UzbekAI

Ўзбекистон Республикаси Вазирлар Маҳкамасининг

қарори

НИЗОМ

НИЗОМ

РЎЙХАТИ

Ўзбекистон Республикаси Вазирлар Маҳкамаси ҳузуридаги Саноат, радиация ва ядро хавфсизлиги қўмитаси фаолиятини ташкил этиш чора-тадбирлари тўғрисида

Ўзбекистон Республикаси Президентининг «Ер қаъридан фойдаланиш, саноат, радиация ва ядро хавфсизлиги ҳамда атом энергиясидан фойдаланиш соҳаларида давлат бошқаруви ва назорати тизимини такомиллаштириш чора-тадбирлари тўғрисида» 2024 йил 24 майдаги ПФ-79-сон Фармони ҳамда «Вазирлар Маҳкамаси ҳузуридаги Саноат, радиация ва ядро хавфсизлиги қўмитаси фаолиятини самарали ташкил этиш чора-тадбирлари тўғрисида» 2024 йил 24 майдаги ПҚ-186-сон қарори ижросини таъминлаш мақсадида Вазирлар Маҳкамаси қарор қилади:

1. Қуйидагиларни назарда тутувчи:

а) Ўзбекистон Республикаси Вазирлар Маҳкамаси ҳузуридаги Саноат, радиация ва ядро хавфсизлиги қўмитаси тўғрисидаги низом 1-иловага мувофиқ:

Саноат, радиация ва ядро хавфсизлиги қўмитасининг (кейинги ўринларда — Қўмита) тузилмаси, Қўмита ҳамда унинг тизимидаги ташкилотларнинг вазифа ва функциялари;

Қўмитанинг республика ва маҳаллий ижро этувчи ҳокимият органлари ҳамда бошқа ташкилотлар билан ўзаро ҳамкорлик қилиш тартиби;

Қўмита ва унинг тизимидаги ташкилотлар фаолиятини молиялаштириш, ходимларини моддий рағбатлантириш тартиби;

б) Саноат, радиация ва ядро хавфсизлиги қўмитаси ҳузуридаги Саноат хавфсизлиги соҳасини қўллаб-қувватлаш жамғармаси маблағларини шакллантириш ва улардан фойдаланиш тартиби тўғрисидаги низом 2-иловага мувофиқ:

Саноат хавфсизлиги соҳасини қўллаб-қувватлаш жамғармаси маблағларини (кейинги ўринларда — Жамғарма) шакллантириш тартиби;

Жамғарма маблағларидан фойдаланиш тартиби;

Жамғарма маблағларини ходимларни моддий рағбатлантириш ва ижтимоий ҳимоя қилишга йўналтириш тартиби тасдиқлансин.

2. Белгилансинки:

Саноат, радиация ва ядро хавфсизлиги қўмитаси бошқарув ходимларининг лавозим маошини белгилашда Давлат бюджети маблағлари ҳисобидан ягона тариф сеткаси бўйича меҳнатга ҳақ тўлашнинг тасдиқланган разрядларига мувофиқ тариф коэффициенти 1,8 бараварга оширилган ҳолда қўлланилади;

Саноат, радиация ва ядро хавфсизлиги қўмитаси ходимларига Давлат бюджети маблағлари ҳисобидан узлуксиз иш стажи учун уларнинг умумий меҳнат фаолиятини қамраб олган ҳолда, фақат асосий иш жойи бўйича ходимнинг ойлик маошига (рағбатлантириш коэффициентини ҳисобга олган ҳолда) нисбатан 1 йилдан 3 йилгача — 30 фоиз, 3 йилдан 5 йилгача — 60 фоиз, 5 йилдан 10 йилгача — 75 фоиз, 10 йилдан 15 йилгача — 100 фоиз, 15 йил ва ундан ортиқ — 150 фоиз миқдорида устамалар ҳар ойда тўланади.

3. Давлат активларини бошқариш агентлиги Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари билан биргаликда бир ой муддатда Саноат, радиация ва ядро хавфсизлиги қўмитасининг ҳудудий бошқармалари ҳудудлардаги агентлик тасарруфидаги бўш турган маъмурий биноларга оператив бошқарув ҳуқуқи асосида жойлаштирилишини таъминласин.

4. Ўзбекистон Республикаси Ҳукуматининг 3-иловага мувофиқ айрим қарорлари ўз кучини йўқотган деб ҳисоблансин.

5. Вазирлар Маҳкамаси ҳузуридаги Саноат, радиация ва ядро хавфсизлиги қўмитаси бир ой муддатда:

ўзларининг таркибий бўлинмалари тўғрисидаги низомларни ва ходимларнинг лавозим йўриқномаларини тасдиқласин;

манфаатдор вазирликлар ва идоралар билан биргаликда ўзлари қабул қилган норматив-ҳуқуқий ҳужжатларни ушбу қарорга мувофиқлаштирсин.

6. Мазкур қарорнинг бажарилишини назорат қилиш Ўзбекистон Республикаси Вазирлар Маҳкамаси ҳузуридаги Саноат, радиация ва ядро хавфсизлиги қўмитаси раиси А.В. Рафиқов зиммасига юклансин.

Вазирлар Маҳкамасининг 2024 йил 4 октябрдаги 633-сон қарорига 1-ИЛОВА

Ўзбекистон Республикаси Вазирлар Маҳкамаси ҳузуридаги Саноат, радиация ва ядро хавфсизлиги қўмитаси тўғрисида

1-боб. Умумий қоидалар

1. Ушбу Низом Ўзбекистон Республикаси Вазирлар Маҳкамаси ҳузуридаги Саноат, радиация ва ядро хавфсизлиги қўмитасининг (кейинги ўринларда — Қўмита) мақоми, асосий вазифалари, функциялари, ҳуқуқлари, жавобгарлиги, фаолиятини ташкил этиш ва ҳисобот бериш тартибини, шунингдек, Қўмита раиси ҳамда унинг ўринбосарларининг асосий функционал вазифалари ва жавобгарликларини белгилайди.

2. Қўмита алоҳида мустақил мақомга эга республика ижро этувчи ҳокимият органи ҳисобланиб, хавфли ишлаб чиқариш объектларида саноат хавфсизлиги ҳамда атом энергетикаси ва ядро технологиялари объектларида радиация ва ядро хавфсизлигини таъминлаш соҳаларида ягона давлат сиёсатини юритади.

3. Қўмита бевосита Ўзбекистон Республикаси Вазирлар Маҳкамасига (кейинги ўринларда — Вазирлар Маҳкамаси) бўйсунади ва ўз фаолияти юзасидан ҳисобот беради.

4. Қўмита ўз фаолиятида Ўзбекистон Республикасининг Конституцияси ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг фармонлари, қарорлари ва фармойишларига, Вазирлар Маҳкамасининг қарорлари ва фармойишларига, шунингдек, ушбу Низом ва бошқа қонунчилик ҳужжатларига амал қилади.

5. Қўмитанинг ўз ваколатлари доирасида қабул қилинган қарорлари вазирликлар, идоралар, маҳаллий ижро этувчи ҳокимият органлари, бошқа ташкилотлар ва уларнинг мансабдор шахслари, шунингдек, юридик ва жисмоний шахслар томонидан бажарилиши мажбурий ҳисобланади.

6. Қўмита ўзининг фаолияти соҳасига тегишли бўлган масалаларни, шу жумладан, назорат остидаги корхоналарда содир бўлган авариялар, гуруҳий, оқибати ўлим билан тугаган бахтсиз ҳодисаларни ва бошқа масалаларни тегишли корхона раҳбарлари иштирокида Қўмитанинг Илмий-техник кенгашида кўриб чиқади.

7. Қўмита ва унинг тузилмасига кирадиган ташкилотлар юридик шахслар ҳисобланади, Ўзбекистон Республикаси Давлат герби тасвири туширилган муҳр ва бланкаларга, мустақил балансга, Ўзбекистон Республикаси Иқтисодиёт ва молия вазирлиги ҳузуридаги Ғазначилик хизмати қўмитасида шахсий ғазна ҳисобварақларига, банк ҳисобварақларига, шу жумладан, чет эл валютасидаги банк ҳисобварақларига эга.

8. Қўмитанинг расмий номи:

а) давлат тилида:

тўлиқ номи — Ўзбекистон Республикаси Вазирлар Маҳкамаси ҳузуридаги Саноат, радиация ва ядро хавфсизлиги қўмитаси;

қисқартма номи — Саноат, радиация ва ядро хавфсизлиги қўмитаси;

б) рус тилида:

тўлиқ номи — Комитет промышленной, радиационной и ядерной безопасности при Кабинете Министров Республики Узбекистан;

қисқартма номи — Комитет промышленной, радиационной и ядерной безопасности;

в) инглиз тилида:

тўлиқ номи — «Industrial, radiation and nuclear safety committee under the Cabinet of Ministers of the Republic of Uzbekistan»;

қисқартма номи — Industrial, radiation and nuclear safety committee.

9. Қўмита жойлашган жой ва почта манзили: 100011, Тошкент шаҳар, Шайхонтохур тумани, М-14, 27-уй.

10. Қўмита белгиланган штатлар бирлиги доирасида марказий аппарат, ҳудудий бошқармалар (бўлимлар), саноат хавфсизлиги инспекциялари ва тизимидаги ташкилотлар ташкилий тузилмасини ва низомларини тасдиқлайди.

2-боб. Қўмитанинг тузилмаси

11. Қўмита тизимига қуйидагилар киради:

марказий аппарат;

Қорақалпоғистон Республикаси, вилоятлар ва Тошкент шаҳридаги ҳудудий бошқармалари (бўлимлари);

«Саноат хавфсизлиги» ДМ;

«Контехназоратўқув» ДМ;

«Саноат назорати лабораторияси» ДМ;

«Радиация ва ядро хавфсизлиги илмий-техник маркази» ДМ;

Навоий саноат хавфсизлиги инспекцияси;

Олмалиқ саноат хавфсизлиги инспекцияси;

Бекобод саноат хавфсизлиги инспекцияси;

Темир йўл саноат хавфсизлиги инспекцияси.

11 1 . Қўмитанинг Навоий саноат хавфсизлиги инспекцияси, Олмалиқ саноат хавфсизлиги инспекцияси, Бекобод саноат хавфсизлиги инспекцияси ва Темир йўл саноат хавфсизлиги инспекцияларини молиялаштириш ва моддий-техник таъминлаш тегишли равишда «Навоий КМК» АЖ, «Олмалиқ КМК» АЖ, «Ўзметкомбинат» АЖ ва «Ўзбекистон темир йўллари» АЖ маблағлари ҳисобидан амалга оширилади.

Қўмитанинг саноат хавфсизлиги инспекциялари ходимлари таркиби тегишли равишда «Навоий КМК» АЖ, «Олмалиқ КМК» АЖ, «Ўзметкомбинат» АЖ ва «Ўзбекистон темир йўллари» АЖнинг штатдаги ходимлари сонига киритилади.

12. Ҳудудий бошқармалар (бўлимлар), саноат хавфсизлиги инспекциялари ҳамда бошқа тузилмалар саноат, радиация ва ядро хавфсизлигини таъминлаш соҳаларида ягона давлат назорати тизимини ташкил этади.

13. Ҳудудий бошқармалар (бўлимлар), саноат хавфсизлиги инспекциялари маҳаллий давлат ҳокимияти органларидан мустақил фаолият олиб боради ва бевосита Қўмитага бўйсунади.

14. Давлат органлари ва бошқа ташкилотларга Қўмита ходимларига уларнинг ваколатига кирмайдиган ишларни бажаришни юклаш тақиқланади.

3-боб. Қўмита, унинг ҳудудий бошқармалари (бўлимлари) ва саноат хавфсизлиги инспекцияларининг вазифалари ва функциялари

15. Қуйидагилар Қўмитанинг асосий вазифалари ҳисобланади:

Ўзбекистон Республикасининг « Хавфли ишлаб чиқариш объектларининг саноат хавфсизлиги тўғрисида »ги ва « Аҳолини ва ҳудудларни табиий ҳамда техноген хусусиятли фавқулодда вазиятлардан муҳофаза қилиш тўғрисида »ги қонунлари, хавфли ишлаб чиқариш объектларида, атом энергетикаси ва ядро технологиялари объектларида саноат, радиация ва ядро хавфсизлигини таъминлашга доир қонунчилик ҳужжатлари ҳамда техник жиҳатдан тартибга солиш соҳасидаги норматив ҳужжатларда белгиланган талабларга жисмоний ва юридик шахслар томонидан риоя этилиши устидан давлат назорати ва текширувини амалга ошириш;

атом энергетикаси ва ядро технологиялари объектларида радиация ва ядро хавфсизлигини таъминлаш, шунингдек, хавфли ишлаб чиқариш объектларида саноат хавфсизлиги соҳаларида ягона давлат сиёсатини амалга ошириш ва мувофиқлаштириш;

саноат, радиация ва ядро хавфсизлигини таъминлаш соҳасида республикада иқтисодиётнинг асосий тармоқларини янада ривожлантириш бўйича стратегик режалар ва дастурларни ишлаб чиқишда иштирок этиш;

саноат, радиация ва ядро хавфсизлигини таъминлаш ҳамда лифтлар ва истироҳат боғлари аттракционларидан фойдаланиш борасидаги норматив-ҳуқуқий ҳужжатлар лойиҳалари ва техник жиҳатдан тартибга солиш соҳасидаги норматив ҳужжатларни белгиланган тартибда ишлаб чиқиш ва қабул қилиш;

саноат, радиация ва ядро хавфсизлиги ҳамда лифтлар ва истироҳат боғлари аттракционларидан фойдаланиш борасидаги қонунчилик ҳужжатлари ва техник жиҳатдан тартибга солиш соҳасидаги норматив ҳужжатлар талабларига юридик ҳамда жисмоний шахслар томонидан риоя этилиши устидан давлат назоратини ва текширувини амалга ошириш;

саноат хавфсизлигини экспертизадан ва аккредитациядан ўтказиш тизимини такомиллаштириш, шунингдек, атом энергиясидан фойдаланиш объектларининг ва (ёки) атом энергиясидан фойдаланиш соҳасидаги фаолиятнинг хавфсизлигини асослаш юзасидан экспертизадан ўтказишни ташкил этиш;

хавфли ишлаб чиқариш объектларини идентификация қилиш, ҳисобга олиш ва уларнинг давлат реестрини юритиш, саноат хавфсизлигини декларациялаш тартибини ташкил этиш ва такомиллаштириш, техноген хавфи юқори бўлган зоналарнинг давлат кадастри ҳамда кадастр паспортларини ишлаб чиқилиши ва юритилишини назорат қилиш ҳамда мувофиқлаштириш;

саноат хавфсизлиги ва атом энергиясидан фойдаланиш соҳаларида рухсат этиш хусусиятига эга ҳужжатларни (лицензияларни, рухсатномаларни) белгиланган тартибда бериш фаолиятини амалга ошириш;

саноат, радиация ва ядро хавфсизлигини таъминлаш соҳаларида давлат назорати органларининг фаолиятини мувофиқлаштириш;

техника ва технологияларнинг жадал ривожланишини ҳисобга олган ҳолда саноат, радиация ва ядро хавфсизлиги ҳамда лифтлар ва аттракционлар хавфсизлигини таъминлаш соҳаларида фаолият юритувчи мутахассисларни тайёрлаш, қайта тайёрлаш, уларнинг малакасини ошириш ҳамда уларни белгиланган тартибда аттестациядан ўтказиш;

саноат, радиация ва ядро хавфсизлиги, лифтлар ва истироҳат боғлари аттракционлари хавфсизлиги йўналишларида ҳуқуқбузарлик ҳолатларини аниқлаш ҳамда уларга нисбатан қонунчиликда белгиланган чораларни кўриш юзасидан идоралараро ҳамкорликни янада ривожлантириш;

саноат, радиация ва ядро хавфсизлиги ҳамда лифтлар ва истироҳат боғлари аттракционлари хавфсизлиги соҳасида аниқланган ҳуқуқбузарликлар ва уларнинг оқибатлари тўғрисида кенг жамоатчиликни хабардор қилиб бориш, соҳада ҳуқуқни қўллаш амалиёти ва қонунчилик ҳужжатларини такомиллаштириш юзасидан таклифлар ишлаб чиқиш;

Қўмита фаолиятининг асосий йўналишлари бўйича халқаро ва хорижий ташкилотлар билан ҳамкорлик қилиш, шунингдек, соҳа фаолиятига тааллуқли бўлган халқаро шартномалар бўйича Ўзбекистон Республикасининг мажбуриятлари бажарилишини таъминлаш.

16. Қўмита унга юкланган вазифаларга мувофиқ қуйидаги функцияларни амалга оширади:

а) Ўзбекистон Республикасининг « Хавфли ишлаб чиқариш объектларининг саноат хавфсизлиги тўғрисида »ги ва « Аҳолини ва ҳудудларни табиий ҳамда техноген хусусиятли фавқулодда вазиятлардан муҳофаза қилиш тўғрисида »ги қонунлари, хавфли ишлаб чиқариш объектларида, атом энергетикаси ва ядро технологиялари объектларида саноат, радиация ва ядро хавфсизлигини таъминлашга доир қонунчилик ҳужжатлари ва техник жиҳатдан тартибга солиш соҳасидаги норматив ҳужжатларда белгиланган талабларга жисмоний ва юридик шахслар томонидан риоя этилиши устидан давлат назорати ва текширувини амалга ошириш соҳасида:

саноат, радиация ва ядро хавфсизлигини таъминлашни такомиллаштириш юзасидан Вазирлар Маҳкамасига таклифлар киритади;

саноат, радиация ва ядро хавфсизлигини таъминлаш соҳасидаги техник регламентларни тасдиқлаш, уларга ўзгартириш ва қўшимчалар киритиш, шунингдек, мазкур регламентларни бекор қилиш тўғрисида Вазирлар Маҳкамасига таклифлар киритади;

саноат, радиация ва ядро хавфсизлигини таъминлаш соҳасидаги солиш соҳасидаги техник жиҳатдан тартибга солиш соҳасидаги норматив ҳужжатлар талабларига риоя этилиши устидан ўз ваколати доирасида давлат назорати амалга оширилишини таъминлайди;

б) атом энергетикаси ва ядро технологиялари объектларида радиация ва ядро хавфсизлигини таъминлаш, шунингдек, хавфли ишлаб чиқариш объектларида саноат хавфсизлиги соҳаларида ягона давлат сиёсатини амалга ошириш ва мувофиқлаштириш соҳасида:

хавфли ишлаб чиқариш объектларида, шунингдек, хавфли ишлаб чиқариш объектларига эга бўлган хўжалик юритувчи субъектларда қўлланиладиган ишлаб чиқаришлар (технологиялар), объектлар ва техник қурилмалар рўйхатини такомиллаштириб боради;

иқтисодиётнинг тегишли тармоқларида саноат, радиация ва ядро хавфсизлигини таъминлаш тизимини такомиллаштириш бўйича таклифлар тайёрлайди;

хавфли ишлаб чиқариш объектларида саноат хавфсизлиги экспертизаси тизимини ривожлантиришни, атом энергиясидан фойдаланиш объектларининг ва (ёки) атом энергиясидан фойдаланиш соҳасидаги фаолиятнинг хавфсизлигини асослаш юзасидан экспертиза ўтказишни, шунингдек, атом энергиясидан фойдаланиш соҳасида фаолиятни лицензиялаш (рухсатнома бериш) тизимини ташкил этади;

хавфли ишлаб чиқариш объектларида қўлланиладиган техник қурилмаларни ҳамда лифтлар ва аттракционларни сертификатлашни ташкил этади;

ўз ваколатлари доирасида ионлаштирувчи нурланиш манбаларининг давлат ҳисоби ва назоратини, уларнинг миллий реестри юритилишини таъминлайди;

радиациявий аварияларни прогноз қилиш, барвақт аниқлаш ва ҳаракат қилиш ягона давлат тизимида иштирок этади;

хавфли ишлаб чиқариш объектлари давлат реестрида хавфли ишлаб чиқариш объектларининг ягона ҳисобини юритади;

аттракционларни рўйхатга олади ва уларнинг ягона давлат реестрини юритади;

техноген хавфи юқори бўлган зоналарнинг давлат кадастрини яратилиши, юритилишини мувофиқлаштиради ва назорат қилади;

авария ҳолатининг ва ишлаб чиқариш жароҳатининг олдини олиш мақсадида саноат, радиация ва ядро хавфсизлиги талабларига риоя қилиш зарурлиги тўғрисида кенг жамоатчилик ўртасида тушунтириш ишларини амалга оширади;

саноат хавфсизлиги талабларига риоя этилиши устидан ишлаб чиқариш назоратини ташкил этиш тўғрисидаги маълумотларни тўплайди ва таҳлил қилади;

Қўмитанинг назорати остидаги объектларда авариялар, ишлаб чиқаришда жароҳатланиш ҳолларининг сабабларини белгиланган тартибда текширади ва ҳисобга олади;

республика ижро этувчи ҳокимият органларига, маҳаллий давлат ҳокимияти органларига, хўжалик бирлашмаларига, фуқароларнинг ўзини ўзи бошқариш органларига атом энергиясидан фойдаланишдаги хавфсизлик масалалари юзасидан ахборот беради;

в) саноат, радиация ва ядро хавфсизлигини таъминлаш соҳасида республикада иқтисодиётнинг асосий тармоқларини янада ривожлантириш бўйича стратегик режалар ва дастурларни ишлаб чиқишда иштирок этиш соҳасида:

вазирликлар, идоралар ва хўжалик бирлашмалари билан биргаликда саноат, радиация ва ядро хавфсизлигини таъминлаш юзасидан саноатнинг базавий тармоқларини янада ривожлантириш бўйича стратегик режалар ва дастурлар бўйича таклифларни ишлаб чиқади;

саноат, радиация ва ядро хавфсизлигини таъминлаш юзасидан саноатнинг базавий тармоқларини янада ривожлантириш бўйича тасдиқланган давлат дастурларига мувофиқ саноат, радиация ва ядро хавфсизлигини таъминлаш бўйича ишлар амалга оширилишини назорат қилади;

радиация ва ядро хавфсизлигини таъминлаш юзасидан атом энергиясидан тинчлик мақсадларида фойдаланиш соҳасида давлат мақсадли дастурлари ишлаб чиқилиши, кўриб чиқилиши ва амалга оширилишида иштирок этади;

халқаро ва давлатлараро илмий-техник ҳамкорликни ривожлантиради;

г) саноат, радиация ва ядро хавфсизлигини таъминлаш ҳамда лифтлар ва истироҳат боғлари аттракционларидан фойдаланиш борасидаги норматив-ҳуқуқий ҳужжатлар лойиҳалари ва техник жиҳатдан тартибга солиш соҳасидаги норматив ҳужжатларни белгиланган тартибда ишлаб чиқиш ва қабул қилиш соҳасида:

саноат, радиация ва ядро хавфсизлиги, лифтлар ва аттракционлар хавфсизлигини таъминлаш ҳамда Қўмита ваколатига кирадиган бошқа масалалар бўйича қонунчилик ҳужжатларини ва техник жиҳатдан тартибга солиш соҳасидаги норматив ҳужжатларни белгиланган тартибда ишлаб чиқади;

атом энергиясидан фойдаланиш соҳасидаги нормалар ва қоидаларни ишлаб чиқади, уларни амалга киритиш ҳамда амалга оширилишини таъминлайди;

саноат, радиация ва ядро хавфсизлиги, лифтлар ва аттракционлар хавфсизлигини таъминлаш талаблари мавжуд бўлган техник жиҳатдан тартибга солиш соҳасидаги норматив ҳужжатлар лойиҳаларини кўриб чиқади ва келишишда иштирок этади;

д) саноат, радиация ва ядро хавфсизлиги ҳамда лифтлар ва истироҳат боғлари аттракционларидан фойдаланиш борасидаги қонунчилик ҳужжатлари ва техник жиҳатдан тартибга солиш соҳасидаги норматив ҳужжатлар талабларига юридик ҳамда жисмоний шахслар томонидан риоя этилиши устидан давлат назоратини ва текширувини амалга ошириш соҳасида:

жисмоний ва юридик шахслар томонидан саноат, радиация ва ядро хавфсизлиги, лифтлар ва аттракционлар хавфсизлигини таъминлаш соҳасидаги қонунчилик ҳужжатлари ва техник жиҳатдан тартибга солиш соҳасида норматив ҳужжатлар талабларига риоя этилиши устидан давлат назорати ва текширувини амалга оширади;

хавфли ишлаб чиқариш объектларида фойдаланиладиган буғ ва сув иситиш қозонларини, босим остида ишлайдиган идишларни, буғ ва иссиқ сув қувурларини, кўтариш иншоотларини, йилига битта ускуна учун 100 000 ва ундан ортиқ кубометр табиий ва суюлтирилган углеводород газидан ёқилғи сифатида фойдаланувчи техник қурилмаларни рўйхатга олади ва реестрини юритади;

газдан қутқариш ва авария-диспетчерлик хизматлари корхоналари, бўлинмаларининг содир бўлиши мумкин бўлган аварияларнинг олдини олиш ва оқибатларини бартараф этишга тайёрлигини назорат қилади;

назорат остидаги корхоналар ва объектларни фойдаланишга қабул қилиш бўйича давлат ва ишчи комиссия таркибида иштирок этиш учун ўз вакилларини тайинлайди, ушбу объектларда фойдаланишга қабул қилиш қоидаларига риоя этилишини назорат қилади;

хавфли ишлаб чиқариш объектидан фойдаланишга ташкилотларнинг тайёрлигини, шунингдек, назорат остидаги объектларда авариялар ва ишлаб чиқариш жароҳатининг олдини олиш тадбирлари ишлаб чиқилиши ва ўтказилишини назорат қилади;

саноат хавфсизлиги декларациялари ишлаб чиқилиши ва тақдим этилишининг мониторингини юритади;

ишлаб турган ва қурилаётган хавфли ишлаб чиқариш объектларида саноат хавфсизлигини декларациялашни назорат қилади;

