📅 2024-yil 5-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 5 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 5 декабря 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 5 December 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
НИЗОМ
Уй қамоғи эҳтиёт чораси қўлланилган ва озодликни чеклаш жазоси тайинланган шахсларни электрон браслет орқали масофадан туриб назорат қилиш тартиби тўғрисидаги низомни тасдиқлаш ҳақида
Сўнгги йилларда ички ишлар органлари тизимида жиноятчиликка қарши курашиш ва жамоат хавфсизлигини таъминлашда замонавий ахборот технологиялари имкониятларидан кенг фойдаланган ҳолда ижобий натижаларга эришилмоқда.
Шу билан бирга, жамоат хавфсизлигини таъминлаш борасида жавобгарлик муқаррарлигини таъминлаш, қайта жиноят содир этилишининг олдини олиш, жазо ижроси устидан самарали назорат механизмини ўрнатиш учун янги технологияларни қўллаш талаб этилмоқда.
Уй қамоғи эҳтиёт чораси ва озодликни чеклаш жазоси қўлланилган шахсларни масофадан туриб назорат қилиш амалиётини йўлга қўйиш орқали жавобгарликнинг муқаррарлигини таъминлаш ва жазо ижроси устидан самарали назоратни ўрнатиш зарурати юзага келмоқда.
Ўзбекистон Республикасининг «Пробация тўғрисида»ги Қонуни , Ўзбекистон Республикаси Президентининг « Жамоат хавфсизлигини таъминлаш ва жиноятчиликка қарши курашиш соҳасида ички ишлар органлари фаолиятини сифат жиҳатидан янги босқичга кўтариш чора-тадбирлари тўғрисида » 2021 йил 26 мартдаги ПФ-6196-сон ҳамда « Ўзбекистон Республикаси жамоат хавфсизлиги концепциясини тасдиқлаш ва уни амалга ошириш чора-тадбирлари тўғрисида » 2021 йил 29 ноябрдаги ПФ-27-сон фармонлари ижросини таъминлаш, шунингдек, уй қамоғи эҳтиёт чораси ва озодликни чеклаш жазоси қўлланилган шахсларни масофадан туриб назорат қилиш тартибини жорий этиш мақсадида Вазирлар Маҳкамаси қарор қилади:
1. Қуйидагилар:
Ўзбекистон Республикаси Президентининг 2021 йил 26 мартдаги ПФ-6196-сон Фармони билан тасдиқланган Ички ишлар органлари тизимини янада такомиллаштириш бўйича «йўл харитаси»нинг 22-бандига мувофиқ, Ички ишлар вазирлиги Жамоат хавфсизлиги департаменти Пробация бошқармаси тузилмасида ягона электрон мониторинг маркази ташкил этилиб, масофадан туриб назорат қилиш учун замонавий техник воситалар ва сервер қурилмалари билан жиҳозланганлиги, ахборот технологиялари бўйича олий маълумотли кадрлар билан жамланганлиги;
Ўзбекистон Республикаси Криминология тадқиқот институтида илмий-тадқиқот ишларига давлат буюртмаси асосида амалий илмий-тадқиқот лойиҳаси амалга оширилганлиги, лойиҳа натижасида электрон браслет яратилганлиги, унинг дастурий таъминоти ишлаб чиқилганлиги ҳамда республиканинг 14 та ҳудудида (ички ишлар органлари жамоат тартибини сақлаш, ҳуқуқбузарликлар профилактикаси, пробация хизматларида) синовдан ўтказилиб, амалиётга жорий этишга тайёр ҳолатга келтирилганлиги маълумот учун қабул қилинсин.
2. Қуйидагиларни назарда тутувчи Уй қамоғи эҳтиёт чораси қўлланилган ва озодликни чеклаш жазоси тайинланган шахсларни электрон браслет орқали масофадан туриб назорат қилиш тартиби тўғрисидаги низом иловага мувофиқ тасдиқлансин:
уй қамоғи эҳтиёт чораси қўлланилган ва озодликни чеклаш жазоси тайинланган шахсларнинг эҳтиёт чораси ва жазони ижро этиш жойида бўлишини электрон браслет орқали масофадан туриб назорат қилиш;
электрон браслет тақилиши белгиланган шахсларнинг ҳуқуқлари ва мажбуриятлари;
электрон браслет орқали масофадан туриб назорат қилиш тартибини бузиш учун жавобгарлик;
электрон браслетга шикаст етказилганда ёки йўқотилганда моддий зарарни ундириш тартиблари.
3. 2025 йил 1 январдан бошлаб уй қамоғи эҳтиёт чораси қўлланилган ҳамда озодликни чеклаш жазоси тайинланган шахсларнинг эҳтиёт чораси ва жазони ижро этиш жойида бўлишини реал вақт режимида масофадан туриб назорат қилиш тартиби амалиётга босқичма-босқич жорий этилсин.
4. Ўзбекистон Республикаси Ички ишлар вазирлиги манфаатдор вазирлик ва идоралар билан биргаликда уч ой муддатда ўзлари қабул қилган норматив-ҳуқуқий ҳужжатларни ушбу қарорга мувофиқлаштирсин.
