📅 2024-yil 22-yanvar · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 22 январь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 22 января 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 22 January 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
ВАҚТИНЧАЛИК НИЗОМ
Юк ва йўловчиларни ташишда автотранспорт воситаларига йўл варақаларини электрон шаклда расмийлаштириш ва юритиш тизимини жорий этиш тўғрисида
Ўзбекистон Республикасида автомобиль транспортида ташишлар хавфсизлигини таъминлаш, ҳайдовчилар ва автотранспорт воситалари ишини ҳисобга олиш ва назорат қилиш тизимини янада такомиллаштириш, соҳага рақамли технологияларни кенг жорий этиш, шунингдек, Ўзбекистон Республикаси Президентининг «2022 — 2026 йилларга мўлжалланган Янги Ўзбекистоннинг тараққиёт стратегиясини «Инсонга эътибор ва сифатли таълим йили»да амалга оширишга оид давлат дастури тўғрисида» 2023 йил 28 февралдаги ПФ-27-сон Фармони ижросини таъминлаш мақсадида Вазирлар Маҳкамаси қарор қилади:
1. Ўзбекистон Республикаси Президентининг 2023 йил 28 февралдаги ПФ-27-сон Фармони билан тасдиқланган 2022 — 2026 йилларга мўлжалланган Янги Ўзбекистоннинг тараққиёт стратегиясини «Инсонга эътибор ва сифатли таълим йили»да амалга оширишга оид давлат дастурининг 141-бандида товар-моддий бойликларни ташиш учун товар-транспорт юк хатлари ва йўл варақаларини электрон шаклда расмийлаштириш тартибини жорий этиш белгиланганлиги маълумот учун қабул қилинсин.
2. Ўзбекистон Республикаси Транспорт вазирлигининг 2024 йил 1 апрелдан 2024 йил 1 октябрга қадар Юк ва йўловчиларни ташишда автотранспорт воситаларига йўл варақаларини электрон шаклда расмийлаштириш ва юритиш тизимини жорий этиш бўйича тажриба-синов лойиҳасини (кейинги ўринларда — тажриба-синов лойиҳаси) амалга ошириш тўғрисидаги таклифига розилик берилсин.
Белгилансинки, тажриба-синов лойиҳасини амалга ошириш даврида:
электрон йўл варақалари Ўзбекистон Республикаси Транспорт вазирлигининг «Uztrans» ягона интерактив ахборот тизимининг «Электрон йўл варақа» автоматлаштирилган ахборот тизими (кейинги ўринларда — электрон йўл варақалари тизими) орқали расмийлаштирилади ва юритилади;
электрон йўл варақалари ташкилий-ҳуқуқий шакли ва мансублигидан қатъи назар, автомобиль транспортида юк ва йўловчи ташиш фаолияти билан шуғулланувчи юридик шахслар томонидан мустақил равишда расмийлаштирилади;
йўл варақаларининг қоғоз шаклидан фойдаланишни чекламаган ҳолда унинг электрон кўринишига босқичма-босқич ўтиш таъминланади;
электрон йўл варақалари тизими шахсий енгил автомобилида йўналишсиз такси сифатида йўловчиларни ташиш билан шуғулланувчи жисмоний шахслар учун амал қилмайди;
электрон йўл варақалари тизими платформасини яратиш, жорий этиш ва унга хизмат кўрсатиш учун Ўзбекистон Республикаси Транспорт вазирлиги томонидан ишлаб чиқиладиган техник талаблар асосида манфаатдор ташкилотлар (миллий операторлар) танлов асосида жалб этилиши мумкин;
электрон йўл варақалари тизимидан фойдаланганлик учун йиғим ундирилмайди.
3. Ўзбекистон Республикаси Транспорт вазирлиги Рақамли технологиялар вазирлиги билан биргаликда 2024 йил 1 апрелга қадар автомобиль транспортида юк ва йўловчи ташиш фаолияти билан шуғулланувчи юридик шахслар учун қулай электрон йўл варақалари тизими платформаси ишлаб чиқилишини ва жорий этилишини таъминласин.
