📅 2024-yil 20-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 20 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 20 августа 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 20 August 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Андижон вилоятида мебелсозликни ривожлантиришни янги сифат босқичига олиб чиқиш бўйича навбатдаги чора-тадбирлар тўғрисида
Андижон вилоятида мебель маҳсулотларини ишлаб чиқарувчи тадбиркорлик субъектларининг фаолиятини янада қўллаб-қувватлаш, замонавий стандартларга жавоб берадиган мебель маҳсулотларини ишлаб чиқаришни янги сифат босқичига олиб чиқиш орқали уларнинг ички ва ташқи бозорлардаги рақобатбардошлигини ошириш мақсадида Вазирлар Маҳкамаси қарор қилади:
1. Иқтисодиёт ва молия вазирлиги, Инвестициялар, саноат ва савдо вазирлиги, АТ «Алоқа банк» ҳамда Андижон вилояти ҳокимлигининг:
Андижон вилояти Олтинкўл туманининг «Уйғур» МФЙ ҳудудида «кластер» усулида мебель маҳсулотларини ишлаб чиқариш, кўргазма ва савдо объектлари ҳамда барча қулайликларга эга бўлган «Мебелсозлик комплекси» кичик саноат зонасини (кейинги ўринларда — саноат зонаси) ташкил этиш;
Олтинкўл тумани «Уйғур» МФЙ ҳудудидаги 129қ, 130, 131қ контурларда туман ҳокимлиги захирасида бўлган 16,0 гектар, шундан 15,9 гектар суғориладиган ерларни қишлоқ хўжалигига мўлжалланган ерлар тоифасидан ер фондининг саноат, транспорт, алоқа, мудофаа ва бошқа мақсадларга мўлжалланган ерлар тоифасига ўтказиш;
Андижон туманининг «Март» МФЙ ҳудудидан ажратилган 13,0 гектар ва Олтинкўл туманининг «Садда» МФЙ ҳудудидан ажратилган 3,0 гектар ер участкаларини белгиланган тартибда туман ҳокимлиги захирасига қайтариш ҳамда ер фонди тоифасини қишлоқ хўжалигига мўлжалланган ерлар тоифасига ўтказиш;
саноат зонасини барпо этиш билан боғлиқ харажатларни АТ «Алоқа банк» маблағлари ҳисобидан молиялаштириш тўғрисидаги таклифлари маъқуллансин.
2. Андижон вилояти ҳокимлиги:
а) бир ой муддатда Олтинкўл тумани «Уйғур» МФЙда ташкил этиладиган саноат зонаси ҳудудининг чегараларини тасдиқласин;
б) Қишлоқ хўжалиги вазирлиги ҳамда Кадастр агентлиги билан биргаликда:
бир ҳафта муддатда Олтинкўл туманининг «Уйғур» МФЙ ҳудудидаги 129қ, 130, 131қ контурларда туман ҳокимлиги захирасида бўлган 16,0 гектар, шундан 15,9 гектар суғориладиган ерларнинг ер фонди тоифасини ўзгартириш бўйича асослантирилган таклифларни Қишлоқ хўжалигига мўлжалланган ва ўрмон фонди ерларининг ер фонди тоифаларини ўзгартириш масалаларини кўриб чиқиш бўйича Ҳукумат комиссиясига киритсин;
Андижон туманининг «Март» МФЙ ҳудудидаги 13,0 гектар ва Олтинкўл туманининг «Садда» МФЙ ҳудудидаги 3,0 гектар ер участкаларини белгиланган тартибда туман ҳокимлиги захирасига қайтарсин ҳамда ер фонди тоифасини қишлоқ хўжалигига мўлжалланган ерлар тоифасига ўтказсин;
«Март» ва «Садда» МФЙ ҳудудидаги ер участкалари белгиланган тартибда давлат рўйхатидан ўтказилиши ҳамда қишлоқ хўжалиги маҳсулотларини етиштириш учун «E-auksion» электрон савдо платформасида электрон онлайн-аукцион савдоларига чиқарилишини таъминласин.
