UzbekAI

Ўзбекистон Республикаси Вазирлар Маҳкамасининг

қарори

НИЗОМ

РЎЙХАТИ

СХЕМАСИ

РЎЙХАТИ

Ёниш ва портлаш хавфи юқори бўлган кимёвий моддаларни (маҳсулотларни) сақлаш, ташиш, улардан ишлаб чиқаришда фойдаланиш ва уларни йўқ қилиш соҳасидаги фаолиятни назорат қилиш тартиби тўғрисидаги низомни тасдиқлаш ҳақида

Ўзбекистон Республикаси Президентининг «Ёниш ва портлаш хавфи юқори бўлган кимёвий моддалар билан боғлиқ фавқулодда вазиятларнинг олдини олиш бўйича чора-тадбир самарадорлигини ошириш тўғрисида» 2023 йил 6 ноябрдаги ПҚ-357-сон қарори ижросини таъминлаш мақсадида Вазирлар Маҳкамаси қарор қилади:

1. Қуйидагиларни назарда тутувчи Ёниш ва портлаш хавфи юқори бўлган кимёвий моддаларни (маҳсулотларни) сақлаш, ташиш, улардан ишлаб чиқаришда фойдаланиш ва уларни йўқ қилиш соҳасидаги фаолиятни назорат қилиш тартиби тўғрисидаги низом иловага мувофиқ тасдиқлансин:

ёниш ва портлаш хавфи юқори бўлган кимёвий моддаларни (маҳсулотларни) сақлаш учун омбор ҳамда ишлаб чиқариш бино ва иншоотларида ёнғин ва саноат хавфсизлиги талаблари;

кимёвий моддаларни ташишда белгиланган талаблар;

кимёвий моддаларни сақлаш, улардан ишлаб чиқаришда фойдаланиш ва уларни йўқ қилишда белгиланган талаблар;

давлат органларининг кимёвий моддаларни сақлаш, ташиш, улардан ишлаб чиқаришда фойдаланиш ва уларни йўқ қилиш соҳасидаги асосий функциялари.

2. Ўзбекистон Республикаси Фавқулодда вазиятлар вазирлиги Ички ишлар вазирлиги, Экология, атроф-муҳитни муҳофаза қилиш ва иқлим ўзгариши вазирлиги, Вазирлар Маҳкамаси ҳузуридаги Саноат, радиация ва ядро хавфсизлиги қўмитаси, Божхона қўмитаси, Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда мазкур қарор билан тасдиқланган низом талаблари жойларда бир хил ва тўғри бажарилиши устидан қатъий назорат ўрнатсин.

3. Ўзбекистон Миллий телерадиокомпанияси Ахборот ва оммавий коммуникациялар агентлиги билан биргаликда мазкур қарорнинг мазмун-моҳияти ҳамда мақсад ва вазифаларининг оммавий ахборот воситаларида кенг ёритилишини таъминласин.

4. Фавқулодда вазиятлар вазирлиги манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

5. Ушбу қарор расмий эълон қилинган кундан эътиборан уч ой ўтгач кучга киради.

6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.Ж. Раматов ҳамда фавқулодда вазиятлар вазири А.Ҳ. Қўлдошев зиммасига юклансин.

Вазирлар Маҳкамасининг 2024 йил 7 мартдаги 121-сон қарорига ИЛОВА

Ёниш ва портлаш хавфи юқори бўлган кимёвий моддаларни (маҳсулотларни) сақлаш, ташиш, улардан ишлаб чиқаришда фойдаланиш ва уларни йўқ қилиш соҳасидаги фаолиятни назорат қилиш тартиби тўғрисидаги

1-боб. Умумий қоидалар

1. Ушбу Низом Ўзбекистон Республикаси Фавқулодда вазиятлар вазирлиги, Ички ишлар вазирлиги, Экология, атроф-муҳитни муҳофаза қилиш ва иқлим ўзгариши вазирлиги, Божхона қўмитаси, Вазирлар Маҳкамаси ҳузуридаги Саноат, радиация ва ядро хавфсизлиги қўмитаси (кейинги ўринларда — ваколатли органлар) томонидан ёниш ва портлаш хавфи юқори бўлган кимёвий моддалар (кейинги ўринларда — кимёвий моддалар) ушбу моддалардан фойдаланувчилар томонидан сақланишини, ташилишини, улардан ишлаб чиқаришда фойдаланилишини ҳамда уларнинг йўқ қилинишини назорат қилиш тартибини белгилайди.

Мазкур Низом талаблари республика ва маҳаллий ижро этувчи ҳокимият органлари, идоравий бўйсунувидан ҳамда мулкчилик шаклидан қатъи назар, кимёвий моддаларни сақлаш, ташиш, улардан ишлаб чиқаришда фойдаланиш ва уларни йўқ қилиш билан шуғулланадиган жисмоний ҳамда юридик шахслар учун мажбурийдир.

2. Ушбу Низомда қуйидаги асосий тушунчалардан фойдаланилади:

кимёвий моддалар — ёниш ва портлаш хавфи юқори бўлган кимёвий моддалар (маҳсулотлар) рўйхатига киритилган ҳамда ўзига хос хоссалари ва хусусиятлари туфайли муайян омиллар мавжуд бўлган тақдирда бошқа объектларнинг ёниши ёки портлашига шунингдек, одамлар ҳаёти ва соғлиғига, атроф-муҳитга зарар етказилишига сабаб бўлиши мумкин бўлган моддалар, материаллар, буюмлар ва чиқиндилар;

кимёвий моддалардан фойдаланувчилар — ёниш ва портлаш хавфи юқори бўлган кимёвий моддаларни сақлаш, ташиш, улардан фойдаланиш ва уларни йўқ қилиш билан шуғулланадиган жисмоний шахслар, юридик шахслар ва хўжалик юритувчи субъектлар;

божхона омбори — махсус жиҳозланган иншоот бўлиб, ишлатилмаган товарларни божхона назорати остида сақлашга мўлжалланган мажмуа;

омборхона — ёниш ва портлаш хавфи юқори бўлган кимёвий моддаларни сақлашга мўлжалланган объект;

хавфли ишлаб чиқариш объекти (кейинги ўринларда — ХИЧО) — Ўзбекистон Республикасининг «Хавфли ишлаб чиқариш объектларининг саноат хавфсизлиги тўғрисида»ги Қонунида белгиланган корхоналар ёки уларнинг цехлари, участкалари, майдончалари, шунингдек, бошқа ишлаб чиқариш объектлари;

Ягона автоматлаштирилган ахборот тизими — республика ҳудудига олиб кирилган ҳамда белгиланган тартибда божхона расмийлаштирувидан ўтказилган кимёвий моддалар (маҳсулотлар) ва уларни олиб кирувчи субъектлар тўғрисидаги маълумотлари жамланган ҳамда Божхона қўмитаси ва Фавқулодда вазиятлар вазирлиги тизимлари билан интеграция қилинган, реал вақт режимида тақдим этиб бориладиган электрон маълумотлар базаси.

3. Кимёвий моддаларни сақлаш, ташиш, улардан фойдаланиш ва уларни йўқ қилиш билан шуғулланувчи кимёвий моддалардан фойдаланувчилар фаолияти ёнгин хавфсизлиги ва саноат хавфсизлиги соҳасидаги қонунчилик ҳужжатлари, техник жиҳатдан тартибга солиш соҳасидаги норматив ҳужжатлар, шунингдек, шаҳарсозлик нормалари ва қоидалари талабларига мувофиқ бўлиши шарт.

2-боб. Кимёвий моддаларни сақлаш ва ишлаб чиқариш бино ва иншоотлари учун белгиланган талаблар

4. Кимёвий моддаларни сақловчи омбор ва ишлаб чиқариш бино ва иншооти эгалари мазкур Низомга 1-иловада кўрсатилган кимёвий моддаларни сақлаш учун омборнинг ҳамда ишлаб чиқариш бино ва иншоотининг ёнгин ҳамда саноат хавфсизлиги талабларига мувофиқлиги юзасидан Фавқулодда вазиятлар вазирлиги ва Вазирлар Маҳкамаси ҳузуридаги Саноат, радиация ва ядро хавфсизлиги қўмитасидан (кейинги ўринларда — Қўмита) ҳар уч йилда бир маротаба ушбу Низомга 2-иловага мувофиқ шаклда хулоса олиши зарур.

Бунда мазкур хулоса Низомга 3-иловадаги схемага мувофиқ олинади.

5. Янги қурилаётган кимёвий моддаларни сақлаш омбори бинолари ҳамда ишлаб чиқариш бино ва иншоотлари учун ер майдонларини ажратиш, ишлаб чиқилган лойиҳа-смета ҳужжатларини экспертизадан ўтказиш, қурилиш-монтаж ишлари қурилиши тугалланган объектлардан фойдаланиш учун рухсатнома бериш жараёнида шаҳарсозлик нормалари ва қоидаларида белгиланган ёнгин хавфсизлиги талабларига риоя этган ҳолда, қонунчилик ҳужжатларида белгиланган тартибда амалга оширилади.

6. Кимёвий моддалардан фойдаланувчилар республика ҳудудида ишлаб чиқарилган ва чет давлатлардан олиб кирилган кимёвий моддаларни омборхонада жойлаштиришдан (сақлашдан) олдин кимёвий моддаларни ташиш йўналиши, тури, миқдори ва уларни ишлаб чиқарувчи тўғрисидаги маълумотларни бир иш кунида Фавқулодда вазиятлар вазирлигининг тегишлилиги бўйича Қорақалпоғистон Республикаси, вилоятлар ва Тошкент шаҳридаги ҳудудий бошқармасига хулоса олиш учун юборади. Бунда тақдим қилинган барча ҳужжатлар келиб тушган санадан эътиборан уни кўриб чиқиб, хулоса бериш ёхуд уни беришни рад этиш муддати ўн иш кунидан ошмаслиги керак.

7. Омборхоналарда ҳамда ишлаб чиқариш бино ва иншоотларида ёнғин хавфсизлигини таъминлаш учун масъул бўлган, ёнғинга қарши кўрсатмалар (йўл-йўриқ) бериш вазифаси юкланган ходимлар, шунингдек, ёнгин-техник комиссияси аъзолари ёнғин ва техника хавфсизлиги талабларига асосан тайёргарликдан ўтказилган бўлиши лозим.

8. Омборхонада ҳамда ишлаб чиқариш бино ва иншоотида кимёвий моддаларнинг хавфсиз сақланишини таъминлаш мақсадида юк эгаси томонидан омбор эгасига кимёвий моддаларнинг «Модда (материал) хавфсизлик паспорти» тақдим этилиши мажбурий ҳисобланади.

9. Кимёвий моддаларни омборда ҳамда ишлаб чиқариш бино ва иншоотида сақлашда ва улар билан боғлиқ юк кўтариш ва тушириш ишларини бажаришда амалдаги қонунчилик ҳужжатларида белгиланган талаб ҳамда шартларга риоя қилиниши зарур.

10. Республика ҳудудига кириб келаётган ёки Ўзбекистон Республикаси ҳудудида кимёвий моддаларни ишлаб чиқарувчи корхона ёки ташкилотлар томонидан кимёвий моддалар «Модда (материал) хавфсизлик паспорти» билан таъминланиши шарт.

11. Корхона ёки ташкилот томонидан ишлаб чиқарилган ва импорт қилинган кимёвий модданинг «Модда (материал) хавфсизлик паспорти»да қуйидаги маълумотлар акс этиши лозим:

кимёвий моддаларнинг идентификацияси ва уни ишлаб чиқарувчи ёки етказиб берувчи ҳақидаги маълумотлар;

хавф(лар)нинг идентификацияси;

кимёвий таркиби (компонентлари ҳақида маълумот);

биринчи ёрдам кўрсатиш чоралари;

ёнғин ва портлаш хавфсизлигини таъминлаш чоралари ҳамда воситалари;

фавқулодда вазиятларнинг олдини олиш ва оқибатларини бартараф этиш;

кимёвий моддаларни сақлаш ва юклаш-туширишда хавфсизлик қоидалари;

назорат ўлчов асбоблари ва шахсий ҳимоя воситалари;

физик-кимёвий хоссалар;

барқарорлиги ва реакцияга киришувчанлиги;

заҳарлилик хусусиятлари тўғрисидаги маълумотлар;

атроф-муҳитга таъсири тўғрисидаги маълумотлар;

қолдиқ ва чиқиндиларни йўқ қилиш бўйича тавсиялар;

кимёвий моддани ташиш (ташилиши) тўғрисидаги маълумотлар;

миллий ва халқаро қонунчилик тўғрисидаги маълумотлар;

қўшимча маълумотлар.

12. Кимёвий моддалар сақланадиган омбор ҳамда ишлаб чиқариш бино ва иншооти эгаси «Модда (материал) хавфсизлик паспорти»да белгиланган маълумотлардан ташқари амалдаги қонунчилик ҳужжатларида ва техник жиҳатдан тартибга солиш соҳасидаги норматив ҳужжатларда белгиланган талабларни бажарган ҳолда кимёвий моддаларни сақлаш, шунингдек, қуйидаги қўшимча тадбирларни амалга ошириши зарур:

омборнинг ҳамда ишлаб чиқариш бино ва иншоотининг очиқ сақлаш майдонида табиий ёки омборнинг ҳамда ишлаб чиқариш бино ва иншоотининг ёпиқ сақлаш майдонида сунъий шамоллатиш шароитининг яратилиши;

бинонинг ички қисми ҳароратига қўйиладиган талабларни бажариш;

кимёвий моддага офтоб нурлари таъсирини ҳисобга олиш;

омборда ҳамда ишлаб чиқариш бино ва иншоотида ўзаро алоқада экзотермик реакцияларга киришиши мумкин бўлган кимёвий моддалар ораси махсус ажратилган, авария ҳолатларида ҳам бир-бири билан таъсирлашишига имконини бермайдиган жойларга жойлаштирилиши;

омбор ҳамда ишлаб чиқариш бино ва иншоотида бир вақтнинг ўзида кимёвий модда миқдорининг максимал сақланишини ҳисобга олиш;

омбор ҳамда ишлаб чиқариш бино ва иншооти ишчи-ходимларининг шахсий ҳимоя воситалари билан таъминланиши;

кимёвий моддаларни сақлаш, ташиш, улардан ишлаб чиқаришда фойдаланиш ва уларни йўқ қилишга қўйиладиган қўшимча хавфсизлик талаблари бажарилиши лозим.

13. Омборларда ҳамда ишлаб чиқариш бино ва иншоотларида сақланаётган кимёвий моддалар ҳолатини доимий назорат қилиб бориш учун ёнғин ва саноат хавфсизлиги талабларига мувофиқ маҳсулотлар орасидан эркин ҳаракатланиш имкони яратилган бўлиши лозим.

14. Омборларда ҳамда ишлаб чиқариш бино ва иншоотларида кимёвий маҳсулотлар билан амалга ошириладиган юк кўтариш ва тушириш ишлари портлашлардан ҳимояланган ҳамда учқун чиқармайдиган воситалар ва жиҳозлардан фойдаланган ҳолда бажарилиши керак. Мазкур ҳудудларда ишлайдиган ходимлар антистатик воситалар ёрдамида ишлов берилган ҳимоя кийимлари билан таъминланиши лозим.

15. Омборда ҳамда ишлаб чиқариш бино ва иншоотида хизмат кўрсатадиган ходимлар енгил алангаланувчи ва ёнувчи суюқликлар ҳамда ёнувчи газлар билан ишлашда синтетик матолардан тикилган махсус кийимлардан фойдаланиши тақиқланади.

16. Омборларда ҳамда ишлаб чиқариш бино ва иншоотларида ёғланган матоларни (кийимларни), шунингдек, гугурт, чақнатгичлар (ёндирувчилар) ва ёнувчи материаллари бўлган кийимларни сақлаш тақиқланади.

17. Кимёвий моддалар сақланаётган даврда омборда ҳамда ишлаб чиқариш бино ва иншоотида қурилиш-монтаж ишлари Фавқулодда вазиятлар вазирлиги ва унинг ҳудудий бошқармалари билан келишилган ҳолда амалга оширилади.

