UzbekAI

Ўзбекистон Республикаси Адлия вазирининг

буйруғи

НИЗОМ

Интеллектуал мулк тўғрисидаги қонунчилик ҳужжатлари талаблари бузилиши ҳолатлари юзасидан хулоса бериш тартиби тўғрисидаги низомни тасдиқлаш ҳақида

Ўзбекистон Республикаси Президентининг 2024 йил 24 майдаги ПФ-80-сон «Маъмурий ислоҳотлар доирасида адлия органлари ва муассасаларининг масъулиятини янада ошириш ҳамда ихчам бошқарув тизимини шакллантириш тўғрисида»ги Фармонига мувофиқ буюраман:

1. Интеллектуал мулк тўғрисидаги қонунчилик ҳужжатлари талаблари бузилиши ҳолатлари юзасидан хулоса бериш тартиби тўғрисидаги низом иловага мувофиқ тасдиқлансин.

2. Ушбу буйруқ расмий эълон қилинган кундан эътиборан кучга киради.

Ўзбекистон Республикаси адлия вазирининг 2024 йил 10 июлдаги 16-мҳ-сон буйруғига ИЛОВА

Интеллектуал мулк тўғрисидаги қонунчилик ҳужжатлари талаблари бузилиши ҳолатлари юзасидан хулоса бериш тартиби тўғрисидаги

Мазкур Низом Ўзбекистон Республикаси Адлия вазирлиги (бундан буён матнда Адлия вазирлиги деб юритилади) томонидан интеллектуал мулк тўғрисидаги қонунчилик ҳужжатлари талаблари бузилиши ҳолатлари юзасидан хулоса (бундан буён матнда хулоса деб юритилади) бериш тартибини белгилайди.

Ушбу Низомнинг амал қилиши процессуал қонунчилик билан тартибга солинадиган фуқаролик, иқтисодий, жиноят, маъмурий суд ишлари ва маъмурий ҳуқуқбузарлик тўғрисидаги ишлар бўйича мутахассис фикри ва эксперт хулосасини беришга нисбатан татбиқ этилмайди.

1-боб. Умумий қоидалар

1. Мазкур Низомда қуйидаги асосий тушунчалар қўлланилади:

муаллифлик ҳуқуқи ва турдош ҳуқуқ объектлари — фан, адабиёт ва санъат асарлари, ижролар, фонограммалар, эфир ёки кабель орқали кўрсатув ёхуд эшиттириш берувчи ташкилотнинг кўрсатувлари ёки эшиттиришлари, электрон ҳисоблаш машиналари учун дастурлар ва маълумотлар базалари;

саноат мулки объектлари — ихтиролар, фойдали моделлар, саноат намуналари, селекция ютуқлари, товар белгилари (хизмат кўрсатиш белгилари), товар келиб чиққан жой номлари, географик кўрсаткичлар, фирма номлари.

2. Хулоса давлат органларининг инсофсиз рақобатни, интеллектуал мулк объектларининг контрафакт нусхаларини, интеллектуал мулк объектларидан ноқонуний фойдаланганлик ҳолатларини аниқлашга қаратилган сўровига асосан Адлия вазирлиги томонидан берилади.

3. Давлат органининг хулоса бериш ҳақидаги сўрови Адлия вазирлигига келиб тушган кундан эътиборан ўттиз кунлик муддатда кўриб чиқилади.

2-боб. Интеллектуал мулк тўғрисидаги қонунчилик ҳужжатлари талаблари бузилиши ҳолатлари юзасидан ўрганиш ўтказиш ва хулосани расмийлаштириш

4. Давлат органи муаллифлик ҳуқуқи ва турдош ҳуқуқ объектлари ҳамда саноат мулки объектлари (бундан буён матнда интеллектуал мулк объектлари деб юритилади) бўйича интеллектуал мулк тўғрисидаги қонунчилик ҳужжатлари талаблари бузилиши ҳолати мавжуд ёки мавжуд эмаслигини аниқлаш мақсадида Адлия вазирлигига ёзма ёки электрон шаклда сўров юборади.

Сўровда интеллектуал мулк объектлари тўғрисидаги ахборот кўрсатилади.

