UzbekAI

Ўзбекистон Республикаси Вазирлар Маҳкамасининг

қарори

Оилаларни мустаҳкамлаш ва хотин-қизларнинг фаоллигини ошириш бўйича қўшимча чора-тадбирлар белгиланганлиги муносабати билан Ўзбекистон Республикаси Ҳукуматининг айрим қарорларига ўзгартириш ва қўшимчалар киритиш тўғрисида

Мамлакатимизда «Аёллар дафтари» жорий қилиниб, хотин-қизларга ижтимоий-иқтисодий, тиббий, ҳуқуқий ва психологик кўмак бериш тизими йўлга қўйилди.

Шу билан бирга, хотин-қизларни қўллаб-қувватлаш борасида ижтимоий ёрдам кўрсатишнинг манзиллилигини таъминлаш, ҳақиқий ижтимоий ёрдамга муҳтож хотин-қизларни аниқлашда муайян қийинчиликлар юзага келмоқда.

Ўзбекистон Республикаси Президентининг «Оилаларни мустаҳкамлаш ва хотин-қизларнинг фаоллигини ошириш бўйича қўшимча чора-тадбирлар тўғрисида» 2023 йил 21 декабрдаги ПҚ-401-сон қарори ижросини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Ҳукуматининг иловага мувофиқ айрим қарорларига қуйидагиларни назарда тутувчи ўзгартириш ва қўшимчалар киритилсин:

Вазирлар Маҳкамасининг 2020 йил 25 мартдаги 182-сон қарори билан тасдиқланган Уй-жой сотиб олиш ёки якка тартибдаги уй-жойларни қуриш ва реконструкция қилиш учун фуқароларга субсидия тўлаш тартиби тўғрисидаги низомда никоҳи бекор қилинган оилани тўлиқсиз оила сифатида назарда тутиш;

Вазирлар Маҳкамасининг «Уй-жойга муҳтож хотин-қизларни уй-жой билан таъминлаш ҳамда Тошкент шаҳрида бошпанасиз, оғир турмуш шароитига тушиб қолган фуқароларнинг яшаш шароитларини яхшилаш чора-тадбирлари тўғрисида» 2021 йил 6 декабрдаги 737-сон қарорида уй-жойга муҳтож хотин-қизларнинг ота-онасидан ёки уларнинг биридан айрилганлигини ҳамда ёлғиз онаси ёки отаси қарамоғида вояга етганлигини Фуқаролик ҳолати далолатномаларини ёзиш органларининг маълумотномаси асосида аниқлаштириш тартибини жорий қилиш.

2. Ўзбекистон Республикаси Оила ва хотин-қизлар қўмитаси манфаатдор вазирлик ва идоралар билан биргаликда икки ой муддатда ўзлари қабул қилган норматив-ҳуқуқий ҳужжатларни ушбу қарорга мувофиқлаштирсин.

3. Мазкур қарорнинг бажарилишини назорат қилиш Ўзбекистон Республикасининг Бош вазири ўринбосари З.Б. Маҳкамова зиммасига юклансин.

Вазирлар Маҳкамасининг 2024 йил 3 апрелдаги 183-сон қарорига ИЛОВА

Ўзбекистон Республикаси Ҳукуматининг айрим ҳужжатларига киритилаётган ўзгартириш ва қўшимчалар

1. Вазирлар Маҳкамасининг 2020 йил 25 мартдаги 182-сон қарори билан тасдиқланган Уй-жой сотиб олиш ёки якка тартибдаги уй-жойларни қуриш ва реконструкция қилиш учун фуқароларга субсидия тўлаш тартиби тўғрисидаги низомнинг 2-бандида :

а) қуйидаги мазмундаги тўққизинчи хатбоши билан тўлдирилсин:

« тўлиқсиз оила — никоҳи бекор қилинган оила, турмуш ўртоғи вафот этган, бедарак йўқолган ёки ёлғиз ўзи бўла туриб, никоҳдан ўтмасдан болали бўлган ёхуд бошқа сабабларга кўра ота-оналардан бирининг ёлғиз ўзи бир ёки бир нечта болани тарбиялаётган оила»;

б) тўққизинчи — йигирма иккинчи хатбошилар ўнинчи — йигирма учинчи хатбошилар деб ҳисоблансин.

2. Вазирлар Маҳкамасининг «Уй-жойга муҳтож хотин-қизларни уй-жой билан таъминлаш ҳамда Тошкент шаҳрида бошпанасиз, оғир турмуш шароитига тушиб қолган фуқароларнинг яшаш шароитларини яхшилаш чора-тадбирлари тўғрисида» 2021 йил 6 декабрдаги 737-сон қарори 2-банди «а» кичик бандининг иккинчи хатбошиси қуйидаги таҳрирда баён қилинсин:

«туман (шаҳар)ларда ташкил этиладиган Уй-жойга муҳтож хотин-қизларни уй-жой билан таъминлашга кўмаклашиш комиссиялари томонидан нотурар жойларда истиқомат қилаётган, шунингдек, ота-онасидан ёки уларнинг биридан айрилган ҳамда ёлғиз онаси, ёлғиз отаси (Фуқаролик ҳолати далолатномаларини ёзиш органларининг маълумотномаси асосида) ёки бошқа шахслар қарамоғида бўлган вояга етган уй-жойга муҳтож хотин-қизларни (кейинги ўринларда — уй-жойга муҳтож хотин-қизлар) аниқлаш».

