📅 2024-yil 10-fevral · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 10 февраль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 10 февраля 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 10 February 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Самарқанд вилоятида жамоат эҳтиёжлари учун ер участкаларининг олиб қўйилиши муносабати билан жисмоний ва юридик шахсларга етказилган зарарларни қоплаш тўғрисида
Ўзбекистон Республикасининг «Ер участкаларини компенсация эвазига жамоат эҳтиёжлари учун олиб қўйиш тартиб-таомиллари тўғрисида»ги Қонунига асосан ҳамда Самарқанд вилоятида жамоат эҳтиёжлари учун ер участкаларининг олиб қўйилиши муносабати билан жисмоний ва юридик шахсларга етказилган зарарларни қоплаш мақсадида Вазирлар Маҳкамаси қарор қилади:
1. Қуйидагилар:
Самарқанд вилоятининг Пайариқ тумани Хартанг қишлоғида жойлашган Имом ал-Бухорий мажмуасида кенг кўламдаги қурилиш ва ободонлаштириш ишлари амалга оширилаётганлиги;
Вазирлар Маҳкамасининг 2019 йил 17 майдаги 415-сон қарорига асосан республика бюджети ва Абу-Даби тараққиёт жамғармаси маблағлари ҳисобидан Самарқанд шаҳрида автомобиль йўллари, кўприклар, йўл ўтказгичлар ва туннелларни қуриш, реконструкция қилиш ҳамда таъмирлаш ишларини амалга ошириш белгиланганлиги маълумот учун қабул қилинсин.
2. Самарқанд вилояти ҳокимлиги ҳамда Қурилиш ва уй-жой коммунал хўжалиги вазирлигининг вилоятда кенг кўламда қурилиш ва ободонлаштириш ишларини давом эттириш мақсадида жисмоний ва юридик шахсларга тегишли бўлган жами 661 та, шундан Имом ал-Бухорий мажмуаси атрофидаги ҳудудларни ободонлаштириш учун 121 та ҳамда Абу Даби тараққиёт жамғармаси иштирокида Самарқанд шаҳрида кўприк, туннеллар ва автомобиль йўллари қурилишини амалга ошириш учун 540 та кўчмас мулк объектлари жойлашган ер участкаларини компенсация эвазига жамоат эҳтиёжлари учун олиб қўйиш тўғрисидаги таклифи маъқуллансин.
Ушбу бандда кўрсатилган ер участкаларини жамоат эҳтиёжлари учун олиб қўйиш билан боғлиқ ишларни амалга оширишда Ўзбекистон Республикасининг « Ер участкаларини компенсация эвазига жамоат эҳтиёжлари учун олиб қўйиш тартиб-таомиллари тўғрисида »ги ҳамда « Маданий мерос объектларини муҳофаза қилиш ва улардан фойдаланиш тўғрисида »ги қонунлари талабларига қатъий риоя этилсин.
3. Самарқанд вилояти ҳокимлиги жисмоний ва юридик шахсларга етказилган зарарларни қоплаш учун Вазирлар Маҳкамаси ҳузуридаги Жисмоний ва юридик шахсларга етказилган мулкий зарарларни компенсация қилиш бўйича республика мақсадли жамғармасидан (кейинги ўринларда — Республика жамғармаси) маблағ ажратиш учун талаб этиладиган тегишли ҳужжатларни босқичма-босқич Республика жамғармаси кузатув кенгашига киритиб борсин.
4. Иқтисодиёт ва молия вазирлиги Республика жамғармаси кузатув кенгашининг қарорига асосан Республика жамғармасидан Самарқанд вилояти ҳокимлиги ҳузуридаги Жисмоний ва юридик шахсларга етказилган мулкий зарарларни компенсация қилиш бўйича ҳудудий мақсадли жамғармага (кейинги ўринларда — ҳудудий жамғарма) зарур маблағларни Самарқанд вилояти ҳокимлигининг талабномасига асосан босқичма-босқич ажратиб борсин.
5. Самарқанд вилояти ҳокимлиги:
Республика жамғармасидан ҳудудий жамғармага ажратиладиган маблағлар Ўзбекистон Республикасининг «Ер участкаларини компенсация эвазига жамоат эҳтиёжлари учун олиб қўйиш тартиб-таомиллари тўғрисида»ги Қонунида белгиланган тартибга қатъий риоя қилган ҳолда мулкдорларга тўлаб берилишини;
Республика жамғармасидан ажратиладиган маблағларнинг сарфланиши ҳақида Республика жамғармаси кузатув кенгашига ёзма ҳисобот киритиб борилишини таъминласин.
6. Ўзбекистон Республикаси Бош прокуратураси ҳузуридаги Иқтисодий жиноятларга қарши курашиш департаменти ҳузуридаги Давлат молиявий назорати инспекциясига ер участкалари олиб қўйилиши муносабати билан етказилган зарарларни қоплаш учун ажратиладиган маблағларнинг мақсадли сарфланиши бўйича белгиланган тартибда назорат ўрнатиш тавсия этилсин.
