📅 2024-yil 20-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 20 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 20 августа 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 20 August 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
РЕЖА-ЖАДВАЛИ
Нукус ёшлар технопарки фаолиятини янада такомиллаштириш тўғрисида
Иқтидорли ёшларнинг ташаббусларини қўллаб-қувватлаш борасида амалга оширилаётган ишларни янада жадаллаштириш, уларни инновацион тадбиркорликка кенг жалб қилишда замонавий шарт-шароит яратиш, мамлакат илм-фанининг халқаро миқёсидаги рақобатбардошлигини таъминлаш, мавжуд инновацион инфратузилмаларнинг салоҳиятини янада мустаҳкамлаш ҳамда уларнинг инновацион салоҳиятини ривожлантириш мақсадида Вазирлар Маҳкамаси қарор қилади:
1. Ўзбекистон Республикаси Олий таълим, фан ва инновациялар вазирлиги ҳузуридаги Инновацион ривожланиш агентлиги (кейинги ўринларда — Агентлик) ҳар йили камида бир марта:
тегишли ҳудудлардаги ижтимоий-иқтисодий муаммоларнинг ечимига қаратилган янги турдаги маҳсулот ва технологик ечимларнинг прототипларини яратиш учун алоҳида стартап лойиҳалар танловини эълон қилсин;
қоида тариқасида, хар йили октябрь ойида Оролбўйи минтақасида экологик муаммолар ечимига қаратилган лойиҳаларни амалга ошириш юзасидан конференция ўтказсин;
иқтисодиёт соҳаларидаги корхоналар ва маҳаллий ижро этувчи ҳокимият органлари билан биргаликда жорий этишга тайёр лойиҳалар кўргазмасини ташкил этсин.
2. Белгилансинки:
Агентлик томонидан Нукус ёшлар технопарки ва ҳудудларда ташкил этилаётган Ёшлар технопаркларидаги (кейинги ўринларда — технопарклар) муваффақиятли стартап лойиҳаларини қўллаб-қувватлаш, халқаро миқёсида ривожлантириш мақсадида уларнинг муаллифларини робототехника, мехатроника, ахборот технологиялари, сунъий интеллект, қурилиш ва қишлоқ хўжалиги йўналишлари бўйича ҳар йили қисқа муддатли хорижий стажировкага юбориш бўйича алоҳида танлов ташкил этилади;
Агентлик томонидан илмий-инновацион акселератор ва бизнес-инкубаторларни ташкил этиш асосида ташаббускор талаба ёшларни тадбиркорлик фаолиятига йўналтириш мақсадида 2025 йилдан бошлаб технопаркларда «InnoX» бизнес-инкубатор дастури йўлга қўйилади;
Агентлик технопарклар фаолиятини такомиллаштириш мақсадида «InnoX» бизнес-инкубатор дастури ғолибларининг илмий ғоя, стартап ва илмий лойиҳаларини «Бўлажак олим» танлови доирасидаги маблағлар ҳисобидан молиялаштиради.
3. Ўзбекистон Республикаси Олий таълим, фан ва инновациялар вазирлиги:
икки ой муддатда технопаркларнинг стартап лойиҳалари муаллифларини хорижий стажировкага юбориш бўйича танлов шартларини ишлаб чиқсин ва тасдиқласин;
технопаркларни замонавий асбоб-ускуналар билан жиҳозлаш, ходимлари меҳнатига ҳақ тўлаш, бино ва иншоотларини сақлаш, шунингдек, мазкур қарорда белгиланган вазифаларни амалга ошириш билан боғлиқ харажатларни технопаркларнинг хўжалик ва тадбиркорлик фаолиятидан тушадиган маблағлар ҳисобидан молиялаштириш чораларини кўрсин.
4. Ўзбекистон Республикаси Ҳукуматининг иловага мувофиқ айрим қарорларига ўзгартириш ва қўшимчалар киритилсин.
5. Мазкур қарорнинг бажарилишини назорат қилиш Ўзбекистон Республикаси олий таълим, фан ва инновациялар вазири К.А. Шарипов зиммасига юклансин.
