📅 2023-yil 29-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2023 йил 29 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 29 декабря 2023 г. · Постановления Кабинета Министров
Официальный текст. Официальный документ. Редакционные примечания не включены.
📅 29 December 2023 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Вазирлар Маҳкамасининг 2019 йил 15 июлдаги 589-сон қарори билан тасдиқланган Дастурий маҳсулотлар ва ахборот технологиялари технологик парки фаолиятини ташкил этиш тартиби тўғрисидаги низомга ўзгартириш ва қўшимчалар киритиш тўғрисида
Республикамизда кейинги йилларда амалга оширилаётган кенг кўламли ислоҳотлар доирасида ахборот технологиялари соҳасини ва дастурий маҳсулотлар ишлаб чиқаришни янада ривожлантириш учун қулай шарт-шароитлар яратилди, шунингдек, ушбу соҳадаги стартап-лойиҳаларни ҳар томонлама қўллаб-қувватлаш, ички ва ташқи бозорларда дастурий ҳамда юқори технологияли маҳсулотлар ва хизматларни тарғиб қилишга қаратилган устувор вазифалар белгилаб берилди.
Шу билан бирга, ушбу вазифаларни амалга ошириш доирасида Дастурий маҳсулотлар ва ахборот технологиялари технологик парки (кейинги ўринларда — IT-парк) резидентлари томонидан амалга оширишга рухсат этилган фаолият турлари рўйхатини кенгайтириш зарурати юзага келмоқда.
Ўзбекистон Республикаси Президентининг « 2022 — 2026 йилларга мўлжалланган Янги Ўзбекистоннинг тараққиёт стратегиясини «Инсонга эътибор ва сифатли таълим йили»да амалга оширишга оид давлат дастури тўғрисида » 2023 йил 28 февралдаги ПФ-27-сон ва « Маъмурий ислоҳотлар доирасида рақамли технологиялар соҳасида давлат бошқарувини самарали ташкил этиш чора-тадбирлари тўғрисида » 2023 йил 24 майдаги ПФ-76-сон фармонлари ижросини таъминлаш, шунингдек, IT-парк резидентларига қўшимча шарт-шароитлар яратиш мақсадида Вазирлар Маҳкамаси қарор қилади:
1. Ўзбекистон Республикаси Президентининг « 2022 — 2026 йилларга мўлжалланган Янги Ўзбекистоннинг тараққиёт стратегиясини «Инсонга эътибор ва сифатли таълим йили»да амалга оширишга оид давлат дастури тўғрисида » 2023 йил 28 февралдаги ПФ-27-сон ҳамда « Маъмурий ислоҳотлар доирасида рақамли технологиялар соҳасида давлат бошқарувини самарали ташкил этиш чора-тадбирлари тўғрисида » 2023 йил 24 майдаги ПФ-76-сон фармонлари билан IT-парк резидентлари томонидан амалга оширилиши мумкин бўлган фаолият турларини кенгайтириш белгиланганлиги маълумот учун қабул қилинсин.
2. Вазирлар Маҳкамасининг 2019 йил 15 июлдаги 589-сон қарори билан тасдиқланган Дастурий маҳсулотлар ва ахборот технологиялари технологик парки фаолиятини ташкил этиш тартиби тўғрисидаги низомга иловага мувофиқ қуйидагиларни назарда тутувчи ўзгартириш ва қўшимчалар киритилсин:
IT-парк резидентлари томонидан амалга оширилиши мумкин бўлган фаолият турларини кенгайтириш;
IT-парк резидентлари томонидан амалга оширилиши мумкин бўлган фаолият турларини кенгайтирилиши муносабати билан IT-парк резиденти мақомини олиш ва ундан маҳрум қилишнинг қўшимча асосларини белгилаш.
3. Мазкур қарорнинг бажарилишини назорат қилиш Ўзбекистон Республикаси рақамли технологиялар вазири Ш.Х. Шерматов зиммасига юклансин.
