UzbekAI

Ўзбекистон Республикаси Вазирлар Маҳкамасининг

қарори

НИЗОМ

СХЕМАСИ

«Яшил энергия» сертификатлари жорий этилишини кенгайтириш ва «яшил молиялаштириш» механизмларини такомиллаштириш чора-тадбирлари тўғрисида

Ўзбекистон Республикаси Президентининг «Янги таҳрирдаги Ўзбекистон Республикаси Конституциясини амалга ошириш бўйича биринчи навбатдаги чора-тадбирлар тўғрисида» 2023 йил 8 майдаги ПФ-67-сон Фармони ҳамда «Яшил энергия» сертификатлари тизимини жорий этиш чора-тадбирлари тўғрисида» 2023 йил 12 майдаги ПҚ-156-сон қарорига мувофиқ, шунингдек, «яшил молиялаштириш» механизмларини такомиллаштириш ва «яшил энергия» сертификатлари жорий этилишини кенгайтириш мақсадида Вазирлар Маҳкамаси қарор қилади:

1. Қуйидагилар:

Ўзбекистон Республикаси Президентининг «Янги таҳрирдаги Ўзбекистон Республикаси Конституциясини амалга ошириш бўйича биринчи навбатдаги чора-тадбирлар тўғрисида» 2023 йил 8 майдаги ПФ-67-сон Фармонининг 13-бандига мувофиқ «яшил молиялаштириш» механизмларини татбиқ этиш, шу жумладан, «яшил сертификат», «яшил кредитлар» ва халқаро тажрибада кенг фойдаланиладиган бошқа институтлар фаолиятини йўлга қўйиш;

Ўзбекистон Республикаси Президентининг «Яшил энергия» сертификатлари тизимини жорий этиш чора-тадбирлари тўғрисида» 2023 йил 12 майдаги ПҚ-156-сон қарорининг 7-бандига мувофиқ «яшил энергия» сертификатларини бериш ва муомалага киритиш тартибини ишлаб чиқиш белгиланганлиги маълумот учун қабул қилинсин.

2. Қайта тикланувчи энергия манбаларидан электр энергияси ишлаб чиқарувчилар (генерация объектлари) ва уларнинг харидорларини (иштирокчиларни) рўйхатдан ўтказиш шартлари, «яшил энергия» сертификатларини муомалага чиқариш, уларнинг савдосини онлайн платформа орқали амалга ошириш тартибини назарда тутувчи «Яшил энергия» сертификатларини бериш ва муомалага киритиш тартиби тўғрисидаги низом иловага мувофиқ тасдиқлансин.

3. Шундай тартиб ўрнатилсинки, унга мувофиқ:

«яшил энергия» сертификатлари биржалар ва биржа фаолияти тўғрисидаги қонунчилик ҳамда биржа савдолари қоидаларига мувофиқ товар-хомашё биржаси орқали «яшил энергия» сертификатларини сотишга мўлжалланган «яшил энергетика секцияси»да сотилади;

«яшил энергия» сертификатларини муомалага чиқариш ҳисобидан Ўзбекистон Республикаси Иқтисодиёт ва молия вазирлигига тушадиган маблағлар вазирлик ҳузуридаги «Яшил иқтисодиёт лойиҳалари маркази» лойиҳа офисининг алоҳида махсус ҳисобварақларида жамланади.

4. Ўзбекистон Республикаси Иқтисодиёт ва молия вазирлиги Энергетика вазирлиги билан биргаликда ушбу қарорнинг моҳияти ва аҳамиятини иштирокчилар ўртасида кенг тушунтирилишини таъминласин.

5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров ҳамда Ўзбекистон Республикаси энергетика вазири Ж.Т. Мирзамаҳмудов зиммасига юклансин.

Вазирлар Маҳкамасининг 2023 йил 29 сентябрдаги 515-сон қарорига ИЛОВА

«Яшил энергия» сертификатларини бериш ва муомалага киритиш тартиби тўғрисида

1-боб. Умумий қоидалар

1. Мазкур Низом «яшил энергия» сертификатларини ҳисобга олиш, муомалага киритиш ва савдосини ташкил этиш ҳамда мониторингини юритиш тартибини белгилайди.

2. Ушбу Низомда қуйидаги асосий тушунчалардан фойдаланилади:

ариза — муайян даврда электр энергияси ишлаб чиқарилганлиги ва ягона электр тармоғига ёки тўғридан-тўғри сўнгги фойдаланувчига узатилганлигини тасдиқловчи «яшил энергия» сертификатларини бериш учун эмитентга генерация объектини рўйхатдан ўтказиш тўғрисидаги ариза;

генерация объекти — қайта тикланувчи энергия манбалари асосида электр энергияси ишлаб чиқарувчи қурилма;

иштирокчи — платформа реестрида савдо ҳисоб қайдномаларига эга бўлган, сертификатлар билан савдо қиладиган ва улардан фойдаланадиган эмитент бўлмаган маҳаллий ёки хорижий юридик шахс ёки якка тартибдаги тадбиркор;

марказ — «яшил» иқтисодиётни илгари суриш ва «яшил» ривожланиш тамойилларини жорий этиш, иқтисодиёт тармоқларида иссиқхона газлари ташланмаларини қисқартириш бўйича лойиҳаларни амалга ошириш мақсадида халқаро донор ташкилотларнинг техник кўмагини жалб қилган ҳолда тегишли шартномаларни имзолаши ваколатига эга бўлган Ўзбекистон Республикаси Иқтисодиёт ва молия вазирлиги таъсисчилигида давлат муассасаси шаклида ташкил этиладиган «Яшил иқтисодиёт лойиҳалари маркази» лойиҳа офиси;

оператор — эмитентни қўллаб-қувватловчи ва платформа фаолиятини таъминловчи халқаро ташкилот (Evident/ I-REC Services BV);

регистрант (генератор) — генерация объектларига эгалик қилувчи субъект;

сертификатлар реестри — «яшил энергия» сертификатларининг тўлиқ ҳаётий даври ва улардан фойдаланиш ёзувларини сақловчи платформадаги маълумотлар базаси;

сертификатларни чиқариш — платформада ҳисоб қайдномасида бир ёки бир нечта «яшил энергия» сертификатлари қайд этилганлиги тўғрисидаги далолатнома;

қайта тикланувчи энергия манбалари — қуёш, шамол, гидроэлектр, геотермал ва биогаз электр станциялари;

ҳисоб қайдномаси (аккаунт) — «яшил энергия» сертификатларини рўйхатга олишда иштирокчи рўйхатга олинганда унга платформада очиладиган махсус аккаунт;

