📅 2024-yil 28-fevral · Prezident qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 28 февраль · Президент қарорлари
Расмий матн. Расмий ҳужжат. Таҳририй изоҳлар киритилмаган.
📅 28 февраля 2024 г. · Постановления Президента
Официальный текст. Официальный документ. Редакционные примечания не включены.
📅 28 February 2024 · Presidential resolutions
Official text. Official document. Editorial notes are not included.
Ўзбекистон Республикаси Президентининг
Қарори
Хоразм вилоятида тадбиркорларга қулай шароитлар яратишга оид қўшимча чора-тадбирлар тўғрисида
Хоразм вилоятида кичик ва ўрта бизнесни молиявий қўллаб-қувватлаш ҳажмларини кенгайтириш орқали устувор йўналишларда, шу жумладан саноат, хизматлар ва туризм, қишлоқ хўжалигида юқори қўшилган қийматли рақобатбардош маҳсулотлар ишлаб чиқарилишини ташкил этиш ва янги иш ўринларини яратиш мақсадида:
1. Тикланиш ва тараққиёт жамғармаси «Бизнесни ривожлантириш банки» АТБга беш йил муддатга 14 фоиз ставкада 30 миллион АҚШ доллари эквивалентида кредит ресурсларини ажратсин.
Бунда, ушбу маблағлар оилавий тадбиркорликни ривожлантириш дастурлари, шунингдек, Ўзбекистон Республикаси Президентининг 2023 йил 14 сентябрдаги « Кичик бизнесни ривожлантиришни молиявий ва институционал қўллаб-қувватлаш чора-тадбирлари тўғрисида »ги ПҚ-306-сон ва 2023 йил 15 ноябрдаги « Аҳолини кичик ва ўрта бизнесга кенг жалб қилишнинг қўшимча чора-тадбирлари тўғрисида »ги ПҚ-366-сон қарорларида белгиланган тартиб ва механизмлар асосида:
Хоразм вилоятида ҳар бир маҳалланинг саноат, хизматлар, савдо ва умумий овқатланиш, туризм, чорвачилик, паррандачилик, балиқчилик, ҳунармандчилик, касаначилик, заргарлик, қишлоқ хўжалиги маҳсулотларини етиштириш, сақлаш ҳамда қайта ишлаш йўналишларидаги ихтисослашувидан келиб чиқиб, камида 10 та лойиҳаларни амалга ошириш мақсадида;
Хива ва Урганч шаҳарлари, Ҳазорасп, Хива, Шовот, Боғот ва Урганч туманларида замонавий савдо марказлари ва бозорлар ҳамда уларга туташ ҳудудларда ишлаб чиқариш бинолари (ангар ва цехлар)ни қуриш, туристик ва гастрономик кўчаларни ривожлантириш мақсадида тадбиркорларга узоқ муддатли кредит, ижара ва лизингга бериш учун йўналтирилади.
2. Белгилансинки, «Бизнесни ривожлантириш банки» АТБга мазкур қарор доирасида кичик ва ўрта бизнес субъектлари лойиҳаларини амалга оширишда тижорат банклари ҳамда «Тадбиркорликни ривожлантириш компанияси» АЖга ресурсларни жойлаштиришга рухсат берилади.
3. Маҳаллабай ишлаш ва тадбиркорликни ривожлантириш агентлиги Иқтисодиёт ва молия вазирлиги ҳамда Хоразм вилояти ҳокимлиги билан биргаликда бир ой муддатда Хоразм вилоятидаги 531 та маҳаллада амалга ошириладиган лойиҳалар дастурини ишлаб чиқсин.
3 1 . Хоразм вилоятида жойлашган давлат активларини сотиш жараёнларини жадаллаштириш ва тадбиркорлик субъектларига қўшимча имкониятлар яратиш мақсадида, шундай тартиб ўрнатилсинки, унга мувофиқ:
давлат кўчмас мулк объектларини сотиб олган харидор олди-сотди шартномаси тузилган кундан бошлаб ушбу объект қийматидан қатъи назар олти ой ичида сотиб олиш тўловларини тўлиқ амалга оширса, сотиб олиш тўловлари суммасидан 25 фоиз миқдорида чегирма берилади;
давлат активлари бўйича тўловларни, уларнинг миқдоридан қатъи назар, 5 йил ичида тенг улушларда бўлиб-бўлиб тўлаш имконияти яратилади.
4. Аҳолини кичик ва ўрта бизнесга кенг жалб қилиш бўйича республика комиссияси (Ж.А. Қўчқоров) Хоразм вилояти ҳокими Ж.Р. Рахимов билан биргаликда:
мазкур қарорнинг 3-бандида назарда тутилган дастурларни тасдиқласин ҳамда ҳар ой якуни билан уларнинг амалга оширилишини муҳокама қилиб борсин;
ҳар чорак якуни билан Ўзбекистон Республикаси Президентига амалга оширилаётган ишлар самараси ва натижадорлиги тўғрисида ахборот бериб борсин.
5. Қарор ижросини ҳар чоракда муҳокама қилиб бориш, ижро учун масъул идоралар фаолиятини мувофиқлаштириш ва назорат қилиш Бош вазир ўринбосари Ж.А. Қўчқоров ҳамда Хоразм вилояти ҳокими Ж.Р. Рахимов зиммасига юклансин.
