📅 2024-yil 18-aprel · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 18 апрель · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 18 апреля 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 18 April 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
СХЕМАСИ
Ўзбекистон Республикаси Қуролли Кучлари таркибига кирадиган вазирлик ва идораларда ҳаммом-кирхона хизматларини аутсорсинг шартлари асосида кўрсатишни ташкил этиш чора-тадбирлари тўғрисида
Ўзбекистон Республикаси Қуролли Кучлари таркибига кирадиган вазирлик ва идораларда ҳаммом-кирхона хизматларини аутсорсинг шартлари асосида кўрсатишни ташкил этиш, ушбу мақсадлар учун Ўзбекистон Республикасининг Давлат бюджетидан ажратиладиган маблағларни мақбуллаштириш мақсадида Вазирлар Маҳкамаси қарор қилади:
1. Белгилансинки:
Ўзбекистон Республикаси Мудофаа вазирлиги, Ички ишлар вазирлиги, Фавқулодда вазиятлар вазирлиги, Миллий гвардияси ва Ўзбекистон Республикаси Президенти давлат хавфсизлик хизматида (кейинги ўринларда — Қуролли Кучлар таркибига кирадиган вазирлик ва идоралар) ходимлар сони ва харажатларни мақбуллаштириш ҳамда ташиш ва етказиб бериш сифатини яхшилаш имконини берадиган аутсорсинг шартлари асосида ҳаммом-кирхона хизматларини кўрсатиш жорий этилади;
кўрсатилган хизматлар таннархи аутсорсернинг барча харажатларини, шу жумладан, ходимларнинг иш ҳақи, солиқлар, транспорт харажатлари, коммунал хизматлар учун тўловлар ва бошқаларни ўз ичига олган ҳолда 20 фоизгача устама қўшиб ҳисобланади. Бунда ёпиқ ҳарбий шаҳарчаларда ҳаммом-кирхона хизматларини кўрсатиш нархлари тегишли ҳудуддаги мавжуд нархлардан оширилмаслиги лозим;
дала шароитларида ва фавқулодда вазиятларда транспорт харажатлари аутсорсерларга ҳаммом-кирхона хизмати қийматининг 2 фоизи миқдорида қопланади;
ҳаммом-кирхона хизматини кўрсатиш нархлари ўзгарган тақдирда, аутсорсерларни танлаб олиш баённомасига тегишли ўзгартиришлар киритилади.
2. Қуйидагиларни назарда тутувчи Ўзбекистон Республикаси Қуролли Кучлари таркибига кирадиган вазирлик ва идораларда ҳаммом-кирхона хизматларини аутсорсинг шартлари асосида кўрсатиш тартиби тўғрисидаги низом 1-иловага мувофиқ тасдиқлансин:
Қуролли Кучлар таркибига кирадиган вазирлик ва идораларда фаолият кўрсатувчи аутсорсерлар ва уларнинг ходимларига қўйиладиган талаблар;
аутсорсинг тизимида нархларни шакллантириш ва шартномаларни тузиш ҳамда аутсорсинг шартларида шахсий таркибга ҳаммом-кирхона хизматларини кўрсатиш тартиби;
ҳаммом-кирхона хизматлари кўрсатилишини назорат қилиш тартиби;
аутсорсерларга вақтинча фойдаланиш учун берилган объектлар ва моддий-техника воситаларидан фойдаланиш тартиби.
3. Ўзбекистон Республикаси Ҳукуматининг 2-иловага мувофиқ айрим қарорларига ўзгартиришлар ва қўшимча киритилсин.
4. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров, Ўзбекистон Республикаси Миллий гвардияси қўмондони Р.М. Джураев, мудофаа вазири Б.Н. Курбанов, ички ишлар вазири П.Р. Бобожонов, фавқулодда вазиятлар вазири А.Х. Қўлдошев ҳамда Ўзбекистон Республикаси Президенти давлат хавфсизлик хизмати раиси А.А. Усманов зиммасига юклансин.
Вазирлар Маҳкамасининг 2024 йил 18 апрелдаги 217-сон қарорига 1-ИЛОВА
Ўзбекистон Республикаси Қуролли Кучлари таркибига кирадиган вазирлик ва идораларда ҳаммом-кирхона хизматларини аутсорсинг шартлари асосида кўрсатиш тартиби тўғрисида
1-боб. Умумий қоидалар
1. Ушбу Низом Ўзбекистон Республикаси Мудофаа вазирлиги, Ички ишлар вазирлиги, Фавқулодда вазиятлар вазирлиги, Миллий гвардияси, Ўзбекистон Республикаси Президенти давлат хавфсизлик хизмати (кейинги ўринларда — вазирлик ва идоралар) тизимидаги муддатли ва контракт бўйича ҳарбий хизматчилар, резерв ва захирадаги ҳарбий хизматга мажбурлар, сафарбарлик чақируви резерви хизматчилари, ходимлар, курсантлар, тингловчилар, ўқувчилар, болалар соғломлаштириш оромгоҳлари дам олувчилари, тиббиёт муассасаларида даволанаётганлар (кейинги ўринларда — шахсий таркиб), шунингдек, жазони ижро этиш муассасаларида жазо муддатини ўтаётган маҳкумлар, тергов ҳибсхоналарида ва вақтинча сақлаш ҳибсхоналарида сақланаётган шахслар, вояга етмаганларга ижтимоий-ҳуқуқий ёрдам кўрсатиш марказларига қабул қилинган болаларга (кейинги ўринларда — алоҳида тоифадаги шахслар) ҳаммом-кирхона хизматларини аутсорсинг шартлари асосида кўрсатиш тартибини белгилайди.
2. Ушбу Низомда қуйидаги асосий тушунчалардан фойдаланилади:
аутсорсинг — шахсий таркиб ва алоҳида тоифадаги шахсларга кўрсатиладиган ҳаммом-кирхона хизматларини шартнома асосида тадбиркорлик субъектига ўтказиш;
аутсорсер — вазирлик ва идоралар бўлинмалари, қўшинлари, ҳарбий тузилмалари ва муассасаларига (кейинги ўринларда — вазирлик ва идоралар бўлинмалари) шартнома асосида ҳаммом-кирхона хизматларини кўрсатувчи тадбиркорлик субъекти;
буюртмачи — вазирлик ва идоралар;
талабгор — вазирлик ва идоралар бўлинмаларига аутсорсинг асосида хизмат кўрсатиш ҳамда ушбу Низомга мувофиқ танлашда иштирок этиш истагини билдирган тадбиркорлик субъекти.
3. Буюртмачи хизматларини аутсорсингга ўтказишда қуйидаги шартларга риоя қилиши шарт:
аутсорсерни қонунчилик ҳужжатлари асосида танлаб олиш ҳамда унга ўтказиладиган хизматлар сифатини ошириш;
буюртмачининг аутсорсерга ўтказиладиган хизматларни бажариш билан банд бўлган ходимлар сонини (штатини) қисқартириш;
аутсорсерга ўтказиладиган хизматларнинг иқтисодий самарадорлигини ошириш ва хўжалик фаолияти харажатларини қисқартириш.
4. Аутсорсернинг (меҳнат шартномаси асосида фаолият юритувчи) ходимлари вазирлик ва идоралар бўлинмаларига тегишли ҳудудга белгиланган тартибда олдиндан тақдим этилган рўйхат асосида киришига рухсат берилади. Бунда аутсорсер ҳаммом-кирхона хизматларини кўрсатувчи ишчилари ҳақидаги маълумотларни вазирлик ва идораларнинг бўлинмаларига тақдим этади. Ушбу маълумотлар вазирлик ва идораларнинг ички идоравий ҳужжатлари талабларига мувофиқ белгиланган тартибда ўрганилгандан сўнг уларнинг натижасига кўра ишчиларга тегишли ҳудудда хизмат кўрсатишига рухсат берилади.
5. Аутсорсинг хизматини кўрсатиш жараёнида махфийлик режимига риоя этиш вазирлик ва идоралар бўлинмалари томонидан таъминланади.
Аутсорсер ҳаммом-кирхона хизматларини кўрсатиш даврида ўзларига маълум бўлган давлат сирлари ва қонунчиликка мувофиқ фойдаланиш чекланган маълумотларни тарқатмаслик учун жавобгар ҳисобланади.
6. Ҳаммом-кирхона хизматлари вазирлик ва идоралар бўлинмаларида шартнома асосида жалб қилинган аутсорсер томонидан кўрсатилади.
