📅 2023-yil 16-noyabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 16 ноябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 16 ноября 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 16 November 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Республика термитларга қарши курашиш маркази фаолиятини янада такомиллаштириш чора-тадбирлари тўғрисида
Республикада термитларга қарши курашишга доир илмий-тадқиқот ишларини ривожлантириш, илм-фан ва ишлаб чиқариш интеграциясини таъминлаш, илмий-тадқиқот ишларини рағбатлантириш, етакчи хорижий илмий муассасалар билан ҳамкорлик ўрнатиш ҳамда замонавий технологияларни республикада жорий этиш ва мавжуд имкониятлардан самарали фойдаланишни кучайтириш мақсадида Вазирлар Маҳкамаси қарор қилади:
1. Ўзбекистон Республикаси Фанлар академияси, Иқтисодиёт ва молия вазирлиги, Олий таълим, фан ва инновациялар вазирлиги, Давлат активларини бошқариш агентлигининг Фанлар академияси Зоология институти ҳузурида давлат муассасаси шаклидаги Республика термитларга қарши курашиш маркази негизида Республика термитларга қарши курашиш илмий ишлаб-чиқариш маркази (кейинги ўринларда — Марказ)ни ташкил этиш тўғрисидаги таклифи маъқуллансин.
2. Қуйидагилар Марказнинг асосий вазифалари этиб белгилансин:
термитлар биологияси ва экологиясини ўрганиш ҳамда уларнинг зарарли фаолиятига қарши курашиш юзасидан фундаментал, амалий ва инновацион тадқиқотлар ўтказиш;
термитларга қарши курашишда қўлланиладиган ем-хўрак ишлаб чиқариш технологияси ва уни қўллаш усулларини доимий равишда такомиллаштириб бориш ва амалиётга жорий этиш;
термитларга қарши курашиш юзасидан услубий қўлланмалар, тавсиялар ва йўриқномалар ишлаб чиқиш;
республикада аҳоли турар жойлари, табиий ва тарихий обидалар, стратегик объектлар ҳамда иншоотлар ва очиқ ер майдонларида термитларнинг тарқалиши, зарарли фаолияти юзасидан мониторинг юритиш;
Қорақалпоғистон Республикаси, Тошкент шаҳар ва вилоятлар дезинфекция станциялари ҳамда Ўсимликлар карантини ва ҳимояси агентлиги ҳудудий филиалларининг буюртмасига биноан термитларга қарши ем-хўракларни шартнома асосида тайёрлаб бериш.
3. Қуйидагилар Марказ фаолиятини молиялаштириш манбалари этиб белгилансин:
ходимлар меҳнатига ҳақ тўлаш, бино ва иншоотларни сақлаш харажатларини молиялаштириш, шунингдек, жорий харажатларни қоплаш учун Ўзбекистон Республикаси Давлат бюджети маблағлари ҳисобидан ажратиладиган маблағлар;
илмий фаолиятга оид дастурларни амалга ошириш учун Ўзбекистон Республикаси Олий таълим, фан ва инновациялар вазирлиги томонидан ўтказиладиган танловлар натижалари бўйича ажратиладиган грантлар;
хўжалик фаолиятидан ҳамда шартнома асосида ўтказиладиган тадқиқотлардан тушадиган тушумлар;
халқаро молия институтлари ва бошқа хорижий ташкилотларнинг грантлари;
қонунчилик ҳужжатларида тақиқланмаган бошқа манбалар.
4. Белгилаб қўйилсинки:
Марказни бюджет маблағлари ҳисобидан сақлаш харажатлари 2023 йилда Ўзбекистон Республикасининг бюджетидан биринчи даражали бюджет маблағларини тақсимловчи сифатида Ўзбекистон Республикаси Фанлар академиясига ажратилган маблағлар доирасида молиялаштирилади, 2024 йилдан бошлаб Ўзбекистон Республикаси Давлат бюджети параметрларида назарда тутилади;
Марказ давлат муассасаси шаклидаги юридик шахс ҳисобланади, Ўзбекистон Республикасининг Давлат герби тасвири ва ўз номи туширилган муҳр ва бланкаларга, мустақил балансга, Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасида ҳисобварақларига, банк, шу жумладан чет эл валютасидаги ҳисобварақларига эга бўлади;
Марказ директори Зоология институти директорининг тавсиясига кўра Ўзбекистон Республикаси Фанлар академияси президенти томонидан лавозимга тайинланади ва лавозимидан озод этилади;
Республика термитларга қарши курашиш илмий ишлаб-чиқариш маркази «Республика термитларга қарши курашиш маркази» давлат муассасасининг барча ҳуқуқлари, мажбуриятлари ва шартномалари бўйича ҳуқуқий вориси ҳисобланади.
