📅 2024-yil 26-fevral · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 26 февраль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 26 февраля 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 26 February 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Бирлашган Миллатлар Ташкилотининг Озиқ-овқат ва қишлоқ хўжалиги ташкилоти ҳамда Глобал экологик жамғарма иштирокида «Ўзбекистонда озиқ-овқат тизимларининг ердан фойдаланиш ва ерни қайта тиклашга таъсирини баҳолаш дастури» лойиҳасини амалга оширишга доир чора-тадбирлар тўғрисида
Сўнгги йилларда республика бўйлаб таназзулга учраган ерларни ва экологик тизимларни тиклаш, биохилма-хилликни муҳофаза қилиш ҳамда иқлим ўзгаришининг салбий оқибатларини юмшатишга қаратилган кенг қўламли ишлар натижасида муҳофаза этиладиган табиий ҳудудлар майдони уч бараварга кенгайтирилиб, мамлакатимизнинг умумий майдонига нисбатан 14,2 фоизга етказилди.
Экология ва атроф-муҳитни муҳофаза қилиш соҳасига халқаро жамоатчиликнинг эътиборини жалб қилиш мақсадида нуфузли халқаро тадбирлар, шу жумладан, Самарқанд шаҳрида БМТнинг Чўлланишга қарши курашиш конвенцияси бажарилишини кўриб чиқиш қўмитасининг 21-йиғилиши (CRIC-21) ўтказилди.
Ҳозирги вақтда иқлим ўзгариши, чўлланиш, ер деградацияси, атмосфера ҳавосининг бузилиши, биохилма-хиллик кескин камайиши салбий оқибатларининг олдини олиш ва уларни бартараф этишда кечиктириб бўлмайдиган чоралар кўриш тақозо этилмоқда.
Ўзбекистон Республикаси Президентининг «Ўзбекистон — 2030» стратегиясини 2023 йилда сифатли ва ўз вақтида амалга ошириш чора-тадбирлари тўғрисида» 2023 йил 11 сентябрдаги ПҚ-300-сон қарори ижросини таъминлаш мақсадида Вазирлар Маҳкамаси қарор қилади:
1. Қуйидагилар:
Глобал экологик жамғарма (кейинги ўринларда — ГЭЖ) томонидан «Ўзбекистонда озиқ-овқат тизимларининг ердан фойдаланиш ва ерни қайта тиклашга таъсирини баҳолаш дастури» лойиҳасини (кейинги ўринларда — Лойиҳа) молиялаштириш учун 5 йил муддатга 5 992 661 АҚШ доллари миқдорида грант ажратилиши белгиланганлиги;
Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги ҳамда Қишлоқ хўжалиги вазирлиги Лойиҳани амалга ошириш учун умумий ижрочи ва техник ёрдам кўрсатувчи этиб белгиланганлиги;
Лойиҳани амалга ошириш даврида БМТнинг Озиқ-овқат ва қишлоқ хўжалиги ташкилотининг (кейинги ўринларда — ФАО) Ўзбекистондаги ваколатхонаси масъул ижро этувчи орган сифатида фаолият кўрсатиши;
Лойиҳа Қорақалпоғистон Республикаси, Қашқадарё ва Хоразм вилоятларида амалга оширилиши назарда тутилганлиги маълумот учун қабул қилинсин.
2. Лойиҳани амалга ошириш доирасида Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги ҳамда Қишлоқ хўжалиги вазирлигига қуйидаги қўшимча вазифалар юклансин:
Лойиҳа билан боғлиқ тадбирларни режалаштириш, мувофиқлаштириш, бошқариш, уларни амалга ошириш юзасидан доимий мониторинг олиб бориш, баҳолаш ва ҳисоботлар тайёрлаш;
Лойиҳа доирасида тадбирларга йўналтириладиган грантнинг мақсадли ва тизимли сарфланишини назорат қилиш, шунингдек, сарфланган ҳамда ўзлаштирилган маблағлар тўғрисида ҳисоботларни тайёрлаш ва тасдиқлаш;
Лойиҳа бўйича амалга оширилган ишлар, сарфланган ва ўзлаштирилган маблағлар тўғрисида ҳисоботлар ҳамда эришилган натижалар юзасидан маълумотларни ҳар чоракда ўзининг расмий веб-сайтида ёритиб бориш орқали Лойиҳанинг амалга оширилиши устидан самарали жамоатчилик назорати ўрнатилишини таъминлаш.
3. Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги Қишлоқ хўжалиги вазирлиги билан биргаликда:
икки ҳафта муддатда ФАОнинг Ўзбекистондаги ваколатхонаси билан Лойиҳани амалга ошириш юзасидан келишувни имзоласин;
бир ой муддатда Лойиҳани амалга ошириш учун шартнома асосида жалб қилинадиган маҳаллий маслаҳатчи-экспертларнинг сони ва уларга тўланадиган иш ҳақи миқдорини ФАОнинг Ўзбекистондаги ваколатхонаси билан келишилган ҳолда тасдиқласин;
икки ой муддатда манфаатдор вазирлик ва идоралар, Қорақалпоғистон Республикаси Вазирлар Кенгаши, Қашқадарё ва Хоразм вилоятлари ҳокимликлари билан биргаликда Лойиҳани 2024 — 2028 йилларда амалга ошириш бўйича чора-тадбирлар режасини ишлаб чиқсин ва тасдиқласин;
Лойиҳани амалга ошириш доирасида бажарилган ишлар ҳолати ва ўзлаштирилган маблағлар юзасидан ҳисоботларни ҳар чоракда Инвестициялар, саноат ва савдо вазирлиги ҳамда Вазирлар Маҳкамасига киритиб борсин.
4. Белгилаб қўйилсинки:
Лойиҳа билан боғлиқ тадбирлар масъул вазирликлар ва ФАОнинг Ўзбекистондаги ваколатхонаси ўртасидаги келишув доирасида амалга оширилади;
Лойиҳа билан боғлиқ тадбирларни амалга ошириш учун ГЭЖнинг гранти ФАОнинг Ўзбекистондаги ваколатхонаси орқали Лойиҳанинг йиллик бюджетида тасдиқланган миқдорда ва муддатларда тегишли вазирлик учун Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасида очилган ҳисобварақларига ўтказиб борилади;
Лойиҳа доирасида ҳисобот йилида ГЭЖнинг ўзлаштирилмаган гранти ФАОнинг Ўзбекистондаги ваколатхонаси билан келишилган ҳолда кейинги йилга тўлиқ ўтказилади;
ГЭЖ гранти ҳисобидан харидлар Ўзбекистон Республикасининг «Давлат харидлари тўғрисида»ги Қонуни талаблари асосида очиқ ва шаффоф усулда амалга оширилади. Бунда республика ҳудудидан ташқаридаги харидлар ФАОнинг Ўзбекистондаги ваколатхонаси билан келишган ҳолда амалга оширилади;
ГЭЖ гранти ҳисобидан харид қилинган асбоб-ускуналар, қурилма ва жиҳозлар Лойиҳани амалга ошириш муддати тугаганидан сўнг маҳаллий ҳамкор ташкилотларига бепул ўтказиб берилади;
Экология, атроф-муҳитни муҳофаза қилиш ва иқлим ўзгариши вазирлиги ҳамда Қишлоқ хўжалиги вазирлигига Лойиҳа доирасидаги тадбирларнинг ўз муддатида ва сифатли бажарилишини, харидларнинг очиқ ва шаффофлигини таъминлаш, шунингдек, уларнинг устидан доимий назорат ўрнатиш мақсадида «йўл хариталари»ни тасдиқлаш ҳамда идоралараро мувофиқлаштирувчи кенгаш ва ишчи гуруҳларни тузиш ваколатлари берилсин.
5. Ўзбекистон Миллий телерадиокомпанияси, Ўзбекистон Миллий ахборот агентлиги ва бошқа оммавий ахборот воситаларига ушбу қарорнинг ижроси билан боғлиқ тадбирларни кенг ёритиш тавсия этилсин.
