📅 2024-yil 8-iyul · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 8 июль · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 8 июля 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 8 July 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Фарғона шаҳрида Лола Муротова номидаги қишлоқ хўжалигига ихтисослашган касб-ҳунар мактабини ташкил этиш тўғрисида
Қишлоқ хўжалиги соҳасида ўрта бўғин кадрларини тайёрлаш, бу борада Ўзбекистон Қаҳрамони, Ўзбекистон Республикасида хизмат кўрсатган қишлоқ хўжалиги ходими, «Эл-юрт ҳурмати» ва «Фидокорона хизматлари учун» орденлари соҳибаси Лола Муротова томонидан яратилган бой тажрибани ёшларга етказиш орқали қишлоқ хўжалиги соҳасида профессионал ва олий таълимнинг ўзаро интеграциясини таъминлаш учун зарур шарт-шароитлар яратиш мақсадида Вазирлар Маҳкамаси қарор қилади:
1. Ўзбекистон Республикаси Олий таълим, фан ва инновациялар вазирлиги, Қишлоқ хўжалиги вазирлиги, Фарғона вилояти ҳокимлигининг Фарғона шаҳрида Лола Муротова номидаги қишлоқ хўжалигига ихтисослашган касб-ҳунар мактабини (кейинги ўринларда — Мактаб) ташкил этиш тўғрисидаги таклифи маъқуллансин.
2. Белгилаб қўйилсинки:
а) Мактаб Олий таълим, фан ва инновациялар вазирлиги тизимидаги давлат профессионал таълим муассасаси ҳисобланади ҳамда унинг фаолияти Давлат бюджети маблағлари ва қонунчилик ҳужжатлари билан тақиқланмаган бошқа манбалар ҳисобидан молиялаштирилади;
б) 2024/2025 ўқув йилидан бошлаб Мактабга умумий ўрта таълим ташкилотининг 9-синф битирувчилари белгиланган тартибда ўқишга қабул қилинади ва ўқув жараёни бошланғич профессионал таълим дастурлари асосида кундузги таълим шаклида амалга оширилади;
в) Мактабда:
юридик шахс бўлмаган «Фермерлар мактаби» ташкил этилади ҳамда буюртмачилар маблағлари ҳисобидан фермерлар малака ошириш курслари йўлга қўйилади;
таълим жараёнини бошқариш, шу жумладан, дарс жадвали, ўқувчилар баҳоларини қайд қилиш, педагог кадрлар ўқув юкламаларини белгилаш ва гуруҳ журналларини юритиш тўлиқ рақамлаштирилади.
3. Ўзбекистон Республикаси Олий таълим, фан ва инновациялар вазирлиги:
а) Иқтисодиёт ва молия вазирлиги билан биргаликда ҳар йили 1 июнга қадар Фарғона вилояти ҳокимлигининг таклифи асосида Мактабга ўқувчиларни қабул қилиш параметрларини белгиланган тартибда шакллантирсин ва тасдиқласин;
б) ўқувчиларни қабул қилиш параметрларига мос равишда юқори малакали мутахассисларни ишга қабул қилиш ҳамда соҳа ташкилотларида стажировкадан ўтказиш ишларини ташкил этсин;
в) Мактабгача ва мактаб таълими вазирлиги билан биргаликда мунтазам равишда умумий ўрта таълим ташкилотларининг 9-синф битирувчиларини қишлоқ хўжалиги соҳасидаги касбларга йўналтириш чораларини кўрсин;
г) 2024/2025 ўқув йилидан бошлаб Мактабда:
тасдиқланган намунавий ўқув режаси доирасида «Германия тажрибаси» асосида ўқувчиларни қишлоқ хўжалиги соҳасида тадбиркорлик кўникмаларига ўқитишни жорий этсин;
таълим жараёнини сифатли ташкил этиш ва методик ёрдам кўрсатиш учун Фарғона давлат университети бириктирилсин, бунда университет ҳар ўқув йили якуни бўйича кадрлар тайёрлаш устидан тизимли назорат ўрнатсин;
д) Мактабни ўқитиладиган фанлар бўйича янги ўқув адабиётлари ва ўқув-методик мажмуалар билан таъминласин;
е) бир ой муддатда Мактабнинг уставини тасдиқласин ҳамда унинг белгиланган тартибда давлат рўйхатидан ўтказилишини таъминласин.
