📅 2024-yil 4-oktabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 4 октябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 4 октября 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 4 October 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Раҳбар кадрларни баҳолаш марказини ташкил этиш тўғрисида
Давлат фуқаролик хизматини салоҳиятли ва истиқболли раҳбар кадрлар билан таъминлашда номзодларнинг билим ва кўникмаларини замонавий технологиялар асосида баҳолаш ҳамда натижаларини таҳлил қилиш, шунингдек, раҳбар кадрлар фаолияти самарадорлигини ошириш юзасидан манзилли чоралар кўриш мақсадида Вазирлар Маҳкамаси қарор қилади:
1. Ўзбекистон Республикаси Президенти ҳузуридаги Бошқарув самарадорлиги агентлигининг (кейинги ўринларда — Агентлик) таклифига асосан Агентлик муассислигида Раҳбар кадрларни баҳолаш маркази (кейинги ўринларда — Марказ) ташкил этилсин.
2. Қуйидагилар Марказнинг асосий вазифалари этиб белгилансин:
ижтимоий-психологик тадқиқотлар асосида давлат фуқаролик хизматчилари учун базавий, алоҳида лавозим ёки лавозимлар гуруҳи учун компетенциялар модели ҳамда индикаторларини ишлаб чиқиш;
давлат фуқаролик хизматчиларини шахсий-профессионал диагностика қилиш, компетенциялар модели асосида комплекс баҳолаш;
компетенцияларни баҳолаш жараёнида фойдаланиш учун доимий равишда янги услубларни ишлаб чиқиш, ўзлаштириш ва жорий қилиш;
компетенцияларни баҳолаш натижалари асосида раҳбар кадрлар учун шахсий-профессионал ривожланиш траекториясини ишлаб чиқиш ва замонавий технологиялардан фойдаланган ҳолда амалга ошириш;
раҳбарлик лавозимига номзодларнинг умумий касбий билими, қадриятлари ва ақлий салоҳиятини аниқлаш бўйича тест синовларини ҳамда психологик сўровномалар ўтказиш;
раҳбар кадрлар фаолияти самарадорлигини баҳолаш ва мониторинг қилиш, кадрларга бўлган эҳтиёжни прогноз қилиш, уларни саралаб олиш ва жой-жойига қўйиш жараёнларига рақамли технологияларни ва замонавий усулларни кенг жорий этиш;
фаолиятининг асосий йўналишлари бўйича эксперт-таҳлилий фаолият, илмий тадқиқот ва изланишларни олиб бориш.
3. Қуйидагилар Марказ фаолиятини молиялаштириш манбалари этиб белгилансин:
Давлат хизматини ривожлантиришни қўллаб-қувватлаш жамғармаси маблағлари;
шартнома асосида хизматлар кўрсатишдан тушадиган тушумлар;
халқаро молия институтлари ва хорижий ҳукумат молия ташкилотларининг грантлари ва техник кўмаклари;
жисмоний ва юридик шахсларнинг ҳомийлик хайриялари;
вақтинча бўш турган маблағларни белгиланган тартибда тижорат банклари депозитларига жойлаштиришдан тушадиган даромадлар;
қонунчилик ҳужжатлари билан тақиқланмаган бошқа манбалар.
4. Белгилансинки:
Марказ давлат муассасаси шаклидаги юридик шахс ҳисобланади, Ўзбекистон Республикаси Давлат герби тасвири туширилган муҳрга ва бланкаларга, Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасида ҳисобварақларига эга бўлади;
Марказнинг устави, ташкилий тузилмаси, шу жумладан, штат бирликлари сони ва ходимларнинг меҳнатга ҳақ тўлаш ва моддий рағбатлантириш шартлари Агентлик томонидан белгиланади. Марказнинг штатлар жадвали ва харажатлар сметаси Ўзбекистон Республикаси Иқтисодиёт ва молия вазирлиги томонидан рўйхатдан ўтказилади;
Марказга Агентлик директори томонидан лавозимга тайинланадиган ва лавозимдан озод этиладиган директор раҳбарлик қилади;
Марказ директори ўринбосари ва ходимлари Агентлик билан келишилган ҳолда, Марказ директори томонидан лавозимга тайинланади ва лавозимдан озод этилади;
Марказ томонидан давлат фуқаролик хизматчилари компетенцияларини баҳолаш шартнома асосида амалга оширилади;
Марказга ҳомийлик ва грант маблағлари ҳисобидан берилган асосий воситаларни сотишдан тушган пул маблағлари (ушбу пул маблағлари ҳисобидан сотиб олинган асосий воситаларни сотишдан тушган пул маблағлари) тўлиқ миқдорда Марказ ихтиёрида қолади ҳамда мақсадли равишда унинг моддий-техника базасини мустаҳкамлаш ва ривожлантириш, шу жумладан транспорт воситаларини харид қилиш учун йўналтирилади.