7. Шартнома имзоланганидан сўнг вазирлик ва идоралар бўлинмаларга тегишли кирхоналарда аутсорсер томонидан давлат стандартлари ва техник тартибга солиш соҳасидаги норматив ҳужжатларга мувофиқ камида бир ойлик сарфланадиган кир ювиш кукуни захираси шакллантирилади ва сақланади.
8. Ҳаммом-кирхона хизматларини кўрсатиш учун маблағларга бўлган ҳар йиллик эҳтиёжни аниқлаш ҳамда уларни олиш белгиланган тартибда режалаштирилаётган молия йилида бажариладиган ишлар (кўрсатиладиган хизматлар) ҳажми ва нархидан келиб чиққан ҳолда амалга оширилади.
Кўрсатилган ҳаммом-кирхона хизматлари учун ҳисоб-китоблар мазкур Низомнинг 26 - 27-бандлари талаблари асосида амалга оширилади.
9. Ҳаммом-кирхона ишлари учун харажатлар (аутсорсернинг устама ҳақини қўшиб ҳисоблаганда) Ўзбекистон Республикасининг Давлат бюджети, бюджетдан ташқари маблағлар, объектларни қўриқлаш бўйича кўрсатиладиган хизматлардан тушадиган маблағлар, шунингдек, Сафарбарлик чақируви резерви бўлинмалари учун Мудофаа вазирлигининг «Сафарбарлик чақируви резерви маблағлари» махсус ҳисобварағи маблағлари ҳисобидан амалга оширилади.
10. Кўрсатилаётган ҳаммом-кирхона хизматларининг сифати ва нархлари вазирлик ва идоралар томонидан ўрганиб борилади.
2-боб. Танлаш комиссияси фаолиятини ташкил этиш
11. Ҳаммом-кирхона хизматларини кўрсатиш учун талабгорларни танлаш мақсадида буюртмачи (Ўзбекистон Республикаси Президенти давлат хавфсизлик хизматининг тегишли бўлинмаси) раҳбарининг қарори билан тоқ сонли ва камида беш нафар аъзодан иборат таркибда танлаш комиссияси (кейинги ўринларда — Комиссия), шунингдек, зарур ҳолларда, ишчи орган тузилади.
12. Комиссиянинг ҳар бир аъзоси Комиссия қарорини қабул қилишда ёқлаб овоз бериши, қарши овоз бериши ёки унда иштирок этишдан бош тортиши мумкин. Комиссия раиси овоз беришда иштирок этишдан бош тортиш ҳуқуқига эга эмас.
Комиссия аъзоси қарши овоз берганда, ўзининг қарори юзасидан шарҳ бериши мумкин ва ушбу шарҳ баённомада қайд этилади.
13. Қарор Комиссия аъзолари умумий сонининг кўпчилик овози билан қабул қилинади. Агар мажлисда Комиссия аъзолари умумий сонининг камида учдан икки қисми ҳозир бўлса, Комиссия ваколатли ҳисобланади.
3-боб. Аутсорсерни танлаш, шартнома тузиш ва ҳисоб-китобларни амалга ошириш тартиби
14. Вазирлик ва идоралар бўлинмаларида ҳаммом-кирхона хизматларини кўрсатиш аутсорсинг асосида мазкур Низомга иловадаги схемага мувофиқ ташкил этилади.
15. Аутсорсерга нисбатан қуйидаги талаблар қўйилади:
буюртмачи томонидан белгиланган мезонларга мувофиқ шартномани бажариш учун зарур кадрлар, техник, моддий ва бошқа ресурслар мавжудлиги;
аутсорсинг хизмати бўйича камида уч ойлик шартнома суммасига тенг айланма маблағларга эга бўлиши;
солиқлар ва йиғимларни тўлаш бўйича муддати ўтган қарздорликнинг мавжуд эмаслиги;
қайта ташкил этиш ёки тугатилиш босқичида бўлмаслиги;
ўзига нисбатан банкротлик тартиб-таомиллари жорий этилмаганлиги;
инсофсиз ижрочиларнинг ягона реестрида қайд этилмаганлиги;
буюртмачи билан суд, шу жумладан ҳакамлик суди ёки халқаро тижорат арбитраж суди муҳокамаси ҳолатида бўлмаслиги.
16. Буюртмачи аутсорсерни танлаш бўйича таклифларни қабул қилиш муддати тугайдиган санадан камида беш иш куни аввал махсус ахборот порталига аутсорсерни танлаш тўғрисида эълон жойлаштиради.
17. Талабгорлар танловда иштирок этиши учун қуйидаги ҳужжатларни тақдим этадилар:
Комиссия раиси номига танловда иштирок этиш учун ариза;
ушбу Низомнинг 15-бандида назарда тутилган талабларга мувофиқлиги тўғрисида ваколатли органларнинг маълумотномалари.
18. Талабгорлар қуйидаги ҳолларда танлашда иштирок этишига йўл қўйилмайди:
ушбу Низомнинг 17-бандида кўрсатилган ҳужжатларни белгиланган муддатларда ва тўлиқ тақдим этмаган бўлса;
нотўғри маълумотни тақдим этган бўлса.
19. Комиссия заруратга кўра тегишли ҳудуддаги талабгорлар рўйхатини ва ҳаммом-кирхона хизматларини кўрсатиш бўйича мавжуд ўртача нархлар тўғрисида маълумот олиш учун тегишлича Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларига талабнома тақдим этади.
20. Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари буюртмачининг талабномаси асосида ўн иш кунида тегишли ҳудуддаги талабгорларнинг рўйхати ҳамда ҳаммом-кирхона хизматларини кўрсатиш бўйича мавжуд ўртача нархлар тўғрисидаги таклифларни шакллантиради ва Комиссияга тақдим этади.
21. Комиссия:
тақдим этилган ва махсус ахборот портали орқали келиб тушган таклифларни ўрганиб чиқади ҳамда энг яхши таклифларни ўн иш кунида танлаб олади. Бунда талабгорларнинг ҳаммом-кирхона хизматларини кўрсатиш соҳасидаги тажрибаси, молиявий, моддий-техник ва логистик базаси, ҳаммом-кирхоналар ҳолатини яхшилашга тайёрлиги, шунингдек, ҳаммом-кирхона хизматларини арзонлаштирилган нархларда кўрсатиш имкониятлари инобатга олинади;
уч иш кунида танлаб олинган таклифлар орасидан ғолибни аниқлайди ҳамда бу ҳақида баённома расмийлаштиради;
бир иш кунида баённомадан кўчирмани вазирлик ва идораларнинг бўлинмаларига юборади.
22. Вазирлик ва идоралар бўлинмаларининг командирлари (бошлиқлари) уч иш кунида:
аутсорсер билан бир молия йили учун амал қилиш муддати 31 декабргача бўлган шартнома тузади ва ҳудудий ғазначилик органида рўйхатдан ўтказади;
аутсорсерга тегишли бино ва моддий-техника воситаларини вақтинча фойдаланиш учун топширади.
23. Молия йили охирида амалдаги аутсорсерни алмаштиришга зарурат бўлмаса, Комиссия томонидан тасдиқланган нарх ва буюртмачининг харажатлар сметасида ажратилган маблағлар доирасида томонларнинг келишувига кўра ва Комиссия йиғилиш баённомаси билан шартнома муддати навбатдаги молия йили учун узайтирилиши мумкин.
Ҳаммом-кирхона хизматларини кўрсатиш нархлари ўзгарган тақдирда, вазирлик ва идораларнинг бўлинмалари командирлари (бошлиқлари) баённомага ўзгартириш киритиш масаласини кўриб чиқиш учун тегишли ҳудуддаги амалдаги нархларни ўрганиб чиқиш далолатномаси илова қилинган таклифларни Комиссияга белгиланган тартибда юборади.
24. Молия йили охирида амалдаги аутсорсерни алмаштириш ёки алмаштирмаслик вазирлик ва идоралар кийим-кечак таъминоти марказий органлари, шунингдек, Ўзбекистон Республикаси Президенти давлат хавфсизлик хизматининг тегишли бўлинма раҳбарларининг қарори билан белгиланади.
Бунда аутсорсернинг ўтган даврдаги фаолияти натижалари, йўл қўйган хато ва камчиликлари, ҳаммом-кирхона хизматларини кўрсатиш бўйича имзоланган шартнома шартларининг бажарилиши инобатга олинади.
