UzbekAI

Ўзбекистон Республикаси Вазирлар Маҳкамасининг

қарори

НИЗОМ

СХЕМАСИ

САВОЛНОМАСИ

НАМУНАВИЙ ТАРКИБИ

«Кичик бизнесни узлуксиз қўллаб-қувватлаш» комплекс дастурини амалга ошириш чора-тадбирлари тўғрисида

Ўзбекистон Республикаси Президентининг « Ўзбекистон Республикаси Президентининг тадбиркорлар билан 2023 йилдаги очиқ мулоқотида белгиланган вазифаларни амалга ошириш чора-тадбирлари тўғрисида » 2023 йил 4 сентябрдаги ПҚ-292-сон ҳамда « Кичик бизнесни ривожлантиришни молиявий ва институционал қўллаб-қувватлаш чора-тадбирлари тўғрисида » 2023 йил 14 сентябрдаги ПҚ-306-сон қарорлари ижросини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Кичик бизнесни ривожлантиришни молиявий ва институционал қўллаб-қувватлаш чора-тадбирлари тўғрисида» 2023 йил 14 сентябрдаги ПҚ-306-сон қарорига мувофиқ:

«Кичик бизнесни узлуксиз қўллаб-қувватлаш» комплекс дастури (кейинги ўринларда — Дастур) амалга оширилиши;

ташаббускорлар қисқа ва ўрта муддатли амалий ўқув курсларда бизнес кўникмаларига ўқитилиши;

амалий ўқув курсларини муваффақиятли тугатиб, сертификат олган ташаббускорлар Дастур доирасида молиявий ва консультатив қўллаб-қувватланиши;

«Бизнесни ривожлантириш банки» АТБ Дастурни самарали амалга ошириш ва доимий равишда такомиллаштириб бориш бўйича асосий таянч банк этиб белгиланганлиги маълумот учун қабул қилинсин.

2. Қуйидагиларни назарда тутувчи «Кичик бизнесни узлуксиз қўллаб-қувватлаш» комплекс дастури ташаббускорларини танлаш, уларнинг лойиҳаларини қўллаб-қувватлаш ва молиялаштириш тўғрисидаги низом 1-иловага мувофиқ тасдиқлансин:

Дастур иштирокчиларини танлаб олиш тартиби;

Кичик бизнесга кўмаклашиш марказлари томонидан ўқитиш жараёнини ташкил этиш;

молиявий қўллаб-қувватлаш воситаларидан фойдаланиш йўналишлари ва тартиби;

ташаббускорларга консультатив хизматлар кўрсатиш тартиби.

3. Белгилансинки:

Вазирлар Маҳкамаси ҳузуридаги Бизнес ва тадбиркорлик олий мактаби Дастур доирасида ўқув жараёнларини ташкил этиш, ўқув дастурларини замонавий ёндашувлар асосида ишлаб чиқиш, ўқитиш бўйича тренерларни танлаш ва Кичик бизнесга кўмаклашиш марказларининг (кейинги ўринларда — марказлар) раҳбар ва ходимлари малакасини оширишга масъул ҳисобланади;

марказлар ўқув жараёнларини Бизнес ва тадбиркорлик олий мактаби, унинг ҳудудий филиаллари, олий таълим муассасалари, «Ишга марҳамат» мономарказлари, касб-ҳунарга ўқитиш марказлари, саноат корхоналари, эркин иқтисодий зоналари ва кичик саноат зоналари, технопарклар ҳамда саноат кластерлари билан ўзаро ҳамкорликда амалга оширади;

Дастурда иштирок этадиган тижорат банклари томонидан амалий ўқув курсларини муваффақиятли тугатиб, сертификат олган ташаббускорлар лойиҳалари мазкур қарорга 1-иловага мувофиқ тартибда молиялаштирилади;

Дастурда иштирок этиш, молиявий ва консультатив қўллаб-қувватлаш воситаларидан фойдаланиш борасидаги барча жараёнлар, шу жумладан, тижорат банклари томонидан соддалаштирилган тартибда қарор қабул қилиш, кредит шартномаларини расмийлаштириш ва лойиҳаларни мониторинг қилиш Бизнес портал орқали амалга оширилади.

4. Иқтисодиёт ва молия вазирлиги ҳамда тижорат банкларининг қуйидаги таклифларига розилик берилсин:

а) «Бизнесни ривожлантириш банки» АТБга жойлаштирилган:

223 млрд сўм миқдоридаги субординар қарзнинг асосий қарз тўловини 2030 йилдан бошлаб 5 йил давомида тенг улушларда қайтариш;

320,9 млрд сўм миқдоридаги кредит линияси маблағларини қайтаришнинг сўнгги муддатини ўзгартирмаган ҳолда, асосий қарз тўловини 2030 йилдан бошлаб тенг улушларда тўлаб бериш шарти билан субординар қарз сифатида қайта расмийлаштириш;

б) «Микрокредитбанк» АТБга 977 млрд сўм миқдоридаги ресурс жойлаштириш мақсадида тузилган кредит ва депозит шартномалари бўйича қолдиқ суммасини шартномаларнинг дастлабки шартларини ўзгаришсиз қолдирган ҳолда субординар қарз сифатида қайта расмийлаштириш;

в) «Ҳар бир оила — тадбиркор» дастури доирасида «Микрокредитбанк» АТБга жойлаштирилган 425 млрд сўм миқдоридаги депозит маблағларни қайтариш муддатини 7 йилга узайтириш.

Бунда мазкур банднинг «а» ва «б» кичик бандларида назарда тутилган маблағлар Дастур доирасидаги лойиҳаларни молиялаштиришга йўналтирилади.

Иқтисодиёт ва молия вазирлиги икки ҳафта муддатда тегишли шартномаларга ушбу банддан келиб чиқиб ўзгартириш ва қўшимчалар киритилишини таъминласин.

6. 2024 йил 1 февралдан бошлаб шундай тартиб ўрнатилсинки, унга кўра:

Солиқ қўмитаси Бизнес порталдаги маълумотлар асосида Дастур доирасида молиявий қўллаб-қувватлаш воситаларидан фойдаланишни бошлаган кичик тадбиркорлик субъектлари тўлаган солиқ суммасининг икки йил давомида алоҳида ҳисобини юритади ҳамда Иқтисодиёт ва молия вазирлигига ҳар ойда маълумот тақдим этиб боради;

Иқтисодиёт ва молия вазирлиги ҳар ярим йиллик якунлари бўйича Солиқ қўмитаси маълумотлари асосида мазкур тадбиркорлик субъектлари томонидан тўланган солиқлар ҳажмига тенг миқдорда «Бизнесни ривожлантириш банки» АТБга фоизсиз бюджет ссудаси ажратади.

7. «Бизнесни ривожлантириш банки» АТБ:

икки ой муддатда халқаро молия институтлари, консалтинг компаниялари ва экспертларни жалб этган ҳолда банкнинг активлари, операцион ва бизнес жараёнларини тўлиқ хатловдан ўтказиб, самарасиз харажатларни қисқартириш ва банк ташкилий тузилмасини оптималлаштириш чора-тадбирларини;

2024 йил 1 апрелга қадар 2024 — 2026 йилларда банкни ривожлантириш ва рақамли трансформация қилиш стратегиясини тасдиқласин.

8. Ўзбекистон Республикаси Президентининг «Кичик бизнесни ривожлантиришни молиявий ва институционал қўллаб-қувватлаш чора-тадбирлари тўғрисида» 2023 йил 14 сентябрдаги ПҚ-306-сон қарорига мувофиқ «Бизнесни ривожлантириш банки» АТБнинг 1,14 трлн сўмлик қўшимча акцияларни чиқариш тўғрисидаги қарори Истиқболли лойиҳалар миллий агентлигида давлат рўйхатидан ўтказилганлиги маълумот учун қабул қилинсин.

Истиқболли лойиҳалар миллий агентлигига Иқтисодиёт ва молия вазирлиги билан биргаликда бир ой муддатда Тикланиш ва тараққиёт жамғармаси томонидан «Бизнесни ривожлантириш банки» АТБ устав капиталини ошириш учун ажратилган 75,0 млн АҚШ доллари миқдоридаги маблағлар ҳисобидан «Бизнесни ривожлантириш банки» АТБнинг қўшимча акциялар чиқариш тўғрисидаги қарорига тегишли ўзгартириш ва қўшимчалар киритилиши муносабати билан уни давлат рўйхатидан ўтказиш тавсия этилсин.

9. «Микрокредитбанк» АТБ ҳамда Камбағалликни қисқартириш ва бандлик вазирлигининг:

аҳолини касб-ҳунарга ўқитиш ва малакасини ошириш, касаначиларга комплекс ёрдам бериш, касаначилар ва фаолиятини касаначилик асосида ташкил этмоқчи бўлган тадбиркорлик субъектларига бепул маслаҳат, консальтинг хизматларини кўрсатишга ихтисослашган «Касаначилар мактаби»ни ташкил этиш;

тажрибали касаначиларни «Касаначилар мактаби»да муассис сифатида иштирок этишга жалб қилиш;

ҳар йили оилавий тадбиркорликни ривожлантириш дастурлари доирасида «Микрокредитбанк» АТБга ажратилган ресурсларнинг камида 100 млрд сўм қисмини касаначилик лойиҳаларини молиялаштиришга йўналтириш тўғрисидаги таклифларига розилик берилсин.

10. Камбағалликни қисқартириш ва бандлик вазирлиги:

«Микрокредитбанк» АТБга «Касаначилар мактаби» фаолиятини ташкил этиш ва ўқув дастурларини ишлаб чиқишга услубий кўмаклашсин;

«Касаначилар мактаби»да ишсиз ва банд бўлмаган фуқароларни ўқитиш, касаначиларга асбоб-ускуналар ва хом ашё харид қилиш харажатлари белгиланган тартибда Камбағалликни қисқартириш давлат мақсадли жамғармаси маблағлари ҳисобидан қоплаб берилишини таъминласин.

11. Вазирлар Маҳкамасининг 2022 йил 22 февралдаги 86-сон қарори билан тасдиқланган Махсус электрон тизим орқали рухсат этиш хусусиятига эга айрим ҳужжатларни бериш тартиб-таомиллари тўғрисидаги ягона низомга 2-иловага мувофиқ ўзгартириш ва қўшимчалар киритилсин.

12. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров зиммасига юклансин.

Вазирлар Маҳкамасининг 2024 йил 20 январдаги 37-сон қарорига 1-ИЛОВА

«Кичик бизнесни узлуксиз қўллаб-қувватлаш» комплекс дастури ташаббускорларини танлаш, уларнинг лойиҳаларини қўллаб-қувватлаш ва молиялаштириш тўғрисида

1-боб. Умумий қоидалар

1. Ушбу Низом «Кичик бизнесни узлуксиз қўллаб-қувватлаш» комплекс дастурида иштирок этиш ҳуқуқига эга ташаббускорлар лойиҳаларини танлаб олиш, молиялаштириш ҳамда мониторинг қилиш тартибини белгилайди.

2. Мазкур Низомда қуйидаги асосий тушунчалардан фойдаланилади:

Дастур — кичик бизнес субъектларини молиявий ва консультатив қўллаб-қувватлашни назарда тутувчи «Кичик бизнесни узлуксиз қўллаб-қувватлаш» комплекс дастури;

Жамғарма — Дастурни амалга оширишни ташкил этиш ҳамда «Кичик бизнесга кўмаклашиш маркази» МЧЖлар фаолиятини мувофиқлаштириб боришга масъул «Кичик бизнесни ривожлантириш жамғармаси» МЧЖ;

марказлар — Қорақалпоғистон Республикаси, вилоятлар ва Тошкент шаҳрида Дастур доирасида ташаббускорларни ўқитиш, лойиҳаларни амалга оширишга кўмаклашиш ва уларнинг мониторингини юритишга масъул бўлган «Кичик бизнесга кўмаклашиш маркази» МЧЖлар;

ҳамкор банклар — Дастур доирасида лойиҳаларни молиялаштиришда иштирок этувчи АТ «Халқ банки», «Микрокредитбанк» АТБ ва бошқа тижорат банклари;

ҳоким ёрдамчиси — маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича туман (шаҳар) ҳокими ёрдамчиси;

молиявий қўллаб-қувватлаш воситалари — Дастур доирасида кредит ажратиш, лизинг бериш, фоизсиз бўлиб тўлаш шарти билан қарз ажратиш, лойиҳаларда улушдор бўлиб иштирок этиш ва грант маблағлари тақдим этиш орқали кўрсатиладиган қўллаб-қувватлаш чоралари;

консультатив қўллаб-қувватлаш чоралари — Дастур доирасида лицензия, рухсатнома ва сертификатлар олиш, солиқ, божхона, ташқи савдо фаолияти, давлат харидлари, ер участкалари ва бино-иншоотлар ажратиш масалаларида кўмаклашиш, шунингдек, имтиёз ва преференциялар, бошқа енгилликлар ва имкониятлар бўйича маълумот ва маслаҳатлар бериш;

баҳолаш гуруҳи — истиқболли лойиҳаларни танлаб олиш, тоифаларга ажратиш ва бизнес лойиҳани баҳолашга масъул марказлар ҳузуридаги Лойиҳаларни баҳолаш ва танлаш гуруҳи;

лойиҳа ташаббускори — камида 1 йил узлуксиз фаолият юритиб келаётган якка тартибдаги тадбиркорлар, деҳқон хўжаликлари, ўзини ўзи банд қилганлар, ҳунармандлар, касаначилар, шунингдек, уч ва ундан ортиқ кишини доимий иш билан таъминлаб келаётган кичик тадбиркорлик субъектлари ва нодавлат таълим ташкилотлари ҳамда оилавий тадбиркорлик дастурлари доирасида ўз бизнес лойиҳаларини муваффақиятли амалга ошириб, ижобий кредит тарихига эга юридик ва жисмоний шахслар;

ваколатли органлар — Дастур доирасида лойиҳа ташаббускорларини танлаш, ўқитиш, лойиҳаларни баҳолаш ва амалга ошириш билан боғлиқ жараёнларда ўзаро ҳамкорлик қилувчи ташкилотлар;

Бизнес портал — Дастурда иштирок этиш билан боғлиқ бизнес жараёнларни автоматлаштирилган ҳолда ташкил этиш ва мувофиқлаштириб бориш имконини берадиган электрон платформа;

сертификат — амалий ўқув курсини муваффақиятли тугатиб, бизнес режасини ҳимоя қилган лойиҳа ташаббускорига марказлар томонидан тақдим қилинадиган ва Дастур доирасида молиявий қўллаб-қувватлаш воситаларидан фойдаланиш ҳуқуқини берувчи QR-кодли (штрихли) ҳужжат;

юқори технологик стартап — сўнгги технологиялар ва илм-фан ютуқларига асосланган инновацион маҳсулотларни (хизматларни) ишлаб чиқариш (кўрсатиш) ва тижоратлаштириш, янги ечимларни жорий этиш ёки мавжудларини яхшилашга қаратилган таваккалчилиги юқори бўлган лойиҳа;

улушга конвертация қилинадиган инвестиция — инвестор, жумладан, венчур фонди томонидан стартап лойиҳага келгусида унинг негизида ташкил этиладиган юридик шахс устав капиталидаги улушга конвертация қилиш шарти билан йўналтириладиган инвестициялар.

