📅 2024-yil 16-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 16 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 16 августа 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 16 August 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Ўзбекистон Республикасида Вақт ва частота хизмати фаолиятини самарали ташкил этиш чора-тадбирлари тўғрисида
Ўзбекистон Республикасининг «Ўзбекистон техник жиҳатдан тартибга солиш агентлигининг фаолиятини ташкил этиш чора-тадбирлари тўғрисида» 2024 йил 28 февралдаги ПҚ-91-сон қарорига мувофиқ ҳамда республикада вақт ва частота соҳасида ўлчашларнинг ягона бирликда бўлишини таъминлаш, шунингдек, Ўзбекистон миллий вақт шкаласини (UTC (UZ) ҳосил қилиш, уни сақлаш ва узатишни амалга ошириш мақсадида Вазирлар Маҳкамаси қарор қилади:
1. Қуйидагилар:
Вазирлар Маҳкамаси ҳузуридаги Ўзбекистон техник жиҳатдан тартибга солиш агентлиги (кейинги ўринларда — Агентлик) томонидан вақт, частота ва миллий вақт шкаласи (UTC (UZ) бирлиги миллий эталони яратилганлиги;
Ўзбекистон Республикаси Халқаро ўлчов ва тарозилар бюросининг (BIPM) Халқаро атом вақти (TAI) гуруҳига тўлиқ ҳуқуқли аъзо сифатида қабул қилинганлиги;
Ўзбекистон Республикасининг Мувофиқлаштирилган универсал вақтни (UTC) шакллантиришда Халқаро ўлчов ва тарозилар бюроси (BIPM) солиштиришларида иштирокчи сифатида рўйхатдан ўтганлиги маълумот учун қабул қилинсин.
2. Белгилансинки, 2025 йил 1 январдан бошлаб:
Ўзбекистон миллий вақт шкаласи (UTC (UZ) жорий этилади ва ундан Ўзбекистон Республикасининг аниқ вақти (кейинги ўринларда — аниқ вақт) сифатида фойдаланилади;
Вақт хизматининг фаолиятини самарали ташкил этишга Агентликнинг «Ўзбекистон миллий метрология институти» давлат муассасаси (кейинги ўринларда — Метрология институти) масъул ҳисобланади;
Метрология институти Мувофиқлаштирилган универсал вақтни (UTC) шакллантиришда иштирок этади ва Ўзбекистон миллий вақт шкаласини (UTC (UZ) ҳосил қилишга ваколатли этиб белгиланади.
3. Агентлик икки ой муддатда:
вақт, частота ва миллий вақт шкаласи (UTC (UZ) бирлиги миллий эталонига мувофиқ Метрология институти таркибида юридик шахс ташкил этмаган ҳолда Вақт ва частота хизматини (кейинги ўринларда — Вақт хизмати);
Вақт хизматининг вазифалари, функциялари, ҳуқуқлари ва мажбуриятларини белгилашни назарда тутувчи низомини «Ўзбектелеком» АК билан келишган ҳолда тасдиқлашни ташкил этсин.
4. Агентлик, Рақамли технологиялар вазирлиги ҳамда Иқтисодиёт ва молия вазирлигининг аниқ вақтни Вақт хизматидан олиш ҳамда уни манфаатдор давлат органлари ва бошқа ташкилотларга узатишни давлат-хусусий шериклик шартлари (кейинги ўринларда — ДХШ лойиҳаси) асосида амалга ошириш тўғрисидаги таклифлари маъқуллансин.
5. ДХШ лойиҳаси доирасида Метрология институти — давлат шериги, «Ўзбектелеком» АК — хусусий шерик этиб белгилансин ҳамда Агентлик «Ўзбектелеком» АК билан биргаликда бир ой муддатда Давлат-хусусий шериклик тўғрисида битим имзоланишини таъминласин.