25. Қуйидагилар аутсорсерни алмаштириш заруратини келтириб чиқарувчи ҳолатлар ҳисобланади:
шартнома шартлари лозим даражада бажармаганлиги;
кийим-кечакка ишлов бериш технологик жараёни доимий равишда бузилганлиги;
ҳаммом-кирхона хизматларини кўрсатишнинг сифати буюртмачи томонидан белгиланган талабларга жавоб бермаганда;
ҳаммом-кирхона объектларида санитария қоидалари, нормалари ва гигиена нормативлари талабларига риоя этилмаганлиги;
техника ва ёнғин хавфсизлиги қоидаларига риоя этмаганлиги;
аутсорсерга нисбатан тугатиш ёки банкротлик тартиб-таомили жорий этилганлиги.
26. Аутсорсер ҳар ойнинг 3-санасига қадар буюртмачи билан ўзаро ҳисоб-китобларни амалга ошириш учун кўрсатилган хизматларнинг юк хатини (ҳисоб-варақасини) тақдим этади. Кўрсатилган хизматларнинг таннархи аутсорсернинг барча харажатларини, шу жумладан, ходимларнинг иш ҳақи, солиқлар, транспорт харажатлари, коммунал хизматлар учун тўловлар ва бошқаларни ўз ичига олган ҳолда 20 фоизгача устама қўшиб ҳисобланади. Бунда ёпиқ ҳарбий шаҳарчаларда ҳаммом-кирхона хизматларини кўрсатиш нархлари тегишли ҳудуддаги мавжуд нархлардан оширилмаслиги лозим.
Кўрсатилган хизматлар учун ҳисоб-варақаларнинг тўғри расмийлаштирилиши ва хизматлар нархларининг тўғри кўрсатилиши учун жавобгарлик аутсорсер зиммасига юкланади.
27. Аутсорсер билан ҳисоб-китоблар хизмат кўрсатиш жадвалида назарда тутилган ойлик сумманинг шартномадаги умумий қийматидан келиб чиққан ҳолда, амалда кўрсатилган хизматлар учун ҳисоб-фактура ва белгиланган тартибда расмийлаштирилган далолатнома асосида ҳар ойнинг 10-санасига қадар аутсорсернинг банк ҳисобварағига маблағларни ўтказиш орқали амалга оширилади.
28. Ҳаммом-кирхона хизматларини кўрсатиш учун аутсорсер томонидан фойдаланиладиган коммунал хизматлар қиймати аутсорсернинг ўз маблағлари ҳисобидан қопланади.
4-боб. Ҳаммом-кирхона хизматларини кўрсатишни ташкил этиш
29. Ҳаммом-кирхона хизматларини кўрсатишни ташкил этиш вазифаси вазирлик ва идораларнинг бўлинмалари командирларининг (бошлиқларининг) зиммасига юкланади.
30. Шахсий таркиб ва алоҳида тоифадаги шахсларга ҳаммом хизмати ҳафтасига камида икки марта кўрсатилади, ҳафтасига бир марта ички кийимлар, ётоқ чойшаблари ва сочиқлар тўлиқ алмаштирилади.
31. Кирхонада кийим-кечакларга ишлов бериш технологик жараёни қабул қилиш, ажратиш, ювиш, сиқиш, қуритиш, дазмоллаш ва буюртмачига тарқатишдан иборат.
32. Кирхонада кийим-кечаклар ранги, мато тури ва кирлик даражасига қараб ажратилади.
5-боб. Ҳаммом-кирхона хизматларини кўрсатишда санитария қоидалари, нормалари ва гигиена нормативларига риоя этилишини назорат қилиш тартиби
33. Ҳаммом-кирхона хизматларини кўрсатишда аутсорсерлар томонидан белгиланган талабларга тўлиқ амал қилиниши, нархларга риоя этилиши ва ҳисоб-китоблар ўз вақтида амалга оширилиши вазирлик ва идоралар бўлинмалари командирларининг (бошлиқларининг) тегишли ўринбосари (бундай лавозим назарда тутилмаган ҳолларда ушбу вазифа юкланган масъул шахслар) томонидан доимий назорат қилинади.
34. Ҳаммом-кирхона хизматларининг санитария назорати вазирлик ва идоралар бўлинмаларининг тиббиёт хизмати томонидан амалга оширилади. Бунда ҳаммом-кирхона объектларининг санитария ҳолати, шахсий таркиб ва алоҳида тоифадаги шахсларнинг чўмилиши, ички кийим ва чойшаблар доимий равишда алмаштирилиши, кийим-кечаклар ювилиши сифати, ҳаммом-кирхона корхона ишчиларининг тиббий кўрикдан ўтиш доимийлиги ва тўлиқлиги текширилади.
35. Ҳаммом-кирхона хизматларини кўрсатувчи ишчилар белгиланган тартибда ва муддатда тиббий кўрикдан ўтгандан сўнг ишлашга рухсат берилади.
36. Ҳаммом-кирхона хизматларини кўрсатувчи ишчилар вазирлик ва идоралар ҳарбий-даволаш муассасасида тиббий кўрикдан ўтаётганда, ҳарбий-тиббий муассаса томонидан сарфланган тиббий воситаларнинг қиймати аутсорсер томонидан тўланади.
37. Ҳаммом-кирхона хизматларини кўрсатувчи ишчиларнинг тиббий кўрикдан ўтишини назорат қилиш аутсорсер, вазирлик ва идораларнинг бўлинмалари командирлари (бошлиқлари) ҳамда тиббиёт хизмати бошлиғи зиммасига юкланади.
38. Ҳаммомдаги сувнинг сифати ичимлик сувига қўйиладиган давлат стандарти талабларига мос келиши зарур.
6-боб. Вазирлик ва идораларнинг бўлинмалари ҳудудида аутсорсерларга вақтинча фойдаланиш учун берилган объектлар ва моддий-техника воситаларидан фойдаланиш тартиби
39. Аутсорсерга ҳаммом-кирхона объектлари (бино, иншоот, хона, ускуна ва бошқалар) ҳамда улардаги моддий-техника воситалари (жиҳозлар, мебеллар, ўлчов воситалари, ёнғинни аниқлаш, хабар бериш ва ўчириш тизимлари ва воситалари ҳамда бошқа мулклар) давлат мулкидан текин фойдаланиш шартномаси асосида белгиланган тартибда далолатнома тузилган ҳолда вақтинча фойдаланиш учун берилади.
40. Аутсорсинг хизматлари кўрсатилиши учун зарур шарт-шароитлар ва моддий-техник базага эга бўлмаган вазирлик ва идораларнинг бўлинмаларига аутсорсерларга тегишли ҳаммом-кирхона объектлари ҳамда моддий-техника воситаларидан фойдаланган ҳолда хизмат кўрсатилишига рухсат этилади. Бунда ёпиқ ҳарбий шаҳарчаларда ҳаммом-кирхона хизматларини кўрсатиш нархлари тегишли ҳудуддаги нархлардан ошиб кетмаслиги керак.
41. Аутсорсерга вақтинча фойдаланишга топширилган объектларда (бино, иншоот, хона ва бошқалар) ёнғин хавфсизлигини таъминлаш ҳамда хизмат кўрсатувчи ходимлар томонидан ёнғин ва техника хавфсизлиги талабларига риоя этилишини назорат қилиш аутсорсер, вазирлик ва идораларнинг бўлинмалари командирлари (бошлиқлари) ва унинг моддий таъминот бўйича ўринбосари (бундай лавозимлар назарда тутилмаган ҳолларда ушбу вазифа юкланган масъул шахслар) зиммасига юкланади.
42. Аутсорсерга вақтинча фойдаланиш учун бериладиган объектлар ва моддий-техника воситаларининг сони, тоифаси ва тўлиқлиги бўйича ҳисоби вазирлик ва идоралар бўлинмаларининг тегишли хизмати томонидан юритилади.
43. Аутсорсерга вақтинча фойдаланиш учун берилган ўлчов воситаларини қиёслашдан ўтказиш бўйича хизмат кўрсатиш ва уларни таъмирлаш аутсорсернинг маблағлари ҳисобидан амалга оширилади.
44. Ҳаммом-кирхона хизматларини моддий-техник таъминлаш вазирлик ва идораларнинг тегишли органлари орқали ҳар йили мақсадли равишда ажратиладиган бюджет маблағлари ва қонунчиликда тақиқланмаган бошқа манбалар ҳисобидан амалга оширилади.
45. Фойдаланиш муддатларини ўтаб бўлган ва яроқсиз ҳолатга келган моддий-техника воситалари белгиланган тартибда ҳисобдан чиқарилади.