Вазирлар Маҳкамасининг 2024 йил 20 августдаги 522-сон қарорига ИЛОВА
Ўзбекистон Республикаси Ҳукуматининг айрим қарорларига киритилаётган ўзгартириш ва қўшимчалар
1. Вазирлар Маҳкамасининг «Олий таълимдан кейинги таълим тизимини янада такомиллаштириш чора-тадбирлари тўғрисида» 2017 йил 22 майдаги 304-сон қарорига 2-иловада :
а) 15-банднинг иккинчи хатбошиси қуйидаги таҳрирда баён этилсин:
«Ҳужжатлар илмий ташкилот ва таълим муассасалари қабул комиссияси томонидан 15 сентябрдан 15 октябргача бўлган даврда Ягона электрон тизим ёки Ягона интерактив давлат хизматлари портали орқали қабул қилинади.»;
б) 41-банд қуйидаги таҳрирда баён этилсин:
«41. Мустақил изланувчиликка талабгор қуйидаги ҳужжатларни илова қилган ҳолда ариза билан илмий ташкилот ёки таълим муассасасига Ягона электрон тизим ёки Ягона интерактив давлат хизматлари портали орқали мурожаат қилади:».
2. Вазирлар Маҳкамасининг «Республика ҳудудларида Ёшлар технопаркларини ташкил этиш чора-тадбирлари тўғрисида» 2020 йил 22 майдаги 313-сон қарорида :
а) 1-банддаги «Инновацион ривожланиш вазирлиги» сўзлари «Олий таълим, фан ва инновациялар вазирлиги ҳузуридаги Инновацион ривожланиш агентлиги» сўзлари билан алмаштирилсин;
б) 2-бандда :
иккинчи хатбошидаги «Инновацион ривожланиш вазирлиги» сўзлари «Олий таълим, фан ва инновациялар вазирлиги» сўзлари билан алмаштирилсин;
саккизинчи хатбошидаги «Инновацион ривожланиш вазирлиги» сўзлари «Олий таълим, фан ва инновациялар вазирлиги ҳузуридаги Инновацион ривожланиш агентлиги» сўзлари билан алмаштирилсин;
қуйидаги мазмундаги ўнинчи хатбоши билан тўлдирилсин:
«ҳудудлардаги ёшларни инновацион фаолиятга кенг жалб қилиш ва уларнинг ғояларини такомиллаштириш ҳамда янги босқичга олиб чиқиш мақсадида инкубация ва акселерация дастурларини ташкил этиш»;
в) 3-бандда :
иккинчи хатбоши қуйидаги таҳрирда баён этилсин:
«Технопарклар Ўзбекистон Республикаси Олий таълим, фан ва инновациялар вазирлиги ҳузуридаги Инновацион ривожланиш агентлиги тизимидаги давлат муассасаси ҳисобланади»;
учинчи хатбошидаги «Инновацион ривожланиш вазирлиги ҳузуридаги Ёшлар академияси» сўзлари «Олий таълим, фан ва инновациялар вазирлиги ҳузуридаги Инновацион ривожланиш агентлиги» сўзлари билан алмаштирилсин;
бешинчи хатбошидаги «Инновацион ривожланиш вазирлиги» сўзлари «Олий таълим, фан ва инновациялар вазирлиги ҳузуридаги Инновацион ривожланиш агентлиги» сўзлари билан алмаштирилсин;
г) 4-банднинг иккинчи хатбошиси қуйидаги таҳрирда баён этилсин:
«2020 — 2024 йилларда республика ҳудудларида Ёшлар технопаркларини босқичма-босқич ташкил этиш режа-жадвали (кейинги ўринларда — режа-жадвал) 1-иловага мувофиқ;»;
