📅 2023-yil 20-noyabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 20 ноябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 20 ноября 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 20 November 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
ЖУРНАЛИНИНГ ШАКЛИ
Ўзбекистон Республикасида ҳамда хорижда ҳужжатлар ва далолатномаларни консуллик легаллаштириш тартиби тўғрисидаги низомни тасдиқлаш ҳақида
Ўзбекистон Республикасининг «Ўзбекистон Республикасининг Консуллик уставини тасдиқлаш тўғрисида»ги Қонунига ҳамда Ўзбекистон Республикаси Президентининг «Давлат ҳуқуқий сиёсатини амалга оширишда адлия органлари ва муассасалари фаолиятини янада такомиллаштириш чора-тадбирлари тўғрисида» 2020 йил 19 майдаги ПФ-5997-сон Фармонига мувофиқ Вазирлар Маҳкамаси қарор қилади:
1. Ўзбекистон Республикасининг консуллик муассасалари томонидан ҳужжатлар ва далолатномаларни легаллаштириш, Ўзбекистон Республикасида ҳужжатлар ва далолатномаларни легаллаштириш тартибини, ушбу ҳужжатлар ва далолатномаларга қўйиладиган талабларни, шунингдек, легаллаштириш ёзувини киритиш тартибини назарда тутувчи Ўзбекистон Республикасида ҳамда хорижда ҳужжатлар ва далолатномаларни консуллик легаллаштириш тартиби тўғрисидаги низом иловага мувофиқ тасдиқлансин.
2. Ўзбекистон Республикаси Ташқи ишлар вазирлиги манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
3. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев зиммасига юклансин.
Вазирлар Маҳкамасининг 2023 йил 20 ноябрдаги 610-сон қарорига ИЛОВА
Ўзбекистон Республикасида ҳамда хорижда ҳужжатлар ва далолатномаларни консуллик легаллаштириш тартиби тўғрисида
1-боб. Умумий қоидалар
1. Мазкур Низом Ўзбекистон Республикасининг хориждаги дипломатик ваколатхоналари ва консуллик муассасалари (кейинги ўринларда — Ўзбекистон Республикасининг консуллик муассасалари) томонидан хорижда ва Ўзбекистон Республикаси Ташқи ишлар вазирлигининг Консуллик-ҳуқуқий департаменти (кейинги ўринларда — Консуллик-ҳуқуқий департамент) томонидан Ўзбекистон Республикасида ҳужжатлар ва далолатномаларни консуллик легаллаштириш тартибини белгилайди.
2. Ҳужжатлар ва далолатномаларни консуллик легаллаштириш улардаги имзоларнинг ҳақиқийлигини, ҳужжатни ёки далолатномани имзолаган шахснинг ваколатларини, легаллаштиришга тақдим этилган ҳужжатга ёхуд далолатномага босилган муҳр ёки штампнинг ҳақиқийлигини ҳамда ушбу ҳужжатлар ва далолатномаларнинг хорижий давлат ёки Ўзбекистон Республикаси қонунчилик ҳужжатларига мувофиқлигини аниқлаш ва шаҳодатлашдан иборатдир. Консуллик муассасалари томонидан ҳужжатлар ва далолатномаларнинг легаллаштирилиши уларнинг халқаро муносабатлардаги қонунийлигини тасдиқлайди.
Консуллик легаллаштириш ҳужжат ёки далолатномада баён этилган фактларни эмас, балки фақат уларни имзолаган шахснинг ваколатларини, легаллаштиришга тақдим этилган ҳужжатга ёхуд далолатномага босилган муҳр ёки штампнинг ҳақиқийлигини аниқлаш ва шаҳодатлашдан иборатдир.
3. Консуллик легаллаштириш функциясини:
хорижий давлатларда — Ўзбекистон Республикасининг консуллик муассасалари;
Ўзбекистон Республикасида — Консуллик-ҳуқуқий департамент амалга оширади.
4. Хорижий давлатларда ҳужжатлар ва далолатномаларни консуллик легаллаштириш функциялари консуллик мансабдор шахси (кейинги ўринларда — консул) томонидан амалга оширилади.
Агар муайян сабабга кўра консул ўз функцияларини бажара олмаса ёки консул лавозими вақтинча бўш бўлса, консулнинг вазифалари хорижий давлат ҳудудида жойлашган мазкур ёки бошқа консуллик муассасасининг бошқа мансабдор шахсига ёки ушбу давлат ҳудудида жойлашган Ўзбекистон Республикаси дипломатик ваколатхонасининг дипломатик ходимларидан бирига юкланади.
Ўзбекистон Республикасида ҳужжатлар ва далолатномаларни консуллик легаллаштириш функциялари Консуллик-ҳуқуқий департамент ходимларидан бирига юкланади.
5. Ўзбекистон Республикаси давлат органлари ва муассасалари хорижий давлатларнинг ташкилотларидан жўнатиладиган ҳужжатлар ва далолатномалар улар консуллик муассасаси томонидан легаллаштирилган тақдирдагина, агар Ўзбекистон Республикасининг қонунчилик ҳужжатларида ёки Ўзбекистон Республикаси ва ушбу ҳужжатлар ҳамда далолатномалар жўнатиладиган давлат иштирокчи бўлган халқаро шартномада бошқача қоида назарда тутилмаган бўлса, кўриб чиқиш учун қабул қилади.
Консул консуллик округидаги давлат органлари ва муассасалари вакиллари иштирокида тузилган ёки мазкур давлат органлари ҳамда муассасалари томонидан жўнатиладиган ҳужжатлар ва далолатномаларни легаллаштиради.
6. Консул хорижий давлат ҳудудида расмийлаштирилган ҳужжатни легаллаштириш учун зарур ҳолларда мазкур ҳужжатнинг Ўзбекистон Республикаси давлат тилидаги ёки бошқа тиллардаги нотариал тартибда тасдиқланган таржимасини тақдим этишни талаб қилишга ҳақли.