46. Аутсорсерга вақтинча фойдаланиш учун берилган, белгиланган фойдаланиш муддатларини ўтаб бўлмасдан яроқсиз ҳолатга келган моддий-техника воситалари аутсорсернинг маблағлари ҳисобидан тикланади.
47. Ҳаммом-кирхона объектларини қуриш, мавжудларини кенгайтириш, қайта жиҳозлаш ҳамда капитал таъмирлаш вазирлик ва идораларнинг марказий органлари томонидан ҳар йили мақсадли равишда ажратиладиган бюджет маблағлари ва қонунчиликда тақиқланмаган бошқа манбалар ҳисобидан амалга оширилади. Бунда ҳаммом-кирхона объектларини жорий таъмирлаш ишлари аутсорсернинг маблағлари ҳисобидан амалга оширилади.
7-боб. Якунловчи қоидалар
48. Мазкур Низом талабларининг бузилиши томонлар ўртасида тузилган шартномани белгиланган тартибда бекор қилиш учун асос бўлиши мумкин.
49. Ушбу Низом билан тартибга солинмаган аутсорсинг шартлари қонунчилик ҳужжатларига мувофиқ ҳал этилади.
50. Мазкур Низом талаблари бузилишида айбдор бўлган шахслар қонунчилик ҳужжатларига мувофиқ жавоб берадилар.
Ўзбекистон Республикаси Қуролли Кучлари таркибига кирадиган вазирлик ва идораларда ҳаммом-кирхона хизматларини аутсорсинг шартлари асосида кўрсатиш тартиби тўғрисидаги низомга ИЛОВА
Ўзбекистон Республикаси Қуролли Кучлари таркибига кирадиган вазирлик ва идораларда ҳаммом-кирхона хизматларини кўрсатишни аутсорсинг асосида ташкил этиш
Босқичлар Субъект Тадбирлар Муддатлар Аутсорсерни танлаш тартиби I босқич Мудофаа вазирлиги, Ички ишлар вазирлиги, Фавқулодда вазиятлар вазирлиги, Миллий гвардия, Ўзбекистон Республикаси Президенти давлат хавфсизлик хизмати (кейинги ўринларда — вазирлик ва идоралар Ҳаммом-кирхона хизматларини кўрсатиш бўйича аутсорсерларни танлаш тўғрисида махсус ахборот порталига эълон жойлаштиради. Таклифларни қабул қилиш муддати тугайдиган санадан камида беш иш куни аввал II босқич Вазирлик ва идоралар ҳузуридаги Комиссия (кейинги ўринларда — Комиссия) Талабгор ташкилотлар рўйхати ва ҳаммом-кирхона хизматларини кўрсатиш бўйича тегишли ҳудуддаги ўртача нархлар тўғрисида маълумот олиш учун Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликларига талабномаларни тақдим этади. Заруратга кўра III босқич Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари Талабгорларнинг рўйхати ва тегишли ҳудуддаги ўртача нархлар тўғрисидаги таклифларни шакллантиради ва Комиссияга тақдим этади. Талабнома тақдим этилгандан бошлаб ўн иш кунида IV босқич Комиссия 1. Тақдим этилган ва махсус ахборот портали орқали келиб тушган таклифларни ўрганиб чиқади ва энг яхши таклифларни танлаб олади. Ўн иш кунида 2. Ғолибни аниқлаш ва баённомани расмийлаштиради. Уч иш кунида 3. Баённомадан кўчирмани вазирлик ва идораларнинг бўлинмаларига юборади. Бир иш кунида V босқич Вазирлик ва идораларнинг бўлинмалари командирлари (бошлиқлари 1. Аутсорсерлар билан бир молия йили учун амал қилиш муддати 31 декабргача бўлган шартномалар тузади ва ҳудудий ғазначилик органларида рўйхатдан ўтказади. 2. Аутсорсерларга тегишли бинолар ва моддий-техника воситаларини вақтинча фойдаланиш учун шартнома асосида топширади. Уч иш кунида Аутсорсер билан ҳисоб-китоб қилиш тартиби VI босқич Аутсорсер 1. Кўрсатилган хизматларнинг асосланган ҳужжатларини расмийлаштиради. 2. Вазирлик ва идораларнинг бўлинмалари билан ўзаро ҳисоб-китоб қилиш учун амалда кўрсатилган хизматлар ҳисоб-фактурасини (бажарилган ишлар далолатномасини ) тақдим этади. Ҳар ойнинг 3-санасигача VII босқич Вазирлик ва идораларнинг бўлинмалари командирлари (бошлиқлари) Ҳисоб-варақа ва далолатнома асосида аутсорсернинг банк ҳисобварағига маблағларни ўтказади. Ҳар ойда жорий ойнинг 10-санасигача
Вазирлар Маҳкамасининг 2024 йил 18 апрелдаги 217-сон қарорига 2-ИЛОВА
Ўзбекистон Республикаси Ҳукуматининг айрим қарорларига киритилаётган ўзгартиришлар ва қўшимча
1. Вазирлар Маҳкамасининг «Ўзбекистон Республикаси Ягона авиация қидирув-қутқарув хизмати тўғрисидаги низомни тасдиқлаш ҳақида» 2015 йил 3 апрелдаги 80-сон қарорининг рус тилидаги матнида:
1-илованинг 9-банди биринчи хатбошисидаги «заместитель Министра обороны — » сўзлари чиқариб ташлансин;
3-илованинг биринчи хатбошисидаги «заместитель Министра обороны — » сўзлари чиқариб ташлансин.
3. Вазирлар Маҳкамасининг «Ўзбекистон Республикасида учувчисиз учадиган аппаратлардан фойдаланишни тартибга солиш бўйича қўшимча чора-тадбирлар тўғрисида» 2022 йил 15 ноябрдаги 658-сон қарорида :
а) 1-иловага 6-илованинг 8 — 10-бандларидаги «ҳаво ҳужумига қарши мудофаа» сўзлари «ҳаво ҳужумидан мудофаа» сўзлари билан алмаштирилсин;
б) 3-иловада :
3-банднинг ўнинчи хатбошисидаги «ҳаво ҳужумига қарши мудофаа» сўзлари «ҳаво ҳужумидан мудофаа» сўзлари билан алмаштирилсин;
9-банднинг биринчи хатбошисида :
биринчи жумладаги «Ўзбекистон Республикаси мудофаа вазирининг ўринбосари — Ҳаво ҳужумига қарши мудофаа қўшинлари ва ҳарбий-ҳаво кучлари қўмондони» сўзлари «Ҳаво ҳужумидан мудофаа қўшинлари ва ҳарбий-ҳаво кучлари қўмондони» сўзлари билан алмаштирилсин;
иккинчи жумладаги «Ҳаво ҳужумига қарши мудофаа» сўзлари «Ҳаво ҳужумидан мудофаа» сўзлари билан алмаштирилсин;
11-банднинг учинчи хатбошисидаги , 27-банддаги ва 29-банднинг биринчи хатбошисидаги «Ҳаво ҳужумига қарши мудофаа» сўзлари «Ҳаво ҳужумидан мудофаа» сўзлари билан алмаштирилсин.
4. Вазирлар Маҳкамасининг 2022 йил 17 ноябрдаги 660-сон қарори билан тасдиқланган Фуқаро ҳаво кемалари билан содир бўлган авиация ҳодисаларини Ўзбекистон Республикасида текшириш қоидалари 17-бандининг биринчи хатбошисидаги «Ҳаво ҳужумига қарши мудофаа» сўзлари «Ҳаво ҳужумидан мудофаа» сўзлари билан алмаштирилсин.
5. Вазирлар Маҳкамасининг «Жаҳон иқтисодиёти ва дипломатия университети ҳузуридаги дипломатик академияда дипломатик лавозимларга тайинланадиган номзодларни ўқитиш, шунингдек, айрим лавозимдаги мутахассисларни қайта тайёрлаш ва уларнинг малакасини ошириш тизимини жорий этиш чора-тадбирлари тўғрисида» 2023 йил 10 январдаги 8-сон қарорининг 1-банди қуйидаги мазмундаги иккинчи хатбоши билан тўлдирилсин:
«Академия юридик шахс мақомига эга бўлган давлат олий таълим муассасаси ҳисобланади».