атом энергиясидан фойдаланиш объектларининг хавфсизлигини таъминлаш устидан давлат назорати ва текширувини ҳамда атом энергиясидан фойдаланиш объектларининг жисман ҳимоя қилиниши устидан белгиланган тартибда давлат назоратини амалга оширади;

атом энергиясидан фойдаланиш объектларида аварияга оид ташқи режани ишлаб чиқишда иштирок этади ҳамда республика ижро этувчи ҳокимият органларининг ва атом энергиясидан фойдаланиш соҳасида фаолият юритадиган бошқа юридик шахсларнинг авария ҳолатларига тайёрлиги устидан давлат назоратини таъминлайди;

назорат остидаги объектларда саноат, радиация ва ядро хавфсизлигини таъминлаш, путур етказмайдиган назорат бўйича, шунингдек, лифтлар ва аттракционлар хавфсизлиги соҳасидаги норматив-ҳуқуқий ҳужжатлар ва норматив ҳужжатлар бажарилишини таъминлаш бўйича профилактика ишларини амалга оширади;

корхоналарда газ-қутқарув ва авария-диспетчерлик хизматларининг бўлиши мумкин бўлган аварияларнинг олдини олиш ва уларнинг оқибатларини бартараф этишга тайёрлигини назорат қилади;

е) саноат хавфсизлигини экспертизадан ва аккредитациядан ўтказиш тизимини такомиллаштириш, шунингдек, атом энергиясидан фойдаланиш объектларининг ва (ёки) атом энергиясидан фойдаланиш соҳасидаги фаолиятнинг хавфсизлигини асослаш юзасидан экспертизадан ўтказишни ташкил этиш соҳасида:

саноат хавфсизлиги соҳасида эксперт ташкилотларини белгиланган тартибда аккредитациядан ўтказади ва уларнинг фаолиятини назорат қилади;

саноат хавфсизлиги соҳасида берилган экспертиза хулосаларининг ягона ҳисобини юритади;

саноат хавфсизлиги соҳасида экспертларни аттестациядан ўтказади ва уларнинг фаолиятини назорат қилади;

саноат хавфсизлигини бошқариш тизими аудитини ўтказиш тартибини белгилайди ва мазкур соҳада фаолият билан шуғулланувчи ташкилотларни аккредитациядан ўтказади;

атом энергиясидан фойдаланиш объектлари ва (ёки) атом энергиясидан фойдаланиш соҳасида фаолият турлари хавфсизлиги экспертизасини (хавфсизликни асослаш экспертизасини) ташкил этади;

ж) хавфли ишлаб чиқариш объектларини идентификация қилиш, ҳисобга олиш ва уларнинг давлат реестрини юритиш, саноат хавфсизлигини декларациялаш тартибини ташкил этиш ва такомиллаштириш, техноген хавфи юқори бўлган зоналарнинг давлат кадастри ҳамда кадастр паспортларини ишлаб чиқилиши ва юритилишини назорат қилиш ҳамда мувофиқлаштириш соҳасида:

ишлаб турган ва қурилаётган хавфли ишлаб чиқариш объектларида саноат хавфсизлигини декларациялашни назорат қилади;

техноген хавф юқори бўлган зоналар бош кадастр маркази томонидан техноген хавф юқори бўлган зоналар давлат кадастр паспорти яратилиши ва юритилишини мувофиқлаштиради;

з) саноат хавфсизлиги ва атом энергиясидан фойдаланиш соҳаларида рухсат этиш хусусиятига эга ҳужжатларни (лицензияларни, рухсатномаларни) белгиланган тартибда бериш фаолиятини амалга ошириш соҳасида:

саноат хавфсизлиги ҳамда атом энергиясидан фойдаланиш ва ионлаштирувчи нурланиш манбалари муомаласи соҳаларида тегишли фаолият турларини лицензиялайди;

ўз ваколатлари доирасида фаолиятнинг айрим турларини лицензиялашда ва келишиш ишларида иштирок этади;

лицензиатлар томонидан лицензия талаблари ва шартларига риоя этилишини назорат қилади;

атом энергиясидан фойдаланиш объектларидаги нохуш ҳодисалар ва аварияларнинг сабабларини техник жиҳатдан текшириш тартибини тасдиқлайди;

Қўмитанинг ваколатига кирадиган ишларнинг айрим турларига белгиланган тартибда рухсатномалар беради ва уларни бекор қилади;

қонунчилик ҳужжатларига мувофиқ хавфли юклар транзитида хулосалар беради ва назорат қилади;

атом энергиясидан фойдаланиш соҳасидаги эксплуатация қилувчи ташкилот, шунингдек, бошқа юридик шахс томонидан мазкур соҳадаги фаолиятни амалга ошириш жараёнида хавфсизликни таъминлаш учун зарур бўлган мажбурий талабларга, лицензия шартларига риоя этилишини назорат қилади;

и) саноат, радиация ва ядро хавфсизлигини таъминлаш соҳаларида давлат назорати органларининг фаолиятини мувофиқлаштириш соҳасида:

саноат хавфсизлиги, жумладан, хавфли ишлаб чиқариш объектларида содир бўлган авариялар, гуруҳий, оқибати оғир ва ўлим билан тугаган бахтсиз ҳодисаларни махсус текшириш ва ҳисобини юритиш, атом энергиясидан фойдаланиш ва техноген хавф юқори бўлган зоналар давлат кадастрини юритиш соҳаларида давлат назорати органларининг фаолиятини мувофиқлаштиради, ҳисоботларини қабул қилади ва эшитади, саноат хавфсизлиги соҳаси бўйича тегишли кўрсатмалар беради;

хавфли ишлаб чиқариш объектларида содир бўлган авариялар, оқибати оғир ва ўлим билан тугаган бахтсиз ҳодисаларни техник жиҳатдан текшириш натижаларини тегишли корхона раҳбарлари иштирокида Қўмитанинг Илмий-техник кенгашида кўриб чиқади ва тегишли кўрсатмалар беради;

к) техника ва технологияларнинг жадал ривожланишини ҳисобга олган ҳолда саноат, радиация ва ядро хавфсизлиги ҳамда лифтлар ва аттракционлар хавфсизлигини таъминлаш соҳаларида фаолият юритувчи мутахассисларни тайёрлаш, қайта тайёрлаш, уларнинг малакасини ошириш ҳамда уларни белгиланган тартибда аттестациядан ўтказиш соҳасида:

саноат хавфсизлиги соҳасида ходимларнинг малакасини оширади, шунингдек, радиация ва ядро хавфсизлиги соҳасида мутахассислар тайёрлашни ташкил этади;

хавфли ишлаб чиқариш объектлари, лифтлар ва аттракционлар хавфсизлиги бўйича ходимларни тайёрлаш (қайта тайёрлаш) ва аттестациядан ўтказиш (билимларни текшириш) тартибини ишлаб чиқади ва тасдиқлайди;

саноат корхоналари, лифтлар ва аттракционларга масъул ходимлар малакаси оширилишини ташкил этади ва уларнинг билимларини текширишда иштирок этади;

назорат остидаги объектлар ходимларини тайёрлаш курсларини ташкил этади ва уларга тегишли гувоҳномалар беради;

атом энергиясидан фойдаланиш соҳасида фаолият юритадиган эксплуатация қилувчи ташкилотлар ва бошқа юридик шахслар ходимлари белгиланган тартибда аттестациядан ўтказилишни ташкил этади ва аттестациядан ўтказишда иштирок этади;

л) саноат, радиация ва ядро хавфсизлиги ҳамда лифтлар ва истироҳат боғлари аттракционлари хавфсизлигини таъминлаш соҳасидаги қонунчилик ҳужжатлари ва техник жиҳатдан тартибга солиш соҳасидаги норматив ҳужжатлар талабларига жисмоний ва юридик шахслар томонидан риоя этилиши устидан давлат назорати ва текширувини амалга ошириш соҳасида:

саноат, радиация ва ядро хавфсизлиги, лифтлар ва аттракционлар хавфсизлигини таъминлаш йўналишларида ҳуқуқбузарлик ҳолатларини аниқлаш ҳамда уларга нисбатан тезкор чоралар кўриш юзасидан идоралараро ҳамкорлик қилади;

саноат, радиация ва ядро хавфсизлиги, лифтлар ва аттракционлар хавфсизлиги қоидаларини бузиш билан боғлиқ аниқланган ҳуқуқбузарликлар бўйича тезкор чоралар кўради;

саноат, радиация ва ядро хавфсизлиги, лифтлар ва аттракционлар хавфсизлиги талабларини бузган айбдор шахсларни жиноий жавобгарликка тортиш тўғрисидаги масалани кўриб чиқиш учун материалларни ҳуқуқни муҳофаза қилиш органларига юборади;

м) саноат, радиация ва ядро хавфсизлиги ҳамда лифтлар ва истироҳат боғлари аттракционлари хавфсизлиги соҳасида аниқланган ҳуқуқбузарликлар ва уларнинг оқибатлари тўғрисида кенг жамоатчиликни хабардор қилиб бориш, соҳада ҳуқуқни қўллаш амалиёти ва қонунчилик ҳужжатларини такомиллаштириш юзасидан таклифлар ишлаб чиқиш соҳасида:

саноат хавфсизлиги, лифтлар ва аттракционлар хавфсизлиги соҳасида аниқланган ҳуқуқбузарликлар ҳамда уларнинг оқибатлари тўғрисида кенг жамоатчиликни хабардор қилиб боради, соҳада ҳуқуқни қўллаш амалиёти ва қонунчиликни такомиллаштириш юзасидан таклифлар ишлаб чиқади;

лифтлар ва аттракционлар фаолиятини масофавий назорат қилиш, ҳуқуқбузарликлар тўғрисида хабар бериш имкониятини берувчи электрон платформани юритади;

Қўмита мансабдор шахсларига текширув ўтказиш вақтида ўз хизмат бурчларини бажаришига тўсқинлик қилган шахсларни маъмурий жавобгарликка тортади;

н) Қўмита фаолиятининг асосий йўналишлари бўйича халқаро ва хорижий ташкилотлар билан ҳамкорлик қилиш, шунингдек, соҳа фаолиятига тааллуқли бўлган халқаро шартномалар бўйича Ўзбекистон Республикасининг мажбуриятлари бажарилишини таъминлаш соҳасида:

саноатда, атом энергетикаси ва илмий тадқиқот ишлари хавфсиз амалга оширилишини назорат қилиш соҳасида халқаро ҳамкорлик қилади, Қўмитанинг ваколатига кирадиган масалалар бўйича халқаро ташкилотлар, бошқа мамлакатларнинг тегишли назорат органлари билан белгиланган тартибда ҳамкорлик қилади;

атом энергиясидан тинч мақсадларда фойдаланиш, кимёвий, бактериологик (биологик) ва заҳарли қурол-яроғни тақиқлаш, шунингдек, кимёвий, биологик, радиологик ва ядро материалларининг таъсири хавфини пасайтириш ҳамда давлатга қарашли бўлмаган субъектларнинг оммавий қирғин қуроллари ва уларни етказиб берилишини олдини олиш, шунингдек, уларнинг ноқонуний айланишига барҳам беришга доир халқаро шартномалар бўйича Ўзбекистон Республикасининг мажбуриятлари бажарилишини таъминлайди.

17. Қўмита унга юкланган вазифа ва функцияларни бевосита ҳамда ўзининг таркибий бўлинмалари орқали амалга оширади.

4-боб. Қўмита марказий аппаратининг асосий вазифалари ва функциялари

18. Қўмита марказий аппаратининг асосий вазифалари унинг тизимидаги ташкилотлар билан биргаликда Қўмитага юкланган вазифа ва функцияларнинг самарали бажарилишини ташкил этиш ҳамда таъминлаш ҳисобланади.

19. Қўмитанинг марказий аппарати унга юкланган асосий вазифаларга мувофиқ қуйидаги функцияларни амалга оширади:

Қўмита ва унинг раҳбарияти фаолиятини ташкилий ва ахборот-таҳлил жиҳатидан таъминлайди;

Қўмита ва унинг тизимидаги ташкилотлар томонидан Ўзбекистон Республикаси Конституциясига ва қонунларига, Ўзбекистон Республикаси Олий Мажлиси палаталарининг қарорларига, Ўзбекистон Республикаси Президентининг Фармонлари, қарорлари ва фармойишларига, Вазирлар Маҳкамасининг қарорларига ва фармойишларига шунингдек, мазкур Низомга ва бошқа қонунчилик ҳужжатларига мувофиқ талабларнинг бажарилишида тизимли назоратни таъминлайди;

Қўмита томонидан Вазирлар Маҳкамаси, Ўзбекистон Республикаси Президенти Администрациясига киритиладиган ҳужжатларнинг сифатли ҳамда ўз вақтида ишлаб чиқилишини ва уларнинг иқтисодий ва ҳуқуқий экспертизадан ўтказилишини ташкил этади;

Қўмита ва унинг тизимидаги ташкилотлар фаолиятига белгиланган тартибда раҳбарлик қилади, уларнинг фаолиятини мувофиқлаштиради ва назорат қилади;

Қўмитанинг фаолияти, шу жумладан, норма ижодкорлиги соҳасидаги фаолияти ҳуқуқий таъминланишини ташкил этади;

Қўмитанинг ваколатига тегишли оператив, ташкилий, кадрлар, молия, ишлаб чиқариш-хўжалик масалалари ва бошқа масалаларни ҳал этади.

5-боб. Қўмитанинг ҳуқуқлари ва жавобгарлиги

20. Қўмита унга юкланган вазифалар ва функцияларни амалга ошириш учун қуйидаги ҳуқуқларга эгадир:

норматив-ҳуқуқий ҳужжатлар лойиҳаларини, шунингдек, Қўмитага юкланган вазифалар ва функцияларни бажариш билан боғлиқ бошқа ҳужжатларни ишлаб чиқиш ва белгиланган тартибда киритиш Қўмита ваколатига кирувчи масалалар бўйича қонунчилик ҳужжатлари ва техник жиҳатдан тартибга солиш соҳасидаги норматив ҳужжатлар лойиҳаларини кўриб чиқиш ҳамда улар юзасидан хулосалар бериш;

Қўмита ваколатига кирадиган масалаларда давлат ва хўжалик бошқаруви, маҳаллий ижро этувчи ҳокимият органлари фаолиятини мувофиқлаштиришда иштирок этиш;

Қўмита ваколатига кирадиган масалаларни ҳал этиш учун зарур бўлган ахборотни давлат органлари, хўжалик бирлашмалари ва маҳаллий ижро этувчи ҳокимият органларидан сўраб олиш;

Қўмита ваколатига кирадиган масалалар бўйича зарур статистика ахборотини давлат статистика органларидан ва Ўзбекистон Техник жиҳатдан тартибга солиш агентлигидан стандартлар ва регламентларни электрон шаклда бепул олиш;

Қўмита ходимларини Қўмитанинг бюджетдан ташқари маблағлар ҳисобидан моддий рағбатлантириш;

Қўмита ваколатига кирадиган масалалар бўйича таклифларни давлат органлари, хўжалик бирлашмалари ва маҳаллий ижро этувчи ҳокимият органларига кўриб чиқиш учун киритиш;

Қўмита таркибига кирадиган масалалар бўйича идоралараро халқаро шартномаларни тузиш;

Қўмита таркибига кирадиган масалалар бўйича халқаро даражада Ўзбекистон Республикаси манфаатларини ифодалаш;

Қўмита назорати остидаги объектларга тўсиқсиз кириш;

хавфли ишлаб чиқариш объектларининг саноат хавфсизлиги, радиация ва ядро хавфсизлиги, шунингдек, лифтлар ва аттракционлар хавфсизлиги талабларига риоя этилишини белгиланган тартибда назорат қилиш (текшириш);

саноат, радиация ва ядро хавфсизлиги, аттракционлардан фойдаланиш талаблари бузилган ҳолда олиб борилаётган ёки аварияларни юзага келтириши мумкин бўлган ишларни тўхтатиб қўйиш, шунингдек, одамларнинг ҳаёти хавф остида қолганда ёки авария ҳолатлари юзага келганда уларни иш жойларидан олиб чиқишда иштирок этиш;

ўз ваколатлари доирасида саноат, радиация ва ядро хавфсизлиги, лифтлар ва истироҳат боғлари аттракционларидан фойдаланиш соҳаларида қонунчилик ҳужжатлари ва техник жиҳатдан тартибга солиш соҳасидаги норматив ҳужжатлар талаблари бузилганлиги учун назорат остидаги объектларнинг, жумладан, тадбиркорлик субъектларининг мансабдор шахсларини ҳамда жисмоний шахсларни маъмурий жавобгарликка тортиш бўйича тақдимномалар киритиш;

саноат, радиация ва ядро хавфсизлигини таъминлаш соҳасидаги ҳуқуқбузарликларни содир этганлик учун жисмоний ва юридик шахсларга нисбатан жарималар қўллаш;

назорат остидаги корхоналарнинг, шунингдек, Қўмитанинг назорати остидаги объектларга эга бўлган вазирликлар, қўмиталар, идоралар, хўжалик бирлашмалари раҳбарларига саноат, радиация ва ядро хавфсизлиги талабларининг аниқланган бузилишларини бартараф этиш тўғрисида ижро этишга мажбурий бўлган кўрсатмалар бериш;

назорат остидаги объектларда ходимларнинг хавфсизлик қоидалари ва нормаларини, технологик регламентларни, ходимларнинг меҳнатини муҳофаза қилиш бўйича йўриқномаларни билишини текшириш, назорат остидаги корхоналарнинг раҳбарлари ва ходимларининг, шу жумладан, саноат, радиация ва ядро хавфсизлигини таъминлаш соҳасида кадрларни тайёрловчи ва қайта тайёрловчи ходимларнинг саноат, радиация ва ядро хавфсизлиги қоидалари ва нормалари бўйича имтиҳонларида қатнашиш ва билимини текшириш;

Қўмитанинг ваколатига кирадиган масалалар бўйича хавфли ишлаб чиқариш объектларидан фойдаланувчи ташкилотларнинг раҳбарлари ҳисоботларини эшитиш;

саноат хавфсизлиги экспертизасини ўтказиш ҳуқуқига эга эксперт ташкилотларининг аккредитация аттестати белгиланган тартибда амал қилишини тўхтатиб қўйиш, тугатиш ёки бекор қилиш;

фаолиятнинг айрим турларини амалга ошириш ҳуқуқини берувчи лицензияларнинг амал қилишини белгиланган тартибда тўхтатиб қўйиш, амал қилишини тўхтатиш ёки бекор қилиш тўғрисида таклифлар тайёрлаш;

рухсат бериш хусусиятига эга ҳужжатнинг амал қилишини белгиланган тартибда тўхтатиб қўйиш ва тўхтатиш, бекор қилиш чораларини кўриш;

саноат хавфсизлиги экспертизасининг қонунчилик ҳужжатлари бузилган ҳолда тайёрланган хулосаларини ҳақиқий эмас деб эътироф этиш;

саноат хавфсизлиги соҳасида эксперт гувоҳномаларини белгиланган тартибда ваколатларини қисқартириш, эксперт тоифасини пасайтириш, амал қилишини тўхтатиб туриш, уни тугатиш ёки бекор қилиш;

саноат хавфсизлиги соҳасида аккредитация қилинган эксперт ташкилотлари фаолияти устидан инспекция назоратини ўтказиш;

назорат остидаги объектлар, вазирликлар, қўмиталар, идоралар, хўжалик бирлашмалари, маҳаллий давлат ҳокимияти органларига саноат, радиация ва ядро хавфсизлиги, лифтлар ва аттракционлар хавфсизлиги соҳасидаги қоидалар, йўриқномалар ва бошқа норматив ҳужжатлар талабларини бузаётган мансабдор шахсларнинг меҳнат шартномасини тўхтатиш, интизомий жазо бериш ёки ишларга техник раҳбарлик қилиш ҳуқуқидан бир йилгача бўлган муддатда маҳрум қилиш тўғрисида тақдимномалар киритиш;

ионлаштирувчи нурланиш манбаларини ҳисобга олиш ва назорат қилиш тизимини ривожлантириш;

саноат, радиация ва ядро хавфсизлигини таъминлаш соҳасини рақамлаштириш орқали самарадорлик ва натижадорликка эришиш, шаффоф ва коррупциядан ҳоли самарали тизимни жорий этиш;

Қўмитанинг ваколатига кирадиган масалалар бўйича аварияларнинг, ишлаб чиқариш жароҳати ҳолатларининг, сабабларини белгиланган тартибда текшириш ва текшириш натижалари бўйича бажарилиши мажбурий бўлган қарорлар қабул қилиш;

зарурат бўлганда, ташкилотлар томонидан ускуналар ва материалларни назорат тартибида синашни, ишчи ва атроф табиий муҳит таҳлилини, лойиҳа ва лойиҳа-конструкторлик ечимларининг мустақил экспертизасини тайинлаш;

эҳтиёт қисмлар тайёрловчи заводларда ва таъмирлаш корхоналарида саноатнинг назорат остидаги тармоқлари учун ускуналарнинг саноат хавфсизлиги талабларига мувофиқлигини текшириш, уларнинг саноат, радиация хавфсизлиги стандартлари, қоидалари ва нормалари талабларига ва тасдиқланган лойиҳа ечимларига мувофиқ бўлмаган ҳолларда ишлаб чиқарилишини белгиланган тартибда тўхтатиб қўйиш;

Қўмита ваколатига кирадиган масалалар бўйича вазирликлар, қўмиталар, идоралар, хўжалик бирлашмалари, маҳаллий давлат ҳокимияти органлари, ташкилотлардан зарур ахборотни олиш;

саноат, радиация ва ядро хавфсизлигини таъминлаш соҳасидаги норматив ҳужжатларнинг мажбурий талабларини бузганликда айбдор бўлган ишлаб чиқарувчиларга, ишлаб чиқарувчининг ваколатли вакилига, сотувчиларга, импорт қилувчиларга ёки ижрочиларга нисбатан молиявий санкцияларни қўллаш юзасидан судга мурожаат қилиш;

саноат, радиация ва ядро хавфсизлиги таъминлаш соҳасидаги норматив ҳужжатлар талабларига номувофиқ маҳсулотни муомаладан чиқариш ёки чақириб олиш тўғрисидаги кўрсатмаларни бажармаганлик учун юридик шахсларга нисбатан молиявий жарима қўллаш бўйича судга мурожаат қилиш;

мансабдор ва жисмоний шахсларда ишларга техник раҳбарлик қилиш ва уларни бажариш ҳуқуқини берадиган тегишли ҳужжатлар мавжудлигини, хавфлилиги юқорилиги билан боғлиқ ишлар учун махсус белгиланган талабларга риоя қилинишини текшириш;

вазирликлар, идоралар, маҳаллий ижро этувчи ҳокимият органлари ва бошқа ташкилотлар билан келишув бўйича уларнинг мутахассисларини ишлаб чиқаришларнинг, объектлар ва ишларнинг хавфсизлиги билан боғлиқ мустақил экспертизалар ўтказишни татбиқ этиш ва ишланмалар учун шартнома асосида жалб этиш;

Қўмита қонунчилик ҳужжатларига мувофиқ бошқа ҳуқуқларга ҳам эга бўлиши мумкин.

Қўмитанинг давлат инспекторлари томонидан ўз мажбуриятлари бажарилишида назорат остидаги объектлар уларни хизмат хоналари, интернет ва алоқа воситалари, навбатчи махсус кийим-бош ва ҳимоя воситалари, транспорт билан таъминлайдилар ва ҳудудий бошқармаларнинг уларга доимий бириктирилган инспекторларига эса коммунал хизматлар кўрсатиладиган ва интернет, телефон алоқаси бор бўлган идоравий турар жой берилишида кўмаклашадилар, шунингдек, идоравий болалар мактабгача ва санаторий-курорт муассасаларидан жой берадилар, тиббий хизмат кўрсатиш ва ижтимоий-маиший таъминлаш масалаларини ҳал этадилар.

21. Қўмита:

Қўмитага юкланган вазифа ва функцияларнинг самарали бажарилиши, шунингдек, саноат, радиация ва ядро хавфсизлигини таъминлаш соҳасидаги давлат сиёсатини амалга ошириш;

Қўмитанинг фаолияти билан боғлиқ бўлган прогноз кўрсаткичларга эришишни сўзсиз таъминлаш;

Вазирлар Маҳкамасига ва Ўзбекистон Республикаси Президенти Администрациясига киритиладиган норматив-ҳуқуқий ҳужжатлар ва бошқа ҳужжатлар лойиҳалари, шунингдек, Қўмита томонидан қабул қилинадиган буйруқлар амалга оширилишининг сифати, пировард натижалари ва оқибатлари;

саноат, радиация ва ядро хавфсизлигини таъминлаш соҳасини ривожлантириш, шунингдек, кўрсатилган соҳаларда ҳудудларни ижтимоий-иқтисодий ривожлантириш ва улардаги муаммоли масалаларни ҳал қилиш бўйича дастурлар, тадбирлар режалари, «йўл хариталари» ва бошқа ҳужжатларнинг самарали амалга оширилиши;

ўз ваколати доирасида фуқаролар ва тадбиркорлик субъектларининг қонуний ҳуқуқ ва манфаатлари ҳимоя қилиниши ва уларга риоя этилиши таъминланиши учун жавоб беради.

