📅 2024-yil 4-iyun · Vazirlik va idoralar hujjatlari · Iqtisodiyot va moliya vaziri
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 4 июнь · Вазирлик ва идоралар ҳужжатлари · Иқтисодиёт ва молия вазири
Расмий матн. Расмий ҳужжат. Таҳририй изоҳлар киритилмаган.
📅 4 июня 2024 г. · Документы министерств и ведомств · Министр экономики и финансов
Официальный текст. Официальный документ. Редакционные примечания не включены.
📅 4 June 2024 · Ministry and agency documents · Iqtisodiyot va moliya vaziri
Official text. Official document. Editorial notes are not included.
Ўзбекистон Республикаси Иқтисодиёт ва молия вазирининг
буйруғи
Ўзбекистон Республикаси бюджет ҳисобининг стандарти (15-сонли БҲС) «Хизмат кўрсатиш бўйича концессия келишувлари»ни тасдиқлаш тўғрисида
Ўзбекистон Республикасининг Бюджет кодекси , Ўзбекистон Республикасининг «Бухгалтерия ҳисоби тўғрисида»ги Қонунига мувофиқ ва бюджет ҳисобини давлат секторида молиявий ҳисоботларнинг халқаро стандартлари билан мувофиқлаштириш мақсадида, буюраман:
1. Ўзбекистон Республикаси бюджет ҳисобининг стандарти (15-сонли БҲС) «Хизмат кўрсатиш бўйича концессия келишувлари» иловага мувофиқ тасдиқлансин.
2. Мазкур буйруқ 2025 йил 1 январдан эътиборан кучга киради.
Ўзбекистон Республикаси иқтисодиёт ва молия вазирининг 2024 йил 4 июндаги 129-сон буйруғига ИЛОВА
Ўзбекистон Республикаси бюджет ҳисобининг стандарти (15-сонли БҲС) «Хизмат кўрсатиш бўйича концессия келишувлари»
Мазкур Ўзбекистон Республикаси бюджет ҳисобининг стандарти (15-сонли БҲС) «Хизмат кўрсатиш бўйича концессия келишувлари» (бундан буён матнда Стандарт деб юритилади) бюджет ташкилотлари , давлат мақсадли ва бошқа бюджетдан ташқари жамғармалар (бундан буён матнда ташкилотлар деб юритилади) томонидан хизмат кўрсатиш бўйича концессия келишувлари ҳисобини юритиш тартибини белгилайди.
1-боб. Умумий қоидалар
1. Мазкур Стандартда қуйидаги асосий тушунчалар қўлланилади:
активлар — ташкилот томонидан бошқариладиган ва келгусида иқтисодий манфаат ёки фойдали потенциал келтириши кутилаётган ресурслар;
конседент — операторга хизмат кўрсатиш бўйича концессия келишувига асосан ўз активидан фойдаланиш ҳуқуқини берувчи ташкилот;
оператор — хизмат кўрсатиш бўйича концессия келишувига асосан конседентнинг активидан фойдаланиш ҳуқуқини олувчи хусусий шерик;
хизмат кўрсатиш бўйича концессия келишуви — конседент ва оператор ўртасидаги келишув ҳисобланиб, унга кўра конседентнинг активларидан оператор муайян давр мобайнида конседент номидан хизматларини кўрсатиш учун хизмат кўрсатиш концессияси активларидан фойдаланади.
2. Мазкур Стандартнинг мақсади конседент томонидан хизмат кўрсатиш бўйича концессия келишувларини ҳисобга олиш тартибини белгилашдан иборат.
3. Ташкилотлар хизмат кўрсатиш бўйича концессия келишувларини ҳисобга олишда ва молиявий ҳисоботларни тайёрлашда ушбу Стандарт талабларига амал қилиши керак.
2-боб. Хизмат кўрсатиш бўйича концессия келишувидаги активларни ҳисобга олиш ва баҳолаш
4. Хизмат кўрсатиш бўйича концессия келишувидаги активлар қуйидаги ҳолларда ҳисобга олинади:
конседент оператор томонидан кўрсатиладиган хизматларни бажаришни, кимга ва қандай нархларда хизматлар кўрсатишни назорат қилганда ёки тартибга солганда;
конседент хизмат кўрсатиш бўйича концессия келишуви тугаган тақдирда активларнинг қолдиқ қийматига эгалик ҳуқуқини амалга оширганда.
