UzbekAI

Ўзбекистон Республикаси Вазирлар Маҳкамасининг

қарори

НИЗОМ

Фойдаланишда бўлган мопед ва скутерларни давлат рўйхатидан ўтказиш тартиби тўғрисидаги вақтинчалик низомни тасдиқлаш ҳақида

Сўнгги йилларда мамлакатимизда йўл ҳаракати хавфсизлигини таъминлаш тизимини такомиллаштириш соҳасида кенг қамровли амалий чора-тадбирлар амалга оширилмоқда.

Шу билан бирга, аҳоли орасида тобора оммалашаётган ва электр қувватида ҳаракатланадиган транспорт воситаларида йўлларда ҳаракат иштирокчилари хавфсизлигини ишончли таъминлашда қатор муаммолар юзага келмоқда.

Хусусан, Йўл ҳаракати қоидалари бўйича бошланғич билимларга эга бўлмаган шахслар томонидан бундай транспорт воситалари бошқарилаётганлиги йўлларда турли салбий ҳолатларни келтириб чиқариш эҳтимолини оширмоқда. Бундай омиллар электр қувватида ҳаракатланадиган транспорт воситаларидан ўз билганича фойдаланишга, йўлларда тартибсиз, Йўл ҳаракати қоидаларига амал қилмасдан бошқаришга, йўл ҳаракати иштирокчилари билан боғлиқ нохуш ҳолатлар юзага келишига сабаб бўлмоқда.

Юқоридаги салбий оқибатларнинг олдини олиш ҳамда фуқароларга қўшимча қулайликлар яратиш мақсадида Вазирлар Маҳкамаси қарор қилади:

1. Белгилаб қўйилсинки:

двигателининг иш ҳажми 25 см 3 ва ундан ортиқ, лекин 50 см 3 дан ошмайдиган, шунингдек, электр двигателининг қуввати 0,25 киловатт ва ундан ортиқ, бироқ 4 киловаттдан ошмайдиган, конструктив тезлиги соатига 25 километр ва ундан ортиқ, лекин 50 километрдан ошмайдиган транспорт воситалари (мопед ва скутер) учун алоҳида рўйхатдан ўтказиш давлат рақами белгилари жорий этилади ҳамда бу турдаги транспорт воситалари белгиланган тартибда давлат рўйхатидан ўтказилади;

2025 йил 1 октябрдан бошлаб мазкур банднинг иккинчи хатбошисида назарда тутилган транспорт воситаларини бошқариш учун тегишли тоифадаги ҳайдовчилик гувоҳномасига эга бўлиш талаб этилади.

2. Фойдаланишда бўлган мопед ва скутерларни давлат рўйхатидан ўтказиш тартиби тўғрисидаги вақтинчалик низом иловага мувофиқ тасдиқлансин.

3. Ички ишлар вазирлиги 2024 йил 1 октябрга қадар:

мопед ва скутерларни сотиш фаолияти билан шуғулланувчи махсус савдо ташкилотларини (ишлаб чиқарувчи, унинг вакили ёки воситачи (дистрибьюторлик, дилерлик) ташкилотларини) ЙҲХХнинг Ягона автоматлаштирилган ахборот тизими «Транспорт воситалари ҳисоб маълумотномалари» модулига интеграция қилсин ва бундай транспорт воситалари учун счёт-маълумотлар электрон шаклда берилишини таъминласин;

Иқтисодиёт ва молия вазирлиги ҳузуридаги Божхона қўмитаси билан биргаликда Ўзбекистон Республикасига олиб кирилаётган мопед ва скутер тўғрисидаги маълумотлар билан алмашишни жорий этсин.

4. Ички ишлар вазирлиги манфаатдор вазирлик ва идоралар билан биргаликда:

ушбу қарорнинг мазмун-моҳияти ва аҳамияти аҳоли ўртасида кенг тушунтирилишини таъминласин;

ўзлари қабул қилган норматив-ҳуқуқий ҳужжатларни икки ой муддатда ушбу қарорга мувофиқлаштирсин.

