UzbekAI

Ўзбекистон Республикаси Давлат хавфсизлик хизмати раисининг

буйруғи

НИЗОМ

Ўзбекистон Республикаси Давлат хавфсизлик хизмати байроғи ва эмблемасидан фойдаланиш тартиби тўғрисидаги низомни тасдиқлаш ҳақида

Ўзбекистон Республикасининг «Ўзбекистон Республикаси Давлат хавфсизлик хизмати тўғрисида»ги Қонуни ва Ўзбекистон Республикаси Президентининг 2018 йил 14 мартдаги ПФ-5379-сон «Ўзбекистон Республикасининг давлат хавфсизлиги тизимини такомиллаштириш чора-тадбирлари тўғрисида»ги Фармонига мувофиқ буюраман:

1. Ўзбекистон Республикаси Давлат хавфсизлик хизмати байроғи ва эмблемасидан фойдаланиш тартиби тўғрисидаги низом иловага мувофиқ тасдиқлансин.

2. Мазкур буйруқ расмий эълон қилинган кундан эътиборан кучга киради.

Ўзбекистон Республикаси Давлат хавфсизлик хизмати Раисининг 2023 йил 14 октябрдаги 113-сон буйруғига ИЛОВА

Ўзбекистон Республикаси Давлат хавфсизлик хизмати байроғи ва эмблемасидан фойдаланиш тартиби тўғрисидаги

Ушбу Низом Ўзбекистон Республикаси Давлат хавфсизлик хизмати (бундан буён матнда Хизмат деб юритилади) байроғи ва эмблемасини тайёрлаш, ундан фойдаланиш, сақлаш ва йўқ қилиш тартибини белгилайди.

1-боб. Умумий қоидалар

1. Хизмат байроғи ва эмблемаси Хизматнинг расмий рамзлари ҳисобланади.

2. Хизмат байроғи ва эмблемаси ўлчамидан қатъи назар, Ўзбекистон Республикаси Президентининг 2018 йил 14 мартдаги ПФ-5379-сон «Ўзбекистон Республикасининг Давлат хавфсизлиги тизимини такомиллаштириш чора-тадбирлари тўғрисида»ги Фармонида келтирилган намуналарга мувофиқ бўлиши керак.

3. Хизмат байроғи ва эмблемаси Хизмат ҳарбий хизматчилари учун Ватанга садоқат билан хизмат қилишни, Ўзбекистоннинг давлат суверенитетини, ҳудудий яхлитлигини ва хавфсизлигини ҳимоя қилиш муқаддас бурч эканлигини эслатиб туришга хизмат қилади.

2-боб. Хизмат байроғи ва эмблемасини тайёрлаш ва ундан фойдаланиш

4. Хизмат байроғи ва эмблемасини тайёрлаш қонунчиликда белгиланган тартибда амалга оширилади.

5. Хизмат байроғидан қуйидаги бино ва иншоотларда фойдаланилади:

Хизмат марказий девони биносида ва раҳбарияти хизмат хоналарида;

Хизматнинг Қорақалпоғистон Республикаси, вилоятлар ва Тошкент шаҳри бўйича бошқармалари, уларнинг туманлар (шаҳарлар) бўйича бўлимлари (бўлинмалари), Хизматнинг чегара қўшинлари, шунингдек Хизматнинг зиммасига юклатилган вазифаларни бажариш учун ташкил этиладиган бошқа органлар биноларида;

Хизмат тарихи музейи, маънавият ва маърифат хоналарида ҳамда мажлислар залларида;

Хизмат иштирокида ёки ташаббуси билан ташкил этилаётган спорт мусобақалари ва бошқа тадбирлар ўтказилаётган бино ва иншоотларда.

6. Хизмат байроғи Ўзбекистон Республикаси ва Қорақалпоғистон Республикасининг Давлат байроқлари билан бир вақтда кўтарилганда ўнг томондан кўтарилади (бинонинг фасад қисмига қараб турганда).

Хизмат байроғи Ўзбекистон Республикаси ва Қорақалпоғистон Республикасининг Давлат байроқлари билан бир текис жойлаштирилади.

