UzbekAI

Ўзбекистон Республикаси Вазирлар Маҳкамасининг

қарори

НИЗОМ

Кемаларни хусусий сектор томонидан техник кўрикдан ўтказиш тартиби тўғрисидаги низомни тасдиқлаш ҳақида

Ўзбекистон Республикаси Президентининг «Маъмурий ислоҳотлар доирасида транспорт соҳасида давлат бошқарувини самарали ташкил қилиш чора-тадбирлари тўғрисида» 2023 йил 14 июндаги ПФ-94-сон Фармони ижросини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Маъмурий ислоҳотлар доирасида транспорт соҳасида давлат бошқарувини самарали ташкил қилиш чора-тадбирлари тўғрисида» 2023 йил 14 июндаги ПФ-94-сон Фармонига мувофиқ Транспорт вазирлигининг дарё транспортида давлат хизматларини кўрсатиш функцияларини хусусий секторга ўтказиш белгиланганлиги маълумот учун қабул қилинсин.

2. Қуйидагиларни назарда тутувчи Кемаларни хусусий сектор томонидан техник кўрикдан ўтказиш тартиби тўғрисидаги низом иловага мувофиқ тасдиқлансин:

тадбиркорлик субъектлари томонидан кемаларни техник кўрикдан ўтказишни ташкил этиш;

техник кўрикдан ўтказилган кемалар тўғрисидаги маълумотларни Транспорт вазирлиги ҳузуридаги Транспорт назорати инспекцияси томонидан юритиладиган кема реестрига киритиб бориш;

кемаларни техник кўрикдан ўтказиш учун тадбиркорлик субъектларини танлаш тартиби;

тадбиркорлик субъектларининг кемаларни техник кўрикдан ўтказиш ишларини мониторинг қилиш.

3. Транспорт вазирлиги манфаатдор вазирлик ва идоралар билан биргаликда уч ой муддатда ўзлари қабул қилган норматив-ҳуқуқий ҳужжатларни ушбу қарорга мувофиқлаштирсин.

4. Ушбу қарор расмий эълон қилинган кундан эътиборан уч ой ўтгач кучга киради.

5. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.Ж. Раматов ҳамда транспорт вазири И.Р. Махкамов зиммасига юклансин.

Ўзбекистон Республикаси Вазирлар Маҳкамасининг 2024 йил 8 августдаги 488-сон қарорига ИЛОВА

Кемаларни хусусий сектор томонидан техник кўрикдан ўтказиш тартиби тўғрисидаги

1-боб. Умумий қоидалар

1. Мазкур Низом хусусий сектор томонидан кемаларни дастлабки, ҳар йиллик, навбатдаги ва навбатдан ташқари техник кўриклардан ўтказиш тартибини белгилайди.

2. Ушбу Низомда қуйидаги асосий тушунчалардан фойдаланилади:

кема — кемачилик мақсадида фойдаланадиган, асосий двигатели 75 от кучидан кам бўлмаган ўзиюрар ва сиғими 80 регистр тоннадан кам бўлмаган ўзиюрмас сузувчан қурилмалар, шу жумладан, аралаш (дарё — денгиз) сузиш кемалари, паромлар, сув тубини чуқурлаштирувчи ва тозаловчи земснарядлар, сузувчан кран ва шу каби техник қурилмалар;

кема реестри — Транспорт вазирлиги ҳузуридаги Транспорт назорати инспекциясининг (кейинги ўринларда — Транспорт назорати инспекцияси) Қорақалпоғистон Республикаси, Сурхондарё, Хоразм ва Тошкент вилоятлари ҳудудий бўлимларининг Кемачилик регистри бош инспекторлари томонидан юритиладиган кема ҳамда унинг эгаси тўғрисидаги маълумотларни ўз ичига олган электрон ва қоғоз шаклда юритиладиган ахборотлар мажмуи;

Кемачилик регистри бош инспекторлари — Транспорт назорати инспекциясининг Қорақалпоғистон Республикаси, Сурхондарё, Хоразм ва Тошкент вилоятлари ҳудудий бўлимларининг кемаларни классификация ҳамда техник назорат қилиш ваколати берилган мансабдор шахслари;

тадбиркорлик субъекти — кемаларни техник кўрикдан ўтказиш тўғрисида Давлат функцияларининг ягона реестрини шакллантириш ва юритишга қаратилган электрон майдонча (кейинги ўринларда — Электрон майдонча) орқали истак билдирган юридик шахс;

хулоса тайёрловчи орган — Транспорт назорати инспекцияси.

