📅 2024-yil 12-avgust · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 12 август · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 12 августа 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 12 August 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
СХЕМАСИ
ТАРКИБИ
Шаҳарсозлик соҳасидаги низоларни судга қадар кўриб чиқиш тартиби тўғрисидаги низомни тасдиқлаш ҳақида
Ўзбекистон Республикаси Президентининг «Маъмурий ислоҳотлар доирасида қурилиш ва уй-жой коммунал хўжалиги соҳасида давлат бошқарувини самарали ташкил қилиш чора-тадбирлари тўғрисида» 2023 йил 28 августдаги ПФ-151-сон Фармони ижросини таъминлаш, шунингдек, шаҳарсозлик соҳасида юзага келадиган низоларни судга қадар ҳал қилиш тартибини жорий қилиш мақсадида Вазирлар Маҳкамаси қарор қилади:
1. Қуйидагилар:
Шаҳарсозлик кодексига мувофиқ Қурилиш ва уй-жой коммунал хўжалиги вазирлиги ўз ваколатлари доирасидаги масалалар юзасидан шаҳарсозлик фаолияти субъектлари ўртасидаги келишмовчиликларни кўриб чиқиши белгиланганлиги;
«Лицензиялаш, рухсат бериш ва хабардор қилиш тартиб-таомиллари тўғрисида»ги Қонун ва Шаҳарсозлик кодексига мувофиқ Қурилиш ва уй-жой коммунал хўжалиги вазирлигининг ҳудудий бўлинмалари томонидан жисмоний ва юридик шахсларга шаҳарсозлик фаолиятини амалга ошириш учун рухсат этиш хусусиятига эга ҳужжатлар берилиши маълумот учун қабул қилинсин.
2. Қуйидагилар:
Шаҳарсозлик соҳасидаги низоларни судга қадар кўриб чиқиш тартиби тўғрисидаги низом 1-иловага ;
Шаҳарсозлик соҳасида низоларни судга қадар кўриб чиқиш ва ҳал этиш бўйича идоралараро комиссия таркиби 2-иловага мувофиқ тасдиқлансин.
3. Қурилиш ва уй-жой коммунал хўжалиги вазирлиги икки ой муддатда:
«Шаффоф қурилиш» миллий ахборот тизимида Шаҳарсозлик соҳасида низоларни судга қадар ҳал қилиш натижалари бўйича реестрни ишга туширсин;
манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни ушбу қарорга мувофиқлаштирсин;
Ўзбекистон Миллий ахборот агентлиги ва Миллий телерадиокомпания билан биргаликда мазкур қарорнинг мазмун ва моҳияти оммавий ахборот воситаларида кенг ёритилишини таъминласин.
4. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.Ж. Раматов зиммасига юклансин.
Вазирлар Маҳкамасининг 2024 йил 12 августдаги 496-сон қарорига 1-ИЛОВА
Шаҳарсозлик соҳасидаги низоларни судга қадар кўриб чиқиш тартиби тўғрисидаги
1-боб. Умумий қоидалар
1. Мазкур Низом шаҳарсозлик соҳасидаги низоларни судга қадар кўриб чиқиш тартибини белгилайди.
2. Ушбу Низомда қуйидаги асосий тушунчалардан фойдаланилади:
ваколатли орган — мурожаатда кўрсатилган шаҳарсозлик соҳасида рухсат этиш хусусиятига эга ҳужжатни қабул қилган ёки қабул қилишни рад этган ташкилот ёки бўлинма;
манфаатдор шахс — шаҳарсозлик соҳасида рухсат берилган ёки рад этилган ёхуд дахлдор бўлган шахс, шунингдек, ҳуқуқлари ва қонуний манфаатлари ушбу ҳужжатга ёки ҳаракатга дахлдор бўлиши мумкин бўлган жисмоний ёки юридик шахс;
рухсат этиш хусусиятига эга ҳужжат — шаҳарсозлик фаолияти соҳасида ваколатли орган томонидан рухсатнома, келишув, хулоса шаклида, шунингдек, қонунчиликда назарда тутилган бошқа шаклларда бериладиган, рухсат бериш талаблари ва шартларига мажбурий равишда риоя этилган тақдирда муайян фаолиятни (ҳаракатларни) амалга ошириш ҳуқуқини берадиган ҳужжат;
Шаҳарсозлик соҳасида низоларни судга қадар кўриб чиқиш ва ҳал этиш бўйича идоралараро комиссия (кейинги ўринларда — комиссия) — шаҳарсозлик соҳасида юзага келадиган низоларни судга қадар кўриб чиқувчи ва ҳал этувчи идоралараро орган.
шаҳарсозлик соҳасидаги низолар — Ўзбекистон Республикасининг «Лицензиялаш, рухсат бериш ва хабардор қилиш тартиб-таомиллари тўғрисида»ги Қонун ҳамда Шаҳарсозлик кодексига мувофиқ ваколатли органнинг маъмурий-ҳуқуқий фаолиятига нисбатан судга қадар кўриб чиқиладиган келишмовчиликлар.
3. Шаҳарсозлик соҳасидаги низолар қуйидаги шаҳарсозлик фаолиятини амалга ошириш учун бериладиган рухсат этиш хусусиятига эга ҳужжатлар бўйича кўриб чиқилади:
бино ва иншоотнинг ташқи кўринишини ўзгартиришни келишиш бўйича хулоса;
бино ва иншоотларнинг ихтисослашишини ўзгартириш, қайта қуриш, реконструкция қилиш ҳамда ўз ҳудудида қўшимча бино ва иншоотларни қуришни лойиҳалаштиришга рухсатномаси;
архитектура-режалаштириш топшириғи;
ҳудудий архитектура-шаҳарсозлик кенгаши қарори;
ҳудудий бошқармалар ҳузуридаги архитектура-шаҳарсозлик кенгаши ишчи органи хулосаси;
шаҳарсозлик ҳужжатларининг йиғма экспертиза хулосаси;
қурилиш-монтаж ишларини бошлаш учун объектни рўйхатдан ўтказиш бўйича ҳудудий инспекциянинг рухсатномаси (инвойс ёки QR-код қўйилган кўчирма);
қурилиш-монтаж ишлари тугалланган объектдан фойдаланиш учун рухсатнома.