4. Қуйидагиларни назарда тутувчи Юк ва йўловчиларни ташишда автотранспорт воситаларига йўл варақаларини электрон шаклда расмийлаштириш ва юритиш тартиби тўғрисидаги вақтинчалик низом иловага мувофиқ тасдиқлансин:
электрон йўл варақаларига қўйиладиган талаблар ва уларнинг турлари;
электрон йўл варақаларини расмийлаштириш, қайта ишлаш ва сақлаш;
электрон йўл варақалари юритилишини назорат қилиш ҳамда улар ҳақидаги маълумотлардан фойдаланиш.
5. Ўзбекистон Республикаси Транспорт вазирлиги 2024 йил якунига қадар мазкур қарорга асосан амалга ошириладиган тажриба-синов лойиҳаси натижаларидан келиб чиқиб, ижобий ва салбий ҳолатларини инобатга олган ҳолда электрон йўл варақалари тизимини такомиллаштириш ва йўл варақаларининг қоғоз шаклидан тўлиқ воз кечиш юзасидан Вазирлар Маҳкамасига таклиф киритсин.
6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.Ж. Раматов ва транспорт вазири И.Р. Махкамов зиммасига юклансин.
Вазирлар Маҳкамасининг 2024 йил 22 январдаги 44-сон қарорига ИЛОВА
Юк ва йўловчиларни ташишда автотранспорт воситаларига йўл варақаларини электрон шаклда расмийлаштириш ва юритиш тартиби тўғрисида
1-боб. Умумий қоидалар
1. Мазкур Низом тижорат асосида юк ва йўловчиларни ташишда автотранспорт воситаларига йўл варақасини (кейинги ўринларда — электрон йўл варақаси) электрон шаклда расмийлаштириш ва юритиш тартибини белгилайди.
2. Электрон йўл варақаси Ўзбекистон Республикаси Транспорт вазирлигининг «Uztrans» ягона интерактив ахборот тизимининг «Электрон йўл варақа» автоматлаштирилган ахборот тизими (кейинги ўринларда — электрон йўл варақаси тизими) орқали расмийлаштирилади ва юритилади.
Бунда юк ва йўловчиларни халқаро ташиш учун расмийлаштириладиган йўл варақаси электрон ва анъанавий шаклда расмийлаштирилади ва юритилади.
3. Мазкур Низомда қуйидаги асосий тушунчалардан фойдаланилади:
ваколатли орган — Ўзбекистон Республикаси Транспорт вазирлиги;
электрон йўл варақаси тизими — электрон йўл варақасини расмийлаштириш, қайта ишлаш ва сақлаш функцияларини амалга оширувчи автоматлаштирилган ахборот тизими;
фойдаланувчи — электрон йўл варақаси тизимидан фойдаланиш ҳуқуқига эга бўлган, тижорат ва нотижорат асосида автотранспорт воситасида юк ва йўловчиларни ташиш фаолияти билан шуғулланувчи юридик шахслар;
электрон йўл варақаси — ҳисобга олиш серияси ва тартиб рақамига эга бўлган, электрон йўл варақаси тизими орқали юритиладиган ва автотранспорт воситаларининг ишини белгилаб берувчи QR-код (матрик штрихли код) билан тасдиқланган асосий ҳужжат.