3. Дастурда иштирок этиш ва молиявий қўллаб-қувватлаш чораларидан Бизнес портал орқали фойдаланилади ва шу билан боғлиқ бизнес жараёнларининг ҳар бир босқичини онлайн кузатиш имконияти яратилади.

4. Дастур доирасида лойиҳа ташаббускорларини баҳолаш, ўқитиш, молиявий, консультатив қўллаб-қувватлаш ва лойиҳа мониторингини юритиш ушбу Низомга 1-иловадаги схемага мувофиқ амалга оширилади.

2-боб. Дастур иштирокчиларини танлаб олиш тартиби

5. Лойиҳа ташаббускори Дастурда иштирок этиш учун Бизнес портал орқали онлайн тарзда икки босқичда мурожаат қилади:

1-босқичда — лойиҳани танлаб олиш ва амалий ўқув курсида иштирок этиш учун лойиҳанинг дастлабки ҳисоб-китоблари ҳамда фойдаланиш режалаштирилган молиявий қўллаб-қувватлаш воситалари кўрсатилган ариза юборилади;

2-босқичда — сертификат олгандан сўнг зарур ҳужжатларни илова қилган ҳолда молиявий қўллаб-қувватлаш воситаларидан фойдаланиш учун ариза юборилади.

Дастур доирасида грант маблағларини тақдим этиш воситасидан фойдаланиш учун лойиҳа ташаббускорлари мазкур Низом 4-бобининг 6-параграфида белгиланган тартибда Бизнес портал орқали мурожаат қилади.

6. Лойиҳани танлаб олиш ва амалий ўқув курсида иштирок этиш учун ариза берилгандан сўнг Бизнес портал орқали лойиҳа ташаббускори икки иш кунида скорингдан ўтказилади.

Скоринг учун зарур маълумотлар давлат органлари ва ташкилотлари ҳамда тижорат банкларидан электрон ахборот алмашинуви орқали олинади.

Лойиҳа ташаббускори скоринг натижалари тўғрисида Бизнес портал орқали хабардор қилинади.

7. Ҳоким ёрдамчиси уч кун муддатда бевосита жойига чиққан ҳолда скорингдан ўтган лойиҳа ташаббускори билан учрашиб, унинг ушбу Низомга 2-иловадаги саволнома асосида белгиланган мезонларга мувофиқлигини ўрганади ҳамда натижалари тўғрисидаги хулосани Бизнес порталга жойлаштиради.

Ҳоким ёрдамчисининг ижобий хулосалари асосида Бизнес-порталда автоматик равишда ташаббускорларнинг дастлабки рўйхати шакллантирилади.

8. Марказлар ҳузурида ушбу Низомга 3-иловага мувофиқ намунавий таркибда лойиҳаларни баҳолаш ва танлаш гуруҳлари ташкил қилинади.

Лойиҳа ташаббускорларининг фаолият даври, пул айланмаси ва ишчилар сонига қараб, уларнинг тадбиркорлик кўникмаси ва бизнес-режаларининг яшовчанлиги самарадорлиги Жамғарма томонидан тасдиқланадиган методика асосида баҳоланади. Баҳолаш методикаси Бизнес порталга жойлаштирилади.

9. Баҳолаш гуруҳлари уч иш кунида дастлабки рўйхатга киритилган лойиҳа ташаббускорларининг истиқболли лойиҳаларини танлаб олади ва ушбу Низомга 4-иловага мувофиқ уларни тоифаларга ажратади.

Баҳолаш гуруҳининг ҳар бир аъзоси лойиҳаларни танлаб олиш ва тоифаларга ажратиш масалаларида уч иш кунида ўз фикр ва мулоҳазаларини бериши шарт. Гуруҳ аъзоси ушбу муддат давомида муносабат билдирмаган тақдирда, у томонидан ижобий хулоса берилган деб ҳисобланади.

3-боб. Марказлар томонидан ўқитиш жараёнини ташкил этиш

10. Марказлар лойиҳа ташаббускорларини ўқитиш учун Вазирлар Маҳкамаси ҳузуридаги Бизнес ва тадбиркорлик олий мактаби ва унинг ҳудудий филиаллари, Ўзбекистон Республикаси Олий таълим, фан ва инновациялар вазирлиги ҳузуридаги Инновацион ривожланиш агентлиги, олий таълим муассасалари, «Ишга марҳамат» мономарказлари, касб-ҳунарга ўқитиш марказлари, саноат корхоналари, эркин иқтисодий зоналар ва кичик саноат зоналари, технопарклар ҳамда саноат кластерлари билан ҳамкорликда қисқа ва ўрта муддатли амалий ўқув курсларини ташкил қилади.

Ўқув курсларини самарали ташкил қилиш мақсадида шартнома асосида нодавлат таълим ташкилотлари ҳам жалб қилиниши мумкин.

11. Лойиҳа ташаббускорлари амалий ўқув курсларида кичик тадбиркорлик субъектларининг лойиҳалари бўйича бизнес-режаларни ишлаб чиқиш, молиялаштириш ва ишга тушириш, сотув бозорларини кенгайтириш, хусусий инвестиция шерикларини жалб қилиш, бизнесни ташкил этиш ҳамда юритиш билан боғлиқ бошқа йўналишлар бўйича ўқитилади.

12. Лойиҳа ташаббускорлари амалий ўқув курслари якунларида бизнес-режасини ҳимоя қилади.

13. Қисқа ва ўрта муддатли амалий ўқув курсларини муваффақиятли тугатган ва ўз лойиҳасини ҳимоя қилган лойиҳа ташаббускорларига бир кун муддатда марказлар томонидан Дастур доирасидаги қўллаб-қувватлаш механизмларидан фойдаланиш ҳуқуқини берадиган сертификат тақдим этилади.

Бунда ўзини ўзи банд қилган шахслар, ҳунармандлар, касаначилар ва оилавий тадбиркорлик дастурлари доирасида ўз бизнес лойиҳаларини муваффақиятли амалга оширган жисмоний шахслар молиявий инструментлардан фойдаланиш ҳуқуқини қўлга киритганда белгиланган тартибда тадбиркорлик субъекти сифатида давлат рўйхатидан ўтказилиши лозим.

4-боб. Молиявий қўллаб-қувватлаш воситаларидан фойдаланиш тартиби

14. Молиявий қўллаб-қувватлаш воситаларидан фойдаланиш бўйича ариза лойиҳа ташаббускори томонидан мустақил равишда ёки марказларнинг кўмаги билан Бизнес портал орқали тақдим этилади.

15. Лойиҳа ташаббускори ўз аризасида қуйидаги молиявий қўллаб-қувватлаш воситаларидан бирини ёки бир нечтасини кўрсатиши мумкин:

100,0 млн сўмгача гаровсиз кредит;

150,0 млн сўмгача гаров талаби пасайтирилган револьвер кредит;

500,0 млн сўмгача кредит;

1,0 млрд сўмгача кредит;

1,5 млрд сўмгача кредит;

1,5 млрд сўмгача лизинг хизмати;

1,5 млрд сўмгача фоизсиз бўлиб тўлаш шарти билан қарзга асосий восита олиб бериш;

лойиҳа қийматининг 20 фоизигача қисмига, бироқ 1,0 млрд сўмгача бўлган миқдорда улушдор бўлиб иштирок этиш;

2,0 млрд сўмгача грант маблағлари тақдим этиш.

15 1 . Ўзини ўзи банд қилган шахсларга тадбиркорлик фаолиятини бошлаш учун 100 млн сўмгача гаровсиз кредитларнинг 50 фоиз қисми уларнинг банк картасига ўтказиб берилиши мумкин.

16. Лойиҳа ташаббускорига бир вақтнинг ўзида бир нечта молиявий қўллаб-қувватлаш воситалари тақдим қилинганда, уларнинг умумий миқдори 2 млрд сўмдан ошмаслиги лозим.

Тадбиркорлик субъектлари ушбу лимит доирасида мавжуд кредитга қўшимча равишда молиявий қўллаб-қувватлаш воситаларидан такроран фойдаланишларига рухсат этилади.

17. Молиялаштириш маъқулланган аризалар мавжуд ресурс маблағлари доирасида рўйхатга олинган идентификация рақами кетма-кетлиги асосида молиялаштириб борилади.

18. Дастур бўйича тақдим қилинадиган молиявий қўллаб-қувватлаш воситалари тижорат банкларида бухгалтерия ҳисобининг ҳисобварақлар режасига мувофиқ алоҳида ҳисобварақларда юритилади.

1-§. Кредит ва лизинг ажратиш

19. Лойиҳа ташаббускори кредит (ёки лизинг) хизматидан фойдаланиш учун Бизнес портал орқали ўз аризасига хизмат кўрсатувчи тижорат банкининг ички кредит сиёсатидан келиб чиқиб тегишли ҳужжатларни илова қилади.

Талаб этиладиган ҳужжатлар рўйхати таянч банк ва ҳамкор банклар томонидан Бизнес порталга жойлаштирилади.

20. Лойиҳа ташаббускорларидан қўшимча ҳужжатлар талаб қилишга йўл қўйилмайди. Тижорат банклари бошқа идораларда мавжуд ахборот ва маълумотларни Бизнес портал орқали идоралараро электрон ҳамкорлик йўли билан мустақил равишда олади.

21. Аризалар беш иш кунидан ошмаган муддатда кўриб чиқилиб, натижаси бўйича кредит (лизинг) ажратиш ёки уни рад этиш ҳақида қарор қабул қилинади.

Бунда 1 млрд сўмгача кредит (лизинг) ажратиш тўғрисидаги қарор тижорат банкларининг ҳудудий филиаллари томонидан қабул қилинади.

22. Тегишли ҳужжатлар тўлиқ тақдим этилмаган ёки ёлғон маълумотлар тақдим этилган ҳолларда, аризани кўриб чиқиш рад этилади. Бошқа сабабларга кўра аризани кўриб чиқишни рад этиш тақиқланади.

2-§. Фоизсиз бўлиб тўлаш шарти билан қарзга асосий восита олиб бериш

23. Лойиҳа ташаббускори Бизнес портал орқали ўз аризасига Жамғарма қарори асосида белгиланган ҳужжатларни илова қилади. Бунда мазкур ҳужжатлар рўйхати Бизнес порталда очиқ-ошкора эълон қилинади ва унда назарда тутилмаган ҳужжатларни талаб қилиш тақиқланади.

24. Аризалар беш иш кунидан ошмаган муддатда кўриб чиқилиб, натижаси бўйича марказлар томонидан мазкур молиявий ёрдам инструментини тақдим этиш ёки уни рад этиш ҳақида қарор қабул қилинади.

25. Тегишли ҳужжатлар тўлиқ тақдим этилмаган ёки ёлғон маълумотлар тақдим этилган, шунингдек, талабгор белгиланган талабларга номувофиқ бўлган ҳолларда молиявий ёрдам воситасини тақдим этиш рад этилади. Бошқа сабабларга кўра, аризани кўриб чиқишни рад этиш тақиқланади.

3-§. Лойиҳаларда давлат мулки объекти билан улушдор бўлиб иштирок этиш воситаси

26. Лойиҳа ташаббускори янги лойиҳаларга ва мавжуд ишлаб чиқаришни кенгайтиришга оид лойиҳаларига бўш турган давлат мулки объектлари (кейинги ўринларда — объект) билан мазкур лойиҳа амалга оширилаётган тадбиркорлик субъектининг устав капиталига улушдор бўлиб кириш тўғрисидаги аризани Бизнес портал орқали қуйидагиларни илова қилган ҳолда марказларга юборади:

аниқ объектга доир тегишли маълумотлар;

лойиҳа қиймати, шу жумладан, лойиҳа ташаббускори томонидан молиялаштириладиган қисмининг манбалари.

27. Марказлар томонидан лойиҳа ташаббускори ҳисобланган тадбиркорлик субъекти устав капиталида иштирок этиши қуйидагилар орқали амалга оширилади:

савдода турган объектни сотиб олиш тўловларини амалга ошириш учун Марказлар томонидан мазкур тўлов суммасини (ёки унинг бир қисмини) мақсадли равишда Марказлар улуши сифатида расмийлаштириш шарти билан лойиҳа ташаббускорига ўтказиб бериш орқали;

савдога қўйилмаган объектларни Ўзбекистон Республикаси Давлат активларини бошқариш агентлиги (кейинги ўринларда — Агентлик) томонидан марказлар улуши сифатида лойиҳа ташаббускорига устав капиталига киритиш орқали. Бунда мазкур объектнинг баҳолаш ташкилоти томонидан аниқланган қиймати (ёки унинг бир қисми) марказлар томонидан Агентликка бир ой муддатда ўтказиб берилади.