4. Манфаатдор шахс ваколатли органнинг рухсат этиш хусусиятига эга ҳужжати ёки бундай ҳужжатни беришни рад этиш ҳақидаги қарори, шунингдек, ҳаракатлари (ҳаракатсизлиги) бўйича комиссияга мурожаат қилиши мумкин.
Жисмоний ва юридик шахсларнинг шаҳарсозлик соҳасидаги қонуний манфаатларини кўзлаб ваколатли давлат органлари ёки аниқланган қонун бузилиши ҳолатлари юзасидан ҳуқуқни муҳофаза қилувчи органлар ҳам комиссияга мурожаат қилиши мумкин.
5. Манфаатдор шахслар томонидан комиссияга мурожаат қилиш ихтиёрий бўлиб, бу уларнинг бевосита судга мурожаат қилиш ҳуқуқини чекламайди.
Манфаатдор шахс комиссия қарорларидан норози бўлган тақдирда, мазкур низолар суд тартибида кўриб чиқилади.
Бунда судларда кўриб чиқилган ёки кўриб чиқилаётган низолар комиссия томонидан кўриб чиқилмайди.
2-боб. Комиссияни шакллантириш тартиби ва унинг вазифалари
6. Шаҳарсозлик соҳасидаги низолар комиссия томонидан кўриб чиқилади.
Комиссия таркиби қурилиш ва уй-жой коммунал хўжалиги вазирининг буйруғи билан тасдиқланади.
Бунда қурилиш ва уй-жой коммунал хўжалиги вазири ҳамда унинг тегишли ўринбосари, вазирликнинг давлат-архитектура назорати бўлими бошлиғи, архитектура ва шаҳарсозликни ривожлантириш бошқармаси бошлиғи, Қурилиш ва уй-жой коммунал хўжалиги соҳасида назорат қилиш инспекцияси бошлиғи, Урбанизация ва шаҳарсозлик ҳужжатларини ишлаб чиқиш Республика маркази директори, Шаҳарсозлик ҳужжатларини экспертиза қилиш Республика маркази давлат муассасаси раҳбари, Техник меъёрлаш ва стандартлаштириш илмий-тадқиқот институти директори, «ЎзшаҳарсозликЛИТИ», «ТошкентбошпланЛИТИ» ҳамда «Қишлоқ қурилиш лойиҳа» бош лойиҳа институтлари бош директорлари комиссиянинг доимий аъзоси ҳисобланади.
Комиссиянинг бошқа аъзолари комиссияга келиб тушган мурожаатнинг тегишлигига кўра комиссия фаолиятига жалб қилинади.
Комиссия йиғилишида масалага алоқадор комиссия аъзоларининг учдан икки қисми иштирок этган тақдирда, ваколатли (кворум) ҳисобланади.
Йиғилишни ўтказиш учун кворум шаклланмаган тақдирда, комиссиянинг янги мажлиси ўтказиладиган жой, сана ва вақт ҳақида белгиланган тартибда хабарнома юборилади.
7. Рухсат этиш хусусиятига эга ҳужжатни қабул қилган ёки қабул қилишни рад этган мансабдор шахс комиссия аъзоси бўлиши мумкин эмас.
8. Комиссия раиси ишда бўлмаган вақтда, комиссия мажлисини унинг ўринбосарларидан бири олиб боради.
9. Комиссия раиси:
комиссия фаолияти ва унинг иш тартибига риоя этилишини ташкил этади;
манфаатдор шахслардан келиб тушган мурожаатларни кўриб чиқиш жойи, куни ва вақтини белгилайди;
комиссия мажлисларини ўтказади ва уларда раислик қилади.
Комиссия раиси комиссия томонидан ишнинг ўз вақтида, тўғри, шаффоф ва виждонан бажарилишини ташкил этиш учун масъул ҳисобланади.
10. Қуйидагилар комиссиянинг асосий вазифалари ҳисобланади:
манфаатдор шахсларнинг шаҳарсозлик соҳасидаги мурожаатларини ушбу Низом ва қонунчилик ҳужжатлари талабларига мувофиқ кўриб чиқиш;
шаҳарсозлик соҳасида юзага келадиган низоларни судгача ҳал қилиш чораларини кўриш.
11. Комиссия ўзига юкланган вазифаларни амалга ошириш ва мурожаатларни кўриб чиқишда, зарур ҳолларда, тегишли ташкилотларнинг вакилларини жалб қилиши мумкин.
12. Комиссия мурожаатларни кўриб чиқишда тенг ҳуқуқлилик, холислик, қонунийлик, коллегиаллик ва ҳуқуқни қўллаш амалиётининг бир хиллигини таъминлаш ҳамда мурожаат этувчиларнинг ҳуқуқлари ва қонуний манфаатларига риоя қилиш принципларига асосланади.
13. Комиссия ўз фаолиятини мазкур Низом ҳамда бошқа тегишли қонунчилик ҳужжатларига мувофиқ амалга оширади.
3-боб. Комиссияга мурожаат қилиш шакли ва тартиби
14. Шаҳарсозлик соҳасида низоларни судга қадар кўриб чиқиш ва ҳал этиш бўйича идоралараро комиссияга ушбу Низомга иловадаги схемага мувофиқ мурожаат қилинади ва мурожаатлар кўриб чиқилади.
Манфаатдор шахс комиссияга оғзаки, ёзма ёхуд электрон шаклда вазирликнинг электрон почта ёки расмий веб-сайти орқали мурожаат қилиши мумкин ва унда қуйидагилар кўрсатилган бўлиши керак:
рухсат этиш хусусиятига эга ҳужжатни қабул қилган ёки уни қабул қилишни рад этган ёхуд ҳаракат (ҳаракатсизлик)ни амалга оширган ваколатли органнинг номи;
мурожаат этган жисмоний шахснинг (вакилининг) фамилияси, исми, отасининг исми ва яшаш жойи, юридик шахс учун эса унинг номи ва жойлашган жойи (почта манзили);
мурожаат этган шахснинг талаблари;
илова қилинаётган ҳужжатларнинг рўйхати (мавжуд бўлган тақдирда);
мурожаат этилган сана.