18. Ишчи-ходимлар меҳнат ва техника хавфсизлиги қоидаларига тўлиқ риоя этишлари, шахсий ҳимоя воситаларидан мақсадли фойдаланиш, жабрланганларга биринчи ёрдам кўрсатиш, шунингдек, юзага келиши мумкин бўлган фавқулодда вазиятлар ва ёнғинларда тўғри ҳаракат қилиш қоидаларини билишлари зарур.

19. Хавфсизликни таъминлаш мезонлари ишчи-ходимлар учун давлат тилида ёзилган бўлиши ва уларга риоя этилиши доимий назорат қилиниши керак.

3-боб. Кимёвий моддаларни ташишда белгиланган талаблар

20. Кимёвий моддаларнинг тегишли манзилга хавфсиз тарзда етказилиши (ташилиши) учун қонунчилик ҳужжатларида белгиланган тартибда ички ишлар органларининг кузатуви остида амалга оширилади.

21. Ўзаро алоқада экзотермик реакцияларга киришиши мумкин бўлган кимёвий моддалар ва материалларни ҳамда озиқ-овқат маҳсулотларини биргаликда транспорт юкхонасига жойлаштириш ва ташиш тақиқланади.

22. Кимёвий моддалар ташувчи томонидан ташилишида ҳамда улар билан боғлиқ юк кўтариш ва тушириш ишларини бажаришда амалдаги қонунчилик ҳужжатларида белгиланган талаб ва шартларга риоя қилиниши зарур.

4-боб. Кимёвий моддалардан фойдаланиш ва йўқ қилишда белгиланган талаблар

23. Кимёвий моддалардан фойдаланувчилар кимёвий моддаларни ишлаб чиқарувчи ва етказиб берувчидан «Модда (материал) хавфсизлик паспорти»ни талаб қилиши шарт.

24. Фойдаланиш муддати ўтган ҳамда яроқсиз ҳолга келган кимёвий моддаларни омборда сақлаш ва улардан фойдаланиш тақиқланади.

25. Кимёвий моддалардан фойдаланувчилар томонидан кимёвий моддаларни сақлаш, юклаш, ташиш ҳамда ундан фойдаланиш бўйича ишчи-ходимларнинг хавфсизлигини таъминлаш мезонларини ишлаб чиқиши ва тасдиқлаши шарт.

26. Кимёвий моддалардан фойдаланувчилар томонидан омборда ва ишлаб чиқаришда содир бўлиши мумкин бўлган фавқулодда вазиятларнинг олдини олиш ва бартараф этиш бўйича ҳаракатлар режаси ишлаб чиқилади ва Фавқулодда вазиятлар вазирлигининг ҳудудий бошқармалари билан келишилган ҳолда тасдиқланади.

27. Кимёвий моддаларни «Модда (материал) хавфсизлик паспорти»да кўрсатилган яроқлилик муддатининг ўтиб кетиши ҳолатларини камайтиришга доир тадбирлар кимёвий модданинг мулкдори ёки ундан фойдаланувчилар томонидан қонунчилик ҳужжатларида белгиланган тартибда амалга оширилади.

28. Фойдаланишга яроқсиз ҳолга келган, яроқлилик муддати ўтган ёки қайта ишлаш имкони бўлмаган кимёвий моддаларни йўқ қилиш омбор ҳамда ишлаб чиқариш бино ва иншоот эгасининг мурожаати асосида, манфаатдор вазирлик ва идоралар билан биргаликда қонунчилик ҳужжатларида белгиланган тартибда амалга оширилади.

5-боб Давлат органларининг кимёвий моддаларни сақлаш, ташиш, улардан фойдаланиш ва уларни йўқ қилиш соҳасидаги назорати

29. Кимёвий моддаларни сақлаш, ташиш, улардан фойдаланиш ва уларни йўқ қилиш соҳасида белгиланган талабларга риоя этилишида, шунингдек, техноген авариялар ва фавқулодда вазиятларнинг олдини олиш бўйича ҳамкорлик қилишда тегишли вазирлик ва идоралар ҳамда маҳаллий ижро этувчи ҳокимият органлари ўзларига юкланган функцияларга мувофиқ тадбирларни амалга оширадилар.

30. Фавқулодда вазиятлар вазирлиги кимёвий моддаларни сақлаш, ташиш, улардан ишлаб чиқаришда фойдаланиш ва уларни йўқ қилиш соҳасида қуйидагиларни амалга оширади:

а) кимёвий моддаларни сақлаш, ташиш, улардан ишлаб чиқаришда фойдаланиш ва уларни йўқ қилиш соҳасидаги фаолиятни мувофиқлаштиради, шунингдек, ушбу соҳадаги белгиланган талабларга риоя этилишини назорат қилади;

б) кимёвий моддалардан фойдаланувчилар томонидан кимёвий моддаларни сақлаш, ташиш, улардан ишлаб чиқаришда фойдаланиш ва уларни йўқ қилишда белгиланган хавфсизлик талабларига риоя этилишини назорат қилади;

в) республика ҳудудига олиб кирилган ва республика ҳудудида ишлаб чиқарилаётган ҳамда сақланаётган кимёвий моддалар тўғрисида ягона марказлашган маълумотлар базасини яратади ва мониторингини юритади;

г) кимёвий моддаларни сақлаш, ташиш, улардан ишлаб чиқаришда фойдаланиш ва уларни йўқ қилишда юзага келадиган техноген авариялар ва фавқулодда вазиятларнинг олдини олиш, шунингдек, оқибатларини бартараф этиш ишларини бошқаради ҳамда мувофиқлаштиради;

д) кимёвий моддаларни сақлаш, ташиш, улардан ишлаб чиқаришда фойдаланиш ва уларни йўқ қилиш соҳасидаги назоратни Божхона қўмитаси, Қўмита, Ички ишлар вазирлиги ҳамда бошқа манфаатдор вазирлик ва идоралар билан ҳамкорликда амалга оширади;

е) ёниш ва портлаш хавфи юқори бўлган кимёвий моддаларни сақлаш ва улардан ишлаб чиқаришда фойдаланиш учун объектнинг (омборнинг) ҳамда ишлаб чиқариш бино ва иншоотининг ёнғин ва саноат хавфсизлиги талабларига мувофиқлиги юзасидан хулоса беради;

ж) кимёвий моддалар бўйича талабларнинг бузилишида айбдор бўлган шахсларга нисбатан қонунчилик ҳужжатларида белгиланган тартибда чоралар кўради;

з) Божхона қўмитаси билан биргаликда республика ҳудудига олиб кириладиган кимёвий моддалар бўйича Ягона автоматлаштирилган ахборот тизими орқали маълумот алмашади;

и) Ички ишлар вазирлиги, Қурилиш ва уй-жой коммунал хўжалиги вазирлиги, Транспорт вазирлиги, Энергетика вазирлиги, Божхона қўмитаси ҳамда Қўмита мутахассисларини жалб этган ҳолда, бўлим (бўлинмалар) ходимларининг малакасини ошириб боради;

к) кимёвий моддаларни сақлаш омборларида ҳамда ишлаб чиқариш бино ва иншоотларида бир йилда кўпи билан бир маротаба батафсил (дастлабки) ва назорат тартибида кимёвий моддаларни сақлаш, улардан ишлаб чиқаришда фойдаланиш ва уларни йўқ қилишда белгиланган талабларга риоя этилишини назорат қилади, шу жумладан, уларнинг омборда тўғри жойлаштирилгани, емирувчи ёки бошқача таъсирга чидамли тарзда сақланаётганлиги, шунингдек, бир-бирига ўзаро таъсир қилмаслиги ва хавфли оқибатларни келтириб чиқарувчи реакцияга киришмаслигини таъминловчи шароитлар яратилганлигини текширади;

л) жисмоний ва юридик шахслар мурожаатлари, шунингдек, оммавий ахборот воситалари ва бошқа манбалардан олинган маълумотлар асосида белгиланган тартибда тезкор текширувлар ўтказади;

м) Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларининг аҳоли ва ҳудудларни фавқулодда вазиятлардан муҳофаза қилиш бўйича йиллик асосий тадбирлар режалари асосида кимёвий моддалар билан боғлиқ фаолиятни амалга оширувчи тадбиркорлик субъектлари, давлат органлари ва бошқа ташкилотлар ходимлари иштирокида кимёвий моддаларни сақлаш, ташиш, улардан ишлаб чиқаришда фойдаланиш ва уларни йўқ қилиш тадбирларини хавфсиз ташкил этиш бўйича кўргазмали ўқув машқ ва машғулотлар ўтказиб боради.

31. Божхона қўмитаси кимёвий моддаларни сақлаш, ташиш, улардан ишлаб чиқаришда фойдаланиш ва уларни йўқ қилиш соҳасидаги қуйидагиларни амалга оширади:

а) республика ҳудудига олиб кирилган кимёвий моддаларни белгиланган тартибда божхона расмийлаштирувидан ўтказади ҳамда бир кун муддатда Ягона автоматлаштирилган ахборот тизимига кимёвий моддалар тури, миқдори ва уларни олиб кирувчи субъект тўғрисидаги маълумотларни киритиб боради:

божхона чегарасидан олиб кирилганлиги тўғрисида;

божхона назорати остида сақланаётган омбор тўғрисида;

маҳсулотлар якуний божхона режимига расмийлаштирилганлиги тўғрисида маълумот;

б) омбор эгасига «Божхона омборини таъсис этиш учун» лицензия беради;

в) божхона назорати остидаги кимёвий моддаларни Фавқулодда вазиятлар вазирлиги томонидан талабларга жавоб бериши бўйича берилган хулосаси асосида божхона омборларига жойлаштирилишига рухсат беради ва назоратини таъминлайди;

г) Фавқулодда вазиятлар вазирлиги, Ички ишлар вазирлиги ва Вазирлар Маҳкамаси ҳузуридаги Саноат, радиация ва ядро хавфсизлиги қўмитаси билан кимёвий моддаларни сақлаш, ташиш, улардан фойдаланиш ва уларни йўқ қилишда доимий ҳамкорлик қилади.

32. Қўмита-кимёвий моддаларни сақлаш, ташиш, улардан ишлаб чиқаришда фойдаланиш, уларни йўқ қилиш соҳасида қуйидагиларни амалга оширади:

а) мазкур Низомга 4-иловага мувофиқ кимёвий моддалар омборда ҳамда ишлаб чиқариш бино ва иншоотида сақланса, ушбу омборларни ҳамда ишлаб чиқариш бино ва иншоотларини ХИЧО сифатида рўйхатга олади;

б) омборларда ҳамда ишлаб чиқариш бино ва иншоотларида, кимёвий моддаларни сақлаш учун мўлжалланган ХИЧОларини лойиҳалаштириш, қуриш ҳамда кимёвий моддаларни сақлаш учун мўлжалланган ХИЧОда портловчи ва заҳарли моддаларни, уларни қўллаган ҳолда материаллар ва маҳсулотларни, шунингдек, портлатиш воситаларини яратиш, ишлаб чиқариш, ташиш, сақлаш ва реализация қилиш фаолияти учун лицензияси мавжудлигини назорат қилади;

в) Ўзбекистон Республикасининг «Хавфли ишлаб чиқариш объектларининг саноат хавфсизлиги тўғрисида»ги Қонунига кўра қуйидаги омборларда ҳамда ишлаб чиқариш бино ва иншоотларида кимёвий моддаларни сақлаш учун мўлжалланган ХИЧОларида белгиланган тартибда:

хавфли ишлаб чиқариш объектини қуриш, кенгайтириш, қайта қуриш, техник жиҳатдан қайта жиҳозлаш, консервациялаш ва тугатишга доир лойиҳа ҳужжатларини;

хавфли ишлаб чиқариш объектида қўлланадиган техник қурилмаларини;

хавфли ишлаб чиқариш объектидаги бинолар ва иншоотларни;

г) омборларда, ишлаб чиқариш бино ва иншоотларда ҳамда кимёвий моддаларни сақлаш учун мўлжалланган ХИЧОда авария юз берганда, бошқа шахсларнинг ҳаёти, соғлиғи ва (ёки) мол-мулкига ҳамда атроф-муҳитга зарар етказганлик учун жавобгарлик қонунчилик ҳужжатларида белгиланадиган тартибда суғурта қилинганлигини текширади;

д) омборлар, ишлаб чиқариш бино ва иншоотлари, кимёвий моддаларни сақлаш учун мўлжалланган ХИЧОни монтаж, таъмирлаш, ишга тушириш-созлаш ва фойдаланиш ишларини бажариш учун қуйидаги фаолият турлари бўйича қонунчилик ҳужжатларида белгиланган тартибда Қўмита томонидан:

Қўмита назоратидаги объектларда электр қурилмаларини созлаш ишларини бажариш учун рухсатнома;

Фавқулодда вазиятлар вазирлигига ёниш ва портлаш хавфи юқори бўлган кимёвий моддаларни сақлаш учун объектнинг (омборнинг) ҳамда ишлаб чиқариш бино ва иншоотининг саноат хавфсизлиги талабларига мувофиқлиги юзасидан хулоса беради;

е) ёниш ва портлаш хавфи юқори бўлган кимёвий моддаларни сақлаш, ташиш, улардан ишлаб чиқаришда фойдаланиш ва уларни йўқ қилиш соҳасида фаолият юритадиган раҳбарларни уч йилда бир маротаба, мутахассисларнинг бир йилда бир маротаба ўтказиладиган меҳнат муҳофазаси қоидалари ва йўриқномалари бўйича билим синовларида иштирок этади;

ж) омборларда, ишлаб чиқариш бино ва иншоотларида ҳамда кимёвий моддаларни сақлаш учун мўлжалланган ХИЧОда авария ёки бахтсиз ҳодисалар содир бўлган тақдирда, қонунчилик ҳужжатларида белгиланган тартибда махсус текшириш ўтказади.

33. Ички ишлар вазирлиги кимёвий моддаларни сақлаш, ташиш, улардан фойдаланиш ва уларни йўқ қилиш соҳасида қуйидагиларни амалга оширади:

кимёвий моддалар тегишли манзилга хавфсиз етказилиши (ташилиши) учун қонунчилик ҳужжатларида белгиланган тартибда кузатувни амалга оширади;

кимёвий моддалар билан боғлиқ техноген авариялар ва фавқулодда вазиятларда жамоат тартибини сақлаш чораларини кўради.

33 1 . Экология, атроф-муҳитни муҳофаза қилиш ва иқлим ўзгариши вазирлиги кимёвий моддаларни сақлаш, ташиш, улардан ишлаб чиқаришда фойдаланиш ва уларни йўқ қилиш соҳасидаги фаолиятнинг табиатни муҳофаза қилиш нормаларига мувофиқлигига риоя этилишини назорат қилади.

6-боб. Якунловчи қоида

34. Кимёвий моддаларни сақлаш, ташиш, улардан ишлаб чиқаришда фойдаланиш ва уларни йўқ қилишда хавфсизлик талабларига риоя этилишини таъминлашга қуйидагилар жавобгар ҳисобланади:

кимёвий моддалар омборга жойлаштирилгунга қадар — ташувчи;

кимёвий моддалар омборга ҳамда ишлаб чиқариш бино ва иншоотига жойлаштирилганда — омбор эгаси ва улардан фойдаланувчи субъект;

кимёвий моддалардан фойдаланиш ва уларни йўқ қилишда — улардан фойдаланувчи субъект.

35. Ушбу Низом талабларининг бузилишида айбдор бўлган шахслар қонунчилик ҳужжатларига мувофиқ жавоб берадилар.

