UzbekAI

Ўзбекистон Республикаси Вазирлар Маҳкамасининг

қарори

НИЗОМ

Ўзбекистон Республикаси Энергетика бозорини ривожлантириш ва тартибга солиш агентлиги тўғрисидаги низомни тасдиқлаш ҳақида

Ўзбекистон Республикаси Президентининг «Энергетика соҳасини ислоҳ қилишнинг навбатдаги босқичини амалга ошириш чора-тадбирлари тўғрисида» 2023 йил 28 сентябрдаги ПФ-166-сон Фармони ҳамда «Энергетика бозорини ривожлантириш ва тартибга солиш агентлиги фаолиятини ташкил этиш чора-тадбирлари тўғрисида» 2024 йил 17 январдаги ПҚ-28-сон қарори ижросини таъминлаш мақсадида Вазирлар Маҳкамаси қарор қилади:

1. Қуйидагилар:

Ўзбекистон Республикаси Президентининг «Энергетика соҳасини ислоҳ қилишнинг навбатдаги босқичини амалга ошириш чора-тадбирлари тўғрисида» 2023 йил 28 сентябрдаги ПФ-166-сон Фармонига мувофиқ Ўзбекистон Республикаси Энергетика бозорини ривожлантириш ва тартибга солиш агентлиги (кейинги ўринларда — Агентлик) ташкил этилганлиги ҳамда унинг асосий вазифалари белгиланганлиги;

Ўзбекистон Республикаси Президентининг «Энергетика бозорини ривожлантириш ва тартибга солиш агентлиги фаолиятини ташкил этиш чора-тадбирлари тўғрисида» 2024 йил 17 январдаги ПҚ-28-сон қарорига мувофиқ Агентлик фаолиятининг асосий йўналишлари, ташкилий тузилмаси ва Агентликнинг фаолиятини самарали ташкил этиш бўйича «йўл харитаси» тасдиқланганлиги маълумот учун қабул қилинсин.

2. Қуйидагиларни назарда тутувчи Ўзбекистон Республикаси Энергетика бозорини ривожлантириш ва тартибга солиш агентлиги тўғрисидаги низом иловага мувофиқ тасдиқлансин:

Агентликнинг мақоми, асосий вазифалари ва функциялари;

Агентликнинг ҳуқуқлари ва жавобгарлиги;

Агентлик раҳбарларининг асосий функционал вазифалари ва жавобгарлиги;

Агентлик фаолиятини ташкил этиш тартиби;

Агентлик фаолияти самарадорлиги ва натижадорлигини баҳолаш мезонлари ва иш индикаторлари;

Агентликни молиялаштириш ва моддий-техник таъминлаш, унинг ходимлари меҳнатига ҳақ тўлаш ва моддий рағбатлантириш.

3. Мазкур қарорнинг бажарилишини назорат қилиш Энергетика бозорини ривожлантириш ва тартибга солиш агентлиги директори Ш.Х. Ходжаев зиммасига юклансин.

Вазирлар Маҳкамасининг 2024 йил 30 апрелдаги 252-сон қарорига ИЛОВА

Ўзбекистон Республикаси Энергетика бозорини ривожлантириш ва тартибга солиш агентлиги тўғрисида

1-боб. Умумий қоидалар

1. Мазкур Низом Энергетика бозорини ривожлантириш ва тартибга солиш агентлигининг (кейинги ўринларда — Агентлик) мақоми, асосий вазифалари, функциялари, ҳуқуқлари ва жавобгарлигини, фаолиятини ташкил этиш тартибини, шунингдек, Агентлик раҳбари ва унинг ўринбосари асосий функционал вазифалари ва жавобгарлигини белгилайди.

2. Агентлик энергетика бозорини ривожлантириш ва тартибга солиш соҳасида давлат сиёсатини амалга оширувчи мустақил республика ижро этувчи ҳокимият органи ҳисобланади.

3. Агентлик бевосита Вазирлар Маҳкамасига бўйсунади ва фаолияти юзасидан ҳисобот беради.

4. Агентлик ўз фаолиятида Ўзбекистон Республикасининг Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Вазирлар Маҳкамасининг қарорлари ва фармойишларига, шунингдек, ушбу Низом ва бошқа қонунчилик ҳужжатларига амал қилади.

5. Агентликнинг ўз ваколатлари доирасида қабул қилган қарорлари вазирликлар, идоралар, маҳаллий ижро ҳокимияти органлари, бошқа ташкилотлар, мансабдор шахслар ва фуқаролар томонидан ижро этилиши мажбурий ҳисобланади.

6. Агентлик Ўзбекистон Республикаси Давлат герби тасвири туширилган ва ўз номи давлат тилида ёзилган муҳрга ва бланкаларга, мустақил балансга, Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасида шахсий ғазна ҳисобварақларига, банк ҳисобварақларига, шу жумладан хорижий валютадаги шахсий ғазна ҳисобварақларига эга бўлади.

7. Агентликнинг расмий номи:

а) давлат тилида:

тўлиқ номи — Ўзбекистон Республикаси Энергетика бозорини ривожлантириш ва тартибга солиш агентлиги;

қисқартирилган номи — Энергетика бозори регулятори.

б) рус тилида:

тўлиқ номи — Агентство по развитию и регулированию энергетического рынка Республики Узбекистан;

қисқартирилган номи — Регулятор рынка энергетики.

в) инглиз тилида:

тўлиқ номи — Energy market development and regulatory agency of the Republic of Uzbekistan;

қисқартирилган номи — Energy market regulator.

8. Агентликнинг жойлашган жойи (почта манзили): Тошкент шаҳар, Миробод тумани, Ойбек кўчаси, 26-уй.

2-боб. Агентликнинг асосий вазифалари ва функциялари

9. Қуйидагилар Агентликнинг асосий вазифалари ҳисобланади:

электр энергиясининг рақобатга асосланган улгуржи ва чакана бозорларини (кейинги ўринларда — бозор) босқичма-босқич ташкил қилишни таъминлаш;

бозорда рақобатни қўллаб-қувватлаш, бозорнинг жозибадорлигини ҳамда талаб ва таклифнинг мутаносиблигини таъминлаш;

бозорнинг барча иштирокчилари учун тенг ҳуқуқ ва шаффофликни таъминловчи қонун-қоидаларга риоя этилиши устидан давлат назоратини ўрнатиш;

бозор иштирокчилари фаолиятини лицензиялаш, уларнинг лицензия шартларига амал қилишини назорат қилиш;

2026 йилдан бошлаб электр энергиясини узатиш ва тақсимлаш учун ҳамда зарур бўлган бошқа ҳолларда тегишли тарифлар ва тўловлар миқдорларини тасдиқлаш;

магистрал ва тақсимлаш электр тармоқларда юзага келадиган технологик йўқотишларнинг рухсат этилган меъёрларини тасдиқлаш;

бозор конъюнктураси ва энергия ресурсларига бўлган эҳтиёждан келиб чиққан ҳолда ишлаб чиқариш ҳажмларини оширишни режалаштириш ва инфратузилмани яратишга қаратилган узоқ муддатли инвестиция сиёсатини шакллантириш ва амалга оширишда иштирок этиш;

энергетика соҳасидаги қурилиш ва таъмирлаш ишларида маҳаллий товар ва хизматлар харид қилинишини рағбатлантирувчи механизмларни ишлаб чиқиш.

10. Агентлик ўзига юкланган асосий вазифаларга мувофиқ қуйидаги функцияларни амалга оширади:

а) бозорни босқичма-босқич ташкил қилишни таъминлаш соҳасида:

шаффоф ва рақобатли бозорни яратади;

электр энергиясини ишлаб чиқариш ва истеъмол қилишнинг мувозанатини таъминлашда иштирок этади;

бозор механизмларига ўтишнинг асосий босқичларини ва уларда кўзда тутилган муҳим шартлар ва қоидаларини назарда тутувчи норматив-ҳуқуқий ҳужжатлар лойиҳаларини тегишли вазирлик ва идоралар билан келишади ҳамда белгиланган тартибда Вазирлар Маҳкамасига киритади;

бозор муносабатларининг молиявий, иқтисодий ва ҳуқуқий сиёсатини юритади;

бозорни тартибга солишга доир норматив-ҳуқуқий ҳужжатлар ижросини мунтазам равишда таҳлил қилади, заруратга кўра уларга ўзгартириш ва қўшимчалар киритиш бўйича таклифлар тайёрлайди;

бозор иштирокчиларининг вазифалари, ҳуқуқ ва мажбуриятларини белгилайди;

б) бозорда рақобатни қўллаб-қувватлаш, бозорнинг жозибадорлигини ҳамда талаб ва таклифнинг мутаносиблигини таъминлаш соҳасида:

бозорнинг шаффоф, камситмасдан ва рақобат муҳитида ишлашига қаратилган норматив-ҳуқуқий ҳужжатлар лойиҳаларини, бозор концепцияси ва бошқа тегишли ҳужжатлар лойиҳаларини ишлаб чиқади;

бозор қоидаларини ишлаб чиқади, тегишли вазирлик ва идоралар билан келишади ҳамда белгиланган тартибда Вазирлар Маҳкамасига киритади;

бозор қоидаларини замон талабларига жавоб бериши бўйича изланишлар ўтказиб, уни доимий равишда такомиллаштириб боради;

электр энергиясининг улгуржи ва чакана савдо операциялари учун мўлжалланган онлайн савдо платформасини (кейинги ўринда — платформа) яратишда иштирок этади (техник топшириқ ишлаб чиқади) ҳамда уни самарали ишлашини таъминлаш ва доимий ривожлантириб бориш бўйича таклифлар ишлаб чиқади;

платформанинг дастурий таъминотини тест ва реал режимда ишга туширишни мувофиқлаштиради ва мунтазам равишда назорат қилади;

платформани Ўзбекистон Республикаси Миллий статистика қўмитаси маълумотлар базасига интеграция қилинишини мувофиқлаштиради ва мунтазам равишда маълумотлар алмашинувини назорат қилади;

ҳудудларда, шунингдек, тажриба-синов сифатида танланган ҳудудларда электр энергиясини улгуржи харид қилиш ва тақсимлаш тармоқларига уланган истеъмолчиларга сотиш ва (ёки) тақсимлаш тармоқларини эксплуатация қилиш функциясини хусусий секторга берилишини мувофиқлаштиради;

хусусий секторга қўйиладиган талабларни ишлаб чиқиш ва танланган ҳудудларда электр энергиясини сотиш ва (ёки) тақсимлаш тармоқларини эксплуатация қилиш бўйича инвесторларни аниқлаш жараёнини мувофиқлаштириш, шунингдек, улар билан тегишли шартномаларни расмийлаштириш жараёнини назорат қилади;

в) бозорнинг барча иштирокчилари учун тенг ҳуқуқ ва шаффофликни таъминловчи қонун-қоидаларга риоя этилиши устидан давлат назоратини ўрнатиш соҳасида:

бозор қоидаларини бузиш ҳолатларини аниқлайди, уларга чора кўриш ва бартараф этишнинг тегишли механизмларини, шу жумладан қоида ва кўрсатмаларини ишлаб чиқади;

бозор шаффофлигини ҳамда барча иштирокчилари учун тенг шароитлар яратилишини таъминлайди;

бозор фаолияти билан боғлиқ мониторингни мунтазам равишда олиб боради;

бозор иштирокчилари томонидан хизматлар кўрсатиш шартларини ишлаб чиқишда иштирок этади ҳамда бозор иштирокчилари ўртасидаги оммавий шартномаларнинг ушбу шартларга мувофиқлигини кўриб чиқади;

г) бозор иштирокчилари фаолиятини лицензиялаш, уларнинг лицензия шартларига амал қилишини назорат қилиш соҳасида:

бозор иштирокчилари фаолиятини лицензиялаш тартибини ишлаб чиқади ва тегишли норматив-ҳуқуқий ҳужжат лойиҳасини белгиланган тартибда Вазирлар Маҳкамасига киритади;

норматив-ҳуқуқий ҳужжатларда назарда тутилган шартларга асосан лицензиялар беради, уларга тегишли ўзгартиришлар киритади ва бекор қилади;

бозор иштирокчилари томонидан лицензия мажбуриятларининг бажарилишини мониторинг қилади ва уларнинг лицензия талабларига мувофиқлигини мунтазам назорат қилади;