5. Марказга қуйидаги ҳуқуқлар берилсин:
ўз фаолиятини самарали амалга ошириши учун тегишли соҳа бўйича малакали мутахассислар ва экспертларни, шу жумладан, хорижий экспертларни белгиланган тартибда тўғридан-тўғри шартнома асосида жалб қилиш;
Агентлик ва бошқа буюртмачилар билан тўғридан-тўғри тузиладиган хизмат кўрсатиш шартномаси асосида фаолиятининг асосий йўналишлари доирасида даромад келтирадиган фаолият билан шуғулланиш, давлат фуқаролик хизматида замонавий рақамли технологияларни жорий этиш бўйича ахборот дастурларини ишлаб чиқиш.
6. Марказ Тошкент шаҳар ҳокимлиги ҳузуридаги «Муниципал активларни бошқариш маркази» ДУКга тегишли Тошкент шаҳар, Чилонзор тумани, Ислом Каримов кўчаси, 55-уй манзилидаги бинонинг 1-қаватида текин фойдаланиш ҳуқуқи асосида жойлаштирилсин.
7. Марказга битта енгил автомашина ва битта микроавтобус сақлаш учун лимит ажратилсин.
8. Агентлик бир ой муддатда Марказнинг устави, ташкилий тузилмаси, шу жумладан, штат бирликлари сони ва ходимларнинг меҳнатга ҳақ тўлаш ва моддий рағбатлантириш шартларини белгилаш ҳамда Марказни давлат рўйхатидан ўтказиш чораларини кўрсин.
9. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2024 йил 4 октябрь,
629-сон
Oʻzbekiston Respublikasi Vazirlar Mahkamasining
qarori
Rahbar kadrlarni baholash markazini tashkil etish toʻgʻrisida
Davlat fuqarolik xizmatini salohiyatli va istiqbolli rahbar kadrlar bilan taʼminlashda nomzodlarning bilim va koʻnikmalarini zamonaviy texnologiyalar asosida baholash hamda natijalarini tahlil qilish, shuningdek, rahbar kadrlar faoliyati samaradorligini oshirish yuzasidan manzilli choralar koʻrish maqsadida Vazirlar Mahkamasi qaror qiladi:
1. Oʻzbekiston Respublikasi Prezidenti huzuridagi Boshqaruv samaradorligi agentligining (keyingi oʻrinlarda — Agentlik) taklifiga asosan Agentlik muassisligida Rahbar kadrlarni baholash markazi (keyingi oʻrinlarda — Markaz) tashkil etilsin.
2. Quyidagilar Markazning asosiy vazifalari etib belgilansin:
ijtimoiy-psixologik tadqiqotlar asosida davlat fuqarolik xizmatchilari uchun bazaviy, alohida lavozim yoki lavozimlar guruhi uchun kompetensiyalar modeli hamda indikatorlarini ishlab chiqish;
davlat fuqarolik xizmatchilarini shaxsiy-professional diagnostika qilish, kompetensiyalar modeli asosida kompleks baholash;
kompetensiyalarni baholash jarayonida foydalanish uchun doimiy ravishda yangi uslublarni ishlab chiqish, oʻzlashtirish va joriy qilish;
kompetensiyalarni baholash natijalari asosida rahbar kadrlar uchun shaxsiy-professional rivojlanish trayektoriyasini ishlab chiqish va zamonaviy texnologiyalardan foydalangan holda amalga oshirish;
rahbarlik lavozimiga nomzodlarning umumiy kasbiy bilimi, qadriyatlari va aqliy salohiyatini aniqlash boʻyicha test sinovlarini hamda psixologik soʻrovnomalar oʻtkazish;
rahbar kadrlar faoliyati samaradorligini baholash va monitoring qilish, kadrlarga boʻlgan ehtiyojni prognoz qilish, ularni saralab olish va joy-joyiga qoʻyish jarayonlariga raqamli texnologiyalarni va zamonaviy usullarni keng joriy etish;
faoliyatining asosiy yoʻnalishlari boʻyicha ekspert-tahliliy faoliyat, ilmiy tadqiqot va izlanishlarni olib borish.