15. Мурожаат ёзма шаклда берилганда, мурожаат қилувчи ёки унинг вакили томонидан имзоланади. Агар мурожаат вакил томонидан берилган бўлса, унга ишончноманинг ёки вакил ваколатларини тасдиқловчи бошқа ҳужжатнинг кўчирма нусхаси илова қилиниши керак.
16. Жисмоний шахс оғзаки мурожаат қилаётганда (шахсий қабул орқали) ўз шахсини тасдиқловчи ҳужжатни, юридик шахснинг вакили эса ўз ваколатларини ва шахсини тасдиқловчи ҳужжатни тақдим этиши керак.
Электрон шаклда бериладиган мурожаатларда мурожаат қилувчининг электрон манзили ва ягона идентификатори (ЖШШИР, юридик шахс эса — СТИР) ҳамда бошқа реквизитлар (ўзи истаган ҳамда мурожаат билан боғлиқ маълумотлар) кўрсатилиши керак.
Оғзаки мурожаатлар комиссия котиби томонидан қабул қилинади ва мурожаатларни қайд этиш реестрига киритилади.
17. Манфаатдор шахс мурожаатга у билан боғлиқ бўлган бошқа маълумотлар ва ҳужжатларни ҳам илова қилиши мумкин.
18. Агар қонунда бошқача қоида назарда тутилмаган бўлса, мурожаат рухсат этиш хусусиятига эга ҳужжат ёки уни рад этиш ҳақидаги қарор қабул қилинган пайтдан ёки ваколатли органнинг ҳаракатлари (ҳаракатсизлиги) маълум бўлган пайтдан эътиборан 30 кундан кечиктирмай берилиши мумкин.
4-боб. Мурожаатни кўриб чиқиш тартиби
19. Комиссия котиби манфаатдор шахснинг мурожаатини у келиб тушган кунда, иш вақти тугаганидан кейин келиб тушган тақдирда эса, кейинги иш кунида рўйхатдан ўтказади.
Комиссия котиби келиб тушган мурожаатнинг ушбу Низомнинг 14-банди талабларига мувофиқлигини текширади ва уни комиссия мажлисида кўриб чиқишга тайёрлайди ёки мурожаат ушбу Низомнинг 14-банди талабларига номувофиқлиги аниқланганда, камчиликларни бартараф этиш учун бир иш куни мобайнида манфаатдор шахсга қайтаради.
20. Мурожаат келиб тушган кундан бошлаб ўн беш иш кунида комиссия томонидан кўриб чиқилади.
Бунда мурожаатда кўтарилган масалалар уларни бевосита жойида ўрганиш, бошқа тегишли ҳужжатлар ва материалларни олиш ҳамда бошқа тегишли ташкилотнинг вакилларини жалб қилишни талаб этган тақдирда, уни кўриб чиқиш муддати қўшимча ўн беш иш кунига узайтирилиши мумкин.
21. Комиссия котиби комиссия аъзоларини ва манфаатдор шахсни ёки унинг қонуний вакилини комиссия мажлиси ўтказиладиган кундан камида уч кун олдин мажлис ўтказиладиган жой, сана ва вақт ҳақида хабардор қилади.
22. Манфаатдор шахс ёки унинг қонуний вакили комиссия томонидан мурожаат кўриб чиқилишида иштирок этиш ҳуқуқига эга.
Бунда комиссия манфаатдор шахс ёки унинг қонуний вакилининг талабига кўра муҳокамани видеоконференцалоқа воситаларидан фойдаланган ҳолда ўтказиши мумкин.
Видеоконференцалоқа режимида мурожаатни кўриб чиқиш учун техник ва бошқа шароитлар ваколатли органнинг марказий аппарати ёки тегишли ҳудудий бўлинмаси томонидан таъминланади.
Мурожаатни кўриб чиқиш вақтида низо билан боғлиқ бўлган ваколатли орган ёки унинг вакили комиссия раисининг талабига кўра мажлисда иштирок этиши шарт.
23. Мурожаатни кўриб чиқиш якуни бўйича баён тузилиб, комиссия аъзолари томонидан имзоланади ва уни раислик қилувчи тасдиқлайди.
24. Мурожаат этган шахс мурожаатни комиссия томонидан қарор қабул қилингунига қадар чақириб олишга ҳақли. Мурожаатни чақириб олиш ёзма (мурожаатни йиғилишда кўриб чиқиш жараёнида) ёки электрон шаклда (вазирликнинг электрон почта ёки расмий веб-сайти орқали) амалга оширилиши мумкин.
25. Комиссия мурожаат бўйича қуйидаги қарорлардан бирини қабул қилишга ҳақли:
рухсат этиш хусусиятига эга ҳужжатни бериш ёки беришни рад этиш ҳақидаги қарорни ўзгаришсиз қолдириш;
рухсат этиш хусусиятига эга ҳужжатга ёки рухсат этиш хусусиятига эга ҳужжатни беришни рад этиш ҳақидаги қарорга ўзгартиришлар киритиш;
рухсат этиш хусусиятига эга ҳужжатни бериш ёки беришни рад этиш ҳақидаги қарорни бекор қилиш ва зарур бўлган тақдирда, янги қарор қабул қилиш;
ваколатли органга ёки унинг мансабдор шахси зиммасига берилган мурожаат моҳияти бўйича муайян ҳаракатларни амалга ошириш ёхуд ҳаракатни амалга оширмаслик бўйича мажбурият юклаш.
26. Мурожаат комиссия томонидан кўрилаётганда, юзага келадиган масалалар унинг аъзолари томонидан бир овоздан ҳал қилинади. Ҳеч бир аъзо овоз беришда бетараф қолишга ҳақли эмас.
Овозлар тенг бўлиб қолган тақдирда, комиссия раисининг овози ҳал қилувчи ҳисобланади.
27. Ваколатли органнинг қарори юзасидан мурожаат қилинган тақдирда, мурожаат рўйхатдан ўтказилган пайтдан эътиборан қарорнинг амал қилиши ва ижро этилиши тўхтатиб турилади.
Бу ҳақида комиссия томонидан ваколатли органга ва манфаатдор шахсларга хабар берилади.