7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари А.Ж. Раматов ва Ж.А. Қўчқоров ҳамда Самарқанд вилояти ҳокими Э.О. Турдимов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2024 йил 10 февраль,
82-сон
Oʻzbekiston Respublikasi Vazirlar Mahkamasining
qarori
Samarqand viloyatida jamoat ehtiyojlari uchun yer uchastkalarining olib qoʻyilishi munosabati bilan jismoniy va yuridik shaxslarga yetkazilgan zararlarni qoplash toʻgʻrisida
Oʻzbekiston Respublikasining “Yer uchastkalarini kompensatsiya evaziga jamoat ehtiyojlari uchun olib qoʻyish tartib-taomillari toʻgʻrisida”gi Qonuniga asosan hamda Samarqand viloyatida jamoat ehtiyojlari uchun yer uchastkalarining olib qoʻyilishi munosabati bilan jismoniy va yuridik shaxslarga yetkazilgan zararlarni qoplash maqsadida Vazirlar Mahkamasi qaror qiladi:
1. Quyidagilar:
Samarqand viloyatining Payariq tumani Xartang qishlogʻida joylashgan Imom al-Buxoriy majmuasida keng koʻlamdagi qurilish va obodonlashtirish ishlari amalga oshirilayotganligi;
Vazirlar Mahkamasining 2019-yil 17-maydagi 415-son qaroriga asosan respublika budjeti va Abu-Dabi taraqqiyot jamgʻarmasi mablagʻlari hisobidan Samarqand shahrida avtomobil yoʻllari, koʻpriklar, yoʻl oʻtkazgichlar va tunnellarni qurish, rekonstruksiya qilish hamda taʼmirlash ishlarini amalga oshirish belgilanganligi maʼlumot uchun qabul qilinsin.
2. Samarqand viloyati hokimligi hamda Qurilish va uy-joy kommunal xoʻjaligi vazirligining viloyatda keng koʻlamda qurilish va obodonlashtirish ishlarini davom ettirish maqsadida jismoniy va yuridik shaxslarga tegishli boʻlgan jami 661 ta, shundan Imom al-Buxoriy majmuasi atrofidagi hududlarni obodonlashtirish uchun 121 ta hamda Abu Dabi taraqqiyot jamgʻarmasi ishtirokida Samarqand shahrida koʻprik, tunnellar va avtomobil yoʻllari qurilishini amalga oshirish uchun 540 ta koʻchmas mulk obyektlari joylashgan yer uchastkalarini kompensatsiya evaziga jamoat ehtiyojlari uchun olib qoʻyish toʻgʻrisidagi taklifi maʼqullansin.
Ushbu bandda koʻrsatilgan yer uchastkalarini jamoat ehtiyojlari uchun olib qoʻyish bilan bogʻliq ishlarni amalga oshirishda Oʻzbekiston Respublikasining “ Yer uchastkalarini kompensatsiya evaziga jamoat ehtiyojlari uchun olib qoʻyish tartib-taomillari toʻgʻrisida ”gi hamda “ Madaniy meros obyektlarini muhofaza qilish va ulardan foydalanish toʻgʻrisida ”gi qonunlari talablariga qatʼiy rioya etilsin.
3. Samarqand viloyati hokimligi jismoniy va yuridik shaxslarga yetkazilgan zararlarni qoplash uchun Vazirlar Mahkamasi huzuridagi Jismoniy va yuridik shaxslarga yetkazilgan mulkiy zararlarni kompensatsiya qilish boʻyicha respublika maqsadli jamgʻarmasidan (keyingi oʻrinlarda — Respublika jamgʻarmasi) mablagʻ ajratish uchun talab etiladigan tegishli hujjatlarni bosqichma-bosqich Respublika jamgʻarmasi kuzatuv kengashiga kiritib borsin.
4. Iqtisodiyot va moliya vazirligi Respublika jamgʻarmasi kuzatuv kengashining qaroriga asosan Respublika jamgʻarmasidan Samarqand viloyati hokimligi huzuridagi Jismoniy va yuridik shaxslarga yetkazilgan mulkiy zararlarni kompensatsiya qilish boʻyicha hududiy maqsadli jamgʻarmaga (keyingi oʻrinlarda — hududiy jamgʻarma) zarur mablagʻlarni Samarqand viloyati hokimligining talabnomasiga asosan bosqichma-bosqich ajratib borsin.
5. Samarqand viloyati hokimligi:
Respublika jamgʻarmasidan hududiy jamgʻarmaga ajratiladigan mablagʻlar Oʻzbekiston Respublikasining “Yer uchastkalarini kompensatsiya evaziga jamoat ehtiyojlari uchun olib qoʻyish tartib-taomillari toʻgʻrisida”gi Qonunida belgilangan tartibga qatʼiy rioya qilgan holda mulkdorlarga toʻlab berilishini;
Respublika jamgʻarmasidan ajratiladigan mablagʻlarning sarflanishi haqida Respublika jamgʻarmasi kuzatuv kengashiga yozma hisobot kiritib borilishini taʼminlasin.
6. Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti huzuridagi Davlat moliyaviy nazorati inspeksiyasiga yer uchastkalari olib qoʻyilishi munosabati bilan yetkazilgan zararlarni qoplash uchun ajratiladigan mablagʻlarning maqsadli sarflanishi boʻyicha belgilangan tartibda nazorat oʻrnatish tavsiya etilsin.
7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari A.J. Ramatov va J.A. Qoʻchqorov hamda Samarqand viloyati hokimi E.O. Turdimov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 10-fevral,
82-son