📅 2024-yil 30-noyabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 30 ноябрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 30 ноября 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 30 November 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Йўл ҳаракати қоидаларига пиёдалар хавфсизлигини таъминлашга қаратилган ўзгартириш ва қўшимчалар киритиш тўғрисида
Республикамизда йўл ҳаракати хавфсизлигини таъминлаш, йўл-транспорт ҳодисаларининг, жумладан, пиёдалар ва болалар иштирокидаги бахтсиз ҳодисаларнинг олдини олиш бўйича тизимли чоралар кўрилмоқда.
Шу билан бирга, йўл инфратузилмасида етарли шароитлар яратилмаганлиги натижасида йўл қатнов қисмида пиёдаларнинг ҳаракатланиши йўл ҳаракати хавфсизлигига салбий таъсир кўрсатмоқда.
Пиёдалар учун қулай шарт-шароитлар яратиш, улар иштирокидаги йўл-транспорт ҳодисаларининг олдини олиш, пиёдалар ҳаракатининг устуворлигини ҳамда йўлларда ҳаракат хавфсизлигини таъминлаш мақсадида Вазирлар Маҳкамаси қарор қилади:
1. Вазирлар Маҳкамасининг 2022 йил 12 апрелдаги 172-сон қарори билан тасдиқланган Йўл ҳаракати қоидаларига иловага мувофиқ «Баланд пиёдалар ўтиш жойлари» йўл белгисини ҳамда йўл ётиқ чизиқларини жорий қилишга қаратилган ўзгартириш ва қўшимчалар киритилсин.
2. Белгилансинки, «Баланд пиёдалар ўтиш жойлари» йўл белгиси ҳамда йўл ётиқ чизиқлари шаҳарлар ва бошқа аҳоли пунктларининг кўчаларида, давлат ва маҳаллий аҳамиятга молик автомобиль йўлларининг ёритилган ҳамда юқори тезлик соатига 30 километргача чеклов жорий қилинган участкаларида, турар жой даҳаларидаги кўриниш чекланган чорраҳаларда, болалар майдончалари ҳамда таълим ташкилотлари олдидаги йўл участкаларида, оммавий дам олиш жойлари, стадионлар, вокзаллар, савдо марказлари ва бошқа одам кўп тўланадиган жойларда, кўчаларнинг 1.21. «Болалар» йўл белгиси таъсиридаги қисмларига ўрнатилади.
3. Ўзбекистон Республикаси Ички ишлар вазирлиги Транспорт вазирлиги ва маҳаллий ижро этувчи ҳокимият органлари билан биргаликда икки ой муддатда таҳлиллар асосида 2025-2026 йилларда «Баланд пиёдалар ўтиш жойлари» йўл белгиси ҳамда йўл ётиқ чизиқларини ўрнатиш зарур бўлган жойлар рўйхатини тасдиқласин.
4. Белгилансинки, «Баланд пиёдалар ўтиш жойлари» йўл белгиси ҳамда йўл ётиқ чизиқлари шаҳарлар, вилоятлар, туманлар марказларидаги кўчаларда Ўзбекистон Республикаси Ички ишлар вазирлиги Жамоат хавфсизлиги департаменти Йўл ҳаракати хавфсизлиги хизматининг «Хавфсиз йўл ва хавфсиз пиёда» республика жамғармаси ҳамда давлат ва маҳаллий аҳамиятдаги автомобиль йўллари, шунингдек, бошқа аҳоли пунктларидаги кўчаларда Ўзбекистон Республикаси Транспорт вазирлиги ҳузуридаги Автомобиль йўллари қўмитаси фаолиятини ривожлантириш ва қўллаб-қувватлаш жамғармаси маблағлари ҳисобидан ўрнатилади.
5. Ўзбекистон техник жиҳатдан тартибга солиш агентлиги, Ўзбекистон Республикаси Ички ишлар вазирлиги ва Транспорт вазирлиги билан биргаликда икки ой муддатда Oʻz DSt 3403:2022 «Сунъий нотекисликлар. Умумий техник талаблар», Oʻz DSt 3283:2022 «Йўл белгилари умумий техник талаблар» Ўзбекистон Республикасининг давлат стандартларига ушбу қарорга мувофиқ жорий этилаётган «Баланд пиёдалар ўтиш жойлари» йўл белгиси ҳамда йўл ётиқ чизиқлари ўрнатиладиган жойларнинг техник кўрсаткичларини назарда тутувчи ўзгартириш ва қўшимчалар киритсин.
6. Мазкур қарорнинг бажарилишини назорат қилиш Ўзбекистон Республикаси ички ишлар вазири П.Р. Бобожонов ва транспорт вазири И.Р. Маҳкамов зиммасига юклансин.
Вазирлар Маҳкамасининг 2024 йил 30 ноябрдаги 805-сон қарорига ИЛОВА
Вазирлар Маҳкамасининг 2022 йил 12 апрелдаги 172-сон қарори билан тасдиқланган Йўл ҳаракати қоидаларига киритилаётган ўзгартириш ва қўшимчалар
1. 183-банд қуйидаги мазмундаги ўн бешинчи хатбоши билан тўлдирилсин:
«Баланд пиёдалар ўтиш жойларини ташкил этиш.».
