UzbekAI

Ўзбекистон Республикаси Вазирлар Маҳкамасининг

қарори

НИЗОМ

НИЗОМ

НОМЕНКЛАТУРАСИ ВА ҲИСОБИ

Донор қонидан дори воситаларини ишлаб чиқаришни йўлга қўйишга доир қўшимча чора-тадбирлар тўғрисида

Ўзбекистон Республикасининг «Фармацевтика фаолияти такомиллаштирилиши муносабати билан Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида»ги Қонуни , Ўзбекистон Республикаси Президентининг «2022 — 2026 йилларда республиканинг фармацевтика тармоғини жадал ривожлантиришга оид қўшимча чора-тадбирлар тўғрисида» 2022 йил 21 январдаги ПФ-55-сон Фармони ижроси юзасидан, шунингдек, аҳолини сифатли ва хавфсиз дори воситалари билан таъминлаш, фармацевтика тармоғига илғор илмий-техника ютуқларини ва инновацияларни жорий этиш, мамлакатимизда донор қонидан дори воситаларини ишлаб чиқаришни йўлга қўйиш мақсадида Вазирлар Маҳкамаси қарор қилади:

1. Қуйидагилар:

Ўзбекистон Республикасининг «Фармацевтика фаолияти такомиллаштирилиши муносабати билан Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида»ги Қонунига мувофиқ донор қонини тўплаш ва унинг асосида фармацевтика маҳсулотларини хусусий тартибда ишлаб чиқаришга тақиқ бекор қилинганлиги;

донор қони ва унинг таркибий қисмларидан фармацевтика маҳсулотлари ихтисослаштирилган фармацевтика ташкилотлари томонидан ишлаб чиқарилиши маълумот учун қабул қилинсин.

2. Белгилансинки, донор қонидан қон плазмасини дори моддаси (субстанция) сифатида ажратиб олиш, тўплаш, унинг асосида дори воситаларини ишлаб чиқариш, сақлаш ва етказиб беришга қуйидаги талабларни бажарган юридик шахслар учун рухсат берилади:

а) донор қонидан қон плазмасини дори моддаси (субстанция) сифатида ажратиб олиш ва тўплаш бўйича:

тиббий ҳамда фармацевтика фаолияти учун тегишли лицензияларга эга бўлиш;

«Зарур ишлаб чиқариш амалиёти (GMP)»нинг миллий талабларига мувофиқлик тўғрисида сертификатга эга бўлиш;

донор қонидан қон плазмасини дори моддаси (субстанция) сифатида плазмафарез усулида Ўзбекистон Республикасида давлат рўйхатидан ўтказилган тиббий жиҳоз воситасида ажратиб олиш;

б) қон плазмаси асосида дори воситаларини ишлаб чиқариш бўйича:

фармацевтика фаолияти учун тегишли лицензияга эга бўлиш;

«Зарур ишлаб чиқариш амалиёти (GMP)»нинг миллий талабларига мувофиқлик тўғрисида сертификатга эга бўлиш;

в) қон плазмаси ва унинг асосида ишлаб чиқарилган дори воситаларини реализиция қилиш учун сақлаш ва етказиб бериш бўйича:

фармацевтика фаолияти учун тегишли лицензияга эга бўлиш;

«Зарур амалиётлар (GхP)»нинг тегишли миллий талабларига мувофиқлик тўғрисида сертификатга эга бўлиш.

3. Қон плазмаси асосида ишлаб чиқариладиган дори воситалари белгиланган тартибда давлат рўйхатидан ўтказилиб ҳар бир партия учун аккредитациядан ўтган сертификатлаштириш органи томонидан мувофиқлик сертификати расмийлаштирилгандан сўнг уларнинг тиббиёт амалиётида қўлланилишига рухсат этилади.

4. Қуйидагиларни назарда тутувчи Донор қонидан дори воситаларини ишлаб чиқаришни ташкил этиш тартиби тўғрисидаги низом 1-иловага мувофиқ тасдиқлансин:

қон плазмасини дори моддаси (субстанция) сифатида ажратиб олиш, тўплаш, унинг асосида дори воситаларини ишлаб чиқариш, сақлаш ва етказиб беришга доир талаблар;

қон плазмасидан дори воситаларини ишлаб чиқаришда сифатни таъминлашга доир талаблар.

5. Ўзбекистон Республикаси Соғлиқни сақлаш вазирлиги:

икки ҳафта муддатда Ўзбекистон Республикасининг «Лицензиялаш, рухсат бериш ва хабардор қилиш тартиб-таомиллари тўғрисида»ги Қонуни ҳамда ушбу қарор талабларидан келиб чиқиб, донор қонидан қон плазмасини дори моддаси (субстанция) сифатида ажратиб олиш ва унинг асосида дори воситаларини ишлаб чиқариш билан боғлиқ фаолиятни лицензиялаш ҳамда «Зарур амалиётлар (GxP)»нинг тегишли миллий талабларига мувофиқлик бўйича сертификатлаш тизимини жорий этсин;

бир ой муддатда Фармацевтика тармоғини қўллаб-қувватлаш ва ривожлантириш жамғармаси маблағлари ҳисобидан донор қонидан дори воситаларини ишлаб чиқариш жараёнларини назорат қилиш имконини берадиган электрон ҳисобга олиш тизимини ишлаб чиқсин ва амалиётга жорий этсин;

қон билан ишлаш хизмати, шу жумладан, донор қонидан дори воситаларини ишлаб чиқарувчи ташкилотларнинг фаолиятини мувофиқлаштирсин ва назорат қилиб борсин.

6. Вазирлар Маҳкамасининг «Қон ва унинг таркибий қисмлари донорлиги тўғрисида»ги Ўзбекистон Республикаси Қонунини амалга оширишга доир қўшимча чора-тадбирлар тўғрисида» 2014 йил 27 ноябрдаги 324-сон қарорига 2-иловага мувофиқ ўзгартиришлар киритилсин.

7. Ўзбекистон Республикаси Соғлиқни сақлаш вазирлиги манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

8. Мазкур қарорнинг бажарилишини назорат қилиш Ўзбекистон Республикаси соғлиқни сақлаш вазири в.б. А.А.Худаяров зиммасига юклансин.

Вазирлар Маҳкамасининг 2024 йил 22 апрелдаги 225-сон қарорига 1-ИЛОВА

Донор қонидан дори воситаларини ишлаб чиқаришни ташкил этиш тартиби тўғрисида

1-боб. Умумий қоидалар

1. Мазкур Низом донор қонидан олинган қон плазмасини (кейинги ўринлардан — қон плазмаси) ажратиб олиш ва уни дори моддаси (субстанция) сифатида тўплаш, қон плазмасидан дори воситаларини ишлаб чиқаришни ташкил этиш тартибини белгилайди.

2. Ушбу Низом талаблари давлат тиббиёт ташкилотлари томонидан қон донорлигини ташкил этиш, қон, унинг компонентлари ва препаратларини тайёрлаш ҳамда қайта ишлашга нисбатан татбиқ этилмайди.