5. Мазкур Стандартнинг 4-банди иккинчи хатбошиси хизмат кўрсатиш бўйича концессия келишувида фойдаланиладиган активга унинг тўлиқ фойдали муддати давомида татбиқ этилади.
6. Конседент ушбу Стандартнинг 4-бандига асосан хизмат кўрсатиш бўйича концессия келишувидаги активларни ҳисобга олишда уларни ҳаққоний қиймати бўйича баҳолайди.
7. Конседент ўзининг мавжуд активларини мазкур Стандартнинг 4-бандига мувофиқ, ҳисобга олганда, уларни хизмат кўрсатиш бўйича концессия келишуви активи сифатида қайта таснифлайди.
Қайта таснифланган активлар моддий активлар бўлганда, улар Ўзбекистон Республикаси бюджет ҳисобининг (8-сонли БҲС) « Кўчмас мулк, бино ва жиҳозлар » (рўйхат рақами 3144, 2019 йил 20 март) стандарти, номоддий активлар бўлганда эса Ўзбекистон Республикаси бюджет ҳисобининг стандарти (9-сонли БҲС) « Номоддий активлар » (рўйхат рақами 3169, 2019 йил 24 июнь) талабларига мувофиқ ҳисобга олинади.
3-боб. Мажбуриятларни молиявий ҳисоботда тан олиш
8. Конседент хизмат кўрсатиш бўйича концессия келишувида мажбуриятларни молиявий ҳисоботда тан олиши керак.
Бунда, конседент мавжуд активларини ушбу Стандартнинг 7-бандига мувофиқ, хизмат кўрсатиш бўйича концессия келишуви активлари сифатида қайта таснифлаганда, мажбуриятларни молиявий ҳисоботда тан олмайди.
9. Конседентнинг молиявий ҳисоботда тан олинган мажбуриятлари баҳоланади ҳамда конседентдан операторга ёки оператордан конседентга амалга оширилган қўшимча тўлов миқдорини ҳисобга олган ҳолда молиявий ҳисоботда акс эттирилади.
10. Молиявий ҳисоботда тан олинган мажбуриятлар конседент ва оператор ўртасидаги хизмат кўрсатиш бўйича концессия келишуви мазмунига асосланади.
11. Конседент операторга хизмат кўрсатиш бўйича концессия келишувидан келиб чиқиб қуйидаги имкониятларни яратиб бериши мумкин:
а) учинчи шахслардан фойда олиш;
б) активлардан бошқа фойда келтирувчи активлар сифатида фойдаланиш (масалан, поликлиника биносида аҳолига бепул тиббий хизмат кўрсатиладиган қисми билан бир вақтда пуллик хизматларни ташкил этиш);
д) тўловларни амалга ошириш.
4-боб. Молиявий мажбурият ва ҳуқуқларни операторга бериш
12. Конседент хизмат кўрсатиш бўйича концессия келишуви активини қуриш, сотиб олиш ёки модернизация қилиш учун операторга пул кўринишида ёки бошқа молиявий активларни бериш кўринишида мажбуриятга эга бўлса, конседент мажбуриятни мазкур Стандартнинг 9-бандига мувофиқ, молиявий мажбурият сифатида молиявий ҳисоботда тан олади.
13. Конседентнинг хизмат кўрсатиш бўйича концессия келишуви активининг қурилиши, модернизацияси, сотиб олиниши учун операторга пул тўловини ёки бошқа молиявий активни бериш бўйича мажбурияти бўлмаса, шунингдек, операторга хизматлардан фойдаланувчи учинчи шахслардан ёки даромад келтирувчи активлардан фойда олиш ҳуқуқини берса, конседент мажбуриятни мазкур Стандартнинг 9-бандига мувофиқ, конседент ва оператор ўртасида активлар алмашишдан ҳосил бўлувчи даромад сифатида ҳисобга олади.
14. Конседент хизмат кўрсатиш бўйича концессия келишуви активининг қурилиши, модернизацияси, унинг сотиб олиниши бўйича қарздорликни молиявий мажбурият ва операторга ҳуқуқни бериш орқали қисман тўласа, умумий қарздорликнинг ҳар бир қисми 8-бандга мувофиқ, алоҳида ҳисобга олинади. Мажбуриятнинг дастлаб ҳисобга олинган умумий суммаси мазкур Стандартнинг 9-бандида назарда тутилган миқдорга тенг бўлиши керак.