3.1-§. С авдода турган объект қиймати тўловларини амалга ошириш

28. Савдода турган объект қиймати тўловларини амалга ошириш учун лойиҳа ташаббускори томонидан марказларга қуйидагилар тақдим этилади:

аукцион натижалари тўғрисидаги баённома;

лойиҳа ташаббускорининг устав капиталида шаклланадиган марказларга тегишли улуш миқдори ҳамда тадбиркорлик субъекти таъсисчилари сафига киритилишини маъқуллаш тўғрисидаги Иштирокчилар умумий йиғилиши қарори;

лойиҳани амалга ошириш бизнес-режаси.

29. Марказлар бир ҳафта муддатда тақдим этилган ҳужжатлар тўлиқлиги, бизнес-режанинг Баҳолаш методикасига мувофиқлигини ўрганиб чиқиб, лойиҳа ташаббускорига молиявий ёрдам воситасини тақдим этиш ёки уни рад этиш тўғрисида қарор қабул қилади.

30. Марказлар ўз қарорини қабул қилгандан кейин икки кун муддатда лойиҳа ташаббускори билан тадбиркорлик субъекти устав капиталида иштирок этиш тўғрисидаги келишув лойиҳасини тақдим этади.

Келишув тузилгандан сўнг объект қиймати тўловлари суммаси (сумманинг бир қисми) тадбиркорлик субъектига ўтказиб берилади.

3.2 -§. Савдога қўйилмаган объектларни Агентлик томонидан марказлар улуши сифатида лойиҳа ташаббускори устав капиталига киритиш

31. Савдога қўйилмаган объектни Агентлик томонидан марказлар улуши сифатида лойиҳа ташаббускори устав капиталига киритиш учун лойиҳа ташаббускори томонидан марказга бизнес-режа тақдим этилади.

32. Марказлар бир ҳафта муддатда бизнес-режанинг Баҳолаш методикасига мувофиқлигини ўрганиб чиқиб, лойиҳа ташаббускорига молиявий ёрдам воситасини тақдим этиш ёки рад этиш тўғрисида қарор қабул қилади.

33. Молиявий ёрдам воситасини тақдим этиш тўғрисида қарор қабул қилинганда:

марказлар томонидан икки кун муддатда Агентликка объектни лойиҳа ташаббускорининг устав капиталига киритиш мақсадида уни баҳолаш ва устав капиталига марказлар улуши сифатида бериш тўғрисида қарор қабул қилиш юзасидан Бизнес портал орқали мурожаат юборади;

Агентлик икки ҳафта муддатда объектни тадбиркорлик субъекти устав капиталига киритиш масаласини балансда сақловчи билан келишади.

Балансда сақловчи розилиги олинган ҳолда икки ҳафта муддатда объектни баҳоланишини ташкил этади ва баҳолаш ҳисоботини марказларга тақдим этади. Бунда баҳолаш хизматлари ҳақи марказлар томонидан Агентликка қоплаб берилади;

Марказ томонидан икки кун муддатда объектни баҳолаш тўғрисидаги ҳисобот лойиҳа ташаббускорига тақдим этилади.

34. Лойиҳа ташаббускори томонидан марказларга лойиҳа ташаббускорининг устав капиталида шаклланадиган Марказга тегишли улуш миқдори ҳамда тадбиркорлик субъекти таъсисчилари сафига киритилишини маъқуллаш тўғрисидаги Иштирокчилар умумий йиғилиши қарори тақдим этилади.

35. Марказлар икки кун муддатда лойиҳа ташаббускори билан тадбиркорлик субъекти устав капиталида иштирок этиш тўғрисидаги келишув лойиҳасини тақдим этади.

Келишув тузилгандан сўнг Агентлик томонидан объектни лойиҳа ташаббускори устав капиталига марказлар улушини шакллантириш ҳисобига киритиш тўғрисида буйруқ қабул қилинади ва объектни сотиб олиш тўловлари суммаси (суммасининг бир қисми) марказлар томонидан Агентликка ўтказиб берилади. Бунда объектнинг баҳоланган қиймати лойиҳа ташаббускори устав капиталининг 20 фоиздан ортиғини ташкил этса, объект учун тўловнинг қолган қисми лойиҳа ташаббускори томонидан тўланади.

4-§. Лойиҳаларда ер участкалари билан улушдор бўлиб иштирок этиш

36. Қишлоқ хўжалигида фойдаланилмайдиган ер участкаларига (кейинги ўринларда — ер участкалари) бўлган мулк ҳуқуқи ва ижара ҳуқуқи лойиҳа ташаббускори томонидан электрон онлайн-аукцион орқали лойиҳани амалга оширишнинг эҳтиёжидан келиб чиқиб сотиб олинади.

Ер участкаларини сотиб олиш учун лойиҳа ташаббускори томонидан марказларга қуйидагилар тақдим этилади:

аукцион натижалари тўғрисидаги баённома;

лойиҳа ташаббускорининг устав капиталида шаклланадиган марказларга тегишли улуш миқдори ҳамда тадбиркорлик субъекти таъсисчилари сафига киритилишини маъқуллаш тўғрисидаги Иштирокчилар умумий йиғилиши қарори;

лойиҳани амалга ошириш бизнес-режаси.

37. Марказлар бир ҳафта муддатда тақдим этилган ҳужжатлар тўлиқлиги, бизнес-режанинг Баҳолаш методикасига мувофиқлигини ўрганиб чиқиб, лойиҳа ташаббускорига молиявий ёрдам воситасини тақдим этиш ёки уни рад этиш тўғрисида қарор қабул қилади.

38. Марказлар ўз қарорини қабул қилгандан кейин икки кун муддатда лойиҳа ташаббускори билан тадбиркорлик субъекти устав капиталида иштирок этиш тўғрисидаги келишув лойиҳасини тақдим этади.

Келишув тузилгандан сўнг объект қиймати суммаси (сумманинг бир қисми) тадбиркорлик субъектига ўтказиб берилади.

5-§. Лойиҳаларда асбоб-ускуналар, бино ва иншоотлар ҳамда бошқа кўринишдаги моддий активлар билан улушдор бўлиб иштирок этиш

39. Асбоб-ускуналар, бино ва иншоотлар ҳамда бошқа кўринишдаги моддий активларни (кейинги ўринларда — моддий активлар) марказлар улуши сифатида лойиҳа ташаббускорининг устав капиталига киритиш учун лойиҳа ташаббускори Бизнес портал орқали марказларга ариза беради.

Аризага қуйидаги маълумотлар илова қилинади:

бино ва иншоот(лар) бўйича — жойлашган жойи, ўлчамлари, конструкциялари, техник ҳолати, нархига тегишли маълумотлар;

асбоб-ускуна ва бошқа кўринишдаги моддий активлар бўйича — уларнинг хусусияти, технологик вазифаси ва нархига тегишли маълумотлар;

лойиҳани амалга ошириш бизнес-режаси.

40. Марказлар бир ҳафта муддатда (баҳолаш талаб этилган тақдирда бир ойдан ортиқ бўлмаган муддатда) тақдим этилган ҳужжатларни тўлиқлиги, бизнес-режанинг Баҳолаш методикасига мувофиқлигини ўрганиб чиқиб, лойиҳа ташаббускорига молиявий ёрдам воситасини тақдим этиш ёки уни рад этиш тўғрисида қарор қабул қилади.

Бунда марказлар кўчмас мулк объектлари нархига оид шаклланган бозор маълумотлари таҳлилидан келиб чиқиб, объектнинг мулкдори билан келишувга асосан объектни баҳолашдан ўтказиши мумкин.

41. Молиявий ёрдам воситасини тақдим этиш тўғрисида қарор қабул қилинган тақдирда, марказлар бир кун муддатда лойиҳа ташаббускорига келишув лойиҳасини юборади.

Бунда объектни сотиб олиш шартлари, сотиб олишдаги марказларнинг ҳамда лойиҳа ташаббускорининг улуши, олди-сотди шартномаси лойиҳаси (мавжуд бўлса) ҳамда бино ва иншоотни киритиш ҳисобига тадбиркорлик субъектининг устав капиталидаги улушлар тақсимотига оид ҳисоб-китоблар кўрсатилади.

42. Лойиҳа ташаббускори бир ой муддатдан кечикмай келишув лойиҳасини маъқуллайди ёки рад этади. Келишув маъқулланганда, марказларнинг тадбиркорлик субъекти таъсисчилари сафига киритилишини маъқуллаш тўғрисидаги қарор илова қилинади.

43. Бино ва иншоот марказлар томонидан сотиб олинганда олди-сотди шартномаси икки томонлама тарзда, марказлар томонидан лойиҳа ташаббускори иштирокида сотиб олинганда уч томонлама тарзда расмийлаштирилади.

Сотиб олинган бино ва иншоотни лойиҳа ташаббускори ҳисобланган тадбиркорлик субъекти устав капиталига киритиш масаласи у сотиб олингандан кейин уч кундан кечиктирмай тадбиркорлик субъектининг тегишли бошқарув органи муҳокамасига киритилиши лозим.

6-§. Лойиҳалар учун грант маблағларини тақдим этиш

44. Лойиҳа ташаббускори Бизнес портал орқали марказларга ариза тақдим этади ва унга Вазирлар Маҳкамасининг 2020 йил 9 мартдаги 133-сон қарори билан тасдиқланган «Стартап» лойиҳаларни тасдиқлаш, молиялаштириш ва амалга ошириш тартиби тўғрисидаги низом талаблари асосида ишлаб чиқилган лойиҳа ҳужжатларини илова қилади.

45. Аризаларга мувофиқ лойиҳа ҳужжатлари беш иш кунида баҳолаш гуруҳлари томонидан қуйидаги мезонлар асосида 100 баллик шкала бўйича баҳоланади:

инновационлиги;

ижтимоий қиймати ва таъсири;

асосчи ва жамоанинг салоҳияти;

ечимнинг мақсадга мувофиқлиги;

амалдаги ҳолати;

амалга ошириш самарадорлиги;

лойиҳанинг мавжуд аналогларидан фарқи хамда мавжуд рақобатчилардан афзаллиги;

лойиҳанинг инвестицион жозибадорлиги ҳамда юқори ўсиш салоҳиятига эга эканлиги;

лойиҳанинг амалга оширилишидан кутилаётган натижа;

молиявий кўрсаткичлар таҳлили.

Бунда 70 баллдан юқори баҳоланган лойиҳалар танлаб олинади ва Ўзбекистон Республикаси Олий таълим, фан ва инновациялар вазирлиги ҳузуридаги Инновацион ривожланиш агентлигига юборилади.

46. Ўзбекистон Республикаси Олий таълим, фан ва инновациялар вазирлиги ҳузуридаги Инновацион ривожланиш агентлиги ўн беш иш кунида тақдим этилган лойиҳа ҳужжатларини кўриб чиқиб, маъқулланган лойиҳаларни марказларга тақдим этади. Бунда Инновацион ривожланиш агентлиги:

лойиҳаларни Ўзбекистон Республикаси Олий таълим, фан ва инновациялар вазирлиги ҳузуридаги Илмий-техник кенгаш муҳокамасига киритилишини;

Илмий-техник кенгаш муҳокамасидан муваффақиятли ўтган лойиҳаларни Ўзбекистон Республикаси Олий таълим, фан ва инновациялар вазирлиги ҳузуридаги Илм-фан ва инновациялар кенгаши муҳокамасида стартап лойиҳани молиялаштириш тўғрисида қарор қабул қилинишини ташкил қилади.

47. Марказлар маъқулланган лойиҳа ташаббускорларини мазкур Низомнинг 3-бобида белгиланган тартибда махсус дастурлар асосида ўқитади ва сертификат олган ташаббускорларни грант маблағлари ажратиш учун Ўзбекистон Республикаси Олий таълим, фан ва инновациялар вазирлиги ҳузуридаги Инновацион ривожланиш агентлигига йўналтиради.

48. Ўзбекистон Республикаси Олий таълим, фан ва инновациялар вазирлиги ҳузуридаги Инновацион ривожланиш агентлиги мазкур лойиҳаларни ўн беш кун муддатда белгиланган тартибда молиялаштиришни бошлайди.

49. Ўзбекистон Республикаси Олий таълим, фан ва инновациялар вазирлиги ҳузуридаги Инновацион ривожланиш агентлиги давлат илмий дастурлари доирасида молиялаштирилган тижоратлаштириш ва стартап лойиҳалари рўйхатини амалиётга жорий қилиш ва кенгайтиришни қўллаб-қувватлаш мақсадида марказларга тақдим этиб боради.

5-боб. Маслаҳат хизматларини кўрсатиш тартиби

50. Лойиҳа ташаббускорлари сўровига кўра, марказлар томонидан қуйидаги масалалар бўйича маълумот ва маслаҳатлар берилади:

лицензия, рухсатнома ва сертификатлар олиш, божхона ҳамда солиқ маъмуриятчилиги, экспорт ва импорт операциялари, шартномаларни расмийлаштириш;

давлат харидларида иштирок этиш, шунингдек, ер участкалари, бино ва иншоотларни сотиб олиш ёки ижарага олиш ва лойиҳалаштириш;

тадбиркорликни қўллаб-қувватлаш бўйича амалдаги имтиёз ва преференциялар, мавжуд бошқа енгилликлар ва имкониятлар.

51. Марказлар зарур ҳолларда лойиҳа ташаббускорларига давлат органларидан тегишли ҳужжатларни олиш, шунингдек, имтиёз ва преференциялар қўлланилишини таъминлашда кўмаклашади.

6-боб. Якунловчи қоидалар

52. Ушбу Низом талабларини бузганликда айбдор шахслар қонунчилик ҳужжатларида белгиланган тартибда жавобгар бўлади.