7. Хорижда ҳар қандай ҳаракатни амалга ошириш ваколатига эга бўлган Ўзбекистон Республикасининг давлат органлари ва муассасалари томонидан бундай ҳаракатларни амалга ошириш учун берилган ишончномаларни ҳамда мазкур давлат органлари ва муассасалари фаолияти билан боғлиқ бошқа ҳужжатлар Консуллик-ҳуқуқий департамент томонидан легаллаштирилади.
8. Агар хорижий давлатнинг қонунчилик ҳужжатларига мувофиқ Ўзбекистон Республикаси давлат органлари ва муассасалари томонидан расмийлаштирилган ҳамда хорижий давлат ҳудудида фойдаланиш учун мўлжалланган ҳужжатлар ва далолатномалар легаллаштирилиши талаб этилса, улар белгиланган тартибда легаллаштирилиши лозим.
9. Агар Ўзбекистон Республикаси қонунчилик ҳужжатларига мувофиқ Ўзбекистон Республикасида аккредитациядан ўтган хорижий давлатларнинг дипломатик ваколатхоналари ва консуллик муассасалари томонидан расмийлаштирилган ҳамда Ўзбекистон Республикасида фойдаланиш учун мўлжалланган ҳужжатлар ва далолатномалар легаллаштирилиши талаб этилса, улар белгиланган тартибда легаллаштирилиши лозим.
10. Қуйидаги ҳужжатлар ва далолатномалар консуллик муассасалари томонидан легаллаштирилмайди:
Ўзбекистон Республикаси қонунчилик ҳужжатларига зид бўлган;
ўз мазмунига кўра Ўзбекистон Республикаси манфаатларига зарар етказиши мумкин бўлган;
нотўғри расмийлаштирилган;
Ўзбекистон Республикаси фуқароларининг шаъни ва қадр-қимматига путур етказадиган маълумотлар мавжуд бўлган;
тозалашлар, қўшимча ёзувлар ёки қайд этилмаган тузатишлар, шунингдек, қалам билан ёзилган ёзувлар мавжуд бўлган;
бир неча варақларда тузилган, лекин тартиб рақами қўйилмаган, тикилмаган, ҳужжат ёки далолатномани тақдим этган ташкилотнинг муҳри ва мансабдор шахснинг имзоси билан шаҳодатланмаган;
ҳужжатларга факсимил имзо қўйилган бўлса (Ўзбекистон Республикаси қонунчилик ҳужжатларида белгиланган ҳолатлар бундан мустасно).
Шунингдек, паспорт, идентификацияловчи ID-картаси, партияга мансублик ҳақидаги ҳужжатлар, касаба уюшмаси чипталари, ҳарбий билетлар, тоифа ёки диний эътиқодга мансублик ҳақидаги ҳамда фуқаролик муомаласидан чиқарилган мол-мулк ҳужжатларининг асли ва нусхалари легаллаштирилмайди.
11. Агар ҳужжатга ёки ушбу ҳужжатга бириктирилган вараққа апостиль қўйилган бўлса, бу ҳужжатни легаллаштириш талаб этилмайди.
Ўзбекистон Республикасининг давлат органлари ва муассасалари апостиль қўйилган ҳужжатларни, агар апостиль Ўзбекистон Республикаси билан муносабатларда чет элнинг расмий ҳужжатларини легаллаштиришга доир талабни бекор қилувчи конвенция қўлланиладиган чет давлатнинг ваколатли органи томонидан қўйилган бўлса, қабул қилиши шарт.
2-боб. Ўзбекистон Республикаси консуллик муассасалари томонидан ҳужжатлар ва далолатномаларни легаллаштириш
12. Ҳужжатлар ва далолатномаларни легаллаштириш учун Ўзбекистон Республикасининг консуллик муассасасида консуллик округида жойлашган давлат органлари ва муассасалари томонидан расмийлаштирилган ҳужжатлар ҳамда далолатномаларни тасдиқлаш ваколатига эга бўлган мансабдор шахсларнинг имзоси ва муҳрлари намуналари мавжуд бўлиши лозим.
Хорижий давлатнинг консуллик муассасаси учун белгиланган консуллик округи ҳудудида жойлашган Ўзбекистон Республикаси консуллик муассасаларида улар жойлашган ҳудудда аккредитация қилинган бошқа давлатлар консуллик муассасалари ҳамда қабул қилувчи давлат Ўзбекистон Республикаси Ташқи ишлар вазирлигининг ҳужжатлар ва далолатномаларни легаллаштириш ваколатига эга бўлган мансабдор шахслари имзоси ва муҳри намуналари ҳам мавжуд бўлиши лозим.
13. Ҳужжатлар ва далолатномаларни Ўзбекистон Республикасининг консуллик муассасаларида легаллаштириш учун шахслар ушбу Низомга 1-иловага мувофиқ шаклда ариза тўлдириб, унга қуйидагиларни илова қиладилар:
шахсини тасдиқловчи ҳужжат нусхаси;
легаллаштириш талаб этиладиган ҳужжат ёки далолатнома ва унинг нусхалари;
консуллик йиғимлари ва ҳақиқий харажатларнинг ўрнини қоплаш ҳисобидан йиғимлар тўланганлиги тўғрисидаги ҳужжатнинг асли.
Ҳужжатлар ва далолатномалар ариза топширилган кундан эътиборан беш иш куни ичида легаллаштирилади.
14. Легаллаштириш учун тақдим этилган ҳужжатлар ва далолатномалар Ўзбекистон Республикаси консуллик муассасаси жойлашган давлатнинг қонун ҳужжатларига мувофиқ эканлигига шубҳа бўлган ҳолларда, консул консуллик округидаги давлат ҳокимияти органларига расмий тушунтириш беришни сўраб мурожаат қилади.
