UzbekAI

Ўзбекистон Республикаси Вазирлар Маҳкамасининг

қарори

НИЗОМ

Ўзбекистон Республикаси ҳудуди орқали тамаки маҳсулотларини транзит олиб ўтишда божхона назоратини амалга ошириш тартиби тўғрисидаги низомни тасдиқлаш ҳақида

Ўзбекистон Республикаси Президентининг «Алкоголь ва тамаки маҳсулотлари бозорини тартибга солиш ҳамда уларнинг ноқонуний айланмасининг олдини олиш чора-тадбирларини кучайтириш тўғрисида» 2024 йил 3 июндаги ПФ-84-сон Фармони ижросини таъминлаш мақсадида Вазирлар Маҳкамаси қарор қилади:

1. Ўзбекистон Республикаси Президентининг «Алкоголь ва тамаки маҳсулотлари бозорини тартибга солиш ҳамда уларнинг ноқонуний айланмасининг олдини олиш чора-тадбирларини кучайтириш тўғрисида» 2024 йил 3 июндаги ПФ-84-сон Фармонига мувофиқ 2024 йил 1 сентябрдан бошлаб Ўзбекистон Республикаси ҳудуди орқали тамаки маҳсулотларининг транзити учун қуйидаги талаблар жорий этилганлиги маълумот учун қабул қилинсин:

товар ишлаб чиқарилган мамлакат сертификати, уни етказиб бериш шартномаси (битими), товарлар бир нечта қисмга ажратилиб, транзит йўли билан ташилган тақдирда, уларни олиб ўтиш жадвалининг мавжудлиги;

юк олиб ўтувчи томонидан тегишли божхона тўловларининг суммаси Ўзбекистон Республикаси божхона органларининг депозит ҳисобварағига ўтказилганлиги. Бунда кейинчалик товарлар республика ташқарисига олиб чиқилганлиги тасдиқлангандан сўнг тўланган суммалар қайтарилиши;

тамаки ташувчи транспорт воситаларининг фақат инспекцион кўрик мажмуалари билан жиҳозланган чегара божхона постлари орқали ўтказилиши;

қабул қилувчи давлатнинг акциз маркаси бўлган тамаки маҳсулотларини республика ҳудудидан транзит олиб ўтишга рухсат этилиши, акциз маркаси қўлланилмайдиган давлатлардан импорт қилиш ёки уларга экспорт қилиш ҳамда қонунчиликка мувофиқ акциз маркаси талаб этилмайдиган ҳолатлар бундан мустасно.

2. Ўзбекистон Республикаси ҳудуди орқали тамаки маҳсулотларини транзит олиб ўтишда божхона назоратини амалга ошириш тартиби тўғрисидаги низом иловага мувофиқ тасдиқлансин.

3. Ўзбекистон Республикаси Иқтисодиёт ва молия вазирлиги манфаатдор вазирликлар ҳамда идоралар билан биргаликда ўзлари қабул қилган норматив-ҳуқуқий ҳужжатларни бир ой муддатда ушбу қарорга мувофиқлаштирсин.

4. Мазкур қарорнинг бажарилишини назорат қилиш Ўзбекистон Республикаси Бош вазирининг ўринбосари — иқтисодиёт ва молия вазири Ж.А. Қўчқоров зиммасига юклансин.

Вазирлар Маҳкамасининг 2024 йил 30 октябрдаги 717-сон қарорига ИЛОВА

Ўзбекистон Республикаси ҳудуди орқали тамаки маҳсулотларини транзит олиб ўтишда божхона назоратини амалга ошириш тартиби тўғрисида

1-боб. Умумий қоидалар

1. Мазкур Низом Ўзбекистон Республикаси ҳудуди орқали тамаки маҳсулотларини автомобиль ва темир йўл транспортида, шу жумладан, мультимодал ташишда транзит олиб ўтиш тартибини белгилайди.