эмитент — «яшил энергия» сертификатлари тизимини юритиш, шу жумладан, «яшил энергия» сертификатларини чиқариш, уларнинг савдосини ташкил этиш ва мониторингини юритиш бўйича масъул орган — Ўзбекистон Республикаси Иқтисодиёт ва молия вазирлиги;

электр энергиясининг қолдиқ ҳажми — талаб қилинмаган ёки муайян санага қадар сақланган ва ҳисоб-китоб қилинган миллий энергия баланси;

«яшил энергия» сертификати (кейинги ўринларда — сертификат) — платформа реестрига киритилган генерация объекти томонидан тегишли ҳажмда ишлаб чиқарилган ҳамда ягона электр энергетика тармоғига ёки тўғридан-тўғри охирги фойдаланувчига узатилган электр энергиясини тасдиқловчи ёзув;

«яшил энергия» сертификатлари ягона электрон платформаси (кейинги ўринларда — платформа) — Халқаро қайта тикланувчи энергия манбаларини сертификатлаш ташкилоти (I-REC) стандартлари асосида ишлаб чиқилган «яшил энергия» сертификатларини ҳисобга олиш, савдосини ташкил қилиш ва мониторингини юритиш, шунингдек, «яшил энергия» сертификатлари тизимининг барча иштирокчилари учун хизматлар кўрсатиш имкониятига эга электрон тизим;

I-REC — Халқаро қайта тикланувчи энергия манбаларини сертификатлаш ташкилоти.

3. Сертификатларни ҳисобга олиш, савдосини ташкил қилиш ҳамда мониторингини юритиш ишлари эмитент номидан марказ томонидан амалга оширилади.

Марказ «яшил» иқтисодиётни илгари суриш ва «яшил» ривожланиш тамойилларини жорий этиш, иқтисодиёт тармоқларида иссиқхона газлари ташланмаларини қисқартириш бўйича лойиҳаларни кўриб чиқиш ва амалга ошириш ҳамда «яшил энергия» сертификатлари муомаласини таъминлаш чораларини кўради ҳамда мувофиқлаштириб боради.

4. «Яшил энергия» сертификатларини ҳисобга олиш, савдосини ташкил этиш ва мониторингини юритиш мазкур Низомга иловада келтирилган схемага мувофиқ амалга оширилади.

5. Муайян давр давомида қайта тикланувчи энергия манбаларида ишлаб чиқарилган ҳамда ягона электр тармоғига ёки тўғридан-тўғри охирги фойдаланувчига узатилган тегишли миқдордаги МВт/соат электр энергияси учун сертификатлар фақат бир марта берилади.

6. Сертификатнинг амал қилиш муддати чегараланмаган. Фойдаланилган сертификатлар иштирокчи томонидан платформа орқали ҳисобдан чиқарилади.

7. Сертификатлар иштирокчиларнинг ҳисоб қайдномаларида сақланади. Айнан бир сертификатга фақат бир регистрант ёки иштирокчи эга бўлиши мумкин.

8. Қайта тикланувчи энергия манбаларида ўз истеъмоли учун ишлаб чиқарилган ва фойдаланилган электр энергияси миқдори учун сертификатлар берилмайди.

9. Иштирокчилар ўз эҳтиёжидан ортиқ сертификатларга эга бўлган тақдирда, уларни бошқа иштирокчиларга платформа орқали ўтказишлари мумкин.

10. Сертификатдан фақат бир марта фойдаланиш мумкин, сертификат фойдаланилганда ёки ҳисобдан чиқарилганида, иштирокчилар ўртасида ўтказилмайди.

2-боб. Генерация объектлари ва иштирокчиларни рўйхатга олиш тартиби

11. Регистрант ва эмитент ўртасида сертификат чиқаришнинг стандарт шартлари тўғрисида шартнома тузилади.

Регистрант платформада рўйхатдан ўтиш учун қуйидаги ҳужжатларни I-REC бош офисига эмитент орқали юбориш тўғрисида мурожаат юборади:

Сертификат чиқаришнинг стандарт шартлари тўғрисидаги шартноманинг нусхаси;

охирги 12 ойлик бухгалтерия баланси ва ташқи аудит хулосаси (аудит қилинган бўлса);

CSD01 шаклидаги тўлдирилган ва имзоланган сўровнома (корхонанинг умумий, раҳбарият ва акциядорлар тўғрисидаги ҳамда алоқа маълумотлари);

Эмитент регистрантнинг аккаунтини платформада очиш мақсадида юқоридаги ҳужжатларни беш иш куни давомида I-REC бош офисига юборади.

12. I-REC томонидан қабул қилинган санадан сўнг бир ой давомида регистрантнинг электрон почтасига платформага кириш учун регистрант аккаунти бўйича маълумотлар юборилади.

13. Генерация объектларини рўйхатга олиш мақсадида регистрант томонидан эмитентга платформа орқали белгиланган шаклдаги электрон ариза юборилади.

14. Рўйхатга олиш учун берилган аризада қуйидагилар акс эттирилади:

СSD02 электрон аризаси тўлдирилган ва имзоланган ҳолда (генерация объектининг тури ва жойлашуви, унинг номинал қуввати, уланган тармоғи);

генерация объектининг фотосурати (максимал даражада қамраб олувчи расми);

бир чизиқли электр схемаси;

Ўзбекистон Республикаси Энергетика вазирлиги томонидан бериладиган генерация объектларида электр энергияси қайта тикланувчи энергия манбаларида ишлаб чиқарилганлигини тасдиқловчи ҳужжат.

15. Генерация объектини рўйхатга олиш учун регистрант томонидан эмитентга қуйидаги миқдордаги бир марталик йиғим амалга оширилаётган санадаги Ўзбекистон Республикаси Марказий банкининг расмий валюта курси бўйича миллий валютада ундирилади:

умумий қуввати 1 МВтгача бўлган генерация объектлари учун — 100 евро миқдорида;

умумий қуввати 1 МВтдан 5 МВтгача бўлган генерация объектлари учун — 500 евро миқдорида;

умумий қуввати 5 МВтдан 10 МВтгача бўлган генерация объектлари учун — 1 000 евро миқдорида;

умумий қуввати 10 МВтдан 50 МВтгача бўлган генерация объектлари учун — 1 500 евро миқдорида;

умумий қуввати 50 МВтдан катта бўлган генерация объектлари учун — 2 000 евро миқдорида.