5. Мазкур қарорнинг бажарилишини назорат қилиш Ўзбекистон Республикаси ички ишлар вазири П.Р. Бобожонов зиммасига юклансин.
Вазирлар Маҳкамасининг 2024 йил 5 декабрдаги 813-сон қарорига ИЛОВА
Уй қамоғи эҳтиёт чораси қўлланилган ва озодликни чеклаш жазоси тайинланган шахсларни электрон браслет орқали масофадан туриб назорат қилиш тартиби тўғрисида
1-боб. Умумий қоидалар
1. Мазкур Низом уй қамоғи эҳтиёт чораси қўлланилган ва озодликни чеклаш жазоси тайинланган шахсларнинг эҳтиёт чораси ва жазони ижро этиш жойида бўлишини электрон браслет орқали масофадан туриб назорат қилиш тартибини белгилайди.
Уй қамоғи эҳтиёт чораси қўлланилган ва озодликни чеклаш жазоси тайинланган шахсларнинг эҳтиёт чораси ва жазони ижро этиш жойида бўлишини электрон браслет орқали масофадан туриб назорат қилиш қонунчилик ҳужжатларига мувофиқ ички ишлар органлари томонидан амалга оширилади.
2. Ушбу Низомда қуйидаги асосий тушунчалардан фойдаланилади:
ижрочи ходимлар — туман (шаҳар) ички ишлар органи жамоат хавфсизлиги хизмати пробация бўлинмаси ходимлари, ҳуқуқбузарликлар профилактикаси бўлинмаси хотин-қизлар масалалари бўйича катта инспектори ва маҳалла ҳуқуқ-тартибот маскани (таянч пункти) профилактика инспекторлари;
хизмат кўрсатувчи ташкилот — электрон браслет ва унинг дастурий таъминоти шаклидаги илмий фаолият натижаларини қонунчиликда белгиланган тартибда тижоратлаштирган юридик шахс;
электрон браслет — уй қамоғи эҳтиёт чораси қўлланилган ва озодликни чеклаш жазоси тайинланган шахснинг ҳаракатланишини реал вақт режимида автоматик тарзда хабар юбориш орқали масофадан туриб назорат қилишга мўлжалланган, оёққа ёки қўлга тақиладиган электрон қурилма;
ягона электрон мониторинг маркази — Ўзбекистон Республикаси Ички ишлар вазирлиги Жамоат хавфсизлиги департаменти Пробация бошқармасининг ягона электрон мониторинг маркази;
«Elektron braslet» ахборот тизими — Ўзбекистон Республикаси Ички ишлар вазирлиги Жамоат хавфсизлиги департаменти Пробация бошқармасининг мустақил ахборот тизими.
2-боб. Электрон браслетни қўллашда риоя қилинадиган талаблар
3. Электрон браслет уй қамоғи эҳтиёт чораси қўлланилган ёки озодликни чеклаш жазоси тайинланган шахс оёғининг болдир қисмига тақилади. Шахс оёғининг болдир қисмига электрон браслетни тақиш имконияти мавжуд бўлмаган ҳолларда (суяк синиши, бошқа жароҳатлар билан тиббий муолажа кўрсатилган ва бошқалар) қўл қисмига тақилишига рухсат этилади.
4. Аёл жинсидаги шахсга электрон браслет у билан бир жинсдаги ходим (ички ишлар органи жамоат хавфсизлиги хизмати ҳуқуқбузарликлар профилактикаси бўлинмаси хотин-қизлар масалалари бўйича катта инспектори) томонидан тақилади ҳамда ечиб олинади.
5. Уй қамоғи эҳтиёт чораси қўлланилган ёки озодликни чеклаш жазоси тайинланган шахсга носоз ёки электр қуввати тўлиқ бўлмаган электрон браслетни тақишга йўл қўйилмайди.
6. Уй қамоғи эҳтиёт чораси қўлланилган ёки озодликни чеклаш жазоси тайинланган қуйидаги шахсларга электрон браслет қўллаш мумкин эмас:
ўн саккиз ёшга тўлмаган шахслар;
ҳомиладор аёллар;
уч ёшга тўлмаган болалари бор аёллар;
биринчи ёки иккинчи гуруҳ ногиронлиги бўлган шахслар;
тиббий кўрсатмага кўра электрон браслетни тақиш тавсия этилмайдиган шахслар (имплант қилинган кардиостимулятор ўрнатилган шахслар, юқумли тери касаллиги (аллерго контакт дерматит, тери замбуруғи ёки қичима касаллиги) бўлган шахслар).
3-боб. Уй қамоғи эҳтиёт чораси қўлланилган ва озодликни чеклаш жазоси тайинланган шахсларни электрон браслет орқали масофадан туриб назорат қилиш тартиби
7. Суднинг уй қамоғи тарзидаги эҳтиёт чорасини қўллаш тўғрисидаги ажрими нусхаси «Электрон жиноий-ҳуқуқий статистика» ахборот тизими орқали «Elektron braslet» ахборот тизимига юборилади.
Суднинг ажрими нусхаси келиб тушган вақтдан бошлаб бир иш куни ичида туман (шаҳар) ички ишлар органи бошлиғининг ёзма топшириғи асосида «Elektron braslet» ахборот тизимида ижрочи ходимлар белгиланади.