5. Ушбу қарор расмий эълон қилинган кундан эътиборан уч ой ўтгач кучга киради.

6. Мазкур қарорнинг бажарилишини назорат қилиш Ўзбекистон Республикаси ички ишлар вазири П.Р. Бобожонов зиммасига юклансин.

Вазирлар Маҳкамасининг 2024 йил 8 июлдаги 393-сон қарорига ИЛОВА

Фойдаланишда бўлган мопед ва скутерларни давлат рўйхатидан ўтказиш тартиби тўғрисида вақтинчалик

1-боб. Умумий қоидалар

1. Мазкур Вақтинчалик низом фойдаланишда бўлган двигателининг иш ҳажми 25 см 3 ва ундан ортиқ, лекин 50 см 3 дан ошмайдиган, шунингдек, электр двигателининг қуввати 0,25 киловатт ва ундан ортиқ, лекин 4 киловаттдан ошмайдиган, конструктив тезлиги соатига 25 километр ва ундан ортиқ, лекин 50 километрдан ошмайдиган транспорт воситаларини (кейинги ўринларда — мопед ёки скутерлар) давлат рўйхатидан ўтказишнинг вақтинчалик тартибини белгилайди.

Ушбу Вақтинчалик низом талаблари у кучга киргунга қадар янги, фойдаланишда бўлмаган мопед ва скутерларга нисбатан татбиқ этилмайди.

Янги мопед ёки скутерлар Вазирлар Маҳкамасининг «Автомототранспорт воситаларини давлат рўйхатидан ўтказиш ва уларга рўйхатдан ўтказиш давлат рақами белгиларини бериш тартибини такомиллаштириш тўғрисида» 2017 йил 31 августдаги 683-сон қарорида белгиланган талабларга мувофиқ давлат рўйхатидан ўтказилади.

2. Мопед ёки скутерларни давлат рўйхатидан ўтказиш Ўзбекистон Республикаси Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизмати (кейинги ўринларда — ЙҲХХ) ҳудудий бошқармаларининг рўйхатдан ўтказиш ва имтиҳон олиш бўлинмалари (кейинги ўринларда — ҳудудий бошқармалар) томонидан амалга оширилади.

3. Мопед ёки скутерларни рўйхатдан ўтказиш ҳамда уларга рўйхатдан ўтказиш давлат рақами белгиларини ва рўйхатдан ўтказилганлиги тўғрисидаги гувоҳномаларни бериш учун ундириладиган тўловлар миқдори Ўзбекистон Республикаси Ички ишлар вазирлиги томонидан белгиланади.

4. Мазкур Вақтинчалик низом 2025 йил 30 сентябрга қадар амал қилади.

2-боб. Фойдаланишда бўлган мопед ва скутерларни давлат рўйхатидан ўтказиш тартиби

5. Фойдаланишда бўлган мопед ва скутерларнинг техник тавсифлари техник жиҳатдан тартибга солиш соҳасидаги норматив ҳужжатлар, шунингдек, йўл ҳаракати хавфсизлигини таъминлаш соҳасидаги меъёрлар талабларига мос келиши керак.

6. Фойдаланишда бўлган мопед ва скутерлар эгалари ёки вакиллари томонидан ҳудудий бошқармаларга олиб келинади ва улар соддалаштирилган тартибда давлат рўйхатидан ўтказилади.

7. Фойдаланишда бўлган мопед ва скутерларни давлат рўйхатидан ўтказиш учун эгалари ёки вакиллари ҳудудий бошқармаларга қуйидаги ҳужжатларни тақдим этади:

мопед ёки скутер эгаси ёки вакилининг шахсини тасдиқловчи ҳужжати ва унга тақдим этилган ишончнома;

мопед ёки скутер эгаси ёки вакилининг белгиланган намунадаги аризаси;

мопед ёки скутернинг техник тавсифлари акс эттирилган савдо ташкилотлари (ишлаб чиқарувчи, унинг вакили ёки воситачи (дистрибьюторлик, дилерлик) ташкилотлар) томонидан берилган ҳужжат (русуми, идентификацияловчи рама ва двигателлар рақамлари, двигателининг қуввати, тўлиқ вазн ва бошқалар акс эттирилган ҳужжат), агар мавжуд бўлса;