5. Сўровга қуйидагилар илова қилинади:

жисмоний ва юридик шахсларнинг мурожаатлари (агар мавжуд бўлса);

давлат органи томонидан интеллектуал мулк объектларини ҳимоя қилиш чораларини кўришда тўпланган ҳужжатлар нусхалари;

ўрганиш объект(лар)ининг намунаси, нусхаси, чизмаси, аудио ёзуви фото ва видео тасвирлари;

муаллифлик ҳуқуқи ва турдош ҳуқуқ объектларининг яратилиш фактини тасдиқловчи материаллар (нусхаси, чизмаси, аудио ёзуви, фото ва видео тасвирлари ҳамда бошқалар);

интеллектуал мулк объектларига бўлган ҳуқуқларни бошқа шахсга ўтказиш ёки ундан фойдаланиш фактини тасдиқловчи шартнома, суд қарори, мерос гувоҳномаси ва бошқа ҳужжатлар;

интеллектуал мулк ҳуқуқи бузилиши ҳолатини тасдиқловчи далиллар (аудио ёзуви, фото ва видео тасвирлари ҳамда бошқалар).

6. Сўров Адлия вазирлигига келиб тушгандан сўнг, интеллектуал мулк объектларига оид қонунчилик талаблари бузилган ёки бузилмаганлигини ўрганиш учун вазирликнинг Интеллектуал мулкни ҳуқуқий ҳимоя қилиш бошқармасига юборилади.

7. Давлат органи томонидан мазкур Низомнинг 5-бандида назарда тутилган ҳужжат ва маълумотлар тўлиқ тақдим этилмаган бўлса, Адлия вазирлиги томонидан давлат органига камчиликларни бартараф этиб, қайта сўров юбориш мумкинлиги тўғрисида ушбу сўров келиб тушган кундан эътиборан беш иш куни ичида ёзма ёки электрон шаклда маълум қилинади.

8. Давлат органи томонидан мазкур Низомнинг 5-бандида назарда тутилган ҳужжат ва маълумотлар тўлиқ тақдим этилган бўлса, Адлия вазирлиги Интеллектуал мулкни ҳуқуқий ҳимоя қилиш бошқармасининг масъул ходими томонидан давлат органининг сўрови бўйича қуйидагилар кўриб чиқилади:

ўрганиш объект(лар)ининг қонунчилик ҳужжатлари бўйича интеллектуал мулк объекти сифатида ҳимоя қилиниши ёки қилинмаслиги;

ўрганиш объект(лар)и саноат мулки объекти ҳисобланганда, унинг муҳофазага эга саноат мулки объекти билан айнан бир хил ёки унга адаштириб юбориш даражасида ўхшашлиги;

9. Ўрганиш объекти саноат мулки объекти ҳисобланганда, у муҳофазага эга саноат мулки объекти билан тегишли саноат мулки объектларини рўйхатдан ўтказиш бўйича давлат хизматларини кўрсатиш регламентларида белгиланган талаблар асосида таққосланади ва ўрганиб чиқилади.

10. Адлия вазирлиги сўровни кўриб чиқиш жараёнида:

давлат органлари ва бошқа ташкилотлардан ҳужжат ҳамда маълумотларни сўраш ва олиш;

давлат органлари ва бошқа ташкилотларнинг мансабдор шахслари ҳамда ходимларини, шунингдек интеллектуал мулк масалалари бўйича жисмоний шахсларни чақириш, қонунчилик ҳужжатларининг бузилиши ҳолатлари юзасидан оғзаки ва ёзма тушунтиришлар талаб қилиш;

давлат органларидан ўрганиш объект(лар)ини жойига чиққан ҳолда ўрганишнинг ташкил этилишини сўраш ва жойига чиққан ҳолда ўрганиш;

зарур билим ва малакага эга мутахассисларни жалб қилиш ҳуқуқларига эга.

11. Қуйидаги ҳолларда ўрганиш ўтказилмайди ва хулоса бериш рад этилади:

сўров юборган давлат органининг сўровни кўрмасдан қолдириш тўғрисидаги мурожаати келиб тушганда;

давлат органининг сўровида интеллектуал мулк объекти ҳисобланмайдиган объектлар ёки мазкур Низомнинг 2-бандида назарда тутилмаган ҳолатлар бўйича хулоса бериш сўралганда;

фан, техника, санъат ёки ҳунар соҳасида махсус билимлар асосида аниқланадиган масалалар бўйича хулоса бериш сўралганда.