15. Консулга Ўзбекистон Республикасидан ҳужжатлар талаб қилиб олиш тартиби доирасида Ўзбекистон Республикасида тузилган, бироқ Консуллик-ҳуқуқий департамент томонидан легаллаштирилмаган ҳужжатлар ва далолатномалар келиб тушган тақдирда, Ўзбекистон Республикасининг консуллик муассасаси жойлашган давлатнинг қонунчилик ҳужжатларига мувофиқ ушбу ҳужжатлар ва далолатномалар легаллаштирилиши талаб этилса, консул уларни легаллаштиради ҳамда манфаатдор шахслар, давлат органлари ва муассасаларга юборади.
16. Ўзбекистон Республикасида тузилган, бироқ Консуллик-ҳуқуқий департамент томонидан легаллаштирилмаган ҳужжатлар ва далолатномалар легаллаштириш учун шахслар, давлат органлари ва муассасалардан келиб тушган тақдирда, консул уларнинг ҳақиқийлигини аниқлаш учун Консуллик-ҳуқуқий департаментга юборади. Ижобий жавоб олинган тақдирда, консул ушбу ҳужжатлар ва далолатномаларни белгиланган тартибда легаллаштиради.
17. Консул зарур ҳолларда учинчи давлат ҳудудида фойдаланиш учун мўлжалланган ҳужжатлар ва далолатномаларни легаллаштириши мумкин. Ушбу ҳужжатлар ёки далолатномалар учинчи давлат ҳудудида ҳақиқий ҳисобланиши учун Ўзбекистон Республикасининг консуллик муассасаси жойлашган давлатдаги учинчи давлат консуллик муассасаси томонидан ҳам легаллаштирилиши лозим.
18. Ўзбекистон Республикасининг консуллик муассасаси жойлашган давлатда фойдаланиш учун талаб қилиб олинаётган Ўзбекистон Республикаси фуқаролари, давлат органлари ва муассасаларининг ҳужжатлари ва далолатномаларини консул ушбу Низомда белгиланган тартибда легаллаштиради.
19. Ўзбекистон Республикасининг Консуллик устави 14-моддасига асосан консулнинг ҳаракатлари (ҳаракатсизлиги) ёки қарорлари устидан Ўзбекистон Республикаси қонунчилик ҳужжатларига мувофиқ консуллик муассасаси бошлиғига, Ўзбекистон Республикасининг консуллик муассасаси жойлашган давлатдаги дипломатик ваколатхонаси бошлиғига ва (ёки) Ўзбекистон Республикаси Ташқи ишлар вазирлигига ёхуд суд тартибида шикоят қилиниши мумкин.
3-боб. Ҳужжатлар ва далолатномаларни Ўзбекистон Республикасида легаллаштириш
20. Консуллик-ҳуқуқий департамент хорижий мамлакат давлат органлари ва муассасалари томонидан расмийлаштирилган ҳамда Ўзбекистон Республикаси ва Россия Федерациясида аккредитация қилинган хорижий дипломатик ваколатхоналар ёки консуллик муассасалари томонидан легаллаштирилган ҳужжатлар ва далолатномаларни, ушбу дипломатик ваколатхоналар масъул ходимларининг имзолари ва муҳрлари намуналари мавжуд бўлган тақдирда легаллаштиради.
21. Ҳужжатлар ва далолатномаларни Консуллик-ҳуқуқий департаментда легаллаштириш учун шахслар ушбу Низомга 1-иловага мувофиқ шаклда ариза тўлдириб, унга қуйидагиларни илова қиладилар:
шахсини тасдиқловчи ҳужжатнинг нусхаси;
легаллаштириш талаб этиладиган ҳужжат ёки далолатнома ва унинг нусхалари;
консуллик йиғимлари ва ҳақиқий харажатларнинг ўрнини қоплаш ҳисобидан йиғимлар тўланганлиги тўғрисидаги ҳужжатнинг асли.
Ҳужжатлар ва далолатномалар ариза топширилган кундан эътиборан беш иш куни ичида легаллаштирилади.
22. Консуллик-ҳуқуқий департаментда Ўзбекистон Республикаси ва Россия Федерациясида аккредитация қилинган дипломатик ваколатхоналар ва консуллик муассасаларида ҳужжатлар ва далолатномаларни легаллаштириш вазифасини бажарувчи мансабдор шахсларнинг имзоси ва муҳрлари намуналари мавжуд бўлиши керак.
23. Консуллик-ҳуқуқий департамент Ўзбекистон Республикаси давлат органлари ва муассасалари хорижий давлатларда фойдаланиш учун мўлжалланган ҳужжатлар ва далолатномаларни ҳам легаллаштиради.
24. Консуллик-ҳуқуқий департаментда легаллаштирилиши лозим бўлган ҳужжатлар ва далолатномаларни тасдиқлаш ваколатига эга бўлган Ўзбекистон Республикаси Адлия вазирлиги масъул ходимларининг имзоси ва муҳрлари намуналари мавжуд бўлиши керак.
25. Консуллик-ҳуқуқий департамент нотариус имзосини шаҳодатловчи Ўзбекистон Республикаси Адлия вазирлиги масъул ходимининг имзосини шаҳодатлайди. Имзоларни тасдиқлашнинг ушбу тартиби фуқаролик ҳолати далолатномаларини ёзишнинг республика ҳудудида амал қилишга белгиланган ҳужжатлари нусхаларини ҳамда бошқа ҳужжатлар нусхаларини хорижий давлатга тақдим этиш учун тасдиқлаш мақсадида жорий қилинган.
26. Консуллик-ҳуқуқий департамент масъул ходимининг ҳаракатлари (ҳаракатсизлиги) ёки қарорлари устидан Ўзбекистон Республикаси қонунчилик ҳужжатларига мувофиқ Ўзбекистон Республикаси Ташқи ишлар вазирлигига ёхуд суд тартибида шикоят қилиниши мумкин.