15. Агар конседент хизмат кўрсатиш бўйича концессия келишувида белгиланган ёки ҳисобланган тўловларни ҳамда хизматдан фойдаланувчилар томонидан операторга тўланадиган тўловларни кафолатлаган бўлса, конседент тўловлар бўйича мажбуриятни олган бўлади.
16. Конседент томонидан операторга тўловларнинг амалга оширилиши мазкур Стандартнинг 8-бандига мувофиқ тан олинган мажбуриятни камайтирса, у ҳолда тўловлар молиявий харажат ва оператор томонидан кўрсатилган хизматлар учун харажат сифатида тақсимланади.
17. Хизмат кўрсатиш бўйича концессия келишувига кўра, оператор томонидан кўрсатиладиган хизматлар учун тўловлар мазкур Стандартнинг 8-бандига мувофиқ, молиявий харажатлар сифатида ҳисобга олади.
18. Конседент активларни молиялаштириш ва хизмат кўрсатиш тўловларини алоҳида қисмларга ажрата олиш имкониятига эга бўлса, улар билан боғлиқ харажатларни хизмат кўрсатиш бўйича концессия келишувида назарда тутилган миқдорга мос равишда ҳисобга олади.
Агарда конседент активларни молиялаштириш ва хизмат кўрсатиш тўловларини алоҳида қисмларга ажрата олиш имкониятига эга бўлмаса, улар билан боғлиқ харажатларни таҳлил қилиш орқали аниқлаб ҳисобга олади.
19. Конседент хизмат кўрсатиш бўйича концессия келишувининг иқтисодий мазмунидан келиб чиққан ҳолда даромадларни молиявий ҳисоботда акс эттиради ва мазкур Стандартнинг 14-бандига мувофиқ, молиявий ҳисоботда тан олинган мажбуриятни камайтиради.
20. Конседент операторга хизмат кўрсатиш бўйича концессия келишуви бўйича учинчи шахслардан ёки активлардан фойда олиш ҳуқуқини тақдим қилиши мазкур келишувни фойда келтирувчи келишув сифатида қаралишини англатади.
Конседент томонидан операторга берилган ҳуқуқлар хизмат кўрсатиш бўйича концессия келишуви даври мобайнида амал қилишини инобатга олиб, ушбу ҳуқуқлардан тушган даромадлар молиявий ҳисоботларда мажбуриятлар сифатида акс эттирилади.
Хизмат кўрсатиш бўйича концессия келишувига кўра даромадлар тан олиниши билан мажбурият камаяди.
5-боб. Ахборотни очиб бериш
21. Конседент хизмат кўрсатиш бўйича концессия келишувига оид маълумотларни Ўзбекистон Республикаси бюджет ҳисобининг (3-сонли БҲС) « Бюджет ҳисоботи » (рўйхат рақами 3124, 2019 йил 18 январь) стандартига мувофиқ, молиявий ҳисоботларда тақдим этади.
22. Конседент молиявий ҳисобот даврида хизмат кўрсатиш бўйича концессия келишувининг қуйидаги маълумотларини ошкор қилиши лозим:
а) предмети ҳақидаги;
б) қиймати тўғрисидаги;
д) тарафларнинг ҳуқуқ ва мажбуриятлари тўғрисидаги;
э) тарафларнинг ўз мажбуриятлари бажарилишини таъминлаш усуллари, миқдорлари ва муддатлари ҳақидаги;
ф) келишувга киритилган ўзгартиш ва қўшимчалар тўғрисидаги;
г) келишувнинг муддати, бу муддатни белгилаш тартиби ҳақидаги;
ҳ) келишувни тугатиш асослари, тартиби ва шартлари, муддатидан олдин тугатиш тартиби ҳақидаги.
23. Мазкур Стандартнинг 22-бандида белгиланган ошкор қилиниши лозим бўлган маълумотлар ҳар бир хизмат кўрсатиш бўйича концессия келишуви бўйича алоҳида кўрсатилади.
Агар, хизмат кўрсатиш бўйича концессия келишувлари ўхшаш хизматларни ўз ичига олса улар бир гуруҳда кўрсатилади.
