📅 2023-yil 27-noyabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 27 ноябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 27 ноября 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 27 November 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Мол-мулкни бошқа шахсга ўтказиш учун қўйилган тақиқларни (хатловларни) бекор қилиш жараёнларининг соддалаштирилиши муносабати билан Бошқа шахсга ўтказиш тақиқлаб ёки хатлаб қўйилган мол-мулклар электрон маълумотлар банкини шакллантириш, юритиш ва ундан фойдаланиш тўғрисидаги низомга ўзгартиришлар ва қўшимча киритиш тўғрисида
Сўнгги йилларда мамлакатимизда нотариат институтининг самарали фаолият кўрсатишини таъминлаш ҳамда нотариал идоралар томонидан жисмоний ва юридик шахсларга ҳуқуқий хизмат кўрсатиш сифат даражасини ошириш бўйича изчил ишлар амалга оширилмоқда.
Шу билан бирга, нотариал хизматлар кўрсатишнинг тезкорлигини ошириш, фуқаролик-ҳуқуқий муносабатларда, жумладан, хусусий мулк эгалари ўз мулкини эркин тасарруф этиши ва ундан фойдаланиш борасидаги ортиқча бюрократик тўсиқ ва ғовларни олиб ташлаш ҳамда соҳани рақамлаштириш бўйича зарур чора-тадбирларни белгилаш талаб этилмоқда.
Мол-мулкни бошқа шахсга ўтказишга қўйилган тақиқларни (хатловларни) бекор қилиш жараёнларини соддалаштириш, хусусан, банк ва бошқа кредит ташкилотлари томонидан мажбурият тўлиқ бажарилганлиги ҳамда мол-мулкни бошқа шахсга ўтказиш учун қўйилган тақиқ бекор қилиниши лозимлиги ҳақидаги маълумотларни замонавий ахборот технологияларидан фойдаланган ҳолда, электрон шаклда юбориш амалиётини жорий этиш, шунингдек, жисмоний ва юридик шахсларга қўшимча қулайликлар яратиш мақсадида Вазирлар Маҳкамаси қарор қилади:
1. Вазирлар Маҳкамасининг 2022 йил 22 августдаги 468-сон қарори билан тасдиқланган Бошқа шахсга ўтказиш тақиқлаб ёки хатлаб қўйилган мол-мулклар электрон маълумотлар банкини шакллантириш, юритиш ва ундан фойдаланиш тўғрисидаги низомга иловага мувофиқ қуйидагиларни назарда тутувчи ўзгартиришлар ва қўшимча киритилсин:
идоравий нотариал архивлар сақловида бўлган ҳужжатлар билан боғлиқ тақиқни (хатловни) нотариус томонидан қонунчилик ҳужжатларига мувофиқ бекор қилиш;
нотариал тасдиқланган гаров (ипотека) шартномалари бўйича тегишли банк ва бошқа кредит ташкилотларининг мол-мулкни бошқа шахсга ўтказиш учун қўйилган тақиқ бекор қилинганлиги ҳақидаги маълумотларини, агар тақиқ 2019 йил 1 январга қадар қўйилган бўлса, исталган нотариус ёки тегишли нотариал архив мудири томонидан, шунингдек, тақиқ 2019 йил 1 январь ва ундан кейин қўйилган бўлса, тегишли банк ёки кредит ташкилоти томонидан бошқа шахсга ўтказиш тақиқлаб ёки хатлаб қўйилган мол-мулклар электрон маълумотлар банкига (кейинги ўринларда — электрон маълумотлар банки) киритиш;
банк ва бошқа кредит ташкилотларининг нотариал тасдиқланган битимлар бўйича мажбурият тўлиқ бажарилганлиги ҳамда мол-мулкни бошқа шахсга ўтказишга қўйилган тақиқ бекор қилиниши лозимлиги ҳақидаги маълумотларини электрон маълумотлар банкига электрон шаклда юбориш.
2. Банклар ва бошқа кредит ташкилотларига мажбурият тўлиқ бажарилганлиги ҳамда мол-мулкни бошқа шахсга ўтказиш учун 2019 йил 1 январга қадар қўйилган тақиқ бекор қилиниши лозимлиги ҳақидаги маълумотларни электрон маълумотлар банкига электрон шаклда юбориш амалиётини жорий этиш тавсия қилинсин.