мопед ёки скутерга бўлган мулкий ва бошқа ашёвий ҳуқуқларни тасдиқловчи ҳужжат ёки харид қилинганлигини тасдиқловчи ҳужжат, агар мавжуд бўлса;

мопед ёки скутерни давлат рўйхатидан ўтказиш ҳамда уларга рўйхатдан ўтказиш давлат рақами белгиларини ва рўйхатдан ўтказилганлиги тўғрисидаги гувоҳномаларни бериш учун тўловлар тўланганлигини тасдиқловчи банк тўлов ҳужжати (электрон тўлов тизимлар орқали тўлов амалга оширилган ҳоллар бундан мустасно).

8. Агар фойдаланишда бўлган мопед ёки скутер учун 7-банднинг тўртинчи ва бешинчи хатбошиларидаги ҳужжатлар мавжуд бўлмаса, ҳақиқатдан ҳам ушбу мопед ёки скутер шу шахсга тегишли эканлиги, уни қаердан, қачон олганлиги тўғрисида эркин шаклдаги тушунтириш хати ёзиб беради.

9. Ҳудудий бошқармалар томонидан мопед ёки скутерларнинг русуми, идентификацияловчи рама ва двигателлар рақамларининг (кейинги ўринларда — техник кўрсаткичлари) тақдим этилган ҳужжатларда кўрсатилган маълумотларга тўғри келиши юзасидан техник кўрикдан ўтказилади.

Мопед ёки скутерга тегишли маълумотлар олиб қочилган ва ўғирланган автомототранспорт воситалари бўйича маълумотлар базаси билан таққосланади.

Агар маълумотлар базасида мопед ёки скутернинг қидирувда эканлиги бўйича материаллар мавжуд бўлса, тўпланган ҳужжатлар 24 соат ичида суриштирув ёки тергов органларига юборилади.

10. Қидирувда бўлмаган мопед ёки скутерлар:

двигателининг иш ҳажми 25 см 3 дан ортиқ, лекин 50 см 3 дан ошмайдиган, конструктив тезлиги соатига 25 километрдан ортиқ, лекин 50 километрдан ошмайдиган ҳолатда мопед сифатида;

электр двигателининг қуввати 0,25 киловаттдан ортиқ, лекин 4 киловаттдан ошмайдиган, конструктив тезлиги соатига 25 километрдан ортиқ, лекин 50 километрдан ошмайдиган ҳолатда скутер сифатида давлат рўйхатидан ўтказилади.

11. Давлат рўйхатидан ўтказилган мопед ёки скутерга белгиланган тартибда автомототранспорт воситасини рўйхатдан ўтказиш тўғрисидаги гувоҳнома расмийлаштирилади ва рўйхатдан ўтказиш давлат рақами белгиси берилади.

12. Агрегат рақамларининг ҳаққонийлигига шубҳа туғдирган мопед ёки скутер экспертизага юборилади.

Экспертиза натижалари салбий чиққан ҳолатларда масъул ходимлар томонидан суриштирув ёки тергов органларига дарҳол мурожаат қилинади.

Экспертиза якунлари ижобий бўлганда, ушбу мопед ёки скутер мазкур Вақтинчалик низомда белгиланган тартибда давлат рўйхатидан ўтказиш ҳаракатлари амалга оширилади.

3-боб. Якунловчи қоида

13. Ушбу Вақтинчалик низом талабларининг бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Ўзбекистон Республикасининг Бош вазири А. АРИПОВ

Тошкент ш.,

2024 йил 8 июль,

393-сон

(Қонунчилик маълумотлари миллий базаси, 17.07.2024 й., 09/24/393/0516-сон; 15.04.2025 й., 09/25/224/0338-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

Foydalanishda boʻlgan moped va skuterlarni davlat roʻyxatidan oʻtkazish tartibi toʻgʻrisidagi vaqtinchalik nizomni tasdiqlash haqida

Soʻnggi yillarda mamlakatimizda yoʻl harakati xavfsizligini taʼminlash tizimini takomillashtirish sohasida keng qamrovli amaliy chora-tadbirlar amalga oshirilmoqda.