3. Мазкур Низомда қуйидаги асосий тушунчалар қўлланилади:

дори воситалари — касалликлар профилактикаси, уларга ташхис қўйиш ва уларни даволаш, шунингдек, одам организмининг ҳолати ва функцияларини ўзгартириш учун тиббиёт амалиётида қўлланилишига рухсат этилган дори моддалари (субстанциялар) ва ёрдамчи моддалар асосида олинган воситалар, дори моддалари (субстанциялар), дори препаратлари;

«Зарур амалиётлар (GxP)» сертификати — «Зарур амалиётлар (GxP)»нинг тегишли миллий талаблари юзасидан ўтказилган фармацевтик инспекция натижаларига кўра Ўзбекистон Республикаси Соғлиқни сақлаш вазирлиги ҳузуридаги Фармацевтика тармоғини ривожлантириш агентлигининг Зарур амалиётлар маркази томонидан тақдим этиладиган ҳужжат;

плазмафарез — инсон танасидан ташқарида қонни шаклли элементлар ва плазмага ажратиш усули.

2-боб. Қон плазмасини дори моддаси (субстанция) сифатида ажратиб олиш, тўплаш, унинг асосида дори воситаларини ишлаб чиқариш, сақлаш ва етказиб беришга доир талаблар

4. Қон плазмасини дори моддаси (субстанция) сифатида ажратиб олиш, тўплаш, унинг асосида дори воситаларини ишлаб чиқариш, сақлаш ва етказиб беришга қуйидаги талабларни бажарган юридик шахслар учун рухсат берилади:

а) донор қонидан қон плазмасини дори моддаси (субстанция) сифатида ажратиб олиш ва тўплаш бўйича:

тиббий ҳамда фармацевтика фаолияти учун тегишли лицензияларга эга бўлиш;

«Зарур ишлаб чиқариш амалиёти (GMP)»нинг миллий талабларига мувофиқлик тўғрисида сертификатга эга бўлиш;

донор қонидан қон плазмасини дори моддаси (субстанция) сифатида плазмафарез усулида Ўзбекистон Республикасида давлат рўйхатидан ўтказилган тиббий жиҳоз воситасида ажратиб олиш;

б) қон плазмаси асосида дори воситаларини ишлаб чиқариш бўйича:

фармацевтика фаолияти учун тегишли лицензияга эга бўлиш;

«Зарур ишлаб чиқариш амалиёти (GMP)»нинг миллий талабларига мувофиқлик тўғрисида сертификатга эга бўлиш;

в) қон плазмаси ва унинг асосида ишлаб чиқарилган дори воситаларини реализиция қилиш учун сақлаш ва етказиб бериш бўйича:

фармацевтика фаолияти учун тегишли лицензияга эга бўлиш;

«Зарур амалиётлар (GхP)»нинг тегишли миллий талабларига мувофиқлик тўғрисида сертификатга эга бўлиш.

5. Донор томонидан қон плазмасини топшириш тартиби Ўзбекистон Республикаси Соғлиқни сақлаш вазирлиги томонидан белгиланади.

6. Ажратиб олинган қон плазмасидан тиббий фаолият учун тегишли лицензияга эга бўлган лабораторияларда Ўзбекистон Республикаси Соғлиқни сақлаш вазирлиги томонидан белгиланадиган текширувлардан ўтказилиб, касалликлар аниқланмагандан кейингина дори воситаларини ишлаб чиқаришга рухсат берилади.

3-боб. Қон плазмасидан дори воситаларини ишлаб чиқаришда сифатни таъминлашга доир талаблар

7. Қон плазмасидан дори воситаларини ишлаб чиқаришда ушбу дори воситалари орқали юқумли касалликлар юқишининг олди олиниши лозим.

8. Қон плазмасидан дори воситаларини ишлаб чиқаришда сифатни таъминлаш ҳамда ушбу Низом ва «Зарур амалиётлар (GxP)»нинг тегишли миллий талабларига риоя этилиши тайёр маҳсулот ишлаб чиқаришнинг донорни танлашдан бошлаб, сарфлов воситалари сифати, қон плазмасини сақлаш, ташиш, қайта ишлаш ва тайёр маҳсулотни етказиб беришгача бўлган барча босқичларига тааллуқли ҳисобланади.

9. Қон плазмасини тайёрловчи ташкилотларда ҳар бир донорнинг қон плазмасини топширишга яроқлилигини ҳамда плазманинг дори воситаларини ишлаб чиқариш учун бошланғич материал сифатида яроқлилигини аниқлаш бўйича ички йўриқномалар мавжуд бўлиши шарт.

10. Қон плазмасининг лаборатория текширувлари натижалари Ўзбекистон Республикаси Соғлиқни сақлаш вазирлиги томонидан белгиланган шаклларга мувофиқ расмийлаштирилган ва дори воситасини ишлаб чиқарувчи ушбу маълумотлардан фойдаланиш имконига эга бўлиши лозим.

11. Дори воситаларини қон плазмасидан ишлаб чиқаришнинг барча стандарт операцион жараёнлари сифат менежменти тизими жараёнларига мувофиқ бўлиши ва мазкур талаблардан четга чиқишга йўл қўйилганлигини аниқлаш имкони яратилиши зарур.

12. Қон плазмасидан дори воситаларини ишлаб чиқаришда микроорганизмларни фаолсизлантириш ва улардан холи бўлиш босқичларидан ўтган ва ўтмаган материаллар учун хоналар ва ускуналар бир-биридан ажратилган бўлиши керак.

13. Зарур ҳолатларда ретроспектив таҳлил ўтказилишини таъминлаш мақсадида ҳар бир қон плазмаси намуналари яроқлилик муддати энг узоқ бўлган дори воситасининг яроқлилик муддати ўтганидан кейинги бир йил муддатга тенг давр давомида тегишли шароитларда сақланиши лозим.

14. Қон плазмаси асосида ишлаб чиқарилган дори воситаларининг тиббиёт амалиётида қўлланилишига улар белгиланган тартибда давлат рўйхатидан ўтказилиб ҳар бир сериясига аккредитациядан ўтган сертификатлаштириш органлари томонидан мувофиқлик сертификатлари расмийлаштирилгандан сўнг рухсат этилади.

15. Қон плазмаси асосида ишлаб чиқарилган дори воситаларининг улгуржи ва чакана реализацияси «Зарур амалиётлар (GxP)»нинг тегишли миллий талабларига мувофиқлик сертификати ва тегишли лицензияга эга юридик шахслар томонидан амалга оширилади.

16. Қон плазмасини ажратиб олиш ҳамда ундан дори воситаларини ишлаб чиқарувчи ташкилотларнинг «Зарур амалиётлар (GxP)»нинг тегишли миллий талабларига мувофиқлиги ҳар йили камида бир марта белгиланган тартибда қайта инспекциядан ўтказилади.