28. Комиссия томонидан қонун бузилиши ҳолатлари аниқланган тақдирда, бу ҳақида хулоса тузилиб, тегишли юқори турувчи органга ва ҳуқуқни муҳофаза қилувчи органларга хабар берилади.
29. Комиссия котиби икки иш кунида комиссия қарорини ариза берувчига юборади ҳамда қарорни «Шаффоф қурилиш» миллий ахборот тизимидаги Шаҳарсозлик соҳасида низоларни судга қадар ҳал қилиш реестрига киритади.
5-боб. Якунловчи қоидалар
30. Шаҳарсозлик соҳасидаги рухсат этиш хусусиятига оид ҳужжатлар билан боғлиқ мурожаатлар судга қадар кўриб чиқиш ушбу Низом ҳамда бошқа қонунчилик ҳужжатларида белгиланган тартибда амалга оширилади.
31. Мазкур Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.
32. Шаҳарсозлик соҳасидаги рухсат берилган ҳужжатлар туфайли жисмоний ва юридик шахсларга етказилган зарар белгиланган тартибда қопланади.
Шаҳарсозлик соҳасидаги низоларни судга қадар кўриб чиқиш тартиби тўғрисидаги низомга ИЛОВА
Шаҳарсозлик соҳасида низоларни судга қадар кўриб чиқиш ва ҳал этиш бўйича идоралараро комиссияга мурожаат қилиш ва мурожаатларни кўриб чиқиш
Босқичлар Субъектлар Тадбирлар Муддатлар 1-босқич Ариза берувчи (жисмоний ёки юридик шахс) Ариза берувчи комиссияга оғзаки, ёзма ёхуд электрон шаклда вазирликнинг электрон почта ёки расмий веб-сайти орқали ваколатли органнинг рухсат этиш хусусиятига эга ҳужжатни бериш ёки беришни рад этиш ҳақидаги қарори, шунингдек, ҳаракатлари (ҳаракатсизлиги) бўйича комиссияга мурожаат қилади. хоҳишига кўра 2-босқич Комиссия котиби Келиб тушган мурожаатнинг белгиланган талабларга мувофиқлигини текширади ва уни комиссия мажлисида кўриб чиқишга тайёрлайди ёки мурожаат номувофиқлиги аниқланганда, камчиликларни бартараф этиш учун манфаатдор шахсга қайтаради. 1 иш куни 3-босқич Комиссия 1. Ариза берувчининг мурожаатини кўриб чиқади. 2. Ариза берувчи, манфаатдор шахслар ҳамда ваколатли орган мансабдор шахслари иштирокида комиссия мажлисида муҳокама қилади. 3. Мурожаатни кўриб чиқиш натижалари бўйича тегишли қарор қабул қилади. ариза келиб тушган кундан бошлаб 15 иш кунида (мурожаатда кўтарилган масалалар уларни бевосита жойида ўрганиш, бошқа тегишли ҳужжатлар ва материалларни олишни талаб этса, қўшимча 15 иш кунида) 4-босқич Комиссия котиби Комиссия қарори ва жавоб хатини ариза берувчига юборади. Комиссия қарорини «Шаффоф қурилиш» миллий ахборот тизимидаги Шаҳарсозлик соҳасида низоларни судга қадар ҳал қилиш реестрига киритади. 2 иш куни 5-босқич Манфаатдор шахс Комиссия қароридан норози бўлган ҳолатларда судга мурожаат қилади. Белгиланган муддатларда
Вазирлар Маҳкамасининг 2024 йил 12 августдаги 496-сон қарорига 2-ИЛОВА
Шаҳарсозлик соҳасида низоларни судга қадар кўриб чиқиш ва ҳал этиш бўйича идоралараро комиссия
Ш. Хидоятов — қурилиш ва уй-жой коммунал хўжалиги вазири в.б, Комиссия раиси Д. Адилов — қурилиш ва уй-жой коммунал вазирининг ўринбосари, Комиссия раисининг ўринбосари Н. Режабоев — Қурилиш ва уй-жой коммунал вазирлигининг Давлат архитектура назорати бошқармаси бошлиғи, Комиссия раисининг ўринбосари лавозими бўйича — Қурилиш ва уй-жой коммунал хўжалиги соҳасида назорат қилиш инспекцияси бошлиғи Лавозими бўйича * — Иқтисодиёт ва молия вазирлиги ҳузуридаги Кадастр агентлиги масъул ходими Лавозими бўйича * — Фавқулодда вазиятлар вазирлиги масъул ходими Лавозими бўйича * — Санитария-эпидемиологик осойишталик ва жамоат саломатлиги қўмитаси масъул ходими Лавозими бўйича * — Автомобиль йўллари қўмитаси масъул ходими Лавозими бўйича * — Экология, атроф-муҳитни муҳофаза қилиш ва иқлим ўзгариши вазирлиги масъул ходими Лавозими бўйича * — Энергетика вазирлиги масъул ходими Лавозими бўйича * — Адлия вазирлиги масъул ходими Лавозими бўйича * — Маданий мерос агентлиги масъул ходими Лавозими бўйича — Урбанизация ва шаҳарсозлик ҳужжатларини ишлаб чиқиш Республика маркази директори М. Иноятов — Шаҳарсозлик ҳужжатлари экспертизаси Республика маркази давлат муассасаси раҳбари Ш. Содиқов — Техник меъёрлаш ва стандартлаштириш илмий-тадқиқот институти директори Б. Элмуродов — «ЎзшаҳарсозликЛИТИ» бош лойиҳа институти бош директори Р. Шарипов — «ТошкентбошпланЛИТИ» бош лойиҳа институти бош директори И. Ахмедов — «Қишлоқ қурилиш лойиҳа» бош лойиҳа институти бош директори А. Усманов — Қурилиш ва уй-жой коммунал хўжалиги вазирлигининг архитектура ва шаҳарсозликни ривожлантириш бошқармаси бошлиғи, Комиссия котиби
Ўзбекистон Республикасининг Бош вазири А. АРИПОВ
Тошкент ш.,
2024 йил 12 август,
496-сон
Oʻzbekiston Respublikasi Vazirlar Mahkamasining
qarori
NIZOM
SXEMASI
TARKIBI
Shaharsozlik sohasidagi nizolarni sudga qadar koʻrib chiqish tartibi toʻgʻrisidagi nizomni tasdiqlash haqida
Oʻzbekiston Respublikasi Prezidentining “Maʼmuriy islohotlar doirasida qurilish va uy-joy kommunal xoʻjaligi sohasida davlat boshqaruvini samarali tashkil qilish chora-tadbirlari toʻgʻrisida” 2023-yil 28-avgustdagi PF-151-son Farmoni ijrosini taʼminlash, shuningdek, shaharsozlik sohasida yuzaga keladigan nizolarni sudga qadar hal qilish tartibini joriy qilish maqsadida Vazirlar Mahkamasi qaror qiladi:
1. Quyidagilar:
Shaharsozlik kodeksiga muvofiq Qurilish va uy-joy kommunal xoʻjaligi vazirligi oʻz vakolatlari doirasidagi masalalar yuzasidan shaharsozlik faoliyati subyektlari oʻrtasidagi kelishmovchiliklarni koʻrib chiqishi belgilanganligi;
“Litsenziyalash, ruxsat berish va xabardor qilish tartib-taomillari toʻgʻrisida”gi Qonun va Shaharsozlik kodeksiga muvofiq Qurilish va uy-joy kommunal xoʻjaligi vazirligining hududiy boʻlinmalari tomonidan jismoniy va yuridik shaxslarga shaharsozlik faoliyatini amalga oshirish uchun ruxsat etish xususiyatiga ega hujjatlar berilishi maʼlumot uchun qabul qilinsin.
