📅 2023-yil 28-noyabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 28 ноябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 28 ноября 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 28 November 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Судьялар ва уларнинг оила аъзолари пенсия таъминоти шартлари, меъёрлари ҳамда тартиби такомиллаштирилиши муносабати билан Судьялар ва уларнинг оила аъзолари пенсия таъминоти шартлари, меъёрлари ҳамда тартиби тўғрисидаги низомга ўзгартириш ва қўшимчалар киритиш тўғрисида
Сўнгги йилларда мамлакатимизда суд ҳокимияти мустақиллигини таъминлаш, фуқаролар, шунингдек, тадбиркорлик субъектларининг ҳуқуқлари, эркинликлари ва қонуний манфаатларини суд томонидан ҳимоя қилиш кафолатларини кучайтиришга қаратилган ислоҳотлар амалга оширилди.
Суд ҳокимиятининг алоҳида мавқе ва обрўсига, судьялар мустақиллиги принципларига мувофиқ судьялар ва уларнинг оила аъзолари пенсия таъминоти шартлари, меъёрлари ҳамда тартиби белгиланган.
Бугунги кунда судьяларга пенсия тайинлаш амалиётида юзага келаётган ноаниқлик ва муаммолар таҳлили судьялар ва уларнинг оила аъзолари пенсия таъминоти шартлари, меъёрлари ҳамда тартибини янада такомиллаштириш зарурлигини кўрсатди.
Ўзбекистон Республикаси Президентининг «Одил судловга эришиш имкониятларини янада кенгайтириш ва судлар фаолияти самарадорлигини оширишга доир қўшимча чора-тадбирлар тўғрисида» 2023 йил 16 январдаги ПФ-11-сон Фармонига мувофиқ, шунингдек, судьяларнинг пенсия таъминоти шартлари, меъёрлари ва тартибини янада такомиллаштириш мақсадида Вазирлар Маҳкамаси қарор қилади:
1. Ўзбекистон Республикаси Президентининг 2023 йил 16 январдаги ПФ-11-сон Фармони билан тасдиқланган 2023 — 2026 йилларга мўлжалланган суд тизимини сифат жиҳатидан янги босқичга олиб чиқишнинг қисқа муддатли стратегиясини амалга ошириш бўйича ҳаракатлар дастурининг 27-бандига мувофиқ судьяларга пенсия тайинлаш амалиётида юзага келаётган ноаниқлик ва муаммолар таҳлили асосида судьялар ва уларнинг оила аъзолари пенсия таъминоти шартлари, меъёрлари ҳамда тартибини такомиллаштиришга қаратилган таклифларни ишлаб чиқиш белгиланганлиги маълумот учун қабул қилинсин.
2. Вазирлар Маҳкамасининг 2019 йил 9 январдаги 11-сон қарори билан тасдиқланган Судьялар ва уларнинг оила аъзолари пенсия таъминоти шартлари, меъёрлари ҳамда тартиби тўғрисидаги низомга иловага мувофиқ қуйидагиларни назарда тутувчи ўзгартириш ва қўшимчалар киритилсин:
судьялик лавозимида пенсия олиш ҳуқуқини таъминлашда судьянинг пенсия ёшига қадар бенуқсон обрў-эътибор билан фаолият кўрсатиши асосий мезон ҳисобланишини инобатга олиб, Ўзбекистон Республикаси «Судлар тўғрисида»ги Қонунида белгиланган асослар бўйича судьянинг ваколатлари муддатидан илгари тугатилган тақдирда, судьялик пенсиясини олиш ҳуқуқини истисно этиш;
судьянинг амалдаги ваколат муддати тугамасдан навбатдаги муддатга сайланган ёки тайинланган ҳолларда, истисно тариқасида, олти ойгача бўлган муддат судья лавозимидаги иш стажига қўшилишини аниқлаштириш;
пенсионер вафот этган ой учун охиригача олинмай қолган пенсия суммаси ушбу ой учун тўлиқ тўланишини белгилаш.
3. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров зиммасига юклансин.