2. Ушбу Низомда қуйидаги асосий тушунчалардан фойдаланилади:

божхона тўловлари — Ўзбекистон Республикасининг божхона қонунчилигига мувофиқ ҳисобланган, товарларни Ўзбекистон Республикасининг божхона ҳудудида эркин муомалага чиқариш учун тўланиши лозим бўлган импорт божхона божи, акциз солиғи, қўшилган қиймат солиғи ва божхона йиғимлари;

ваколатли шахс — Ўзбекистон Республикаси ҳудуди орқали тамаки маҳсулотларини транзит олиб ўтишда божхона органларига қонунчилик ҳужжатларида белгиланган маълумотлар ва ҳужжатларни тақдим этадиган юкни жўнатувчи, қабул қилувчи, ташувчи ёки экспедитор ҳамда улар номидан иш кўрувчи бошқа шахслар;

кириш божхона пости — Ўзбекистон Республикаси ҳудуди орқали транзит олиб ўтиладиган товарлар олиб кириладиган чегара божхона пости;

товарлар — Ўзбекистон Республикаси ҳудуди орқали транзит олиб ўтиладиган тамаки маҳсулотлари;

тўловчи — товарларнинг транзити учун божхона тўловлари суммасини Ўзбекистон Республикаси божхона органларининг депозит ҳисобварағига ўтказган, ўзининг ҳисобварағи, номи, СТИРи (ЖШШИРи) ва бошқа реквизит маълумотларига эга бўлган ҳар қандай юридик ёки жисмоний шахс;

товарлар партияси — битта жўнатувчи томонидан битта олувчига битта транспорт воситасида ёки поездда (конвойда) битта жўнатувчи юборган транзит юк;

чиқиш божхона пости — Ўзбекистон Республикаси ҳудуди орқали транзит олиб ўтиладиган товарлар олиб чиқиладиган чегара божхона пости.

3. Тамаки маҳсулотларини Ўзбекистон Республикаси ҳудуди орқали транзит олиб ўтишга рухсат олиш учун ваколатли шахс Ўзбекистон Республикасининг божхона ҳудудига олиб киришга мўлжалланган товарлар ва транспорт воситалари тўғрисидаги дастлабки электрон маълумотларни (кейинги ўринларда — дастлабки электрон маълумотлар) тақдим этишда белгиланган маълумотлар билан бирга қуйидагилар кўрсатилган ҳолда мурожаат қилади:

товар ишлаб чиқарилган мамлакат сертификати ва унинг электрон нусхаси;

етказиб бериш шартномасининг (битимининг) электрон нусхаси;

товарлар бир нечта қисмга ажратилиб, транзит йўли билан ташилган тақдирда, уларни олиб ўтиш жадвалининг электрон нусхаси;

товарлар транзити бўйича божхона тўловлари суммаси божхона органларининг депозит ҳисобварағига ўтказилганлигини тасдиқловчи маълумотлар;

товарларнинг қабул қилувчи давлатнинг акциз маркаси билан маркаланганлиги тўғрисидаги маълумотлар, қонунчиликка мувофиқ акциз маркаси талаб этилмайдиган ҳолатлар бундан мустасно.

4. Товарлар Ўзбекистон Республикаси ҳудудига амалда олиб кирилган пайтдан бошлаб ушбу ҳудуддан ташқарига олиб чиқиб кетилгунга қадар божхона назорати остида бўлади.

5. Ваколатли шахс томонидан тамаки маҳсулотлари бўйича Ўзбекистон Республикасининг божхона ҳудудига олиб киришга мўлжалланган товарлар ва транспорт воситалари тўғрисидаги дастлабки электрон маълумотлар фақат транспорт воситаларининг инспекцион кўрик мажмуалари билан жиҳозланган чегара божхона постлари орқали тақдим этилади.

6. Товарларни Ўзбекистон Республикаси ҳудуди орқали транзит олиб ўтишга қўйиладиган талаблар ва шартлар Ўзбекистон Республикасининг божхона тўғрисидаги қонунчилик ҳужжатлари билан белгиланади.