2-боб. Электрон йўл варақасига қўйиладиган талаблар ва уларнинг турлари
4. Электрон йўл варақасида қуйидагилар тўғрисидаги маълумотлар кўрсатилиши шарт:
йўл варақасининг тури, рақами, амал қилиш муддати, шунингдек, автотранспорт воситасининг русуми ва эгаси;
ташиш тури, юк тури, ҳайдовчининг кунлик тиббий кўрикдан ўтганлиги;
автотранспорт воситасининг созлиги ва техник кўрикдан ўтганлиги, ҳайдовчига берилган ёқилғи миқдори, автотранспорт воситасидаги ёқилғи қолдиғи;
шаҳар ва шаҳар атрофида мунтазам йўналишлардаги автобусга ўрнатилган валидаторлар орқали амалга оширилган тўловлар;
ҳайдовчининг иш соати, шу жумладан, кунлик ва ойлик, тунги вақтда, байрам ва дам олиш кунларида ишлаган соатлари, тежаган ва сарф қилган ёқилғиси миқдори, ҳайдовчига тўланган иш ҳақи;
ҳайдовчи томонидан содир этилган йўл ҳаракати қоидалари бузилиши.
Электрон йўл варақасига киритиладиган маълумотлар фойдаланувчилар ҳамда уларнинг тегишли масъул ходимлари томонидан электрон рақамли имзо билан тасдиқланади.
5. Электрон йўл варақаси автотранспорт воситасидан фойдаланиш мақсади ҳамда ташиш турларига қараб қуйидагиларга бўлинади:
а) автотранспорт воситасидан тижорат асосида йўловчи ва юк ташиш мақсадида фойдаланувчилар учун:
A-000000 — мунтазам йўналишларда йўловчи ташувчи автотранспорт воситалари учун;
B-000000 — буюртма асосида йўловчи ташувчи автотранспорт воситалари учун;
D-000000 — тижорат асосида фойдаланиладиган юк автотранспорт воситалари учун;
б) автотранспорт воситаларидан тижорат мақсадида фойдаланмасдан, ўз эҳтиёжлари учун фойдаланадиган юридик шахслар учун:
Е-000000 — йўловчи ташувчи автотранспорт воситалари учун йўл варақаси;
F-000000 — юк ташувчи автотранспорт воситалари учун йўл варақаси.
Серия рақамидан олдин фойдаланувчининг рўйхатдан ўтган қуйидаги ҳудудлар коди акс эттирилади:
Тошкент шаҳри — 01;
Тошкент вилояти — 10;
Сирдарё вилояти — 20;
Жиззах вилояти — 25;
Самарқанд вилояти — 30;
Фарғона вилояти — 40;
Наманган вилояти — 50;
Андижон вилояти — 60;
Қашқадарё вилояти — 70;
Сурхондарё вилояти — 75;
Бухоро вилояти — 80;
Навоий вилояти — 85;
Хоразм вилояти — 90;
Қорақалпоғистон Республикаси — 95.
6. Қуйидаги ҳолатларда электрон йўл варақаси электрон йўл варақаси тизими орқали очилмайди:
фойдаланувчи мулк ҳуқуқи ёки бошқа ашёвий ҳуқуқларга эга бўлмаган автотранспорт воситасидан фойдаланганда;
фойдаланувчи билан меҳнат шартномасига эга бўлмаган ҳайдовчилар учун йўл варақаси расмийлаштирилганда;
ҳайдовчи тегишли тоифадаги автотранспорт воситасини бошқариш учун ҳайдовчилик гувоҳномасига ёки қонунчилик ҳужжатларида белгиланган етарли меҳнат стажига эга бўлмаганда;
ҳайдовчи белгиланган тартибда дастлабки ва кейинчалик даврий тиббий кўриклардан ўтмаганда;
ҳайдовчининг ҳайдовчилик гувоҳномаси бекор қилинган даврда;
автотранспорт воситаси белгиланган тартибда даврий техник кўрикдан ўтказилмаганда;
автотранспорт воситасини мунтазам йўналишга ишга чиқаришда ташувчи ушбу йўналишда ишлаш ҳуқуқини берувчи тендер битимига/брутто контрактга эга бўлмаганда;
автотранспорт воситасини буюртма асосида ишга чиқаришда ташувчи ушбу буюртмани амалга ошириш учун тегишли шартномага эга бўлмаганда.
