📅 2024-yil 7-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 7 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 7 сентября 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 7 September 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Хоразм вилояти Урганч шаҳридаги ободонлаштириш муассасаларини мақбуллаштириш ва уларнинг фаолияти самарадорлигини ошириш чора-тадбирлари тўғрисида
Хоразм вилоятининг Урганч шаҳри ҳудудидаги ободонлаштириш ва кўкаламзорлаштириш майдонларини сақлаш ҳамда улардан фойдаланиш ишларини самарали ташкил этиш, бошқариш тизимини янада такомиллаштириш мақсадида Вазирлар Маҳкамаси қарор қилади:
1. Хоразм вилояти ҳокимлиги, Иқтисодиёт ва молия вазирлиги, Маданият вазирлиги ҳамда Давлат активларини бошқариш агентлигининг Урганч шаҳар ҳокимлиги ҳузуридаги «Шовот» маданият ва истироҳат боги» давлат унитар корхонасини Шовот канали ҳудудларини ободонлаштириш участкаси сифатида Хоразм вилояти ҳокимлигининг Урганч шаҳар ободонлаштириш бошқармасига (кейинги ўринларда — Урганч ободонлаштириш бошқармаси) қўшиб олиш орқали қайта ташкил этиш тўғрисидаги таклифига розилик берилсин.
2. Урганч ободонлаштириш бошқармаси Урганч шаҳар ҳокимлиги ҳузуридаги «Шовот» маданият ва истироҳат боги» давлат унитар корхонасининг барча ҳуқуқ ва мажбуриятлари бўйича ҳуқуқий ворис ҳисобланади.
3. Урганч шаҳар ҳокимлиги ҳузуридаги «Шовот» маданият ва истироҳат боги» давлат унитар корхонасининг қуйидаги вазифалари Урганч ободонлаштириш бошқармасига юклансин:
Шовот канали соҳилида жойлашган объектларни ҳамда ҳудудларнинг шаҳарсозлик ва санитария нормалари ҳамда қоидаларига мувофиқ сифатли сақланиши ва улардан оқилона фойдаланишини таъминлаш;
Шовот каналининг боғ ҳудудини кўкаламзорлаштириш, дов-дарахтларни сақлаш (парвариш қилиш)га доир агротехник тадбирларни амалга ошириш, уларнинг зараркунандалари ва касалликларига қарши курашиш;
электр энергиясини тежаш мақсадида замонавий асбоб-ускуналар ва технологияларни жорий этган ҳолда, бириктирилган ҳудуднинг ташқи ёритиш тармоқларини сақлаш, жорий таъмирлаш ҳамда улардан оқилона фойдаланиш ҳамда бошқа ишларни амалга ошириш;
мавсумий талабларни ҳисобга олган ҳолда, ободонлаштириш объектларини санитария жиҳатидан тозалаш.
4. Хоразм вилояти ҳокимлиги бир ой муддатда:
хатлов ўтказган ҳолда, «Шовот» маданият ва истироҳат боғи» давлат унитар корхонасининг мол-мулки, асосий воситалари, анжомлари ва транспорт воситаларини ҳамда дебиторлик ва кредиторлик қарздорликлари топшириш-қабул қилиш далолатномасига асосан Урганч ободонлаштириш бошқармасига ўтказилишини;
Урганч ободонлаштириш бошқармасининг ташкилий тузилмаси ва штатлар жадвалининг қайта шакллантирилишини;
«Шовот» маданият ва истироҳат боги» давлат унитар корхонасининг ишлаб келаётган ходимлари билан тузилган меҳнат шартномалари меҳнат қонунчилигига мувофиқ Урганч ободонлаштириш бошқармаси билан қайта расмийлаштирилишини таъминласин.
5. Белгилансинки, Шовот канали ҳудудларини ободонлаштириш участкаси бўлими ходимлари меҳнатига ҳақ тўлаш ва уларни моддий рағбатлантириш Вазирлар Маҳкамасининг «Ободонлаштириш ходимларини моддий рағбатлантиришни кучайтириш чора-тадбирлари тўғрисида» 2009 йил 1 апрелдаги 91-сон қарорига мувофиқ амалга оширилади.
6. Хоразм вилояти ҳокимлиги:
Иқтисодиёт ва молия вазирлиги билан биргаликда бир ой муддатда 2024 йил учун белгиланган тегишли штат жадваллари ҳамда харажатлар сметаларига ўзгартиришлар киритилишини таъминласин;
2025 йилдан бошлаб Хоразм вилояти маҳаллий бюджети параметрларини шакллантиришда Шовот канали ҳудудларини ободонлаштириш объектларини сақлаш, улардан фойдаланиш ва таъмирлаш учун зарур маблағлар ажратилишини назарда тутсин.
7. Вазирлар Маҳкамасининг «Урганч шаҳрида «Шовот» маданият ва истироҳат боғи» давлат унитар корхонасини ташкил этиш чора-тадбирлари тўғрисида» 2013 йил 20 сентябрдаги 260-сон қарори ўз кучини йўқотган деб ҳисоблансин.
8. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.Ж. Раматов ва Хоразм вилояти ҳокими Ж.Р. Рахимов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2024 йил 7 сентябрь,
552-сон
Oʻzbekiston Respublikasi Vazirlar Mahkamasining
qarori
Xorazm viloyati Urganch shahridagi obodonlashtirish muassasalarini maqbullashtirish va ularning faoliyati samaradorligini oshirish chora-tadbirlari toʻgʻrisida
Xorazm viloyatining Urganch shahri hududidagi obodonlashtirish va koʻkalamzorlashtirish maydonlarini saqlash hamda ulardan foydalanish ishlarini samarali tashkil etish, boshqarish tizimini yanada takomillashtirish maqsadida Vazirlar Mahkamasi qaror qiladi:
1. Xorazm viloyati hokimligi, Iqtisodiyot va moliya vazirligi, Madaniyat vazirligi hamda Davlat aktivlarini boshqarish agentligining Urganch shahar hokimligi huzuridagi “Shovot” madaniyat va istirohat bogi” davlat unitar korxonasini Shovot kanali hududlarini obodonlashtirish uchastkasi sifatida Xorazm viloyati hokimligining Urganch shahar obodonlashtirish boshqarmasiga (keyingi oʻrinlarda — Urganch obodonlashtirish boshqarmasi) qoʻshib olish orqali qayta tashkil etish toʻgʻrisidagi taklifiga rozilik berilsin.
2. Urganch obodonlashtirish boshqarmasi Urganch shahar hokimligi huzuridagi “Shovot” madaniyat va istirohat bogi” davlat unitar korxonasining barcha huquq va majburiyatlari boʻyicha huquqiy voris hisoblanadi.
3. Urganch shahar hokimligi huzuridagi “Shovot” madaniyat va istirohat bogi” davlat unitar korxonasining quyidagi vazifalari Urganch obodonlashtirish boshqarmasiga yuklansin:
Shovot kanali sohilida joylashgan obyektlarni hamda hududlarning shaharsozlik va sanitariya normalari hamda qoidalariga muvofiq sifatli saqlanishi va ulardan oqilona foydalanishini taʼminlash;
Shovot kanalining bogʻ hududini koʻkalamzorlashtirish, dov-daraxtlarni saqlash (parvarish qilish)ga doir agrotexnik tadbirlarni amalga oshirish, ularning zararkunandalari va kasalliklariga qarshi kurashish;
elektr energiyasini tejash maqsadida zamonaviy asbob-uskunalar va texnologiyalarni joriy etgan holda, biriktirilgan hududning tashqi yoritish tarmoqlarini saqlash, joriy taʼmirlash hamda ulardan oqilona foydalanish hamda boshqa ishlarni amalga oshirish;
mavsumiy talablarni hisobga olgan holda, obodonlashtirish obyektlarini sanitariya jihatidan tozalash.
4. Xorazm viloyati hokimligi bir oy muddatda:
xatlov oʻtkazgan holda, “Shovot” madaniyat va istirohat bogʻi” davlat unitar korxonasining mol-mulki, asosiy vositalari, anjomlari va transport vositalarini hamda debitorlik va kreditorlik qarzdorliklari topshirish-qabul qilish dalolatnomasiga asosan Urganch obodonlashtirish boshqarmasiga oʻtkazilishini;
Urganch obodonlashtirish boshqarmasining tashkiliy tuzilmasi va shtatlar jadvalining qayta shakllantirilishini;
“Shovot” madaniyat va istirohat bogi” davlat unitar korxonasining ishlab kelayotgan xodimlari bilan tuzilgan mehnat shartnomalari mehnat qonunchiligiga muvofiq Urganch obodonlashtirish boshqarmasi bilan qayta rasmiylashtirilishini taʼminlasin.
5. Belgilansinki, Shovot kanali hududlarini obodonlashtirish uchastkasi boʻlimi xodimlari mehnatiga haq toʻlash va ularni moddiy ragʻbatlantirish Vazirlar Mahkamasining “Obodonlashtirish xodimlarini moddiy ragʻbatlantirishni kuchaytirish chora-tadbirlari toʻgʻrisida” 2009-yil 1-apreldagi 91-son qaroriga muvofiq amalga oshiriladi.
6. Xorazm viloyati hokimligi:
Iqtisodiyot va moliya vazirligi bilan birgalikda bir oy muddatda 2024-yil uchun belgilangan tegishli shtat jadvallari hamda xarajatlar smetalariga oʻzgartirishlar kiritilishini taʼminlasin;
2025-yildan boshlab Xorazm viloyati mahalliy budjeti parametrlarini shakllantirishda Shovot kanali hududlarini obodonlashtirish obyektlarini saqlash, ulardan foydalanish va taʼmirlash uchun zarur mablagʻlar ajratilishini nazarda tutsin.
7. Vazirlar Mahkamasining “Urganch shahrida “Shovot” madaniyat va istirohat bogʻi” davlat unitar korxonasini tashkil etish chora-tadbirlari toʻgʻrisida” 2013-yil 20-sentabrdagi 260-son qarori oʻz kuchini yoʻqotgan deb hisoblansin.
8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov va Xorazm viloyati hokimi J.R. Raximov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 7-sentabr,
552-son