Вазирлар Маҳкамасининг 2023 йил 28 ноябрдаги 630-сон қарорига ИЛОВА
Вазирлар Маҳкамасининг 2019 йил 9 январдаги 11-сон қарори билан тасдиқланган Судьялар ва уларнинг оила аъзолари пенсия таъминоти шартлари, меъёрлари ҳамда тартиби тўғрисидаги низомга киритилаётган ўзгартириш ва қўшимчалар
1. 3-бандда :
«а» кичик банд қуйидаги таҳрирда баён этилсин:
«а) ёшга доир пенсияни — судья сифатида камида 15 йиллик иш стажига эга бўлган эркаклар — 60 ёшга тўлганда ҳамда аёллар — 55 ёшга тўлганда. Бунда судьянинг амалдаги ваколат муддати тугамасдан навбатдаги муддатга сайланган ёки тайинланган ҳолларда, истисно тариқасида, олти ойгача бўлган муддат судья лавозимидаги иш стажига қўшилади»;
қуйидаги мазмундаги олтинчи хатбоши билан тўлдирилсин:
«Ўзбекистон Республикасининг «Судлар тўғрисида»ги Қонуни 79-моддаси биринчи қисмининг 1, 3, 5 ва 10-бандларида назарда тутилган асослар бўйича судьянинг ваколатлари муддатидан илгари тугатилган тақдирда, у ушбу Низомга мувофиқ пенсия олиш ҳуқуқига эга бўлмайди».
2. 6-банднинг учинчи хатбошиси «шунингдек,» сўзидан кейин «1991 йил 12 июндан 1992 йилнинг 8 декабрига қадар ҳакамлик судлари,» сўзлари билан тўлдирилсин.
3. 30-бандда :
қуйидаги мазмундаги тўққизинчи хатбоши билан тўлдирилсин:
«Ушбу Низом 30-бандининг бешинчи хатбошисида назарда тутилган шахсларнинг ушбу Низомга мувофиқ пенсия тайинлаш ҳуқуқини берадиган иш стажини ҳисоблаш учун ушбу шахслар камида 10 йил судья лавозимида ишлаган бўлиши лозим»;
тўққизинчи хатбоши тегишинча ўнинчи хатбоши деб ҳисоблансин.
4. 45-банднинг бешинчи хатбошиси «хўжалик судлари,» сўзларидан кейин «шунингдек, 1991 йил 12 июндан 1992 йилнинг 8 декабрига қадар ҳакамлик судлари» сўзлари билан тўлдирилсин.
5. 48-банднинг тўртинчи хатбошисидаги «пенсияни ҳисоблашнинг энг кам миқдорининг» сўзлари «пенсияни ҳисоблаш базавий миқдорининг» сўзлари билан алмаштирилсин.
6. 100-банднинг иккинчи хатбошисидаги «унинг вафотигача ушбу ойнинг кунлари учун» сўзлари «ушбу ой учун тўлиқ» сўзлари билан алмаштирилсин.
Ўзбекистон Республикасининг Бош вазири А. АРИПОВ
Тошкент ш.,
2023 йил 28 ноябрь,
630-сон
Oʻzbekiston Respublikasi Vazirlar Mahkamasining
qarori
Sudyalar va ularning oila aʼzolari pensiya taʼminoti shartlari, meʼyorlari hamda tartibi takomillashtirilishi munosabati bilan Sudyalar va ularning oila aʼzolari pensiya taʼminoti shartlari, meʼyorlari hamda tartibi toʻgʻrisidagi nizomga oʻzgartirish va qoʻshimchalar kiritish toʻgʻrisida
Soʻnggi yillarda mamlakatimizda sud hokimiyati mustaqilligini taʼminlash, fuqarolar, shuningdek, tadbirkorlik subyektlarining huquqlari, erkinliklari va qonuniy manfaatlarini sud tomonidan himoya qilish kafolatlarini kuchaytirishga qaratilgan islohotlar amalga oshirildi.
Sud hokimiyatining alohida mavqe va obroʻsiga, sudyalar mustaqilligi prinsiplariga muvofiq sudyalar va ularning oila aʼzolari pensiya taʼminoti shartlari, meʼyorlari hamda tartibi belgilangan.
Bugungi kunda sudyalarga pensiya tayinlash amaliyotida yuzaga kelayotgan noaniqlik va muammolar tahlili sudyalar va ularning oila aʼzolari pensiya taʼminoti shartlari, meʼyorlari hamda tartibini yanada takomillashtirish zarurligini koʻrsatdi.
Oʻzbekiston Respublikasi Prezidentining “Odil sudlovga erishish imkoniyatlarini yanada kengaytirish va sudlar faoliyati samaradorligini oshirishga doir qoʻshimcha chora-tadbirlar toʻgʻrisida” 2023-yil 16-yanvardagi PF-11-son Farmoniga muvofiq, shuningdek, sudyalarning pensiya taʼminoti shartlari, meʼyorlari va tartibini yanada takomillashtirish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining 2023-yil 16-yanvardagi PF-11-son Farmoni bilan tasdiqlangan 2023 — 2026-yillarga moʻljallangan sud tizimini sifat jihatidan yangi bosqichga olib chiqishning qisqa muddatli strategiyasini amalga oshirish boʻyicha harakatlar dasturining 27-bandiga muvofiq sudyalarga pensiya tayinlash amaliyotida yuzaga kelayotgan noaniqlik va muammolar tahlili asosida sudyalar va ularning oila aʼzolari pensiya taʼminoti shartlari, meʼyorlari hamda tartibini takomillashtirishga qaratilgan takliflarni ishlab chiqish belgilanganligi maʼlumot uchun qabul qilinsin.
