллар, улар таътилда бўлган даврда ҳамда ишга чиққанидан кейин бир йил давомида;
тиббиёт ёки фармацевтика фаолияти билан шуғулланаётган уч ёшгача болалари бор аёллар;
узоқ вақт (уч ойдан ортиқ вақт мобайнида) даволанаётган шифокор ва фармацевтлар, улар даволанаётган даврда ҳамда ишга чиққанидан кейин олти ой давомида;
чет эл давлатларига ўқишга, қайта тайёрлаш ва малака ошириш курсларига юборилган (расмий ҳужжатлар билан асосланиши лозим) шифокор ва фармацевтлар.
6. Ўз хоҳишига кўра навбатдан ташқари аттестацияда қатнашиб, малака тоифасини оширган тиббиёт ва фармацевтика ходимларига оширилган малака тоифаси бўйича ҳақ тўланади.
Бунда навбатдан ташқари аттестацияда қатнашиб, аттестациядан ўта олмаган тиббиёт ва фармацевтика ходимларининг малака тоифаси туширилмайди.
7. Даволаш-профилактика ташкилотлари раҳбарлари:
навбатдаги мажбурий аттестациядан ўтиш муддати тугашидан олти ой олдин шифокор ва фармацевтларни аттестациядан ўтиши лозимлиги тўғрисида ёзма равишда хабардор қилиши;
тиббиёт ва фармацевтика ходимларини аттестациядан ўтказиш тартиби билан таништириши ҳамда аттестациядан ўтиш учун ҳужжат топшириш бошлангунга қадар уларнинг малака оширишини ташкил этиши лозим.
8. Тиббиёт ва фармацевтика ходимларига учинчи, иккинчи, биринчи ва олий малака тоифалари берилади.
Малака тоифаси 5 йил муддатга берилади.
9. Учинчи малака тоифаси — керакли назарий билимга эга бўлган, лекин иккинчи малака тоифасини олиш учун зарур иш стажига эга бўлмаган қуйидаги шифокорларга берилади:
умумий стоматология мутахассислиги бўйича олий маълумотга эга бўлган шифокорларга — фақат умумий стоматология мутахассислиги бўйича;
магистратурани тамомлаган ёки қайта тайёрлашдан ўтган шифокорларга — олган тор мутахассислиги бўйича.
Учинчи малака тоифаси шифокорларнинг хусусий тиббиёт ва фармацевтика ташкилотларига ишга кириши учун ва ушбу ташкилотлар фаолиятини лицензиялашга шароит яратиш мақсадида берилади. Давлат тиббиёт ва фармацевтика ташкилотларининг учинчи малака тоифасига эга шифокорлари учун малака тоифасига эга бўлмаган шифокорлар меҳнатига ҳақ тўлаш тартиби ва шартлари қўлланилади.
10. Иккинчи малака тоифаси — мутахассислиги бўйича камида уч йил иш стажига ҳамда зарур назарий билим ва амалий кўникмаларга эга бўлган тиббиёт ва фармацевтика ходимларига берилади. Иккинчи малака тоифасини олиш учун учинчи малака тоифасининг бўлиши талаб қилинмайди.
11. Биринчи малака тоифаси — мутахассислиги бўйича камида беш йил иш стажига, яхши назарий билим ва амалий кўникмаларга ҳамда иккинчи малака тоифасига эга бўлган тиббиёт ва фармацевтика ходимларига берилади.
12. Олий малака тоифаси — мутахассислиги бўйича камида етти йил иш стажига, юқори назарий билим ва амалий кўникмаларга ҳамда биринчи малака тоифасига эга бўлган тиббиёт ва фармацевтика ходимларига берилади.
Магистратура ва клиник ординатурани тугатган тиббиёт ва фармацевтика ходимларининг ўқиш давридаги ва эгаллаган мутахассислиги бўйича асосий ҳамда ўриндош иш жойидаги иш стажи инобатга олинади.
13. Малака тоифасини олиш учун мурожаат қилган тиббиёт ва фармацевтика ходимларининг мутахассислик бўйича иш стажи қонунчилик ҳужжатларига мувофиқ аниқланади, шунингдек, Ўзбекистон Республикаси соғлиқни сақлаш вазирининг буйруғи билан тасдиқланадиган турдош мутахассисликлар бўйича иш стажи ҳам ҳисобга олинади.
Тиббиёт ва фармацевтика ходими мутахассислигининг номланиши ўзгарганда, унинг олдинги мутахассислиги бўйича олган малака тоифаси бўйича меҳнатга ҳақ тўлаш шартлари сақланади, кейинчалик янги номдаги мутахассислик бўйича малака тоифасини олиш учун мурожаат қилганда олдинги мутахассислиги бўйича иш стажи ва олган малака тоифаси инобатга олинади.
Даволаш-профилактика ташкилотларининг биринчи раҳбарлари, уларнинг ўринбосарлари ҳамда соғлиқни сақлашнинг бошқарув тизимида фаолият юритаётган тиббиёт ва фармацевтика ходимлари соғлиқни сақлашни бошқариш ва жамоат соғлиғини сақлаш мутахассислиги бўйича, тиббиёт ва фармацевтика таълими соҳасида фаолият юритаётган тиббиёт ва фармацевтика ходимлари тиббий ихтисослигига мос равишда тегишли мутахассислиги бўйича малака тоифаси олиш учун мурожаат қилишлари мумкин. Бунда малака тоифаси мавжудлиги учун меҳнатга ҳақ тўлашнинг қўшимча тўловлари татбиқ этилади.
Тиббиёт ва фармацевтика ходимларининг малака тоифаси мавжудлиги учун меҳнатга ҳақ тўлашнинг қўшимча тўловлари сертификатда кўрсатилган санадан бошлаб унинг амал қилиш муддати давомида амалга оширилади.
14. Малака тоифаси «Олий ҳамширалик иши» мутахассислигига эга бўлган ҳамширалар, ўрта тиббиёт ёки фармацевтика ходимининг мурожаатига кўра асосий ва ўриндош иш жойидаги мутахассисликлардан биттаси бўйича ёки уларнинг ҳар бири бўйича алоҳида берилиши мумкин.
Шифокорлар малака тоифасини олиш бўйича асосий ва ўриндош иш жойидаги мутахассисликларнинг ҳар бири бўйича малака тоифасини олиши лозим. Бунда тиббиёт ёки фармацевтика ходимлари тегишли мутахассислик бўйича мазкур Регламентда белгиланган талабларга жавоб бериши керак.
Тиббиёт ёки фармацевтика ходимларига ўриндошлик асосидаги иш жойида мутахассислиги бўйича олган малака тоифаси учун ҳам белгиланган тартибда тўлов амалга оширилади.
15. Зарур иш стажига эга бўлган тиббиёт ёки фармацевтика ходимларига муддатидан олдин, бироқ охирги малака тоифаси берилган кундан камида бир йилдан кейин навбатдаги малака тоифаси берилиши мумкин.
Ўзбекистон Республикаси ҳудудидаги тиббиёт ташкилотларида бевосита даволаш-профилактика фаолияти билан шуғулланаётган, шунингдек, мазкур Регламентнинг 10 — 12-бандларида кўрсатилган иш стажига, илмий даражаси бўлган ёки истисно тариқасида, Ўзбекистон Республикаси соғлиқни сақлаш вазирининг тақдимномасига кўра илмий даражаси бўлмасада, юқори назарий билим ва амалий кўникмаларга эга бўлган мутахассисларга бир поғона юқори малака тоифаси берилади.
16. Давлат хизматлари марказлари ва ваколатли давлат органлари ўртасидаги ахборот алмашинуви электрон рақамли имзони (кейинги ўринларда — ЭРИ) мажбурий тартибда қўллаш орқали фақат идоралараро электрон ўзаро боғланиш ёрдамида амалга оширилади.
17. Тиббиёт ва фармацевтика ходимларига малака тоифаси бериш бўйича давлат хизматлари ушбу Регламентга 1-иловада келтирилган схемага мувофиқ кўрсатилади.
2-боб. Ҳужжатларни топшириш тартиби
18. Талабгор давлат хизматларидан фойдаланиш учун Давлат хизматлари марказига ўзи келиб мурожаат этади ёки Ўзбекистон Республикаси Ягона интерактив давлат хизматлари порталида (кейинги ўринларда — ЯИДХП) рўйхатдан ўтади.
Аризалар ЯИДХП орқали дам олиш ва байрам кунларидан қатъи назар, ҳар куни 24 соат давомида юборилиши мумкин.
Бунда аризалар иш вақтидан кейин ёки дам олиш ва байрам кунлари тушганда, навбатдаги иш куни аризаларнинг ваколатли органга тушган ва ваколатли орган томонидан қабул қилинган кун ҳисобланади.
19. Талабгор ёки унинг номидан ариза бериш ҳуқуқига эга бўлган шахс ўзи келиб мурожаат этган тақдирда, Давлат хизматлари маркази ходими ариза берувчи номидан, ЯИДХП орқали мурожаат этганда эса, мустақил равишда ушбу Регламентга 2-иловага мувофиқ электрон шаклдаги сўровномани тўлдиради. Учинчи шахслар манфаати учун ҳаракат қилаётганда, сўровномага нотариал тасдиқланган ишончнома илова қилинади.
Сўровномага қуйидаги ҳужжатлар илова қилинади:
мутахассислик бўйича малака оширганлиги тўғрисидаги ҳужжатнинг нусхаси;
илмий семинарлар, съездлар, конференцияларда қатнашганлиги ҳамда хорижий давлатларда малака оширганлигини тасдиқловчи ҳужжатларнинг (диплом, гувоҳнома, сертификат ва бошқалар) нусхаси (мавжуд бўлганда).
Талабгорнинг сўровномасида унинг электрон манзили кўрсатилиши мумкин. Сўровномада талабгор электрон манзилининг ҳамда SMS-хабарлар олиш учун мобил телефон рақамининг кўрсатилганлиги унинг сўровнома бўйича қабул қилинган қарор ҳақида ахборот тизими орқали хабарнома олишга розилигини англатади.
Талабгорнинг иш стажини, олий ва ўрта махсус, профессионал таълим ташкилотларида ўқиганлигини тасдиқловчи архив маълумотномалари тиббий ёки фармацевтик маълумоти (олий, ўрта махсус, интернатура, клиник ординатура, магистратура, илмий даража, қайта тайёрлаш) тўғрисидаги диплом (ҳужжат) ва/ёки хорижий таълим ташкилотида олинган олий маълумот тўғрисидаги диплом ёхуд олий маълумот тўғрисидаги ҳужжат (Ўзбекистон Республикасида тан олинганлиги тўғрисидаги) маълумотлари, шунингдек, ходимнинг меҳнат фаолияти тўғрисидаги маълумотлари электрон ҳамкорлик йўли билан «Электрон ҳукумат»нинг идоралараро интеграциялашув платформаси орқали олинади («Ягона миллий меҳнат тизими» идоралараро дастурий-аппарат комплекси орқали ходимнинг меҳнат фаолияти тўғрисидаги маълумотларини олиш имконияти мавжуд бўлмаган ҳолларда, талабгордан мазкур маълумотларни сўрашга йўл қўйилади).
Тақдим этилган ҳужжатлардаги маълумотларнинг ҳаққонийлигига талабгор масъул ҳисобланади.
20. Сўровнома тўлдирилганидан сўнг талабгор маълумотларнинг тўғрилигини текширади ва уни имзоларни идентификация қилишнинг тегишли воситалари (дактилоскопия, электрон имзо, мобил-ID ва бошқалар) билан тасдиқлайди.
Талабгор ЯИДХП орқали мурожаат этган тақдирда, сўровномани ЭРИ билан тасдиқлаш талаб этилмайди.
21. Давлат хизматлари кўрсатилганлиги учун қуйидаги миқдорларда тўлов ундирилади:
шифокор ва фармацевтлардан — базавий ҳисоблаш миқдорининг икки баравари миқдорида;
«Олий тиббий ҳамроҳлик иши» мутахассислигига эга бўлган ҳамширалар, ўрта тиббиёт ва ўрта фармацевтика ходимларидан — базавий ҳисоблаш миқдорининг бир баравари миқдорида.
22. Давлат хизматлари кўрсатилиши учун ЯИДХП орқали мурожаат этилганда, белгиланган тўлов суммасининг 90 фоизи ундирилади.
Ижтимоий реестрнинг «камбағал оила» тоифасига киритилган оилаларнинг аъзоларига, шунингдек, I ва II гуруҳ ногиронлиги бўлган шахсларга мазкур банднинг биринчи хатбошисида белгиланган тўловнинг 50 фоизи миқдорида, Ижтимоий реестрнинг «давлат таъминотидаги оила» тоифасига киритилган оилаларнинг аъзоларига 75 фоизи миқдорида чегирма қўлланилади. Бунда чегирма Ижтимоий реестрнинг:
«давлат таъминотидаги оила» ёки «камбағал оила» тоифасидан «камбағаллик чегарасидаги оила» тоифасига ўтказилган оилаларга, уларнинг илгари белгиланган тоифасига мувофиқ миқдорда;
оғир ҳаётий вазиятга тушган оила сифатида «камбағаллик чегарасидаги оила» тоифасига киритилган оилаларга «камбағал оила» тоифасидаги оила учун белгиланган миқдорда қўлланилади;
Давлат хизматлари кўрсатилгани учун тўловлар Ягона биллинг тизими орқали амалга оширилади.
22 1 . Таълим ташкилотида қонунчилик ҳужжатларига мувофиқ тузилган меҳнат шартномаси асосида таълим ва тарбия соҳасида касбий фаолиятни амалга оширувчи педагог шахслардан мазкур Регламентнинг 21-бандида белгиланган тўлов суммасининг 50 фоизи ундирилади.