Белгилансинки, Давлат-хусусий шериклик тўғрисидаги битим доирасида:
давлат органлари ва бошқа ташкилотларга аниқ вақт пулли хизмат асосида узатилади ҳамда келиб тушган маблағнинг 90 фоизи хусусий шерикка, қолган қисми давлат шериги ҳисобварағига ўтказилади;
тўлов миқдори томонлар сарфланган харажатлар инобатга олиниб, асослантирилган ҳисоб-китоблар асосида белгиланади;
давлат шериги вақт ва частота соҳасида ўлчашларнинг ягона бирликда бўлишини таъминлайди, Ўзбекистон миллий вақт шкаласини (UTC (UZ) ҳосил қилиш, сақлаш ва хусусий шерикка узатишни амалга оширади;
хусусий шерик манфаатдор давлат органлари ва бошқа ташкилотларга аниқ вақтни узатади;
давлат шериги аниқ вақтни мунтазам трансляция қилиб борувчи веб-сайт ва мобиль иловани ишга туширади;
битимнинг амал қилиш муддати камида беш йил этиб белгиланади ва ушбу муддат томонлар ўртасида келишилган ҳолда, қонунда белгиланган муддатлар доирасида узайтирилиши ёки қисқартирилиши мумкин.
6. Агентлик икки ой муддатда тегишли вазирликлар ва идоралар билан биргаликда аниқ вақт сигналларини қабул қилувчи абонентлар рўйхатини шакллантирсин ва тасдиқласин. Заруратга кўра абонентлар рўйхати ҳар йили камида бир марта янгилаб борилади.
7. Давлат шеригига пулли хизматдан келиб тушган маблағлар Вақт хизматининг моддий-техник базасини ривожлантириш, инфратузилмасини такомиллаштириш, ходимларни рағбатлантириш ва малакасини ошириш ҳамда хорижий экспертларни жалб қилиш билан боғлиқ харажатларни қоплашга йўналтирилади.
8. Мазкур қарорнинг бажарилишини назорат қилиш Вазирлар Маҳкамаси ҳузуридаги Ўзбекистон техник жиҳатдан тартибга солиш агентлиги директори А.Р. Жуманазаров ва Ўзбекистон Республикаси рақамли технологиялар вазири Ш.Х. Шерматов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2024 йил 16 август,
510-сон
Oʻzbekiston Respublikasi Vazirlar Mahkamasining
qarori
Oʻzbekiston Respublikasida Vaqt va chastota xizmati faoliyatini samarali tashkil etish chora-tadbirlari toʻgʻrisida
Oʻzbekiston Respublikasining “Oʻzbekiston texnik jihatdan tartibga solish agentligining faoliyatini tashkil etish chora-tadbirlari toʻgʻrisida” 2024-yil 28-fevraldagi PQ-91-son qaroriga muvofiq hamda respublikada vaqt va chastota sohasida oʻlchashlarning yagona birlikda boʻlishini taʼminlash, shuningdek, Oʻzbekiston milliy vaqt shkalasini (UTC (UZ) hosil qilish, uni saqlash va uzatishni amalga oshirish maqsadida Vazirlar Mahkamasi qaror qiladi:
1. Quyidagilar:
Vazirlar Mahkamasi huzuridagi Oʻzbekiston texnik jihatdan tartibga solish agentligi (keyingi oʻrinlarda — Agentlik) tomonidan vaqt, chastota va milliy vaqt shkalasi (UTC (UZ) birligi milliy etaloni yaratilganligi;
Oʻzbekiston Respublikasi Xalqaro oʻlchov va tarozilar byurosining (BIPM) Xalqaro atom vaqti (TAI) guruhiga toʻliq huquqli aʼzo sifatida qabul qilinganligi;
Oʻzbekiston Respublikasining Muvofiqlashtirilgan universal vaqtni (UTC) shakllantirishda Xalqaro oʻlchov va tarozilar byurosi (BIPM) solishtirishlarida ishtirokchi sifatida roʻyxatdan oʻtganligi maʼlumot uchun qabul qilinsin.
2. Belgilansinki, 2025-yil 1-yanvardan boshlab:
Oʻzbekiston milliy vaqt shkalasi (UTC (UZ) joriy etiladi va undan Oʻzbekiston Respublikasining aniq vaqti (keyingi oʻrinlarda — aniq vaqt) sifatida foydalaniladi;
Vaqt xizmatining faoliyatini samarali tashkil etishga Agentlikning “Oʻzbekiston milliy metrologiya instituti” davlat muassasasi (keyingi oʻrinlarda — Metrologiya instituti) masʼul hisoblanadi;
Metrologiya instituti Muvofiqlashtirilgan universal vaqtni (UTC) shakllantirishda ishtirok etadi va Oʻzbekiston milliy vaqt shkalasini (UTC (UZ) hosil qilishga vakolatli etib belgilanadi.