2-боб. Божхона тўловлари суммасини божхона органларининг депозит ҳисобварағига ўтказиш

7. Тўловчи товарларнинг транзити учун божхона тўловлари суммаси Ўзбекистон Республикаси ҳудудига амалда олиб кирилгунга қадар миллий ёки эркин фойдаланиладиган валютада (АҚШ доллари) божхона органининг депозит ҳисобварағига ўтказилади.

Божхона органининг депозит ҳисобварағи тўғрисидаги маълумотлар Ўзбекистон Республикаси Иқтисодиёт ва молия вазирлиги ҳузуридаги Божхона қўмитасининг расмий веб-сайти ҳамда чегара ўтказиш пунктларига жойлаштирилади.

8. Божхона органининг депозит ҳисобварағига қўйиладиган пул таъминоти миқдори депозитга қўйилган куни амалда бўлган ва Ўзбекистон Республикаси қонунчилик ҳужжатларига асосан товарларни Ўзбекистон Республикаси божхона ҳудудида эркин муомалага чиқариш учун белгиланган божхона тўловлари ставкаларидан келиб чиққан ҳолда ҳисобланиши керак.

9. Тўловчи божхона органларига товарлар тўғрисидаги дастлабки электрон маълумотларни тақдим этишдан камида беш календарь кун олдин товарларнинг транзити учун божхона тўловлари суммасини божхона органининг депозит ҳисобварағига жойлаштириши мумкин, муқаддам божхона назоратидан ечилмаган божхона органининг депозит ҳисобварағида мавжуд бўлган маблағлар бундан мустасно.

10. Тўловчи божхона органларига товарлар тўғрисидаги дастлабки электрон маълумотларни тақдим этишда, тўланган божхона тўловлари суммасини қайтариш учун тўловчининг СТИРи ва банк реквизитлари кўрсатилиши шарт.

11. Ваколатли шахс дастлабки электрон маълумотларни тақдим этишда, божхона органларига божхона тўловлари суммаси божхона органларининг депозит ҳисобварағига ўтказилганлиги ҳақида маълумот беради. Божхона органлари ахборот тизими орқали божхона тўловлари суммаси божхона органларининг депозит ҳисобварағида мавжудлигини текширади.

12. Божхона органларининг депозит ҳисобварағига ўтказилган божхона тўловлари суммасини қуйидаги мақсадларда тасарруф этиш тақиқланади:

товарлар божхона назоратидан ечилгунга қадар тўловчи томонидан уларни тасарруф этиш;

божхона тўловлари суммасидан бошқа шахсларнинг товарлари таъминоти учун фойдаланиш;

божхона тўловлари суммасидан бир вақтнинг ўзида тўловчининг бошқа товарлари таъминоти учун фойдаланиш.

3-боб. Товарларнинг божхона назорати ва расмийлаштирувини бошлаш ҳамда якунлаш

13. Транзит мақсадида Ўзбекистон Республикаси ҳудудига олиб кирилаётган товарларнинг божхона расмийлаштируви божхона органларига дастлабки электрон маълумотлар тақдим этилиб, товарлар ортилган транспорт воситаси кириш божхона постига етиб келган вақтдан бошланади.

Бунда товар ва транспорт воситалари Ўзбекистон Республикаси божхона қонунчилигига мувофиқ божхона назорати ва расмийлаштирувидан ўтказилади.

Товарлар хавфни бошқариш тизими орқали божхона органларининг ахборот тизимида назоратдан ўтказилади.

14. Кириш божхона постида божхона органлари томонидан транспорт воситаси инспекцион кўрик мажмуасида тақдим этилган маълумотларга асосан божхона назоратидан ўтказилади, шунингдек, товарлар қабул қилувчи давлатнинг акциз маркаси билан маркаланганлиги текширилади, қонунчиликка мувофиқ акциз маркаси талаб этилмайдиган ҳолатлар бундан мустасно.

