UzbekAI

Ўзбекистон Республикаси Вазирлар Маҳкамасининг

қарори

НИЗОМ

Касалликларни амбулатор шароитда даволашда дори воситалари харажатларини қоплаш бўйича реимбурсация дастури тўғрисидаги низомни тасдиқлаш ҳақида

Аҳолига амбулатор тиббий ёрдам кўрсатиш самарадорлигини ошириш, соҳага босқичма-босқич давлат тиббий суғуртаси механизмларини жорий этиш ҳамда касалликларни даволашда дори воситалари харажатларини қоплаш бўйича реимбурсация дастурини жорий қилиш мақсадида Вазирлар Маҳкамаси қарор қилади:

1. Қуйидагилар:

Ўзбекистон Республикаси Президентининг «Соғлиқни сақлаш тизимини ташкил этишнинг янги модели ва давлат тиббий суғуртаси механизмларини Сирдарё вилоятида жорий этиш чора-тадбирлари тўғрисида» 2020 йил 12 ноябрдаги ПҚ-4890-сон қарорига асосан 2022 йилдан Сирдарё вилоятида;

Ўзбекистон Республикаси Президентининг «Ўзбекистон-2030» стратегиясини 2023 йилда сифатли ва ўз вақтида амалга ошириш чора-тадбирлари тўғрисида» 2023 йил 11 сентябрдаги ПҚ-300-сон қарорига асосан 2023 йил 1 июлдан Тошкент шаҳрида аҳолининг энг кўп мурожаатларига сабаб бўлган сурункали касалликлар билан диспансер назоратида турган беморларни реимбурсация дастури доирасида 11 турдаги дори воситалари билан таъминлаш тизими тажриба-синов тариқасида йўлга қўйилганлиги маълумот учун қабул қилинсин.

2. Қуйидагиларни назарда тутувчи Касалликларни амбулатор шароитда даволашда дори воситалари харажатларини қоплаш бўйича реимбурсация дастури тўғрисидаги низом иловага мувофиқ тасдиқлансин:

шифокор томонидан реимбурсация дастури доирасида дори воситаларини тайинлаш;

шифокор томонидан расмийлаштирилган электрон рецепт асосида дорихоналар томонидан дори воситаларини беморларга бепул бериш;

электрон рецепт асосида дорихоналар томонидан берилган дори воситалари қийматини Давлат бюджети маблағлари ҳисобидан қоплаш тартиби.

3. Соғлиқни сақлаш вазирлиги:

бир ой муддатда манфаатдор вазирлик ва идоралар билан биргаликда ўзлари қабул қилган норматив-ҳуқуқий ҳужжатларни ушбу қарорга мувофиқлаштирсин;

икки ой муддатда реимбурсация дастурини давлат тиббий суғуртаси механизмлари жорий этилган ҳудудларда босқичма-босқич йўлга қўйиш чораларини кўрсин.

4. Белгилансинки:

шифокор томонидан расмийлаштирилган электрон рецепт бўйича давлат томонидан кафолатланган тиббий хизматлар ва дори воситалари пакетига киритилган дори воситалари беморларга дорихоналар томонидан реимбурсация дастури асосида бепул берилади;

реимбурсация дастури асосида бериладиган дори воситалари бўйича дорихоналарнинг харажатлари Давлат бюджети маблағлари ҳисобидан Давлат тиббий суғуртаси жамғармаси (кейинги ўринларда — Жамғарма) орқали қоплаб берилади. Бунда Жамғарма билан дорихоналар ўртасида тўғридан-тўғри шартнома тузилади ва дорихоналарнинг харажатларини қоплаш учун тўловлар ғазначилик хизмати органлари орқали юридик мажбурият расмийлаштирилган ҳолда ҳар ойда камида бир маротаба молиялаштирилади;

реимбурсация дастурини амалга оширишда бемор ёки унинг қонуний вакилининг мобил телефон рақамига юбориладиган СМС-хабарлар бўйича харажатлар реимбурсация дастурига ажратилган маблағлар ҳисобидан қопланади.

5. Соғлиқни сақлаш вазирлиги ҳузуридаги «Фармацевтика маҳсулотлари хавфсизлиги маркази» давлат муассасаси реимбурсация дастури асосида бериладиган дори воситаларининг чакана савдода мавжудлиги (дефектура) юзасидан доимий мониторинг ўтказиб борсин ҳамда мониторинг натижаларини ҳар ойнинг 5-санасига қадар Жамғармага тақдим этилишини таъминласин.

6. Ўзбекистон Миллий телерадиокомпанияси, Ўзбекистон Миллий ахборот агентлиги ва бошқа оммавий ахборот воситаларига ушбу қарорга мувофиқ давлат тиббий суғурта механизмлари, шу жумладан реимбурсация дастурини жорий қилиш бўйича амалга оширилаётган ишларни кенг ёритиш тавсия этилсин.

7. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров ва Ўзбекистон Республикаси соғлиқни сақлаш вазири вазифасини бажарувчи А.А. Худаяров зиммасига юклансин.

Вазирлар Маҳкамасининг 2024 йил 2 октябрдаги 619-сон қарорига ИЛОВА

Касалликларни амбулатор шароитда даволашда дори воситалари харажатларини қоплаш бўйича реимбурсация дастури тўғрисида

1-боб. Умумий қоидалар

1. Мазкур Низом беморларни амбулатор шароитда даволаниши учун шифокор томонидан расмийлаштирилган электрон рецепт асосида дорихоналар орқали дори воситаларини бериш ва берилган дори воситалари қийматини Давлат бюджети маблағлари ҳисобидан қоплаш (реимбурсация) тартибини белгилайди.

2. Ушбу Низом аҳолига амбулатор тиббий ёрдам кўрсатишда дори таъминоти шаффофлиги ва натижадорлигини таъминлаш мақсадида дори воситаларининг чакана савдоси билан шуғулланиш учун тегишли лицензияга эга ҳамда Давлат тиббий суғуртаси жамғармаси (кейинги ўринларда — Жамғарма) билан шартнома тузган дорихоналарга (кейинги ўринларда — дорихона) нисбатан татбиқ этилади.