4. Белгилансинки, Мактабни жорий сақлаш, унинг фаолият юритишини, моддий-техник базасини мустаҳкамлаш ва кадрлар тайёрлаш харажатлари 2024 йилда Фарғона вилоятининг маҳаллий бюджети маблағлари доирасида амалга оширилади, 2025 йилдан бошлаб эса Давлат бюджети параметрларида назарда тутилади.
5. Ўзбекистон Республикаси Иқтисодиёт ва молия вазирлиги Олий таълим, фан ва инновациялар вазирлиги билан биргаликда бир ой муддатда 2024 йилда мақбуллаштирилган маблағлар ҳисобидан Мактабга қишлоқ хўжалиги техникаларини харид қилиш учун Фарғона вилояти маҳаллий бюджетига тегишли маблағларни ажратиш чораларини кўрсин.
6. Фарғона вилояти ҳокимлиги:
бир ой муддатда Давлат активларини бошқариш агентлиги билан биргаликда Мактабни мос бинога жойлаштириш чораларини кўрсин;
икки ой муддатда Мактаб учун зарур бўладиган қишлоқ хўжалиги техникалари бюджетдан ажратилган маблағлар ҳисобидан харид қилинишини таъминласин;
Мактабга қишлоқ хўжалиги соҳасидаги иш берувчилар бириктирилишини таъминласин;
Мактаб битирувчилари амалиёти ишлаб чиқариш ташкилотларида ташкил этилишига ҳамда кейинчалик уларни ишга жойлаштиришга ҳар томонлама кўмаклашсин.
7. Ўзбекистон Республикаси Олий таълим, фан ва инновациялар вазирлиги манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.
8. Мазкур қарорнинг бажарилишини назорат қилиш Ўзбекистон Республикаси олий таълим, фан ва инновациялар вазири К.А. Шарипов ҳамда Фарғона вилояти ҳокими Х.Х. Бозаров зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2024 йил 8 июль,
392-сон
Oʻzbekiston Respublikasi Vazirlar Mahkamasining
qarori
Fargʻona shahrida Lola Murotova nomidagi qishloq xoʻjaligiga ixtisoslashgan kasb-hunar maktabini tashkil etish toʻgʻrisida
Qishloq xoʻjaligi sohasida oʻrta boʻgʻin kadrlarini tayyorlash, bu borada Oʻzbekiston Qahramoni, Oʻzbekiston Respublikasida xizmat koʻrsatgan qishloq xoʻjaligi xodimi, “El-yurt hurmati” va “Fidokorona xizmatlari uchun” ordenlari sohibasi Lola Murotova tomonidan yaratilgan boy tajribani yoshlarga yetkazish orqali qishloq xoʻjaligi sohasida professional va oliy taʼlimning oʻzaro integratsiyasini taʼminlash uchun zarur shart-sharoitlar yaratish maqsadida Vazirlar Mahkamasi qaror qiladi:
1. Oʻzbekiston Respublikasi Oliy taʼlim, fan va innovatsiyalar vazirligi, Qishloq xoʻjaligi vazirligi, Fargʻona viloyati hokimligining Fargʻona shahrida Lola Murotova nomidagi qishloq xoʻjaligiga ixtisoslashgan kasb-hunar maktabini (keyingi oʻrinlarda — Maktab) tashkil etish toʻgʻrisidagi taklifi maʼqullansin.
2. Belgilab qoʻyilsinki:
a) Maktab Oliy taʼlim, fan va innovatsiyalar vazirligi tizimidagi davlat professional taʼlim muassasasi hisoblanadi hamda uning faoliyati Davlat budjeti mablagʻlari va qonunchilik hujjatlari bilan taqiqlanmagan boshqa manbalar hisobidan moliyalashtiriladi;
b) 2024/2025 oʻquv yilidan boshlab Maktabga umumiy oʻrta taʼlim tashkilotining 9-sinf bitiruvchilari belgilangan tartibda oʻqishga qabul qilinadi va oʻquv jarayoni boshlangʻich professional taʼlim dasturlari asosida kunduzgi taʼlim shaklida amalga oshiriladi;
v) Maktabda:
yuridik shaxs boʻlmagan “Fermerlar maktabi” tashkil etiladi hamda buyurtmachilar mablagʻlari hisobidan fermerlar malaka oshirish kurslari yoʻlga qoʻyiladi;
taʼlim jarayonini boshqarish, shu jumladan, dars jadvali, oʻquvchilar baholarini qayd qilish, pedagog kadrlar oʻquv yuklamalarini belgilash va guruh jurnallarini yuritish toʻliq raqamlashtiriladi.
