📅 2023-yil 29-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 29 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 29 декабря 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 29 December 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Фитосанитария талаблари енгиллаштирилиши муносабати билан Вазирлар Маҳкамасининг «Ўзбекистон Республикаси ҳудудини ўсимликлар карантинидаги зарарли организмлардан ҳимоя қилиш ва ўсимликлар карантини соҳасида рухсат бериш тартиб-таомилларидан ўтиш тартиби тўғрисидаги низомларни тасдиқлаш ҳақида» 2018 йил 29 январдаги 65-сон қарорига ўзгартиришлар киритиш тўғрисида
Кейинги йилларда ўсимликларни зарарли организмлардан ишончли ҳимоя қилиш соҳасида давлат бошқарувини такомиллаштириш, ўсимликлар карантини тизимини янги босқичга кўтариш, фитосанитар ва озиқ-овқат хавфсизлигини таъминлаш, тадбиркорлик субъектларини қўллаб-қувватлаш, ўсимликлар карантини соҳасида хизматлар сифатини халқаро стандартларга мувофиқлаштириш борасида тизимли чора-тадбирлар амалга оширилмоқда.
Шу билан бирга, ички бозорларда аҳолининг истеъмол талаби юқори бўлган асосий турдаги озиқ-овқат маҳсулотларининг нарх-навоси барқарорлигини сақлаш учун импорт ҳисобидан қопланадиган ҳамда халқаро амалиётда фитосанитария сертификати талаб этилмайдиган маҳсулотларни Ўзбекистон Республикаси ҳудудига олиб кириш бўйича фитосанитария талабларини соддалаштириш ва халқаро амалиётга мувофиқлаштириш зарурати юзага келмоқда.
Ўзбекистон Республикаси Президентининг «Ўзбекистон Республикаси Президентининг тадбиркорлар билан 2023 йилдаги очиқ мулоқотида белгиланган вазифаларни амалга ошириш чора-тадбирлари тўғрисида» 2023 йил 4 сентябрдаги ПҚ-292-сон қарори ижросини таъминлаш, шунингдек, фитосанитария талабларини енгиллаштириш орқали аҳолининг истеъмол талаби юқори бўлган асосий турдаги озиқ-овқат маҳсулотларининг нарх-навоси барқарорлигини сақлаш мақсадида Вазирлар Маҳкамаси қарор қилади:
1. Фитосанитария талаблари енгиллаштирилиши муносабати билан Вазирлар Маҳкамасининг 2018 йил 29 январдаги 65-сон қарори билан тасдиқланган Ўзбекистон Республикаси ҳудудини ўсимликлар карантинидаги зарарли организмлардан ҳимоя қилиш тартиби тўғрисидаги низомнинг 7-банди қуйидаги таҳрирда баён этилсин:
«7. Ўзбекистон Республикаси ҳудудига ўсимликлар карантини назоратидаги маҳсулотларни олиб киришга Ўзбекистон Республикаси Қишлоқ хўжалиги вазирлиги ҳузуридаги Ўсимликлар карантини ва ҳимояси агентлиги (кейинги ўринларда — Агентлик) томонидан берилган карантин рухсатномаси ҳамда экспорт қилувчи мамлакатнинг ваколатли давлат органлари томонидан бериладиган фитосанитар сертификати ёки гувоҳномаси бўлган тақдирдагина рухсат берилади.
Қуйидаги ҳолларда ўсимликлар карантини назоратидаги маҳсулотларни Ўзбекистон Республикаси ҳудудига олиб киришга фақат Агентлик томонидан ҳар бир партияга алоҳида ҳолда бериладиган карантин рухсатномаси бўлган тақдирда йўл қўйилади:
экспорт қилувчи мамлакатда ваколатли давлат органлари мавжуд бўлмаса;
экспорт қилувчи мамлакатда фитосанитария сертификати (гувоҳномаси) талаб этилмайдиган, шунингдек, Ўзбекистон Республикаси ҳудудига олиб кириладиган ва унинг ташқарисига олиб чиқиладиган ўсимликлар карантини назоратидаги маҳсулотлар рўйхатига киритилган фитосанитар хавфи паст бўлган карантин остидаги маҳсулотларга».
2. Ўзбекистон Республикаси Қишлоқ хўжалиги вазирлиги манфаатдор вазирликлар ва идоралар билан биргаликда бир ой муддатда ўзлари қабул қилган норматив-ҳуқуқий ҳужжатларни ушбу қарорга мувофиқлаштирсин.
3. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев ва Ўзбекистон Республикаси қишлоқ хўжалиги вазири И.Ю. Абдурахмонов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2023 йил 29 декабрь,
707-сон
Oʻzbekiston Respublikasi Vazirlar Mahkamasining
qarori
Fitosanitariya talablari yengillashtirilishi munosabati bilan Vazirlar Mahkamasining “Oʻzbekiston Respublikasi hududini oʻsimliklar karantinidagi zararli organizmlardan himoya qilish va oʻsimliklar karantini sohasida ruxsat berish tartib-taomillaridan oʻtish tartibi toʻgʻrisidagi nizomlarni tasdiqlash haqida” 2018-yil 29-yanvardagi 65-son qaroriga oʻzgartirishlar kiritish toʻgʻrisida
Keyingi yillarda oʻsimliklarni zararli organizmlardan ishonchli himoya qilish sohasida davlat boshqaruvini takomillashtirish, oʻsimliklar karantini tizimini yangi bosqichga koʻtarish, fitosanitar va oziq-ovqat xavfsizligini taʼminlash, tadbirkorlik subyektlarini qoʻllab-quvvatlash, oʻsimliklar karantini sohasida xizmatlar sifatini xalqaro standartlarga muvofiqlashtirish borasida tizimli chora-tadbirlar amalga oshirilmoqda.
Shu bilan birga, ichki bozorlarda aholining isteʼmol talabi yuqori boʻlgan asosiy turdagi oziq-ovqat mahsulotlarining narx-navosi barqarorligini saqlash uchun import hisobidan qoplanadigan hamda xalqaro amaliyotda fitosanitariya sertifikati talab etilmaydigan mahsulotlarni Oʻzbekiston Respublikasi hududiga olib kirish boʻyicha fitosanitariya talablarini soddalashtirish va xalqaro amaliyotga muvofiqlashtirish zarurati yuzaga kelmoqda.
Oʻzbekiston Respublikasi Prezidentining “Oʻzbekiston Respublikasi Prezidentining tadbirkorlar bilan 2023-yildagi ochiq muloqotida belgilangan vazifalarni amalga oshirish chora-tadbirlari toʻgʻrisida” 2023-yil 4-sentabrdagi PQ-292-son qarori ijrosini taʼminlash, shuningdek, fitosanitariya talablarini yengillashtirish orqali aholining isteʼmol talabi yuqori boʻlgan asosiy turdagi oziq-ovqat mahsulotlarining narx-navosi barqarorligini saqlash maqsadida Vazirlar Mahkamasi qaror qiladi:
1. Fitosanitariya talablari yengillashtirilishi munosabati bilan Vazirlar Mahkamasining 2018-yil 29-yanvardagi 65-son qarori bilan tasdiqlangan Oʻzbekiston Respublikasi hududini oʻsimliklar karantinidagi zararli organizmlardan himoya qilish tartibi toʻgʻrisidagi nizomning 7-bandi quyidagi tahrirda bayon etilsin:
“7. Oʻzbekiston Respublikasi hududiga oʻsimliklar karantini nazoratidagi mahsulotlarni olib kirishga Oʻzbekiston Respublikasi Qishloq xoʻjaligi vazirligi huzuridagi Oʻsimliklar karantini va himoyasi agentligi (keyingi oʻrinlarda — Agentlik) tomonidan berilgan karantin ruxsatnomasi hamda eksport qiluvchi mamlakatning vakolatli davlat organlari tomonidan beriladigan fitosanitar sertifikati yoki guvohnomasi boʻlgan taqdirdagina ruxsat beriladi.
Quyidagi hollarda oʻsimliklar karantini nazoratidagi mahsulotlarni Oʻzbekiston Respublikasi hududiga olib kirishga faqat Agentlik tomonidan har bir partiyaga alohida holda beriladigan karantin ruxsatnomasi boʻlgan taqdirda yoʻl qoʻyiladi:
eksport qiluvchi mamlakatda vakolatli davlat organlari mavjud boʻlmasa;
eksport qiluvchi mamlakatda fitosanitariya sertifikati (guvohnomasi) talab etilmaydigan, shuningdek, Oʻzbekiston Respublikasi hududiga olib kiriladigan va uning tashqarisiga olib chiqiladigan oʻsimliklar karantini nazoratidagi mahsulotlar roʻyxatiga kiritilgan fitosanitar xavfi past boʻlgan karantin ostidagi mahsulotlarga”.
2. Oʻzbekiston Respublikasi Qishloq xoʻjaligi vazirligi manfaatdor vazirliklar va idoralar bilan birgalikda bir oy muddatda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.
3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev va Oʻzbekiston Respublikasi qishloq xoʻjaligi vaziri I.Y. Abduraxmonov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 29-dekabr,
707-son