3. Мазкур Низомда қуйидаги асосий тушунчалар қўлланилади:

амбулатор тиббий ёрдам — кечаю-кундуз кузатувга муҳтож бўлмаган беморларга кўрсатиладиган тиббий ёрдам;

доимий фаолиятдаги ҳайъат (кейинги ўринларда — ДФҲ) — даволаш-профилактика муассасаларида стандартлар ва клиник протоколлар асосида касалликларни ташхислаш ва даволаш учун зарур бўлган дори воситалари, тиббий жиҳозлар, сарфлов материаллари, тиббий асбоб-ускуналар ҳамда реагентларни харид қилиш, тарқатиш ва улардан самарали фойдаланиш, шунингдек, электрон рецептларни тасдиқлашга масъул тузилма;

дори воситасининг халқаро патентланмаган номи (кейинги ўринларда — ХПН) — Жаҳон соғлиқни сақлаш ташкилоти томонидан дори воситаси таркибидаги фаол дори моддасининг (субстанция) номи. ХПН орқали дори воситаси идентификация қилинади;

реимбурсация дастури — беморларни амбулатор шароитда даволаш учун шифокор томонидан расмийлаштирилган электрон рецепт асосида дорихоналар орқали дори воситаларини бериш ва берилган дори воситалари қийматини Жамғарма томонидан қоплаш дастури;

тиббий ахборот тизими (кейинги ўринларда — ахборот тизими) — тиббиёт ташкилотларига мурожаат қилган аҳолининг саломатлиги, шифокор кўриги ва инструментал-лаборатор текширувлар натижаларини акс эттириш, жамлаш ҳамда тиббий ҳужжатларни электрон шаклда яратишни ва уларнинг автоматлаштирилган айланмасини таъминлайдиган электрон тизим;

халқаро касалликлар таснифи (кейинги ўринларда — ХКТ) — касалликлар ва соғлиқ билан боғлиқ бошқа муаммоларнинг халқаро статистик таснифи;

электрон ахборот дастури (кейинги ўринларда — ахборот дастури) — реимбурсация дастури ва электрон рецепт билан боғлиқ барча жараёнларни бошқариш, маълумот алмашиш, тегишли ҳисоботларни шакллантириш каби функцияларни амалга оширувчи ахборот дастури;

электрон рецепт — шифокор томонидан дорихонанинг фармацевтик маълумотга эга бўлган мутахассисига дори воситасини бериш ҳамда уни қўллаш усули тўғрисидаги кўрсатмаси электрон шаклда қайд этилган, электрон рақамли имзо билан тасдиқланган ва уни идентификациялаш имконини берадиган бошқа реквизитларга эга бўлган электрон ҳужжат;

қонуний вакил — беморнинг оила аъзоси ёки беморга васийлик қилишга тайинланган шахс (ижтимоий ходим);

чекланган қоплаш қиймати — реимбурсация дастури асосида берилаётган дори воситасининг ХПН, шакли ва дозаси бўйича ҳар бир бирлиги учун қоплаб берилиш мумкин бўлган энг юқори сумма.

4. Мазкур Низом талаблари асосида бериладиган дори воситалари рўйхатига Ўзбекистон Республикаси ҳудудида тиббий амалиётда фойдаланиш учун тасдиқланган ва Давлат рўйхатидан ўтказилганлиги тўғрисидаги гувоҳноманинг амал қилиш муддати давомида ишлаб чиқарилган тайёр дори воситалари киритилади.

5. Реимбурсация дастурига киритиладиган касалликлар ва уларни даволашда бериладиган дори воситалари рўйхати Ўзбекистон Республикаси Соғлиқни сақлаш вазирлиги томонидан белгиланади, уларнинг чекланган қоплаш қийматини белгилаш ва тўловларни амалга ошириш тартиби Жамғарма Кузатув кенгаши томонидан тасдиқланади.

6. Реимбурсация дастури асосида бериладиган дори воситасининг ХПН, шакли ва дозаси учун чекланган қоплаш қиймати Жамғарма ҳузурида ташкил этиладиган комиссия томонидан белгиланади.

7. Реимбурсация дастури асосида бериладиган дори воситалари бўйича дорихоналарнинг харажатлари Давлат бюджети маблағлари ҳисобидан Жамғарма томонидан чекланган қоплаш қиймати доирасида қоплаб берилади. Бунда дорихоналарнинг харажатларини қоплаш учун тўловлар ғазначилик хизмати органлари орқали юридик мажбурият асосида ҳар ойда камида бир маротаба амалга оширилади.

8. Реимбурсация дастурининг бюджети Жамғарма бюджетининг бир қисми ҳисобланиб, ушбу дастурга киритилган дори воситалари, тиббий буюмлар ва сарфлов воситаларини аҳолига тақдим қилиш учун талаб этиладиган маблағлар йиғиндисидан иборат бўлади. Бунда реимбурсация дастури бюджети республика даражасида алоҳида жамланади.

9. Реимбурсация дастури доирасида электрон рецептлар тўғри ва асосли шакллантирилиши, дорихоналарга узатилиши, улар асосида дори воситаларининг берилиши ҳамда берилган дори воситалари бўйича харажатлар қопланишини назорат қилиш Жамғарма томонидан ахборот дастури орқали ёки тегишли муассаса (дорихона)га ташриф буюрган ҳолда бирламчи ҳужжатларни ўрганиш асосида амалга оширилади.

Бунда Жамғармага шахсга доир маълумотларни, шу жумладан, барча тиббий маълумотларни ахборот тизимидан тўғридан-тўғри олиш ва қайта ишлаш ваколати берилади.

10. Реимбурсация дастури доирасида электрон рецепт билан боғлиқ жараёнларни бошқариш, маълумот алмашиш, тегишли ҳисоботларни шакллантириш каби функцияларни амалга оширувчи ахборот дастури Жамғарма томонидан жорий этилади ва бошқарилади ҳамда манфаатдор вазирлик ва идораларнинг ахборот тизимлари билан ўрнатилган тартибда интеграция қилинади.