16. Рўйхатдан ўтувчининг аризаси йиғим ундирилгандан сўнг эмитент томонидан беш иш куни ичида кўриб чиқилади, рўйхатдан ўтказилади ва генерация объекти платформага киритилади.

17. Аризани кўриб чиқиш қуйидаги ҳолатларда рад этилади:

нотўғри ёки ёлғон маълумотлар киритилганлиги аниқланганда;

мазкур Низомнинг 14 ва 15-бандларида кўрсатилган талабларга зид бўлганда;

бошқа қайта тикланувчи энергияни сертификатлаш тизимларида рўйхатдан ўтган тақдирда.

Мазкур бандда кўрсатилган камчиликларни бартараф этгандан кейин ариза қайта киритилиши мумкин.

18. Генерация объектининг платформага киритилганлиги ушбу объект рўйхатдан ўтган ойдан кейинги ойнинг биринчи кунидан бошлаб кучга киради.

19. Генерация объекти платформада бўлиш муддати беш йилни ташкил этади, ушбу муддат тугагандан сўнг генерация объектни қайта рўйхатга олиш талаб этилади.

Сертификатларни беришнинг узлуксизлигини таъминлаш мақсадида генерация объектининг платформада бўлиш муддати тугашидан олдин ушбу муддатни узайтириш бўйича мурожаат қилиниши мумкин.

20. Сертификатларни чиқариш учун регистрант томонидан платформа орқали эмитентга ариза берилади ва қуйидаги маълумотлар киритилади:

а) ягона электр энергетикаси тармоғига узатилган электр учун:

CCD04 шаклдаги тўлдирилган ва имзоланган сўровнома (генерация объекти ёки объектлари томонидан ишлаб чиқарилган электр энергияси миқдори, иштирокчи номи);

корхонанинг умумий фаолияти тўғрисида маълумотлар;

электр энергияси ишлаб чиқариш давомийлиги ва унинг ҳажми (кВт.с);

генерация объектларида электр энергиясини ишлаб чиқариш ҳолати «Ўзбекистон миллий электр тармоқлари» АЖ («Ўзэнергосотиш» АЖ ёки «Ҳудудий электр тармоқлари» АЖ) томонидан тасдиқланган ҳужжат;

сертификат чиқариш учун мўлжалланган регистрантнинг иштирокчи аккаунти маълумотлари;

б) тўғридан-тўғри сўнгги фойдаланувчига узатилган электр учун:

CCD04 шаклдаги тўлдирилган ва имзоланган сўровнома (генерация объекти ёки объектлари томонидан ишлаб чиқарилган электр энергияси миқдори, иштирокчи номи);

корхонанинг умумий фаолияти тўғрисида маълумотлар;

электр энергияси ишлаб чиқариш давомийлиги ва унинг ҳажми (кВт.с);

электр энергиясини тўғридан-тўғри қабул қилган сўнгги фойдаланувчи ва генерация объекти эгаси томонидан тузилган муайян даврда узатилган электр ҳажмини тасдиқловчи далолатнома;

сертификат чиқариш учун мўлжалланган регистрантнинг иштирокчи аккаунти маълумотлари;

генерация объектларида электр энергиясини ишлаб чиқариш ҳолати бўйича электр энергиясини ҳисобга олиш ва назорат қилишнинг автоматлаштирилган тизимидан (ЭҲНАТ) олинган ва электр энергиясини сотиб олувчи томонидан тасдиқланган ҳужжат.

21. Иштирокчилар платформадан фойдаланиш ва у орқали сертификатлар савдоси бўйича хизматлардан фойдаланиш учун оператор билан шартнома тузади ҳамда ўзининг ҳисоб қайдномаларини очади.

3-боб. Сертификатларни чиқариш тартиби

22. Сертификатларни чиқариш тўғрисидаги расмий сўров регистрант томонидан платформа орқали эмитентга юборилади.

23. Ишлаб чиқарилган электр энергиясини ҳисоблаш нуқтаси:

ягона электр энергетика тармоғига узатилганида — электр тармоғига узатиш жойида;

тўғридан-тўғри охирги фойдаланувчига узатилганида — электр тармоқларининг баланс бўйича мансублик чегараси бўлади.

24. Текшириш натижаларига кўра ишлаб чиқарилгани ва ягона электр энергетика тармоғига ёки тўғридан-тўғри сўнгги фойдаланувчига узатилгани тасдиқланган «яшил электр» энергияси ҳажмига мос равишда эмитент томонидан платформа орқали ҳар 1 МВт/соат электр энергияси учун 1 та ноёб идентификация рақамли сертификат чиқарилади.

25. Ҳисобга олинмасдан қолган ҳар қандай ишлаб чиқарилган электр энергияси ҳажмини кейинги ишлаб чиқариш даврига ўтказиш мумкин. Бунда ҳисобга олиш даври I-REC томонидан белгиланган талабларга мос келиши лозим.

26. Сертификатлар берилиши мумкин бўлган давр I-REC талабларига асосан белгиланади.

27. Сертификатни ўчириб ёки ўзгартириб бўлмайди, хатоликни тузатиш ҳолатлари бундан мустасно. Агар сертификат хатолик билан берилган бўлса, оператор томонидан бекор қилинади.

28. Агар оператор сертификатнинг келиб чиқиши регистрант ва эмитент ўртасида «Сертификат чиқаришнинг стандарт шартлари тўғрисидаги шартнома» шартлари бузилганлигидан хабар топса, вазият аниқланган пайтдан бошлаб сертификатларни бериш ёки ундан фойдаланишни тўхтатади.

29. Хатолик тасдиқланган тақдирда, оператор сертификат тафсилотларига ўзгартириш киритади.

Сертификат фойдаланилганидан сўнг унга тузатишлар киритиб бўлмайди.

4-боб. Сертификатлар савдосини амалга ошириш, улардан фойдаланиш ва уларни ҳисобдан чиқариш тартиби

30. Сертификатлардан иштирокчи томонидан унинг ҳисоб қайдномаси орқали фойдаланилади. Сертификатлар ҳисоб қайдномасидан чиқарилиши ва ундан қайтиб фойдаланиб бўлмайдиган қилиб ҳисоб қайдномасига жойлаштирилиши керак.

31. Агар регистрант ўзида ишлаб чиқарилган ва узатилган электр энергияси учун берилган сертификатдан ўзи фойдаланишни хоҳласа, ушбу сертификатни ўзи учун очилган қайтиб фойдаланиб бўлмайдиган ҳисоб қайдномасига ўтказиши мумкин.

