UzbekAI

Ўзбекистон Республикаси Вазирлар Маҳкамасининг

қарори

Тошкент вилояти ҳокимлиги ҳузуридаги Ободонлаштириш бош бошқармасини тугатиш чоралари тўғрисида

Ободонлаштириш соҳасида бошқарув фаолиятини самарали йўлга қўйиш ва мақбуллаштириш, ортиқча ва бир-бирини такрорловчи функцияларни тугатиш мақсадида Вазирлар Маҳкамаси қарор қилади:

1. Иқтисодиёт ва молия вазирлиги ҳамда Тошкент вилояти ҳокимлигининг Тошкент вилояти ҳокимлиги ҳузуридаги Ободонлаштириш бош бошқармасини (кейинги ўринларда — Бош бошқарма) тугатиш тўғрисидаги таклифига розилик берилсин.

2. Давлат активларини бошқариш агентлиги ва Тошкент вилояти ҳокимлиги бир ой муддатда Бош бошқармага тегишли бино ва иншоотлар, автотранспорт воситалари ҳамда товар-моддий активларни тўлиқ хатловдан ўтказиб, Тошкент вилояти ҳокимлигига оператив бошқарув ҳуқуқи асосида ўтказилишини таъминласин.

3. Камбағалликни қисқартириш ва бандлик вазирлиги ҳамда Тошкент вилояти ҳокимлиги Бош бошқарманинг тугатилиши натижасида ишдан бўшатиладиган ходимларни иш билан таъминлаш ва ижтимоий муҳофаза қилиш чораларини кўрсин.

4. Тошкент вилояти ҳокимлиги, Иқтисодиёт ва молия вазирлиги билан биргаликда Ободонлаштириш бош бошқармасини тугатилиши муносабати билан мақбуллаштирилаётган штат бирликлари ҳисобидан 20 та штат бирликлари ва иш ҳақи харажатлари учун талаб этиладиган маблағларни Чирчиқ шаҳар ободонлаштириш бошқармасига ўтказилишини таъминласин.

5. Вазирлар Маҳкамасининг «Тошкент вилоятида ободонлаштириш ишларини янада такомиллаштириш чора-тадбирлари тўғрисида» 2019 йил 21 ноябрдаги 931-сон қарори ўз кучини йўқотган деб ҳисоблансин.

6. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари А.Ж. Раматов ва Тошкент вилояти ҳокими З.Т. Мирзаев зиммасига юклансин.

Ўзбекистон Республикасининг Бош вазири А. АРИПОВ

Тошкент ш.,

2024 йил 9 сентябрь,

556-сон

(Қонунчилик маълумотлари миллий базаси, 10.09.2024 й., 09/24/556/0697-сон)

lex.uz

Oʻzbekiston Respublikasi Vazirlar Mahkamasining

qarori

Toshkent viloyati hokimligi huzuridagi Obodonlashtirish bosh boshqarmasini tugatish choralari toʻgʻrisida

Obodonlashtirish sohasida boshqaruv faoliyatini samarali yoʻlga qoʻyish va maqbullashtirish, ortiqcha va bir-birini takrorlovchi funksiyalarni tugatish maqsadida Vazirlar Mahkamasi qaror qiladi:

1. Iqtisodiyot va moliya vazirligi hamda Toshkent viloyati hokimligining Toshkent viloyati hokimligi huzuridagi Obodonlashtirish bosh boshqarmasini (keyingi oʻrinlarda — Bosh boshqarma) tugatish toʻgʻrisidagi taklifiga rozilik berilsin.

2. Davlat aktivlarini boshqarish agentligi va Toshkent viloyati hokimligi bir oy muddatda Bosh boshqarmaga tegishli bino va inshootlar, avtotransport vositalari hamda tovar-moddiy aktivlarni toʻliq xatlovdan oʻtkazib, Toshkent viloyati hokimligiga operativ boshqaruv huquqi asosida oʻtkazilishini taʼminlasin.

3. Kambagʻallikni qisqartirish va bandlik vazirligi hamda Toshkent viloyati hokimligi Bosh boshqarmaning tugatilishi natijasida ishdan boʻshatiladigan xodimlarni ish bilan taʼminlash va ijtimoiy muhofaza qilish choralarini koʻrsin.

4. Toshkent viloyati hokimligi, Iqtisodiyot va moliya vazirligi bilan birgalikda Obodonlashtirish bosh boshqarmasini tugatilishi munosabati bilan maqbullashtirilayotgan shtat birliklari hisobidan 20 ta shtat birliklari va ish haqi xarajatlari uchun talab etiladigan mablagʻlarni Chirchiq shahar obodonlashtirish boshqarmasiga oʻtkazilishini taʼminlasin.

5. Vazirlar Mahkamasining “Toshkent viloyatida obodonlashtirish ishlarini yanada takomillashtirish chora-tadbirlari toʻgʻrisida” 2019-yil 21-noyabrdagi 931-son qarori oʻz kuchini yoʻqotgan deb hisoblansin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.J. Ramatov va Toshkent viloyati hokimi Z.T. Mirzayev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2024-yil 9-sentabr,

556-son

(Qonunchilik maʼlumotlari milliy bazasi, 10.09.2024-y., 09/24/556/0697-son)

lex.uz