53. Дастур доирасида лойиҳа ташаббускори ёки иштирокчилар ваколатли органларнинг, Жамғарма, марказлар ва тижорат банклари масъул ходимларининг, ҳоким ёрдамчисининг ҳаракатлари (ҳаракатсизлиги) устидан қонунчилик ҳужжатларида белгиланган тартибда шикоят қилиши мумкин.

54. Давлат органлари ва уларнинг мансабдор шахсларига марказлар фаолиятига, шу жумладан, уларнинг лойиҳа ташаббускорларини танлаб олиш, лойиҳаларни баҳолаш ва молиялаштириш, раҳбар ходимларини тайинлашга аралашиш, шунингдек, марказлар маблағлари ҳисобидан турли хил хайрия (ҳомийлик) тўловлар ва бадаллар талаб қилиш тақиқланади.

«Кичик бизнесни узлуксиз қўллаб-қувватлаш» комплекс дастури ташаббускорларини танлаш, уларнинг лойиҳаларини қўллаб-қувватлаш ва молиялаштириш тўғрисидаги низомга 1-ИЛОВА

Дастур доирасида лойиҳа ташаббускорларини баҳолаш, ўқитиш, молиявий ва консультатив қўллаб-қувватлаш ва лойиҳа мониторингини юритиш

Босқичлар Масъул ижрочилар Тадбирлар Муддатлар 1-босқич Лойиҳа ташаббускори 1. Дастурда иштирок этиш учун Бизнес порталда рўйхатдан ўтиб, молиявий воситани кўрсатган ҳолда ариза юборади. Ўз хоҳишига кўра Бизнес портал ( инсон омилисиз ) 2. Ариза берувчи онлайн скорингдан ўтказилади ҳамда натижаси Марказга юборилади. Автоматик тарзда Кичик бизнесга кўмаклашиш маркази 3. Онлайн скорингда ижобий деб баҳоланганда, лойиҳа жойига чиққан ҳолда намунавий шаклдаги электрон саволнома асосида ўрганиш учун масъул ҳоким ёрдамчисига юборилади. Келиб тушган кундан кечиктирмасдан Ҳоким ёрдамчиси 4. Ўрганиш натижаларини Бизнес портал орқали марказга юборади. Уч кун муддатда Бизнес портал ( инсон омилисиз ) 5. Ташаббускорларнинг дастлабки рўйхати шакллантирилади. Автоматик тарзда 2-босқич Кичик бизнесга кўмаклашиш маркази ҳузуридаги Лойиҳаларни баҳолаш ва танлаш гуруҳлари 1. Дастлабки рўйхатга киритилган ташаббускорларнинг тадбиркорлик кўникмаси ва бизнес-режаларининг яшовчанлигини баҳолаш асосида истиқболли лойиҳалар танлаб олинади ва уларнинг фаолият даври, пул айланмаси ва ишчилар сонига қараб тоифага ажратилади ҳамда ўқитиш учун йўналтирилади. Уч кун муддатда Кичик бизнесга кўмаклашиш маркази 2. Тавсия этилган лойиҳа ташаббускорлари қисқа ва ўрта муддатли амалий ўқув курсларида (масофавий ёки анъанавий) ўқитилади. Танланган ўқув дастурига мувофиқ Кичик бизнесга кўмаклашиш маркази 3. Тест (имтиҳон) синовларини муваффақиятли топширган ҳамда тайёрлаган бизнес-режасини муваффақиятли ҳимоя қилган ташаббускорга сертификат берилади. Бир кун муддатда 3-босқич Лойиҳа ташаббускори 1. Сертификат олган ташаббускор комплекс дастур доирасидаги қўллаб-қувватлаш механизмларидан фойдаланиши учун хизмат кўрсатаётган ҳамкор банкига молиявий воситалардан фойдаланиш бўйича Бизнес портал орқали онлайн ариза билан мурожаат қилади. Лойиҳа ташаббускори кредит (ёки лизинг) хизматидан фойдаланиш учун Бизнес портал орқали ўз аризасига хизмат кўрсатувчи тижорат банкининг ички кредит сиёсатидан келиб чиқиб, тегишли ҳужжатларни илова қилади Ўз хоҳишига кўра 2. Ариза ва тақдим этилган тегишли ҳужжатлар кўриб чиқилиб, натижаси бўйича қуйидаги мос ҳолдаги ваколатли идоралар молиявий воситалардан фойдаланиш ёки уни рад этиш ҳақида қарор қабул қилинади. Бунда: Тижорат банки кредит (лизинг) Беш кун муддатда Кичик бизнесга кўмаклашиш маркази бўлиб тўлаш шарти билан қарз Беш кун муддатда улуш киритиш Киритилаётган улуш шаклидан келиб чиқиб белгиланади Инновацион ривожланиш агентлиги грант 15 иш кунида 4-босқич Кичик бизнесга кўмаклашиш маркази, тижорат банклари 1. Иштирокчилар лойиҳаларининг мунтазам мониторинги юритилади. Ҳар чоракда 2. Марказ лойиҳага улушдор бўлиб кирган лойиҳалардаги ўз улушини бозор тамойиллари асосида белгиланган тартибда сотади. Белгиланган тартиб ҳамда муддатларда

Кичик бизнесни узлуксиз қўллаб-қувватлаш» комплекс дастури ташаббускорларини танлаш, уларнинг лойиҳаларини қўллаб-қувватлаш ва молиялаштириш тўғрисидаги низомга 2-ИЛОВА

«Кичик бизнесни узлуксиз қўллаб қувватлаш» комплекс дастури лойиҳа ташаббускори _________________нинг фаолият юритиш жойига чиқиб ўрганиш

Ташкилот номи/ФИО * СТИР/ПИНФЛ * Телефон рақами * Тадбиркорлик фаолият тури * Лойиҳа мақсади * Қайси банк мижози ** Лойиҳани амалга ошириш жойи * Кадастр ёки ижара шартномаси рақами * Сўралаётган молиявий восита номи * Миқдори * Таъминот тури * Сони * Реквизитлари * Охирги 12 ойлик пул айланмаси ** (мавжуд бўлса) Оилавий тадбиркорлик дастурида иштирок этган Мавжуд кредит қолдиғи ** Кредит маблағининг мақсадли ишлатилгани Ҳа Йўқ Яратилган ишчи ўринлари Жами ишчилар сони ** Хулоса Лойиҳа ташаббускорини дастлабки рўйхатга киритиш тавсия этиладими? Ҳа Йўқ Изоҳ Ҳоким ёрдамчиси

«Кичик бизнесни узлуксиз қўллаб-қувватлаш» комплекс дастури ташаббускорларини танлаш, уларнинг лойиҳаларини қўллаб-қувватлаш ва молиялаштириш тўғрисидаги низомга 3-ИЛОВА

Лойиҳаларни баҳолаш ва танлаш гуруҳининг

1. Лавозими бўйича — «Кичик бизнесга кўмаклашиш маркази» МЧЖ директори — Лойиҳаларни баҳолаш ва танлаш гуруҳи раҳбари 2. Лавозими бўйича — Маҳаллада тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича туман (шаҳар) ҳокими ёрдамчиси 3. Келишувга асосан — Лойиҳа ташаббускорига хизмат кўрсатувчи тижорат банкининг ишончли вакили 4. Келишувга асосан — Эксперт 5. Келишувга асосан — Ўзбекистон Республикаси Олий таълим, фан ва инновациялар вазирлиги ҳузуридаги Инновацион ривожланиш агентлиги вакили

«Кичик бизнесни узлуксиз қўллаб-қувватлаш» комплекс дастури ташаббускорларини танлаш, уларнинг лойиҳаларини қўллаб-қувватлаш ва молиялаштириш тўғрисидаги низомга 4-ИЛОВА

Ташаббускорларни тоифаларга ажратиш мезонлари

Т/р Тоифалар 1-тоифа 2-тоифа 3-тоифа 4-тоифа 1. Молиявий восита тури 100 миллион сўмгача гаровсиз кредитлар 150 миллион сўмгача гаров талаби пасайтирилган револьвер кредитлар 500 миллион сўмгача кредитлар 1 миллиард сўмгача кредитлар 1,5 миллиард сўмгача кредитлар 1,5 миллиард сўмгача лизинг хизматлари кўрсатиш 1,5 миллиард сўмгача фоизсиз бўлиб тўлаш шарти билан қарзга асосий восита олиб бериш Лойиҳаларда 1 миллиард сўмгача миқдорда улушдор бўлиб иштирок этиш 2 миллиард сўмгача грант маблағлари тақдим этиш 2. Воситани олиш мақсади лойиҳани амалга ошириш лойиҳани амалга ошириш лойиҳани амалга ошириш лойиҳани амалга ошириш лойиҳани амалга ошириш асбоб-ускуналар, технологик жиҳозлар ва махсус техникаларни сотиб олиш асбоб-ускуналар, технологик жиҳозлар ва махсус техникаларни сотиб олиш бўш турган давлат мулки объектлари ва ер майдонлари, асбоб-ускуналар, бино ва иншоотлар ҳамда бошқа кўринишдаги моддий активларни сотиб олиш инновацион ишланмаларни тижоратлаштириш ва юқори технологик стартап лойиҳаларни молиялаштириш 3. Ишчи ўринларнинг мавжудлиги якка тартибдаги тадбиркорлар, деҳқон хўжаликлари, ўзини ўзи банд қилган шахслар, ҳунармандлар, касаначилар, нодавлат таълим ташкилотлари, уч ва ундан ортиқ кишини доимий иш билан таъминлаётган кичик тадбиркорлик субъектлари кичик тадбиркорлик субъектлари-3 ва ундан ортиқ кишини доимий иш билан таъминлаётган кичик тадбиркорлик субъектлари — камида 4 нафар кишини доимий иш билан таъминлаётган кичик тадбиркорлик субъектлари-камида 5 нафар кишини доимий иш билан таъминлаётган кичик тадбиркорлик субъектлари-камида 10 нафар кишини доимий иш билан таъминлаётган кичик тадбиркорлик субъектлари-камида 10 нафар кишини доимий иш билан таъминлаётган кичик тадбиркорлик субъектлари-камида 10 нафар кишини доимий иш билан таъминлаётган кичик тадбиркорлик субъектлари-камида 10 нафар кишини доимий иш билан таъминлаётган кичик тадбиркорлик субъектлари-3 ва ундан ортиқ кишини доимий иш билан таъминлаётган 4. Пул айланмасига талаб талаб мавжуд эмас талаб мавжуд эмас охирги 12 ойда айланма маблағлари миқдори 200 миллион сўмдан зиёд бўлган охирги 12 ойда айланма маблағлари миқдори 500 млн сўмдан 10 млрд сўмгача охирги 12 ойда айланма маблағлари миқдори 1 млрд сўмдан 10 млрд сўмгача охирги 12 ойда айланма маблағлари миқдори 1 млрд сўмдан 10 млрд сўмгача охирги 12 ойда айланма маблағлари миқдори 1 млрд сўмдан 10 млрд сўмгача охирги 12 ойда айланма маблағлари миқдори 1 млрд сўмдан 10 млрд сўмгача талаб мавжуд эмас

Вазирлар Маҳкамасининг 2024 йил 20 январдаги 37-сон қарорига 2-ИЛОВА

Вазирлар Маҳкамасининг 2022 йил 22 февралдаги 86-сон қарори билан тасдиқланган Махсус электрон тизим орқали рухсат этиш хусусиятига эга айрим ҳужжатларни бериш тартиб-таомиллари тўғрисидаги ягона низомга киритилаётган ўзгартириш ва қўшимчалар

20-иловада :

а) 7-позициянинг учинчи устуни қуйидаги мазмундаги тўртинчи хатбоши билан тўлдирилсин:

«Кичик бизнесга кўмаклашиш марказлари томонидан янги лойиҳалар учун тадбиркорлик субъектларига тор доирадаги мутахассис сифатида жалб қилинган чет эл фуқаролари учун — базавий ҳисоблаш миқдорининг 1 баравари миқдорида»;

тўртинчи — ўнинчи хатбошилар тегишлича бешинчи — ўн биринчи хатбошилар деб ҳисоблансин;

б) 11-позициянинг учинчи устуни қуйидаги мазмундаги «а 1 » кичик банди билан тўлдирилсин:

«а 1 ) Кичик бизнесга кўмаклашиш марказлари тавсиясига асосан янги лойиҳалар доирасида тор доирадаги мутахассис сифатида жалб қилинган чет эл фуқаролари учун — тасдиқномалар меҳнат шартномаси амал қиладиган муддатга, бироқ уч йилдан ортиқ бўлмаган муддатга чексиз марта узайтириш имконияти билан, аммо ҳар бир ҳолатда уч йилдан ортиқ бўлмаган муддатга».

