📅 2024-yil 29-mart · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 29 март · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 29 марта 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 29 March 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Атмосфера ҳавосига транспорт воситаларининг салбий таъсирини камайтириш бўйича чора-тадбирлар тўғрисида
Ўзбекистон Республикаси Президентининг «2030 йилгача бўлган даврда Ўзбекистон Республикасининг Атроф муҳитни муҳофаза қилиш концепциясини тасдиқлаш тўғрисида» 2019 йил 30 октябрдаги ПФ-5863-сон Фармони ҳамда «Экология, атроф-муҳитни муҳофаза қилиш ва иқлим ўзгариши вазирлиги фаолиятини самарали ташкил этиш чора-тадбирлари тўғрисида» 2023 йил 31 майдаги ПҚ-171-сон қарори ижросини таъминлаш, шунингдек, мамлакатимизда транспорт воситаларининг атроф-муҳитга салбий таъсирини, шу жумладан, атмосфера ҳавосига зарарли ташламалар ҳажмини камайтириш мақсадида Вазирлар Маҳкамаси қарор қилади:
1. Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги (кейинги ўринларда — Экология вазирлиги), Ички ишлар вазирлиги ва Транспорт вазирлигининг қуйидаги таклифларига розилик берилсин:
а) 2026 йил 1 январдан бошлаб барча тоифалардаги автомототранспорт воситаларидан (кейинги ўринларда — транспорт воситалари) ифлослантирувчи моддалар ташламаларининг атмосфера ҳавосига зарарли таъсири бўйича йўл қўйиладиган нормативларга (кейинги ўринларда — нормативлар) мослигини назорат қилиш бўйича қуйидагиларни назарда тутувчи «Экологик транспорт» тизимини босқичма-босқич жорий этиш:
«ҳудудларни улардаги атмосфера ҳавоси билан боғлиқ реал экологик ҳолатдан келиб чиқиб, илғор хорижий тажриба ва инновацион технологиялар асосида экологик зоналарга (кейинги ўринларда — экологик зоналар) ажратиб бориш;
транспорт воситаларининг нормативларга мослиги даражасини уларнинг ишлаб чиқарувчи томонидан белгиланган экологик синфига мансублигига («Евро») кўра автоматик баҳолаш тизими ёрдамида қалбакилаштиришдан ҳимояланган ҳамда электрон белгига эга бўлган экологик стикерлар бериш орқали транспорт воситаларини «яшил», «сариқ» ва «қизил» ранглар билан белгиланадиган «тоза», «ўрта» ва «зарарли» экологик тоифаларга ажратиб бориш;
экологик тоифаси ҳудуднинг экологик зонасига мувофиқ бўлмаган транспорт воситаларига нисбатан экологик компенсация тўловларини жорий этиш ёхуд улардан тегишли экологик зоналар ҳудудида фойдаланишни чеклаш ёки тақиқлаш;
б) «Экологик транспорт» тизимини қуйидаги босқичларда жорий этиш:
биринчи босқичда (2025 — 2027 йилларда) — Тошкент шаҳрида;
иккинчи босқичда (2028 — 2030 йилларда) — Нукус шаҳри ва вилоятлар марказларида ҳамда, заруратга кўра, алоҳида экологик зоналарда (сайёҳлик маркази, табиат қўриқхонаси, соғломлаштириш ҳамда дам олиш масканлари ва бошқалар);
учинчи босқичда (2031 — 2034 йилларда) — бошқа барча ҳудудларда;
в) экологик тоифаси ҳудуднинг экологик зонасига мувофиқ бўлмаган транспорт воситаларидан экологик зоналар ҳудудида фойдаланиш тартибига риоя этмаганлик учун жавобгарлик чораларини белгилаш ҳамда жарима маблағларини мамлакатнинг экологик ҳолатини яхшилашга ва атроф-муҳитни муҳофаза қилишга мақсадли йўналтириш.