11. Реимбурсация дастури доирасида бериладиган дори воситаларининг давлат рўйхатидан (шу жумладан қайта рўйхатдан) ўтганлик сертификатини амал қилиш муддати тўғрисидаги маълумотлар, шунингдек, фойдаланиши тақиқланган ҳамда қайтарилган ёки карантинга ўтказилган дори воситаларининг миқдори (партияси) ёки қатори (сериялари) тўғрисидаги маълумотлар ахборот дастурига Ўзбекистон Республикаси Соғлиқни сақлаш вазирлиги ҳузуридаги «Фармацевтика маҳсулотлари хавфсизлиги маркази» давлат муассасасининг ахборот тизими орқали ўзаро интеграция асосида автоматик тарзда узатилиши таъминланади.

2-боб. Реимбурсация тизимида дорихоналарнинг иштироки

12. Реимбурсация тизимида иштирок этадиган дорихоналарга мазкур дастур асосида бериладиган дори воситаларининг доимий мавжуд бўлишини кафолатлаш ва чакана савдо тармоқларида узлуксиз мавжудлигини таъминлаш масъулияти юклатилади.

Бунда дорихона дори воситаларининг етказиб берилишидаги узилиш ҳолатлари тўғрисида Жамғармани етти кун аввал хабардор қилиши лозим.

13. Тайинланган дори воситасининг электрон рецептда кўрсатилган ХПН, шакли ва дозасига мос ҳолда ҳамда сотувда мавжуд реимбурсация дастурига киритилган дори воситаларининг энг паст чекланган қоплаш қиймати доирасида берилишига дорихона ходими (фармацевт) жавобгар бўлади.

14. Жамғарма билан тузилган шартномага асосан дорихона ахборот тизимига уланади.

15. Дорихона шартнома тузилган санадан бошлаб беш иш куни ичида реимбурсация тизимида иштирок этувчи ўз филиаллари ҳамда ахборот дастурида ишлашга рухсат берилган ходимлари тўғрисидаги маълумотни Жамғармага тақдим этади.

16. Реимбурсация дастурини тартибга солувчи ҳужжатларга ўзгартириш киритилган тақдирда, Жамғарма билан дорихоналар ўртасида тузилган шартномаларга тегишли ўзгартириш ва қўшимчалар киритилиши лозим бўлади. Кўрсатилган ҳужжатларга киритилган ўзгартириш ва қўшимчалар тўғрисида Жамғарма дорихоналарни ёзма ёки электрон шаклда беш иш куни ичида огоҳлантиради.

17. Дорихона томонидан реимбурсация дастури асосида бериладиган дори воситалари учун бемордан тўлов олинганлиги ҳамда реимбурсация дастури талабларига риоя этилмаслик ҳолати аниқланганда Жамғарма:

биринчи маротаба — огоҳлантириш бериш;

иккинчи маротаба — бир томонлама тартибда шартномани бекор қилган ҳолда дорихонани реимбурсация дастуридан чиқариш ҳуқуқига эга.

Бунда реимбурсация дастуридан чиқарилган дорихона ходимларининг ахборот дастурига кириши тўхтатилади ва хабарнома берилган кундан кейин берилган дори воситалари учун тўлов амалга оширилмайди.

3-боб. Реимбурсация дастурида дори воситаларининг тайинланиши

18. Реимбурсация дастури асосида беморларга дори воситаларини тайинлаш Жамғарма билан шартномавий муносабатлар ўрнатган бирламчи тиббий-санитария муассасаси шифокори томонидан амалга оширилади. Бунда Жамғарма билан тузилган шартнома мазкур муассаса ва унда фаолият юритаётган шифокорларни ахборот дастурида рўйхатдан ўтказиш учун асос бўлади.

19. Бирламчи тиббий-санитария муассасаси раҳбари реимбурсация дастури доирасида рецепт ёзиш ваколати берилган шифокорлар ва электрон рецептларни тасдиқлаш ваколати берилган ДФҲ аъзолари рўйхатини ахборот дастурига тегишли маълумотлар киритилиши учун Жамғармага тақдим этади.

4-боб. Реимбурсация дастури доирасида электрон рецепт шакллантириш ва уни узатиш

20. Электрон рецепт тиббий ахборот тизимида шифокор томонидан тегишли ёзувлари мавжуд бўлган бемор учун расмийлаштирилади. Электрон рецептда ҳар бир ташхис бўйича учтагача дори воситаси кўрсатилиши мумкин.

Электрон рецептда қуйидаги маълумотлар акс эттирилиши зарур:

бирламчи тиббий-санитария муассасасининг номи;

электрон рецепт рақами ва берилган сана;

беморнинг ЖШШИР, фамилияси, исми ва отасининг исми, тугилган санаси;

ХКТга мувофиқ қўйилган ташхис;

дори воситасининг ХПН бўйича номланиши, рақами (электрон рецепт рақамига боғланган ҳолда), шакли, дозаси, фойдаланиш усули, даволаниш курсининг давомийлиги (сурункали касалликка чалинган беморлар учун бир ойдан ошмаган ҳолда);

шифокорнинг фамилияси, исми ва отасининг исми ҳамда телефон рақами;

электрон рецептни тасдиқлаган шифокорнинг фамилияси, исми ва отасининг исми.

21. Электрон рецептнинг амал қилиш муддати расмийлаштирилган кундан бошлаб етти календарь кунини ташкил этади.

22. Реимбурсация дастури доирасида дори воситалари беморга Жамғарма билан шартнома тузган дорихоналар орқали электрон рецепт асосида бепул берилади.

23. Шифокор томонидан расмийлаштирилган электрон рецепт ўрнатилган тартибда тасдиқланганидан сўнг ахборот дастури орқали Жамғарма билан шартнома тузган дорихоналарга узатилади ҳамда бемор (унинг қонуний вакили ёки бириктирилган патронаж ҳамшираси)нинг мобил телефон рақамига мазкур рецептнинг рақами ва санаси акс эттирилган СМС-хабарнома автоматик равишда юборилади.