Ўзбекистон Республикасининг Бош вазири А. АРИПОВ

Тошкент ш.,

2024 йил 20 январь,

37-сон

(Қонунчилик маълумотлари миллий базаси, 22.01.2024 й., 09/24/37/0056-сон; 01.04.2024 й., 09/24/181/0259-сон; 15.05.2024 й., 09/24/282/0347-сон; 30.12.2024 й., 07/24/455/1092-сон; 10.11.2025 й., 09/25/709/1027-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

SXEMASI

SAVOLNOMASI

NAMUNAVIY TARKIBI

“Kichik biznesni uzluksiz qoʻllab-quvvatlash” kompleks dasturini amalga oshirish chora-tadbirlari toʻgʻrisida

Oʻzbekiston Respublikasi Prezidentining “ Oʻzbekiston Respublikasi Prezidentining tadbirkorlar bilan 2023-yildagi ochiq muloqotida belgilangan vazifalarni amalga oshirish chora-tadbirlari toʻgʻrisida ” 2023-yil 4-sentabrdagi PQ-292-son hamda “ Kichik biznesni rivojlantirishni moliyaviy va institutsional qoʻllab-quvvatlash chora-tadbirlari toʻgʻrisida ” 2023-yil 14-sentabrdagi PQ-306-son qarorlari ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Kichik biznesni rivojlantirishni moliyaviy va institutsional qoʻllab-quvvatlash chora-tadbirlari toʻgʻrisida” 2023-yil 14-sentabrdagi PQ-306-son qaroriga muvofiq:

“Kichik biznesni uzluksiz qoʻllab-quvvatlash” kompleks dasturi (keyingi oʻrinlarda — Dastur) amalga oshirilishi;

tashabbuskorlar qisqa va oʻrta muddatli amaliy oʻquv kurslarda biznes koʻnikmalariga oʻqitilishi;

amaliy oʻquv kurslarini muvaffaqiyatli tugatib, sertifikat olgan tashabbuskorlar Dastur doirasida moliyaviy va konsultativ qoʻllab-quvvatlanishi;

“Biznesni rivojlantirish banki” ATB Dasturni samarali amalga oshirish va doimiy ravishda takomillashtirib borish boʻyicha asosiy tayanch bank etib belgilanganligi maʼlumot uchun qabul qilinsin.

2. Quyidagilarni nazarda tutuvchi “Kichik biznesni uzluksiz qoʻllab-quvvatlash” kompleks dasturi tashabbuskorlarini tanlash, ularning loyihalarini qoʻllab-quvvatlash va moliyalashtirish toʻgʻrisidagi nizom 1-ilovaga muvofiq tasdiqlansin:

Dastur ishtirokchilarini tanlab olish tartibi;

Kichik biznesga koʻmaklashish markazlari tomonidan oʻqitish jarayonini tashkil etish;

moliyaviy qoʻllab-quvvatlash vositalaridan foydalanish yoʻnalishlari va tartibi;

tashabbuskorlarga konsultativ xizmatlar koʻrsatish tartibi.

3. Belgilansinki:

Vazirlar Mahkamasi huzuridagi Biznes va tadbirkorlik oliy maktabi Dastur doirasida oʻquv jarayonlarini tashkil etish, oʻquv dasturlarini zamonaviy yondashuvlar asosida ishlab chiqish, oʻqitish boʻyicha trenerlarni tanlash va Kichik biznesga koʻmaklashish markazlarining (keyingi oʻrinlarda — markazlar) rahbar va xodimlari malakasini oshirishga masʼul hisoblanadi;

markazlar oʻquv jarayonlarini Biznes va tadbirkorlik oliy maktabi, uning hududiy filiallari, oliy taʼlim muassasalari, “Ishga marhamat” monomarkazlari, kasb-hunarga oʻqitish markazlari, sanoat korxonalari, erkin iqtisodiy zonalari va kichik sanoat zonalari, texnoparklar hamda sanoat klasterlari bilan oʻzaro hamkorlikda amalga oshiradi;

Dasturda ishtirok etadigan tijorat banklari tomonidan amaliy oʻquv kurslarini muvaffaqiyatli tugatib, sertifikat olgan tashabbuskorlar loyihalari mazkur qarorga 1-ilovaga muvofiq tartibda moliyalashtiriladi;

Dasturda ishtirok etish, moliyaviy va konsultativ qoʻllab-quvvatlash vositalaridan foydalanish borasidagi barcha jarayonlar, shu jumladan, tijorat banklari tomonidan soddalashtirilgan tartibda qaror qabul qilish, kredit shartnomalarini rasmiylashtirish va loyihalarni monitoring qilish Biznes portal orqali amalga oshiriladi.

4. Iqtisodiyot va moliya vazirligi hamda tijorat banklarining quyidagi takliflariga rozilik berilsin:

a) “Biznesni rivojlantirish banki” ATBga joylashtirilgan:

223 mlrd soʻm miqdoridagi subordinar qarzning asosiy qarz toʻlovini 2030-yildan boshlab 5 yil davomida teng ulushlarda qaytarish;

320,9 mlrd soʻm miqdoridagi kredit liniyasi mablagʻlarini qaytarishning soʻnggi muddatini oʻzgartirmagan holda, asosiy qarz toʻlovini 2030-yildan boshlab teng ulushlarda toʻlab berish sharti bilan subordinar qarz sifatida qayta rasmiylashtirish;

b) “Mikrokreditbank” ATBga 977 mlrd soʻm miqdoridagi resurs joylashtirish maqsadida tuzilgan kredit va depozit shartnomalari boʻyicha qoldiq summasini shartnomalarning dastlabki shartlarini oʻzgarishsiz qoldirgan holda subordinar qarz sifatida qayta rasmiylashtirish;

v) “Har bir oila — tadbirkor” dasturi doirasida “Mikrokreditbank” ATBga joylashtirilgan 425 mlrd soʻm miqdoridagi depozit mablagʻlarni qaytarish muddatini 7 yilga uzaytirish.

Bunda mazkur bandning “a” va “b” kichik bandlarida nazarda tutilgan mablagʻlar Dastur doirasidagi loyihalarni moliyalashtirishga yoʻnaltiriladi.

Iqtisodiyot va moliya vazirligi ikki hafta muddatda tegishli shartnomalarga ushbu banddan kelib chiqib oʻzgartirish va qoʻshimchalar kiritilishini taʼminlasin.

6. 2024-yil 1-fevraldan boshlab shunday tartib oʻrnatilsinki, unga koʻra:

Soliq qoʻmitasi Biznes portaldagi maʼlumotlar asosida Dastur doirasida moliyaviy qoʻllab-quvvatlash vositalaridan foydalanishni boshlagan kichik tadbirkorlik subyektlari toʻlagan soliq summasining ikki yil davomida alohida hisobini yuritadi hamda Iqtisodiyot va moliya vazirligiga har oyda maʼlumot taqdim etib boradi;

Iqtisodiyot va moliya vazirligi har yarim yillik yakunlari boʻyicha Soliq qoʻmitasi maʼlumotlari asosida mazkur tadbirkorlik subyektlari tomonidan toʻlangan soliqlar hajmiga teng miqdorda “Biznesni rivojlantirish banki” ATBga foizsiz budjet ssudasi ajratadi.

7. “Biznesni rivojlantirish banki” ATB:

ikki oy muddatda xalqaro moliya institutlari, konsalting kompaniyalari va ekspertlarni jalb etgan holda bankning aktivlari, operatsion va biznes jarayonlarini toʻliq xatlovdan oʻtkazib, samarasiz xarajatlarni qisqartirish va bank tashkiliy tuzilmasini optimallashtirish chora-tadbirlarini;

2024-yil 1-aprelga qadar 2024 — 2026-yillarda bankni rivojlantirish va raqamli transformatsiya qilish strategiyasini tasdiqlasin.

8. Oʻzbekiston Respublikasi Prezidentining “Kichik biznesni rivojlantirishni moliyaviy va institutsional qoʻllab-quvvatlash chora-tadbirlari toʻgʻrisida” 2023-yil 14-sentabrdagi PQ-306-son qaroriga muvofiq “Biznesni rivojlantirish banki” ATBning 1,14 trln soʻmlik qoʻshimcha aksiyalarni chiqarish toʻgʻrisidagi qarori Istiqbolli loyihalar milliy agentligida davlat roʻyxatidan oʻtkazilganligi maʼlumot uchun qabul qilinsin.

Istiqbolli loyihalar milliy agentligiga Iqtisodiyot va moliya vazirligi bilan birgalikda bir oy muddatda Tiklanish va taraqqiyot jamgʻarmasi tomonidan “Biznesni rivojlantirish banki” ATB ustav kapitalini oshirish uchun ajratilgan 75,0 mln AQSH dollari miqdoridagi mablagʻlar hisobidan “Biznesni rivojlantirish banki” ATBning qoʻshimcha aksiyalar chiqarish toʻgʻrisidagi qaroriga tegishli oʻzgartirish va qoʻshimchalar kiritilishi munosabati bilan uni davlat roʻyxatidan oʻtkazish tavsiya etilsin.

9. “Mikrokreditbank” ATB hamda Kambagʻallikni qisqartirish va bandlik vazirligining:

aholini kasb-hunarga oʻqitish va malakasini oshirish, kasanachilarga kompleks yordam berish, kasanachilar va faoliyatini kasanachilik asosida tashkil etmoqchi boʻlgan tadbirkorlik subyektlariga bepul maslahat, konsalting xizmatlarini koʻrsatishga ixtisoslashgan “Kasanachilar maktabi”ni tashkil etish;

tajribali kasanachilarni “Kasanachilar maktabi”da muassis sifatida ishtirok etishga jalb qilish;

har yili oilaviy tadbirkorlikni rivojlantirish dasturlari doirasida “Mikrokreditbank” ATBga ajratilgan resurslarning kamida 100 mlrd soʻm qismini kasanachilik loyihalarini moliyalashtirishga yoʻnaltirish toʻgʻrisidagi takliflariga rozilik berilsin.

10. Kambagʻallikni qisqartirish va bandlik vazirligi:

“Mikrokreditbank” ATBga “Kasanachilar maktabi” faoliyatini tashkil etish va oʻquv dasturlarini ishlab chiqishga uslubiy koʻmaklashsin;

“Kasanachilar maktabi”da ishsiz va band boʻlmagan fuqarolarni oʻqitish, kasanachilarga asbob-uskunalar va xom ashyo xarid qilish xarajatlari belgilangan tartibda Kambagʻallikni qisqartirish davlat maqsadli jamgʻarmasi mablagʻlari hisobidan qoplab berilishini taʼminlasin.

11. Vazirlar Mahkamasining 2022-yil 22-fevraldagi 86-son qarori bilan tasdiqlangan Maxsus elektron tizim orqali ruxsat etish xususiyatiga ega ayrim hujjatlarni berish tartib-taomillari toʻgʻrisidagi yagona nizomga 2-ilovaga muvofiq oʻzgartirish va qoʻshimchalar kiritilsin.

12. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.

Vazirlar Mahkamasining 2024-yil 20-yanvardagi 37-son qaroriga 1-ILOVA

“Kichik biznesni uzluksiz qoʻllab-quvvatlash” kompleks dasturi tashabbuskorlarini tanlash, ularning loyihalarini qoʻllab-quvvatlash va moliyalashtirish toʻgʻrisida

1-bob. Umumiy qoidalar

1. Ushbu Nizom “Kichik biznesni uzluksiz qoʻllab-quvvatlash” kompleks dasturida ishtirok etish huquqiga ega tashabbuskorlar loyihalarini tanlab olish, moliyalashtirish hamda monitoring qilish tartibini belgilaydi.

2. Mazkur Nizomda quyidagi asosiy tushunchalardan foydalaniladi:

Dastur — kichik biznes subyektlarini moliyaviy va konsultativ qoʻllab-quvvatlashni nazarda tutuvchi “Kichik biznesni uzluksiz qoʻllab-quvvatlash” kompleks dasturi;

Jamgʻarma — Dasturni amalga oshirishni tashkil etish hamda “Kichik biznesga koʻmaklashish markazi” MCHJlar faoliyatini muvofiqlashtirib borishga masʼul “Kichik biznesni rivojlantirish jamgʻarmasi” MCHJ;

markazlar — Qoraqalpogʻiston Respublikasi, viloyatlar va Toshkent shahrida Dastur doirasida tashabbuskorlarni oʻqitish, loyihalarni amalga oshirishga koʻmaklashish va ularning monitoringini yuritishga masʼul boʻlgan “Kichik biznesga koʻmaklashish markazi” MCHJlar;

hamkor banklar — Dastur doirasida loyihalarni moliyalashtirishda ishtirok etuvchi AT “Xalq banki”, “Mikrokreditbank” ATB va boshqa tijorat banklari;

hokim yordamchisi — mahallada tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha tuman (shahar) hokimi yordamchisi;

moliyaviy qoʻllab-quvvatlash vositalari — Dastur doirasida kredit ajratish, lizing berish, foizsiz boʻlib toʻlash sharti bilan qarz ajratish, loyihalarda ulushdor boʻlib ishtirok etish va grant mablagʻlari taqdim etish orqali koʻrsatiladigan qoʻllab-quvvatlash choralari;

konsultativ qoʻllab-quvvatlash choralari — Dastur doirasida litsenziya, ruxsatnoma va sertifikatlar olish, soliq, bojxona, tashqi savdo faoliyati, davlat xaridlari, yer uchastkalari va bino-inshootlar ajratish masalalarida koʻmaklashish, shuningdek, imtiyoz va preferensiyalar, boshqa yengilliklar va imkoniyatlar boʻyicha maʼlumot va maslahatlar berish;

baholash guruhi — istiqbolli loyihalarni tanlab olish, toifalarga ajratish va biznes loyihani baholashga masʼul markazlar huzuridagi Loyihalarni baholash va tanlash guruhi;

loyiha tashabbuskori — kamida 1 yil uzluksiz faoliyat yuritib kelayotgan yakka tartibdagi tadbirkorlar, dehqon xoʻjaliklari, oʻzini oʻzi band qilganlar, hunarmandlar, kasanachilar, shuningdek, uch va undan ortiq kishini doimiy ish bilan taʼminlab kelayotgan kichik tadbirkorlik subyektlari va nodavlat taʼlim tashkilotlari hamda oilaviy tadbirkorlik dasturlari doirasida oʻz biznes loyihalarini muvaffaqiyatli amalga oshirib, ijobiy kredit tarixiga ega yuridik va jismoniy shaxslar;

vakolatli organlar — Dastur doirasida loyiha tashabbuskorlarini tanlash, oʻqitish, loyihalarni baholash va amalga oshirish bilan bogʻliq jarayonlarda oʻzaro hamkorlik qiluvchi tashkilotlar;

Biznes portal — Dasturda ishtirok etish bilan bogʻliq biznes jarayonlarni avtomatlashtirilgan holda tashkil etish va muvofiqlashtirib borish imkonini beradigan elektron platforma;

sertifikat — amaliy oʻquv kursini muvaffaqiyatli tugatib, biznes rejasini himoya qilgan loyiha tashabbuskoriga markazlar tomonidan taqdim qilinadigan va Dastur doirasida moliyaviy qoʻllab-quvvatlash vositalaridan foydalanish huquqini beruvchi QR-kodli (shtrixli) hujjat;

yuqori texnologik startap — soʻnggi texnologiyalar va ilm-fan yutuqlariga asoslangan innovatsion mahsulotlarni (xizmatlarni) ishlab chiqarish (koʻrsatish) va tijoratlashtirish, yangi yechimlarni joriy etish yoki mavjudlarini yaxshilashga qaratilgan tavakkalchiligi yuqori boʻlgan loyiha;

ulushga konvertatsiya qilinadigan investitsiya — investor, jumladan, venchur fondi tomonidan startap loyihaga kelgusida uning negizida tashkil etiladigan yuridik shaxs ustav kapitalidagi ulushga konvertatsiya qilish sharti bilan yoʻnaltiriladigan investitsiyalar.