23. Тўловлар суммаси қуйидаги тартибда тақсимланади:
а) Давлат хизматлари марказларига ўзи келиб мурожаат этганда:
18 фоизи — Ўзбекистон Республикаси Адлия вазирлигининг Давлат хизматларини ривожлантириш жамғармасига;
0,5 фоизи — Ягона биллинг тизими орқали давлат хизматларини кўрсатганлик учун Ўзбекистон Республикаси Рақамли технологиялар вазирлиги ҳузуридаги «Электрон ҳукумат лойиҳаларини бошқариш маркази» давлат муассасасининг Иқтисодиёт ва молия вазирлиги ҳузуридаги Ғазначилик хизмати қўмитасидаги махсус ҳисобварағига;
қолган маблағлар — ваколатли органнинг Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасидаги махсус ҳисобварағига;
б) ЯИДХП орқали мурожаат этилганда:
11,75 фоизи — Ўзбекистон Республикаси Рақамли технологиялар вазирлиги ҳузуридаги «Электрон ҳукумат лойиҳаларини бошқариш маркази» давлат муассасасининг Иқтисодиёт ва молия вазирлиги ҳузуридаги Ғазначилик хизмати қўмитасидаги махсус ҳисобварағига (шу жумладан, 0,5 фоизи йиғим тўланганлиги Ягона биллинг тизими орқали тасдиқланганлиги учун);
қолган маблағлар — ваколатли органнинг Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасидаги махсус ҳисобварағига ўтказилади;
24. Талабгор давлат хизматларидан фойдаланишда уларни кўрсатишнинг ҳар қандай босқичида бош тортиш ҳуқуқига эга. Талабгор давлат хизматларидан фойдаланишдан бош тортганда, унинг сўровномаси кўриб чиқилмасдан қолдирилади ва тўланган тўлов суммаси қайтарилмайди.
25. Талабгор давлат хизматлари марказига келиб мурожаат этганда, унинг сўровномаси марказ ходими томонидан тўлдирилиб, талабгор томонидан тасдиқлангандан сўнг мазкур Регламентнинг 19-бандига мувофиқ ҳужжатлар илова қилинган ҳолда, ўн дақиқада ваколатли органга электрон шаклда юборилади. ЯИДХП орқали мурожаат қилинганда эса, сўровнома автоматик тарзда ваколатли органга юборилади.
26. Ваколатли орган сўровнома келиб тушган кундан бошлаб 5 иш куни ичида уни ўрганиб чиқади ва талабгорни аттестацияга қўйиш ёки қўймаслик тўғрисида қарор қабул қилади.
27. Аттестацияга қўйилган талабгорлар рўйхати ваколатли органнинг расмий веб-сайтида аттестация ўтказиш санасидан ўн беш кун олдин жойлаштирилади.
28. Талабгорга давлат хизматлари кўрсатилиши рад этилган тақдирда, ваколатли орган томонидан ушбу Регламентга мувофиқ рад этиш тўғрисидаги билдиришнома рад этиш сабаблари ва талабгор ушбу сабабларни бартараф этиб, такроран кўриб чиқиш учун ҳужжатларни тақдим этиши мумкин бўлган муддат (20 иш кун ичида) кўрсатилган ҳолда, Давлат хизматлари марказига ёки ЯИДХП орқали унинг шахсий кабинетига электрон шаклда юборилади.
Талабгорга рад этиш сабаблари бартараф этилиши учун тақдим этилган муддат давомида қайта тақдим этилган ҳужжатлар кўриб чиқилганлиги учун тўлов ундирилмайди.
Рад этиш тўғрисидаги билдиришномада кўрсатилган муддат тугагандан сўнг берилган сўровнома янгидан берилган ҳисобланади.
29. Қуйидагилар талабгорнинг аттестацияга қўйилмаслиги учун асос ҳисобланади:
Ўзбекистон Республикаси Президентининг «Тиббий-санитария соҳасида кадрларни тайёрлаш ва узлуксиз касбий ривожлантиришнинг мутлақо янги тизимини жорий этиш чора-тадбирлари тўғрисида» 2020 йил 7 апрелдаги ПҚ-4666-сон қарорига 4-иловага ҳамда Вазирлар Маҳкамасининг «Тиббиёт ходимлари малакасини ошириш ва уларни қайта тайёрлаш тизимини такомиллаштириш тўғрисида» 2009 йил 18 декабрдаги 319-сон қарорига мувофиқ малака оширганлиги тўғрисидаги ҳужжат тақдим этилмаганда;
Ушбу Регламентнинг 28-бандига мувофиқ рад этиш тўғрисидаги билдиришномада кўрсатилган муддат тугаганда.
Давлат хизматлари кўрсатишни мазкур бандда кўрсатилган асослардан бошқа ҳолатлар бўйича рад этишга йўл қўйилмайди.
30. Талабгордан ҳужжатларни қабул қилиш заруратга кўра маълумотларни умумлаштириш ва техник мувофиқликни таъминлаш мақсадида ҳар йили январь ва август ойларида расмий эълон берилган ҳолда тўхтатилиши мумкин.
3-боб. Талабгорни аттестациядан ўтказиш тартиби
31. Ваколатли орган томонидан талабгорни аттестациядан ўтказиш шакли ва жадвали ҳар йили 1 февралга қадар тасдиқланади ҳамда Ўзбекистон Республикаси Соғлиқни сақлаш вазирлигининг расмий веб-сайтида эълон қилинади.
Мазкур жадвалга ваколатли орган томонидан ҳужжат топширган талабгорлар сонидан келиб чиққан ҳолда, ўзгартириш ва қўшимчалар киритилиши мумкин. Бунда уч кун ичида ушбу ўзгартириш ва қўшимчалар тўғрисида Ўзбекистон Республикаси Соғлиқни сақлаш вазирлигининг расмий веб-сайтида эълон қилиниши лозим.
32. Талабгор амалдаги малака тоифаси муддати тугашидан камида олти ой олдин аттестациядан ўтиш тўғрисида мурожаат қилиши лозим.
Талабгор амалдаги малака тоифаси муддати тугагандан кейин олти ой давомида малака тоифаси олиш учун мурожаат қилишга ҳақли. Талабгорнинг ҳаракатсизлиги (мазкур Регламентнинг 5-бандида назарда тутилган ҳолатлар бундан мустасно) туфайли малака тоифаси олиш учун мурожаат этиш муддати ўтказиб юборилганда, мавжуд малака тоифасидан бир поғона туширилади.
33. Талабгорга малака тоифаси бериш бўйича аттестация икки босқичда ўтказилади:
биринчи босқич — онлайн тест синови (кейинги ўринларда — тест синови);
иккинчи босқич — амалий синовларга тегишли бўлган малака тоифаларига мос равишда табақалаштирилган саволлар асосида суҳбат.
34. Тест синовлари Қорақалпоғистон Республикаси, вилоятлар ва Тошкент шаҳрида ваколатли орган томонидан ташкил этилган тест синовини ўтказишга мослаштирилган ҳамда махсус камералар ўрнатилган хоналарда ваколатли орган томонидан тасдиқланган жадвал асосида ўтказилади.
35. Тест синовини топширишда талабгор шахсини тасдиқловчи ҳужжатнинг асл нусхаси (фуқаролик паспорти, идентификация ID-картаси, фуқаронинг хорижга чиқиш биометрик паспорти ёки ҳайдовчилик гувоҳномаси кабилар) тақдим этади.
Шахсни тасдиқловчи ҳужжатга эга бўлмаган ёки тест синовига кечиккан талабгорлар аттестацияга келмаган ҳисобланади ва навбатдаги тест синовидан ўтадиган талабгорлар рўйхатига киритилади, бу ҳақда талабгор Давлат хизматлари маркази (ўзи келиб мурожаат қилган тақдирда) ёки ЯИДХП орқали (электрон тарзда мурожаат этган тақдирда) уч иш кунидан кечиктирмай хабардор қилинади.
36. Агар талабгор тегишли тарзда хабардор қилинганидан кейин иккинчи марта тест синовини топшириш учун келмаса, талабгорга давлат хизматини кўрсатиш рад қилинган ҳисобланади. Бунда давлат хизматидан фойдаланиш учун тўланган тўлов суммаси қайтариб берилмайди.
Ҳужжатлар мазкур Регламентда белгиланган умумий тартибда янгидан ариза бериш орқали қайта топширилади.
37. Аттестациянинг очиқ ва ошкора ўтказилишини таъминлаш учун аттестация жараёни аудио ва видеоёзувларда қайд этиб борилади ва видеотасвир ваколатли органда камида бир йил сақланади.
Аттестация жараёнини узлуксиз равишда аудио ва видеотасвирга тушириш ҳамда Ўзбекистон Республикаси Соғлиқни сақлаш вазирлигининг расмий веб-сайтида онлайн трансляция қилиш учун алоҳида имтиҳон хоналари ажратилади. Мазкур хоналар замонавий техник асбоб-ускуналар (компьютер, овозли видеокамера, Интернет жаҳон ахборот тармоғи ва бошқалар) билан таъминлаб, талабгорлар учун тегишли шарт-шароитлар яратилади.
38. Тест синови саволлари қонунчилик ҳужжатларига киритилган ўзгартириш ва қўшимчаларни ҳисобга олган ҳолда янгилаб борилади.
39. Тест синови учун 50 дақиқа вақт ажратилади. Тест синови даврида ҳар бир тестдан ўтувчига 50 та савол берилади. Ҳар бир савол бир балли тизимда баҳоланади. Максимал балл 50 баллни ташкил этади.
Тест синовлари босқичида максимал баллнинг 56 фоизидан (28 балл) кам тўплаган талабгор кейинги босқич синовларига киритилмайди ва малака тоифаси беришга нолойиқ деб эътироф этилади.
Аттестациянинг тест синови босқичида малака тоифаси беришга нолойиқ деб топилган талабгор умумий асосларда аттестациядан ўтиш учун ҳужжатларини топшириши мумкин.
40. Тест синовининг натижалари шу вақтнинг ўзида эълон қилинади. Талабгор тест синовини муваффақиятли топширган тақдирда, аттестациянинг иккинчи босқичига қўйилади.
41. Тест синовлари якунида уни ўтказишга масъул шахс томонидан баённома тузилади.
Баённомада қуйидаги маълумотлар кўрсатилади:
тест синови ўтказилган жой ва сана;
тест синови бошланган ва тугалланган вақт;
тест синовида ҳозир бўлган ва келмаган талабгорлар рўйхати;
ҳар бир талабгорнинг фамилияси, исми ва отасининг исми, мутахассислиги ва бошқа маълумотлар, шунингдек, тест синови натижасида олинган баллар кўрсатилади.
Баённома тест синовини ўтказишга масъул шахс томонидан имзоланади.
42. Аттестациянинг иккинчи босқичи амалий синовларга тегишли бўлган малака тоифаларига мос равишда табақалаштирилган саволлар асосида суҳбат шаклида ўтказилади.
Аттестациянинг суҳбат босқичи ваколатли орган ҳузурида ёки ваколатли органнинг Қорақалпоғистон Республикаси ва вилоятларда ташкил этиладиган ихтисослаштирилган аттестация комиссиялари (кейинги ўринларда — аттестация комиссияси) томонидан ўтказилади.
Аттестация комиссиясини ташкил этиш учун тегишлилиги бўйича ваколатли орган томонидан камида беш нафар аъзодан, шу жумладан, аттестация комиссияси раиси, раис ўринбосари ва котибидан иборат таркибда номзодлар рўйхати шакллантирилади.
Аттестацияда комиссия раиси иштирок этмаган тақдирда, комиссия аъзоларининг таклифига кўра комиссия аъзоларидан бири раислик вазифасини бажаради.
Аттестация комиссиясининг таркиби ваколатли орган томонидан тасдиқланади.
Аттестация комиссияси таркиби ҳар йили қайта тасдиқланади. Бунда аттестация комиссияси таркибининг камида 20 фоизи янгиланиши керак.
Аттестация комиссиясининг аъзолари аттестация комиссияси таркибига шартнома асосида жалб этилиши мумкин.
43. Аттестация комиссияси аъзоларининг сони, ҳар бир аттестация комиссиясининг ихтисослиги ва улар томонидан аттестациядан ўтказиладиган мутахассисликлар тегишли ҳудудда фаолият юритаётган талабгорларнинг сонидан келиб чиққан ҳолда белгиланади.
Аттестация комиссиясининг ихтисослиги аттестация комиссиялари аъзоларининг мутахассислигига мувофиқ бўлиши зарур.
44. Аттестация комиссияси таркибига Ўзбекистон Республикаси Соғлиқни сақлаш вазирлиги, Соғлиқни сақлаш вазирлиги ҳузуридаги Санитария-эпидемиологик осойишталик ва жамоат саломатлиги қўмитаси, олий тиббий таълим ташкилотлари, ихтисослаштирилган илмий-амалий тиббиёт марказлари, илмий-тадқиқот институтлари, даволаш-профилактика ташкилотларида ҳамда хусусий тиббиёт ташкилотларида фаолият юритаётган илмий даражага ёки мутахассислиги бўйича олий малака тоифасига эга бўлган тиббиёт ва фармацевтика ходимлари, шунингдек, тармоқ касаба уюшмаси кенгаши вакиллари ҳамда бошқа мутахассислар жалб этилади.