6-боб. Қўмита раҳбарларининг асосий функционал вазифалари

22. Қуйидагилар Қўмита раисининг асосий функционал вазифалари ҳисобланади:

Ўзбекистон Республикаси Конституцияси ва қонунлари талабларига, шунингдек, бошқа норматив-ҳуқуқий ҳужжатларга риоя этиш;

Қўмита фаолиятига умумий раҳбарлик ва назорат қилиш, Ўзбекистон Республикаси Президентининг ҳужжатлари, Вазирлар Маҳкамасининг қарорлари ва бошқа қонунчилик ҳужжатлари билан Қўмитага юкланган вазифалар ва функциялар бажарилишини ташкил этиш;

Ўзбекистон Республикаси Президентининг ҳужжатлари ва Вазирлар Маҳкамасининг қарорлари билан тасдиқланган Қўмита фаолиятини янада такомиллаштириш бўйича концепциялар, комплекс дастурлар ва тадбирлар ижросини танқидий ва чуқур таҳлил қилиш;

хавфли ишлаб чиқариш объектларида, радиациявий хавфли объектларда ва атом энергиясидан фойдаланиш объектларида бўлиши мумкин бўлган авариялар, нохуш ва бахтсиз ҳодисалардан огоҳлантириш ва уларнинг олдини олиш бўйича амалий чора-тадбирларни ишлаб чиқиш ва қабул қилиш;

Қўмита фаолияти соҳасига кирадиган масалалар бўйича Ўзбекистон Республикаси Президенти Администрацияси бўлинмалари, Олий Мажлиси палаталари ва Вазирлар Маҳкамасининг таркибий бўлинмалари, шунингдек, тегишли вазирликлар ва идоралар билан ҳамкорлик қилиш, Вазирлар Маҳкамаси ва унинг Раёсати мажлисларида масалаларни кўриб чиқишда иштирок этиш;

Қўмита раҳбарлари ва ходимлари хизмат сафарларини Ўзбекистон Республикаси Президентининг « Мансабдор шахсларнинг хорижий мамлакатларга чиқиш тартибини такомиллаштириш чоралари тўғрисида » 2014 йил 5 мартдаги ПҚ-2142-сон ҳамда «Хорижий хизмат сафарларида бўлишнинг самарадорлиги ва хорижий делегацияларнинг Ўзбекистон Республикасига ташрифини ташкил этиш учун мансабдор шахсларнинг шахсий жавобгарлигини янада ошириш чора-тадбирлари тўғрисида» 2017 йил 3 августдаги ПҚ-3170-сон қарорлари талабларига мувофиқ ташкил этиш, хизмат сафарларининг асосланганлиги, самарадорлиги ва натижадорлигини, сафар учун ажратиладиган маблағлардан мақсадли ҳамда оқилона фойдаланишни таъминлаш;

Ўзбекистон Республикаси Президенти, Ўзбекистон Республикаси Президенти Администрацияси, Ўзбекистон Республикасининг Бош вазири ва унинг ўринбосарлари топшириқларини бажариш;

ўз ўринбосарлари ваколатларини белгилаш, улар ўртасида вазифаларни тақсимлаш, Қўмитанинг бошқа мансабдор шахслари ваколатларини белгилаш, Қўмита фаолиятининг алоҳида тузилмаларига раҳбарлик қилиш учун ўз ўринбосарлари ва бошқа мансабдор шахсларнинг шахсий масъулияти даражасини белгилаш;

Қўмита фаолияти режалаштирилишини ташкил этиш ҳамда йиллик ва ярим йиллик иш режаларини тасдиқлаш, уларнинг бажарилиши устидан назоратни таъминлаш;

Ўзбекистон Республикаси Президенти ва Вазирлар Маҳкамасининг қарорлари ва топшириқлари ижросини ташкил этиш ва мониторинг олиб боришнинг амалий тизимини яратиш, Қўмита фаолиятида ижро интизомини мустаҳкамлаш бўйича комплекс амалий чора-тадбирларни бажариш, шунингдек, Ўзбекистон Республикаси Президентининг «Қонунчилик ҳужжатлари ижросини самарали ташкил этишда давлат бошқаруви органлари ва маҳаллий ижро этувчи ҳокимият органлари раҳбарларининг шахсий жавобгарлигини кучайтиришга доир қўшимча чора-тадбирлар тўғрисида» 2021 йил 10 февралдаги ПФ-6166-сон Фармонига , «Ijro.gov.uz» ижро интизоми идоралараро ягона электрон тизими самарали фаолият кўрсатишини таъминлашга қаратилган қўшимча чора-тадбирлар тўғрисида » 2021 йил 31 майдаги ПҚ-5132-сон ва «Ўзбекистон Республикаси Президентининг ҳужжатлари ва топшириқлари самарали ва натижали ижро этилиши, шунингдек, ижро интизоми мустаҳкамланиши учун Ўзбекистон Республикаси Президенти Давлат маслаҳатчиларининг, Вазирлар Маҳкамаси ва унинг комплекслари, давлат бошқаруви органлари ва бошқа ташкилотлар, шунингдек, барча даражалардаги ҳокимликлар раҳбарларининг шахсий жавобгарлиги тўғрисида» 2017 йил 11 апрелдаги ПҚ-2881-сон қарорларига мувофиқ Қўмита тизимидаги ташкилотлар раҳбарларининг шахсий масъулиятини ошириш чораларини кўриш;

Қўмита ходимларини тайёрлаш, қайта тайёрлаш, уларнинг малакасини ошириш ва аттестациядан ўтказиш, шунингдек, кадрларни танлаш ва жой-жойига қўйиш, уларнинг самарали фаолияти учун зарур шарт-шароитлар яратиш, Қўмитанинг кадрлар захирасини шакллантириш;

Ўзбекистон Республикаси Президенти, Ўзбекистон Республикаси Президенти Администрацияси ва Вазирлар Маҳкамаси номенклатурасига кирадиган бўш лавозимларга таклиф этилган кадрларнинг, шунингдек, Қўмитага ишга қабул қилинаётган бошқа кадрларнинг профессионал, ўз ишини билиши, амалий тажрибага, юксак даражада ишлаш хусусиятларига ва маънавий-ахлоқий фазилатларга эга эканлиги кафолатини таъминлаш;

саноат, радиация ва ядро хавфсизлигини таъминлаш бўйича норматив-ҳуқуқий ҳужжатлар лойиҳалари сифатли ишлаб чиқилишини, улар Ўзбекистон Республикаси « Норматив-ҳуқуқий ҳужжатлар тўғрисида »ги, « Қонунлар лойиҳаларини тайёрлаш ва Ўзбекистон Республикаси Олий Мажлисининг Қонунчилик палатасига киритиш тартиби тўғрисида »ги қонунлари, Ўзбекистон Республикаси Президентининг 2018 йил 26 августдаги ПФ-5519-сон Фармони билан тасдиқланган Ўзбекистон Республикаси Президенти Администрациясининг Регламенти (кейинги ўринларда — Ўзбекистон Республикаси Президенти Администрациясининг Регламенти), Вазирлар Маҳкамасининг 2024 йил 25 мартдаги 150-сон қарори билан тасдиқланган Вазирлар Маҳкамасининг Регламенти (кейинги ўринларда — Вазирлар Маҳкамасининг Регламенти) талабларига қатъий мувофиқ равишда ўз вақтида киритилишини ташкил этиш, шунингдек, уларнинг Вазирлар Маҳкамасида ишлаб чиқилиши, Вазирлар Маҳкамаси раҳбарияти ҳузурида ҳимоя қилиниши ва Ўзбекистон Республикаси Президенти Администрациясида кўриб чиқилишида иштирок этиш;

« Норматив-ҳуқуқий ҳужжатлар тўғрисида »ги, « Қонунлар лойиҳаларини тайёрлаш ва уларни Ўзбекистон Республикаси Олий Мажлиси Қонунчилик палатасига киритиш тартиби тўғрисида »ги Ўзбекистон Республикасининг қонунларига ва бошқа қонунчилик ҳужжатларига мувофиқ Қўмита фаолиятига алоқадор қонун лойиҳаларини тайёрлашни ташкил этиш;

Қўмита ваколатига кирадиган масалалар бўйича норматив-ҳуқуқий ҳужжатларни ва техник жиҳатдан тартибга солиш соҳасидаги норматив ҳужжатларни қабул қилиш, зарурат бўлганда бошқа вазирликлар ва идоралар билан биргаликда қўшма қарорлар қабул қилиш;

Қўмитага тақдим этилган таклифлар ва норматив-ҳуқуқий ҳужжатлар лойиҳаларини тўлиқ ва ҳар томонлама кўриб чиқилишини таъминлаш, уларни пухта ҳуқуқий, молиявий, иқтисодий ва бошқа экспертизадан ўтказиш, шунингдек, Ўзбекистон Республикаси Президенти Администрацияси Регламентида ва Вазирлар Маҳкамасининг Регламентида белгиланган муддатларда уларни келишиш;

Қўмита раҳбарлари ва ходимлари хизмат сафарларини қонунчилик ҳужжатлари талабларига мувофиқ ташкил этиш, хизмат сафарларининг асосланганлиги, самарадорлиги ва натижадорлигини, сафар учун ажратиладиган маблағлардан мақсадли ва оқилона фойдаланишни таъминлаш;

ўз ўринбосарлари ҳамда таркибий бўлинмалар раҳбарлари фаолияти самарадорлигини ва натижадорлигини мунтазам танқидий таҳлил қилиш, уларнинг шахсий ҳисоботларини эшитиш ва якунлари бўйича зарур чоралар кўриш;

Қўмита ходимларини рағбатлантириш ва интизомий жавобгарликка тортиш, шу жумладан, уларнинг эгаллаб турган лавозимда қолишининг мақсадга мувофиқлигига доир масалаларни кўриб чиқиш;

Қўмита ходимлари томонидан Одоб-ахлоқ қоидалари талабларига риоя этилишини таъминлаш;

« Коррупцияга қарши курашиш тўғрисида »ги ҳамда « Манфаатлар тўқнашуви тўғрисида »ги Ўзбекистон Республикасининг қонунлари талабларига мувофиқ Қўмита тизимида коррупция ва бошқа ҳуқуқбузарликларнинг олдини олиш чораларини кўриш, шунингдек, ҳуқуқни қўллаш амалиётини ва қонунчилик ҳужжатларини такомиллаштиришга доир чора-тадбирларни ишлаб чиқиш ва амалга ошириш орқали уларнинг содир этилишига кўмаклашувчи сабаблар ва шарт-шароитларни аниқлаш, таҳлил қилиш, бартараф этиш;

Қўмита ҳамда унинг таркибий бўлинмалари ишини ташкил этишнинг замонавий шакллари жорий этилишини таъминлаш;

аҳоли ва тадбиркорлик субъектлари билан ҳамкорлик қилишда, шу жумладан, «ягона дарча» принципини жорий этиш орқали давлат хизматлари сифати ва самарадорлигини ҳамда улардан эркин фойдаланиш ҳамда «Электрон ҳукумат тўғрисида»ги Ўзбекистон Республикасининг Қонунини амалга ошириш доирасида замонавий ахборот-коммуникация технологияларидан фойдаланиш;

жисмоний ва юридик шахсларнинг мурожаатларини кўриб чиқишга доир самарали ишларни ташкил этиш, аҳоли билан тўғридан-тўғри ва очиқ мулоқотни йўлга қўйиш, қонунчилик ҳужжатларида белгиланган муддатларда ва тартибда жисмоний шахсларни ва юридик шахслар вакилларини мунтазам равишда шахсан қабул қилиш, шу жумладан, жойларга бориб қабул қилиш;

Ўзбекистон Республикаси Президентининг Халқ қабулхоналари билан самарали ҳамкорликни, уларнинг фаолиятида Қўмита ходимлари ва раҳбарларининг фаол иштирок этишини ташкил этиш, жисмоний ва юридик шахсларнинг Ўзбекистон Республикаси Президенти Виртуал қабулхонасидан тушган мурожаатлари ўз вақтида ва тўлиқ кўриб чиқилишини таъминлаш;

давлат сирига киритилган маълумотлар ва махфий ахборот билан ишлашда қонунчилик ҳужжатлари талабларига риоя қилиш;

марказий аппарат ва ҳудудий бошқармалар (бўлимлар) тузилмасига зарурат бўлганда бошқарув ходимларининг чекланган сони ва меҳнатга ҳақ тўлаш фонди доирасида ўзгартиришлар киритиш;

Қўмитанинг таркибий бўлинмалари тўғрисидаги низомларни (уставларни) белгиланган тартибда тасдиқлаш;

Қўмита таркибий бўлинмаларнинг ходимларини белгиланган тартибда лавозимга тайинлаш ва лавозимдан озод қилиш;

ушбу Низомда белгиланган, саноат, радиация ва ядро хавфсизлиги бўйича техник жиҳатдан тартибга солиш, шунингдек, саноат, радиация ва ядро хавфсизлигини таъминлаш соҳасида профилактик чора-тадбирларни ишлаб чиқиш ва амалга ошириш соҳаларида барча жисмоний ва юридик шахсларнинг қонунчилик ҳужжатлари ва норматив ҳужжатларга риоя қилиши устидан давлат назоратини таъминлаш бўйича Қўмита фаолиятининг асосий йўналишларини ташкил этиш ва мувофиқлаштириш;

Қўмитани моддий-техник жиҳозлашни яхшилаш ишларини амалга ошириш;

меҳнат ва ижро интизомини ошириш, кадрларни жой-жойига қўйишни таъминлаш, шунингдек, ходимларга юкланган вазифаларни бажариш бўйича уларнинг шахсий масъулияти бўйича кечиктириб бўлмайдиган чоралар кўриш;

Ўзбекистон Республикаси ҳудудида атом энергиясидан фойдаланиш соҳасида фаолиятни лицензиялаш мақсадида экспертиза бўйича ишларни бажариш учун хорижий ихтисослаштирилган институтлар ва компанияларни, шунингдек, хорижий мутахассислар ва экспертларни жалб этиш.

Қўмита раиси қонунчилик ҳужжатларига мувофиқ бошқа ваколатларни ҳам амалга ошириши мумкин.

23. Қуйидагилар Қўмита раиси ўринбосарларининг асосий функционал вазифалари ҳисобланади:

Ўзбекистон Республикаси Конституцияси ва қонунлари талабларига, шунингдек, бошқа норматив-ҳуқуқий ҳужжатларга риоя қилиш;

Қўмита раиси вақтинча бўлмаганда, тегишли буйруқ асосида унинг вазифаларини бажариш;

Қўмитанинг мутасаддилик қилинадиган таркибий бўлинмалари фаолиятини мувофиқлаштириш, назорат қилиш ва уларга бевосита раҳбарлик қилиш, уларнинг ходимлари ўртасида вазифаларни тақсимлаш;

Қўмита фаолиятининг мутасаддилик қилинадиган йўналишлари бўйича Ўзбекистон Республикаси Президентининг ҳужжатлари ва Вазирлар Маҳкамасининг қарорлари билан тасдиқланган республика ижро этувчи ҳокимият органлари фаолиятини янада такомиллаштириш бўйича концепциялар, комплекс дастурлар ва тадбирлар ижросини танқидий ва чуқур таҳлил қилиш;

мутасаддилик қилинадиган таркибий бўлинмалар томонидан прогноз кўрсаткичларга эришишни сўзсиз таъминлаш чораларини кўриш, бўлинмалар раҳбарларининг ҳисоботларини мунтазам эшитиш ва ушбу кўрсаткичларга эришиш учун уларнинг шахсий жавобгарлигини ошириш;

мутасаддилик қилинадиган таркибий бўлинмалар раҳбарларининг йиллик ва ярим йиллик режаларини тасдиқлаш, уларнинг бажарилиши устидан назоратни таъминлаш;

Ўзбекистон Республикаси Президенти ва Вазирлар Маҳкамасининг ҳужжатлари ва топшириқлари ижросини таъминлаш, Қўмитанинг мутасаддилик қилинадиган таркибий бўлинмаларида ижро интизоми бўйича комплекс амалий чора-тадбирларни амалга ошириш, шунингдек, қонунчилик ҳужжатларига мувофиқ топшириқлар ўз вақтида ва сифатли ижро этилиши учун таркибий бўлинмалар раҳбарларининг шахсий масъулиятини ошириш чораларини кўриш;

Илмий-техник кенгаш қарорлари, Қўмита раисининг буйруқлари ва топшириқлари ўз вақтида ва сифатли бажарилишини таъминлаш;

мутасаддилик қилинадиган таркибий бўлинмаларда кадрларни танлаш ва жой-жойига қўйиш бўйича Қўмита раисига таклифлар тақдим этиш, уларнинг профессионал, ўз ишини билиши, амалий тажрибага, юксак даражада ишлаш хусусиятларига ва маънавий-ахлоқий фазилатларга эга эканлиги кафолатини таъминлаш, уларнинг касбий малакасини ошириш чораларини кўриш, мутасаддилик қилинадиган бўлинмаларда кадрлар захирасини шакллантириш;

норматив-ҳуқуқий ҳужжатлар лойиҳалари мутасаддилик қилинадиган таркибий бўлинмалар томонидан сифатли ва ўз вақтида ишлаб чиқилишини ташкил этиш, Қўмитанинг таркибий бўлинмаларида тайёрланган ҳужжатлар лойиҳаларини кўриб чиқиш ва улар кейинчалик Қўмита раиси томонидан кўриб чиқилиши, имзоланиши учун келишиш, уларнинг Ўзбекистон Республикаси Президенти Администрацияси ва Вазирлар Маҳкамаси Регламентлари талабларига қатъий мувофиқ равишда Ўзбекистон Республикаси Вазирлар Маҳкамасига ўз вақтида киритилишини таъминлаш, шунингдек, Вазирлар Маҳкамасида норматив-ҳуқуқий ҳужжатлар лойиҳаларини ишлаб чиқишда Қўмита раисининг топшириғига биноан иштирок этиш;

Қўмитага тақдим этилган таклифлар ва норматив-ҳуқуқий ҳужжатлар лойиҳаларини тўлиқ ва ҳар томонлама кўриб чиқиш, уларни пухта ҳуқуқий, молиявий, иқтисодий ва бошқа экспертизадан ўтказиш;

хизмат сафарларини Ўзбекистон Республикаси Президентининг « Мансабдор шахсларнинг хорижий мамлакатларга чиқиш тартибини такомиллаштириш чоралари тўғрисида » 2014 йил 5 мартдаги ПҚ-2142-сон ҳамда «Хорижий хизмат сафарларида бўлишнинг самарадорлиги ва хорижий делегацияларнинг Ўзбекистон Республикасига ташрифини ташкил этиш учун мансабдор шахсларнинг шахсий жавобгарлигини янада ошириш чора-тадбирлари тўғрисида» 2017 йил 3 августдаги ПҚ-3170-сон қарорлари талабларига мувофиқ ташкил этиш, хизмат сафарларининг асосланганлиги, самарадорлиги ва натижадорлигини, сафар учун ажратиладиган маблағлардан мақсадли ҳамда оқилона фойдаланишни таъминлаш;

мутасаддилик қилинадиган таркибий бўлинмалар раҳбарлари ва ходимлари фаолияти самарадорлиги ва натижадорлигини мунтазам танқидий таҳлил қилиш, мажлисларда уларнинг шахсий ҳисоботларини эшитиш ва якунлари бўйича зарур чоралар кўриш;

фаолият соҳасига тегишли масалалар бўйича Қўмита фаолиятини такомиллаштиришга доир амалий чоралар кўриш, қонунчилик ҳужжатларини такомиллаштириш бўйича таклифлар ишлаб чиқиш ва уларни Қўмита раисига киритиш;

мутасаддилик қилинадиган таркибий бўлинмалар раҳбарлари ва ходимларини рағбатлантириш ва интизомий жавобгарликка тортиш, шу жумладан, уларнинг эгаллаб турган лавозимида қолиши мақсадга мувофиқлигига масаласини кўриб чиқиш бўйича таклифларни Қўмита раисига киритиш;

Қўмита ходимларининг одоб-ахлоқ қоидалари талабларига, мутасаддилик қилинадиган таркибий бўлинмалар раҳбарлари ва ходимларининг ушбу қоидаларга риоя этишини таъминлаш;

ҳуқуқни қўллаш амалиётини ва қонунчилик ҳужжатларини такомиллаштиришга доир чора-тадбирларни ишлаб чиқиш ва амалга ошириш орқали « Коррупцияга қарши курашиш тўғрисида »ги ҳамда « Манфаатлар тўқнашуви тўғрисида »ги Ўзбекистон Республикасининг қонунлари талабларига мувофиқ Қўмита тизимида коррупция ва бошқа ҳуқуқбузарликларнинг олдини олиш чораларини кўриш, шунингдек, уларнинг содир этилишига кўмаклашувчи сабаблар ва шарт-шароитларни аниқлаш, таҳлил қилиш, бартараф этиш;

давлат хизматлари самарадорлиги, сифати ва улардан эркин фойдаланишни оширишга доир таклифларни Қўмита раисига киритиш;

қонунчилик ҳужжатларида белгиланган муддатларда ва тартибда жисмоний ва юридик шахсларнинг мурожаатларини кўриб чиқиш бўйича самарали ишларни ташкил этиш, аҳоли билан тўғридан-тўғри ва очиқ мулоқотни йўлга қўйиш, жисмоний шахсларни ва юридик шахслар вакилларини мунтазам равишда шахсан қабул қилиш, шу жумладан, жойларга бориб қабул қилиш;

Ўзбекистон Республикаси Президентининг Халқ қабулхоналари билан самарали ҳамкорлик қилиш, уларнинг фаолиятида фаол иштирок этиш, жисмоний ва юридик шахслар вакилларининг Ўзбекистон Республикаси Президентининг Виртуал қабулхонасидан тушган мурожаатлари ўз вақтида ва тўлақонли кўриб чиқилишини таъминлаш;

давлат сирига киритилган маълумотлар ва махфий ахборот билан ишлашда қонунчилик ҳужжатлари талабларига риоя қилиш;

ушбу Низомда белгиланган, саноат, радиация ва ядро хавфсизлигини таъминлаш соҳасида профилактика чора-тадбирларини ишлаб чиқиш ва амалга ошириш соҳасида жисмоний ва юридик шахсларнинг қонунчилик ҳужжатлари ва норматив ҳужжатларга риоя қилиши устидан давлат назоратини таъминлаш бўйича Қўмита фаолиятининг асосий йўналишларини ташкил этиш ва мувофиқлаштириш;

ижро интизомининг ҳолатини, Қўмита фаолиятини таҳлил қилиш бўйича аппарат йиғилишларини ўтказиш;

Қўмита раисининг тезкор топшириқларини бажариш.

Қўмита раисининг ўринбосарлари қонунчилик ҳужжатларига мувофиқ бошқа ваколатларни ҳам амалга оширилиши мумкин.

24. Қуйидагилар марказий аппарат таркибий бўлинмалари раҳбарларининг асосий функционал вазифалари ҳисобланади:

Ўзбекистон Республикаси Конституцияси ва қонунлари талабларига, шунингдек, бошқа норматив-ҳуқуқий ҳужжатларга риоя этиш;

Ўзбекистон Республикаси Президенти ва Вазирлар Маҳкамасининг қарорлари ва топшириқлари ижросини ташкил этиш ва мониторинг олиб боришнинг амалий тизимини яратиш, Қўмита фаолиятида ижро интизомини мустаҳкамлаш бўйича комплекс амалий чора-тадбирларни бажариш, шунингдек, Ўзбекистон Республикаси Президентининг «Қонунчилик ҳужжатлари ижросини самарали ташкил этишда давлат бошқаруви органлари ва маҳаллий ижро этувчи ҳокимият органлари раҳбарларининг шахсий жавобгарлигини кучайтиришга доир қўшимча чора-тадбирлар тўғрисида» 2021 йил 10 февралдаги ПФ-6166-сон Фармонига , «Ijro.gov.uz» ижро интизоми идоралараро ягона электрон тизими самарали фаолият кўрсатишини таъминлашга қаратилган қўшимча чора-тадбирлар тўғрисида » 2021 йил 31 майдаги ПҚ-5132-сон ва «Ўзбекистон Республикаси Президентининг ҳужжатлари ва топшириқлари самарали ва натижали ижро этилиши, шунингдек, ижро интизоми мустаҳкамланиши учун Ўзбекистон Республикаси Президенти Давлат маслаҳатчиларининг, Вазирлар Маҳкамаси ва унинг комплекслари, давлат бошқаруви органлари ва бошқа ташкилотлар, шунингдек, барча даражалардаги ҳокимликлар раҳбарларининг шахсий жавобгарлиги тўғрисида» 2017 йил 11 апрелдаги ПҚ-2881-сон қарорларига мувофиқ шахсий масъулиятини ошириш чораларни кўриш;

таркибий бўлинмалар фаолиятига бевосита раҳбарлик қилиш, ушбу бўлинмаларга юкланган вазифалар ва функциялар бажарилишини ташкил этиш;

Қўмитанинг таркибий бўлинмалари фаолиятини ўз ваколатлари доирасида мувофиқлаштириш;

саноат, радиация ва ядро хавфсизлигини таъминлаш соҳасида назорат-профилактик ишлар ва бошқа тадбирлар бажарилишини тизимли таҳлил қилиш ва таркибий бўлинмалар томонидан кўрсатиб ўтилган соҳаларда бахтсиз ҳодисалар ва аварияларнинг олдини олишга ва уларни қисқартиришга йўналтирилган қўшимча чоралар кўрилиши бўйича таклифларни Қўмита раҳбариятига киритиш;

Ўзбекистон Республикаси Президенти ва Вазирлар Маҳкамаси ҳужжатлари ва топшириқлари ижросини таъминлаш, Қўмита таркибий бўлинмалари ходимларининг ижро интизомини мустаҳкамлаш бўйича комплекс амалий чора-тадбирларни амалга ошириш, шунингдек, қонунчилик ҳужжатларига мувофиқ топшириқларнинг ўз вақтида ва сифатли бажарилиши учун таркибий бўлинмалар ходимларининг шахсий масъулиятини ошириш чораларини кўриш;

Илмий-техник кенгаш қарорлари, Қўмита раиси ва унинг ўринбосарлари буйруқлари ҳамда топшириқлари ўз вақтида ва сифатли бажарилишини таъминлаш;

таркибий бўлинмаларнинг ярим йиллик иш режалари ишлаб чиқилишини таъминлаш, уларни тасдиқлаш учун киритиш, уларда кўрсатилган вазифалар ва тадбирлар ўз вақтида ва сифатли бажарилишини таъминлаш;

таркибий бўлинмаларга юкланган вазифалар бажарилишини назорат қилиш ва мувофиқлаштириш, ҳудудий бошқармалар (бўлимлар), саноат хавфсизлиги инспекциялари ва идоравий мансуб ташкилотлар фаолиятига амалий ва методик ёрдам кўрсатиш;