8. Озодликни чеклаш тарзидаги жазони ўташ тартиби талабларини бажармаётган ёки жазони ўташ даврида жамоат тартибини бузиш билан боғлиқ ҳуқуқбузарликлар учун маъмурий жавобгарликка тортилган пробация назоратидаги шахсга нисбатан туман (шаҳар) ички ишлар органи пробация бўлинмаси бошлиғининг қарори асосида электрон браслет қўлланилади.
9. Туман (шаҳар) ички ишлар органи пробация бўлинмаси бошлиғининг озодликни чеклаш жазоси тайинланган шахсни электрон браслет орқали масофадан туриб назорат қилиш тўғрисидаги қарори «Elektron braslet» ахборот тизимида расмийлаштирилади.
Қарор расмийлаштирилган вақтдан бошлаб бир иш куни ичида «Elektron braslet» ахборот тизимида ижрочи ходимлар белгиланади.
10. Уй қамоғи эҳтиёт чораси қўлланилган ёки озодликни чеклаш жазоси тайинланган шахснинг фамилияси, исми, отасининг исми, жинси, туғилган йили, жисмоний шахснинг шахсий идентификация рақами (ЖШШИР), электрон браслет тақилган вақт, электрон браслетнинг индивидуал рақами, ижрочи ходимларнинг фамилияси, исми, отасининг исми ва телефон рақами «Elektron braslet» ахборот тизимида қайд этилади.
11. Уй қамоғи эҳтиёт чораси қўлланилган ёки озодликни чеклаш жазоси тайинланган шахсга ижрочи ходимлар томонидан ушбу Низомда белгиланган ҳуқуқлари ва мажбуриятлари тушунтирилади ҳамда бу ҳақида ундан тилхат олинади.
12. Ягона электрон мониторинг маркази:
уй қамоғи эҳтиёт чораси қўлланилган ёки озодликни чеклаш жазоси тайинланган шахсга электрон браслет тақилганлиги ҳақидаги маълумотлар «Elektron braslet» ахборот тизимига киритилган вақтдан бошлаб бир иш куни ичида электрон браслетни фаоллаштиради;
уй қамоғи эҳтиёт чораси қўлланилган ёки озодликни чеклаш жазоси тайинланган шахсларга тақилган электрон браслетларнинг техник созлигини (фаол ҳолатда турганлигини) «Elektron braslet» ахборот тизимидаги маълумотларни реал вақт режимида таҳлил қилиб бориш орқали масофадан туриб назорат қилади;
уй қамоғи эҳтиёт чораси қўлланилган ёки озодликни чеклаш жазоси тайинланган шахсга тақилган электрон браслетнинг электр қуввати тугаганлиги, ушбу шахс электрон браслетни ечганлиги ёки электрон браслетнинг техник топшириғида белгиланган радиус оралиғидан ташқарига чиққанлиги ҳақидаги онлайн хабар келиб тушганда, дарҳол ижрочи ходимларни бу ҳақида хабардор этади ва ушбу хабарни «Elektron braslet» ахборот тизимида қайд этади.
4-боб. Электрон браслетлар билан таъминлаш ва уларни сақлаш
13. Хизмат кўрсатувчи ташкилот ҳақ эвазига хизмат кўрсатиш шартномаси асосида:
туман (шаҳар) ички ишлар органларини зарур миқдордаги электрон браслетлар билан таъминлайди;
туман (шаҳар) ички ишлар органларида сақланаётган носоз ҳолатдаги электрон браслетларни соз ҳолатдаги электрон браслетларга алмаштиради;
ижрочи ходимларнинг электрон браслетни қўллаш ва унинг дастурий таъминотини ишлатиш кўникмасини мустаҳкамлаш бўйича ўқув-амалий семинарлар ўтказади;
электрон браслетларнинг дастурий таъминотида юзага келадиган техник носозликларни бартараф этади;
электрон браслетлар ва уларнинг дастурий таъминотини тизимли равишда такомиллаштириб боради.
14. Ҳақ эвазига хизмат кўрсатиш шартномаси хизмат кўрсатувчи ташкилот (ижрочи) ҳамда Ўзбекистон Республикаси Ички ишлар вазирлиги Жамоат хавфсизлиги департаменти Ҳуқуқбузарликлар профилактикаси хизмати ва Пробация бошқармаси (буюртмачилар) ўртасида қонунчиликда белгиланган тартибда тузилади.
Ушбу шартномада белгиланган ҳақ Ўзбекистон Республикаси Ички ишлар вазирлиги Жамоат хавфсизлиги департаменти Ҳуқуқбузарликлар профилактикаси хизматининг ҳуқуқбузарликлар профилактикаси тизимини ривожлантириш жамғармаси ҳамда Пробация бошқармасининг пробация хизматини ривожлантириш жамғармасидан ажратилган маблағлар ҳисобидан тўланади.