3. Адлия вазирлиги бир ой муддатда:
нотариал тасдиқланган гаров (ипотека) шартномалари асосида мол-мулкни бошқа шахсга ўтказиш учун 2019 йил 1 январь ва ундан кейин қўйилган тақиқлар бўйича мол-мулкни бошқа шахсга ўтказиш учун қўйилган тақиқ бекор қилинганлиги ҳақидаги маълумотларни тегишли банк ёки кредит ташкилоти томонидан электрон маълумотлар банкига киритиш имкониятини яратсин;
манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни ушбу қарорга мувофиқлаштирсин.
4. Мазкур қарорнинг бажарилишини назорат қилиш Ўзбекистон Республикаси адлия вазири А.Ж. Ташкулов зиммасига юклансин.
Вазирлар Маҳкамасининг 2023 йил 27 ноябрдаги 626-сон қарорига ИЛОВА
Бошқа шахсга ўтказиш тақиқлаб ёки хатлаб қўйилган мол-мулклар электрон маълумотлар банкини шакллантириш, юритиш ва ундан фойдаланиш тўғрисидаги низомга киритилаётган ўзгартиришлар ва қўшимча
1. 8-банд қуйидаги таҳрирда баён этилсин:
«8. Нотариус қонунчилик ҳужжатларида белгиланган ҳолларда, шунингдек, тарафларнинг келишувига асосан мол-мулкни бошқа шахсга ўтказишни тақиқлаб қўяди ва тақиқни бекор қилади. Бунда нотариуснинг мол-мулкни бошқа шахсга ўтказишни тақиқлаб қўйиши ва тақиқни бекор қилиши электрон маълумотлар банки орқали амалга оширилади.
Нотариус нотариал архив сақловида бўлган ҳужжатлар билан боғлиқ тақиқни (хатловни) бекор қилиши мумкин.».
2. 10-банд қуйидаги таҳрирда баён этилсин:
«10. Банк ва бошқа кредит ташкилотлари томонидан берилган кредит ёки қарз қайтарилишини таъминлаш мақсадида нотариал тасдиқланган гаров (ипотека) шартномаси бўйича мажбуриятлар тўлиқ бажарилган тақдирда мол-мулкни бошқа шахсга ўтказишга тақиқ:
2019 йил 1 январга қадар қўйилган бўлса, мол-мулкни бошқа шахсга ўтказишга қўйилган тақиқ бекор қилинганлиги ҳақидаги маълумотлар исталган нотариус ёки тегишли нотариал архив мудири томонидан;
2019 йил 1 январь ва ундан кейин қўйилган бўлса, мол-мулкни бошқа шахсга ўтказишга қўйилган тақиқ бекор қилинганлиги ҳақидаги маълумотлар тегишли банк ёки кредит ташкилоти томонидан электрон маълумотлар банкига киритилади.».
3. Қуйидаги мазмундаги 10 1 -банд билан тўлдирилсин:
«10 1 . Мазкур Низомнинг 10-банди иккинчи хатбошисида назарда тутилган ҳолларда банк ва бошқа кредит ташкилотларининг нотариал тасдиқланган гаров (ипотека) шартномаси бўйича мажбурият тўлиқ бажарилганлиги ҳамда мол-мулкни бошқа шахсга ўтказишга қўйилган тақиқ бекор қилиниши лозимлиги ҳақидаги хабарномаси электрон маълумотлар банкига электрон шаклда юборилиши мумкин.
Бунда, ушбу хабарномада мол-мулкни бошқа шахсга ўтказишга тақиқ қўйилишига асос бўлган нотариал тасдиқланган битимнинг реестр рақами ва санаси, тақиқ бекор қилиниши лозим бўлган мол-мулк ҳақидаги маълумотлар (идентификатор) ҳамда банк ёки бошқа кредит ташкилотининг солиқ тўловчининг идентификация рақами кўрсатилиши зарур.».
4. 14-банд қуйидаги таҳрирда баён этилсин:
«14. Мол-мулкни бошқа шахсга ўтказишни тақиқлаб ёки хатлаб қўйиш, шунингдек, уни бекор қилишда тўлов ундирилмайди, нотариус томонидан тақиқ (хатлов) бекор қилинадиган ҳоллар бундан мустасно.».
5. 18-банддаги «ёки» сўзи «ва» сўзи билан алмаштирилсин.