3. Agentlik ikki oy muddatda:
vaqt, chastota va milliy vaqt shkalasi (UTC (UZ) birligi milliy etaloniga muvofiq Metrologiya instituti tarkibida yuridik shaxs tashkil etmagan holda Vaqt va chastota xizmatini (keyingi oʻrinlarda — Vaqt xizmati);
Vaqt xizmatining vazifalari, funksiyalari, huquqlari va majburiyatlarini belgilashni nazarda tutuvchi nizomini “Oʻzbektelekom” AK bilan kelishgan holda tasdiqlashni tashkil etsin.
4. Agentlik, Raqamli texnologiyalar vazirligi hamda Iqtisodiyot va moliya vazirligining aniq vaqtni Vaqt xizmatidan olish hamda uni manfaatdor davlat organlari va boshqa tashkilotlarga uzatishni davlat-xususiy sheriklik shartlari (keyingi oʻrinlarda — DXSH loyihasi) asosida amalga oshirish toʻgʻrisidagi takliflari maʼqullansin.
5. DXSH loyihasi doirasida Metrologiya instituti — davlat sherigi, “Oʻzbektelekom” AK — xususiy sherik etib belgilansin hamda Agentlik “Oʻzbektelekom” AK bilan birgalikda bir oy muddatda Davlat-xususiy sheriklik toʻgʻrisida bitim imzolanishini taʼminlasin.
Belgilansinki, Davlat-xususiy sheriklik toʻgʻrisidagi bitim doirasida:
davlat organlari va boshqa tashkilotlarga aniq vaqt pulli xizmat asosida uzatiladi hamda kelib tushgan mablagʻning 90 foizi xususiy sherikka, qolgan qismi davlat sherigi hisobvaragʻiga oʻtkaziladi;
toʻlov miqdori tomonlar sarflangan xarajatlar inobatga olinib, asoslantirilgan hisob-kitoblar asosida belgilanadi;
davlat sherigi vaqt va chastota sohasida oʻlchashlarning yagona birlikda boʻlishini taʼminlaydi, Oʻzbekiston milliy vaqt shkalasini (UTC (UZ) hosil qilish, saqlash va xususiy sherikka uzatishni amalga oshiradi;
xususiy sherik manfaatdor davlat organlari va boshqa tashkilotlarga aniq vaqtni uzatadi;
davlat sherigi aniq vaqtni muntazam translyatsiya qilib boruvchi veb-sayt va mobil ilovani ishga tushiradi;
bitimning amal qilish muddati kamida besh yil etib belgilanadi va ushbu muddat tomonlar oʻrtasida kelishilgan holda, qonunda belgilangan muddatlar doirasida uzaytirilishi yoki qisqartirilishi mumkin.
6. Agentlik ikki oy muddatda tegishli vazirliklar va idoralar bilan birgalikda aniq vaqt signallarini qabul qiluvchi abonentlar roʻyxatini shakllantirsin va tasdiqlasin. Zaruratga koʻra abonentlar roʻyxati har yili kamida bir marta yangilab boriladi.
7. Davlat sherigiga pulli xizmatdan kelib tushgan mablagʻlar Vaqt xizmatining moddiy-texnik bazasini rivojlantirish, infratuzilmasini takomillashtirish, xodimlarni ragʻbatlantirish va malakasini oshirish hamda xorijiy ekspertlarni jalb qilish bilan bogʻliq xarajatlarni qoplashga yoʻnaltiriladi.
8. Mazkur qarorning bajarilishini nazorat qilish Vazirlar Mahkamasi huzuridagi Oʻzbekiston texnik jihatdan tartibga solish agentligi direktori A.R. Jumanazarov va Oʻzbekiston Respublikasi raqamli texnologiyalar vaziri Sh.X. Shermatov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 16-avgust,
510-son