📅 2024-yil 27-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 27 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 27 сентября 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 27 September 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Республикада хорижий туристлар оқимини янада ошириш ҳамда соҳада экспорт олди молиялаштиришни ривожлантиришга қаратилган қўшимча чора-тадбирлар тўғрисида
Ўзбекистон Республикаси Президентининг «Ўзбекистон Республикасида туризм инфратузилмасини яхшилаш ва хорижий туристлар оқимини янада оширишга қаратилган қўшимча чора-тадбирлар тўғрисида» 2024 йил 18 июлдаги ПФ-102-сон Фармони ижроси юзасидан, шунингдек, тижорат банклари томонидан кредитлар ажратилиши ҳамда улардан самарали ва манзилли фойдаланилишини таъминлаш мақсадида Вазирлар Маҳкамаси қарор қилади:
1. Қуйидагилар маълумот учун қабул қилинсин:
2024 йил 1 сентябрдан бошлаб кириш туризми фаолиятини амалга оширувчи Ўзбекистон Республикаси резиденти бўлган туроператорларни (кейинги ўринларда — туроператорлар) уларнинг хорижий мамлакатлардан республикага туристларни олиб келиш билан боғлиқ харажатларини молиялаштириш учун айланма маблағ билан таъминлаш мақсадида Тикланиш ва тараққиёт жамғармаси томонидан республика тижорат банклари (кейинги ўринларда — иштирокчи тижорат банклари) орқали 50 млн АҚШ доллари эквивалентида миллий валютада йиллик 14 фоиз ставкада кредит линияси (кейинги ўринларда — мақсадли кредит линияси) очилганлиги;
кредит ресурслари тижорат банкларига 3 йиллик имтиёзли давр билан 12 йил муддатга ажратилиши;
тижорат банклари томонидан ажратиладиган кредитлар бўйича йиллик фоиз ставкаси таркибидаги банк маржаси 3 фоиздан ошмаган миқдорда ўрнатилиб, кредитлар туроператорларга 2 йиллик имтиёзли давр (фоиз ва асосий қарздан) билан 10 йил муддатга берилиши.
2. Белгилансинки, туроператорларга кредитлар бевосита уларнинг бирламчи ҳисобварақлари мавжуд тижорат банклари орқали ажратилади.
3. Тикланиш ва тараққиёт жамғармаси кредит ресурсларининг иштирокчи тижорат банклари талабномалари келиб тушган кундан эътиборан уч кун муддатда тасдиқланган тақсимот бўйича тегишли тижорат банклари кесимида жойлаштирилишини таъминласин.
4. Белгилаб қўйилсинки:
тижорат банклари томонидан кредитлар туроператорларни уларнинг хорижий мамлакатлардан республикага туристларни олиб келиш билан боғлиқ харажатларини молиялаштириш учун айланма маблағ билан таъминлаш мақсадида битта тадбиркорлик субъектига 25 млрд сўмгача миқдорда;
мақсадли кредит линияси доирасида кредитлар 1 йилдан ортиқ фаолият юритаётган, камида 15 фоиз миқдорида ўз маблағлари (шу жумладан, бино ва иншоотлар кўринишида) жалб этилишини таъминлай оладиган туроператорларига ажратилади.
Бунда иштирокчи тижорат банки томонидан мақсадли кредит линияси ҳисобидан ажратилган кредитлар тўлиқ тақсимланганидан кейин туроператорлардан қўшимча талабномалар келиб тушганда, кредит линияси ресурслари Тикланиш ва тараққиёт жамғармаси томонидан тижорат банклари ўртасида қайта тақсимланиши мумкин.
5. Шундай тартиб ўрнатилсинки, унга мувофиқ мазкур қарор доирасида ажратилган кредитлардан самарали ва манзилли фойдаланилишини таъминлаш мақсадида туроператорлар куйидаги мажбуриятларни ўз зиммасига олади (айланма кредит ажратилган санадан бошлаб навбатдаги йил якуни бўйича):
хизмат кўрсатилаётган хорижий сайёҳлар сонини камида 25 фоизга ошириш;
туристик хизматлар кўрсатишдан тушадиган даромадларни камида 25 фоизга ошириш.
Ушбу банднинг иккинчи ва учинчи хатбошиларида кўрсатилган талаблар бажарилмаганда, туроператорларга ажратилган имтиёзли кредит ставкаси банкнинг амалдаги тижорий ставкасига ўзгартирилади.
6. Мақсадли кредит линияси ҳисобидан ажратилган кредитларнинг қуйидагиларга йўналтирилишига йўл қўйилмаслиги белгилаб қўйилсин:
илгари олинган кредитларни ёки бошқа қарзларни қайтариш;
алкоголь ва тамаки маҳсулотларини ишлаб чиқариш;
ишлаб чиқариш (хизмат кўрсатиш) мақсадлари учун ишлатилмайдиган шахсий мол-мулк (мебел, уяли телефон, маиший техника ва бошқалар) сотиб олиш;
автотранспорт воситаларини харид қилиш (қиймати кредит суммасининг 40 фоизигача бўлган саккиз ва ундан ортиқ ўринли йўловчи ташувчи автомобиллар сотиб олиш бундан мустасно);
маъмурий харажатларни тўлаш, шу жумладан хизмат автомобилларини сақлаш;
бино ва иншоотлар сотиб олиш ва қуриш.
