📅 2023-yil 29-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 29 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 29 декабря 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 29 December 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Сабзавот, полиз экинлари ва картошкачилик илмий-тадқиқот институти фаолиятини янада такомиллаштириш тўғрисида
Сабзавотчилик, полизчилик ва картошкачилик бўйича илмий-тадқиқотларни янада ривожлантириш, ҳудудларнинг табиий-иқлим шароитларига мос, серҳосил навларини яратиш, бирламчи уруғчиликни ташкил этиш ва маҳсулот етиштиришда илмий ёндашувни янада жадаллаштириш ҳамда Ўзбекистон Республикаси Президентининг «Аграр соҳада илм-фан, таълим ва ишлаб чиқаришни интеграция қилиш орқали сифат ва самарадорликни оширишнинг қўшимча чора-тадбирлари тўғрисида» 2023 йил 7 июлдаги ПҚ-216-сон қарори ижросини таъминлаш мақсадида Вазирлар Маҳкамаси қарор қилади:
1. Ўзбекистон Республикаси Қишлоқ хўжалиги вазирлиги ҳамда Жиззах вилояти ҳокимлигининг Қишлоқ хўжалигида билим ва инновациялар миллий маркази тизимидаги Сабзавот, полиз экинлари ва картошкачилик илмий-тадқиқот институтининг (кейинги ўринларда — Институт) Зомин илмий-тажриба станциясини (кейинги ўринларда — Илмий-тажриба станция) ташкил этиш тўғрисидаги таклифига розилик берилсин.
2. Ўзбекистон Республикаси Президентининг «Қишлоқ хўжалигида билим ва инновациялар тизими ҳамда замонавий хизматлар кўрсатишни янада ривожлантириш тўғрисида» 2021 йил 3 февралдаги ПФ-6159-сон Фармонига мувофиқ илмий-тадқиқот институтлари ҳамда уларнинг тизимига кирувчи илмий-тажриба станциялари ва участкаларининг бино ва иншоотларини сақлаш, шунингдек, уларнинг ходимлари (илмий ходимлардан ташқари) меҳнатига ҳақ тўлаш бўйича харажатларни молиялаштириш Давлат бюджети маблағлари ҳисобидан амалга оширилиши белгиланганлиги маълумот учун қабул қилинсин.
3. Қуйидагилар Илмий-тажриба станциясининг асосий вазифалари этиб белгилансин:
сабзавот, полиз ва картошка экинларининг маҳаллий тупроқ-иқлим шароитларига мос, серҳосил, касаллик ва зараркунандаларга чидамли ҳамда сифат кўрсаткичлари юқори бўлган нав ва дурагайларини яратиш;
сабзавот, полиз ва картошка экинларининг бирламчи уруғчилигини ташкил этиш бўйича илмий-тадқиқот ишларини ривожлантириш;
сабзавот, полиз ва картошка экинларини етиштиришнинг замонавий ресурс тежайдиган технологияларини ишлаб чиқиш ва амалиётга жорий этиш;
илғор хорижий тажрибаларни қўллаган ҳолда сабзавот, полиз ва картошка экинларини етиштириш ва уларнинг ҳосилдорлигини ошириш бўйича илмий асосланган тавсиялар ишлаб чиқиш;
сабзавот, полиз ва картошкачилик соҳасида илмий ходимларни тайёрлаш, соҳада фаолият кўрсатаётган ходимларни қайта тайёрлаш ва уларнинг малакасини оширишни ташкил этиш.
4. Белгилансинки, Илмий-тажриба станцияни сақлаш билан боғлиқ харажатлар 2024 йилда Ўзбекистон Республикаси республика бюджетидан биринчи даражали бюджет маблағларини тақсимловчи сифатида Қишлоқ хўжалиги вазирлигига ажратиладиган маблағлар доирасида қопланади, 2025 йилдан бошлаб эса Ўзбекистон Республикаси Давлат бюджети параметрларида назарда тутилади.
5. Қуйидагилар Илмий-тажриба станциясининг фаолиятини молиялаштириш манбалари этиб белгилансин:
бино ва иншоотларни сақлаш, шунингдек, ходимлар (илмий ходимлардан ташқари) меҳнатига ҳақ тўлаш бўйича харажатларни молиялаштириш учун Давлат бюджети маблағлари;
илмий фаолиятга оид дастурларни амалга ошириш учун Ўзбекистон Республикаси Олий таълим, фан ва инновациялар вазирлиги томонидан ўтказиладиган танловлар натижалари бўйича ажратиладиган грантлар;
хўжалик фаолиятидан ҳамда шартнома асосида ўтказиладиган тадқиқотлардан тушадиган тушумлар;
халқаро молия институтлари ва бошқа хорижий ташкилотларнинг грантлари;
қонунчилик ҳужжатларида тақиқланмаган бошқа манбалар.
6. Қишлоқ хўжалиги вазирлиги икки ҳафта муддатда Илмий-тажриба станциясининг моддий-техник базасини мустаҳкамлашга оид чора-тадбирлар дастурини ишлаб чиқсин ва тасдиқласин.