Shu bilan birga, aholi orasida tobora ommalashayotgan va elektr quvvatida harakatlanadigan transport vositalarida yoʻllarda harakat ishtirokchilari xavfsizligini ishonchli taʼminlashda qator muammolar yuzaga kelmoqda.

Xususan, Yoʻl harakati qoidalari boʻyicha boshlangʻich bilimlarga ega boʻlmagan shaxslar tomonidan bunday transport vositalari boshqarilayotganligi yoʻllarda turli salbiy holatlarni keltirib chiqarish ehtimolini oshirmoqda. Bunday omillar elektr quvvatida harakatlanadigan transport vositalaridan oʻz bilganicha foydalanishga, yoʻllarda tartibsiz, Yoʻl harakati qoidalariga amal qilmasdan boshqarishga, yoʻl harakati ishtirokchilari bilan bogʻliq noxush holatlar yuzaga kelishiga sabab boʻlmoqda.

Yuqoridagi salbiy oqibatlarning oldini olish hamda fuqarolarga qoʻshimcha qulayliklar yaratish maqsadida Vazirlar Mahkamasi qaror qiladi:

1. Belgilab qoʻyilsinki:

dvigatelining ish hajmi 25 sm 3 va undan ortiq, lekin 50 sm 3 dan oshmaydigan, shuningdek, elektr dvigatelining quvvati 0,25 kilovatt va undan ortiq, biroq 4 kilovattdan oshmaydigan, konstruktiv tezligi soatiga 25 kilometr va undan ortiq, lekin 50 kilometrdan oshmaydigan transport vositalari (moped va skuter) uchun alohida roʻyxatdan oʻtkazish davlat raqami belgilari joriy etiladi hamda bu turdagi transport vositalari belgilangan tartibda davlat roʻyxatidan oʻtkaziladi;

2025-yil 1-oktabrdan boshlab mazkur bandning ikkinchi xatboshisida nazarda tutilgan transport vositalarini boshqarish uchun tegishli toifadagi haydovchilik guvohnomasiga ega boʻlish talab etiladi.

2. Foydalanishda boʻlgan moped va skuterlarni davlat roʻyxatidan oʻtkazish tartibi toʻgʻrisidagi vaqtinchalik nizom ilovaga muvofiq tasdiqlansin.

3. Ichki ishlar vazirligi 2024-yil 1-oktabrga qadar:

moped va skuterlarni sotish faoliyati bilan shugʻullanuvchi maxsus savdo tashkilotlarini (ishlab chiqaruvchi, uning vakili yoki vositachi (distribyutorlik, dilerlik) tashkilotlarini) YHXXning Yagona avtomatlashtirilgan axborot tizimi “Transport vositalari hisob maʼlumotnomalari” moduliga integratsiya qilsin va bunday transport vositalari uchun schyot-maʼlumotlar elektron shaklda berilishini taʼminlasin;

Iqtisodiyot va moliya vazirligi huzuridagi Bojxona qoʻmitasi bilan birgalikda Oʻzbekiston Respublikasiga olib kirilayotgan moped va skuter toʻgʻrisidagi maʼlumotlar bilan almashishni joriy etsin.

4. Ichki ishlar vazirligi manfaatdor vazirlik va idoralar bilan birgalikda:

ushbu qarorning mazmun-mohiyati va ahamiyati aholi oʻrtasida keng tushuntirilishini taʼminlasin;

oʻzlari qabul qilgan normativ-huquqiy hujjatlarni ikki oy muddatda ushbu qarorga muvofiqlashtirsin.

5. Ushbu qaror rasmiy eʼlon qilingan kundan eʼtiboran uch oy oʻtgach kuchga kiradi.

6. Mazkur qarorning bajarilishini nazorat qilish Oʻzbekiston Respublikasi ichki ishlar vaziri P.R. Bobojonov zimmasiga yuklansin.