4-боб. Якунловчи қоидалар

17. Мазкур Низом талабларининг бузилишида айбдор бўлган шахслар қонунчилик ҳужжатларида белгиланган тартибда жавобгар бўлади.

Вазирлар Маҳкамасининг 2024 йил 22 апрелдаги 225-сон қарорига 2-ИЛОВА

Вазирлар Маҳкамасининг «Қон ва унинг таркибий қисмлари донорлиги тўғрисида»ги Ўзбекистон Республикаси Қонунини амалга оширишга доир қўшимча чора-тадбирлар тўғрисида» 2014 йил 27 ноябрдаги 324-сон қарорига киритилаётган ўзгартиришлар

1. 1-илованинг матни қуйидаги таҳрирда баён этилсин:

«Қон билан ишлаш хизмати фаолиятини мувофиқлаштириш тартиби тўғрисида

1-боб. Умумий қоидалар

1. Ушбу Низом Ўзбекистон Республикасининг «Қон ва унинг таркибий қисмлари донорлиги тўғрисида»ги Қонунига мувофиқ қон билан ишлаш хизмати фаолиятини мувофиқлаштириш тартибини белгилайди.

2. Қон билан ишлаш хизмати ташкилотларининг, шунингдек, вазирликлар, идоралар, маҳаллий ижро этувчи ҳокимият органларининг донор қони ва унинг таркибий қисмлари масалалари бўйича фаолияти Ўзбекистон Республикаси Соғлиқни сақлаш вазирлиги томонидан мувофиқлаштирилади.

Донор қони ва унинг таркибий қисмларини тўплаш, тайёрлаш, қайта ишлаш, сақлаш ҳамда ишлатиш тартиби Ўзбекистон Республикаси Соғлиқни сақлаш вазирлиги томонидан белгиланади.

2-боб. Қон билан ишлаш хизматининг тузилмаси ва ваколатлари

3. Қон билан ишлаш хизмати донор қони ва унинг таркибий қисмларини тўплашга, тайёрлашга, қайта ишлашга ва сақлашга ихтисослаштирилган тиббиёт ташкилотлари ҳамда донор қони ва унинг таркибий қисмларидан фармацевтика маҳсулотларини ишлаб чиқаришга ихтисослаштирилган фармацевтика ташкилотлари (кейинги ўринларда – қон билан ишлаш хизмати) мажмуидан иборатдир.

4. Қон билан ишлаш хизмати қуйидагиларни ўз ичига олади:

донор қони ва унинг таркибий қисмларини тўплаш, тайёрлаш, қайта ишлаш, сақлаш ва ундан фойдаланишга ихтисослаштирилган давлат тиббиёт ташкилотлари;

донор қони ва унинг таркибий қисмларидан фойдаланадиган тиббиёт ташкилотлари;

дори воситаларини ишлаб чиқариш учун қон плазмасини йиғишга ихтисослаштирилган ташкилотлар;

қон плазмасидан дори воситаларини ишлаб чиқаришга ихтисослаштирилган фармацевтика ташкилотлари.

5. Қон билан ишлаш хизмати ташкилотлари биноларини лойиҳалаштириш, қуриш ва эксплуатация қилиш санитария қоидалари, нормалари ва гигиена нормативлари талабларига мувофиқ амалга оширилади.

6. Қон ва унинг таркибий қисмларини тўплаш, тайёрлаш, қайта ишлаш фақат давлат рўйхатидан ўтказилган тиббий техникалар ёрдамида амалга оширилади.

7. Қон ва унинг таркибий қисмлари Ўзбекистон Республикаси Соғлиқни сақлаш вазирлиги томонидан белгиланадиган талабларга мувофиқ узлуксиз ҳароратни сақлаш ва рўйхатга олиш тизими мавжуд бўлган махсус музлатгичларда сақланади.

8. Қон ва унинг таркибий қисмлари, шу жумладан, қон плазмасини 18 ёшга тўлган шахслар томонидан топширилишига рухсат берилади.

Қон ва унинг таркибий қисмларини топширадиган шахсларнинг саломатлик кўрсаткичлари, соғлиғига қўйиладиган талаблар ҳамда уларни тиббий кўрикдан ўтказиш тартиби Ўзбекистон Республикаси Соғлиқни сақлаш вазирлиги томонидан белгиланади.

Қон ва унинг таркибий қисмларини топшириш олдидан шахсларни тиббий кўрикдан ўтказиш ҳамда уларнинг саломатлиги тўғрисидаги ҳужжат бериш бепул амалга оширилади.

9. Қон ва унинг таркибий қисмларини топшириш чоғида донор қуйидаги ҳуқуқларга эга:

соғлиғи сақланиши кафолатининг тиббиёт ходимлари томонидан таъминланиши;

соғлиғига етказилган зарарнинг ўрни қопланиши;

бепул овқат билан таъминланиш.

Донор қонунчиликка мувофиқ бошқа ҳуқуқларга ҳам эга бўлиши мумкин.

10. Қон ва унинг таркибий қисмлари бепул ва пулли асосда топширилиши мумкин.

Қон ва унинг таркибий қисмларини тўплаш, тайёрлаш, қайта ишлаш, сақлаш бўйича ихтисослаштирилган давлат тиббиёт ташкилотлари ҳамда қон плазмасидан дори воситаларини ишлаб чиқаришга ихтисослаштирилган ташкилотлар донорларга келишувга мувофиқ қўшимча кафолатлар ҳамда компенсация тўловларини белгилаши мумкин.

11. Қон билан ишлаш хизмати ташкилотлари Ўзбекистон Республикаси Соғлиқни сақлаш вазирлигининг электрон тизимига уланиши лозим.

12. Қон билан ишлаш хизмати қон ва унинг таркибий қисмлари донорлигини қуйидагилар орқали ташкил этади:

донор қони, унинг таркибий қисмлари ва препаратларини тўплаш, тайёрлаш, қайта ишлаш, сақлаш;

аҳолини қон ва унинг таркибий қисмларини ихтиёрий равишда топширишга жалб этиш;

донор қони ва унинг таркибий қисмларини, шунингдек, донор қони препаратларини ишлаб чиқариш ва улардан фойдаланишнинг хавфсизлик шароитларини таъминлаш;

донор қони ва унинг таркибий қисмларини, шунингдек, донор қони препаратларини хавфсиз ташишни ташкил этиш;

донор қони банкини яратиш ва янгилаб бориш;

қон билан ишлаш хизматини, донорликни қон ва унинг таркибий қисмлари донорлигини, уларни тайёрлашни ҳамда клиник қўлланишни ташкил этиш масалалари бўйича илмий-тадқиқот фаолиятини амалга ошириш;

қон ва унинг таркибий қисмлари донорлиги бўйича маълумотларнинг ягона электрон базасини шакллантириш;

қон ва унинг таркибий қисмларининг ихтиёрий бепул донорлигини ривожлантириш бўйича тадбиркорлик субъектлари, нодавлат нотижорат ташкилотлари, фуқароларнинг ўзини ўзи бошқариш органлари билан ўзаро ҳамкорлик қилиш.