4-боб. Легаллаштириладиган ҳужжатлар ва далолатномаларга қўйиладиган талаблар. Легаллаштириш ёзувини киритиш
27. Легаллаштириш учун тақдим этилган ҳужжатлар ва далолатномалар аниқ ва равшан ёзилган, ҳужжат ёки далолатномада қайд этилган сумма ва сана, рақам ва муддат ёзув билан ифодаланган бўлиши зарур. Мансабдор шахсларнинг имзолари ва муҳрлар босма изи аниқ бўлиши керак.
Ҳужжатдаги ва далолатномадаги бўш жойлар чизиб чиқилиши керак. Тузатиш ва қўшимчаларни ҳужжатни тасдиқлаган шахснинг имзоси олдидан кўрсатиш ва легаллаштириш ёзувида такрорлаш зарур. Тузатиш ва қўшимчалар шундай киритилиши керакки, барча хато ёзилган, кейин тузатилган ҳамда ўчирилганларни дастлабки кўринишида ўқиш мумкин бўлиши лозим. Агар тузатиш ва қўшимчалар легаллаштириш ёзувига қилинган бўлса, улар фақатгина легаллаштираётган мансабдор шахс томонидан изоҳланади ҳамда имзоланади.
28. Легаллаштириш ёзувлари учун жой бўлмаган тақдирда, ёзув алоҳида қоғозда ёзилади ва ҳужжат ёки далолатномага тикиб қўйилади ҳамда легаллаштираётган шахснинг имзоси ва муҳри билан унга бириктирилади.
29. Мансабдор шахс ҳужжат ёки далолатнома мазкур Низом талабларига мувофиқ легаллаштирилиши мумкинлигига ишонч ҳосил қилганидан сўнг унга белгиланган шаклда ёзув киритади.
5-боб. Якунловчи қоидалар
30. Ўзбекистон Республикасининг консуллик муассасалари ва Консуллик-ҳуқуқий департамент ҳужжатлар ва далолатномаларни легаллаштириш реестрларини, шунингдек, ушбу Низомга 2-иловага мувофиқ шакл бўйича легаллаштирилган ҳужжатлар ва далолатномаларни ҳисобга олиш журналини юритади.
Фуқаролар ва ташкилотларнинг аризалари Ўзбекистон Республикасининг консуллик муассасаси ва Консуллик-ҳуқуқий департаментда сақланади ҳамда даврий кетма-кетликда тикиб борилади. Легаллаштирилиши лозим бўлган ҳар бир ҳужжатга легаллаштириш тартиб рақами берилиб, санаси кўрсатилади, ушбу рақам ва сана ариза рақами ва санаси билан мос бўлиши лозим.
Ўзбекистон Республикасининг консуллик муассасаси ва Консуллик-ҳуқуқий департамент легаллаштирилган ҳужжатларнинг ҳисобини электрон шаклда ҳам юритиши мумкин.
31. Ҳужжатлар ва далолатномаларни легаллаштириш бўйича консуллик ҳаракатларини амалга оширганлик учун консуллик йиғимлари ва ҳақиқий харажатларни қоплаш ҳисобидан йиғимлар ундирилади.
32. Ушбу Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавоб берадилар.
Ўзбекистон Республикасида ҳамда хорижда ҳужжатлар ва далолатномаларни консуллик легаллаштириш тартиби тўғрисидаги низомга 1-ИЛОВА
Ўзбекистон Республикаси консуллик муассасасига (ёки Ўзбекистон Республикаси Ташқи ишлар вазирлигининг Консуллик-ҳуқуқий департаментига) АРИЗА Ф.И.О. _________________________________________________________________________ Ариза берувчининг фуқаролиги ____________________________________________________ Турар жойи, манзили _____________________________________________________________ ________________________________________________________________________________ Иш жойи________________________________________________________________________ Лавозими _______________________________________________________________________ Легаллаштирилиши лозим бўлган ҳужжат номи. Ҳужжат серияси, рақами. Ким томонидан, қачон берилган. Ҳужжат кимга берилган Ўзбекистон Республикаси Адлия вазирлигида рўйхатга олинган рақам Ўзбекистон Республикаси консуллик муассасаси (ёки Ташқи ишлар вазирлигининг Консуллик-ҳуқуқий департаменти) рўйхатга олиш рақами Ҳужжатнинг хусусияти — фуқаролик ҳолати ҳақида, таълим ҳақида, тижорат хусусиятига эга, молиявий ва бошқа ҳаракатларни амалга ошириш учун, мол-мулкни бошқариш учун (кераклиси чизилсин). Сана ________________________ Имзо _______________________ Тўланган консуллик йиғими суммаси _______________________________________________ Консуллик йиғими тўланганлиги ҳақида квитанция рақами ____________________________ _______________________________________________________________________________ Консуллик йиғими тўланган сана __________________________________________________ Имзоси тасдиқланаётган шахснинг Ф.И.О. ___________________________________________ Ҳужжатни легаллаштирган шахснинг Ф.И.О. _________________________________________
Ўзбекистон Республикасида ҳамда хорижда ҳужжатлар ва далолатномаларни консуллик легаллаштириш тартиби тўғрисидаги низомга 2-ИЛОВА
Легаллаштирилган ҳужжатларни ва далолатномаларни ҳисобга олиш
Т/р Легаллаштириш санаси Легаллаштирган шахснинг Ф.И.О., лавозими Ҳужжатнинг номи, реквизитлари Ҳужжатни имзолаган шахснинг Ф.И.О., лавозими Легаллаштириш учун ҳужжат тақдим этган шахснинг Ф.И.О., шахсини тасдиқловчи ҳужжатнинг маълумотлари Легаллаштириш тақдим этиладиган давлат Легаллаштириш учун йиғим тўланганлиги тўғрисидаги белги 1 2 3 4 5 6 7 8
Ўзбекистон Республикасининг Бош вазири А. АРИПОВ
Тошкент ш.,
2023 йил 20 ноябрь,
610-сон
Oʻzbekiston Respublikasi Vazirlar Mahkamasining
qarori
NIZOM
JURNALINING SHAKLI
Oʻzbekiston Respublikasida hamda xorijda hujjatlar va dalolatnomalarni konsullik legallashtirish tartibi toʻgʻrisidagi nizomni tasdiqlash haqida
Oʻzbekiston Respublikasining “Oʻzbekiston Respublikasining Konsullik ustavini tasdiqlash toʻgʻrisida”gi Qonuniga hamda Oʻzbekiston Respublikasi Prezidentining “Davlat huquqiy siyosatini amalga oshirishda adliya organlari va muassasalari faoliyatini yanada takomillashtirish chora-tadbirlari toʻgʻrisida” 2020-yil 19-maydagi PF-5997-son Farmoniga muvofiq Vazirlar Mahkamasi qaror qiladi:
1. Oʻzbekiston Respublikasining konsullik muassasalari tomonidan hujjatlar va dalolatnomalarni legallashtirish, Oʻzbekiston Respublikasida hujjatlar va dalolatnomalarni legallashtirish tartibini, ushbu hujjatlar va dalolatnomalarga qoʻyiladigan talablarni, shuningdek, legallashtirish yozuvini kiritish tartibini nazarda tutuvchi Oʻzbekiston Respublikasida hamda xorijda hujjatlar va dalolatnomalarni konsullik legallashtirish tartibi toʻgʻrisidagi nizom ilovaga muvofiq tasdiqlansin.