24. Бемор (унинг қонуний вакили ёки бириктирилган патронаж ҳамшираси) электрон рецепт асосида дори воситасини олиш учун дорихонага мурожаат қилиб ушбу электрон рецепт рақамини маълум қилганидан сўнг дорихона ходими томонидан ахборот дастурида мазкур электрон рецепт бўйича дори берилиши тўғрисида амалиёт бажарилади ҳамда бемор (унинг қонуний вакили ёки бириктирилган патронаж ҳамшира) мобил телефон рақамига СМС-хабарнома орқали махсус код юборилади.

25. Дорихона ходими СМС-хабарнома орқали юборилган махсус кодни бемордан сўрайди ва ахборот дастурига киритади, киритилган махсус код ахборот дастури томонидан қабул қилинганидан сўнг реимбурсация дастурига киритилган энг паст чекланган қоплаш қийматига эга бўлган дори воситаси бемор (унинг қонуний вакили ёки бириктирилган патронаж ҳамшираси)га берилади ҳамда ахборот дастурида дори воситаси берилганлиги дорихона ходими томонидан тасдиқланади ва мазкур электрон рецепт ёпилади.

5-боб. Берилган дори воситалари бўйича харажатларни қоплаш

26. Реимбурсация дастурида иштирок этувчи дорихоналарнинг берилган дори воситалари бўйича сарф-харажатлари мазкур дори воситаларининг ҳақиқий сотув нархлари акс эттирилган ҳисоб-фактуралар асосида Жамғарма томонидан чекланган қоплаш қиймати доирасида тўлаб берилади.

27. Реимбурсация дастури доирасида берилган дори воситаларининг ҳисобини юритиш ахборот дастури орқали автоматик тарзда шакллантириладиган ҳисоботлар асосида амалга оширилади.

28. Реимбурсация дастури бўйича тўловларни олиш учун дорихона ҳафталик ёки ойлик асосда берилган дори воситасининг ҳақиқий сотув нархи акс эттирилган, электрон рецепт рақамига боғланган дори воситаси рақами ва мазкур электрон рецептга мувофиқ дори воситасининг тайинланган миқдоридан берилган қисми кўрсатилган ҳисоб-фактурани Жамғармага юборади.

Бунда дорихона раҳбари ҳисоб-фактурада акс эттирилган маълумотларнинг тўғрилиги ва ҳаққонийлиги ҳамда ўз вақтида Жамғармага узатилишига жавобгар ҳисобланади.

29. Ҳисоб-фактура келиб тушган кундан бошлаб Жамғарма ундаги маълумотларни беш иш куни ичида кўриб чиқади. Бунда дорихона билан тузилган шартнома шартларининг бажарилиши ўрганиб чиқилади ҳамда ҳисоб-фактурада акс эттирилган сарф-харажатларни тўлиқ қоплаш, қисман қоплаш ёки қоплашни рад этиш тўғрисида қарор қабул қилинади.

30. Жамғарма томонидан сарф-харажатларни тўлиқ қоплаш тўғрисидаги қарор ҳисоб-фактурани қабул қилиш орқали амалга оширилади. Харажатларни қисман қоплаш ёки рад этиш тўғрисида қарор қабул қилинган тақдирда ҳисоб-фактура дорихонага қайтарилади ва рад этишнинг асослари кўрсатилади.

Дорихона харажатларни қисман қоплаш ёки рад этиш учун асос бўлган сабабларни бартараф этиши ва харажатлар қопланиши учун ҳисоб-фактурани беш иш куни ичида такроран тақдим этиш ҳуқуқига эга.

31. Ахборот дастурида реимбурсация дастури учун режалаштирилган маблағларнинг ойлик режаси шакллантирилади.

32. Жамғарма реимбурсация дастури учун режалаштирилган маблағларни бошқариш ва назорат қилишни амалга оширади. Мазкур маблағларни бирламчи тиббий-санитария ёрдами муассасалари кесимида тақсимлайди, қайта тақсимлайди ҳамда электрон рецептлар расмийлаштирилишини доимий мониторинг қилади.

6-боб. Якунловчи қоидалар

33. Ўзбекистон Республикаси Соғлиқни сақлаш вазирлиги Иқтисодиёт ва молия вазирлиги ҳамда Жамғарма билан келишган ҳолда реимбурсация дастурини жорий этиш ва юритилишида юзага келадиган муаммоларни ечиш ҳамда ушбу ҳужжатда тартибга солинмаган масалаларни ҳал қилиш ваколатига эга.

34. Жамғарма билан шартнома тузган дорихона ва тиббиёт муассасалари раҳбарлари ахборот дастурига маълумотларнинг тўғри киритилиши, ахборот дастуридан тўғри ва мақсадли фойдаланишга, шунингдек, ўз ходимлари томонидан йўл қўйиладиган хатолик учун жавобгардир.

35. Мазкур Низом талаблари бузилишида айбдор бўлган шахслар қонунчилик ҳужжатларида белгиланган тартибда жавобгар бўлади.

Ўзбекистон Республикасининг Бош вазири А. АРИПОВ

Тошкент ш.,

2024 йил 2 октябрь,

619-сон

(Қонунчилик маълумотлари миллий базаси, 05.10.2024 й., 09/24/619/0783-сон; 23.01.2026 й., 07/26/19/0067-сон; 03.07.2026 й., 09/26/353/0680-сон; 16.09.2026 й., 06/26/191/0937-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

Kasalliklarni ambulator sharoitda davolashda dori vositalari xarajatlarini qoplash boʻyicha reimbursatsiya dasturi toʻgʻrisidagi nizomni tasdiqlash haqida

Aholiga ambulator tibbiy yordam koʻrsatish samaradorligini oshirish, sohaga bosqichma-bosqich davlat tibbiy sugʻurtasi mexanizmlarini joriy etish hamda kasalliklarni davolashda dori vositalari xarajatlarini qoplash boʻyicha reimbursatsiya dasturini joriy qilish maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Prezidentining “Sogʻliqni saqlash tizimini tashkil etishning yangi modeli va davlat tibbiy sugʻurtasi mexanizmlarini Sirdaryo viloyatida joriy etish chora-tadbirlari toʻgʻrisida” 2020-yil 12-noyabrdagi PQ-4890-son qaroriga asosan 2022-yildan Sirdaryo viloyatida;