Қон билан ишлаш хизмати қонунчиликка мувофиқ бошқа ваколатларни ҳам амалга ошириши мумкин.

3-боб. Вазирликлар ва идоралар, маҳаллий ижро этувчи ҳокимият органларининг қон билан ишлаш хизмати фаолиятини мувофиқлаштириш бўйича ваколатлари

13. Вазирликлар ва идоралар раҳбарлари ўз ваколатлари доирасида:

шахсларни донорлар сафига жалб этишда қон билан ишлаш хизматига кўмаклашадилар;

донорнинг аризасига биноан уни иш, хизмат ёки ўқиш жойидан тиббий кўрикдан ўтиш кунида, шунингдек, қон топшириш кунида соғлиқни сақлаш ташкилотларига тўсқинликсиз юборадилар, донорнинг ушбу кунларда иш жойида ёки хизмат жойида бўлмаслиги одамларнинг ҳаётига ёки саломатлигига хавф солишига, давлат мудофаасини, хавфсизлигини ва жамоат тартибини таъминлаш билан боғлиқ вазифаларнинг бажарилмаслигига ёки бошқа оғир оқибатларга олиб келиши мумкин бўлган ҳолатлар бундан мустасно;

қон топширишни ташкил этиш учун зарур хоналар тақдим этадилар;

донорга қонунчиликда белгиланган кафолатларни берадилар ва уни рағбатлантириш чораларини қўллайдилар.

Вазирликлар ва идоралар қон ва унинг таркибий қисмлари донорлиги соҳасида қонунчиликка мувофиқ бошқа ваколатларни ҳам амалга оширишлари мумкин.

14. Маҳаллий ижро этувчи ҳокимият органлари ўз ваколатлари доирасида:

донор қони ва унинг таркибий қисмлари тўғрисидаги қонунчиликнинг бажарилишини таъминлайдилар;

ўз ҳудудларида қон ва унинг таркибий қисмлари донорлигини ташкил этадилар;

қон ва унинг таркибий қисмлари донорлигини ривожлантиришга маҳаллий бюджетдан маблағлар ажратадилар.

Маҳаллий ижро этувчи ҳокимияти органлари қон ва унинг таркибий қисмлари донорлиги соҳасидаги қонунчиликка мувофиқ бошқа ваколатларни ҳам амалга оширишлари мумкин.

4-боб. Фавқулодда вазиятларда қон ва унинг таркибий қисмлари донорлигини ташкил этиш

15. Фавқулодда вазиятлар хавфи пайдо бўлганда ўз вақтида ҳаракатланиш, тегишли ҳудудларда қон ва унинг таркибий қисмлари донорлигини ташкил этиш ишларига тезкор раҳбарлик қилиш учун Ўзбекистон Республикаси Соғлиқни сақлаш вазирлиги томонидан маҳаллий ижро этувчи ҳокимият органлари билан биргаликда қуйидаги тадбирлар амалга оширилади:

мўлжалланаётган донорлар рўйхатларини аниқлаштириш;

шикастланганлар учун қон топшириш шохобчаларини аниқлаш ва ташкил этиш;

донор қонини тайёрлаш бўйича кўчма бригадалар ташкил этиш;

донор қонини тайёрлаш ва текшириш учун реактивлар ва ускуналар захирасини яратиш;

аҳоли ўртасида қон донорлиги бўйича тушунтириш ишларини амалга ошириш;

донорларга сифатли тиббий хизмат кўрсатилишини ва донор қонини тайёрлашда санитария-эпидемиология назоратини таъминлаш.

16. Фавқулодда вазиятларда донор қони таркибий қисмларига ҳамда препаратларига бўлган эҳтиёж ушбу Низомга иловага мувофиқ, эҳтиёжнинг номенклатураси ва ҳисоби бўйича Ўзбекистон Республикаси Соғлиқни сақлаш вазирлиги томонидан аниқланади.

17. Фавқулодда ҳолатлар ва вазиятларда Вазирлар Маҳкамасининг қарори асосида қон хизмати нодавлат ташкилотлари захирасидаги қон плазмаси ва қон препаратлари давлат захирасига олиниши мумкин.

Бунда захирага олинган қон плазмаси ва қон препаратлари учун улгуржи референт нархлардан юқори бўлмаган миқдорида компенсация тўлаб берилади.

5-боб. Қон билан ишлаш хизматини молиялаштириш

18. Қон билан ишлаш хизматининг давлат ташкилотлари фаолияти белгиланган тартибда, Давлат бюджети маблағлари ва қонун билан тақиқланмаган бошқа манбалар ҳисобига, нодавлат ташкилотлари фаолияти ўзларининг маблағлари ҳисобига молиялаштирилади.

6-боб. Якунловчи қоида

19. Ушбу Низомнинг қоидалари бузилишида айбдор бўлган шахслар қонунчиликка мувофиқ жавоб беради.

Донор қони ва унинг таркибий қисмлари билан ишлаш хизмати фаолиятини мувофиқлаштириш тартиби тўғрисидаги низомга ИЛОВА

Фавқулодда вазиятларда донор қони таркибий қисмларига ҳамда препаратларига бўлган эҳтиёжнинг

Донор қони таркибий қисмлари ҳамда препаратлари номи Ўлчов бирлиги 100 нафар жабрланганларни 5 кунлик даволаш учун эҳтиёж нормаси Эритроцитар масса литр 50,0 Янги музлатилган плазма литр 100,0 Тромбоцитлар концентрати доза 20 Альбумин 10% литр 40,0 Антистафилокок иммуноглобулин доза 15 Қоқшолга қарши иммуноглобулин доза 50

2. 2-илованинг 3-банди бешинчи хатбошиси қуйидаги таҳрирда баён этилсин:

«Донор қони ва унинг таркибий қисмларини Ўзбекистон Республикасига олиб кириш ва унинг ташқарисига олиб чиқиш фавқулодда вазиятларда, шошилинч инсонпарварлик ёрдамини кўрсатиш ва бошқа зарур ҳолатларда Ўзбекистон Республикаси Соғлиқни сақлаш вазирлигининг таклифига биноан Вазирлар Маҳкамасининг қарорлари асосида амалга оширилади».

