📅 2024-yil 16-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 16 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 16 августа 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 16 August 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Тошкент тиббий-генетик илмий маркази — «Академик Н.П. Бочков номидаги тиббий-генетик илмий маркази» Федерал давлат бюджет илмий муассасаси бўлинмасини ташкил этиш тўғрисида
Ўзбекистон Республикаси Президентининг «Кам учрайдиган (орфан) ва бошқа ирсий-генетик касалликларга чалинган болаларга тиббий ва ижтимоий ёрдам кўрсатишни янада яхшилаш чора-тадбирлари тўғрисида» 2019 йил 7 сентябрдаги ПҚ-4440-сон қарорига мувофиқ халқаро талаб ва стандартлар асосида юқори малакали тиббий-генетик кадрларни тайёрлаш ҳамда соҳада илмий ва инновацион фаолиятни самарали ташкил этиш мақсадида Вазирлар Маҳкамаси қарор қилади:
1. Фанлар академиясининг Иммунология ва инсон геномикаси институти ҳамда Россия Федерациясининг «Академик Н.П. Бочков номидаги тиббий-генетик илмий маркази» Федерал давлат бюджети илмий муассасаси (кейинги ўринларда — бош муассаса) ўртасида Тошкент тиббий-генетик илмий маркази — «Академик Н.П. Бочков номидаги тиббий-генетик илмий маркази» Федерал давлат бюджети илмий муассасасининг бўлинмасини (кейинги ўринларда — Бўлинма) ташкил этиш тўғрисида битим имзоланганлиги маълумот учун қабул қилинсин.
2. Тошкент шаҳрида Россия Федерациясининг «Академик Н.П. Бочков номидаги тиббий-генетик илмий маркази» Федерал давлат бюджети илмий муассасасининг юридик шахс бўлган Тошкент тиббий-генетик илмий маркази — «Академик Н.П. Бочков номидаги тиббий-генетик илмий маркази» Федерал давлат бюджети илмий муассасасининг бўлинмаси ташкил этилсин.
3. Қуйидагилар Бўлинманинг асосий вазифалари этиб белгилансин:
тиббий генетика соҳасида янги билимларни ўзлаштиришга қаратилган фундаментал, қидирув ва амалий (шу жумладан, клиник) илмий тадқиқотларни амалга ошириш;
халқаро талаб ва стандартларга мувофиқ юқори малакали илмий ва тиббий кадрлар тайёрлаш тизимида иштирок этиш;
фан ва таълимнинг халқаро илмий-тадқиқот ва таълим йўналишига интеграциялашувга кўмаклашиш.
4. Белгилансинки:
Бўлинма «Академик Н.П. Бочков номидаги тиббий-генетик илмий маркази» Федерал давлат бюджети илмий муассасасининг алоҳида бўлинмаси бўлиб, халқаро талаб ва стандартлар асосида тиббиёт соҳасида илмий тадқиқотлар ўтказувчи ташкилот ҳисобланади;
Бўлинмага бош муассаса томонидан лавозимга тайинланадиган ва лавозимдан озод этиладиган ижрочи директор раҳбарлик қилади;
Бўлинмага жалб этиладиган профессор-ўқитувчи ходимларнинг хизмат сафарларига Россия Федерациясида, шунингдек бош муассаса ва Бўлинма ўртасида белгиланган тартиб бўйича ҳақ тўланади.
5. Қуйидагилар Бўлинма фаолиятини молиялаштириш манбалари этиб белгилансин:
«Академик Н.П. Бочков номидаги тиббий-генетик илмий маркази» Федерал давлат бюджет илмий муассасасининг маблағлари;
илмий-тадқиқот лойиҳаларини амалга ошириш учун Ўзбекистон Республикаси Олий таълим, фан ва инновациялар вазирлиги томонидан ўтказиладиган танловлар натижаларига кўра ажратиладиган грантлар;
халқаро молия институтлари ва ташкилотларининг грантлари;
шартнома асосида хизматлар кўрсатишдан олинадиган даромадлар;
жисмоний ва юридик шахсларнинг ҳомийлик хайриялари;
қонунчилик ҳужжатларида тақиқланмаган бошқа манбалар.