Ўзбекистон Республикасининг Бош вазири А. АРИПОВ
Тошкент ш.,
2023 йил 27 ноябрь,
626-сон
Oʻzbekiston Respublikasi Vazirlar Mahkamasining
qarori
Mol-mulkni boshqa shaxsga oʻtkazish uchun qoʻyilgan taqiqlarni (xatlovlarni) bekor qilish jarayonlarining soddalashtirilishi munosabati bilan Boshqa shaxsga oʻtkazish taqiqlab yoki xatlab qoʻyilgan mol-mulklar elektron maʼlumotlar bankini shakllantirish, yuritish va undan foydalanish toʻgʻrisidagi nizomga oʻzgartirishlar va qoʻshimcha kiritish toʻgʻrisida
Soʻnggi yillarda mamlakatimizda notariat institutining samarali faoliyat koʻrsatishini taʼminlash hamda notarial idoralar tomonidan jismoniy va yuridik shaxslarga huquqiy xizmat koʻrsatish sifat darajasini oshirish boʻyicha izchil ishlar amalga oshirilmoqda.
Shu bilan birga, notarial xizmatlar koʻrsatishning tezkorligini oshirish, fuqarolik-huquqiy munosabatlarda, jumladan, xususiy mulk egalari oʻz mulkini erkin tasarruf etishi va undan foydalanish borasidagi ortiqcha byurokratik toʻsiq va gʻovlarni olib tashlash hamda sohani raqamlashtirish boʻyicha zarur chora-tadbirlarni belgilash talab etilmoqda.
Mol-mulkni boshqa shaxsga oʻtkazishga qoʻyilgan taqiqlarni (xatlovlarni) bekor qilish jarayonlarini soddalashtirish, xususan, bank va boshqa kredit tashkilotlari tomonidan majburiyat toʻliq bajarilganligi hamda mol-mulkni boshqa shaxsga oʻtkazish uchun qoʻyilgan taqiq bekor qilinishi lozimligi haqidagi maʼlumotlarni zamonaviy axborot texnologiyalaridan foydalangan holda, elektron shaklda yuborish amaliyotini joriy etish, shuningdek, jismoniy va yuridik shaxslarga qoʻshimcha qulayliklar yaratish maqsadida Vazirlar Mahkamasi qaror qiladi:
1. Vazirlar Mahkamasining 2022-yil 22-avgustdagi 468-son qarori bilan tasdiqlangan Boshqa shaxsga oʻtkazish taqiqlab yoki xatlab qoʻyilgan mol-mulklar elektron maʼlumotlar bankini shakllantirish, yuritish va undan foydalanish toʻgʻrisidagi nizomga ilovaga muvofiq quyidagilarni nazarda tutuvchi oʻzgartirishlar va qoʻshimcha kiritilsin:
idoraviy notarial arxivlar saqlovida boʻlgan hujjatlar bilan bogʻliq taqiqni (xatlovni) notarius tomonidan qonunchilik hujjatlariga muvofiq bekor qilish;
notarial tasdiqlangan garov (ipoteka) shartnomalari boʻyicha tegishli bank va boshqa kredit tashkilotlarining mol-mulkni boshqa shaxsga oʻtkazish uchun qoʻyilgan taqiq bekor qilinganligi haqidagi maʼlumotlarini, agar taqiq 2019-yil 1-yanvarga qadar qoʻyilgan boʻlsa, istalgan notarius yoki tegishli notarial arxiv mudiri tomonidan, shuningdek, taqiq 2019-yil 1-yanvar va undan keyin qoʻyilgan boʻlsa, tegishli bank yoki kredit tashkiloti tomonidan boshqa shaxsga oʻtkazish taqiqlab yoki xatlab qoʻyilgan mol-mulklar elektron maʼlumotlar bankiga (keyingi oʻrinlarda — elektron maʼlumotlar banki) kiritish;
bank va boshqa kredit tashkilotlarining notarial tasdiqlangan bitimlar boʻyicha majburiyat toʻliq bajarilganligi hamda mol-mulkni boshqa shaxsga oʻtkazishga qoʻyilgan taqiq bekor qilinishi lozimligi haqidagi maʼlumotlarini elektron maʼlumotlar bankiga elektron shaklda yuborish.
2. Banklar va boshqa kredit tashkilotlariga majburiyat toʻliq bajarilganligi hamda mol-mulkni boshqa shaxsga oʻtkazish uchun 2019-yil 1-yanvarga qadar qoʻyilgan taqiq bekor qilinishi lozimligi haqidagi maʼlumotlarni elektron maʼlumotlar bankiga elektron shaklda yuborish amaliyotini joriy etish tavsiya qilinsin.