15. Товар ва транспорт воситаларига нисбатан божхона назорати ва расмийлаштируви якунланганидан сўнг товарлар божхона назорати остида чиқиш божхона постига йўналтирилади.

16. Белгиланган муддатларда товар ва транспорт воситалари чиқиш божхона постига етиб борганда, божхона органлари томонидан транспорт воситаси инспекцион кўрик мажмуасида божхона назоратидан ўтказилиб, кириш божхона постидаги тасвирлар билан ўзаро солиштирилади.

17. Чиқиш божхона постида товар ва транспорт воситаларига нисбатан божхона назорати ва расмийлаштируви якунланганидан сўнг товарлар божхона назоратидан ечилиб, Ўзбекистон Республикаси ҳудудидан олиб чиқишга рухсат берилади.

4-боб. Божхона тўловлари суммасини тўловчига қайтариш ҳамда унинг ҳисобини юритиш

18. Товарлар божхона назоратидан ечилгандан сўнг 5 иш куни ичида тўланган божхона тўловлари суммаси келиб тушган ҳисобварақ орқали тўловчига қайтарилади.

Тўловчининг ёки бошқа шахсларнинг мурожаатига асосан божхона тўловлари келиб тушган ҳисобварақдан бошқа шахсларнинг ҳисобварағига ўтказилишига йўл қўйилмайди, қонунчилик ҳужжатларига асосан суд ёки бошқа ваколатли органнинг мазкур маблағлар бўйича қабул қилган қарорлари асосида хатловга олиш ёки бошқа ҳисобварағига ўтказиш тўғрисидаги талаби бундан мустасно.

19. Тўловчи томонидан божхона органининг депозит ҳисобварағига ўтказилган божхона тўловларидан келгусида бошқа товарларга нисбатан фойдаланиш маълум қилинганда, маблағлар божхона органларининг депозитида сақланиши мумкин.

20. Маблағлар божхона органлари депозит ҳисобварағига келиб тушган санадан бошлаб 30 календарь кунда божхона органларига товарларни транзит олиб ўтиш бўйича мурожаат келиб тушмаса, маблағлар беш иш кунида тўловчига қайтарилади.

21. Товарлар транзити бўйича божхона органининг депозит ҳисобварағига тўланган божхона тўловларининг ҳисоби Ўзбекистон Республикаси Иқтисодиёт ва молия вазирлиги ҳузуридаги Божхона қўмитаси томонидан юритилади.

22. Товарлар чиқиш божхона постига белгиланган муддатларда етиб бормаган тақдирда, кечиктирилган ҳар бир кун учун белгиланган йиғимлар божхона органининг депозит ҳисобварағига қўйилган маблағлар ҳисобидан ундириб олинади.

23. Ўзбекистон Республикаси ҳудуди орқали товарларни транзит олиб ўтиш давомида авария ёки енгиб бўлмас куч таъсири натижасида товарлар истеъмолга яроқсиз ҳолга келиши ҳолатларини суғурталаш ҳуқуқига эга.

Божхона тўғрисидаги қонунчилик талабларининг бузилиши натижасида товарларни Ўзбекистон Республикаси ҳудудидан олиб чиқиш имконияти мавжуд бўлмаганда, суд ёки бошқа ваколатли органнинг қарорига асосан товарлар божхона назоратидан ечилиб, божхона органининг депозит ҳисобварағидаги маблағлар Республика бюджетига ўтказилади.

5-боб. Якунловчи қоида

24. Мазкур Низомнинг бузилишида айбдор бўлган шахслар қонунчилик ҳужжатларида белгиланган тартибда жавоб берадилар.