Ёниш ва портлаш хавфи юқори бўлган кимёвий моддаларни (маҳсулотларни) сақлаш, ташиш, улардан фойдаланиш ва уларни йўқ қилиш соҳасидаги фаолиятни назорат қилиш тартиби тўғрисидаги низомга 1-ИЛОВА

Ёниш ва портлаш хавфи юқори бўлган моддалар ҳамда ушбу моддалар сақланадиган омбор ҳамда ишлаб чиқаришга мўлжалланган бино ва иншоотларнинг ёнгин ва саноат хавфсизлиги талабларига мувофиқлиги юзасидан Фавқулодда вазиятлар вазирлиги ҳамда Вазирлар Маҳкамаси ҳузуридаги Саноат, радиация ва ядро хавфсизлиги қўмитасидан хулоса олиниши зарур бўлган кимёвий моддалар (маҳсулотлар)

Т/р ТИФ ТН коди Товар номи 1. 2207 80 фоиз ва ундан кўп бўлган спирт концентрацияли денатурацияланмаган этил спирти; этил спирти ва бошқа денатурацияланган, ҳар қандай концентрацияли спирт дамламалари 2. 2209 00 Сирка ва сирка кислотасидан олинган унинг ўрнини босувчилар 3. 2503 00 Сублимацияланган, тиндирилган ёки коллоид олтингугуртдан ташқари барча кўринишдаги олтингугурт 4. 2511 20 Табиий барий карбонати (витерит), кальцийланган ёки кальцийланмаган, ТИФ ТНнинг 2816-товар позициясидаги барий оксидидан ташқари 5. 2522 10 Сўндирилмаган оҳак, ТИФ ТНнинг 2825-товар позициясида кўрсатилган кальций оксиди ва гидроксидидан ташқари 6. 2801 10 Хлор 7. 2801 30 Фтор; бром 8. 2802 00 Чўктирилган ёки сублимацияланган олтингугурт; коллоид олтингугурт 9. 2804 10 Водород 10. 2804 21 Инерт газлар: аргон 11. 2804 29 Инерт газлар: бошқалар, аргондан ташқари 12. 2804 30 Азот 13. 2804 40 Кислород 14. 2804 70 Фосфор 15. 2804 80 Маргимуш (мишьяк) 16. 2804 90 Селен 17. 2805 11 Ишқорий ёки ишқорий ер металлари: натрий 18. 2805 12 Ишқорий ёки ишқорий ер металлари: кальций 19. 2805 19 Ишқорий ёки ишқорий ер металлари: бошқалар, натрий ва кальцийлардан ташқари 20. 2805 30 Аралашмалардаги ёки қотишмалардаги соф шаклдаги скандий ва иттирий, нодир ер металлари 21. 2806 Водород хлориди (хлорид кислотаси); хлорсульфон кислотаси 22. 2807 Сульфат кислотаси; олеум 23. 2808 Азот кислотаси; сульфоазотли кислоталар 24. 2809 20 Фосфор кислотаси; аниқ ёки ноаниқ кимёвий таркибга эга полифосфор кислоталари 25. 2811 Бошқа ноорганик кислоталар ва нометалларнинг кислород билан бошқа ноорганик бирикмалари 26. 2812 11 Хлоридлар ва оксид хлоридлар: карбонил дихлориди (фосген) 27. 2812 13 Хлоридлар ва оксид хлоридлар: фосфор трихлориди 28. 2812 14 Хлоридлар ва оксид хлоридлар: фосфор пентахлориди 29. 2812 19 Хлоридлар ва оксид хлоридлар: бошқалар 30. 2812 90 Нометалларнинг галогенли бирикмалари ва галогенли оксидлари: бошқалар, хлоридлар ва оксид хлоридлардан ташқари 31. 2813 Нометалларнинг сульфидлари; техник фосфор трисульфиди 32. 2814 20 Сувли эритмадаги аммиак 33. 2815 Натрий гидроксиди (каустик сода); калий гидроксиди (уювчи калий); натрий ёки калий пероксидлари 34. 2816 Магний гидроксиди ва пероксиди; стронций ёки барий оксидлари, гидроксидлари ва пероксидлари 35. 2819 Хром оксидлари ва гидроксидлари 36. 2821 10 Темир оксидлари ва гидроксидлари 37. 2824 90 Қўрғошин оксидлари; қўрғошинли сурик (қизил ва тўқ сариқ): бошқалар, қўрғошин монооксиди (қўрғошин глети)лардан ташқари 38. 2825 10 Гидразин ва гидроксиламин ва уларнинг ноорганик тузлари 39. 2825 90 Бошқа ноорганик асослар; металларнинг бошқа оксидлари, гидроксидлари ва пероксидлари: бошқалар 40. 2826 19 Бошқа фторидлар, алюминийдан ташқари 41. 2826 90 Фторосиликатлар, фтороалюминатлар ва фторнинг бошқа мураккаб тузлари: бошқалар 42. 2827 20 Кальций хлориди 43. 2827 31 Бошқа хлоридлар: магний 44. 2827 32 Бошқа хлоридлар: алюминий 45. 2827 39 Бошқа хлоридлар: бошқалар, магний, алюминий ва никельлардан ташқари 46. 2827 51 Бромидлар ва бромид оксидлари: натрий ёки калий бромидлари 47. 2827 59 Бромидлар ва бромид оксидлари: бошқалар, натрий ёки калий бромидларидан ташқари 48. 2827 60 Йодидлар ва йодид оксидлари 49. 2828 90 Гипохлоритлар; хлоритлар; гипобромитлар: бошқалар 50. 2829 Хлоратлар ва перхлоратлар; броматлар ва перброматлар; йодатлар ва перйодатлар 51. 2831 10 Дитионитлар ва сульфоксилатлар: натрий 52. 2833 19 Натрий сульфатлари: бошқалар, динатрий сульфатидан ташқари 53. 2833 27 Бошқа сульфатлар: барий 54. 2833 29 Бошқа сульфатлар: бошқалар 55. 2833 40 Пероксосульфатлар (персульфатлар) 56. 2834 Нитритлар; нитратлар 57. 2837 11 Цианидлар ва цианид оксидлар: натрий 58. 2837 19 Цианидлар ва цианид оксидлар: бошқалар, натрийдан ташқари 59. 2841 50 Бошқа хроматлар ва дихроматлар; пероксохроматлар 60. 2841 61 Манганитлар, манганатлар ва перманганатлар: калий перманганати 61. 2841 69 Манганитлар, манганатлар ва перманганатлар: бошқалар, калий перманганатидан ташқари 62. 2843 21 Кумуш бирикмалари: кумуш нитрати 63. 2843 90 Бошқа бирикмалар; амальгамалар 64. 2845 90 ТИФ ТНнинг 2844-товар позициясидаги изотоплардан бошқа изотоплар; ушбу изотопларнинг аниқ ёки ноаниқ кимёвий таркибга эга органик ёки ноорганик бирикмалари: бошқалар 65. 2846 90 Нодир ер металлари, иттрий ёки скандий, ёки ушбу металларнинг аралашмалари, органик ёки ноорганик бирикмалари: бошқалар 66. 2847 00 Мочевина билан қотирилган ёки қотирилмаган водород пероксиди 67. 2849 10 Карбидлар, кимёвий таркиби аниқ ёки ноаниқ: кальций 68. 2849 90 Карбидлар, кимёвий таркиби аниқ ёки ноаниқ: бошқалар, кальций ва кремнийлардан ташқари 69. 2850 00 ТИФ ТНнинг 2849-товар позициясига тааллуқли карбид бирикмаларидан бошқа, аниқ ёки ноаниқ кимёвий таркибга эга гидридлар, нитридлар, азидлар, силицидлар ва боридлар 70. 2852 Амальгамалардан бошқа симобнинг аниқ ёки ноаниқ кимёвий таркибга эга, органик ёки ноорганик бирикмалари: 71. 2901 Ациклик углеводородлар 72. 2902 Циклик углеводородлар 73. 2903 Углеводородларнинг галлогенланган ҳосилалари 74. 2904 Углеводородларнинг сульфирланган, нитроланган ёки нитрозирланган ҳосилалари, галогенлашган ёки галогенлашмаган 75. 2905 11 Тўйинган моноспиртлар: метанол (метил спирти) 76. 2905 12 Тўйинган моноспиртлар: пропил спирти ва изопропил спирти 77. 2905 13 Тўйинган моноспиртлар: бутил спирти 78. 2905 14 Тўйинган моноспиртлар: бошқа бутаноллар 79. 2905 16 Тўйинган моноспиртлар: октанол (октил спирти) ва унинг изомерлари 80. 2905 19 Тўйинган моноспиртлар: бошқалар 81. 2905 59 Ациклик спиртларнинг галогенланган, сульфинланган, нитроланган ёки нитрозаланган ҳосилалари: бошқалар 82. 2906 19 Циклоалкан, циклоалкен ёки циклотерпен: бошқалар 83. 2907 12 Монофеноллар: крезоллар ва уларнинг тузлари 84. 2907 19 Монофеноллар: бошқалар 85. 2907 29 Полифеноллар; фенолоспиртлар: бошқалар 86. 2908 19 Таркибида фақат галогено гуруҳлар бўлган ҳосилалар ва уларнинг тузлари: бошқалар 87. 2908 99 Фенол ёки фенолоспиртларнинг галогенланган, сульфинланган, нитроланган ёки нитрозаланган ҳосилалари: бошқалар 88. 2909 Оддий эфирлар, оддий эфирларнинг, ацеталларнинг, яримацеталларнинг ва кетонларнинг (маълум ва номаълум кимёвий таркибдаги) эфирспиртлари, эфирфеноллари, эфирспиртфеноллари, спиртларнинг пероксидлари ва уларнинг галогенланган, сульфирланган, нитроланган ёки нитрозирланган ҳосилалари 89. 2910 20 Таркибида уч бензол ҳалқа бўлган эпоксидлар, эпокси спиртлар, эпоксифеноллар ва эпоксиэфирлар ва уларнинг галлогенланган, сульфинланган, нитроланган ёки нитрозаланган ҳосила бирикмалари: метилоксиран (пропиленоксид) 90. 2910 30 Таркибида уч бензол ҳалқа бўлган эпоксидлар, эпокси спиртлар, эпоксифеноллар ва эпоксиэфирлар ва уларнинг галлогенланган, сульфинланган, нитроланган ёки нитрозаланган ҳосила бирикмалари: эпоксипропан (эпихлоргидрин) 91. 2911 00 Таркибида бошқа кислородли функционал гуруҳ бўлган ацеталлар ва яримацеталлар ҳамда уларнинг галлогенланган, сульфинланган, нитроланган ёки нитрозаланган ҳосила бирикмалари 92. 2912 Таркибида бошқа кислородли функционал гуруҳ бўлган ёки бўлмаган альдегидлар; циклик альдегид полимерлари; параформальдегид 93. 2913 00 Галлогенланган, сульфинланган, нитроланган ёки нитрозаланган бирикмаларнинг ҳосила бирикмалари 94. 2914 11 Таркибида бошқа кислородли функционал гуруҳ бўлган ёки бўлмаган ациклик кетонлар: ацетон 95. 2914 12 Таркибида бошқа кислородли функционал гуруҳ бўлган ёки бўлмаган ациклик кетонлар: бутанон (метилэтилкетон) 96. 2914 19 Таркибида бошқа кислородли функционал гуруҳ бўлган ёки бўлмаган ациклик кетонлар: бошқалар 97. 2914 22 Таркибида бошқа кислородли функционал гуруҳ бўлган ёки бўлмаган циклоалкан, циклоалкен ёки циклотерпен кетонлар: циклогексанон ва метилциклогексанонлар 98. 2914 29 Таркибида бошқа кислородли функционал гуруҳ бўлган ёки бўлмаган циклоалкан, циклоалкен ёки циклотерпен кетонлар: бошқалар 99. 2914 40 Кетоноспирт ва кетоноалдегидлар 100. 2914 79 Галлогенланган, сульфинланган, нитроланган ёки нитрозаланган ҳосилалари: бошқалар 101. 2915 11 Чумоли кислотаси 102. 2915 13 Чумоли кислотасининг мураккаб эфирлари 103. 2915 21 Сирка кислота 104. 2915 24 Сирка ангидрид 105. 2915 33 Сирка кислота мураккаб эфирлари: п-бутилацетат 106. 2915 39 Сирка кислота мураккаб эфирлари: бошқалар 107. 2915 40 Моно-, ди- ёки трихлорсиркали кислотлар, уларнинг тузлари ва мураккаб эфирлари 108. 2915 50 Пропион кислота, унинг тузлари ва мураккаб эфирлари 109. 2915 90 Ациклик кўп карбонли тўйинган кислоталар ва уларнинг ангдрид, галлогенангидрид, пероксид ҳамда пероксикислоталари; уларнинг галлогенланган, сульфинланган, нитроланган ёки нитрозаланган ҳосила бирикмалари: бошқалар 110. 2916 11 Ациклик кўп карбонли тўйинмаган кислоталар, уларнинг ангдрид, галлоген ангидрид, пероксид, пероксикислоталари ва ушбу бирикмаларнинг ҳосилалари: акрил кислота ва унинг тузлари 111. 2916 12 Ациклик кўп карбонли тўйинмаган кислоталар, уларнинг ангидрид, галлоген ангидрид, пероксид, пероксикислоталари ва ушбу бирикмаларнинг ҳосилалари: акрил кислотанинг мураккаб эфирлари 112. 2916 13 Ациклик кўп карбонли тўйинмаган кислоталар, уларнинг ангдрид, галлоген ангидрид, пероксид, пероксикислоталари ва ушбу бирикмаларнинг ҳосилалари: метакрил кислота ва унинг тузлари 113. 2916 32 Ароматик кўп карбонли кислоталар, уларнинг ангдрид, галогенангидрид, пероксид, пероксикислоталари ва уларнинг ҳосилалари: бензоил пероксид ва бензоилхлорид 114. 2916 34 Ароматик кўп карбонли кислоталар, уларнинг ангдрид, галогенангидрид, пероксид, пероксикислоталари ва уларнинг ҳосилалари: фенилсирка кислота ва уларнинг тузлари 115. 2917 14 Поликарбон ациклик кислоталар, уларнинг ангидрид, галлоген ангидрид, пероксид, пероксикислоталари ва уларнинг ҳосилалари: малеин ангидрид 116. 2920 90 Нометалларнинг бошқа ноорганик кислоталари мураккаб эфирлари (галлогенводородлар мураккаб эфирларидан ташқари) ва уларнинг тузлари; уларнинг галлогенланган, сульфинланган, нитроланган ёки нитрозаланган ҳосилалари: бошқалар 117. 2921 11 Ациклик моноаминолар ва уларнинг ҳосилалари; ушбу бирикмалар тузлари: метиламин, ди- ёки триметиламин ва уларнинг тузлари 118. 2921 19 Ациклик моноаминолар ва уларнинг ҳосилалари; ушбу бирикмалар тузлари: бошқалар 119. 2921 21 Ациклик полиаминлар ва уларнинг ҳосилалари; ушбу бирикмалар тузлари: этилендиамин ва уларнинг тузлари 120. 2921 22 Ациклик полиаминлар ва уларнинг ҳосилалари; ушбу бирикмалар тузлари: гексаметилендиамин ва уларнинг тузлари 121. 2921 29 Ациклик полиаминлар ва уларнинг ҳосилалари; ушбу бирикмалар тузлари: бошқалар 122. 2921 30 Моно- ёки полиаминлар циклоалкан, циклоалкен ёки циклотерпен ва уларнинг ҳосилалари; ушбу бирикмалар тузлари 123. 2921 41 Ароматик моноаминлар ва уларнинг ҳосилалари; ушбу бирикмалар тузлари: анилин ва уларнинг тузлари 124. 2921 42 Ароматик моноаминлар ва уларнинг ҳосилалари; ушбу бирикмалар тузлари: анилин ҳосилалари ва уларнинг тузлари 125. 2921 43 Ароматик моноаминлар ва уларнинг ҳосилалари; ушбу бирикмалар тузлари: толуидинлар ва уларнинг ҳосилалари; ушбу бирикмалар тузлари 126. 2921 44 Ароматик моноаминлар ва уларнинг ҳосилалари; ушбу бирикмалар тузлари: дифениламин ва унинг ҳосилалари; ушбу бирикмалар тузлари 127. 2921 45 Ароматик моноаминлар ва уларнинг ҳосилалари; ушбу бирикмалар тузлари: 1-нафтиламин (α-нафтиламин), 2-нафтиламин (β-нафтиламин) ва уларнинг ҳосилалари; ушбу бирикмалар тузлари 128. 2921 49 Ароматик моноаминлар ва уларнинг ҳосилалари; ушбу бирикмалар тузлари: бошқалар 129. 2921 51 Ароматик полиаминлар ва уларнинг ҳосилалари; ушбу бирикмалар тузлари: о-, м-, п-фенилендиамин, диаминотолуоллар ва уларнинг ҳосилалари; ушбу бирикмалар тузлари 130. 2921 59 Ароматик полиаминлар ва уларнинг ҳосилалари; ушбу бирикмалар тузлари: бошқалар 131. 2922 11 Аминоспиртлар, таркибида бир турдан ортиқ кислородли функционал гуруҳ бўлган бирикмалардан ташқари ва уларнинг оддий ва мураккаб эфирлари; ушбу бирикмалар тузлари: моноэтаноламин ва унинг тузлари 132. 2922 19 Аминоспиртлар, таркибида бир турдан ортиқ кислородли функционал гуруҳ бўлган бирикмалардан ташқари ва уларнинг оддий ва мураккаб эфирлари; ушбу бирикмалар тузлари: бошқалар 133. 2922 29 Аминоспиртлар ва бошқа аминофеноллар, таркибида бир турдан ортиқ кислородли функционал гуруҳ бўлган бирикмалардан ташқари ва уларнинг оддий ва мураккаб эфирлари; ушбу бирикмалар тузлари: бошқалар 134. 2922 43 Аминокислоталар, таркибида бир типдан ортиқ кислородли функционал гуруҳ бўлган бирикмалардан ташқари ва уларнинг оддий ва мураккаб эфирлари; ушбу бирикмалар тузлари: антранил кислота ва уларнинг тузлари 135. 2923 90 Тўртламчи аммоний асослар тузлари ва гидроксидлари; кимёвий таркиби аниқ ва ноаниқ бўлган лецитин ва фосфор аминолипидлари ва бошқалар: бошқалар 136. 2924 19 Ациклик амидлар (ациклик карбаматларни киритган ҳолда) ва уларнинг ҳосилалари; ушбу бирикмалар тузлари: бошқалар 137. 2925 29 Иминлар ва уларнинг ҳосилалари; ушбу бирикмалар тузлари: бошқалар 138. 2926 10 Таркибида нитрил функционал гуруҳ бўлган бирикмалар: акрилонитрил 139. 2926 90 Таркибида нитрил функционал гуруҳ бўлган бирикмалар: бошқалар 140. 2928 00 Органик гидразин ёки гидроксиламин ҳосилалари 141. 2929 Таркибида бошқа азотли функционал гуруҳлар бўлган бирикмалар 142. 2930 90 Органиксульфид бирикмалар: бошқалар 143. 2931 10 Тетраметил қўрғошин ва тетраэтил қўрғошин 144. 2931 90 Органо-ноорганик бирикмалар бошқалар: бошқалар 145. 2932 11 Тузилишида конденсирланмаган фуранли ҳалқани ўз ичига олган бирикмалар (гидрирланган ёки гидрирланмаган): тетрагидрофуран 146. 2932 19 Тузилишида конденсирланмаган фуранли ҳалқани ўз ичига олган бирикмалар (гидрирланган ёки гидрирланмаган): бошқалар 147. 2932 91 Таркибида фақат кислород гетеро атом(лар) бўлган бошқа бирикмалар: изосафрол 148. 2932 92 Таркибида фақат кислород гетеро атом(лар) бўлган бошқа бирикмалар: 1-(1, 3-бензодиоксол-5-ил) пропан-2-он 149. 2932 99 Таркибида фақат кислород гетеро атом(лар) бўлган бошқа бирикмалар: бошқалар 150. 2933 31 Тузилишида конденсирланмаган пиридин ҳалқани ўз ичига олган (гидрирланган ёки гидрирланмаган) бирикмалар: пиридин ва унинг тузлари 151. 2933 59 Тузилишида пиримидин ҳалқа (гидрирланган ёки гидрирланмаган) ёки пиперазин ҳалқани ўз ичига олган бирикмалар: бошқалар 152. 2933 69 Тузилишида конденсирланмаган триазин ҳалқани ўз ичига олган (гидрирланган ёки гидрирланмаган) бирикмалар: бошқалар 153. 2933 99 Таркибида фақат азот гетероатом(лар)и бўлган бирикмалар: бошқалар 154. 2934 99 Аниқ ёки ноаниқ кимёвий таркибдаги нуклеин кислоталар ва уларнинг тузлари; гетероциклик бошқа бирикмалар: бошқалар 155. 2939 20 Хин дарахти алкалоидлари ва уларнинг ҳосилалари; ушбу бирикмалар тузлари 156. 2939 79 Алкалоидлар, табиий ёки синтез қилинган; уларнинг тузлари, оддий ва мураккаб эфирлар ва бошқа ҳосила бирикмалари; ўсимликдан келиб чиққан: бошқалар 157. 3102 30 Минерал ёки кимёвий, азотли ўгитлар: аммоний нитрати, шу жумладан, сувли эритмада 158. 3102 50 Минерал ёки кимёвий, азотли ўғитлар: натрий нитрати 159. 3102 90 Минерал ёки кимёвий, азотли ўғитлар: бошқалар, шу жумладан, олдинги субпозицияларда номланмаган аралашмалар 160. 3104 20 Минерал ёки кимёвий, калийли ўғитлар: калий хлориди 161. 3104 30 Минерал ёки кимёвий, калийли ўғитлар: калий сульфати 162. 3206 49 Бошқа ранг берувчи моддалар ва препаратлар: бошқалар 163. 3604 10 Мушакбозликлар 164. 3606 Ферроцерий ва ҳар қандай шаклдаги бошқа пирофорик қотишмалар 165. 3707 10 Фотокимёвий моддалар (лаклар, елимлар, ёпиштирувчи моддалар ва шунга ўхшаш препаратлардан ташқари); ўлчанган дозаларда тақдим этилган ёки фойдаланишга тайёр шаклда чакана савдога чиқарилган фотографик мақсадлар учун аралаштирилмаган маҳсулотлар: сезгирлаштирилган эмульсиялар 166. 3805 90 Ёғоч ёки сульфат скипидар ва қарағай ёғи ёки ҳайдаш ёки нина баргли дарахтлар ёғочини қайта ишлашнинг бошқа йўли билан олинган терпен мойлари; тозаланмаган дипентен; сульфит скипидар ва бошқа тозаланмаган пара-цимол; асосий компонент сифатида альфа-терпинеол сақловчи қарағай ёғи: бошқалар 167. 3808 59 Инсектицидлар, родентицидлар, фунғицидлар, гербицидлар, пайдо бўлишга қарши воситалар ва ўсимликларнинг ўсиши учун регуляторлар, дезинфекцияловчи ва шунга ўхшаш воситалар, чакана савдо учун формаларга ёки қадоқларга қадоқланган ёки тайёр препаратлар ёки маҳсулотлар кўринишида тақдим этилган (масалан, олтингугурт билан ишланган ленталар, фитил ва шамлар ва чивинлардан ёпишқоқ қоғоз): бошқалар 168. 3808 99 Инсектицидлар, родентицидлар, фунгицидлар, гербицидлар, пайдо бўлишга қарши воситалар ва ўсимликларнинг ўсиши учун регуляторлар, дезинфекцияловчи ва шунга ўхшаш воситалар, чакана савдо учун формаларга ёки қадоқларга қадоқланган ёки тайёр препаратлар ёки маҳсулотлар кўринишида тақдим этилган (масалан, олтингугурт билан ишланган ленталар, фитил ва шамлар ва чивинлардан ёпишқоқ қоғоз): бошқалар 169. 3815 90 Бошқа жойда номланмаган ёки киритилмаган реакция ташаббускорлари, реакция тезлаштиргичлари ва катализаторлари: бошқалар 170. 3824 84 Таркибида алдрин (ISO), камфехлор (ISO) (токсафен), хлордан (ISO), хлордекон (ISO), ДДТ (ISO) (клофенотан (INN), 1,1,1-триклоро-2,2-бис п-хлорофенил, этан), диелдрин (ISO, INN), эндосулфан (ISO), эндрин (ISO), гептахлор (180)ёки мирекс (ISO) мавжуд моддалар 171. 3824 99 Қолиплар ёки қуйиш ядроларини ишлаб чиқариш учун тайёр боғловчилар; бошқа жойда кўрсатилмаган ёки киритилмаган кимё ёки унга алоқадор саноат маҳсулотлари ва препаратлари (шу жумладан, табиий маҳсулотлар аралашмаларидан ташкил топган препаратлар): бошқалар 172. 3827 68 Таркибида метан, этан ёки пропаннинг галогенли ҳосилалари ва гидрофторуглеродлар бўлган моддалар 173. 7603 10 Алюминий кукун ва пўстлоқлари: қатламсиз тузилишли кукунлар 174. 7903 Рух заррачалари, кукуни ва чанги 175. 8109 Цирконий ва ундан тайёрланган буюмлар, шу жумладан лом ва чиқиндилар 176. 8112 Бериллий, хром, гафний, рений, таллий, кадмий, германий, ванадий, галлий, индий ва ниобий (колумбий), ва улардан тайёрланган буюмлар, шу жумладан, металл парчалари ва чиқиндилар