Oʻzbekiston Respublikasi Prezidentining “Oʻzbekiston-2030” strategiyasini 2023-yilda sifatli va oʻz vaqtida amalga oshirish chora-tadbirlari toʻgʻrisida” 2023-yil 11-sentabrdagi PQ-300-son qaroriga asosan 2023-yil 1-iyuldan Toshkent shahrida aholining eng koʻp murojaatlariga sabab boʻlgan surunkali kasalliklar bilan dispanser nazoratida turgan bemorlarni reimbursatsiya dasturi doirasida 11 turdagi dori vositalari bilan taʼminlash tizimi tajriba-sinov tariqasida yoʻlga qoʻyilganligi maʼlumot uchun qabul qilinsin.

2. Quyidagilarni nazarda tutuvchi Kasalliklarni ambulator sharoitda davolashda dori vositalari xarajatlarini qoplash boʻyicha reimbursatsiya dasturi toʻgʻrisidagi nizom ilovaga muvofiq tasdiqlansin:

shifokor tomonidan reimbursatsiya dasturi doirasida dori vositalarini tayinlash;

shifokor tomonidan rasmiylashtirilgan elektron retsept asosida dorixonalar tomonidan dori vositalarini bemorlarga bepul berish;

elektron retsept asosida dorixonalar tomonidan berilgan dori vositalari qiymatini Davlat budjeti mablagʻlari hisobidan qoplash tartibi.

3. Sogʻliqni saqlash vazirligi:

bir oy muddatda manfaatdor vazirlik va idoralar bilan birgalikda oʻzlari qabul qilgan normativ-huquqiy hujjatlarni ushbu qarorga muvofiqlashtirsin;

ikki oy muddatda reimbursatsiya dasturini davlat tibbiy sugʻurtasi mexanizmlari joriy etilgan hududlarda bosqichma-bosqich yoʻlga qoʻyish choralarini koʻrsin.

4. Belgilansinki:

shifokor tomonidan rasmiylashtirilgan elektron retsept boʻyicha davlat tomonidan kafolatlangan tibbiy xizmatlar va dori vositalari paketiga kiritilgan dori vositalari bemorlarga dorixonalar tomonidan reimbursatsiya dasturi asosida bepul beriladi;

reimbursatsiya dasturi asosida beriladigan dori vositalari boʻyicha dorixonalarning xarajatlari Davlat budjeti mablagʻlari hisobidan Davlat tibbiy sugʻurtasi jamgʻarmasi (keyingi oʻrinlarda — Jamgʻarma) orqali qoplab beriladi. Bunda Jamgʻarma bilan dorixonalar oʻrtasida toʻgʻridan-toʻgʻri shartnoma tuziladi va dorixonalarning xarajatlarini qoplash uchun toʻlovlar gʻaznachilik xizmati organlari orqali yuridik majburiyat rasmiylashtirilgan holda har oyda kamida bir marotaba moliyalashtiriladi;

reimbursatsiya dasturini amalga oshirishda bemor yoki uning qonuniy vakilining mobil telefon raqamiga yuboriladigan SMS-xabarlar boʻyicha xarajatlar reimbursatsiya dasturiga ajratilgan mablagʻlar hisobidan qoplanadi.

5. Sogʻliqni saqlash vazirligi huzuridagi “Farmatsevtika mahsulotlari xavfsizligi markazi” davlat muassasasi reimbursatsiya dasturi asosida beriladigan dori vositalarining chakana savdoda mavjudligi (defektura) yuzasidan doimiy monitoring oʻtkazib borsin hamda monitoring natijalarini har oyning 5-sanasiga qadar Jamgʻarmaga taqdim etilishini taʼminlasin.

6. Oʻzbekiston Milliy teleradiokompaniyasi, Oʻzbekiston Milliy axborot agentligi va boshqa ommaviy axborot vositalariga ushbu qarorga muvofiq davlat tibbiy sugʻurta mexanizmlari, shu jumladan reimbursatsiya dasturini joriy qilish boʻyicha amalga oshirilayotgan ishlarni keng yoritish tavsiya etilsin.

7. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov va Oʻzbekiston Respublikasi sogʻliqni saqlash vaziri vazifasini bajaruvchi A.A. Xudayarov zimmasiga yuklansin.

Vazirlar Mahkamasining 2024-yil 2-oktabrdagi 619-son qaroriga ILOVA

Kasalliklarni ambulator sharoitda davolashda dori vositalari xarajatlarini qoplash boʻyicha reimbursatsiya dasturi toʻgʻrisida

1-bob. Umumiy qoidalar

1. Mazkur Nizom bemorlarni ambulator sharoitda davolanishi uchun shifokor tomonidan rasmiylashtirilgan elektron retsept asosida dorixonalar orqali dori vositalarini berish va berilgan dori vositalari qiymatini Davlat budjeti mablagʻlari hisobidan qoplash (reimbursatsiya) tartibini belgilaydi.

2. Ushbu Nizom aholiga ambulator tibbiy yordam koʻrsatishda dori taʼminoti shaffofligi va natijadorligini taʼminlash maqsadida dori vositalarining chakana savdosi bilan shugʻullanish uchun tegishli litsenziyaga ega hamda Davlat tibbiy sugʻurtasi jamgʻarmasi (keyingi oʻrinlarda — Jamgʻarma) bilan shartnoma tuzgan dorixonalarga (keyingi oʻrinlarda — dorixona) nisbatan tatbiq etiladi.