12. Масъул ходим томонидан ўрганиш натижаларига кўра интеллектуал мулк объектларига оид қонунчилик ҳужжатлари бузилганлиги ёки бузилмаганлиги юзасидан якуний хулоса тайёрланади.

13. Хулосада қуйидагилар кўрсатилади:

ўрганиш ўтказиш жойи ва вақти;

давлат органининг сўрови тўғрисидаги маълумотлар;

ўрганиш ўтказиш учун асос бўлган норматив-ҳуқуқий ҳужжатлар;

ҳуқуқбузарлик ҳолати аниқланган ёки аниқланмаганлиги.

14. Хулоса масъул ходим, таркибий бўлинмалар раҳбари томонидан имзоланади.

15. Адлия вазирлиги томонидан интеллектуал мулк тўғрисидаги қонунчилик ҳужжатлари талаблари бузилиши ҳолатлари юзасидан хулоса тақдим этилган ўрганиш объект(лар)и нусхалари (чизмалар, аудио ёзув, фото ва видео тасвирлар ва бошқалар (агар мавжуд бўлса) билан биргаликда давлат органига юборилади.

16. Хулосага тартиб рақам бериш ва уларнинг ҳисобини юритиш Адлия вазирлигининг электрон ахборот алмашинув тизими орқали амалга оширилади.

3-боб. Якуний қоида

17. Мазкур Низом талабларини бузилишида айбдор бўлган шахслар қонунчилик ҳужжатларига мувофиқ жавоб беради.

Вазир А. ТАШКУЛОВ

Тошкент ш.,

2024 йил 10 июль,

16-мҳ-сон

(Қонунчилик маълумотлари миллий базаси, 11.07.2024 й., 10/24/3529/0498-сон)

lex.uz

Oʻzbekiston Respublikasi Adliya vazirining

buyrugʻi

NIZOM

Intellektual mulk toʻgʻrisidagi qonunchilik hujjatlari talablari buzilishi holatlari yuzasidan xulosa berish tartibi toʻgʻrisidagi nizomni tasdiqlash haqida

Oʻzbekiston Respublikasi Prezidentining 2024-yil 24-maydagi PF-80-son “Maʼmuriy islohotlar doirasida adliya organlari va muassasalarining masʼuliyatini yanada oshirish hamda ixcham boshqaruv tizimini shakllantirish toʻgʻrisida”gi Farmoniga muvofiq buyuraman:

1. Intellektual mulk toʻgʻrisidagi qonunchilik hujjatlari talablari buzilishi holatlari yuzasidan xulosa berish tartibi toʻgʻrisidagi nizom ilovaga muvofiq tasdiqlansin.

2. Ushbu buyruq rasmiy eʼlon qilingan kundan eʼtiboran kuchga kiradi.

Oʻzbekiston Respublikasi adliya vazirining 2024-yil 10-iyuldagi 16-mh-son buyrugʻiga ILOVA

Intellektual mulk toʻgʻrisidagi qonunchilik hujjatlari talablari buzilishi holatlari yuzasidan xulosa berish tartibi toʻgʻrisidagi

Mazkur Nizom Oʻzbekiston Respublikasi Adliya vazirligi (bundan buyon matnda Adliya vazirligi deb yuritiladi) tomonidan intellektual mulk toʻgʻrisidagi qonunchilik hujjatlari talablari buzilishi holatlari yuzasidan xulosa (bundan buyon matnda xulosa deb yuritiladi) berish tartibini belgilaydi.

Ushbu Nizomning amal qilishi protsessual qonunchilik bilan tartibga solinadigan fuqarolik, iqtisodiy, jinoyat, maʼmuriy sud ishlari va maʼmuriy huquqbuzarlik toʻgʻrisidagi ishlar boʻyicha mutaxassis fikri va ekspert xulosasini berishga nisbatan tatbiq etilmaydi.