Ўзбекистон Республикасининг Бош вазири А. АРИПОВ

Тошкент ш.,

2024 йил 30 октябрь,

717-сон

(Қонунчилик маълумотлари миллий базаси, 31.10.2024 й., 09/24/717/0868-сон)

lex.uz

Oʻzbekiston Respublikasi Vazirlar Mahkamasining

qarori

NIZOM

Oʻzbekiston Respublikasi hududi orqali tamaki mahsulotlarini tranzit olib oʻtishda bojxona nazoratini amalga oshirish tartibi toʻgʻrisidagi nizomni tasdiqlash haqida

Oʻzbekiston Respublikasi Prezidentining “Alkogol va tamaki mahsulotlari bozorini tartibga solish hamda ularning noqonuniy aylanmasining oldini olish chora-tadbirlarini kuchaytirish toʻgʻrisida” 2024-yil 3-iyundagi PF-84-son Farmoni ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Prezidentining “Alkogol va tamaki mahsulotlari bozorini tartibga solish hamda ularning noqonuniy aylanmasining oldini olish chora-tadbirlarini kuchaytirish toʻgʻrisida” 2024-yil 3-iyundagi PF-84-son Farmoniga muvofiq 2024-yil 1-sentabrdan boshlab Oʻzbekiston Respublikasi hududi orqali tamaki mahsulotlarining tranziti uchun quyidagi talablar joriy etilganligi maʼlumot uchun qabul qilinsin:

tovar ishlab chiqarilgan mamlakat sertifikati, uni yetkazib berish shartnomasi (bitimi), tovarlar bir nechta qismga ajratilib, tranzit yoʻli bilan tashilgan taqdirda, ularni olib oʻtish jadvalining mavjudligi;

yuk olib oʻtuvchi tomonidan tegishli bojxona toʻlovlarining summasi Oʻzbekiston Respublikasi bojxona organlarining depozit hisobvaragʻiga oʻtkazilganligi. Bunda keyinchalik tovarlar respublika tashqarisiga olib chiqilganligi tasdiqlangandan soʻng toʻlangan summalar qaytarilishi;

tamaki tashuvchi transport vositalarining faqat inspeksion koʻrik majmualari bilan jihozlangan chegara bojxona postlari orqali oʻtkazilishi;

qabul qiluvchi davlatning aksiz markasi boʻlgan tamaki mahsulotlarini respublika hududidan tranzit olib oʻtishga ruxsat etilishi, aksiz markasi qoʻllanilmaydigan davlatlardan import qilish yoki ularga eksport qilish hamda qonunchilikka muvofiq aksiz markasi talab etilmaydigan holatlar bundan mustasno.

2. Oʻzbekiston Respublikasi hududi orqali tamaki mahsulotlarini tranzit olib oʻtishda bojxona nazoratini amalga oshirish tartibi toʻgʻrisidagi nizom ilovaga muvofiq tasdiqlansin.

3. Oʻzbekiston Respublikasi Iqtisodiyot va moliya vazirligi manfaatdor vazirliklar hamda idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — iqtisodiyot va moliya vaziri J.A. Qoʻchqorov zimmasiga yuklansin.

Vazirlar Mahkamasining 2024-yil 30-oktabrdagi 717-son qaroriga ILOVA

Oʻzbekiston Respublikasi hududi orqali tamaki mahsulotlarini tranzit olib oʻtishda bojxona nazoratini amalga oshirish tartibi toʻgʻrisida

1-bob. Umumiy qoidalar

1. Mazkur Nizom Oʻzbekiston Respublikasi hududi orqali tamaki mahsulotlarini avtomobil va temir yoʻl transportida, shu jumladan, multimodal tashishda tranzit olib oʻtish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

bojxona toʻlovlari — Oʻzbekiston Respublikasining bojxona qonunchiligiga muvofiq hisoblangan, tovarlarni Oʻzbekiston Respublikasining bojxona hududida erkin muomalaga chiqarish uchun toʻlanishi lozim boʻlgan import bojxona boji, aksiz soligʻi, qoʻshilgan qiymat soligʻi va bojxona yigʻimlari;

vakolatli shaxs — Oʻzbekiston Respublikasi hududi orqali tamaki mahsulotlarini tranzit olib oʻtishda bojxona organlariga qonunchilik hujjatlarida belgilangan maʼlumotlar va hujjatlarni taqdim etadigan yukni joʻnatuvchi, qabul qiluvchi, tashuvchi yoki ekspeditor hamda ular nomidan ish koʻruvchi boshqa shaxslar;