таркибий бўлинмалар фаолиятига оид масалалар юзасидан қонунчилик ҳужжатларини такомиллаштириш бўйича таклифларни ишлаб чиқиш ва кўриб чиқиш учун Қўмита раисининг тегишли ўринбосарларига киритиш;

таркибий бўлинмаларда кадрларни танлаш ва жой-жойига қўйишда Қўмита раисининг ўринбосарларига таклифлар тақдим этиш, уларнинг касбий малакасини ошириш чораларини кўриш, таркибий бўлинмаларда кадрлар захирасини шакллантириш;

норматив-ҳуқуқий ҳужжатлар лойиҳалари таркибий бўлинмалар томонидан сифатли ишлаб чиқилишини ташкил этиш, уларнинг Ўзбекистон Республикаси Президенти Администрацияси ва Вазирлар Маҳкамасининг Регламентлари талабларига қатъий мувофиқ равишда Вазирлар Маҳкамасига ўз вақтида киритилишини таъминлаш;

Қўмитага тақдим этилган таклифлар ва норматив-ҳуқуқий ҳужжатлар лойиҳаларини тўлиқ ва ҳар томонлама кўриб чиқиш;

хизмат сафарларини Ўзбекистон Республикаси Президентининг « Мансабдор шахсларнинг хорижий мамлакатларга чиқиш тартибини такомиллаштириш чоралари тўғрисида » 2014 йил 5 мартдаги ПҚ-2142-сон ҳамда «Хорижий хизмат сафарларида бўлишнинг самарадорлиги ва хорижий делегацияларнинг Ўзбекистон Республикасига ташрифини ташкил этиш учун мансабдор шахсларнинг шахсий жавобгарлигини янада ошириш чора-тадбирлари тўғрисида» 2017 йил 3 августдаги ПҚ-3170-сон қарорлари талабларига мувофиқ ташкил этиш, хизмат сафарларининг асосланганлиги, самарадорлиги ва натижадорлигини, сафар учун ажратиладиган маблағлардан мақсадли ҳамда оқилона фойдаланишни таъминлаш;

таркибий бўлинмалар ходимлари фаолияти самарадорлиги ва натижадорлигини мунтазам равишда танқидий таҳлил қилиш, йиғилишларда уларнинг шахсий ҳисоботларини эшитиш, уларнинг якунлари бўйича зарур чоралар кўриш;

Қўмита ходимларининг одоб-ахлоқ қоидалари талабларига риоя қилишини, таркибий бўлинмалар ходимлари ушбу қоидаларга риоя этишини таъминлаш;

« Коррупцияга қарши курашиш тўғрисида »ги ҳамда « Манфаатлар тўқнашуви тўғрисида »ги Ўзбекистон Республикасининг қонунлари талабларига мувофиқ таркибий бўлинмаларда коррупция ва бошқа ҳуқуқбузарликларнинг олдини олиш чораларини кўриш, шунингдек, ҳуқуқни қўллаш амалиётини ва қонунчилик ҳужжатларини такомиллаштиришга доир чора-тадбирларни ишлаб чиқиш ва амалга ошириш орқали уларнинг содир этилишига кўмаклашувчи сабаблар ва шарт-шароитларни аниқлаш, таҳлил қилиш, бартараф этиш;

давлат хизматларининг самарадорлиги, сифати ва улардан эркин фойдаланишни оширишга доир таклифларни Қўмита раҳбариятига киритиш;

жисмоний ва юридик шахсларнинг мурожаатларини кўриб чиқиш, қонунчилик ҳужжатларида белгиланган муддатларда ва тартибда аҳоли билан тўғридан-тўғри ва очиқ мулоқотни йўлга қўйиш;

Ўзбекистон Республикаси Президентининг Халқ қабулхоналари ва Виртуал қабулхонасидан тушган мурожаатларини ўз вақтида ва тўлақонли кўриб чиқиш;

давлат сирига киритилган маълумотлар ва махфий ахборот билан ишлашда қонунчилик ҳужжатлари талабларига риоя қилиш.

7-боб. Қўмита раҳбарларининг жавобгарлиги

25. Қўмита раиси:

Қўмитага юкланган вазифалар ва функциялар бажарилиши;

ушбу Низомнинг 21-бандида кўрсатилган Қўмитанинг жавобгарлик соҳалари бўйича;

ушбу Низомнинг 22-бандида кўрсатилган ўз функционал вазифаларининг сифатли бажарилиши учун шахсан жавобгардир.

26. Қўмита раиси ўринбосарлари:

мутасаддилик қилинадиган йўналиш ва таркибий бўлинмаларда Қўмитага юкланган вазифалар ва функцияларнинг бажарилиши;

ушбу Низомнинг 21-бандида кўрсатилган Қўмитанинг жавобгарлик соҳаларида мутасаддилик қилинадиган масалалар бўйича;

ушбу Низомнинг 23-бандида кўрсатилган ўз функционал вазифаларининг сифатли бажарилиши учун шахсан жавобгардир.

8-боб. Қўмита фаолиятини ташкил этиш

1-§. Қўмита раҳбарияти

27. Қўмитага раис раҳбарлик қилади.

Раиснинг икки нафар ўринбосари бўлади.

Қўмита раиси белгиланган тартибда Ўзбекистон Республикаси Президенти томонидан лавозимга тайинланади ва лавозимдан озод қилинади.

Қўмита раиси ўринбосарлари Ўзбекистон Республикаси Президенти билан келишилган ҳолда Вазирлар Маҳкамаси томонидан, Қўмитанинг бошқа тизим ташкилотлари раҳбарлари Вазирлар Маҳкамаси билан келишган ҳолда Қўмита раиси томонидан лавозимга тайинланади ва лавозимдан озод қилинади.

28. Қўмита раиси мақоми, меҳнатга ҳақ тўлаш, тиббий ва транспорт хизмат кўрсатиш шароитлари бўйича вазирга, Қўмита раиси ўринбосарлари эса — вазир ўринбосарига тенглаштирилади.

29. Қўмита раиси:

Қўмитага юкланган вазифалар ва функцияларнинг бажарилиши;

ушбу Низомда назарда тутилган Қўмитанинг жавобгарлик соҳалари бўйича;

ўз функционал вазифаларининг сифатли бажарилиши учун шахсан жавобгардир.

30. Қўмита раисининг ўринбосарлари:

Қўмитанинг мутасаддилик қилинадиган таркибий бўлинмаларида Қўмитага юкланган вазифалар ва функцияларнинг бажарилиши;

ушбу Низомда назарда тутилган Қўмитанинг мутасаддилик қилинадиган масалаларга доир жавобгарлик соҳалари бўйича;

ўз функционал вазифаларининг сифатли бажарилиши учун шахсан жавоб беради.

Қўмита раиси бўлмаган вақтда унинг ваколатларини бажаради.

Қўмитанинг ҳудудий бошқармалар (бўлимлар) ва идоравий мансуб ташкилотларига Қўмита раиси томонидан лавозимга тайинланадиган ва лавозимдан озод этиладиган раҳбарлар бошчилик қилади.

31. Қўмитанинг ҳудудий бошқармалари (бўлимлар), саноат хавфсизлиги инспекциялари ва идоравий мансуб ташкилотлари раҳбарлари:

уларга юкланган вазифалар ва функцияларнинг бажарилиши ва жавобгарлиги соҳалари бўйича;

ўз функционал вазифалари сифатли бажарилиши учун шахсан жавоб берадилар.

Қўмитанинг таркибий тузилмалари ўз фаолиятини Қўмита раиси томонидан тасдиқланадиган низомларга мувофиқ амалга оширади.

2-§. Республика ва маҳаллий ижро этувчи ҳокимият органлари ҳамда бошқа ташкилотлар билан ўзаро ҳамкорлик

32. Қўмита ўз фаолиятини республика ва маҳаллий ижро этувчи ҳокимият органлари ва бошқа ташкилотлар билан ҳамкорлик қилади.

33. Ҳудудий бошқармалар (бўлимлар), саноат хавфсизлиги инспекциялари ва идоравий мансуб ташкилотлар ўз ваколатлари доирасида бошқа давлат органлари ва хўжалик бирлашмаларининг ҳудудий органлари, маҳаллий ижро этувчи ҳокимият органлари ва бошқа ташкилотлар билан ҳамкорлик қилади.

9-боб. Қўмита фаолияти самарадорлиги ва натижадорлигини баҳолаш мезонлари ва иш индикаторлари

34. Қўмита фаолиятининг самарадорлиги мунтазам баҳоланади.

35. Қўмита фаолиятининг самарадорлиги ва натижадорлигини баҳолаш тегишли мезонлар ва иш индикаторларга асосланади.

36. Қўмита фаолиятининг самарадорлиги ва натижадорлигини баҳолаш якунлари бўйича:

Қўмита ва унинг ҳудудий бошқармалари, саноат хавфсизлиги инспекциялари раҳбарлари ва ходимларини рағбатлантириш (мукофотлаш) ёки интизомий жавобгарликка тортиш;

Қўмита фаолиятида аниқланган камчиликларни бартараф этиш ва унинг фаолиятини янада такомиллаштириш чоралари кўрилади.

37. Қўмита фаолиятининг самарадорлиги ва натижадорлигини баҳолаш тартиби ва услуби Вазирлар Маҳкамаси томонидан белгиланади.

38. Қўмита раиси ва унинг ўринбосарлари фаолияти бўйича самарадорлик кўрсаткичлари қонунчилик ҳужжатлари билан белгиланади.

39. Қўмитанинг текшириш ҳуқуқига эга инспекторлари уларнинг соҳага оид билимларини текшириш мақсадида уч йилда бир маротаба аттестациядан ўтказилади.

10-боб. Илмий-техник кенгаш

40. Қўмита ваколатига кирадиган муҳим масалаларни кўриб чиқиш ва тавсиялар бериш учун Илмий-техник кенгаш ташкил этилади. Илмий-техник кенгаш Қўмита ҳузурида фаолият юритадиган маслаҳат органи ҳисобланади.

41. Илмий-техник кенгаш тўғрисидаги Низом ва унинг таркиби Қўмита раиси томонидан тасдиқланади.

42. Илмий-техник кенгаш қуйидаги асосий вазифаларни амалга оширади:

саноат, радиация ва ядро хавфсизлигини таъминлаш соҳасидаги давлат сиёсатини юритиш ва тартибга солиш мақсадида илмий тадқиқотлар ва илмий-техник ишларнинг йўналишлари, мавзулари ва натижалари бўйича таклифларни кўриб чиқиш ва тайёрлаш;

саноат, радиация ва ядро хавфсизлигини таъминлаш соҳасида давлат сиёсатини юритиш ва тартибга солиш бўйича тавсиялар ишлаб чиқиш;

Қўмита ваколати доирасида тартибга солиш, назорат қилиш ва лицензиялаш фаолиятида ҳуқуқни қўллаш амалиётидан келиб чиқиб, илғор тажрибалар ва инновацион ишланмаларни амалга оширишга кўмаклашиш.

43. Илмий-техник кенгаш Қўмита ваколатига тегишли бўлган бошқа масалаларни ҳам кўриб чиқиш ҳуқуқига эга.

44. Илмий-техник кенгаш йиғилишларига Қўмита ваколатига кирадиган масалалар бўйича давлат органлари ва хўжалик бирлашмалари, назорат остидаги объектларга эга бўлган корхона ва ташкилотлар раҳбарлари таклиф этилиши мумкин.

11-боб. Қўмита фаолиятини молиялаштириш ва моддий-техник таъминлаш, унинг ходимлари меҳнатига ҳақ тўлаш ва уларни моддий рағбатлантириш

45. Қўмита бюджет ташкилоти ҳисобланади ҳамда унинг моддий-техник таъминоти, ходимлари меҳнатига ҳақ тўлаш ва уларни моддий рағбатлантириш бўйича харажатлар Давлат бюджети маблағлари, Жамғарма маблағлари ва қонунчилик билан тақиқланмаган бошқа маблағлар ҳисобидан молиялаштирилади.

46. Қўмитани бошқарув ходимларининг лавозим маошини белгилашда Давлат бюджети маблағлари ҳисобидан ягона тариф сеткаси бўйича меҳнатга ҳақ тўлашнинг тасдиқланган разрядларига мувофиқ тариф коэффициенти 1,8 бараварга оширилган ҳолда қўлланилади.

47. Қўмита ходимларининг иш ҳақи лавозим маоши, иш ҳақига туман (ҳудудий) коэффициентлари, мукофотлар, устамалар, қўшимча ҳақлар ва қонунчилик ҳужжатларида назарда тутилган бошқа рағбатлантирувчи тўловлардан иборат.

48. Қўмитанинг барча ходимларига узлуксиз иш стажи учун устамаларни уларнинг умумий меҳнат фаолиятини қамраб олган ҳолда, устамалар фақат асосий иш жойи бўйича ҳар ойда ва ходимнинг ойлик маошига (рағбатлантириш коэффициентини ҳисобга олган ҳолда) нисбатан қуйидаги фоизларда ҳисобланади:

Иш стажи бўйича гуруҳ Узлуксиз стаж учун устама миқдори 1 йилдан 3 йилгача 30% 3 йилдан 5 йилгача 60% 5 йилдан 10 йилгача 75% 10 йилдан 15 йилгача 100% 15 йил ва ундан ортиқ 150%

49. Қўмитанинг инспекторлар таркибига ва ходимларига фарқлаш белгилари бўлган формали кийим-бош ва ягона намунадаги гувоҳнома белгиланган тартибда берилади.

12-боб. Якунловчи қоида

50. Қўмита қонунчилик ҳужжатларида белгиланган тартибда қайта ташкил этилади ва тугатилади.

Вазирлар Маҳкамасининг 2024 йил 4 октябрдаги 633-сон қарорига 2-ИЛОВА

Саноат, радиация ва ядро хавфсизлиги қўмитаси ҳузуридаги Саноат хавфсизлиги соҳасини қўллаб-қувватлаш жамғармаси маблағларини шакллантириш ва улардан фойдаланиш тартиби тўғрисида

1-боб. Умумий қоидалар

1. Мазкур Низом Саноат, радиация ва ядро хавфсизлиги қўмитаси ҳузуридаги Саноат хавфсизлиги соҳасини қўллаб-қувватлаш жамғармаси (кейинги ўринларда — Жамғарма) маблағларини шакллантириш ва улардан фойдаланиш тартибини белгилайди.

2. Жамғарма юридик шахс ташкил этмаган ҳолда, Ўзбекистон Республикаси Вазирлар Маҳкамаси ҳузуридаги Саноат, радиация ва ядро хавфсизлиги қўмитасига (кейинги ўринларда — Қўмита) юкланган вазифаларни амалга ошириш бўйича чора-тадбирларни молиялаштиришга кўмаклашиш ва унинг фаолияти самарадорлигини таъминлаш мақсадида ташкил этилади.

3. Жамғарма маблағлари Қўмитанинг Иқтисодиёт ва молия вазирлиги ҳузуридаги Ғазначилик хизмати қўмитасида белгиланган тартибда очиладиган миллий валютадаги шахсий ғазна ҳисобварақларида жамланади.

2-боб. Жамғарма маблағларини шакллантириш тартиби

4. Жамғарма маблағлари қуйидаги манбалар ҳисобидан шакллантирилади:

Жамғарманинг кутилаётган харажатларидан келиб чиқиб, Иқтисодиёт ва молия вазирлиги билан келишилган ҳолда ўрнатиладиган, «Навоийуран» давлат корхонаси йиллик фойдасидан ҳисобланган дивиденднинг 1 фоизи миқдоридаги ажратмалар;

«Саноат хавфсизлиги» ДМ, «Радиация ва ядро хавфсизлиги илмий-техник маркази» ДМ, «Контехназоратўқув» ДМ ва «Саноат назорати лабораторияси» ДМ соф фойдасининг 50 фоизи миқдоридаги ажратмалар;

саноат, радиация ва ядро хавфсизлиги соҳасида давлат хизматларини кўрсатишдан қонунчиликда белгиланган тартибда ва миқдорларда Қўмитага тушадиган маблағлар.

Қўмита томонидан хўжалик юритувчи субъектлар, уларнинг мансабдор шахслари ва жисмоний шахслардан саноат, радиация ва ядро хавфсизлиги соҳасидаги қонунчилик ҳамда техник жиҳатдан тартибга солиш соҳасидаги норматив ҳужжатлар талабларини бузганлик учун қонунчиликда белгиланган тартибда ва миқдорларда ундириладиган жарималар суммасининг 80 фоизи миқдоридаги маблағлар (бунда ушбу тушумнинг 75 фоизи қисми Қўмитанинг ахборот-коммуникация технологияларини ривожлантиришга йўналтирилади);

Қўмита тизимидаги ташкилотлар томонидан белгиланган тартибда ажратиладиган маблағлар;

халқаро молия институтлари маблағлари, донор ташкилотлар грантлари;

қонунчиликда тақиқланмаган бошқа манбалар.

3-боб. Жамғарма маблағларидан фойдаланиш тартиби

5. Жамғарма маблағларидан ҳар йили Қўмита томонидан тасдиқланадиган, Иқтисодиёт ва молия вазирлиги билан келишилган даромадлар ва харажатлар сметасига мувофиқ равишда фойдаланилади.

6. Жамғарма маблағларидан қуйидаги мақсадларда фойдаланилади:

Қўмита ҳамда унинг тизимидаги ташкилотларнинг моддий-техник базасини мустаҳкамлаш;

Қўмитани жорий сақлаш харажатлари;

Қўмитага белгиланган тартибда атом энергиясидан фойдаланиш соҳасидаги фаолиятни лицензиялаш мақсадида экспертиза бўйича ишларни амалга ошириш учун хорижий ихтисослаштирилган институтлар ва компанияларни, шунингдек, хорижий мутахассис ва экспертларни шартнома асосида жалб этиш;

Қўмита фаолиятида ахборот технологияларини жорий этиш ва модернизация қилиш;

Қўмита ходимларини моддий рағбатлантириш ва ижтимоий ҳимоя қилиш;

Қўмита ходимларини тайёрлаш, қайта тайёрлаш, уларнинг малакасини ошириш ва амалиёт ўташини, шу жумладан, хорижий давлатларга ва республика ҳудудида хизмат сафарларини ташкил қилиш, халқаро конференциялар, семинарлар ва бошқа тадбирларда иштирок этишини таъминлаш;

радиация ва ядро хавфсизлиги соҳасида эксперт ва маслаҳат хизматларини кўрсатиш;

Қўмита фаолиятини қўллаб-қувватлаш ва ривожлантириш билан боғлиқ бошқа тадбирларни молиялаштириш.

7. Жамғарманинг даромадлар ва харажатлар сметаси жорий йилда келиб тушиши кутилаётган маблағлар доирасида ва бажарилиши лозим бўлган тадбирлардан келиб чиқиб тузилади.

8. Қўмита раиси Жамғарма маблағларини тасарруф этувчи ҳисобланади.

4-боб. Жамғарма маблағларини ходимларни моддий рағбатлантириш ва ижтимоий ҳимоя қилишга йўналтириш

9. Жамғарма маблағлари ҳисобидан Қўмита ходимларини моддий рағбатлантириш ва ижтимоий ҳимоя қилиш Жамғарма молиявий ҳолатидан келиб чиқиб, қуйидаги шаклларда амалга оширилади:

қонунчиликда белгиланган байрам кунларда ва бошқа муҳим саналарда бир марталик пул мукофоти билан мукофотлаш;

лавозим маошларига ҳар ой белгиланадиган шахсий устама тўлаш;

ишда муваффақиятларга эришганлиги ва муҳим топшириқларни бажарганлиги учун алоҳида ходимларни мукофотлаш;

овқат пули учун тўлов;

йўлкира харажатлари учун тўлов;

моддий ёрдам кўрсатиш.

10. Қўмита ҳамда унинг тизимидаги бюджет ташкилотлари ходимлари қуйидаги байрамлар ва муҳим саналар муносабати билан Қўмита молиявий ҳолатидан келиб чиқиб, бир лавозим маошигача бўлган миқдорда (рағбатлантириш коэффициенти билан бирга) мукофотланиши мумкин.

1 январь — Янги йил;

8 март — Халқаро хотин-қизлар куни;

21 март — Наврўз байрами;

9 май — Хотира ва қадрлаш куни;

Рўза ҳайити (Ийд ал-Фитр);

Қурбон ҳайити (Ийд ал-Адҳа);

1 сентябрь — Мустақиллик куни;

1 октябрь — Ўқитувчи ва мураббийлар куни;

8 декабрь — Ўзбекистон Республикаси Конституцияси куни.

Бунда ходимларга бериладиган мукофот миқдори Қўмита раиси томонидан белгиланади.

11. Қўмита ходимларига Жамғарма ҳисобидан қуйидаги устама ва рағбатлантириш чоралари белгиланади:

ташаббускорлик ва меҳнат натижалари бўйича ҳар ойда шахсий устама тўловлари ойлик маошининг (рағбатлантириш коэффициентини ҳисобга олган ҳолда) — бир юз фоизигача бўлган миқдорда;

хизмат вазифаларини сидқидилдан бажаргани, ижро интизомига риоя этилгани, ўз хизмат фаолияти самарадорлигини ошириш мотивацияси ва хизмат вазифаларини самарали бажариш тизимини жорий этган марказий аппарат ходимларига ҳар ойда ёки чоракда лавозим маошининг (рағбатлантириш коэффициентини ҳисобга олган ҳолда) — эллик фоизигача бўлган миқдорда, ҳудудий бўлинма ходимларига лавозим маошининг (рағбатлантириш коэффициентини ҳисобга олган ҳолда) — йигирма фоизигача бўлган миқдорда.

12. Қўмита ҳамда унинг тизимидаги бюджет ташкилотлари ходимлари алоҳида муваффақиятларга эришгани ва муҳим топшириқларни бажаргани учун чорак якунлари бўйича лавозим маошининг (рағбатлантириш коэффициентини ҳисобга олган ҳолда) эллик фоизигача миқдорда мукофотланади.

Устама ва рағбатлантириш чоралари жорий қилинадиган ходимлар тоифаси, тартиби ва уларга бериладиган устама ва рағбатлантириш миқдори Қўмита раиси томонидан белгиланади.

13. Қўмита ходимларини ижтимоий ҳимоя қилиш мақсадида уларга ҳар ойда базавий ҳисоблаш миқдорининг икки бараваригача миқдорда овқат пули ҳамда йўлкира харажатларини қоплаш учун базавий ҳисоблаш миқдорининг бир бараваригача миқдорда йўлкира пули берилиши мумкин.

14. Қўмита ходимларига Қўмита касаба уюшмасининг илтимосномасига биноан Қўмита молиявий ҳолатидан келиб чиқиб, Қўмита раисининг қарори билан қуйидаги шароитлар ва миқдорларда моддий ёрдам кўрсатилиши мумкин:

ходимнинг юбилей саналари (50 ёш, 60 ёш) муносабати билан базавий ҳисоблаш миқдорининг ўттиз баравари;

ходимнинг ўзи оила қурганда ёки фарзандининг тўйи муносабати билан (никоҳ гувоҳномасига асосан, фақат биринчи никоҳ учун) базавий ҳисоблаш миқдорининг эллик баравари;

ходим вафот этганда, унинг турмуш ўртоғи ёки қонуний вакилига базавий ҳисоблаш миқдорининг эллик баравари;

Оила кодексига мувофиқ ходимнинг яқин қариндошлари (ота-онаси, турмуш ўртоғи ва фарзандлари) вафот этганда (ўлим тўғрисидаги гувоҳномага асосан) базавий ҳисоблаш миқдорининг ўттиз баравари;

алоҳида эҳтиёж туғилганда (бахтсиз ҳодиса, авария, узоқ муддатли касаллик сабабли махсус даволаниш ва соғлиқни қайта тиклашга, шунингдек, оиладаги оғир моддий аҳвол ва бошқа ҳолатлар), базавий ҳисоблаш миқдорининг эллик баравари;

қишлоқ хўжалиги маҳсулотларини сотиб олиш учун йилда бир марта (қоида тариқасида куз ойларида) базавий ҳисоблаш миқдорининг ўн баравари миқдорида.

5-боб. Жамғарма маблағларидан фойдаланиш ҳисоби, ҳисоботи ва назорати

15. Жамғарма маблағларининг ҳисоб ва ҳисоботи Қўмита томонидан қонунчилик ҳужжатларига мувофиқ юритилади.

16. Бухгалтерия ҳисобининг тўғри юритилиши, Жамғармага маблағлар келиб тушиши ва унинг сарфланиши ҳақидаги ҳар чорак ва йил якуни бўйича тузиладиган ҳисоботларни тайёрлаш ҳамда Иқтисодиёт ва молия вазирлигига ўз вақтида тақдим қилишга Қўмитанинг Молия ва бухгалтерия ҳисоби бўлими жавобгар ҳисобланади.

17. Жамғарма маблағларидан оқилона ва мақсадли фойдаланиш юзасидан назорат Иқтисодиёт ва молия вазирлиги ҳузуридаги Давлат молиявий назорати инспекцияси томонидан амалга оширилади.

18. Жамғарманинг ҳисобот йилида фойдаланилмаган маблағлари олиб қўйилмайди ва кейинчалик ушбу Низомда назарда тутилган тартибда фойдаланиш учун миллий ва хорижий валютада жамғариб бориладиган ғазначилик шахсий ғазна ҳисобварақларида қолади.

6-боб. Якунловчи қоида

19. Ушбу Низом талаблари бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Вазирлар Маҳкамасининг 2024 йил 4 октябрдаги 633-сон қарорига 3-ИЛОВА

Ўзбекистон Республикаси Ҳукуматининг ўз кучини йўқотган деб эътироф этилаётган айрим қарорлари

1. Вазирлар Маҳкамасининг «Ўзбекистон Республикаси Саноат хавфсизлиги давлат қўмитаси тўғрисидаги низомни тасдиқлаш тўғрисида» 2019 йил 1 февралдаги 75-сон қарори .