32. Фойдаланилган сертификатларни ҳисобдан чиқаришини мониторинг қилиб бориш учун генерация объекти ва иштирокчилар томонидан платформа орқали фойдаланилган сертификатлар ва электр энергиясининг қолган ҳажми тўғрисида махсус ҳисобот юритилади ва ҳар чорак якуни билан эмитентга ахборот берилади.

33. Электр энергиясининг қолдиқ ҳажмининг расмий ҳисоб-китоблари бўлмаган тақдирда, сертификатларни икки марта ҳисоблашнинг олдини олиш мақсадида оператор мавжуд бўлган маълумотларга асосланиб, электр энергиясининг қолдиқ ҳажмини баҳолайди.

34. «Яшил энергия» сертификати биржа савдоларига регистрант томонидан стандарт лотлар асосида сотувга қўйилади:

Савдо сессиясида сотиладиган бир «яшил энергия» сертификатининг лоти 1000 кВт/соат миқдорида белгиланади. Сертификатлар бўйича тузилган битимларга мувофиқ мижозларнинг ўзаро мажбуриятлари биржанинг Ҳисоб-китоб-клиринг палатаси томонидан ҳисобга олинади ва мониторинг амалга оширилади.

Хорижий талабгорлар учун сертификатлар бўйича биржа савдоларида иштирок этишда «бир электрон ариза» тамойили асосида рўйхатдан ўтказиш тартиби жорий қилинади.

Сертификатлар бўйича биржа савдолари ҳамда ҳисоб-китоб-клиринг операциялари тўғрисидаги маълумотлар эмитентга онлайн равишда шахсий кабинет орқали тақдим этиб борилади.

35. «Яшил энергия» сертификатлари бўйича савдоларга хорижий талабгорларни кенг жалб қилиш мақсадида биржа савдоларида яратилган имкониятлар ва биржа механизмларининг қулайликлари тўғрисидаги биржанинг чет давлатларда савдо майдончалари орқали тушунтириш ишлари олиб борилади.

5-боб. Реестрни юритиш тартиби

36. Реестр марказлаштирилган ҳолда Интернет тармоғи орқали кузатиш мумкин бўлган иштирокчиларнинг ҳисоб қайдномалари реестри ҳамда генерация объектлари реестридан иборат.

37. Реестрда генерация объектининг қуйидаги хусусиятлари кўрсатилади:

ишлаб чиқарилган ҳажми (ўтган йилги кўрсаткич, млн.кВт/соатда);

сертификатлар берилганлиги;

ишлаб чиқариш қуввати (йиллик қувват, МВт.);

ишлаб чиқариш режаси.

38. Ҳисоб қайдномалари ва ҳисоботларнинг реестрдаги маълумотларини яратиш ва янгилаш, сертификатларни чиқариш учун сўровларни платформага жойлаштириш, шунингдек, генерация объектларини қўшиш ва сертификатларни бериш эмитент томонидан амалга оширилади.

6-боб. Якунловчи қоида

39. Ушбу Низомнинг талаблари бузилишида айбдор бўлган шахслар қонунчилик ҳужжатларига мувофиқ жавоб берадилар.

«Яшил энергия» сертификатларини бериш ва муомалага киритиш тартиби тўғрисидаги низомга ИЛОВА

«Яшил энергия» сертификатларини ҳисобга олиш, савдосини ташкил этиш ва мониторингини юритиш

Босқичлар Субъектлар Тадбирлар Бажариш муддатлари 1-босқич Эмитент (Иқтисодиёт ва молия вазирлиги) 1. I-REC билан тегишли шартнома имзолайди. 2. I-REC аккредитациясидан ўтади. Аккредитациядан ўтиш муддатларида 2-босқич Рўйхатдан ўтувчи (регистрант) Рўйхатдан ўтиш учун эмитент билан шартнома тузади ва платформада регистрант аккаунтини очиш учун эмитентга ариза юборади. Заруратга кўра 3-босқич Эмитент 1. Рўйхатдан ўтувчининг аризасини кўриб чиқади. 2. I-RECга регистрантни рўйхатдан ўтказиш учун ҳужжатларни юборади. 5 иш куни ичида 4-босқич I-REC 1. Рўйхатдан ўтувчининг аризасини кўриб чиқади. 2. Регистрантнинг электрон почтасига платформага кириш учун регистрант аккаунти, регистрантнинг иштирокчи аккаунти бўйича маълумотлар юборади. Бир ой ичида 5-босқич Рўйхатдан ўтувчи (регистрант) Платформа орқали эмитентга генерация объектларини рўйхатга олиш бўйича ариза юборади. Заруратга кўра 6-босқич Эмитент Генерация объектини платформага киритади. 5 иш куни ичида 7-босқич Рўйхатдан ўтувчи (регистрант) 1. Биржада тузилган шартнома асосида Эмитентга генерация объектида ишлаб чиқарилган электр энергиясига мос сертификат чиқаришга талабнома юборади. 2. Шартномага мувофиқ Эмитентга йиғимни тўлайди. Заруратга кўра 8-босқич Эмитент Регистрант сўровига асосан сертификатларни тегишли аккаунтга чиқариб беради. 5 иш куни ичида 9-босқич Рўйхатдан ўтувчи (регистрант) «Яшил энергия» сертификатини биржа савдоларига стандарт лотлар асосида сотувга қўяди. Заруратга кўра 10-босқич Иштирокчи 1. I-REC ҳисоб қайдномасини очади. 2. Рўйхатдан ўтувчидан сертификатни ўзи ёки мижози номидан сотиб олади. Заруратга кўра 11-босқич Иштирокчи Сертификатларни биржада тузилган шартнома асосида ўзининг ёки мижознинг номига ҳисобдан чиқаради. 5 иш куни ичида

Ўзбекистон Республикасининг Бош вазири А. АРИПОВ

Тошкент ш.,

2023 йил 29 сентябрь,

515-сон

(Қонунчилик маълумотлари миллий базаси, 03.10.2023 й., 09/23/515/0738-сон; 15.04.2025 й., 09/25/225/0339-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

SXEMASI

“Yashil energiya” sertifikatlari joriy etilishini kengaytirish va “yashil moliyalashtirish” mexanizmlarini takomillashtirish chora-tadbirlari toʻgʻrisida