3-боб. Электрон йўл варақасини очиш, қайта ишлаш ва сақлаш
7. Электрон йўл варақаси жорий календарь ойда очилади ва ойнинг охирги санасига қадар амал қилади.
Фойдаланувчининг хоҳишига кўра ушбу муддат қисқартирилиши мумкин.
Электрон йўл варақасининг амал қилиш муддати тамом бўлгач, кейинги календарь ой учун янги йўл варақаси очилади.
8. Электрон йўл варақаси фойдаланувчи томонидан очилади ва унга ой якунига/йўл варақаси ёпилгунига қадар тегишли маълумотлар киритиб борилади.
9. Электрон йўл варақаси ҳақидаги маълумотлар ишга туширилган вақтдан бошлаб электрон йўл варақаси тизимида 5 йил сақланади.
4-боб. Электрон йўл варақаси юритилишини назорат қилиш
10. Ваколатли орган томонидан қуйидаги ҳолларда электрон йўл варақасининг амал қилиши тугатилади:
юридик шахс тугатилганда (тугатилган вақтдан бошлаб);
электрон йўл варақасини очиш учун нотўғри маълумотлар киритилганлиги аниқланганда.
11. Юридик шахс қайта ташкил этилганда, электрон йўл варақаси тизимидаги унга тегишли бўлган электрон йўл варақаси автоматик равишда фойдаланувчига ёки унинг ҳуқуқий ворисига қайта расмийлаштирилади.
12. Юк ва йўловчиларни автотранспорт воситасида ташишда электрон йўл варақаси мавжудлиги ҳамда ундаги маълумотларнинг тўғрилиги Ўзбекистон Республикаси Транспорт вазирлиги ҳузуридаги Транспорт назорати инспекцияси ҳамда Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати томонидан назорат қилинади.
13. Электрон йўл варақаси Ўзбекистон Республикаси Транспорт вазирлиги ҳузуридаги Транспорт назорати инспекцияси ҳамда Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати томонидан махсус мосламадан (планшет) фойдаланган ҳолда электрон йўл варақаси тизими орқали текширилади.
Бунда электрон йўл варақаси автотранспорт воситасининг давлат рақами, ҳайдовчининг шахсини тасдиқловчи ҳужжат (паспорт ёки идентификацияловчи ID-карта) тўғрисидаги маълумотлар билан солиштириш орқали текширилади.
5-боб. Электрон йўл варақаси ҳақидаги маълумотлардан фойдаланиш
14. Электрон йўл варақаси ҳақидаги маълумотлар учинчи шахсларга тақдим этилиши тақиқланади.
15. Ваколатли орган томонидан қонунчилик ҳужжатларида белгиланган тартибда терговга қадар текширувни амалга оширувчи органлар, дастлабки тергов органлари ва суднинг ёзма сўровига асосан электрон йўл варақаси ҳақидаги маълумотлар тақдим этилади.
6-боб. Якунловчи қоидалар
16. Фойдаланувчилар электрон йўл варақасидаги маълумотларнинг тўғрилиги ва ҳаққонийлиги учун қонунчиликда белгиланган тартибда жавобгар ҳисобланади.
17. Мазкур Низом талаблари бузилишида айбдор бўлган шахслар қонунчилик ҳужжатларида белгиланган тартибда жавобгар бўлади.