7. Белгилансинки, Илмий-тажриба станцияси юридик шахс мақомига эга давлат муассасаси ҳисобланади ва фаолияти Институт томонидан мувофиқлаштирилиб борилади.
8. Ўзбекистон Республикаси Қишлоқ хўжалиги вазирлиги ҳузуридаги Қишлоқ хўжалигида билим ва инновациялар миллий маркази Институт билан биргаликда бир ҳафта муддатда Илмий-тажриба станциясининг уставини тасдиқласин ҳамда белгиланган тартибда давлат рўйхатидан ўтказишни таъминласин.
9. Жиззах вилояти ҳокимлиги Қишлоқ хўжалиги вазирлиги ва Давлат активларини бошқариш агентлиги билан биргаликда бир ой муддатда Зомин тумани ҳокимлигига тегишли бўш турган бинолардан Илмий-тажриба станциясига оператив бошқарув ҳуқуқи асосида бино ажратсин.
10. Вазирлар Маҳкамасининг «Ўзбекистон Республикаси Қишлоқ хўжалиги вазирлиги ҳузуридаги Қишлоқ хўжалигида билим ва инновациялар миллий маркази тизимидаги илмий ташкилотларнинг тузилмаларини тасдиқлаш тўғрисида» 2021 йил 24 сентябрдаги 601-сон қарорига иловага мувофиқ ўзгартиришлар киритилсин.
11. Мазкур қарорнинг бажарилишини назорат қилиш Ўзбекистон Республикаси қишлоқ хўжалиги вазири И.Ю. Абдурахмонов ҳамда Жиззах вилояти ҳокими Э.С. Салиев зиммасига юклансин.
Вазирлар Маҳкамасининг 2023 йил 29 декабрдаги 699-сон қарорига ИЛОВА
Вазирлар Маҳкамасининг «Ўзбекистон Республикаси Қишлоқ хўжалиги вазирлиги ҳузуридаги Қишлоқ хўжалигида билим ва инновациялар миллий маркази тизимидаги илмий ташкилотларнинг тузилмаларини тасдиқлаш тўғрисида» 2021 йил 24 сентябрдаги 601-сон қарорига киритилаётган ўзгартиришлар
3-иловада :
«Ўзбекистон-Венгрия картошкачилик илмий маркази***» блоки чиқариб ташлансин;
«6 та ҳудудий илмий-тажриба станциялари» блокидаги «6» рақами «9» рақами билан алмаштирилсин.
Ўзбекистон Республикасининг Бош вазири А. АРИПОВ
Тошкент ш.,
2023 йил 29 декабрь,
699-сон
Oʻzbekiston Respublikasi Vazirlar Mahkamasining
qarori
Sabzavot, poliz ekinlari va kartoshkachilik ilmiy-tadqiqot instituti faoliyatini yanada takomillashtirish toʻgʻrisida
Sabzavotchilik, polizchilik va kartoshkachilik boʻyicha ilmiy-tadqiqotlarni yanada rivojlantirish, hududlarning tabiiy-iqlim sharoitlariga mos, serhosil navlarini yaratish, birlamchi urugʻchilikni tashkil etish va mahsulot yetishtirishda ilmiy yondashuvni yanada jadallashtirish hamda Oʻzbekiston Respublikasi Prezidentining “Agrar sohada ilm-fan, taʼlim va ishlab chiqarishni integratsiya qilish orqali sifat va samaradorlikni oshirishning qoʻshimcha chora-tadbirlari toʻgʻrisida” 2023-yil 7-iyuldagi PQ-216-son qarori ijrosini taʼminlash maqsadida Vazirlar Mahkamasi qaror qiladi:
1. Oʻzbekiston Respublikasi Qishloq xoʻjaligi vazirligi hamda Jizzax viloyati hokimligining Qishloq xoʻjaligida bilim va innovatsiyalar milliy markazi tizimidagi Sabzavot, poliz ekinlari va kartoshkachilik ilmiy-tadqiqot institutining (keyingi oʻrinlarda — Institut) Zomin ilmiy-tajriba stansiyasini (keyingi oʻrinlarda — Ilmiy-tajriba stansiya) tashkil etish toʻgʻrisidagi taklifiga rozilik berilsin.
2. Oʻzbekiston Respublikasi Prezidentining “Qishloq xoʻjaligida bilim va innovatsiyalar tizimi hamda zamonaviy xizmatlar koʻrsatishni yanada rivojlantirish toʻgʻrisida” 2021-yil 3-fevraldagi PF-6159-son Farmoniga muvofiq ilmiy-tadqiqot institutlari hamda ularning tizimiga kiruvchi ilmiy-tajriba stansiyalari va uchastkalarining bino va inshootlarini saqlash, shuningdek, ularning xodimlari (ilmiy xodimlardan tashqari) mehnatiga haq toʻlash boʻyicha xarajatlarni moliyalashtirish Davlat budjeti mablagʻlari hisobidan amalga oshirilishi belgilanganligi maʼlumot uchun qabul qilinsin.