2. Шундай тартиб ўрнатилсинки, унга мувофиқ:
а) 2026 йил 1 январдан бошлаб республиканинг барча ҳудудларида транспорт воситаларининг нормативларга мослиги даражасини аниқлаш ва натижалари бўйича экологик стикерлар бериш мазкур хизматлар учун алоҳида тўлов ундирилмасдан транспорт воситаларини Давлат йўл ҳаракати хавфсизлиги хизмати бўлинмаларида рўйхатга олиш ва қайта рўйхатга олиш жараёнида босқичма-босқич амалга оширилади;
б) мазкур банднинг «а» кичик бандидан бошқа ҳолатларда экологик стикерларга эга бўлмаган транспорт воситалари уларнинг нормативларга мослиги даражасини аниқлаш ва натижалари бўйича экологик стикерлар бериш тартиботларидан Давлат йўл ҳаракати хавфсизлиги хизмати бўлинмаларида мазкур хизматлар учун алоҳида тўлов ундирилмасдан қуйидаги муддатларда ўтказилиши зарур:
2028 йил 1 январга қадар — Тошкент шаҳрида;
2031 йил 1 январга қадар — Нукус шаҳри ва вилоятлар марказларида ҳамда экологик зоналарга ажратилган алоҳида экологик зоналарда;
2035 йил 1 январга қадар — бошқа барча ҳудудларда;
в) экологик стикерларга эга бўлган транспорт воситалари ихтиёрий равишда уларнинг нормативларга мослиги даражасини қайта аниқлаш ва натижалари бўйича янги экологик стикерлар бериш тартиботларидан Давлат йўл ҳаракати хавфсизлиги хизмати бўлинмаларида бир йилда бир марта ушбу хизматлар учун алоҳида тўлов ундирилмасдан ўтказилиши мумкин;
г) ишлаб чиқарилганига уч йилдан ошмаган транспорт воситаларига уларнинг эгалари томонидан онлайн ахборот тизимлари орқали юборилган мурожаатлар асосида реал вақт режимида «яшил» экологик тоифасига мансуб экологик стикерлар мазкур хизматлар учун алоҳида тўлов ундирилмасдан диагностика текширувисиз берилади ва почта орқали юборилади;
д) шошилинч ва тезкор хизмат транспорт воситаларидан ҳамда жамоат транспортидан (такси ва йўналишли таксидан ташқари) барча экологик зоналар ҳудудида ҳеч қандай чеклов ва тақиқларсиз фойдаланилади;
е) экологик тоифаси ҳудуднинг экологик зонасига мувофиқ бўлмаган айрим турдаги транспорт воситаларидан Вазирлар Маҳкамаси томонидан белгиланган тартибда экологик компенсация тўловларини амалга ошириш орқали тегишли экологик зоналар ҳудудида вақтинчалик фойдаланиш мумкин.
3. Белгилансинки:
ҳудудлардаги экологик зоналар чегараларини белгилаш ҳамда уларни ўзгартириш тегишлича Қорақалпоғистон Республикаси Вазирлар Кенгаши, Тошкент шаҳар ва вилоятлар ҳокимликлари томонидан Экология вазирлиги таклифига асосан амалга оширилади;
экологик синфга мансублигини («Евро») аниқлаш имкони бўлмаган транспорт воситаларининг нормативларга мослиги Ўзбекистон Республикаси Ички ишлар вазирлигининг «Инновация лойиҳалари ва аҳолига сервис хизматлари кўрсатиш маркази» давлат унитар корхонаси томонидан диагностика текширувидан ўтказилади ва аниқланади;
диагностика ўлчов воситаларини мувофиқлик текширувидан ўтказиш Экология вазирлиги ҳузуридаги Давлат экологик сертификатлаштириш ва стандартлаштириш маркази томонидан амалга оширилади.