45. Аттестация комиссияси:
талабгорнинг мутахассислиги ва фаолияти бўйича қисқача ахборотни тинглайди;
аттестациядан ўтадиган талабгорга саволлар ёки симуляцион ёхуд ситуацион топшириқ беради, унинг жавоблари натижалари бўйича очиқ овоз беришни ўтказади;
аттестация натижаси бўйича талабгорга баҳо беради;
аттестациядан ўтган талабгор фаолиятини яхшилаш бўйича тавсиялар беради;
малака тоифаларининг турларидан келиб чиқиб, уларнинг даражаларига мос равишда табақалаштирилган аттестация саволларини тузади ва янгилаб боради;
аттестация ўтказиш билан боғлиқ бошқа масалаларни кўриб чиқади.
Аттестация комиссияси йиғилиши унинг ишида аттестация комиссияси аъзоларининг камида учдан икки қисми иштирок этган тақдирда, ваколатли ҳисобланади.
Аттестация жараёни аудио ва видеоёзувларда қайд этиб борилади. Бунда талабгорга мутахассислиги бўйича ўн балли тизимда баҳоланадиган 5 та савол берилади ва 15 дақиқа вақт ажратилади.
Талабгорнинг ҳар бир саволга жавоби аттестация комиссияси аъзоларининг кўпчилик овози билан ўн балли тизимда баҳоланади.
Аттестациянинг иккинчи босқичида тўпланадиган максимал балл 50 баллни ташкил этади. Аттестация якунида талабгорларга аттестация натижалари эълон қилинади.
46. Аттестацияни топшириш жараёнида талабгорга қуйидагилар тақиқланади:
қонунчилик ҳужжатлари ва йўриқнома материаллар, ахборотномалар ва махсус адабиётлардан фойдаланиш;
мобил алоқа воситаси ва бошқа алоқа воситаларидан фойдаланиш;
бошқа талабгорлар билан суҳбатлашиш;
аттестация хонасидан ташқарига чиқиш.
Ушбу талабларни бузган талабгорлар имтиҳон ўтаётган хонадан чиқариб юборилади ва аттестациядан ўтмаган ҳисобланади.
47. Ваколатли органнинг кузатувчи сифатида иштирок этадиган ходимларидан бошқа бегона шахсларга аттестацияда иштирок этишга рухсат берилмайди.
48. Аттестациянинг иккинчи босқичида олинган умумий баллар йиғиндиси ҳар бир талабгор бўйича аттестация комиссияси томонидан қуйидагича қарор қабул қилиниши учун асос бўлади:
тўпланиши мумкин бўлган энг юқори (50) баллнинг 60 фоизи ёки 30 балл ва ундан юқориси учун — талабгорлик қилаётган малака тоифасига лойиқ деб топиш ҳақида;
тўпланиши мумкин бўлган энг юқори баллнинг 50 фоизи (25 балл)дан 60 фоизи (30 балл)гача — талабгорлик қилаётган малака тоифасидан бир поғона паст малака тоифаси бериш ҳақида;
тўпланиши мумкин бўлган энг юқори баллнинг 45 фоизи (22,5 балл)дан 50 фоизи (25 балл)гача — талабгорлик қилаётган малака тоифасидан икки поғона паст малака тоифаси бериш ҳақида;
тўпланиши мумкин бўлган энг юқори баллнинг 45 фоизи (22,5 балл)дан кам балл учун ёки мазкур банднинг учинчи , тўртинчи хатбошиларига мувофиқ тегишли паст поғонадаги малака тоифаси мавжуд бўлмаган ҳолларда — малака тоифаси беришга нолойиқ деб топиш ҳақида.
Аттестациянинг иккинчи босқичида тўпланган умумий баллар йиғиндиси максимал 50 баллнинг 45 фоизидан кам бўлгани учун малака тоифаси беришга нолойиқ деб топилган талабгор аттестация ўтказилган кундан бошлаб уч ой ўтгач, умумий асосларда аттестациядан ўтиш учун ҳужжатларини топшириши мумкин.
49. Аттестациянинг иккинчи босқичига келмаган талабгорлар навбатдаги иккинчи босқич аттестациядан ўтадиган талабгорлар рўйхатига киритилади, бу ҳақда талабгор Давлат хизматлари маркази (ўзи келиб мурожаат қилган тақдирда) ёки ЯИДХП орқали (электрон тарзда мурожаат этган тақдирда) уч иш кунидан кечиктирмай хабардор қилинади.
Агар талабгор тегишли тарзда хабардор қилинганидан кейин иккинчи марта ҳам аттестацияда иштирок этмаса, талабгорга давлат хизматини кўрсатиш рад қилинган ҳисобланади. Бунда давлат хизматидан фойдаланиш учун тўланган тўлов суммаси қайтариб берилмайди.
Ҳужжатлар мазкур Регламентда белгиланган умумий тартибда янгидан ариза бериш орқали қайта топширилади.
4-боб. Малака тоифасини бериш тартиби
50. Талабгорнинг аттестация натижалари аттестация комиссияси қарори билан мазкур Регламентнинг 41-бандига мувофиқ расмийлаштириладиган баённомага асосан тасдиқланади ҳамда ваколатли органда сақланади.
51. Аттестация тугагандан бошлаб ўн иш куни ичида аттестация якунлари бўйича ваколатли органнинг тегишли буйруғи қабул қилинади ва мазкур Регламентга 3-иловага мувофиқ шаклда QR-код (матрик штрихли код) қўйилган сертификатни расмийлаштиради.
Ваколатли орган сертификатни Давлат хизматлари маркази ёки ЯИДХП орқали талабгорга юборади, ушбу сертификат Ўзбекистон Республикасининг барча ҳудудларида юридик кучга эга бўлади.
52. Ваколатли орган сертификатни расмийлаштиради ва Малака тоифаси сертификатларининг реестрини (кейинги ўринларда — реестр) шакллантиради.
Реестр электрон шаклда юритилади.
Реестр шакли ваколатли орган томонидан тасдиқланади.
53. Реестрга киритилган талабгорга тааллуқли шахсини тасдиқловчи ҳужжат маълумотлари ва яшаш манзили каби шахсий маълумотлардан ташқари барча маълумотлар билан танишиб чиқиш учун очиқ бўлиб, ваколатли органнинг расмий веб-сайтида чоп этилади.
54. Давлат хизматлари маркази сертификат олингандан сўнг ўн дақиқа мобайнида уни талабгорнинг электрон манзилига юборади ва талабгорни бу ҳақда ахборот-коммуникация тизими орқали хабардор қилади. Талабгорнинг сўровига кўра Давлат хизматлари маркази сертификатни электрон ёки қоғоз шаклда тақдим этиши мумкин.
55. Аттестациядан ўта олмаган талабгор аттестация ўтказилган кундан бошлаб ўттиз иш куни ичида ваколатли органга апелляция бериш ҳуқуқига эга. Апелляция ёзма равишда тақдим этилади.
Апелляция комиссияси апелляция шикоятини кўриб чиқишда зарур ҳолларда, талабгор ёки аттестация комиссияси аъзолари ёхуд бетараф мутахассисларни таклиф қилиши мумкин.
Апелляция комиссияси таркиби ваколатли орган томонидан камида беш нафар аъзодан, шу жумладан, комиссия раиси, раис ўринбосари ва котибидан иборат таркибда тасдиқланади. Аттестация комиссияси аъзолари апелляция комиссияси таркибига киритилмайди.
Апелляция комиссияси 10 иш куни ичида киритилган апелляцияни кўриб чиқади ва талабгорга қабул қилинган қарор ҳақида ёзма равишда хабар беради.
56. Апелляцияни кўриб чиқиш натижалари юзасидан апелляция комиссияси томонидан қуйидаги қарорлардан бири қабул қилинади:
аттестация натижаларини (ёзма равишда асосланган хат асосида) ўзгаришсиз қолдириш ва апелляцияни қаноатлантиришни рад этиш тўғрисида;
апелляцияни қаноатлантириш ва талабгор аттестацияни топширган деб ҳисоблаш тўғрисида;
талабгорни такроран аттестацияга қўйиш тўғрисида.
57. Аттестация натижаларини ўзгаришсиз қолдириш ва апелляцияни қаноатлантиришни рад этиш тўғрисидаги қарор қуйидаги ҳолларда қабул қилинади:
апелляция мазкур Регламент талабларини бузган ҳолда тақдим этилган бўлса;
апелляцияда кўрсатилган важлар ўз тасдиғини топмаса.
58. Аттестацияни такроран ўтказиш тўғрисидаги қарор апелляция берган талабгорнинг аттестация мазкур Регламент талабларига зид равишда ўтказилганлиги ҳолатлари аниқланган тақдирда қабул қилинади.
59. Ваколатли орган томонидан апелляция берган талабгор учун аттестацияни такроран ўтказиш тўғрисида қарор қабул қилинган тақдирда, такрорий аттестация мазкур Регламентда белгиланган тартибда ўтказилади.
Бунда аттестация Регламент талабларига зид равишда ўтказилганлиги ҳолатлари аниқланган тақдирда, апелляция берган талабгор учун аттестация такроран ўтказилишини инобатга олган ҳолда, аттестация такроран бепул ўтказилади.
60. Ўтказилган битта аттестация юзасидан такроран апелляция берилмайди.
61. Ваколатли органнинг қарори устидан қонунчилик ҳужжатларида белгиланган тартибга судга шикоят қилиниши мумкин.
62. Сертификатда кўрсатилган маълумотлар ўзгарган тақдирда, талабгор сертификатни қайта расмийлаштириш учун ваколатли органга ўн иш куни ичида Давлат хизматлари марказига бевосита ўзи ёки ишончли вакили орқали мурожаат этади ёхуд ЯИДХПда ушбу Регламентнинг 19-бандига мувофиқ сўровномани тўлдиради.
Сўровнома тўлдирилганидан сўнг талабгор маълумотларнинг тўғрилигини текширади ва имзоларни идентификация қилишнинг тегишли воситалари (дактилоскопия, электрон имзо, мобил-ID ва бошқалар) билан тасдиқлайди.
63. Сертификатни қайта расмийлаштирганлик учун тўлов ундирилмайди.
64. Ваколатли орган талабгорнинг сўровномаси келиб тушган кундан бошлаб уч иш кунидан кўп бўлмаган муддатда сертификатни қайта расмийлаштиради ва ушбу Регламентнинг 54-бандига мувофиқ белгиланган тартибда талабгорга юборади, шунингдек, бу тўғрисидаги маълумотни ваколатли органнинг расмий веб-сайтига жойлаштиради.
65. Ваколатли орган сертификатни қайта расмийлаштиришда реестрга тегишли ўзгартиришлар киритади.
Сертификатни қайта расмийлаштиришда илгари берилган сертификатнинг серияси, рақами ва амал қилиш муддати ўзгармайди.
66. Сертификатни қайта расмийлаштириш учун талабгордан қайта имтиҳондан ўтиш талаб қилинмайди.
67. Сертификатнинг амал қилиши қуйидаги ҳолларда ваколатли органнинг қарорига биноан бекор қилинади:
талабгор сертификатнинг амал қилишини бекор қилиш бўйича мурожаат қилганда;
сертификатни бериш тартиби бекор қилинганда;
сертификатнинг амал қилиш муддати тамом бўлганда;
талабгорнинг муомалага лаёқатлилиги белгиланган тартибда чекланганда, у муомалага лаёқатсиз деб топилганда;
талабгор вафот этганда.
68. Ваколатли орган қуйидаги ҳолларда сертификатнинг амал қилишини бекор қилиш тўғрисида судга мурожаат қилади:
ваколатли органнинг сертификат бериш тўғрисидаги қарорининг қонунга хилофлиги аниқланганда;
сертификатнинг қалбаки ҳужжатлардан фойдаланган ҳолда олинганлиги аниқланганда;
талабгор сертификат ёки унга оид қонунчилик ҳужжатлари талабларини бир йил давомида мунтазам равишда (икки ва ундан ортиқ маротаба) ёки бир маротаба қўпол равишда бузганда.
Тиббиёт ёки фармацевтика ходимларининг фаолиятида беморнинг ўлимига сабаб бўлувчи қўпол хато ва бузилишларга йўл қўйилган ёхуд ногиронлик тайинланишига олиб келувчи оғир тан жароҳатлари етказилганлиги суднинг қарори билан аниқланганлиги сертификат талабларини бир йил давомида мунтазам равишда (икки ва ундан ортиқ маротаба) ёки бир маротаба қўпол равишда бузиш деб ҳисобланади.
69. Ваколатли органнинг сертификатнинг амал қилишини бекор қилиш тўғрисидаги қарори ҳақида бир иш куни ичида талабгор хабардор қилинади ва сертификатнинг амал қилиши бекор қилинганлиги ҳақида реестрга тегишли ёзув киритилади.
Сертификат бекор қилинганда, талабгор сертификатни олиш бўйича ушбу Регламентга асосан умумий тартибда мурожаат қилиши мумкин.
5-боб. Якунловчи қоидалар
70. Давлат хизматлари марказлари ва ваколатли орган ўз фаолиятини амалга ошириши натижасида олинган маълумотларнинг сир сақланишини таъминлайди.
71. Ўзбекистон Республикаси Адлия вазирлиги, унинг ҳудудий бошқармалари ва Давлат хизматлари марказлари Регламент талаблари ижроси бўйича давлат органлари ва бошқа ташкилотларнинг фаолияти устидан, шу жумладан, ЯИДХП орқали доимий назоратни ва мониторингни амалга оширади.
72. Талабгор давлат органлари ва бошқа ташкилотлар ходимларининг хатти-ҳаракатлари (ҳаракатсизлиги) юзасидан қонунчиликда белгиланган тартибда шикоят қилишлари мумкин.