3. Савдо-саноат палатаси ҳамда Андижон вилояти ҳокимлиги:
АТ «Алоқа банк» билан биргаликда икки ой муддатда Туркия, Хитой ва бошқа мебелсозлик ривожланган хорижий давлатлардан экспертларни жалб қилган ҳолда, қуйидагиларни назарда тутувчи саноат зонасининг концепциясини ишлаб чиқсин:
ишлаб чиқариш цехлари (ангар), кўргазма заллари, очиқ ва ёпиқ савдо майдонлари, фурнитура ва бутловчи қисмлар савдо маркази ҳамда логистика марказини ташкил этиш;
импортни чуқур таҳлил қилган ҳолда мебель маҳсулотлари учун импорт ўрнини босувчи хомашёлар, фурнитуралар ва бутловчи қисмлар ишлаб чиқарилишини йўлга қўйиш;
ички ва ташқи бозорлар конъюнктурасидан келиб чиқиб, рақобатбардош мебель маҳсулотларини ишлаб чиқаришни ташкил қилиш бўйича таниқли хорижий брендларни жалб қилиш;
маҳаллий фурнитура ва бутловчи қисмлар ишлаб чиқарувчи корхоналарнинг дилерлик марказларини очиш;
фурнитура ва бутловчи қисмларни импорт қилувчи ташкилотларнинг ёки уларни хорижий ишлаб чиқарувчиларининг дилерлик марказларини очиш орқали ишлаб чиқарувчиларга биринчи сотувчи («қўл»)дан харид қилиш имконини яратиб бериш.
4. Белгилаб қўйилсинки:
а) саноат зонаси ҳудудини ташқи муҳандислик-коммуникация тармоқлари билан таъминлаш доирасида:
ичимлик суви ва оқова сув тармоқлари ҳамда автомобиль йўлларини қуриш, реконструкция қилиш ва таъмирлаш ишлари — 2025 йилда Ўзбекистон Республикасининг ижтимоий ва ишлаб чиқариш инфратузилмасини ривожлантириш дастури доирасида махсус иқтисодий зоналар, ёшлар ва кичик саноат зоналари ҳамда йирик ишлаб чиқариш лойиҳаларини муҳандислик-коммуникация тармоқлари билан таъминлаш учун кўзда тутилган маблағлар;
электр энергияси, табиий газ ва алоқа тармоқларини қуриш, реконструкция қилиш ва таъмирлаш ишлари — ўрнатилган тартибда таъминотчи корхоналарнинг ўз маблағлари ҳисобидан молиялаштирилади;
б) саноат зонаси ҳудудида АТ «Алоқа банк» томонидан қуриладиган бино ва иншоотларни тадбиркорларга сотиш, ижара ва лизингга бериш «E-auksion» электрон савдо платформасида электрон онлайн-аукцион савдолари орқали амалга оширилади.
5. Қурилиш ва уй-жой коммунал хўжалиги вазирлиги саноат зонасини барпо этиш доирасида лойиҳа-смета ҳужжатларини ишлаб чиқиш ва нархларни мақбуллаштириш юзасидан Савдо-саноат палатаси ва Андижон вилояти ҳокимлигига амалий кўмак бериб борсин ҳамда қурилиш-монтаж ишларини техник жиҳатдан тартибга солиш соҳасидаги норматив ҳужжатлар талабларига қатъий риоя этилган ҳолда амалга оширилиши устидан назорат ўрнатилишини таъминласин.
6. Қишлоқ хўжалиги вазирлиги бир ой муддатда тегишли вазирлик ва идоралар билан биргаликда қонунчилик ҳужжатларига мазкур қарордан келиб чиқадиган ўзгартириш ва қўшимчалар киритиш тўғрисидаги норматив ҳуқуқий ҳужжат лойиҳасини ишлаб чиқиб, Вазирлар Маҳкамасига киритсин.
7. Мазкур қарорнинг ижросини самарали ташкил қилишга масъул ва шахсий жавобгар этиб Савдо-саноат палатаси раиси Д.А. Вахабов, инвестициялар, саноат ва савдо вазири Л.Ш. Кудратов ҳамда Андижон вилояти ҳокими Ш.Қ. Абдураҳманов белгилансин.