2. 1-иловада :
а) Огоҳлантирувчи белгиларда 1.20-банд қуйидаги таҳрирда баён этилсин:
«1.20. «Пиёдалар ўтиш жойи». 5.16.1, 5.16.2, 5.48 белгилари ва (ёки) 1.14.1 — 1.14.4, 1.29.1 — 1.29.3 йўл чизиқлари билан белгиланган пиёдалар ўтиш жойини билдиради.»;
б) Ахборот-кўрсатгич белгиларда :
5.18-банд қуйидаги таҳрирда баён этилсин:
«5.18. «Тавсия этилган тезлик». Йўлнинг шу қисмида тавсия этилган ҳаракатланиш тезлигини билдиради. Белгига энг яқин чорраҳагача амал қилинади. 5.18 белгиси огоҳлантирувчи белги билан бирга қўлланса, унинг таъсир оралиғи хавфли қисмнинг узунлиги билан аниқланади. 5.48 йўл белгиси ўрнатилган кўча ва йўлларда ўрнатилиши лозимлигини билдиради»;
қуйидаги мазмундаги 5.48-банд билан тўлдирилсин:
«5.48. «Баланд пиёдалар ўтиш жойи». 5.16.1-5.16.2 йўл белгилари билан бирга қўлланилади»;
в) Йўл белгиларининг тасвирлари туширилган қисмида:
«Ахборот-ишора белгилари» сўзлари «Ахборот-кўрсатгич белгилари» сўзлари билан алмаштирилсин;
қуйидаги тасвирдаги йўл белгиси билан тўлдирилсин:
«
5.48. «Баланд пиёдалар ўтиш жойи».
3. 2-иловада :
Ётиқ чизиқлар қуйидаги мазмундаги 1.29.1, 1.29.2 ва 1.29.3-бандлар билан тўлдирилсин:
1.29.1-сунъий нотекислик (баланд пиёдалар ўтиш жойини билдиради);
1.29.2-сунъий нотекислик (автомобиль йўлларида « 3D » кўринишдаги баланд пиёдалар ўтиш жойини билдиради);
1.29.3-автомобиль йўлларида «3D» кўринишдаги пиёдалар ўтиш жойи».
Ўзбекистон Республикасининг Бош вазири А. АРИПОВ
Тошкент ш.,
2024 йил 30 ноябрь,
805-сон
Oʻzbekiston Respublikasi Vazirlar Mahkamasining
qarori
Yoʻl harakati qoidalariga piyodalar xavfsizligini taʼminlashga qaratilgan oʻzgartirish va qoʻshimchalar kiritish toʻgʻrisida
Respublikamizda yoʻl harakati xavfsizligini taʼminlash, yoʻl-transport hodisalarining, jumladan, piyodalar va bolalar ishtirokidagi baxtsiz hodisalarning oldini olish boʻyicha tizimli choralar koʻrilmoqda.
Shu bilan birga, yoʻl infratuzilmasida yetarli sharoitlar yaratilmaganligi natijasida yoʻl qatnov qismida piyodalarning harakatlanishi yoʻl harakati xavfsizligiga salbiy taʼsir koʻrsatmoqda.
Piyodalar uchun qulay shart-sharoitlar yaratish, ular ishtirokidagi yoʻl-transport hodisalarining oldini olish, piyodalar harakatining ustuvorligini hamda yoʻllarda harakat xavfsizligini taʼminlash maqsadida Vazirlar Mahkamasi qaror qiladi:
1. Vazirlar Mahkamasining 2022-yil 12-apreldagi 172-son qarori bilan tasdiqlangan Yoʻl harakati qoidalariga ilovaga muvofiq “Baland piyodalar oʻtish joylari” yoʻl belgisini hamda yoʻl yotiq chiziqlarini joriy qilishga qaratilgan oʻzgartirish va qoʻshimchalar kiritilsin.
2. Belgilansinki, “Baland piyodalar oʻtish joylari” yoʻl belgisi hamda yoʻl yotiq chiziqlari shaharlar va boshqa aholi punktlarining koʻchalarida, davlat va mahalliy ahamiyatga molik avtomobil yoʻllarining yoritilgan hamda yuqori tezlik soatiga 30 kilometrgacha cheklov joriy qilingan uchastkalarida, turar joy dahalaridagi koʻrinish cheklangan chorrahalarda, bolalar maydonchalari hamda taʼlim tashkilotlari oldidagi yoʻl uchastkalarida, ommaviy dam olish joylari, stadionlar, vokzallar, savdo markazlari va boshqa odam koʻp toʻlanadigan joylarda, koʻchalarning 1.21. “Bolalar” yoʻl belgisi taʼsiridagi qismlariga oʻrnatiladi.