3. Mazkur Nizomda quyidagi asosiy tushunchalar qoʻllaniladi:

ambulator tibbiy yordam — kechayu-kunduz kuzatuvga muhtoj boʻlmagan bemorlarga koʻrsatiladigan tibbiy yordam;

doimiy faoliyatdagi hayʼat (keyingi oʻrinlarda — DFH) — davolash-profilaktika muassasalarida standartlar va klinik protokollar asosida kasalliklarni tashxislash va davolash uchun zarur boʻlgan dori vositalari, tibbiy jihozlar, sarflov materiallari, tibbiy asbob-uskunalar hamda reagentlarni xarid qilish, tarqatish va ulardan samarali foydalanish, shuningdek, elektron retseptlarni tasdiqlashga masʼul tuzilma;

dori vositasining xalqaro patentlanmagan nomi (keyingi oʻrinlarda — XPN) — Jahon sogʻliqni saqlash tashkiloti tomonidan dori vositasi tarkibidagi faol dori moddasining (substansiya) nomi. XPN orqali dori vositasi identifikatsiya qilinadi;

reimbursatsiya dasturi — bemorlarni ambulator sharoitda davolash uchun shifokor tomonidan rasmiylashtirilgan elektron retsept asosida dorixonalar orqali dori vositalarini berish va berilgan dori vositalari qiymatini Jamgʻarma tomonidan qoplash dasturi;

tibbiy axborot tizimi (keyingi oʻrinlarda — axborot tizimi) — tibbiyot tashkilotlariga murojaat qilgan aholining salomatligi, shifokor koʻrigi va instrumental-laborator tekshiruvlar natijalarini aks ettirish, jamlash hamda tibbiy hujjatlarni elektron shaklda yaratishni va ularning avtomatlashtirilgan aylanmasini taʼminlaydigan elektron tizim;

xalqaro kasalliklar tasnifi (keyingi oʻrinlarda — XKT) — kasalliklar va sogʻliq bilan bogʻliq boshqa muammolarning xalqaro statistik tasnifi;

elektron axborot dasturi (keyingi oʻrinlarda — axborot dasturi) — reimbursatsiya dasturi va elektron retsept bilan bogʻliq barcha jarayonlarni boshqarish, maʼlumot almashish, tegishli hisobotlarni shakllantirish kabi funksiyalarni amalga oshiruvchi axborot dasturi;

elektron retsept — shifokor tomonidan dorixonaning farmatsevtik maʼlumotga ega boʻlgan mutaxassisiga dori vositasini berish hamda uni qoʻllash usuli toʻgʻrisidagi koʻrsatmasi elektron shaklda qayd etilgan, elektron raqamli imzo bilan tasdiqlangan va uni identifikatsiyalash imkonini beradigan boshqa rekvizitlarga ega boʻlgan elektron hujjat;

qonuniy vakil — bemorning oila aʼzosi yoki bemorga vasiylik qilishga tayinlangan shaxs (ijtimoiy xodim);

cheklangan qoplash qiymati — reimbursatsiya dasturi asosida berilayotgan dori vositasining XPN, shakli va dozasi boʻyicha har bir birligi uchun qoplab berilish mumkin boʻlgan eng yuqori summa.

4. Mazkur Nizom talablari asosida beriladigan dori vositalari roʻyxatiga Oʻzbekiston Respublikasi hududida tibbiy amaliyotda foydalanish uchun tasdiqlangan va Davlat roʻyxatidan oʻtkazilganligi toʻgʻrisidagi guvohnomaning amal qilish muddati davomida ishlab chiqarilgan tayyor dori vositalari kiritiladi.

5. Reimbursatsiya dasturiga kiritiladigan kasalliklar va ularni davolashda beriladigan dori vositalari roʻyxati Oʻzbekiston Respublikasi Sogʻliqni saqlash vazirligi tomonidan belgilanadi, ularning cheklangan qoplash qiymatini belgilash va toʻlovlarni amalga oshirish tartibi Jamgʻarma Kuzatuv kengashi tomonidan tasdiqlanadi.

6. Reimbursatsiya dasturi asosida beriladigan dori vositasining XPN, shakli va dozasi uchun cheklangan qoplash qiymati Jamgʻarma huzurida tashkil etiladigan komissiya tomonidan belgilanadi.

7. Reimbursatsiya dasturi asosida beriladigan dori vositalari boʻyicha dorixonalarning xarajatlari Davlat budjeti mablagʻlari hisobidan Jamgʻarma tomonidan cheklangan qoplash qiymati doirasida qoplab beriladi. Bunda dorixonalarning xarajatlarini qoplash uchun toʻlovlar gʻaznachilik xizmati organlari orqali yuridik majburiyat asosida har oyda kamida bir marotaba amalga oshiriladi.

8. Reimbursatsiya dasturining budjeti Jamgʻarma budjetining bir qismi hisoblanib, ushbu dasturga kiritilgan dori vositalari, tibbiy buyumlar va sarflov vositalarini aholiga taqdim qilish uchun talab etiladigan mablagʻlar yigʻindisidan iborat boʻladi. Bunda reimbursatsiya dasturi budjeti respublika darajasida alohida jamlanadi.

9. Reimbursatsiya dasturi doirasida elektron retseptlar toʻgʻri va asosli shakllantirilishi, dorixonalarga uzatilishi, ular asosida dori vositalarining berilishi hamda berilgan dori vositalari boʻyicha xarajatlar qoplanishini nazorat qilish Jamgʻarma tomonidan axborot dasturi orqali yoki tegishli muassasa (dorixona)ga tashrif buyurgan holda birlamchi hujjatlarni oʻrganish asosida amalga oshiriladi.

Bunda Jamgʻarmaga shaxsga doir maʼlumotlarni, shu jumladan, barcha tibbiy maʼlumotlarni axborot tizimidan toʻgʻridan-toʻgʻri olish va qayta ishlash vakolati beriladi.

10. Reimbursatsiya dasturi doirasida elektron retsept bilan bogʻliq jarayonlarni boshqarish, maʼlumot almashish, tegishli hisobotlarni shakllantirish kabi funksiyalarni amalga oshiruvchi axborot dasturi Jamgʻarma tomonidan joriy etiladi va boshqariladi hamda manfaatdor vazirlik va idoralarning axborot tizimlari bilan oʻrnatilgan tartibda integratsiya qilinadi.