Ёниш ва портлаш хавфи юқори бўлган кимёвий моддаларни (маҳсулотларни) сақлаш, ташиш, улардан фойдаланиш ва йўқ қилиш соҳасидаги фаолиятни назорат қилиш тартиби тўғрисидаги низомга 2-ИЛОВА

Электрон ҳужжатнинг идентификация рақами Ёниш ва портлаш хавфи юқори бўлган кимёвий моддаларни (маҳсулотларни) сақлаш ҳамда ишлаб чиқариш бино ва иншоотлари учун объектнинг ёнғин ва саноат хавфсизлиги талабларига мувофиқлиги юзасидан ХУЛОСА Серия Рақам Ушбу хулоса (вилоят, туман/шаҳар, қишлоқ/кўча/уй) _________________ ___________________________________________________________________ ________________________________________________ манзилда жойлашган, ___________________________________________________________________ (жисмоний ва юридик Ф.И.О) га тегишли бўлган, ________________________ _____________________________________________ (объектнинг номи) нинг иловада рўйхати келтирилган ёниш ва портлаш хавфи юқори бўлган кимёвий моддаларни (маҳсулотларни) сақлаш учун ёнғин ва саноат хавфсизлиги талабларига мувофиқлиги юзасидан берилди. 20 ___ йил «___» _______________ ________________________________ ______________________ (ваколатга эга раҳбарнинг лавозими) (Ф.И.О) м 2 : ______________________________________ м 3 : ______________________________________ Бинолар ва (ёки) очиқ майдонлар QR-код

Ёниш ва портлаш хавфи юқори бўлган кимёвий моддаларни (маҳсулотларни) сақлаш, ташиш, улардан фойдаланиш ва йўқ қилиш соҳасидаги фаолиятни назорат қилиш тартиби тўғрисидаги низомга 3-ИЛОВА

Ёниш ва портлаш хавфи юқори бўлган кимёвий моддаларни омборхоналарда ва ишлаб чиқариш бино ва иншоотларида сақлаш фаолияти учун рухсатнома олиш

Босқичлар Субъектлар Тадбирлар Бажариш муддатлари 1-босқич Кимёвий моддаларни сақловчи омбор ҳамда ишлаб чиқариш бино ва иншооти эгалари Кимёвий моддаларни сақлаш омборини ташкил этиш ҳамда кимёвий моддаларни ишлаб чиқариш бино ва иншоотида сақлаш бўйича Фавқулодда вазиятлар вазирлигининг ҳудудий бошқармасига талаб этиладиган материаллар билан бирга ариза билан ёзма ёки вазирлик электрон манзили орқали мурожаат қилади. Кимёвий моддалар омборга жойлаштирилгунга қадар 2-босқич Фавқулодда вазиятлар вазирлиги ҳудудий бошқармаси 1. Қўмитага аризада кўрсатилган омборхона ҳамда ишлаб чиқариш бино ва иншооти саноат хавфсизлиги талабларига жавоб бериши юзасидан тегишли хулоса олиш учун зарур материалларни юборади. Бир иш куни 2. Омборхона ҳамда ишлаб чиқариш бино ва иншоотининг ёнгин хавфсизлиги талабларига мувофиқлиги юзасидан жойига чиққан ҳолда тегишли ўрганишлар ўтказади. Уч иш куни 3-босқич Қўмита Аризани жойига чиққан ҳолда ўрганиб чиқиб, омборнинг ҳамда ишлаб чиқариш бино ва иншоотининг саноат хавфсизлиги талабларига мувофиқлиги юзасидан тегишли хулосани Фавқулодда вазиятлар вазирлигига тақдим қилади. Етти иш куни 4-босқич Фавқулодда вазиятлар вазирлиги ҳудудий бошқармаси Қўмита хулосаси ва омборнинг ҳамда ишлаб чиқариш бино ва иншоотининг ёнгин хавфсизлиги талабларига мувофиқлигини ўрганиш натижалари асосида ёниш ва портлаш хавфи юқори бўлган кимёвий моддаларни сақлаш омборхонаси ҳамда ишлаб чиқариш бино ва иншооти фаолияти учун тегишли рухсатнома ёки омборхонанинг ҳамда ишлаб чиқариш бино ва иншоотининг саноат ва/ёки ёнгин хавфсизлиги қоидаларига мувофиқ эмаслиги тўғрисида хулоса беради. Ўн иш куни

Ёниш ва портлаш хавфи юқори бўлган кимёвий моддаларни (маҳсулотларни) сақлаш, ташиш, улардан фойдаланиш ва йўқ қилиш соҳасидаги фаолиятни назорат қилиш тартиби тўғрисидаги низомга 4-ИЛОВА

Вазирлар Маҳкамаси ҳузуридаги Саноат, радиация ва ядро хавфсизлиги қўмитаси назорати остида бўлган хавфли кимёвий моддаларнинг

Т/р Хавфли модданинг номи, тури ва заҳарли моддалар Минимал чекланган меъёр (тонна) I. Хавфли модданинг номи 1. Аммиак 500 2. Аммоний нитрат (таркибидаги аммоний нитратдан ҳосил бўлган азот массасининг 28 фоизидан ортиғини ташкил этадиган аммоний нитрат ва аммоний аралашмаси, шунингдек, аммоний нитрат концентрацияси массанинг 90 фоизидан ортиқ бўлган аммоний нитратнинг сувли эритмалари) 2500 3. Ўгит шаклидаги аммоний нитрат (аммоний нитрат асосидаги оддий ўгитлар, шунингдек, таркибидаги аммоний нитратдан ҳосил бўлган азот массасининг 28 фоизидан ортиғини ташкил этадиган мураккаб ўғитлар (мураккаб ўғитлар таркибида аммоний нитрат фосфат ва (ёки) калий билан биргаликда мавжуд бўлади) 10 000 4. Акрилонитрил 200 5. Хлор 25 6. Этилен оксиди 50 7. Водород цианид 20 8. Водород фторид 50 9. Водород сульфид 50 10. Олтингугурт диоксиди 250 11. Олтингугурт триоксиди 75 12. Қўрғошин алкили 50 13. Фосген 0,75 14. Метилизоцианат 0,15 II. Хавфли моддалар турлари 1. Алангаланадиган газлар 200 2. Товар-хомашё омборлари ва базалардаги ёнадиган суюқликлар 50 000 3. Технологик жараёнда фойдаланиладиган ёки магистрал қувурлар билан узатиладиган ёнадиган суюқликлар 200 4. Заҳарли моддалар 200 5. Юқори заҳарли моддалар 20 6. Оксидланадиган моддалар 200 III. Заҳарли моддалар 1. Акрилонитрил (вентокс) - 2. Метил спирти - 3. Маргимушли ангидрид - 4. Маргимушсимон ангидрид - 5. Дихлорид симоблар (сулема) ва бошқа симоб тузлари - 6. Никель тетракарбонили - 7. Сариқ фосфор - 8. Қизил фосфор - 9. Водород цианид ва унинг тузлари (натрий цианид, калий цианид, кадмий цианид, кумуш цианид, симоб цианид ва оксицианид, қўрғошин цианид, мис цианид, рух цианид, кальций цианид) - 10. Циан қотишма - 11. Циклон - 12. Этилмеркурхлорид - 13. Этилмеркоптан -

Ўзбекистон Республикасининг Бош вазири А. АРИПОВ

Тошкент ш.,

2024 йил 7 март,

121-сон

(Қонунчилик маълумотлари миллий базаси, 11.03.2024 й., 09/24/121/0194-сон; 05.05.2025 й., 09/25/289/0406-сон; 02.07.2025 й., 09/25/397/0562-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

ROʻYXATI

SXEMASI

ROʻYXATI

Yonish va portlash xavfi yuqori boʻlgan kimyoviy moddalarni (mahsulotlarni) saqlash, tashish, ulardan ishlab chiqarishda foydalanish va ularni yoʻq qilish sohasidagi faoliyatni nazorat qilish tartibi toʻgʻrisidagi nizomni tasdiqlash haqida

Oʻzbekiston Respublikasi Prezidentining “Yonish va portlash xavfi yuqori boʻlgan kimyoviy moddalar bilan bogʻliq favqulodda vaziyatlarning oldini olish boʻyicha chora-tadbir samaradorligini oshirish toʻgʻrisida” 2023-yil 6-noyabrdagi PQ-357-son qarori ijrosini taʼminlash maqsadida Vazirlar Mahkamasi qaror qiladi:

1. Quyidagilarni nazarda tutuvchi Yonish va portlash xavfi yuqori boʻlgan kimyoviy moddalarni (mahsulotlarni) saqlash, tashish, ulardan ishlab chiqarishda foydalanish va ularni yoʻq qilish sohasidagi faoliyatni nazorat qilish tartibi toʻgʻrisidagi nizom ilovaga muvofiq tasdiqlansin:

yonish va portlash xavfi yuqori boʻlgan kimyoviy moddalarni (mahsulotlarni) saqlash uchun ombor hamda ishlab chiqarish bino va inshootlarida yongʻin va sanoat xavfsizligi talablari;

kimyoviy moddalarni tashishda belgilangan talablar;

kimyoviy moddalarni saqlash, ulardan ishlab chiqarishda foydalanish va ularni yoʻq qilishda belgilangan talablar;

davlat organlarining kimyoviy moddalarni saqlash, tashish, ulardan ishlab chiqarishda foydalanish va ularni yoʻq qilish sohasidagi asosiy funksiyalari.