3. Кемалар техник кўрикдан Кемачилик регистри бош инспекторлари ҳамда тадбиркорлик субъектлари томонидан Вазирлар Маҳкамасининг « Дарё транспортида давлат хизматлари кўрсатишнинг маъмурий регламентини тасдиқлаш тўғрисида » 2022 йил 7 апрелдаги 167-сон ҳамда « Ўзбекистон Республикаси кемачилиги соҳасида хавфсизликни таъминлашга оид чора-тадбирлар тўғрисида » 2023 йил 11 сентябрдаги 462-сон қарорлари талабларига мувофиқ ўтказилади.

4. Давлат хавфсизлик хизмати ҳамда Мудофаа вазирлиги органларига тегишли кемалар ушбу ташкилотлар бошлиқларининг қарорига асосан тегишли шартнома тузиш орқали фақат Кемачилик регистри бош инспекторлари томонидан техник кўрикдан ўтказилади.

5. Ўзбекистон Республикасининг ички кема йўлларида ва сув ҳавзаларида фойдаланишда бўлган, юридик ва жисмоний шахсларга тегишли, белгиланган тартибда кема реестрига киритилган кемалар мажбурий техник кўрикдан ўтказилади.

Техник кўрикдан ўтказилган кемалар тўғрисидаги маълумотлар кема реестрига киритиб борилади.

6. Кемачилик регистри бош инспекторлари томонидан кемалар техник кўрикдан ўтказилганлиги учун тўлов кема эгаси томонидан Вазирлар Маҳкамасининг 2022 йил 7 апрелдаги 167-сон қарори билан тасдиқланган Дарё транспортида давлат хизматлари кўрсатишнинг маъмурий регламентига мувофиқ амалга оширилади.

Тадбиркорлик субъектлари томонидан кемалар техник кўрикдан ўтказганлиги учун тўлов миқдорини тадбиркорлик субъектлари мустақил белгилайди ва келиб тушадиган маблағлар тўлиқ ҳажмда ўзларининг тасарруфида қолади.

7. Кемаларни техник кўрикдан ўтказишга сув транспорти соҳаси бўйича мутахассисликка эга шахсларга рухсат берилади.

2-боб. Тадбиркорлик субъектлари томонидан кемаларни техник кўрикдан ўтказишни ташкил этиш

8. Кемалар техник кўрикдан кема жойлашган манзил бўйича ўтказилади.

Кема жойлашган манзилга бориш-келиш шартлари ва харажатлари кема эгаси билан тузиладиган шартномаларда белгиланади.

9. Техник кўрикдан ўтказиш даврида Кемачилик регистри бош инспекторлари ва тадбиркорлик субъектлари томонидан қуйидаги назорат-ўлчаш воситаларидан фойдаланилади:

кема қобиғи қалинлигини ўлчаш воситаси (0.7 мм дан 100 мм гача диапазонда);

бензин ва дизель ёқилғисида ишловчи двигателлардан чиқадиган газлар миқдорини ўлчаш воситаси;

двигателлар тирсакли валларининг айланиш частотасини ўлчаш воситаси (100 — 60000 айланиш частотаси диапазонида);

шовқинни ўлчаш воситаси (60 — 100 децибел диапазонида);

электр узаткич симларининг техник ҳолатини аниқлаш воситаси (500 — 2500 V диапазонда).

Қўлланиладиган назорат-ўлчаш воситалари мувофиқлик сертификатига эга ва қонунчилик ҳужжатларига мувофиқ даврий қиёслашдан ўтган бўлиши шарт.

3-боб. Кемаларни техник кўрикдан ўтказиш учун тадбиркорлик субъектларини танлаш

10. Кемаларни техник кўрикдан ўтказиш учун тадбиркорлик субъектлари Вазирлар Маҳкамасининг 2021 йил 23 сентябрдаги 596-сон қарори билан тасдиқланган Давлат функцияларини хусусий секторга ўтказиш тартиби тўғрисидаги низом талабларига мувофиқ танланади.