2. Oʻzbekiston Respublikasi Tashqi ishlar vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev zimmasiga yuklansin.
Vazirlar Mahkamasining 2023-yil 20-noyabrdagi 610-son qaroriga ILOVA
Oʻzbekiston Respublikasida hamda xorijda hujjatlar va dalolatnomalarni konsullik legallashtirish tartibi toʻgʻrisida
1-bob. Umumiy qoidalar
1. Mazkur Nizom Oʻzbekiston Respublikasining xorijdagi diplomatik vakolatxonalari va konsullik muassasalari (keyingi oʻrinlarda — Oʻzbekiston Respublikasining konsullik muassasalari) tomonidan xorijda va Oʻzbekiston Respublikasi Tashqi ishlar vazirligining Konsullik-huquqiy departamenti (keyingi oʻrinlarda — Konsullik-huquqiy departament) tomonidan Oʻzbekiston Respublikasida hujjatlar va dalolatnomalarni konsullik legallashtirish tartibini belgilaydi.
2. Hujjatlar va dalolatnomalarni konsullik legallashtirish ulardagi imzolarning haqiqiyligini, hujjatni yoki dalolatnomani imzolagan shaxsning vakolatlarini, legallashtirishga taqdim etilgan hujjatga yoxud dalolatnomaga bosilgan muhr yoki shtampning haqiqiyligini hamda ushbu hujjatlar va dalolatnomalarning xorijiy davlat yoki Oʻzbekiston Respublikasi qonunchilik hujjatlariga muvofiqligini aniqlash va shahodatlashdan iboratdir. Konsullik muassasalari tomonidan hujjatlar va dalolatnomalarning legallashtirilishi ularning xalqaro munosabatlardagi qonuniyligini tasdiqlaydi.
Konsullik legallashtirish hujjat yoki dalolatnomada bayon etilgan faktlarni emas, balki faqat ularni imzolagan shaxsning vakolatlarini, legallashtirishga taqdim etilgan hujjatga yoxud dalolatnomaga bosilgan muhr yoki shtampning haqiqiyligini aniqlash va shahodatlashdan iboratdir.
3. Konsullik legallashtirish funksiyasini:
xorijiy davlatlarda — Oʻzbekiston Respublikasining konsullik muassasalari;
Oʻzbekiston Respublikasida — Konsullik-huquqiy departament amalga oshiradi.
4. Xorijiy davlatlarda hujjatlar va dalolatnomalarni konsullik legallashtirish funksiyalari konsullik mansabdor shaxsi (keyingi oʻrinlarda — konsul) tomonidan amalga oshiriladi.
Agar muayyan sababga koʻra konsul oʻz funksiyalarini bajara olmasa yoki konsul lavozimi vaqtincha boʻsh boʻlsa, konsulning vazifalari xorijiy davlat hududida joylashgan mazkur yoki boshqa konsullik muassasasining boshqa mansabdor shaxsiga yoki ushbu davlat hududida joylashgan Oʻzbekiston Respublikasi diplomatik vakolatxonasining diplomatik xodimlaridan biriga yuklanadi.
Oʻzbekiston Respublikasida hujjatlar va dalolatnomalarni konsullik legallashtirish funksiyalari Konsullik-huquqiy departament xodimlaridan biriga yuklanadi.
5. Oʻzbekiston Respublikasi davlat organlari va muassasalari xorijiy davlatlarning tashkilotlaridan joʻnatiladigan hujjatlar va dalolatnomalar ular konsullik muassasasi tomonidan legallashtirilgan taqdirdagina, agar Oʻzbekiston Respublikasining qonunchilik hujjatlarida yoki Oʻzbekiston Respublikasi va ushbu hujjatlar hamda dalolatnomalar joʻnatiladigan davlat ishtirokchi boʻlgan xalqaro shartnomada boshqacha qoida nazarda tutilmagan boʻlsa, koʻrib chiqish uchun qabul qiladi.
Konsul konsullik okrugidagi davlat organlari va muassasalari vakillari ishtirokida tuzilgan yoki mazkur davlat organlari hamda muassasalari tomonidan joʻnatiladigan hujjatlar va dalolatnomalarni legallashtiradi.
6. Konsul xorijiy davlat hududida rasmiylashtirilgan hujjatni legallashtirish uchun zarur hollarda mazkur hujjatning Oʻzbekiston Respublikasi davlat tilidagi yoki boshqa tillardagi notarial tartibda tasdiqlangan tarjimasini taqdim etishni talab qilishga haqli.