2. Вазирлар Маҳкамасининг «Ўзбекистон Республикаси Саноат хавфсизлиги давлат қўмитаси тўғрисидаги низомга ўзгартириш ва қўшимчалар киритиш тўғрисида» 2020 йил 15 апрелдаги 226-сон қарори .

3. Вазирлар Маҳкамасининг «Ўзбекистон Республикаси Ҳукуматининг айрим қарорларига ўзгартиришлар киритиш тўғрисида (Ўзбекистон Республикасининг «Ўзбекистон Республикаси Вазирлар Маҳкамаси тўғрисида» 2019 йил 10 декабрдаги ЎРҚ-591-сон Қонуни)» 2020 йил 16 апрелдаги 234-сон қарорига илованинг 17-банди .

Ўзбекистон Республикасининг Бош вазири А. АРИПОВ

Тошкент ш.,

2024 йил 4 октябрь,

633-сон

(Қонунчилик маълумотлари миллий базаси, 10.10.2024 й., 09/24/633/0799-сон; 05.05.2025 й., 09/25/289/0406-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

NIZOM

ROʻYXATI

Oʻzbekiston Respublikasi Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi faoliyatini tashkil etish chora-tadbirlari toʻgʻrisida

Oʻzbekiston Respublikasi Prezidentining “Yer qaʼridan foydalanish, sanoat, radiatsiya va yadro xavfsizligi hamda atom energiyasidan foydalanish sohalarida davlat boshqaruvi va nazorati tizimini takomillashtirish chora-tadbirlari toʻgʻrisida” 2024-yil 24-maydagi PF-79-son Farmoni hamda “Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi faoliyatini samarali tashkil etish chora-tadbirlari toʻgʻrisida” 2024-yil 24-maydagi PQ-186-son qarori ijrosini taʼminlash maqsadida Vazirlar Mahkamasi qaror qiladi:

1. Quyidagilarni nazarda tutuvchi:

a) Oʻzbekiston Respublikasi Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi toʻgʻrisidagi nizom 1-ilovaga muvofiq:

Sanoat, radiatsiya va yadro xavfsizligi qoʻmitasining (keyingi oʻrinlarda — Qoʻmita) tuzilmasi, Qoʻmita hamda uning tizimidagi tashkilotlarning vazifa va funksiyalari;

Qoʻmitaning respublika va mahalliy ijro etuvchi hokimiyat organlari hamda boshqa tashkilotlar bilan oʻzaro hamkorlik qilish tartibi;

Qoʻmita va uning tizimidagi tashkilotlar faoliyatini moliyalashtirish, xodimlarini moddiy ragʻbatlantirish tartibi;

b) Sanoat, radiatsiya va yadro xavfsizligi qoʻmitasi huzuridagi Sanoat xavfsizligi sohasini qoʻllab-quvvatlash jamgʻarmasi mablagʻlarini shakllantirish va ulardan foydalanish tartibi toʻgʻrisidagi nizom 2-ilovaga muvofiq:

Sanoat xavfsizligi sohasini qoʻllab-quvvatlash jamgʻarmasi mablagʻlarini (keyingi oʻrinlarda — Jamgʻarma) shakllantirish tartibi;

Jamgʻarma mablagʻlaridan foydalanish tartibi;

Jamgʻarma mablagʻlarini xodimlarni moddiy ragʻbatlantirish va ijtimoiy himoya qilishga yoʻnaltirish tartibi tasdiqlansin.

2. Belgilansinki:

Sanoat, radiatsiya va yadro xavfsizligi qoʻmitasi boshqaruv xodimlarining lavozim maoshini belgilashda Davlat budjeti mablagʻlari hisobidan yagona tarif setkasi boʻyicha mehnatga haq toʻlashning tasdiqlangan razryadlariga muvofiq tarif koeffitsiyenti 1,8 baravarga oshirilgan holda qoʻllaniladi;

Sanoat, radiatsiya va yadro xavfsizligi qoʻmitasi xodimlariga Davlat budjeti mablagʻlari hisobidan uzluksiz ish staji uchun ularning umumiy mehnat faoliyatini qamrab olgan holda, faqat asosiy ish joyi boʻyicha xodimning oylik maoshiga (ragʻbatlantirish koeffitsiyentini hisobga olgan holda) nisbatan 1 yildan 3 yilgacha — 30 foiz, 3 yildan 5 yilgacha — 60 foiz, 5 yildan 10 yilgacha — 75 foiz, 10 yildan 15 yilgacha — 100 foiz, 15 yil va undan ortiq — 150 foiz miqdorida ustamalar har oyda toʻlanadi.

3. Davlat aktivlarini boshqarish agentligi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bilan birgalikda bir oy muddatda Sanoat, radiatsiya va yadro xavfsizligi qoʻmitasining hududiy boshqarmalari hududlardagi agentlik tasarrufidagi boʻsh turgan maʼmuriy binolarga operativ boshqaruv huquqi asosida joylashtirilishini taʼminlasin.

4. Oʻzbekiston Respublikasi Hukumatining 3-ilovaga muvofiq ayrim qarorlari oʻz kuchini yoʻqotgan deb hisoblansin.

5. Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi bir oy muddatda:

oʻzlarining tarkibiy boʻlinmalari toʻgʻrisidagi nizomlarni va xodimlarning lavozim yoʻriqnomalarini tasdiqlasin;

manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.

6. Mazkur qarorning bajarilishini nazorat qilish Oʻzbekiston Respublikasi Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi raisi A.V. Rafiqov zimmasiga yuklansin.

Vazirlar Mahkamasining 2024-yil 4-oktabrdagi 633-son qaroriga 1-ILOVA

Oʻzbekiston Respublikasi Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi toʻgʻrisida

1-bob. Umumiy qoidalar

1. Ushbu Nizom Oʻzbekiston Respublikasi Vazirlar Mahkamasi huzuridagi Sanoat, radiatsiya va yadro xavfsizligi qoʻmitasining (keyingi oʻrinlarda — Qoʻmita) maqomi, asosiy vazifalari, funksiyalari, huquqlari, javobgarligi, faoliyatini tashkil etish va hisobot berish tartibini, shuningdek, Qoʻmita raisi hamda uning oʻrinbosarlarining asosiy funksional vazifalari va javobgarliklarini belgilaydi.

2. Qoʻmita alohida mustaqil maqomga ega respublika ijro etuvchi hokimiyat organi hisoblanib, xavfli ishlab chiqarish obyektlarida sanoat xavfsizligi hamda atom energetikasi va yadro texnologiyalari obyektlarida radiatsiya va yadro xavfsizligini taʼminlash sohalarida yagona davlat siyosatini yuritadi.

3. Qoʻmita bevosita Oʻzbekiston Respublikasi Vazirlar Mahkamasiga (keyingi oʻrinlarda — Vazirlar Mahkamasi) boʻysunadi va oʻz faoliyati yuzasidan hisobot beradi.

4. Qoʻmita oʻz faoliyatida Oʻzbekiston Respublikasining Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek, ushbu Nizom va boshqa qonunchilik hujjatlariga amal qiladi.

5. Qoʻmitaning oʻz vakolatlari doirasida qabul qilingan qarorlari vazirliklar, idoralar, mahalliy ijro etuvchi hokimiyat organlari, boshqa tashkilotlar va ularning mansabdor shaxslari, shuningdek, yuridik va jismoniy shaxslar tomonidan bajarilishi majburiy hisoblanadi.

6. Qoʻmita oʻzining faoliyati sohasiga tegishli boʻlgan masalalarni, shu jumladan, nazorat ostidagi korxonalarda sodir boʻlgan avariyalar, guruhiy, oqibati oʻlim bilan tugagan baxtsiz hodisalarni va boshqa masalalarni tegishli korxona rahbarlari ishtirokida Qoʻmitaning Ilmiy-texnik kengashida koʻrib chiqadi.

7. Qoʻmita va uning tuzilmasiga kiradigan tashkilotlar yuridik shaxslar hisoblanadi, Oʻzbekiston Respublikasi Davlat gerbi tasviri tushirilgan muhr va blankalarga, mustaqil balansga, Oʻzbekiston Respublikasi Iqtisodiyot va moliya vazirligi huzuridagi Gʻaznachilik xizmati qoʻmitasida shaxsiy gʻazna hisobvaraqlariga, bank hisobvaraqlariga, shu jumladan, chet el valyutasidagi bank hisobvaraqlariga ega.

8. Qoʻmitaning rasmiy nomi:

a) davlat tilida:

toʻliq nomi — Oʻzbekiston Respublikasi Vazirlar Mahkamasi huzuridagi Sanoat, radiatsiya va yadro xavfsizligi qoʻmitasi;

qisqartma nomi — Sanoat, radiatsiya va yadro xavfsizligi qoʻmitasi;

b) rus tilida:

toʻliq nomi — Komitet promishlennoy, radiatsionnoy i yadernoy bezopasnosti pri Kabinete Ministrov Respubliki Uzbekistan;

qisqartma nomi — Komitet promishlennoy, radiatsionnoy i yadernoy bezopasnosti;

v) ingliz tilida:

toʻliq nomi — “Industrial, radiation and nuclear safety committee under the Cabinet of Ministers of the Republic of Uzbekistan”;

qisqartma nomi — Industrial, radiation and nuclear safety committee.

9. Qoʻmita joylashgan joy va pochta manzili: 100011, Toshkent shahar, Shayxontoxur tumani, M-14, 27-uy.

10. Qoʻmita belgilangan shtatlar birligi doirasida markaziy apparat, hududiy boshqarmalar (boʻlimlar), sanoat xavfsizligi inspeksiyalari va tizimidagi tashkilotlar tashkiliy tuzilmasini va nizomlarini tasdiqlaydi.

2-bob. Qoʻmitaning tuzilmasi

11. Qoʻmita tizimiga quyidagilar kiradi:

markaziy apparat;

Qoraqalpogʻiston Respublikasi, viloyatlar va Toshkent shahridagi hududiy boshqarmalari (boʻlimlari);

“Sanoat xavfsizligi” DM;

“Kontexnazoratoʻquv” DM;

“Sanoat nazorati laboratoriyasi” DM;

“Radiatsiya va yadro xavfsizligi ilmiy-texnik markazi” DM;

Navoiy sanoat xavfsizligi inspeksiyasi;

Olmaliq sanoat xavfsizligi inspeksiyasi;

Bekobod sanoat xavfsizligi inspeksiyasi;

Temir yoʻl sanoat xavfsizligi inspeksiyasi.

11 1 . Qoʻmitaning Navoiy sanoat xavfsizligi inspeksiyasi, Olmaliq sanoat xavfsizligi inspeksiyasi, Bekobod sanoat xavfsizligi inspeksiyasi va Temir yoʻl sanoat xavfsizligi inspeksiyalarini moliyalashtirish va moddiy-texnik taʼminlash tegishli ravishda “Navoiy KMK” AJ, “Olmaliq KMK” AJ, “Oʻzmetkombinat” AJ va “Oʻzbekiston temir yoʻllari” AJ mablagʻlari hisobidan amalga oshiriladi.

Qoʻmitaning sanoat xavfsizligi inspeksiyalari xodimlari tarkibi tegishli ravishda “Navoiy KMK” AJ, “Olmaliq KMK” AJ, “Oʻzmetkombinat” AJ va “Oʻzbekiston temir yoʻllari” AJning shtatdagi xodimlari soniga kiritiladi.

12. Hududiy boshqarmalar (boʻlimlar), sanoat xavfsizligi inspeksiyalari hamda boshqa tuzilmalar sanoat, radiatsiya va yadro xavfsizligini taʼminlash sohalarida yagona davlat nazorati tizimini tashkil etadi.

13. Hududiy boshqarmalar (boʻlimlar), sanoat xavfsizligi inspeksiyalari mahalliy davlat hokimiyati organlaridan mustaqil faoliyat olib boradi va bevosita Qoʻmitaga boʻysunadi.

14. Davlat organlari va boshqa tashkilotlarga Qoʻmita xodimlariga ularning vakolatiga kirmaydigan ishlarni bajarishni yuklash taqiqlanadi.

3-bob. Qoʻmita, uning hududiy boshqarmalari (boʻlimlari) va sanoat xavfsizligi inspeksiyalarining vazifalari va funksiyalari

15. Quyidagilar Qoʻmitaning asosiy vazifalari hisoblanadi:

Oʻzbekiston Respublikasining “ Xavfli ishlab chiqarish obyektlarining sanoat xavfsizligi toʻgʻrisida ”gi va “ Aholini va hududlarni tabiiy hamda texnogen xususiyatli favqulodda vaziyatlardan muhofaza qilish toʻgʻrisida ”gi qonunlari, xavfli ishlab chiqarish obyektlarida, atom energetikasi va yadro texnologiyalari obyektlarida sanoat, radiatsiya va yadro xavfsizligini taʼminlashga doir qonunchilik hujjatlari hamda texnik jihatdan tartibga solish sohasidagi normativ hujjatlarda belgilangan talablarga jismoniy va yuridik shaxslar tomonidan rioya etilishi ustidan davlat nazorati va tekshiruvini amalga oshirish;

atom energetikasi va yadro texnologiyalari obyektlarida radiatsiya va yadro xavfsizligini taʼminlash, shuningdek, xavfli ishlab chiqarish obyektlarida sanoat xavfsizligi sohalarida yagona davlat siyosatini amalga oshirish va muvofiqlashtirish;

sanoat, radiatsiya va yadro xavfsizligini taʼminlash sohasida respublikada iqtisodiyotning asosiy tarmoqlarini yanada rivojlantirish boʻyicha strategik rejalar va dasturlarni ishlab chiqishda ishtirok etish;

sanoat, radiatsiya va yadro xavfsizligini taʼminlash hamda liftlar va istirohat bogʻlari attraksionlaridan foydalanish borasidagi normativ-huquqiy hujjatlar loyihalari va texnik jihatdan tartibga solish sohasidagi normativ hujjatlarni belgilangan tartibda ishlab chiqish va qabul qilish;

sanoat, radiatsiya va yadro xavfsizligi hamda liftlar va istirohat bogʻlari attraksionlaridan foydalanish borasidagi qonunchilik hujjatlari va texnik jihatdan tartibga solish sohasidagi normativ hujjatlar talablariga yuridik hamda jismoniy shaxslar tomonidan rioya etilishi ustidan davlat nazoratini va tekshiruvini amalga oshirish;

sanoat xavfsizligini ekspertizadan va akkreditatsiyadan oʻtkazish tizimini takomillashtirish, shuningdek, atom energiyasidan foydalanish obyektlarining va (yoki) atom energiyasidan foydalanish sohasidagi faoliyatning xavfsizligini asoslash yuzasidan ekspertizadan oʻtkazishni tashkil etish;

xavfli ishlab chiqarish obyektlarini identifikatsiya qilish, hisobga olish va ularning davlat reyestrini yuritish, sanoat xavfsizligini deklaratsiyalash tartibini tashkil etish va takomillashtirish, texnogen xavfi yuqori boʻlgan zonalarning davlat kadastri hamda kadastr pasportlarini ishlab chiqilishi va yuritilishini nazorat qilish hamda muvofiqlashtirish;

sanoat xavfsizligi va atom energiyasidan foydalanish sohalarida ruxsat etish xususiyatiga ega hujjatlarni (litsenziyalarni, ruxsatnomalarni) belgilangan tartibda berish faoliyatini amalga oshirish;

sanoat, radiatsiya va yadro xavfsizligini taʼminlash sohalarida davlat nazorati organlarining faoliyatini muvofiqlashtirish;

texnika va texnologiyalarning jadal rivojlanishini hisobga olgan holda sanoat, radiatsiya va yadro xavfsizligi hamda liftlar va attraksionlar xavfsizligini taʼminlash sohalarida faoliyat yurituvchi mutaxassislarni tayyorlash, qayta tayyorlash, ularning malakasini oshirish hamda ularni belgilangan tartibda attestatsiyadan oʻtkazish;

sanoat, radiatsiya va yadro xavfsizligi, liftlar va istirohat bogʻlari attraksionlari xavfsizligi yoʻnalishlarida huquqbuzarlik holatlarini aniqlash hamda ularga nisbatan qonunchilikda belgilangan choralarni koʻrish yuzasidan idoralararo hamkorlikni yanada rivojlantirish;

sanoat, radiatsiya va yadro xavfsizligi hamda liftlar va istirohat bogʻlari attraksionlari xavfsizligi sohasida aniqlangan huquqbuzarliklar va ularning oqibatlari toʻgʻrisida keng jamoatchilikni xabardor qilib borish, sohada huquqni qoʻllash amaliyoti va qonunchilik hujjatlarini takomillashtirish yuzasidan takliflar ishlab chiqish;

Qoʻmita faoliyatining asosiy yoʻnalishlari boʻyicha xalqaro va xorijiy tashkilotlar bilan hamkorlik qilish, shuningdek, soha faoliyatiga taalluqli boʻlgan xalqaro shartnomalar boʻyicha Oʻzbekiston Respublikasining majburiyatlari bajarilishini taʼminlash.

16. Qoʻmita unga yuklangan vazifalarga muvofiq quyidagi funksiyalarni amalga oshiradi:

a) Oʻzbekiston Respublikasining “ Xavfli ishlab chiqarish obyektlarining sanoat xavfsizligi toʻgʻrisida ”gi va “ Aholini va hududlarni tabiiy hamda texnogen xususiyatli favqulodda vaziyatlardan muhofaza qilish toʻgʻrisida ”gi qonunlari, xavfli ishlab chiqarish obyektlarida, atom energetikasi va yadro texnologiyalari obyektlarida sanoat, radiatsiya va yadro xavfsizligini taʼminlashga doir qonunchilik hujjatlari va texnik jihatdan tartibga solish sohasidagi normativ hujjatlarda belgilangan talablarga jismoniy va yuridik shaxslar tomonidan rioya etilishi ustidan davlat nazorati va tekshiruvini amalga oshirish sohasida:

sanoat, radiatsiya va yadro xavfsizligini taʼminlashni takomillashtirish yuzasidan Vazirlar Mahkamasiga takliflar kiritadi;

sanoat, radiatsiya va yadro xavfsizligini taʼminlash sohasidagi texnik reglamentlarni tasdiqlash, ularga oʻzgartirish va qoʻshimchalar kiritish, shuningdek, mazkur reglamentlarni bekor qilish toʻgʻrisida Vazirlar Mahkamasiga takliflar kiritadi;

sanoat, radiatsiya va yadro xavfsizligini taʼminlash sohasidagi solish sohasidagi texnik jihatdan tartibga solish sohasidagi normativ hujjatlar talablariga rioya etilishi ustidan oʻz vakolati doirasida davlat nazorati amalga oshirilishini taʼminlaydi;

b) atom energetikasi va yadro texnologiyalari obyektlarida radiatsiya va yadro xavfsizligini taʼminlash, shuningdek, xavfli ishlab chiqarish obyektlarida sanoat xavfsizligi sohalarida yagona davlat siyosatini amalga oshirish va muvofiqlashtirish sohasida:

xavfli ishlab chiqarish obyektlarida, shuningdek, xavfli ishlab chiqarish obyektlariga ega boʻlgan xoʻjalik yurituvchi subyektlarda qoʻllaniladigan ishlab chiqarishlar (texnologiyalar), obyektlar va texnik qurilmalar roʻyxatini takomillashtirib boradi;

iqtisodiyotning tegishli tarmoqlarida sanoat, radiatsiya va yadro xavfsizligini taʼminlash tizimini takomillashtirish boʻyicha takliflar tayyorlaydi;

xavfli ishlab chiqarish obyektlarida sanoat xavfsizligi ekspertizasi tizimini rivojlantirishni, atom energiyasidan foydalanish obyektlarining va (yoki) atom energiyasidan foydalanish sohasidagi faoliyatning xavfsizligini asoslash yuzasidan ekspertiza oʻtkazishni, shuningdek, atom energiyasidan foydalanish sohasida faoliyatni litsenziyalash (ruxsatnoma berish) tizimini tashkil etadi;

xavfli ishlab chiqarish obyektlarida qoʻllaniladigan texnik qurilmalarni hamda liftlar va attraksionlarni sertifikatlashni tashkil etadi;

oʻz vakolatlari doirasida ionlashtiruvchi nurlanish manbalarining davlat hisobi va nazoratini, ularning milliy reyestri yuritilishini taʼminlaydi;

radiatsiyaviy avariyalarni prognoz qilish, barvaqt aniqlash va harakat qilish yagona davlat tizimida ishtirok etadi;

xavfli ishlab chiqarish obyektlari davlat reyestrida xavfli ishlab chiqarish obyektlarining yagona hisobini yuritadi;

attraksionlarni roʻyxatga oladi va ularning yagona davlat reyestrini yuritadi;

texnogen xavfi yuqori boʻlgan zonalarning davlat kadastrini yaratilishi, yuritilishini muvofiqlashtiradi va nazorat qiladi;

avariya holatining va ishlab chiqarish jarohatining oldini olish maqsadida sanoat, radiatsiya va yadro xavfsizligi talablariga rioya qilish zarurligi toʻgʻrisida keng jamoatchilik oʻrtasida tushuntirish ishlarini amalga oshiradi;

sanoat xavfsizligi talablariga rioya etilishi ustidan ishlab chiqarish nazoratini tashkil etish toʻgʻrisidagi maʼlumotlarni toʻplaydi va tahlil qiladi;

Qoʻmitaning nazorati ostidagi obyektlarda avariyalar, ishlab chiqarishda jarohatlanish hollarining sabablarini belgilangan tartibda tekshiradi va hisobga oladi;

respublika ijro etuvchi hokimiyat organlariga, mahalliy davlat hokimiyati organlariga, xoʻjalik birlashmalariga, fuqarolarning oʻzini oʻzi boshqarish organlariga atom energiyasidan foydalanishdagi xavfsizlik masalalari yuzasidan axborot beradi;

v) sanoat, radiatsiya va yadro xavfsizligini taʼminlash sohasida respublikada iqtisodiyotning asosiy tarmoqlarini yanada rivojlantirish boʻyicha strategik rejalar va dasturlarni ishlab chiqishda ishtirok etish sohasida:

vazirliklar, idoralar va xoʻjalik birlashmalari bilan birgalikda sanoat, radiatsiya va yadro xavfsizligini taʼminlash yuzasidan sanoatning bazaviy tarmoqlarini yanada rivojlantirish boʻyicha strategik rejalar va dasturlar boʻyicha takliflarni ishlab chiqadi;

sanoat, radiatsiya va yadro xavfsizligini taʼminlash yuzasidan sanoatning bazaviy tarmoqlarini yanada rivojlantirish boʻyicha tasdiqlangan davlat dasturlariga muvofiq sanoat, radiatsiya va yadro xavfsizligini taʼminlash boʻyicha ishlar amalga oshirilishini nazorat qiladi;

radiatsiya va yadro xavfsizligini taʼminlash yuzasidan atom energiyasidan tinchlik maqsadlarida foydalanish sohasida davlat maqsadli dasturlari ishlab chiqilishi, koʻrib chiqilishi va amalga oshirilishida ishtirok etadi;

xalqaro va davlatlararo ilmiy-texnik hamkorlikni rivojlantiradi;

g) sanoat, radiatsiya va yadro xavfsizligini taʼminlash hamda liftlar va istirohat bogʻlari attraksionlaridan foydalanish borasidagi normativ-huquqiy hujjatlar loyihalari va texnik jihatdan tartibga solish sohasidagi normativ hujjatlarni belgilangan tartibda ishlab chiqish va qabul qilish sohasida:

sanoat, radiatsiya va yadro xavfsizligi, liftlar va attraksionlar xavfsizligini taʼminlash hamda Qoʻmita vakolatiga kiradigan boshqa masalalar boʻyicha qonunchilik hujjatlarini va texnik jihatdan tartibga solish sohasidagi normativ hujjatlarni belgilangan tartibda ishlab chiqadi;

atom energiyasidan foydalanish sohasidagi normalar va qoidalarni ishlab chiqadi, ularni amalga kiritish hamda amalga oshirilishini taʼminlaydi;

sanoat, radiatsiya va yadro xavfsizligi, liftlar va attraksionlar xavfsizligini taʼminlash talablari mavjud boʻlgan texnik jihatdan tartibga solish sohasidagi normativ hujjatlar loyihalarini koʻrib chiqadi va kelishishda ishtirok etadi;

d) sanoat, radiatsiya va yadro xavfsizligi hamda liftlar va istirohat bogʻlari attraksionlaridan foydalanish borasidagi qonunchilik hujjatlari va texnik jihatdan tartibga solish sohasidagi normativ hujjatlar talablariga yuridik hamda jismoniy shaxslar tomonidan rioya etilishi ustidan davlat nazoratini va tekshiruvini amalga oshirish sohasida:

jismoniy va yuridik shaxslar tomonidan sanoat, radiatsiya va yadro xavfsizligi, liftlar va attraksionlar xavfsizligini taʼminlash sohasidagi qonunchilik hujjatlari va texnik jihatdan tartibga solish sohasida normativ hujjatlar talablariga rioya etilishi ustidan davlat nazorati va tekshiruvini amalga oshiradi;

xavfli ishlab chiqarish obyektlarida foydalaniladigan bugʻ va suv isitish qozonlarini, bosim ostida ishlaydigan idishlarni, bugʻ va issiq suv quvurlarini, koʻtarish inshootlarini, yiliga bitta uskuna uchun 100 000 va undan ortiq kubometr tabiiy va suyultirilgan uglevodorod gazidan yoqilgʻi sifatida foydalanuvchi texnik qurilmalarni roʻyxatga oladi va reyestrini yuritadi;

gazdan qutqarish va avariya-dispetcherlik xizmatlari korxonalari, boʻlinmalarining sodir boʻlishi mumkin boʻlgan avariyalarning oldini olish va oqibatlarini bartaraf etishga tayyorligini nazorat qiladi;

nazorat ostidagi korxonalar va obyektlarni foydalanishga qabul qilish boʻyicha davlat va ishchi komissiya tarkibida ishtirok etish uchun oʻz vakillarini tayinlaydi, ushbu obyektlarda foydalanishga qabul qilish qoidalariga rioya etilishini nazorat qiladi;