Ўзбекистон Республикасининг Бош вазири А. АРИПОВ
Тошкент ш.,
2024 йил 18 апрель,
217-сон
Oʻzbekiston Respublikasi Vazirlar Mahkamasining
qarori
NIZOM
SXEMASI
Oʻzbekiston Respublikasi Qurolli Kuchlari tarkibiga kiradigan vazirlik va idoralarda hammom-kirxona xizmatlarini autsorsing shartlari asosida koʻrsatishni tashkil etish chora-tadbirlari toʻgʻrisida
Oʻzbekiston Respublikasi Qurolli Kuchlari tarkibiga kiradigan vazirlik va idoralarda hammom-kirxona xizmatlarini autsorsing shartlari asosida koʻrsatishni tashkil etish, ushbu maqsadlar uchun Oʻzbekiston Respublikasining Davlat budjetidan ajratiladigan mablagʻlarni maqbullashtirish maqsadida Vazirlar Mahkamasi qaror qiladi:
1. Belgilansinki:
Oʻzbekiston Respublikasi Mudofaa vazirligi, Ichki ishlar vazirligi, Favqulodda vaziyatlar vazirligi, Milliy gvardiyasi va Oʻzbekiston Respublikasi Prezidenti davlat xavfsizlik xizmatida (keyingi oʻrinlarda — Qurolli Kuchlar tarkibiga kiradigan vazirlik va idoralar) xodimlar soni va xarajatlarni maqbullashtirish hamda tashish va yetkazib berish sifatini yaxshilash imkonini beradigan autsorsing shartlari asosida hammom-kirxona xizmatlarini koʻrsatish joriy etiladi;
koʻrsatilgan xizmatlar tannarxi autsorserning barcha xarajatlarini, shu jumladan, xodimlarning ish haqi, soliqlar, transport xarajatlari, kommunal xizmatlar uchun toʻlovlar va boshqalarni oʻz ichiga olgan holda 20 foizgacha ustama qoʻshib hisoblanadi. Bunda yopiq harbiy shaharchalarda hammom-kirxona xizmatlarini koʻrsatish narxlari tegishli hududdagi mavjud narxlardan oshirilmasligi lozim;
dala sharoitlarida va favqulodda vaziyatlarda transport xarajatlari autsorserlarga hammom-kirxona xizmati qiymatining 2 foizi miqdorida qoplanadi;
hammom-kirxona xizmatini koʻrsatish narxlari oʻzgargan taqdirda, autsorserlarni tanlab olish bayonnomasiga tegishli oʻzgartirishlar kiritiladi.
2. Quyidagilarni nazarda tutuvchi Oʻzbekiston Respublikasi Qurolli Kuchlari tarkibiga kiradigan vazirlik va idoralarda hammom-kirxona xizmatlarini autsorsing shartlari asosida koʻrsatish tartibi toʻgʻrisidagi nizom 1-ilovaga muvofiq tasdiqlansin:
Qurolli Kuchlar tarkibiga kiradigan vazirlik va idoralarda faoliyat koʻrsatuvchi autsorserlar va ularning xodimlariga qoʻyiladigan talablar;
autsorsing tizimida narxlarni shakllantirish va shartnomalarni tuzish hamda autsorsing shartlarida shaxsiy tarkibga hammom-kirxona xizmatlarini koʻrsatish tartibi;
hammom-kirxona xizmatlari koʻrsatilishini nazorat qilish tartibi;
autsorserlarga vaqtincha foydalanish uchun berilgan obyektlar va moddiy-texnika vositalaridan foydalanish tartibi.
3. Oʻzbekiston Respublikasi Hukumatining 2-ilovaga muvofiq ayrim qarorlariga oʻzgartirishlar va qoʻshimcha kiritilsin.
4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov, Oʻzbekiston Respublikasi Milliy gvardiyasi qoʻmondoni R.M. Djurayev, mudofaa vaziri B.N. Kurbanov, ichki ishlar vaziri P.R. Bobojonov, favqulodda vaziyatlar vaziri A.X. Qoʻldoshev hamda Oʻzbekiston Respublikasi Prezidenti davlat xavfsizlik xizmati raisi A.A. Usmanov zimmasiga yuklansin.
Vazirlar Mahkamasining 2024-yil 18-apreldagi 217-son qaroriga 1-ILOVA
Oʻzbekiston Respublikasi Qurolli Kuchlari tarkibiga kiradigan vazirlik va idoralarda hammom-kirxona xizmatlarini autsorsing shartlari asosida koʻrsatish tartibi toʻgʻrisida
1-bob. Umumiy qoidalar
1. Ushbu Nizom Oʻzbekiston Respublikasi Mudofaa vazirligi, Ichki ishlar vazirligi, Favqulodda vaziyatlar vazirligi, Milliy gvardiyasi, Oʻzbekiston Respublikasi Prezidenti davlat xavfsizlik xizmati (keyingi oʻrinlarda — vazirlik va idoralar) tizimidagi muddatli va kontrakt boʻyicha harbiy xizmatchilar, rezerv va zaxiradagi harbiy xizmatga majburlar, safarbarlik chaqiruvi rezervi xizmatchilari, xodimlar, kursantlar, tinglovchilar, oʻquvchilar, bolalar sogʻlomlashtirish oromgohlari dam oluvchilari, tibbiyot muassasalarida davolanayotganlar (keyingi oʻrinlarda — shaxsiy tarkib), shuningdek, jazoni ijro etish muassasalarida jazo muddatini oʻtayotgan mahkumlar, tergov hibsxonalarida va vaqtincha saqlash hibsxonalarida saqlanayotgan shaxslar, voyaga yetmaganlarga ijtimoiy-huquqiy yordam koʻrsatish markazlariga qabul qilingan bolalarga (keyingi oʻrinlarda — alohida toifadagi shaxslar) hammom-kirxona xizmatlarini autsorsing shartlari asosida koʻrsatish tartibini belgilaydi.
2. Ushbu Nizomda quyidagi asosiy tushunchalardan foydalaniladi:
autsorsing — shaxsiy tarkib va alohida toifadagi shaxslarga koʻrsatiladigan hammom-kirxona xizmatlarini shartnoma asosida tadbirkorlik subyektiga oʻtkazish;
autsorser — vazirlik va idoralar boʻlinmalari, qoʻshinlari, harbiy tuzilmalari va muassasalariga (keyingi oʻrinlarda — vazirlik va idoralar boʻlinmalari) shartnoma asosida hammom-kirxona xizmatlarini koʻrsatuvchi tadbirkorlik subyekti;
buyurtmachi — vazirlik va idoralar;
talabgor — vazirlik va idoralar boʻlinmalariga autsorsing asosida xizmat koʻrsatish hamda ushbu Nizomga muvofiq tanlashda ishtirok etish istagini bildirgan tadbirkorlik subyekti.
3. Buyurtmachi xizmatlarini autsorsingga oʻtkazishda quyidagi shartlarga rioya qilishi shart:
autsorserni qonunchilik hujjatlari asosida tanlab olish hamda unga oʻtkaziladigan xizmatlar sifatini oshirish;
buyurtmachining autsorserga oʻtkaziladigan xizmatlarni bajarish bilan band boʻlgan xodimlar sonini (shtatini) qisqartirish;
autsorserga oʻtkaziladigan xizmatlarning iqtisodiy samaradorligini oshirish va xoʻjalik faoliyati xarajatlarini qisqartirish.
4. Autsorserning (mehnat shartnomasi asosida faoliyat yurituvchi) xodimlari vazirlik va idoralar boʻlinmalariga tegishli hududga belgilangan tartibda oldindan taqdim etilgan roʻyxat asosida kirishiga ruxsat beriladi. Bunda autsorser hammom-kirxona xizmatlarini koʻrsatuvchi ishchilari haqidagi maʼlumotlarni vazirlik va idoralarning boʻlinmalariga taqdim etadi. Ushbu maʼlumotlar vazirlik va idoralarning ichki idoraviy hujjatlari talablariga muvofiq belgilangan tartibda oʻrganilgandan soʻng ularning natijasiga koʻra ishchilarga tegishli hududda xizmat koʻrsatishiga ruxsat beriladi.
5. Autsorsing xizmatini koʻrsatish jarayonida maxfiylik rejimiga rioya etish vazirlik va idoralar boʻlinmalari tomonidan taʼminlanadi.
Autsorser hammom-kirxona xizmatlarini koʻrsatish davrida oʻzlariga maʼlum boʻlgan davlat sirlari va qonunchilikka muvofiq foydalanish cheklangan maʼlumotlarni tarqatmaslik uchun javobgar hisoblanadi.
6. Hammom-kirxona xizmatlari vazirlik va idoralar boʻlinmalarida shartnoma asosida jalb qilingan autsorser tomonidan koʻrsatiladi.