15. Уй қамоғи эҳтиёт чораси қўлланилган ёки озодликни чеклаш жазоси тайинланган шахсларни электрон браслет орқали масофадан туриб назорат қилиш бўйича техник топшириқ шахсга оид маълумотларни ҳимоя қилиш, ахборот хавфсизлиги ва жамоат хавфсизлигини таъминлаш бўйича талаблар акс эттирилган ҳолда, Ўзбекистон Республикаси Ички ишлар вазирлиги Жамоат хавфсизлиги департаменти Ҳуқуқбузарликлар профилактикаси хизмати ҳамда Пробация бошқармаси томонидан ишлаб чиқилади ва Ўзбекистон Республикаси ички ишлар вазирининг ўринбосари — Жамоат хавфсизлиги департаменти бошлиғи томонидан тасдиқланади.
16. Электрон браслетлар ички ишлар органларининг навбатчилик қисмларидаги махсус воситаларни сақлаш хоналарида сақланади.
Электрон браслетларни махсус воситаларни сақлаш хонасида сақлаш тартиби Ўзбекистон Республикаси Ички ишлар вазирлиги томонидан белгиланади.
17. Туман (шаҳар) ички ишлар органи навбатчилик қисми:
хизмат кўрсатувчи ташкилот томонидан тақдим этилган электрон браслетларни қабул қилиб олади;
электрон браслетларни туман (шаҳар) ички ишлар органининг махсус воситаларни сақлаш хонасида белгиланган тартибда сақланишини таъминлайди;
электрон браслетларнинг ҳаракатини (ижрочи ходимларга топшириш ва улардан қабул қилиб олишни) «Elektron braslet» ахборот тизимида юритади.
18. «Elektron braslet» ахборот тизимининг электрон браслетлар ҳаракатини қайд этиш бўлимида қуйидаги маълумотлар кўрсатилади:
электрон браслет берилган ижрочи ходим фамилияси, исми ва отасининг исми ҳамда лавозими;
берилган электрон браслетнинг индивидуал рақамлари;
электрон браслет берилган ҳамда қабул қилиб олинган сана ва вақт;
электрон браслетнинг топшириш вақтидаги ҳолати (соз ёки носозлиги);
электрон браслетни қабул қилиб олган ва топширган ижрочи ходимнинг фамилияси, исми ва отасининг исми.
19. Электрон браслетларнинг техник созлиги, электр қувватининг тўлиқлиги туман (шаҳар) ички ишлар органи навбатчилик қисми масъул ходимлари томонидан доимий равишда назорат қилиб борилади. Ижрочи ходимларга носоз ёки электр қуввати тўлиқ бўлмаган электрон браслетлар берилишига йўл қўйилмайди.
20. Электрон браслетни қабул қилиб олган ижрочи ходим электрон браслетнинг созлигини ва электр қуввати тўлалигини, «GPS» сигнали ишлаётганлигини ҳамда махсус тасмаси бутлигини текширади.
Электрон браслетда носозликлар аниқланганда носоз электрон браслет топширилиб, соз электрон браслетга алмаштирилади.
Электрон браслетдан фойдаланишдан олдин ижрочи ходим томонидан унинг махсус тасмасига дезинфекция воситалари (антисептик, спирт) ёрдамида ишлов берилади.
21. Электрон браслетдан фойдаланиш якунлангандан сўнг ижрочи ходим томонидан махсус тасмага дезинфекция воситалари (антисептик, спирт) ёрдамида ишлов берилган ҳолда, электрон браслетлар тегишлича туман (шаҳар) ички ишлар органи навбатчилик қисмига топширилади.
22. Топширилаётган электрон браслетлар туман (шаҳар) ички ишлар органи навбатчилик қисми масъул ходимлари томонидан ташқи кўрикдан ўтказилгандан сўнг «Elektron braslet» ахборот тизимида қайд этиш йўли билан қабул қилиб олинади.
5-боб. Электрон браслетларни қўллашда ижрочи ходимларнинг ҳуқуқлари ва мажбуриятлари
23. Электрон браслетларни қўллашда ижрочи ходимлар қуйидаги ҳуқуқларга эга:
уй қамоғи эҳтиёт чораси қўлланилган ёки озодликни чеклаш жазоси тайинланган шахсдан зудлик билан туман (шаҳар) ички ишлар органи маъмурий биносига етиб келишини сўраш;
уй қамоғи эҳтиёт чораси қўлланилган ёки озодликни чеклаш жазоси тайинланган шахсга ушбу Низомда белгиланган ҳуқуқлари ва мажбуриятларини тушунтириш, бу ҳақида ундан тилхат олиш;
уй қамоғи эҳтиёт чораси қўлланилган ёки озодликни чеклаш жазоси тайинланган шахсга электрон браслетни туман (шаҳар) ички ишлар органи маъмурий биносида тақиш;
уй қамоғи эҳтиёт чораси қўлланилган ёки озодликни чеклаш жазоси тайинланган шахснинг ёзма мурожаати асосида электрон браслетни жароҳат мавжуд бўлган оёқдан ечиб, соғ оёққа ёки қўлга тақиш;
уй қамоғи эҳтиёт чораси қўлланилган ёки озодликни чеклаш жазоси тайинланган шахсга тиббий кўрсатма асосида шошилинч тиббий ёрдам кўрсатиш ёки тиббий текширувдан ўтказиш давомида ундан электрон браслетни вақтинча ечиб олиш ва тиббий ёрдам кўрсатилганидан (тиббий текширув ўтказилганидан) кейин ушбу шахсга электрон браслетни тақиш.
