📅 2023-yil 29-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 29 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 29 сентября 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 29 September 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
«Яшил» иқтисодиётга ўтиш жараёнини бошқариш тизимини ташкил этиш чора-тадбирлари тўғрисида
Ўзбекистон Республикаси Президентининг «2030 йилгача Ўзбекистон Республикасининг «яшил» иқтисодиётга ўтишига қаратилган ислоҳотлар самарадорлигини ошириш бўйича чора-тадбирлар тўғрисида» 2022 йил 2 декабрдаги ПҚ-436-сон қарори ижросини таъминлаш мақсадида Вазирлар Маҳкамаси қарор қилади:
1. Ўзбекистон Республикаси Президентининг 2022 йил 2 декабрдаги ПҚ-436-сон қарори билан тасдиқланган 2030 йилгача Ўзбекистон Республикасида «яшил» иқтисодиётга ўтиш ва «яшил» ўсишни таъминлаш бўйича ҳаракатлар режасининг 58-бандида:
давлат бошқаруви органлари ва хўжалик бирлашмаларининг амалдаги раҳбар ўринбосарларидан бирига «яшил» иқтисодиёт масалаларини мувофиқлаштириш вазифасини юклаш;
давлат бошқаруви органлари ва хўжалик бирлашмаларида «яшил» иқтисодиёт масалалари билан шуғулланишга масъул бўлинмаларни белгилаш назарда тутилганлиги маълумот учун қабул қилинсин.
2. Республика ижро этувчи ҳокимият органлари ҳамда устав фондида (устав капиталида) давлат улуши 50 фоиз ва ундан ортиқ бўлган хўжалик бирлашмалари раҳбарлари икки ҳафта муддатда тегишли қарор ва/ёки буйруқлар асосида:
амалдаги раҳбар ўринбосарларидан бирига «яшил» иқтисодиёт масалаларини мувофиқлаштириш вазифаси юкланишини;
мавжуд штат бирликлари доирасида «яшил» иқтисодиёт масалалари билан шуғулланишга масъул бўлинма белгиланиши,
шунингдек, унинг мақсад ва вазифаларини назарда тутувчи низоми тасдиқланишини таъминласин.
3. Белгилансинки, «яшил» иқтисодиёт масалаларини мувофиқлаштириш вазифаси юкланган раҳбар ўринбосарлари томонидан қуйидаги чора-тадбирлар амалга оширилади:
республика ижро этувчи ҳокимият органи ёки хўжалик бирлашмаси фаолиятига оид «яшил» иқтисодиёт масалаларини мувофиқлаштириш;
тегишли соҳа ва ишлаб чиқариш тармоқларининг табиий ресурслардан барқарор ва самарали фойдаланиш тамойилларига риоя этишини таъминлаш;
иқтисодиёт соҳасининг табиий офатлар ва иқлим ўзгаришига нисбатан барқарорлигини таъминлаш чораларини кўриш;
иқтисодиёт тармоқларининг «яшил» ва кам углеродли ривожланишга қаратилган чора-тадбирларини амалга ошириш, шу жумладан, қайта тикланувчи энергия манбалари ва энергия самарадор технологияларни жорий қилиш;
«яшил» инновацияларни жорий этиш ва ушбу соҳага инвестицияларни жалб қилиш чораларини кўриш;
тармоқ ташкилотларининг барқарор ишлаб чиқариш кўрсаткичларини яхшилаш мақсадида «яшил» иқтисодиётга ўтишга қаратилган режаларини амалга ошириш ва ривожлантириш истиқболлари бўйича таклифлар ишлаб чиқиш;
энергия ва ресурс самарадорлигини ошириш ҳамда кам чиқиндили маҳсулотлар ишлаб чиқариш мақсадида илмий ташкилотлар ва ишлаб чиқариш сектори ўртасида интеграцияни таъминлаш;
узоқ муддатли истиқболда барқарор иш ўринларини яратиш учун «яшил» иқтисодиётга ўтиш даврида ходимлар малакасини ошириш ва уларни қайта тайёрлаш, шунингдек, уларнинг «яшил» ўсиш бўйича салоҳиятини ошириш ва инсон капиталини ривожлантириш.
4. Республика ижро этувчи ҳокимият органлари ҳамда устав фондида (устав капиталида) давлат улуши 50 фоиз ва ундан ортиқ бўлган хўжалик бирлашмалари:
бир ой муддатда Ўзбекистон Республикаси Иқтисодиёт ва молия вазирлиги билан келишган ҳолда, «яшил» иқтисодиёт фаолияти соҳасида уч йилга мўлжалланган «йўл харитаси»ни тасдиқласин;
ҳар йили 1 февралга қадар «яшил» иқтисодиёт масалалари билан шуғулланишга масъул бўлинмаларнинг йиллик ҳисоботларини Ўзбекистон Республикаси Иқтисодиёт ва молия вазирлигига тақдим этиб борсин.
5. Ўзбекистон Республикаси Иқтисодиёт ва молия вазирлиги:
Жаҳон банки билан ҳамкорликда ишлаб чиқилаётган Миллий иқлим ва ривожланиш ҳисоботи (Country Climate and Development Report — CCDR) якунлангандан сўнг ҳисоботда келтирилган таҳлиллардан келиб чиқиб, тегишли вазирликлар ва идораларга кўрсатма ва тавсиялар юборилишини таъминласин;
уч ой муддатда манфаатдор вазирликлар ва идоралар билан биргаликда мазкур қарорнинг ижроси доирасида амалга оширилган ишлар тўғрисида Вазирлар Маҳкамасига умумлаштирилган маълумот киритсин.