7. Shartnoma imzolanganidan soʻng vazirlik va idoralar boʻlinmalarga tegishli kirxonalarda autsorser tomonidan davlat standartlari va texnik tartibga solish sohasidagi normativ hujjatlarga muvofiq kamida bir oylik sarflanadigan kir yuvish kukuni zaxirasi shakllantiriladi va saqlanadi.
8. Hammom-kirxona xizmatlarini koʻrsatish uchun mablagʻlarga boʻlgan har yillik ehtiyojni aniqlash hamda ularni olish belgilangan tartibda rejalashtirilayotgan moliya yilida bajariladigan ishlar (koʻrsatiladigan xizmatlar) hajmi va narxidan kelib chiqqan holda amalga oshiriladi.
Koʻrsatilgan hammom-kirxona xizmatlari uchun hisob-kitoblar mazkur Nizomning 26 - 27-bandlari talablari asosida amalga oshiriladi.
9. Hammom-kirxona ishlari uchun xarajatlar (autsorserning ustama haqini qoʻshib hisoblaganda) Oʻzbekiston Respublikasining Davlat budjeti, budjetdan tashqari mablagʻlar, obyektlarni qoʻriqlash boʻyicha koʻrsatiladigan xizmatlardan tushadigan mablagʻlar, shuningdek, Safarbarlik chaqiruvi rezervi boʻlinmalari uchun Mudofaa vazirligining “Safarbarlik chaqiruvi rezervi mablagʻlari” maxsus hisobvaragʻi mablagʻlari hisobidan amalga oshiriladi.
10. Koʻrsatilayotgan hammom-kirxona xizmatlarining sifati va narxlari vazirlik va idoralar tomonidan oʻrganib boriladi.
2-bob. Tanlash komissiyasi faoliyatini tashkil etish
11. Hammom-kirxona xizmatlarini koʻrsatish uchun talabgorlarni tanlash maqsadida buyurtmachi (Oʻzbekiston Respublikasi Prezidenti davlat xavfsizlik xizmatining tegishli boʻlinmasi) rahbarining qarori bilan toq sonli va kamida besh nafar aʼzodan iborat tarkibda tanlash komissiyasi (keyingi oʻrinlarda — Komissiya), shuningdek, zarur hollarda, ishchi organ tuziladi.
12. Komissiyaning har bir aʼzosi Komissiya qarorini qabul qilishda yoqlab ovoz berishi, qarshi ovoz berishi yoki unda ishtirok etishdan bosh tortishi mumkin. Komissiya raisi ovoz berishda ishtirok etishdan bosh tortish huquqiga ega emas.
Komissiya aʼzosi qarshi ovoz berganda, oʻzining qarori yuzasidan sharh berishi mumkin va ushbu sharh bayonnomada qayd etiladi.
13. Qaror Komissiya aʼzolari umumiy sonining koʻpchilik ovozi bilan qabul qilinadi. Agar majlisda Komissiya aʼzolari umumiy sonining kamida uchdan ikki qismi hozir boʻlsa, Komissiya vakolatli hisoblanadi.
3-bob. Autsorserni tanlash, shartnoma tuzish va hisob-kitoblarni amalga oshirish tartibi
14. Vazirlik va idoralar boʻlinmalarida hammom-kirxona xizmatlarini koʻrsatish autsorsing asosida mazkur Nizomga ilovadagi sxemaga muvofiq tashkil etiladi.
15. Autsorserga nisbatan quyidagi talablar qoʻyiladi:
buyurtmachi tomonidan belgilangan mezonlarga muvofiq shartnomani bajarish uchun zarur kadrlar, texnik, moddiy va boshqa resurslar mavjudligi;
autsorsing xizmati boʻyicha kamida uch oylik shartnoma summasiga teng aylanma mablagʻlarga ega boʻlishi;
soliqlar va yigʻimlarni toʻlash boʻyicha muddati oʻtgan qarzdorlikning mavjud emasligi;
qayta tashkil etish yoki tugatilish bosqichida boʻlmasligi;
oʻziga nisbatan bankrotlik tartib-taomillari joriy etilmaganligi;
insofsiz ijrochilarning yagona reyestrida qayd etilmaganligi;
buyurtmachi bilan sud, shu jumladan hakamlik sudi yoki xalqaro tijorat arbitraj sudi muhokamasi holatida boʻlmasligi.
16. Buyurtmachi autsorserni tanlash boʻyicha takliflarni qabul qilish muddati tugaydigan sanadan kamida besh ish kuni avval maxsus axborot portaliga autsorserni tanlash toʻgʻrisida eʼlon joylashtiradi.
17. Talabgorlar tanlovda ishtirok etishi uchun quyidagi hujjatlarni taqdim etadilar:
Komissiya raisi nomiga tanlovda ishtirok etish uchun ariza;
ushbu Nizomning 15-bandida nazarda tutilgan talablarga muvofiqligi toʻgʻrisida vakolatli organlarning maʼlumotnomalari.
18. Talabgorlar quyidagi hollarda tanlashda ishtirok etishiga yoʻl qoʻyilmaydi:
ushbu Nizomning 17-bandida koʻrsatilgan hujjatlarni belgilangan muddatlarda va toʻliq taqdim etmagan boʻlsa;
notoʻgʻri maʼlumotni taqdim etgan boʻlsa.
19. Komissiya zaruratga koʻra tegishli hududdagi talabgorlar roʻyxatini va hammom-kirxona xizmatlarini koʻrsatish boʻyicha mavjud oʻrtacha narxlar toʻgʻrisida maʼlumot olish uchun tegishlicha Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga talabnoma taqdim etadi.
20. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari buyurtmachining talabnomasi asosida oʻn ish kunida tegishli hududdagi talabgorlarning roʻyxati hamda hammom-kirxona xizmatlarini koʻrsatish boʻyicha mavjud oʻrtacha narxlar toʻgʻrisidagi takliflarni shakllantiradi va Komissiyaga taqdim etadi.
21. Komissiya:
taqdim etilgan va maxsus axborot portali orqali kelib tushgan takliflarni oʻrganib chiqadi hamda eng yaxshi takliflarni oʻn ish kunida tanlab oladi. Bunda talabgorlarning hammom-kirxona xizmatlarini koʻrsatish sohasidagi tajribasi, moliyaviy, moddiy-texnik va logistik bazasi, hammom-kirxonalar holatini yaxshilashga tayyorligi, shuningdek, hammom-kirxona xizmatlarini arzonlashtirilgan narxlarda koʻrsatish imkoniyatlari inobatga olinadi;
uch ish kunida tanlab olingan takliflar orasidan gʻolibni aniqlaydi hamda bu haqida bayonnoma rasmiylashtiradi;
bir ish kunida bayonnomadan koʻchirmani vazirlik va idoralarning boʻlinmalariga yuboradi.
22. Vazirlik va idoralar boʻlinmalarining komandirlari (boshliqlari) uch ish kunida:
autsorser bilan bir moliya yili uchun amal qilish muddati 31-dekabrgacha boʻlgan shartnoma tuzadi va hududiy gʻaznachilik organida roʻyxatdan oʻtkazadi;
autsorserga tegishli bino va moddiy-texnika vositalarini vaqtincha foydalanish uchun topshiradi.
23. Moliya yili oxirida amaldagi autsorserni almashtirishga zarurat boʻlmasa, Komissiya tomonidan tasdiqlangan narx va buyurtmachining xarajatlar smetasida ajratilgan mablagʻlar doirasida tomonlarning kelishuviga koʻra va Komissiya yigʻilish bayonnomasi bilan shartnoma muddati navbatdagi moliya yili uchun uzaytirilishi mumkin.
Hammom-kirxona xizmatlarini koʻrsatish narxlari oʻzgargan taqdirda, vazirlik va idoralarning boʻlinmalari komandirlari (boshliqlari) bayonnomaga oʻzgartirish kiritish masalasini koʻrib chiqish uchun tegishli hududdagi amaldagi narxlarni oʻrganib chiqish dalolatnomasi ilova qilingan takliflarni Komissiyaga belgilangan tartibda yuboradi.
24. Moliya yili oxirida amaldagi autsorserni almashtirish yoki almashtirmaslik vazirlik va idoralar kiyim-kechak taʼminoti markaziy organlari, shuningdek, Oʻzbekiston Respublikasi Prezidenti davlat xavfsizlik xizmatining tegishli boʻlinma rahbarlarining qarori bilan belgilanadi.