2. Quyidagilar:
Shaharsozlik sohasidagi nizolarni sudga qadar koʻrib chiqish tartibi toʻgʻrisidagi nizom 1-ilovaga ;
Shaharsozlik sohasida nizolarni sudga qadar koʻrib chiqish va hal etish boʻyicha idoralararo komissiya tarkibi 2-ilovaga muvofiq tasdiqlansin.
3. Qurilish va uy-joy kommunal xoʻjaligi vazirligi ikki oy muddatda:
“Shaffof qurilish” milliy axborot tizimida Shaharsozlik sohasida nizolarni sudga qadar hal qilish natijalari boʻyicha reyestrni ishga tushirsin;
manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ushbu qarorga muvofiqlashtirsin;
Oʻzbekiston Milliy axborot agentligi va Milliy teleradiokompaniya bilan birgalikda mazkur qarorning mazmun va mohiyati ommaviy axborot vositalarida keng yoritilishini taʼminlasin.
4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov zimmasiga yuklansin.
Vazirlar Mahkamasining 2024-yil 12-avgustdagi 496-son qaroriga 1-ILOVA
Shaharsozlik sohasidagi nizolarni sudga qadar koʻrib chiqish tartibi toʻgʻrisidagi
1-bob. Umumiy qoidalar
1. Mazkur Nizom shaharsozlik sohasidagi nizolarni sudga qadar koʻrib chiqish tartibini belgilaydi.
2. Ushbu Nizomda quyidagi asosiy tushunchalardan foydalaniladi:
vakolatli organ — murojaatda koʻrsatilgan shaharsozlik sohasida ruxsat etish xususiyatiga ega hujjatni qabul qilgan yoki qabul qilishni rad etgan tashkilot yoki boʻlinma;
manfaatdor shaxs — shaharsozlik sohasida ruxsat berilgan yoki rad etilgan yoxud daxldor boʻlgan shaxs, shuningdek, huquqlari va qonuniy manfaatlari ushbu hujjatga yoki harakatga daxldor boʻlishi mumkin boʻlgan jismoniy yoki yuridik shaxs;
ruxsat etish xususiyatiga ega hujjat — shaharsozlik faoliyati sohasida vakolatli organ tomonidan ruxsatnoma, kelishuv, xulosa shaklida, shuningdek, qonunchilikda nazarda tutilgan boshqa shakllarda beriladigan, ruxsat berish talablari va shartlariga majburiy ravishda rioya etilgan taqdirda muayyan faoliyatni (harakatlarni) amalga oshirish huquqini beradigan hujjat;
Shaharsozlik sohasida nizolarni sudga qadar koʻrib chiqish va hal etish boʻyicha idoralararo komissiya (keyingi oʻrinlarda — komissiya) — shaharsozlik sohasida yuzaga keladigan nizolarni sudga qadar koʻrib chiquvchi va hal etuvchi idoralararo organ.
shaharsozlik sohasidagi nizolar — Oʻzbekiston Respublikasining “Litsenziyalash, ruxsat berish va xabardor qilish tartib-taomillari toʻgʻrisida”gi Qonun hamda Shaharsozlik kodeksiga muvofiq vakolatli organning maʼmuriy-huquqiy faoliyatiga nisbatan sudga qadar koʻrib chiqiladigan kelishmovchiliklar.
3. Shaharsozlik sohasidagi nizolar quyidagi shaharsozlik faoliyatini amalga oshirish uchun beriladigan ruxsat etish xususiyatiga ega hujjatlar boʻyicha koʻrib chiqiladi:
bino va inshootning tashqi koʻrinishini oʻzgartirishni kelishish boʻyicha xulosa;
bino va inshootlarning ixtisoslashishini oʻzgartirish, qayta qurish, rekonstruksiya qilish hamda oʻz hududida qoʻshimcha bino va inshootlarni qurishni loyihalashtirishga ruxsatnomasi;
arxitektura-rejalashtirish topshirigʻi;
hududiy arxitektura-shaharsozlik kengashi qarori;
hududiy boshqarmalar huzuridagi arxitektura-shaharsozlik kengashi ishchi organi xulosasi;
shaharsozlik hujjatlarining yigʻma ekspertiza xulosasi;
qurilish-montaj ishlarini boshlash uchun obyektni roʻyxatdan oʻtkazish boʻyicha hududiy inspeksiyaning ruxsatnomasi (invoys yoki QR-kod qoʻyilgan koʻchirma);
qurilish-montaj ishlari tugallangan obyektdan foydalanish uchun ruxsatnoma.