kirish bojxona posti — Oʻzbekiston Respublikasi hududi orqali tranzit olib oʻtiladigan tovarlar olib kiriladigan chegara bojxona posti;

tovarlar — Oʻzbekiston Respublikasi hududi orqali tranzit olib oʻtiladigan tamaki mahsulotlari;

toʻlovchi — tovarlarning tranziti uchun bojxona toʻlovlari summasini Oʻzbekiston Respublikasi bojxona organlarining depozit hisobvaragʻiga oʻtkazgan, oʻzining hisobvaragʻi, nomi, STIRi (JSHSHIRi) va boshqa rekvizit maʼlumotlariga ega boʻlgan har qanday yuridik yoki jismoniy shaxs;

tovarlar partiyasi — bitta joʻnatuvchi tomonidan bitta oluvchiga bitta transport vositasida yoki poyezdda (konvoyda) bitta joʻnatuvchi yuborgan tranzit yuk;

chiqish bojxona posti — Oʻzbekiston Respublikasi hududi orqali tranzit olib oʻtiladigan tovarlar olib chiqiladigan chegara bojxona posti.

3. Tamaki mahsulotlarini Oʻzbekiston Respublikasi hududi orqali tranzit olib oʻtishga ruxsat olish uchun vakolatli shaxs Oʻzbekiston Respublikasining bojxona hududiga olib kirishga moʻljallangan tovarlar va transport vositalari toʻgʻrisidagi dastlabki elektron maʼlumotlarni (keyingi oʻrinlarda — dastlabki elektron maʼlumotlar) taqdim etishda belgilangan maʼlumotlar bilan birga quyidagilar koʻrsatilgan holda murojaat qiladi:

tovar ishlab chiqarilgan mamlakat sertifikati va uning elektron nusxasi;

yetkazib berish shartnomasining (bitimining) elektron nusxasi;

tovarlar bir nechta qismga ajratilib, tranzit yoʻli bilan tashilgan taqdirda, ularni olib oʻtish jadvalining elektron nusxasi;

tovarlar tranziti boʻyicha bojxona toʻlovlari summasi bojxona organlarining depozit hisobvaragʻiga oʻtkazilganligini tasdiqlovchi maʼlumotlar;

tovarlarning qabul qiluvchi davlatning aksiz markasi bilan markalanganligi toʻgʻrisidagi maʼlumotlar, qonunchilikka muvofiq aksiz markasi talab etilmaydigan holatlar bundan mustasno.

4. Tovarlar Oʻzbekiston Respublikasi hududiga amalda olib kirilgan paytdan boshlab ushbu hududdan tashqariga olib chiqib ketilgunga qadar bojxona nazorati ostida boʻladi.

5. Vakolatli shaxs tomonidan tamaki mahsulotlari boʻyicha Oʻzbekiston Respublikasining bojxona hududiga olib kirishga moʻljallangan tovarlar va transport vositalari toʻgʻrisidagi dastlabki elektron maʼlumotlar faqat transport vositalarining inspeksion koʻrik majmualari bilan jihozlangan chegara bojxona postlari orqali taqdim etiladi.

6. Tovarlarni Oʻzbekiston Respublikasi hududi orqali tranzit olib oʻtishga qoʻyiladigan talablar va shartlar Oʻzbekiston Respublikasining bojxona toʻgʻrisidagi qonunchilik hujjatlari bilan belgilanadi.

2-bob. Bojxona toʻlovlari summasini bojxona organlarining depozit hisobvaragʻiga oʻtkazish

7. Toʻlovchi tovarlarning tranziti uchun bojxona toʻlovlari summasi Oʻzbekiston Respublikasi hududiga amalda olib kirilgunga qadar milliy yoki erkin foydalaniladigan valyutada (AQSH dollari) bojxona organining depozit hisobvaragʻiga oʻtkaziladi.