Bunda autsorserning oʻtgan davrdagi faoliyati natijalari, yoʻl qoʻygan xato va kamchiliklari, hammom-kirxona xizmatlarini koʻrsatish boʻyicha imzolangan shartnoma shartlarining bajarilishi inobatga olinadi.
25. Quyidagilar autsorserni almashtirish zaruratini keltirib chiqaruvchi holatlar hisoblanadi:
shartnoma shartlari lozim darajada bajarmaganligi;
kiyim-kechakka ishlov berish texnologik jarayoni doimiy ravishda buzilganligi;
hammom-kirxona xizmatlarini koʻrsatishning sifati buyurtmachi tomonidan belgilangan talablarga javob bermaganda;
hammom-kirxona obyektlarida sanitariya qoidalari, normalari va gigiyena normativlari talablariga rioya etilmaganligi;
texnika va yongʻin xavfsizligi qoidalariga rioya etmaganligi;
autsorserga nisbatan tugatish yoki bankrotlik tartib-taomili joriy etilganligi.
26. Autsorser har oyning 3-sanasiga qadar buyurtmachi bilan oʻzaro hisob-kitoblarni amalga oshirish uchun koʻrsatilgan xizmatlarning yuk xatini (hisob-varaqasini) taqdim etadi. Koʻrsatilgan xizmatlarning tannarxi autsorserning barcha xarajatlarini, shu jumladan, xodimlarning ish haqi, soliqlar, transport xarajatlari, kommunal xizmatlar uchun toʻlovlar va boshqalarni oʻz ichiga olgan holda 20 foizgacha ustama qoʻshib hisoblanadi. Bunda yopiq harbiy shaharchalarda hammom-kirxona xizmatlarini koʻrsatish narxlari tegishli hududdagi mavjud narxlardan oshirilmasligi lozim.
Koʻrsatilgan xizmatlar uchun hisob-varaqalarning toʻgʻri rasmiylashtirilishi va xizmatlar narxlarining toʻgʻri koʻrsatilishi uchun javobgarlik autsorser zimmasiga yuklanadi.
27. Autsorser bilan hisob-kitoblar xizmat koʻrsatish jadvalida nazarda tutilgan oylik summaning shartnomadagi umumiy qiymatidan kelib chiqqan holda, amalda koʻrsatilgan xizmatlar uchun hisob-faktura va belgilangan tartibda rasmiylashtirilgan dalolatnoma asosida har oyning 10-sanasiga qadar autsorserning bank hisobvaragʻiga mablagʻlarni oʻtkazish orqali amalga oshiriladi.
28. Hammom-kirxona xizmatlarini koʻrsatish uchun autsorser tomonidan foydalaniladigan kommunal xizmatlar qiymati autsorserning oʻz mablagʻlari hisobidan qoplanadi.
4-bob. Hammom-kirxona xizmatlarini koʻrsatishni tashkil etish
29. Hammom-kirxona xizmatlarini koʻrsatishni tashkil etish vazifasi vazirlik va idoralarning boʻlinmalari komandirlarining (boshliqlarining) zimmasiga yuklanadi.
30. Shaxsiy tarkib va alohida toifadagi shaxslarga hammom xizmati haftasiga kamida ikki marta koʻrsatiladi, haftasiga bir marta ichki kiyimlar, yotoq choyshablari va sochiqlar toʻliq almashtiriladi.
31. Kirxonada kiyim-kechaklarga ishlov berish texnologik jarayoni qabul qilish, ajratish, yuvish, siqish, quritish, dazmollash va buyurtmachiga tarqatishdan iborat.
32. Kirxonada kiyim-kechaklar rangi, mato turi va kirlik darajasiga qarab ajratiladi.
5-bob. Hammom-kirxona xizmatlarini koʻrsatishda sanitariya qoidalari, normalari va gigiyena normativlariga rioya etilishini nazorat qilish tartibi
33. Hammom-kirxona xizmatlarini koʻrsatishda autsorserlar tomonidan belgilangan talablarga toʻliq amal qilinishi, narxlarga rioya etilishi va hisob-kitoblar oʻz vaqtida amalga oshirilishi vazirlik va idoralar boʻlinmalari komandirlarining (boshliqlarining) tegishli oʻrinbosari (bunday lavozim nazarda tutilmagan hollarda ushbu vazifa yuklangan masʼul shaxslar) tomonidan doimiy nazorat qilinadi.
34. Hammom-kirxona xizmatlarining sanitariya nazorati vazirlik va idoralar boʻlinmalarining tibbiyot xizmati tomonidan amalga oshiriladi. Bunda hammom-kirxona obyektlarining sanitariya holati, shaxsiy tarkib va alohida toifadagi shaxslarning choʻmilishi, ichki kiyim va choyshablar doimiy ravishda almashtirilishi, kiyim-kechaklar yuvilishi sifati, hammom-kirxona korxona ishchilarining tibbiy koʻrikdan oʻtish doimiyligi va toʻliqligi tekshiriladi.
35. Hammom-kirxona xizmatlarini koʻrsatuvchi ishchilar belgilangan tartibda va muddatda tibbiy koʻrikdan oʻtgandan soʻng ishlashga ruxsat beriladi.
36. Hammom-kirxona xizmatlarini koʻrsatuvchi ishchilar vazirlik va idoralar harbiy-davolash muassasasida tibbiy koʻrikdan oʻtayotganda, harbiy-tibbiy muassasa tomonidan sarflangan tibbiy vositalarning qiymati autsorser tomonidan toʻlanadi.
37. Hammom-kirxona xizmatlarini koʻrsatuvchi ishchilarning tibbiy koʻrikdan oʻtishini nazorat qilish autsorser, vazirlik va idoralarning boʻlinmalari komandirlari (boshliqlari) hamda tibbiyot xizmati boshligʻi zimmasiga yuklanadi.
38. Hammomdagi suvning sifati ichimlik suviga qoʻyiladigan davlat standarti talablariga mos kelishi zarur.
6-bob. Vazirlik va idoralarning boʻlinmalari hududida autsorserlarga vaqtincha foydalanish uchun berilgan obyektlar va moddiy-texnika vositalaridan foydalanish tartibi
39. Autsorserga hammom-kirxona obyektlari (bino, inshoot, xona, uskuna va boshqalar) hamda ulardagi moddiy-texnika vositalari (jihozlar, mebellar, oʻlchov vositalari, yongʻinni aniqlash, xabar berish va oʻchirish tizimlari va vositalari hamda boshqa mulklar) davlat mulkidan tekin foydalanish shartnomasi asosida belgilangan tartibda dalolatnoma tuzilgan holda vaqtincha foydalanish uchun beriladi.
40. Autsorsing xizmatlari koʻrsatilishi uchun zarur shart-sharoitlar va moddiy-texnik bazaga ega boʻlmagan vazirlik va idoralarning boʻlinmalariga autsorserlarga tegishli hammom-kirxona obyektlari hamda moddiy-texnika vositalaridan foydalangan holda xizmat koʻrsatilishiga ruxsat etiladi. Bunda yopiq harbiy shaharchalarda hammom-kirxona xizmatlarini koʻrsatish narxlari tegishli hududdagi narxlardan oshib ketmasligi kerak.
41. Autsorserga vaqtincha foydalanishga topshirilgan obyektlarda (bino, inshoot, xona va boshqalar) yongʻin xavfsizligini taʼminlash hamda xizmat koʻrsatuvchi xodimlar tomonidan yongʻin va texnika xavfsizligi talablariga rioya etilishini nazorat qilish autsorser, vazirlik va idoralarning boʻlinmalari komandirlari (boshliqlari) va uning moddiy taʼminot boʻyicha oʻrinbosari (bunday lavozimlar nazarda tutilmagan hollarda ushbu vazifa yuklangan masʼul shaxslar) zimmasiga yuklanadi.
42. Autsorserga vaqtincha foydalanish uchun beriladigan obyektlar va moddiy-texnika vositalarining soni, toifasi va toʻliqligi boʻyicha hisobi vazirlik va idoralar boʻlinmalarining tegishli xizmati tomonidan yuritiladi.
43. Autsorserga vaqtincha foydalanish uchun berilgan oʻlchov vositalarini qiyoslashdan oʻtkazish boʻyicha xizmat koʻrsatish va ularni taʼmirlash autsorserning mablagʻlari hisobidan amalga oshiriladi.
44. Hammom-kirxona xizmatlarini moddiy-texnik taʼminlash vazirlik va idoralarning tegishli organlari orqali har yili maqsadli ravishda ajratiladigan budjet mablagʻlari va qonunchilikda taqiqlanmagan boshqa manbalar hisobidan amalga oshiriladi.