д) 5-банднинг тўртинчи хатбошисидаги «Инновацион ривожланиш вазирлигининг» сўзлари «Олий таълим, фан ва инновациялар вазирлиги ҳузуридаги Инновацион ривожланиш агентлигининг» сўзлари билан алмаштирилсин;
е) 6-банднинг тўртинчи хатбошисидаги «инновацион ривожланиш вазири» сўзлари «Олий таълим, фан ва инновациялар вазирлиги ҳузуридаги Инновацион ривожланиш агентлиги директори» сўзлари билан алмаштирилсин;
ж) 10-банд қуйидаги таҳрирда баён этилсин:
«10. Мазкур қарорнинг бажарилишини назорат қилиш Ўзбекистон Республикаси Олий таълим, фан ва инновациялар вазирлиги ҳузуридаги Инновацион ривожланиш агентлиги директори Ш.Р. Ражаббаев зиммасига юклансин»;
з) 1-илованинг матни қуйидаги таҳрирда баён этилсин:
«2020 — 2024 йилларда республика ҳудудларида Ёшлар технопаркларини босқичма-босқич ташкил этиш
Т/р Ҳудуд номи Жойлашиш жойи Амалга ошириш муддати 1. Андижон вилояти Андижон шаҳар 2021 йил 2. Тошкент вилояти Оҳангарон шаҳар 3. Қорақалпоғистон Республикаси Нукус шаҳар 2022 йил 4. Самарқанд вилояти Самарқанд шаҳар 5. Сирдарё вилояти Гулистон шаҳар 6. Навоий вилояти Навоий шаҳар 2023 йил 7. Бухоро вилояти Бухоро шаҳар 2024 йил 8. Наманган вилояти Наманган шаҳар 9. Фарғона вилояти Фарғона шаҳар 10. Хоразм вилояти Урганч шаҳар 11. Жиззах вилояти Жиззах шаҳар 12. Сурхондарё вилояти Термиз шаҳар 13. Қашқадарё вилояти Қарши шаҳар » .
Ўзбекистон Республикасининг Бош вазири А. АРИПОВ
Тошкент ш.,
2024 йил 20 август,
522-сон
Oʻzbekiston Respublikasi Vazirlar Mahkamasining
qarori
REJA-JADVALI
Nukus yoshlar texnoparki faoliyatini yanada takomillashtirish toʻgʻrisida
Iqtidorli yoshlarning tashabbuslarini qoʻllab-quvvatlash borasida amalga oshirilayotgan ishlarni yanada jadallashtirish, ularni innovatsion tadbirkorlikka keng jalb qilishda zamonaviy shart-sharoit yaratish, mamlakat ilm-fanining xalqaro miqyosidagi raqobatbardoshligini taʼminlash, mavjud innovatsion infratuzilmalarning salohiyatini yanada mustahkamlash hamda ularning innovatsion salohiyatini rivojlantirish maqsadida Vazirlar Mahkamasi qaror qiladi:
1. Oʻzbekiston Respublikasi Oliy taʼlim, fan va innovatsiyalar vazirligi huzuridagi Innovatsion rivojlanish agentligi (keyingi oʻrinlarda — Agentlik) har yili kamida bir marta:
tegishli hududlardagi ijtimoiy-iqtisodiy muammolarning yechimiga qaratilgan yangi turdagi mahsulot va texnologik yechimlarning prototiplarini yaratish uchun alohida startap loyihalar tanlovini eʼlon qilsin;
qoida tariqasida, xar yili oktabr oyida Orolboʻyi mintaqasida ekologik muammolar yechimiga qaratilgan loyihalarni amalga oshirish yuzasidan konferensiya oʻtkazsin;
iqtisodiyot sohalaridagi korxonalar va mahalliy ijro etuvchi hokimiyat organlari bilan birgalikda joriy etishga tayyor loyihalar koʻrgazmasini tashkil etsin.