Ўзбекистон Республикаси Президенти Ш. МИРЗИЁЕВ
Тошкент ш.,
2024 йил 28 февраль,
ПҚ-89-сон
Oʻzbekiston Respublikasi Prezidentining
Qarori
Xorazm viloyatida tadbirkorlarga qulay sharoitlar yaratishga oid qoʻshimcha chora-tadbirlar toʻgʻrisida
Xorazm viloyatida kichik va oʻrta biznesni moliyaviy qoʻllab-quvvatlash hajmlarini kengaytirish orqali ustuvor yoʻnalishlarda, shu jumladan sanoat, xizmatlar va turizm, qishloq xoʻjaligida yuqori qoʻshilgan qiymatli raqobatbardosh mahsulotlar ishlab chiqarilishini tashkil etish va yangi ish oʻrinlarini yaratish maqsadida:
1. Tiklanish va taraqqiyot jamgʻarmasi “Biznesni rivojlantirish banki” ATBga besh yil muddatga 14 foiz stavkada 30 million AQSH dollari ekvivalentida kredit resurslarini ajratsin.
Bunda, ushbu mablagʻlar oilaviy tadbirkorlikni rivojlantirish dasturlari, shuningdek, Oʻzbekiston Respublikasi Prezidentining 2023-yil 14-sentabrdagi “ Kichik biznesni rivojlantirishni moliyaviy va institutsional qoʻllab-quvvatlash chora-tadbirlari toʻgʻrisida ”gi PQ-306-son va 2023-yil 15-noyabrdagi “ Aholini kichik va oʻrta biznesga keng jalb qilishning qoʻshimcha chora-tadbirlari toʻgʻrisida ”gi PQ-366-son qarorlarida belgilangan tartib va mexanizmlar asosida:
Xorazm viloyatida har bir mahallaning sanoat, xizmatlar, savdo va umumiy ovqatlanish, turizm, chorvachilik, parrandachilik, baliqchilik, hunarmandchilik, kasanachilik, zargarlik, qishloq xoʻjaligi mahsulotlarini yetishtirish, saqlash hamda qayta ishlash yoʻnalishlaridagi ixtisoslashuvidan kelib chiqib, kamida 10 ta loyihalarni amalga oshirish maqsadida;
Xiva va Urganch shaharlari, Hazorasp, Xiva, Shovot, Bogʻot va Urganch tumanlarida zamonaviy savdo markazlari va bozorlar hamda ularga tutash hududlarda ishlab chiqarish binolari (angar va sexlar)ni qurish, turistik va gastronomik koʻchalarni rivojlantirish maqsadida tadbirkorlarga uzoq muddatli kredit, ijara va lizingga berish uchun yoʻnaltiriladi.
2. Belgilansinki, “Biznesni rivojlantirish banki” ATBga mazkur qaror doirasida kichik va oʻrta biznes subyektlari loyihalarini amalga oshirishda tijorat banklari hamda “Tadbirkorlikni rivojlantirish kompaniyasi” AJga resurslarni joylashtirishga ruxsat beriladi.
3. Mahallabay ishlash va tadbirkorlikni rivojlantirish agentligi Iqtisodiyot va moliya vazirligi hamda Xorazm viloyati hokimligi bilan birgalikda bir oy muddatda Xorazm viloyatidagi 531 ta mahallada amalga oshiriladigan loyihalar dasturini ishlab chiqsin.
3 1 . Xorazm viloyatida joylashgan davlat aktivlarini sotish jarayonlarini jadallashtirish va tadbirkorlik subyektlariga qoʻshimcha imkoniyatlar yaratish maqsadida, shunday tartib oʻrnatilsinki, unga muvofiq:
davlat koʻchmas mulk obyektlarini sotib olgan xaridor oldi-sotdi shartnomasi tuzilgan kundan boshlab ushbu obyekt qiymatidan qatʼi nazar olti oy ichida sotib olish toʻlovlarini toʻliq amalga oshirsa, sotib olish toʻlovlari summasidan 25 foiz miqdorida chegirma beriladi;
davlat aktivlari boʻyicha toʻlovlarni, ularning miqdoridan qatʼi nazar, 5 yil ichida teng ulushlarda boʻlib-boʻlib toʻlash imkoniyati yaratiladi.
4. Aholini kichik va oʻrta biznesga keng jalb qilish boʻyicha respublika komissiyasi (J.A. Qoʻchqorov) Xorazm viloyati hokimi J.R. Raximov bilan birgalikda:
mazkur qarorning 3-bandida nazarda tutilgan dasturlarni tasdiqlasin hamda har oy yakuni bilan ularning amalga oshirilishini muhokama qilib borsin;
har chorak yakuni bilan Oʻzbekiston Respublikasi Prezidentiga amalga oshirilayotgan ishlar samarasi va natijadorligi toʻgʻrisida axborot berib borsin.
5. Qaror ijrosini har chorakda muhokama qilib borish, ijro uchun masʼul idoralar faoliyatini muvofiqlashtirish va nazorat qilish Bosh vazir oʻrinbosari J.A. Qoʻchqorov hamda Xorazm viloyati hokimi J.R. Raximov zimmasiga yuklansin.
Oʻzbekiston Respublikasi Prezidenti Sh. MIRZIYOYEV
Toshkent sh.,
2024-yil 28-fevral,
PQ-89-son