1-bob. Umumiy qoidalar

1. Mazkur Nizomda quyidagi asosiy tushunchalar qoʻllaniladi:

mualliflik huquqi va turdosh huquq obyektlari — fan, adabiyot va sanʼat asarlari, ijrolar, fonogrammalar, efir yoki kabel orqali koʻrsatuv yoxud eshittirish beruvchi tashkilotning koʻrsatuvlari yoki eshittirishlari, elektron hisoblash mashinalari uchun dasturlar va maʼlumotlar bazalari;

sanoat mulki obyektlari — ixtirolar, foydali modellar, sanoat namunalari, seleksiya yutuqlari, tovar belgilari (xizmat koʻrsatish belgilari), tovar kelib chiqqan joy nomlari, geografik koʻrsatkichlar, firma nomlari.

2. Xulosa davlat organlarining insofsiz raqobatni, intellektual mulk obyektlarining kontrafakt nusxalarini, intellektual mulk obyektlaridan noqonuniy foydalanganlik holatlarini aniqlashga qaratilgan soʻroviga asosan Adliya vazirligi tomonidan beriladi.

3. Davlat organining xulosa berish haqidagi soʻrovi Adliya vazirligiga kelib tushgan kundan eʼtiboran oʻttiz kunlik muddatda koʻrib chiqiladi.

2-bob. Intellektual mulk toʻgʻrisidagi qonunchilik hujjatlari talablari buzilishi holatlari yuzasidan oʻrganish oʻtkazish va xulosani rasmiylashtirish

4. Davlat organi mualliflik huquqi va turdosh huquq obyektlari hamda sanoat mulki obyektlari (bundan buyon matnda intellektual mulk obyektlari deb yuritiladi) boʻyicha intellektual mulk toʻgʻrisidagi qonunchilik hujjatlari talablari buzilishi holati mavjud yoki mavjud emasligini aniqlash maqsadida Adliya vazirligiga yozma yoki elektron shaklda soʻrov yuboradi.

Soʻrovda intellektual mulk obyektlari toʻgʻrisidagi axborot koʻrsatiladi.

5. Soʻrovga quyidagilar ilova qilinadi:

jismoniy va yuridik shaxslarning murojaatlari (agar mavjud boʻlsa);

davlat organi tomonidan intellektual mulk obyektlarini himoya qilish choralarini koʻrishda toʻplangan hujjatlar nusxalari;

oʻrganish obyekt(lar)ining namunasi, nusxasi, chizmasi, audio yozuvi foto va video tasvirlari;

mualliflik huquqi va turdosh huquq obyektlarining yaratilish faktini tasdiqlovchi materiallar (nusxasi, chizmasi, audio yozuvi, foto va video tasvirlari hamda boshqalar);

intellektual mulk obyektlariga boʻlgan huquqlarni boshqa shaxsga oʻtkazish yoki undan foydalanish faktini tasdiqlovchi shartnoma, sud qarori, meros guvohnomasi va boshqa hujjatlar;

intellektual mulk huquqi buzilishi holatini tasdiqlovchi dalillar (audio yozuvi, foto va video tasvirlari hamda boshqalar).

6. Soʻrov Adliya vazirligiga kelib tushgandan soʻng, intellektual mulk obyektlariga oid qonunchilik talablari buzilgan yoki buzilmaganligini oʻrganish uchun vazirlikning Intellektual mulkni huquqiy himoya qilish boshqarmasiga yuboriladi.

7. Davlat organi tomonidan mazkur Nizomning 5-bandida nazarda tutilgan hujjat va maʼlumotlar toʻliq taqdim etilmagan boʻlsa, Adliya vazirligi tomonidan davlat organiga kamchiliklarni bartaraf etib, qayta soʻrov yuborish mumkinligi toʻgʻrisida ushbu soʻrov kelib tushgan kundan eʼtiboran besh ish kuni ichida yozma yoki elektron shaklda maʼlum qilinadi.

8. Davlat organi tomonidan mazkur Nizomning 5-bandida nazarda tutilgan hujjat va maʼlumotlar toʻliq taqdim etilgan boʻlsa, Adliya vazirligi Intellektual mulkni huquqiy himoya qilish boshqarmasining masʼul xodimi tomonidan davlat organining soʻrovi boʻyicha quyidagilar koʻrib chiqiladi:

oʻrganish obyekt(lar)ining qonunchilik hujjatlari boʻyicha intellektual mulk obyekti sifatida himoya qilinishi yoki qilinmasligi;

mualliflik huquqi va turdosh huquq obyektlarining yaratilish faktini tasdiqlovchi materiallar (nusxasi, chizmasi, audio yozuvi, foto va video tasvirlari hamda boshqalar);