Ижрочи ходимлар қонунчилик ҳужжатларига мувофиқ бошқа ҳуқуқларга ҳам эга бўлиши мумкин.
24. Электрон браслетларни қўллашда ижрочи ходимлар:
уй қамоғи эҳтиёт чораси қўлланилган ёки озодликни чеклаш жазоси тайинланган шахсга электрон браслетни тақишдан олдин унинг созлигини, электр қуввати тўлалигини ва махсус тасмаси бутлигини текшириши, электрон браслетнинг махсус тасмасига дезинфекция воситалари (антисептик, спирт) ёрдамида ишлов бериши;
уй қамоғи эҳтиёт чораси қўлланилган ёки озодликни чеклаш жазоси тайинланган шахсга тақилган электрон браслетда носозликлар аниқланганда (электрон браслет тақилган шахс уни носоз ҳолатга келтирганда), зудлик билан носоз электрон браслетни соз электрон браслетга алмаштириши ва бу ҳақда туман (шаҳар) ички ишлар органи бошлиғига ёзма ахборот бериши;
уй қамоғи эҳтиёт чорасини ижро этиш муддати якунланганда ёки озодликни чеклаш жазоси тайинланган шахс пробация ҳисобидан чиқарилаётган вақтда ёхуд жазони ўташ тартибига риоя этган ва жамоат тартибини бузишга йўл қўймаган тақдирда, электрон браслет қўлланилган кундан эътиборан уч ой ўтгач, ушбу шахсдан туман (шаҳар) ички ишлар органи маъмурий биносида электрон браслетни ечиб олиши;
ечиб олинган электрон браслетни унинг махсус тасмасига дезинфекция воситалари (антисептик, спирт) ёрдамида ишлов берган ҳолда, туман (шаҳар) ички ишлар органининг махсус воситаларни сақлаш хонасига топшириши;
ягона электрон мониторинг марказининг электрон браслет онлайн сигнали ишга тушганлиги ҳақидаги хабарини олган вақтдан бошлаб дарҳол ушбу Низомнинг 28 — 30-бандларида белгиланган чора-тадбирларни амалга ошириши шарт.
Ижрочи ходимларнинг зиммасига қонунчилик ҳужжатларига мувофиқ бошқа мажбуриятлар юкланиши мумкин.
6-боб. Электрон браслет қўлланиладиган шахсларнинг ҳуқуқлари ва мажбуриятлари
25. Электрон браслет қўлланиладиган шахслар қуйидаги ҳуқуқларга эга:
электрон браслет қўлланилишидан олдин ушбу Низомда белгиланган ҳуқуқлари ва мажбуриятлари тўғрисидаги маълумотларни ижрочи ходимлардан олиш;
электрон браслетни жароҳат мавжуд бўлган оёқдан ечиб, соғ оёққа ёки қўлга тақиш бўйича ижрочи ходимларга ёзма мурожаат қилиш;
тиббий кўрсатма асосида шошилинч тиббий ёрдам кўрсатиш ёки тиббий текширувдан ўтказиш давомида электрон браслетни вақтинча ечиб туришни сўраш (тиббий текширувлар тугагунга қадар);
электрон браслетда носозлик юзага келганда, уни соз электрон браслетга алмаштириш бўйича ижрочи ходимларга мурожаат қилиш.
Электрон браслет қўлланиладиган шахслар қонунчилик ҳужжатларига мувофиқ бошқа ҳуқуқларга ҳам эга.
26. Электрон браслет қўлланиладиган шахслар қуйидагиларни:
электрон браслетни белгиланган вақт ичида қувватлаб бориш орқали унинг электр қуввати тугамаслигини таъминлаши;
электрон браслетни ўзбошимчалик билан ечмаслиги;
электрон браслетга зарар етказиш билан боғлиқ ҳаракатларни амалга оширмаслиги шарт.
Электрон браслет қўлланиладиган шахслар қонунчилик ҳужжатларига мувофиқ бошқа мажбуриятларга ҳам эга.
7-боб. Электрон браслет орқали масофадан туриб назорат қилиш тартибини бузиш учун жавобгарлик
27. Қуйидагилар шахснинг уй қамоғи эҳтиёт чораси ёки озодликни чеклаш жазосини ижро этиш жойида бўлишини электрон браслет орқали масофадан туриб назорат қилиш тартибини бузиш деб ҳисобланади:
уй қамоғи эҳтиёт чораси қўлланилган ёки озодликни чеклаш жазоси тайинланган шахс ўзига электрон браслет тақилишини рад этса;
уй қамоғи эҳтиёт чораси қўлланилган ёки озодликни чеклаш жазоси тайинланган шахс электрон браслетни белгиланган вақт ичида қувватлаб бормаганлиги (электр қуввати тугаганлиги) сабабли ягона электрон мониторинг маркази томонидан электрон браслет онлайн сигнали ишга тушганлиги ҳақида хабар берилган бўлса;
уй қамоғи эҳтиёт чораси қўлланилган ёки озодликни чеклаш жазоси тайинланган шахс электрон браслетни ўзбошимчалик билан ечса;
уй қамоғи эҳтиёт чораси қўлланилган ёки озодликни чеклаш жазоси тайинланган шахс ижрочи ходимларнинг ёзма рухсатисиз электрон браслетнинг техник топшириғида белгиланган радиус оралиғидан ташқарига чиқса;
уй қамоғи эҳтиёт чораси қўлланилган ёки озодликни чеклаш жазоси тайинланган шахс электрон браслетга зарар етказиш билан боғлиқ ҳаракатларни амалга оширса.