Vazirlar Mahkamasining 2024-yil 8-iyuldagi 393-son qaroriga ILOVA

Foydalanishda boʻlgan moped va skuterlarni davlat roʻyxatidan oʻtkazish tartibi toʻgʻrisida vaqtinchalik

1-bob. Umumiy qoidalar

1. Mazkur Vaqtinchalik nizom foydalanishda boʻlgan dvigatelining ish hajmi 25 sm 3 va undan ortiq, lekin 50 sm 3 dan oshmaydigan, shuningdek, elektr dvigatelining quvvati 0,25 kilovatt va undan ortiq, lekin 4 kilovattdan oshmaydigan, konstruktiv tezligi soatiga 25 kilometr va undan ortiq, lekin 50 kilometrdan oshmaydigan transport vositalarini (keyingi oʻrinlarda — moped yoki skuterlar) davlat roʻyxatidan oʻtkazishning vaqtinchalik tartibini belgilaydi.

Ushbu Vaqtinchalik nizom talablari u kuchga kirgunga qadar yangi, foydalanishda boʻlmagan moped va skuterlarga nisbatan tatbiq etilmaydi.

Yangi moped yoki skuterlar Vazirlar Mahkamasining “Avtomototransport vositalarini davlat roʻyxatidan oʻtkazish va ularga roʻyxatdan oʻtkazish davlat raqami belgilarini berish tartibini takomillashtirish toʻgʻrisida” 2017-yil 31-avgustdagi 683-son qarorida belgilangan talablarga muvofiq davlat roʻyxatidan oʻtkaziladi.

2. Moped yoki skuterlarni davlat roʻyxatidan oʻtkazish Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmati (keyingi oʻrinlarda — YHXX) hududiy boshqarmalarining roʻyxatdan oʻtkazish va imtihon olish boʻlinmalari (keyingi oʻrinlarda — hududiy boshqarmalar) tomonidan amalga oshiriladi.

3. Moped yoki skuterlarni roʻyxatdan oʻtkazish hamda ularga roʻyxatdan oʻtkazish davlat raqami belgilarini va roʻyxatdan oʻtkazilganligi toʻgʻrisidagi guvohnomalarni berish uchun undiriladigan toʻlovlar miqdori Oʻzbekiston Respublikasi Ichki ishlar vazirligi tomonidan belgilanadi.

4. Mazkur Vaqtinchalik nizom 2025-yil 30-sentabrga qadar amal qiladi.

2-bob. Foydalanishda boʻlgan moped va skuterlarni davlat roʻyxatidan oʻtkazish tartibi

5. Foydalanishda boʻlgan moped va skuterlarning texnik tavsiflari texnik jihatdan tartibga solish sohasidagi normativ hujjatlar, shuningdek, yoʻl harakati xavfsizligini taʼminlash sohasidagi meʼyorlar talablariga mos kelishi kerak.

6. Foydalanishda boʻlgan moped va skuterlar egalari yoki vakillari tomonidan hududiy boshqarmalarga olib kelinadi va ular soddalashtirilgan tartibda davlat roʻyxatidan oʻtkaziladi.

7. Foydalanishda boʻlgan moped va skuterlarni davlat roʻyxatidan oʻtkazish uchun egalari yoki vakillari hududiy boshqarmalarga quyidagi hujjatlarni taqdim etadi:

moped yoki skuter egasi yoki vakilining shaxsini tasdiqlovchi hujjati va unga taqdim etilgan ishonchnoma;

moped yoki skuter egasi yoki vakilining belgilangan namunadagi arizasi;

moped yoki skuterning texnik tavsiflari aks ettirilgan savdo tashkilotlari (ishlab chiqaruvchi, uning vakili yoki vositachi (distribyutorlik, dilerlik) tashkilotlar) tomonidan berilgan hujjat (rusumi, identifikatsiyalovchi rama va dvigatellar raqamlari, dvigatelining quvvati, toʻliq vazn va boshqalar aks ettirilgan hujjat), agar mavjud boʻlsa;