лицензия талаблари ва шартларига бозор иштирокчиларининг риоя этишини текширишни Ўзбекистон Республикаси Президенти ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил билан келишилган ёки уни хабардор қилган ҳолда жойига чиққан ҳолда ўтказади;

лицензиялар реестрини яратади ҳамда уларнинг ҳисобини юритиш, назорат қилиш юзасидан тегишли талабларни ишлаб чиқади ва тасдиқлайди;

лицензиянинг йиллик даврий йиғимлари ставкалари бўйича таклифларни ишлаб чиқади ва Вазирлар Маҳкамасига тасдиқлаш учун киритади;

электр энергиясини ишлаб чиқариш, узатиш ва тақсимлаш фаолиятларини юритиш учун лицензия берилган бозор иштирокчилари тўғрисидаги маълумотлар базасини Ўзбекистон Республикаси Миллий статистика қўмитаси билан интеграция қилади ҳамда маълумотларни доимий янгилаб боради;

тартибга солинадиган фаолият турлари бўйича лицензия тўловини ҳисоблаш ва бозор иштирокчилари томонидан уларни тўлаш тартиби тўғрисидаги низомни ишлаб чиқади ва Вазирлар Маҳкамасига киритади;

лицензиатларни тартибга солинадиган фаолият турлари бўйича аудит қилиш қоидаларини ишлаб чиқади ва қабул қилади;

текширувлар натижалари асосида бозор иштирокчилари томонидан бозор талаблари ва шартларига доир қоидабузарликлар аниқланганда, уларнинг мулкдор шахсига ёки раҳбар шахсига нисбатан тегишли чора ва санкциялар қўллаш тўғрисида далолатномалар расмийлаштиради ва қарорлар қабул қилади;

д) 2026 йилдан бошлаб электр энергиясини узатиш ва тақсимлаш учун ҳамда зарур бўлган бошқа ҳолларда тегишли тарифлар ва тўловлар миқдорларини тасдиқлаш соҳасида:

2026 йилга қадар Идоралараро тариф комиссияси томонидан тарифларни белгилашда бевосита иштирок этади ва келишади;

аҳоли учун электр энергияси тарифларини белгилашда ижтимоий ҳимоя механизмларини жорий этади;

тарифларни белгилашда энергетика соҳасида амалга ошириладиган инвестиция режаларини инобатга олади;

2026 йил 1 январдан бошлаб амалдаги қонунчилик ҳужжатларига мувофиқ тариф ва тўловлар миқдорини белгилаш юзасидан таклифларни Вазирлар Маҳкамасига киритади;

е) магистрал ва тақсимлаш электр тармоқларда юзага келадиган технологик йўқотишларнинг (кейинги ўринларда — технологик йўқотишлар) рухсат этилган меъёрларини тасдиқлаш соҳасида:

технологик йўқотишлар меъёрларини ҳисоблаш қоидаларини ишлаб чиқади ва Вазирлар Маҳкамасига киритади;

технологик йўқотишларни камайтириш бўйича таклифлар ишлаб чиқади;

технологик йўқотишлар меъёрларини тасдиқланган қоидалар асосида белгилайди;

технологик йўқотишлар тўғрисидаги маълумотларни Республика энергетика балансини шакллантиришда фойдаланиш учун тегишли вазирлик ва идораларга мунтазам равишда тақдим этиб боради;

ж) бозор конъюнктураси ва энергия ресурсларига бўлган эҳтиёждан келиб чиққан ҳолда ишлаб чиқариш ҳажмларини оширишни режалаштириш ва инфратузилмани яратишга қаратилган узоқ муддатли инвестиция сиёсатини шакллантириш ва амалга оширишда иштирок этиш соҳасида:

таклиф этилаётган инвестиция лойиҳаларининг якуний истеъмолчилар тарифларига таъсирини баҳолайди;

ҳудудлардаги талабдан келиб чиққан ҳолда инвестицияларнинг тенг тақсимланиши бўйича таклифлар ишлаб чиқади;

таклиф этилаётган инвестиция лойиҳаларининг бозорда рақобат ва нархлардаги ўзгаришлар тўғрисидаги хабарлар келиб тушиши тартибининг бузилишига йўл қўймаслик таъсирини баҳолайди;

хусусий электр станциялари қурилишида давлат кафолатисиз инвестициялар жалб қилинишини жадаллаштириш бўйича таклифлар ишлаб чиқади;

з) энергетика соҳасидаги қурилиш ва таъмирлаш ишларида маҳаллий товар ва хизматлар харид қилинишини рағбатлантирувчи механизмларни ишлаб чиқиш соҳасида:

инвестицияларни баҳолаш, шу жумладан электр энергетикаси соҳасида қурилиш ва таъмирлаш ишлари учун маҳаллий товарлар ва хизматларни харид қилишни рағбатлантириш механизмларини ишлаб чиқади;

қонунчилик ҳужжатларида белгиланган бошқа вазифаларни бажаради.

3-боб. Агентликнинг ҳуқуқлари ва жавобгарлиги

11. Агентлик ўзига юкланган вазифаларни бажариш учун қуйидаги ҳуқуқларга эгадир:

1) Вазирлар Маҳкамасига ёки Ўзбекистон Республикаси Президенти Администрациясига норматив-ҳуқуқий ҳужжатлар лойиҳаларини, шунингдек, Агентликка юкланган вазифалар ва функцияларни бажариш билан боғлиқ бўлган бошқа ҳужжатларни белгиланган тартибда киритиш;

2) республика ва маҳаллий ижро ҳокимияти органлари, бошқа ташкилотлар, мансабдор шахслар ва фуқаролар томонидан бажарилиши мажбурий бўлган норматив-ҳуқуқий ҳужжатларни қабул қилиш, зарур ҳолларда, бошқа вазирлик ва идоралар билан биргаликда қўшма қарорлар ва бошқа ҳужжатлар қабул қилиш;

3) бозор иштирокчилари фаолиятини жойларга чиққан ҳолда ўрганиш ва текширишлар ўтказиш;

4) республика ва маҳаллий ижро этувчи ҳокимияти органлари, бошқа ташкилотлар, мансабдор шахслар ва фуқароларга бажарилиши мажбурий бўлган тақдимнома, кўрсатма ва ёзма равишда огоҳлантиришлар киритиш;

5) аниқланган қонунбузилиш ҳолатлари бўйича айбдор мансабдор шахсларни жавобгарликка тортиш тўғрисида тегишли республика ижро этувчи ҳокимият органлари ва бошқа ташкилотларга таклифлар киритиш;

6) республика ва маҳаллий ижро ҳокимияти органлари, бошқа ташкилотлар, мансабдор шахслар ва фуқаролар, шу жумладан бозор иштирокчилари фаолиятини мувофиқлаштириш;

7) зарур маълумотларни статистика ва солиқ органлари, давлат хизматлари маркази ва бошқа вазирлик ва идоралардан бепул тарзда сўраш ва олиш;

8) таклифларни кўриб чиқиш учун Вазирлар Маҳкамасига, республика ва маҳаллий ижро этувчи ҳокимият органлари ҳамда хўжалик жамиятларига киритиш;

9) норматив-ҳуқуқий ҳужжатлар лойиҳаларини тайёрлаш бўйича режаларни ва (ёки) дастурларни Вазирлар Маҳкамасига киритиш;

10) хорижий энергетика ташкилотлари, фан ва таълим муассасалари билан ҳамкорлик олиб бориш;

11) норматив-ҳуқуқий ҳужжат лойиҳасини ишлаб чиқишда илмий муассаса ва бошқа ташкилотлар олимлари ва мутахассислари, шунингдек, маҳаллий ва хорижий экспертларни консультант сифатида ёллаш ва (ёки) уларнинг хулоса ва тавсияларини олиш;

12) республика ва маҳаллий ижро ҳокимияти органлари, бошқа ташкилотлар, шунингдек, халқаро молия институтлари, илмий муассасалар ва нодавлат нотижорат ташкилотлари вакиллари ҳамда фуқаролар иштирокида ишчи гуруҳ (комиссия) тузиш;

13) амалиётда қўллаш тажрибаси таҳлили, олинган тавсиялар ва халқаро тажриба асосида амалдаги норматив-ҳуқуқий ҳужжатларга ўзгартириш ва қўшимчалар киритиш бўйича ташаббус билан чиқиш;

14) зарур маълумотларни тўплаш, тартибга солиш амалиётини уйғунлаштириш, кўзда тутилган қарорларни асослаш ёки таклиф этилаётган ҳуқуқий ва меъёрий ечимларни баҳолаш учун зарур бўлганда жамоатчилик муҳокамасини ташкил этиш;

15) республика ва маҳаллий ижро ҳокимияти органлари, бошқа ташкилотлар, бозор иштирокчилари, мансабдор шахслар ва фуқароларга бозорда рақобат қоидаларини бузиш ҳолатларини бартараф этиш юзасидан бажарилиши мажбурий бўлган кўрсатмаларни кўриб чиқиш учун юбориш;

16) тарифларни тасдиқлаш бўйича келиб тушган аризаларнинг асосланганлигини текшириш бўйича аудит ўтказилиши тўғрисида бозор иштирокчиларига хабарнома юбориш;

17) бозор фаолияти юзасидан текширувларни белгилаш ва ўтказиш ҳамда рақобатни қўллаб-қувватлаш, бозорнинг талаб даражасида ишлашини таъминлаш бўйича зарур ва мутаносиб чораларни кўриш;

18) бозор иштирокчиларининг фаолияти устидан шикоят келиб тушган тақдирда ёки режадаги ўрганишлар давомида бозор қоидаларига риоя этмаслик ҳолатлари аниқланганда, бозор иштирокчиларидан ўз хизматларига мутаносиблигини ва камситмасдан қўлланилишини таъминлаш учун улар томонидан қўлланиладиган шартлар, шу жумладан тарифлар ва нархларни ўзгартиришни талаб қилиш;

19) бозор иштирокчилари томонидан лицензия талаблари ва шартларига риоя этилишини назорат қилиш;

20) қуйидаги ҳолатларда юзага келадиган низоларни ҳал қилинишида:

а) лицензиатнинг ўз фаолиятини бажариши юзасидан бошқа лицензиатга қарши давоси мавжудлигида;

б) учинчи томоннинг тарқатиш ва (ёки) узатиш тармоғига уланишида муаммо юзага келганда;

в) энергетика корхоналари ўртасидаги ёки энергетика корхоналари билан жисмоний ёки юридик шахслар ўртасидаги тариф ва тўловларнинг қўлланилишидаги қоидабузарликлар юзага келганда;

г) бозор иштирокчилари томонидан электр энергиясининг сифат кўрсаткичлари таъминланмаганда ёки магистрал ва тақсимлаш тармоқларидан фойдаланиш қоидалари бузилганда;

д) Агентликнинг қарорларини амалга ошириш талаблари бажарилиши билан боғлиқ бошқа ҳар қандай низолар, сўровлар ва шикоятлар юзага келганда иштирок этиш;

21) бозор иштирокчиларига ва бошқа шахсларга қонунчилик ҳужжатларига мувофиқ тегишли чораларни қўллаш;

Агентлик қонунчилик ҳужжатларига мувофиқ бошқа ҳуқуқларга ҳам эга бўлиши мумкин.

12. Агентлик:

1) тегишли соҳадаги фаолиятнинг асосий кўрсаткичлари бўйича параметрларга эришилишини самарали таъминлаш;

2) амалга оширилаётган ислоҳотларнинг, шунингдек, Агентлик томонидан Ўзбекистон Республикаси Президенти Администрациясига ва Вазирлар Маҳкамасига киритиладиган, шунингдек, Агентлик томонидан қабул қилинадиган норматив-ҳуқуқий ҳужжатларнинг сифати, якуний натижалари ва амалга оширилишининг оқибатлари;

3) тегишли соҳани ривожлантириш ва ҳудудларнинг муаммоли масалаларини ҳал қилиш бўйича дастур, тадбирлар режаси, «йўл хариталари» ва бошқа ҳужжатларнинг самарали бажарилиши;

4) юридик ва жисмоний шахсларнинг мурожаатларини кўриб чиқиш ва белгиланган муддатларда уларга жавоб бериш;

5) мунтазам равишда ходимларни қайта тайёрлаш ва уларнинг малакасини ошириш;

6) меҳнат ва ички тартиб-қоидаларига риоя этиш;

7) тегишли соҳада фуқаролар ва тадбиркорлик субъектлари ҳуқуқлари ва қонуний манфаатларининг муҳофаза қилинишини таъминлаш учун жавобгардир.