6. Ўзбекистон Республикаси Фанлар академияси президентига, зарур ҳолларда, Марказ тузилмасига ходимларнинг тасдиқланган умумий чекланган сони ва меҳнатга ҳақ тўлаш фонди доирасида ўзгартиришлар киритиш ҳуқуқи берилсин.
7. Марказнинг раҳбари ва илмий ходимларига Ўзбекистон Республикаси Фанлар академияси илмий-тадқиқот муассасаларининг тегишли лавозимлари учун белгиланган меҳнатга ҳақ тўлаш ва моддий рағбатлантириш шартлари татбиқ этилсин.
8. Ўзбекистон Республикаси Фанлар академияси:
Маданий мерос агентлиги ва Марказ билан биргаликда ҳар йили 1 августга қадар маданий мерос объектларида ва уларга туташ бўлган аҳоли турар жойларини термитлардан ҳимоя қилиш мақсадида зарарланган объектларда термитларга қарши курашиш чора-тадбирларни назарда тутувчи дастур ишлаб чиқилишини ва тасдиқланишини таъминласин;
Тошкент шаҳар ҳокимлиги ва Давлат активларини бошқариш агентлиги билан биргаликда бир ой муддатда Марказни оператив бошқарув ҳуқуқи асосида тегишли бинога жойлаштириш бўйича таклиф киритсин.
9. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари ҳар йилги маҳаллий бюджет параметрларини шакллантириш жараёнида аҳоли турар жойлари, ижтимоий аҳамиятга эга манзиллар ва улар атрофида термитларга қарши курашиш учун сарфланадиган харажатларни молиялаштириш мақсадида белгиланган тартибда зарур маблағлар назарда тутилишини таъминласин.
10. Ўзбекистон Республикаси Фанлар академияси:
икки ҳафта муддатда Республика термитларга қарши курашиш илмий ишлаб-чиқариш маркази тўғрисидаги низомни тасдиқласин ва унинг белгиланган тартибда давлат рўйхатидан ўтказилишини таъминласин;
манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
11. Ўзбекистон Республикаси Ҳукуматининг 2-иловага мувофиқ айрим қарорлари ўз кучини йўқотган деб ҳисоблансин.
12. Мазкур қарорнинг бажарилишини назорат қилиш Ўзбекистон Республикаси Фанлар академияси президенти Б. Юлдашев зиммасига юклансин.
Вазирлар Маҳкамасининг 2023 йил 16 ноябрдаги 605-сон қарорига 2-ИЛОВА
Ўзбекистон Республикаси Ҳукуматининг ўз кучини йўқотган деб ҳисобланаётган айрим қарорлари
1. Вазирлар Маҳкамасининг «Республикада термитларга қарши курашиш ишларини жадаллаштириш ва уларнинг зарарини бартараф қилиш тўғрисида» 2012 йил 2 февралдаги 27-сон қарори .
2. Вазирлар Маҳкамасининг «Вазирлар Маҳкамасининг «Республикада термитларга қарши курашиш ишларини жадаллаштириш ва уларнинг зарарини бартараф қилиш тўғрисида» 2012 йил 2 февралдаги 27-сон қарорига ўзгартиришлар ва қўшимча киритиш ҳақида» 2019 йил 4 сентябрдаги 725-сон қарори .
3. Вазирлар Маҳкамасининг «Илмий ва инновацион фаолиятни бошқариш тизимини ташкил этиш чора-тадбирлари тўғрисида» 2021 йил 27 августдаги 545-сон қарорининг 3-иловаси 2-банди .