7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосарлари Ж.А. Қўчқоров ва Ж.А. Ходжаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2024 йил 27 сентябрь,
610-сон
Oʻzbekiston Respublikasi Vazirlar Mahkamasining
qarori
Respublikada xorijiy turistlar oqimini yanada oshirish hamda sohada eksport oldi moliyalashtirishni rivojlantirishga qaratilgan qoʻshimcha chora-tadbirlar toʻgʻrisida
Oʻzbekiston Respublikasi Prezidentining “Oʻzbekiston Respublikasida turizm infratuzilmasini yaxshilash va xorijiy turistlar oqimini yanada oshirishga qaratilgan qoʻshimcha chora-tadbirlar toʻgʻrisida” 2024-yil 18-iyuldagi PF-102-son Farmoni ijrosi yuzasidan, shuningdek, tijorat banklari tomonidan kreditlar ajratilishi hamda ulardan samarali va manzilli foydalanilishini taʼminlash maqsadida Vazirlar Mahkamasi qaror qiladi:
1. Quyidagilar maʼlumot uchun qabul qilinsin:
2024-yil 1-sentabrdan boshlab kirish turizmi faoliyatini amalga oshiruvchi Oʻzbekiston Respublikasi rezidenti boʻlgan turoperatorlarni (keyingi oʻrinlarda — turoperatorlar) ularning xorijiy mamlakatlardan respublikaga turistlarni olib kelish bilan bogʻliq xarajatlarini moliyalashtirish uchun aylanma mablagʻ bilan taʼminlash maqsadida Tiklanish va taraqqiyot jamgʻarmasi tomonidan respublika tijorat banklari (keyingi oʻrinlarda — ishtirokchi tijorat banklari) orqali 50 mln AQSh dollari ekvivalentida milliy valyutada yillik 14 foiz stavkada kredit liniyasi (keyingi oʻrinlarda — maqsadli kredit liniyasi) ochilganligi;
kredit resurslari tijorat banklariga 3 yillik imtiyozli davr bilan 12 yil muddatga ajratilishi;
tijorat banklari tomonidan ajratiladigan kreditlar boʻyicha yillik foiz stavkasi tarkibidagi bank marjasi 3 foizdan oshmagan miqdorda oʻrnatilib, kreditlar turoperatorlarga 2 yillik imtiyozli davr (foiz va asosiy qarzdan) bilan 10 yil muddatga berilishi.
2. Belgilansinki, turoperatorlarga kreditlar bevosita ularning birlamchi hisobvaraqlari mavjud tijorat banklari orqali ajratiladi.
3. Tiklanish va taraqqiyot jamgʻarmasi kredit resurslarining ishtirokchi tijorat banklari talabnomalari kelib tushgan kundan eʼtiboran uch kun muddatda tasdiqlangan taqsimot boʻyicha tegishli tijorat banklari kesimida joylashtirilishini taʼminlasin.
4. Belgilab qoʻyilsinki:
tijorat banklari tomonidan kreditlar turoperatorlarni ularning xorijiy mamlakatlardan respublikaga turistlarni olib kelish bilan bogʻliq xarajatlarini moliyalashtirish uchun aylanma mablagʻ bilan taʼminlash maqsadida bitta tadbirkorlik subyektiga 25 mlrd soʻmgacha miqdorda;
maqsadli kredit liniyasi doirasida kreditlar 1 yildan ortiq faoliyat yuritayotgan, kamida 15 foiz miqdorida oʻz mablagʻlari (shu jumladan, bino va inshootlar koʻrinishida) jalb etilishini taʼminlay oladigan turoperatorlariga ajratiladi.
Bunda ishtirokchi tijorat banki tomonidan maqsadli kredit liniyasi hisobidan ajratilgan kreditlar toʻliq taqsimlanganidan keyin turoperatorlardan qoʻshimcha talabnomalar kelib tushganda, kredit liniyasi resurslari Tiklanish va taraqqiyot jamgʻarmasi tomonidan tijorat banklari oʻrtasida qayta taqsimlanishi mumkin.
5. Shunday tartib oʻrnatilsinki, unga muvofiq mazkur qaror doirasida ajratilgan kreditlardan samarali va manzilli foydalanilishini taʼminlash maqsadida turoperatorlar kuyidagi majburiyatlarni oʻz zimmasiga oladi (aylanma kredit ajratilgan sanadan boshlab navbatdagi yil yakuni boʻyicha):
xizmat koʻrsatilayotgan xorijiy sayyohlar sonini kamida 25 foizga oshirish;
turistik xizmatlar koʻrsatishdan tushadigan daromadlarni kamida 25 foizga oshirish.
Ushbu bandning ikkinchi va uchinchi xatboshilarida koʻrsatilgan talablar bajarilmaganda, turoperatorlarga ajratilgan imtiyozli kredit stavkasi bankning amaldagi tijoriy stavkasiga oʻzgartiriladi.
6. Maqsadli kredit liniyasi hisobidan ajratilgan kreditlarning quyidagilarga yoʻnaltirilishiga yoʻl qoʻyilmasligi belgilab qoʻyilsin:
ilgari olingan kreditlarni yoki boshqa qarzlarni qaytarish;
alkogol va tamaki mahsulotlarini ishlab chiqarish;
ishlab chiqarish (xizmat koʻrsatish) maqsadlari uchun ishlatilmaydigan shaxsiy mol-mulk (mebel, uyali telefon, maishiy texnika va boshqalar) sotib olish;
avtotransport vositalarini xarid qilish (qiymati kredit summasining 40 foizigacha boʻlgan sakkiz va undan ortiq oʻrinli yoʻlovchi tashuvchi avtomobillar sotib olish bundan mustasno);
maʼmuriy xarajatlarni toʻlash, shu jumladan xizmat avtomobillarini saqlash;
bino va inshootlar sotib olish va qurish.
7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari J.A. Qoʻchqorov va J.A. Xodjayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 27-sentabr,
610-son