UzbekAI

Ўзбекистон Республикаси Вазирлар Маҳкамасининг

қарори

Вазирлар Маҳкамасининг 2020 йил 14 майдаги 283-сон қарори билан тасдиқланган Ташқи савдо операциялари амалга оширилиши мониторингини олиб бориш ва назорат қилиш тартиби тўғрисидаги низомга ўзгартиришлар киритиш ҳақида

Ташқи савдо операциялари доирасида активларни репатриация қилиш талабларини янада такомиллаштириш мақсадида Вазирлар Маҳкамаси қарор қилади:

1. Вазирлар Маҳкамасининг 2020 йил 14 майдаги 283-сон қарори билан тасдиқланган Ташқи савдо операциялари амалга оширилиши мониторингини олиб бориш ва назорат қилиш тартиби тўғрисидаги низомга иловага мувофиқ қуйидагиларни назарда тутувчи ўзгартиришлар киритилсин:

ташқи савдо операциялари бўйича активларни репатриация қилиш таъминланмаганлиги учун молиявий жарималар қўллаш амалиётини тартибга солиш ва дебиторлик қарздорликларни ҳисоблаш тартибига аниқлик киритиш;

молиявий жарима қўлланилгандан кейин 120 кун муддатда активлар репатриация қилинган тақдирда, тўланган жарима суммасининг 75 фоизини қайтариб бериш тартибини жорий этиш.

2. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров ҳамда Вазирлар Маҳкамаси ҳузуридаги Солиқ қўмитаси раиси Ш.Д. Кудбиев зиммасига юклансин.

Вазирлар Маҳкамасининг 2024 йил 7 сентябрдаги 551-сон қарорига ИЛОВА

Вазирлар Маҳкамасининг 2020 йил 14 майдаги 283-сон қарори билан тасдиқланган Ташқи савдо операциялари амалга оширилиши мониторингини олиб бориш ва назорат қилиш тартиби тўғрисидаги низомга киритилаётган ўзгартиришлар

1. 27-банд қуйидаги таҳрирда баён этилсин:

«27. Ташқи савдо контрактлари бўйича активлар репатриация қилинишини (чет элдан хорижий валютадаги маблағлар келиб тушишини ёки ушбу Низомда кўрсатилган божхона режимларида товарлар республикага олиб кирилиши ва расмийлаштирилишини, ишлар бажарилиши ва хизматлар кўрсатилишини ёки маблағларнинг қайтарилишини) мазкур Низомнинг 23, 24 ва 24 1 -бандларида белгиланган муддатларда таъминламаган хўжалик юритувчи субъектлар Ўзбекистон Республикасининг «Валютани тартибга солиш тўғрисида»ги Қонунининг 11 1 -моддасида белгиланган жаримани тўлайдилар.

Қуйидаги ҳолларда ташқи савдо операциялари бўйича дебитор қарздорлик муддати ўтган ҳисобланмайди:

асбоб-ускуналарни ва (ёки) бутловчи қисмларни етказиб бериш муддатлари уларнинг техник тавсифларига ҳамда ўзига хос хусусиятига қараб бир юз саксон кундан ортиқ этиб белгиланган импортга оид контрактлар бўйича етказиб бериш муддати даврида;

Ўзбекистон Республикаси Президентининг ва Ўзбекистон Республикаси Вазирлар Маҳкамасининг қарорларига мувофиқ амалга ошириладиган лойиҳалар доирасида тузилган импортга оид контрактларда ёки маҳсулот тақсимоти тўғрисидаги битимларни амалга ошириш доирасида бошқарувчи қўмита томонидан тасдиқланган импортга оид контрактларда белгиланган муддатлар бузилмаган бўлса;

инвестиция лойиҳалари доирасида тузилган контрактлар бўйича лойиҳалаштириш, асбоб-ускуналар ва эҳтиёт қисмларни етказиб бериш, шунингдек, асбоб-ускуналарни ўрнатиш ҳамда қурилиш-монтаж ишлари билан боғлиқ бўлган ишларни (хизматларни) кўрсатиш юзасидан импортга оид контрактларда белгиланган муддатлар бузилмаган бўлса».

2. 28-бандда :

ўн тўққизинчи хатбоши чиқариб ташлансин;

йигирманчи — йигирма саккизинчи хатбошилар тегишлича ўн тўққизинчи — йигирма еттинчи хатбошилар деб ҳисоблансин;

йигирма тўртинчи хатбошиси қуйидаги таҳрирда баён этилсин:

«Молиявий жарима қўллаш тўғрисидаги суд ҳужжати қонуний кучга киргандан сўнг 120 кун ичида аризада кўрсатилган ташқи савдо контрактлари бўйича тўлиқ миқдорда активлар репатриация қилиниши таъминланган тақдирда — тўланган жарима суммасининг 75 фоизи қайтариб берилади».