4. Manfaatdor shaxs vakolatli organning ruxsat etish xususiyatiga ega hujjati yoki bunday hujjatni berishni rad etish haqidagi qarori, shuningdek, harakatlari (harakatsizligi) boʻyicha komissiyaga murojaat qilishi mumkin.
Jismoniy va yuridik shaxslarning shaharsozlik sohasidagi qonuniy manfaatlarini koʻzlab vakolatli davlat organlari yoki aniqlangan qonun buzilishi holatlari yuzasidan huquqni muhofaza qiluvchi organlar ham komissiyaga murojaat qilishi mumkin.
5. Manfaatdor shaxslar tomonidan komissiyaga murojaat qilish ixtiyoriy boʻlib, bu ularning bevosita sudga murojaat qilish huquqini cheklamaydi.
Manfaatdor shaxs komissiya qarorlaridan norozi boʻlgan taqdirda, mazkur nizolar sud tartibida koʻrib chiqiladi.
Bunda sudlarda koʻrib chiqilgan yoki koʻrib chiqilayotgan nizolar komissiya tomonidan koʻrib chiqilmaydi.
2-bob. Komissiyani shakllantirish tartibi va uning vazifalari
6. Shaharsozlik sohasidagi nizolar komissiya tomonidan koʻrib chiqiladi.
Komissiya tarkibi qurilish va uy-joy kommunal xoʻjaligi vazirining buyrugʻi bilan tasdiqlanadi.
Bunda qurilish va uy-joy kommunal xoʻjaligi vaziri hamda uning tegishli oʻrinbosari, vazirlikning davlat-arxitektura nazorati boʻlimi boshligʻi, arxitektura va shaharsozlikni rivojlantirish boshqarmasi boshligʻi, Qurilish va uy-joy kommunal xoʻjaligi sohasida nazorat qilish inspeksiyasi boshligʻi, Urbanizatsiya va shaharsozlik hujjatlarini ishlab chiqish Respublika markazi direktori, Shaharsozlik hujjatlarini ekspertiza qilish Respublika markazi davlat muassasasi rahbari, Texnik meʼyorlash va standartlashtirish ilmiy-tadqiqot instituti direktori, “OʻzshaharsozlikLITI”, “ToshkentboshplanLITI” hamda “Qishloq qurilish loyiha” bosh loyiha institutlari bosh direktorlari komissiyaning doimiy aʼzosi hisoblanadi.
Komissiyaning boshqa aʼzolari komissiyaga kelib tushgan murojaatning tegishligiga koʻra komissiya faoliyatiga jalb qilinadi.
Komissiya yigʻilishida masalaga aloqador komissiya aʼzolarining uchdan ikki qismi ishtirok etgan taqdirda, vakolatli (kvorum) hisoblanadi.
Yigʻilishni oʻtkazish uchun kvorum shakllanmagan taqdirda, komissiyaning yangi majlisi oʻtkaziladigan joy, sana va vaqt haqida belgilangan tartibda xabarnoma yuboriladi.
7. Ruxsat etish xususiyatiga ega hujjatni qabul qilgan yoki qabul qilishni rad etgan mansabdor shaxs komissiya aʼzosi boʻlishi mumkin emas.
8. Komissiya raisi ishda boʻlmagan vaqtda, komissiya majlisini uning oʻrinbosarlaridan biri olib boradi.
9. Komissiya raisi:
komissiya faoliyati va uning ish tartibiga rioya etilishini tashkil etadi;
manfaatdor shaxslardan kelib tushgan murojaatlarni koʻrib chiqish joyi, kuni va vaqtini belgilaydi;
komissiya majlislarini oʻtkazadi va ularda raislik qiladi.
Komissiya raisi komissiya tomonidan ishning oʻz vaqtida, toʻgʻri, shaffof va vijdonan bajarilishini tashkil etish uchun masʼul hisoblanadi.
10. Quyidagilar komissiyaning asosiy vazifalari hisoblanadi:
manfaatdor shaxslarning shaharsozlik sohasidagi murojaatlarini ushbu Nizom va qonunchilik hujjatlari talablariga muvofiq koʻrib chiqish;
shaharsozlik sohasida yuzaga keladigan nizolarni sudgacha hal qilish choralarini koʻrish.
11. Komissiya oʻziga yuklangan vazifalarni amalga oshirish va murojaatlarni koʻrib chiqishda, zarur hollarda, tegishli tashkilotlarning vakillarini jalb qilishi mumkin.
12. Komissiya murojaatlarni koʻrib chiqishda teng huquqlilik, xolislik, qonuniylik, kollegiallik va huquqni qoʻllash amaliyotining bir xilligini taʼminlash hamda murojaat etuvchilarning huquqlari va qonuniy manfaatlariga rioya qilish prinsiplariga asoslanadi.
13. Komissiya oʻz faoliyatini mazkur Nizom hamda boshqa tegishli qonunchilik hujjatlariga muvofiq amalga oshiradi.
3-bob. Komissiyaga murojaat qilish shakli va tartibi
14. Shaharsozlik sohasida nizolarni sudga qadar koʻrib chiqish va hal etish boʻyicha idoralararo komissiyaga ushbu Nizomga ilovadagi sxemaga muvofiq murojaat qilinadi va murojaatlar koʻrib chiqiladi.
Manfaatdor shaxs komissiyaga ogʻzaki, yozma yoxud elektron shaklda vazirlikning elektron pochta yoki rasmiy veb-sayti orqali murojaat qilishi mumkin va unda quyidagilar koʻrsatilgan boʻlishi kerak:
ruxsat etish xususiyatiga ega hujjatni qabul qilgan yoki uni qabul qilishni rad etgan yoxud harakat (harakatsizlik)ni amalga oshirgan vakolatli organning nomi;
murojaat etgan jismoniy shaxsning (vakilining) familiyasi, ismi, otasining ismi va yashash joyi, yuridik shaxs uchun esa uning nomi va joylashgan joyi (pochta manzili);
murojaat etgan shaxsning talablari;
ilova qilinayotgan hujjatlarning roʻyxati (mavjud boʻlgan taqdirda);
murojaat etilgan sana.