2. Belgilansinki:
Agentlik tomonidan Nukus yoshlar texnoparki va hududlarda tashkil etilayotgan Yoshlar texnoparklaridagi (keyingi oʻrinlarda — texnoparklar) muvaffaqiyatli startap loyihalarini qoʻllab-quvvatlash, xalqaro miqyosida rivojlantirish maqsadida ularning mualliflarini robototexnika, mexatronika, axborot texnologiyalari, sunʼiy intellekt, qurilish va qishloq xoʻjaligi yoʻnalishlari boʻyicha har yili qisqa muddatli xorijiy stajirovkaga yuborish boʻyicha alohida tanlov tashkil etiladi;
Agentlik tomonidan ilmiy-innovatsion akselerator va biznes-inkubatorlarni tashkil etish asosida tashabbuskor talaba yoshlarni tadbirkorlik faoliyatiga yoʻnaltirish maqsadida 2025-yildan boshlab texnoparklarda “InnoX” biznes-inkubator dasturi yoʻlga qoʻyiladi;
Agentlik texnoparklar faoliyatini takomillashtirish maqsadida “InnoX” biznes-inkubator dasturi gʻoliblarining ilmiy gʻoya, startap va ilmiy loyihalarini “Boʻlajak olim” tanlovi doirasidagi mablagʻlar hisobidan moliyalashtiradi.
3. Oʻzbekiston Respublikasi Oliy taʼlim, fan va innovatsiyalar vazirligi:
ikki oy muddatda texnoparklarning startap loyihalari mualliflarini xorijiy stajirovkaga yuborish boʻyicha tanlov shartlarini ishlab chiqsin va tasdiqlasin;
texnoparklarni zamonaviy asbob-uskunalar bilan jihozlash, xodimlari mehnatiga haq toʻlash, bino va inshootlarini saqlash, shuningdek, mazkur qarorda belgilangan vazifalarni amalga oshirish bilan bogʻliq xarajatlarni texnoparklarning xoʻjalik va tadbirkorlik faoliyatidan tushadigan mablagʻlar hisobidan moliyalashtirish choralarini koʻrsin.
4. Oʻzbekiston Respublikasi Hukumatining ilovaga muvofiq ayrim qarorlariga oʻzgartirish va qoʻshimchalar kiritilsin.
5. Mazkur qarorning bajarilishini nazorat qilish Oʻzbekiston Respublikasi oliy taʼlim, fan va innovatsiyalar vaziri K.A. Sharipov zimmasiga yuklansin.
Vazirlar Mahkamasining 2024-yil 20-avgustdagi 522-son qaroriga ILOVA
Oʻzbekiston Respublikasi Hukumatining ayrim qarorlariga kiritilayotgan oʻzgartirish va qoʻshimchalar
1. Vazirlar Mahkamasining “Oliy taʼlimdan keyingi taʼlim tizimini yanada takomillashtirish chora-tadbirlari toʻgʻrisida” 2017-yil 22-maydagi 304-son qaroriga 2-ilovada :
a) 15-bandning ikkinchi xatboshisi quyidagi tahrirda bayon etilsin:
“Hujjatlar ilmiy tashkilot va taʼlim muassasalari qabul komissiyasi tomonidan 15-sentabrdan 15-oktabrgacha boʻlgan davrda Yagona elektron tizim yoki Yagona interaktiv davlat xizmatlari portali orqali qabul qilinadi.”;
b) 41-band quyidagi tahrirda bayon etilsin:
“41. Mustaqil izlanuvchilikka talabgor quyidagi hujjatlarni ilova qilgan holda ariza bilan ilmiy tashkilot yoki taʼlim muassasasiga Yagona elektron tizim yoki Yagona interaktiv davlat xizmatlari portali orqali murojaat qiladi:”.