Ўзбекистон Республикасининг Бош вазири А. АРИПОВ
Тошкент ш.,
2023 йил 16 ноябрь,
605-сон
Oʻzbekiston Respublikasi Vazirlar Mahkamasining
qarori
Respublika termitlarga qarshi kurashish markazi faoliyatini yanada takomillashtirish chora-tadbirlari toʻgʻrisida
Respublikada termitlarga qarshi kurashishga doir ilmiy-tadqiqot ishlarini rivojlantirish, ilm-fan va ishlab chiqarish integratsiyasini taʼminlash, ilmiy-tadqiqot ishlarini ragʻbatlantirish, yetakchi xorijiy ilmiy muassasalar bilan hamkorlik oʻrnatish hamda zamonaviy texnologiyalarni respublikada joriy etish va mavjud imkoniyatlardan samarali foydalanishni kuchaytirish maqsadida Vazirlar Mahkamasi qaror qiladi:
1. Oʻzbekiston Respublikasi Fanlar akademiyasi, Iqtisodiyot va moliya vazirligi, Oliy taʼlim, fan va innovatsiyalar vazirligi, Davlat aktivlarini boshqarish agentligining Fanlar akademiyasi Zoologiya instituti huzurida davlat muassasasi shaklidagi Respublika termitlarga qarshi kurashish markazi negizida Respublika termitlarga qarshi kurashish ilmiy ishlab-chiqarish markazi (keyingi oʻrinlarda — Markaz)ni tashkil etish toʻgʻrisidagi taklifi maʼqullansin.
2. Quyidagilar Markazning asosiy vazifalari etib belgilansin:
termitlar biologiyasi va ekologiyasini oʻrganish hamda ularning zararli faoliyatiga qarshi kurashish yuzasidan fundamental, amaliy va innovatsion tadqiqotlar oʻtkazish;
termitlarga qarshi kurashishda qoʻllaniladigan yem-xoʻrak ishlab chiqarish texnologiyasi va uni qoʻllash usullarini doimiy ravishda takomillashtirib borish va amaliyotga joriy etish;
termitlarga qarshi kurashish yuzasidan uslubiy qoʻllanmalar, tavsiyalar va yoʻriqnomalar ishlab chiqish;
respublikada aholi turar joylari, tabiiy va tarixiy obidalar, strategik obyektlar hamda inshootlar va ochiq yer maydonlarida termitlarning tarqalishi, zararli faoliyati yuzasidan monitoring yuritish;
Qoraqalpogʻiston Respublikasi, Toshkent shahar va viloyatlar dezinfeksiya stansiyalari hamda Oʻsimliklar karantini va himoyasi agentligi hududiy filiallarining buyurtmasiga binoan termitlarga qarshi yem-xoʻraklarni shartnoma asosida tayyorlab berish.
3. Quyidagilar Markaz faoliyatini moliyalashtirish manbalari etib belgilansin:
xodimlar mehnatiga haq toʻlash, bino va inshootlarni saqlash xarajatlarini moliyalashtirish, shuningdek, joriy xarajatlarni qoplash uchun Oʻzbekiston Respublikasi Davlat budjeti mablagʻlari hisobidan ajratiladigan mablagʻlar;
ilmiy faoliyatga oid dasturlarni amalga oshirish uchun Oʻzbekiston Respublikasi Oliy taʼlim, fan va innovatsiyalar vazirligi tomonidan oʻtkaziladigan tanlovlar natijalari boʻyicha ajratiladigan grantlar;
xoʻjalik faoliyatidan hamda shartnoma asosida oʻtkaziladigan tadqiqotlardan tushadigan tushumlar;
xalqaro moliya institutlari va boshqa xorijiy tashkilotlarning grantlari;
qonunchilik hujjatlarida taqiqlanmagan boshqa manbalar.
4. Belgilab qoʻyilsinki:
Markazni budjet mablagʻlari hisobidan saqlash xarajatlari 2023-yilda Oʻzbekiston Respublikasining budjetidan birinchi darajali budjet mablagʻlarini taqsimlovchi sifatida Oʻzbekiston Respublikasi Fanlar akademiyasiga ajratilgan mablagʻlar doirasida moliyalashtiriladi, 2024-yildan boshlab Oʻzbekiston Respublikasi Davlat budjeti parametrlarida nazarda tutiladi;
Markaz davlat muassasasi shaklidagi yuridik shaxs hisoblanadi, Oʻzbekiston Respublikasining Davlat gerbi tasviri va oʻz nomi tushirilgan muhr va blankalarga, mustaqil balansga, Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasida hisobvaraqlariga, bank, shu jumladan chet el valyutasidagi hisobvaraqlariga ega boʻladi;
Markaz direktori Zoologiya instituti direktorining tavsiyasiga koʻra Oʻzbekiston Respublikasi Fanlar akademiyasi prezidenti tomonidan lavozimga tayinlanadi va lavozimidan ozod etiladi;
Respublika termitlarga qarshi kurashish ilmiy ishlab-chiqarish markazi “Respublika termitlarga qarshi kurashish markazi” davlat muassasasining barcha huquqlari, majburiyatlari va shartnomalari boʻyicha huquqiy vorisi hisoblanadi.