Ўзбекистон Республикасининг Бош вазири А. АРИПОВ
Тошкент ш.,
2024 йил 22 январь,
44-сон
Oʻzbekiston Respublikasi Vazirlar Mahkamasining
qarori
VAQTINCHALIK NIZOM
Yuk va yoʻlovchilarni tashishda avtotransport vositalariga yoʻl varaqalarini elektron shaklda rasmiylashtirish va yuritish tizimini joriy etish toʻgʻrisida
Oʻzbekiston Respublikasida avtomobil transportida tashishlar xavfsizligini taʼminlash, haydovchilar va avtotransport vositalari ishini hisobga olish va nazorat qilish tizimini yanada takomillashtirish, sohaga raqamli texnologiyalarni keng joriy etish, shuningdek, Oʻzbekiston Respublikasi Prezidentining “2022 — 2026-yillarga moʻljallangan Yangi Oʻzbekistonning taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturi toʻgʻrisida” 2023-yil 28-fevraldagi PF-27-son Farmoni ijrosini taʼminlash maqsadida Vazirlar Mahkamasi qaror qiladi:
1. Oʻzbekiston Respublikasi Prezidentining 2023-yil 28-fevraldagi PF-27-son Farmoni bilan tasdiqlangan 2022 — 2026-yillarga moʻljallangan Yangi Oʻzbekistonning taraqqiyot strategiyasini “Insonga eʼtibor va sifatli taʼlim yili”da amalga oshirishga oid davlat dasturining 141-bandida tovar-moddiy boyliklarni tashish uchun tovar-transport yuk xatlari va yoʻl varaqalarini elektron shaklda rasmiylashtirish tartibini joriy etish belgilanganligi maʼlumot uchun qabul qilinsin.
2. Oʻzbekiston Respublikasi Transport vazirligining 2024-yil 1-apreldan 2024-yil 1-oktabrga qadar Yuk va yoʻlovchilarni tashishda avtotransport vositalariga yoʻl varaqalarini elektron shaklda rasmiylashtirish va yuritish tizimini joriy etish boʻyicha tajriba-sinov loyihasini (keyingi oʻrinlarda — tajriba-sinov loyihasi) amalga oshirish toʻgʻrisidagi taklifiga rozilik berilsin.
Belgilansinki, tajriba-sinov loyihasini amalga oshirish davrida:
elektron yoʻl varaqalari Oʻzbekiston Respublikasi Transport vazirligining “Uztrans” yagona interaktiv axborot tizimining “Elektron yoʻl varaqa” avtomatlashtirilgan axborot tizimi (keyingi oʻrinlarda — elektron yoʻl varaqalari tizimi) orqali rasmiylashtiriladi va yuritiladi;
elektron yoʻl varaqalari tashkiliy-huquqiy shakli va mansubligidan qatʼi nazar, avtomobil transportida yuk va yoʻlovchi tashish faoliyati bilan shugʻullanuvchi yuridik shaxslar tomonidan mustaqil ravishda rasmiylashtiriladi;
yoʻl varaqalarining qogʻoz shaklidan foydalanishni cheklamagan holda uning elektron koʻrinishiga bosqichma-bosqich oʻtish taʼminlanadi;
elektron yoʻl varaqalari tizimi shaxsiy yengil avtomobilida yoʻnalishsiz taksi sifatida yoʻlovchilarni tashish bilan shugʻullanuvchi jismoniy shaxslar uchun amal qilmaydi;
elektron yoʻl varaqalari tizimi platformasini yaratish, joriy etish va unga xizmat koʻrsatish uchun Oʻzbekiston Respublikasi Transport vazirligi tomonidan ishlab chiqiladigan texnik talablar asosida manfaatdor tashkilotlar (milliy operatorlar) tanlov asosida jalb etilishi mumkin;
elektron yoʻl varaqalari tizimidan foydalanganlik uchun yigʻim undirilmaydi.
3. Oʻzbekiston Respublikasi Transport vazirligi Raqamli texnologiyalar vazirligi bilan birgalikda 2024-yil 1-aprelga qadar avtomobil transportida yuk va yoʻlovchi tashish faoliyati bilan shugʻullanuvchi yuridik shaxslar uchun qulay elektron yoʻl varaqalari tizimi platformasi ishlab chiqilishini va joriy etilishini taʼminlasin.