Oʻzbekiston Respublikasi Prezidentining “Yangi tahrirdagi Oʻzbekiston Respublikasi Konstitutsiyasini amalga oshirish boʻyicha birinchi navbatdagi chora-tadbirlar toʻgʻrisida” 2023-yil 8-maydagi PF-67-son Farmoni hamda “Yashil energiya” sertifikatlari tizimini joriy etish chora-tadbirlari toʻgʻrisida” 2023-yil 12-maydagi PQ-156-son qaroriga muvofiq, shuningdek, “yashil moliyalashtirish” mexanizmlarini takomillashtirish va “yashil energiya” sertifikatlari joriy etilishini kengaytirish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Prezidentining “Yangi tahrirdagi Oʻzbekiston Respublikasi Konstitutsiyasini amalga oshirish boʻyicha birinchi navbatdagi chora-tadbirlar toʻgʻrisida” 2023-yil 8-maydagi PF-67-son Farmonining 13-bandiga muvofiq “yashil moliyalashtirish” mexanizmlarini tatbiq etish, shu jumladan, “yashil sertifikat”, “yashil kreditlar” va xalqaro tajribada keng foydalaniladigan boshqa institutlar faoliyatini yoʻlga qoʻyish;

Oʻzbekiston Respublikasi Prezidentining “Yashil energiya” sertifikatlari tizimini joriy etish chora-tadbirlari toʻgʻrisida” 2023-yil 12-maydagi PQ-156-son qarorining 7-bandiga muvofiq “yashil energiya” sertifikatlarini berish va muomalaga kiritish tartibini ishlab chiqish belgilanganligi maʼlumot uchun qabul qilinsin.

2. Qayta tiklanuvchi energiya manbalaridan elektr energiyasi ishlab chiqaruvchilar (generatsiya obyektlari) va ularning xaridorlarini (ishtirokchilarni) roʻyxatdan oʻtkazish shartlari, “yashil energiya” sertifikatlarini muomalaga chiqarish, ularning savdosini onlayn platforma orqali amalga oshirish tartibini nazarda tutuvchi “Yashil energiya” sertifikatlarini berish va muomalaga kiritish tartibi toʻgʻrisidagi nizom ilovaga muvofiq tasdiqlansin.

3. Shunday tartib oʻrnatilsinki, unga muvofiq:

“yashil energiya” sertifikatlari birjalar va birja faoliyati toʻgʻrisidagi qonunchilik hamda birja savdolari qoidalariga muvofiq tovar-xomashyo birjasi orqali “yashil energiya” sertifikatlarini sotishga moʻljallangan “yashil energetika seksiyasi”da sotiladi;

“yashil energiya” sertifikatlarini muomalaga chiqarish hisobidan Oʻzbekiston Respublikasi Iqtisodiyot va moliya vazirligiga tushadigan mablagʻlar vazirlik huzuridagi “Yashil iqtisodiyot loyihalari markazi” loyiha ofisining alohida maxsus hisobvaraqlarida jamlanadi.

4. Oʻzbekiston Respublikasi Iqtisodiyot va moliya vazirligi Energetika vazirligi bilan birgalikda ushbu qarorning mohiyati va ahamiyatini ishtirokchilar oʻrtasida keng tushuntirilishini taʼminlasin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov hamda Oʻzbekiston Respublikasi energetika vaziri J.T. Mirzamahmudov zimmasiga yuklansin.

Vazirlar Mahkamasining 2023-yil 29-sentabrdagi 515-son qaroriga ILOVA

“Yashil energiya” sertifikatlarini berish va muomalaga kiritish tartibi toʻgʻrisida

1-bob. Umumiy qoidalar

1. Mazkur Nizom “yashil energiya” sertifikatlarini hisobga olish, muomalaga kiritish va savdosini tashkil etish hamda monitoringini yuritish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

ariza — muayyan davrda elektr energiyasi ishlab chiqarilganligi va yagona elektr tarmogʻiga yoki toʻgʻridan-toʻgʻri soʻnggi foydalanuvchiga uzatilganligini tasdiqlovchi “yashil energiya” sertifikatlarini berish uchun emitentga generatsiya obyektini roʻyxatdan oʻtkazish toʻgʻrisidagi ariza;

generatsiya obyekti — qayta tiklanuvchi energiya manbalari asosida elektr energiyasi ishlab chiqaruvchi qurilma;

ishtirokchi — platforma reyestrida savdo hisob qaydnomalariga ega boʻlgan, sertifikatlar bilan savdo qiladigan va ulardan foydalanadigan emitent boʻlmagan mahalliy yoki xorijiy yuridik shaxs yoki yakka tartibdagi tadbirkor;

markaz — “yashil” iqtisodiyotni ilgari surish va “yashil” rivojlanish tamoyillarini joriy etish, iqtisodiyot tarmoqlarida issiqxona gazlari tashlanmalarini qisqartirish boʻyicha loyihalarni amalga oshirish maqsadida xalqaro donor tashkilotlarning texnik koʻmagini jalb qilgan holda tegishli shartnomalarni imzolashi vakolatiga ega boʻlgan Oʻzbekiston Respublikasi Iqtisodiyot va moliya vazirligi taʼsischiligida davlat muassasasi shaklida tashkil etiladigan “Yashil iqtisodiyot loyihalari markazi” loyiha ofisi;

operator — emitentni qoʻllab-quvvatlovchi va platforma faoliyatini taʼminlovchi xalqaro tashkilot (Evident/ I-REC Services BV);

registrant (generator) — generatsiya obyektlariga egalik qiluvchi subyekt;

sertifikatlar reyestri — “yashil energiya” sertifikatlarining toʻliq hayotiy davri va ulardan foydalanish yozuvlarini saqlovchi platformadagi maʼlumotlar bazasi;

sertifikatlarni chiqarish — platformada hisob qaydnomasida bir yoki bir nechta “yashil energiya” sertifikatlari qayd etilganligi toʻgʻrisidagi dalolatnoma;

qayta tiklanuvchi energiya manbalari — quyosh, shamol, gidroelektr, geotermal va biogaz elektr stansiyalari;

hisob qaydnomasi (akkaunt) — “yashil energiya” sertifikatlarini roʻyxatga olishda ishtirokchi roʻyxatga olinganda unga platformada ochiladigan maxsus akkaunt;

emitent — “yashil energiya” sertifikatlari tizimini yuritish, shu jumladan, “yashil energiya” sertifikatlarini chiqarish, ularning savdosini tashkil etish va monitoringini yuritish boʻyicha masʼul organ — Oʻzbekiston Respublikasi Iqtisodiyot va moliya vazirligi;

elektr energiyasining qoldiq hajmi — talab qilinmagan yoki muayyan sanaga qadar saqlangan va hisob-kitob qilingan milliy energiya balansi;

“yashil energiya” sertifikati (keyingi oʻrinlarda — sertifikat) — platforma reyestriga kiritilgan generatsiya obyekti tomonidan tegishli hajmda ishlab chiqarilgan hamda yagona elektr energetika tarmogʻiga yoki toʻgʻridan-toʻgʻri oxirgi foydalanuvchiga uzatilgan elektr energiyasini tasdiqlovchi yozuv;

“yashil energiya” sertifikatlari yagona elektron platformasi (keyingi oʻrinlarda — platforma) — Xalqaro qayta tiklanuvchi energiya manbalarini sertifikatlash tashkiloti (I-REC) standartlari asosida ishlab chiqilgan “yashil energiya” sertifikatlarini hisobga olish, savdosini tashkil qilish va monitoringini yuritish, shuningdek, “yashil energiya” sertifikatlari tizimining barcha ishtirokchilari uchun xizmatlar koʻrsatish imkoniyatiga ega elektron tizim;

I-REC — Xalqaro qayta tiklanuvchi energiya manbalarini sertifikatlash tashkiloti.