Ўзбекистон Республикасининг Бош вазири А. АРИПОВ

Тошкент ш.,

2024 йил 22 апрель,

225-сон

(Қонунчилик маълумотлари миллий базаси, 23.04.2024 й., 09/24/225/0294-сон; 03.07.2026 й., 09/26/353/0680-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

NIZOM

NOMENKLATURASI VA HISOBI

Donor qonidan dori vositalarini ishlab chiqarishni yoʻlga qoʻyishga doir qoʻshimcha chora-tadbirlar toʻgʻrisida

Oʻzbekiston Respublikasining “Farmatsevtika faoliyati takomillashtirilishi munosabati bilan Oʻzbekiston Respublikasining ayrim qonun hujjatlariga qoʻshimcha va oʻzgartirishlar kiritish toʻgʻrisida”gi Qonuni , Oʻzbekiston Respublikasi Prezidentining “2022 — 2026-yillarda respublikaning farmatsevtika tarmogʻini jadal rivojlantirishga oid qoʻshimcha chora-tadbirlar toʻgʻrisida” 2022-yil 21-yanvardagi PF-55-son Farmoni ijrosi yuzasidan, shuningdek, aholini sifatli va xavfsiz dori vositalari bilan taʼminlash, farmatsevtika tarmogʻiga ilgʻor ilmiy-texnika yutuqlarini va innovatsiyalarni joriy etish, mamlakatimizda donor qonidan dori vositalarini ishlab chiqarishni yoʻlga qoʻyish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasining “Farmatsevtika faoliyati takomillashtirilishi munosabati bilan Oʻzbekiston Respublikasining ayrim qonun hujjatlariga qoʻshimcha va oʻzgartirishlar kiritish toʻgʻrisida”gi Qonuniga muvofiq donor qonini toʻplash va uning asosida farmatsevtika mahsulotlarini xususiy tartibda ishlab chiqarishga taqiq bekor qilinganligi;

donor qoni va uning tarkibiy qismlaridan farmatsevtika mahsulotlari ixtisoslashtirilgan farmatsevtika tashkilotlari tomonidan ishlab chiqarilishi maʼlumot uchun qabul qilinsin.

2. Belgilansinki, donor qonidan qon plazmasini dori moddasi (substansiya) sifatida ajratib olish, toʻplash, uning asosida dori vositalarini ishlab chiqarish, saqlash va yetkazib berishga quyidagi talablarni bajargan yuridik shaxslar uchun ruxsat beriladi:

a) donor qonidan qon plazmasini dori moddasi (substansiya) sifatida ajratib olish va toʻplash boʻyicha:

tibbiy hamda farmatsevtika faoliyati uchun tegishli litsenziyalarga ega boʻlish;

“Zarur ishlab chiqarish amaliyoti (GMP)”ning milliy talablariga muvofiqlik toʻgʻrisida sertifikatga ega boʻlish;

donor qonidan qon plazmasini dori moddasi (substansiya) sifatida plazmafarez usulida Oʻzbekiston Respublikasida davlat roʻyxatidan oʻtkazilgan tibbiy jihoz vositasida ajratib olish;

b) qon plazmasi asosida dori vositalarini ishlab chiqarish boʻyicha:

farmatsevtika faoliyati uchun tegishli litsenziyaga ega boʻlish;

“Zarur ishlab chiqarish amaliyoti (GMP)”ning milliy talablariga muvofiqlik toʻgʻrisida sertifikatga ega boʻlish;

v) qon plazmasi va uning asosida ishlab chiqarilgan dori vositalarini realizitsiya qilish uchun saqlash va yetkazib berish boʻyicha:

farmatsevtika faoliyati uchun tegishli litsenziyaga ega boʻlish;

“Zarur amaliyotlar (GxP)”ning tegishli milliy talablariga muvofiqlik toʻgʻrisida sertifikatga ega boʻlish.

3. Qon plazmasi asosida ishlab chiqariladigan dori vositalari belgilangan tartibda davlat roʻyxatidan oʻtkazilib har bir partiya uchun akkreditatsiyadan oʻtgan sertifikatlashtirish organi tomonidan muvofiqlik sertifikati rasmiylashtirilgandan soʻng ularning tibbiyot amaliyotida qoʻllanilishiga ruxsat etiladi.

4. Quyidagilarni nazarda tutuvchi Donor qonidan dori vositalarini ishlab chiqarishni tashkil etish tartibi toʻgʻrisidagi nizom 1-ilovaga muvofiq tasdiqlansin:

qon plazmasini dori moddasi (substansiya) sifatida ajratib olish, toʻplash, uning asosida dori vositalarini ishlab chiqarish, saqlash va yetkazib berishga doir talablar;

qon plazmasidan dori vositalarini ishlab chiqarishda sifatni taʼminlashga doir talablar.

5. Oʻzbekiston Respublikasi Sogʻliqni saqlash vazirligi:

ikki hafta muddatda Oʻzbekiston Respublikasining “Litsenziyalash, ruxsat berish va xabardor qilish tartib-taomillari toʻgʻrisida”gi Qonuni hamda ushbu qaror talablaridan kelib chiqib, donor qonidan qon plazmasini dori moddasi (substansiya) sifatida ajratib olish va uning asosida dori vositalarini ishlab chiqarish bilan bogʻliq faoliyatni litsenziyalash hamda “Zarur amaliyotlar (GxP)”ning tegishli milliy talablariga muvofiqlik boʻyicha sertifikatlash tizimini joriy etsin;

bir oy muddatda Farmatsevtika tarmogʻini qoʻllab-quvvatlash va rivojlantirish jamgʻarmasi mablagʻlari hisobidan donor qonidan dori vositalarini ishlab chiqarish jarayonlarini nazorat qilish imkonini beradigan elektron hisobga olish tizimini ishlab chiqsin va amaliyotga joriy etsin;

qon bilan ishlash xizmati, shu jumladan, donor qonidan dori vositalarini ishlab chiqaruvchi tashkilotlarning faoliyatini muvofiqlashtirsin va nazorat qilib borsin.

6. Vazirlar Mahkamasining “Qon va uning tarkibiy qismlari donorligi toʻgʻrisida”gi Oʻzbekiston Respublikasi Qonunini amalga oshirishga doir qoʻshimcha chora-tadbirlar toʻgʻrisida” 2014-yil 27-noyabrdagi 324-son qaroriga 2-ilovaga muvofiq oʻzgartirishlar kiritilsin.

7. Oʻzbekiston Respublikasi Sogʻliqni saqlash vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

8. Mazkur qarorning bajarilishini nazorat qilish Oʻzbekiston Respublikasi sogʻliqni saqlash vaziri v.b. A.A.Xudayarov zimmasiga yuklansin.

Vazirlar Mahkamasining 2024-yil 22-apreldagi 225-son qaroriga 1-ILOVA

Donor qonidan dori vositalarini ishlab chiqarishni tashkil etish tartibi toʻgʻrisida

1-bob. Umumiy qoidalar

1. Mazkur Nizom donor qonidan olingan qon plazmasini (keyingi oʻrinlardan — qon plazmasi) ajratib olish va uni dori moddasi (substansiya) sifatida toʻplash, qon plazmasidan dori vositalarini ishlab chiqarishni tashkil etish tartibini belgilaydi.

2. Ushbu Nizom talablari davlat tibbiyot tashkilotlari tomonidan qon donorligini tashkil etish, qon, uning komponentlari va preparatlarini tayyorlash hamda qayta ishlashga nisbatan tatbiq etilmaydi.