Вазир Д. КУЧКАРОВ
Тошкент ш.,
2024 йил 4 июнь,
129-сон
Oʻzbekiston Respublikasi Iqtisodiyot va moliya vazirining
buyrugʻi
Oʻzbekiston Respublikasi budjet hisobining standarti (15-sonli BHS) “Xizmat koʻrsatish boʻyicha konsessiya kelishuvlari”ni tasdiqlash toʻgʻrisida
Oʻzbekiston Respublikasining Budjet kodeksi , Oʻzbekiston Respublikasining “Buxgalteriya hisobi toʻgʻrisida”gi Qonuniga muvofiq va budjet hisobini davlat sektorida moliyaviy hisobotlarning xalqaro standartlari bilan muvofiqlashtirish maqsadida, buyuraman:
1. Oʻzbekiston Respublikasi budjet hisobining standarti (15-sonli BHS) “Xizmat koʻrsatish boʻyicha konsessiya kelishuvlari” ilovaga muvofiq tasdiqlansin.
2. Mazkur buyruq 2025-yil 1-yanvardan eʼtiboran kuchga kiradi.
Oʻzbekiston Respublikasi iqtisodiyot va moliya vazirining 2024-yil 4-iyundagi 129-son buyrugʻiga ILOVA
Oʻzbekiston Respublikasi budjet hisobining standarti (15-sonli BHS) “Xizmat koʻrsatish boʻyicha konsessiya kelishuvlari”
Mazkur Oʻzbekiston Respublikasi budjet hisobining standarti (15-sonli BHS) “Xizmat koʻrsatish boʻyicha konsessiya kelishuvlari” (bundan buyon matnda Standart deb yuritiladi) budjet tashkilotlari , davlat maqsadli va boshqa budjetdan tashqari jamgʻarmalar (bundan buyon matnda tashkilotlar deb yuritiladi) tomonidan xizmat koʻrsatish boʻyicha konsessiya kelishuvlari hisobini yuritish tartibini belgilaydi.
1-bob. Umumiy qoidalar
1. Mazkur Standartda quyidagi asosiy tushunchalar qoʻllaniladi:
aktivlar — tashkilot tomonidan boshqariladigan va kelgusida iqtisodiy manfaat yoki foydali potensial keltirishi kutilayotgan resurslar;
konsedent — operatorga xizmat koʻrsatish boʻyicha konsessiya kelishuviga asosan oʻz aktividan foydalanish huquqini beruvchi tashkilot;
operator — xizmat koʻrsatish boʻyicha konsessiya kelishuviga asosan konsedentning aktividan foydalanish huquqini oluvchi xususiy sherik;
xizmat koʻrsatish boʻyicha konsessiya kelishuvi — konsedent va operator oʻrtasidagi kelishuv hisoblanib, unga koʻra konsedentning aktivlaridan operator muayyan davr mobaynida konsedent nomidan xizmatlarini koʻrsatish uchun xizmat koʻrsatish konsessiyasi aktivlaridan foydalanadi.
2. Mazkur Standartning maqsadi konsedent tomonidan xizmat koʻrsatish boʻyicha konsessiya kelishuvlarini hisobga olish tartibini belgilashdan iborat.
3. Tashkilotlar xizmat koʻrsatish boʻyicha konsessiya kelishuvlarini hisobga olishda va moliyaviy hisobotlarni tayyorlashda ushbu Standart talablariga amal qilishi kerak.
2-bob. Xizmat koʻrsatish boʻyicha konsessiya kelishuvidagi aktivlarni hisobga olish va baholash
4. Xizmat koʻrsatish boʻyicha konsessiya kelishuvidagi aktivlar quyidagi hollarda hisobga olinadi:
konsedent operator tomonidan koʻrsatiladigan xizmatlarni bajarishni, kimga va qanday narxlarda xizmatlar koʻrsatishni nazorat qilganda yoki tartibga solganda;
konsedent xizmat koʻrsatish boʻyicha konsessiya kelishuvi tugagan taqdirda aktivlarning qoldiq qiymatiga egalik huquqini amalga oshirganda.
5. Mazkur Standartning 4-bandi ikkinchi xatboshisi xizmat koʻrsatish boʻyicha konsessiya kelishuvida foydalaniladigan aktivga uning toʻliq foydali muddati davomida tatbiq etiladi.
6. Konsedent ushbu Standartning 4-bandiga asosan xizmat koʻrsatish boʻyicha konsessiya kelishuvidagi aktivlarni hisobga olishda ularni haqqoniy qiymati boʻyicha baholaydi.