11. Кемаларни техник кўрикдан ўтказиш истагини билдирган тадбиркорлик субъектлари, давлат функцияларини хусусий секторга ўтказиш соҳасидаги ваколатли орган — Иқтисодиёт ва молия вазирлиги томонидан ташкил этилган Электрон майдончада кўрсатилган соҳа бўйича тажрибага эга эканлиги ёки ўхшаш соҳа бўйича вазифаларни амалга ошираётганлиги тўғрисида маълумотларни тақдим этади.

12. Иқтисодиёт ва молия вазирлиги дастлабки олинган маълумотлар бўйича танлаб олинган тадбиркорлик субъектларининг имкониятини баҳолаш учун тадбиркорлик субъектлари рўйхатини шакллантиради ва Транспорт назорати инспекциясига тақдим этади.

13. Транспорт назорати инспекцияси томонидан тадбиркорлик субъектларининг кемаларни техник кўрикдан ўтказиш бўйича имкониятини баҳолашда, тадбиркорлик субъектлари томонидан Вазирлар Маҳкамасининг « Дарё транспортида давлат хизматлари кўрсатишнинг маъмурий регламентини тасдиқлаш тўғрисида » 2022 йил 7 апрелдаги 167-сон ҳамда « Ўзбекистон Республикаси кемачилиги соҳасида хавфсизликни таъминлашга оид чора-тадбирлар тўғрисида » 2023 йил 11 сентябрдаги 462-сон қарорлари талабларига риоя этилиши ва кемаларни техник кўрикдан ўтказиш ишларининг ташкил этилганлиги ўрганиб чиқилади.

14. Тадбиркорлик субъектларининг имкониятига баҳо бериш қуйидагиларни ўз ичига олади:

тадбиркорлик субъектларида Ўзбекистон Республикасининг дарё транспорти соҳасига оид қонунчилик ҳужжатларига риоя этилишини текшириш, уларнинг натижаларини таҳлил этиш;

тадбиркорлик субъектларида кемаларни техник кўрикдан ўтказиш ишларини амалга ошириш учун етарли малакага эга бўлган ходимларнинг мавжудлиги;

кемаларни техник кўрикдан ўтказиш тизими, жараёнлари ва сифатини текшириш;

назорат-ўлчаш воситаларининг рўйхати ва уларнинг мавжудлиги;

назорат-ўлчаш воситаларининг давлат синовидан, қиёслашдан, калибрлашдан ўтказилганлиги ва мувофиқлик сертификатлари ёки чет эл мувофиқлик сертификатларининг эътироф этилганлиги тўғрисидаги ҳужжатлар мавжудлиги;

шикастланишлар мезони ва ўлчаш услублари;

юриш ва швартов синовларидан ўтказиш бўйича технологик жараёнларнинг мавжудлиги;

тадбиркорлик субъектларининг кўрсатиладиган фаолият тури бўйича жисмоний ва юридик шахсларнинг мурожаатларини кўриб чиқиш тартибини таҳлил этиш.

15. Мазкур Низомнинг 14-бандида келтирилган талаблар Транспорт назорати инспекцияси томонидан ўн кун муддат ичида ўрганиб чиқилади ва хулоса тайёрланиб, бир кун муддатда Иқтисодиёт ва молия вазирлигига тақдим этилади.

16. Транспорт назорати инспекцияси зарур ҳолларда, ўз маблағлари ҳисобидан тегишли хулосаларни тайёрлаш учун экспертларни шартнома асосида жалб этиши мумкин.

17. Иқтисодиёт ва молия вазирлиги Транспорт назорати инспекцияси томонидан тайёрланган хулосага мувофиқ кемаларни техник кўрикдан ўтказиш бўйича ижобий баҳо берилган тадбиркорлик субъектларини танлайди.

18. Иқтисодиёт ва молия вазирлиги томонидан танланган тадбиркорлик субъектларида кўрсатилган соҳа бўйича функцияларни амалга ошириш учун белгиланган тартибда техник жиҳатдан малакалилиги маъқуллашдан ўтказилган, кемаларни техник кўрикдан ўтказиш учун зарур технологик жиҳозлар билан таъминланган ишлаб чиқариш-техник базасига эга бўлиши керак.

19. Ишлаб чиқариш-техник базаси техник жиҳатдан малакалилиги маъқуллашдан ўтказилган тадбиркорлик субъектлари қонунчилик ҳужжатларида белгиланган тартибда кемаларни техник кўрикдан ўтказиш ишларини амалга оширади.