4-боб. Агентлик раҳбарларининг асосий функционал вазифалари

13. Қуйидагилар Агентлик директорининг асосий функционал вазифалари ҳисобланади:

1) Ўзбекистон Республикаси Конституцияси ва қонунлари ҳамда бошқа норматив-ҳуқуқий ҳужжатлар талабларига риоя этиш;

2) Агентлик фаолиятига умумий раҳбарлик қилиш, Ўзбекистон Республикаси Президентининг тегишли ҳужжатлари, Вазирлар Маҳкамасининг қарорлари ва бошқа қонунчилик ҳужжатлари билан Агентликка юкланган вазифа ва функциялар бажарилишини ташкил этиш;

3) Ўзбекистон Республикаси Президенти, Ўзбекистон Республикасининг Бош вазири топшириқларини бажариш;

4) ўз ўринбосари ва Агентликнинг бошқа мансабдор шахслари ваколатларини белгилаш ва вазифаларни тақсимлаши;

5) Агентлик фаолияти режалаштирилишини ташкил этиш, Агентликнинг даврий иш режаларини тасдиқлаши, уларнинг бажарилиши юзасидан назоратни таъминлаш;

6) Ўзбекистон Республикаси Президенти, Вазирлар Маҳкамаси топшириқларига ва ўз ташаббусига кўра норматив-ҳуқуқий ҳужжатлар лойиҳаларини сифатли ишлаб чиқилишини, улар Ўзбекистон Республикасининг «Норматив-ҳуқуқий ҳужжатлар тўғрисида»ги Қонуни , Ўзбекистон Республикаси Президенти Администрациясининг Регламенти ва Вазирлар Маҳкамасининг Регламенти талабларига мувофиқ равишда ўз вақтида киритилишини ташкил этиш, уларнинг Вазирлар Маҳкамасида пухта ишланишида, Вазирлар Маҳкамаси раҳбарияти ҳузурида ҳимоя қилинишида ва Ўзбекистон Республикаси Президенти Администрациясида қўриб чиқилишида иштирок этиш;

7) Агентлик ваколатига кирадиган масалалар бўйича кўрсатмалар чиқариш, буйруқлар ва норматив-ҳуқуқий ҳужжатларни қабул қилиш, зарур бўлганда бошқа вазирлик ва идоралар билан биргаликда тегишли қарорлар қабул қилиш;

8) Агентлик раҳбарлари ва ходимлари хизмат сафарларини Ўзбекистон Республикаси Президентининг « Мансабдор шахсларнинг хорижий мамлакатларга чиқиш тартибини такомиллаштириш чоралари тўғрисида » 2014 йил 5 мартдаги ПҚ-2142-сон ва «Хорижий хизмат сафарларида бўлиш самарадорлиги ва хорижий делегацияларнинг Ўзбекистон Республикасига ташрифларини ташкил этиш учун мансабдор шахсларнинг шахсий масъулиятини янада ошириш чора-тадбирлари тўғрисида» 2017 йил 3 августдаги ПҚ-3170-сон қарорлари талабларига мувофиқ ташкил этиш, хизмат сафарларининг асосланганлиги, самарадорлиги ва натижадорлигини, сафар учун ажратиладиган маблағлардан мақсадли ва оқилона фойдаланишни таъминлаш;

9) Агентлик ходимлари томонидан Вазирлар Маҳкамасининг 2022 йил 14 октябрдаги 595-сон қарори билан тасдиқланган Давлат фуқаролик хизматчилари одоб-ахлоқининг намунавий қоидалари асосида тасдиқланган Агентлик ходимларининг одоб-ахлоқ қоидалари талабларига риоя этилишини таъминлашни назорат қилиш;

10) жисмоний ва юридик шахсларнинг мурожаатларини кўриб чиқиш бўйича ишларни Ўзбекистон Республикасининг «Жисмоний ва юридик шахсларнинг мурожаатлари тўғрисида»ги Қонуни , Вазирлар Маҳкамасининг 2018 йил 7 майдаги 341-сон қарори билан тасдиқланган Давлат органларида, давлат муассасаларида ва давлат иштирокидаги ташкилотларда жисмоний ва юридик шахсларнинг мурожаатлари билан ишлаш тартиби тўғрисидаги намунавий низомга мувофиқ самарали ташкил этиш, жамоатчилик билан бевосита ва очиқ мулоқот ўрнатиш, шахсий қабуллар ўтказиш, шу жумладан, жисмоний ва юридик шахсларнинг вакилларини жойларга бориб қабул қилишни ташкил этиш;

11) давлат органлари ва бошқа ташкилотларда, Ўзбекистон Республикаси судларида, шунингдек, давлат органлари, халқаро ташкилотлар ва хорижий мамлакат вакиллари иштирокида ўтказиладиган расмий тадбирларда Агентлик номидан иштирок этиш;

12) Ўзбекистон Республикасининг «Коррупцияга қарши курашиш тўғрисида»ги Қонуни ва коррупцияга қарши курашишга доир бошқа қонунчилик ҳужжатларига риоя этиш, фаолиятда коррупциявий хавф-хатарларни ва манфаатлар тўқнашувини ўз вақтида аниқлаш ҳамда уларга чек қўйиш, коррупцияга оид ҳуқуқбузарликларнинг олдини олиш чораларини кўриш ҳамда тизимда коррупциянинг олдини олиш ва унга қарши муросасиз курашишга доир ишларга раҳбарлик қилиш ва мувофиқлаштириш;

13) Ўзбекистон Республикаси Президентининг Халқ қабулхоналари билан самарали ҳамкорлик қилишни ташкил этиш, Агентлик раҳбарлари ва ходимлари уларнинг фаолиятида фаол иштирок этишини, жисмоний ва юридик шахсларнинг Ўзбекистон Республикаси Президентининг Виртуал қабулхонасидан келиб тушган мурожаатларини ўз вақтида ва тўлақонли кўриб чиқилишини таъминлаш;

14) Агентлик Ҳайъат мажлисларида раислик қилиш;

15) Агентликка юкланган вазифаларни бажариш учун шартнома асосида жалб этиладиган малакали маҳаллий ва хорижий мутахассислар хизматига ҳақ тўлаш шартларини халқаро амалиёт ва бозор шароитларидан келиб чиққан ҳолда белгилаш ҳамда уларга Энергетика бозорини ривожлантириш жамғармаси (кейинги ўринларда — Жамғарма) маблағлари ҳисобидан иш ҳақи ва бошқа тўловларни белгилаш;

16) Агентлик ходимларни уларнинг кўп йиллик ва самарали фаолияти, алоҳида хизматлари учун Ўзбекистон Республикаси давлат мукофотлари билан тақдирлаш учун белгиланган тартибда таклифлар киритишни таъминлаш ва тавсиялар бериш;

17) Агентлик мулкини қонунчилик ҳужжатларида белгиланган тартибда тасарруф этиш;

18) Агентлик ваколатига кирадиган масалалар юзасидан Ўзбекистон Республикасининг халқаро шартномаларини белгиланган тартибда имзолаш;

19) Агентликнинг ички ташкилий масалалари юзасидан қарорлар қабул қилиш;

20) Агентлик номидан бозор иштирокчиларига ёзма сўровлар юбориш;

21) Агентлик ходимларини лавозимга тайинлаш ва лавозимидан озод этиш, меҳнат шартномалари (буйруқлари)ни имзолаш;

22) Агентлик ходимларига вазифаларни юклаш;

23) Агентлик ходимларининг малакасини ошириш ва уларни хорижий давлатларга стажировка ва тажриба алмашиш учун юборишни ташкил этиш;

24) Агентлик ходимларини рағбатлантириш ва интизомий жавобгарликка тортиш масалаларини ҳал қилиш, ўз ўринбосарини рағбатлантириш ва интизомий жавобгарликка тортиш масалаларини, шу жумладан, келгусида унинг эгаллаб турган лавозимида қолишининг мақсадга мувофиқлиги масалаларини кўриб чиқиш бўйича таклифлар киритиш, унинг шахсий жавобгарлигини ошириш бўйича тизимли чораларни амалга ошириш;

25) Агентликнинг ташқи ва ички ташкилий фаолияти устидан доимий ва қатъий назорат ўрнатиш;

26) Агентликка киритилган таклифлар ва тақдим этилган норматив-ҳуқуқий ҳужжатлар лойиҳаларининг тўлиқ ва ҳар томонлама кўриб чиқилишини, Ўзбекистон Республикаси Президенти Администрацияси Регламенти ва Ўзбекистон Республикаси Вазирлар Маҳкамасининг Регламентида белгиланган муддатларда келишилиши (виза қўйилиши)ни таъминлаш;

27) давлат сирлари тоифасига киритилган ва махфий ахборот билан ишлашда қонунчилик талабларига риоя қилиш;

28) ходимларнинг белгиланган чекланган сони доирасида Агентлик штатлар жадвалини, шунингдек, Ўзбекистон Республикасининг бюджет маблағлари ҳисобидан молиялаштирилаётган Агентликнинг харажатлари сметасини тасдиқлаш;

29) ушбу Низомда ва қонунчилик ҳужжатларида назарда тутилган бошқа ваколатларни амалга ошириш.

14. Қуйидагилар директор ўринбосарининг асосий функционал вазифалари ҳисобланади:

1) Ўзбекистон Республикаси Конституцияси ва қонунлари ҳамда бошқа норматив-ҳуқуқий ҳужжатлар талабларига риоя этиш;

2) Агентлик директори маълум сабабларга кўра (хизмат сафари, меҳнат таътили, бетоблиги даврида) йўқлигида унинг вазифаларини бажариш;

3) Агентликнинг ўзи назорат қиладиган таркибий тузилмалари фаолиятини мувофиқлаштириш, назорат ва бевосита раҳбарлик қилиш, ходимлар ўртасида вазифаларни тақсимлаш;

4) Агентлик фаолиятининг ўзи мутасаддилик қиладиган йўналишларини янада такомиллаштириш юзасидан Ўзбекистон Республикаси Президентининг ҳужжатлари ва Вазирлар Маҳкамаси қарорлари билан тасдиқланган комплекс дастур ва комплекс чора-тадбирлар ижросини танқидий ва чуқур таҳлил қилиш;

5) мутасаддилигидаги таркибий тузилмалар бўлинма раҳбарларининг ҳисоботларини мунтазам тинглаб бориш ва белгиланган кўрсаткичларга етишиш учун уларнинг шахсий жавобгарлигини ошириш;

6) Агентликнинг ва Агентлик директорининг буйруқ ва топшириқлари ижросини ўз вақтида ва сифатли таъминлаш;

7) Агентликка киритилган таклифлар ва тақдим этилган норматив-ҳуқуқий ҳужжатларнинг лойиҳаларини тўлиқ ва ҳар томонлама кўриб чиқиш;

8) ўзи назорат қиладиган идоравий мансуб тузилмаларда кадрларни белгиланган тартибда танлаш ва жой-жойига қўйиш бўйича директорга таклифлар тақдим этиш, уларнинг профессионаллиги, ўз ишини билиши, юксак даражадаги ишчанлик ва маънавий-ахлоқий фазилатларга эга бўлишини таъминлаш, уларнинг касбий малакасини ошириш чораларини кўриш, мутасаддилик қилинадиган таркибий тузилмаларда кадрлар захирасини шакллантириш чораларини кўриш;

9) Агентлик ходимлари томонидан Вазирлар Маҳкамасининг 2022 йил 14 октябрдаги 595-сон қарори билан тасдиқланган Давлат фуқаролик хизматчилари одоб-ахлоқининг намунавий қоидалари асосида тасдиқланган Агентлик ходимларининг одоб-ахлоқ қоидалари талабларига риоя этилишини таъминлайди;

10) жисмоний ва юридик шахсларнинг мурожаатларини кўриб чиқиш бўйича ишларни Ўзбекистон Республикасининг «Жисмоний ва юридик шахсларнинг мурожаатлари тўғрисида»ги Қонуни , Вазирлар Маҳкамасининг 2018 йил 7 майдаги 341-сон қарори билан тасдиқланган Давлат органларида, давлат муассасаларида ва давлат иштирокидаги ташкилотларда жисмоний ва юридик шахсларнинг мурожаатлари билан ишлаш тартиби тўғрисидаги намунавий низомга мувофиқ самарали ташкил этиш, жамоатчилик билан бевосита ва очиқ мулоқот ўрнатиш, шахсий қабуллар ўтказиш, шу жумладан, жисмоний ва юридик шахсларнинг вакилларини жойларга бориб қабул қилишни ташкил этиш;

11) бозорни ривожлантиришда ва тартибга солишда Агентлик фаолиятини такомиллаштириш бўйича амалий чоралар кўриш, ушбу соҳада қонунчиликни такомиллаштиришга доир таклифларни ишлаб чиқиб, кўриб чиқиш учун Агентлик директорига киритиш;

12) бозор муносабатлари жорий этилишини назарда тутадиган халқаро стандартларга мувофиқ электр энергетикаси соҳасидаги норматив базанинг тизимли асосда қайта кўриб чиқилишини ташкил этиш;

13) энергетика соҳасида давлат сиёсатининг асосий йўналишлари бўйича таклифлар тайёрлаш;

14) хорижий давлатлар, халқаро ва хорижий ташкилотлар билан электр энергетикаси бозорини ривожлантириш ва тартибга солиш масалалари бўйича ҳамкорлик қилиш;

15) давлат сирлари тоифасига киритилган ва махфий ахборот билан ишлашда қонунчилик талабларига риоя қилиш.