28. Ушбу Низом 27-бандининг иккинчи — олтинчи хатбошиларида белгиланган ҳолатлардан бири содир этилганда, ижрочи ходимлар томонидан шахснинг уй қамоғи эҳтиёт чораси ёки озодликни чеклаш жазосини ижро этиш жойида бўлишини электрон браслет орқали масофадан туриб назорат қилиш тартибини бузганлиги тўғрисида далолатнома расмийлаштирилади (далолатнома ижрочи ходимлар ва холислар томонидан имзоланади).
29. Уй қамоғи эҳтиёт чораси қўлланилган шахс ушбу Низом 27-бандининг иккинчи — олтинчи хатбошиларида белгиланган ҳолатлардан бирини биринчи маротаба содир этганда, унга нисбатан қонунчиликда белгиланган тартибда расмий огоҳлантириш тарзидаги профилактика чораси қўлланилади.
Уй қамоғи эҳтиёт чораси қўлланилган шахс ўзига расмий огоҳлантириш тарзидаги профилактика чораси қўлланилганидан кейин ушбу Низом 27-бандининг иккинчи — олтинчи хатбошиларида белгиланган ҳолатлардан бирини такроран содир этса, ижрочи ходимлар томонидан ушбу шахс ўтаётган эҳтиёт чорасини бошқа эҳтиёт чорасига алмаштириш ҳақида тегишли тергов органига (судга) тақдимнома киритилади.
30. Озодликни чеклаш жазоси тайинланган шахс ушбу Низом 27-бандининг иккинчи — олтинчи хатбошиларида белгиланган ҳолатлардан бирини биринчи маротаба содир этганда, унга нисбатан қонунчиликда белгиланган тартибда огоҳлантириш тарзидаги интизомий жазо чораси қўлланилади.
Озодликни чеклаш жазоси тайинланган шахс ўзига огоҳлантириш тарзидаги интизомий жазо чораси қўлланилганидан кейин ушбу Низом 27-бандининг иккинчи — олтинчи хатбошиларида белгиланган ҳолатлардан бирини такроран содир этса, ижрочи ходимлар томонидан ушбу шахс ўтаётган жазони бошқа жазога алмаштириш ҳақида тегишли судга тақдимнома киритилади.
8-боб. Электрон браслетга шикаст етказилганда ёки йўқотилганда моддий зарарни ундириш тартиби
31. Электрон браслетнинг корпусида шикастланиш ёки носозлик аниқланганда ёки электрон браслет йўқотилганда, ижрочи ходимлар зудлик билан туман (шаҳар) ички ишлар органи бошлиғига бу ҳақда ёзма ахборот беради.
32. Туман (шаҳар) ички ишлар органи бошлиғининг ёзма топшириғи асосида электрон браслетнинг шикастланганлиги, носоз ҳолатга келганлиги ёки йўқотилганлиги сабаблари ва шарт-шароитларини ўрганиш бўйича текширув ўтказилади.
Текширув натижасига мувофиқ:
ижрочи ходимлар томонидан электрон браслетга шикаст етказилганлиги ёки йўқотилганлиги ҳолати аниқланган тақдирда, уларга нисбатан моддий жавобгарлик чоралари қўлланилади;
электрон браслетга уй қамоғи эҳтиёт чораси қўлланилган ёки озодликни чеклаш жазоси тайинланган шахс қасддан шикаст етказганлиги аниқланган ҳолларда, етказилган моддий зарарнинг ўрни ушбу шахс томонидан қопланиши таъминланади.
Етказилган моддий зарарнинг миқдори текширув хулосасида белгиланади. Текширув хулосаси ижрочи ходимлар ва уй қамоғи эҳтиёт чораси қўлланилган ёки озодликни чеклаш жазоси тайинланган шахсга тилхат олиш йўли билан эълон қилинади.
33. Уй қамоғи эҳтиёт чораси қўлланилган ёки озодликни чеклаш жазоси тайинланган шахс моддий зарарнинг ўрнини бир ой муддат ичида қопламаса, ушбу зарар суд тартибида ундирилади.
9-боб. Якунловчи қоидалар
34. Уй қамоғи эҳтиёт чораси қўлланилган ёки озодликни чеклаш жазоси тайинланган шахс эҳтиёт чораси ёки жазони ижро этиш жойини тарк этиб, қочган ҳолларда туман (шаҳар) ички ишлар органи ходимлари қонунчиликда белгиланган тартибда уни ушлашга қаратилган чораларни кўради.
35. Ушбу Низом талабларининг бузилишида айбдор бўлган шахслар қонунчилик ҳужжатларига мувофиқ жавоб берадилар.