3. Quyidagilar Ilmiy-tajriba stansiyasining asosiy vazifalari etib belgilansin:
sabzavot, poliz va kartoshka ekinlarining mahalliy tuproq-iqlim sharoitlariga mos, serhosil, kasallik va zararkunandalarga chidamli hamda sifat koʻrsatkichlari yuqori boʻlgan nav va duragaylarini yaratish;
sabzavot, poliz va kartoshka ekinlarining birlamchi urugʻchiligini tashkil etish boʻyicha ilmiy-tadqiqot ishlarini rivojlantirish;
sabzavot, poliz va kartoshka ekinlarini yetishtirishning zamonaviy resurs tejaydigan texnologiyalarini ishlab chiqish va amaliyotga joriy etish;
ilgʻor xorijiy tajribalarni qoʻllagan holda sabzavot, poliz va kartoshka ekinlarini yetishtirish va ularning hosildorligini oshirish boʻyicha ilmiy asoslangan tavsiyalar ishlab chiqish;
sabzavot, poliz va kartoshkachilik sohasida ilmiy xodimlarni tayyorlash, sohada faoliyat koʻrsatayotgan xodimlarni qayta tayyorlash va ularning malakasini oshirishni tashkil etish.
4. Belgilansinki, Ilmiy-tajriba stansiyani saqlash bilan bogʻliq xarajatlar 2024-yilda Oʻzbekiston Respublikasi respublika budjetidan birinchi darajali budjet mablagʻlarini taqsimlovchi sifatida Qishloq xoʻjaligi vazirligiga ajratiladigan mablagʻlar doirasida qoplanadi, 2025-yildan boshlab esa Oʻzbekiston Respublikasi Davlat budjeti parametrlarida nazarda tutiladi.
5. Quyidagilar Ilmiy-tajriba stansiyasining faoliyatini moliyalashtirish manbalari etib belgilansin:
bino va inshootlarni saqlash, shuningdek, xodimlar (ilmiy xodimlardan tashqari) mehnatiga haq toʻlash boʻyicha xarajatlarni moliyalashtirish uchun Davlat budjeti mablagʻlari;
ilmiy faoliyatga oid dasturlarni amalga oshirish uchun Oʻzbekiston Respublikasi Oliy taʼlim, fan va innovatsiyalar vazirligi tomonidan oʻtkaziladigan tanlovlar natijalari boʻyicha ajratiladigan grantlar;
xoʻjalik faoliyatidan hamda shartnoma asosida oʻtkaziladigan tadqiqotlardan tushadigan tushumlar;
xalqaro moliya institutlari va boshqa xorijiy tashkilotlarning grantlari;
qonunchilik hujjatlarida taqiqlanmagan boshqa manbalar.
6. Qishloq xoʻjaligi vazirligi ikki hafta muddatda Ilmiy-tajriba stansiyasining moddiy-texnik bazasini mustahkamlashga oid chora-tadbirlar dasturini ishlab chiqsin va tasdiqlasin.
7. Belgilansinki, Ilmiy-tajriba stansiyasi yuridik shaxs maqomiga ega davlat muassasasi hisoblanadi va faoliyati Institut tomonidan muvofiqlashtirilib boriladi.
8. Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligida bilim va innovatsiyalar milliy markazi Institut bilan birgalikda bir hafta muddatda Ilmiy-tajriba stansiyasining ustavini tasdiqlasin hamda belgilangan tartibda davlat roʻyxatidan oʻtkazishni taʼminlasin.
9. Jizzax viloyati hokimligi Qishloq xoʻjaligi vazirligi va Davlat aktivlarini boshqarish agentligi bilan birgalikda bir oy muddatda Zomin tumani hokimligiga tegishli boʻsh turgan binolardan Ilmiy-tajriba stansiyasiga operativ boshqaruv huquqi asosida bino ajratsin.
10. Vazirlar Mahkamasining “Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligida bilim va innovatsiyalar milliy markazi tizimidagi ilmiy tashkilotlarning tuzilmalarini tasdiqlash toʻgʻrisida” 2021-yil 24-sentabrdagi 601-son qaroriga ilovaga muvofiq oʻzgartirishlar kiritilsin.
11. Mazkur qarorning bajarilishini nazorat qilish Oʻzbekiston Respublikasi qishloq xoʻjaligi vaziri I.Y. Abduraxmonov hamda Jizzax viloyati hokimi E.S. Saliyev zimmasiga yuklansin.
Vazirlar Mahkamasining 2023-yil 29-dekabrdagi 699-son qaroriga ILOVA
Vazirlar Mahkamasining “Oʻzbekiston Respublikasi Qishloq xoʻjaligi vazirligi huzuridagi Qishloq xoʻjaligida bilim va innovatsiyalar milliy markazi tizimidagi ilmiy tashkilotlarning tuzilmalarini tasdiqlash toʻgʻrisida” 2021-yil 24-sentabrdagi 601-son qaroriga kiritilayotgan oʻzgartirishlar
3-ilovada :
“Oʻzbekiston-Vengriya kartoshkachilik ilmiy markazi***” bloki chiqarib tashlansin;
“6 ta hududiy ilmiy-tajriba stansiyalari” blokidagi “6” raqami “9” raqami bilan almashtirilsin.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 29-dekabr,
699-son