3. Quyidagilar Markaz faoliyatini moliyalashtirish manbalari etib belgilansin:
Davlat xizmatini rivojlantirishni qoʻllab-quvvatlash jamgʻarmasi mablagʻlari;
shartnoma asosida xizmatlar koʻrsatishdan tushadigan tushumlar;
xalqaro moliya institutlari va xorijiy hukumat moliya tashkilotlarining grantlari va texnik koʻmaklari;
jismoniy va yuridik shaxslarning homiylik xayriyalari;
vaqtincha boʻsh turgan mablagʻlarni belgilangan tartibda tijorat banklari depozitlariga joylashtirishdan tushadigan daromadlar;
qonunchilik hujjatlari bilan taqiqlanmagan boshqa manbalar.
4. Belgilansinki:
Markaz davlat muassasasi shaklidagi yuridik shaxs hisoblanadi, Oʻzbekiston Respublikasi Davlat gerbi tasviri tushirilgan muhrga va blankalarga, Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasida hisobvaraqlariga ega boʻladi;
Markazning ustavi, tashkiliy tuzilmasi, shu jumladan, shtat birliklari soni va xodimlarning mehnatga haq toʻlash va moddiy ragʻbatlantirish shartlari Agentlik tomonidan belgilanadi. Markazning shtatlar jadvali va xarajatlar smetasi Oʻzbekiston Respublikasi Iqtisodiyot va moliya vazirligi tomonidan roʻyxatdan oʻtkaziladi;
Markazga Agentlik direktori tomonidan lavozimga tayinlanadigan va lavozimdan ozod etiladigan direktor rahbarlik qiladi;
Markaz direktori oʻrinbosari va xodimlari Agentlik bilan kelishilgan holda, Markaz direktori tomonidan lavozimga tayinlanadi va lavozimdan ozod etiladi;
Markaz tomonidan davlat fuqarolik xizmatchilari kompetensiyalarini baholash shartnoma asosida amalga oshiriladi;
Markazga homiylik va grant mablagʻlari hisobidan berilgan asosiy vositalarni sotishdan tushgan pul mablagʻlari (ushbu pul mablagʻlari hisobidan sotib olingan asosiy vositalarni sotishdan tushgan pul mablagʻlari) toʻliq miqdorda Markaz ixtiyorida qoladi hamda maqsadli ravishda uning moddiy-texnika bazasini mustahkamlash va rivojlantirish, shu jumladan transport vositalarini xarid qilish uchun yoʻnaltiriladi.
5. Markazga quyidagi huquqlar berilsin:
oʻz faoliyatini samarali amalga oshirishi uchun tegishli soha boʻyicha malakali mutaxassislar va ekspertlarni, shu jumladan, xorijiy ekspertlarni belgilangan tartibda toʻgʻridan-toʻgʻri shartnoma asosida jalb qilish;
Agentlik va boshqa buyurtmachilar bilan toʻgʻridan-toʻgʻri tuziladigan xizmat koʻrsatish shartnomasi asosida faoliyatining asosiy yoʻnalishlari doirasida daromad keltiradigan faoliyat bilan shugʻullanish, davlat fuqarolik xizmatida zamonaviy raqamli texnologiyalarni joriy etish boʻyicha axborot dasturlarini ishlab chiqish.
6. Markaz Toshkent shahar hokimligi huzuridagi “Munitsipal aktivlarni boshqarish markazi” DUKga tegishli Toshkent shahar, Chilonzor tumani, Islom Karimov koʻchasi, 55-uy manzilidagi binoning 1-qavatida tekin foydalanish huquqi asosida joylashtirilsin.
7. Markazga bitta yengil avtomashina va bitta mikroavtobus saqlash uchun limit ajratilsin.
8. Agentlik bir oy muddatda Markazning ustavi, tashkiliy tuzilmasi, shu jumladan, shtat birliklari soni va xodimlarning mehnatga haq toʻlash va moddiy ragʻbatlantirish shartlarini belgilash hamda Markazni davlat roʻyxatidan oʻtkazish choralarini koʻrsin.
9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 4-oktabr,
629-son