6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2023 йил 29 сентябрь,
514-сон
Oʻzbekiston Respublikasi Vazirlar Mahkamasining
qarori
“Yashil” iqtisodiyotga oʻtish jarayonini boshqarish tizimini tashkil etish chora-tadbirlari toʻgʻrisida
Oʻzbekiston Respublikasi Prezidentining “2030-yilgacha Oʻzbekiston Respublikasining “yashil” iqtisodiyotga oʻtishiga qaratilgan islohotlar samaradorligini oshirish boʻyicha chora-tadbirlar toʻgʻrisida” 2022-yil 2-dekabrdagi PQ-436-son qarori ijrosini taʼminlash maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining 2022-yil 2-dekabrdagi PQ-436-son qarori bilan tasdiqlangan 2030-yilgacha Oʻzbekiston Respublikasida “yashil” iqtisodiyotga oʻtish va “yashil” oʻsishni taʼminlash boʻyicha harakatlar rejasining 58-bandida:
davlat boshqaruvi organlari va xoʻjalik birlashmalarining amaldagi rahbar oʻrinbosarlaridan biriga “yashil” iqtisodiyot masalalarini muvofiqlashtirish vazifasini yuklash;
davlat boshqaruvi organlari va xoʻjalik birlashmalarida “yashil” iqtisodiyot masalalari bilan shugʻullanishga masʼul boʻlinmalarni belgilash nazarda tutilganligi maʼlumot uchun qabul qilinsin.
2. Respublika ijro etuvchi hokimiyat organlari hamda ustav fondida (ustav kapitalida) davlat ulushi 50 foiz va undan ortiq boʻlgan xoʻjalik birlashmalari rahbarlari ikki hafta muddatda tegishli qaror va/yoki buyruqlar asosida:
amaldagi rahbar oʻrinbosarlaridan biriga “yashil” iqtisodiyot masalalarini muvofiqlashtirish vazifasi yuklanishini;
mavjud shtat birliklari doirasida “yashil” iqtisodiyot masalalari bilan shugʻullanishga masʼul boʻlinma belgilanishi,
shuningdek, uning maqsad va vazifalarini nazarda tutuvchi nizomi tasdiqlanishini taʼminlasin.
3. Belgilansinki, “yashil” iqtisodiyot masalalarini muvofiqlashtirish vazifasi yuklangan rahbar oʻrinbosarlari tomonidan quyidagi chora-tadbirlar amalga oshiriladi:
respublika ijro etuvchi hokimiyat organi yoki xoʻjalik birlashmasi faoliyatiga oid “yashil” iqtisodiyot masalalarini muvofiqlashtirish;
tegishli soha va ishlab chiqarish tarmoqlarining tabiiy resurslardan barqaror va samarali foydalanish tamoyillariga rioya etishini taʼminlash;
iqtisodiyot sohasining tabiiy ofatlar va iqlim oʻzgarishiga nisbatan barqarorligini taʼminlash choralarini koʻrish;
iqtisodiyot tarmoqlarining “yashil” va kam uglerodli rivojlanishga qaratilgan chora-tadbirlarini amalga oshirish, shu jumladan, qayta tiklanuvchi energiya manbalari va energiya samarador texnologiyalarni joriy qilish;
“yashil” innovatsiyalarni joriy etish va ushbu sohaga investitsiyalarni jalb qilish choralarini koʻrish;
tarmoq tashkilotlarining barqaror ishlab chiqarish koʻrsatkichlarini yaxshilash maqsadida “yashil” iqtisodiyotga oʻtishga qaratilgan rejalarini amalga oshirish va rivojlantirish istiqbollari boʻyicha takliflar ishlab chiqish;
energiya va resurs samaradorligini oshirish hamda kam chiqindili mahsulotlar ishlab chiqarish maqsadida ilmiy tashkilotlar va ishlab chiqarish sektori oʻrtasida integratsiyani taʼminlash;
uzoq muddatli istiqbolda barqaror ish oʻrinlarini yaratish uchun “yashil” iqtisodiyotga oʻtish davrida xodimlar malakasini oshirish va ularni qayta tayyorlash, shuningdek, ularning “yashil” oʻsish boʻyicha salohiyatini oshirish va inson kapitalini rivojlantirish.
4. Respublika ijro etuvchi hokimiyat organlari hamda ustav fondida (ustav kapitalida) davlat ulushi 50 foiz va undan ortiq boʻlgan xoʻjalik birlashmalari:
bir oy muddatda Oʻzbekiston Respublikasi Iqtisodiyot va moliya vazirligi bilan kelishgan holda, “yashil” iqtisodiyot faoliyati sohasida uch yilga moʻljallangan “yoʻl xaritasi”ni tasdiqlasin;
har yili 1-fevralga qadar “yashil” iqtisodiyot masalalari bilan shugʻullanishga masʼul boʻlinmalarning yillik hisobotlarini Oʻzbekiston Respublikasi Iqtisodiyot va moliya vazirligiga taqdim etib borsin.
5. Oʻzbekiston Respublikasi Iqtisodiyot va moliya vazirligi:
Jahon banki bilan hamkorlikda ishlab chiqilayotgan Milliy iqlim va rivojlanish hisoboti (Country Climate and Development Report — CCDR) yakunlangandan soʻng hisobotda keltirilgan tahlillardan kelib chiqib, tegishli vazirliklar va idoralarga koʻrsatma va tavsiyalar yuborilishini taʼminlasin;
uch oy muddatda manfaatdor vazirliklar va idoralar bilan birgalikda mazkur qarorning ijrosi doirasida amalga oshirilgan ishlar toʻgʻrisida Vazirlar Mahkamasiga umumlashtirilgan maʼlumot kiritsin.
6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 29-sentabr,
514-son