2. Vazirlar Mahkamasining 2019-yil 9-yanvardagi 11-son qarori bilan tasdiqlangan Sudyalar va ularning oila aʼzolari pensiya taʼminoti shartlari, meʼyorlari hamda tartibi toʻgʻrisidagi nizomga ilovaga muvofiq quyidagilarni nazarda tutuvchi oʻzgartirish va qoʻshimchalar kiritilsin:
sudyalik lavozimida pensiya olish huquqini taʼminlashda sudyaning pensiya yoshiga qadar benuqson obroʻ-eʼtibor bilan faoliyat koʻrsatishi asosiy mezon hisoblanishini inobatga olib, Oʻzbekiston Respublikasi “Sudlar toʻgʻrisida”gi Qonunida belgilangan asoslar boʻyicha sudyaning vakolatlari muddatidan ilgari tugatilgan taqdirda, sudyalik pensiyasini olish huquqini istisno etish;
sudyaning amaldagi vakolat muddati tugamasdan navbatdagi muddatga saylangan yoki tayinlangan hollarda, istisno tariqasida, olti oygacha boʻlgan muddat sudya lavozimidagi ish stajiga qoʻshilishini aniqlashtirish;
pensioner vafot etgan oy uchun oxirigacha olinmay qolgan pensiya summasi ushbu oy uchun toʻliq toʻlanishini belgilash.
3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.
Vazirlar Mahkamasining 2023-yil 28-noyabrdagi 630-son qaroriga ILOVA
Vazirlar Mahkamasining 2019-yil 9-yanvardagi 11-son qarori bilan tasdiqlangan Sudyalar va ularning oila aʼzolari pensiya taʼminoti shartlari, meʼyorlari hamda tartibi toʻgʻrisidagi nizomga kiritilayotgan oʻzgartirish va qoʻshimchalar
1. 3-bandda :
“a” kichik band quyidagi tahrirda bayon etilsin:
“a) yoshga doir pensiyani — sudya sifatida kamida 15 yillik ish stajiga ega boʻlgan erkaklar — 60 yoshga toʻlganda hamda ayollar — 55 yoshga toʻlganda. Bunda sudyaning amaldagi vakolat muddati tugamasdan navbatdagi muddatga saylangan yoki tayinlangan hollarda, istisno tariqasida, olti oygacha boʻlgan muddat sudya lavozimidagi ish stajiga qoʻshiladi”;
quyidagi mazmundagi oltinchi xatboshi bilan toʻldirilsin:
“Oʻzbekiston Respublikasining “Sudlar toʻgʻrisida”gi Qonuni 79-moddasi birinchi qismining 1, 3, 5 va 10-bandlarida nazarda tutilgan asoslar boʻyicha sudyaning vakolatlari muddatidan ilgari tugatilgan taqdirda, u ushbu Nizomga muvofiq pensiya olish huquqiga ega boʻlmaydi”.
2. 6-bandning uchinchi xatboshisi “shuningdek,” soʻzidan keyin “1991-yil 12-iyundan 1992-yilning 8-dekabriga qadar hakamlik sudlari,” soʻzlari bilan toʻldirilsin.
3. 30-bandda :
quyidagi mazmundagi toʻqqizinchi xatboshi bilan toʻldirilsin:
“Ushbu Nizom 30-bandining beshinchi xatboshisida nazarda tutilgan shaxslarning ushbu Nizomga muvofiq pensiya tayinlash huquqini beradigan ish stajini hisoblash uchun ushbu shaxslar kamida 10 yil sudya lavozimida ishlagan boʻlishi lozim”;
toʻqqizinchi xatboshi tegishincha oʻninchi xatboshi deb hisoblansin.
4. 45-bandning beshinchi xatboshisi “xoʻjalik sudlari,” soʻzlaridan keyin “shuningdek, 1991-yil 12-iyundan 1992-yilning 8-dekabriga qadar hakamlik sudlari” soʻzlari bilan toʻldirilsin.
5. 48-bandning toʻrtinchi xatboshisidagi “pensiyani hisoblashning eng kam miqdorining” soʻzlari “pensiyani hisoblash bazaviy miqdorining” soʻzlari bilan almashtirilsin.
6. 100-bandning ikkinchi xatboshisidagi “uning vafotigacha ushbu oyning kunlari uchun” soʻzlari “ushbu oy uchun toʻliq” soʻzlari bilan almashtirilsin.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 28-noyabr,
630-son