73. Мазкур Регламент талабларининг бузилишида айбдор бўлган шахслар қонунчилик ҳужжатларида белгиланган тартибда жавоб берадилар.
Тиббиёт ва фармацевтика ходимларини аттестациядан ўтказиш ва уларга малака тоифалари бериш бўйича давлат хизматларини кўрсатишнинг маъмурий регламентига 1-ИЛОВА
Тиббиёт ва фармацевтика ходимларига малака тоифаси бериш бўйича давлат хизматларини кўрсатиш
Босқичлар Масъуллар Чора-тадбирлар Муддатлар I. Ҳужжатларни топшириш 1-босқич Талабгор Малака тоифаси бериш бўйича давлат хизматидан фойдаланиш учун давлат хизматлари марказига мурожаат этади ёки ЯИДХПда рўйхатдан ўтади. Навбатдаги мажбурий аттестация муддати келганда ёки навбатдан ташқари ўз хоҳишига кўра 2-босқич 1. Талабгор 2. Давлат хизматлари маркази 3. ЯИДХП Талабгор ёки унинг номидан ариза бериш ҳуқуқига эга бўлган шахс давлат хизматлари маркази ёки ЯИДХП орқали сўровномани тўлдиради ва белгиланган тўловни тўлайди ҳамда сўровномани ваколатли органга юборади. 1. Сўровнома тўлдирилгандан кейин ўн дақиқада (давлат хизматлари маркази орқали) 2. Автоматик тарзда (ЯИДХП орқали) II. Ҳужжатларни кўриб чиқиш 3-босқич Ваколатли орган (Тиббиёт ва фармацевтика ходимларининг малакасини баҳолаш маркази) Сўровномани ўрганиб чиқади ва талабгорни аттестацияга қўйиш ёки қўймаслик тўғрисида қарор қабул қилади. Бунда ҳужжатлар тўлиқ бўлмаганда, сўровномани қабул қилмасдан давлат хизматлари марказига ёки ЯИДХП орқали талабгорга асослантирилган хабарнома юборади. Беш иш куни ичида 4-босқич Ваколатли орган Аттестацияга қўйилган талабгорлар рўйхати ваколатли органнинг расмий веб-сайтида жойлаштирилади. Аттестация санасидан ўн беш кун олдин III. Аттестациядан ўтказиш ва малака тоифаси бериш 5-босқич Ваколатли орган Талабгорни аттестациядан (тест синови, суҳбат) ўтказади. Тасдиқланган жадвал асосида 6-босқич Ваколатли орган Аттестация якунлари бўйича малака тоифаси сертификатини расмийлаштиради ва тасдиқлайди ҳамда давлат хизматлари марказига ёки ЯИДХП орқали талабгорга юборади. Аттестация тугагандан бошлаб ўн иш куни ичида 7-босқич Ваколатли орган Аттестацияга қатнашмаган талабгор навбатдаги аттестациядан ўтадиган талабгорлар рўйхатига киритилади ва бу ҳақда давлат хизматлари марказига ёки талабгорга ЯИДХП орқали хабардор қилинади. Уч иш куни ичида 8-босқич Давлат хизматлари маркази 1. Малака тоифаси сертификати олингандан сўнг уни талабгорнинг электрон манзилига юборади ва талабгорни бу ҳақда ахборот-коммуникация тизими орқали хабардор қилади. 1. Ун дақиқада 2. Талабгор ўзи келиб мурожаат қилганда, сертификатни электрон ёки қоғоз шаклида унга тақдим этади. 2. Талабгорнинг сўровига кўра
Тиббиёт ва фармацевтика ходимларини аттестациядан ўтказиш ва уларга малака тоифалари бериш бўйича давлат хизматларини кўрсатишнинг маъмурий регламентига 2-ИЛОВА
Тиббиёт ва фармацевтика ходимларини аттестациядан ўтказиш ва уларга малака тоифалари бериш бўйича давлат хизматларини кўрсатиш учун
I. Талабгор тўғрисида маълумот 1. Ф.И.О.: 2. Паспорт серияси, рақами, уни берган орган ва берилган вақти: 3. ЖШШИР рақами: 4. Яшаш манзили: 5. Телефон рақами: 6. Электрон почта манзили (мавжуд бўлса): II. Малакасига оид маълумотлар 1. Иш жойи: 2. Лавозими: 3. Мутахассислиги (малака тоифаси оладиган мутахассислиги): 4. Умумий иш стажи: 5. Малака тоифаси оладиган мутахассислиги бўйича иш стажи: 6. Қайси малака тоифасига даъвогарлиги (олий, биринчи, иккинчи ёки учинчи): 7. «Ягона миллий меҳнат тизими» идоралараро дастурий-аппарат комплексида автоматик тарзда шакллантириладиган электрон меҳнат дафтарига оид маълумотлар: III. Малака тоифаси оладиган мутахассислиги 1. Эгаллаган мутахассислиги ва йили: 2. Таълим олган тиббиёт ёки таълим ташкилоти номи: IV. Малака тоифаси: (агар мавжуд бўлса) 1. Малака тоифаси (олий, биринчи, иккинчи ёки учинчи) 2. Берилган вақти 3. Малака тоифаси берган ваколатли орган номи 4. Малака тоифаси берилганлиги тўғрисидаги сертификат рақами ва санаси V. Кейинги 5 йил давомида малака оширганлиги 1. Малака ошириш мавзуси 2. Тўпланган кредит соатлари ҳажми 3. Малака оширганлиги тўғрисидаги сертификатлар рақами ва санаси Сўровнома тўлдирилган сана ва рақам _________________________ _________________________ (сана) (рақам)
Тиббиёт ва фармацевтика ходимларини аттестациядан ўтказиш ва уларга малака тоифалари бериш бўйича давлат хизматларини кўрсатишнинг маъмурий регламентига 3-ИЛОВА
_____________________ (Vazirlik yoki tashkilot nomi) MALAKA TOIFASI BERILGANLIGI TOʻGʻRISIDA SERTIFIKAT (seriyasi va raqami) Ushbu sertifikat __________________________________________________________ ga (familiyasi, ismi, otasining ismi) _____________________________________________________________________ ning (vakolatli organ nomi) 20___-yil «___» ___________dagi ___________________-son buyrugʻi bilan ______________________________________________________ mutaxassisligi boʻyicha (mutaxassislik nomi) __________________________________________ malaka toifasi berilganligini tasdiqlaydi. (malaka toifasi turi) Berilgan sana: Amal qilish muddati: 20___-yil «___» ___________ 20___-yil «___» ___________ Mazkur hujjat Vazirlar Mahkamasining 2017-yil 15-sentabrdagi 728-son qaroriga muvofiq Yagona interaktiv davlat xizmatlari portalida shakllantirilgan elektron hujjatning nusxasi boʻlib, davlat organlari va tashkilotlari tomonidan ushbu hujjatni qabul qilishni rad etishlari qatʼiyan taqiqlanadi. Hujjat haqiqiyligini repo.gov.uz veb-saytida hujjatning noyob raqamini kiritib yoki mobil telefon yordamida QR-kodni skaner qilish orqali tekshirish mumkin. QR-kod
Ўзбекистон Республикасининг Бош вазири А. АРИПОВ
Тошкент ш.,
2023 йил 18 сентябрь,
477-сон
Oʻzbekiston Respublikasi Vazirlar Mahkamasining
qarori
MAʼMURIY REGLAMENTI
SXEMASI
SOʻROVNOMA
Tibbiyot va farmatsevtika xodimlarini attestatsiyadan oʻtkazish va ularga malaka toifalari berish boʻyicha davlat xizmatlarini koʻrsatishning maʼmuriy reglamentini tasdiqlash toʻgʻrisida
Oʻzbekiston Respublikasi Prezidentining “Davlat xizmatlari koʻrsatish infratuzilmasini takomillashtirish va aholining davlat xizmatlaridan foydalanish imkoniyatlarini kengaytirish chora-tadbirlari toʻgʻrisida” 2021-yil 24-iyuldagi PF-6269-son Farmoniga muvofiq tibbiyot va farmatsevtika xodimlarini attestatsiyadan oʻtkazish va ularga malaka toifalari berish boʻyicha davlat xizmatlarini koʻrsatish tizimini yanada takomillashtirish maqsadida Vazirlar Mahkamasi qaror qiladi:
1. Tibbiyot va farmatsevtika xodimlarini attestatsiyadan oʻtkazish va ularga malaka toifalari berish boʻyicha davlat xizmatlarini koʻrsatishning maʼmuriy reglamenti ilovaga muvofiq tasdiqlansin.
2. Belgilansinki, talabgorlar ushbu qaror bilan tasdiqlangan maʼmuriy reglamentga muvofiq tibbiyot va farmatsevtika xodimlarini attestatsiyadan oʻtkazish va ularga malaka toifalari berish boʻyicha koʻrsatiladigan davlat xizmatlaridan foydalanish uchun Davlat xizmatlari markazlari hamda Oʻzbekiston Respublikasi Yagona interaktiv davlat xizmatlari portali (keyingi oʻrinlarda — YIDXP) orqali elektron shaklda murojaat qiladilar.
3. Oʻzbekiston Respublikasi Sogʻliqni saqlash vazirligi:
a) Raqamli texnologiyalar vazirligi va Adliya vazirligi bilan birgalikda:
ushbu qaror bilan tasdiqlangan maʼmuriy reglamentga muvofiq davlat xizmatlarini koʻrsatish YIDXP orqali joriy etilishini taʼminlasin;
YIDXPda davlat xizmatlarini koʻrsatishning har bir bosqichida murojaatlar koʻrib chiqilishini kuzatib borish tartibini joriy etsin;
b) tibbiyot va farmatsevtika xodimlariga tegishli malaka toifasi berilganligi toʻgʻrisidagi sertifikatlarning navbatdagi malaka toifalarini berishda hamda amaldagi malaka toifasining muddati tugagunga qadar hisobga olinishini taʼminlasin;
v) manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.
4. Tizimida davolash-profilaktika tashkilotlari boʻlgan vazirliklar va idoralar:
boʻysunuvidagi tibbiyot va farmatsevtika faoliyati bilan shugʻullanuvchi tashkilotlar tomonidan navbatdagi attestatsiyadan oʻtadigan hamda navbatdan tashqari attestatsiyadan oʻtish xohishini bildirgan;
attestatsiyadan oʻtganiga besh yil toʻlgan va besh yil davomida amaldagi malaka toifasini himoya qilmagan yoki malakasini oshirmagan tibbiyot va farmatsevtika xodimlarini navbatdagi attestatsiyaga jalb etish choralarini koʻrsin.
5. Oʻzbekiston Respublikasi Prezidentining “Maʼmuriy islohotlar doirasida sogʻliqni saqlash sohasida davlat boshqaruvini samarali tashkil qilish chora-tadbirlari toʻgʻrisida” 2023-yil 20-iyundagi PQ-197-son qaroriga muvofiq tibbiyot va farmatsevtika xodimlarining nazariy bilimlari, amaliy koʻnikmalari, kasbiy mahoratini attestatsiyadan oʻtkazish va ularga malaka toifalari berish funksiyalarini amalga oshiruvchi davlat muassasasi shaklidagi Tibbiyot va farmatsevtika xodimlarining malakasini baholash markazi tashkil etilganligi maʼlumot uchun qabul qilinsin.
6. Tibbiyot va farmatsevtika xodimlarining malakasini baholash markaziga aholining dekretirlangan guruhlari, shu jumladan, faoliyati oziq-ovqat xom ashyosi, oziq-ovqat mahsulotlari va ichimlik suvini ishlab chiqarish, saqlash, tashish va sotish, bolalarni oʻqitish va tarbiyalash, aholiga kommunal va maishiy xizmatlar koʻrsatish bilan bogʻliq boʻlgan shaxslar uchun ishlab chiqarish sanitariyasi va gigiyenik oʻqitish boʻyicha pulli kurslar tashkil qilish huquqi berilsin.
7. Mazkur qarorning bajarilishini nazorat qilish Oʻzbekiston Respublikasi sogʻliqni saqlash vaziri A.Sh. Inoyatov zimmasiga yuklansin.
Vazirlar Mahkamasining 2023-yil 18-sentabrdagi 477-son qaroriga ILOVA
Tibbiyot va farmatsevtika xodimlarini attestatsiyadan oʻtkazish va ularga malaka toifalari berish boʻyicha davlat xizmatlarini koʻrsatishning
1-bob. Umumiy qoidalar
1. Mazkur maʼmuriy reglament (keyingi oʻrinlarda — Reglament) tibbiyot va farmatsevtika xodimlarini (keyingi oʻrinlarda — talabgor) attestatsiyadan oʻtkazish va ularga malaka toifalari berish boʻyicha davlat xizmatlarini (keyingi oʻrinlarda — davlat xizmati) koʻrsatish tartibini belgilaydi.
2. Malaka toifalari Oʻzbekiston Respublikasi Sogʻliqni saqlash vazirligi tizimidagi Tibbiyot va farmatsevtika xodimlarining malakasini baholash markazi (keyingi oʻrinlarda — vakolatli organ) tomonidan tashkiliy-huquqiy shaklidan va idoraviy boʻysunuvidan qatʼi nazar, tibbiyot va farmatsevtika faoliyati bilan shugʻullanuvchi barcha tashkilotlarda faoliyat yuritadigan shifokorlar, farmatsevtlar, “Oliy hamshiralik ishi” mutaxassisligiga ega boʻlgan hamshiralar, oʻrta tibbiyot va oʻrta farmatsevtika xodimlariga, shu jumladan, Oʻzbekiston Respublikasi hududidagi tibbiyot va farmatsevtika tashkilotlarida faoliyat yuritayotgan chet el fuqarolari va fuqaroligi boʻlmagan shaxslarga (keyingi oʻrinlarda — tibbiyot va farmatsevtika xodimlari) beriladi.