Қарор ижросини муҳокама қилиб бориш, ижро учун масъул идоралар фаолиятини мувофиқлаштириш ва назорат қилиш Ўзбекистон Республикаси Бош вазирининг ўринбосари Ж.А. Ходжаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2024 йил 20 август,
523-сон
Oʻzbekiston Respublikasi Vazirlar Mahkamasining
qarori
Andijon viloyatida mebelsozlikni rivojlantirishni yangi sifat bosqichiga olib chiqish boʻyicha navbatdagi chora-tadbirlar toʻgʻrisida
Andijon viloyatida mebel mahsulotlarini ishlab chiqaruvchi tadbirkorlik subyektlarining faoliyatini yanada qoʻllab-quvvatlash, zamonaviy standartlarga javob beradigan mebel mahsulotlarini ishlab chiqarishni yangi sifat bosqichiga olib chiqish orqali ularning ichki va tashqi bozorlardagi raqobatbardoshligini oshirish maqsadida Vazirlar Mahkamasi qaror qiladi:
1. Iqtisodiyot va moliya vazirligi, Investitsiyalar, sanoat va savdo vazirligi, AT “Aloqa bank” hamda Andijon viloyati hokimligining:
Andijon viloyati Oltinkoʻl tumanining “Uygʻur” MFY hududida “klaster” usulida mebel mahsulotlarini ishlab chiqarish, koʻrgazma va savdo obyektlari hamda barcha qulayliklarga ega boʻlgan “Mebelsozlik kompleksi” kichik sanoat zonasini (keyingi oʻrinlarda — sanoat zonasi) tashkil etish;
Oltinkoʻl tumani “Uygʻur” MFY hududidagi 129q, 130, 131q konturlarda tuman hokimligi zaxirasida boʻlgan 16,0 gektar, shundan 15,9 gektar sugʻoriladigan yerlarni qishloq xoʻjaligiga moʻljallangan yerlar toifasidan yer fondining sanoat, transport, aloqa, mudofaa va boshqa maqsadlarga moʻljallangan yerlar toifasiga oʻtkazish;
Andijon tumanining “Mart” MFY hududidan ajratilgan 13,0 gektar va Oltinkoʻl tumanining “Sadda” MFY hududidan ajratilgan 3,0 gektar yer uchastkalarini belgilangan tartibda tuman hokimligi zaxirasiga qaytarish hamda yer fondi toifasini qishloq xoʻjaligiga moʻljallangan yerlar toifasiga oʻtkazish;
sanoat zonasini barpo etish bilan bogʻliq xarajatlarni AT “Aloqa bank” mablagʻlari hisobidan moliyalashtirish toʻgʻrisidagi takliflari maʼqullansin.
2. Andijon viloyati hokimligi:
a) bir oy muddatda Oltinkoʻl tumani “Uygʻur” MFYda tashkil etiladigan sanoat zonasi hududining chegaralarini tasdiqlasin;
b) Qishloq xoʻjaligi vazirligi hamda Kadastr agentligi bilan birgalikda:
bir hafta muddatda Oltinkoʻl tumanining “Uygʻur” MFY hududidagi 129q, 130, 131q konturlarda tuman hokimligi zaxirasida boʻlgan 16,0 gektar, shundan 15,9 gektar sugʻoriladigan yerlarning yer fondi toifasini oʻzgartirish boʻyicha asoslantirilgan takliflarni Qishloq xoʻjaligiga moʻljallangan va oʻrmon fondi yerlarining yer fondi toifalarini oʻzgartirish masalalarini koʻrib chiqish boʻyicha Hukumat komissiyasiga kiritsin;
Andijon tumanining “Mart” MFY hududidagi 13,0 gektar va Oltinkoʻl tumanining “Sadda” MFY hududidagi 3,0 gektar yer uchastkalarini belgilangan tartibda tuman hokimligi zaxirasiga qaytarsin hamda yer fondi toifasini qishloq xoʻjaligiga moʻljallangan yerlar toifasiga oʻtkazsin;
“Mart” va “Sadda” MFY hududidagi yer uchastkalari belgilangan tartibda davlat roʻyxatidan oʻtkazilishi hamda qishloq xoʻjaligi mahsulotlarini yetishtirish uchun “E-auksion” elektron savdo platformasida elektron onlayn-auksion savdolariga chiqarilishini taʼminlasin.