7. Хизмат байроғи биноларнинг асосий кириш жойида ёки бунинг учун мақбул бўлган бошқа жойда ёхуд тегишли тутқичи бўлган дастада ёки флагштокда байроқнинг дастаси бинонинг олд томони билан кўпи билан 45 градусли бурчак ҳосил қиладиган тарзда кўтарилади.

Кўтариб қўйилган Хизмат байроғининг матоси ер сатҳидан камида 2,5 метр баландликда бўлиши керак.

8. Хизмат байроғи тасвири қуйидаги ҳолларда қўлланилиши мумкин:

Хизмат автотранспорт воситалари, махсус ва ҳарбий техникаларида;

Хизмат ҳарбий хизматчиларининг ҳарбий формали кийим-кечакларида ва фарқловчи нишонларида;

Хизмат ҳарбий хизматчилари учун ўтказиладиган ўқув-тарбия жараёнида;

Хизмат расмий веб-сайтларида.

9. Хизмат эмблемаси қуйидагиларда жойлаштирилади:

Хизмат марказий девони биносида ва раҳбарияти хизмат хоналарида;

Хизмат офицерлар таркибидаги ҳарбий хизматчиларнинг хизмат гувоҳномасида.

10. Хизмат эмблемаси тасвири қуйидаги ҳолларда қўлланилиши мумкин:

Хизмат автотранспорт воситалари, махсус ва ҳарбий техникаларида;

Хизмат ҳарбий хизматчиларининг ҳарбий формали кийим-кечакларида ва фарқловчи нишонларида;

Хизмат тарихи музейи, маънавият ва маърифат хоналарида ҳамда мажлислар залларида;

Хизмат ҳарбий хизматчилари учун ўтказиладиган ўқув-тарбия жараёнида;

Хизмат фахрий ёрлиқларида ҳамда ички ва халқаро ёзишма ҳужжатларида;

Хизмат расмий веб-сайтлари ва нашрларида;

Хизмат идоравий кўкрак ва эсдалик нишонларида.

11. Хизмат байроғи ва эмблемаси тасвиридан қуйидаги ҳолларда фойдаланишга рухсат этилади:

Хизмат буюртмаси бўйича чоп этиладиган босма маҳсулотларда;

Хизмат томонидан, шунингдек у билан ҳамкорликда суратга олинадиган кино, видео ва фотоматериалларда;

Хизмат буюртмасига кўра тайёрланадиган идоравий, ахборот ва эсдалик совға маҳсулотлари ҳамда қадоқланган пакетларга туширилган тасвир сифатида, шу жумладан логотип, кубок, спорт медаллари, вимпеллар ва дипломларда.

12. Хизмат байроғи ва эмблемаси бутун ҳамда ранги бузилмаган ҳолда кўтарилади ва жойлаштирилади.

13. Хизмат байроғи ва эмблемасининг ўлчами, ўрнатилган ёки жойлаштирилган жойларига мос келиши керак.

14. Жисмоний ва юридик шахслар томонидан товарларни ишлаб чиқариш (ишларни бажариш ва хизмат кўрсатиш) ва реализация қилишда Хизмат байроғи ва эмблемаси тасвири туширилган белгилардан фойдаланиш тақиқланади, бундан Хизмат буюртмасига асосан товарларни ишлаб чиқариш (ишларни бажариш ва хизмат кўрсатиш), шунингдек қонунчиликда назарда тутилган ҳоллар мустасно.

15. Юридик шахсларнинг рамзий белгилари Хизмат байроғи ва эмблемаси билан айнан ўхшаш бўлиши мумкин эмас.

3-боб. Хизмат байроғи ва эмблемасини сақлаш ва йўқ қилиш

16. Хизмат байроғи ва эмблемасини сақлаш, ҳисобини юритиш, бериш ва ишлатиш Хизмат Раиси, Қорақалпоғистон Республикаси, вилоятлар ва Тошкент шаҳри бўйича бошқармалари, уларнинг туманлар (шаҳарлар) бўйича бўлимлари (бўлинмалари), Хизматнинг чегара қўшинлари, шунингдек Хизматнинг зиммасига юклатилган вазифаларни бажариш учун ташкил этиладиган бошқа органлар бошлиқлари томонидан тайинланадиган моддий жавобгар шахслар томонидан таъминланади, бундан ушбу Низомнинг 9-банди тўртинчи хатбошисида назарда тутилган ҳолат мустасно.