3. Oʻzbekiston Respublikasi Oliy taʼlim, fan va innovatsiyalar vazirligi:
a) Iqtisodiyot va moliya vazirligi bilan birgalikda har yili 1-iyunga qadar Fargʻona viloyati hokimligining taklifi asosida Maktabga oʻquvchilarni qabul qilish parametrlarini belgilangan tartibda shakllantirsin va tasdiqlasin;
b) oʻquvchilarni qabul qilish parametrlariga mos ravishda yuqori malakali mutaxassislarni ishga qabul qilish hamda soha tashkilotlarida stajirovkadan oʻtkazish ishlarini tashkil etsin;
v) Maktabgacha va maktab taʼlimi vazirligi bilan birgalikda muntazam ravishda umumiy oʻrta taʼlim tashkilotlarining 9-sinf bitiruvchilarini qishloq xoʻjaligi sohasidagi kasblarga yoʻnaltirish choralarini koʻrsin;
g) 2024/2025 oʻquv yilidan boshlab Maktabda:
tasdiqlangan namunaviy oʻquv rejasi doirasida “Germaniya tajribasi” asosida oʻquvchilarni qishloq xoʻjaligi sohasida tadbirkorlik koʻnikmalariga oʻqitishni joriy etsin;
taʼlim jarayonini sifatli tashkil etish va metodik yordam koʻrsatish uchun Fargʻona davlat universiteti biriktirilsin, bunda universitet har oʻquv yili yakuni boʻyicha kadrlar tayyorlash ustidan tizimli nazorat oʻrnatsin;
d) Maktabni oʻqitiladigan fanlar boʻyicha yangi oʻquv adabiyotlari va oʻquv-metodik majmualar bilan taʼminlasin;
e) bir oy muddatda Maktabning ustavini tasdiqlasin hamda uning belgilangan tartibda davlat roʻyxatidan oʻtkazilishini taʼminlasin.
4. Belgilansinki, Maktabni joriy saqlash, uning faoliyat yuritishini, moddiy-texnik bazasini mustahkamlash va kadrlar tayyorlash xarajatlari 2024-yilda Fargʻona viloyatining mahalliy budjeti mablagʻlari doirasida amalga oshiriladi, 2025-yildan boshlab esa Davlat budjeti parametrlarida nazarda tutiladi.
5. Oʻzbekiston Respublikasi Iqtisodiyot va moliya vazirligi Oliy taʼlim, fan va innovatsiyalar vazirligi bilan birgalikda bir oy muddatda 2024-yilda maqbullashtirilgan mablagʻlar hisobidan Maktabga qishloq xoʻjaligi texnikalarini xarid qilish uchun Fargʻona viloyati mahalliy budjetiga tegishli mablagʻlarni ajratish choralarini koʻrsin.
6. Fargʻona viloyati hokimligi:
bir oy muddatda Davlat aktivlarini boshqarish agentligi bilan birgalikda Maktabni mos binoga joylashtirish choralarini koʻrsin;
ikki oy muddatda Maktab uchun zarur boʻladigan qishloq xoʻjaligi texnikalari budjetdan ajratilgan mablagʻlar hisobidan xarid qilinishini taʼminlasin;
Maktabga qishloq xoʻjaligi sohasidagi ish beruvchilar biriktirilishini taʼminlasin;
Maktab bitiruvchilari amaliyoti ishlab chiqarish tashkilotlarida tashkil etilishiga hamda keyinchalik ularni ishga joylashtirishga har tomonlama koʻmaklashsin.
7. Oʻzbekiston Respublikasi Oliy taʼlim, fan va innovatsiyalar vazirligi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.
8. Mazkur qarorning bajarilishini nazorat qilish Oʻzbekiston Respublikasi oliy taʼlim, fan va innovatsiyalar vaziri K.A. Sharipov hamda Fargʻona viloyati hokimi X.X. Bozarov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 8-iyul,
392-son