7. Konsedent oʻzining mavjud aktivlarini mazkur Standartning 4-bandiga muvofiq, hisobga olganda, ularni xizmat koʻrsatish boʻyicha konsessiya kelishuvi aktivi sifatida qayta tasniflaydi.
Qayta tasniflangan aktivlar moddiy aktivlar boʻlganda, ular Oʻzbekiston Respublikasi budjet hisobining (8-sonli BHS) “ Koʻchmas mulk, bino va jihozlar ” (roʻyxat raqami 3144, 2019-yil 20-mart) standarti, nomoddiy aktivlar boʻlganda esa Oʻzbekiston Respublikasi budjet hisobining standarti (9-sonli BHS) “ Nomoddiy aktivlar ” (roʻyxat raqami 3169, 2019-yil 24-iyun) talablariga muvofiq hisobga olinadi.
3-bob. Majburiyatlarni moliyaviy hisobotda tan olish
8. Konsedent xizmat koʻrsatish boʻyicha konsessiya kelishuvida majburiyatlarni moliyaviy hisobotda tan olishi kerak.
Bunda, konsedent mavjud aktivlarini ushbu Standartning 7-bandiga muvofiq, xizmat koʻrsatish boʻyicha konsessiya kelishuvi aktivlari sifatida qayta tasniflaganda, majburiyatlarni moliyaviy hisobotda tan olmaydi.
9. Konsedentning moliyaviy hisobotda tan olingan majburiyatlari baholanadi hamda konsedentdan operatorga yoki operatordan konsedentga amalga oshirilgan qoʻshimcha toʻlov miqdorini hisobga olgan holda moliyaviy hisobotda aks ettiriladi.
10. Moliyaviy hisobotda tan olingan majburiyatlar konsedent va operator oʻrtasidagi xizmat koʻrsatish boʻyicha konsessiya kelishuvi mazmuniga asoslanadi.
11. Konsedent operatorga xizmat koʻrsatish boʻyicha konsessiya kelishuvidan kelib chiqib quyidagi imkoniyatlarni yaratib berishi mumkin:
a) uchinchi shaxslardan foyda olish;
b) aktivlardan boshqa foyda keltiruvchi aktivlar sifatida foydalanish (masalan, poliklinika binosida aholiga bepul tibbiy xizmat koʻrsatiladigan qismi bilan bir vaqtda pullik xizmatlarni tashkil etish);
d) toʻlovlarni amalga oshirish.
4-bob. Moliyaviy majburiyat va huquqlarni operatorga berish
12. Konsedent xizmat koʻrsatish boʻyicha konsessiya kelishuvi aktivini qurish, sotib olish yoki modernizatsiya qilish uchun operatorga pul koʻrinishida yoki boshqa moliyaviy aktivlarni berish koʻrinishida majburiyatga ega boʻlsa, konsedent majburiyatni mazkur Standartning 9-bandiga muvofiq, moliyaviy majburiyat sifatida moliyaviy hisobotda tan oladi.
13. Konsedentning xizmat koʻrsatish boʻyicha konsessiya kelishuvi aktivining qurilishi, modernizatsiyasi, sotib olinishi uchun operatorga pul toʻlovini yoki boshqa moliyaviy aktivni berish boʻyicha majburiyati boʻlmasa, shuningdek, operatorga xizmatlardan foydalanuvchi uchinchi shaxslardan yoki daromad keltiruvchi aktivlardan foyda olish huquqini bersa, konsedent majburiyatni mazkur Standartning 9-bandiga muvofiq, konsedent va operator oʻrtasida aktivlar almashishdan hosil boʻluvchi daromad sifatida hisobga oladi.
14. Konsedent xizmat koʻrsatish boʻyicha konsessiya kelishuvi aktivining qurilishi, modernizatsiyasi, uning sotib olinishi boʻyicha qarzdorlikni moliyaviy majburiyat va operatorga huquqni berish orqali qisman toʻlasa, umumiy qarzdorlikning har bir qismi 8-bandga muvofiq, alohida hisobga olinadi. Majburiyatning dastlab hisobga olingan umumiy summasi mazkur Standartning 9-bandida nazarda tutilgan miqdorga teng boʻlishi kerak.