intellektual mulk obyektlariga boʻlgan huquqlarni boshqa shaxsga oʻtkazish yoki undan foydalanish faktini tasdiqlovchi shartnoma, sud qarori, meros guvohnomasi va boshqa hujjatlar;

oʻrganish obyekt(lar)i sanoat mulki obyekti hisoblanganda, uning muhofazaga ega sanoat mulki obyekti bilan aynan bir xil yoki unga adashtirib yuborish darajasida oʻxshashligi;

intellektual mulk huquqi buzilishi holatini tasdiqlovchi dalillar (audio yozuvi, foto va video tasvirlari hamda boshqalar).

9. Oʻrganish obyekti sanoat mulki obyekti hisoblanganda, u muhofazaga ega sanoat mulki obyekti bilan tegishli sanoat mulki obyektlarini roʻyxatdan oʻtkazish boʻyicha davlat xizmatlarini koʻrsatish reglamentlarida belgilangan talablar asosida taqqoslanadi va oʻrganib chiqiladi.

10. Adliya vazirligi soʻrovni koʻrib chiqish jarayonida:

davlat organlari va boshqa tashkilotlardan hujjat hamda maʼlumotlarni soʻrash va olish;

davlat organlari va boshqa tashkilotlarning mansabdor shaxslari hamda xodimlarini, shuningdek intellektual mulk masalalari boʻyicha jismoniy shaxslarni chaqirish, qonunchilik hujjatlarining buzilishi holatlari yuzasidan ogʻzaki va yozma tushuntirishlar talab qilish;

davlat organlaridan oʻrganish obyekt(lar)ini joyiga chiqqan holda oʻrganishning tashkil etilishini soʻrash va joyiga chiqqan holda oʻrganish;

zarur bilim va malakaga ega mutaxassislarni jalb qilish huquqlariga ega.

11. Quyidagi hollarda oʻrganish oʻtkazilmaydi va xulosa berish rad etiladi:

soʻrov yuborgan davlat organining soʻrovni koʻrmasdan qoldirish toʻgʻrisidagi murojaati kelib tushganda;

davlat organining soʻrovida intellektual mulk obyekti hisoblanmaydigan obyektlar yoki mazkur Nizomning 2-bandida nazarda tutilmagan holatlar boʻyicha xulosa berish soʻralganda;

fan, texnika, sanʼat yoki hunar sohasida maxsus bilimlar asosida aniqlanadigan masalalar boʻyicha xulosa berish soʻralganda.

12. Masʼul xodim tomonidan oʻrganish natijalariga koʻra intellektual mulk obyektlariga oid qonunchilik hujjatlari buzilganligi yoki buzilmaganligi yuzasidan yakuniy xulosa tayyorlanadi.

13. Xulosada quyidagilar koʻrsatiladi:

oʻrganish oʻtkazish joyi va vaqti;

davlat organining soʻrovi toʻgʻrisidagi maʼlumotlar;

oʻrganish oʻtkazish uchun asos boʻlgan normativ-huquqiy hujjatlar;

huquqbuzarlik holati aniqlangan yoki aniqlanmaganligi.

14. Xulosa masʼul xodim, tarkibiy boʻlinmalar rahbari tomonidan imzolanadi.

15. Adliya vazirligi tomonidan intellektual mulk toʻgʻrisidagi qonunchilik hujjatlari talablari buzilishi holatlari yuzasidan xulosa taqdim etilgan oʻrganish obyekt(lar)i nusxalari (chizmalar, audio yozuv, foto va video tasvirlar va boshqalar (agar mavjud boʻlsa) bilan birgalikda davlat organiga yuboriladi.

16. Xulosaga tartib raqam berish va ularning hisobini yuritish Adliya vazirligining elektron axborot almashinuv tizimi orqali amalga oshiriladi.

3-bob. Yakuniy qoida

17. Mazkur Nizom talablarini buzilishida aybdor boʻlgan shaxslar qonunchilik hujjatlariga muvofiq javob beradi.

Vazir A. TASHKULOV

Toshkent sh.,

2024-yil 10-iyul,

16-mh-son

(Qonunchilik maʼlumotlari milliy bazasi, 11.07.2024-y., 10/24/3529/0498-son)

lex.uz