20. Иқтисодиёт ва молия вазирлиги ҳамда Транспорт назорати инспекцияси томонидан ишлаб чиқариш-техник базаси техник жиҳатдан малакалилиги маъқуллашдан ўтказилган ва кемаларни техник кўрикдан ўтказиш ишларини амалга оширувчи тадбиркорлик субъектларининг реестри юритилади.

Иқтисодиёт ва молия вазирлиги ҳамда Транспорт назорати инспекцияси мазкур реестрни ўзларининг Интернет жаҳон ахборот тармоғидаги расмий веб-сайтларига ва бошқа ижтимоий тармоқларга жойлаштириб, бу ҳақида тадбиркорлик субъектларини хабардор қилиб боради.

4-боб. Тадбиркорлик субъектларининг кемаларни техник кўрикдан ўтказиш ишларини мониторинг қилиш

21. Тадбиркорлик субъектлари томонидан кемаларни техник кўрикдан ўтказиш самарадорлиги ва сифати қуйидаги кўрсаткичлар (KPI) билан баҳоланади:

кема конструкцияси, қобиғи, тўпламлари, механизмлари, қурилмалари ва тизимларида шикастланиш ва нуқсонларнинг белгиланган чегара доирасида бўлиши;

кеманинг чўкмаслиги учун мўлжалланган авария-қутқарув воситалари, ёнгинга қарши инвентарлар ва индивидуал қутқарув воситаларининг мавжудлиги ва бутлиги;

кемада Кемачилик регистри бош инспекторлари томонидан юритиладиган кема ҳужжатлари (кема гувоҳномаси нусхаси, сузишга яроқлилиги тўғрисида гувоҳнома, классификация гувоҳномаси, ички сузиш кемаларидан ифлосланишнинг олдини олиш тўғрисида гувоҳнома, охирги ўтказилган техник кўрик далолатномаси), кема дафтари ва журналлари (кема журнали, вахта журнали, машина журнали) ва уларда тегишли ёзувларнинг мавжудлиги;

кема бошқарувчисида кемани бошқариш ҳуқуқини берувчи кема ҳайдовчиси гувоҳномасининг мавжудлиги;

кемада хавфни билдирувчи сигнал жадвалининг мавжудлиги ва уларнинг кўринадиган жойга тўғри жойлаштирилганлиги. Хавфни билдирувчи сигнал жадвалида барча экипаж аъзоларининг вазифалари ва ҳаракатлари (кемани бошқариш, ҳаво ва сув муҳитини кузатиш, кеманинг зичлиги, кеманинг чўкмаслиги учун чоралар кўриш, ёнғин ва сувга қарши курашиш, кемада ўрнатилган махсус воситалардан фойдаланиш, кема экипажи ва йўловчиларга тиббий ёрдам кўрсатиш, атроф-муҳитни муҳофаза қилиш, сувда инсонни қутқариш, одамларни тўлиқ эвакуация қилган ҳолда кемани тарк этиш) белгилаб қўйилганлиги;

кемани техник кўрикдан ўтказиш тўғрисида далолатномада кема конструкцияси, қобиғи, тўпламлари, механизмлари, қурилмалари ва тизимларининг техник ҳолати бўйича тўлиқ маълумотларнинг мавжудлиги.

22. Транспорт назорати инспекцияси тадбиркорлик субъектларининг кемаларни техник кўрикдан ўтказиш бўйича ишларини белгиланган тартибда мониторинг қилиб боради ва маълумотларни Иқтисодиёт ва молия вазирлигига тақдим этиб боради.

5-боб. Якунловчи қоидалар

23. Тадбиркорлик субъектлари кемалар мазкур Низом талабларига мувофиқ ҳолда сифатли техник кўрикдан ўтказилишини таъминлаш учун масъул бўладилар.

24. Мазкур Низом талаблари бузилишида айбдор бўлган шахслар қонунчилик ҳужжатларида белгиланган тартибда жавобгар бўлади.