xavfli ishlab chiqarish obyektidan foydalanishga tashkilotlarning tayyorligini, shuningdek, nazorat ostidagi obyektlarda avariyalar va ishlab chiqarish jarohatining oldini olish tadbirlari ishlab chiqilishi va oʻtkazilishini nazorat qiladi;

sanoat xavfsizligi deklaratsiyalari ishlab chiqilishi va taqdim etilishining monitoringini yuritadi;

ishlab turgan va qurilayotgan xavfli ishlab chiqarish obyektlarida sanoat xavfsizligini deklaratsiyalashni nazorat qiladi;

atom energiyasidan foydalanish obyektlarining xavfsizligini taʼminlash ustidan davlat nazorati va tekshiruvini hamda atom energiyasidan foydalanish obyektlarining jisman himoya qilinishi ustidan belgilangan tartibda davlat nazoratini amalga oshiradi;

atom energiyasidan foydalanish obyektlarida avariyaga oid tashqi rejani ishlab chiqishda ishtirok etadi hamda respublika ijro etuvchi hokimiyat organlarining va atom energiyasidan foydalanish sohasida faoliyat yuritadigan boshqa yuridik shaxslarning avariya holatlariga tayyorligi ustidan davlat nazoratini taʼminlaydi;

nazorat ostidagi obyektlarda sanoat, radiatsiya va yadro xavfsizligini taʼminlash, putur yetkazmaydigan nazorat boʻyicha, shuningdek, liftlar va attraksionlar xavfsizligi sohasidagi normativ-huquqiy hujjatlar va normativ hujjatlar bajarilishini taʼminlash boʻyicha profilaktika ishlarini amalga oshiradi;

korxonalarda gaz-qutqaruv va avariya-dispetcherlik xizmatlarining boʻlishi mumkin boʻlgan avariyalarning oldini olish va ularning oqibatlarini bartaraf etishga tayyorligini nazorat qiladi;

e) sanoat xavfsizligini ekspertizadan va akkreditatsiyadan oʻtkazish tizimini takomillashtirish, shuningdek, atom energiyasidan foydalanish obyektlarining va (yoki) atom energiyasidan foydalanish sohasidagi faoliyatning xavfsizligini asoslash yuzasidan ekspertizadan oʻtkazishni tashkil etish sohasida:

sanoat xavfsizligi sohasida ekspert tashkilotlarini belgilangan tartibda akkreditatsiyadan oʻtkazadi va ularning faoliyatini nazorat qiladi;

sanoat xavfsizligi sohasida berilgan ekspertiza xulosalarining yagona hisobini yuritadi;

sanoat xavfsizligi sohasida ekspertlarni attestatsiyadan oʻtkazadi va ularning faoliyatini nazorat qiladi;

sanoat xavfsizligini boshqarish tizimi auditini oʻtkazish tartibini belgilaydi va mazkur sohada faoliyat bilan shugʻullanuvchi tashkilotlarni akkreditatsiyadan oʻtkazadi;

atom energiyasidan foydalanish obyektlari va (yoki) atom energiyasidan foydalanish sohasida faoliyat turlari xavfsizligi ekspertizasini (xavfsizlikni asoslash ekspertizasini) tashkil etadi;

j) xavfli ishlab chiqarish obyektlarini identifikatsiya qilish, hisobga olish va ularning davlat reyestrini yuritish, sanoat xavfsizligini deklaratsiyalash tartibini tashkil etish va takomillashtirish, texnogen xavfi yuqori boʻlgan zonalarning davlat kadastri hamda kadastr pasportlarini ishlab chiqilishi va yuritilishini nazorat qilish hamda muvofiqlashtirish sohasida:

ishlab turgan va qurilayotgan xavfli ishlab chiqarish obyektlarida sanoat xavfsizligini deklaratsiyalashni nazorat qiladi;

texnogen xavf yuqori boʻlgan zonalar bosh kadastr markazi tomonidan texnogen xavf yuqori boʻlgan zonalar davlat kadastr pasporti yaratilishi va yuritilishini muvofiqlashtiradi;

z) sanoat xavfsizligi va atom energiyasidan foydalanish sohalarida ruxsat etish xususiyatiga ega hujjatlarni (litsenziyalarni, ruxsatnomalarni) belgilangan tartibda berish faoliyatini amalga oshirish sohasida:

sanoat xavfsizligi hamda atom energiyasidan foydalanish va ionlashtiruvchi nurlanish manbalari muomalasi sohalarida tegishli faoliyat turlarini litsenziyalaydi;

oʻz vakolatlari doirasida faoliyatning ayrim turlarini litsenziyalashda va kelishish ishlarida ishtirok etadi;

litsenziatlar tomonidan litsenziya talablari va shartlariga rioya etilishini nazorat qiladi;

atom energiyasidan foydalanish obyektlaridagi noxush hodisalar va avariyalarning sabablarini texnik jihatdan tekshirish tartibini tasdiqlaydi;

Qoʻmitaning vakolatiga kiradigan ishlarning ayrim turlariga belgilangan tartibda ruxsatnomalar beradi va ularni bekor qiladi;

qonunchilik hujjatlariga muvofiq xavfli yuklar tranzitida xulosalar beradi va nazorat qiladi;

atom energiyasidan foydalanish sohasidagi ekspluatatsiya qiluvchi tashkilot, shuningdek, boshqa yuridik shaxs tomonidan mazkur sohadagi faoliyatni amalga oshirish jarayonida xavfsizlikni taʼminlash uchun zarur boʻlgan majburiy talablarga, litsenziya shartlariga rioya etilishini nazorat qiladi;

i) sanoat, radiatsiya va yadro xavfsizligini taʼminlash sohalarida davlat nazorati organlarining faoliyatini muvofiqlashtirish sohasida:

sanoat xavfsizligi, jumladan, xavfli ishlab chiqarish obyektlarida sodir boʻlgan avariyalar, guruhiy, oqibati ogʻir va oʻlim bilan tugagan baxtsiz hodisalarni maxsus tekshirish va hisobini yuritish, atom energiyasidan foydalanish va texnogen xavf yuqori boʻlgan zonalar davlat kadastrini yuritish sohalarida davlat nazorati organlarining faoliyatini muvofiqlashtiradi, hisobotlarini qabul qiladi va eshitadi, sanoat xavfsizligi sohasi boʻyicha tegishli koʻrsatmalar beradi;

xavfli ishlab chiqarish obyektlarida sodir boʻlgan avariyalar, oqibati ogʻir va oʻlim bilan tugagan baxtsiz hodisalarni texnik jihatdan tekshirish natijalarini tegishli korxona rahbarlari ishtirokida Qoʻmitaning Ilmiy-texnik kengashida koʻrib chiqadi va tegishli koʻrsatmalar beradi;

k) texnika va texnologiyalarning jadal rivojlanishini hisobga olgan holda sanoat, radiatsiya va yadro xavfsizligi hamda liftlar va attraksionlar xavfsizligini taʼminlash sohalarida faoliyat yurituvchi mutaxassislarni tayyorlash, qayta tayyorlash, ularning malakasini oshirish hamda ularni belgilangan tartibda attestatsiyadan oʻtkazish sohasida:

sanoat xavfsizligi sohasida xodimlarning malakasini oshiradi, shuningdek, radiatsiya va yadro xavfsizligi sohasida mutaxassislar tayyorlashni tashkil etadi;

xavfli ishlab chiqarish obyektlari, liftlar va attraksionlar xavfsizligi boʻyicha xodimlarni tayyorlash (qayta tayyorlash) va attestatsiyadan oʻtkazish (bilimlarni tekshirish) tartibini ishlab chiqadi va tasdiqlaydi;

sanoat korxonalari, liftlar va attraksionlarga masʼul xodimlar malakasi oshirilishini tashkil etadi va ularning bilimlarini tekshirishda ishtirok etadi;

nazorat ostidagi obyektlar xodimlarini tayyorlash kurslarini tashkil etadi va ularga tegishli guvohnomalar beradi;

atom energiyasidan foydalanish sohasida faoliyat yuritadigan ekspluatatsiya qiluvchi tashkilotlar va boshqa yuridik shaxslar xodimlari belgilangan tartibda attestatsiyadan oʻtkazilishni tashkil etadi va attestatsiyadan oʻtkazishda ishtirok etadi;

l) sanoat, radiatsiya va yadro xavfsizligi hamda liftlar va istirohat bogʻlari attraksionlari xavfsizligini taʼminlash sohasidagi qonunchilik hujjatlari va texnik jihatdan tartibga solish sohasidagi normativ hujjatlar talablariga jismoniy va yuridik shaxslar tomonidan rioya etilishi ustidan davlat nazorati va tekshiruvini amalga oshirish sohasida:

sanoat, radiatsiya va yadro xavfsizligi, liftlar va attraksionlar xavfsizligini taʼminlash yoʻnalishlarida huquqbuzarlik holatlarini aniqlash hamda ularga nisbatan tezkor choralar koʻrish yuzasidan idoralararo hamkorlik qiladi;

sanoat, radiatsiya va yadro xavfsizligi, liftlar va attraksionlar xavfsizligi qoidalarini buzish bilan bogʻliq aniqlangan huquqbuzarliklar boʻyicha tezkor choralar koʻradi;

sanoat, radiatsiya va yadro xavfsizligi, liftlar va attraksionlar xavfsizligi talablarini buzgan aybdor shaxslarni jinoiy javobgarlikka tortish toʻgʻrisidagi masalani koʻrib chiqish uchun materiallarni huquqni muhofaza qilish organlariga yuboradi;

m) sanoat, radiatsiya va yadro xavfsizligi hamda liftlar va istirohat bogʻlari attraksionlari xavfsizligi sohasida aniqlangan huquqbuzarliklar va ularning oqibatlari toʻgʻrisida keng jamoatchilikni xabardor qilib borish, sohada huquqni qoʻllash amaliyoti va qonunchilik hujjatlarini takomillashtirish yuzasidan takliflar ishlab chiqish sohasida:

sanoat xavfsizligi, liftlar va attraksionlar xavfsizligi sohasida aniqlangan huquqbuzarliklar hamda ularning oqibatlari toʻgʻrisida keng jamoatchilikni xabardor qilib boradi, sohada huquqni qoʻllash amaliyoti va qonunchilikni takomillashtirish yuzasidan takliflar ishlab chiqadi;

liftlar va attraksionlar faoliyatini masofaviy nazorat qilish, huquqbuzarliklar toʻgʻrisida xabar berish imkoniyatini beruvchi elektron platformani yuritadi;

Qoʻmita mansabdor shaxslariga tekshiruv oʻtkazish vaqtida oʻz xizmat burchlarini bajarishiga toʻsqinlik qilgan shaxslarni maʼmuriy javobgarlikka tortadi;

n) Qoʻmita faoliyatining asosiy yoʻnalishlari boʻyicha xalqaro va xorijiy tashkilotlar bilan hamkorlik qilish, shuningdek, soha faoliyatiga taalluqli boʻlgan xalqaro shartnomalar boʻyicha Oʻzbekiston Respublikasining majburiyatlari bajarilishini taʼminlash sohasida:

sanoatda, atom energetikasi va ilmiy tadqiqot ishlari xavfsiz amalga oshirilishini nazorat qilish sohasida xalqaro hamkorlik qiladi, Qoʻmitaning vakolatiga kiradigan masalalar boʻyicha xalqaro tashkilotlar, boshqa mamlakatlarning tegishli nazorat organlari bilan belgilangan tartibda hamkorlik qiladi;

atom energiyasidan tinch maqsadlarda foydalanish, kimyoviy, bakteriologik (biologik) va zaharli qurol-yarogʻni taqiqlash, shuningdek, kimyoviy, biologik, radiologik va yadro materiallarining taʼsiri xavfini pasaytirish hamda davlatga qarashli boʻlmagan subyektlarning ommaviy qirgʻin qurollari va ularni yetkazib berilishini oldini olish, shuningdek, ularning noqonuniy aylanishiga barham berishga doir xalqaro shartnomalar boʻyicha Oʻzbekiston Respublikasining majburiyatlari bajarilishini taʼminlaydi.

17. Qoʻmita unga yuklangan vazifa va funksiyalarni bevosita hamda oʻzining tarkibiy boʻlinmalari orqali amalga oshiradi.

4-bob. Qoʻmita markaziy apparatining asosiy vazifalari va funksiyalari

18. Qoʻmita markaziy apparatining asosiy vazifalari uning tizimidagi tashkilotlar bilan birgalikda Qoʻmitaga yuklangan vazifa va funksiyalarning samarali bajarilishini tashkil etish hamda taʼminlash hisoblanadi.

19. Qoʻmitaning markaziy apparati unga yuklangan asosiy vazifalarga muvofiq quyidagi funksiyalarni amalga oshiradi:

Qoʻmita va uning rahbariyati faoliyatini tashkiliy va axborot-tahlil jihatidan taʼminlaydi;

Qoʻmita va uning tizimidagi tashkilotlar tomonidan Oʻzbekiston Respublikasi Konstitutsiyasiga va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining Farmonlari, qarorlari va farmoyishlariga, Vazirlar Mahkamasining qarorlariga va farmoyishlariga shuningdek, mazkur Nizomga va boshqa qonunchilik hujjatlariga muvofiq talablarning bajarilishida tizimli nazoratni taʼminlaydi;

Qoʻmita tomonidan Vazirlar Mahkamasi, Oʻzbekiston Respublikasi Prezidenti Administratsiyasiga kiritiladigan hujjatlarning sifatli hamda oʻz vaqtida ishlab chiqilishini va ularning iqtisodiy va huquqiy ekspertizadan oʻtkazilishini tashkil etadi;

Qoʻmita va uning tizimidagi tashkilotlar faoliyatiga belgilangan tartibda rahbarlik qiladi, ularning faoliyatini muvofiqlashtiradi va nazorat qiladi;

Qoʻmitaning faoliyati, shu jumladan, norma ijodkorligi sohasidagi faoliyati huquqiy taʼminlanishini tashkil etadi;

Qoʻmitaning vakolatiga tegishli operativ, tashkiliy, kadrlar, moliya, ishlab chiqarish-xoʻjalik masalalari va boshqa masalalarni hal etadi.

5-bob. Qoʻmitaning huquqlari va javobgarligi

20. Qoʻmita unga yuklangan vazifalar va funksiyalarni amalga oshirish uchun quyidagi huquqlarga egadir:

normativ-huquqiy hujjatlar loyihalarini, shuningdek, Qoʻmitaga yuklangan vazifalar va funksiyalarni bajarish bilan bogʻliq boshqa hujjatlarni ishlab chiqish va belgilangan tartibda kiritish Qoʻmita vakolatiga kiruvchi masalalar boʻyicha qonunchilik hujjatlari va texnik jihatdan tartibga solish sohasidagi normativ hujjatlar loyihalarini koʻrib chiqish hamda ular yuzasidan xulosalar berish;

Qoʻmita vakolatiga kiradigan masalalarda davlat va xoʻjalik boshqaruvi, mahalliy ijro etuvchi hokimiyat organlari faoliyatini muvofiqlashtirishda ishtirok etish;

Qoʻmita vakolatiga kiradigan masalalarni hal etish uchun zarur boʻlgan axborotni davlat organlari, xoʻjalik birlashmalari va mahalliy ijro etuvchi hokimiyat organlaridan soʻrab olish;

Qoʻmita vakolatiga kiradigan masalalar boʻyicha zarur statistika axborotini davlat statistika organlaridan va Oʻzbekiston Texnik jihatdan tartibga solish agentligidan standartlar va reglamentlarni elektron shaklda bepul olish;

Qoʻmita xodimlarini Qoʻmitaning budjetdan tashqari mablagʻlar hisobidan moddiy ragʻbatlantirish;

Qoʻmita vakolatiga kiradigan masalalar boʻyicha takliflarni davlat organlari, xoʻjalik birlashmalari va mahalliy ijro etuvchi hokimiyat organlariga koʻrib chiqish uchun kiritish;

Qoʻmita tarkibiga kiradigan masalalar boʻyicha idoralararo xalqaro shartnomalarni tuzish;

Qoʻmita tarkibiga kiradigan masalalar boʻyicha xalqaro darajada Oʻzbekiston Respublikasi manfaatlarini ifodalash;

Qoʻmita nazorati ostidagi obyektlarga toʻsiqsiz kirish;

xavfli ishlab chiqarish obyektlarining sanoat xavfsizligi, radiatsiya va yadro xavfsizligi, shuningdek, liftlar va attraksionlar xavfsizligi talablariga rioya etilishini belgilangan tartibda nazorat qilish (tekshirish);

sanoat, radiatsiya va yadro xavfsizligi, attraksionlardan foydalanish talablari buzilgan holda olib borilayotgan yoki avariyalarni yuzaga keltirishi mumkin boʻlgan ishlarni toʻxtatib qoʻyish, shuningdek, odamlarning hayoti xavf ostida qolganda yoki avariya holatlari yuzaga kelganda ularni ish joylaridan olib chiqishda ishtirok etish;

oʻz vakolatlari doirasida sanoat, radiatsiya va yadro xavfsizligi, liftlar va istirohat bogʻlari attraksionlaridan foydalanish sohalarida qonunchilik hujjatlari va texnik jihatdan tartibga solish sohasidagi normativ hujjatlar talablari buzilganligi uchun nazorat ostidagi obyektlarning, jumladan, tadbirkorlik subyektlarining mansabdor shaxslarini hamda jismoniy shaxslarni maʼmuriy javobgarlikka tortish boʻyicha taqdimnomalar kiritish;

sanoat, radiatsiya va yadro xavfsizligini taʼminlash sohasidagi huquqbuzarliklarni sodir etganlik uchun jismoniy va yuridik shaxslarga nisbatan jarimalar qoʻllash;

nazorat ostidagi korxonalarning, shuningdek, Qoʻmitaning nazorati ostidagi obyektlarga ega boʻlgan vazirliklar, qoʻmitalar, idoralar, xoʻjalik birlashmalari rahbarlariga sanoat, radiatsiya va yadro xavfsizligi talablarining aniqlangan buzilishlarini bartaraf etish toʻgʻrisida ijro etishga majburiy boʻlgan koʻrsatmalar berish;

nazorat ostidagi obyektlarda xodimlarning xavfsizlik qoidalari va normalarini, texnologik reglamentlarni, xodimlarning mehnatini muhofaza qilish boʻyicha yoʻriqnomalarni bilishini tekshirish, nazorat ostidagi korxonalarning rahbarlari va xodimlarining, shu jumladan, sanoat, radiatsiya va yadro xavfsizligini taʼminlash sohasida kadrlarni tayyorlovchi va qayta tayyorlovchi xodimlarning sanoat, radiatsiya va yadro xavfsizligi qoidalari va normalari boʻyicha imtihonlarida qatnashish va bilimini tekshirish;

Qoʻmitaning vakolatiga kiradigan masalalar boʻyicha xavfli ishlab chiqarish obyektlaridan foydalanuvchi tashkilotlarning rahbarlari hisobotlarini eshitish;

sanoat xavfsizligi ekspertizasini oʻtkazish huquqiga ega ekspert tashkilotlarining akkreditatsiya attestati belgilangan tartibda amal qilishini toʻxtatib qoʻyish, tugatish yoki bekor qilish;

faoliyatning ayrim turlarini amalga oshirish huquqini beruvchi litsenziyalarning amal qilishini belgilangan tartibda toʻxtatib qoʻyish, amal qilishini toʻxtatish yoki bekor qilish toʻgʻrisida takliflar tayyorlash;

ruxsat berish xususiyatiga ega hujjatning amal qilishini belgilangan tartibda toʻxtatib qoʻyish va toʻxtatish, bekor qilish choralarini koʻrish;

sanoat xavfsizligi ekspertizasining qonunchilik hujjatlari buzilgan holda tayyorlangan xulosalarini haqiqiy emas deb eʼtirof etish;

sanoat xavfsizligi sohasida ekspert guvohnomalarini belgilangan tartibda vakolatlarini qisqartirish, ekspert toifasini pasaytirish, amal qilishini toʻxtatib turish, uni tugatish yoki bekor qilish;

sanoat xavfsizligi sohasida akkreditatsiya qilingan ekspert tashkilotlari faoliyati ustidan inspeksiya nazoratini oʻtkazish;

nazorat ostidagi obyektlar, vazirliklar, qoʻmitalar, idoralar, xoʻjalik birlashmalari, mahalliy davlat hokimiyati organlariga sanoat, radiatsiya va yadro xavfsizligi, liftlar va attraksionlar xavfsizligi sohasidagi qoidalar, yoʻriqnomalar va boshqa normativ hujjatlar talablarini buzayotgan mansabdor shaxslarning mehnat shartnomasini toʻxtatish, intizomiy jazo berish yoki ishlarga texnik rahbarlik qilish huquqidan bir yilgacha boʻlgan muddatda mahrum qilish toʻgʻrisida taqdimnomalar kiritish;

ionlashtiruvchi nurlanish manbalarini hisobga olish va nazorat qilish tizimini rivojlantirish;

sanoat, radiatsiya va yadro xavfsizligini taʼminlash sohasini raqamlashtirish orqali samaradorlik va natijadorlikka erishish, shaffof va korrupsiyadan holi samarali tizimni joriy etish;

Qoʻmitaning vakolatiga kiradigan masalalar boʻyicha avariyalarning, ishlab chiqarish jarohati holatlarining, sabablarini belgilangan tartibda tekshirish va tekshirish natijalari boʻyicha bajarilishi majburiy boʻlgan qarorlar qabul qilish;

zarurat boʻlganda, tashkilotlar tomonidan uskunalar va materiallarni nazorat tartibida sinashni, ishchi va atrof tabiiy muhit tahlilini, loyiha va loyiha-konstruktorlik yechimlarining mustaqil ekspertizasini tayinlash;

ehtiyot qismlar tayyorlovchi zavodlarda va taʼmirlash korxonalarida sanoatning nazorat ostidagi tarmoqlari uchun uskunalarning sanoat xavfsizligi talablariga muvofiqligini tekshirish, ularning sanoat, radiatsiya xavfsizligi standartlari, qoidalari va normalari talablariga va tasdiqlangan loyiha yechimlariga muvofiq boʻlmagan hollarda ishlab chiqarilishini belgilangan tartibda toʻxtatib qoʻyish;

Qoʻmita vakolatiga kiradigan masalalar boʻyicha vazirliklar, qoʻmitalar, idoralar, xoʻjalik birlashmalari, mahalliy davlat hokimiyati organlari, tashkilotlardan zarur axborotni olish;

sanoat, radiatsiya va yadro xavfsizligini taʼminlash sohasidagi normativ hujjatlarning majburiy talablarini buzganlikda aybdor boʻlgan ishlab chiqaruvchilarga, ishlab chiqaruvchining vakolatli vakiliga, sotuvchilarga, import qiluvchilarga yoki ijrochilarga nisbatan moliyaviy sanksiyalarni qoʻllash yuzasidan sudga murojaat qilish;

sanoat, radiatsiya va yadro xavfsizligi taʼminlash sohasidagi normativ hujjatlar talablariga nomuvofiq mahsulotni muomaladan chiqarish yoki chaqirib olish toʻgʻrisidagi koʻrsatmalarni bajarmaganlik uchun yuridik shaxslarga nisbatan moliyaviy jarima qoʻllash boʻyicha sudga murojaat qilish;

mansabdor va jismoniy shaxslarda ishlarga texnik rahbarlik qilish va ularni bajarish huquqini beradigan tegishli hujjatlar mavjudligini, xavfliligi yuqoriligi bilan bogʻliq ishlar uchun maxsus belgilangan talablarga rioya qilinishini tekshirish;

vazirliklar, idoralar, mahalliy ijro etuvchi hokimiyat organlari va boshqa tashkilotlar bilan kelishuv boʻyicha ularning mutaxassislarini ishlab chiqarishlarning, obyektlar va ishlarning xavfsizligi bilan bogʻliq mustaqil ekspertizalar oʻtkazishni tatbiq etish va ishlanmalar uchun shartnoma asosida jalb etish;

Qoʻmita qonunchilik hujjatlariga muvofiq boshqa huquqlarga ham ega boʻlishi mumkin.

Qoʻmitaning davlat inspektorlari tomonidan oʻz majburiyatlari bajarilishida nazorat ostidagi obyektlar ularni xizmat xonalari, internet va aloqa vositalari, navbatchi maxsus kiyim-bosh va himoya vositalari, transport bilan taʼminlaydilar va hududiy boshqarmalarning ularga doimiy biriktirilgan inspektorlariga esa kommunal xizmatlar koʻrsatiladigan va internet, telefon aloqasi bor boʻlgan idoraviy turar joy berilishida koʻmaklashadilar, shuningdek, idoraviy bolalar maktabgacha va sanatoriy-kurort muassasalaridan joy beradilar, tibbiy xizmat koʻrsatish va ijtimoiy-maishiy taʼminlash masalalarini hal etadilar.

21. Qoʻmita:

Qoʻmitaga yuklangan vazifa va funksiyalarning samarali bajarilishi, shuningdek, sanoat, radiatsiya va yadro xavfsizligini taʼminlash sohasidagi davlat siyosatini amalga oshirish;

Qoʻmitaning faoliyati bilan bogʻliq boʻlgan prognoz koʻrsatkichlarga erishishni soʻzsiz taʼminlash;

Vazirlar Mahkamasiga va Oʻzbekiston Respublikasi Prezidenti Administratsiyasiga kiritiladigan normativ-huquqiy hujjatlar va boshqa hujjatlar loyihalari, shuningdek, Qoʻmita tomonidan qabul qilinadigan buyruqlar amalga oshirilishining sifati, pirovard natijalari va oqibatlari;

sanoat, radiatsiya va yadro xavfsizligini taʼminlash sohasini rivojlantirish, shuningdek, koʻrsatilgan sohalarda hududlarni ijtimoiy-iqtisodiy rivojlantirish va ulardagi muammoli masalalarni hal qilish boʻyicha dasturlar, tadbirlar rejalari, “yoʻl xaritalari” va boshqa hujjatlarning samarali amalga oshirilishi;

oʻz vakolati doirasida fuqarolar va tadbirkorlik subyektlarining qonuniy huquq va manfaatlari himoya qilinishi va ularga rioya etilishi taʼminlanishi uchun javob beradi.

