📅 2024-yil 2-iyul · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 2 июль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 2 июля 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 2 July 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Сабзавот, полиз экинлари ва картошкачилик илмий-тадқиқот институтининг Кўкдала илмий-тажриба станциясини ташкил этиш чора-тадбирлари тўғрисида
Сўнгги йилларда республикада сабзавот-полиз экинларини етиштиришда илмий-тадқиқот ишларини янада ривожлантириш ва илм-фан ютуқларини жорий этиш бўйича бир қатор ислоҳотлар амалга оширилмоқда.
Глобал иқлимнинг кескин ўзгариши ва сув ресурсларининг танқислиги кузатилаётган бир пайтда илм-фанни ривожлантириш, турли стресс омилларга нисбатан чидамли экспортбоп сабзавот ва полиз экинлари нав ҳамда ва дурагайларини яратиш, ресурс тежайдиган илғор агротехнологияларни ишлаб чиқаришга жорий этишни тақозо этмоқда.
Республика тупроқ-иқлим шароитларига мос экспортбоп маҳаллий сабзавот ва полиз экинлари навларини яратиш, интенсив сабзавот ва полизчилик тизимини йўлга қўйиш, илм-фан ҳамда ишлаб чиқариш интеграциясини таъминлаш, самарасиз фойдаланилаётган ер майдонларини ўзлаштириш ва суғориш тизимини яхшилаш мақсадида Вазирлар Маҳкамаси қарор қилади:
1. Ўзбекистон Республикаси Қишлоқ хўжалиги вазирлиги, Олий-таълим, фан ва инновациялар вазирлиги ва Қашқадарё вилояти ҳокимлигининг:
Сабзавот, полиз экинлари ва картошкачилик илмий-тадқиқот институти (кейинги ўринларда — Институт) муассислигида «Кўкдала илмий-тажриба станцияси» давлат муассасасини (кейинги ўринларда — Тажриба станцияси) ташкил этиш;
Қашқадарё вилоятининг Кўкдала тумани Д. Сафаров ҳудудидаги туман ҳокимлиги захирасидаги 495қ, 509қ контурлардаги суғориладиган 14,0 гектар ва Кўкдала ҳудудидаги 2874қ, 2875қ контурлардаги суғорилмайдиган (лалми) 30,0 гектар ер майдонларини илмий-тадқиқот ишларини амалга ошириш ва уруғчиликни ташкил қилиш мақсадида Тажриба станциясига ўттиз йил муддатга ижара ҳуқуқи асосида ажратиш тўғрисидаги таклифлари маъқуллансин.
2. Қуйидагилар Тажриба станциясининг асосий вазифалари этиб белгилансин:
сабзавот, полиз ва картошка экинларининг бирламчи уруғчилигини ташкил этиш бўйича илмий-тадқиқот ишларини ривожлантириш;
сабзавот, полиз ва картошка экинларининг маҳаллий тупроқ-иқлим шароитларига мос, серҳосил, касаллик ва зараркунандаларга чидамли ҳамда сифат кўрсаткичлари юқори бўлган нав ва дурагайларини яратиш;
сабзавот, полиз ва картошка экинларини етиштиришнинг замонавий ресурс тежайдиган технологияларини ишлаб чиқиш ва амалиётга жорий этиш;
илғор хорижий тажрибаларни қўллаган ҳолда сабзавот, полиз ва картошка экинларини етиштириш ва уларнинг ҳосилдорлигини ошириш бўйича илмий асосланган тавсиялар ишлаб чиқиш;
сабзавот, полиз ва картошкачилик соҳасида илмий-тадқиқот олиб бораётган изланувчиларга тажриба станциясида мавжуд имкониятлардан фойдаланган ҳолда, тажриба-синов ишларини амалга ошириш учун шароитлар яратиш;
сабзавот, полиз ва картошкачилик соҳасида фаолият кўрсатаётган ходимлар малакасини оширишни ташкил этиш.
3. Белгилансинки, Тажриба станцияни сақлаш билан боғлиқ харажатлар 2024 йилда Ўзбекистон Республикаси республика бюджетидан биринчи даражали бюджет маблағларини тақсимловчи сифатида Қишлоқ хўжалиги вазирлигига ажратиладиган маблағлар доирасида қопланади, 2025 йилдан бошлаб эса Ўзбекистон Республикаси Давлат бюджети параметрларида назарда тутилади.