3. Oʻzbekiston Respublikasi Ichki ishlar vazirligi Transport vazirligi va mahalliy ijro etuvchi hokimiyat organlari bilan birgalikda ikki oy muddatda tahlillar asosida 2025-2026-yillarda “Baland piyodalar oʻtish joylari” yoʻl belgisi hamda yoʻl yotiq chiziqlarini oʻrnatish zarur boʻlgan joylar roʻyxatini tasdiqlasin.
4. Belgilansinki, “Baland piyodalar oʻtish joylari” yoʻl belgisi hamda yoʻl yotiq chiziqlari shaharlar, viloyatlar, tumanlar markazlaridagi koʻchalarda Oʻzbekiston Respublikasi Ichki ishlar vazirligi Jamoat xavfsizligi departamenti Yoʻl harakati xavfsizligi xizmatining “Xavfsiz yoʻl va xavfsiz piyoda” respublika jamgʻarmasi hamda davlat va mahalliy ahamiyatdagi avtomobil yoʻllari, shuningdek, boshqa aholi punktlaridagi koʻchalarda Oʻzbekiston Respublikasi Transport vazirligi huzuridagi Avtomobil yoʻllari qoʻmitasi faoliyatini rivojlantirish va qoʻllab-quvvatlash jamgʻarmasi mablagʻlari hisobidan oʻrnatiladi.
5. Oʻzbekiston texnik jihatdan tartibga solish agentligi, Oʻzbekiston Respublikasi Ichki ishlar vazirligi va Transport vazirligi bilan birgalikda ikki oy muddatda Oʻz DSt 3403:2022 “Sunʼiy notekisliklar. Umumiy texnik talablar”, Oʻz DSt 3283:2022 “Yoʻl belgilari umumiy texnik talablar” Oʻzbekiston Respublikasining davlat standartlariga ushbu qarorga muvofiq joriy etilayotgan “Baland piyodalar oʻtish joylari” yoʻl belgisi hamda yoʻl yotiq chiziqlari oʻrnatiladigan joylarning texnik koʻrsatkichlarini nazarda tutuvchi oʻzgartirish va qoʻshimchalar kiritsin.
6. Mazkur qarorning bajarilishini nazorat qilish Oʻzbekiston Respublikasi ichki ishlar vaziri P.R. Bobojonov va transport vaziri I.R. Mahkamov zimmasiga yuklansin.
Vazirlar Mahkamasining 2024-yil 30-noyabrdagi 805-son qaroriga ILOVA
Vazirlar Mahkamasining 2022-yil 12-apreldagi 172-son qarori bilan tasdiqlangan Yoʻl harakati qoidalariga kiritilayotgan oʻzgartirish va qoʻshimchalar
1. 183-band quyidagi mazmundagi oʻn beshinchi xatboshi bilan toʻldirilsin:
“Baland piyodalar oʻtish joylarini tashkil etish.”.
2. 1-ilovada :
a) Ogohlantiruvchi belgilarda 1.20-band quyidagi tahrirda bayon etilsin:
“1.20. “Piyodalar oʻtish joyi”. 5.16.1, 5.16.2, 5.48 belgilari va (yoki) 1.14.1 — 1.14.4, 1.29.1 — 1.29.3 yoʻl chiziqlari bilan belgilangan piyodalar oʻtish joyini bildiradi.”;
b) Axborot-koʻrsatgich belgilarda :
5.18-band quyidagi tahrirda bayon etilsin:
“5.18. “Tavsiya etilgan tezlik”. Yoʻlning shu qismida tavsiya etilgan harakatlanish tezligini bildiradi. Belgiga eng yaqin chorrahagacha amal qilinadi. 5.18 belgisi ogohlantiruvchi belgi bilan birga qoʻllansa, uning taʼsir oraligʻi xavfli qismning uzunligi bilan aniqlanadi. 5.48 yoʻl belgisi oʻrnatilgan koʻcha va yoʻllarda oʻrnatilishi lozimligini bildiradi”;
quyidagi mazmundagi 5.48-band bilan toʻldirilsin:
“5.48. “Baland piyodalar oʻtish joyi”. 5.16.1-5.16.2 yoʻl belgilari bilan birga qoʻllaniladi”;
v) Yoʻl belgilarining tasvirlari tushirilgan qismida:
“Axborot-ishora belgilari” soʻzlari “Axborot-koʻrsatgich belgilari” soʻzlari bilan almashtirilsin;
quyidagi tasvirdagi yoʻl belgisi bilan toʻldirilsin:
“
5.48. “Baland piyodalar oʻtish joyi”.
3. 2-ilovada :
Yotiq chiziqlar quyidagi mazmundagi 1.29.1, 1.29.2 va 1.29.3-bandlar bilan toʻldirilsin:
1.29.1-sunʼiy notekislik (baland piyodalar oʻtish joyini bildiradi);
1.29.2-sunʼiy notekislik (avtomobil yoʻllarida “ 3D ” koʻrinishdagi baland piyodalar oʻtish joyini bildiradi);
1.29.3-avtomobil yoʻllarida “3D” koʻrinishdagi piyodalar oʻtish joyi”.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 30-noyabr,
805-son