7. Xorijda har qanday harakatni amalga oshirish vakolatiga ega boʻlgan Oʻzbekiston Respublikasining davlat organlari va muassasalari tomonidan bunday harakatlarni amalga oshirish uchun berilgan ishonchnomalarni hamda mazkur davlat organlari va muassasalari faoliyati bilan bogʻliq boshqa hujjatlar Konsullik-huquqiy departament tomonidan legallashtiriladi.
8. Agar xorijiy davlatning qonunchilik hujjatlariga muvofiq Oʻzbekiston Respublikasi davlat organlari va muassasalari tomonidan rasmiylashtirilgan hamda xorijiy davlat hududida foydalanish uchun moʻljallangan hujjatlar va dalolatnomalar legallashtirilishi talab etilsa, ular belgilangan tartibda legallashtirilishi lozim.
9. Agar Oʻzbekiston Respublikasi qonunchilik hujjatlariga muvofiq Oʻzbekiston Respublikasida akkreditatsiyadan oʻtgan xorijiy davlatlarning diplomatik vakolatxonalari va konsullik muassasalari tomonidan rasmiylashtirilgan hamda Oʻzbekiston Respublikasida foydalanish uchun moʻljallangan hujjatlar va dalolatnomalar legallashtirilishi talab etilsa, ular belgilangan tartibda legallashtirilishi lozim.
10. Quyidagi hujjatlar va dalolatnomalar konsullik muassasalari tomonidan legallashtirilmaydi:
Oʻzbekiston Respublikasi qonunchilik hujjatlariga zid boʻlgan;
oʻz mazmuniga koʻra Oʻzbekiston Respublikasi manfaatlariga zarar yetkazishi mumkin boʻlgan;
notoʻgʻri rasmiylashtirilgan;
Oʻzbekiston Respublikasi fuqarolarining shaʼni va qadr-qimmatiga putur yetkazadigan maʼlumotlar mavjud boʻlgan;
tozalashlar, qoʻshimcha yozuvlar yoki qayd etilmagan tuzatishlar, shuningdek, qalam bilan yozilgan yozuvlar mavjud boʻlgan;
bir necha varaqlarda tuzilgan, lekin tartib raqami qoʻyilmagan, tikilmagan, hujjat yoki dalolatnomani taqdim etgan tashkilotning muhri va mansabdor shaxsning imzosi bilan shahodatlanmagan;
hujjatlarga faksimil imzo qoʻyilgan boʻlsa (Oʻzbekiston Respublikasi qonunchilik hujjatlarida belgilangan holatlar bundan mustasno).
Shuningdek, pasport, identifikatsiyalovchi ID-kartasi, partiyaga mansublik haqidagi hujjatlar, kasaba uyushmasi chiptalari, harbiy biletlar, toifa yoki diniy eʼtiqodga mansublik haqidagi hamda fuqarolik muomalasidan chiqarilgan mol-mulk hujjatlarining asli va nusxalari legallashtirilmaydi.
11. Agar hujjatga yoki ushbu hujjatga biriktirilgan varaqqa apostil qoʻyilgan boʻlsa, bu hujjatni legallashtirish talab etilmaydi.
Oʻzbekiston Respublikasining davlat organlari va muassasalari apostil qoʻyilgan hujjatlarni, agar apostil Oʻzbekiston Respublikasi bilan munosabatlarda chet elning rasmiy hujjatlarini legallashtirishga doir talabni bekor qiluvchi konvensiya qoʻllaniladigan chet davlatning vakolatli organi tomonidan qoʻyilgan boʻlsa, qabul qilishi shart.
2-bob. Oʻzbekiston Respublikasi konsullik muassasalari tomonidan hujjatlar va dalolatnomalarni legallashtirish
12. Hujjatlar va dalolatnomalarni legallashtirish uchun Oʻzbekiston Respublikasining konsullik muassasasida konsullik okrugida joylashgan davlat organlari va muassasalari tomonidan rasmiylashtirilgan hujjatlar hamda dalolatnomalarni tasdiqlash vakolatiga ega boʻlgan mansabdor shaxslarning imzosi va muhrlari namunalari mavjud boʻlishi lozim.
Xorijiy davlatning konsullik muassasasi uchun belgilangan konsullik okrugi hududida joylashgan Oʻzbekiston Respublikasi konsullik muassasalarida ular joylashgan hududda akkreditatsiya qilingan boshqa davlatlar konsullik muassasalari hamda qabul qiluvchi davlat Oʻzbekiston Respublikasi Tashqi ishlar vazirligining hujjatlar va dalolatnomalarni legallashtirish vakolatiga ega boʻlgan mansabdor shaxslari imzosi va muhri namunalari ham mavjud boʻlishi lozim.
13. Hujjatlar va dalolatnomalarni Oʻzbekiston Respublikasining konsullik muassasalarida legallashtirish uchun shaxslar ushbu Nizomga 1-ilovaga muvofiq shaklda ariza toʻldirib, unga quyidagilarni ilova qiladilar:
shaxsini tasdiqlovchi hujjat nusxasi;
legallashtirish talab etiladigan hujjat yoki dalolatnoma va uning nusxalari;
konsullik yigʻimlari va haqiqiy xarajatlarning oʻrnini qoplash hisobidan yigʻimlar toʻlanganligi toʻgʻrisidagi hujjatning asli.
Hujjatlar va dalolatnomalar ariza topshirilgan kundan eʼtiboran besh ish kuni ichida legallashtiriladi.
14. Legallashtirish uchun taqdim etilgan hujjatlar va dalolatnomalar Oʻzbekiston Respublikasi konsullik muassasasi joylashgan davlatning qonun hujjatlariga muvofiq ekanligiga shubha boʻlgan hollarda, konsul konsullik okrugidagi davlat hokimiyati organlariga rasmiy tushuntirish berishni soʻrab murojaat qiladi.