Ўзбекистон Республикасининг Бош вазири А. АРИПОВ

Тошкент ш.,

2024 йил 8 август,

488-сон

(Қонунчилик маълумотлари миллий базаси, 12.08.2024 й., 09/24/488/0601-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

Kemalarni xususiy sektor tomonidan texnik koʻrikdan oʻtkazish tartibi toʻgʻrisidagi nizomni tasdiqlash haqida

Oʻzbekiston Respublikasi Prezidentining “Maʼmuriy islohotlar doirasida transport sohasida davlat boshqaruvini samarali tashkil qilish chora-tadbirlari toʻgʻrisida” 2023-yil 14-iyundagi PF-94-son Farmoni ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Maʼmuriy islohotlar doirasida transport sohasida davlat boshqaruvini samarali tashkil qilish chora-tadbirlari toʻgʻrisida” 2023-yil 14-iyundagi PF-94-son Farmoniga muvofiq Transport vazirligining daryo transportida davlat xizmatlarini koʻrsatish funksiyalarini xususiy sektorga oʻtkazish belgilanganligi maʼlumot uchun qabul qilinsin.

2. Quyidagilarni nazarda tutuvchi Kemalarni xususiy sektor tomonidan texnik koʻrikdan oʻtkazish tartibi toʻgʻrisidagi nizom ilovaga muvofiq tasdiqlansin:

tadbirkorlik subyektlari tomonidan kemalarni texnik koʻrikdan oʻtkazishni tashkil etish;

texnik koʻrikdan oʻtkazilgan kemalar toʻgʻrisidagi maʼlumotlarni Transport vazirligi huzuridagi Transport nazorati inspeksiyasi tomonidan yuritiladigan kema reyestriga kiritib borish;

kemalarni texnik koʻrikdan oʻtkazish uchun tadbirkorlik subyektlarini tanlash tartibi;

tadbirkorlik subyektlarining kemalarni texnik koʻrikdan oʻtkazish ishlarini monitoring qilish.

3. Transport vazirligi manfaatdor vazirlik va idoralar bilan birgalikda uch oy muddatda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.

4. Ushbu qaror rasmiy eʼlon qilingan kundan eʼtiboran uch oy oʻtgach kuchga kiradi.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov hamda transport vaziri I.R. Maxkamov zimmasiga yuklansin.

Oʻzbekiston Respublikasi Vazirlar Mahkamasining 2024-yil 8-avgustdagi 488-son qaroriga ILOVA

Kemalarni xususiy sektor tomonidan texnik koʻrikdan oʻtkazish tartibi toʻgʻrisidagi

1-bob. Umumiy qoidalar

1. Mazkur Nizom xususiy sektor tomonidan kemalarni dastlabki, har yillik, navbatdagi va navbatdan tashqari texnik koʻriklardan oʻtkazish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

kema — kemachilik maqsadida foydalanadigan, asosiy dvigateli 75 ot kuchidan kam boʻlmagan oʻziyurar va sigʻimi 80 registr tonnadan kam boʻlmagan oʻziyurmas suzuvchan qurilmalar, shu jumladan, aralash (daryo — dengiz) suzish kemalari, paromlar, suv tubini chuqurlashtiruvchi va tozalovchi zemsnaryadlar, suzuvchan kran va shu kabi texnik qurilmalar;

kema reyestri — Transport vazirligi huzuridagi Transport nazorati inspeksiyasining (keyingi oʻrinlarda — Transport nazorati inspeksiyasi) Qoraqalpogʻiston Respublikasi, Surxondaryo, Xorazm va Toshkent viloyatlari hududiy boʻlimlarining Kemachilik registri bosh inspektorlari tomonidan yuritiladigan kema hamda uning egasi toʻgʻrisidagi maʼlumotlarni oʻz ichiga olgan elektron va qogʻoz shaklda yuritiladigan axborotlar majmui;

Kemachilik registri bosh inspektorlari — Transport nazorati inspeksiyasining Qoraqalpogʻiston Respublikasi, Surxondaryo, Xorazm va Toshkent viloyatlari hududiy boʻlimlarining kemalarni klassifikatsiya hamda texnik nazorat qilish vakolati berilgan mansabdor shaxslari;

tadbirkorlik subyekti — kemalarni texnik koʻrikdan oʻtkazish toʻgʻrisida Davlat funksiyalarining yagona reyestrini shakllantirish va yuritishga qaratilgan elektron maydoncha (keyingi oʻrinlarda — Elektron maydoncha) orqali istak bildirgan yuridik shaxs;

xulosa tayyorlovchi organ — Transport nazorati inspeksiyasi.