17. Хизмат байроқлари ва эмблемалари кейинчалик фойдаланиш учун яроқсизлиги аниқланганда, моддий жавобгар шахс уларни алмаштириш бўйича зарур чоралар кўради.

18. Бинонинг олд томонида жойлаштирилган Хизмат байроғини алмаштириш унинг эскиришига кўра, бир йилда кўпи билан тўрт марта амалга оширилади. Бино ичида ва мажлислар залларидаги байроқ уч йилда бир мартадан кўп бўлмаган муддатда алмаштирилади. Агар белгиланган муддат тамом бўлгандан кейин Хизмат байроғи қониқарли ҳолатда бўлса, у алмаштирилмайди.

19. Хизмат эмблемаси кўпи билан беш йилда бир марта алмаштирилади. Агар ушбу муддат ўтгач белги қониқарли ҳолатда бўлса, у алмаштирилмайди.

20. Дастлабки кўринишини йўқотган ёки фойдаланишга яроқсиз бўлиб қолган Хизмат байроғи ва эмблемасини йўқ қилиш қайта фойдаланишни истисно этиш мақсадида ёқиш, эритиш ва майдалаш йўллари орқали амалга оширилиши шарт.

Фойдаланишга яроқсиз бўлиб қолган Хизмат байроғи ва эмблемасини йўқ қилиш тўғрисида тегишли далолатнома моддий жавобгар шахс томонидан тузилади.

4-боб. Якунловчи қоида

21. Ушбу Низом талаблари бузилишида айбдор шахслар қонунчилик ҳужжатларида белгиланган тартибда жавоб беради.

Раис А. АЗИЗОВ

Тошкент ш.,

2023 йил 14 октябрь,

113-сон

(Қонунчилик маълумотлари миллий базаси, 20.10.2023 й., 10/23/3466/0790-сон)

lex.uz

Oʻzbekiston Respublikasi Davlat xavfsizlik xizmati raisining

buyrugʻi

NIZOM

Oʻzbekiston Respublikasi Davlat xavfsizlik xizmati bayrogʻi va emblemasidan foydalanish tartibi toʻgʻrisidagi nizomni tasdiqlash haqida

Oʻzbekiston Respublikasining “Oʻzbekiston Respublikasi Davlat xavfsizlik xizmati toʻgʻrisida”gi Qonuni va Oʻzbekiston Respublikasi Prezidentining 2018-yil 14-martdagi PF-5379-son “Oʻzbekiston Respublikasining davlat xavfsizligi tizimini takomillashtirish chora-tadbirlari toʻgʻrisida”gi Farmoniga muvofiq buyuraman:

1. Oʻzbekiston Respublikasi Davlat xavfsizlik xizmati bayrogʻi va emblemasidan foydalanish tartibi toʻgʻrisidagi nizom ilovaga muvofiq tasdiqlansin.

2. Mazkur buyruq rasmiy eʼlon qilingan kundan eʼtiboran kuchga kiradi.

Oʻzbekiston Respublikasi Davlat xavfsizlik xizmati Raisining 2023-yil 14-oktabrdagi 113-son buyrugʻiga ILOVA

Oʻzbekiston Respublikasi Davlat xavfsizlik xizmati bayrogʻi va emblemasidan foydalanish tartibi toʻgʻrisidagi

Ushbu Nizom Oʻzbekiston Respublikasi Davlat xavfsizlik xizmati (bundan buyon matnda Xizmat deb yuritiladi) bayrogʻi va emblemasini tayyorlash, undan foydalanish, saqlash va yoʻq qilish tartibini belgilaydi.

1-bob. Umumiy qoidalar

1. Xizmat bayrogʻi va emblemasi Xizmatning rasmiy ramzlari hisoblanadi.

2. Xizmat bayrogʻi va emblemasi oʻlchamidan qatʼi nazar, Oʻzbekiston Respublikasi Prezidentining 2018-yil 14-martdagi PF-5379-son “Oʻzbekiston Respublikasining Davlat xavfsizligi tizimini takomillashtirish chora-tadbirlari toʻgʻrisida”gi Farmonida keltirilgan namunalarga muvofiq boʻlishi kerak.