11. Reimbursatsiya dasturi doirasida beriladigan dori vositalarining davlat roʻyxatidan (shu jumladan qayta roʻyxatdan) oʻtganlik sertifikatini amal qilish muddati toʻgʻrisidagi maʼlumotlar, shuningdek, foydalanishi taqiqlangan hamda qaytarilgan yoki karantinga oʻtkazilgan dori vositalarining miqdori (partiyasi) yoki qatori (seriyalari) toʻgʻrisidagi maʼlumotlar axborot dasturiga Oʻzbekiston Respublikasi Sogʻliqni saqlash vazirligi huzuridagi “Farmatsevtika mahsulotlari xavfsizligi markazi” davlat muassasasining axborot tizimi orqali oʻzaro integratsiya asosida avtomatik tarzda uzatilishi taʼminlanadi.

2-bob. Reimbursatsiya tizimida dorixonalarning ishtiroki

12. Reimbursatsiya tizimida ishtirok etadigan dorixonalarga mazkur dastur asosida beriladigan dori vositalarining doimiy mavjud boʻlishini kafolatlash va chakana savdo tarmoqlarida uzluksiz mavjudligini taʼminlash masʼuliyati yuklatiladi.

Bunda dorixona dori vositalarining yetkazib berilishidagi uzilish holatlari toʻgʻrisida Jamgʻarmani yetti kun avval xabardor qilishi lozim.

13. Tayinlangan dori vositasining elektron retseptda koʻrsatilgan XPN, shakli va dozasiga mos holda hamda sotuvda mavjud reimbursatsiya dasturiga kiritilgan dori vositalarining eng past cheklangan qoplash qiymati doirasida berilishiga dorixona xodimi (farmatsevt) javobgar boʻladi.

14. Jamgʻarma bilan tuzilgan shartnomaga asosan dorixona axborot tizimiga ulanadi.

15. Dorixona shartnoma tuzilgan sanadan boshlab besh ish kuni ichida reimbursatsiya tizimida ishtirok etuvchi oʻz filiallari hamda axborot dasturida ishlashga ruxsat berilgan xodimlari toʻgʻrisidagi maʼlumotni Jamgʻarmaga taqdim etadi.

16. Reimbursatsiya dasturini tartibga soluvchi hujjatlarga oʻzgartirish kiritilgan taqdirda, Jamgʻarma bilan dorixonalar oʻrtasida tuzilgan shartnomalarga tegishli oʻzgartirish va qoʻshimchalar kiritilishi lozim boʻladi. Koʻrsatilgan hujjatlarga kiritilgan oʻzgartirish va qoʻshimchalar toʻgʻrisida Jamgʻarma dorixonalarni yozma yoki elektron shaklda besh ish kuni ichida ogohlantiradi.

17. Dorixona tomonidan reimbursatsiya dasturi asosida beriladigan dori vositalari uchun bemordan toʻlov olinganligi hamda reimbursatsiya dasturi talablariga rioya etilmaslik holati aniqlanganda Jamgʻarma:

birinchi marotaba — ogohlantirish berish;

ikkinchi marotaba — bir tomonlama tartibda shartnomani bekor qilgan holda dorixonani reimbursatsiya dasturidan chiqarish huquqiga ega.

Bunda reimbursatsiya dasturidan chiqarilgan dorixona xodimlarining axborot dasturiga kirishi toʻxtatiladi va xabarnoma berilgan kundan keyin berilgan dori vositalari uchun toʻlov amalga oshirilmaydi.

3-bob. Reimbursatsiya dasturida dori vositalarining tayinlanishi

18. Reimbursatsiya dasturi asosida bemorlarga dori vositalarini tayinlash Jamgʻarma bilan shartnomaviy munosabatlar oʻrnatgan birlamchi tibbiy-sanitariya muassasasi shifokori tomonidan amalga oshiriladi. Bunda Jamgʻarma bilan tuzilgan shartnoma mazkur muassasa va unda faoliyat yuritayotgan shifokorlarni axborot dasturida roʻyxatdan oʻtkazish uchun asos boʻladi.

19. Birlamchi tibbiy-sanitariya muassasasi rahbari reimbursatsiya dasturi doirasida retsept yozish vakolati berilgan shifokorlar va elektron retseptlarni tasdiqlash vakolati berilgan DFH aʼzolari roʻyxatini axborot dasturiga tegishli maʼlumotlar kiritilishi uchun Jamgʻarmaga taqdim etadi.

4-bob. Reimbursatsiya dasturi doirasida elektron retsept shakllantirish va uni uzatish

20. Elektron retsept tibbiy axborot tizimida shifokor tomonidan tegishli yozuvlari mavjud boʻlgan bemor uchun rasmiylashtiriladi. Elektron retseptda har bir tashxis boʻyicha uchtagacha dori vositasi koʻrsatilishi mumkin.

Elektron retseptda quyidagi maʼlumotlar aks ettirilishi zarur:

birlamchi tibbiy-sanitariya muassasasining nomi;

elektron retsept raqami va berilgan sana;

bemorning JSHSHIR, familiyasi, ismi va otasining ismi, tugilgan sanasi;

XKTga muvofiq qoʻyilgan tashxis;

dori vositasining XPN boʻyicha nomlanishi, raqami (elektron retsept raqamiga bogʻlangan holda), shakli, dozasi, foydalanish usuli, davolanish kursining davomiyligi (surunkali kasallikka chalingan bemorlar uchun bir oydan oshmagan holda);

shifokorning familiyasi, ismi va otasining ismi hamda telefon raqami;

elektron retseptni tasdiqlagan shifokorning familiyasi, ismi va otasining ismi.

21. Elektron retseptning amal qilish muddati rasmiylashtirilgan kundan boshlab yetti kalendar kunini tashkil etadi.

22. Reimbursatsiya dasturi doirasida dori vositalari bemorga Jamgʻarma bilan shartnoma tuzgan dorixonalar orqali elektron retsept asosida bepul beriladi.