15. Agar konsedent xizmat koʻrsatish boʻyicha konsessiya kelishuvida belgilangan yoki hisoblangan toʻlovlarni hamda xizmatdan foydalanuvchilar tomonidan operatorga toʻlanadigan toʻlovlarni kafolatlagan boʻlsa, konsedent toʻlovlar boʻyicha majburiyatni olgan boʻladi.
16. Konsedent tomonidan operatorga toʻlovlarning amalga oshirilishi mazkur Standartning 8-bandiga muvofiq tan olingan majburiyatni kamaytirsa, u holda toʻlovlar moliyaviy xarajat va operator tomonidan koʻrsatilgan xizmatlar uchun xarajat sifatida taqsimlanadi.
17. Xizmat koʻrsatish boʻyicha konsessiya kelishuviga koʻra, operator tomonidan koʻrsatiladigan xizmatlar uchun toʻlovlar mazkur Standartning 8-bandiga muvofiq, moliyaviy xarajatlar sifatida hisobga oladi.
18. Konsedent aktivlarni moliyalashtirish va xizmat koʻrsatish toʻlovlarini alohida qismlarga ajrata olish imkoniyatiga ega boʻlsa, ular bilan bogʻliq xarajatlarni xizmat koʻrsatish boʻyicha konsessiya kelishuvida nazarda tutilgan miqdorga mos ravishda hisobga oladi.
Agarda konsedent aktivlarni moliyalashtirish va xizmat koʻrsatish toʻlovlarini alohida qismlarga ajrata olish imkoniyatiga ega boʻlmasa, ular bilan bogʻliq xarajatlarni tahlil qilish orqali aniqlab hisobga oladi.
19. Konsedent xizmat koʻrsatish boʻyicha konsessiya kelishuvining iqtisodiy mazmunidan kelib chiqqan holda daromadlarni moliyaviy hisobotda aks ettiradi va mazkur Standartning 14-bandiga muvofiq, moliyaviy hisobotda tan olingan majburiyatni kamaytiradi.
20. Konsedent operatorga xizmat koʻrsatish boʻyicha konsessiya kelishuvi boʻyicha uchinchi shaxslardan yoki aktivlardan foyda olish huquqini taqdim qilishi mazkur kelishuvni foyda keltiruvchi kelishuv sifatida qaralishini anglatadi.
Konsedent tomonidan operatorga berilgan huquqlar xizmat koʻrsatish boʻyicha konsessiya kelishuvi davri mobaynida amal qilishini inobatga olib, ushbu huquqlardan tushgan daromadlar moliyaviy hisobotlarda majburiyatlar sifatida aks ettiriladi.
Xizmat koʻrsatish boʻyicha konsessiya kelishuviga koʻra daromadlar tan olinishi bilan majburiyat kamayadi.
5-bob. Axborotni ochib berish
21. Konsedent xizmat koʻrsatish boʻyicha konsessiya kelishuviga oid maʼlumotlarni Oʻzbekiston Respublikasi budjet hisobining (3-sonli BHS) “ Budjet hisoboti ” (roʻyxat raqami 3124, 2019-yil 18-yanvar) standartiga muvofiq, moliyaviy hisobotlarda taqdim etadi.
22. Konsedent moliyaviy hisobot davrida xizmat koʻrsatish boʻyicha konsessiya kelishuvining quyidagi maʼlumotlarini oshkor qilishi lozim:
a) predmeti haqidagi;
b) qiymati toʻgʻrisidagi;
d) taraflarning huquq va majburiyatlari toʻgʻrisidagi;
e) taraflarning oʻz majburiyatlari bajarilishini taʼminlash usullari, miqdorlari va muddatlari haqidagi;
f) kelishuvga kiritilgan oʻzgartish va qoʻshimchalar toʻgʻrisidagi;
g) kelishuvning muddati, bu muddatni belgilash tartibi haqidagi;
h) kelishuvni tugatish asoslari, tartibi va shartlari, muddatidan oldin tugatish tartibi haqidagi.
23. Mazkur Standartning 22-bandida belgilangan oshkor qilinishi lozim boʻlgan maʼlumotlar har bir xizmat koʻrsatish boʻyicha konsessiya kelishuvi boʻyicha alohida koʻrsatiladi.
Agar, xizmat koʻrsatish boʻyicha konsessiya kelishuvlari oʻxshash xizmatlarni oʻz ichiga olsa ular bir guruhda koʻrsatiladi.
Vazir D. KUCHKAROV
Toshkent sh.,
2024-yil 4-iyun,
129-son