3. Ushbu Reglamentda quyidagi asosiy tushunchalar qoʻllaniladi:
malaka toifasi — attestatsiya natijalariga koʻra berilgan tibbiyot va farmatsevtika xodimlarining nazariy bilimi, amaliy koʻnikmalari, kasbiy malakasi darajasini tasdiqlovchi hamda ularni moddiy ragʻbatlantirish uchun asos boʻladigan daraja;
malaka toifasi berilganligi toʻgʻrisidagi sertifikat (keyingi oʻrinlarda — sertifikat) — tibbiyot va farmatsevtika xodimlariga malaka toifasi berilganligini tasdiqlovchi hujjat;
talabgor — tashkiliy-huquqiy shaklidan va idoraviy boʻysunuvidan qatʼi nazar, barcha tashkilotlarda mehnat qiladigan tibbiyot va farmatsevtika xodimlari.
4. Tibbiyot va farmatsevtika xodimlari har besh yilda bir marta malaka toifasini berish boʻyicha navbatdagi majburiy attestatsiyadan oʻtkaziladi (“Oliy hamshiralik ishi” mutaxassisligiga ega boʻlgan hamshiralar, oʻrta tibbiyot yoki farmatsevtika xodimlari bundan mustasno).
Ilgari attestatsiyadan oʻtmagan va ishga yangi qabul qilingan shifokorlar hamda farmatsevtlar yoki oliy taʼlim tashkilotlarini bitirib, birinchi bor ishga kirgan shifokor va farmatsevtlar mutaxassisligi boʻyicha uch yil ish stajiga ega boʻlgandan soʻng malaka toifasini berish maqsadida majburiy attestatsiyadan oʻtkaziladi.
Tibbiyot va farmatsevtika xodimlari oʻz xohishiga koʻra navbatdan tashqari malaka toifasini berish boʻyicha attestatsiyadan oʻtkazilishi mumkin.
Navbatdagi malaka toifasini berish boʻyicha majburiy attestatsiyadan, shuningdek, navbatdan tashqari attestatsiyadan oʻtgan shifokor va farmatsevtlar navbatdagi majburiy attestatsiyaga besh yildan soʻng jalb etiladi.
Shifokor va farmatsevtlar malaka toifasini berish boʻyicha majburiy attestatsiyaga oʻz muddatida jalb etilishi uchun shifokor va farmatsevtlar faoliyat koʻrsatayotgan tashkilot rahbari shaxsan javobgar hisoblanadi.
5. Quyidagilar navbatdagi malaka toifasini berish boʻyicha majburiy attestatsiyaga jalb etilmaydi:
fan nomzodi, falsafa doktori (Doctor of Philosophy (PhD) yoki fan doktori (Doctor of Science (DSc) darajasiga hamda Oliy attestatsiya komissiyasi tomonidan berilgan katta ilmiy xodim, dotsent va professor ilmiy unvoniga ega boʻlgan oliy tibbiy taʼlim tashkilotlarining shifokor va farmatsevtlari;
tibbiyot yoki farmatsevtika faoliyati bilan shugʻullanayotgan va qonunchilikka muvofiq pensiya yoshiga toʻlgan shifokor va farmatsevtlar;
tibbiyot yoki farmatsevtika faoliyati boʻyicha uch yildan kam boʻlgan ish stajiga ega shifokor va farmatsevtlar;
homilador ayollar, ular homilador boʻlgan davrda hamda ishga chiqqanidan keyin bir yil davomida;
homiladorlik va tugʻish hamda bolani parvarish qilish taʼtillarida boʻlgan ayollar, ular taʼtilda boʻlgan davrda hamda ishga chiqqanidan keyin bir yil davomida;
tibbiyot yoki farmatsevtika faoliyati bilan shugʻullanayotgan uch yoshgacha bolalari bor ayollar;
uzoq vaqt (uch oydan ortiq vaqt mobaynida) davolanayotgan shifokor va farmatsevtlar, ular davolanayotgan davrda hamda ishga chiqqanidan keyin olti oy davomida;
chet el davlatlariga oʻqishga, qayta tayyorlash va malaka oshirish kurslariga yuborilgan (rasmiy hujjatlar bilan asoslanishi lozim) shifokor va farmatsevtlar.
6. Oʻz xohishiga koʻra navbatdan tashqari attestatsiyada qatnashib, malaka toifasini oshirgan tibbiyot va farmatsevtika xodimlariga oshirilgan malaka toifasi boʻyicha haq toʻlanadi.
Bunda navbatdan tashqari attestatsiyada qatnashib, attestatsiyadan oʻta olmagan tibbiyot va farmatsevtika xodimlarining malaka toifasi tushirilmaydi.
7. Davolash-profilaktika tashkilotlari rahbarlari:
navbatdagi majburiy attestatsiyadan oʻtish muddati tugashidan olti oy oldin shifokor va farmatsevtlarni attestatsiyadan oʻtishi lozimligi toʻgʻrisida yozma ravishda xabardor qilishi;
tibbiyot va farmatsevtika xodimlarini attestatsiyadan oʻtkazish tartibi bilan tanishtirishi hamda attestatsiyadan oʻtish uchun hujjat topshirish boshlangunga qadar ularning malaka oshirishini tashkil etishi lozim.
8. Tibbiyot va farmatsevtika xodimlariga uchinchi, ikkinchi, birinchi va oliy malaka toifalari beriladi.
Malaka toifasi 5 yil muddatga beriladi.
9. Uchinchi malaka toifasi — kerakli nazariy bilimga ega boʻlgan, lekin ikkinchi malaka toifasini olish uchun zarur ish stajiga ega boʻlmagan quyidagi shifokorlarga beriladi:
umumiy stomatologiya mutaxassisligi boʻyicha oliy maʼlumotga ega boʻlgan shifokorlarga — faqat umumiy stomatologiya mutaxassisligi boʻyicha;
magistraturani tamomlagan yoki qayta tayyorlashdan oʻtgan shifokorlarga — olgan tor mutaxassisligi boʻyicha.
Uchinchi malaka toifasi shifokorlarning xususiy tibbiyot va farmatsevtika tashkilotlariga ishga kirishi uchun va ushbu tashkilotlar faoliyatini litsenziyalashga sharoit yaratish maqsadida beriladi. Davlat tibbiyot va farmatsevtika tashkilotlarining uchinchi malaka toifasiga ega shifokorlari uchun malaka toifasiga ega boʻlmagan shifokorlar mehnatiga haq toʻlash tartibi va shartlari qoʻllaniladi.
10. Ikkinchi malaka toifasi — mutaxassisligi boʻyicha kamida uch yil ish stajiga hamda zarur nazariy bilim va amaliy koʻnikmalarga ega boʻlgan tibbiyot va farmatsevtika xodimlariga beriladi. Ikkinchi malaka toifasini olish uchun uchinchi malaka toifasining boʻlishi talab qilinmaydi.
11. Birinchi malaka toifasi — mutaxassisligi boʻyicha kamida besh yil ish stajiga, yaxshi nazariy bilim va amaliy koʻnikmalarga hamda ikkinchi malaka toifasiga ega boʻlgan tibbiyot va farmatsevtika xodimlariga beriladi.
12. Oliy malaka toifasi — mutaxassisligi boʻyicha kamida yetti yil ish stajiga, yuqori nazariy bilim va amaliy koʻnikmalarga hamda birinchi malaka toifasiga ega boʻlgan tibbiyot va farmatsevtika xodimlariga beriladi.
Magistratura va klinik ordinaturani tugatgan tibbiyot va farmatsevtika xodimlarining oʻqish davridagi va egallagan mutaxassisligi boʻyicha asosiy hamda oʻrindosh ish joyidagi ish staji inobatga olinadi.
13. Malaka toifasini olish uchun murojaat qilgan tibbiyot va farmatsevtika xodimlarining mutaxassislik boʻyicha ish staji qonunchilik hujjatlariga muvofiq aniqlanadi, shuningdek, Oʻzbekiston Respublikasi sogʻliqni saqlash vazirining buyrugʻi bilan tasdiqlanadigan turdosh mutaxassisliklar boʻyicha ish staji ham hisobga olinadi.
Tibbiyot va farmatsevtika xodimi mutaxassisligining nomlanishi oʻzgarganda, uning oldingi mutaxassisligi boʻyicha olgan malaka toifasi boʻyicha mehnatga haq toʻlash shartlari saqlanadi, keyinchalik yangi nomdagi mutaxassislik boʻyicha malaka toifasini olish uchun murojaat qilganda oldingi mutaxassisligi boʻyicha ish staji va olgan malaka toifasi inobatga olinadi.
Davolash-profilaktika tashkilotlarining birinchi rahbarlari, ularning oʻrinbosarlari hamda sogʻliqni saqlashning boshqaruv tizimida faoliyat yuritayotgan tibbiyot va farmatsevtika xodimlari sogʻliqni saqlashni boshqarish va jamoat sogʻligʻini saqlash mutaxassisligi boʻyicha, tibbiyot va farmatsevtika taʼlimi sohasida faoliyat yuritayotgan tibbiyot va farmatsevtika xodimlari tibbiy ixtisosligiga mos ravishda tegishli mutaxassisligi boʻyicha malaka toifasi olish uchun murojaat qilishlari mumkin. Bunda malaka toifasi mavjudligi uchun mehnatga haq toʻlashning qoʻshimcha toʻlovlari tatbiq etiladi.
Tibbiyot va farmatsevtika xodimlarining malaka toifasi mavjudligi uchun mehnatga haq toʻlashning qoʻshimcha toʻlovlari sertifikatda koʻrsatilgan sanadan boshlab uning amal qilish muddati davomida amalga oshiriladi.
14. Malaka toifasi “Oliy hamshiralik ishi” mutaxassisligiga ega boʻlgan hamshiralar, oʻrta tibbiyot yoki farmatsevtika xodimining murojaatiga koʻra asosiy va oʻrindosh ish joyidagi mutaxassisliklardan bittasi boʻyicha yoki ularning har biri boʻyicha alohida berilishi mumkin.
Shifokorlar malaka toifasini olish boʻyicha asosiy va oʻrindosh ish joyidagi mutaxassisliklarning har biri boʻyicha malaka toifasini olishi lozim. Bunda tibbiyot yoki farmatsevtika xodimlari tegishli mutaxassislik boʻyicha mazkur Reglamentda belgilangan talablarga javob berishi kerak.
Tibbiyot yoki farmatsevtika xodimlariga oʻrindoshlik asosidagi ish joyida mutaxassisligi boʻyicha olgan malaka toifasi uchun ham belgilangan tartibda toʻlov amalga oshiriladi.
15. Zarur ish stajiga ega boʻlgan tibbiyot yoki farmatsevtika xodimlariga muddatidan oldin, biroq oxirgi malaka toifasi berilgan kundan kamida bir yildan keyin navbatdagi malaka toifasi berilishi mumkin.
Oʻzbekiston Respublikasi hududidagi tibbiyot tashkilotlarida bevosita davolash-profilaktika faoliyati bilan shugʻullanayotgan, shuningdek, mazkur Reglamentning 10 — 12-bandlarida koʻrsatilgan ish stajiga, ilmiy darajasi boʻlgan yoki istisno tariqasida, Oʻzbekiston Respublikasi sogʻliqni saqlash vazirining taqdimnomasiga koʻra ilmiy darajasi boʻlmasada, yuqori nazariy bilim va amaliy koʻnikmalarga ega boʻlgan mutaxassislarga bir pogʻona yuqori malaka toifasi beriladi.
16. Davlat xizmatlari markazlari va vakolatli davlat organlari oʻrtasidagi axborot almashinuvi elektron raqamli imzoni (keyingi oʻrinlarda — ERI) majburiy tartibda qoʻllash orqali faqat idoralararo elektron oʻzaro bogʻlanish yordamida amalga oshiriladi.
17. Tibbiyot va farmatsevtika xodimlariga malaka toifasi berish boʻyicha davlat xizmatlari ushbu Reglamentga 1-ilovada keltirilgan sxemaga muvofiq koʻrsatiladi.
2-bob. Hujjatlarni topshirish tartibi
18. Talabgor davlat xizmatlaridan foydalanish uchun Davlat xizmatlari markaziga oʻzi kelib murojaat etadi yoki Oʻzbekiston Respublikasi Yagona interaktiv davlat xizmatlari portalida (keyingi oʻrinlarda — YIDXP) roʻyxatdan oʻtadi.
Arizalar YIDXP orqali dam olish va bayram kunlaridan qatʼi nazar, har kuni 24 soat davomida yuborilishi mumkin.
Bunda arizalar ish vaqtidan keyin yoki dam olish va bayram kunlari tushganda, navbatdagi ish kuni arizalarning vakolatli organga tushgan va vakolatli organ tomonidan qabul qilingan kun hisoblanadi.
19. Talabgor yoki uning nomidan ariza berish huquqiga ega boʻlgan shaxs oʻzi kelib murojaat etgan taqdirda, Davlat xizmatlari markazi xodimi ariza beruvchi nomidan, YIDXP orqali murojaat etganda esa, mustaqil ravishda ushbu Reglamentga 2-ilovaga muvofiq elektron shakldagi soʻrovnomani toʻldiradi. Uchinchi shaxslar manfaati uchun harakat qilayotganda, soʻrovnomaga notarial tasdiqlangan ishonchnoma ilova qilinadi.