3. Mazkur Nizomda quyidagi asosiy tushunchalar qoʻllaniladi:

dori vositalari — kasalliklar profilaktikasi, ularga tashxis qoʻyish va ularni davolash, shuningdek, odam organizmining holati va funksiyalarini oʻzgartirish uchun tibbiyot amaliyotida qoʻllanilishiga ruxsat etilgan dori moddalari (substansiyalar) va yordamchi moddalar asosida olingan vositalar, dori moddalari (substansiyalar), dori preparatlari;

“Zarur amaliyotlar (GxP)” sertifikati — “Zarur amaliyotlar (GxP)”ning tegishli milliy talablari yuzasidan oʻtkazilgan farmatsevtik inspeksiya natijalariga koʻra Oʻzbekiston Respublikasi Sogʻliqni saqlash vazirligi huzuridagi Farmatsevtika tarmogʻini rivojlantirish agentligining Zarur amaliyotlar markazi tomonidan taqdim etiladigan hujjat;

plazmafarez — inson tanasidan tashqarida qonni shaklli elementlar va plazmaga ajratish usuli.

2-bob. Qon plazmasini dori moddasi (substansiya) sifatida ajratib olish, toʻplash, uning asosida dori vositalarini ishlab chiqarish, saqlash va yetkazib berishga doir talablar

4. Qon plazmasini dori moddasi (substansiya) sifatida ajratib olish, toʻplash, uning asosida dori vositalarini ishlab chiqarish, saqlash va yetkazib berishga quyidagi talablarni bajargan yuridik shaxslar uchun ruxsat beriladi:

a) donor qonidan qon plazmasini dori moddasi (substansiya) sifatida ajratib olish va toʻplash boʻyicha:

tibbiy hamda farmatsevtika faoliyati uchun tegishli litsenziyalarga ega boʻlish;

“Zarur ishlab chiqarish amaliyoti (GMP)”ning milliy talablariga muvofiqlik toʻgʻrisida sertifikatga ega boʻlish;

donor qonidan qon plazmasini dori moddasi (substansiya) sifatida plazmafarez usulida Oʻzbekiston Respublikasida davlat roʻyxatidan oʻtkazilgan tibbiy jihoz vositasida ajratib olish;

b) qon plazmasi asosida dori vositalarini ishlab chiqarish boʻyicha:

farmatsevtika faoliyati uchun tegishli litsenziyaga ega boʻlish;

“Zarur ishlab chiqarish amaliyoti (GMP)”ning milliy talablariga muvofiqlik toʻgʻrisida sertifikatga ega boʻlish;

v) qon plazmasi va uning asosida ishlab chiqarilgan dori vositalarini realizitsiya qilish uchun saqlash va yetkazib berish boʻyicha:

farmatsevtika faoliyati uchun tegishli litsenziyaga ega boʻlish;

“Zarur amaliyotlar (GxP)”ning tegishli milliy talablariga muvofiqlik toʻgʻrisida sertifikatga ega boʻlish.

5. Donor tomonidan qon plazmasini topshirish tartibi Oʻzbekiston Respublikasi Sogʻliqni saqlash vazirligi tomonidan belgilanadi.

6. Ajratib olingan qon plazmasidan tibbiy faoliyat uchun tegishli litsenziyaga ega boʻlgan laboratoriyalarda Oʻzbekiston Respublikasi Sogʻliqni saqlash vazirligi tomonidan belgilanadigan tekshiruvlardan oʻtkazilib, kasalliklar aniqlanmagandan keyingina dori vositalarini ishlab chiqarishga ruxsat beriladi.

3-bob. Qon plazmasidan dori vositalarini ishlab chiqarishda sifatni taʼminlashga doir talablar

7. Qon plazmasidan dori vositalarini ishlab chiqarishda ushbu dori vositalari orqali yuqumli kasalliklar yuqishining oldi olinishi lozim.

8. Qon plazmasidan dori vositalarini ishlab chiqarishda sifatni taʼminlash hamda ushbu Nizom va “Zarur amaliyotlar (GxP)”ning tegishli milliy talablariga rioya etilishi tayyor mahsulot ishlab chiqarishning donorni tanlashdan boshlab, sarflov vositalari sifati, qon plazmasini saqlash, tashish, qayta ishlash va tayyor mahsulotni yetkazib berishgacha boʻlgan barcha bosqichlariga taalluqli hisoblanadi.

9. Qon plazmasini tayyorlovchi tashkilotlarda har bir donorning qon plazmasini topshirishga yaroqliligini hamda plazmaning dori vositalarini ishlab chiqarish uchun boshlangʻich material sifatida yaroqliligini aniqlash boʻyicha ichki yoʻriqnomalar mavjud boʻlishi shart.

10. Qon plazmasining laboratoriya tekshiruvlari natijalari Oʻzbekiston Respublikasi Sogʻliqni saqlash vazirligi tomonidan belgilangan shakllarga muvofiq rasmiylashtirilgan va dori vositasini ishlab chiqaruvchi ushbu maʼlumotlardan foydalanish imkoniga ega boʻlishi lozim.

11. Dori vositalarini qon plazmasidan ishlab chiqarishning barcha standart operatsion jarayonlari sifat menejmenti tizimi jarayonlariga muvofiq boʻlishi va mazkur talablardan chetga chiqishga yoʻl qoʻyilganligini aniqlash imkoni yaratilishi zarur.

12. Qon plazmasidan dori vositalarini ishlab chiqarishda mikroorganizmlarni faolsizlantirish va ulardan xoli boʻlish bosqichlaridan oʻtgan va oʻtmagan materiallar uchun xonalar va uskunalar bir-biridan ajratilgan boʻlishi kerak.

13. Zarur holatlarda retrospektiv tahlil oʻtkazilishini taʼminlash maqsadida har bir qon plazmasi namunalari yaroqlilik muddati eng uzoq boʻlgan dori vositasining yaroqlilik muddati oʻtganidan keyingi bir yil muddatga teng davr davomida tegishli sharoitlarda saqlanishi lozim.

14. Qon plazmasi asosida ishlab chiqarilgan dori vositalarining tibbiyot amaliyotida qoʻllanilishiga ular belgilangan tartibda davlat roʻyxatidan oʻtkazilib har bir seriyasiga akkreditatsiyadan oʻtgan sertifikatlashtirish organlari tomonidan muvofiqlik sertifikatlari rasmiylashtirilgandan soʻng ruxsat etiladi.

15. Qon plazmasi asosida ishlab chiqarilgan dori vositalarining ulgurji va chakana realizatsiyasi “Zarur amaliyotlar (GxP)”ning tegishli milliy talablariga muvofiqlik sertifikati va tegishli litsenziyaga ega yuridik shaxslar tomonidan amalga oshiriladi.

16. Qon plazmasini ajratib olish hamda undan dori vositalarini ishlab chiqaruvchi tashkilotlarning “Zarur amaliyotlar (GxP)”ning tegishli milliy talablariga muvofiqligi har yili kamida bir marta belgilangan tartibda qayta inspeksiyadan oʻtkaziladi.