6-bob. Qoʻmita rahbarlarining asosiy funksional vazifalari

22. Quyidagilar Qoʻmita raisining asosiy funksional vazifalari hisoblanadi:

Oʻzbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya etish;

Qoʻmita faoliyatiga umumiy rahbarlik va nazorat qilish, Oʻzbekiston Respublikasi Prezidentining hujjatlari, Vazirlar Mahkamasining qarorlari va boshqa qonunchilik hujjatlari bilan Qoʻmitaga yuklangan vazifalar va funksiyalar bajarilishini tashkil etish;

Oʻzbekiston Respublikasi Prezidentining hujjatlari va Vazirlar Mahkamasining qarorlari bilan tasdiqlangan Qoʻmita faoliyatini yanada takomillashtirish boʻyicha konsepsiyalar, kompleks dasturlar va tadbirlar ijrosini tanqidiy va chuqur tahlil qilish;

xavfli ishlab chiqarish obyektlarida, radiatsiyaviy xavfli obyektlarda va atom energiyasidan foydalanish obyektlarida boʻlishi mumkin boʻlgan avariyalar, noxush va baxtsiz hodisalardan ogohlantirish va ularning oldini olish boʻyicha amaliy chora-tadbirlarni ishlab chiqish va qabul qilish;

Qoʻmita faoliyati sohasiga kiradigan masalalar boʻyicha Oʻzbekiston Respublikasi Prezidenti Administratsiyasi boʻlinmalari, Oliy Majlisi palatalari va Vazirlar Mahkamasining tarkibiy boʻlinmalari, shuningdek, tegishli vazirliklar va idoralar bilan hamkorlik qilish, Vazirlar Mahkamasi va uning Rayosati majlislarida masalalarni koʻrib chiqishda ishtirok etish;

Qoʻmita rahbarlari va xodimlari xizmat safarlarini Oʻzbekiston Respublikasi Prezidentining “ Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida ” 2014-yil 5-martdagi PQ-2142-son hamda “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablagʻlardan maqsadli hamda oqilona foydalanishni taʼminlash;

Oʻzbekiston Respublikasi Prezidenti, Oʻzbekiston Respublikasi Prezidenti Administratsiyasi, Oʻzbekiston Respublikasining Bosh vaziri va uning oʻrinbosarlari topshiriqlarini bajarish;

oʻz oʻrinbosarlari vakolatlarini belgilash, ular oʻrtasida vazifalarni taqsimlash, Qoʻmitaning boshqa mansabdor shaxslari vakolatlarini belgilash, Qoʻmita faoliyatining alohida tuzilmalariga rahbarlik qilish uchun oʻz oʻrinbosarlari va boshqa mansabdor shaxslarning shaxsiy masʼuliyati darajasini belgilash;

Qoʻmita faoliyati rejalashtirilishini tashkil etish hamda yillik va yarim yillik ish rejalarini tasdiqlash, ularning bajarilishi ustidan nazoratni taʼminlash;

Oʻzbekiston Respublikasi Prezidenti va Vazirlar Mahkamasining qarorlari va topshiriqlari ijrosini tashkil etish va monitoring olib borishning amaliy tizimini yaratish, Qoʻmita faoliyatida ijro intizomini mustahkamlash boʻyicha kompleks amaliy chora-tadbirlarni bajarish, shuningdek, Oʻzbekiston Respublikasi Prezidentining “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qoʻshimcha chora-tadbirlar toʻgʻrisida” 2021-yil 10-fevraldagi PF-6166-son Farmoniga , “Ijro.gov.uz” ijro intizomi idoralararo yagona elektron tizimi samarali faoliyat koʻrsatishini taʼminlashga qaratilgan qoʻshimcha chora-tadbirlar toʻgʻrisida ” 2021-yil 31-maydagi PQ-5132-son va “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat boshqaruvi organlari va boshqa tashkilotlar, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qarorlariga muvofiq Qoʻmita tizimidagi tashkilotlar rahbarlarining shaxsiy masʼuliyatini oshirish choralarini koʻrish;

Qoʻmita xodimlarini tayyorlash, qayta tayyorlash, ularning malakasini oshirish va attestatsiyadan oʻtkazish, shuningdek, kadrlarni tanlash va joy-joyiga qoʻyish, ularning samarali faoliyati uchun zarur shart-sharoitlar yaratish, Qoʻmitaning kadrlar zaxirasini shakllantirish;

Oʻzbekiston Respublikasi Prezidenti, Oʻzbekiston Respublikasi Prezidenti Administratsiyasi va Vazirlar Mahkamasi nomenklaturasiga kiradigan boʻsh lavozimlarga taklif etilgan kadrlarning, shuningdek, Qoʻmitaga ishga qabul qilinayotgan boshqa kadrlarning professional, oʻz ishini bilishi, amaliy tajribaga, yuksak darajada ishlash xususiyatlariga va maʼnaviy-axloqiy fazilatlarga ega ekanligi kafolatini taʼminlash;

sanoat, radiatsiya va yadro xavfsizligini taʼminlash boʻyicha normativ-huquqiy hujjatlar loyihalari sifatli ishlab chiqilishini, ular Oʻzbekiston Respublikasi “ Normativ-huquqiy hujjatlar toʻgʻrisida ”gi, “ Qonunlar loyihalarini tayyorlash va Oʻzbekiston Respublikasi Oliy Majlisining Qonunchilik palatasiga kiritish tartibi toʻgʻrisida ”gi qonunlari, Oʻzbekiston Respublikasi Prezidentining 2018-yil 26-avgustdagi PF-5519-son Farmoni bilan tasdiqlangan Oʻzbekiston Respublikasi Prezidenti Administratsiyasining Reglamenti (keyingi oʻrinlarda — Oʻzbekiston Respublikasi Prezidenti Administratsiyasining Reglamenti), Vazirlar Mahkamasining 2024-yil 25-martdagi 150-son qarori bilan tasdiqlangan Vazirlar Mahkamasining Reglamenti (keyingi oʻrinlarda — Vazirlar Mahkamasining Reglamenti) talablariga qatʼiy muvofiq ravishda oʻz vaqtida kiritilishini tashkil etish, shuningdek, ularning Vazirlar Mahkamasida ishlab chiqilishi, Vazirlar Mahkamasi rahbariyati huzurida himoya qilinishi va Oʻzbekiston Respublikasi Prezidenti Administratsiyasida koʻrib chiqilishida ishtirok etish;

“ Normativ-huquqiy hujjatlar toʻgʻrisida ”gi, “ Qonunlar loyihalarini tayyorlash va ularni Oʻzbekiston Respublikasi Oliy Majlisi Qonunchilik palatasiga kiritish tartibi toʻgʻrisida ”gi Oʻzbekiston Respublikasining qonunlariga va boshqa qonunchilik hujjatlariga muvofiq Qoʻmita faoliyatiga aloqador qonun loyihalarini tayyorlashni tashkil etish;

Qoʻmita vakolatiga kiradigan masalalar boʻyicha normativ-huquqiy hujjatlarni va texnik jihatdan tartibga solish sohasidagi normativ hujjatlarni qabul qilish, zarurat boʻlganda boshqa vazirliklar va idoralar bilan birgalikda qoʻshma qarorlar qabul qilish;

Qoʻmitaga taqdim etilgan takliflar va normativ-huquqiy hujjatlar loyihalarini toʻliq va har tomonlama koʻrib chiqilishini taʼminlash, ularni puxta huquqiy, moliyaviy, iqtisodiy va boshqa ekspertizadan oʻtkazish, shuningdek, Oʻzbekiston Respublikasi Prezidenti Administratsiyasi Reglamentida va Vazirlar Mahkamasining Reglamentida belgilangan muddatlarda ularni kelishish;

Qoʻmita rahbarlari va xodimlari xizmat safarlarini qonunchilik hujjatlari talablariga muvofiq tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablagʻlardan maqsadli va oqilona foydalanishni taʼminlash;

oʻz oʻrinbosarlari hamda tarkibiy boʻlinmalar rahbarlari faoliyati samaradorligini va natijadorligini muntazam tanqidiy tahlil qilish, ularning shaxsiy hisobotlarini eshitish va yakunlari boʻyicha zarur choralar koʻrish;

Qoʻmita xodimlarini ragʻbatlantirish va intizomiy javobgarlikka tortish, shu jumladan, ularning egallab turgan lavozimda qolishining maqsadga muvofiqligiga doir masalalarni koʻrib chiqish;

Qoʻmita xodimlari tomonidan Odob-axloq qoidalari talablariga rioya etilishini taʼminlash;

“ Korrupsiyaga qarshi kurashish toʻgʻrisida ”gi hamda “ Manfaatlar toʻqnashuvi toʻgʻrisida ”gi Oʻzbekiston Respublikasining qonunlari talablariga muvofiq Qoʻmita tizimida korrupsiya va boshqa huquqbuzarliklarning oldini olish choralarini koʻrish, shuningdek, huquqni qoʻllash amaliyotini va qonunchilik hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

Qoʻmita hamda uning tarkibiy boʻlinmalari ishini tashkil etishning zamonaviy shakllari joriy etilishini taʼminlash;

aholi va tadbirkorlik subyektlari bilan hamkorlik qilishda, shu jumladan, “yagona darcha” prinsipini joriy etish orqali davlat xizmatlari sifati va samaradorligini hamda ulardan erkin foydalanish hamda “Elektron hukumat toʻgʻrisida”gi Oʻzbekiston Respublikasining Qonunini amalga oshirish doirasida zamonaviy axborot-kommunikatsiya texnologiyalaridan foydalanish;

jismoniy va yuridik shaxslarning murojaatlarini koʻrib chiqishga doir samarali ishlarni tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish, qonunchilik hujjatlarida belgilangan muddatlarda va tartibda jismoniy shaxslarni va yuridik shaxslar vakillarini muntazam ravishda shaxsan qabul qilish, shu jumladan, joylarga borib qabul qilish;

Oʻzbekiston Respublikasi Prezidentining Xalq qabulxonalari bilan samarali hamkorlikni, ularning faoliyatida Qoʻmita xodimlari va rahbarlarining faol ishtirok etishini tashkil etish, jismoniy va yuridik shaxslarning Oʻzbekiston Respublikasi Prezidenti Virtual qabulxonasidan tushgan murojaatlari oʻz vaqtida va toʻliq koʻrib chiqilishini taʼminlash;

davlat siriga kiritilgan maʼlumotlar va maxfiy axborot bilan ishlashda qonunchilik hujjatlari talablariga rioya qilish;

markaziy apparat va hududiy boshqarmalar (boʻlimlar) tuzilmasiga zarurat boʻlganda boshqaruv xodimlarining cheklangan soni va mehnatga haq toʻlash fondi doirasida oʻzgartirishlar kiritish;

Qoʻmitaning tarkibiy boʻlinmalari toʻgʻrisidagi nizomlarni (ustavlarni) belgilangan tartibda tasdiqlash;

Qoʻmita tarkibiy boʻlinmalarning xodimlarini belgilangan tartibda lavozimga tayinlash va lavozimdan ozod qilish;

ushbu Nizomda belgilangan, sanoat, radiatsiya va yadro xavfsizligi boʻyicha texnik jihatdan tartibga solish, shuningdek, sanoat, radiatsiya va yadro xavfsizligini taʼminlash sohasida profilaktik chora-tadbirlarni ishlab chiqish va amalga oshirish sohalarida barcha jismoniy va yuridik shaxslarning qonunchilik hujjatlari va normativ hujjatlarga rioya qilishi ustidan davlat nazoratini taʼminlash boʻyicha Qoʻmita faoliyatining asosiy yoʻnalishlarini tashkil etish va muvofiqlashtirish;

Qoʻmitani moddiy-texnik jihozlashni yaxshilash ishlarini amalga oshirish;

mehnat va ijro intizomini oshirish, kadrlarni joy-joyiga qoʻyishni taʼminlash, shuningdek, xodimlarga yuklangan vazifalarni bajarish boʻyicha ularning shaxsiy masʼuliyati boʻyicha kechiktirib boʻlmaydigan choralar koʻrish;

Oʻzbekiston Respublikasi hududida atom energiyasidan foydalanish sohasida faoliyatni litsenziyalash maqsadida ekspertiza boʻyicha ishlarni bajarish uchun xorijiy ixtisoslashtirilgan institutlar va kompaniyalarni, shuningdek, xorijiy mutaxassislar va ekspertlarni jalb etish.

Qoʻmita raisi qonunchilik hujjatlariga muvofiq boshqa vakolatlarni ham amalga oshirishi mumkin.

23. Quyidagilar Qoʻmita raisi oʻrinbosarlarining asosiy funksional vazifalari hisoblanadi:

Oʻzbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya qilish;

Qoʻmita raisi vaqtincha boʻlmaganda, tegishli buyruq asosida uning vazifalarini bajarish;

Qoʻmitaning mutasaddilik qilinadigan tarkibiy boʻlinmalari faoliyatini muvofiqlashtirish, nazorat qilish va ularga bevosita rahbarlik qilish, ularning xodimlari oʻrtasida vazifalarni taqsimlash;

Qoʻmita faoliyatining mutasaddilik qilinadigan yoʻnalishlari boʻyicha Oʻzbekiston Respublikasi Prezidentining hujjatlari va Vazirlar Mahkamasining qarorlari bilan tasdiqlangan respublika ijro etuvchi hokimiyat organlari faoliyatini yanada takomillashtirish boʻyicha konsepsiyalar, kompleks dasturlar va tadbirlar ijrosini tanqidiy va chuqur tahlil qilish;

mutasaddilik qilinadigan tarkibiy boʻlinmalar tomonidan prognoz koʻrsatkichlarga erishishni soʻzsiz taʼminlash choralarini koʻrish, boʻlinmalar rahbarlarining hisobotlarini muntazam eshitish va ushbu koʻrsatkichlarga erishish uchun ularning shaxsiy javobgarligini oshirish;

mutasaddilik qilinadigan tarkibiy boʻlinmalar rahbarlarining yillik va yarim yillik rejalarini tasdiqlash, ularning bajarilishi ustidan nazoratni taʼminlash;

Oʻzbekiston Respublikasi Prezidenti va Vazirlar Mahkamasining hujjatlari va topshiriqlari ijrosini taʼminlash, Qoʻmitaning mutasaddilik qilinadigan tarkibiy boʻlinmalarida ijro intizomi boʻyicha kompleks amaliy chora-tadbirlarni amalga oshirish, shuningdek, qonunchilik hujjatlariga muvofiq topshiriqlar oʻz vaqtida va sifatli ijro etilishi uchun tarkibiy boʻlinmalar rahbarlarining shaxsiy masʼuliyatini oshirish choralarini koʻrish;

Ilmiy-texnik kengash qarorlari, Qoʻmita raisining buyruqlari va topshiriqlari oʻz vaqtida va sifatli bajarilishini taʼminlash;

mutasaddilik qilinadigan tarkibiy boʻlinmalarda kadrlarni tanlash va joy-joyiga qoʻyish boʻyicha Qoʻmita raisiga takliflar taqdim etish, ularning professional, oʻz ishini bilishi, amaliy tajribaga, yuksak darajada ishlash xususiyatlariga va maʼnaviy-axloqiy fazilatlarga ega ekanligi kafolatini taʼminlash, ularning kasbiy malakasini oshirish choralarini koʻrish, mutasaddilik qilinadigan boʻlinmalarda kadrlar zaxirasini shakllantirish;

normativ-huquqiy hujjatlar loyihalari mutasaddilik qilinadigan tarkibiy boʻlinmalar tomonidan sifatli va oʻz vaqtida ishlab chiqilishini tashkil etish, Qoʻmitaning tarkibiy boʻlinmalarida tayyorlangan hujjatlar loyihalarini koʻrib chiqish va ular keyinchalik Qoʻmita raisi tomonidan koʻrib chiqilishi, imzolanishi uchun kelishish, ularning Oʻzbekiston Respublikasi Prezidenti Administratsiyasi va Vazirlar Mahkamasi Reglamentlari talablariga qatʼiy muvofiq ravishda Oʻzbekiston Respublikasi Vazirlar Mahkamasiga oʻz vaqtida kiritilishini taʼminlash, shuningdek, Vazirlar Mahkamasida normativ-huquqiy hujjatlar loyihalarini ishlab chiqishda Qoʻmita raisining topshirigʻiga binoan ishtirok etish;

Qoʻmitaga taqdim etilgan takliflar va normativ-huquqiy hujjatlar loyihalarini toʻliq va har tomonlama koʻrib chiqish, ularni puxta huquqiy, moliyaviy, iqtisodiy va boshqa ekspertizadan oʻtkazish;

xizmat safarlarini Oʻzbekiston Respublikasi Prezidentining “ Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida ” 2014-yil 5-martdagi PQ-2142-son hamda “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablagʻlardan maqsadli hamda oqilona foydalanishni taʼminlash;

mutasaddilik qilinadigan tarkibiy boʻlinmalar rahbarlari va xodimlari faoliyati samaradorligi va natijadorligini muntazam tanqidiy tahlil qilish, majlislarda ularning shaxsiy hisobotlarini eshitish va yakunlari boʻyicha zarur choralar koʻrish;

faoliyat sohasiga tegishli masalalar boʻyicha Qoʻmita faoliyatini takomillashtirishga doir amaliy choralar koʻrish, qonunchilik hujjatlarini takomillashtirish boʻyicha takliflar ishlab chiqish va ularni Qoʻmita raisiga kiritish;

mutasaddilik qilinadigan tarkibiy boʻlinmalar rahbarlari va xodimlarini ragʻbatlantirish va intizomiy javobgarlikka tortish, shu jumladan, ularning egallab turgan lavozimida qolishi maqsadga muvofiqligiga masalasini koʻrib chiqish boʻyicha takliflarni Qoʻmita raisiga kiritish;

Qoʻmita xodimlarining odob-axloq qoidalari talablariga, mutasaddilik qilinadigan tarkibiy boʻlinmalar rahbarlari va xodimlarining ushbu qoidalarga rioya etishini taʼminlash;

huquqni qoʻllash amaliyotini va qonunchilik hujjatlarini takomillashtirishga doir chora-tadbirlarni ishlab chiqish va amalga oshirish orqali “ Korrupsiyaga qarshi kurashish toʻgʻrisida ”gi hamda “ Manfaatlar toʻqnashuvi toʻgʻrisida ”gi Oʻzbekiston Respublikasining qonunlari talablariga muvofiq Qoʻmita tizimida korrupsiya va boshqa huquqbuzarliklarning oldini olish choralarini koʻrish, shuningdek, ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

davlat xizmatlari samaradorligi, sifati va ulardan erkin foydalanishni oshirishga doir takliflarni Qoʻmita raisiga kiritish;

qonunchilik hujjatlarida belgilangan muddatlarda va tartibda jismoniy va yuridik shaxslarning murojaatlarini koʻrib chiqish boʻyicha samarali ishlarni tashkil etish, aholi bilan toʻgʻridan-toʻgʻri va ochiq muloqotni yoʻlga qoʻyish, jismoniy shaxslarni va yuridik shaxslar vakillarini muntazam ravishda shaxsan qabul qilish, shu jumladan, joylarga borib qabul qilish;

Oʻzbekiston Respublikasi Prezidentining Xalq qabulxonalari bilan samarali hamkorlik qilish, ularning faoliyatida faol ishtirok etish, jismoniy va yuridik shaxslar vakillarining Oʻzbekiston Respublikasi Prezidentining Virtual qabulxonasidan tushgan murojaatlari oʻz vaqtida va toʻlaqonli koʻrib chiqilishini taʼminlash;

davlat siriga kiritilgan maʼlumotlar va maxfiy axborot bilan ishlashda qonunchilik hujjatlari talablariga rioya qilish;

ushbu Nizomda belgilangan, sanoat, radiatsiya va yadro xavfsizligini taʼminlash sohasida profilaktika chora-tadbirlarini ishlab chiqish va amalga oshirish sohasida jismoniy va yuridik shaxslarning qonunchilik hujjatlari va normativ hujjatlarga rioya qilishi ustidan davlat nazoratini taʼminlash boʻyicha Qoʻmita faoliyatining asosiy yoʻnalishlarini tashkil etish va muvofiqlashtirish;

ijro intizomining holatini, Qoʻmita faoliyatini tahlil qilish boʻyicha apparat yigʻilishlarini oʻtkazish;

Qoʻmita raisining tezkor topshiriqlarini bajarish.

Qoʻmita raisining oʻrinbosarlari qonunchilik hujjatlariga muvofiq boshqa vakolatlarni ham amalga oshirilishi mumkin.

24. Quyidagilar markaziy apparat tarkibiy boʻlinmalari rahbarlarining asosiy funksional vazifalari hisoblanadi:

Oʻzbekiston Respublikasi Konstitutsiyasi va qonunlari talablariga, shuningdek, boshqa normativ-huquqiy hujjatlarga rioya etish;

Oʻzbekiston Respublikasi Prezidenti va Vazirlar Mahkamasining qarorlari va topshiriqlari ijrosini tashkil etish va monitoring olib borishning amaliy tizimini yaratish, Qoʻmita faoliyatida ijro intizomini mustahkamlash boʻyicha kompleks amaliy chora-tadbirlarni bajarish, shuningdek, Oʻzbekiston Respublikasi Prezidentining “Qonunchilik hujjatlari ijrosini samarali tashkil etishda davlat boshqaruvi organlari va mahalliy ijro etuvchi hokimiyat organlari rahbarlarining shaxsiy javobgarligini kuchaytirishga doir qoʻshimcha chora-tadbirlar toʻgʻrisida” 2021-yil 10-fevraldagi PF-6166-son Farmoniga , “Ijro.gov.uz” ijro intizomi idoralararo yagona elektron tizimi samarali faoliyat koʻrsatishini taʼminlashga qaratilgan qoʻshimcha chora-tadbirlar toʻgʻrisida ” 2021-yil 31-maydagi PQ-5132-son va “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat boshqaruvi organlari va boshqa tashkilotlar, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qarorlariga muvofiq shaxsiy masʼuliyatini oshirish choralarni koʻrish;

tarkibiy boʻlinmalar faoliyatiga bevosita rahbarlik qilish, ushbu boʻlinmalarga yuklangan vazifalar va funksiyalar bajarilishini tashkil etish;

Qoʻmitaning tarkibiy boʻlinmalari faoliyatini oʻz vakolatlari doirasida muvofiqlashtirish;

sanoat, radiatsiya va yadro xavfsizligini taʼminlash sohasida nazorat-profilaktik ishlar va boshqa tadbirlar bajarilishini tizimli tahlil qilish va tarkibiy boʻlinmalar tomonidan koʻrsatib oʻtilgan sohalarda baxtsiz hodisalar va avariyalarning oldini olishga va ularni qisqartirishga yoʻnaltirilgan qoʻshimcha choralar koʻrilishi boʻyicha takliflarni Qoʻmita rahbariyatiga kiritish;

Oʻzbekiston Respublikasi Prezidenti va Vazirlar Mahkamasi hujjatlari va topshiriqlari ijrosini taʼminlash, Qoʻmita tarkibiy boʻlinmalari xodimlarining ijro intizomini mustahkamlash boʻyicha kompleks amaliy chora-tadbirlarni amalga oshirish, shuningdek, qonunchilik hujjatlariga muvofiq topshiriqlarning oʻz vaqtida va sifatli bajarilishi uchun tarkibiy boʻlinmalar xodimlarining shaxsiy masʼuliyatini oshirish choralarini koʻrish;

Ilmiy-texnik kengash qarorlari, Qoʻmita raisi va uning oʻrinbosarlari buyruqlari hamda topshiriqlari oʻz vaqtida va sifatli bajarilishini taʼminlash;

tarkibiy boʻlinmalarning yarim yillik ish rejalari ishlab chiqilishini taʼminlash, ularni tasdiqlash uchun kiritish, ularda koʻrsatilgan vazifalar va tadbirlar oʻz vaqtida va sifatli bajarilishini taʼminlash;

tarkibiy boʻlinmalarga yuklangan vazifalar bajarilishini nazorat qilish va muvofiqlashtirish, hududiy boshqarmalar (boʻlimlar), sanoat xavfsizligi inspeksiyalari va idoraviy mansub tashkilotlar faoliyatiga amaliy va metodik yordam koʻrsatish;

tarkibiy boʻlinmalar faoliyatiga oid masalalar yuzasidan qonunchilik hujjatlarini takomillashtirish boʻyicha takliflarni ishlab chiqish va koʻrib chiqish uchun Qoʻmita raisining tegishli oʻrinbosarlariga kiritish;

tarkibiy boʻlinmalarda kadrlarni tanlash va joy-joyiga qoʻyishda Qoʻmita raisining oʻrinbosarlariga takliflar taqdim etish, ularning kasbiy malakasini oshirish choralarini koʻrish, tarkibiy boʻlinmalarda kadrlar zaxirasini shakllantirish;

normativ-huquqiy hujjatlar loyihalari tarkibiy boʻlinmalar tomonidan sifatli ishlab chiqilishini tashkil etish, ularning Oʻzbekiston Respublikasi Prezidenti Administratsiyasi va Vazirlar Mahkamasining Reglamentlari talablariga qatʼiy muvofiq ravishda Vazirlar Mahkamasiga oʻz vaqtida kiritilishini taʼminlash;

Qoʻmitaga taqdim etilgan takliflar va normativ-huquqiy hujjatlar loyihalarini toʻliq va har tomonlama koʻrib chiqish;

xizmat safarlarini Oʻzbekiston Respublikasi Prezidentining “ Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida ” 2014-yil 5-martdagi PQ-2142-son hamda “Xorijiy xizmat safarlarida boʻlishning samaradorligi va xorijiy delegatsiyalarning Oʻzbekiston Respublikasiga tashrifini tashkil etish uchun mansabdor shaxslarning shaxsiy javobgarligini yanada oshirish chora-tadbirlari toʻgʻrisida” 2017-yil 3-avgustdagi PQ-3170-son qarorlari talablariga muvofiq tashkil etish, xizmat safarlarining asoslanganligi, samaradorligi va natijadorligini, safar uchun ajratiladigan mablagʻlardan maqsadli hamda oqilona foydalanishni taʼminlash;

tarkibiy boʻlinmalar xodimlari faoliyati samaradorligi va natijadorligini muntazam ravishda tanqidiy tahlil qilish, yigʻilishlarda ularning shaxsiy hisobotlarini eshitish, ularning yakunlari boʻyicha zarur choralar koʻrish;

Qoʻmita xodimlarining odob-axloq qoidalari talablariga rioya qilishini, tarkibiy boʻlinmalar xodimlari ushbu qoidalarga rioya etishini taʼminlash;

“ Korrupsiyaga qarshi kurashish toʻgʻrisida ”gi hamda “ Manfaatlar toʻqnashuvi toʻgʻrisida ”gi Oʻzbekiston Respublikasining qonunlari talablariga muvofiq tarkibiy boʻlinmalarda korrupsiya va boshqa huquqbuzarliklarning oldini olish choralarini koʻrish, shuningdek, huquqni qoʻllash amaliyotini va qonunchilik hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashuvchi sabablar va shart-sharoitlarni aniqlash, tahlil qilish, bartaraf etish;

davlat xizmatlarining samaradorligi, sifati va ulardan erkin foydalanishni oshirishga doir takliflarni Qoʻmita rahbariyatiga kiritish;

jismoniy va yuridik shaxslarning murojaatlarini koʻrib chiqish, qonunchilik hujjatlarida belgilangan muddatlarda va tartibda aholi bilan toʻgʻridan-toʻgʻri va ochiq muloqotni yoʻlga qoʻyish;

Oʻzbekiston Respublikasi Prezidentining Xalq qabulxonalari va Virtual qabulxonasidan tushgan murojaatlarini oʻz vaqtida va toʻlaqonli koʻrib chiqish;

davlat siriga kiritilgan maʼlumotlar va maxfiy axborot bilan ishlashda qonunchilik hujjatlari talablariga rioya qilish.