6. Фанлар академияси бош муассаса билан биргаликда бир ой муддатда Бўлинма уставини ишлаб чиқиб, тасдиқлаш ҳамда белгиланган тартибда давлат рўйхатидан ўтказиш чораларини кўрсин.
7. Белгилаб қўйилсинки:
Бўлинмага Тошкент шаҳрининг Миробод тумани Яҳё Ғуломов кўчасидаги 74-уй манзилида жойлашган Фанлар академиясининг Иммунология ва инсон геномикаси институтига тегишли бино ва хоналарнинг бир қисми текин фойдаланиш ҳуқуқи асосида берилади;
фойдаланишга берилган бино ва иншоотлар ҳамда уларга тегишли ҳудудни сақлаш билан боғлиқ барча харажатлар, шу жумладан коммунал хизматлар бўйича тўловлар Бўлинма маблағлари ҳисобидан қопланади.
Бунда Бўлинма жойлаштириладиган Фанлар академиясининг Иммунология ва инсон геномикаси институти бино ва иншоотларини реконструкция қилиш, таъмирлаш, шунингдек, Бўлинмани зарур мебель, инвентарь, асбоб-ускуналар, компьютер, техника ҳамда ахборот-коммуникация технологиялари билан жиҳозлашга доир молиялаштириш лойиҳалари бош муассаса маблағлари ҳисобидан амалга оширилиши инобатга олинсин.
8. Мазкур қарорнинг бажарилишини назорат қилиш Ўзбекистон Республикаси Фанлар академияси президенти Б.С. Юлдашев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2024 йил 16 август,
513-сон
Oʻzbekiston Respublikasi Vazirlar Mahkamasining
qarori
Toshkent tibbiy-genetik ilmiy markazi — “Akademik N.P. Bochkov nomidagi tibbiy-genetik ilmiy markazi” Federal davlat budjet ilmiy muassasasi boʻlinmasini tashkil etish toʻgʻrisida
Oʻzbekiston Respublikasi Prezidentining “Kam uchraydigan (orfan) va boshqa irsiy-genetik kasalliklarga chalingan bolalarga tibbiy va ijtimoiy yordam koʻrsatishni yanada yaxshilash chora-tadbirlari toʻgʻrisida” 2019-yil 7-sentabrdagi PQ-4440-son qaroriga muvofiq xalqaro talab va standartlar asosida yuqori malakali tibbiy-genetik kadrlarni tayyorlash hamda sohada ilmiy va innovatsion faoliyatni samarali tashkil etish maqsadida Vazirlar Mahkamasi qaror qiladi:
1. Fanlar akademiyasining Immunologiya va inson genomikasi instituti hamda Rossiya Federatsiyasining “Akademik N.P. Bochkov nomidagi tibbiy-genetik ilmiy markazi” Federal davlat budjeti ilmiy muassasasi (keyingi oʻrinlarda — bosh muassasa) oʻrtasida Toshkent tibbiy-genetik ilmiy markazi — “Akademik N.P. Bochkov nomidagi tibbiy-genetik ilmiy markazi” Federal davlat budjeti ilmiy muassasasining boʻlinmasini (keyingi oʻrinlarda — Boʻlinma) tashkil etish toʻgʻrisida bitim imzolanganligi maʼlumot uchun qabul qilinsin.
2. Toshkent shahrida Rossiya Federatsiyasining “Akademik N.P. Bochkov nomidagi tibbiy-genetik ilmiy markazi” Federal davlat budjeti ilmiy muassasasining yuridik shaxs boʻlgan Toshkent tibbiy-genetik ilmiy markazi — “Akademik N.P. Bochkov nomidagi tibbiy-genetik ilmiy markazi” Federal davlat budjeti ilmiy muassasasining boʻlinmasi tashkil etilsin.