4. «Экологик транспорт» тизимини самарали жорий этиш доирасида қуйидаги вазифалар юклансин:
а) Экология вазирлигига:
атмосфера ҳавоси сифатини автоматик мониторинг станцияларини «Атмосфера ҳавоси сифатини автоматик мониторинг станциялари. Умумий техник шартлар» Ўзбекистон миллий стандартига мувофиқ Экология вазирлиги томонидан тасдиқланган техник талаблар асосида харид қилиш, ўрнатиш, ишга тушириш ва уларга техник хизмат кўрсатиш. Бунда, атмосфера ҳавоси сифатини автоматик мониторинг станцияларини харид қилишда маҳаллий ишлаб чиқарилган маҳсулотларга устуворлик берилади;
илғор хорижий мутахассис ва экспертларни жалб этиш ҳамда инновацион технологияларни татбиқ қилиш орқали ўзида барча экологик зоналар ҳақидаги умумлашган маълумотлардан иборат мамлакатнинг атмосфера ҳавоси бўйича динамик электрон экологик харитасини шакллантириш ҳамда юритиб бориш;
транспорт воситаларидан экологик зоналар ҳудудида фойдаланиш соҳасидаги ҳуқуқбузарликларни аниқлашга қаратилган автоматлаштирилган фото ва видео қайд этиш техника воситаларини ҳамда уларнинг дастурий таъминотини харид қилиш, ўрнатиш, ишга тушириш ва уларга техник хизмат кўрсатиш;
ўз ташкилий тузилмасида атмосфера ҳавосини назорат қилиш мониторинг марказини ҳамда транспорт воситаларидан экологик зоналар ҳудудида фойдаланиш соҳасидаги ҳуқуқбузарликларни расмийлаштириш бўйича маъмурий амалиёт бўлимини ташкил этиш, шунингдек, уларни барча зарур моддий-техника ва дастурий воситалар билан таъминлаш;
б) Ўзбекистон Республикаси Ички ишлар вазирлигига:
Давлат йўл ҳаракати хизмати рўйхатлаш бўлинмаларининг бино ва иншоотларини замон талабларига мос равишда янгидан қуриш, қайта қуриш ва капитал таъмирлаш, уларнинг ҳузурида диагностика марказларини барпо этиш, шунингдек, уларни зарур моддий-техника ва дастурий воситалар билан жиҳозлаш;
«Инновация лойиҳалари ва аҳолига сервис хизматлари кўрсатиш маркази» давлат унитар корхонаси тузилмасида транспорт воситаларини экологик диагностика текширувидан ўтказиш бўйича сервис хизмати кўрсатиш билан шуғулланувчи экология операторлар штат бирликларини киритиш, уларни қайта тайёрлаш ва малакасини ошириб бориш;
транспорт воситаларининг нормативларга мослиги даражасини автоматик баҳолаш тизимига асосланган диагностика текшируви воситаларини харид қилиш, ўрнатиш, ишга тушириш ва уларга техник хизмат кўрсатиш;
экологик стикерлар бланкларини ва уларга ишлов бериш бўйича махсус чоп этиш ускуналарини харид қилиш ҳамда стикерларни транспорт воситаси эгасига почта орқали етказиб бериш тизимини йўлга қўйиш.
5. Экология вазирлиги, Ўзбекистон Республикаси Ички ишлар вазирлиги ва Транспорт вазирлиги:
а) 2025 йил 1 апрелга қадар мазкур қарор ижроси доирасида жорий этиладиган ва амалда мавжуд электрон ахборот тизимлари ўзаро интеграция қилинишини таъминласин;
б) мазкур қарорнинг 4-бандида назарда тутилган чора-тадбирларни самарали амалга ошириш учун хусусий сектор ва инвестиция маблағларини жалб қилиш чораларини кўрсин;
в) 2025 йил 1 январга қадар қуйидагиларни назарда тутувчи Ҳукумат қарори лойиҳасини киритсин:
ҳудудларни улардаги атмосфера ҳавоси билан боғлиқ реал экологик ҳолатдан келиб чиқиб, экологик зоналарга ажратиб бориш ҳамда уларнинг атмосфера ҳавоси бўйича динамик электрон экологик харитасини шакллантириш ва юритиш тартибини;
экологик зоналар ҳудудида ва уларга кириш жойларида аҳолини қулай тарзда хабардор қилувчи белгиларни ўрнатиш ҳамда электрон платформаларда маълумотларни жойлаштириш тартибини;
транспорт воситаларининг нормативларга мослиги даражасини аниқлаш, натижаси бўйича уларни экологик тоифаларга ажратиб бориш, экологик стикерларнинг намуналари ва ҳимоя элементларини белгилаш ҳамда экологик стикерларни бериш, шунингдек, транспорт воситаларидан тегишли экологик зоналар ҳудудида фойдаланишни чеклаш ёки тақиқлаш механизмларини;
экологик компенсация тўловлари асосида экологик зоналар ҳудудида вақтинчалик фойдаланиш мумкин бўлган транспорт воситалари турлари рўйхатини ҳамда экологик компенсация тўловлари миқдори ва уларни ундириш тартибини;
транспорт воситаларидан экологик зоналар ҳудудида фойдаланиш соҳасидаги ҳуқуқбузарликларни аниқлаш, маъмурий баённомаларни расмийлаштириш, ундирилган жарима маблағларини мақсадли йўналтириш тартибини;
г) 2024 йил 1 декабрга қадар экологик тоифаси ҳудуднинг экологик зонасига мувофиқ бўлмаган транспорт воситаларидан экологик зоналар ҳудудида фойдаланиш тартибига риоя этмаганлик учун жавобгарлик чораларини белгилаш бўйича қонун лойиҳасини киритсин;
д) манфаатдор вазирлик ва идоралар билан биргаликда икки ой муддатда қонунчилик ҳужжатларига мазкур қарордан келиб чиқадиган ўзгартириш ва қўшимчалар тўғрисида таклифлар киритсин.