6. Oʻzbekiston Respublikasi Fanlar akademiyasi prezidentiga, zarur hollarda, Markaz tuzilmasiga xodimlarning tasdiqlangan umumiy cheklangan soni va mehnatga haq toʻlash fondi doirasida oʻzgartirishlar kiritish huquqi berilsin.
7. Markazning rahbari va ilmiy xodimlariga Oʻzbekiston Respublikasi Fanlar akademiyasi ilmiy-tadqiqot muassasalarining tegishli lavozimlari uchun belgilangan mehnatga haq toʻlash va moddiy ragʻbatlantirish shartlari tatbiq etilsin.
8. Oʻzbekiston Respublikasi Fanlar akademiyasi:
Madaniy meros agentligi va Markaz bilan birgalikda har yili 1-avgustga qadar madaniy meros obyektlarida va ularga tutash boʻlgan aholi turar joylarini termitlardan himoya qilish maqsadida zararlangan obyektlarda termitlarga qarshi kurashish chora-tadbirlarni nazarda tutuvchi dastur ishlab chiqilishini va tasdiqlanishini taʼminlasin;
Toshkent shahar hokimligi va Davlat aktivlarini boshqarish agentligi bilan birgalikda bir oy muddatda Markazni operativ boshqaruv huquqi asosida tegishli binoga joylashtirish boʻyicha taklif kiritsin.
9. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari har yilgi mahalliy budjet parametrlarini shakllantirish jarayonida aholi turar joylari, ijtimoiy ahamiyatga ega manzillar va ular atrofida termitlarga qarshi kurashish uchun sarflanadigan xarajatlarni moliyalashtirish maqsadida belgilangan tartibda zarur mablagʻlar nazarda tutilishini taʼminlasin.
10. Oʻzbekiston Respublikasi Fanlar akademiyasi:
ikki hafta muddatda Respublika termitlarga qarshi kurashish ilmiy ishlab-chiqarish markazi toʻgʻrisidagi nizomni tasdiqlasin va uning belgilangan tartibda davlat roʻyxatidan oʻtkazilishini taʼminlasin;
manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
11. Oʻzbekiston Respublikasi Hukumatining 2-ilovaga muvofiq ayrim qarorlari oʻz kuchini yoʻqotgan deb hisoblansin.
12. Mazkur qarorning bajarilishini nazorat qilish Oʻzbekiston Respublikasi Fanlar akademiyasi prezidenti B. Yuldashev zimmasiga yuklansin.
Vazirlar Mahkamasining 2023-yil 16-noyabrdagi 605-son qaroriga 2-ILOVA
Oʻzbekiston Respublikasi Hukumatining oʻz kuchini yoʻqotgan deb hisoblanayotgan ayrim qarorlari
1. Vazirlar Mahkamasining “Respublikada termitlarga qarshi kurashish ishlarini jadallashtirish va ularning zararini bartaraf qilish toʻgʻrisida” 2012-yil 2-fevraldagi 27-son qarori .
2. Vazirlar Mahkamasining “Vazirlar Mahkamasining “Respublikada termitlarga qarshi kurashish ishlarini jadallashtirish va ularning zararini bartaraf qilish toʻgʻrisida” 2012-yil 2-fevraldagi 27-son qaroriga oʻzgartirishlar va qoʻshimcha kiritish haqida” 2019-yil 4-sentabrdagi 725-son qarori .
3. Vazirlar Mahkamasining “Ilmiy va innovatsion faoliyatni boshqarish tizimini tashkil etish chora-tadbirlari toʻgʻrisida” 2021-yil 27-avgustdagi 545-son qarorining 3-ilovasi 2-bandi .
Oʻzbekiston Respublikasining Bosh vaziri A. ARIPOV
Toshkent sh.,
2023-yil 16-noyabr,
605-son