2. Oʻzbekiston Respublikasi Favqulodda vaziyatlar vazirligi Ichki ishlar vazirligi, Ekologiya, atrof-muhitni muhofaza qilish va iqlim oʻzgarishi vazirligi, Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi, Bojxona qoʻmitasi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda mazkur qaror bilan tasdiqlangan nizom talablari joylarda bir xil va toʻgʻri bajarilishi ustidan qatʼiy nazorat oʻrnatsin.

3. Oʻzbekiston Milliy teleradiokompaniyasi Axborot va ommaviy kommunikatsiyalar agentligi bilan birgalikda mazkur qarorning mazmun-mohiyati hamda maqsad va vazifalarining ommaviy axborot vositalarida keng yoritilishini taʼminlasin.

4. Favqulodda vaziyatlar vazirligi manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

5. Ushbu qaror rasmiy eʼlon qilingan kundan eʼtiboran uch oy oʻtgach kuchga kiradi.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov hamda favqulodda vaziyatlar vaziri A.H. Qoʻldoshev zimmasiga yuklansin.

Vazirlar Mahkamasining 2024-yil 7-martdagi 121-son qaroriga ILOVA

Yonish va portlash xavfi yuqori boʻlgan kimyoviy moddalarni (mahsulotlarni) saqlash, tashish, ulardan ishlab chiqarishda foydalanish va ularni yoʻq qilish sohasidagi faoliyatni nazorat qilish tartibi toʻgʻrisidagi

1-bob. Umumiy qoidalar

1. Ushbu Nizom Oʻzbekiston Respublikasi Favqulodda vaziyatlar vazirligi, Ichki ishlar vazirligi, Ekologiya, atrof-muhitni muhofaza qilish va iqlim oʻzgarishi vazirligi, Bojxona qoʻmitasi, Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi (keyingi oʻrinlarda — vakolatli organlar) tomonidan yonish va portlash xavfi yuqori boʻlgan kimyoviy moddalar (keyingi oʻrinlarda — kimyoviy moddalar) ushbu moddalardan foydalanuvchilar tomonidan saqlanishini, tashilishini, ulardan ishlab chiqarishda foydalanilishini hamda ularning yoʻq qilinishini nazorat qilish tartibini belgilaydi.

Mazkur Nizom talablari respublika va mahalliy ijro etuvchi hokimiyat organlari, idoraviy boʻysunuvidan hamda mulkchilik shaklidan qatʼi nazar, kimyoviy moddalarni saqlash, tashish, ulardan ishlab chiqarishda foydalanish va ularni yoʻq qilish bilan shugʻullanadigan jismoniy hamda yuridik shaxslar uchun majburiydir.

2. Ushbu Nizomda quyidagi asosiy tushunchalardan foydalaniladi:

kimyoviy moddalar — yonish va portlash xavfi yuqori boʻlgan kimyoviy moddalar (mahsulotlar) roʻyxatiga kiritilgan hamda oʻziga xos xossalari va xususiyatlari tufayli muayyan omillar mavjud boʻlgan taqdirda boshqa obyektlarning yonishi yoki portlashiga shuningdek, odamlar hayoti va sogʻligʻiga, atrof-muhitga zarar yetkazilishiga sabab boʻlishi mumkin boʻlgan moddalar, materiallar, buyumlar va chiqindilar;

kimyoviy moddalardan foydalanuvchilar — yonish va portlash xavfi yuqori boʻlgan kimyoviy moddalarni saqlash, tashish, ulardan foydalanish va ularni yoʻq qilish bilan shugʻullanadigan jismoniy shaxslar, yuridik shaxslar va xoʻjalik yurituvchi subyektlar;

bojxona ombori — maxsus jihozlangan inshoot boʻlib, ishlatilmagan tovarlarni bojxona nazorati ostida saqlashga moʻljallangan majmua;

omborxona — yonish va portlash xavfi yuqori boʻlgan kimyoviy moddalarni saqlashga moʻljallangan obyekt;

xavfli ishlab chiqarish obyekti (keyingi oʻrinlarda — XICHO) — Oʻzbekiston Respublikasining “Xavfli ishlab chiqarish obyektlarining sanoat xavfsizligi toʻgʻrisida”gi Qonunida belgilangan korxonalar yoki ularning sexlari, uchastkalari, maydonchalari, shuningdek, boshqa ishlab chiqarish obyektlari;

Yagona avtomatlashtirilgan axborot tizimi — respublika hududiga olib kirilgan hamda belgilangan tartibda bojxona rasmiylashtiruvidan oʻtkazilgan kimyoviy moddalar (mahsulotlar) va ularni olib kiruvchi subyektlar toʻgʻrisidagi maʼlumotlari jamlangan hamda Bojxona qoʻmitasi va Favqulodda vaziyatlar vazirligi tizimlari bilan integratsiya qilingan, real vaqt rejimida taqdim etib boriladigan elektron maʼlumotlar bazasi.

3. Kimyoviy moddalarni saqlash, tashish, ulardan foydalanish va ularni yoʻq qilish bilan shugʻullanuvchi kimyoviy moddalardan foydalanuvchilar faoliyati yongin xavfsizligi va sanoat xavfsizligi sohasidagi qonunchilik hujjatlari, texnik jihatdan tartibga solish sohasidagi normativ hujjatlar, shuningdek, shaharsozlik normalari va qoidalari talablariga muvofiq boʻlishi shart.

2-bob. Kimyoviy moddalarni saqlash va ishlab chiqarish bino va inshootlari uchun belgilangan talablar

4. Kimyoviy moddalarni saqlovchi ombor va ishlab chiqarish bino va inshooti egalari mazkur Nizomga 1-ilovada koʻrsatilgan kimyoviy moddalarni saqlash uchun omborning hamda ishlab chiqarish bino va inshootining yongin hamda sanoat xavfsizligi talablariga muvofiqligi yuzasidan Favqulodda vaziyatlar vazirligi va Vazirlar Mahkamasi huzuridagi Sanoat, radiatsiya va yadro xavfsizligi qoʻmitasidan (keyingi oʻrinlarda — Qoʻmita) har uch yilda bir marotaba ushbu Nizomga 2-ilovaga muvofiq shaklda xulosa olishi zarur.

Bunda mazkur xulosa Nizomga 3-ilovadagi sxemaga muvofiq olinadi.

5. Yangi qurilayotgan kimyoviy moddalarni saqlash ombori binolari hamda ishlab chiqarish bino va inshootlari uchun yer maydonlarini ajratish, ishlab chiqilgan loyiha-smeta hujjatlarini ekspertizadan oʻtkazish, qurilish-montaj ishlari qurilishi tugallangan obyektlardan foydalanish uchun ruxsatnoma berish jarayonida shaharsozlik normalari va qoidalarida belgilangan yongin xavfsizligi talablariga rioya etgan holda, qonunchilik hujjatlarida belgilangan tartibda amalga oshiriladi.

6. Kimyoviy moddalardan foydalanuvchilar respublika hududida ishlab chiqarilgan va chet davlatlardan olib kirilgan kimyoviy moddalarni omborxonada joylashtirishdan (saqlashdan) oldin kimyoviy moddalarni tashish yoʻnalishi, turi, miqdori va ularni ishlab chiqaruvchi toʻgʻrisidagi maʼlumotlarni bir ish kunida Favqulodda vaziyatlar vazirligining tegishliligi boʻyicha Qoraqalpogʻiston Respublikasi, viloyatlar va Toshkent shahridagi hududiy boshqarmasiga xulosa olish uchun yuboradi. Bunda taqdim qilingan barcha hujjatlar kelib tushgan sanadan eʼtiboran uni koʻrib chiqib, xulosa berish yoxud uni berishni rad etish muddati oʻn ish kunidan oshmasligi kerak.

7. Omborxonalarda hamda ishlab chiqarish bino va inshootlarida yongʻin xavfsizligini taʼminlash uchun masʼul boʻlgan, yongʻinga qarshi koʻrsatmalar (yoʻl-yoʻriq) berish vazifasi yuklangan xodimlar, shuningdek, yongin-texnik komissiyasi aʼzolari yongʻin va texnika xavfsizligi talablariga asosan tayyorgarlikdan oʻtkazilgan boʻlishi lozim.

8. Omborxonada hamda ishlab chiqarish bino va inshootida kimyoviy moddalarning xavfsiz saqlanishini taʼminlash maqsadida yuk egasi tomonidan ombor egasiga kimyoviy moddalarning “Modda (material) xavfsizlik pasporti” taqdim etilishi majburiy hisoblanadi.

9. Kimyoviy moddalarni omborda hamda ishlab chiqarish bino va inshootida saqlashda va ular bilan bogʻliq yuk koʻtarish va tushirish ishlarini bajarishda amaldagi qonunchilik hujjatlarida belgilangan talab hamda shartlarga rioya qilinishi zarur.

10. Respublika hududiga kirib kelayotgan yoki Oʻzbekiston Respublikasi hududida kimyoviy moddalarni ishlab chiqaruvchi korxona yoki tashkilotlar tomonidan kimyoviy moddalar “Modda (material) xavfsizlik pasporti” bilan taʼminlanishi shart.

11. Korxona yoki tashkilot tomonidan ishlab chiqarilgan va import qilingan kimyoviy moddaning “Modda (material) xavfsizlik pasporti”da quyidagi maʼlumotlar aks etishi lozim:

kimyoviy moddalarning identifikatsiyasi va uni ishlab chiqaruvchi yoki yetkazib beruvchi haqidagi maʼlumotlar;

xavf(lar)ning identifikatsiyasi;

kimyoviy tarkibi (komponentlari haqida maʼlumot);

birinchi yordam koʻrsatish choralari;

yongʻin va portlash xavfsizligini taʼminlash choralari hamda vositalari;

favqulodda vaziyatlarning oldini olish va oqibatlarini bartaraf etish;

kimyoviy moddalarni saqlash va yuklash-tushirishda xavfsizlik qoidalari;

nazorat oʻlchov asboblari va shaxsiy himoya vositalari;

fizik-kimyoviy xossalar;

barqarorligi va reaksiyaga kirishuvchanligi;

zaharlilik xususiyatlari toʻgʻrisidagi maʼlumotlar;

atrof-muhitga taʼsiri toʻgʻrisidagi maʼlumotlar;

qoldiq va chiqindilarni yoʻq qilish boʻyicha tavsiyalar;

kimyoviy moddani tashish (tashilishi) toʻgʻrisidagi maʼlumotlar;

milliy va xalqaro qonunchilik toʻgʻrisidagi maʼlumotlar;

qoʻshimcha maʼlumotlar.

12. Kimyoviy moddalar saqlanadigan ombor hamda ishlab chiqarish bino va inshooti egasi “Modda (material) xavfsizlik pasporti”da belgilangan maʼlumotlardan tashqari amaldagi qonunchilik hujjatlarida va texnik jihatdan tartibga solish sohasidagi normativ hujjatlarda belgilangan talablarni bajargan holda kimyoviy moddalarni saqlash, shuningdek, quyidagi qoʻshimcha tadbirlarni amalga oshirishi zarur:

omborning hamda ishlab chiqarish bino va inshootining ochiq saqlash maydonida tabiiy yoki omborning hamda ishlab chiqarish bino va inshootining yopiq saqlash maydonida sunʼiy shamollatish sharoitining yaratilishi;

binoning ichki qismi haroratiga qoʻyiladigan talablarni bajarish;

kimyoviy moddaga oftob nurlari taʼsirini hisobga olish;

omborda hamda ishlab chiqarish bino va inshootida oʻzaro aloqada ekzotermik reaksiyalarga kirishishi mumkin boʻlgan kimyoviy moddalar orasi maxsus ajratilgan, avariya holatlarida ham bir-biri bilan taʼsirlashishiga imkonini bermaydigan joylarga joylashtirilishi;

ombor hamda ishlab chiqarish bino va inshootida bir vaqtning oʻzida kimyoviy modda miqdorining maksimal saqlanishini hisobga olish;

ombor hamda ishlab chiqarish bino va inshooti ishchi-xodimlarining shaxsiy himoya vositalari bilan taʼminlanishi;

kimyoviy moddalarni saqlash, tashish, ulardan ishlab chiqarishda foydalanish va ularni yoʻq qilishga qoʻyiladigan qoʻshimcha xavfsizlik talablari bajarilishi lozim.

13. Omborlarda hamda ishlab chiqarish bino va inshootlarida saqlanayotgan kimyoviy moddalar holatini doimiy nazorat qilib borish uchun yongʻin va sanoat xavfsizligi talablariga muvofiq mahsulotlar orasidan erkin harakatlanish imkoni yaratilgan boʻlishi lozim.

14. Omborlarda hamda ishlab chiqarish bino va inshootlarida kimyoviy mahsulotlar bilan amalga oshiriladigan yuk koʻtarish va tushirish ishlari portlashlardan himoyalangan hamda uchqun chiqarmaydigan vositalar va jihozlardan foydalangan holda bajarilishi kerak. Mazkur hududlarda ishlaydigan xodimlar antistatik vositalar yordamida ishlov berilgan himoya kiyimlari bilan taʼminlanishi lozim.

15. Omborda hamda ishlab chiqarish bino va inshootida xizmat koʻrsatadigan xodimlar yengil alangalanuvchi va yonuvchi suyuqliklar hamda yonuvchi gazlar bilan ishlashda sintetik matolardan tikilgan maxsus kiyimlardan foydalanishi taqiqlanadi.

16. Omborlarda hamda ishlab chiqarish bino va inshootlarida yogʻlangan matolarni (kiyimlarni), shuningdek, gugurt, chaqnatgichlar (yondiruvchilar) va yonuvchi materiallari boʻlgan kiyimlarni saqlash taqiqlanadi.

17. Kimyoviy moddalar saqlanayotgan davrda omborda hamda ishlab chiqarish bino va inshootida qurilish-montaj ishlari Favqulodda vaziyatlar vazirligi va uning hududiy boshqarmalari bilan kelishilgan holda amalga oshiriladi.