3. Quyidagilar Boʻlinmaning asosiy vazifalari etib belgilansin:
tibbiy genetika sohasida yangi bilimlarni oʻzlashtirishga qaratilgan fundamental, qidiruv va amaliy (shu jumladan, klinik) ilmiy tadqiqotlarni amalga oshirish;
xalqaro talab va standartlarga muvofiq yuqori malakali ilmiy va tibbiy kadrlar tayyorlash tizimida ishtirok etish;
fan va taʼlimning xalqaro ilmiy-tadqiqot va taʼlim yoʻnalishiga integratsiyalashuvga koʻmaklashish.
4. Belgilansinki:
Boʻlinma “Akademik N.P. Bochkov nomidagi tibbiy-genetik ilmiy markazi” Federal davlat budjeti ilmiy muassasasining alohida boʻlinmasi boʻlib, xalqaro talab va standartlar asosida tibbiyot sohasida ilmiy tadqiqotlar oʻtkazuvchi tashkilot hisoblanadi;
Boʻlinmaga bosh muassasa tomonidan lavozimga tayinlanadigan va lavozimdan ozod etiladigan ijrochi direktor rahbarlik qiladi;
Boʻlinmaga jalb etiladigan professor-oʻqituvchi xodimlarning xizmat safarlariga Rossiya Federatsiyasida, shuningdek bosh muassasa va Boʻlinma oʻrtasida belgilangan tartib boʻyicha haq toʻlanadi.
5. Quyidagilar Boʻlinma faoliyatini moliyalashtirish manbalari etib belgilansin:
“Akademik N.P. Bochkov nomidagi tibbiy-genetik ilmiy markazi” Federal davlat budjet ilmiy muassasasining mablagʻlari;
ilmiy-tadqiqot loyihalarini amalga oshirish uchun Oʻzbekiston Respublikasi Oliy taʼlim, fan va innovatsiyalar vazirligi tomonidan oʻtkaziladigan tanlovlar natijalariga koʻra ajratiladigan grantlar;
xalqaro moliya institutlari va tashkilotlarining grantlari;
shartnoma asosida xizmatlar koʻrsatishdan olinadigan daromadlar;
jismoniy va yuridik shaxslarning homiylik xayriyalari;
qonunchilik hujjatlarida taqiqlanmagan boshqa manbalar.
6. Fanlar akademiyasi bosh muassasa bilan birgalikda bir oy muddatda Boʻlinma ustavini ishlab chiqib, tasdiqlash hamda belgilangan tartibda davlat roʻyxatidan oʻtkazish choralarini koʻrsin.
7. Belgilab qoʻyilsinki:
Boʻlinmaga Toshkent shahrining Mirobod tumani Yahyo Gʻulomov koʻchasidagi 74-uy manzilida joylashgan Fanlar akademiyasining Immunologiya va inson genomikasi institutiga tegishli bino va xonalarning bir qismi tekin foydalanish huquqi asosida beriladi;
foydalanishga berilgan bino va inshootlar hamda ularga tegishli hududni saqlash bilan bogʻliq barcha xarajatlar, shu jumladan kommunal xizmatlar boʻyicha toʻlovlar Boʻlinma mablagʻlari hisobidan qoplanadi.
Bunda Boʻlinma joylashtiriladigan Fanlar akademiyasining Immunologiya va inson genomikasi instituti bino va inshootlarini rekonstruksiya qilish, taʼmirlash, shuningdek, Boʻlinmani zarur mebel, inventar, asbob-uskunalar, kompyuter, texnika hamda axborot-kommunikatsiya texnologiyalari bilan jihozlashga doir moliyalashtirish loyihalari bosh muassasa mablagʻlari hisobidan amalga oshirilishi inobatga olinsin.
8. Mazkur qarorning bajarilishini nazorat qilish Oʻzbekiston Respublikasi Fanlar akademiyasi prezidenti B.S. Yuldashev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 16-avgust,
513-son