Soʻrovnomaga quyidagi hujjatlar ilova qilinadi:
mutaxassislik boʻyicha malaka oshirganligi toʻgʻrisidagi hujjatning nusxasi;
ilmiy seminarlar, syezdlar, konferensiyalarda qatnashganligi hamda xorijiy davlatlarda malaka oshirganligini tasdiqlovchi hujjatlarning (diplom, guvohnoma, sertifikat va boshqalar) nusxasi (mavjud boʻlganda).
Talabgorning soʻrovnomasida uning elektron manzili koʻrsatilishi mumkin. Soʻrovnomada talabgor elektron manzilining hamda SMS-xabarlar olish uchun mobil telefon raqamining koʻrsatilganligi uning soʻrovnoma boʻyicha qabul qilingan qaror haqida axborot tizimi orqali xabarnoma olishga roziligini anglatadi.
Talabgorning ish stajini, oliy va oʻrta maxsus, professional taʼlim tashkilotlarida oʻqiganligini tasdiqlovchi arxiv maʼlumotnomalari tibbiy yoki farmatsevtik maʼlumoti (oliy, oʻrta maxsus, internatura, klinik ordinatura, magistratura, ilmiy daraja, qayta tayyorlash) toʻgʻrisidagi diplom (hujjat) va/yoki xorijiy taʼlim tashkilotida olingan oliy maʼlumot toʻgʻrisidagi diplom yoxud oliy maʼlumot toʻgʻrisidagi hujjat (Oʻzbekiston Respublikasida tan olinganligi toʻgʻrisidagi) maʼlumotlari, shuningdek, xodimning mehnat faoliyati toʻgʻrisidagi maʼlumotlari elektron hamkorlik yoʻli bilan “Elektron hukumat”ning idoralararo integratsiyalashuv platformasi orqali olinadi (“Yagona milliy mehnat tizimi” idoralararo dasturiy-apparat kompleksi orqali xodimning mehnat faoliyati toʻgʻrisidagi maʼlumotlarini olish imkoniyati mavjud boʻlmagan hollarda, talabgordan mazkur maʼlumotlarni soʻrashga yoʻl qoʻyiladi).
Taqdim etilgan hujjatlardagi maʼlumotlarning haqqoniyligiga talabgor masʼul hisoblanadi.
20. Soʻrovnoma toʻldirilganidan soʻng talabgor maʼlumotlarning toʻgʻriligini tekshiradi va uni imzolarni identifikatsiya qilishning tegishli vositalari (daktiloskopiya, elektron imzo, mobil-ID va boshqalar) bilan tasdiqlaydi.
Talabgor YIDXP orqali murojaat etgan taqdirda, soʻrovnomani ERI bilan tasdiqlash talab etilmaydi.
21. Davlat xizmatlari koʻrsatilganligi uchun quyidagi miqdorlarda toʻlov undiriladi:
shifokor va farmatsevtlardan — bazaviy hisoblash miqdorining ikki baravari miqdorida;
“Oliy tibbiy hamrohlik ishi” mutaxassisligiga ega boʻlgan hamshiralar, oʻrta tibbiyot va oʻrta farmatsevtika xodimlaridan — bazaviy hisoblash miqdorining bir baravari miqdorida.
22. Davlat xizmatlari koʻrsatilishi uchun YIDXP orqali murojaat etilganda, belgilangan toʻlov summasining 90 foizi undiriladi.
Ijtimoiy reyestrning “kambagʻal oila” toifasiga kiritilgan oilalarning aʼzolariga, shuningdek, I va II guruh nogironligi boʻlgan shaxslarga mazkur bandning birinchi xatboshisida belgilangan toʻlovning 50 foizi miqdorida, Ijtimoiy reyestrning “davlat taʼminotidagi oila” toifasiga kiritilgan oilalarning aʼzolariga 75 foizi miqdorida chegirma qoʻllaniladi. Bunda chegirma Ijtimoiy reyestrning:
“davlat taʼminotidagi oila” yoki “kambagʻal oila” toifasidan “kambagʻallik chegarasidagi oila” toifasiga oʻtkazilgan oilalarga, ularning ilgari belgilangan toifasiga muvofiq miqdorda;
ogʻir hayotiy vaziyatga tushgan oila sifatida “kambagʻallik chegarasidagi oila” toifasiga kiritilgan oilalarga “kambagʻal oila” toifasidagi oila uchun belgilangan miqdorda qoʻllaniladi;
Davlat xizmatlari koʻrsatilgani uchun toʻlovlar Yagona billing tizimi orqali amalga oshiriladi.
22 1 . Taʼlim tashkilotida qonunchilik hujjatlariga muvofiq tuzilgan mehnat shartnomasi asosida taʼlim va tarbiya sohasida kasbiy faoliyatni amalga oshiruvchi pedagog shaxslardan mazkur Reglamentning 21-bandida belgilangan toʻlov summasining 50 foizi undiriladi.
23. Toʻlovlar summasi quyidagi tartibda taqsimlanadi:
a) Davlat xizmatlari markazlariga oʻzi kelib murojaat etganda:
18 foizi — Oʻzbekiston Respublikasi Adliya vazirligining Davlat xizmatlarini rivojlantirish jamgʻarmasiga;
0,5 foizi — Yagona billing tizimi orqali davlat xizmatlarini koʻrsatganlik uchun Oʻzbekiston Respublikasi Raqamli texnologiyalar vazirligi huzuridagi “Elektron hukumat loyihalarini boshqarish markazi” davlat muassasasining Iqtisodiyot va moliya vazirligi huzuridagi Gʻaznachilik xizmati qoʻmitasidagi maxsus hisobvaragʻiga;
qolgan mablagʻlar — vakolatli organning Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasidagi maxsus hisobvaragʻiga;
b) YIDXP orqali murojaat etilganda:
11,75 foizi — Oʻzbekiston Respublikasi Raqamli texnologiyalar vazirligi huzuridagi “Elektron hukumat loyihalarini boshqarish markazi” davlat muassasasining Iqtisodiyot va moliya vazirligi huzuridagi Gʻaznachilik xizmati qoʻmitasidagi maxsus hisobvaragʻiga (shu jumladan, 0,5 foizi yigʻim toʻlanganligi Yagona billing tizimi orqali tasdiqlanganligi uchun);
qolgan mablagʻlar — vakolatli organning Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasidagi maxsus hisobvaragʻiga oʻtkaziladi;
24. Talabgor davlat xizmatlaridan foydalanishda ularni koʻrsatishning har qanday bosqichida bosh tortish huquqiga ega. Talabgor davlat xizmatlaridan foydalanishdan bosh tortganda, uning soʻrovnomasi koʻrib chiqilmasdan qoldiriladi va toʻlangan toʻlov summasi qaytarilmaydi.
25. Talabgor davlat xizmatlari markaziga kelib murojaat etganda, uning soʻrovnomasi markaz xodimi tomonidan toʻldirilib, talabgor tomonidan tasdiqlangandan soʻng mazkur Reglamentning 19-bandiga muvofiq hujjatlar ilova qilingan holda, oʻn daqiqada vakolatli organga elektron shaklda yuboriladi. YIDXP orqali murojaat qilinganda esa, soʻrovnoma avtomatik tarzda vakolatli organga yuboriladi.
26. Vakolatli organ soʻrovnoma kelib tushgan kundan boshlab 5 ish kuni ichida uni oʻrganib chiqadi va talabgorni attestatsiyaga qoʻyish yoki qoʻymaslik toʻgʻrisida qaror qabul qiladi.
27. Attestatsiyaga qoʻyilgan talabgorlar roʻyxati vakolatli organning rasmiy veb-saytida attestatsiya oʻtkazish sanasidan oʻn besh kun oldin joylashtiriladi.
28. Talabgorga davlat xizmatlari koʻrsatilishi rad etilgan taqdirda, vakolatli organ tomonidan ushbu Reglamentga muvofiq rad etish toʻgʻrisidagi bildirishnoma rad etish sabablari va talabgor ushbu sabablarni bartaraf etib, takroran koʻrib chiqish uchun hujjatlarni taqdim etishi mumkin boʻlgan muddat (20 ish kun ichida) koʻrsatilgan holda, Davlat xizmatlari markaziga yoki YIDXP orqali uning shaxsiy kabinetiga elektron shaklda yuboriladi.
Talabgorga rad etish sabablari bartaraf etilishi uchun taqdim etilgan muddat davomida qayta taqdim etilgan hujjatlar koʻrib chiqilganligi uchun toʻlov undirilmaydi.
Rad etish toʻgʻrisidagi bildirishnomada koʻrsatilgan muddat tugagandan soʻng berilgan soʻrovnoma yangidan berilgan hisoblanadi.
29. Quyidagilar talabgorning attestatsiyaga qoʻyilmasligi uchun asos hisoblanadi:
Oʻzbekiston Respublikasi Prezidentining “Tibbiy-sanitariya sohasida kadrlarni tayyorlash va uzluksiz kasbiy rivojlantirishning mutlaqo yangi tizimini joriy etish chora-tadbirlari toʻgʻrisida” 2020-yil 7-apreldagi PQ-4666-son qaroriga 4-ilovaga hamda Vazirlar Mahkamasining “Tibbiyot xodimlari malakasini oshirish va ularni qayta tayyorlash tizimini takomillashtirish toʻgʻrisida” 2009-yil 18-dekabrdagi 319-son qaroriga muvofiq malaka oshirganligi toʻgʻrisidagi hujjat taqdim etilmaganda;
Ushbu Reglamentning 28-bandiga muvofiq rad etish toʻgʻrisidagi bildirishnomada koʻrsatilgan muddat tugaganda.
Davlat xizmatlari koʻrsatishni mazkur bandda koʻrsatilgan asoslardan boshqa holatlar boʻyicha rad etishga yoʻl qoʻyilmaydi.
30. Talabgordan hujjatlarni qabul qilish zaruratga koʻra maʼlumotlarni umumlashtirish va texnik muvofiqlikni taʼminlash maqsadida har yili yanvar va avgust oylarida rasmiy eʼlon berilgan holda toʻxtatilishi mumkin.
3-bob. Talabgorni attestatsiyadan oʻtkazish tartibi
31. Vakolatli organ tomonidan talabgorni attestatsiyadan oʻtkazish shakli va jadvali har yili 1-fevralga qadar tasdiqlanadi hamda Oʻzbekiston Respublikasi Sogʻliqni saqlash vazirligining rasmiy veb-saytida eʼlon qilinadi.
Mazkur jadvalga vakolatli organ tomonidan hujjat topshirgan talabgorlar sonidan kelib chiqqan holda, oʻzgartirish va qoʻshimchalar kiritilishi mumkin. Bunda uch kun ichida ushbu oʻzgartirish va qoʻshimchalar toʻgʻrisida Oʻzbekiston Respublikasi Sogʻliqni saqlash vazirligining rasmiy veb-saytida eʼlon qilinishi lozim.
32. Talabgor amaldagi malaka toifasi muddati tugashidan kamida olti oy oldin attestatsiyadan oʻtish toʻgʻrisida murojaat qilishi lozim.
Talabgor amaldagi malaka toifasi muddati tugagandan keyin olti oy davomida malaka toifasi olish uchun murojaat qilishga haqli. Talabgorning harakatsizligi (mazkur Reglamentning 5-bandida nazarda tutilgan holatlar bundan mustasno) tufayli malaka toifasi olish uchun murojaat etish muddati oʻtkazib yuborilganda, mavjud malaka toifasidan bir pogʻona tushiriladi.
33. Talabgorga malaka toifasi berish boʻyicha attestatsiya ikki bosqichda oʻtkaziladi:
birinchi bosqich — onlayn test sinovi (keyingi oʻrinlarda — test sinovi);
ikkinchi bosqich — amaliy sinovlarga tegishli boʻlgan malaka toifalariga mos ravishda tabaqalashtirilgan savollar asosida suhbat.
34. Test sinovlari Qoraqalpogʻiston Respublikasi, viloyatlar va Toshkent shahrida vakolatli organ tomonidan tashkil etilgan test sinovini oʻtkazishga moslashtirilgan hamda maxsus kameralar oʻrnatilgan xonalarda vakolatli organ tomonidan tasdiqlangan jadval asosida oʻtkaziladi.
35. Test sinovini topshirishda talabgor shaxsini tasdiqlovchi hujjatning asl nusxasi (fuqarolik pasporti, identifikatsiya ID-kartasi, fuqaroning xorijga chiqish biometrik pasporti yoki haydovchilik guvohnomasi kabilar) taqdim etadi.
Shaxsni tasdiqlovchi hujjatga ega boʻlmagan yoki test sinoviga kechikkan talabgorlar attestatsiyaga kelmagan hisoblanadi va navbatdagi test sinovidan oʻtadigan talabgorlar roʻyxatiga kiritiladi, bu haqda talabgor Davlat xizmatlari markazi (oʻzi kelib murojaat qilgan taqdirda) yoki YIDXP orqali (elektron tarzda murojaat etgan taqdirda) uch ish kunidan kechiktirmay xabardor qilinadi.
36. Agar talabgor tegishli tarzda xabardor qilinganidan keyin ikkinchi marta test sinovini topshirish uchun kelmasa, talabgorga davlat xizmatini koʻrsatish rad qilingan hisoblanadi. Bunda davlat xizmatidan foydalanish uchun toʻlangan toʻlov summasi qaytarib berilmaydi.
Hujjatlar mazkur Reglamentda belgilangan umumiy tartibda yangidan ariza berish orqali qayta topshiriladi.
37. Attestatsiyaning ochiq va oshkora oʻtkazilishini taʼminlash uchun attestatsiya jarayoni audio va videoyozuvlarda qayd etib boriladi va videotasvir vakolatli organda kamida bir yil saqlanadi.