6. Мазкур қарорнинг бажарилишини назорат қилиш Ўзбекистон Республикаси экология, атроф-муҳитни муҳофаза қилиш ва иқлим ўзгариши вазири А.А. Абдухакимов ҳамда Ўзбекистон Республикаси қишлоқ хўжалиги вазири И.Ю. Абдурахмонов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2024 йил 26 февраль,
102-сон
Oʻzbekiston Respublikasi Vazirlar Mahkamasining
qarori
Birlashgan Millatlar Tashkilotining Oziq-ovqat va qishloq xoʻjaligi tashkiloti hamda Global ekologik jamgʻarma ishtirokida “Oʻzbekistonda oziq-ovqat tizimlarining yerdan foydalanish va erni qayta tiklashga taʼsirini baholash dasturi” loyihasini amalga oshirishga doir chora-tadbirlar toʻgʻrisida
Soʻnggi yillarda respublika boʻylab tanazzulga uchragan yerlarni va ekologik tizimlarni tiklash, bioxilma-xillikni muhofaza qilish hamda iqlim oʻzgarishining salbiy oqibatlarini yumshatishga qaratilgan keng qoʻlamli ishlar natijasida muhofaza etiladigan tabiiy hududlar maydoni uch baravarga kengaytirilib, mamlakatimizning umumiy maydoniga nisbatan 14,2 foizga yetkazildi.
Ekologiya va atrof-muhitni muhofaza qilish sohasiga xalqaro jamoatchilikning eʼtiborini jalb qilish maqsadida nufuzli xalqaro tadbirlar, shu jumladan, Samarqand shahrida BMTning Choʻllanishga qarshi kurashish konvensiyasi bajarilishini koʻrib chiqish qoʻmitasining 21-yigʻilishi (CRIC-21) oʻtkazildi.
Hozirgi vaqtda iqlim oʻzgarishi, choʻllanish, yer degradatsiyasi, atmosfera havosining buzilishi, bioxilma-xillik keskin kamayishi salbiy oqibatlarining oldini olish va ularni bartaraf etishda kechiktirib boʻlmaydigan choralar koʻrish taqozo etilmoqda.
Oʻzbekiston Respublikasi Prezidentining “Oʻzbekiston — 2030” strategiyasini 2023-yilda sifatli va oʻz vaqtida amalga oshirish chora-tadbirlari toʻgʻrisida” 2023-yil 11-sentabrdagi PQ-300-son qarori ijrosini taʼminlash maqsadida Vazirlar Mahkamasi qaror qiladi:
1. Quyidagilar:
Global ekologik jamgʻarma (keyingi oʻrinlarda — GEJ) tomonidan “Oʻzbekistonda oziq-ovqat tizimlarining yerdan foydalanish va erni qayta tiklashga taʼsirini baholash dasturi” loyihasini (keyingi oʻrinlarda — Loyiha) moliyalashtirish uchun 5 yil muddatga 5 992 661 AQSh dollari miqdorida grant ajratilishi belgilanganligi;
Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi hamda Qishloq xoʻjaligi vazirligi Loyihani amalga oshirish uchun umumiy ijrochi va texnik yordam koʻrsatuvchi etib belgilanganligi;
Loyihani amalga oshirish davrida BMTning Oziq-ovqat va qishloq xoʻjaligi tashkilotining (keyingi oʻrinlarda — FAO) Oʻzbekistondagi vakolatxonasi masʼul ijro etuvchi organ sifatida faoliyat koʻrsatishi;
Loyiha Qoraqalpogʻiston Respublikasi, Qashqadaryo va Xorazm viloyatlarida amalga oshirilishi nazarda tutilganligi maʼlumot uchun qabul qilinsin.
2. Loyihani amalga oshirish doirasida Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi hamda Qishloq xoʻjaligi vazirligiga quyidagi qoʻshimcha vazifalar yuklansin:
Loyiha bilan bogʻliq tadbirlarni rejalashtirish, muvofiqlashtirish, boshqarish, ularni amalga oshirish yuzasidan doimiy monitoring olib borish, baholash va hisobotlar tayyorlash;
Loyiha doirasida tadbirlarga yoʻnaltiriladigan grantning maqsadli va tizimli sarflanishini nazorat qilish, shuningdek, sarflangan hamda oʻzlashtirilgan mablagʻlar toʻgʻrisida hisobotlarni tayyorlash va tasdiqlash;
Loyiha boʻyicha amalga oshirilgan ishlar, sarflangan va oʻzlashtirilgan mablagʻlar toʻgʻrisida hisobotlar hamda erishilgan natijalar yuzasidan maʼlumotlarni har chorakda oʻzining rasmiy veb-saytida yoritib borish orqali Loyihaning amalga oshirilishi ustidan samarali jamoatchilik nazorati oʻrnatilishini taʼminlash.
3. Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi Qishloq xoʻjaligi vazirligi bilan birgalikda:
ikki hafta muddatda FAOning Oʻzbekistondagi vakolatxonasi bilan Loyihani amalga oshirish yuzasidan kelishuvni imzolasin;
bir oy muddatda Loyihani amalga oshirish uchun shartnoma asosida jalb qilinadigan mahalliy maslahatchi-ekspertlarning soni va ularga toʻlanadigan ish haqi miqdorini FAOning Oʻzbekistondagi vakolatxonasi bilan kelishilgan holda tasdiqlasin;
ikki oy muddatda manfaatdor vazirlik va idoralar, Qoraqalpogʻiston Respublikasi Vazirlar Kengashi, Qashqadaryo va Xorazm viloyatlari hokimliklari bilan birgalikda Loyihani 2024 — 2028-yillarda amalga oshirish boʻyicha chora-tadbirlar rejasini ishlab chiqsin va tasdiqlasin;
Loyihani amalga oshirish doirasida bajarilgan ishlar holati va oʻzlashtirilgan mablagʻlar yuzasidan hisobotlarni har chorakda Investitsiyalar, sanoat va savdo vazirligi hamda Vazirlar Mahkamasiga kiritib borsin.
4. Belgilab qoʻyilsinki:
Loyiha bilan bogʻliq tadbirlar masʼul vazirliklar va FAOning Oʻzbekistondagi vakolatxonasi oʻrtasidagi kelishuv doirasida amalga oshiriladi;
Loyiha bilan bogʻliq tadbirlarni amalga oshirish uchun GEJning granti FAOning Oʻzbekistondagi vakolatxonasi orqali Loyihaning yillik budjetida tasdiqlangan miqdorda va muddatlarda tegishli vazirlik uchun Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasida ochilgan hisobvaraqlariga oʻtkazib boriladi;
Loyiha doirasida hisobot yilida GEJning oʻzlashtirilmagan granti FAOning Oʻzbekistondagi vakolatxonasi bilan kelishilgan holda keyingi yilga toʻliq oʻtkaziladi;
GEJ granti hisobidan xaridlar Oʻzbekiston Respublikasining “Davlat xaridlari toʻgʻrisida”gi Qonuni talablari asosida ochiq va shaffof usulda amalga oshiriladi. Bunda respublika hududidan tashqaridagi xaridlar FAOning Oʻzbekistondagi vakolatxonasi bilan kelishgan holda amalga oshiriladi;
GEJ granti hisobidan xarid qilingan asbob-uskunalar, qurilma va jihozlar Loyihani amalga oshirish muddati tugaganidan soʻng mahalliy hamkor tashkilotlariga bepul oʻtkazib beriladi;
Ekologiya, atrof-muhitni muhofaza qilish va iqlim oʻzgarishi vazirligi hamda Qishloq xoʻjaligi vazirligiga Loyiha doirasidagi tadbirlarning oʻz muddatida va sifatli bajarilishini, xaridlarning ochiq va shaffofligini taʼminlash, shuningdek, ularning ustidan doimiy nazorat oʻrnatish maqsadida “yoʻl xaritalari”ni tasdiqlash hamda idoralararo muvofiqlashtiruvchi kengash va ishchi guruhlarni tuzish vakolatlari berilsin.
5. Oʻzbekiston Milliy teleradiokompaniyasi, Oʻzbekiston Milliy axborot agentligi va boshqa ommaviy axborot vositalariga ushbu qarorning ijrosi bilan bogʻliq tadbirlarni keng yoritish tavsiya etilsin.
6. Mazkur qarorning bajarilishini nazorat qilish Oʻzbekiston Respublikasi ekologiya, atrof-muhitni muhofaza qilish va iqlim oʻzgarishi vaziri A.A. Abduxakimov hamda Oʻzbekiston Respublikasi qishloq xoʻjaligi vaziri I.Y. Abduraxmonov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 26-fevral,
102-son