3. Xizmat bayrogʻi va emblemasi Xizmat harbiy xizmatchilari uchun Vatanga sadoqat bilan xizmat qilishni, Oʻzbekistonning davlat suverenitetini, hududiy yaxlitligini va xavfsizligini himoya qilish muqaddas burch ekanligini eslatib turishga xizmat qiladi.

2-bob. Xizmat bayrogʻi va emblemasini tayyorlash va undan foydalanish

4. Xizmat bayrogʻi va emblemasini tayyorlash qonunchilikda belgilangan tartibda amalga oshiriladi.

5. Xizmat bayrogʻidan quyidagi bino va inshootlarda foydalaniladi:

Xizmat markaziy devoni binosida va rahbariyati xizmat xonalarida;

Xizmatning Qoraqalpogʻiston Respublikasi, viloyatlar va Toshkent shahri boʻyicha boshqarmalari, ularning tumanlar (shaharlar) boʻyicha boʻlimlari (boʻlinmalari), Xizmatning chegara qoʻshinlari, shuningdek Xizmatning zimmasiga yuklatilgan vazifalarni bajarish uchun tashkil etiladigan boshqa organlar binolarida;

Xizmat tarixi muzeyi, maʼnaviyat va maʼrifat xonalarida hamda majlislar zallarida;

Xizmat ishtirokida yoki tashabbusi bilan tashkil etilayotgan sport musobaqalari va boshqa tadbirlar oʻtkazilayotgan bino va inshootlarda.

6. Xizmat bayrogʻi Oʻzbekiston Respublikasi va Qoraqalpogʻiston Respublikasining Davlat bayroqlari bilan bir vaqtda koʻtarilganda oʻng tomondan koʻtariladi (binoning fasad qismiga qarab turganda).

Xizmat bayrogʻi Oʻzbekiston Respublikasi va Qoraqalpogʻiston Respublikasining Davlat bayroqlari bilan bir tekis joylashtiriladi.

7. Xizmat bayrogʻi binolarning asosiy kirish joyida yoki buning uchun maqbul boʻlgan boshqa joyda yoxud tegishli tutqichi boʻlgan dastada yoki flagshtokda bayroqning dastasi binoning old tomoni bilan koʻpi bilan 45 gradusli burchak hosil qiladigan tarzda koʻtariladi.

Koʻtarib qoʻyilgan Xizmat bayrogʻining matosi yer sathidan kamida 2,5 metr balandlikda boʻlishi kerak.

8. Xizmat bayrogʻi tasviri quyidagi hollarda qoʻllanilishi mumkin:

Xizmat avtotransport vositalari, maxsus va harbiy texnikalarida;

Xizmat harbiy xizmatchilarining harbiy formali kiyim-kechaklarida va farqlovchi nishonlarida;

Xizmat harbiy xizmatchilari uchun oʻtkaziladigan oʻquv-tarbiya jarayonida;

Xizmat rasmiy veb-saytlarida.

9. Xizmat emblemasi quyidagilarda joylashtiriladi:

Xizmat markaziy devoni binosida va rahbariyati xizmat xonalarida;

Xizmat ofitserlar tarkibidagi harbiy xizmatchilarning xizmat guvohnomasida.

10. Xizmat emblemasi tasviri quyidagi hollarda qoʻllanilishi mumkin:

Xizmat avtotransport vositalari, maxsus va harbiy texnikalarida;

Xizmat harbiy xizmatchilarining harbiy formali kiyim-kechaklarida va farqlovchi nishonlarida;

Xizmat tarixi muzeyi, maʼnaviyat va maʼrifat xonalarida hamda majlislar zallarida;

Xizmat harbiy xizmatchilari uchun oʻtkaziladigan oʻquv-tarbiya jarayonida;

Xizmat faxriy yorliqlarida hamda ichki va xalqaro yozishma hujjatlarida;

Xizmat rasmiy veb-saytlari va nashrlarida;

Xizmat idoraviy koʻkrak va esdalik nishonlarida.