moped yoki skuterga boʻlgan mulkiy va boshqa ashyoviy huquqlarni tasdiqlovchi hujjat yoki xarid qilinganligini tasdiqlovchi hujjat, agar mavjud boʻlsa;

moped yoki skuterni davlat roʻyxatidan oʻtkazish hamda ularga roʻyxatdan oʻtkazish davlat raqami belgilarini va roʻyxatdan oʻtkazilganligi toʻgʻrisidagi guvohnomalarni berish uchun toʻlovlar toʻlanganligini tasdiqlovchi bank toʻlov hujjati (elektron toʻlov tizimlar orqali toʻlov amalga oshirilgan hollar bundan mustasno).

8. Agar foydalanishda boʻlgan moped yoki skuter uchun 7-bandning toʻrtinchi va beshinchi xatboshilaridagi hujjatlar mavjud boʻlmasa, haqiqatdan ham ushbu moped yoki skuter shu shaxsga tegishli ekanligi, uni qayerdan, qachon olganligi toʻgʻrisida erkin shakldagi tushuntirish xati yozib beradi.

9. Hududiy boshqarmalar tomonidan moped yoki skuterlarning rusumi, identifikatsiyalovchi rama va dvigatellar raqamlarining (keyingi oʻrinlarda — texnik koʻrsatkichlari) taqdim etilgan hujjatlarda koʻrsatilgan maʼlumotlarga toʻgʻri kelishi yuzasidan texnik koʻrikdan oʻtkaziladi.

Moped yoki skuterga tegishli maʼlumotlar olib qochilgan va oʻgʻirlangan avtomototransport vositalari boʻyicha maʼlumotlar bazasi bilan taqqoslanadi.

Agar maʼlumotlar bazasida moped yoki skuterning qidiruvda ekanligi boʻyicha materiallar mavjud boʻlsa, toʻplangan hujjatlar 24 soat ichida surishtiruv yoki tergov organlariga yuboriladi.

10. Qidiruvda boʻlmagan moped yoki skuterlar:

dvigatelining ish hajmi 25 sm 3 dan ortiq, lekin 50 sm 3 dan oshmaydigan, konstruktiv tezligi soatiga 25 kilometrdan ortiq, lekin 50 kilometrdan oshmaydigan holatda moped sifatida;

elektr dvigatelining quvvati 0,25 kilovattdan ortiq, lekin 4 kilovattdan oshmaydigan, konstruktiv tezligi soatiga 25 kilometrdan ortiq, lekin 50 kilometrdan oshmaydigan holatda skuter sifatida davlat roʻyxatidan oʻtkaziladi.

11. Davlat roʻyxatidan oʻtkazilgan moped yoki skuterga belgilangan tartibda avtomototransport vositasini roʻyxatdan oʻtkazish toʻgʻrisidagi guvohnoma rasmiylashtiriladi va roʻyxatdan oʻtkazish davlat raqami belgisi beriladi.

12. Agregat raqamlarining haqqoniyligiga shubha tugʻdirgan moped yoki skuter ekspertizaga yuboriladi.

Ekspertiza natijalari salbiy chiqqan holatlarda masʼul xodimlar tomonidan surishtiruv yoki tergov organlariga darhol murojaat qilinadi.

Ekspertiza yakunlari ijobiy boʻlganda, ushbu moped yoki skuter mazkur Vaqtinchalik nizomda belgilangan tartibda davlat roʻyxatidan oʻtkazish harakatlari amalga oshiriladi.

3-bob. Yakunlovchi qoida

13. Ushbu Vaqtinchalik nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Oʻzbekiston Respublikasining Bosh vaziri A. ARIPOV

Toshkent sh.,

2024-yil 8-iyul,

393-son

(Qonunchilik maʼlumotlari milliy bazasi, 17.07.2024-y., 09/24/393/0516-son; 15.04.2025-y., 09/25/224/0338-son)

lex.uz