15. Murojaat yozma shaklda berilganda, murojaat qiluvchi yoki uning vakili tomonidan imzolanadi. Agar murojaat vakil tomonidan berilgan boʻlsa, unga ishonchnomaning yoki vakil vakolatlarini tasdiqlovchi boshqa hujjatning koʻchirma nusxasi ilova qilinishi kerak.
16. Jismoniy shaxs ogʻzaki murojaat qilayotganda (shaxsiy qabul orqali) oʻz shaxsini tasdiqlovchi hujjatni, yuridik shaxsning vakili esa oʻz vakolatlarini va shaxsini tasdiqlovchi hujjatni taqdim etishi kerak.
Elektron shaklda beriladigan murojaatlarda murojaat qiluvchining elektron manzili va yagona identifikatori (JSHSHIR, yuridik shaxs esa — STIR) hamda boshqa rekvizitlar (oʻzi istagan hamda murojaat bilan bogʻliq maʼlumotlar) koʻrsatilishi kerak.
Ogʻzaki murojaatlar komissiya kotibi tomonidan qabul qilinadi va murojaatlarni qayd etish reyestriga kiritiladi.
17. Manfaatdor shaxs murojaatga u bilan bogʻliq boʻlgan boshqa maʼlumotlar va hujjatlarni ham ilova qilishi mumkin.
18. Agar qonunda boshqacha qoida nazarda tutilmagan boʻlsa, murojaat ruxsat etish xususiyatiga ega hujjat yoki uni rad etish haqidagi qaror qabul qilingan paytdan yoki vakolatli organning harakatlari (harakatsizligi) maʼlum boʻlgan paytdan eʼtiboran 30 kundan kechiktirmay berilishi mumkin.
4-bob. Murojaatni koʻrib chiqish tartibi
19. Komissiya kotibi manfaatdor shaxsning murojaatini u kelib tushgan kunda, ish vaqti tugaganidan keyin kelib tushgan taqdirda esa, keyingi ish kunida roʻyxatdan oʻtkazadi.
Komissiya kotibi kelib tushgan murojaatning ushbu Nizomning 14-bandi talablariga muvofiqligini tekshiradi va uni komissiya majlisida koʻrib chiqishga tayyorlaydi yoki murojaat ushbu Nizomning 14-bandi talablariga nomuvofiqligi aniqlanganda, kamchiliklarni bartaraf etish uchun bir ish kuni mobaynida manfaatdor shaxsga qaytaradi.
20. Murojaat kelib tushgan kundan boshlab oʻn besh ish kunida komissiya tomonidan koʻrib chiqiladi.
Bunda murojaatda koʻtarilgan masalalar ularni bevosita joyida oʻrganish, boshqa tegishli hujjatlar va materiallarni olish hamda boshqa tegishli tashkilotning vakillarini jalb qilishni talab etgan taqdirda, uni koʻrib chiqish muddati qoʻshimcha oʻn besh ish kuniga uzaytirilishi mumkin.
21. Komissiya kotibi komissiya aʼzolarini va manfaatdor shaxsni yoki uning qonuniy vakilini komissiya majlisi oʻtkaziladigan kundan kamida uch kun oldin majlis oʻtkaziladigan joy, sana va vaqt haqida xabardor qiladi.
22. Manfaatdor shaxs yoki uning qonuniy vakili komissiya tomonidan murojaat koʻrib chiqilishida ishtirok etish huquqiga ega.
Bunda komissiya manfaatdor shaxs yoki uning qonuniy vakilining talabiga koʻra muhokamani videokonferensaloqa vositalaridan foydalangan holda oʻtkazishi mumkin.
Videokonferensaloqa rejimida murojaatni koʻrib chiqish uchun texnik va boshqa sharoitlar vakolatli organning markaziy apparati yoki tegishli hududiy boʻlinmasi tomonidan taʼminlanadi.
Murojaatni koʻrib chiqish vaqtida nizo bilan bogʻliq boʻlgan vakolatli organ yoki uning vakili komissiya raisining talabiga koʻra majlisda ishtirok etishi shart.
23. Murojaatni koʻrib chiqish yakuni boʻyicha bayon tuzilib, komissiya aʼzolari tomonidan imzolanadi va uni raislik qiluvchi tasdiqlaydi.
24. Murojaat etgan shaxs murojaatni komissiya tomonidan qaror qabul qilinguniga qadar chaqirib olishga haqli. Murojaatni chaqirib olish yozma (murojaatni yigʻilishda koʻrib chiqish jarayonida) yoki elektron shaklda (vazirlikning elektron pochta yoki rasmiy veb-sayti orqali) amalga oshirilishi mumkin.
25. Komissiya murojaat boʻyicha quyidagi qarorlardan birini qabul qilishga haqli:
ruxsat etish xususiyatiga ega hujjatni berish yoki berishni rad etish haqidagi qarorni oʻzgarishsiz qoldirish;
ruxsat etish xususiyatiga ega hujjatga yoki ruxsat etish xususiyatiga ega hujjatni berishni rad etish haqidagi qarorga oʻzgartirishlar kiritish;
ruxsat etish xususiyatiga ega hujjatni berish yoki berishni rad etish haqidagi qarorni bekor qilish va zarur boʻlgan taqdirda, yangi qaror qabul qilish;
vakolatli organga yoki uning mansabdor shaxsi zimmasiga berilgan murojaat mohiyati boʻyicha muayyan harakatlarni amalga oshirish yoxud harakatni amalga oshirmaslik boʻyicha majburiyat yuklash.
26. Murojaat komissiya tomonidan koʻrilayotganda, yuzaga keladigan masalalar uning aʼzolari tomonidan bir ovozdan hal qilinadi. Hech bir aʼzo ovoz berishda betaraf qolishga haqli emas.
Ovozlar teng boʻlib qolgan taqdirda, komissiya raisining ovozi hal qiluvchi hisoblanadi.
27. Vakolatli organning qarori yuzasidan murojaat qilingan taqdirda, murojaat roʻyxatdan oʻtkazilgan paytdan eʼtiboran qarorning amal qilishi va ijro etilishi toʻxtatib turiladi.
Bu haqida komissiya tomonidan vakolatli organga va manfaatdor shaxslarga xabar beriladi.