6. Ўзбекистон Республикаси Иқтисодиёт ва молия вазирлиги бир ой муддатда аҳолига «зарарли» тоифадаги транспорт воситаларини «тоза» тоифадаги транспорт воситаларига алмаштириш учун субсидия бериш тизимини жорий этиш ҳамда атмосфера ҳавосини муҳофаза қилиш ва унинг ифлосланишининг олдини олишга қаратилган замонавий ёндашувга асосланган чора-тадбирларни молиялаштириш бўйича Вазирлар Маҳкамасига таклиф киритсин.
7. Қорақалпоғистон Республикаси Вазирлар Кенгаши, Тошкент шаҳар ва вилоятлар ҳокимликлари Ўзбекистон Республикаси Ички ишлар вазирлиги билан биргаликда бир ой муддатда Давлат йўл ҳаракати хизмати рўйхатлаш бўлинмаларини такомиллаштириш, шу жумладан уларнинг қувватларини ошириш учун бўш турган ер участкаларини ажратиш бўйича асослантирилган таклифларни киритсин.
8. Экология вазирлиги манфаатдор вазирлик ва идоралар билан биргаликда ўзлари қабул қилган идоравий ҳужжатларини икки ой муддатда ушбу қарорга мувофиқлаштирсин.
9. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.Ж. Раматов, экология, атроф-муҳитни муҳофаза қилиш ва иқлим ўзгариши вазири А.А. Абдухакимов, ички ишлар вазири П.Р. Бобожонов ва транспорт вазири И.Р. Махкамов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2024 йил 29 март,
166-сон
Oʻzbekiston Respublikasi Vazirlar Mahkamasining
qarori
Atmosfera havosiga transport vositalarining salbiy taʼsirini kamaytirish boʻyicha chora-tadbirlar toʻgʻrisida
Oʻzbekiston Respublikasi Prezidentining “2030-yilgacha boʻlgan davrda Oʻzbekiston Respublikasining Atrof muhitni muhofaza qilish konsepsiyasini tasdiqlash toʻgʻrisida” 2019-yil 30-oktabrdagi PF-5863-son Farmoni hamda “Ekologiya, atrof-muhitni muhofaza qilish va iqlim oʻzgarishi vazirligi faoliyatini samarali tashkil etish chora-tadbirlari toʻgʻrisida” 2023-yil 31-maydagi PQ-171-son qarori ijrosini taʼminlash, shuningdek, mamlakatimizda transport vositalarining atrof-muhitga salbiy taʼsirini, shu jumladan, atmosfera havosiga zararli tashlamalar hajmini kamaytirish maqsadida Vazirlar Mahkamasi qaror qiladi:
1. Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi (keyingi oʻrinlarda — Ekologiya vazirligi), Ichki ishlar vazirligi va Transport vazirligining quyidagi takliflariga rozilik berilsin:
a) 2026-yil 1-yanvardan boshlab barcha toifalardagi avtomototransport vositalaridan (keyingi oʻrinlarda — transport vositalari) ifloslantiruvchi moddalar tashlamalarining atmosfera havosiga zararli taʼsiri boʻyicha yoʻl qoʻyiladigan normativlarga (keyingi oʻrinlarda — normativlar) mosligini nazorat qilish boʻyicha quyidagilarni nazarda tutuvchi “Ekologik transport” tizimini bosqichma-bosqich joriy etish:
“hududlarni ulardagi atmosfera havosi bilan bogʻliq real ekologik holatdan kelib chiqib, ilgʻor xorijiy tajriba va innovatsion texnologiyalar asosida ekologik zonalarga (keyingi oʻrinlarda — ekologik zonalar) ajratib borish;
transport vositalarining normativlarga mosligi darajasini ularning ishlab chiqaruvchi tomonidan belgilangan ekologik sinfiga mansubligiga (“Yevro”) koʻra avtomatik baholash tizimi yordamida qalbakilashtirishdan himoyalangan hamda elektron belgiga ega boʻlgan ekologik stikerlar berish orqali transport vositalarini “yashil”, “sariq” va “qizil” ranglar bilan belgilanadigan “toza”, “oʻrta” va “zararli” ekologik toifalarga ajratib borish;