3. Dasturda ishtirok etish va moliyaviy qoʻllab-quvvatlash choralaridan Biznes portal orqali foydalaniladi va shu bilan bogʻliq biznes jarayonlarining har bir bosqichini onlayn kuzatish imkoniyati yaratiladi.

4. Dastur doirasida loyiha tashabbuskorlarini baholash, oʻqitish, moliyaviy, konsultativ qoʻllab-quvvatlash va loyiha monitoringini yuritish ushbu Nizomga 1-ilovadagi sxemaga muvofiq amalga oshiriladi.

2-bob. Dastur ishtirokchilarini tanlab olish tartibi

5. Loyiha tashabbuskori Dasturda ishtirok etish uchun Biznes portal orqali onlayn tarzda ikki bosqichda murojaat qiladi:

1-bosqichda — loyihani tanlab olish va amaliy oʻquv kursida ishtirok etish uchun loyihaning dastlabki hisob-kitoblari hamda foydalanish rejalashtirilgan moliyaviy qoʻllab-quvvatlash vositalari koʻrsatilgan ariza yuboriladi;

2-bosqichda — sertifikat olgandan soʻng zarur hujjatlarni ilova qilgan holda moliyaviy qoʻllab-quvvatlash vositalaridan foydalanish uchun ariza yuboriladi.

Dastur doirasida grant mablagʻlarini taqdim etish vositasidan foydalanish uchun loyiha tashabbuskorlari mazkur Nizom 4-bobining 6-paragrafida belgilangan tartibda Biznes portal orqali murojaat qiladi.

6. Loyihani tanlab olish va amaliy oʻquv kursida ishtirok etish uchun ariza berilgandan soʻng Biznes portal orqali loyiha tashabbuskori ikki ish kunida skoringdan oʻtkaziladi.

Skoring uchun zarur maʼlumotlar davlat organlari va tashkilotlari hamda tijorat banklaridan elektron axborot almashinuvi orqali olinadi.

Loyiha tashabbuskori skoring natijalari toʻgʻrisida Biznes portal orqali xabardor qilinadi.

7. Hokim yordamchisi uch kun muddatda bevosita joyiga chiqqan holda skoringdan oʻtgan loyiha tashabbuskori bilan uchrashib, uning ushbu Nizomga 2-ilovadagi savolnoma asosida belgilangan mezonlarga muvofiqligini oʻrganadi hamda natijalari toʻgʻrisidagi xulosani Biznes portalga joylashtiradi.

Hokim yordamchisining ijobiy xulosalari asosida Biznes-portalda avtomatik ravishda tashabbuskorlarning dastlabki roʻyxati shakllantiriladi.

8. Markazlar huzurida ushbu Nizomga 3-ilovaga muvofiq namunaviy tarkibda loyihalarni baholash va tanlash guruhlari tashkil qilinadi.

Loyiha tashabbuskorlarining faoliyat davri, pul aylanmasi va ishchilar soniga qarab, ularning tadbirkorlik koʻnikmasi va biznes-rejalarining yashovchanligi samaradorligi Jamgʻarma tomonidan tasdiqlanadigan metodika asosida baholanadi. Baholash metodikasi Biznes portalga joylashtiriladi.

9. Baholash guruhlari uch ish kunida dastlabki roʻyxatga kiritilgan loyiha tashabbuskorlarining istiqbolli loyihalarini tanlab oladi va ushbu Nizomga 4-ilovaga muvofiq ularni toifalarga ajratadi.

Baholash guruhining har bir aʼzosi loyihalarni tanlab olish va toifalarga ajratish masalalarida uch ish kunida oʻz fikr va mulohazalarini berishi shart. Guruh aʼzosi ushbu muddat davomida munosabat bildirmagan taqdirda, u tomonidan ijobiy xulosa berilgan deb hisoblanadi.

3-bob. Markazlar tomonidan oʻqitish jarayonini tashkil etish

10. Markazlar loyiha tashabbuskorlarini oʻqitish uchun Vazirlar Mahkamasi huzuridagi Biznes va tadbirkorlik oliy maktabi va uning hududiy filiallari, Oʻzbekiston Respublikasi Oliy taʼlim, fan va innovatsiyalar vazirligi huzuridagi Innovatsion rivojlanish agentligi, oliy taʼlim muassasalari, “Ishga marhamat” monomarkazlari, kasb-hunarga oʻqitish markazlari, sanoat korxonalari, erkin iqtisodiy zonalar va kichik sanoat zonalari, texnoparklar hamda sanoat klasterlari bilan hamkorlikda qisqa va oʻrta muddatli amaliy oʻquv kurslarini tashkil qiladi.

Oʻquv kurslarini samarali tashkil qilish maqsadida shartnoma asosida nodavlat taʼlim tashkilotlari ham jalb qilinishi mumkin.

11. Loyiha tashabbuskorlari amaliy oʻquv kurslarida kichik tadbirkorlik subyektlarining loyihalari boʻyicha biznes-rejalarni ishlab chiqish, moliyalashtirish va ishga tushirish, sotuv bozorlarini kengaytirish, xususiy investitsiya sheriklarini jalb qilish, biznesni tashkil etish hamda yuritish bilan bogʻliq boshqa yoʻnalishlar boʻyicha oʻqitiladi.

12. Loyiha tashabbuskorlari amaliy oʻquv kurslari yakunlarida biznes-rejasini himoya qiladi.

13. Qisqa va oʻrta muddatli amaliy oʻquv kurslarini muvaffaqiyatli tugatgan va oʻz loyihasini himoya qilgan loyiha tashabbuskorlariga bir kun muddatda markazlar tomonidan Dastur doirasidagi qoʻllab-quvvatlash mexanizmlaridan foydalanish huquqini beradigan sertifikat taqdim etiladi.

Bunda oʻzini oʻzi band qilgan shaxslar, hunarmandlar, kasanachilar va oilaviy tadbirkorlik dasturlari doirasida oʻz biznes loyihalarini muvaffaqiyatli amalga oshirgan jismoniy shaxslar moliyaviy instrumentlardan foydalanish huquqini qoʻlga kiritganda belgilangan tartibda tadbirkorlik subyekti sifatida davlat roʻyxatidan oʻtkazilishi lozim.

4-bob. Moliyaviy qoʻllab-quvvatlash vositalaridan foydalanish tartibi

14. Moliyaviy qoʻllab-quvvatlash vositalaridan foydalanish boʻyicha ariza loyiha tashabbuskori tomonidan mustaqil ravishda yoki markazlarning koʻmagi bilan Biznes portal orqali taqdim etiladi.

15. Loyiha tashabbuskori oʻz arizasida quyidagi moliyaviy qoʻllab-quvvatlash vositalaridan birini yoki bir nechtasini koʻrsatishi mumkin:

100,0 mln soʻmgacha garovsiz kredit;

150,0 mln soʻmgacha garov talabi pasaytirilgan revolver kredit;

500,0 mln soʻmgacha kredit;

1,0 mlrd soʻmgacha kredit;

1,5 mlrd soʻmgacha kredit;

1,5 mlrd soʻmgacha lizing xizmati;

1,5 mlrd soʻmgacha foizsiz boʻlib toʻlash sharti bilan qarzga asosiy vosita olib berish;

loyiha qiymatining 20 foizigacha qismiga, biroq 1,0 mlrd soʻmgacha boʻlgan miqdorda ulushdor boʻlib ishtirok etish;

2,0 mlrd soʻmgacha grant mablagʻlari taqdim etish.

15 1 . Oʻzini oʻzi band qilgan shaxslarga tadbirkorlik faoliyatini boshlash uchun 100 mln soʻmgacha garovsiz kreditlarning 50 foiz qismi ularning bank kartasiga oʻtkazib berilishi mumkin.

16. Loyiha tashabbuskoriga bir vaqtning oʻzida bir nechta moliyaviy qoʻllab-quvvatlash vositalari taqdim qilinganda, ularning umumiy miqdori 2 mlrd soʻmdan oshmasligi lozim.

Tadbirkorlik subyektlari ushbu limit doirasida mavjud kreditga qoʻshimcha ravishda moliyaviy qoʻllab-quvvatlash vositalaridan takroran foydalanishlariga ruxsat etiladi.

17. Moliyalashtirish maʼqullangan arizalar mavjud resurs mablagʻlari doirasida roʻyxatga olingan identifikatsiya raqami ketma-ketligi asosida moliyalashtirib boriladi.

18. Dastur boʻyicha taqdim qilinadigan moliyaviy qoʻllab-quvvatlash vositalari tijorat banklarida buxgalteriya hisobining hisobvaraqlar rejasiga muvofiq alohida hisobvaraqlarda yuritiladi.

1-§. Kredit va lizing ajratish

19. Loyiha tashabbuskori kredit (yoki lizing) xizmatidan foydalanish uchun Biznes portal orqali oʻz arizasiga xizmat koʻrsatuvchi tijorat bankining ichki kredit siyosatidan kelib chiqib tegishli hujjatlarni ilova qiladi.

Talab etiladigan hujjatlar roʻyxati tayanch bank va hamkor banklar tomonidan Biznes portalga joylashtiriladi.

20. Loyiha tashabbuskorlaridan qoʻshimcha hujjatlar talab qilishga yoʻl qoʻyilmaydi. Tijorat banklari boshqa idoralarda mavjud axborot va maʼlumotlarni Biznes portal orqali idoralararo elektron hamkorlik yoʻli bilan mustaqil ravishda oladi.

21. Arizalar besh ish kunidan oshmagan muddatda koʻrib chiqilib, natijasi boʻyicha kredit (lizing) ajratish yoki uni rad etish haqida qaror qabul qilinadi.

Bunda 1 mlrd soʻmgacha kredit (lizing) ajratish toʻgʻrisidagi qaror tijorat banklarining hududiy filiallari tomonidan qabul qilinadi.

22. Tegishli hujjatlar toʻliq taqdim etilmagan yoki yolgʻon maʼlumotlar taqdim etilgan hollarda, arizani koʻrib chiqish rad etiladi. Boshqa sabablarga koʻra arizani koʻrib chiqishni rad etish taqiqlanadi.

2-§. Foizsiz boʻlib toʻlash sharti bilan qarzga asosiy vosita olib berish

23. Loyiha tashabbuskori Biznes portal orqali oʻz arizasiga Jamgʻarma qarori asosida belgilangan hujjatlarni ilova qiladi. Bunda mazkur hujjatlar roʻyxati Biznes portalda ochiq-oshkora eʼlon qilinadi va unda nazarda tutilmagan hujjatlarni talab qilish taqiqlanadi.

24. Arizalar besh ish kunidan oshmagan muddatda koʻrib chiqilib, natijasi boʻyicha markazlar tomonidan mazkur moliyaviy yordam instrumentini taqdim etish yoki uni rad etish haqida qaror qabul qilinadi.

25. Tegishli hujjatlar toʻliq taqdim etilmagan yoki yolgʻon maʼlumotlar taqdim etilgan, shuningdek, talabgor belgilangan talablarga nomuvofiq boʻlgan hollarda moliyaviy yordam vositasini taqdim etish rad etiladi. Boshqa sabablarga koʻra, arizani koʻrib chiqishni rad etish taqiqlanadi.

3-§. Loyihalarda davlat mulki obyekti bilan ulushdor boʻlib ishtirok etish vositasi

26. Loyiha tashabbuskori yangi loyihalarga va mavjud ishlab chiqarishni kengaytirishga oid loyihalariga boʻsh turgan davlat mulki obyektlari (keyingi oʻrinlarda — obyekt) bilan mazkur loyiha amalga oshirilayotgan tadbirkorlik subyektining ustav kapitaliga ulushdor boʻlib kirish toʻgʻrisidagi arizani Biznes portal orqali quyidagilarni ilova qilgan holda markazlarga yuboradi:

aniq obyektga doir tegishli maʼlumotlar;

loyiha qiymati, shu jumladan, loyiha tashabbuskori tomonidan moliyalashtiriladigan qismining manbalari.

27. Markazlar tomonidan loyiha tashabbuskori hisoblangan tadbirkorlik subyekti ustav kapitalida ishtirok etishi quyidagilar orqali amalga oshiriladi:

savdoda turgan obyektni sotib olish toʻlovlarini amalga oshirish uchun Markazlar tomonidan mazkur toʻlov summasini (yoki uning bir qismini) maqsadli ravishda Markazlar ulushi sifatida rasmiylashtirish sharti bilan loyiha tashabbuskoriga oʻtkazib berish orqali;

savdoga qoʻyilmagan obyektlarni Oʻzbekiston Respublikasi Davlat aktivlarini boshqarish agentligi (keyingi oʻrinlarda — Agentlik) tomonidan markazlar ulushi sifatida loyiha tashabbuskoriga ustav kapitaliga kiritish orqali. Bunda mazkur obyektning baholash tashkiloti tomonidan aniqlangan qiymati (yoki uning bir qismi) markazlar tomonidan Agentlikka bir oy muddatda oʻtkazib beriladi.