3. Kemalar texnik koʻrikdan Kemachilik registri bosh inspektorlari hamda tadbirkorlik subyektlari tomonidan Vazirlar Mahkamasining “ Daryo transportida davlat xizmatlari koʻrsatishning maʼmuriy reglamentini tasdiqlash toʻgʻrisida ” 2022-yil 7-apreldagi 167-son hamda “ Oʻzbekiston Respublikasi kemachiligi sohasida xavfsizlikni taʼminlashga oid chora-tadbirlar toʻgʻrisida ” 2023-yil 11-sentabrdagi 462-son qarorlari talablariga muvofiq oʻtkaziladi.

4. Davlat xavfsizlik xizmati hamda Mudofaa vazirligi organlariga tegishli kemalar ushbu tashkilotlar boshliqlarining qaroriga asosan tegishli shartnoma tuzish orqali faqat Kemachilik registri bosh inspektorlari tomonidan texnik koʻrikdan oʻtkaziladi.

5. Oʻzbekiston Respublikasining ichki kema yoʻllarida va suv havzalarida foydalanishda boʻlgan, yuridik va jismoniy shaxslarga tegishli, belgilangan tartibda kema reyestriga kiritilgan kemalar majburiy texnik koʻrikdan oʻtkaziladi.

Texnik koʻrikdan oʻtkazilgan kemalar toʻgʻrisidagi maʼlumotlar kema reyestriga kiritib boriladi.

6. Kemachilik registri bosh inspektorlari tomonidan kemalar texnik koʻrikdan oʻtkazilganligi uchun toʻlov kema egasi tomonidan Vazirlar Mahkamasining 2022-yil 7-apreldagi 167-son qarori bilan tasdiqlangan Daryo transportida davlat xizmatlari koʻrsatishning maʼmuriy reglamentiga muvofiq amalga oshiriladi.

Tadbirkorlik subyektlari tomonidan kemalar texnik koʻrikdan oʻtkazganligi uchun toʻlov miqdorini tadbirkorlik subyektlari mustaqil belgilaydi va kelib tushadigan mablagʻlar toʻliq hajmda oʻzlarining tasarrufida qoladi.

7. Kemalarni texnik koʻrikdan oʻtkazishga suv transporti sohasi boʻyicha mutaxassislikka ega shaxslarga ruxsat beriladi.

2-bob. Tadbirkorlik subyektlari tomonidan kemalarni texnik koʻrikdan oʻtkazishni tashkil etish

8. Kemalar texnik koʻrikdan kema joylashgan manzil boʻyicha oʻtkaziladi.

Kema joylashgan manzilga borish-kelish shartlari va xarajatlari kema egasi bilan tuziladigan shartnomalarda belgilanadi.

9. Texnik koʻrikdan oʻtkazish davrida Kemachilik registri bosh inspektorlari va tadbirkorlik subyektlari tomonidan quyidagi nazorat-oʻlchash vositalaridan foydalaniladi:

kema qobigʻi qalinligini oʻlchash vositasi (0.7 mm dan 100 mm gacha diapazonda);

benzin va dizel yoqilgʻisida ishlovchi dvigatellardan chiqadigan gazlar miqdorini oʻlchash vositasi;

dvigatellar tirsakli vallarining aylanish chastotasini oʻlchash vositasi (100 — 60000 aylanish chastotasi diapazonida);

shovqinni oʻlchash vositasi (60 — 100 detsibel diapazonida);

elektr uzatkich simlarining texnik holatini aniqlash vositasi (500 — 2500 V diapazonda).

Qoʻllaniladigan nazorat-oʻlchash vositalari muvofiqlik sertifikatiga ega va qonunchilik hujjatlariga muvofiq davriy qiyoslashdan oʻtgan boʻlishi shart.

3-bob. Kemalarni texnik koʻrikdan oʻtkazish uchun tadbirkorlik subyektlarini tanlash

10. Kemalarni texnik koʻrikdan oʻtkazish uchun tadbirkorlik subyektlari Vazirlar Mahkamasining 2021-yil 23-sentabrdagi 596-son qarori bilan tasdiqlangan Davlat funksiyalarini xususiy sektorga oʻtkazish tartibi toʻgʻrisidagi nizom talablariga muvofiq tanlanadi.