Attestatsiya jarayonini uzluksiz ravishda audio va videotasvirga tushirish hamda Oʻzbekiston Respublikasi Sogʻliqni saqlash vazirligining rasmiy veb-saytida onlayn translyatsiya qilish uchun alohida imtihon xonalari ajratiladi. Mazkur xonalar zamonaviy texnik asbob-uskunalar (kompyuter, ovozli videokamera, Internet jahon axborot tarmogʻi va boshqalar) bilan taʼminlab, talabgorlar uchun tegishli shart-sharoitlar yaratiladi.
38. Test sinovi savollari qonunchilik hujjatlariga kiritilgan oʻzgartirish va qoʻshimchalarni hisobga olgan holda yangilab boriladi.
39. Test sinovi uchun 50 daqiqa vaqt ajratiladi. Test sinovi davrida har bir testdan oʻtuvchiga 50 ta savol beriladi. Har bir savol bir balli tizimda baholanadi. Maksimal ball 50 ballni tashkil etadi.
Test sinovlari bosqichida maksimal ballning 56 foizidan (28 ball) kam toʻplagan talabgor keyingi bosqich sinovlariga kiritilmaydi va malaka toifasi berishga noloyiq deb eʼtirof etiladi.
Attestatsiyaning test sinovi bosqichida malaka toifasi berishga noloyiq deb topilgan talabgor umumiy asoslarda attestatsiyadan oʻtish uchun hujjatlarini topshirishi mumkin.
40. Test sinovining natijalari shu vaqtning oʻzida eʼlon qilinadi. Talabgor test sinovini muvaffaqiyatli topshirgan taqdirda, attestatsiyaning ikkinchi bosqichiga qoʻyiladi.
41. Test sinovlari yakunida uni oʻtkazishga masʼul shaxs tomonidan bayonnoma tuziladi.
Bayonnomada quyidagi maʼlumotlar koʻrsatiladi:
test sinovi oʻtkazilgan joy va sana;
test sinovi boshlangan va tugallangan vaqt;
test sinovida hozir boʻlgan va kelmagan talabgorlar roʻyxati;
har bir talabgorning familiyasi, ismi va otasining ismi, mutaxassisligi va boshqa maʼlumotlar, shuningdek, test sinovi natijasida olingan ballar koʻrsatiladi.
Bayonnoma test sinovini oʻtkazishga masʼul shaxs tomonidan imzolanadi.
42. Attestatsiyaning ikkinchi bosqichi amaliy sinovlarga tegishli boʻlgan malaka toifalariga mos ravishda tabaqalashtirilgan savollar asosida suhbat shaklida oʻtkaziladi.
Attestatsiyaning suhbat bosqichi vakolatli organ huzurida yoki vakolatli organning Qoraqalpogʻiston Respublikasi va viloyatlarda tashkil etiladigan ixtisoslashtirilgan attestatsiya komissiyalari (keyingi oʻrinlarda — attestatsiya komissiyasi) tomonidan oʻtkaziladi.
Attestatsiya komissiyasini tashkil etish uchun tegishliligi boʻyicha vakolatli organ tomonidan kamida besh nafar aʼzodan, shu jumladan, attestatsiya komissiyasi raisi, rais oʻrinbosari va kotibidan iborat tarkibda nomzodlar roʻyxati shakllantiriladi.
Attestatsiyada komissiya raisi ishtirok etmagan taqdirda, komissiya aʼzolarining taklifiga koʻra komissiya aʼzolaridan biri raislik vazifasini bajaradi.
Attestatsiya komissiyasining tarkibi vakolatli organ tomonidan tasdiqlanadi.
Attestatsiya komissiyasi tarkibi har yili qayta tasdiqlanadi. Bunda attestatsiya komissiyasi tarkibining kamida 20 foizi yangilanishi kerak.
Attestatsiya komissiyasining aʼzolari attestatsiya komissiyasi tarkibiga shartnoma asosida jalb etilishi mumkin.
43. Attestatsiya komissiyasi aʼzolarining soni, har bir attestatsiya komissiyasining ixtisosligi va ular tomonidan attestatsiyadan oʻtkaziladigan mutaxassisliklar tegishli hududda faoliyat yuritayotgan talabgorlarning sonidan kelib chiqqan holda belgilanadi.
Attestatsiya komissiyasining ixtisosligi attestatsiya komissiyalari aʼzolarining mutaxassisligiga muvofiq boʻlishi zarur.
44. Attestatsiya komissiyasi tarkibiga Oʻzbekiston Respublikasi Sogʻliqni saqlash vazirligi, Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasi, oliy tibbiy taʼlim tashkilotlari, ixtisoslashtirilgan ilmiy-amaliy tibbiyot markazlari, ilmiy-tadqiqot institutlari, davolash-profilaktika tashkilotlarida hamda xususiy tibbiyot tashkilotlarida faoliyat yuritayotgan ilmiy darajaga yoki mutaxassisligi boʻyicha oliy malaka toifasiga ega boʻlgan tibbiyot va farmatsevtika xodimlari, shuningdek, tarmoq kasaba uyushmasi kengashi vakillari hamda boshqa mutaxassislar jalb etiladi.
45. Attestatsiya komissiyasi:
talabgorning mutaxassisligi va faoliyati boʻyicha qisqacha axborotni tinglaydi;
attestatsiyadan oʻtadigan talabgorga savollar yoki simulyatsion yoxud situatsion topshiriq beradi, uning javoblari natijalari boʻyicha ochiq ovoz berishni oʻtkazadi;
attestatsiya natijasi boʻyicha talabgorga baho beradi;
attestatsiyadan oʻtgan talabgor faoliyatini yaxshilash boʻyicha tavsiyalar beradi;
malaka toifalarining turlaridan kelib chiqib, ularning darajalariga mos ravishda tabaqalashtirilgan attestatsiya savollarini tuzadi va yangilab boradi;
attestatsiya oʻtkazish bilan bogʻliq boshqa masalalarni koʻrib chiqadi.
Attestatsiya komissiyasi yigʻilishi uning ishida attestatsiya komissiyasi aʼzolarining kamida uchdan ikki qismi ishtirok etgan taqdirda, vakolatli hisoblanadi.
Attestatsiya jarayoni audio va videoyozuvlarda qayd etib boriladi. Bunda talabgorga mutaxassisligi boʻyicha oʻn balli tizimda baholanadigan 5 ta savol beriladi va 15 daqiqa vaqt ajratiladi.
Talabgorning har bir savolga javobi attestatsiya komissiyasi aʼzolarining koʻpchilik ovozi bilan oʻn balli tizimda baholanadi.
Attestatsiyaning ikkinchi bosqichida toʻplanadigan maksimal ball 50 ballni tashkil etadi. Attestatsiya yakunida talabgorlarga attestatsiya natijalari eʼlon qilinadi.
46. Attestatsiyani topshirish jarayonida talabgorga quyidagilar taqiqlanadi:
qonunchilik hujjatlari va yoʻriqnoma materiallar, axborotnomalar va maxsus adabiyotlardan foydalanish;
mobil aloqa vositasi va boshqa aloqa vositalaridan foydalanish;
boshqa talabgorlar bilan suhbatlashish;
attestatsiya xonasidan tashqariga chiqish.
Ushbu talablarni buzgan talabgorlar imtihon oʻtayotgan xonadan chiqarib yuboriladi va attestatsiyadan oʻtmagan hisoblanadi.
47. Vakolatli organning kuzatuvchi sifatida ishtirok etadigan xodimlaridan boshqa begona shaxslarga attestatsiyada ishtirok etishga ruxsat berilmaydi.
48. Attestatsiyaning ikkinchi bosqichida olingan umumiy ballar yigʻindisi har bir talabgor boʻyicha attestatsiya komissiyasi tomonidan quyidagicha qaror qabul qilinishi uchun asos boʻladi:
toʻplanishi mumkin boʻlgan eng yuqori (50) ballning 60 foizi yoki 30 ball va undan yuqorisi uchun — talabgorlik qilayotgan malaka toifasiga loyiq deb topish haqida;
toʻplanishi mumkin boʻlgan eng yuqori ballning 50 foizi (25 ball)dan 60 foizi (30 ball)gacha — talabgorlik qilayotgan malaka toifasidan bir pogʻona past malaka toifasi berish haqida;
toʻplanishi mumkin boʻlgan eng yuqori ballning 45 foizi (22,5 ball)dan 50 foizi (25 ball)gacha — talabgorlik qilayotgan malaka toifasidan ikki pogʻona past malaka toifasi berish haqida;
toʻplanishi mumkin boʻlgan eng yuqori ballning 45 foizi (22,5 ball)dan kam ball uchun yoki mazkur bandning uchinchi , toʻrtinchi xatboshilariga muvofiq tegishli past pogʻonadagi malaka toifasi mavjud boʻlmagan hollarda — malaka toifasi berishga noloyiq deb topish haqida.
Attestatsiyaning ikkinchi bosqichida toʻplangan umumiy ballar yigʻindisi maksimal 50 ballning 45 foizidan kam boʻlgani uchun malaka toifasi berishga noloyiq deb topilgan talabgor attestatsiya oʻtkazilgan kundan boshlab uch oy oʻtgach, umumiy asoslarda attestatsiyadan oʻtish uchun hujjatlarini topshirishi mumkin.
49. Attestatsiyaning ikkinchi bosqichiga kelmagan talabgorlar navbatdagi ikkinchi bosqich attestatsiyadan oʻtadigan talabgorlar roʻyxatiga kiritiladi, bu haqda talabgor Davlat xizmatlari markazi (oʻzi kelib murojaat qilgan taqdirda) yoki YIDXP orqali (elektron tarzda murojaat etgan taqdirda) uch ish kunidan kechiktirmay xabardor qilinadi.
Agar talabgor tegishli tarzda xabardor qilinganidan keyin ikkinchi marta ham attestatsiyada ishtirok etmasa, talabgorga davlat xizmatini koʻrsatish rad qilingan hisoblanadi. Bunda davlat xizmatidan foydalanish uchun toʻlangan toʻlov summasi qaytarib berilmaydi.
Hujjatlar mazkur Reglamentda belgilangan umumiy tartibda yangidan ariza berish orqali qayta topshiriladi.
4-bob. Malaka toifasini berish tartibi
50. Talabgorning attestatsiya natijalari attestatsiya komissiyasi qarori bilan mazkur Reglamentning 41-bandiga muvofiq rasmiylashtiriladigan bayonnomaga asosan tasdiqlanadi hamda vakolatli organda saqlanadi.
51. Attestatsiya tugagandan boshlab oʻn ish kuni ichida attestatsiya yakunlari boʻyicha vakolatli organning tegishli buyrugʻi qabul qilinadi va mazkur Reglamentga 3-ilovaga muvofiq shaklda QR-kod (matrik shtrixli kod) qoʻyilgan sertifikatni rasmiylashtiradi.
Vakolatli organ sertifikatni Davlat xizmatlari markazi yoki YIDXP orqali talabgorga yuboradi, ushbu sertifikat Oʻzbekiston Respublikasining barcha hududlarida yuridik kuchga ega boʻladi.
52. Vakolatli organ sertifikatni rasmiylashtiradi va Malaka toifasi sertifikatlarining reyestrini (keyingi oʻrinlarda — reyestr) shakllantiradi.
Reyestr elektron shaklda yuritiladi.
Reyestr shakli vakolatli organ tomonidan tasdiqlanadi.
53. Reyestrga kiritilgan talabgorga taalluqli shaxsini tasdiqlovchi hujjat maʼlumotlari va yashash manzili kabi shaxsiy maʼlumotlardan tashqari barcha maʼlumotlar bilan tanishib chiqish uchun ochiq boʻlib, vakolatli organning rasmiy veb-saytida chop etiladi.
54. Davlat xizmatlari markazi sertifikat olingandan soʻng oʻn daqiqa mobaynida uni talabgorning elektron manziliga yuboradi va talabgorni bu haqda axborot-kommunikatsiya tizimi orqali xabardor qiladi. Talabgorning soʻroviga koʻra Davlat xizmatlari markazi sertifikatni elektron yoki qogʻoz shaklda taqdim etishi mumkin.
55. Attestatsiyadan oʻta olmagan talabgor attestatsiya oʻtkazilgan kundan boshlab oʻttiz ish kuni ichida vakolatli organga apellyatsiya berish huquqiga ega. Apellyatsiya yozma ravishda taqdim etiladi.
Apellyatsiya komissiyasi apellyatsiya shikoyatini koʻrib chiqishda zarur hollarda, talabgor yoki attestatsiya komissiyasi aʼzolari yoxud betaraf mutaxassislarni taklif qilishi mumkin.
Apellyatsiya komissiyasi tarkibi vakolatli organ tomonidan kamida besh nafar aʼzodan, shu jumladan, komissiya raisi, rais oʻrinbosari va kotibidan iborat tarkibda tasdiqlanadi. Attestatsiya komissiyasi aʼzolari apellyatsiya komissiyasi tarkibiga kiritilmaydi.
Apellyatsiya komissiyasi 10 ish kuni ichida kiritilgan apellyatsiyani koʻrib chiqadi va talabgorga qabul qilingan qaror haqida yozma ravishda xabar beradi.
56. Apellyatsiyani koʻrib chiqish natijalari yuzasidan apellyatsiya komissiyasi tomonidan quyidagi qarorlardan biri qabul qilinadi:
attestatsiya natijalarini (yozma ravishda asoslangan xat asosida) oʻzgarishsiz qoldirish va apellyatsiyani qanoatlantirishni rad etish toʻgʻrisida;
apellyatsiyani qanoatlantirish va talabgor attestatsiyani topshirgan deb hisoblash toʻgʻrisida;
talabgorni takroran attestatsiyaga qoʻyish toʻgʻrisida.