5-боб. Агентлик раҳбарларининг жавобгарлиги

15. Агентлик директори:

Агентликка юкланган вазифалар ва функциялар бажарилиши;

ушбу Низомнинг 12-бандида кўрсатилган Агентликнинг жавобгарлик соҳалари бўйича;

ушбу Низомнинг 13-бандида кўрсатилган ўз функционал вазифаларининг сифатли бажарилиши учун шахсан жавобгардир.

16. Агентлик директори ўринбосари:

мутасаддилик қилинадиган йўналиш ва таркибий бўлинмаларда Агентликка юкланган вазифалар ва функцияларнинг бажарилиши;

ушбу Низомнинг 12-бандида кўрсатилган Агентликнинг жавобгарлик соҳаларида мутасаддилик қилинадиган масалалар бўйича;

ушбу Низомнинг 14-бандида кўрсатилган ўз функционал вазифаларининг сифатли бажарилиши учун шахсан жавобгардир.

6-боб. Агентлик фаолиятини ташкил этиш

1-§. Агентлик раҳбарияти

17. Агентлик директори ва унинг ўринбосари Ўзбекистон Республикаси Бош вазирининг тақдимномасига асосан Ўзбекистон Республикаси Президенти томонидан лавозимга тайинланади ва лавозимдан озод этилади.

18. Агентлик директори мақоми, тиббий ва транспорт хизмати кўрсатиш шартлари бўйича вазирга, Агентлик директори ўринбосари эса — вазир ўринбосарига тенглаштирилади.

19. Агентлик директори маълум сабабларга кўра (хизмат сафари, меҳнат таътили, бетоблиги даврида) йўқлигида унинг ўринбосари Агентлик директорининг вазифаларини бажаради.

2-§. Республика ва маҳаллий ижро ҳокимияти органлари ҳамда бошқа ташкилотлар билан ўзаро ҳамкорлик

20. Агентлик ўз фаолиятини республика ва маҳаллий ижро ҳокимияти органлари ҳамда бошқа ташкилотлардан мустақил равишда амалга оширади ҳамда улар билан ўзаро ҳамкорлик қилади.

21. Ўзбекистон Республикасининг республика ва маҳаллий ижро ҳокимияти органлари ҳамда бошқа ташкилотлар томонидан тайёрланадиган қуйидаги ҳужжатлар Агентлик билан мажбурий тарзда келишилади:

электр энергетикаси соҳасида амалга оширилаётган барча лойиҳалар, жумладан, давлат-хусусий шериклик асосидаги лойиҳаларнинг техник-иқтисодий кўрсаткичлари;

электр энергиясини ишлаб чиқариш ва истеъмол қилиш баланси;

электр энергиясини ишлаб чиқариш, узатиш ва тақсимлашдаги технологик йўқотишлар меъёрлари;

бозор фаолиятига таъсир этувчи норматив-ҳуқуқий ҳужжатлар лойиҳалари.

22. Агентлик директори Вазирлар Маҳкамаси ҳузуридаги Идоралараро тариф комиссиясининг доимий аъзоси бўлиб, мазкур комиссия раиси ўринбосари ҳисобланади.

3-§. Агентлик ҳайъати

23. Агентликда директор (ҳайъат раиси), унинг ўринбосари (лавозим бўйича), шунингдек, Агентлик фаолиятининг асосий йўналишларини мувофиқлаштирувчи таркибий бўлинмалари раҳбарларидан иборат таркибда Ҳайъат ташкил этилади.

Ҳайъат таркибининг сони ва шахсий таркиби белгиланган тартибда Вазирлар Маҳкамаси томонидан тасдиқланади.

24. Ҳайъатга қуйидаги вазифалар юкланади:

Агентлик вазифаларининг энг муҳим самарадорлик кўрсаткичларини ишлаб чиқиш ва амалга оширилишини назорат қилиш;

Агентлик фаолияти билан боғлиқ долзарб масалаларнинг жойларда муҳокама этилишини таъминлаган ҳолда ҳайъатнинг кенгайтирилган мажлислари ўтказилишини ташкиллаштириш, шунингдек, юзага келган муаммоларни бартараф этиш бўйича тегишли қарорларни ишлаб чиқиш ва қабул қилиш;

Агентликнинг таркибига кирувчи лавозимлар номенклатурасини кўриб чиқиш ва тасдиқлаш;

Ўзбекистон Республикаси Президенти ва Вазирлар Маҳкамасининг қарор ва топшириқларида белгиланган вазифаларнинг ўз вақтида ва сифатли амалга оширилишини таъминлаш мақсадида Агентлик раҳбарлари ва ходимларининг ижро интизомини мустаҳкамлаш ва шахсий жавобгарлигини ошириш.

Ҳайъат, шунингдек, Агентлик ваколатига киритилган бошқа масалаларни ҳам кўриб чиқишга ҳақли.

25. Агентлик директори қарори билан қуйидагилар:

Ҳайъат иш режалари ва белгиланган вазифаларни бажариш муддатлари;

таклифлар ташаббуси билан чиқиш, лойиҳаларни бошлаш ва ҳисобот бериш тартиблари;

Ҳайъатнинг фаолиятини самарали таъминлаш учун Агентликнинг масъул таркибий бўлинмаларининг вазифалари тасдиқланиши мумкин.

26. Ҳайъат йиғилишига Агентлик ваколатига тегишли масалалар юзасидан республика ва маҳаллий ижро ҳокимияти органлари, бошқа ташкилотлар раҳбарлари ва эксперт мутахассислар таклиф этилиши мумкин.

27. Ҳайъат мажлиси аъзоларининг ярмидан кўпи иштирок этган тақдирда, ваколатли ҳисобланади. Ҳайъат қарорлари, оддий кўпчилик овози билан қабул қилинади.

28. Директор ва Ҳайъат аъзолари ўртасида келишмовчиликлар юзага келган тақдирда директор, ушбу келишмовчиликлар хусусида Вазирлар Маҳкамасига ва Ўзбекистон Республикаси Президент Администрациясига ахборот бериб, мустақил равишда қарор қабул қилади. Ҳайъат аъзолари ҳам ўз фикрларини Вазирлар Маҳкамасига ва Ўзбекистон Республикаси Президент Администрациясига билдиришлари мумкин.

29. Ҳайъат ўз фаолияти учун зарур бўлган ҳужжатлар, ҳисоботлар ва бошқа маълумотларни сўраб олишга ҳақли.

30. Ҳайъат қарорлари Ҳайъат раиси томонидан имзоланади ва Агентлик буйруғи (қарори) билан амалга оширилади.

7-боб. Агентлик фаолияти самарадорлиги ва натижадорлигини баҳолаш мезонлари ва иш индикаторлари

31. Агентлик фаолиятининг самарадорлиги мунтазам баҳоланади.

32. Агентлик фаолияти самарадорлиги ва натижадорлигига берилган баҳо Вазирлар Маҳкамаси томонидан тасдиқланадиган Агентлик фаолияти самарадорлиги ва натижадорлигини баҳолаш мезонлари ва иш индикаторларига асосланади.

33. Агентлик фаолияти самарадорлиги ва натижадорлигини баҳолаш якунлари бўйича:

Агентлик раҳбарлари ва ходимларини рағбатлантириш (мукофотлаш) ёки интизомий жавобгарликка тортиш;

Агентлик фаолиятида аниқланган камчиликларни бартараф этиш ва унинг фаолиятини янада такомиллаштириш чоралари кўрилади.

34. Агентлик фаолияти самарадорлиги ва натижадорлигини баҳолаш тартиби ва услуби қонунчилик ҳужжатлари билан белгиланади.

8-боб. Агентлик фаолиятини молиялаштириш ва моддий-техник таъминлаш, унинг ходимлари меҳнатига ҳақ тўлаш ва моддий рағбатлантириш

35. Лицензия йиғимларининг йиллик даврий тушумлари Жамғарманинг махсус ҳисобварағига ўтказилади ва Агентлик томонидан фойдаланилади. Бунда, йил якуни билан ушбу ҳисобварақдаги ортиб қолган маблағлар Давлат бюджетига ўтказилади.

36. Агентлик бозор қоидаларини бузганлик учун қўлланиладиган жарималардан тушадиган маблағларнинг Агентликда қолдирилган қисмидан қонунчиликда белгиланган тартибда ўз фаолияти учун фойдаланишга ҳақли.

37. Агентликни моддий-техника таъминоти, ходимлари меҳнатига ҳақ тўлаш ва уларни моддий рағбатлантириш бўйича харажатларни молиялаштириш Ўзбекистон Республикаси Давлат бюджети, Жамғарма маблағлари ва қонунчилик билан тақиқланмаган бошқа маблағлар ҳисобидан амалга оширилади.

38. Агентлик тузилмаси ва штатлар жадвали Агентлик директори томонидан тасдиқланади.

39. Агентлик ходимларига Энергетика вазирлигининг марказий аппарати ходимлари учун белгиланган меҳнатига ҳақ тўлаш шартлари татбиқ этилади. Бунда:

Агентлик ходимларининг иш ҳақи лавозим маоши, мукофот, қўшимча тўлов, устама ва қонунчиликда назарда тутилган бошқа тўловлардан иборат бўлади;

хизмат вазифасини сидқидилдан ва самарали бажариб келаётган Агентликнинг ходимларига директор томонидан Жамғарма маблағлари ҳисобидан шахсий устамалар белгиланади;

Жамғарма маблағлари ҳисобидан Агентлик ходимларига эгаллаб турган лавозимлари бўйича лавозим маошларига қонунчилик ҳужжатларида назарда тутилган бошқа тўловлардан қатъий назар, устама ва бошқа рағбатлантирувчи тўловлар директор томонидан белгиланади;

Жамғарма маблағлари ёки қонунчилик билан тақиқланмаган бошқа манбалар ҳисобидан байрам саналари муносабати билан штат жадвалига кўра, ходимлар лавозим маошига нисбатан мукофот тўланади.

40. Агентлик ходимларига Ўзбекистон Республикаси Давлат бюджети маблағлари ҳисобидан иш стажи учун (фақат асосий иш жойи бўйича) Энергетика вазирлигининг марказий аппарати ходимларига татбиқ этиладиган муддат ва фоизларда мукофот тўланади.

Узоқ муддат ишлаган йиллари учун мукофот олиш ҳуқуқини берувчи иш стажи Агентлик томонидан тасдиқланадиган тартибга мувофиқ ҳисобланади.

41. Агентлик ходимларига олдинги ташкилотларда берилган кўп йиллик хизматлари учун қўшимча ҳақ ва устамалар ҳамда мартаба даражалари сақланади.

9-боб. Якуний қоида

42. Агентликни қайта ташкил этиш ва тугатиш қонунчилик ҳужжатларида белгиланган тартибда амалга оширилади.