3. Sertifikatlarni hisobga olish, savdosini tashkil qilish hamda monitoringini yuritish ishlari emitent nomidan markaz tomonidan amalga oshiriladi.

Markaz “yashil” iqtisodiyotni ilgari surish va “yashil” rivojlanish tamoyillarini joriy etish, iqtisodiyot tarmoqlarida issiqxona gazlari tashlanmalarini qisqartirish boʻyicha loyihalarni koʻrib chiqish va amalga oshirish hamda “yashil energiya” sertifikatlari muomalasini taʼminlash choralarini koʻradi hamda muvofiqlashtirib boradi.

4. “Yashil energiya” sertifikatlarini hisobga olish, savdosini tashkil etish va monitoringini yuritish mazkur Nizomga ilovada keltirilgan sxemaga muvofiq amalga oshiriladi.

5. Muayyan davr davomida qayta tiklanuvchi energiya manbalarida ishlab chiqarilgan hamda yagona elektr tarmogʻiga yoki toʻgʻridan-toʻgʻri oxirgi foydalanuvchiga uzatilgan tegishli miqdordagi MVt/soat elektr energiyasi uchun sertifikatlar faqat bir marta beriladi.

6. Sertifikatning amal qilish muddati chegaralanmagan. Foydalanilgan sertifikatlar ishtirokchi tomonidan platforma orqali hisobdan chiqariladi.

7. Sertifikatlar ishtirokchilarning hisob qaydnomalarida saqlanadi. Aynan bir sertifikatga faqat bir registrant yoki ishtirokchi ega boʻlishi mumkin.

8. Qayta tiklanuvchi energiya manbalarida oʻz isteʼmoli uchun ishlab chiqarilgan va foydalanilgan elektr energiyasi miqdori uchun sertifikatlar berilmaydi.

9. Ishtirokchilar oʻz ehtiyojidan ortiq sertifikatlarga ega boʻlgan taqdirda, ularni boshqa ishtirokchilarga platforma orqali oʻtkazishlari mumkin.

10. Sertifikatdan faqat bir marta foydalanish mumkin, sertifikat foydalanilganda yoki hisobdan chiqarilganida, ishtirokchilar oʻrtasida oʻtkazilmaydi.

2-bob. Generatsiya obyektlari va ishtirokchilarni roʻyxatga olish tartibi

11. Registrant va emitent oʻrtasida sertifikat chiqarishning standart shartlari toʻgʻrisida shartnoma tuziladi.

Registrant platformada roʻyxatdan oʻtish uchun quyidagi hujjatlarni I-REC bosh ofisiga emitent orqali yuborish toʻgʻrisida murojaat yuboradi:

Sertifikat chiqarishning standart shartlari toʻgʻrisidagi shartnomaning nusxasi;

oxirgi 12 oylik buxgalteriya balansi va tashqi audit xulosasi (audit qilingan boʻlsa);

CSD01 shaklidagi toʻldirilgan va imzolangan soʻrovnoma (korxonaning umumiy, rahbariyat va aksiyadorlar toʻgʻrisidagi hamda aloqa maʼlumotlari);

Emitent registrantning akkauntini platformada ochish maqsadida yuqoridagi hujjatlarni besh ish kuni davomida I-REC bosh ofisiga yuboradi.

12. I-REC tomonidan qabul qilingan sanadan soʻng bir oy davomida registrantning elektron pochtasiga platformaga kirish uchun registrant akkaunti boʻyicha maʼlumotlar yuboriladi.

13. Generatsiya obyektlarini roʻyxatga olish maqsadida registrant tomonidan emitentga platforma orqali belgilangan shakldagi elektron ariza yuboriladi.

14. Roʻyxatga olish uchun berilgan arizada quyidagilar aks ettiriladi:

SSD02 elektron arizasi toʻldirilgan va imzolangan holda (generatsiya obyektining turi va joylashuvi, uning nominal quvvati, ulangan tarmogʻi);

generatsiya obyektining fotosurati (maksimal darajada qamrab oluvchi rasmi);

bir chiziqli elektr sxemasi;

Oʻzbekiston Respublikasi Energetika vazirligi tomonidan beriladigan generatsiya obyektlarida elektr energiyasi qayta tiklanuvchi energiya manbalarida ishlab chiqarilganligini tasdiqlovchi hujjat.

15. Generatsiya obyektini roʻyxatga olish uchun registrant tomonidan emitentga quyidagi miqdordagi bir martalik yigʻim amalga oshirilayotgan sanadagi Oʻzbekiston Respublikasi Markaziy bankining rasmiy valyuta kursi boʻyicha milliy valyutada undiriladi:

umumiy quvvati 1 MVtgacha boʻlgan generatsiya obyektlari uchun — 100 yevro miqdorida;

umumiy quvvati 1 MVtdan 5 MVtgacha boʻlgan generatsiya obyektlari uchun — 500 yevro miqdorida;

umumiy quvvati 5 MVtdan 10 MVtgacha boʻlgan generatsiya obyektlari uchun — 1 000 yevro miqdorida;

umumiy quvvati 10 MVtdan 50 MVtgacha boʻlgan generatsiya obyektlari uchun — 1 500 yevro miqdorida;

umumiy quvvati 50 MVtdan katta boʻlgan generatsiya obyektlari uchun — 2 000 yevro miqdorida.

16. Roʻyxatdan oʻtuvchining arizasi yigʻim undirilgandan soʻng emitent tomonidan besh ish kuni ichida koʻrib chiqiladi, roʻyxatdan oʻtkaziladi va generatsiya obyekti platformaga kiritiladi.