4. Quyidagilarni nazarda tutuvchi Yuk va yoʻlovchilarni tashishda avtotransport vositalariga yoʻl varaqalarini elektron shaklda rasmiylashtirish va yuritish tartibi toʻgʻrisidagi vaqtinchalik nizom ilovaga muvofiq tasdiqlansin:
elektron yoʻl varaqalariga qoʻyiladigan talablar va ularning turlari;
elektron yoʻl varaqalarini rasmiylashtirish, qayta ishlash va saqlash;
elektron yoʻl varaqalari yuritilishini nazorat qilish hamda ular haqidagi maʼlumotlardan foydalanish.
5. Oʻzbekiston Respublikasi Transport vazirligi 2024-yil yakuniga qadar mazkur qarorga asosan amalga oshiriladigan tajriba-sinov loyihasi natijalaridan kelib chiqib, ijobiy va salbiy holatlarini inobatga olgan holda elektron yoʻl varaqalari tizimini takomillashtirish va yoʻl varaqalarining qogʻoz shaklidan toʻliq voz kechish yuzasidan Vazirlar Mahkamasiga taklif kiritsin.
6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov va transport vaziri I.R. Maxkamov zimmasiga yuklansin.
Vazirlar Mahkamasining 2024-yil 22-yanvardagi 44-son qaroriga ILOVA
Yuk va yoʻlovchilarni tashishda avtotransport vositalariga yoʻl varaqalarini elektron shaklda rasmiylashtirish va yuritish tartibi toʻgʻrisida
1-bob. Umumiy qoidalar
1. Mazkur Nizom tijorat asosida yuk va yoʻlovchilarni tashishda avtotransport vositalariga yoʻl varaqasini (keyingi oʻrinlarda — elektron yoʻl varaqasi) elektron shaklda rasmiylashtirish va yuritish tartibini belgilaydi.
2. Elektron yoʻl varaqasi Oʻzbekiston Respublikasi Transport vazirligining “Uztrans” yagona interaktiv axborot tizimining “Elektron yoʻl varaqa” avtomatlashtirilgan axborot tizimi (keyingi oʻrinlarda — elektron yoʻl varaqasi tizimi) orqali rasmiylashtiriladi va yuritiladi.
Bunda yuk va yoʻlovchilarni xalqaro tashish uchun rasmiylashtiriladigan yoʻl varaqasi elektron va anʼanaviy shaklda rasmiylashtiriladi va yuritiladi.
3. Mazkur Nizomda quyidagi asosiy tushunchalardan foydalaniladi:
vakolatli organ — Oʻzbekiston Respublikasi Transport vazirligi;
elektron yoʻl varaqasi tizimi — elektron yoʻl varaqasini rasmiylashtirish, qayta ishlash va saqlash funksiyalarini amalga oshiruvchi avtomatlashtirilgan axborot tizimi;
foydalanuvchi — elektron yoʻl varaqasi tizimidan foydalanish huquqiga ega boʻlgan, tijorat va notijorat asosida avtotransport vositasida yuk va yoʻlovchilarni tashish faoliyati bilan shugʻullanuvchi yuridik shaxslar;
elektron yoʻl varaqasi — hisobga olish seriyasi va tartib raqamiga ega boʻlgan, elektron yoʻl varaqasi tizimi orqali yuritiladigan va avtotransport vositalarining ishini belgilab beruvchi QR-kod (matrik shtrixli kod) bilan tasdiqlangan asosiy hujjat.