Вазирлар Маҳкамасининг 2023 йил 29 декабрдаги 698-сон қарорига ИЛОВА
Вазирлар Маҳкамасининг 2019 йил 15 июлдаги 589-сон қарори билан тасдиқланган Дастурий маҳсулотлар ва ахборот технологиялари технологик парки фаолиятини ташкил этиш тартиби тўғрисидаги низомга киритилаётган ўзгартириш ва қўшимчалар
1. 2-бандда :
қуйидаги мазмундаги ўн олтинчи хатбоши билан тўлдирилсин:
«Эксперт кенгаши — Технопарк резиденти мақомини олиш учун талабгорлик қилувчи юридик шахсларнинг бизнес режаларини кўриб чиқиш ва таҳлил қилиш мақсадида Дирекцияда вазирликлар ва идораларнинг малакали мутахассислари ҳамда бошқа мутахассислардан иборат таркибда ташкил этиладиган орган. Эксперт кенгашининг иш тартиби Дирекция томонидан белгиланади;»
ўн олтинчи-ўн еттинчи хатбошилар тегишлича ўн еттинчи-ўн саккизинчи хатбошилар деб ҳисоблансин;
2. 4-банд қуйидаги таҳрирда баён этилсин:
«4. Дирекцияга «Масъулияти чекланган ҳамда қўшимча масъулиятли жамиятлар тўғрисида»ги Ўзбекистон Республикаси Қонунининг 39-моддасида белгиланган тартибда лавозимга тайинланадиган Бош директор раҳбарлик қилади.
Бош директорнинг ваколатлари Дирекция уставида белгиланади.
Бош директор Дирекцияга юкланган функциялар ва вазифалар амалга оширилиши учун шахсан жавоб беради ва Рақамли технологиялар вазирлигининг сўрови бўйича Технопарк ва Дирекция фаолияти тўғрисида ҳисобот тақдим қилади.»;
3. 9-банд қуйидаги мазмундаги «д» ва «е» кичик бандлар билан тўлдирилсин:
«д) ахборот технологиялари соҳасидаги лойиҳаларни венчур молиялаштириш ҳамда акселерация дастурларини амалга ошириш фаолияти учун Технопарк резиденти мақомини олиш мақсадида ариза берган юридик шахслар Технопарк ҳудуди ёки Дирекция филиалларининг юридик манзилида рўйхатдан ўтган ва ушбу манзилда жойлашган бўлиши;
е) киберспорт соҳасида хизмат кўрсатиш учун Технопарк резиденти мақомини олиш мақсадида ариза берган юридик шахслар Дирекция томонидан тасдиқланадиган рўйхат бўйича халқаро сертификатга эга бўлиши.»;
4. 14-банднинг олтинчи хатбошисидаги «, ариза берувчига ушбу қарордан кўчирма тақдим этилади» сўзлари «ва веб-портал орқали ариза берувчи хабардор қилинади.» сўзлари билан алмаштирилсин;
5. 18-бандда :
тўртинчи хатбошидаги «солиқ ҳисоботи нусхаларини» сўзлари «солиқ ҳисоботини» сўзлари билан алмаштирилсин;
6. 21-бандда :
қуйидаги мазмундаги ўн биринчи хатбоши билан тўлдирилсин:
«венчур молиялаштириш ва акселерация дастурларини амалга ошириш фаолияти билан шуғулланаётган Технопарк резидентлари Технопарк ва унинг филиалларидан рўйхатдан ўтган юридик манзилини бошқа манзилга ўзгартирганда;»;
ўн биринчи хатбоши ўн иккинчи хатбоши деб ҳисоблансин;
7. 2-илова қуйидаги мазмундаги 19 — 22-бандлар билан тўлдирилсин:
«19. Мультимедиа ва дизайн соҳасида (веб-дизайн, графика дизайни, компьютер ўйинлари дизайни, вектор графикаси, 3D-графика, визуаллаштирувчи дизайн, интерфейс дизайни, техник дизайн, моушн-дизайн) хизмат кўрсатиш;
20. Дастурий таъминотдан фойдаланган ҳолда мультипликация маҳсулотларини ишлаб чиқариш;
21. Ахборот технологиялари соҳасидаги лойиҳаларни венчур молиялаштириш ҳамда акселерация дастурларини амалга ошириш фаолияти;
22. Киберспорт соҳасида хизмат кўрсатиш.».