15. Konsulga Oʻzbekiston Respublikasidan hujjatlar talab qilib olish tartibi doirasida Oʻzbekiston Respublikasida tuzilgan, biroq Konsullik-huquqiy departament tomonidan legallashtirilmagan hujjatlar va dalolatnomalar kelib tushgan taqdirda, Oʻzbekiston Respublikasining konsullik muassasasi joylashgan davlatning qonunchilik hujjatlariga muvofiq ushbu hujjatlar va dalolatnomalar legallashtirilishi talab etilsa, konsul ularni legallashtiradi hamda manfaatdor shaxslar, davlat organlari va muassasalarga yuboradi.
16. Oʻzbekiston Respublikasida tuzilgan, biroq Konsullik-huquqiy departament tomonidan legallashtirilmagan hujjatlar va dalolatnomalar legallashtirish uchun shaxslar, davlat organlari va muassasalardan kelib tushgan taqdirda, konsul ularning haqiqiyligini aniqlash uchun Konsullik-huquqiy departamentga yuboradi. Ijobiy javob olingan taqdirda, konsul ushbu hujjatlar va dalolatnomalarni belgilangan tartibda legallashtiradi.
17. Konsul zarur hollarda uchinchi davlat hududida foydalanish uchun moʻljallangan hujjatlar va dalolatnomalarni legallashtirishi mumkin. Ushbu hujjatlar yoki dalolatnomalar uchinchi davlat hududida haqiqiy hisoblanishi uchun Oʻzbekiston Respublikasining konsullik muassasasi joylashgan davlatdagi uchinchi davlat konsullik muassasasi tomonidan ham legallashtirilishi lozim.
18. Oʻzbekiston Respublikasining konsullik muassasasi joylashgan davlatda foydalanish uchun talab qilib olinayotgan Oʻzbekiston Respublikasi fuqarolari, davlat organlari va muassasalarining hujjatlari va dalolatnomalarini konsul ushbu Nizomda belgilangan tartibda legallashtiradi.
19. Oʻzbekiston Respublikasining Konsullik ustavi 14-moddasiga asosan konsulning harakatlari (harakatsizligi) yoki qarorlari ustidan Oʻzbekiston Respublikasi qonunchilik hujjatlariga muvofiq konsullik muassasasi boshligʻiga, Oʻzbekiston Respublikasining konsullik muassasasi joylashgan davlatdagi diplomatik vakolatxonasi boshligʻiga va (yoki) Oʻzbekiston Respublikasi Tashqi ishlar vazirligiga yoxud sud tartibida shikoyat qilinishi mumkin.
3-bob. Hujjatlar va dalolatnomalarni Oʻzbekiston Respublikasida legallashtirish
20. Konsullik-huquqiy departament xorijiy mamlakat davlat organlari va muassasalari tomonidan rasmiylashtirilgan hamda Oʻzbekiston Respublikasi va Rossiya Federatsiyasida akkreditatsiya qilingan xorijiy diplomatik vakolatxonalar yoki konsullik muassasalari tomonidan legallashtirilgan hujjatlar va dalolatnomalarni, ushbu diplomatik vakolatxonalar masʼul xodimlarining imzolari va muhrlari namunalari mavjud boʻlgan taqdirda legallashtiradi.
21. Hujjatlar va dalolatnomalarni Konsullik-huquqiy departamentda legallashtirish uchun shaxslar ushbu Nizomga 1-ilovaga muvofiq shaklda ariza toʻldirib, unga quyidagilarni ilova qiladilar:
shaxsini tasdiqlovchi hujjatning nusxasi;
legallashtirish talab etiladigan hujjat yoki dalolatnoma va uning nusxalari;
konsullik yigʻimlari va haqiqiy xarajatlarning oʻrnini qoplash hisobidan yigʻimlar toʻlanganligi toʻgʻrisidagi hujjatning asli.
Hujjatlar va dalolatnomalar ariza topshirilgan kundan eʼtiboran besh ish kuni ichida legallashtiriladi.
22. Konsullik-huquqiy departamentda Oʻzbekiston Respublikasi va Rossiya Federatsiyasida akkreditatsiya qilingan diplomatik vakolatxonalar va konsullik muassasalarida hujjatlar va dalolatnomalarni legallashtirish vazifasini bajaruvchi mansabdor shaxslarning imzosi va muhrlari namunalari mavjud boʻlishi kerak.
23. Konsullik-huquqiy departament Oʻzbekiston Respublikasi davlat organlari va muassasalari xorijiy davlatlarda foydalanish uchun moʻljallangan hujjatlar va dalolatnomalarni ham legallashtiradi.
24. Konsullik-huquqiy departamentda legallashtirilishi lozim boʻlgan hujjatlar va dalolatnomalarni tasdiqlash vakolatiga ega boʻlgan Oʻzbekiston Respublikasi Adliya vazirligi masʼul xodimlarining imzosi va muhrlari namunalari mavjud boʻlishi kerak.
25. Konsullik-huquqiy departament notarius imzosini shahodatlovchi Oʻzbekiston Respublikasi Adliya vazirligi masʼul xodimining imzosini shahodatlaydi. Imzolarni tasdiqlashning ushbu tartibi fuqarolik holati dalolatnomalarini yozishning respublika hududida amal qilishga belgilangan hujjatlari nusxalarini hamda boshqa hujjatlar nusxalarini xorijiy davlatga taqdim etish uchun tasdiqlash maqsadida joriy qilingan.
26. Konsullik-huquqiy departament masʼul xodimining harakatlari (harakatsizligi) yoki qarorlari ustidan Oʻzbekiston Respublikasi qonunchilik hujjatlariga muvofiq Oʻzbekiston Respublikasi Tashqi ishlar vazirligiga yoxud sud tartibida shikoyat qilinishi mumkin.