2-bob. Elektron yoʻl varaqasiga qoʻyiladigan talablar va ularning turlari
4. Elektron yoʻl varaqasida quyidagilar toʻgʻrisidagi maʼlumotlar koʻrsatilishi shart:
yoʻl varaqasining turi, raqami, amal qilish muddati, shuningdek, avtotransport vositasining rusumi va egasi;
tashish turi, yuk turi, haydovchining kunlik tibbiy koʻrikdan oʻtganligi;
avtotransport vositasining sozligi va texnik koʻrikdan oʻtganligi, haydovchiga berilgan yoqilgʻi miqdori, avtotransport vositasidagi yoqilgʻi qoldigʻi;
shahar va shahar atrofida muntazam yoʻnalishlardagi avtobusga oʻrnatilgan validatorlar orqali amalga oshirilgan toʻlovlar;
haydovchining ish soati, shu jumladan, kunlik va oylik, tungi vaqtda, bayram va dam olish kunlarida ishlagan soatlari, tejagan va sarf qilgan yoqilgʻisi miqdori, haydovchiga toʻlangan ish haqi;
haydovchi tomonidan sodir etilgan yoʻl harakati qoidalari buzilishi.
Elektron yoʻl varaqasiga kiritiladigan maʼlumotlar foydalanuvchilar hamda ularning tegishli masʼul xodimlari tomonidan elektron raqamli imzo bilan tasdiqlanadi.
5. Elektron yoʻl varaqasi avtotransport vositasidan foydalanish maqsadi hamda tashish turlariga qarab quyidagilarga boʻlinadi:
a) avtotransport vositasidan tijorat asosida yoʻlovchi va yuk tashish maqsadida foydalanuvchilar uchun:
A-000000 — muntazam yoʻnalishlarda yoʻlovchi tashuvchi avtotransport vositalari uchun;
B-000000 — buyurtma asosida yoʻlovchi tashuvchi avtotransport vositalari uchun;
D-000000 — tijorat asosida foydalaniladigan yuk avtotransport vositalari uchun;
b) avtotransport vositalaridan tijorat maqsadida foydalanmasdan, oʻz ehtiyojlari uchun foydalanadigan yuridik shaxslar uchun:
E-000000 — yoʻlovchi tashuvchi avtotransport vositalari uchun yoʻl varaqasi;
F-000000 — yuk tashuvchi avtotransport vositalari uchun yoʻl varaqasi.
Seriya raqamidan oldin foydalanuvchining roʻyxatdan oʻtgan quyidagi hududlar kodi aks ettiriladi:
Toshkent shahri — 01;
Toshkent viloyati — 10;
Sirdaryo viloyati — 20;
Jizzax viloyati — 25;
Samarqand viloyati — 30;
Fargʻona viloyati — 40;
Namangan viloyati — 50;
Andijon viloyati — 60;
Qashqadaryo viloyati — 70;
Surxondaryo viloyati — 75;
Buxoro viloyati — 80;
Navoiy viloyati — 85;
Xorazm viloyati — 90;
Qoraqalpogʻiston Respublikasi — 95.
6. Quyidagi holatlarda elektron yoʻl varaqasi elektron yoʻl varaqasi tizimi orqali ochilmaydi:
foydalanuvchi mulk huquqi yoki boshqa ashyoviy huquqlarga ega boʻlmagan avtotransport vositasidan foydalanganda;
foydalanuvchi bilan mehnat shartnomasiga ega boʻlmagan haydovchilar uchun yoʻl varaqasi rasmiylashtirilganda;
haydovchi tegishli toifadagi avtotransport vositasini boshqarish uchun haydovchilik guvohnomasiga yoki qonunchilik hujjatlarida belgilangan yetarli mehnat stajiga ega boʻlmaganda;
haydovchi belgilangan tartibda dastlabki va keyinchalik davriy tibbiy koʻriklardan oʻtmaganda;
haydovchining haydovchilik guvohnomasi bekor qilingan davrda;
avtotransport vositasi belgilangan tartibda davriy texnik koʻrikdan oʻtkazilmaganda;
avtotransport vositasini muntazam yoʻnalishga ishga chiqarishda tashuvchi ushbu yoʻnalishda ishlash huquqini beruvchi tender bitimiga/brutto kontraktga ega boʻlmaganda;
avtotransport vositasini buyurtma asosida ishga chiqarishda tashuvchi ushbu buyurtmani amalga oshirish uchun tegishli shartnomaga ega boʻlmaganda.