3.1-§. S avdoda turgan obyekt qiymati toʻlovlarini amalga oshirish

28. Savdoda turgan obyekt qiymati toʻlovlarini amalga oshirish uchun loyiha tashabbuskori tomonidan markazlarga quyidagilar taqdim etiladi:

auksion natijalari toʻgʻrisidagi bayonnoma;

loyiha tashabbuskorining ustav kapitalida shakllanadigan markazlarga tegishli ulush miqdori hamda tadbirkorlik subyekti taʼsischilari safiga kiritilishini maʼqullash toʻgʻrisidagi Ishtirokchilar umumiy yigʻilishi qarori;

loyihani amalga oshirish biznes-rejasi.

29. Markazlar bir hafta muddatda taqdim etilgan hujjatlar toʻliqligi, biznes-rejaning Baholash metodikasiga muvofiqligini oʻrganib chiqib, loyiha tashabbuskoriga moliyaviy yordam vositasini taqdim etish yoki uni rad etish toʻgʻrisida qaror qabul qiladi.

30. Markazlar oʻz qarorini qabul qilgandan keyin ikki kun muddatda loyiha tashabbuskori bilan tadbirkorlik subyekti ustav kapitalida ishtirok etish toʻgʻrisidagi kelishuv loyihasini taqdim etadi.

Kelishuv tuzilgandan soʻng obyekt qiymati toʻlovlari summasi (summaning bir qismi) tadbirkorlik subyektiga oʻtkazib beriladi.

3.2 -§. Savdoga qoʻyilmagan obyektlarni Agentlik tomonidan markazlar ulushi sifatida loyiha tashabbuskori ustav kapitaliga kiritish

31. Savdoga qoʻyilmagan obyektni Agentlik tomonidan markazlar ulushi sifatida loyiha tashabbuskori ustav kapitaliga kiritish uchun loyiha tashabbuskori tomonidan markazga biznes-reja taqdim etiladi.

32. Markazlar bir hafta muddatda biznes-rejaning Baholash metodikasiga muvofiqligini oʻrganib chiqib, loyiha tashabbuskoriga moliyaviy yordam vositasini taqdim etish yoki rad etish toʻgʻrisida qaror qabul qiladi.

33. Moliyaviy yordam vositasini taqdim etish toʻgʻrisida qaror qabul qilinganda:

markazlar tomonidan ikki kun muddatda Agentlikka obyektni loyiha tashabbuskorining ustav kapitaliga kiritish maqsadida uni baholash va ustav kapitaliga markazlar ulushi sifatida berish toʻgʻrisida qaror qabul qilish yuzasidan Biznes portal orqali murojaat yuboradi;

Agentlik ikki hafta muddatda obyektni tadbirkorlik subyekti ustav kapitaliga kiritish masalasini balansda saqlovchi bilan kelishadi.

Balansda saqlovchi roziligi olingan holda ikki hafta muddatda obyektni baholanishini tashkil etadi va baholash hisobotini markazlarga taqdim etadi. Bunda baholash xizmatlari haqi markazlar tomonidan Agentlikka qoplab beriladi;

Markaz tomonidan ikki kun muddatda obyektni baholash toʻgʻrisidagi hisobot loyiha tashabbuskoriga taqdim etiladi.

34. Loyiha tashabbuskori tomonidan markazlarga loyiha tashabbuskorining ustav kapitalida shakllanadigan Markazga tegishli ulush miqdori hamda tadbirkorlik subyekti taʼsischilari safiga kiritilishini maʼqullash toʻgʻrisidagi Ishtirokchilar umumiy yigʻilishi qarori taqdim etiladi.

35. Markazlar ikki kun muddatda loyiha tashabbuskori bilan tadbirkorlik subyekti ustav kapitalida ishtirok etish toʻgʻrisidagi kelishuv loyihasini taqdim etadi.

Kelishuv tuzilgandan soʻng Agentlik tomonidan obyektni loyiha tashabbuskori ustav kapitaliga markazlar ulushini shakllantirish hisobiga kiritish toʻgʻrisida buyruq qabul qilinadi va obyektni sotib olish toʻlovlari summasi (summasining bir qismi) markazlar tomonidan Agentlikka oʻtkazib beriladi. Bunda obyektning baholangan qiymati loyiha tashabbuskori ustav kapitalining 20 foizdan ortigʻini tashkil etsa, obyekt uchun toʻlovning qolgan qismi loyiha tashabbuskori tomonidan toʻlanadi.

4-§. Loyihalarda yer uchastkalari bilan ulushdor boʻlib ishtirok etish

36. Qishloq xoʻjaligida foydalanilmaydigan yer uchastkalariga (keyingi oʻrinlarda — yer uchastkalari) boʻlgan mulk huquqi va ijara huquqi loyiha tashabbuskori tomonidan elektron onlayn-auksion orqali loyihani amalga oshirishning ehtiyojidan kelib chiqib sotib olinadi.

Yer uchastkalarini sotib olish uchun loyiha tashabbuskori tomonidan markazlarga quyidagilar taqdim etiladi:

auksion natijalari toʻgʻrisidagi bayonnoma;

loyiha tashabbuskorining ustav kapitalida shakllanadigan markazlarga tegishli ulush miqdori hamda tadbirkorlik subyekti taʼsischilari safiga kiritilishini maʼqullash toʻgʻrisidagi Ishtirokchilar umumiy yigʻilishi qarori;

loyihani amalga oshirish biznes-rejasi.

37. Markazlar bir hafta muddatda taqdim etilgan hujjatlar toʻliqligi, biznes-rejaning Baholash metodikasiga muvofiqligini oʻrganib chiqib, loyiha tashabbuskoriga moliyaviy yordam vositasini taqdim etish yoki uni rad etish toʻgʻrisida qaror qabul qiladi.

38. Markazlar oʻz qarorini qabul qilgandan keyin ikki kun muddatda loyiha tashabbuskori bilan tadbirkorlik subyekti ustav kapitalida ishtirok etish toʻgʻrisidagi kelishuv loyihasini taqdim etadi.

Kelishuv tuzilgandan soʻng obyekt qiymati summasi (summaning bir qismi) tadbirkorlik subyektiga oʻtkazib beriladi.

5-§. Loyihalarda asbob-uskunalar, bino va inshootlar hamda boshqa koʻrinishdagi moddiy aktivlar bilan ulushdor boʻlib ishtirok etish

39. Asbob-uskunalar, bino va inshootlar hamda boshqa koʻrinishdagi moddiy aktivlarni (keyingi oʻrinlarda — moddiy aktivlar) markazlar ulushi sifatida loyiha tashabbuskorining ustav kapitaliga kiritish uchun loyiha tashabbuskori Biznes portal orqali markazlarga ariza beradi.

Arizaga quyidagi maʼlumotlar ilova qilinadi:

bino va inshoot(lar) boʻyicha — joylashgan joyi, oʻlchamlari, konstruksiyalari, texnik holati, narxiga tegishli maʼlumotlar;

asbob-uskuna va boshqa koʻrinishdagi moddiy aktivlar boʻyicha — ularning xususiyati, texnologik vazifasi va narxiga tegishli maʼlumotlar;

loyihani amalga oshirish biznes-rejasi.

40. Markazlar bir hafta muddatda (baholash talab etilgan taqdirda bir oydan ortiq boʻlmagan muddatda) taqdim etilgan hujjatlarni toʻliqligi, biznes-rejaning Baholash metodikasiga muvofiqligini oʻrganib chiqib, loyiha tashabbuskoriga moliyaviy yordam vositasini taqdim etish yoki uni rad etish toʻgʻrisida qaror qabul qiladi.

Bunda markazlar koʻchmas mulk obyektlari narxiga oid shakllangan bozor maʼlumotlari tahlilidan kelib chiqib, obyektning mulkdori bilan kelishuvga asosan obyektni baholashdan oʻtkazishi mumkin.

41. Moliyaviy yordam vositasini taqdim etish toʻgʻrisida qaror qabul qilingan taqdirda, markazlar bir kun muddatda loyiha tashabbuskoriga kelishuv loyihasini yuboradi.

Bunda obyektni sotib olish shartlari, sotib olishdagi markazlarning hamda loyiha tashabbuskorining ulushi, oldi-sotdi shartnomasi loyihasi (mavjud boʻlsa) hamda bino va inshootni kiritish hisobiga tadbirkorlik subyektining ustav kapitalidagi ulushlar taqsimotiga oid hisob-kitoblar koʻrsatiladi.

42. Loyiha tashabbuskori bir oy muddatdan kechikmay kelishuv loyihasini maʼqullaydi yoki rad etadi. Kelishuv maʼqullanganda, markazlarning tadbirkorlik subyekti taʼsischilari safiga kiritilishini maʼqullash toʻgʻrisidagi qaror ilova qilinadi.

43. Bino va inshoot markazlar tomonidan sotib olinganda oldi-sotdi shartnomasi ikki tomonlama tarzda, markazlar tomonidan loyiha tashabbuskori ishtirokida sotib olinganda uch tomonlama tarzda rasmiylashtiriladi.

Sotib olingan bino va inshootni loyiha tashabbuskori hisoblangan tadbirkorlik subyekti ustav kapitaliga kiritish masalasi u sotib olingandan keyin uch kundan kechiktirmay tadbirkorlik subyektining tegishli boshqaruv organi muhokamasiga kiritilishi lozim.

6-§. Loyihalar uchun grant mablagʻlarini taqdim etish

44. Loyiha tashabbuskori Biznes portal orqali markazlarga ariza taqdim etadi va unga Vazirlar Mahkamasining 2020-yil 9-martdagi 133-son qarori bilan tasdiqlangan “Startap” loyihalarni tasdiqlash, moliyalashtirish va amalga oshirish tartibi toʻgʻrisidagi nizom talablari asosida ishlab chiqilgan loyiha hujjatlarini ilova qiladi.

45. Arizalarga muvofiq loyiha hujjatlari besh ish kunida baholash guruhlari tomonidan quyidagi mezonlar asosida 100 ballik shkala boʻyicha baholanadi:

innovatsionligi;

ijtimoiy qiymati va taʼsiri;

asoschi va jamoaning salohiyati;

yechimning maqsadga muvofiqligi;

amaldagi holati;

amalga oshirish samaradorligi;

loyihaning mavjud analoglaridan farqi xamda mavjud raqobatchilardan afzalligi;

loyihaning investitsion jozibadorligi hamda yuqori oʻsish salohiyatiga ega ekanligi;

loyihaning amalga oshirilishidan kutilayotgan natija;

moliyaviy koʻrsatkichlar tahlili.

Bunda 70 balldan yuqori baholangan loyihalar tanlab olinadi va Oʻzbekiston Respublikasi Oliy taʼlim, fan va innovatsiyalar vazirligi huzuridagi Innovatsion rivojlanish agentligiga yuboriladi.

46. Oʻzbekiston Respublikasi Oliy taʼlim, fan va innovatsiyalar vazirligi huzuridagi Innovatsion rivojlanish agentligi oʻn besh ish kunida taqdim etilgan loyiha hujjatlarini koʻrib chiqib, maʼqullangan loyihalarni markazlarga taqdim etadi. Bunda Innovatsion rivojlanish agentligi:

loyihalarni Oʻzbekiston Respublikasi Oliy taʼlim, fan va innovatsiyalar vazirligi huzuridagi Ilmiy-texnik kengash muhokamasiga kiritilishini;

Ilmiy-texnik kengash muhokamasidan muvaffaqiyatli oʻtgan loyihalarni Oʻzbekiston Respublikasi Oliy taʼlim, fan va innovatsiyalar vazirligi huzuridagi Ilm-fan va innovatsiyalar kengashi muhokamasida startap loyihani moliyalashtirish toʻgʻrisida qaror qabul qilinishini tashkil qiladi.

47. Markazlar maʼqullangan loyiha tashabbuskorlarini mazkur Nizomning 3-bobida belgilangan tartibda maxsus dasturlar asosida oʻqitadi va sertifikat olgan tashabbuskorlarni grant mablagʻlari ajratish uchun Oʻzbekiston Respublikasi Oliy taʼlim, fan va innovatsiyalar vazirligi huzuridagi Innovatsion rivojlanish agentligiga yoʻnaltiradi.

48. Oʻzbekiston Respublikasi Oliy taʼlim, fan va innovatsiyalar vazirligi huzuridagi Innovatsion rivojlanish agentligi mazkur loyihalarni oʻn besh kun muddatda belgilangan tartibda moliyalashtirishni boshlaydi.

49. Oʻzbekiston Respublikasi Oliy taʼlim, fan va innovatsiyalar vazirligi huzuridagi Innovatsion rivojlanish agentligi davlat ilmiy dasturlari doirasida moliyalashtirilgan tijoratlashtirish va startap loyihalari roʻyxatini amaliyotga joriy qilish va kengaytirishni qoʻllab-quvvatlash maqsadida markazlarga taqdim etib boradi.

5-bob. Maslahat xizmatlarini koʻrsatish tartibi

50. Loyiha tashabbuskorlari soʻroviga koʻra, markazlar tomonidan quyidagi masalalar boʻyicha maʼlumot va maslahatlar beriladi:

litsenziya, ruxsatnoma va sertifikatlar olish, bojxona hamda soliq maʼmuriyatchiligi, eksport va import operatsiyalari, shartnomalarni rasmiylashtirish;

davlat xaridlarida ishtirok etish, shuningdek, yer uchastkalari, bino va inshootlarni sotib olish yoki ijaraga olish va loyihalashtirish;

tadbirkorlikni qoʻllab-quvvatlash boʻyicha amaldagi imtiyoz va preferensiyalar, mavjud boshqa yengilliklar va imkoniyatlar.

51. Markazlar zarur hollarda loyiha tashabbuskorlariga davlat organlaridan tegishli hujjatlarni olish, shuningdek, imtiyoz va preferensiyalar qoʻllanilishini taʼminlashda koʻmaklashadi.