18. Ishchi-xodimlar mehnat va texnika xavfsizligi qoidalariga toʻliq rioya etishlari, shaxsiy himoya vositalaridan maqsadli foydalanish, jabrlanganlarga birinchi yordam koʻrsatish, shuningdek, yuzaga kelishi mumkin boʻlgan favqulodda vaziyatlar va yongʻinlarda toʻgʻri harakat qilish qoidalarini bilishlari zarur.

19. Xavfsizlikni taʼminlash mezonlari ishchi-xodimlar uchun davlat tilida yozilgan boʻlishi va ularga rioya etilishi doimiy nazorat qilinishi kerak.

3-bob. Kimyoviy moddalarni tashishda belgilangan talablar

20. Kimyoviy moddalarning tegishli manzilga xavfsiz tarzda yetkazilishi (tashilishi) uchun qonunchilik hujjatlarida belgilangan tartibda ichki ishlar organlarining kuzatuvi ostida amalga oshiriladi.

21. Oʻzaro aloqada ekzotermik reaksiyalarga kirishishi mumkin boʻlgan kimyoviy moddalar va materiallarni hamda oziq-ovqat mahsulotlarini birgalikda transport yukxonasiga joylashtirish va tashish taqiqlanadi.

22. Kimyoviy moddalar tashuvchi tomonidan tashilishida hamda ular bilan bogʻliq yuk koʻtarish va tushirish ishlarini bajarishda amaldagi qonunchilik hujjatlarida belgilangan talab va shartlarga rioya qilinishi zarur.

4-bob. Kimyoviy moddalardan foydalanish va yoʻq qilishda belgilangan talablar

23. Kimyoviy moddalardan foydalanuvchilar kimyoviy moddalarni ishlab chiqaruvchi va yetkazib beruvchidan “Modda (material) xavfsizlik pasporti”ni talab qilishi shart.

24. Foydalanish muddati oʻtgan hamda yaroqsiz holga kelgan kimyoviy moddalarni omborda saqlash va ulardan foydalanish taqiqlanadi.

25. Kimyoviy moddalardan foydalanuvchilar tomonidan kimyoviy moddalarni saqlash, yuklash, tashish hamda undan foydalanish boʻyicha ishchi-xodimlarning xavfsizligini taʼminlash mezonlarini ishlab chiqishi va tasdiqlashi shart.

26. Kimyoviy moddalardan foydalanuvchilar tomonidan omborda va ishlab chiqarishda sodir boʻlishi mumkin boʻlgan favqulodda vaziyatlarning oldini olish va bartaraf etish boʻyicha harakatlar rejasi ishlab chiqiladi va Favqulodda vaziyatlar vazirligining hududiy boshqarmalari bilan kelishilgan holda tasdiqlanadi.

27. Kimyoviy moddalarni “Modda (material) xavfsizlik pasporti”da koʻrsatilgan yaroqlilik muddatining oʻtib ketishi holatlarini kamaytirishga doir tadbirlar kimyoviy moddaning mulkdori yoki undan foydalanuvchilar tomonidan qonunchilik hujjatlarida belgilangan tartibda amalga oshiriladi.

28. Foydalanishga yaroqsiz holga kelgan, yaroqlilik muddati oʻtgan yoki qayta ishlash imkoni boʻlmagan kimyoviy moddalarni yoʻq qilish ombor hamda ishlab chiqarish bino va inshoot egasining murojaati asosida, manfaatdor vazirlik va idoralar bilan birgalikda qonunchilik hujjatlarida belgilangan tartibda amalga oshiriladi.

5-bob Davlat organlarining kimyoviy moddalarni saqlash, tashish, ulardan foydalanish va ularni yoʻq qilish sohasidagi nazorati

29. Kimyoviy moddalarni saqlash, tashish, ulardan foydalanish va ularni yoʻq qilish sohasida belgilangan talablarga rioya etilishida, shuningdek, texnogen avariyalar va favqulodda vaziyatlarning oldini olish boʻyicha hamkorlik qilishda tegishli vazirlik va idoralar hamda mahalliy ijro etuvchi hokimiyat organlari oʻzlariga yuklangan funksiyalarga muvofiq tadbirlarni amalga oshiradilar.

30. Favqulodda vaziyatlar vazirligi kimyoviy moddalarni saqlash, tashish, ulardan ishlab chiqarishda foydalanish va ularni yoʻq qilish sohasida quyidagilarni amalga oshiradi:

a) kimyoviy moddalarni saqlash, tashish, ulardan ishlab chiqarishda foydalanish va ularni yoʻq qilish sohasidagi faoliyatni muvofiqlashtiradi, shuningdek, ushbu sohadagi belgilangan talablarga rioya etilishini nazorat qiladi;

b) kimyoviy moddalardan foydalanuvchilar tomonidan kimyoviy moddalarni saqlash, tashish, ulardan ishlab chiqarishda foydalanish va ularni yoʻq qilishda belgilangan xavfsizlik talablariga rioya etilishini nazorat qiladi;

v) respublika hududiga olib kirilgan va respublika hududida ishlab chiqarilayotgan hamda saqlanayotgan kimyoviy moddalar toʻgʻrisida yagona markazlashgan maʼlumotlar bazasini yaratadi va monitoringini yuritadi;

g) kimyoviy moddalarni saqlash, tashish, ulardan ishlab chiqarishda foydalanish va ularni yoʻq qilishda yuzaga keladigan texnogen avariyalar va favqulodda vaziyatlarning oldini olish, shuningdek, oqibatlarini bartaraf etish ishlarini boshqaradi hamda muvofiqlashtiradi;

d) kimyoviy moddalarni saqlash, tashish, ulardan ishlab chiqarishda foydalanish va ularni yoʻq qilish sohasidagi nazoratni Bojxona qoʻmitasi, Qoʻmita, Ichki ishlar vazirligi hamda boshqa manfaatdor vazirlik va idoralar bilan hamkorlikda amalga oshiradi;

e) yonish va portlash xavfi yuqori boʻlgan kimyoviy moddalarni saqlash va ulardan ishlab chiqarishda foydalanish uchun obyektning (omborning) hamda ishlab chiqarish bino va inshootining yongʻin va sanoat xavfsizligi talablariga muvofiqligi yuzasidan xulosa beradi;

j) kimyoviy moddalar boʻyicha talablarning buzilishida aybdor boʻlgan shaxslarga nisbatan qonunchilik hujjatlarida belgilangan tartibda choralar koʻradi;

z) Bojxona qoʻmitasi bilan birgalikda respublika hududiga olib kiriladigan kimyoviy moddalar boʻyicha Yagona avtomatlashtirilgan axborot tizimi orqali maʼlumot almashadi;

i) Ichki ishlar vazirligi, Qurilish va uy-joy kommunal xoʻjaligi vazirligi, Transport vazirligi, Energetika vazirligi, Bojxona qoʻmitasi hamda Qoʻmita mutaxassislarini jalb etgan holda, boʻlim (boʻlinmalar) xodimlarining malakasini oshirib boradi;

k) kimyoviy moddalarni saqlash omborlarida hamda ishlab chiqarish bino va inshootlarida bir yilda koʻpi bilan bir marotaba batafsil (dastlabki) va nazorat tartibida kimyoviy moddalarni saqlash, ulardan ishlab chiqarishda foydalanish va ularni yoʻq qilishda belgilangan talablarga rioya etilishini nazorat qiladi, shu jumladan, ularning omborda toʻgʻri joylashtirilgani, yemiruvchi yoki boshqacha taʼsirga chidamli tarzda saqlanayotganligi, shuningdek, bir-biriga oʻzaro taʼsir qilmasligi va xavfli oqibatlarni keltirib chiqaruvchi reaksiyaga kirishmasligini taʼminlovchi sharoitlar yaratilganligini tekshiradi;

l) jismoniy va yuridik shaxslar murojaatlari, shuningdek, ommaviy axborot vositalari va boshqa manbalardan olingan maʼlumotlar asosida belgilangan tartibda tezkor tekshiruvlar oʻtkazadi;

m) Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining aholi va hududlarni favqulodda vaziyatlardan muhofaza qilish boʻyicha yillik asosiy tadbirlar rejalari asosida kimyoviy moddalar bilan bogʻliq faoliyatni amalga oshiruvchi tadbirkorlik subyektlari, davlat organlari va boshqa tashkilotlar xodimlari ishtirokida kimyoviy moddalarni saqlash, tashish, ulardan ishlab chiqarishda foydalanish va ularni yoʻq qilish tadbirlarini xavfsiz tashkil etish boʻyicha koʻrgazmali oʻquv mashq va mashgʻulotlar oʻtkazib boradi.

31. Bojxona qoʻmitasi kimyoviy moddalarni saqlash, tashish, ulardan ishlab chiqarishda foydalanish va ularni yoʻq qilish sohasidagi quyidagilarni amalga oshiradi:

a) respublika hududiga olib kirilgan kimyoviy moddalarni belgilangan tartibda bojxona rasmiylashtiruvidan oʻtkazadi hamda bir kun muddatda Yagona avtomatlashtirilgan axborot tizimiga kimyoviy moddalar turi, miqdori va ularni olib kiruvchi subyekt toʻgʻrisidagi maʼlumotlarni kiritib boradi:

bojxona chegarasidan olib kirilganligi toʻgʻrisida;

bojxona nazorati ostida saqlanayotgan ombor toʻgʻrisida;

mahsulotlar yakuniy bojxona rejimiga rasmiylashtirilganligi toʻgʻrisida maʼlumot;

b) ombor egasiga “Bojxona omborini taʼsis etish uchun” litsenziya beradi;

v) bojxona nazorati ostidagi kimyoviy moddalarni Favqulodda vaziyatlar vazirligi tomonidan talablarga javob berishi boʻyicha berilgan xulosasi asosida bojxona omborlariga joylashtirilishiga ruxsat beradi va nazoratini taʼminlaydi;

g) Favqulodda vaziyatlar vazirligi, Ichki ishlar vazirligi va Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi bilan kimyoviy moddalarni saqlash, tashish, ulardan foydalanish va ularni yoʻq qilishda doimiy hamkorlik qiladi.

32. Qoʻmita-kimyoviy moddalarni saqlash, tashish, ulardan ishlab chiqarishda foydalanish, ularni yoʻq qilish sohasida quyidagilarni amalga oshiradi:

a) mazkur Nizomga 4-ilovaga muvofiq kimyoviy moddalar omborda hamda ishlab chiqarish bino va inshootida saqlansa, ushbu omborlarni hamda ishlab chiqarish bino va inshootlarini XICHO sifatida roʻyxatga oladi;

b) omborlarda hamda ishlab chiqarish bino va inshootlarida, kimyoviy moddalarni saqlash uchun moʻljallangan XICHOlarini loyihalashtirish, qurish hamda kimyoviy moddalarni saqlash uchun moʻljallangan XICHOda portlovchi va zaharli moddalarni, ularni qoʻllagan holda materiallar va mahsulotlarni, shuningdek, portlatish vositalarini yaratish, ishlab chiqarish, tashish, saqlash va realizatsiya qilish faoliyati uchun litsenziyasi mavjudligini nazorat qiladi;

v) Oʻzbekiston Respublikasining “Xavfli ishlab chiqarish obyektlarining sanoat xavfsizligi toʻgʻrisida”gi Qonuniga koʻra quyidagi omborlarda hamda ishlab chiqarish bino va inshootlarida kimyoviy moddalarni saqlash uchun moʻljallangan XICHOlarida belgilangan tartibda:

xavfli ishlab chiqarish obyektini qurish, kengaytirish, qayta qurish, texnik jihatdan qayta jihozlash, konservatsiyalash va tugatishga doir loyiha hujjatlarini;

xavfli ishlab chiqarish obyektida qoʻllanadigan texnik qurilmalarini;

xavfli ishlab chiqarish obyektidagi binolar va inshootlarni;

g) omborlarda, ishlab chiqarish bino va inshootlarda hamda kimyoviy moddalarni saqlash uchun moʻljallangan XICHOda avariya yuz berganda, boshqa shaxslarning hayoti, sogʻligʻi va (yoki) mol-mulkiga hamda atrof-muhitga zarar yetkazganlik uchun javobgarlik qonunchilik hujjatlarida belgilanadigan tartibda sugʻurta qilinganligini tekshiradi;

d) omborlar, ishlab chiqarish bino va inshootlari, kimyoviy moddalarni saqlash uchun moʻljallangan XICHOni montaj, taʼmirlash, ishga tushirish-sozlash va foydalanish ishlarini bajarish uchun quyidagi faoliyat turlari boʻyicha qonunchilik hujjatlarida belgilangan tartibda Qoʻmita tomonidan:

Qoʻmita nazoratidagi obyektlarda elektr qurilmalarini sozlash ishlarini bajarish uchun ruxsatnoma;

Favqulodda vaziyatlar vazirligiga yonish va portlash xavfi yuqori boʻlgan kimyoviy moddalarni saqlash uchun obyektning (omborning) hamda ishlab chiqarish bino va inshootining sanoat xavfsizligi talablariga muvofiqligi yuzasidan xulosa beradi;

e) yonish va portlash xavfi yuqori boʻlgan kimyoviy moddalarni saqlash, tashish, ulardan ishlab chiqarishda foydalanish va ularni yoʻq qilish sohasida faoliyat yuritadigan rahbarlarni uch yilda bir marotaba, mutaxassislarning bir yilda bir marotaba oʻtkaziladigan mehnat muhofazasi qoidalari va yoʻriqnomalari boʻyicha bilim sinovlarida ishtirok etadi;

j) omborlarda, ishlab chiqarish bino va inshootlarida hamda kimyoviy moddalarni saqlash uchun moʻljallangan XICHOda avariya yoki baxtsiz hodisalar sodir boʻlgan taqdirda, qonunchilik hujjatlarida belgilangan tartibda maxsus tekshirish oʻtkazadi.

33. Ichki ishlar vazirligi kimyoviy moddalarni saqlash, tashish, ulardan foydalanish va ularni yoʻq qilish sohasida quyidagilarni amalga oshiradi:

kimyoviy moddalar tegishli manzilga xavfsiz yetkazilishi (tashilishi) uchun qonunchilik hujjatlarida belgilangan tartibda kuzatuvni amalga oshiradi;

kimyoviy moddalar bilan bogʻliq texnogen avariyalar va favqulodda vaziyatlarda jamoat tartibini saqlash choralarini koʻradi.

33 1 . Ekologiya, atrof-muhitni muhofaza qilish va iqlim oʻzgarishi vazirligi kimyoviy moddalarni saqlash, tashish, ulardan ishlab chiqarishda foydalanish va ularni yoʻq qilish sohasidagi faoliyatning tabiatni muhofaza qilish normalariga muvofiqligiga rioya etilishini nazorat qiladi.

6-bob. Yakunlovchi qoida

34. Kimyoviy moddalarni saqlash, tashish, ulardan ishlab chiqarishda foydalanish va ularni yoʻq qilishda xavfsizlik talablariga rioya etilishini taʼminlashga quyidagilar javobgar hisoblanadi:

kimyoviy moddalar omborga joylashtirilgunga qadar — tashuvchi;

kimyoviy moddalar omborga hamda ishlab chiqarish bino va inshootiga joylashtirilganda — ombor egasi va ulardan foydalanuvchi subyekt;

kimyoviy moddalardan foydalanish va ularni yoʻq qilishda — ulardan foydalanuvchi subyekt.