11. Xizmat bayrogʻi va emblemasi tasviridan quyidagi hollarda foydalanishga ruxsat etiladi:

Xizmat buyurtmasi boʻyicha chop etiladigan bosma mahsulotlarda;

Xizmat tomonidan, shuningdek u bilan hamkorlikda suratga olinadigan kino, video va fotomateriallarda;

Xizmat buyurtmasiga koʻra tayyorlanadigan idoraviy, axborot va esdalik sovgʻa mahsulotlari hamda qadoqlangan paketlarga tushirilgan tasvir sifatida, shu jumladan logotip, kubok, sport medallari, vimpellar va diplomlarda.

12. Xizmat bayrogʻi va emblemasi butun hamda rangi buzilmagan holda koʻtariladi va joylashtiriladi.

13. Xizmat bayrogʻi va emblemasining oʻlchami, oʻrnatilgan yoki joylashtirilgan joylariga mos kelishi kerak.

14. Jismoniy va yuridik shaxslar tomonidan tovarlarni ishlab chiqarish (ishlarni bajarish va xizmat koʻrsatish) va realizatsiya qilishda Xizmat bayrogʻi va emblemasi tasviri tushirilgan belgilardan foydalanish taqiqlanadi, bundan Xizmat buyurtmasiga asosan tovarlarni ishlab chiqarish (ishlarni bajarish va xizmat koʻrsatish), shuningdek qonunchilikda nazarda tutilgan hollar mustasno.

15. Yuridik shaxslarning ramziy belgilari Xizmat bayrogʻi va emblemasi bilan aynan oʻxshash boʻlishi mumkin emas.

3-bob. Xizmat bayrogʻi va emblemasini saqlash va yoʻq qilish

16. Xizmat bayrogʻi va emblemasini saqlash, hisobini yuritish, berish va ishlatish Xizmat Raisi, Qoraqalpogʻiston Respublikasi, viloyatlar va Toshkent shahri boʻyicha boshqarmalari, ularning tumanlar (shaharlar) boʻyicha boʻlimlari (boʻlinmalari), Xizmatning chegara qoʻshinlari, shuningdek Xizmatning zimmasiga yuklatilgan vazifalarni bajarish uchun tashkil etiladigan boshqa organlar boshliqlari tomonidan tayinlanadigan moddiy javobgar shaxslar tomonidan taʼminlanadi, bundan ushbu Nizomning 9-bandi toʻrtinchi xatboshisida nazarda tutilgan holat mustasno.

17. Xizmat bayroqlari va emblemalari keyinchalik foydalanish uchun yaroqsizligi aniqlanganda, moddiy javobgar shaxs ularni almashtirish boʻyicha zarur choralar koʻradi.

18. Binoning old tomonida joylashtirilgan Xizmat bayrogʻini almashtirish uning eskirishiga koʻra, bir yilda koʻpi bilan toʻrt marta amalga oshiriladi. Bino ichida va majlislar zallaridagi bayroq uch yilda bir martadan koʻp boʻlmagan muddatda almashtiriladi. Agar belgilangan muddat tamom boʻlgandan keyin Xizmat bayrogʻi qoniqarli holatda boʻlsa, u almashtirilmaydi.

19. Xizmat emblemasi koʻpi bilan besh yilda bir marta almashtiriladi. Agar ushbu muddat oʻtgach belgi qoniqarli holatda boʻlsa, u almashtirilmaydi.

20. Dastlabki koʻrinishini yoʻqotgan yoki foydalanishga yaroqsiz boʻlib qolgan Xizmat bayrogʻi va emblemasini yoʻq qilish qayta foydalanishni istisno etish maqsadida yoqish, eritish va maydalash yoʻllari orqali amalga oshirilishi shart.

Foydalanishga yaroqsiz boʻlib qolgan Xizmat bayrogʻi va emblemasini yoʻq qilish toʻgʻrisida tegishli dalolatnoma moddiy javobgar shaxs tomonidan tuziladi.

4-bob. Yakunlovchi qoida

21. Ushbu Nizom talablari buzilishida aybdor shaxslar qonunchilik hujjatlarida belgilangan tartibda javob beradi.

Rais A. AZIZOV

Toshkent sh.,

2023-yil 14-oktabr,

113-son

(Qonunchilik maʼlumotlari milliy bazasi, 20.10.2023-y., 10/23/3466/0790-son)

lex.uz