11. Kemalarni texnik koʻrikdan oʻtkazish istagini bildirgan tadbirkorlik subyektlari, davlat funksiyalarini xususiy sektorga oʻtkazish sohasidagi vakolatli organ — Iqtisodiyot va moliya vazirligi tomonidan tashkil etilgan Elektron maydonchada koʻrsatilgan soha boʻyicha tajribaga ega ekanligi yoki oʻxshash soha boʻyicha vazifalarni amalga oshirayotganligi toʻgʻrisida maʼlumotlarni taqdim etadi.

12. Iqtisodiyot va moliya vazirligi dastlabki olingan maʼlumotlar boʻyicha tanlab olingan tadbirkorlik subyektlarining imkoniyatini baholash uchun tadbirkorlik subyektlari roʻyxatini shakllantiradi va Transport nazorati inspeksiyasiga taqdim etadi.

13. Transport nazorati inspeksiyasi tomonidan tadbirkorlik subyektlarining kemalarni texnik koʻrikdan oʻtkazish boʻyicha imkoniyatini baholashda, tadbirkorlik subyektlari tomonidan Vazirlar Mahkamasining “ Daryo transportida davlat xizmatlari koʻrsatishning maʼmuriy reglamentini tasdiqlash toʻgʻrisida ” 2022-yil 7-apreldagi 167-son hamda “ Oʻzbekiston Respublikasi kemachiligi sohasida xavfsizlikni taʼminlashga oid chora-tadbirlar toʻgʻrisida ” 2023-yil 11-sentabrdagi 462-son qarorlari talablariga rioya etilishi va kemalarni texnik koʻrikdan oʻtkazish ishlarining tashkil etilganligi oʻrganib chiqiladi.

14. Tadbirkorlik subyektlarining imkoniyatiga baho berish quyidagilarni oʻz ichiga oladi:

tadbirkorlik subyektlarida Oʻzbekiston Respublikasining daryo transporti sohasiga oid qonunchilik hujjatlariga rioya etilishini tekshirish, ularning natijalarini tahlil etish;

tadbirkorlik subyektlarida kemalarni texnik koʻrikdan oʻtkazish ishlarini amalga oshirish uchun yetarli malakaga ega boʻlgan xodimlarning mavjudligi;

kemalarni texnik koʻrikdan oʻtkazish tizimi, jarayonlari va sifatini tekshirish;

nazorat-oʻlchash vositalarining roʻyxati va ularning mavjudligi;

nazorat-oʻlchash vositalarining davlat sinovidan, qiyoslashdan, kalibrlashdan oʻtkazilganligi va muvofiqlik sertifikatlari yoki chet el muvofiqlik sertifikatlarining eʼtirof etilganligi toʻgʻrisidagi hujjatlar mavjudligi;

shikastlanishlar mezoni va oʻlchash uslublari;

yurish va shvartov sinovlaridan oʻtkazish boʻyicha texnologik jarayonlarning mavjudligi;

tadbirkorlik subyektlarining koʻrsatiladigan faoliyat turi boʻyicha jismoniy va yuridik shaxslarning murojaatlarini koʻrib chiqish tartibini tahlil etish.

15. Mazkur Nizomning 14-bandida keltirilgan talablar Transport nazorati inspeksiyasi tomonidan oʻn kun muddat ichida oʻrganib chiqiladi va xulosa tayyorlanib, bir kun muddatda Iqtisodiyot va moliya vazirligiga taqdim etiladi.

16. Transport nazorati inspeksiyasi zarur hollarda, oʻz mablagʻlari hisobidan tegishli xulosalarni tayyorlash uchun ekspertlarni shartnoma asosida jalb etishi mumkin.

17. Iqtisodiyot va moliya vazirligi Transport nazorati inspeksiyasi tomonidan tayyorlangan xulosaga muvofiq kemalarni texnik koʻrikdan oʻtkazish boʻyicha ijobiy baho berilgan tadbirkorlik subyektlarini tanlaydi.

18. Iqtisodiyot va moliya vazirligi tomonidan tanlangan tadbirkorlik subyektlarida koʻrsatilgan soha boʻyicha funksiyalarni amalga oshirish uchun belgilangan tartibda texnik jihatdan malakaliligi maʼqullashdan oʻtkazilgan, kemalarni texnik koʻrikdan oʻtkazish uchun zarur texnologik jihozlar bilan taʼminlangan ishlab chiqarish-texnik bazasiga ega boʻlishi kerak.