4-bob. Yakunlovchi qoidalar

17. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.

Vazirlar Mahkamasining 2024-yil 22-apreldagi 225-son qaroriga 2-ILOVA

Vazirlar Mahkamasining “Qon va uning tarkibiy qismlari donorligi toʻgʻrisida”gi Oʻzbekiston Respublikasi Qonunini amalga oshirishga doir qoʻshimcha chora-tadbirlar toʻgʻrisida” 2014-yil 27-noyabrdagi 324-son qaroriga kiritilayotgan oʻzgartirishlar

1. 1-ilovaning matni quyidagi tahrirda bayon etilsin:

“Qon bilan ishlash xizmati faoliyatini muvofiqlashtirish tartibi toʻgʻrisida

1-bob. Umumiy qoidalar

1. Ushbu Nizom Oʻzbekiston Respublikasining “Qon va uning tarkibiy qismlari donorligi toʻgʻrisida”gi Qonuniga muvofiq qon bilan ishlash xizmati faoliyatini muvofiqlashtirish tartibini belgilaydi.

2. Qon bilan ishlash xizmati tashkilotlarining, shuningdek, vazirliklar, idoralar, mahalliy ijro etuvchi hokimiyat organlarining donor qoni va uning tarkibiy qismlari masalalari boʻyicha faoliyati Oʻzbekiston Respublikasi Sogʻliqni saqlash vazirligi tomonidan muvofiqlashtiriladi.

Donor qoni va uning tarkibiy qismlarini toʻplash, tayyorlash, qayta ishlash, saqlash hamda ishlatish tartibi Oʻzbekiston Respublikasi Sogʻliqni saqlash vazirligi tomonidan belgilanadi.

2-bob. Qon bilan ishlash xizmatining tuzilmasi va vakolatlari

3. Qon bilan ishlash xizmati donor qoni va uning tarkibiy qismlarini toʻplashga, tayyorlashga, qayta ishlashga va saqlashga ixtisoslashtirilgan tibbiyot tashkilotlari hamda donor qoni va uning tarkibiy qismlaridan farmatsevtika mahsulotlarini ishlab chiqarishga ixtisoslashtirilgan farmatsevtika tashkilotlari (keyingi oʻrinlarda – qon bilan ishlash xizmati) majmuidan iboratdir.

4. Qon bilan ishlash xizmati quyidagilarni oʻz ichiga oladi:

donor qoni va uning tarkibiy qismlarini toʻplash, tayyorlash, qayta ishlash, saqlash va undan foydalanishga ixtisoslashtirilgan davlat tibbiyot tashkilotlari;

donor qoni va uning tarkibiy qismlaridan foydalanadigan tibbiyot tashkilotlari;

dori vositalarini ishlab chiqarish uchun qon plazmasini yigʻishga ixtisoslashtirilgan tashkilotlar;

qon plazmasidan dori vositalarini ishlab chiqarishga ixtisoslashtirilgan farmatsevtika tashkilotlari.

5. Qon bilan ishlash xizmati tashkilotlari binolarini loyihalashtirish, qurish va ekspluatatsiya qilish sanitariya qoidalari, normalari va gigiyena normativlari talablariga muvofiq amalga oshiriladi.

6. Qon va uning tarkibiy qismlarini toʻplash, tayyorlash, qayta ishlash faqat davlat roʻyxatidan oʻtkazilgan tibbiy texnikalar yordamida amalga oshiriladi.

7. Qon va uning tarkibiy qismlari Oʻzbekiston Respublikasi Sogʻliqni saqlash vazirligi tomonidan belgilanadigan talablarga muvofiq uzluksiz haroratni saqlash va roʻyxatga olish tizimi mavjud boʻlgan maxsus muzlatgichlarda saqlanadi.

8. Qon va uning tarkibiy qismlari, shu jumladan, qon plazmasini 18 yoshga toʻlgan shaxslar tomonidan topshirilishiga ruxsat beriladi.

Qon va uning tarkibiy qismlarini topshiradigan shaxslarning salomatlik koʻrsatkichlari, sogʻligʻiga qoʻyiladigan talablar hamda ularni tibbiy koʻrikdan oʻtkazish tartibi Oʻzbekiston Respublikasi Sogʻliqni saqlash vazirligi tomonidan belgilanadi.

Qon va uning tarkibiy qismlarini topshirish oldidan shaxslarni tibbiy koʻrikdan oʻtkazish hamda ularning salomatligi toʻgʻrisidagi hujjat berish bepul amalga oshiriladi.

9. Qon va uning tarkibiy qismlarini topshirish chogʻida donor quyidagi huquqlarga ega:

sogʻligʻi saqlanishi kafolatining tibbiyot xodimlari tomonidan taʼminlanishi;

sogʻligʻiga yetkazilgan zararning oʻrni qoplanishi;

bepul ovqat bilan taʼminlanish.

Donor qonunchilikka muvofiq boshqa huquqlarga ham ega boʻlishi mumkin.

10. Qon va uning tarkibiy qismlari bepul va pulli asosda topshirilishi mumkin.

Qon va uning tarkibiy qismlarini toʻplash, tayyorlash, qayta ishlash, saqlash boʻyicha ixtisoslashtirilgan davlat tibbiyot tashkilotlari hamda qon plazmasidan dori vositalarini ishlab chiqarishga ixtisoslashtirilgan tashkilotlar donorlarga kelishuvga muvofiq qoʻshimcha kafolatlar hamda kompensatsiya toʻlovlarini belgilashi mumkin.

11. Qon bilan ishlash xizmati tashkilotlari Oʻzbekiston Respublikasi Sogʻliqni saqlash vazirligining elektron tizimiga ulanishi lozim.

12. Qon bilan ishlash xizmati qon va uning tarkibiy qismlari donorligini quyidagilar orqali tashkil etadi:

donor qoni, uning tarkibiy qismlari va preparatlarini toʻplash, tayyorlash, qayta ishlash, saqlash;

aholini qon va uning tarkibiy qismlarini ixtiyoriy ravishda topshirishga jalb etish;

donor qoni va uning tarkibiy qismlarini, shuningdek, donor qoni preparatlarini ishlab chiqarish va ulardan foydalanishning xavfsizlik sharoitlarini taʼminlash;

donor qoni va uning tarkibiy qismlarini, shuningdek, donor qoni preparatlarini xavfsiz tashishni tashkil etish;

donor qoni bankini yaratish va yangilab borish;

qon bilan ishlash xizmatini, donorlikni qon va uning tarkibiy qismlari donorligini, ularni tayyorlashni hamda klinik qoʻllanishni tashkil etish masalalari boʻyicha ilmiy-tadqiqot faoliyatini amalga oshirish;

qon va uning tarkibiy qismlari donorligi boʻyicha maʼlumotlarning yagona elektron bazasini shakllantirish;

qon va uning tarkibiy qismlarining ixtiyoriy bepul donorligini rivojlantirish boʻyicha tadbirkorlik subyektlari, nodavlat notijorat tashkilotlari, fuqarolarning oʻzini oʻzi boshqarish organlari bilan oʻzaro hamkorlik qilish.