Ўзбекистон Республикасининг Бош вазири А. АРИПОВ

Тошкент ш.,

2024 йил 3 апрель,

183-сон

(Қонунчилик маълумотлари миллий базаси, 13.04.2024 й., 09/24/183/0273-сон)

lex.uz

Oʻzbekiston Respublikasi Vazirlar Mahkamasining

qarori

Oilalarni mustahkamlash va xotin-qizlarning faolligini oshirish boʻyicha qoʻshimcha chora-tadbirlar belgilanganligi munosabati bilan Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida

Mamlakatimizda “Ayollar daftari” joriy qilinib, xotin-qizlarga ijtimoiy-iqtisodiy, tibbiy, huquqiy va psixologik koʻmak berish tizimi yoʻlga qoʻyildi.

Shu bilan birga, xotin-qizlarni qoʻllab-quvvatlash borasida ijtimoiy yordam koʻrsatishning manzilliligini taʼminlash, haqiqiy ijtimoiy yordamga muhtoj xotin-qizlarni aniqlashda muayyan qiyinchiliklar yuzaga kelmoqda.

Oʻzbekiston Respublikasi Prezidentining “Oilalarni mustahkamlash va xotin-qizlarning faolligini oshirish boʻyicha qoʻshimcha chora-tadbirlar toʻgʻrisida” 2023-yil 21-dekabrdagi PQ-401-son qarori ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Hukumatining ilovaga muvofiq ayrim qarorlariga quyidagilarni nazarda tutuvchi oʻzgartirish va qoʻshimchalar kiritilsin:

Vazirlar Mahkamasining 2020-yil 25-martdagi 182-son qarori bilan tasdiqlangan Uy-joy sotib olish yoki yakka tartibdagi uy-joylarni qurish va rekonstruksiya qilish uchun fuqarolarga subsidiya toʻlash tartibi toʻgʻrisidagi nizomda nikohi bekor qilingan oilani toʻliqsiz oila sifatida nazarda tutish;

Vazirlar Mahkamasining “Uy-joyga muhtoj xotin-qizlarni uy-joy bilan taʼminlash hamda Toshkent shahrida boshpanasiz, ogʻir turmush sharoitiga tushib qolgan fuqarolarning yashash sharoitlarini yaxshilash chora-tadbirlari toʻgʻrisida” 2021-yil 6-dekabrdagi 737-son qarorida uy-joyga muhtoj xotin-qizlarning ota-onasidan yoki ularning biridan ayrilganligini hamda yolgʻiz onasi yoki otasi qaramogʻida voyaga yetganligini Fuqarolik holati dalolatnomalarini yozish organlarining maʼlumotnomasi asosida aniqlashtirish tartibini joriy qilish.

2. Oʻzbekiston Respublikasi Oila va xotin-qizlar qoʻmitasi manfaatdor vazirlik va idoralar bilan birgalikda ikki oy muddatda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.

3. Mazkur qarorning bajarilishini nazorat qilish Oʻzbekiston Respublikasining Bosh vaziri oʻrinbosari Z.B. Mahkamova zimmasiga yuklansin.

Vazirlar Mahkamasining 2024-yil 3-apreldagi 183-son qaroriga ILOVA

Oʻzbekiston Respublikasi Hukumatining ayrim hujjatlariga kiritilayotgan oʻzgartirish va qoʻshimchalar

1. Vazirlar Mahkamasining 2020-yil 25-martdagi 182-son qarori bilan tasdiqlangan Uy-joy sotib olish yoki yakka tartibdagi uy-joylarni qurish va rekonstruksiya qilish uchun fuqarolarga subsidiya toʻlash tartibi toʻgʻrisidagi nizomning 2-bandida :

a) quyidagi mazmundagi toʻqqizinchi xatboshi bilan toʻldirilsin:

“ toʻliqsiz oila — nikohi bekor qilingan oila, turmush oʻrtogʻi vafot etgan, bedarak yoʻqolgan yoki yolgʻiz oʻzi boʻla turib, nikohdan oʻtmasdan bolali boʻlgan yoxud boshqa sabablarga koʻra ota-onalardan birining yolgʻiz oʻzi bir yoki bir nechta bolani tarbiyalayotgan oila”;

b) toʻqqizinchi — yigirma ikkinchi xatboshilar oʻninchi — yigirma uchinchi xatboshilar deb hisoblansin.

2. Vazirlar Mahkamasining “Uy-joyga muhtoj xotin-qizlarni uy-joy bilan taʼminlash hamda Toshkent shahrida boshpanasiz, ogʻir turmush sharoitiga tushib qolgan fuqarolarning yashash sharoitlarini yaxshilash chora-tadbirlari toʻgʻrisida” 2021-yil 6-dekabrdagi 737-son qarori 2-bandi “a” kichik bandining ikkinchi xatboshisi quyidagi tahrirda bayon qilinsin:

“tuman (shahar)larda tashkil etiladigan Uy-joyga muhtoj xotin-qizlarni uy-joy bilan taʼminlashga koʻmaklashish komissiyalari tomonidan noturar joylarda istiqomat qilayotgan, shuningdek, ota-onasidan yoki ularning biridan ayrilgan hamda yolgʻiz onasi, yolgʻiz otasi (Fuqarolik holati dalolatnomalarini yozish organlarining maʼlumotnomasi asosida) yoki boshqa shaxslar qaramogʻida boʻlgan voyaga yetgan uy-joyga muhtoj xotin-qizlarni (keyingi oʻrinlarda — uy-joyga muhtoj xotin-qizlar) aniqlash”.

Oʻzbekiston Respublikasining Bosh vaziri A. ARIPOV

Toshkent sh.,

2024-yil 3-aprel,

183-son

(Qonunchilik maʼlumotlari milliy bazasi, 13.04.2024-y., 09/24/183/0273-son)

lex.uz