Ўзбекистон Республикасининг Бош вазири А. АРИПОВ
Тошкент ш.,
2023 йил 29 декабрь,
698-сон
Oʻzbekiston Respublikasi Vazirlar Mahkamasining
qarori
Vazirlar Mahkamasining 2019-yil 15-iyuldagi 589-son qarori bilan tasdiqlangan Dasturiy mahsulotlar va axborot texnologiyalari texnologik parki faoliyatini tashkil etish tartibi toʻgʻrisidagi nizomga oʻzgartirish va qoʻshimchalar kiritish toʻgʻrisida
Respublikamizda keyingi yillarda amalga oshirilayotgan keng koʻlamli islohotlar doirasida axborot texnologiyalari sohasini va dasturiy mahsulotlar ishlab chiqarishni yanada rivojlantirish uchun qulay shart-sharoitlar yaratildi, shuningdek, ushbu sohadagi startap-loyihalarni har tomonlama qoʻllab-quvvatlash, ichki va tashqi bozorlarda dasturiy hamda yuqori texnologiyali mahsulotlar va xizmatlarni targʻib qilishga qaratilgan ustuvor vazifalar belgilab berildi.
Shu bilan birga, ushbu vazifalarni amalga oshirish doirasida Dasturiy mahsulotlar va axborot texnologiyalari texnologik parki (keyingi oʻrinlarda — IT-park) rezidentlari tomonidan amalga oshirishga ruxsat etilgan faoliyat turlari roʻyxatini kengaytirish zarurati yuzaga kelmoqda.
Oʻzbekiston Respublikasi Prezidentining “ 2022 — 2026-yillarga moʻljallangan Yangi Oʻzbekistonning taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturi toʻgʻrisida ” 2023-yil 28-fevraldagi PF-27-son va “ Maʼmuriy islohotlar doirasida raqamli texnologiyalar sohasida davlat boshqaruvini samarali tashkil etish chora-tadbirlari toʻgʻrisida ” 2023-yil 24-maydagi PF-76-son farmonlari ijrosini taʼminlash, shuningdek, IT-park rezidentlariga qoʻshimcha shart-sharoitlar yaratish maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining “ 2022 — 2026-yillarga moʻljallangan Yangi Oʻzbekistonning taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturi toʻgʻrisida ” 2023-yil 28-fevraldagi PF-27-son hamda “ Maʼmuriy islohotlar doirasida raqamli texnologiyalar sohasida davlat boshqaruvini samarali tashkil etish chora-tadbirlari toʻgʻrisida ” 2023-yil 24-maydagi PF-76-son farmonlari bilan IT-park rezidentlari tomonidan amalga oshirilishi mumkin boʻlgan faoliyat turlarini kengaytirish belgilanganligi maʼlumot uchun qabul qilinsin.
2. Vazirlar Mahkamasining 2019-yil 15-iyuldagi 589-son qarori bilan tasdiqlangan Dasturiy mahsulotlar va axborot texnologiyalari texnologik parki faoliyatini tashkil etish tartibi toʻgʻrisidagi nizomga ilovaga muvofiq quyidagilarni nazarda tutuvchi oʻzgartirish va qoʻshimchalar kiritilsin:
IT-park rezidentlari tomonidan amalga oshirilishi mumkin boʻlgan faoliyat turlarini kengaytirish;
IT-park rezidentlari tomonidan amalga oshirilishi mumkin boʻlgan faoliyat turlarini kengaytirilishi munosabati bilan IT-park rezidenti maqomini olish va undan mahrum qilishning qoʻshimcha asoslarini belgilash.
3. Mazkur qarorning bajarilishini nazorat qilish Oʻzbekiston Respublikasi raqamli texnologiyalar vaziri Sh.X. Shermatov zimmasiga yuklansin.