Bojxona organining depozit hisobvaragʻi toʻgʻrisidagi maʼlumotlar Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasining rasmiy veb-sayti hamda chegara oʻtkazish punktlariga joylashtiriladi.

8. Bojxona organining depozit hisobvaragʻiga qoʻyiladigan pul taʼminoti miqdori depozitga qoʻyilgan kuni amalda boʻlgan va Oʻzbekiston Respublikasi qonunchilik hujjatlariga asosan tovarlarni Oʻzbekiston Respublikasi bojxona hududida erkin muomalaga chiqarish uchun belgilangan bojxona toʻlovlari stavkalaridan kelib chiqqan holda hisoblanishi kerak.

9. Toʻlovchi bojxona organlariga tovarlar toʻgʻrisidagi dastlabki elektron maʼlumotlarni taqdim etishdan kamida besh kalendar kun oldin tovarlarning tranziti uchun bojxona toʻlovlari summasini bojxona organining depozit hisobvaragʻiga joylashtirishi mumkin, muqaddam bojxona nazoratidan yechilmagan bojxona organining depozit hisobvaragʻida mavjud boʻlgan mablagʻlar bundan mustasno.

10. Toʻlovchi bojxona organlariga tovarlar toʻgʻrisidagi dastlabki elektron maʼlumotlarni taqdim etishda, toʻlangan bojxona toʻlovlari summasini qaytarish uchun toʻlovchining STIRi va bank rekvizitlari koʻrsatilishi shart.

11. Vakolatli shaxs dastlabki elektron maʼlumotlarni taqdim etishda, bojxona organlariga bojxona toʻlovlari summasi bojxona organlarining depozit hisobvaragʻiga oʻtkazilganligi haqida maʼlumot beradi. Bojxona organlari axborot tizimi orqali bojxona toʻlovlari summasi bojxona organlarining depozit hisobvaragʻida mavjudligini tekshiradi.

12. Bojxona organlarining depozit hisobvaragʻiga oʻtkazilgan bojxona toʻlovlari summasini quyidagi maqsadlarda tasarruf etish taqiqlanadi:

tovarlar bojxona nazoratidan yechilgunga qadar toʻlovchi tomonidan ularni tasarruf etish;

bojxona toʻlovlari summasidan boshqa shaxslarning tovarlari taʼminoti uchun foydalanish;

bojxona toʻlovlari summasidan bir vaqtning oʻzida toʻlovchining boshqa tovarlari taʼminoti uchun foydalanish.

3-bob. Tovarlarning bojxona nazorati va rasmiylashtiruvini boshlash hamda yakunlash

13. Tranzit maqsadida Oʻzbekiston Respublikasi hududiga olib kirilayotgan tovarlarning bojxona rasmiylashtiruvi bojxona organlariga dastlabki elektron maʼlumotlar taqdim etilib, tovarlar ortilgan transport vositasi kirish bojxona postiga yetib kelgan vaqtdan boshlanadi.

Bunda tovar va transport vositalari Oʻzbekiston Respublikasi bojxona qonunchiligiga muvofiq bojxona nazorati va rasmiylashtiruvidan oʻtkaziladi.

Tovarlar xavfni boshqarish tizimi orqali bojxona organlarining axborot tizimida nazoratdan oʻtkaziladi.

14. Kirish bojxona postida bojxona organlari tomonidan transport vositasi inspeksion koʻrik majmuasida taqdim etilgan maʼlumotlarga asosan bojxona nazoratidan oʻtkaziladi, shuningdek, tovarlar qabul qiluvchi davlatning aksiz markasi bilan markalanganligi tekshiriladi, qonunchilikka muvofiq aksiz markasi talab etilmaydigan holatlar bundan mustasno.

15. Tovar va transport vositalariga nisbatan bojxona nazorati va rasmiylashtiruvi yakunlanganidan soʻng tovarlar bojxona nazorati ostida chiqish bojxona postiga yoʻnaltiriladi.