Ўзбекистон Республикасининг Бош вазири А. АРИПОВ
Тошкент ш.,
2024 йил 5 декабрь,
813-сон
Oʻzbekiston Respublikasi Vazirlar Mahkamasining
qarori
NIZOM
Uy qamogʻi ehtiyot chorasi qoʻllanilgan va ozodlikni cheklash jazosi tayinlangan shaxslarni elektron braslet orqali masofadan turib nazorat qilish tartibi toʻgʻrisidagi nizomni tasdiqlash haqida
Soʻnggi yillarda ichki ishlar organlari tizimida jinoyatchilikka qarshi kurashish va jamoat xavfsizligini taʼminlashda zamonaviy axborot texnologiyalari imkoniyatlaridan keng foydalangan holda ijobiy natijalarga erishilmoqda.
Shu bilan birga, jamoat xavfsizligini taʼminlash borasida javobgarlik muqarrarligini taʼminlash, qayta jinoyat sodir etilishining oldini olish, jazo ijrosi ustidan samarali nazorat mexanizmini oʻrnatish uchun yangi texnologiyalarni qoʻllash talab etilmoqda.
Uy qamogʻi ehtiyot chorasi va ozodlikni cheklash jazosi qoʻllanilgan shaxslarni masofadan turib nazorat qilish amaliyotini yoʻlga qoʻyish orqali javobgarlikning muqarrarligini taʼminlash va jazo ijrosi ustidan samarali nazoratni oʻrnatish zarurati yuzaga kelmoqda.
Oʻzbekiston Respublikasining “Probatsiya toʻgʻrisida”gi Qonuni , Oʻzbekiston Respublikasi Prezidentining “ Jamoat xavfsizligini taʼminlash va jinoyatchilikka qarshi kurashish sohasida ichki ishlar organlari faoliyatini sifat jihatidan yangi bosqichga koʻtarish chora-tadbirlari toʻgʻrisida ” 2021-yil 26-martdagi PF-6196-son hamda “ Oʻzbekiston Respublikasi jamoat xavfsizligi konsepsiyasini tasdiqlash va uni amalga oshirish chora-tadbirlari toʻgʻrisida ” 2021-yil 29-noyabrdagi PF-27-son farmonlari ijrosini taʼminlash, shuningdek, uy qamogʻi ehtiyot chorasi va ozodlikni cheklash jazosi qoʻllanilgan shaxslarni masofadan turib nazorat qilish tartibini joriy etish maqsadida Vazirlar Mahkamasi qaror qiladi:
1. Quyidagilar:
Oʻzbekiston Respublikasi Prezidentining 2021-yil 26-martdagi PF-6196-son Farmoni bilan tasdiqlangan Ichki ishlar organlari tizimini yanada takomillashtirish boʻyicha “yoʻl xaritasi”ning 22-bandiga muvofiq, Ichki ishlar vazirligi Jamoat xavfsizligi departamenti Probatsiya boshqarmasi tuzilmasida yagona elektron monitoring markazi tashkil etilib, masofadan turib nazorat qilish uchun zamonaviy texnik vositalar va server qurilmalari bilan jihozlanganligi, axborot texnologiyalari boʻyicha oliy maʼlumotli kadrlar bilan jamlanganligi;
Oʻzbekiston Respublikasi Kriminologiya tadqiqot institutida ilmiy-tadqiqot ishlariga davlat buyurtmasi asosida amaliy ilmiy-tadqiqot loyihasi amalga oshirilganligi, loyiha natijasida elektron braslet yaratilganligi, uning dasturiy taʼminoti ishlab chiqilganligi hamda respublikaning 14 ta hududida (ichki ishlar organlari jamoat tartibini saqlash, huquqbuzarliklar profilaktikasi, probatsiya xizmatlarida) sinovdan oʻtkazilib, amaliyotga joriy etishga tayyor holatga keltirilganligi maʼlumot uchun qabul qilinsin.
2. Quyidagilarni nazarda tutuvchi Uy qamogʻi ehtiyot chorasi qoʻllanilgan va ozodlikni cheklash jazosi tayinlangan shaxslarni elektron braslet orqali masofadan turib nazorat qilish tartibi toʻgʻrisidagi nizom ilovaga muvofiq tasdiqlansin:
uy qamogʻi ehtiyot chorasi qoʻllanilgan va ozodlikni cheklash jazosi tayinlangan shaxslarning ehtiyot chorasi va jazoni ijro etish joyida boʻlishini elektron braslet orqali masofadan turib nazorat qilish;
elektron braslet taqilishi belgilangan shaxslarning huquqlari va majburiyatlari;
elektron braslet orqali masofadan turib nazorat qilish tartibini buzish uchun javobgarlik;
elektron brasletga shikast yetkazilganda yoki yoʻqotilganda moddiy zararni undirish tartiblari.
3. 2025-yil 1-yanvardan boshlab uy qamogʻi ehtiyot chorasi qoʻllanilgan hamda ozodlikni cheklash jazosi tayinlangan shaxslarning ehtiyot chorasi va jazoni ijro etish joyida boʻlishini real vaqt rejimida masofadan turib nazorat qilish tartibi amaliyotga bosqichma-bosqich joriy etilsin.