Ўзбекистон Республикасининг Бош вазири А. АРИПОВ

Тошкент ш.,

2024 йил 30 апрель,

252-сон

(Қонунчилик маълумотлари миллий базаси, 06.05.2024 й., 09/24/252/0324-сон; 08.08.2025 й., 09/25/504/0707-сон; 07.10.2025 й., 09/25/627/0901-сон; 21.07.2026 й., 09/26/393/0764-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

Oʻzbekiston Respublikasi Energetika bozorini rivojlantirish va tartibga solish agentligi toʻgʻrisidagi nizomni tasdiqlash haqida

Oʻzbekiston Respublikasi Prezidentining “Energetika sohasini isloh qilishning navbatdagi bosqichini amalga oshirish chora-tadbirlari toʻgʻrisida” 2023-yil 28-sentabrdagi PF-166-son Farmoni hamda “Energetika bozorini rivojlantirish va tartibga solish agentligi faoliyatini tashkil etish chora-tadbirlari toʻgʻrisida” 2024-yil 17-yanvardagi PQ-28-son qarori ijrosini taʼminlash maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Prezidentining “Energetika sohasini isloh qilishning navbatdagi bosqichini amalga oshirish chora-tadbirlari toʻgʻrisida” 2023-yil 28-sentabrdagi PF-166-son Farmoniga muvofiq Oʻzbekiston Respublikasi Energetika bozorini rivojlantirish va tartibga solish agentligi (keyingi oʻrinlarda — Agentlik) tashkil etilganligi hamda uning asosiy vazifalari belgilanganligi;

Oʻzbekiston Respublikasi Prezidentining “Energetika bozorini rivojlantirish va tartibga solish agentligi faoliyatini tashkil etish chora-tadbirlari toʻgʻrisida” 2024-yil 17-yanvardagi PQ-28-son qaroriga muvofiq Agentlik faoliyatining asosiy yoʻnalishlari, tashkiliy tuzilmasi va Agentlikning faoliyatini samarali tashkil etish boʻyicha “yoʻl xaritasi” tasdiqlanganligi maʼlumot uchun qabul qilinsin.

2. Quyidagilarni nazarda tutuvchi Oʻzbekiston Respublikasi Energetika bozorini rivojlantirish va tartibga solish agentligi toʻgʻrisidagi nizom ilovaga muvofiq tasdiqlansin:

Agentlikning maqomi, asosiy vazifalari va funksiyalari;

Agentlikning huquqlari va javobgarligi;

Agentlik rahbarlarining asosiy funksional vazifalari va javobgarligi;

Agentlik faoliyatini tashkil etish tartibi;

Agentlik faoliyati samaradorligi va natijadorligini baholash mezonlari va ish indikatorlari;

Agentlikni moliyalashtirish va moddiy-texnik taʼminlash, uning xodimlari mehnatiga haq toʻlash va moddiy ragʻbatlantirish.

3. Mazkur qarorning bajarilishini nazorat qilish Energetika bozorini rivojlantirish va tartibga solish agentligi direktori Sh.X. Xodjayev zimmasiga yuklansin.

Vazirlar Mahkamasining 2024-yil 30-apreldagi 252-son qaroriga ILOVA

Oʻzbekiston Respublikasi Energetika bozorini rivojlantirish va tartibga solish agentligi toʻgʻrisida

1-bob. Umumiy qoidalar

1. Mazkur Nizom Energetika bozorini rivojlantirish va tartibga solish agentligining (keyingi oʻrinlarda — Agentlik) maqomi, asosiy vazifalari, funksiyalari, huquqlari va javobgarligini, faoliyatini tashkil etish tartibini, shuningdek, Agentlik rahbari va uning oʻrinbosari asosiy funksional vazifalari va javobgarligini belgilaydi.

2. Agentlik energetika bozorini rivojlantirish va tartibga solish sohasida davlat siyosatini amalga oshiruvchi mustaqil respublika ijro etuvchi hokimiyat organi hisoblanadi.

3. Agentlik bevosita Vazirlar Mahkamasiga boʻysunadi va faoliyati yuzasidan hisobot beradi.

4. Agentlik oʻz faoliyatida Oʻzbekiston Respublikasining Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek, ushbu Nizom va boshqa qonunchilik hujjatlariga amal qiladi.

5. Agentlikning oʻz vakolatlari doirasida qabul qilgan qarorlari vazirliklar, idoralar, mahalliy ijro hokimiyati organlari, boshqa tashkilotlar, mansabdor shaxslar va fuqarolar tomonidan ijro etilishi majburiy hisoblanadi.

6. Agentlik Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga va blankalarga, mustaqil balansga, Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasida shaxsiy gʻazna hisobvaraqlariga, bank hisobvaraqlariga, shu jumladan xorijiy valyutadagi shaxsiy gʻazna hisobvaraqlariga ega boʻladi.

7. Agentlikning rasmiy nomi:

a) davlat tilida:

toʻliq nomi — Oʻzbekiston Respublikasi Energetika bozorini rivojlantirish va tartibga solish agentligi;

qisqartirilgan nomi — Energetika bozori regulatori.

b) rus tilida:

toʻliq nomi — Agentstvo po razvitiyu i regulirovaniyu energeticheskogo rinka Respubliki Uzbekistan;

qisqartirilgan nomi — Regulator rinka energetiki.

v) ingliz tilida:

toʻliq nomi — Energy market development and regulatory agency of the Republic of Uzbekistan;

qisqartirilgan nomi — Energy market regulator.

8. Agentlikning joylashgan joyi (pochta manzili): Toshkent shahar, Mirobod tumani, Oybek koʻchasi, 26-uy.

2-bob. Agentlikning asosiy vazifalari va funksiyalari

9. Quyidagilar Agentlikning asosiy vazifalari hisoblanadi:

elektr energiyasining raqobatga asoslangan ulgurji va chakana bozorlarini (keyingi oʻrinlarda — bozor) bosqichma-bosqich tashkil qilishni taʼminlash;

bozorda raqobatni qoʻllab-quvvatlash, bozorning jozibadorligini hamda talab va taklifning mutanosibligini taʼminlash;

bozorning barcha ishtirokchilari uchun teng huquq va shaffoflikni taʼminlovchi qonun-qoidalarga rioya etilishi ustidan davlat nazoratini oʻrnatish;

bozor ishtirokchilari faoliyatini litsenziyalash, ularning litsenziya shartlariga amal qilishini nazorat qilish;

2026-yildan boshlab elektr energiyasini uzatish va taqsimlash uchun hamda zarur boʻlgan boshqa hollarda tegishli tariflar va toʻlovlar miqdorlarini tasdiqlash;

magistral va taqsimlash elektr tarmoqlarda yuzaga keladigan texnologik yoʻqotishlarning ruxsat etilgan meʼyorlarini tasdiqlash;

bozor konyunkturasi va energiya resurslariga boʻlgan ehtiyojdan kelib chiqqan holda ishlab chiqarish hajmlarini oshirishni rejalashtirish va infratuzilmani yaratishga qaratilgan uzoq muddatli investitsiya siyosatini shakllantirish va amalga oshirishda ishtirok etish;

energetika sohasidagi qurilish va taʼmirlash ishlarida mahalliy tovar va xizmatlar xarid qilinishini ragʻbatlantiruvchi mexanizmlarni ishlab chiqish.

10. Agentlik oʻziga yuklangan asosiy vazifalarga muvofiq quyidagi funksiyalarni amalga oshiradi:

a) bozorni bosqichma-bosqich tashkil qilishni taʼminlash sohasida:

shaffof va raqobatli bozorni yaratadi;

elektr energiyasini ishlab chiqarish va isteʼmol qilishning muvozanatini taʼminlashda ishtirok etadi;

bozor mexanizmlariga oʻtishning asosiy bosqichlarini va ularda koʻzda tutilgan muhim shartlar va qoidalarini nazarda tutuvchi normativ-huquqiy hujjatlar loyihalarini tegishli vazirlik va idoralar bilan kelishadi hamda belgilangan tartibda Vazirlar Mahkamasiga kiritadi;

bozor munosabatlarining moliyaviy, iqtisodiy va huquqiy siyosatini yuritadi;

bozorni tartibga solishga doir normativ-huquqiy hujjatlar ijrosini muntazam ravishda tahlil qiladi, zaruratga koʻra ularga oʻzgartirish va qoʻshimchalar kiritish boʻyicha takliflar tayyorlaydi;

bozor ishtirokchilarining vazifalari, huquq va majburiyatlarini belgilaydi;

b) bozorda raqobatni qoʻllab-quvvatlash, bozorning jozibadorligini hamda talab va taklifning mutanosibligini taʼminlash sohasida:

bozorning shaffof, kamsitmasdan va raqobat muhitida ishlashiga qaratilgan normativ-huquqiy hujjatlar loyihalarini, bozor konsepsiyasi va boshqa tegishli hujjatlar loyihalarini ishlab chiqadi;

bozor qoidalarini ishlab chiqadi, tegishli vazirlik va idoralar bilan kelishadi hamda belgilangan tartibda Vazirlar Mahkamasiga kiritadi;

bozor qoidalarini zamon talablariga javob berishi boʻyicha izlanishlar oʻtkazib, uni doimiy ravishda takomillashtirib boradi;

elektr energiyasining ulgurji va chakana savdo operatsiyalari uchun moʻljallangan onlayn savdo platformasini (keyingi oʻrinda — platforma) yaratishda ishtirok etadi (texnik topshiriq ishlab chiqadi) hamda uni samarali ishlashini taʼminlash va doimiy rivojlantirib borish boʻyicha takliflar ishlab chiqadi;

platformaning dasturiy taʼminotini test va real rejimda ishga tushirishni muvofiqlashtiradi va muntazam ravishda nazorat qiladi;

platformani Oʻzbekiston Respublikasi Milliy statistika qoʻmitasi maʼlumotlar bazasiga integratsiya qilinishini muvofiqlashtiradi va muntazam ravishda maʼlumotlar almashinuvini nazorat qiladi;

hududlarda, shuningdek, tajriba-sinov sifatida tanlangan hududlarda elektr energiyasini ulgurji xarid qilish va taqsimlash tarmoqlariga ulangan isteʼmolchilarga sotish va (yoki) taqsimlash tarmoqlarini ekspluatatsiya qilish funksiyasini xususiy sektorga berilishini muvofiqlashtiradi;

xususiy sektorga qoʻyiladigan talablarni ishlab chiqish va tanlangan hududlarda elektr energiyasini sotish va (yoki) taqsimlash tarmoqlarini ekspluatatsiya qilish boʻyicha investorlarni aniqlash jarayonini muvofiqlashtirish, shuningdek, ular bilan tegishli shartnomalarni rasmiylashtirish jarayonini nazorat qiladi;

v) bozorning barcha ishtirokchilari uchun teng huquq va shaffoflikni taʼminlovchi qonun-qoidalarga rioya etilishi ustidan davlat nazoratini oʻrnatish sohasida:

bozor qoidalarini buzish holatlarini aniqlaydi, ularga chora koʻrish va bartaraf etishning tegishli mexanizmlarini, shu jumladan qoida va koʻrsatmalarini ishlab chiqadi;

bozor shaffofligini hamda barcha ishtirokchilari uchun teng sharoitlar yaratilishini taʼminlaydi;

bozor faoliyati bilan bogʻliq monitoringni muntazam ravishda olib boradi;

bozor ishtirokchilari tomonidan xizmatlar koʻrsatish shartlarini ishlab chiqishda ishtirok etadi hamda bozor ishtirokchilari oʻrtasidagi ommaviy shartnomalarning ushbu shartlarga muvofiqligini koʻrib chiqadi;

g) bozor ishtirokchilari faoliyatini litsenziyalash, ularning litsenziya shartlariga amal qilishini nazorat qilish sohasida:

bozor ishtirokchilari faoliyatini litsenziyalash tartibini ishlab chiqadi va tegishli normativ-huquqiy hujjat loyihasini belgilangan tartibda Vazirlar Mahkamasiga kiritadi;

normativ-huquqiy hujjatlarda nazarda tutilgan shartlarga asosan litsenziyalar beradi, ularga tegishli oʻzgartirishlar kiritadi va bekor qiladi;

bozor ishtirokchilari tomonidan litsenziya majburiyatlarining bajarilishini monitoring qiladi va ularning litsenziya talablariga muvofiqligini muntazam nazorat qiladi;

litsenziya talablari va shartlariga bozor ishtirokchilarining rioya etishini tekshirishni Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil bilan kelishilgan yoki uni xabardor qilgan holda joyiga chiqqan holda oʻtkazadi;

litsenziyalar reyestrini yaratadi hamda ularning hisobini yuritish, nazorat qilish yuzasidan tegishli talablarni ishlab chiqadi va tasdiqlaydi;

litsenziyaning yillik davriy yigʻimlari stavkalari boʻyicha takliflarni ishlab chiqadi va Vazirlar Mahkamasiga tasdiqlash uchun kiritadi;

elektr energiyasini ishlab chiqarish, uzatish va taqsimlash faoliyatlarini yuritish uchun litsenziya berilgan bozor ishtirokchilari toʻgʻrisidagi maʼlumotlar bazasini Oʻzbekiston Respublikasi Milliy statistika qoʻmitasi bilan integratsiya qiladi hamda maʼlumotlarni doimiy yangilab boradi;

tartibga solinadigan faoliyat turlari boʻyicha litsenziya toʻlovini hisoblash va bozor ishtirokchilari tomonidan ularni toʻlash tartibi toʻgʻrisidagi nizomni ishlab chiqadi va Vazirlar Mahkamasiga kiritadi;

litsenziatlarni tartibga solinadigan faoliyat turlari boʻyicha audit qilish qoidalarini ishlab chiqadi va qabul qiladi;

tekshiruvlar natijalari asosida bozor ishtirokchilari tomonidan bozor talablari va shartlariga doir qoidabuzarliklar aniqlanganda, ularning mulkdor shaxsiga yoki rahbar shaxsiga nisbatan tegishli chora va sanksiyalar qoʻllash toʻgʻrisida dalolatnomalar rasmiylashtiradi va qarorlar qabul qiladi;

d) 2026-yildan boshlab elektr energiyasini uzatish va taqsimlash uchun hamda zarur boʻlgan boshqa hollarda tegishli tariflar va toʻlovlar miqdorlarini tasdiqlash sohasida:

2026-yilga qadar Idoralararo tarif komissiyasi tomonidan tariflarni belgilashda bevosita ishtirok etadi va kelishadi;

aholi uchun elektr energiyasi tariflarini belgilashda ijtimoiy himoya mexanizmlarini joriy etadi;

tariflarni belgilashda energetika sohasida amalga oshiriladigan investitsiya rejalarini inobatga oladi;

2026-yil 1-yanvardan boshlab amaldagi qonunchilik hujjatlariga muvofiq tarif va toʻlovlar miqdorini belgilash yuzasidan takliflarni Vazirlar Mahkamasiga kiritadi;

e) magistral va taqsimlash elektr tarmoqlarda yuzaga keladigan texnologik yoʻqotishlarning (keyingi oʻrinlarda — texnologik yoʻqotishlar) ruxsat etilgan meʼyorlarini tasdiqlash sohasida:

texnologik yoʻqotishlar meʼyorlarini hisoblash qoidalarini ishlab chiqadi va Vazirlar Mahkamasiga kiritadi;

texnologik yoʻqotishlarni kamaytirish boʻyicha takliflar ishlab chiqadi;

texnologik yoʻqotishlar meʼyorlarini tasdiqlangan qoidalar asosida belgilaydi;

texnologik yoʻqotishlar toʻgʻrisidagi maʼlumotlarni Respublika energetika balansini shakllantirishda foydalanish uchun tegishli vazirlik va idoralarga muntazam ravishda taqdim etib boradi;

j) bozor konyunkturasi va energiya resurslariga boʻlgan ehtiyojdan kelib chiqqan holda ishlab chiqarish hajmlarini oshirishni rejalashtirish va infratuzilmani yaratishga qaratilgan uzoq muddatli investitsiya siyosatini shakllantirish va amalga oshirishda ishtirok etish sohasida:

taklif etilayotgan investitsiya loyihalarining yakuniy isteʼmolchilar tariflariga taʼsirini baholaydi;

hududlardagi talabdan kelib chiqqan holda investitsiyalarning teng taqsimlanishi boʻyicha takliflar ishlab chiqadi;

taklif etilayotgan investitsiya loyihalarining bozorda raqobat va narxlardagi oʻzgarishlar toʻgʻrisidagi xabarlar kelib tushishi tartibining buzilishiga yoʻl qoʻymaslik taʼsirini baholaydi;

xususiy elektr stansiyalari qurilishida davlat kafolatisiz investitsiyalar jalb qilinishini jadallashtirish boʻyicha takliflar ishlab chiqadi;

z) energetika sohasidagi qurilish va taʼmirlash ishlarida mahalliy tovar va xizmatlar xarid qilinishini ragʻbatlantiruvchi mexanizmlarni ishlab chiqish sohasida:

investitsiyalarni baholash, shu jumladan elektr energetikasi sohasida qurilish va taʼmirlash ishlari uchun mahalliy tovarlar va xizmatlarni xarid qilishni ragʻbatlantirish mexanizmlarini ishlab chiqadi;

qonunchilik hujjatlarida belgilangan boshqa vazifalarni bajaradi.

3-bob. Agentlikning huquqlari va javobgarligi

11. Agentlik oʻziga yuklangan vazifalarni bajarish uchun quyidagi huquqlarga egadir:

1) Vazirlar Mahkamasiga yoki Oʻzbekiston Respublikasi Prezidenti Administratsiyasiga normativ-huquqiy hujjatlar loyihalarini, shuningdek, Agentlikka yuklangan vazifalar va funksiyalarni bajarish bilan bogʻliq boʻlgan boshqa hujjatlarni belgilangan tartibda kiritish;

2) respublika va mahalliy ijro hokimiyati organlari, boshqa tashkilotlar, mansabdor shaxslar va fuqarolar tomonidan bajarilishi majburiy boʻlgan normativ-huquqiy hujjatlarni qabul qilish, zarur hollarda, boshqa vazirlik va idoralar bilan birgalikda qoʻshma qarorlar va boshqa hujjatlar qabul qilish;

3) bozor ishtirokchilari faoliyatini joylarga chiqqan holda oʻrganish va tekshirishlar oʻtkazish;

4) respublika va mahalliy ijro etuvchi hokimiyati organlari, boshqa tashkilotlar, mansabdor shaxslar va fuqarolarga bajarilishi majburiy boʻlgan taqdimnoma, koʻrsatma va yozma ravishda ogohlantirishlar kiritish;

5) aniqlangan qonunbuzilish holatlari boʻyicha aybdor mansabdor shaxslarni javobgarlikka tortish toʻgʻrisida tegishli respublika ijro etuvchi hokimiyat organlari va boshqa tashkilotlarga takliflar kiritish;

6) respublika va mahalliy ijro hokimiyati organlari, boshqa tashkilotlar, mansabdor shaxslar va fuqarolar, shu jumladan bozor ishtirokchilari faoliyatini muvofiqlashtirish;

7) zarur maʼlumotlarni statistika va soliq organlari, davlat xizmatlari markazi va boshqa vazirlik va idoralardan bepul tarzda soʻrash va olish;

8) takliflarni koʻrib chiqish uchun Vazirlar Mahkamasiga, respublika va mahalliy ijro etuvchi hokimiyat organlari hamda xoʻjalik jamiyatlariga kiritish;

9) normativ-huquqiy hujjatlar loyihalarini tayyorlash boʻyicha rejalarni va (yoki) dasturlarni Vazirlar Mahkamasiga kiritish;

10) xorijiy energetika tashkilotlari, fan va taʼlim muassasalari bilan hamkorlik olib borish;

11) normativ-huquqiy hujjat loyihasini ishlab chiqishda ilmiy muassasa va boshqa tashkilotlar olimlari va mutaxassislari, shuningdek, mahalliy va xorijiy ekspertlarni konsultant sifatida yollash va (yoki) ularning xulosa va tavsiyalarini olish;

12) respublika va mahalliy ijro hokimiyati organlari, boshqa tashkilotlar, shuningdek, xalqaro moliya institutlari, ilmiy muassasalar va nodavlat notijorat tashkilotlari vakillari hamda fuqarolar ishtirokida ishchi guruh (komissiya) tuzish;

13) amaliyotda qoʻllash tajribasi tahlili, olingan tavsiyalar va xalqaro tajriba asosida amaldagi normativ-huquqiy hujjatlarga oʻzgartirish va qoʻshimchalar kiritish boʻyicha tashabbus bilan chiqish;

14) zarur maʼlumotlarni toʻplash, tartibga solish amaliyotini uygʻunlashtirish, koʻzda tutilgan qarorlarni asoslash yoki taklif etilayotgan huquqiy va meʼyoriy yechimlarni baholash uchun zarur boʻlganda jamoatchilik muhokamasini tashkil etish;

15) respublika va mahalliy ijro hokimiyati organlari, boshqa tashkilotlar, bozor ishtirokchilari, mansabdor shaxslar va fuqarolarga bozorda raqobat qoidalarini buzish holatlarini bartaraf etish yuzasidan bajarilishi majburiy boʻlgan koʻrsatmalarni koʻrib chiqish uchun yuborish;

16) tariflarni tasdiqlash boʻyicha kelib tushgan arizalarning asoslanganligini tekshirish boʻyicha audit oʻtkazilishi toʻgʻrisida bozor ishtirokchilariga xabarnoma yuborish;

17) bozor faoliyati yuzasidan tekshiruvlarni belgilash va oʻtkazish hamda raqobatni qoʻllab-quvvatlash, bozorning talab darajasida ishlashini taʼminlash boʻyicha zarur va mutanosib choralarni koʻrish;

18) bozor ishtirokchilarining faoliyati ustidan shikoyat kelib tushgan taqdirda yoki rejadagi oʻrganishlar davomida bozor qoidalariga rioya etmaslik holatlari aniqlanganda, bozor ishtirokchilaridan oʻz xizmatlariga mutanosibligini va kamsitmasdan qoʻllanilishini taʼminlash uchun ular tomonidan qoʻllaniladigan shartlar, shu jumladan tariflar va narxlarni oʻzgartirishni talab qilish;

19) bozor ishtirokchilari tomonidan litsenziya talablari va shartlariga rioya etilishini nazorat qilish;

20) quyidagi holatlarda yuzaga keladigan nizolarni hal qilinishida:

a) litsenziatning oʻz faoliyatini bajarishi yuzasidan boshqa litsenziatga qarshi davosi mavjudligida;

b) uchinchi tomonning tarqatish va (yoki) uzatish tarmogʻiga ulanishida muammo yuzaga kelganda;

v) energetika korxonalari oʻrtasidagi yoki energetika korxonalari bilan jismoniy yoki yuridik shaxslar oʻrtasidagi tarif va toʻlovlarning qoʻllanilishidagi qoidabuzarliklar yuzaga kelganda;

g) bozor ishtirokchilari tomonidan elektr energiyasining sifat koʻrsatkichlari taʼminlanmaganda yoki magistral va taqsimlash tarmoqlaridan foydalanish qoidalari buzilganda;

d) Agentlikning qarorlarini amalga oshirish talablari bajarilishi bilan bogʻliq boshqa har qanday nizolar, soʻrovlar va shikoyatlar yuzaga kelganda ishtirok etish;

21) bozor ishtirokchilariga va boshqa shaxslarga qonunchilik hujjatlariga muvofiq tegishli choralarni qoʻllash;

Agentlik qonunchilik hujjatlariga muvofiq boshqa huquqlarga ham ega boʻlishi mumkin.

12. Agentlik:

1) tegishli sohadagi faoliyatning asosiy koʻrsatkichlari boʻyicha parametrlarga erishilishini samarali taʼminlash;

2) amalga oshirilayotgan islohotlarning, shuningdek, Agentlik tomonidan Oʻzbekiston Respublikasi Prezidenti Administratsiyasiga va Vazirlar Mahkamasiga kiritiladigan, shuningdek, Agentlik tomonidan qabul qilinadigan normativ-huquqiy hujjatlarning sifati, yakuniy natijalari va amalga oshirilishining oqibatlari;

3) tegishli sohani rivojlantirish va hududlarning muammoli masalalarini hal qilish boʻyicha dastur, tadbirlar rejasi, “yoʻl xaritalari” va boshqa hujjatlarning samarali bajarilishi;

4) yuridik va jismoniy shaxslarning murojaatlarini koʻrib chiqish va belgilangan muddatlarda ularga javob berish;

5) muntazam ravishda xodimlarni qayta tayyorlash va ularning malakasini oshirish;

6) mehnat va ichki tartib-qoidalariga rioya etish;

7) tegishli sohada fuqarolar va tadbirkorlik subyektlari huquqlari va qonuniy manfaatlarining muhofaza qilinishini taʼminlash uchun javobgardir.