28. Komissiya tomonidan qonun buzilishi holatlari aniqlangan taqdirda, bu haqida xulosa tuzilib, tegishli yuqori turuvchi organga va huquqni muhofaza qiluvchi organlarga xabar beriladi.
29. Komissiya kotibi ikki ish kunida komissiya qarorini ariza beruvchiga yuboradi hamda qarorni “Shaffof qurilish” milliy axborot tizimidagi Shaharsozlik sohasida nizolarni sudga qadar hal qilish reyestriga kiritadi.
5-bob. Yakunlovchi qoidalar
30. Shaharsozlik sohasidagi ruxsat etish xususiyatiga oid hujjatlar bilan bogʻliq murojaatlar sudga qadar koʻrib chiqish ushbu Nizom hamda boshqa qonunchilik hujjatlarida belgilangan tartibda amalga oshiriladi.
31. Mazkur Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.
32. Shaharsozlik sohasidagi ruxsat berilgan hujjatlar tufayli jismoniy va yuridik shaxslarga yetkazilgan zarar belgilangan tartibda qoplanadi.
Shaharsozlik sohasidagi nizolarni sudga qadar koʻrib chiqish tartibi toʻgʻrisidagi nizomga ILOVA
Shaharsozlik sohasida nizolarni sudga qadar koʻrib chiqish va hal etish boʻyicha idoralararo komissiyaga murojaat qilish va murojaatlarni koʻrib chiqish
Bosqichlar Subyektlar Tadbirlar Muddatlar 1-bosqich Ariza beruvchi (jismoniy yoki yuridik shaxs) Ariza beruvchi komissiyaga ogʻzaki, yozma yoxud elektron shaklda vazirlikning elektron pochta yoki rasmiy veb-sayti orqali vakolatli organning ruxsat etish xususiyatiga ega hujjatni berish yoki berishni rad etish haqidagi qarori, shuningdek, harakatlari (harakatsizligi) boʻyicha komissiyaga murojaat qiladi. xohishiga koʻra 2-bosqich Komissiya kotibi Kelib tushgan murojaatning belgilangan talablarga muvofiqligini tekshiradi va uni komissiya majlisida koʻrib chiqishga tayyorlaydi yoki murojaat nomuvofiqligi aniqlanganda, kamchiliklarni bartaraf etish uchun manfaatdor shaxsga qaytaradi. 1 ish kuni 3-bosqich Komissiya 1. Ariza beruvchining murojaatini koʻrib chiqadi. 2. Ariza beruvchi, manfaatdor shaxslar hamda vakolatli organ mansabdor shaxslari ishtirokida komissiya majlisida muhokama qiladi. 3. Murojaatni koʻrib chiqish natijalari boʻyicha tegishli qaror qabul qiladi. ariza kelib tushgan kundan boshlab 15 ish kunida (murojaatda koʻtarilgan masalalar ularni bevosita joyida oʻrganish, boshqa tegishli hujjatlar va materiallarni olishni talab etsa, qoʻshimcha 15 ish kunida) 4-bosqich Komissiya kotibi Komissiya qarori va javob xatini ariza beruvchiga yuboradi. Komissiya qarorini “Shaffof qurilish” milliy axborot tizimidagi Shaharsozlik sohasida nizolarni sudga qadar hal qilish reyestriga kiritadi. 2 ish kuni 5-bosqich Manfaatdor shaxs Komissiya qaroridan norozi boʻlgan holatlarda sudga murojaat qiladi. Belgilangan muddatlarda
Vazirlar Mahkamasining 2024-yil 12-avgustdagi 496-son qaroriga 2-ILOVA
Shaharsozlik sohasida nizolarni sudga qadar koʻrib chiqish va hal etish boʻyicha idoralararo komissiya
Sh. Xidoyatov — qurilish va uy-joy kommunal xoʻjaligi vaziri v.b, Komissiya raisi D. Adilov — qurilish va uy-joy kommunal vazirining oʻrinbosari, Komissiya raisining oʻrinbosari N. Rejaboyev — Qurilish va uy-joy kommunal vazirligining Davlat arxitektura nazorati boshqarmasi boshligʻi, Komissiya raisining oʻrinbosari lavozimi boʻyicha — Qurilish va uy-joy kommunal xoʻjaligi sohasida nazorat qilish inspeksiyasi boshligʻi Lavozimi boʻyicha * — Iqtisodiyot va moliya vazirligi huzuridagi Kadastr agentligi masʼul xodimi Lavozimi boʻyicha * — Favqulodda vaziyatlar vazirligi masʼul xodimi Lavozimi boʻyicha * — Sanitariya-epidemiologik osoyishtalik va jamoat salomatligi qoʻmitasi masʼul xodimi Lavozimi boʻyicha * — Avtomobil yoʻllari qoʻmitasi masʼul xodimi Lavozimi boʻyicha * — Ekologiya, atrof-muhitni muhofaza qilish va iqlim oʻzgarishi vazirligi masʼul xodimi Lavozimi boʻyicha * — Energetika vazirligi masʼul xodimi Lavozimi boʻyicha * — Adliya vazirligi masʼul xodimi Lavozimi boʻyicha * — Madaniy meros agentligi masʼul xodimi Lavozimi boʻyicha — Urbanizatsiya va shaharsozlik hujjatlarini ishlab chiqish Respublika markazi direktori M. Inoyatov — Shaharsozlik hujjatlari ekspertizasi Respublika markazi davlat muassasasi rahbari Sh. Sodiqov — Texnik meʼyorlash va standartlashtirish ilmiy-tadqiqot instituti direktori B. Elmurodov — “OʻzshaharsozlikLITI” bosh loyiha instituti bosh direktori R. Sharipov — “ToshkentboshplanLITI” bosh loyiha instituti bosh direktori I. Axmedov — “Qishloq qurilish loyiha” bosh loyiha instituti bosh direktori A. Usmanov — Qurilish va uy-joy kommunal xoʻjaligi vazirligining arxitektura va shaharsozlikni rivojlantirish boshqarmasi boshligʻi, Komissiya kotibi
Oʻzbekiston Respublikasining Bosh vaziri A. ARIPOV
Toshkent sh.,
2024-yil 12-avgust,
496-son