📅 2024-yil 5-oktabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 5 октябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 5 октября 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 5 October 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Ярим тайёр чарм экспорти учун йиғимларни ундириш тартибининг ўзгариши муносабати билан Ўзбекистон Республикаси божхона чегараси орқали чарм ва мўйна хом ашёсини олиб чиқишни мониторинг қилиш тартиби тўғрисидаги низомга қўшимча киритиш ҳақида
Ўзбекистон Республикаси Президентининг «Чарм-пойабзал, ипакчилик ва гиламчилик тармоқларини ривожлантиришни янги босқичга олиб чиқиш чора-тадбирлари тўғрисида» 2024 йил 20 майдаги ПҚ-181-сон қарори ижросини таъминлаш мақсадида Вазирлар Маҳкамаси қарор қилади.
1. Ўзбекистон Республикаси Президентининг «Чарм-пойабзал, ипакчилик ва гиламчилик тармоқларини ривожлантиришни янги босқичга олиб чиқиш чора-тадбирлари тўғрисида» 2024 йил 20 майдаги ПҚ-181-сон қарорига кўра ТИФ ТН бўйича 4104 кодига мувофиқ ярим тайёр чармни олиб чиқишда 2024 йил 1 июлдан бошлаб 10 фоиз, лекин бир тоннаси учун 300 АҚШ долларидан кам бўлмаган миқдорда, 2026 йил 1 январдан бошлаб 20 фоиз, лекин бир тоннаси учун 600 АҚШ долларидан кам бўлмаган миқдорда, 2028 йил 1 январдан бошлаб 30 фоиз, лекин бир тоннаси учун 900 АҚШ долларидан кам бўлмаган миқдорда йиғим ундирилиши белгиланганлиги маълумот учун қабул қилинсин.
2. Вазирлар Маҳкамасининг 2019 йил 12 апрелдаги 303-сон қарори билан тасдиқланган Ўзбекистон Республикаси божхона чегараси орқали чарм ва мўйна хом ашёсини олиб чиқишни мониторинг қилиш тартиби тўғрисидаги низомнинг 6-банди тўртинчи хатбошиси «10 фоизи миқдорида» сўзларидан кейин «(ТИФ ТН бўйича 4104 кодига мувофиқ 2024 йил 1 июлдан бошлаб 10 фоиз, лекин бир тоннаси учун 300 АҚШ долларидан кам бўлмаган миқдорда, 2026 йил 1 январдан бошлаб 20 фоиз, лекин бир тоннаси учун 600 АҚШ долларидан кам бўлмаган миқдорда, 2028 йил 1 январдан бошлаб 30 фоиз, лекин бир тоннаси учун 900 АҚШ долларидан кам бўлмаган миқдорда)» сўзлари билан тўлдирилсин.
3. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари Ж.А. Ходжаев ва Савдо-саноат палатаси раиси Д.А. Вахабов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2024 йил 5 октябрь,
642-сон
Oʻzbekiston Respublikasi Vazirlar Mahkamasining
qarori
Yarim tayyor charm eksporti uchun yigʻimlarni undirish tartibining oʻzgarishi munosabati bilan Oʻzbekiston Respublikasi bojxona chegarasi orqali charm va moʻyna xom ashyosini olib chiqishni monitoring qilish tartibi toʻgʻrisidagi nizomga qoʻshimcha kiritish haqida
Oʻzbekiston Respublikasi Prezidentining “Charm-poyabzal, ipakchilik va gilamchilik tarmoqlarini rivojlantirishni yangi bosqichga olib chiqish chora-tadbirlari toʻgʻrisida” 2024-yil 20-maydagi PQ-181-son qarori ijrosini taʼminlash maqsadida Vazirlar Mahkamasi qaror qiladi.
1. Oʻzbekiston Respublikasi Prezidentining “Charm-poyabzal, ipakchilik va gilamchilik tarmoqlarini rivojlantirishni yangi bosqichga olib chiqish chora-tadbirlari toʻgʻrisida” 2024-yil 20-maydagi PQ-181-son qaroriga koʻra TIF TN boʻyicha 4104 kodiga muvofiq yarim tayyor charmni olib chiqishda 2024-yil 1-iyuldan boshlab 10 foiz, lekin bir tonnasi uchun 300 AQSh dollaridan kam boʻlmagan miqdorda, 2026-yil 1-yanvardan boshlab 20 foiz, lekin bir tonnasi uchun 600 AQSh dollaridan kam boʻlmagan miqdorda, 2028-yil 1-yanvardan boshlab 30 foiz, lekin bir tonnasi uchun 900 AQSh dollaridan kam boʻlmagan miqdorda yigʻim undirilishi belgilanganligi maʼlumot uchun qabul qilinsin.
2. Vazirlar Mahkamasining 2019-yil 12-apreldagi 303-son qarori bilan tasdiqlangan Oʻzbekiston Respublikasi bojxona chegarasi orqali charm va moʻyna xom ashyosini olib chiqishni monitoring qilish tartibi toʻgʻrisidagi nizomning 6-bandi toʻrtinchi xatboshisi “10 foizi miqdorida” soʻzlaridan keyin “(TIF TN boʻyicha 4104 kodiga muvofiq 2024-yil 1-iyuldan boshlab 10 foiz, lekin bir tonnasi uchun 300 AQSh dollaridan kam boʻlmagan miqdorda, 2026-yil 1-yanvardan boshlab 20 foiz, lekin bir tonnasi uchun 600 AQSh dollaridan kam boʻlmagan miqdorda, 2028-yil 1-yanvardan boshlab 30 foiz, lekin bir tonnasi uchun 900 AQSh dollaridan kam boʻlmagan miqdorda)” soʻzlari bilan toʻldirilsin.
3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari J.A. Xodjayev va Savdo-sanoat palatasi raisi D.A. Vaxabov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 5-oktabr,
642-son