4-bob. Agentlik rahbarlarining asosiy funksional vazifalari

13. Quyidagilar Agentlik direktorining asosiy funksional vazifalari hisoblanadi:

1) Oʻzbekiston Respublikasi Konstitutsiyasi va qonunlari hamda boshqa normativ-huquqiy hujjatlar talablariga rioya etish;

2) Agentlik faoliyatiga umumiy rahbarlik qilish, Oʻzbekiston Respublikasi Prezidentining tegishli hujjatlari, Vazirlar Mahkamasining qarorlari va boshqa qonunchilik hujjatlari bilan Agentlikka yuklangan vazifa va funksiyalar bajarilishini tashkil etish;

3) Oʻzbekiston Respublikasi Prezidenti, Oʻzbekiston Respublikasining Bosh vaziri topshiriqlarini bajarish;

4) oʻz oʻrinbosari va Agentlikning boshqa mansabdor shaxslari vakolatlarini belgilash va vazifalarni taqsimlashi;

5) Agentlik faoliyati rejalashtirilishini tashkil etish, Agentlikning davriy ish rejalarini tasdiqlashi, ularning bajarilishi yuzasidan nazoratni taʼminlash;

6) Oʻzbekiston Respublikasi Prezidenti, Vazirlar Mahkamasi topshiriqlariga va oʻz tashabbusiga koʻra normativ-huquqiy hujjatlar loyihalarini sifatli ishlab chiqilishini, ular Oʻzbekiston Respublikasining “Normativ-huquqiy hujjatlar toʻgʻrisida”gi Qonuni , Oʻzbekiston Respublikasi Prezidenti Administratsiyasining Reglamenti va Vazirlar Mahkamasining Reglamenti talablariga muvofiq ravishda oʻz vaqtida kiritilishini tashkil etish, ularning Vazirlar Mahkamasida puxta ishlanishida, Vazirlar Mahkamasi rahbariyati huzurida himoya qilinishida va Oʻzbekiston Respublikasi Prezidenti Administratsiyasida qoʻrib chiqilishida ishtirok etish;

7) Agentlik vakolatiga kiradigan masalalar boʻyicha koʻrsatmalar chiqarish, buyruqlar va normativ-huquqiy hujjatlarni qabul qilish, zarur boʻlganda boshqa vazirlik va idoralar bilan birgalikda tegishli qarorlar qabul qilish;

8) Agentlik rahbarlari va xodimlari xizmat safarlarini Oʻzbekiston Respublikasi Prezidentining “ Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida ” 2014-yil 5-martdagi PQ-2142-son va “Xorijiy xizmat safarlarida boʻlish samaradorligi va xorijiy delegatsiyalarning Oʻzbekiston Respublikasiga tashriflarini tashkil etish uchun mansabdor shaxslarning shaxsiy masʼuliyatini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

9) Agentlik xodimlari tomonidan Vazirlar Mahkamasining 2022-yil 14-oktabrdagi 595-son qarori bilan tasdiqlangan Davlat fuqarolik xizmatchilari odob-axloqining namunaviy qoidalari asosida tasdiqlangan Agentlik xodimlarining odob-axloq qoidalari talablariga rioya etilishini taʼminlashni nazorat qilish;

10) jismoniy va yuridik shaxslarning murojaatlarini koʻrib chiqish boʻyicha ishlarni Oʻzbekiston Respublikasining “Jismoniy va yuridik shaxslarning murojaatlari toʻgʻrisida”gi Qonuni , Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi toʻgʻrisidagi namunaviy nizomga muvofiq samarali tashkil etish, jamoatchilik bilan bevosita va ochiq muloqot oʻrnatish, shaxsiy qabullar oʻtkazish, shu jumladan, jismoniy va yuridik shaxslarning vakillarini joylarga borib qabul qilishni tashkil etish;

11) davlat organlari va boshqa tashkilotlarda, Oʻzbekiston Respublikasi sudlarida, shuningdek, davlat organlari, xalqaro tashkilotlar va xorijiy mamlakat vakillari ishtirokida oʻtkaziladigan rasmiy tadbirlarda Agentlik nomidan ishtirok etish;

12) Oʻzbekiston Respublikasining “Korrupsiyaga qarshi kurashish toʻgʻrisida”gi Qonuni va korrupsiyaga qarshi kurashishga doir boshqa qonunchilik hujjatlariga rioya etish, faoliyatda korrupsiyaviy xavf-xatarlarni va manfaatlar toʻqnashuvini oʻz vaqtida aniqlash hamda ularga chek qoʻyish, korrupsiyaga oid huquqbuzarliklarning oldini olish choralarini koʻrish hamda tizimda korrupsiyaning oldini olish va unga qarshi murosasiz kurashishga doir ishlarga rahbarlik qilish va muvofiqlashtirish;

13) Oʻzbekiston Respublikasi Prezidentining Xalq qabulxonalari bilan samarali hamkorlik qilishni tashkil etish, Agentlik rahbarlari va xodimlari ularning faoliyatida faol ishtirok etishini, jismoniy va yuridik shaxslarning Oʻzbekiston Respublikasi Prezidentining Virtual qabulxonasidan kelib tushgan murojaatlarini oʻz vaqtida va toʻlaqonli koʻrib chiqilishini taʼminlash;

14) Agentlik Hayʼat majlislarida raislik qilish;

15) Agentlikka yuklangan vazifalarni bajarish uchun shartnoma asosida jalb etiladigan malakali mahalliy va xorijiy mutaxassislar xizmatiga haq toʻlash shartlarini xalqaro amaliyot va bozor sharoitlaridan kelib chiqqan holda belgilash hamda ularga Energetika bozorini rivojlantirish jamgʻarmasi (keyingi oʻrinlarda — Jamgʻarma) mablagʻlari hisobidan ish haqi va boshqa toʻlovlarni belgilash;

16) Agentlik xodimlarni ularning koʻp yillik va samarali faoliyati, alohida xizmatlari uchun Oʻzbekiston Respublikasi davlat mukofotlari bilan taqdirlash uchun belgilangan tartibda takliflar kiritishni taʼminlash va tavsiyalar berish;

17) Agentlik mulkini qonunchilik hujjatlarida belgilangan tartibda tasarruf etish;

18) Agentlik vakolatiga kiradigan masalalar yuzasidan Oʻzbekiston Respublikasining xalqaro shartnomalarini belgilangan tartibda imzolash;

19) Agentlikning ichki tashkiliy masalalari yuzasidan qarorlar qabul qilish;

20) Agentlik nomidan bozor ishtirokchilariga yozma soʻrovlar yuborish;

21) Agentlik xodimlarini lavozimga tayinlash va lavozimidan ozod etish, mehnat shartnomalari (buyruqlari)ni imzolash;

22) Agentlik xodimlariga vazifalarni yuklash;

23) Agentlik xodimlarining malakasini oshirish va ularni xorijiy davlatlarga stajirovka va tajriba almashish uchun yuborishni tashkil etish;

24) Agentlik xodimlarini ragʻbatlantirish va intizomiy javobgarlikka tortish masalalarini hal qilish, oʻz oʻrinbosarini ragʻbatlantirish va intizomiy javobgarlikka tortish masalalarini, shu jumladan, kelgusida uning egallab turgan lavozimida qolishining maqsadga muvofiqligi masalalarini koʻrib chiqish boʻyicha takliflar kiritish, uning shaxsiy javobgarligini oshirish boʻyicha tizimli choralarni amalga oshirish;

25) Agentlikning tashqi va ichki tashkiliy faoliyati ustidan doimiy va qatʼiy nazorat oʻrnatish;

26) Agentlikka kiritilgan takliflar va taqdim etilgan normativ-huquqiy hujjatlar loyihalarining toʻliq va har tomonlama koʻrib chiqilishini, Oʻzbekiston Respublikasi Prezidenti Administratsiyasi Reglamenti va Oʻzbekiston Respublikasi Vazirlar Mahkamasining Reglamentida belgilangan muddatlarda kelishilishi (viza qoʻyilishi)ni taʼminlash;

27) davlat sirlari toifasiga kiritilgan va maxfiy axborot bilan ishlashda qonunchilik talablariga rioya qilish;

28) xodimlarning belgilangan cheklangan soni doirasida Agentlik shtatlar jadvalini, shuningdek, Oʻzbekiston Respublikasining budjet mablagʻlari hisobidan moliyalashtirilayotgan Agentlikning xarajatlari smetasini tasdiqlash;

29) ushbu Nizomda va qonunchilik hujjatlarida nazarda tutilgan boshqa vakolatlarni amalga oshirish.

14. Quyidagilar direktor oʻrinbosarining asosiy funksional vazifalari hisoblanadi:

1) Oʻzbekiston Respublikasi Konstitutsiyasi va qonunlari hamda boshqa normativ-huquqiy hujjatlar talablariga rioya etish;

2) Agentlik direktori maʼlum sabablarga koʻra (xizmat safari, mehnat taʼtili, betobligi davrida) yoʻqligida uning vazifalarini bajarish;

3) Agentlikning oʻzi nazorat qiladigan tarkibiy tuzilmalari faoliyatini muvofiqlashtirish, nazorat va bevosita rahbarlik qilish, xodimlar oʻrtasida vazifalarni taqsimlash;

4) Agentlik faoliyatining oʻzi mutasaddilik qiladigan yoʻnalishlarini yanada takomillashtirish yuzasidan Oʻzbekiston Respublikasi Prezidentining hujjatlari va Vazirlar Mahkamasi qarorlari bilan tasdiqlangan kompleks dastur va kompleks chora-tadbirlar ijrosini tanqidiy va chuqur tahlil qilish;

5) mutasaddiligidagi tarkibiy tuzilmalar boʻlinma rahbarlarining hisobotlarini muntazam tinglab borish va belgilangan koʻrsatkichlarga yetishish uchun ularning shaxsiy javobgarligini oshirish;

6) Agentlikning va Agentlik direktorining buyruq va topshiriqlari ijrosini oʻz vaqtida va sifatli taʼminlash;

7) Agentlikka kiritilgan takliflar va taqdim etilgan normativ-huquqiy hujjatlarning loyihalarini toʻliq va har tomonlama koʻrib chiqish;

8) oʻzi nazorat qiladigan idoraviy mansub tuzilmalarda kadrlarni belgilangan tartibda tanlash va joy-joyiga qoʻyish boʻyicha direktorga takliflar taqdim etish, ularning professionalligi, oʻz ishini bilishi, yuksak darajadagi ishchanlik va maʼnaviy-axloqiy fazilatlarga ega boʻlishini taʼminlash, ularning kasbiy malakasini oshirish choralarini koʻrish, mutasaddilik qilinadigan tarkibiy tuzilmalarda kadrlar zaxirasini shakllantirish choralarini koʻrish;

9) Agentlik xodimlari tomonidan Vazirlar Mahkamasining 2022-yil 14-oktabrdagi 595-son qarori bilan tasdiqlangan Davlat fuqarolik xizmatchilari odob-axloqining namunaviy qoidalari asosida tasdiqlangan Agentlik xodimlarining odob-axloq qoidalari talablariga rioya etilishini taʼminlaydi;

10) jismoniy va yuridik shaxslarning murojaatlarini koʻrib chiqish boʻyicha ishlarni Oʻzbekiston Respublikasining “Jismoniy va yuridik shaxslarning murojaatlari toʻgʻrisida”gi Qonuni , Vazirlar Mahkamasining 2018-yil 7-maydagi 341-son qarori bilan tasdiqlangan Davlat organlarida, davlat muassasalarida va davlat ishtirokidagi tashkilotlarda jismoniy va yuridik shaxslarning murojaatlari bilan ishlash tartibi toʻgʻrisidagi namunaviy nizomga muvofiq samarali tashkil etish, jamoatchilik bilan bevosita va ochiq muloqot oʻrnatish, shaxsiy qabullar oʻtkazish, shu jumladan, jismoniy va yuridik shaxslarning vakillarini joylarga borib qabul qilishni tashkil etish;

11) bozorni rivojlantirishda va tartibga solishda Agentlik faoliyatini takomillashtirish boʻyicha amaliy choralar koʻrish, ushbu sohada qonunchilikni takomillashtirishga doir takliflarni ishlab chiqib, koʻrib chiqish uchun Agentlik direktoriga kiritish;

12) bozor munosabatlari joriy etilishini nazarda tutadigan xalqaro standartlarga muvofiq elektr energetikasi sohasidagi normativ bazaning tizimli asosda qayta koʻrib chiqilishini tashkil etish;

13) energetika sohasida davlat siyosatining asosiy yoʻnalishlari boʻyicha takliflar tayyorlash;

14) xorijiy davlatlar, xalqaro va xorijiy tashkilotlar bilan elektr energetikasi bozorini rivojlantirish va tartibga solish masalalari boʻyicha hamkorlik qilish;

15) davlat sirlari toifasiga kiritilgan va maxfiy axborot bilan ishlashda qonunchilik talablariga rioya qilish.