23. Shifokor tomonidan rasmiylashtirilgan elektron retsept oʻrnatilgan tartibda tasdiqlanganidan soʻng axborot dasturi orqali Jamgʻarma bilan shartnoma tuzgan dorixonalarga uzatiladi hamda bemor (uning qonuniy vakili yoki biriktirilgan patronaj hamshirasi)ning mobil telefon raqamiga mazkur retseptning raqami va sanasi aks ettirilgan SMS-xabarnoma avtomatik ravishda yuboriladi.

24. Bemor (uning qonuniy vakili yoki biriktirilgan patronaj hamshirasi) elektron retsept asosida dori vositasini olish uchun dorixonaga murojaat qilib ushbu elektron retsept raqamini maʼlum qilganidan soʻng dorixona xodimi tomonidan axborot dasturida mazkur elektron retsept boʻyicha dori berilishi toʻgʻrisida amaliyot bajariladi hamda bemor (uning qonuniy vakili yoki biriktirilgan patronaj hamshira) mobil telefon raqamiga SMS-xabarnoma orqali maxsus kod yuboriladi.

25. Dorixona xodimi SMS-xabarnoma orqali yuborilgan maxsus kodni bemordan soʻraydi va axborot dasturiga kiritadi, kiritilgan maxsus kod axborot dasturi tomonidan qabul qilinganidan soʻng reimbursatsiya dasturiga kiritilgan eng past cheklangan qoplash qiymatiga ega boʻlgan dori vositasi bemor (uning qonuniy vakili yoki biriktirilgan patronaj hamshirasi)ga beriladi hamda axborot dasturida dori vositasi berilganligi dorixona xodimi tomonidan tasdiqlanadi va mazkur elektron retsept yopiladi.

5-bob. Berilgan dori vositalari boʻyicha xarajatlarni qoplash

26. Reimbursatsiya dasturida ishtirok etuvchi dorixonalarning berilgan dori vositalari boʻyicha sarf-xarajatlari mazkur dori vositalarining haqiqiy sotuv narxlari aks ettirilgan hisob-fakturalar asosida Jamgʻarma tomonidan cheklangan qoplash qiymati doirasida toʻlab beriladi.

27. Reimbursatsiya dasturi doirasida berilgan dori vositalarining hisobini yuritish axborot dasturi orqali avtomatik tarzda shakllantiriladigan hisobotlar asosida amalga oshiriladi.

28. Reimbursatsiya dasturi boʻyicha toʻlovlarni olish uchun dorixona haftalik yoki oylik asosda berilgan dori vositasining haqiqiy sotuv narxi aks ettirilgan, elektron retsept raqamiga bogʻlangan dori vositasi raqami va mazkur elektron retseptga muvofiq dori vositasining tayinlangan miqdoridan berilgan qismi koʻrsatilgan hisob-fakturani Jamgʻarmaga yuboradi.

Bunda dorixona rahbari hisob-fakturada aks ettirilgan maʼlumotlarning toʻgʻriligi va haqqoniyligi hamda oʻz vaqtida Jamgʻarmaga uzatilishiga javobgar hisoblanadi.

29. Hisob-faktura kelib tushgan kundan boshlab Jamgʻarma undagi maʼlumotlarni besh ish kuni ichida koʻrib chiqadi. Bunda dorixona bilan tuzilgan shartnoma shartlarining bajarilishi oʻrganib chiqiladi hamda hisob-fakturada aks ettirilgan sarf-xarajatlarni toʻliq qoplash, qisman qoplash yoki qoplashni rad etish toʻgʻrisida qaror qabul qilinadi.

30. Jamgʻarma tomonidan sarf-xarajatlarni toʻliq qoplash toʻgʻrisidagi qaror hisob-fakturani qabul qilish orqali amalga oshiriladi. Xarajatlarni qisman qoplash yoki rad etish toʻgʻrisida qaror qabul qilingan taqdirda hisob-faktura dorixonaga qaytariladi va rad etishning asoslari koʻrsatiladi.

Dorixona xarajatlarni qisman qoplash yoki rad etish uchun asos boʻlgan sabablarni bartaraf etishi va xarajatlar qoplanishi uchun hisob-fakturani besh ish kuni ichida takroran taqdim etish huquqiga ega.

31. Axborot dasturida reimbursatsiya dasturi uchun rejalashtirilgan mablagʻlarning oylik rejasi shakllantiriladi.

32. Jamgʻarma reimbursatsiya dasturi uchun rejalashtirilgan mablagʻlarni boshqarish va nazorat qilishni amalga oshiradi. Mazkur mablagʻlarni birlamchi tibbiy-sanitariya yordami muassasalari kesimida taqsimlaydi, qayta taqsimlaydi hamda elektron retseptlar rasmiylashtirilishini doimiy monitoring qiladi.

6-bob. Yakunlovchi qoidalar

33. Oʻzbekiston Respublikasi Sogʻliqni saqlash vazirligi Iqtisodiyot va moliya vazirligi hamda Jamgʻarma bilan kelishgan holda reimbursatsiya dasturini joriy etish va yuritilishida yuzaga keladigan muammolarni yechish hamda ushbu hujjatda tartibga solinmagan masalalarni hal qilish vakolatiga ega.

34. Jamgʻarma bilan shartnoma tuzgan dorixona va tibbiyot muassasalari rahbarlari axborot dasturiga maʼlumotlarning toʻgʻri kiritilishi, axborot dasturidan toʻgʻri va maqsadli foydalanishga, shuningdek, oʻz xodimlari tomonidan yoʻl qoʻyiladigan xatolik uchun javobgardir.

35. Mazkur Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.

Oʻzbekiston Respublikasining Bosh vaziri A. ARIPOV

Toshkent sh.,

2024-yil 2-oktabr,

619-son

(Qonunchilik maʼlumotlari milliy bazasi, 05.10.2024-y., 09/24/619/0783-son; 23.01.2026-y., 07/26/19/0067-son; 03.07.2026-y., 09/26/353/0680-son; 16.09.2026-y., 06/26/191/0937-son)

lex.uz