35. Ushbu Nizom talablarining buzilishida aybdor boʻlgan shaxslar qonunchilik hujjatlariga muvofiq javob beradilar.

Yonish va portlash xavfi yuqori boʻlgan kimyoviy moddalarni (mahsulotlarni) saqlash, tashish, ulardan foydalanish va ularni yoʻq qilish sohasidagi faoliyatni nazorat qilish tartibi toʻgʻrisidagi nizomga 1-ILOVA

Yonish va portlash xavfi yuqori boʻlgan moddalar hamda ushbu moddalar saqlanadigan ombor hamda ishlab chiqarishga moʻljallangan bino va inshootlarning yongin va sanoat xavfsizligi talablariga muvofiqligi yuzasidan Favqulodda vaziyatlar vazirligi hamda Vazirlar Mahkamasi huzuridagi Sanoat, radiatsiya va yadro xavfsizligi qoʻmitasidan xulosa olinishi zarur boʻlgan kimyoviy moddalar (mahsulotlar)

T/r TIF TN kodi Tovar nomi 1. 2207 80 foiz va undan koʻp boʻlgan spirt konsentratsiyali denaturatsiyalanmagan etil spirti; etil spirti va boshqa denaturatsiyalangan, har qanday konsentratsiyali spirt damlamalari 2. 2209 00 Sirka va sirka kislotasidan olingan uning oʻrnini bosuvchilar 3. 2503 00 Sublimatsiyalangan, tindirilgan yoki kolloid oltingugurtdan tashqari barcha koʻrinishdagi oltingugurt 4. 2511 20 Tabiiy bariy karbonati (viterit), kalsiylangan yoki kalsiylanmagan, TIF TNning 2816-tovar pozitsiyasidagi bariy oksididan tashqari 5. 2522 10 Soʻndirilmagan ohak, TIF TNning 2825-tovar pozitsiyasida koʻrsatilgan kalsiy oksidi va gidroksididan tashqari 6. 2801 10 Xlor 7. 2801 30 Ftor; brom 8. 2802 00 Choʻktirilgan yoki sublimatsiyalangan oltingugurt; kolloid oltingugurt 9. 2804 10 Vodorod 10. 2804 21 Inert gazlar: argon 11. 2804 29 Inert gazlar: boshqalar, argondan tashqari 12. 2804 30 Azot 13. 2804 40 Kislorod 14. 2804 70 Fosfor 15. 2804 80 Margimush (mishyak) 16. 2804 90 Selen 17. 2805 11 Ishqoriy yoki ishqoriy yer metallari: natriy 18. 2805 12 Ishqoriy yoki ishqoriy yer metallari: kalsiy 19. 2805 19 Ishqoriy yoki ishqoriy yer metallari: boshqalar, natriy va kalsiylardan tashqari 20. 2805 30 Aralashmalardagi yoki qotishmalardagi sof shakldagi skandiy va ittiriy, nodir yer metallari 21. 2806 Vodorod xloridi (xlorid kislotasi); xlorsulfon kislotasi 22. 2807 Sulfat kislotasi; oleum 23. 2808 Azot kislotasi; sulfoazotli kislotalar 24. 2809 20 Fosfor kislotasi; aniq yoki noaniq kimyoviy tarkibga ega polifosfor kislotalari 25. 2811 Boshqa noorganik kislotalar va nometallarning kislorod bilan boshqa noorganik birikmalari 26. 2812 11 Xloridlar va oksid xloridlar: karbonil dixloridi (fosgen) 27. 2812 13 Xloridlar va oksid xloridlar: fosfor trixloridi 28. 2812 14 Xloridlar va oksid xloridlar: fosfor pentaxloridi 29. 2812 19 Xloridlar va oksid xloridlar: boshqalar 30. 2812 90 Nometallarning galogenli birikmalari va galogenli oksidlari: boshqalar, xloridlar va oksid xloridlardan tashqari 31. 2813 Nometallarning sulfidlari; texnik fosfor trisulfidi 32. 2814 20 Suvli eritmadagi ammiak 33. 2815 Natriy gidroksidi (kaustik soda); kaliy gidroksidi (uyuvchi kaliy); natriy yoki kaliy peroksidlari 34. 2816 Magniy gidroksidi va peroksidi; stronsiy yoki bariy oksidlari, gidroksidlari va peroksidlari 35. 2819 Xrom oksidlari va gidroksidlari 36. 2821 10 Temir oksidlari va gidroksidlari 37. 2824 90 Qoʻrgʻoshin oksidlari; qoʻrgʻoshinli surik (qizil va toʻq sariq): boshqalar, qoʻrgʻoshin monooksidi (qoʻrgʻoshin gleti)lardan tashqari 38. 2825 10 Gidrazin va gidroksilamin va ularning noorganik tuzlari 39. 2825 90 Boshqa noorganik asoslar; metallarning boshqa oksidlari, gidroksidlari va peroksidlari: boshqalar 40. 2826 19 Boshqa ftoridlar, aluminiydan tashqari 41. 2826 90 Ftorosilikatlar, ftoroalyuminatlar va ftorning boshqa murakkab tuzlari: boshqalar 42. 2827 20 Kalsiy xloridi 43. 2827 31 Boshqa xloridlar: magniy 44. 2827 32 Boshqa xloridlar: aluminiy 45. 2827 39 Boshqa xloridlar: boshqalar, magniy, aluminiy va nikellardan tashqari 46. 2827 51 Bromidlar va bromid oksidlari: natriy yoki kaliy bromidlari 47. 2827 59 Bromidlar va bromid oksidlari: boshqalar, natriy yoki kaliy bromidlaridan tashqari 48. 2827 60 Yodidlar va yodid oksidlari 49. 2828 90 Gipoxloritlar; xloritlar; gipobromitlar: boshqalar 50. 2829 Xloratlar va perxloratlar; bromatlar va perbromatlar; yodatlar va peryodatlar 51. 2831 10 Ditionitlar va sulfoksilatlar: natriy 52. 2833 19 Natriy sulfatlari: boshqalar, dinatriy sulfatidan tashqari 53. 2833 27 Boshqa sulfatlar: bariy 54. 2833 29 Boshqa sulfatlar: boshqalar 55. 2833 40 Peroksosulfatlar (persulfatlar) 56. 2834 Nitritlar; nitratlar 57. 2837 11 Sianidlar va sianid oksidlar: natriy 58. 2837 19 Sianidlar va sianid oksidlar: boshqalar, natriydan tashqari 59. 2841 50 Boshqa xromatlar va dixromatlar; peroksoxromatlar 60. 2841 61 Manganitlar, manganatlar va permanganatlar: kaliy permanganati 61. 2841 69 Manganitlar, manganatlar va permanganatlar: boshqalar, kaliy permanganatidan tashqari 62. 2843 21 Kumush birikmalari: kumush nitrati 63. 2843 90 Boshqa birikmalar; amalgamalar 64. 2845 90 TIF TNning 2844-tovar pozitsiyasidagi izotoplardan boshqa izotoplar; ushbu izotoplarning aniq yoki noaniq kimyoviy tarkibga ega organik yoki noorganik birikmalari: boshqalar 65. 2846 90 Nodir yer metallari, ittriy yoki skandiy, yoki ushbu metallarning aralashmalari, organik yoki noorganik birikmalari: boshqalar 66. 2847 00 Mochevina bilan qotirilgan yoki qotirilmagan vodorod peroksidi 67. 2849 10 Karbidlar, kimyoviy tarkibi aniq yoki noaniq: kalsiy 68. 2849 90 Karbidlar, kimyoviy tarkibi aniq yoki noaniq: boshqalar, kalsiy va kremniylardan tashqari 69. 2850 00 TIF TNning 2849-tovar pozitsiyasiga taalluqli karbid birikmalaridan boshqa, aniq yoki noaniq kimyoviy tarkibga ega gidridlar, nitridlar, azidlar, silitsidlar va boridlar 70. 2852 Amalgamalardan boshqa simobning aniq yoki noaniq kimyoviy tarkibga ega, organik yoki noorganik birikmalari: 71. 2901 Atsiklik uglevodorodlar 72. 2902 Siklik uglevodorodlar 73. 2903 Uglevodorodlarning gallogenlangan hosilalari 74. 2904 Uglevodorodlarning sulfirlangan, nitrolangan yoki nitrozirlangan hosilalari, galogenlashgan yoki galogenlashmagan 75. 2905 11 Toʻyingan monospirtlar: metanol (metil spirti) 76. 2905 12 Toʻyingan monospirtlar: propil spirti va izopropil spirti 77. 2905 13 Toʻyingan monospirtlar: butil spirti 78. 2905 14 Toʻyingan monospirtlar: boshqa butanollar 79. 2905 16 Toʻyingan monospirtlar: oktanol (oktil spirti) va uning izomerlari 80. 2905 19 Toʻyingan monospirtlar: boshqalar 81. 2905 59 Atsiklik spirtlarning galogenlangan, sulfinlangan, nitrolangan yoki nitrozalangan hosilalari: boshqalar 82. 2906 19 Sikloalkan, sikloalken yoki sikloterpen: boshqalar 83. 2907 12 Monofenollar: krezollar va ularning tuzlari 84. 2907 19 Monofenollar: boshqalar 85. 2907 29 Polifenollar; fenolospirtlar: boshqalar 86. 2908 19 Tarkibida faqat galogeno guruhlar boʻlgan hosilalar va ularning tuzlari: boshqalar 87. 2908 99 Fenol yoki fenolospirtlarning galogenlangan, sulfinlangan, nitrolangan yoki nitrozalangan hosilalari: boshqalar 88. 2909 Oddiy efirlar, oddiy efirlarning, atsetallarning, yarimatsetallarning va ketonlarning (maʼlum va nomaʼlum kimyoviy tarkibdagi) efirspirtlari, efirfenollari, efirspirtfenollari, spirtlarning peroksidlari va ularning galogenlangan, sulfirlangan, nitrolangan yoki nitrozirlangan hosilalari 89. 2910 20 Tarkibida uch benzol halqa boʻlgan epoksidlar, epoksi spirtlar, epoksifenollar va epoksiefirlar va ularning gallogenlangan, sulfinlangan, nitrolangan yoki nitrozalangan hosila birikmalari: metiloksiran (propilenoksid) 90. 2910 30 Tarkibida uch benzol halqa boʻlgan epoksidlar, epoksi spirtlar, epoksifenollar va epoksiefirlar va ularning gallogenlangan, sulfinlangan, nitrolangan yoki nitrozalangan hosila birikmalari: epoksipropan (epixlorgidrin) 91. 2911 00 Tarkibida boshqa kislorodli funksional guruh boʻlgan atsetallar va yarimatsetallar hamda ularning gallogenlangan, sulfinlangan, nitrolangan yoki nitrozalangan hosila birikmalari 92. 2912 Tarkibida boshqa kislorodli funksional guruh boʻlgan yoki boʻlmagan aldegidlar; siklik aldegid polimerlari; paraformaldegid 93. 2913 00 Gallogenlangan, sulfinlangan, nitrolangan yoki nitrozalangan birikmalarning hosila birikmalari 94. 2914 11 Tarkibida boshqa kislorodli funksional guruh boʻlgan yoki boʻlmagan atsiklik ketonlar: atseton 95. 2914 12 Tarkibida boshqa kislorodli funksional guruh boʻlgan yoki boʻlmagan atsiklik ketonlar: butanon (metiletilketon) 96. 2914 19 Tarkibida boshqa kislorodli funksional guruh boʻlgan yoki boʻlmagan atsiklik ketonlar: boshqalar 97. 2914 22 Tarkibida boshqa kislorodli funksional guruh boʻlgan yoki boʻlmagan sikloalkan, sikloalken yoki sikloterpen ketonlar: siklogeksanon va metilsiklogeksanonlar 98. 2914 29 Tarkibida boshqa kislorodli funksional guruh boʻlgan yoki boʻlmagan sikloalkan, sikloalken yoki sikloterpen ketonlar: boshqalar 99. 2914 40 Ketonospirt va ketonoaldegidlar 100. 2914 79 Gallogenlangan, sulfinlangan, nitrolangan yoki nitrozalangan hosilalari: boshqalar 101. 2915 11 Chumoli kislotasi 102. 2915 13 Chumoli kislotasining murakkab efirlari 103. 2915 21 Sirka kislota 104. 2915 24 Sirka angidrid 105. 2915 33 Sirka kislota murakkab efirlari: p-butilatsetat 106. 2915 39 Sirka kislota murakkab efirlari: boshqalar 107. 2915 40 Mono-, di- yoki trixlorsirkali kislotlar, ularning tuzlari va murakkab efirlari 108. 2915 50 Propion kislota, uning tuzlari va murakkab efirlari 109. 2915 90 Atsiklik koʻp karbonli toʻyingan kislotalar va ularning angdrid, gallogenangidrid, peroksid hamda peroksikislotalari; ularning gallogenlangan, sulfinlangan, nitrolangan yoki nitrozalangan hosila birikmalari: boshqalar 110. 2916 11 Atsiklik koʻp karbonli toʻyinmagan kislotalar, ularning angdrid, gallogen angidrid, peroksid, peroksikislotalari va ushbu birikmalarning hosilalari: akril kislota va uning tuzlari 111. 2916 12 Atsiklik koʻp karbonli toʻyinmagan kislotalar, ularning angidrid, gallogen angidrid, peroksid, peroksikislotalari va ushbu birikmalarning hosilalari: akril kislotaning murakkab efirlari 112. 2916 13 Atsiklik koʻp karbonli toʻyinmagan kislotalar, ularning angdrid, gallogen angidrid, peroksid, peroksikislotalari va ushbu birikmalarning hosilalari: metakril kislota va uning tuzlari 113. 2916 32 Aromatik koʻp karbonli kislotalar, ularning angdrid, galogenangidrid, peroksid, peroksikislotalari va ularning hosilalari: benzoil peroksid va benzoilxlorid 114. 2916 34 Aromatik koʻp karbonli kislotalar, ularning angdrid, galogenangidrid, peroksid, peroksikislotalari va ularning hosilalari: fenilsirka kislota va ularning tuzlari 115. 2917 14 Polikarbon atsiklik kislotalar, ularning angidrid, gallogen angidrid, peroksid, peroksikislotalari va ularning hosilalari: malein angidrid 116. 2920 90 Nometallarning boshqa noorganik kislotalari murakkab efirlari (gallogenvodorodlar murakkab efirlaridan tashqari) va ularning tuzlari; ularning gallogenlangan, sulfinlangan, nitrolangan yoki nitrozalangan hosilalari: boshqalar 117. 2921 11 Atsiklik monoaminolar va ularning hosilalari; ushbu birikmalar tuzlari: metilamin, di- yoki trimetilamin va ularning tuzlari 118. 2921 19 Atsiklik monoaminolar va ularning hosilalari; ushbu birikmalar tuzlari: boshqalar 119. 2921 21 Atsiklik poliaminlar va ularning hosilalari; ushbu birikmalar tuzlari: etilendiamin va ularning tuzlari 120. 2921 22 Atsiklik poliaminlar va ularning hosilalari; ushbu birikmalar tuzlari: geksametilendiamin va ularning tuzlari 121. 2921 29 Atsiklik poliaminlar va ularning hosilalari; ushbu birikmalar tuzlari: boshqalar 122. 2921 30 Mono- yoki poliaminlar sikloalkan, sikloalken yoki sikloterpen va ularning hosilalari; ushbu birikmalar tuzlari 123. 2921 41 Aromatik monoaminlar va ularning hosilalari; ushbu birikmalar tuzlari: anilin va ularning tuzlari 124. 2921 42 Aromatik monoaminlar va ularning hosilalari; ushbu birikmalar tuzlari: anilin hosilalari va ularning tuzlari 125. 2921 43 Aromatik monoaminlar va ularning hosilalari; ushbu birikmalar tuzlari: toluidinlar va ularning hosilalari; ushbu birikmalar tuzlari 126. 2921 44 Aromatik monoaminlar va ularning hosilalari; ushbu birikmalar tuzlari: difenilamin va uning hosilalari; ushbu birikmalar tuzlari 127. 2921 45 Aromatik monoaminlar va ularning hosilalari; ushbu birikmalar tuzlari: 1-naftilamin (α-naftilamin), 2-naftilamin (β-naftilamin) va ularning hosilalari; ushbu birikmalar tuzlari 128. 2921 49 Aromatik monoaminlar va ularning hosilalari; ushbu birikmalar tuzlari: boshqalar 129. 2921 51 Aromatik poliaminlar va ularning hosilalari; ushbu birikmalar tuzlari: o-, m-, p-fenilendiamin, diaminotoluollar va ularning hosilalari; ushbu birikmalar tuzlari 130. 2921 59 Aromatik poliaminlar va ularning hosilalari; ushbu birikmalar tuzlari: boshqalar 131. 2922 11 Aminospirtlar, tarkibida bir turdan ortiq kislorodli funksional guruh boʻlgan birikmalardan tashqari va ularning oddiy va murakkab efirlari; ushbu birikmalar tuzlari: monoetanolamin va uning tuzlari 132. 2922 19 Aminospirtlar, tarkibida bir turdan ortiq kislorodli funksional guruh boʻlgan birikmalardan tashqari va ularning oddiy va murakkab efirlari; ushbu birikmalar tuzlari: boshqalar 133. 2922 29 Aminospirtlar va boshqa aminofenollar, tarkibida bir turdan ortiq kislorodli funksional guruh boʻlgan birikmalardan tashqari va ularning oddiy va murakkab efirlari; ushbu birikmalar tuzlari: boshqalar 134. 2922 43 Aminokislotalar, tarkibida bir tipdan ortiq kislorodli funksional guruh boʻlgan birikmalardan tashqari va ularning oddiy va murakkab efirlari; ushbu birikmalar tuzlari: antranil kislota va ularning tuzlari 135. 2923 90 Toʻrtlamchi ammoniy asoslar tuzlari va gidroksidlari; kimyoviy tarkibi aniq va noaniq boʻlgan letsitin va fosfor aminolipidlari va boshqalar: boshqalar 136. 2924 19 Atsiklik amidlar (atsiklik karbamatlarni kiritgan holda) va ularning hosilalari; ushbu birikmalar tuzlari: boshqalar 137. 2925 29 Iminlar va ularning hosilalari; ushbu birikmalar tuzlari: boshqalar 138. 2926 10 Tarkibida nitril funksional guruh boʻlgan birikmalar: akrilonitril 139. 2926 90 Tarkibida nitril funksional guruh boʻlgan birikmalar: boshqalar 140. 2928 00 Organik gidrazin yoki gidroksilamin hosilalari 141. 2929 Tarkibida boshqa azotli funksional guruhlar boʻlgan birikmalar 142. 2930 90 Organiksulfid birikmalar: boshqalar 143. 2931 10 Tetrametil qoʻrgʻoshin va tetraetil qoʻrgʻoshin 144. 2931 90 Organo-noorganik birikmalar boshqalar: boshqalar 145. 2932 11 Tuzilishida kondensirlanmagan furanli halqani oʻz ichiga olgan birikmalar (gidrirlangan yoki gidrirlanmagan): tetragidrofuran 146. 2932 19 Tuzilishida kondensirlanmagan furanli halqani oʻz ichiga olgan birikmalar (gidrirlangan yoki gidrirlanmagan): boshqalar 147. 2932 91 Tarkibida faqat kislorod getero atom(lar) boʻlgan boshqa birikmalar: izosafrol 148. 2932 92 Tarkibida faqat kislorod getero atom(lar) boʻlgan boshqa birikmalar: 1-(1, 3-benzodioksol-5-il) propan-2-on 149. 2932 99 Tarkibida faqat kislorod getero atom(lar) boʻlgan boshqa birikmalar: boshqalar 150. 2933 31 Tuzilishida kondensirlanmagan piridin halqani oʻz ichiga olgan (gidrirlangan yoki gidrirlanmagan) birikmalar: piridin va uning tuzlari 151. 2933 59 Tuzilishida pirimidin halqa (gidrirlangan yoki gidrirlanmagan) yoki piperazin halqani oʻz ichiga olgan birikmalar: boshqalar 152. 2933 69 Tuzilishida kondensirlanmagan triazin halqani oʻz ichiga olgan (gidrirlangan yoki gidrirlanmagan) birikmalar: boshqalar 153. 2933 99 Tarkibida faqat azot geteroatom(lar)i boʻlgan birikmalar: boshqalar 154. 2934 99 Aniq yoki noaniq kimyoviy tarkibdagi nuklein kislotalar va ularning tuzlari; geterotsiklik boshqa birikmalar: boshqalar 155. 2939 20 Xin daraxti alkaloidlari va ularning hosilalari; ushbu birikmalar tuzlari 156. 2939 79 Alkaloidlar, tabiiy yoki sintez qilingan; ularning tuzlari, oddiy va murakkab efirlar va boshqa hosila birikmalari; oʻsimlikdan kelib chiqqan: boshqalar 157. 3102 30 Mineral yoki kimyoviy, azotli oʻgitlar: ammoniy nitrati, shu jumladan, suvli eritmada 158. 3102 50 Mineral yoki kimyoviy, azotli oʻgʻitlar: natriy nitrati 159. 3102 90 Mineral yoki kimyoviy, azotli oʻgʻitlar: boshqalar, shu jumladan, oldingi subpozitsiyalarda nomlanmagan aralashmalar 160. 3104 20 Mineral yoki kimyoviy, kaliyli oʻgʻitlar: kaliy xloridi 161. 3104 30 Mineral yoki kimyoviy, kaliyli oʻgʻitlar: kaliy sulfati 162. 3206 49 Boshqa rang beruvchi moddalar va preparatlar: boshqalar 163. 3604 10 Mushakbozliklar 164. 3606 Ferrotseriy va har qanday shakldagi boshqa piroforik qotishmalar 165. 3707 10 Fotokimyoviy moddalar (laklar, yelimlar, yopishtiruvchi moddalar va shunga oʻxshash preparatlardan tashqari); oʻlchangan dozalarda taqdim etilgan yoki foydalanishga tayyor shaklda chakana savdoga chiqarilgan fotografik maqsadlar uchun aralashtirilmagan mahsulotlar: sezgirlashtirilgan emulsiyalar 166. 3805 90 Yogʻoch yoki sulfat skipidar va qaragʻay yogʻi yoki haydash yoki nina bargli daraxtlar yogʻochini qayta ishlashning boshqa yoʻli bilan olingan terpen moylari; tozalanmagan dipenten; sulfit skipidar va boshqa tozalanmagan para-simol; asosiy komponent sifatida alfa-terpineol saqlovchi qaragʻay yogʻi: boshqalar 167. 3808 59 Insektitsidlar, rodentitsidlar, fungʻitsidlar, gerbitsidlar, paydo boʻlishga qarshi vositalar va oʻsimliklarning oʻsishi uchun regulatorlar, dezinfeksiyalovchi va shunga oʻxshash vositalar, chakana savdo uchun formalarga yoki qadoqlarga qadoqlangan yoki tayyor preparatlar yoki mahsulotlar koʻrinishida taqdim etilgan (masalan, oltingugurt bilan ishlangan lentalar, fitil va shamlar va chivinlardan yopishqoq qogʻoz): boshqalar 168. 3808 99 Insektitsidlar, rodentitsidlar, fungitsidlar, gerbitsidlar, paydo boʻlishga qarshi vositalar va oʻsimliklarning oʻsishi uchun regulatorlar, dezinfeksiyalovchi va shunga oʻxshash vositalar, chakana savdo uchun formalarga yoki qadoqlarga qadoqlangan yoki tayyor preparatlar yoki mahsulotlar koʻrinishida taqdim etilgan (masalan, oltingugurt bilan ishlangan lentalar, fitil va shamlar va chivinlardan yopishqoq qogʻoz): boshqalar 169. 3815 90 Boshqa joyda nomlanmagan yoki kiritilmagan reaksiya tashabbuskorlari, reaksiya tezlashtirgichlari va katalizatorlari: boshqalar 170. 3824 84 Tarkibida aldrin (ISO), kamfexlor (ISO) (toksafen), xlordan (ISO), xlordekon (ISO), DDT (ISO) (klofenotan (INN), 1,1,1-trikloro-2,2-bis p-xlorofenil, etan), diyeldrin (ISO, INN), endosulfan (ISO), endrin (ISO), geptaxlor (180)yoki mireks (ISO) mavjud moddalar 171. 3824 99 Qoliplar yoki quyish yadrolarini ishlab chiqarish uchun tayyor bogʻlovchilar; boshqa joyda koʻrsatilmagan yoki kiritilmagan kimyo yoki unga aloqador sanoat mahsulotlari va preparatlari (shu jumladan, tabiiy mahsulotlar aralashmalaridan tashkil topgan preparatlar): boshqalar 172. 3827 68 Tarkibida metan, etan yoki propanning galogenli hosilalari va gidroftoruglerodlar boʻlgan moddalar 173. 7603 10 Aluminiy kukun va poʻstloqlari: qatlamsiz tuzilishli kukunlar 174. 7903 Rux zarrachalari, kukuni va changi 175. 8109 Sirkoniy va undan tayyorlangan buyumlar, shu jumladan lom va chiqindilar 176. 8112 Berilliy, xrom, gafniy, reniy, talliy, kadmiy, germaniy, vanadiy, galliy, indiy va niobiy (kolumbiy), va ulardan tayyorlangan buyumlar, shu jumladan, metall parchalari va chiqindilar