ekologik toifasi hududning ekologik zonasiga muvofiq boʻlmagan transport vositalariga nisbatan ekologik kompensatsiya toʻlovlarini joriy etish yoxud ulardan tegishli ekologik zonalar hududida foydalanishni cheklash yoki taqiqlash;
b) “Ekologik transport” tizimini quyidagi bosqichlarda joriy etish:
birinchi bosqichda (2025 — 2027-yillarda) — Toshkent shahrida;
ikkinchi bosqichda (2028 — 2030-yillarda) — Nukus shahri va viloyatlar markazlarida hamda, zaruratga koʻra, alohida ekologik zonalarda (sayyohlik markazi, tabiat qoʻriqxonasi, sogʻlomlashtirish hamda dam olish maskanlari va boshqalar);
uchinchi bosqichda (2031 — 2034-yillarda) — boshqa barcha hududlarda;
v) ekologik toifasi hududning ekologik zonasiga muvofiq boʻlmagan transport vositalaridan ekologik zonalar hududida foydalanish tartibiga rioya etmaganlik uchun javobgarlik choralarini belgilash hamda jarima mablagʻlarini mamlakatning ekologik holatini yaxshilashga va atrof-muhitni muhofaza qilishga maqsadli yoʻnaltirish.
2. Shunday tartib oʻrnatilsinki, unga muvofiq:
a) 2026-yil 1-yanvardan boshlab respublikaning barcha hududlarida transport vositalarining normativlarga mosligi darajasini aniqlash va natijalari boʻyicha ekologik stikerlar berish mazkur xizmatlar uchun alohida toʻlov undirilmasdan transport vositalarini Davlat yoʻl harakati xavfsizligi xizmati boʻlinmalarida roʻyxatga olish va qayta roʻyxatga olish jarayonida bosqichma-bosqich amalga oshiriladi;
b) mazkur bandning “a” kichik bandidan boshqa holatlarda ekologik stikerlarga ega boʻlmagan transport vositalari ularning normativlarga mosligi darajasini aniqlash va natijalari boʻyicha ekologik stikerlar berish tartibotlaridan Davlat yoʻl harakati xavfsizligi xizmati boʻlinmalarida mazkur xizmatlar uchun alohida toʻlov undirilmasdan quyidagi muddatlarda oʻtkazilishi zarur:
2028-yil 1-yanvarga qadar — Toshkent shahrida;
2031-yil 1-yanvarga qadar — Nukus shahri va viloyatlar markazlarida hamda ekologik zonalarga ajratilgan alohida ekologik zonalarda;
2035-yil 1-yanvarga qadar — boshqa barcha hududlarda;
v) ekologik stikerlarga ega boʻlgan transport vositalari ixtiyoriy ravishda ularning normativlarga mosligi darajasini qayta aniqlash va natijalari boʻyicha yangi ekologik stikerlar berish tartibotlaridan Davlat yoʻl harakati xavfsizligi xizmati boʻlinmalarida bir yilda bir marta ushbu xizmatlar uchun alohida toʻlov undirilmasdan oʻtkazilishi mumkin;
g) ishlab chiqarilganiga uch yildan oshmagan transport vositalariga ularning egalari tomonidan onlayn axborot tizimlari orqali yuborilgan murojaatlar asosida real vaqt rejimida “yashil” ekologik toifasiga mansub ekologik stikerlar mazkur xizmatlar uchun alohida toʻlov undirilmasdan diagnostika tekshiruvisiz beriladi va pochta orqali yuboriladi;
d) shoshilinch va tezkor xizmat transport vositalaridan hamda jamoat transportidan (taksi va yoʻnalishli taksidan tashqari) barcha ekologik zonalar hududida hech qanday cheklov va taqiqlarsiz foydalaniladi;
e) ekologik toifasi hududning ekologik zonasiga muvofiq boʻlmagan ayrim turdagi transport vositalaridan Vazirlar Mahkamasi tomonidan belgilangan tartibda ekologik kompensatsiya toʻlovlarini amalga oshirish orqali tegishli ekologik zonalar hududida vaqtinchalik foydalanish mumkin.