17. Arizani koʻrib chiqish quyidagi holatlarda rad etiladi:

notoʻgʻri yoki yolgʻon maʼlumotlar kiritilganligi aniqlanganda;

mazkur Nizomning 14 va 15-bandlarida koʻrsatilgan talablarga zid boʻlganda;

boshqa qayta tiklanuvchi energiyani sertifikatlash tizimlarida roʻyxatdan oʻtgan taqdirda.

Mazkur bandda koʻrsatilgan kamchiliklarni bartaraf etgandan keyin ariza qayta kiritilishi mumkin.

18. Generatsiya obyektining platformaga kiritilganligi ushbu obyekt roʻyxatdan oʻtgan oydan keyingi oyning birinchi kunidan boshlab kuchga kiradi.

19. Generatsiya obyekti platformada boʻlish muddati besh yilni tashkil etadi, ushbu muddat tugagandan soʻng generatsiya obyektni qayta roʻyxatga olish talab etiladi.

Sertifikatlarni berishning uzluksizligini taʼminlash maqsadida generatsiya obyektining platformada boʻlish muddati tugashidan oldin ushbu muddatni uzaytirish boʻyicha murojaat qilinishi mumkin.

20. Sertifikatlarni chiqarish uchun registrant tomonidan platforma orqali emitentga ariza beriladi va quyidagi maʼlumotlar kiritiladi:

a) yagona elektr energetikasi tarmogʻiga uzatilgan elektr uchun:

CCD04 shakldagi toʻldirilgan va imzolangan soʻrovnoma (generatsiya obyekti yoki obyektlari tomonidan ishlab chiqarilgan elektr energiyasi miqdori, ishtirokchi nomi);

korxonaning umumiy faoliyati toʻgʻrisida maʼlumotlar;

elektr energiyasi ishlab chiqarish davomiyligi va uning hajmi (kVt.s);

generatsiya obyektlarida elektr energiyasini ishlab chiqarish holati “Oʻzbekiston milliy elektr tarmoqlari” AJ (“Oʻzenergosotish” AJ yoki “Hududiy elektr tarmoqlari” AJ) tomonidan tasdiqlangan hujjat;

sertifikat chiqarish uchun moʻljallangan registrantning ishtirokchi akkaunti maʼlumotlari;

b) toʻgʻridan-toʻgʻri soʻnggi foydalanuvchiga uzatilgan elektr uchun:

CCD04 shakldagi toʻldirilgan va imzolangan soʻrovnoma (generatsiya obyekti yoki obyektlari tomonidan ishlab chiqarilgan elektr energiyasi miqdori, ishtirokchi nomi);

korxonaning umumiy faoliyati toʻgʻrisida maʼlumotlar;

elektr energiyasi ishlab chiqarish davomiyligi va uning hajmi (kVt.s);

elektr energiyasini toʻgʻridan-toʻgʻri qabul qilgan soʻnggi foydalanuvchi va generatsiya obyekti egasi tomonidan tuzilgan muayyan davrda uzatilgan elektr hajmini tasdiqlovchi dalolatnoma;

sertifikat chiqarish uchun moʻljallangan registrantning ishtirokchi akkaunti maʼlumotlari;

generatsiya obyektlarida elektr energiyasini ishlab chiqarish holati boʻyicha elektr energiyasini hisobga olish va nazorat qilishning avtomatlashtirilgan tizimidan (EHNAT) olingan va elektr energiyasini sotib oluvchi tomonidan tasdiqlangan hujjat.

21. Ishtirokchilar platformadan foydalanish va u orqali sertifikatlar savdosi boʻyicha xizmatlardan foydalanish uchun operator bilan shartnoma tuzadi hamda oʻzining hisob qaydnomalarini ochadi.

3-bob. Sertifikatlarni chiqarish tartibi

22. Sertifikatlarni chiqarish toʻgʻrisidagi rasmiy soʻrov registrant tomonidan platforma orqali emitentga yuboriladi.

23. Ishlab chiqarilgan elektr energiyasini hisoblash nuqtasi:

yagona elektr energetika tarmogʻiga uzatilganida — elektr tarmogʻiga uzatish joyida;

toʻgʻridan-toʻgʻri oxirgi foydalanuvchiga uzatilganida — elektr tarmoqlarining balans boʻyicha mansublik chegarasi boʻladi.

24. Tekshirish natijalariga koʻra ishlab chiqarilgani va yagona elektr energetika tarmogʻiga yoki toʻgʻridan-toʻgʻri soʻnggi foydalanuvchiga uzatilgani tasdiqlangan “yashil elektr” energiyasi hajmiga mos ravishda emitent tomonidan platforma orqali har 1 MVt/soat elektr energiyasi uchun 1 ta noyob identifikatsiya raqamli sertifikat chiqariladi.

25. Hisobga olinmasdan qolgan har qanday ishlab chiqarilgan elektr energiyasi hajmini keyingi ishlab chiqarish davriga oʻtkazish mumkin. Bunda hisobga olish davri I-REC tomonidan belgilangan talablarga mos kelishi lozim.

26. Sertifikatlar berilishi mumkin boʻlgan davr I-REC talablariga asosan belgilanadi.

27. Sertifikatni oʻchirib yoki oʻzgartirib boʻlmaydi, xatolikni tuzatish holatlari bundan mustasno. Agar sertifikat xatolik bilan berilgan boʻlsa, operator tomonidan bekor qilinadi.

28. Agar operator sertifikatning kelib chiqishi registrant va emitent oʻrtasida “Sertifikat chiqarishning standart shartlari toʻgʻrisidagi shartnoma” shartlari buzilganligidan xabar topsa, vaziyat aniqlangan paytdan boshlab sertifikatlarni berish yoki undan foydalanishni toʻxtatadi.

29. Xatolik tasdiqlangan taqdirda, operator sertifikat tafsilotlariga oʻzgartirish kiritadi.

Sertifikat foydalanilganidan soʻng unga tuzatishlar kiritib boʻlmaydi.

4-bob. Sertifikatlar savdosini amalga oshirish, ulardan foydalanish va ularni hisobdan chiqarish tartibi

30. Sertifikatlardan ishtirokchi tomonidan uning hisob qaydnomasi orqali foydalaniladi. Sertifikatlar hisob qaydnomasidan chiqarilishi va undan qaytib foydalanib boʻlmaydigan qilib hisob qaydnomasiga joylashtirilishi kerak.

31. Agar registrant oʻzida ishlab chiqarilgan va uzatilgan elektr energiyasi uchun berilgan sertifikatdan oʻzi foydalanishni xohlasa, ushbu sertifikatni oʻzi uchun ochilgan qaytib foydalanib boʻlmaydigan hisob qaydnomasiga oʻtkazishi mumkin.