Yonish va portlash xavfi yuqori boʻlgan kimyoviy moddalarni (mahsulotlarni) saqlash, tashish, ulardan foydalanish va yoʻq qilish sohasidagi faoliyatni nazorat qilish tartibi toʻgʻrisidagi nizomga 2-ILOVA

Elektron hujjatning identifikatsiya raqami Yonish va portlash xavfi yuqori boʻlgan kimyoviy moddalarni (mahsulotlarni) saqlash hamda ishlab chiqarish bino va inshootlari uchun obyektning yongʻin va sanoat xavfsizligi talablariga muvofiqligi yuzasidan XULOSA Seriya Raqam Ushbu xulosa (viloyat, tuman/shahar, qishloq/koʻcha/uy) _________________ ___________________________________________________________________ ________________________________________________ manzilda joylashgan, ___________________________________________________________________ (jismoniy va yuridik F.I.O) ga tegishli boʻlgan, ________________________ _____________________________________________ (obyektning nomi) ning ilovada roʻyxati keltirilgan yonish va portlash xavfi yuqori boʻlgan kimyoviy moddalarni (mahsulotlarni) saqlash uchun yongʻin va sanoat xavfsizligi talablariga muvofiqligi yuzasidan berildi. 20 ___ yil “___” _______________ ________________________________ ______________________ (vakolatga ega rahbarning lavozimi) (F.I.O) m 2 : ______________________________________ m 3 : ______________________________________ Binolar va (yoki) ochiq maydonlar QR-kod

Yonish va portlash xavfi yuqori boʻlgan kimyoviy moddalarni (mahsulotlarni) saqlash, tashish, ulardan foydalanish va yoʻq qilish sohasidagi faoliyatni nazorat qilish tartibi toʻgʻrisidagi nizomga 3-ILOVA

Yonish va portlash xavfi yuqori boʻlgan kimyoviy moddalarni omborxonalarda va ishlab chiqarish bino va inshootlarida saqlash faoliyati uchun ruxsatnoma olish

Bosqichlar Subyektlar Tadbirlar Bajarish muddatlari 1-bosqich Kimyoviy moddalarni saqlovchi ombor hamda ishlab chiqarish bino va inshooti egalari Kimyoviy moddalarni saqlash omborini tashkil etish hamda kimyoviy moddalarni ishlab chiqarish bino va inshootida saqlash boʻyicha Favqulodda vaziyatlar vazirligining hududiy boshqarmasiga talab etiladigan materiallar bilan birga ariza bilan yozma yoki vazirlik elektron manzili orqali murojaat qiladi. Kimyoviy moddalar omborga joylashtirilgunga qadar 2-bosqich Favqulodda vaziyatlar vazirligi hududiy boshqarmasi 1. Qoʻmitaga arizada koʻrsatilgan omborxona hamda ishlab chiqarish bino va inshooti sanoat xavfsizligi talablariga javob berishi yuzasidan tegishli xulosa olish uchun zarur materiallarni yuboradi. Bir ish kuni 2. Omborxona hamda ishlab chiqarish bino va inshootining yongin xavfsizligi talablariga muvofiqligi yuzasidan joyiga chiqqan holda tegishli oʻrganishlar oʻtkazadi. Uch ish kuni 3-bosqich Qoʻmita Arizani joyiga chiqqan holda oʻrganib chiqib, omborning hamda ishlab chiqarish bino va inshootining sanoat xavfsizligi talablariga muvofiqligi yuzasidan tegishli xulosani Favqulodda vaziyatlar vazirligiga taqdim qiladi. Yetti ish kuni 4-bosqich Favqulodda vaziyatlar vazirligi hududiy boshqarmasi Qoʻmita xulosasi va omborning hamda ishlab chiqarish bino va inshootining yongin xavfsizligi talablariga muvofiqligini oʻrganish natijalari asosida yonish va portlash xavfi yuqori boʻlgan kimyoviy moddalarni saqlash omborxonasi hamda ishlab chiqarish bino va inshooti faoliyati uchun tegishli ruxsatnoma yoki omborxonaning hamda ishlab chiqarish bino va inshootining sanoat va/yoki yongin xavfsizligi qoidalariga muvofiq emasligi toʻgʻrisida xulosa beradi. Oʻn ish kuni

Yonish va portlash xavfi yuqori boʻlgan kimyoviy moddalarni (mahsulotlarni) saqlash, tashish, ulardan foydalanish va yoʻq qilish sohasidagi faoliyatni nazorat qilish tartibi toʻgʻrisidagi nizomga 4-ILOVA

Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi nazorati ostida boʻlgan xavfli kimyoviy moddalarning

T/r Xavfli moddaning nomi, turi va zaharli moddalar Minimal cheklangan meʼyor (tonna) I. Xavfli moddaning nomi 1. Ammiak 500 2. Ammoniy nitrat (tarkibidagi ammoniy nitratdan hosil boʻlgan azot massasining 28 foizidan ortigʻini tashkil etadigan ammoniy nitrat va ammoniy aralashmasi, shuningdek, ammoniy nitrat konsentratsiyasi massaning 90 foizidan ortiq boʻlgan ammoniy nitratning suvli eritmalari) 2500 3. Oʻgit shaklidagi ammoniy nitrat (ammoniy nitrat asosidagi oddiy oʻgitlar, shuningdek, tarkibidagi ammoniy nitratdan hosil boʻlgan azot massasining 28 foizidan ortigʻini tashkil etadigan murakkab oʻgʻitlar (murakkab oʻgʻitlar tarkibida ammoniy nitrat fosfat va (yoki) kaliy bilan birgalikda mavjud boʻladi) 10 000 4. Akrilonitril 200 5. Xlor 25 6. Etilen oksidi 50 7. Vodorod sianid 20 8. Vodorod ftorid 50 9. Vodorod sulfid 50 10. Oltingugurt dioksidi 250 11. Oltingugurt trioksidi 75 12. Qoʻrgʻoshin alkili 50 13. Fosgen 0,75 14. Metilizotsianat 0,15 II. Xavfli moddalar turlari 1. Alangalanadigan gazlar 200 2. Tovar-xomashyo omborlari va bazalardagi yonadigan suyuqliklar 50 000 3. Texnologik jarayonda foydalaniladigan yoki magistral quvurlar bilan uzatiladigan yonadigan suyuqliklar 200 4. Zaharli moddalar 200 5. Yuqori zaharli moddalar 20 6. Oksidlanadigan moddalar 200 III. Zaharli moddalar 1. Akrilonitril (ventoks) - 2. Metil spirti - 3. Margimushli angidrid - 4. Margimushsimon angidrid - 5. Dixlorid simoblar (sulema) va boshqa simob tuzlari - 6. Nikel tetrakarbonili - 7. Sariq fosfor - 8. Qizil fosfor - 9. Vodorod sianid va uning tuzlari (natriy sianid, kaliy sianid, kadmiy sianid, kumush sianid, simob sianid va oksitsianid, qoʻrgʻoshin sianid, mis sianid, rux sianid, kalsiy sianid) - 10. Sian qotishma - 11. Siklon - 12. Etilmerkurxlorid - 13. Etilmerkoptan -

Oʻzbekiston Respublikasining Bosh vaziri A. ARIPOV

Toshkent sh.,

2024-yil 7-mart,

121-son

(Qonunchilik maʼlumotlari milliy bazasi, 11.03.2024-y., 09/24/121/0194-son; 05.05.2025-y., 09/25/289/0406-son; 02.07.2025-y., 09/25/397/0562-son)

lex.uz