5-bob. Agentlik rahbarlarining javobgarligi

15. Agentlik direktori:

Agentlikka yuklangan vazifalar va funksiyalar bajarilishi;

ushbu Nizomning 12-bandida koʻrsatilgan Agentlikning javobgarlik sohalari boʻyicha;

ushbu Nizomning 13-bandida koʻrsatilgan oʻz funksional vazifalarining sifatli bajarilishi uchun shaxsan javobgardir.

16. Agentlik direktori oʻrinbosari:

mutasaddilik qilinadigan yoʻnalish va tarkibiy boʻlinmalarda Agentlikka yuklangan vazifalar va funksiyalarning bajarilishi;

ushbu Nizomning 12-bandida koʻrsatilgan Agentlikning javobgarlik sohalarida mutasaddilik qilinadigan masalalar boʻyicha;

ushbu Nizomning 14-bandida koʻrsatilgan oʻz funksional vazifalarining sifatli bajarilishi uchun shaxsan javobgardir.

6-bob. Agentlik faoliyatini tashkil etish

1-§. Agentlik rahbariyati

17. Agentlik direktori va uning oʻrinbosari Oʻzbekiston Respublikasi Bosh vazirining taqdimnomasiga asosan Oʻzbekiston Respublikasi Prezidenti tomonidan lavozimga tayinlanadi va lavozimdan ozod etiladi.

18. Agentlik direktori maqomi, tibbiy va transport xizmati koʻrsatish shartlari boʻyicha vazirga, Agentlik direktori oʻrinbosari esa — vazir oʻrinbosariga tenglashtiriladi.

19. Agentlik direktori maʼlum sabablarga koʻra (xizmat safari, mehnat taʼtili, betobligi davrida) yoʻqligida uning oʻrinbosari Agentlik direktorining vazifalarini bajaradi.

2-§. Respublika va mahalliy ijro hokimiyati organlari hamda boshqa tashkilotlar bilan oʻzaro hamkorlik

20. Agentlik oʻz faoliyatini respublika va mahalliy ijro hokimiyati organlari hamda boshqa tashkilotlardan mustaqil ravishda amalga oshiradi hamda ular bilan oʻzaro hamkorlik qiladi.

21. Oʻzbekiston Respublikasining respublika va mahalliy ijro hokimiyati organlari hamda boshqa tashkilotlar tomonidan tayyorlanadigan quyidagi hujjatlar Agentlik bilan majburiy tarzda kelishiladi:

elektr energetikasi sohasida amalga oshirilayotgan barcha loyihalar, jumladan, davlat-xususiy sheriklik asosidagi loyihalarning texnik-iqtisodiy koʻrsatkichlari;

elektr energiyasini ishlab chiqarish va isteʼmol qilish balansi;

elektr energiyasini ishlab chiqarish, uzatish va taqsimlashdagi texnologik yoʻqotishlar meʼyorlari;

bozor faoliyatiga taʼsir etuvchi normativ-huquqiy hujjatlar loyihalari.

22. Agentlik direktori Vazirlar Mahkamasi huzuridagi Idoralararo tarif komissiyasining doimiy aʼzosi boʻlib, mazkur komissiya raisi oʻrinbosari hisoblanadi.

3-§. Agentlik hayʼati

23. Agentlikda direktor (hayʼat raisi), uning oʻrinbosari (lavozim boʻyicha), shuningdek, Agentlik faoliyatining asosiy yoʻnalishlarini muvofiqlashtiruvchi tarkibiy boʻlinmalari rahbarlaridan iborat tarkibda Hayʼat tashkil etiladi.

Hayʼat tarkibining soni va shaxsiy tarkibi belgilangan tartibda Vazirlar Mahkamasi tomonidan tasdiqlanadi.

24. Hayʼatga quyidagi vazifalar yuklanadi:

Agentlik vazifalarining eng muhim samaradorlik koʻrsatkichlarini ishlab chiqish va amalga oshirilishini nazorat qilish;

Agentlik faoliyati bilan bogʻliq dolzarb masalalarning joylarda muhokama etilishini taʼminlagan holda hayʼatning kengaytirilgan majlislari oʻtkazilishini tashkillashtirish, shuningdek, yuzaga kelgan muammolarni bartaraf etish boʻyicha tegishli qarorlarni ishlab chiqish va qabul qilish;

Agentlikning tarkibiga kiruvchi lavozimlar nomenklaturasini koʻrib chiqish va tasdiqlash;

Oʻzbekiston Respublikasi Prezidenti va Vazirlar Mahkamasining qaror va topshiriqlarida belgilangan vazifalarning oʻz vaqtida va sifatli amalga oshirilishini taʼminlash maqsadida Agentlik rahbarlari va xodimlarining ijro intizomini mustahkamlash va shaxsiy javobgarligini oshirish.

Hayʼat, shuningdek, Agentlik vakolatiga kiritilgan boshqa masalalarni ham koʻrib chiqishga haqli.

25. Agentlik direktori qarori bilan quyidagilar:

Hayʼat ish rejalari va belgilangan vazifalarni bajarish muddatlari;

takliflar tashabbusi bilan chiqish, loyihalarni boshlash va hisobot berish tartiblari;

Hayʼatning faoliyatini samarali taʼminlash uchun Agentlikning masʼul tarkibiy boʻlinmalarining vazifalari tasdiqlanishi mumkin.

26. Hayʼat yigʻilishiga Agentlik vakolatiga tegishli masalalar yuzasidan respublika va mahalliy ijro hokimiyati organlari, boshqa tashkilotlar rahbarlari va ekspert mutaxassislar taklif etilishi mumkin.

27. Hayʼat majlisi aʼzolarining yarmidan koʻpi ishtirok etgan taqdirda, vakolatli hisoblanadi. Hayʼat qarorlari, oddiy koʻpchilik ovozi bilan qabul qilinadi.

28. Direktor va Hayʼat aʼzolari oʻrtasida kelishmovchiliklar yuzaga kelgan taqdirda direktor, ushbu kelishmovchiliklar xususida Vazirlar Mahkamasiga va Oʻzbekiston Respublikasi Prezident Administratsiyasiga axborot berib, mustaqil ravishda qaror qabul qiladi. Hayʼat aʼzolari ham oʻz fikrlarini Vazirlar Mahkamasiga va Oʻzbekiston Respublikasi Prezident Administratsiyasiga bildirishlari mumkin.

29. Hayʼat oʻz faoliyati uchun zarur boʻlgan hujjatlar, hisobotlar va boshqa maʼlumotlarni soʻrab olishga haqli.

30. Hayʼat qarorlari Hayʼat raisi tomonidan imzolanadi va Agentlik buyrugʻi (qarori) bilan amalga oshiriladi.

7-bob. Agentlik faoliyati samaradorligi va natijadorligini baholash mezonlari va ish indikatorlari

31. Agentlik faoliyatining samaradorligi muntazam baholanadi.

32. Agentlik faoliyati samaradorligi va natijadorligiga berilgan baho Vazirlar Mahkamasi tomonidan tasdiqlanadigan Agentlik faoliyati samaradorligi va natijadorligini baholash mezonlari va ish indikatorlariga asoslanadi.

33. Agentlik faoliyati samaradorligi va natijadorligini baholash yakunlari boʻyicha:

Agentlik rahbarlari va xodimlarini ragʻbatlantirish (mukofotlash) yoki intizomiy javobgarlikka tortish;

Agentlik faoliyatida aniqlangan kamchiliklarni bartaraf etish va uning faoliyatini yanada takomillashtirish choralari koʻriladi.

34. Agentlik faoliyati samaradorligi va natijadorligini baholash tartibi va uslubi qonunchilik hujjatlari bilan belgilanadi.

8-bob. Agentlik faoliyatini moliyalashtirish va moddiy-texnik taʼminlash, uning xodimlari mehnatiga haq toʻlash va moddiy ragʻbatlantirish

35. Litsenziya yigʻimlarining yillik davriy tushumlari Jamgʻarmaning maxsus hisobvaragʻiga oʻtkaziladi va Agentlik tomonidan foydalaniladi. Bunda, yil yakuni bilan ushbu hisobvaraqdagi ortib qolgan mablagʻlar Davlat budjetiga oʻtkaziladi.

36. Agentlik bozor qoidalarini buzganlik uchun qoʻllaniladigan jarimalardan tushadigan mablagʻlarning Agentlikda qoldirilgan qismidan qonunchilikda belgilangan tartibda oʻz faoliyati uchun foydalanishga haqli.

37. Agentlikni moddiy-texnika taʼminoti, xodimlari mehnatiga haq toʻlash va ularni moddiy ragʻbatlantirish boʻyicha xarajatlarni moliyalashtirish Oʻzbekiston Respublikasi Davlat budjeti, Jamgʻarma mablagʻlari va qonunchilik bilan taqiqlanmagan boshqa mablagʻlar hisobidan amalga oshiriladi.

38. Agentlik tuzilmasi va shtatlar jadvali Agentlik direktori tomonidan tasdiqlanadi.

39. Agentlik xodimlariga Energetika vazirligining markaziy apparati xodimlari uchun belgilangan mehnatiga haq toʻlash shartlari tatbiq etiladi. Bunda:

Agentlik xodimlarining ish haqi lavozim maoshi, mukofot, qoʻshimcha toʻlov, ustama va qonunchilikda nazarda tutilgan boshqa toʻlovlardan iborat boʻladi;

xizmat vazifasini sidqidildan va samarali bajarib kelayotgan Agentlikning xodimlariga direktor tomonidan Jamgʻarma mablagʻlari hisobidan shaxsiy ustamalar belgilanadi;

Jamgʻarma mablagʻlari hisobidan Agentlik xodimlariga egallab turgan lavozimlari boʻyicha lavozim maoshlariga qonunchilik hujjatlarida nazarda tutilgan boshqa toʻlovlardan qatʼiy nazar, ustama va boshqa ragʻbatlantiruvchi toʻlovlar direktor tomonidan belgilanadi;

Jamgʻarma mablagʻlari yoki qonunchilik bilan taqiqlanmagan boshqa manbalar hisobidan bayram sanalari munosabati bilan shtat jadvaliga koʻra, xodimlar lavozim maoshiga nisbatan mukofot toʻlanadi.

40. Agentlik xodimlariga Oʻzbekiston Respublikasi Davlat budjeti mablagʻlari hisobidan ish staji uchun (faqat asosiy ish joyi boʻyicha) Energetika vazirligining markaziy apparati xodimlariga tatbiq etiladigan muddat va foizlarda mukofot toʻlanadi.

Uzoq muddat ishlagan yillari uchun mukofot olish huquqini beruvchi ish staji Agentlik tomonidan tasdiqlanadigan tartibga muvofiq hisoblanadi.

41. Agentlik xodimlariga oldingi tashkilotlarda berilgan koʻp yillik xizmatlari uchun qoʻshimcha haq va ustamalar hamda martaba darajalari saqlanadi.

9-bob. Yakuniy qoida

42. Agentlikni qayta tashkil etish va tugatish qonunchilik hujjatlarida belgilangan tartibda amalga oshiriladi.

Oʻzbekiston Respublikasining Bosh vaziri A. ARIPOV

Toshkent sh.,

2024-yil 30-aprel,

252-son

(Qonunchilik maʼlumotlari milliy bazasi, 06.05.2024-y., 09/24/252/0324-son; 08.08.2025-y., 09/25/504/0707-son; 07.10.2025-y., 09/25/627/0901-son; 21.07.2026-y., 09/26/393/0764-son)

lex.uz