Vazirlar Mahkamasining 2023-yil 29-dekabrdagi 698-son qaroriga ILOVA
Vazirlar Mahkamasining 2019-yil 15-iyuldagi 589-son qarori bilan tasdiqlangan Dasturiy mahsulotlar va axborot texnologiyalari texnologik parki faoliyatini tashkil etish tartibi toʻgʻrisidagi nizomga kiritilayotgan oʻzgartirish va qoʻshimchalar
1. 2-bandda :
quyidagi mazmundagi oʻn oltinchi xatboshi bilan toʻldirilsin:
“Ekspert kengashi — Texnopark rezidenti maqomini olish uchun talabgorlik qiluvchi yuridik shaxslarning biznes rejalarini koʻrib chiqish va tahlil qilish maqsadida Direksiyada vazirliklar va idoralarning malakali mutaxassislari hamda boshqa mutaxassislardan iborat tarkibda tashkil etiladigan organ. Ekspert kengashining ish tartibi Direksiya tomonidan belgilanadi;”
oʻn oltinchi-oʻn yettinchi xatboshilar tegishlicha oʻn yettinchi-oʻn sakkizinchi xatboshilar deb hisoblansin;
2. 4-band quyidagi tahrirda bayon etilsin:
“4. Direksiyaga “Masʼuliyati cheklangan hamda qoʻshimcha masʼuliyatli jamiyatlar toʻgʻrisida”gi Oʻzbekiston Respublikasi Qonunining 39-moddasida belgilangan tartibda lavozimga tayinlanadigan Bosh direktor rahbarlik qiladi.
Bosh direktorning vakolatlari Direksiya ustavida belgilanadi.
Bosh direktor Direksiyaga yuklangan funksiyalar va vazifalar amalga oshirilishi uchun shaxsan javob beradi va Raqamli texnologiyalar vazirligining soʻrovi boʻyicha Texnopark va Direksiya faoliyati toʻgʻrisida hisobot taqdim qiladi.”;
3. 9-band quyidagi mazmundagi “d” va “e” kichik bandlar bilan toʻldirilsin:
“d) axborot texnologiyalari sohasidagi loyihalarni venchur moliyalashtirish hamda akseleratsiya dasturlarini amalga oshirish faoliyati uchun Texnopark rezidenti maqomini olish maqsadida ariza bergan yuridik shaxslar Texnopark hududi yoki Direksiya filiallarining yuridik manzilida roʻyxatdan oʻtgan va ushbu manzilda joylashgan boʻlishi;
e) kibersport sohasida xizmat koʻrsatish uchun Texnopark rezidenti maqomini olish maqsadida ariza bergan yuridik shaxslar Direksiya tomonidan tasdiqlanadigan roʻyxat boʻyicha xalqaro sertifikatga ega boʻlishi.”;
4. 14-bandning oltinchi xatboshisidagi “, ariza beruvchiga ushbu qarordan koʻchirma taqdim etiladi” soʻzlari “va veb-portal orqali ariza beruvchi xabardor qilinadi.” soʻzlari bilan almashtirilsin;
5. 18-bandda :
toʻrtinchi xatboshidagi “soliq hisoboti nusxalarini” soʻzlari “soliq hisobotini” soʻzlari bilan almashtirilsin;
6. 21-bandda :
quyidagi mazmundagi oʻn birinchi xatboshi bilan toʻldirilsin:
“venchur moliyalashtirish va akseleratsiya dasturlarini amalga oshirish faoliyati bilan shugʻullanayotgan Texnopark rezidentlari Texnopark va uning filiallaridan roʻyxatdan oʻtgan yuridik manzilini boshqa manzilga oʻzgartirganda;”;
oʻn birinchi xatboshi oʻn ikkinchi xatboshi deb hisoblansin;
7. 2-ilova quyidagi mazmundagi 19 — 22-bandlar bilan toʻldirilsin:
“19. Multimedia va dizayn sohasida (veb-dizayn, grafika dizayni, kompyuter oʻyinlari dizayni, vektor grafikasi, 3D-grafika, vizuallashtiruvchi dizayn, interfeys dizayni, texnik dizayn, moushn-dizayn) xizmat koʻrsatish;
20. Dasturiy taʼminotdan foydalangan holda multiplikatsiya mahsulotlarini ishlab chiqarish;
21. Axborot texnologiyalari sohasidagi loyihalarni venchur moliyalashtirish hamda akseleratsiya dasturlarini amalga oshirish faoliyati;
22. Kibersport sohasida xizmat koʻrsatish.”.
Oʻzbekiston Respublikasining Bosh vaziri A. ARIPOV
Toshkent sh.,
2023-yil 29-dekabr,
698-son