16. Belgilangan muddatlarda tovar va transport vositalari chiqish bojxona postiga yetib borganda, bojxona organlari tomonidan transport vositasi inspeksion koʻrik majmuasida bojxona nazoratidan oʻtkazilib, kirish bojxona postidagi tasvirlar bilan oʻzaro solishtiriladi.

17. Chiqish bojxona postida tovar va transport vositalariga nisbatan bojxona nazorati va rasmiylashtiruvi yakunlanganidan soʻng tovarlar bojxona nazoratidan yechilib, Oʻzbekiston Respublikasi hududidan olib chiqishga ruxsat beriladi.

4-bob. Bojxona toʻlovlari summasini toʻlovchiga qaytarish hamda uning hisobini yuritish

18. Tovarlar bojxona nazoratidan yechilgandan soʻng 5 ish kuni ichida toʻlangan bojxona toʻlovlari summasi kelib tushgan hisobvaraq orqali toʻlovchiga qaytariladi.

Toʻlovchining yoki boshqa shaxslarning murojaatiga asosan bojxona toʻlovlari kelib tushgan hisobvaraqdan boshqa shaxslarning hisobvaragʻiga oʻtkazilishiga yoʻl qoʻyilmaydi, qonunchilik hujjatlariga asosan sud yoki boshqa vakolatli organning mazkur mablagʻlar boʻyicha qabul qilgan qarorlari asosida xatlovga olish yoki boshqa hisobvaragʻiga oʻtkazish toʻgʻrisidagi talabi bundan mustasno.

19. Toʻlovchi tomonidan bojxona organining depozit hisobvaragʻiga oʻtkazilgan bojxona toʻlovlaridan kelgusida boshqa tovarlarga nisbatan foydalanish maʼlum qilinganda, mablagʻlar bojxona organlarining depozitida saqlanishi mumkin.

20. Mablagʻlar bojxona organlari depozit hisobvaragʻiga kelib tushgan sanadan boshlab 30 kalendar kunda bojxona organlariga tovarlarni tranzit olib oʻtish boʻyicha murojaat kelib tushmasa, mablagʻlar besh ish kunida toʻlovchiga qaytariladi.

21. Tovarlar tranziti boʻyicha bojxona organining depozit hisobvaragʻiga toʻlangan bojxona toʻlovlarining hisobi Oʻzbekiston Respublikasi Iqtisodiyot va moliya vazirligi huzuridagi Bojxona qoʻmitasi tomonidan yuritiladi.

22. Tovarlar chiqish bojxona postiga belgilangan muddatlarda yetib bormagan taqdirda, kechiktirilgan har bir kun uchun belgilangan yigʻimlar bojxona organining depozit hisobvaragʻiga qoʻyilgan mablagʻlar hisobidan undirib olinadi.

23. Oʻzbekiston Respublikasi hududi orqali tovarlarni tranzit olib oʻtish davomida avariya yoki yengib boʻlmas kuch taʼsiri natijasida tovarlar isteʼmolga yaroqsiz holga kelishi holatlarini sugʻurtalash huquqiga ega.

Bojxona toʻgʻrisidagi qonunchilik talablarining buzilishi natijasida tovarlarni Oʻzbekiston Respublikasi hududidan olib chiqish imkoniyati mavjud boʻlmaganda, sud yoki boshqa vakolatli organning qaroriga asosan tovarlar bojxona nazoratidan yechilib, bojxona organining depozit hisobvaragʻidagi mablagʻlar Respublika budjetiga oʻtkaziladi.

5-bob. Yakunlovchi qoida

24. Mazkur Nizomning buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Oʻzbekiston Respublikasining Bosh vaziri A. ARIPOV

Toshkent sh.,

2024-yil 30-oktabr,

717-son

(Qonunchilik maʼlumotlari milliy bazasi, 31.10.2024-y., 09/24/717/0868-son)

lex.uz