3-bob. Elektron yoʻl varaqasini ochish, qayta ishlash va saqlash
7. Elektron yoʻl varaqasi joriy kalendar oyda ochiladi va oyning oxirgi sanasiga qadar amal qiladi.
Foydalanuvchining xohishiga koʻra ushbu muddat qisqartirilishi mumkin.
Elektron yoʻl varaqasining amal qilish muddati tamom boʻlgach, keyingi kalendar oy uchun yangi yoʻl varaqasi ochiladi.
8. Elektron yoʻl varaqasi foydalanuvchi tomonidan ochiladi va unga oy yakuniga/yoʻl varaqasi yopilguniga qadar tegishli maʼlumotlar kiritib boriladi.
9. Elektron yoʻl varaqasi haqidagi maʼlumotlar ishga tushirilgan vaqtdan boshlab elektron yoʻl varaqasi tizimida 5 yil saqlanadi.
4-bob. Elektron yoʻl varaqasi yuritilishini nazorat qilish
10. Vakolatli organ tomonidan quyidagi hollarda elektron yoʻl varaqasining amal qilishi tugatiladi:
yuridik shaxs tugatilganda (tugatilgan vaqtdan boshlab);
elektron yoʻl varaqasini ochish uchun notoʻgʻri maʼlumotlar kiritilganligi aniqlanganda.
11. Yuridik shaxs qayta tashkil etilganda, elektron yoʻl varaqasi tizimidagi unga tegishli boʻlgan elektron yoʻl varaqasi avtomatik ravishda foydalanuvchiga yoki uning huquqiy vorisiga qayta rasmiylashtiriladi.
12. Yuk va yoʻlovchilarni avtotransport vositasida tashishda elektron yoʻl varaqasi mavjudligi hamda undagi maʼlumotlarning toʻgʻriligi Oʻzbekiston Respublikasi Transport vazirligi huzuridagi Transport nazorati inspeksiyasi hamda Ichki ishlar vazirligi Jamoat xavfsizligi departamenti Yoʻl harakati xavfsizligi xizmati tomonidan nazorat qilinadi.
13. Elektron yoʻl varaqasi Oʻzbekiston Respublikasi Transport vazirligi huzuridagi Transport nazorati inspeksiyasi hamda Ichki ishlar vazirligi Jamoat xavfsizligi departamenti Yoʻl harakati xavfsizligi xizmati tomonidan maxsus moslamadan (planshet) foydalangan holda elektron yoʻl varaqasi tizimi orqali tekshiriladi.
Bunda elektron yoʻl varaqasi avtotransport vositasining davlat raqami, haydovchining shaxsini tasdiqlovchi hujjat (pasport yoki identifikatsiyalovchi ID-karta) toʻgʻrisidagi maʼlumotlar bilan solishtirish orqali tekshiriladi.
5-bob. Elektron yoʻl varaqasi haqidagi maʼlumotlardan foydalanish
14. Elektron yoʻl varaqasi haqidagi maʼlumotlar uchinchi shaxslarga taqdim etilishi taqiqlanadi.
15. Vakolatli organ tomonidan qonunchilik hujjatlarida belgilangan tartibda tergovga qadar tekshiruvni amalga oshiruvchi organlar, dastlabki tergov organlari va sudning yozma soʻroviga asosan elektron yoʻl varaqasi haqidagi maʼlumotlar taqdim etiladi.
6-bob. Yakunlovchi qoidalar
16. Foydalanuvchilar elektron yoʻl varaqasidagi maʼlumotlarning toʻgʻriligi va haqqoniyligi uchun qonunchilikda belgilangan tartibda javobgar hisoblanadi.
17. Mazkur Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 22-yanvar,
44-son