2. Vazirlar Mahkamasining “Respublika hududlarida Yoshlar texnoparklarini tashkil etish chora-tadbirlari toʻgʻrisida” 2020-yil 22-maydagi 313-son qarorida :
a) 1-banddagi “Innovatsion rivojlanish vazirligi” soʻzlari “Oliy taʼlim, fan va innovatsiyalar vazirligi huzuridagi Innovatsion rivojlanish agentligi” soʻzlari bilan almashtirilsin;
b) 2-bandda :
ikkinchi xatboshidagi “Innovatsion rivojlanish vazirligi” soʻzlari “Oliy taʼlim, fan va innovatsiyalar vazirligi” soʻzlari bilan almashtirilsin;
sakkizinchi xatboshidagi “Innovatsion rivojlanish vazirligi” soʻzlari “Oliy taʼlim, fan va innovatsiyalar vazirligi huzuridagi Innovatsion rivojlanish agentligi” soʻzlari bilan almashtirilsin;
quyidagi mazmundagi oʻninchi xatboshi bilan toʻldirilsin:
“hududlardagi yoshlarni innovatsion faoliyatga keng jalb qilish va ularning gʻoyalarini takomillashtirish hamda yangi bosqichga olib chiqish maqsadida inkubatsiya va akseleratsiya dasturlarini tashkil etish”;
v) 3-bandda :
ikkinchi xatboshi quyidagi tahrirda bayon etilsin:
“Texnoparklar Oʻzbekiston Respublikasi Oliy taʼlim, fan va innovatsiyalar vazirligi huzuridagi Innovatsion rivojlanish agentligi tizimidagi davlat muassasasi hisoblanadi”;
uchinchi xatboshidagi “Innovatsion rivojlanish vazirligi huzuridagi Yoshlar akademiyasi” soʻzlari “Oliy taʼlim, fan va innovatsiyalar vazirligi huzuridagi Innovatsion rivojlanish agentligi” soʻzlari bilan almashtirilsin;
beshinchi xatboshidagi “Innovatsion rivojlanish vazirligi” soʻzlari “Oliy taʼlim, fan va innovatsiyalar vazirligi huzuridagi Innovatsion rivojlanish agentligi” soʻzlari bilan almashtirilsin;
g) 4-bandning ikkinchi xatboshisi quyidagi tahrirda bayon etilsin:
“2020 — 2024-yillarda respublika hududlarida Yoshlar texnoparklarini bosqichma-bosqich tashkil etish reja-jadvali (keyingi oʻrinlarda — reja-jadval) 1-ilovaga muvofiq;”;
d) 5-bandning toʻrtinchi xatboshisidagi “Innovatsion rivojlanish vazirligining” soʻzlari “Oliy taʼlim, fan va innovatsiyalar vazirligi huzuridagi Innovatsion rivojlanish agentligining” soʻzlari bilan almashtirilsin;
e) 6-bandning toʻrtinchi xatboshisidagi “innovatsion rivojlanish vaziri” soʻzlari “Oliy taʼlim, fan va innovatsiyalar vazirligi huzuridagi Innovatsion rivojlanish agentligi direktori” soʻzlari bilan almashtirilsin;
j) 10-band quyidagi tahrirda bayon etilsin:
“10. Mazkur qarorning bajarilishini nazorat qilish Oʻzbekiston Respublikasi Oliy taʼlim, fan va innovatsiyalar vazirligi huzuridagi Innovatsion rivojlanish agentligi direktori Sh.R. Rajabbayev zimmasiga yuklansin”;
z) 1-ilovaning matni quyidagi tahrirda bayon etilsin:
“2020 — 2024-yillarda respublika hududlarida Yoshlar texnoparklarini bosqichma-bosqich tashkil etish
T/r Hudud nomi Joylashish joyi Amalga oshirish muddati 1. Andijon viloyati Andijon shahar 2021-yil 2. Toshkent viloyati Ohangaron shahar 3. Qoraqalpogʻiston Respublikasi Nukus shahar 2022-yil 4. Samarqand viloyati Samarqand shahar 5. Sirdaryo viloyati Guliston shahar 6. Navoiy viloyati Navoiy shahar 2023-yil 7. Buxoro viloyati Buxoro shahar 2024-yil 8. Namangan viloyati Namangan shahar 9. Fargʻona viloyati Fargʻona shahar 10. Xorazm viloyati Urganch shahar 11. Jizzax viloyati Jizzax shahar 12. Surxondaryo viloyati Termiz shahar 13. Qashqadaryo viloyati Qarshi shahar ” .
Oʻzbekiston Respublikasining Bosh vaziri A. ARIPOV
Toshkent sh.,
2024-yil 20-avgust,
522-son