45. Foydalanish muddatlarini oʻtab boʻlgan va yaroqsiz holatga kelgan moddiy-texnika vositalari belgilangan tartibda hisobdan chiqariladi.
46. Autsorserga vaqtincha foydalanish uchun berilgan, belgilangan foydalanish muddatlarini oʻtab boʻlmasdan yaroqsiz holatga kelgan moddiy-texnika vositalari autsorserning mablagʻlari hisobidan tiklanadi.
47. Hammom-kirxona obyektlarini qurish, mavjudlarini kengaytirish, qayta jihozlash hamda kapital taʼmirlash vazirlik va idoralarning markaziy organlari tomonidan har yili maqsadli ravishda ajratiladigan budjet mablagʻlari va qonunchilikda taqiqlanmagan boshqa manbalar hisobidan amalga oshiriladi. Bunda hammom-kirxona obyektlarini joriy taʼmirlash ishlari autsorserning mablagʻlari hisobidan amalga oshiriladi.
7-bob. Yakunlovchi qoidalar
48. Mazkur Nizom talablarining buzilishi tomonlar oʻrtasida tuzilgan shartnomani belgilangan tartibda bekor qilish uchun asos boʻlishi mumkin.
49. Ushbu Nizom bilan tartibga solinmagan autsorsing shartlari qonunchilik hujjatlariga muvofiq hal etiladi.
50. Mazkur Nizom talablari buzilishida aybdor boʻlgan shaxslar qonunchilik hujjatlariga muvofiq javob beradilar.
Oʻzbekiston Respublikasi Qurolli Kuchlari tarkibiga kiradigan vazirlik va idoralarda hammom-kirxona xizmatlarini autsorsing shartlari asosida koʻrsatish tartibi toʻgʻrisidagi nizomga ILOVA
Oʻzbekiston Respublikasi Qurolli Kuchlari tarkibiga kiradigan vazirlik va idoralarda hammom-kirxona xizmatlarini koʻrsatishni autsorsing asosida tashkil etish
Bosqichlar Subyekt Tadbirlar Muddatlar Autsorserni tanlash tartibi I bosqich Mudofaa vazirligi, Ichki ishlar vazirligi, Favqulodda vaziyatlar vazirligi, Milliy gvardiya, Oʻzbekiston Respublikasi Prezidenti davlat xavfsizlik xizmati (keyingi oʻrinlarda — vazirlik va idoralar Hammom-kirxona xizmatlarini koʻrsatish boʻyicha autsorserlarni tanlash toʻgʻrisida maxsus axborot portaliga eʼlon joylashtiradi. Takliflarni qabul qilish muddati tugaydigan sanadan kamida besh ish kuni avval II bosqich Vazirlik va idoralar huzuridagi Komissiya (keyingi oʻrinlarda — Komissiya) Talabgor tashkilotlar roʻyxati va hammom-kirxona xizmatlarini koʻrsatish boʻyicha tegishli hududdagi oʻrtacha narxlar toʻgʻrisida maʼlumot olish uchun Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga talabnomalarni taqdim etadi. Zaruratga koʻra III bosqich Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Talabgorlarning roʻyxati va tegishli hududdagi oʻrtacha narxlar toʻgʻrisidagi takliflarni shakllantiradi va Komissiyaga taqdim etadi. Talabnoma taqdim etilgandan boshlab oʻn ish kunida IV bosqich Komissiya 1. Taqdim etilgan va maxsus axborot portali orqali kelib tushgan takliflarni oʻrganib chiqadi va eng yaxshi takliflarni tanlab oladi. Oʻn ish kunida 2. Gʻolibni aniqlash va bayonnomani rasmiylashtiradi. Uch ish kunida 3. Bayonnomadan koʻchirmani vazirlik va idoralarning boʻlinmalariga yuboradi. Bir ish kunida V bosqich Vazirlik va idoralarning boʻlinmalari komandirlari (boshliqlari 1. Autsorserlar bilan bir moliya yili uchun amal qilish muddati 31-dekabrgacha boʻlgan shartnomalar tuzadi va hududiy gʻaznachilik organlarida roʻyxatdan oʻtkazadi. 2. Autsorserlarga tegishli binolar va moddiy-texnika vositalarini vaqtincha foydalanish uchun shartnoma asosida topshiradi. Uch ish kunida Autsorser bilan hisob-kitob qilish tartibi VI bosqich Autsorser 1. Koʻrsatilgan xizmatlarning asoslangan hujjatlarini rasmiylashtiradi. 2. Vazirlik va idoralarning boʻlinmalari bilan oʻzaro hisob-kitob qilish uchun amalda koʻrsatilgan xizmatlar hisob-fakturasini (bajarilgan ishlar dalolatnomasini ) taqdim etadi. Har oyning 3-sanasigacha VII bosqich Vazirlik va idoralarning boʻlinmalari komandirlari (boshliqlari) Hisob-varaqa va dalolatnoma asosida autsorserning bank hisobvaragʻiga mablagʻlarni oʻtkazadi. Har oyda joriy oyning 10-sanasigacha
Vazirlar Mahkamasining 2024-yil 18-apreldagi 217-son qaroriga 2-ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirishlar va qoʻshimcha
1. Vazirlar Mahkamasining “Oʻzbekiston Respublikasi Yagona aviatsiya qidiruv-qutqaruv xizmati toʻgʻrisidagi nizomni tasdiqlash haqida” 2015-yil 3-apreldagi 80-son qarorining rus tilidagi matnida:
1-ilovaning 9-bandi birinchi xatboshisidagi “zamestitel Ministra oboroni — ” soʻzlari chiqarib tashlansin;
3-ilovaning birinchi xatboshisidagi “zamestitel Ministra oboroni — ” soʻzlari chiqarib tashlansin.
3. Vazirlar Mahkamasining “Oʻzbekiston Respublikasida uchuvchisiz uchadigan apparatlardan foydalanishni tartibga solish boʻyicha qoʻshimcha chora-tadbirlar toʻgʻrisida” 2022-yil 15-noyabrdagi 658-son qarorida :
a) 1-ilovaga 6-ilovaning 8 — 10-bandlaridagi “havo hujumiga qarshi mudofaa” soʻzlari “havo hujumidan mudofaa” soʻzlari bilan almashtirilsin;
b) 3-ilovada :
3-bandning oʻninchi xatboshisidagi “havo hujumiga qarshi mudofaa” soʻzlari “havo hujumidan mudofaa” soʻzlari bilan almashtirilsin;
9-bandning birinchi xatboshisida :
birinchi jumladagi “Oʻzbekiston Respublikasi mudofaa vazirining oʻrinbosari — Havo hujumiga qarshi mudofaa qoʻshinlari va harbiy-havo kuchlari qoʻmondoni” soʻzlari “Havo hujumidan mudofaa qoʻshinlari va harbiy-havo kuchlari qoʻmondoni” soʻzlari bilan almashtirilsin;
ikkinchi jumladagi “Havo hujumiga qarshi mudofaa” soʻzlari “Havo hujumidan mudofaa” soʻzlari bilan almashtirilsin;
11-bandning uchinchi xatboshisidagi , 27-banddagi va 29-bandning birinchi xatboshisidagi “Havo hujumiga qarshi mudofaa” soʻzlari “Havo hujumidan mudofaa” soʻzlari bilan almashtirilsin.
4. Vazirlar Mahkamasining 2022-yil 17-noyabrdagi 660-son qarori bilan tasdiqlangan Fuqaro havo kemalari bilan sodir boʻlgan aviatsiya hodisalarini Oʻzbekiston Respublikasida tekshirish qoidalari 17-bandining birinchi xatboshisidagi “Havo hujumiga qarshi mudofaa” soʻzlari “Havo hujumidan mudofaa” soʻzlari bilan almashtirilsin.
5. Vazirlar Mahkamasining “Jahon iqtisodiyoti va diplomatiya universiteti huzuridagi diplomatik akademiyada diplomatik lavozimlarga tayinlanadigan nomzodlarni oʻqitish, shuningdek, ayrim lavozimdagi mutaxassislarni qayta tayyorlash va ularning malakasini oshirish tizimini joriy etish chora-tadbirlari toʻgʻrisida” 2023-yil 10-yanvardagi 8-son qarorining 1-bandi quyidagi mazmundagi ikkinchi xatboshi bilan toʻldirilsin:
“Akademiya yuridik shaxs maqomiga ega boʻlgan davlat oliy taʼlim muassasasi hisoblanadi”.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 18-aprel,
217-son