📅 2024-yil 30-sentabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 30 сентябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 30 сентября 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 30 September 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Маҳаллий метиз ишлаб чиқарувчи корхоналар фаолиятини қўллаб-қувватлаш чора-тадбирлари тўғрисида
Ички ва ташқи бозорда барқарор талабга эга бўлган метиз ишлаб чиқаришни кенгайтириш, ишлаб чиқарувчиларни навли прокат хомашёси билан мунтазам таъминлаш ва янги иш ўринларини яратиш мақсадида Вазирлар Маҳкамаси қарор қилади:
1. Белгилансинки, 2030 йил 1 январга қадар метиз ишлаб чиқарувчиларга «Ўзбекистон республика товар-хом ашё биржаси» АЖ ва «Тошкент товар хомашё биржаси» АЖ савдолари орқали «Ўзметкомбинат» АЖ томонидан ишлаб чиқарилган пўлат сим харид қилиш учун тўловларни 90 кун ичида кечиктириб тўлаш шарти билан сотиш тартиби жорий этилади.
Бунда:
а) харид қилинадиган пўлат сим учун тўловларни маҳсулот нархининг 25 фоизини бўнак тарзида, қолган 75 фоизини маҳсулот олинганидан сўнг 90 кун ичида кечиктириб тўлаш шарти билан уни сотишга рухсат этилади;
б) кечиктириб тўлаш шарти билан харид қилинган пўлат сим учун тўловни таъминлаш мақсадида истеъмолчилар томонидан банк кафолати ёки кафиллиги берилади;
в) биржа савдоларига чиқариладиган пўлат сим маркалари ва савдоларда иштирок этувчи метиз ишлаб чиқарувчилар рўйхати Иқтисодиёт ва молия вазирлиги, Инвестициялар, саноат ва савдо вазирлиги ҳамда Савдо-саноат палатаси томонидан биргаликда тасдиқланади;
г) кечиктириб тўлаш имконияти берилган ҳар бир кун учун тўланиши лозим бўлган тўловлар суммаси қуйидагича белгиланади:
30 кун ичида тўланган тўловлар қисмига — фоиз ҳисобланмайди;
31 кундан 60 кунгача тўланган тўловлар қисмига — Марказий банк асосий ставкасининг 50 фоизи миқдорида фоиз ҳисобланади;
61 кундан 90 кунгача тўланган тўловлар қисмига — Марказий банк асосий ставкаси миқдорида фоиз ҳисобланади.
2. Белгилаб қўйилсинки, «Савдони ривожлантириш компанияси» АЖ томонидан метиз ишлаб чиқарувчи корхоналарнинг экспортолди ва экспорт билан боғлиқ савдо операцияларини молиялаштириш мақсадида уларга тижорат банклар орқали 18 ой муддатгача йиллик 4 фоизли ставкадан (шундан 2 фоизи тижорат банки маржаси) ошмаган миқдорда имтиёзли кредитлар ажратиш учун молиявий ресурслар йўналтирилади.
Бунда метиз ишлаб чиқарувчи корхоналарнинг охирги 12 ой давомида қилган экспорт ҳажми:
5 миллион АҚШ долларигача бўлганда — 1 миллион АҚШ долларигача;
5 миллион АҚШ долларидан 10 миллион АҚШ долларигача бўлганда — 2 миллион АҚШ долларигача;
10 миллион АҚШ долларидан 15 миллион АҚШ долларигача бўлганда — 3 миллион АҚШ долларигача;
15 миллион АҚШ долларидан 20 миллион АҚШ долларигача бўлганда — 4 миллион АҚШ долларигача;
20 миллион АҚШ долларидан ортиқ бўлганда — 5 миллион АҚШ долларигача тижорат банклари орқали кредитлар ажратилади.
3. Инвестициялар, саноат ва савдо вазирлиги ҳар чорак якуни бўйича мазкур қарорда белгиланган топшириқлар ижроси юзасидан Вазирлар Маҳкамасига ахборот киритиб борсин.
4. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2024 йил 30 сентябрь,
615-сон
Oʻzbekiston Respublikasi Vazirlar Mahkamasining
qarori
Mahalliy metiz ishlab chiqaruvchi korxonalar faoliyatini qoʻllab-quvvatlash chora-tadbirlari toʻgʻrisida
Ichki va tashqi bozorda barqaror talabga ega boʻlgan metiz ishlab chiqarishni kengaytirish, ishlab chiqaruvchilarni navli prokat xomashyosi bilan muntazam taʼminlash va yangi ish oʻrinlarini yaratish maqsadida Vazirlar Mahkamasi qaror qiladi:
1. Belgilansinki, 2030-yil 1-yanvarga qadar metiz ishlab chiqaruvchilarga “Oʻzbekiston respublika tovar-xom ashyo birjasi” AJ va “Toshkent tovar xomashyo birjasi” AJ savdolari orqali “Oʻzmetkombinat” AJ tomonidan ishlab chiqarilgan poʻlat sim xarid qilish uchun toʻlovlarni 90 kun ichida kechiktirib toʻlash sharti bilan sotish tartibi joriy etiladi.
Bunda:
a) xarid qilinadigan poʻlat sim uchun toʻlovlarni mahsulot narxining 25 foizini boʻnak tarzida, qolgan 75 foizini mahsulot olinganidan soʻng 90 kun ichida kechiktirib toʻlash sharti bilan uni sotishga ruxsat etiladi;
b) kechiktirib toʻlash sharti bilan xarid qilingan poʻlat sim uchun toʻlovni taʼminlash maqsadida isteʼmolchilar tomonidan bank kafolati yoki kafilligi beriladi;
v) birja savdolariga chiqariladigan poʻlat sim markalari va savdolarda ishtirok etuvchi metiz ishlab chiqaruvchilar roʻyxati Iqtisodiyot va moliya vazirligi, Investitsiyalar, sanoat va savdo vazirligi hamda Savdo-sanoat palatasi tomonidan birgalikda tasdiqlanadi;
g) kechiktirib toʻlash imkoniyati berilgan har bir kun uchun toʻlanishi lozim boʻlgan toʻlovlar summasi quyidagicha belgilanadi:
30 kun ichida toʻlangan toʻlovlar qismiga — foiz hisoblanmaydi;
31 kundan 60 kungacha toʻlangan toʻlovlar qismiga — Markaziy bank asosiy stavkasining 50 foizi miqdorida foiz hisoblanadi;
61 kundan 90 kungacha toʻlangan toʻlovlar qismiga — Markaziy bank asosiy stavkasi miqdorida foiz hisoblanadi.
2. Belgilab qoʻyilsinki, “Savdoni rivojlantirish kompaniyasi” AJ tomonidan metiz ishlab chiqaruvchi korxonalarning eksportoldi va eksport bilan bogʻliq savdo operatsiyalarini moliyalashtirish maqsadida ularga tijorat banklar orqali 18 oy muddatgacha yillik 4 foizli stavkadan (shundan 2 foizi tijorat banki marjasi) oshmagan miqdorda imtiyozli kreditlar ajratish uchun moliyaviy resurslar yoʻnaltiriladi.
Bunda metiz ishlab chiqaruvchi korxonalarning oxirgi 12 oy davomida qilgan eksport hajmi:
5 million AQSH dollarigacha boʻlganda — 1 million AQSH dollarigacha;
5 million AQSH dollaridan 10 million AQSH dollarigacha boʻlganda — 2 million AQSH dollarigacha;
10 million AQSH dollaridan 15 million AQSH dollarigacha boʻlganda — 3 million AQSH dollarigacha;
15 million AQSH dollaridan 20 million AQSH dollarigacha boʻlganda — 4 million AQSH dollarigacha;
20 million AQSH dollaridan ortiq boʻlganda — 5 million AQSH dollarigacha tijorat banklari orqali kreditlar ajratiladi.
3. Investitsiyalar, sanoat va savdo vazirligi har chorak yakuni boʻyicha mazkur qarorda belgilangan topshiriqlar ijrosi yuzasidan Vazirlar Mahkamasiga axborot kiritib borsin.
4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 30-sentabr,
615-son