3. Belgilansinki:
hududlardagi ekologik zonalar chegaralarini belgilash hamda ularni oʻzgartirish tegishlicha Qoraqalpogʻiston Respublikasi Vazirlar Kengashi, Toshkent shahar va viloyatlar hokimliklari tomonidan Ekologiya vazirligi taklifiga asosan amalga oshiriladi;
ekologik sinfga mansubligini (“Yevro”) aniqlash imkoni boʻlmagan transport vositalarining normativlarga mosligi Oʻzbekiston Respublikasi Ichki ishlar vazirligining “Innovatsiya loyihalari va aholiga servis xizmatlari koʻrsatish markazi” davlat unitar korxonasi tomonidan diagnostika tekshiruvidan oʻtkaziladi va aniqlanadi;
diagnostika oʻlchov vositalarini muvofiqlik tekshiruvidan oʻtkazish Ekologiya vazirligi huzuridagi Davlat ekologik sertifikatlashtirish va standartlashtirish markazi tomonidan amalga oshiriladi.
4. “Ekologik transport” tizimini samarali joriy etish doirasida quyidagi vazifalar yuklansin:
a) Ekologiya vazirligiga:
atmosfera havosi sifatini avtomatik monitoring stansiyalarini “Atmosfera havosi sifatini avtomatik monitoring stansiyalari. Umumiy texnik shartlar” Oʻzbekiston milliy standartiga muvofiq Ekologiya vazirligi tomonidan tasdiqlangan texnik talablar asosida xarid qilish, oʻrnatish, ishga tushirish va ularga texnik xizmat koʻrsatish. Bunda, atmosfera havosi sifatini avtomatik monitoring stansiyalarini xarid qilishda mahalliy ishlab chiqarilgan mahsulotlarga ustuvorlik beriladi;
ilgʻor xorijiy mutaxassis va ekspertlarni jalb etish hamda innovatsion texnologiyalarni tatbiq qilish orqali oʻzida barcha ekologik zonalar haqidagi umumlashgan maʼlumotlardan iborat mamlakatning atmosfera havosi boʻyicha dinamik elektron ekologik xaritasini shakllantirish hamda yuritib borish;
transport vositalaridan ekologik zonalar hududida foydalanish sohasidagi huquqbuzarliklarni aniqlashga qaratilgan avtomatlashtirilgan foto va video qayd etish texnika vositalarini hamda ularning dasturiy taʼminotini xarid qilish, oʻrnatish, ishga tushirish va ularga texnik xizmat koʻrsatish;
oʻz tashkiliy tuzilmasida atmosfera havosini nazorat qilish monitoring markazini hamda transport vositalaridan ekologik zonalar hududida foydalanish sohasidagi huquqbuzarliklarni rasmiylashtirish boʻyicha maʼmuriy amaliyot boʻlimini tashkil etish, shuningdek, ularni barcha zarur moddiy-texnika va dasturiy vositalar bilan taʼminlash;
b) Oʻzbekiston Respublikasi Ichki ishlar vazirligiga:
Davlat yoʻl harakati xizmati roʻyxatlash boʻlinmalarining bino va inshootlarini zamon talablariga mos ravishda yangidan qurish, qayta qurish va kapital taʼmirlash, ularning huzurida diagnostika markazlarini barpo etish, shuningdek, ularni zarur moddiy-texnika va dasturiy vositalar bilan jihozlash;
“Innovatsiya loyihalari va aholiga servis xizmatlari koʻrsatish markazi” davlat unitar korxonasi tuzilmasida transport vositalarini ekologik diagnostika tekshiruvidan oʻtkazish boʻyicha servis xizmati koʻrsatish bilan shugʻullanuvchi ekologiya operatorlar shtat birliklarini kiritish, ularni qayta tayyorlash va malakasini oshirib borish;
transport vositalarining normativlarga mosligi darajasini avtomatik baholash tizimiga asoslangan diagnostika tekshiruvi vositalarini xarid qilish, oʻrnatish, ishga tushirish va ularga texnik xizmat koʻrsatish;
ekologik stikerlar blanklarini va ularga ishlov berish boʻyicha maxsus chop etish uskunalarini xarid qilish hamda stikerlarni transport vositasi egasiga pochta orqali yetkazib berish tizimini yoʻlga qoʻyish.