4. Қуйидагилар Тажриба станциясининг фаолиятини молиялаштириш манбалари этиб белгилансин:
бино ва иншоотларни сақлаш, шунингдек, ходимлар (илмий ходимлардан ташқари) меҳнатига ҳақ тўлаш бўйича харажатларни молиялаштириш учун Давлат бюджети маблағлари;
хўжалик фаолиятидан ҳамда шартнома асосида ўтказиладиган тадқиқотлардан тушадиган тушумлар;
қонунчилик ҳужжатларида тақиқланмаган бошқа манбалар.
5. Тажриба станцияси Қашқадарё вилояти Кўкдала туманининг «Торжилға» МФЙ Мақсуд Шайхзода кўчасидаги 45-уйда жойлашган Қарши давлат университетига қарашли 1 қаватли ёрдамчи (ўқув устахонаси) биносига оператив бошқарув ҳуқуқи асосида жойлаштирилсин.
6. Ўзбекистон Республикаси Иқтисодиёт ва молия вазирлиги ҳузуридаги Кадастр агентлиги Қашқадарё вилояти ҳокимлиги билан биргаликда бир ой муддатда Тажриба станциясига оператив бошқарув ҳуқуқи асосида бериладиган ёрдамчи (ўқув устахонаси) бино ҳамда ижара ҳуқуқи асосида ажратиладиган 44,0 гектар ер участкасини хатловдан ўтказиб, кўчмас мулк объектларини кадастр ҳисобига олиниши ва кадастр йиғмажилдини шакллантирилишини таъминласин.
7. Вазирлар Маҳкамасининг 2021 йил 24 сентябрдаги 601-сон қарори билан тасдиқланган Қишлоқ хўжалиги вазирлиги ҳузуридаги Қишлоқ хўжалигида билим ва инновациялар миллий маркази тизимидаги Сабзавот, полиз экинлари ва картошкачилик илмий-тадқиқот институтининг тузилмасида «9 та ҳудудий илмий-тажриба станциялари» блокидаги «9» рақами «10» рақами билан алмаштирилсин.
8. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев ва қишлоқ хўжалиги вазири И.Ю. Абдурахмонов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2024 йил 2 июль,
377-сон
Oʻzbekiston Respublikasi Vazirlar Mahkamasining
qarori
Sabzavot, poliz ekinlari va kartoshkachilik ilmiy-tadqiqot institutining Koʻkdala ilmiy-tajriba stansiyasini tashkil etish chora-tadbirlari toʻgʻrisida
Soʻnggi yillarda respublikada sabzavot-poliz ekinlarini yetishtirishda ilmiy-tadqiqot ishlarini yanada rivojlantirish va ilm-fan yutuqlarini joriy etish boʻyicha bir qator islohotlar amalga oshirilmoqda.
Global iqlimning keskin oʻzgarishi va suv resurslarining tanqisligi kuzatilayotgan bir paytda ilm-fanni rivojlantirish, turli stress omillarga nisbatan chidamli eksportbop sabzavot va poliz ekinlari nav hamda va duragaylarini yaratish, resurs tejaydigan ilgʻor agrotexnologiyalarni ishlab chiqarishga joriy etishni taqozo etmoqda.
Respublika tuproq-iqlim sharoitlariga mos eksportbop mahalliy sabzavot va poliz ekinlari navlarini yaratish, intensiv sabzavot va polizchilik tizimini yoʻlga qoʻyish, ilm-fan hamda ishlab chiqarish integratsiyasini taʼminlash, samarasiz foydalanilayotgan yer maydonlarini oʻzlashtirish va sugʻorish tizimini yaxshilash maqsadida Vazirlar Mahkamasi qaror qiladi:
1. Oʻzbekiston Respublikasi Qishloq xoʻjaligi vazirligi, Oliy-taʼlim, fan va innovatsiyalar vazirligi va Qashqadaryo viloyati hokimligining:
Sabzavot, poliz ekinlari va kartoshkachilik ilmiy-tadqiqot instituti (keyingi oʻrinlarda — Institut) muassisligida “Koʻkdala ilmiy-tajriba stansiyasi” davlat muassasasini (keyingi oʻrinlarda — Tajriba stansiyasi) tashkil etish;
Qashqadaryo viloyatining Koʻkdala tumani D. Safarov hududidagi tuman hokimligi zaxirasidagi 495q, 509q konturlardagi sugʻoriladigan 14,0 gektar va Koʻkdala hududidagi 2874q, 2875q konturlardagi sugʻorilmaydigan (lalmi) 30,0 gektar yer maydonlarini ilmiy-tadqiqot ishlarini amalga oshirish va urugʻchilikni tashkil qilish maqsadida Tajriba stansiyasiga oʻttiz yil muddatga ijara huquqi asosida ajratish toʻgʻrisidagi takliflari maʼqullansin.