6-bob. Yakunlovchi qoidalar

52. Ushbu Nizom talablarini buzganlikda aybdor shaxslar qonunchilik hujjatlarida belgilangan tartibda javobgar boʻladi.

53. Dastur doirasida loyiha tashabbuskori yoki ishtirokchilar vakolatli organlarning, Jamgʻarma, markazlar va tijorat banklari masʼul xodimlarining, hokim yordamchisining harakatlari (harakatsizligi) ustidan qonunchilik hujjatlarida belgilangan tartibda shikoyat qilishi mumkin.

54. Davlat organlari va ularning mansabdor shaxslariga markazlar faoliyatiga, shu jumladan, ularning loyiha tashabbuskorlarini tanlab olish, loyihalarni baholash va moliyalashtirish, rahbar xodimlarini tayinlashga aralashish, shuningdek, markazlar mablagʻlari hisobidan turli xil xayriya (homiylik) toʻlovlar va badallar talab qilish taqiqlanadi.

“Kichik biznesni uzluksiz qoʻllab-quvvatlash” kompleks dasturi tashabbuskorlarini tanlash, ularning loyihalarini qoʻllab-quvvatlash va moliyalashtirish toʻgʻrisidagi nizomga 1-ILOVA

Dastur doirasida loyiha tashabbuskorlarini baholash, oʻqitish, moliyaviy va konsultativ qoʻllab-quvvatlash va loyiha monitoringini yuritish

Bosqichlar Masʼul ijrochilar Tadbirlar Muddatlar 1-bosqich Loyiha tashabbuskori 1. Dasturda ishtirok etish uchun Biznes portalda roʻyxatdan oʻtib, moliyaviy vositani koʻrsatgan holda ariza yuboradi. Oʻz xohishiga koʻra Biznes portal ( inson omilisiz ) 2. Ariza beruvchi onlayn skoringdan oʻtkaziladi hamda natijasi Markazga yuboriladi. Avtomatik tarzda Kichik biznesga koʻmaklashish markazi 3. Onlayn skoringda ijobiy deb baholanganda, loyiha joyiga chiqqan holda namunaviy shakldagi elektron savolnoma asosida oʻrganish uchun masʼul hokim yordamchisiga yuboriladi. Kelib tushgan kundan kechiktirmasdan Hokim yordamchisi 4. Oʻrganish natijalarini Biznes portal orqali markazga yuboradi. Uch kun muddatda Biznes portal ( inson omilisiz ) 5. Tashabbuskorlarning dastlabki roʻyxati shakllantiriladi. Avtomatik tarzda 2-bosqich Kichik biznesga koʻmaklashish markazi huzuridagi Loyihalarni baholash va tanlash guruhlari 1. Dastlabki roʻyxatga kiritilgan tashabbuskorlarning tadbirkorlik koʻnikmasi va biznes-rejalarining yashovchanligini baholash asosida istiqbolli loyihalar tanlab olinadi va ularning faoliyat davri, pul aylanmasi va ishchilar soniga qarab toifaga ajratiladi hamda oʻqitish uchun yoʻnaltiriladi. Uch kun muddatda Kichik biznesga koʻmaklashish markazi 2. Tavsiya etilgan loyiha tashabbuskorlari qisqa va oʻrta muddatli amaliy oʻquv kurslarida (masofaviy yoki anʼanaviy) oʻqitiladi. Tanlangan oʻquv dasturiga muvofiq Kichik biznesga koʻmaklashish markazi 3. Test (imtihon) sinovlarini muvaffaqiyatli topshirgan hamda tayyorlagan biznes-rejasini muvaffaqiyatli himoya qilgan tashabbuskorga sertifikat beriladi. Bir kun muddatda 3-bosqich Loyiha tashabbuskori 1. Sertifikat olgan tashabbuskor kompleks dastur doirasidagi qoʻllab-quvvatlash mexanizmlaridan foydalanishi uchun xizmat koʻrsatayotgan hamkor bankiga moliyaviy vositalardan foydalanish boʻyicha Biznes portal orqali onlayn ariza bilan murojaat qiladi. Loyiha tashabbuskori kredit (yoki lizing) xizmatidan foydalanish uchun Biznes portal orqali oʻz arizasiga xizmat koʻrsatuvchi tijorat bankining ichki kredit siyosatidan kelib chiqib, tegishli hujjatlarni ilova qiladi Oʻz xohishiga koʻra 2. Ariza va taqdim etilgan tegishli hujjatlar koʻrib chiqilib, natijasi boʻyicha quyidagi mos holdagi vakolatli idoralar moliyaviy vositalardan foydalanish yoki uni rad etish haqida qaror qabul qilinadi. Bunda: Tijorat banki kredit (lizing) Besh kun muddatda Kichik biznesga koʻmaklashish markazi boʻlib toʻlash sharti bilan qarz Besh kun muddatda ulush kiritish Kiritilayotgan ulush shaklidan kelib chiqib belgilanadi Innovatsion rivojlanish agentligi grant 15 ish kunida 4-bosqich Kichik biznesga koʻmaklashish markazi, tijorat banklari 1. Ishtirokchilar loyihalarining muntazam monitoringi yuritiladi. Har chorakda 2. Markaz loyihaga ulushdor boʻlib kirgan loyihalardagi oʻz ulushini bozor tamoyillari asosida belgilangan tartibda sotadi. Belgilangan tartib hamda muddatlarda

Kichik biznesni uzluksiz qoʻllab-quvvatlash” kompleks dasturi tashabbuskorlarini tanlash, ularning loyihalarini qoʻllab-quvvatlash va moliyalashtirish toʻgʻrisidagi nizomga 2-ILOVA

“Kichik biznesni uzluksiz qoʻllab quvvatlash” kompleks dasturi loyiha tashabbuskori _________________ning faoliyat yuritish joyiga chiqib oʻrganish

Tashkilot nomi/FIO * STIR/PINFL * Telefon raqami * Tadbirkorlik faoliyat turi * Loyiha maqsadi * Qaysi bank mijozi ** Loyihani amalga oshirish joyi * Kadastr yoki ijara shartnomasi raqami * Soʻralayotgan moliyaviy vosita nomi * Miqdori * Taʼminot turi * Soni * Rekvizitlari * Oxirgi 12 oylik pul aylanmasi ** (mavjud boʻlsa) Oilaviy tadbirkorlik dasturida ishtirok etgan Mavjud kredit qoldigʻi ** Kredit mablagʻining maqsadli ishlatilgani Ha Yoʻq Yaratilgan ishchi oʻrinlari Jami ishchilar soni ** Xulosa Loyiha tashabbuskorini dastlabki roʻyxatga kiritish tavsiya etiladimi? Ha Yoʻq Izoh Hokim yordamchisi

“Kichik biznesni uzluksiz qoʻllab-quvvatlash” kompleks dasturi tashabbuskorlarini tanlash, ularning loyihalarini qoʻllab-quvvatlash va moliyalashtirish toʻgʻrisidagi nizomga 3-ILOVA

Loyihalarni baholash va tanlash guruhining

1. Lavozimi boʻyicha — “Kichik biznesga koʻmaklashish markazi” MCHJ direktori — Loyihalarni baholash va tanlash guruhi rahbari 2. Lavozimi boʻyicha — Mahallada tadbirkorlikni rivojlantirish, aholi bandligini taʼminlash va kambagʻallikni qisqartirish masalalari boʻyicha tuman (shahar) hokimi yordamchisi 3. Kelishuvga asosan — Loyiha tashabbuskoriga xizmat koʻrsatuvchi tijorat bankining ishonchli vakili 4. Kelishuvga asosan — Ekspert 5. Kelishuvga asosan — Oʻzbekiston Respublikasi Oliy taʼlim, fan va innovatsiyalar vazirligi huzuridagi Innovatsion rivojlanish agentligi vakili

“Kichik biznesni uzluksiz qoʻllab-quvvatlash” kompleks dasturi tashabbuskorlarini tanlash, ularning loyihalarini qoʻllab-quvvatlash va moliyalashtirish toʻgʻrisidagi nizomga 4-ILOVA

Tashabbuskorlarni toifalarga ajratish mezonlari

T/r Toifalar 1-toifa 2-toifa 3-toifa 4-toifa 1. Moliyaviy vosita turi 100 million soʻmgacha garovsiz kreditlar 150 million soʻmgacha garov talabi pasaytirilgan revolver kreditlar 500 million soʻmgacha kreditlar 1 milliard soʻmgacha kreditlar 1,5 milliard soʻmgacha kreditlar 1,5 milliard soʻmgacha lizing xizmatlari koʻrsatish 1,5 milliard soʻmgacha foizsiz boʻlib toʻlash sharti bilan qarzga asosiy vosita olib berish Loyihalarda 1 milliard soʻmgacha miqdorda ulushdor boʻlib ishtirok etish 2 milliard soʻmgacha grant mablagʻlari taqdim etish 2. Vositani olish maqsadi loyihani amalga oshirish loyihani amalga oshirish loyihani amalga oshirish loyihani amalga oshirish loyihani amalga oshirish asbob-uskunalar, texnologik jihozlar va maxsus texnikalarni sotib olish asbob-uskunalar, texnologik jihozlar va maxsus texnikalarni sotib olish boʻsh turgan davlat mulki obyektlari va yer maydonlari, asbob-uskunalar, bino va inshootlar hamda boshqa koʻrinishdagi moddiy aktivlarni sotib olish innovatsion ishlanmalarni tijoratlashtirish va yuqori texnologik startap loyihalarni moliyalashtirish 3. Ishchi oʻrinlarning mavjudligi yakka tartibdagi tadbirkorlar, dehqon xoʻjaliklari, oʻzini oʻzi band qilgan shaxslar, hunarmandlar, kasanachilar, nodavlat taʼlim tashkilotlari, uch va undan ortiq kishini doimiy ish bilan taʼminlayotgan kichik tadbirkorlik subyektlari kichik tadbirkorlik subyektlari-3 va undan ortiq kishini doimiy ish bilan taʼminlayotgan kichik tadbirkorlik subyektlari — kamida 4 nafar kishini doimiy ish bilan taʼminlayotgan kichik tadbirkorlik subyektlari-kamida 5 nafar kishini doimiy ish bilan taʼminlayotgan kichik tadbirkorlik subyektlari-kamida 10 nafar kishini doimiy ish bilan taʼminlayotgan kichik tadbirkorlik subyektlari-kamida 10 nafar kishini doimiy ish bilan taʼminlayotgan kichik tadbirkorlik subyektlari-kamida 10 nafar kishini doimiy ish bilan taʼminlayotgan kichik tadbirkorlik subyektlari-kamida 10 nafar kishini doimiy ish bilan taʼminlayotgan kichik tadbirkorlik subyektlari-3 va undan ortiq kishini doimiy ish bilan taʼminlayotgan 4. Pul aylanmasiga talab talab mavjud emas talab mavjud emas oxirgi 12 oyda aylanma mablagʻlari miqdori 200 million soʻmdan ziyod boʻlgan oxirgi 12 oyda aylanma mablagʻlari miqdori 500 mln soʻmdan 10 mlrd soʻmgacha oxirgi 12 oyda aylanma mablagʻlari miqdori 1 mlrd soʻmdan 10 mlrd soʻmgacha oxirgi 12 oyda aylanma mablagʻlari miqdori 1 mlrd soʻmdan 10 mlrd soʻmgacha oxirgi 12 oyda aylanma mablagʻlari miqdori 1 mlrd soʻmdan 10 mlrd soʻmgacha oxirgi 12 oyda aylanma mablagʻlari miqdori 1 mlrd soʻmdan 10 mlrd soʻmgacha talab mavjud emas

Vazirlar Mahkamasining 2024-yil 20-yanvardagi 37-son qaroriga 2-ILOVA

Vazirlar Mahkamasining 2022-yil 22-fevraldagi 86-son qarori bilan tasdiqlangan Maxsus elektron tizim orqali ruxsat etish xususiyatiga ega ayrim hujjatlarni berish tartib-taomillari toʻgʻrisidagi yagona nizomga kiritilayotgan oʻzgartirish va qoʻshimchalar

20-ilovada :

a) 7-pozitsiyaning uchinchi ustuni quyidagi mazmundagi toʻrtinchi xatboshi bilan toʻldirilsin:

“Kichik biznesga koʻmaklashish markazlari tomonidan yangi loyihalar uchun tadbirkorlik subyektlariga tor doiradagi mutaxassis sifatida jalb qilingan chet el fuqarolari uchun — bazaviy hisoblash miqdorining 1 baravari miqdorida”;

toʻrtinchi — oʻninchi xatboshilar tegishlicha beshinchi — oʻn birinchi xatboshilar deb hisoblansin;

b) 11-pozitsiyaning uchinchi ustuni quyidagi mazmundagi “a 1 ” kichik bandi bilan toʻldirilsin:

“a 1 ) Kichik biznesga koʻmaklashish markazlari tavsiyasiga asosan yangi loyihalar doirasida tor doiradagi mutaxassis sifatida jalb qilingan chet el fuqarolari uchun — tasdiqnomalar mehnat shartnomasi amal qiladigan muddatga, biroq uch yildan ortiq boʻlmagan muddatga cheksiz marta uzaytirish imkoniyati bilan, ammo har bir holatda uch yildan ortiq boʻlmagan muddatga”.

Oʻzbekiston Respublikasining Bosh vaziri A. ARIPOV

Toshkent sh.,

2024-yil 20-yanvar,

37-son

(Qonunchilik maʼlumotlari milliy bazasi, 22.01.2024-y., 09/24/37/0056-son; 01.04.2024-y., 09/24/181/0259-son; 15.05.2024-y., 09/24/282/0347-son; 30.12.2024-y., 07/24/455/1092-son; 10.11.2025-y., 09/25/709/1027-son)

lex.uz