19. Ishlab chiqarish-texnik bazasi texnik jihatdan malakaliligi maʼqullashdan oʻtkazilgan tadbirkorlik subyektlari qonunchilik hujjatlarida belgilangan tartibda kemalarni texnik koʻrikdan oʻtkazish ishlarini amalga oshiradi.

20. Iqtisodiyot va moliya vazirligi hamda Transport nazorati inspeksiyasi tomonidan ishlab chiqarish-texnik bazasi texnik jihatdan malakaliligi maʼqullashdan oʻtkazilgan va kemalarni texnik koʻrikdan oʻtkazish ishlarini amalga oshiruvchi tadbirkorlik subyektlarining reyestri yuritiladi.

Iqtisodiyot va moliya vazirligi hamda Transport nazorati inspeksiyasi mazkur reyestrni oʻzlarining Internet jahon axborot tarmogʻidagi rasmiy veb-saytlariga va boshqa ijtimoiy tarmoqlarga joylashtirib, bu haqida tadbirkorlik subyektlarini xabardor qilib boradi.

4-bob. Tadbirkorlik subyektlarining kemalarni texnik koʻrikdan oʻtkazish ishlarini monitoring qilish

21. Tadbirkorlik subyektlari tomonidan kemalarni texnik koʻrikdan oʻtkazish samaradorligi va sifati quyidagi koʻrsatkichlar (KPI) bilan baholanadi:

kema konstruksiyasi, qobigʻi, toʻplamlari, mexanizmlari, qurilmalari va tizimlarida shikastlanish va nuqsonlarning belgilangan chegara doirasida boʻlishi;

kemaning choʻkmasligi uchun moʻljallangan avariya-qutqaruv vositalari, yonginga qarshi inventarlar va individual qutqaruv vositalarining mavjudligi va butligi;

kemada Kemachilik registri bosh inspektorlari tomonidan yuritiladigan kema hujjatlari (kema guvohnomasi nusxasi, suzishga yaroqliligi toʻgʻrisida guvohnoma, klassifikatsiya guvohnomasi, ichki suzish kemalaridan ifloslanishning oldini olish toʻgʻrisida guvohnoma, oxirgi oʻtkazilgan texnik koʻrik dalolatnomasi), kema daftari va jurnallari (kema jurnali, vaxta jurnali, mashina jurnali) va ularda tegishli yozuvlarning mavjudligi;

kema boshqaruvchisida kemani boshqarish huquqini beruvchi kema haydovchisi guvohnomasining mavjudligi;

kemada xavfni bildiruvchi signal jadvalining mavjudligi va ularning koʻrinadigan joyga toʻgʻri joylashtirilganligi. Xavfni bildiruvchi signal jadvalida barcha ekipaj aʼzolarining vazifalari va harakatlari (kemani boshqarish, havo va suv muhitini kuzatish, kemaning zichligi, kemaning choʻkmasligi uchun choralar koʻrish, yongʻin va suvga qarshi kurashish, kemada oʻrnatilgan maxsus vositalardan foydalanish, kema ekipaji va yoʻlovchilarga tibbiy yordam koʻrsatish, atrof-muhitni muhofaza qilish, suvda insonni qutqarish, odamlarni toʻliq evakuatsiya qilgan holda kemani tark etish) belgilab qoʻyilganligi;

kemani texnik koʻrikdan oʻtkazish toʻgʻrisida dalolatnomada kema konstruksiyasi, qobigʻi, toʻplamlari, mexanizmlari, qurilmalari va tizimlarining texnik holati boʻyicha toʻliq maʼlumotlarning mavjudligi.

22. Transport nazorati inspeksiyasi tadbirkorlik subyektlarining kemalarni texnik koʻrikdan oʻtkazish boʻyicha ishlarini belgilangan tartibda monitoring qilib boradi va maʼlumotlarni Iqtisodiyot va moliya vazirligiga taqdim etib boradi.

5-bob. Yakunlovchi qoidalar

23. Tadbirkorlik subyektlari kemalar mazkur Nizom talablariga muvofiq holda sifatli texnik koʻrikdan oʻtkazilishini taʼminlash uchun masʼul boʻladilar.

24. Mazkur Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.

Oʻzbekiston Respublikasining Bosh vaziri A. ARIPOV

Toshkent sh.,

2024-yil 8-avgust,

488-son

(Qonunchilik maʼlumotlari milliy bazasi, 12.08.2024-y., 09/24/488/0601-son)

lex.uz