2. Quyidagilar Tajriba stansiyasining asosiy vazifalari etib belgilansin:
sabzavot, poliz va kartoshka ekinlarining birlamchi urugʻchiligini tashkil etish boʻyicha ilmiy-tadqiqot ishlarini rivojlantirish;
sabzavot, poliz va kartoshka ekinlarining mahalliy tuproq-iqlim sharoitlariga mos, serhosil, kasallik va zararkunandalarga chidamli hamda sifat koʻrsatkichlari yuqori boʻlgan nav va duragaylarini yaratish;
sabzavot, poliz va kartoshka ekinlarini yetishtirishning zamonaviy resurs tejaydigan texnologiyalarini ishlab chiqish va amaliyotga joriy etish;
ilgʻor xorijiy tajribalarni qoʻllagan holda sabzavot, poliz va kartoshka ekinlarini yetishtirish va ularning hosildorligini oshirish boʻyicha ilmiy asoslangan tavsiyalar ishlab chiqish;
sabzavot, poliz va kartoshkachilik sohasida ilmiy-tadqiqot olib borayotgan izlanuvchilarga tajriba stansiyasida mavjud imkoniyatlardan foydalangan holda, tajriba-sinov ishlarini amalga oshirish uchun sharoitlar yaratish;
sabzavot, poliz va kartoshkachilik sohasida faoliyat koʻrsatayotgan xodimlar malakasini oshirishni tashkil etish.
3. Belgilansinki, Tajriba stansiyani saqlash bilan bogʻliq xarajatlar 2024-yilda Oʻzbekiston Respublikasi respublika budjetidan birinchi darajali budjet mablagʻlarini taqsimlovchi sifatida Qishloq xoʻjaligi vazirligiga ajratiladigan mablagʻlar doirasida qoplanadi, 2025-yildan boshlab esa Oʻzbekiston Respublikasi Davlat budjeti parametrlarida nazarda tutiladi.
4. Quyidagilar Tajriba stansiyasining faoliyatini moliyalashtirish manbalari etib belgilansin:
bino va inshootlarni saqlash, shuningdek, xodimlar (ilmiy xodimlardan tashqari) mehnatiga haq toʻlash boʻyicha xarajatlarni moliyalashtirish uchun Davlat budjeti mablagʻlari;
xoʻjalik faoliyatidan hamda shartnoma asosida oʻtkaziladigan tadqiqotlardan tushadigan tushumlar;
qonunchilik hujjatlarida taqiqlanmagan boshqa manbalar.
5. Tajriba stansiyasi Qashqadaryo viloyati Koʻkdala tumanining “Torjilgʻa” MFY Maqsud Shayxzoda koʻchasidagi 45-uyda joylashgan Qarshi davlat universitetiga qarashli 1 qavatli yordamchi (oʻquv ustaxonasi) binosiga operativ boshqaruv huquqi asosida joylashtirilsin.
6. Oʻzbekiston Respublikasi Iqtisodiyot va moliya vazirligi huzuridagi Kadastr agentligi Qashqadaryo viloyati hokimligi bilan birgalikda bir oy muddatda Tajriba stansiyasiga operativ boshqaruv huquqi asosida beriladigan yordamchi (oʻquv ustaxonasi) bino hamda ijara huquqi asosida ajratiladigan 44,0 gektar yer uchastkasini xatlovdan oʻtkazib, koʻchmas mulk obyektlarini kadastr hisobiga olinishi va kadastr yigʻmajildini shakllantirilishini taʼminlasin.
7. Vazirlar Mahkamasining 2021-yil 24-sentabrdagi 601-son qarori bilan tasdiqlangan Qishloq xoʻjaligi vazirligi huzuridagi Qishloq xoʻjaligida bilim va innovatsiyalar milliy markazi tizimidagi Sabzavot, poliz ekinlari va kartoshkachilik ilmiy-tadqiqot institutining tuzilmasida “9 ta hududiy ilmiy-tajriba stansiyalari” blokidagi “9” raqami “10” raqami bilan almashtirilsin.
8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev va qishloq xoʻjaligi vaziri I.Y. Abduraxmonov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 2-iyul,
377-son