Ўзбекистон Республикасининг Бош вазири А. АРИПОВ

Тошкент ш.,

2024 йил 7 сентябрь,

551-сон

(Қонунчилик маълумотлари миллий базаси, 12.09.2024 й., 09/24/551/0706-сон)

lex.uz

Oʻzbekiston Respublikasi Vazirlar Mahkamasining

qarori

Vazirlar Mahkamasining 2020-yil 14-maydagi 283-son qarori bilan tasdiqlangan Tashqi savdo operatsiyalari amalga oshirilishi monitoringini olib borish va nazorat qilish tartibi toʻgʻrisidagi nizomga oʻzgartirishlar kiritish haqida

Tashqi savdo operatsiyalari doirasida aktivlarni repatriatsiya qilish talablarini yanada takomillashtirish maqsadida Vazirlar Mahkamasi qaror qiladi:

1. Vazirlar Mahkamasining 2020-yil 14-maydagi 283-son qarori bilan tasdiqlangan Tashqi savdo operatsiyalari amalga oshirilishi monitoringini olib borish va nazorat qilish tartibi toʻgʻrisidagi nizomga ilovaga muvofiq quyidagilarni nazarda tutuvchi oʻzgartirishlar kiritilsin:

tashqi savdo operatsiyalari boʻyicha aktivlarni repatriatsiya qilish taʼminlanmaganligi uchun moliyaviy jarimalar qoʻllash amaliyotini tartibga solish va debitorlik qarzdorliklarni hisoblash tartibiga aniqlik kiritish;

moliyaviy jarima qoʻllanilgandan keyin 120 kun muddatda aktivlar repatriatsiya qilingan taqdirda, toʻlangan jarima summasining 75 foizini qaytarib berish tartibini joriy etish.

2. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov hamda Vazirlar Mahkamasi huzuridagi Soliq qoʻmitasi raisi Sh.D. Kudbiyev zimmasiga yuklansin.

Vazirlar Mahkamasining 2024-yil 7-sentabrdagi 551-son qaroriga ILOVA

Vazirlar Mahkamasining 2020-yil 14-maydagi 283-son qarori bilan tasdiqlangan Tashqi savdo operatsiyalari amalga oshirilishi monitoringini olib borish va nazorat qilish tartibi toʻgʻrisidagi nizomga kiritilayotgan oʻzgartirishlar

1. 27-band quyidagi tahrirda bayon etilsin:

“27. Tashqi savdo kontraktlari boʻyicha aktivlar repatriatsiya qilinishini (chet eldan xorijiy valyutadagi mablagʻlar kelib tushishini yoki ushbu Nizomda koʻrsatilgan bojxona rejimlarida tovarlar respublikaga olib kirilishi va rasmiylashtirilishini, ishlar bajarilishi va xizmatlar koʻrsatilishini yoki mablagʻlarning qaytarilishini) mazkur Nizomning 23, 24 va 24 1 -bandlarida belgilangan muddatlarda taʼminlamagan xoʻjalik yurituvchi subyektlar Oʻzbekiston Respublikasining “Valyutani tartibga solish toʻgʻrisida”gi Qonunining 11 1 -moddasida belgilangan jarimani toʻlaydilar.

Quyidagi hollarda tashqi savdo operatsiyalari boʻyicha debitor qarzdorlik muddati oʻtgan hisoblanmaydi:

asbob-uskunalarni va (yoki) butlovchi qismlarni yetkazib berish muddatlari ularning texnik tavsiflariga hamda oʻziga xos xususiyatiga qarab bir yuz sakson kundan ortiq etib belgilangan importga oid kontraktlar boʻyicha yetkazib berish muddati davrida;

Oʻzbekiston Respublikasi Prezidentining va Oʻzbekiston Respublikasi Vazirlar Mahkamasining qarorlariga muvofiq amalga oshiriladigan loyihalar doirasida tuzilgan importga oid kontraktlarda yoki mahsulot taqsimoti toʻgʻrisidagi bitimlarni amalga oshirish doirasida boshqaruvchi qoʻmita tomonidan tasdiqlangan importga oid kontraktlarda belgilangan muddatlar buzilmagan boʻlsa;

investitsiya loyihalari doirasida tuzilgan kontraktlar boʻyicha loyihalashtirish, asbob-uskunalar va ehtiyot qismlarni yetkazib berish, shuningdek, asbob-uskunalarni oʻrnatish hamda qurilish-montaj ishlari bilan bogʻliq boʻlgan ishlarni (xizmatlarni) koʻrsatish yuzasidan importga oid kontraktlarda belgilangan muddatlar buzilmagan boʻlsa”.

2. 28-bandda :

oʻn toʻqqizinchi xatboshi chiqarib tashlansin;

yigirmanchi — yigirma sakkizinchi xatboshilar tegishlicha oʻn toʻqqizinchi — yigirma yettinchi xatboshilar deb hisoblansin;

yigirma toʻrtinchi xatboshisi quyidagi tahrirda bayon etilsin:

“Moliyaviy jarima qoʻllash toʻgʻrisidagi sud hujjati qonuniy kuchga kirgandan soʻng 120 kun ichida arizada koʻrsatilgan tashqi savdo kontraktlari boʻyicha toʻliq miqdorda aktivlar repatriatsiya qilinishi taʼminlangan taqdirda — toʻlangan jarima summasining 75 foizi qaytarib beriladi”.

Oʻzbekiston Respublikasining Bosh vaziri A. ARIPOV

Toshkent sh.,

2024-yil 7-sentabr,

551-son

(Qonunchilik maʼlumotlari milliy bazasi, 12.09.2024-y., 09/24/551/0706-son)

lex.uz