32. Foydalanilgan sertifikatlarni hisobdan chiqarishini monitoring qilib borish uchun generatsiya obyekti va ishtirokchilar tomonidan platforma orqali foydalanilgan sertifikatlar va elektr energiyasining qolgan hajmi toʻgʻrisida maxsus hisobot yuritiladi va har chorak yakuni bilan emitentga axborot beriladi.

33. Elektr energiyasining qoldiq hajmining rasmiy hisob-kitoblari boʻlmagan taqdirda, sertifikatlarni ikki marta hisoblashning oldini olish maqsadida operator mavjud boʻlgan maʼlumotlarga asoslanib, elektr energiyasining qoldiq hajmini baholaydi.

34. “Yashil energiya” sertifikati birja savdolariga registrant tomonidan standart lotlar asosida sotuvga qoʻyiladi:

Savdo sessiyasida sotiladigan bir “yashil energiya” sertifikatining loti 1000 kVt/soat miqdorida belgilanadi. Sertifikatlar boʻyicha tuzilgan bitimlarga muvofiq mijozlarning oʻzaro majburiyatlari birjaning Hisob-kitob-kliring palatasi tomonidan hisobga olinadi va monitoring amalga oshiriladi.

Xorijiy talabgorlar uchun sertifikatlar boʻyicha birja savdolarida ishtirok etishda “bir elektron ariza” tamoyili asosida roʻyxatdan oʻtkazish tartibi joriy qilinadi.

Sertifikatlar boʻyicha birja savdolari hamda hisob-kitob-kliring operatsiyalari toʻgʻrisidagi maʼlumotlar emitentga onlayn ravishda shaxsiy kabinet orqali taqdim etib boriladi.

35. “Yashil energiya” sertifikatlari boʻyicha savdolarga xorijiy talabgorlarni keng jalb qilish maqsadida birja savdolarida yaratilgan imkoniyatlar va birja mexanizmlarining qulayliklari toʻgʻrisidagi birjaning chet davlatlarda savdo maydonchalari orqali tushuntirish ishlari olib boriladi.

5-bob. Reyestrni yuritish tartibi

36. Reyestr markazlashtirilgan holda Internet tarmogʻi orqali kuzatish mumkin boʻlgan ishtirokchilarning hisob qaydnomalari reyestri hamda generatsiya obyektlari reyestridan iborat.

37. Reyestrda generatsiya obyektining quyidagi xususiyatlari koʻrsatiladi:

ishlab chiqarilgan hajmi (oʻtgan yilgi koʻrsatkich, mln.kVt/soatda);

sertifikatlar berilganligi;

ishlab chiqarish quvvati (yillik quvvat, MVt.);

ishlab chiqarish rejasi.

38. Hisob qaydnomalari va hisobotlarning reyestrdagi maʼlumotlarini yaratish va yangilash, sertifikatlarni chiqarish uchun soʻrovlarni platformaga joylashtirish, shuningdek, generatsiya obyektlarini qoʻshish va sertifikatlarni berish emitent tomonidan amalga oshiriladi.

6-bob. Yakunlovchi qoida

39. Ushbu Nizomning talablari buzilishida aybdor boʻlgan shaxslar qonunchilik hujjatlariga muvofiq javob beradilar.

“Yashil energiya” sertifikatlarini berish va muomalaga kiritish tartibi toʻgʻrisidagi nizomga ILOVA

“Yashil energiya” sertifikatlarini hisobga olish, savdosini tashkil etish va monitoringini yuritish

Bosqichlar Subyektlar Tadbirlar Bajarish muddatlari 1-bosqich Emitent (Iqtisodiyot va moliya vazirligi) 1. I-REC bilan tegishli shartnoma imzolaydi. 2. I-REC akkreditatsiyasidan oʻtadi. Akkreditatsiyadan oʻtish muddatlarida 2-bosqich Roʻyxatdan oʻtuvchi (registrant) Roʻyxatdan oʻtish uchun emitent bilan shartnoma tuzadi va platformada registrant akkauntini ochish uchun emitentga ariza yuboradi. Zaruratga koʻra 3-bosqich Emitent 1. Roʻyxatdan oʻtuvchining arizasini koʻrib chiqadi. 2. I-RECga registrantni roʻyxatdan oʻtkazish uchun hujjatlarni yuboradi. 5 ish kuni ichida 4-bosqich I-REC 1. Roʻyxatdan oʻtuvchining arizasini koʻrib chiqadi. 2. Registrantning elektron pochtasiga platformaga kirish uchun registrant akkaunti, registrantning ishtirokchi akkaunti boʻyicha maʼlumotlar yuboradi. Bir oy ichida 5-bosqich Roʻyxatdan oʻtuvchi (registrant) Platforma orqali emitentga generatsiya obyektlarini roʻyxatga olish boʻyicha ariza yuboradi. Zaruratga koʻra 6-bosqich Emitent Generatsiya obyektini platformaga kiritadi. 5 ish kuni ichida 7-bosqich Roʻyxatdan oʻtuvchi (registrant) 1. Birjada tuzilgan shartnoma asosida Emitentga generatsiya obyektida ishlab chiqarilgan elektr energiyasiga mos sertifikat chiqarishga talabnoma yuboradi. 2. Shartnomaga muvofiq Emitentga yigʻimni toʻlaydi. Zaruratga koʻra 8-bosqich Emitent Registrant soʻroviga asosan sertifikatlarni tegishli akkauntga chiqarib beradi. 5 ish kuni ichida 9-bosqich Roʻyxatdan oʻtuvchi (registrant) “Yashil energiya” sertifikatini birja savdolariga standart lotlar asosida sotuvga qoʻyadi. Zaruratga koʻra 10-bosqich Ishtirokchi 1. I-REC hisob qaydnomasini ochadi. 2. Roʻyxatdan oʻtuvchidan sertifikatni oʻzi yoki mijozi nomidan sotib oladi. Zaruratga koʻra 11-bosqich Ishtirokchi Sertifikatlarni birjada tuzilgan shartnoma asosida oʻzining yoki mijozning nomiga hisobdan chiqaradi. 5 ish kuni ichida

Oʻzbekiston Respublikasining Bosh vaziri A. ARIPOV

Toshkent sh.,

2023-yil 29-sentabr,

515-son

(Qonunchilik maʼlumotlari milliy bazasi, 03.10.2023-y., 09/23/515/0738-son; 15.04.2025-y., 09/25/225/0339-son)

lex.uz