3. Adliya vazirligi bir oy muddatda:
notarial tasdiqlangan garov (ipoteka) shartnomalari asosida mol-mulkni boshqa shaxsga oʻtkazish uchun 2019-yil 1-yanvar va undan keyin qoʻyilgan taqiqlar boʻyicha mol-mulkni boshqa shaxsga oʻtkazish uchun qoʻyilgan taqiq bekor qilinganligi haqidagi maʼlumotlarni tegishli bank yoki kredit tashkiloti tomonidan elektron maʼlumotlar bankiga kiritish imkoniyatini yaratsin;
manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.
4. Mazkur qarorning bajarilishini nazorat qilish Oʻzbekiston Respublikasi adliya vaziri A.J. Tashkulov zimmasiga yuklansin.
Vazirlar Mahkamasining 2023-yil 27-noyabrdagi 626-son qaroriga ILOVA
Boshqa shaxsga oʻtkazish taqiqlab yoki xatlab qoʻyilgan mol-mulklar elektron maʼlumotlar bankini shakllantirish, yuritish va undan foydalanish toʻgʻrisidagi nizomga kiritilayotgan oʻzgartirishlar va qoʻshimcha
1. 8-band quyidagi tahrirda bayon etilsin:
“8. Notarius qonunchilik hujjatlarida belgilangan hollarda, shuningdek, taraflarning kelishuviga asosan mol-mulkni boshqa shaxsga oʻtkazishni taqiqlab qoʻyadi va taqiqni bekor qiladi. Bunda notariusning mol-mulkni boshqa shaxsga oʻtkazishni taqiqlab qoʻyishi va taqiqni bekor qilishi elektron maʼlumotlar banki orqali amalga oshiriladi.
Notarius notarial arxiv saqlovida boʻlgan hujjatlar bilan bogʻliq taqiqni (xatlovni) bekor qilishi mumkin.”.
2. 10-band quyidagi tahrirda bayon etilsin:
“10. Bank va boshqa kredit tashkilotlari tomonidan berilgan kredit yoki qarz qaytarilishini taʼminlash maqsadida notarial tasdiqlangan garov (ipoteka) shartnomasi boʻyicha majburiyatlar toʻliq bajarilgan taqdirda mol-mulkni boshqa shaxsga oʻtkazishga taqiq:
2019-yil 1-yanvarga qadar qoʻyilgan boʻlsa, mol-mulkni boshqa shaxsga oʻtkazishga qoʻyilgan taqiq bekor qilinganligi haqidagi maʼlumotlar istalgan notarius yoki tegishli notarial arxiv mudiri tomonidan;
2019-yil 1-yanvar va undan keyin qoʻyilgan boʻlsa, mol-mulkni boshqa shaxsga oʻtkazishga qoʻyilgan taqiq bekor qilinganligi haqidagi maʼlumotlar tegishli bank yoki kredit tashkiloti tomonidan elektron maʼlumotlar bankiga kiritiladi.”.
3. Quyidagi mazmundagi 10 1 -band bilan toʻldirilsin:
“10 1 . Mazkur Nizomning 10-bandi ikkinchi xatboshisida nazarda tutilgan hollarda bank va boshqa kredit tashkilotlarining notarial tasdiqlangan garov (ipoteka) shartnomasi boʻyicha majburiyat toʻliq bajarilganligi hamda mol-mulkni boshqa shaxsga oʻtkazishga qoʻyilgan taqiq bekor qilinishi lozimligi haqidagi xabarnomasi elektron maʼlumotlar bankiga elektron shaklda yuborilishi mumkin.
Bunda, ushbu xabarnomada mol-mulkni boshqa shaxsga oʻtkazishga taqiq qoʻyilishiga asos boʻlgan notarial tasdiqlangan bitimning reyestr raqami va sanasi, taqiq bekor qilinishi lozim boʻlgan mol-mulk haqidagi maʼlumotlar (identifikator) hamda bank yoki boshqa kredit tashkilotining soliq toʻlovchining identifikatsiya raqami koʻrsatilishi zarur.”.
4. 14-band quyidagi tahrirda bayon etilsin:
“14. Mol-mulkni boshqa shaxsga oʻtkazishni taqiqlab yoki xatlab qoʻyish, shuningdek, uni bekor qilishda toʻlov undirilmaydi, notarius tomonidan taqiq (xatlov) bekor qilinadigan hollar bundan mustasno.”.
5. 18-banddagi “yoki” soʻzi “va” soʻzi bilan almashtirilsin.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 27-noyabr,
626-son