4-bob. Legallashtiriladigan hujjatlar va dalolatnomalarga qoʻyiladigan talablar. Legallashtirish yozuvini kiritish
27. Legallashtirish uchun taqdim etilgan hujjatlar va dalolatnomalar aniq va ravshan yozilgan, hujjat yoki dalolatnomada qayd etilgan summa va sana, raqam va muddat yozuv bilan ifodalangan boʻlishi zarur. Mansabdor shaxslarning imzolari va muhrlar bosma izi aniq boʻlishi kerak.
Hujjatdagi va dalolatnomadagi boʻsh joylar chizib chiqilishi kerak. Tuzatish va qoʻshimchalarni hujjatni tasdiqlagan shaxsning imzosi oldidan koʻrsatish va legallashtirish yozuvida takrorlash zarur. Tuzatish va qoʻshimchalar shunday kiritilishi kerakki, barcha xato yozilgan, keyin tuzatilgan hamda oʻchirilganlarni dastlabki koʻrinishida oʻqish mumkin boʻlishi lozim. Agar tuzatish va qoʻshimchalar legallashtirish yozuviga qilingan boʻlsa, ular faqatgina legallashtirayotgan mansabdor shaxs tomonidan izohlanadi hamda imzolanadi.
28. Legallashtirish yozuvlari uchun joy boʻlmagan taqdirda, yozuv alohida qogʻozda yoziladi va hujjat yoki dalolatnomaga tikib qoʻyiladi hamda legallashtirayotgan shaxsning imzosi va muhri bilan unga biriktiriladi.
29. Mansabdor shaxs hujjat yoki dalolatnoma mazkur Nizom talablariga muvofiq legallashtirilishi mumkinligiga ishonch hosil qilganidan soʻng unga belgilangan shaklda yozuv kiritadi.
5-bob. Yakunlovchi qoidalar
30. Oʻzbekiston Respublikasining konsullik muassasalari va Konsullik-huquqiy departament hujjatlar va dalolatnomalarni legallashtirish reyestrlarini, shuningdek, ushbu Nizomga 2-ilovaga muvofiq shakl boʻyicha legallashtirilgan hujjatlar va dalolatnomalarni hisobga olish jurnalini yuritadi.
Fuqarolar va tashkilotlarning arizalari Oʻzbekiston Respublikasining konsullik muassasasi va Konsullik-huquqiy departamentda saqlanadi hamda davriy ketma-ketlikda tikib boriladi. Legallashtirilishi lozim boʻlgan har bir hujjatga legallashtirish tartib raqami berilib, sanasi koʻrsatiladi, ushbu raqam va sana ariza raqami va sanasi bilan mos boʻlishi lozim.
Oʻzbekiston Respublikasining konsullik muassasasi va Konsullik-huquqiy departament legallashtirilgan hujjatlarning hisobini elektron shaklda ham yuritishi mumkin.
31. Hujjatlar va dalolatnomalarni legallashtirish boʻyicha konsullik harakatlarini amalga oshirganlik uchun konsullik yigʻimlari va haqiqiy xarajatlarni qoplash hisobidan yigʻimlar undiriladi.
32. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
Oʻzbekiston Respublikasida hamda xorijda hujjatlar va dalolatnomalarni konsullik legallashtirish tartibi toʻgʻrisidagi nizomga 1-ILOVA
Oʻzbekiston Respublikasi konsullik muassasasiga (yoki Oʻzbekiston Respublikasi Tashqi ishlar vazirligining Konsullik-huquqiy departamentiga) ARIZA F.I.O. _________________________________________________________________________ Ariza beruvchining fuqaroligi ____________________________________________________ Turar joyi, manzili _____________________________________________________________ ________________________________________________________________________________ Ish joyi________________________________________________________________________ Lavozimi _______________________________________________________________________ Legallashtirilishi lozim boʻlgan hujjat nomi. Hujjat seriyasi, raqami. Kim tomonidan, qachon berilgan. Hujjat kimga berilgan Oʻzbekiston Respublikasi Adliya vazirligida roʻyxatga olingan raqam Oʻzbekiston Respublikasi konsullik muassasasi (yoki Tashqi ishlar vazirligining Konsullik-huquqiy departamenti) roʻyxatga olish raqami Hujjatning xususiyati — fuqarolik holati haqida, taʼlim haqida, tijorat xususiyatiga ega, moliyaviy va boshqa harakatlarni amalga oshirish uchun, mol-mulkni boshqarish uchun (keraklisi chizilsin). Sana ________________________ Imzo _______________________ Toʻlangan konsullik yigʻimi summasi _______________________________________________ Konsullik yigʻimi toʻlanganligi haqida kvitansiya raqami ____________________________ _______________________________________________________________________________ Konsullik yigʻimi toʻlangan sana __________________________________________________ Imzosi tasdiqlanayotgan shaxsning F.I.O. ___________________________________________ Hujjatni legallashtirgan shaxsning F.I.O. _________________________________________
Oʻzbekiston Respublikasida hamda xorijda hujjatlar va dalolatnomalarni konsullik legallashtirish tartibi toʻgʻrisidagi nizomga 2-ILOVA
Legallashtirilgan hujjatlarni va dalolatnomalarni hisobga olish
T/r Legallashtirish sanasi Legallashtirgan shaxsning F.I.O., lavozimi Hujjatning nomi, rekvizitlari Hujjatni imzolagan shaxsning F.I.O., lavozimi Legallashtirish uchun hujjat taqdim etgan shaxsning F.I.O., shaxsini tasdiqlovchi hujjatning maʼlumotlari Legallashtirish taqdim etiladigan davlat Legallashtirish uchun yigʻim toʻlanganligi toʻgʻrisidagi belgi 1 2 3 4 5 6 7 8
Oʻzbekiston Respublikasining Bosh vaziri A. ARIPOV
Toshkent sh.,
2023-yil 20-noyabr,
610-son