5. Ekologiya vazirligi, Oʻzbekiston Respublikasi Ichki ishlar vazirligi va Transport vazirligi:
a) 2025-yil 1-aprelga qadar mazkur qaror ijrosi doirasida joriy etiladigan va amalda mavjud elektron axborot tizimlari oʻzaro integratsiya qilinishini taʼminlasin;
b) mazkur qarorning 4-bandida nazarda tutilgan chora-tadbirlarni samarali amalga oshirish uchun xususiy sektor va investitsiya mablagʻlarini jalb qilish choralarini koʻrsin;
v) 2025-yil 1-yanvarga qadar quyidagilarni nazarda tutuvchi Hukumat qarori loyihasini kiritsin:
hududlarni ulardagi atmosfera havosi bilan bogʻliq real ekologik holatdan kelib chiqib, ekologik zonalarga ajratib borish hamda ularning atmosfera havosi boʻyicha dinamik elektron ekologik xaritasini shakllantirish va yuritish tartibini;
ekologik zonalar hududida va ularga kirish joylarida aholini qulay tarzda xabardor qiluvchi belgilarni oʻrnatish hamda elektron platformalarda maʼlumotlarni joylashtirish tartibini;
transport vositalarining normativlarga mosligi darajasini aniqlash, natijasi boʻyicha ularni ekologik toifalarga ajratib borish, ekologik stikerlarning namunalari va himoya elementlarini belgilash hamda ekologik stikerlarni berish, shuningdek, transport vositalaridan tegishli ekologik zonalar hududida foydalanishni cheklash yoki taqiqlash mexanizmlarini;
ekologik kompensatsiya toʻlovlari asosida ekologik zonalar hududida vaqtinchalik foydalanish mumkin boʻlgan transport vositalari turlari roʻyxatini hamda ekologik kompensatsiya toʻlovlari miqdori va ularni undirish tartibini;
transport vositalaridan ekologik zonalar hududida foydalanish sohasidagi huquqbuzarliklarni aniqlash, maʼmuriy bayonnomalarni rasmiylashtirish, undirilgan jarima mablagʻlarini maqsadli yoʻnaltirish tartibini;
g) 2024-yil 1-dekabrga qadar ekologik toifasi hududning ekologik zonasiga muvofiq boʻlmagan transport vositalaridan ekologik zonalar hududida foydalanish tartibiga rioya etmaganlik uchun javobgarlik choralarini belgilash boʻyicha qonun loyihasini kiritsin;
d) manfaatdor vazirlik va idoralar bilan birgalikda ikki oy muddatda qonunchilik hujjatlariga mazkur qarordan kelib chiqadigan oʻzgartirish va qoʻshimchalar toʻgʻrisida takliflar kiritsin.
6. Oʻzbekiston Respublikasi Iqtisodiyot va moliya vazirligi bir oy muddatda aholiga “zararli” toifadagi transport vositalarini “toza” toifadagi transport vositalariga almashtirish uchun subsidiya berish tizimini joriy etish hamda atmosfera havosini muhofaza qilish va uning ifloslanishining oldini olishga qaratilgan zamonaviy yondashuvga asoslangan chora-tadbirlarni moliyalashtirish boʻyicha Vazirlar Mahkamasiga taklif kiritsin.
7. Qoraqalpogʻiston Respublikasi Vazirlar Kengashi, Toshkent shahar va viloyatlar hokimliklari Oʻzbekiston Respublikasi Ichki ishlar vazirligi bilan birgalikda bir oy muddatda Davlat yoʻl harakati xizmati roʻyxatlash boʻlinmalarini takomillashtirish, shu jumladan ularning quvvatlarini oshirish uchun boʻsh turgan yer uchastkalarini ajratish boʻyicha asoslantirilgan takliflarni kiritsin.
8. Ekologiya vazirligi manfaatdor vazirlik va idoralar bilan birgalikda oʻzlari qabul qilgan idoraviy hujjatlarini ikki oy muddatda ushbu qarorga muvofiqlashtirsin.
9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov, ekologiya, atrof-muhitni muhofaza qilish va iqlim oʻzgarishi vaziri A.A. Abduxakimov, ichki ishlar vaziri P.R. Bobojonov va transport vaziri I.R. Maxkamov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 29-mart,
166-son