57. Attestatsiya natijalarini oʻzgarishsiz qoldirish va apellyatsiyani qanoatlantirishni rad etish toʻgʻrisidagi qaror quyidagi hollarda qabul qilinadi:
apellyatsiya mazkur Reglament talablarini buzgan holda taqdim etilgan boʻlsa;
apellyatsiyada koʻrsatilgan vajlar oʻz tasdigʻini topmasa.
58. Attestatsiyani takroran oʻtkazish toʻgʻrisidagi qaror apellyatsiya bergan talabgorning attestatsiya mazkur Reglament talablariga zid ravishda oʻtkazilganligi holatlari aniqlangan taqdirda qabul qilinadi.
59. Vakolatli organ tomonidan apellyatsiya bergan talabgor uchun attestatsiyani takroran oʻtkazish toʻgʻrisida qaror qabul qilingan taqdirda, takroriy attestatsiya mazkur Reglamentda belgilangan tartibda oʻtkaziladi.
Bunda attestatsiya Reglament talablariga zid ravishda oʻtkazilganligi holatlari aniqlangan taqdirda, apellyatsiya bergan talabgor uchun attestatsiya takroran oʻtkazilishini inobatga olgan holda, attestatsiya takroran bepul oʻtkaziladi.
60. Oʻtkazilgan bitta attestatsiya yuzasidan takroran apellyatsiya berilmaydi.
61. Vakolatli organning qarori ustidan qonunchilik hujjatlarida belgilangan tartibga sudga shikoyat qilinishi mumkin.
62. Sertifikatda koʻrsatilgan maʼlumotlar oʻzgargan taqdirda, talabgor sertifikatni qayta rasmiylashtirish uchun vakolatli organga oʻn ish kuni ichida Davlat xizmatlari markaziga bevosita oʻzi yoki ishonchli vakili orqali murojaat etadi yoxud YIDXPda ushbu Reglamentning 19-bandiga muvofiq soʻrovnomani toʻldiradi.
Soʻrovnoma toʻldirilganidan soʻng talabgor maʼlumotlarning toʻgʻriligini tekshiradi va imzolarni identifikatsiya qilishning tegishli vositalari (daktiloskopiya, elektron imzo, mobil-ID va boshqalar) bilan tasdiqlaydi.
63. Sertifikatni qayta rasmiylashtirganlik uchun toʻlov undirilmaydi.
64. Vakolatli organ talabgorning soʻrovnomasi kelib tushgan kundan boshlab uch ish kunidan koʻp boʻlmagan muddatda sertifikatni qayta rasmiylashtiradi va ushbu Reglamentning 54-bandiga muvofiq belgilangan tartibda talabgorga yuboradi, shuningdek, bu toʻgʻrisidagi maʼlumotni vakolatli organning rasmiy veb-saytiga joylashtiradi.
65. Vakolatli organ sertifikatni qayta rasmiylashtirishda reyestrga tegishli oʻzgartirishlar kiritadi.
Sertifikatni qayta rasmiylashtirishda ilgari berilgan sertifikatning seriyasi, raqami va amal qilish muddati oʻzgarmaydi.
66. Sertifikatni qayta rasmiylashtirish uchun talabgordan qayta imtihondan oʻtish talab qilinmaydi.
67. Sertifikatning amal qilishi quyidagi hollarda vakolatli organning qaroriga binoan bekor qilinadi:
talabgor sertifikatning amal qilishini bekor qilish boʻyicha murojaat qilganda;
sertifikatni berish tartibi bekor qilinganda;
sertifikatning amal qilish muddati tamom boʻlganda;
talabgorning muomalaga layoqatliligi belgilangan tartibda cheklanganda, u muomalaga layoqatsiz deb topilganda;
talabgor vafot etganda.
68. Vakolatli organ quyidagi hollarda sertifikatning amal qilishini bekor qilish toʻgʻrisida sudga murojaat qiladi:
vakolatli organning sertifikat berish toʻgʻrisidagi qarorining qonunga xilofligi aniqlanganda;
sertifikatning qalbaki hujjatlardan foydalangan holda olinganligi aniqlanganda;
talabgor sertifikat yoki unga oid qonunchilik hujjatlari talablarini bir yil davomida muntazam ravishda (ikki va undan ortiq marotaba) yoki bir marotaba qoʻpol ravishda buzganda.
Tibbiyot yoki farmatsevtika xodimlarining faoliyatida bemorning oʻlimiga sabab boʻluvchi qoʻpol xato va buzilishlarga yoʻl qoʻyilgan yoxud nogironlik tayinlanishiga olib keluvchi ogʻir tan jarohatlari yetkazilganligi sudning qarori bilan aniqlanganligi sertifikat talablarini bir yil davomida muntazam ravishda (ikki va undan ortiq marotaba) yoki bir marotaba qoʻpol ravishda buzish deb hisoblanadi.
69. Vakolatli organning sertifikatning amal qilishini bekor qilish toʻgʻrisidagi qarori haqida bir ish kuni ichida talabgor xabardor qilinadi va sertifikatning amal qilishi bekor qilinganligi haqida reyestrga tegishli yozuv kiritiladi.
Sertifikat bekor qilinganda, talabgor sertifikatni olish boʻyicha ushbu Reglamentga asosan umumiy tartibda murojaat qilishi mumkin.
5-bob. Yakunlovchi qoidalar
70. Davlat xizmatlari markazlari va vakolatli organ oʻz faoliyatini amalga oshirishi natijasida olingan maʼlumotlarning sir saqlanishini taʼminlaydi.
71. Oʻzbekiston Respublikasi Adliya vazirligi, uning hududiy boshqarmalari va Davlat xizmatlari markazlari Reglament talablari ijrosi boʻyicha davlat organlari va boshqa tashkilotlarning faoliyati ustidan, shu jumladan, YIDXP orqali doimiy nazoratni va monitoringni amalga oshiradi.
72. Talabgor davlat organlari va boshqa tashkilotlar xodimlarining xatti-harakatlari (harakatsizligi) yuzasidan qonunchilikda belgilangan tartibda shikoyat qilishlari mumkin.
73. Mazkur Reglament talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
Tibbiyot va farmatsevtika xodimlarini attestatsiyadan oʻtkazish va ularga malaka toifalari berish boʻyicha davlat xizmatlarini koʻrsatishning maʼmuriy reglamentiga 1-ILOVA
Tibbiyot va farmatsevtika xodimlariga malaka toifasi berish boʻyicha davlat xizmatlarini koʻrsatish
Bosqichlar Masʼullar Chora-tadbirlar Muddatlar I. Hujjatlarni topshirish 1-bosqich Talabgor Malaka toifasi berish boʻyicha davlat xizmatidan foydalanish uchun davlat xizmatlari markaziga murojaat etadi yoki YIDXPda roʻyxatdan oʻtadi. Navbatdagi majburiy attestatsiya muddati kelganda yoki navbatdan tashqari oʻz xohishiga koʻra 2-bosqich 1. Talabgor 2. Davlat xizmatlari markazi 3. YIDXP Talabgor yoki uning nomidan ariza berish huquqiga ega boʻlgan shaxs davlat xizmatlari markazi yoki YIDXP orqali soʻrovnomani toʻldiradi va belgilangan toʻlovni toʻlaydi hamda soʻrovnomani vakolatli organga yuboradi. 1. Soʻrovnoma toʻldirilgandan keyin oʻn daqiqada (davlat xizmatlari markazi orqali) 2. Avtomatik tarzda (YIDXP orqali) II. Hujjatlarni koʻrib chiqish 3-bosqich Vakolatli organ (Tibbiyot va farmatsevtika xodimlarining malakasini baholash markazi) Soʻrovnomani oʻrganib chiqadi va talabgorni attestatsiyaga qoʻyish yoki qoʻymaslik toʻgʻrisida qaror qabul qiladi. Bunda hujjatlar toʻliq boʻlmaganda, soʻrovnomani qabul qilmasdan davlat xizmatlari markaziga yoki YIDXP orqali talabgorga asoslantirilgan xabarnoma yuboradi. Besh ish kuni ichida 4-bosqich Vakolatli organ Attestatsiyaga qoʻyilgan talabgorlar roʻyxati vakolatli organning rasmiy veb-saytida joylashtiriladi. Attestatsiya sanasidan oʻn besh kun oldin III. Attestatsiyadan oʻtkazish va malaka toifasi berish 5-bosqich Vakolatli organ Talabgorni attestatsiyadan (test sinovi, suhbat) oʻtkazadi. Tasdiqlangan jadval asosida 6-bosqich Vakolatli organ Attestatsiya yakunlari boʻyicha malaka toifasi sertifikatini rasmiylashtiradi va tasdiqlaydi hamda davlat xizmatlari markaziga yoki YIDXP orqali talabgorga yuboradi. Attestatsiya tugagandan boshlab oʻn ish kuni ichida 7-bosqich Vakolatli organ Attestatsiyaga qatnashmagan talabgor navbatdagi attestatsiyadan oʻtadigan talabgorlar roʻyxatiga kiritiladi va bu haqda davlat xizmatlari markaziga yoki talabgorga YIDXP orqali xabardor qilinadi. Uch ish kuni ichida 8-bosqich Davlat xizmatlari markazi 1. Malaka toifasi sertifikati olingandan soʻng uni talabgorning elektron manziliga yuboradi va talabgorni bu haqda axborot-kommunikatsiya tizimi orqali xabardor qiladi. 1. Un daqiqada 2. Talabgor oʻzi kelib murojaat qilganda, sertifikatni elektron yoki qogʻoz shaklida unga taqdim etadi. 2. Talabgorning soʻroviga koʻra
Tibbiyot va farmatsevtika xodimlarini attestatsiyadan oʻtkazish va ularga malaka toifalari berish boʻyicha davlat xizmatlarini koʻrsatishning maʼmuriy reglamentiga 2-ILOVA
Tibbiyot va farmatsevtika xodimlarini attestatsiyadan oʻtkazish va ularga malaka toifalari berish boʻyicha davlat xizmatlarini koʻrsatish uchun
I. Talabgor toʻgʻrisida maʼlumot 1. F.I.O.: 2. Pasport seriyasi, raqami, uni bergan organ va berilgan vaqti: 3. JSHSHIR raqami: 4. Yashash manzili: 5. Telefon raqami: 6. Elektron pochta manzili (mavjud boʻlsa): II. Malakasiga oid maʼlumotlar 1. Ish joyi: 2. Lavozimi: 3. Mutaxassisligi (malaka toifasi oladigan mutaxassisligi): 4. Umumiy ish staji: 5. Malaka toifasi oladigan mutaxassisligi boʻyicha ish staji: 6. Qaysi malaka toifasiga daʼvogarligi (oliy, birinchi, ikkinchi yoki uchinchi): 7. “Yagona milliy mehnat tizimi” idoralararo dasturiy-apparat kompleksida avtomatik tarzda shakllantiriladigan elektron mehnat daftariga oid maʼlumotlar: III. Malaka toifasi oladigan mutaxassisligi 1. Egallagan mutaxassisligi va yili: 2. Taʼlim olgan tibbiyot yoki taʼlim tashkiloti nomi: IV. Malaka toifasi: (agar mavjud boʻlsa) 1. Malaka toifasi (oliy, birinchi, ikkinchi yoki uchinchi) 2. Berilgan vaqti 3. Malaka toifasi bergan vakolatli organ nomi 4. Malaka toifasi berilganligi toʻgʻrisidagi sertifikat raqami va sanasi V. Keyingi 5 yil davomida malaka oshirganligi 1. Malaka oshirish mavzusi 2. Toʻplangan kredit soatlari hajmi 3. Malaka oshirganligi toʻgʻrisidagi sertifikatlar raqami va sanasi Soʻrovnoma toʻldirilgan sana va raqam _________________________ _________________________ (sana) (raqam)
Tibbiyot va farmatsevtika xodimlarini attestatsiyadan oʻtkazish va ularga malaka toifalari berish boʻyicha davlat xizmatlarini koʻrsatishning maʼmuriy reglamentiga 3-ILOVA
_____________________ (Vazirlik yoki tashkilot nomi) MALAKA TOIFASI BERILGANLIGI TOʻGʻRISIDA SERTIFIKAT (seriyasi va raqami) Ushbu sertifikat __________________________________________________________ ga (familiyasi, ismi, otasining ismi) _____________________________________________________________________ ning (vakolatli organ nomi) 20___-yil “___” ___________dagi ___________________-son buyrugʻi bilan ______________________________________________________ mutaxassisligi boʻyicha (mutaxassislik nomi) __________________________________________ malaka toifasi berilganligini tasdiqlaydi. (malaka toifasi turi) Berilgan sana: Amal qilish muddati: 20___-yil “___” ___________ 20___-yil “___” ___________ Mazkur hujjat Vazirlar Mahkamasining 2017-yil 15-sentabrdagi 728-son qaroriga muvofiq Yagona interaktiv davlat xizmatlari portalida shakllantirilgan elektron hujjatning nusxasi boʻlib, davlat organlari va tashkilotlari tomonidan ushbu hujjatni qabul qilishni rad etishlari qatʼiyan taqiqlanadi. Hujjat haqiqiyligini repo.gov.uz veb-saytida hujjatning noyob raqamini kiritib yoki mobil telefon yordamida QR-kodni skaner qilish orqali tekshirish mumkin. QR-kod
Oʻzbekiston Respublikasining Bosh vaziri A. ARIPOV
Toshkent sh.,
2023-yil 18-sentabr,
477-son