Qon bilan ishlash xizmati qonunchilikka muvofiq boshqa vakolatlarni ham amalga oshirishi mumkin.

3-bob. Vazirliklar va idoralar, mahalliy ijro etuvchi hokimiyat organlarining qon bilan ishlash xizmati faoliyatini muvofiqlashtirish boʻyicha vakolatlari

13. Vazirliklar va idoralar rahbarlari oʻz vakolatlari doirasida:

shaxslarni donorlar safiga jalb etishda qon bilan ishlash xizmatiga koʻmaklashadilar;

donorning arizasiga binoan uni ish, xizmat yoki oʻqish joyidan tibbiy koʻrikdan oʻtish kunida, shuningdek, qon topshirish kunida sogʻliqni saqlash tashkilotlariga toʻsqinliksiz yuboradilar, donorning ushbu kunlarda ish joyida yoki xizmat joyida boʻlmasligi odamlarning hayotiga yoki salomatligiga xavf solishiga, davlat mudofaasini, xavfsizligini va jamoat tartibini taʼminlash bilan bogʻliq vazifalarning bajarilmasligiga yoki boshqa ogʻir oqibatlarga olib kelishi mumkin boʻlgan holatlar bundan mustasno;

qon topshirishni tashkil etish uchun zarur xonalar taqdim etadilar;

donorga qonunchilikda belgilangan kafolatlarni beradilar va uni ragʻbatlantirish choralarini qoʻllaydilar.

Vazirliklar va idoralar qon va uning tarkibiy qismlari donorligi sohasida qonunchilikka muvofiq boshqa vakolatlarni ham amalga oshirishlari mumkin.

14. Mahalliy ijro etuvchi hokimiyat organlari oʻz vakolatlari doirasida:

donor qoni va uning tarkibiy qismlari toʻgʻrisidagi qonunchilikning bajarilishini taʼminlaydilar;

oʻz hududlarida qon va uning tarkibiy qismlari donorligini tashkil etadilar;

qon va uning tarkibiy qismlari donorligini rivojlantirishga mahalliy budjetdan mablagʻlar ajratadilar.

Mahalliy ijro etuvchi hokimiyati organlari qon va uning tarkibiy qismlari donorligi sohasidagi qonunchilikka muvofiq boshqa vakolatlarni ham amalga oshirishlari mumkin.

4-bob. Favqulodda vaziyatlarda qon va uning tarkibiy qismlari donorligini tashkil etish

15. Favqulodda vaziyatlar xavfi paydo boʻlganda oʻz vaqtida harakatlanish, tegishli hududlarda qon va uning tarkibiy qismlari donorligini tashkil etish ishlariga tezkor rahbarlik qilish uchun Oʻzbekiston Respublikasi Sogʻliqni saqlash vazirligi tomonidan mahalliy ijro etuvchi hokimiyat organlari bilan birgalikda quyidagi tadbirlar amalga oshiriladi:

moʻljallanayotgan donorlar roʻyxatlarini aniqlashtirish;

shikastlanganlar uchun qon topshirish shoxobchalarini aniqlash va tashkil etish;

donor qonini tayyorlash boʻyicha koʻchma brigadalar tashkil etish;

donor qonini tayyorlash va tekshirish uchun reaktivlar va uskunalar zaxirasini yaratish;

aholi oʻrtasida qon donorligi boʻyicha tushuntirish ishlarini amalga oshirish;

donorlarga sifatli tibbiy xizmat koʻrsatilishini va donor qonini tayyorlashda sanitariya-epidemiologiya nazoratini taʼminlash.

16. Favqulodda vaziyatlarda donor qoni tarkibiy qismlariga hamda preparatlariga boʻlgan ehtiyoj ushbu Nizomga ilovaga muvofiq, ehtiyojning nomenklaturasi va hisobi boʻyicha Oʻzbekiston Respublikasi Sogʻliqni saqlash vazirligi tomonidan aniqlanadi.

17. Favqulodda holatlar va vaziyatlarda Vazirlar Mahkamasining qarori asosida qon xizmati nodavlat tashkilotlari zaxirasidagi qon plazmasi va qon preparatlari davlat zaxirasiga olinishi mumkin.

Bunda zaxiraga olingan qon plazmasi va qon preparatlari uchun ulgurji referent narxlardan yuqori boʻlmagan miqdorida kompensatsiya toʻlab beriladi.

5-bob. Qon bilan ishlash xizmatini moliyalashtirish

18. Qon bilan ishlash xizmatining davlat tashkilotlari faoliyati belgilangan tartibda, Davlat budjeti mablagʻlari va qonun bilan taqiqlanmagan boshqa manbalar hisobiga, nodavlat tashkilotlari faoliyati oʻzlarining mablagʻlari hisobiga moliyalashtiriladi.

6-bob. Yakunlovchi qoida

19. Ushbu Nizomning qoidalari buzilishida aybdor boʻlgan shaxslar qonunchilikka muvofiq javob beradi.

Donor qoni va uning tarkibiy qismlari bilan ishlash xizmati faoliyatini muvofiqlashtirish tartibi toʻgʻrisidagi nizomga ILOVA

Favqulodda vaziyatlarda donor qoni tarkibiy qismlariga hamda preparatlariga boʻlgan ehtiyojning

Donor qoni tarkibiy qismlari hamda preparatlari nomi Oʻlchov birligi 100 nafar jabrlanganlarni 5 kunlik davolash uchun ehtiyoj normasi Eritrotsitar massa litr 50,0 Yangi muzlatilgan plazma litr 100,0 Trombotsitlar konsentrati doza 20 Albumin 10% litr 40,0 Antistafilokok immunoglobulin doza 15 Qoqsholga qarshi immunoglobulin doza 50

2. 2-ilovaning 3-bandi beshinchi xatboshisi quyidagi tahrirda bayon etilsin:

“Donor qoni va uning tarkibiy qismlarini Oʻzbekiston Respublikasiga olib kirish va uning tashqarisiga olib chiqish favqulodda vaziyatlarda, shoshilinch insonparvarlik yordamini koʻrsatish va boshqa zarur holatlarda Oʻzbekiston Respublikasi Sogʻliqni saqlash vazirligining taklifiga binoan Vazirlar Mahkamasining qarorlari asosida amalga oshiriladi”.

Oʻzbekiston Respublikasining Bosh vaziri A. ARIPOV

Toshkent sh.,

2024-yil 22-aprel,

225-son

(Qonunchilik maʼlumotlari milliy bazasi, 23.04.2024-y., 09/24/225/0294-son; 03.07.2026-y., 09/26/353/0680-son)

lex.uz