7-bob. Qoʻmita rahbarlarining javobgarligi

25. Qoʻmita raisi:

Qoʻmitaga yuklangan vazifalar va funksiyalar bajarilishi;

ushbu Nizomning 21-bandida koʻrsatilgan Qoʻmitaning javobgarlik sohalari boʻyicha;

ushbu Nizomning 22-bandida koʻrsatilgan oʻz funksional vazifalarining sifatli bajarilishi uchun shaxsan javobgardir.

26. Qoʻmita raisi oʻrinbosarlari:

mutasaddilik qilinadigan yoʻnalish va tarkibiy boʻlinmalarda Qoʻmitaga yuklangan vazifalar va funksiyalarning bajarilishi;

ushbu Nizomning 21-bandida koʻrsatilgan Qoʻmitaning javobgarlik sohalarida mutasaddilik qilinadigan masalalar boʻyicha;

ushbu Nizomning 23-bandida koʻrsatilgan oʻz funksional vazifalarining sifatli bajarilishi uchun shaxsan javobgardir.

8-bob. Qoʻmita faoliyatini tashkil etish

1-§. Qoʻmita rahbariyati

27. Qoʻmitaga rais rahbarlik qiladi.

Raisning ikki nafar oʻrinbosari boʻladi.

Qoʻmita raisi belgilangan tartibda Oʻzbekiston Respublikasi Prezidenti tomonidan lavozimga tayinlanadi va lavozimdan ozod qilinadi.

Qoʻmita raisi oʻrinbosarlari Oʻzbekiston Respublikasi Prezidenti bilan kelishilgan holda Vazirlar Mahkamasi tomonidan, Qoʻmitaning boshqa tizim tashkilotlari rahbarlari Vazirlar Mahkamasi bilan kelishgan holda Qoʻmita raisi tomonidan lavozimga tayinlanadi va lavozimdan ozod qilinadi.

28. Qoʻmita raisi maqomi, mehnatga haq toʻlash, tibbiy va transport xizmat koʻrsatish sharoitlari boʻyicha vazirga, Qoʻmita raisi oʻrinbosarlari esa — vazir oʻrinbosariga tenglashtiriladi.

29. Qoʻmita raisi:

Qoʻmitaga yuklangan vazifalar va funksiyalarning bajarilishi;

ushbu Nizomda nazarda tutilgan Qoʻmitaning javobgarlik sohalari boʻyicha;

oʻz funksional vazifalarining sifatli bajarilishi uchun shaxsan javobgardir.

30. Qoʻmita raisining oʻrinbosarlari:

Qoʻmitaning mutasaddilik qilinadigan tarkibiy boʻlinmalarida Qoʻmitaga yuklangan vazifalar va funksiyalarning bajarilishi;

ushbu Nizomda nazarda tutilgan Qoʻmitaning mutasaddilik qilinadigan masalalarga doir javobgarlik sohalari boʻyicha;

oʻz funksional vazifalarining sifatli bajarilishi uchun shaxsan javob beradi.

Qoʻmita raisi boʻlmagan vaqtda uning vakolatlarini bajaradi.

Qoʻmitaning hududiy boshqarmalar (boʻlimlar) va idoraviy mansub tashkilotlariga Qoʻmita raisi tomonidan lavozimga tayinlanadigan va lavozimdan ozod etiladigan rahbarlar boshchilik qiladi.

31. Qoʻmitaning hududiy boshqarmalari (boʻlimlar), sanoat xavfsizligi inspeksiyalari va idoraviy mansub tashkilotlari rahbarlari:

ularga yuklangan vazifalar va funksiyalarning bajarilishi va javobgarligi sohalari boʻyicha;

oʻz funksional vazifalari sifatli bajarilishi uchun shaxsan javob beradilar.

Qoʻmitaning tarkibiy tuzilmalari oʻz faoliyatini Qoʻmita raisi tomonidan tasdiqlanadigan nizomlarga muvofiq amalga oshiradi.

2-§. Respublika va mahalliy ijro etuvchi hokimiyat organlari hamda boshqa tashkilotlar bilan oʻzaro hamkorlik

32. Qoʻmita oʻz faoliyatini respublika va mahalliy ijro etuvchi hokimiyat organlari va boshqa tashkilotlar bilan hamkorlik qiladi.

33. Hududiy boshqarmalar (boʻlimlar), sanoat xavfsizligi inspeksiyalari va idoraviy mansub tashkilotlar oʻz vakolatlari doirasida boshqa davlat organlari va xoʻjalik birlashmalarining hududiy organlari, mahalliy ijro etuvchi hokimiyat organlari va boshqa tashkilotlar bilan hamkorlik qiladi.

9-bob. Qoʻmita faoliyati samaradorligi va natijadorligini baholash mezonlari va ish indikatorlari

34. Qoʻmita faoliyatining samaradorligi muntazam baholanadi.

35. Qoʻmita faoliyatining samaradorligi va natijadorligini baholash tegishli mezonlar va ish indikatorlarga asoslanadi.

36. Qoʻmita faoliyatining samaradorligi va natijadorligini baholash yakunlari boʻyicha:

Qoʻmita va uning hududiy boshqarmalari, sanoat xavfsizligi inspeksiyalari rahbarlari va xodimlarini ragʻbatlantirish (mukofotlash) yoki intizomiy javobgarlikka tortish;

Qoʻmita faoliyatida aniqlangan kamchiliklarni bartaraf etish va uning faoliyatini yanada takomillashtirish choralari koʻriladi.

37. Qoʻmita faoliyatining samaradorligi va natijadorligini baholash tartibi va uslubi Vazirlar Mahkamasi tomonidan belgilanadi.

38. Qoʻmita raisi va uning oʻrinbosarlari faoliyati boʻyicha samaradorlik koʻrsatkichlari qonunchilik hujjatlari bilan belgilanadi.

39. Qoʻmitaning tekshirish huquqiga ega inspektorlari ularning sohaga oid bilimlarini tekshirish maqsadida uch yilda bir marotaba attestatsiyadan oʻtkaziladi.

10-bob. Ilmiy-texnik kengash

40. Qoʻmita vakolatiga kiradigan muhim masalalarni koʻrib chiqish va tavsiyalar berish uchun Ilmiy-texnik kengash tashkil etiladi. Ilmiy-texnik kengash Qoʻmita huzurida faoliyat yuritadigan maslahat organi hisoblanadi.

41. Ilmiy-texnik kengash toʻgʻrisidagi Nizom va uning tarkibi Qoʻmita raisi tomonidan tasdiqlanadi.

42. Ilmiy-texnik kengash quyidagi asosiy vazifalarni amalga oshiradi:

sanoat, radiatsiya va yadro xavfsizligini taʼminlash sohasidagi davlat siyosatini yuritish va tartibga solish maqsadida ilmiy tadqiqotlar va ilmiy-texnik ishlarning yoʻnalishlari, mavzulari va natijalari boʻyicha takliflarni koʻrib chiqish va tayyorlash;

sanoat, radiatsiya va yadro xavfsizligini taʼminlash sohasida davlat siyosatini yuritish va tartibga solish boʻyicha tavsiyalar ishlab chiqish;

Qoʻmita vakolati doirasida tartibga solish, nazorat qilish va litsenziyalash faoliyatida huquqni qoʻllash amaliyotidan kelib chiqib, ilgʻor tajribalar va innovatsion ishlanmalarni amalga oshirishga koʻmaklashish.

43. Ilmiy-texnik kengash Qoʻmita vakolatiga tegishli boʻlgan boshqa masalalarni ham koʻrib chiqish huquqiga ega.

44. Ilmiy-texnik kengash yigʻilishlariga Qoʻmita vakolatiga kiradigan masalalar boʻyicha davlat organlari va xoʻjalik birlashmalari, nazorat ostidagi obyektlarga ega boʻlgan korxona va tashkilotlar rahbarlari taklif etilishi mumkin.

11-bob. Qoʻmita faoliyatini moliyalashtirish va moddiy-texnik taʼminlash, uning xodimlari mehnatiga haq toʻlash va ularni moddiy ragʻbatlantirish

45. Qoʻmita budjet tashkiloti hisoblanadi hamda uning moddiy-texnik taʼminoti, xodimlari mehnatiga haq toʻlash va ularni moddiy ragʻbatlantirish boʻyicha xarajatlar Davlat budjeti mablagʻlari, Jamgʻarma mablagʻlari va qonunchilik bilan taqiqlanmagan boshqa mablagʻlar hisobidan moliyalashtiriladi.

46. Qoʻmitani boshqaruv xodimlarining lavozim maoshini belgilashda Davlat budjeti mablagʻlari hisobidan yagona tarif setkasi boʻyicha mehnatga haq toʻlashning tasdiqlangan razryadlariga muvofiq tarif koeffitsiyenti 1,8 baravarga oshirilgan holda qoʻllaniladi.

47. Qoʻmita xodimlarining ish haqi lavozim maoshi, ish haqiga tuman (hududiy) koeffitsiyentlari, mukofotlar, ustamalar, qoʻshimcha haqlar va qonunchilik hujjatlarida nazarda tutilgan boshqa ragʻbatlantiruvchi toʻlovlardan iborat.

48. Qoʻmitaning barcha xodimlariga uzluksiz ish staji uchun ustamalarni ularning umumiy mehnat faoliyatini qamrab olgan holda, ustamalar faqat asosiy ish joyi boʻyicha har oyda va xodimning oylik maoshiga (ragʻbatlantirish koeffitsiyentini hisobga olgan holda) nisbatan quyidagi foizlarda hisoblanadi:

Ish staji boʻyicha guruh Uzluksiz staj uchun ustama miqdori 1 yildan 3 yilgacha 30% 3 yildan 5 yilgacha 60% 5 yildan 10 yilgacha 75% 10 yildan 15 yilgacha 100% 15 yil va undan ortiq 150%

49. Qoʻmitaning inspektorlar tarkibiga va xodimlariga farqlash belgilari boʻlgan formali kiyim-bosh va yagona namunadagi guvohnoma belgilangan tartibda beriladi.

12-bob. Yakunlovchi qoida

50. Qoʻmita qonunchilik hujjatlarida belgilangan tartibda qayta tashkil etiladi va tugatiladi.

Vazirlar Mahkamasining 2024-yil 4-oktabrdagi 633-son qaroriga 2-ILOVA

Sanoat, radiatsiya va yadro xavfsizligi qoʻmitasi huzuridagi Sanoat xavfsizligi sohasini qoʻllab-quvvatlash jamgʻarmasi mablagʻlarini shakllantirish va ulardan foydalanish tartibi toʻgʻrisida

1-bob. Umumiy qoidalar

1. Mazkur Nizom Sanoat, radiatsiya va yadro xavfsizligi qoʻmitasi huzuridagi Sanoat xavfsizligi sohasini qoʻllab-quvvatlash jamgʻarmasi (keyingi oʻrinlarda — Jamgʻarma) mablagʻlarini shakllantirish va ulardan foydalanish tartibini belgilaydi.

2. Jamgʻarma yuridik shaxs tashkil etmagan holda, Oʻzbekiston Respublikasi Vazirlar Mahkamasi huzuridagi Sanoat, radiatsiya va yadro xavfsizligi qoʻmitasiga (keyingi oʻrinlarda — Qoʻmita) yuklangan vazifalarni amalga oshirish boʻyicha chora-tadbirlarni moliyalashtirishga koʻmaklashish va uning faoliyati samaradorligini taʼminlash maqsadida tashkil etiladi.

3. Jamgʻarma mablagʻlari Qoʻmitaning Iqtisodiyot va moliya vazirligi huzuridagi Gʻaznachilik xizmati qoʻmitasida belgilangan tartibda ochiladigan milliy valyutadagi shaxsiy gʻazna hisobvaraqlarida jamlanadi.

2-bob. Jamgʻarma mablagʻlarini shakllantirish tartibi

4. Jamgʻarma mablagʻlari quyidagi manbalar hisobidan shakllantiriladi:

Jamgʻarmaning kutilayotgan xarajatlaridan kelib chiqib, Iqtisodiyot va moliya vazirligi bilan kelishilgan holda oʻrnatiladigan, “Navoiyuran” davlat korxonasi yillik foydasidan hisoblangan dividendning 1 foizi miqdoridagi ajratmalar;

“Sanoat xavfsizligi” DM, “Radiatsiya va yadro xavfsizligi ilmiy-texnik markazi” DM, “Kontexnazoratoʻquv” DM va “Sanoat nazorati laboratoriyasi” DM sof foydasining 50 foizi miqdoridagi ajratmalar;

sanoat, radiatsiya va yadro xavfsizligi sohasida davlat xizmatlarini koʻrsatishdan qonunchilikda belgilangan tartibda va miqdorlarda Qoʻmitaga tushadigan mablagʻlar.

Qoʻmita tomonidan xoʻjalik yurituvchi subyektlar, ularning mansabdor shaxslari va jismoniy shaxslardan sanoat, radiatsiya va yadro xavfsizligi sohasidagi qonunchilik hamda texnik jihatdan tartibga solish sohasidagi normativ hujjatlar talablarini buzganlik uchun qonunchilikda belgilangan tartibda va miqdorlarda undiriladigan jarimalar summasining 80 foizi miqdoridagi mablagʻlar (bunda ushbu tushumning 75 foizi qismi Qoʻmitaning axborot-kommunikatsiya texnologiyalarini rivojlantirishga yoʻnaltiriladi);

Qoʻmita tizimidagi tashkilotlar tomonidan belgilangan tartibda ajratiladigan mablagʻlar;

xalqaro moliya institutlari mablagʻlari, donor tashkilotlar grantlari;

qonunchilikda taqiqlanmagan boshqa manbalar.

3-bob. Jamgʻarma mablagʻlaridan foydalanish tartibi

5. Jamgʻarma mablagʻlaridan har yili Qoʻmita tomonidan tasdiqlanadigan, Iqtisodiyot va moliya vazirligi bilan kelishilgan daromadlar va xarajatlar smetasiga muvofiq ravishda foydalaniladi.

6. Jamgʻarma mablagʻlaridan quyidagi maqsadlarda foydalaniladi:

Qoʻmita hamda uning tizimidagi tashkilotlarning moddiy-texnik bazasini mustahkamlash;

Qoʻmitani joriy saqlash xarajatlari;

Qoʻmitaga belgilangan tartibda atom energiyasidan foydalanish sohasidagi faoliyatni litsenziyalash maqsadida ekspertiza boʻyicha ishlarni amalga oshirish uchun xorijiy ixtisoslashtirilgan institutlar va kompaniyalarni, shuningdek, xorijiy mutaxassis va ekspertlarni shartnoma asosida jalb etish;

Qoʻmita faoliyatida axborot texnologiyalarini joriy etish va modernizatsiya qilish;

Qoʻmita xodimlarini moddiy ragʻbatlantirish va ijtimoiy himoya qilish;

Qoʻmita xodimlarini tayyorlash, qayta tayyorlash, ularning malakasini oshirish va amaliyot oʻtashini, shu jumladan, xorijiy davlatlarga va respublika hududida xizmat safarlarini tashkil qilish, xalqaro konferensiyalar, seminarlar va boshqa tadbirlarda ishtirok etishini taʼminlash;

radiatsiya va yadro xavfsizligi sohasida ekspert va maslahat xizmatlarini koʻrsatish;

Qoʻmita faoliyatini qoʻllab-quvvatlash va rivojlantirish bilan bogʻliq boshqa tadbirlarni moliyalashtirish.

7. Jamgʻarmaning daromadlar va xarajatlar smetasi joriy yilda kelib tushishi kutilayotgan mablagʻlar doirasida va bajarilishi lozim boʻlgan tadbirlardan kelib chiqib tuziladi.

8. Qoʻmita raisi Jamgʻarma mablagʻlarini tasarruf etuvchi hisoblanadi.

4-bob. Jamgʻarma mablagʻlarini xodimlarni moddiy ragʻbatlantirish va ijtimoiy himoya qilishga yoʻnaltirish

9. Jamgʻarma mablagʻlari hisobidan Qoʻmita xodimlarini moddiy ragʻbatlantirish va ijtimoiy himoya qilish Jamgʻarma moliyaviy holatidan kelib chiqib, quyidagi shakllarda amalga oshiriladi:

qonunchilikda belgilangan bayram kunlarda va boshqa muhim sanalarda bir martalik pul mukofoti bilan mukofotlash;

lavozim maoshlariga har oy belgilanadigan shaxsiy ustama toʻlash;

ishda muvaffaqiyatlarga erishganligi va muhim topshiriqlarni bajarganligi uchun alohida xodimlarni mukofotlash;

ovqat puli uchun toʻlov;

yoʻlkira xarajatlari uchun toʻlov;

moddiy yordam koʻrsatish.

10. Qoʻmita hamda uning tizimidagi budjet tashkilotlari xodimlari quyidagi bayramlar va muhim sanalar munosabati bilan Qoʻmita moliyaviy holatidan kelib chiqib, bir lavozim maoshigacha boʻlgan miqdorda (ragʻbatlantirish koeffitsiyenti bilan birga) mukofotlanishi mumkin.

1-yanvar — Yangi yil;

8-mart — Xalqaro xotin-qizlar kuni;

21-mart — Navroʻz bayrami;

9-may — Xotira va qadrlash kuni;

Roʻza hayiti (Iyd al-Fitr);

Qurbon hayiti (Iyd al-Adha);

1-sentabr — Mustaqillik kuni;

1-oktabr — Oʻqituvchi va murabbiylar kuni;

8-dekabr — Oʻzbekiston Respublikasi Konstitutsiyasi kuni.

Bunda xodimlarga beriladigan mukofot miqdori Qoʻmita raisi tomonidan belgilanadi.

11. Qoʻmita xodimlariga Jamgʻarma hisobidan quyidagi ustama va ragʻbatlantirish choralari belgilanadi:

tashabbuskorlik va mehnat natijalari boʻyicha har oyda shaxsiy ustama toʻlovlari oylik maoshining (ragʻbatlantirish koeffitsiyentini hisobga olgan holda) — bir yuz foizigacha boʻlgan miqdorda;

xizmat vazifalarini sidqidildan bajargani, ijro intizomiga rioya etilgani, oʻz xizmat faoliyati samaradorligini oshirish motivatsiyasi va xizmat vazifalarini samarali bajarish tizimini joriy etgan markaziy apparat xodimlariga har oyda yoki chorakda lavozim maoshining (ragʻbatlantirish koeffitsiyentini hisobga olgan holda) — ellik foizigacha boʻlgan miqdorda, hududiy boʻlinma xodimlariga lavozim maoshining (ragʻbatlantirish koeffitsiyentini hisobga olgan holda) — yigirma foizigacha boʻlgan miqdorda.

12. Qoʻmita hamda uning tizimidagi budjet tashkilotlari xodimlari alohida muvaffaqiyatlarga erishgani va muhim topshiriqlarni bajargani uchun chorak yakunlari boʻyicha lavozim maoshining (ragʻbatlantirish koeffitsiyentini hisobga olgan holda) ellik foizigacha miqdorda mukofotlanadi.

Ustama va ragʻbatlantirish choralari joriy qilinadigan xodimlar toifasi, tartibi va ularga beriladigan ustama va ragʻbatlantirish miqdori Qoʻmita raisi tomonidan belgilanadi.

13. Qoʻmita xodimlarini ijtimoiy himoya qilish maqsadida ularga har oyda bazaviy hisoblash miqdorining ikki baravarigacha miqdorda ovqat puli hamda yoʻlkira xarajatlarini qoplash uchun bazaviy hisoblash miqdorining bir baravarigacha miqdorda yoʻlkira puli berilishi mumkin.

14. Qoʻmita xodimlariga Qoʻmita kasaba uyushmasining iltimosnomasiga binoan Qoʻmita moliyaviy holatidan kelib chiqib, Qoʻmita raisining qarori bilan quyidagi sharoitlar va miqdorlarda moddiy yordam koʻrsatilishi mumkin:

xodimning yubiley sanalari (50 yosh, 60 yosh) munosabati bilan bazaviy hisoblash miqdorining oʻttiz baravari;

xodimning oʻzi oila qurganda yoki farzandining toʻyi munosabati bilan (nikoh guvohnomasiga asosan, faqat birinchi nikoh uchun) bazaviy hisoblash miqdorining ellik baravari;

xodim vafot etganda, uning turmush oʻrtogʻi yoki qonuniy vakiliga bazaviy hisoblash miqdorining ellik baravari;

Oila kodeksiga muvofiq xodimning yaqin qarindoshlari (ota-onasi, turmush oʻrtogʻi va farzandlari) vafot etganda (oʻlim toʻgʻrisidagi guvohnomaga asosan) bazaviy hisoblash miqdorining oʻttiz baravari;

alohida ehtiyoj tugʻilganda (baxtsiz hodisa, avariya, uzoq muddatli kasallik sababli maxsus davolanish va sogʻliqni qayta tiklashga, shuningdek, oiladagi ogʻir moddiy ahvol va boshqa holatlar), bazaviy hisoblash miqdorining ellik baravari;

qishloq xoʻjaligi mahsulotlarini sotib olish uchun yilda bir marta (qoida tariqasida kuz oylarida) bazaviy hisoblash miqdorining oʻn baravari miqdorida.

5-bob. Jamgʻarma mablagʻlaridan foydalanish hisobi, hisoboti va nazorati

15. Jamgʻarma mablagʻlarining hisob va hisoboti Qoʻmita tomonidan qonunchilik hujjatlariga muvofiq yuritiladi.

16. Buxgalteriya hisobining toʻgʻri yuritilishi, Jamgʻarmaga mablagʻlar kelib tushishi va uning sarflanishi haqidagi har chorak va yil yakuni boʻyicha tuziladigan hisobotlarni tayyorlash hamda Iqtisodiyot va moliya vazirligiga oʻz vaqtida taqdim qilishga Qoʻmitaning Moliya va buxgalteriya hisobi boʻlimi javobgar hisoblanadi.

17. Jamgʻarma mablagʻlaridan oqilona va maqsadli foydalanish yuzasidan nazorat Iqtisodiyot va moliya vazirligi huzuridagi Davlat moliyaviy nazorati inspeksiyasi tomonidan amalga oshiriladi.

18. Jamgʻarmaning hisobot yilida foydalanilmagan mablagʻlari olib qoʻyilmaydi va keyinchalik ushbu Nizomda nazarda tutilgan tartibda foydalanish uchun milliy va xorijiy valyutada jamgʻarib boriladigan gʻaznachilik shaxsiy gʻazna hisobvaraqlarida qoladi.

6-bob. Yakunlovchi qoida

19. Ushbu Nizom talablari buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Vazirlar Mahkamasining 2024-yil 4-oktabrdagi 633-son qaroriga 3-ILOVA

Oʻzbekiston Respublikasi Hukumatining oʻz kuchini yoʻqotgan deb eʼtirof etilayotgan ayrim qarorlari

1. Vazirlar Mahkamasining “Oʻzbekiston Respublikasi Sanoat xavfsizligi davlat qoʻmitasi toʻgʻrisidagi nizomni tasdiqlash toʻgʻrisida” 2019-yil 1-fevraldagi 75-son qarori .

2. Vazirlar Mahkamasining “Oʻzbekiston Respublikasi Sanoat xavfsizligi davlat qoʻmitasi toʻgʻrisidagi nizomga oʻzgartirish va qoʻshimchalar kiritish toʻgʻrisida” 2020-yil 15-apreldagi 226-son qarori .

3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirishlar kiritish toʻgʻrisida (Oʻzbekiston Respublikasining “Oʻzbekiston Respublikasi Vazirlar Mahkamasi toʻgʻrisida” 2019-yil 10-dekabrdagi OʻRQ-591-son Qonuni)” 2020-yil 16-apreldagi 234-son qaroriga ilovaning 17-bandi .

Oʻzbekiston Respublikasining Bosh vaziri A. ARIPOV

Toshkent sh.,

2024-yil 4-oktabr,

633-son

(Qonunchilik maʼlumotlari milliy bazasi, 10.10.2024-y., 09/24/633/0799-son; 05.05.2025-y., 09/25/289/0406-son)

lex.uz