3. Savdo-sanoat palatasi hamda Andijon viloyati hokimligi:
AT “Aloqa bank” bilan birgalikda ikki oy muddatda Turkiya, Xitoy va boshqa mebelsozlik rivojlangan xorijiy davlatlardan ekspertlarni jalb qilgan holda, quyidagilarni nazarda tutuvchi sanoat zonasining konsepsiyasini ishlab chiqsin:
ishlab chiqarish sexlari (angar), koʻrgazma zallari, ochiq va yopiq savdo maydonlari, furnitura va butlovchi qismlar savdo markazi hamda logistika markazini tashkil etish;
importni chuqur tahlil qilgan holda mebel mahsulotlari uchun import oʻrnini bosuvchi xomashyolar, furnituralar va butlovchi qismlar ishlab chiqarilishini yoʻlga qoʻyish;
ichki va tashqi bozorlar konyunkturasidan kelib chiqib, raqobatbardosh mebel mahsulotlarini ishlab chiqarishni tashkil qilish boʻyicha taniqli xorijiy brendlarni jalb qilish;
mahalliy furnitura va butlovchi qismlar ishlab chiqaruvchi korxonalarning dilerlik markazlarini ochish;
furnitura va butlovchi qismlarni import qiluvchi tashkilotlarning yoki ularni xorijiy ishlab chiqaruvchilarining dilerlik markazlarini ochish orqali ishlab chiqaruvchilarga birinchi sotuvchi (“qoʻl”)dan xarid qilish imkonini yaratib berish.
4. Belgilab qoʻyilsinki:
a) sanoat zonasi hududini tashqi muhandislik-kommunikatsiya tarmoqlari bilan taʼminlash doirasida:
ichimlik suvi va oqova suv tarmoqlari hamda avtomobil yoʻllarini qurish, rekonstruksiya qilish va taʼmirlash ishlari — 2025-yilda Oʻzbekiston Respublikasining ijtimoiy va ishlab chiqarish infratuzilmasini rivojlantirish dasturi doirasida maxsus iqtisodiy zonalar, yoshlar va kichik sanoat zonalari hamda yirik ishlab chiqarish loyihalarini muhandislik-kommunikatsiya tarmoqlari bilan taʼminlash uchun koʻzda tutilgan mablagʻlar;
elektr energiyasi, tabiiy gaz va aloqa tarmoqlarini qurish, rekonstruksiya qilish va taʼmirlash ishlari — oʻrnatilgan tartibda taʼminotchi korxonalarning oʻz mablagʻlari hisobidan moliyalashtiriladi;
b) sanoat zonasi hududida AT “Aloqa bank” tomonidan quriladigan bino va inshootlarni tadbirkorlarga sotish, ijara va lizingga berish “E-auksion” elektron savdo platformasida elektron onlayn-auksion savdolari orqali amalga oshiriladi.
5. Qurilish va uy-joy kommunal xoʻjaligi vazirligi sanoat zonasini barpo etish doirasida loyiha-smeta hujjatlarini ishlab chiqish va narxlarni maqbullashtirish yuzasidan Savdo-sanoat palatasi va Andijon viloyati hokimligiga amaliy koʻmak berib borsin hamda qurilish-montaj ishlarini texnik jihatdan tartibga solish sohasidagi normativ hujjatlar talablariga qatʼiy rioya etilgan holda amalga oshirilishi ustidan nazorat oʻrnatilishini taʼminlasin.
6. Qishloq xoʻjaligi vazirligi bir oy muddatda tegishli vazirlik va idoralar bilan birgalikda qonunchilik hujjatlariga mazkur qarordan kelib chiqadigan oʻzgartirish va qoʻshimchalar kiritish toʻgʻrisidagi normativ huquqiy hujjat loyihasini ishlab chiqib, Vazirlar Mahkamasiga kiritsin.
7. Mazkur qarorning ijrosini samarali tashkil qilishga masʼul va shaxsiy javobgar etib Savdo-sanoat palatasi raisi D.A. Vaxabov, investitsiyalar, sanoat va savdo vaziri L.Sh. Kudratov hamda Andijon viloyati hokimi Sh.Q. Abdurahmanov belgilansin.
Qaror ijrosini muhokama qilib borish, ijro uchun masʼul idoralar faoliyatini muvofiqlashtirish va nazorat qilish Oʻzbekiston Respublikasi Bosh vazirining oʻrinbosari J.A. Xodjayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 20-avgust,
523-son