4. Oʻzbekiston Respublikasi Ichki ishlar vazirligi manfaatdor vazirlik va idoralar bilan birgalikda uch oy muddatda oʻzlari qabul qilgan normativ-huquqiy hujjatlarni ushbu qarorga muvofiqlashtirsin.
5. Mazkur qarorning bajarilishini nazorat qilish Oʻzbekiston Respublikasi ichki ishlar vaziri P.R. Bobojonov zimmasiga yuklansin.
Vazirlar Mahkamasining 2024-yil 5-dekabrdagi 813-son qaroriga ILOVA
Uy qamogʻi ehtiyot chorasi qoʻllanilgan va ozodlikni cheklash jazosi tayinlangan shaxslarni elektron braslet orqali masofadan turib nazorat qilish tartibi toʻgʻrisida
1-bob. Umumiy qoidalar
1. Mazkur Nizom uy qamogʻi ehtiyot chorasi qoʻllanilgan va ozodlikni cheklash jazosi tayinlangan shaxslarning ehtiyot chorasi va jazoni ijro etish joyida boʻlishini elektron braslet orqali masofadan turib nazorat qilish tartibini belgilaydi.
Uy qamogʻi ehtiyot chorasi qoʻllanilgan va ozodlikni cheklash jazosi tayinlangan shaxslarning ehtiyot chorasi va jazoni ijro etish joyida boʻlishini elektron braslet orqali masofadan turib nazorat qilish qonunchilik hujjatlariga muvofiq ichki ishlar organlari tomonidan amalga oshiriladi.
2. Ushbu Nizomda quyidagi asosiy tushunchalardan foydalaniladi:
ijrochi xodimlar — tuman (shahar) ichki ishlar organi jamoat xavfsizligi xizmati probatsiya boʻlinmasi xodimlari, huquqbuzarliklar profilaktikasi boʻlinmasi xotin-qizlar masalalari boʻyicha katta inspektori va mahalla huquq-tartibot maskani (tayanch punkti) profilaktika inspektorlari;
xizmat koʻrsatuvchi tashkilot — elektron braslet va uning dasturiy taʼminoti shaklidagi ilmiy faoliyat natijalarini qonunchilikda belgilangan tartibda tijoratlashtirgan yuridik shaxs;
elektron braslet — uy qamogʻi ehtiyot chorasi qoʻllanilgan va ozodlikni cheklash jazosi tayinlangan shaxsning harakatlanishini real vaqt rejimida avtomatik tarzda xabar yuborish orqali masofadan turib nazorat qilishga moʻljallangan, oyoqqa yoki qoʻlga taqiladigan elektron qurilma;
yagona elektron monitoring markazi — Oʻzbekiston Respublikasi Ichki ishlar vazirligi Jamoat xavfsizligi departamenti Probatsiya boshqarmasining yagona elektron monitoring markazi;
“Elektron braslet” axborot tizimi — Oʻzbekiston Respublikasi Ichki ishlar vazirligi Jamoat xavfsizligi departamenti Probatsiya boshqarmasining mustaqil axborot tizimi.
2-bob. Elektron brasletni qoʻllashda rioya qilinadigan talablar
3. Elektron braslet uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxs oyogʻining boldir qismiga taqiladi. Shaxs oyogʻining boldir qismiga elektron brasletni taqish imkoniyati mavjud boʻlmagan hollarda (suyak sinishi, boshqa jarohatlar bilan tibbiy muolaja koʻrsatilgan va boshqalar) qoʻl qismiga taqilishiga ruxsat etiladi.
4. Ayol jinsidagi shaxsga elektron braslet u bilan bir jinsdagi xodim (ichki ishlar organi jamoat xavfsizligi xizmati huquqbuzarliklar profilaktikasi boʻlinmasi xotin-qizlar masalalari boʻyicha katta inspektori) tomonidan taqiladi hamda yechib olinadi.
5. Uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxsga nosoz yoki elektr quvvati toʻliq boʻlmagan elektron brasletni taqishga yoʻl qoʻyilmaydi.
6. Uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan quyidagi shaxslarga elektron braslet qoʻllash mumkin emas:
oʻn sakkiz yoshga toʻlmagan shaxslar;
homilador ayollar;
uch yoshga toʻlmagan bolalari bor ayollar;
birinchi yoki ikkinchi guruh nogironligi boʻlgan shaxslar;
tibbiy koʻrsatmaga koʻra elektron brasletni taqish tavsiya etilmaydigan shaxslar (implant qilingan kardiostimulyator oʻrnatilgan shaxslar, yuqumli teri kasalligi (allergo kontakt dermatit, teri zamburugʻi yoki qichima kasalligi) boʻlgan shaxslar).
3-bob. Uy qamogʻi ehtiyot chorasi qoʻllanilgan va ozodlikni cheklash jazosi tayinlangan shaxslarni elektron braslet orqali masofadan turib nazorat qilish tartibi
7. Sudning uy qamogʻi tarzidagi ehtiyot chorasini qoʻllash toʻgʻrisidagi ajrimi nusxasi “Elektron jinoiy-huquqiy statistika” axborot tizimi orqali “Elektron braslet” axborot tizimiga yuboriladi.
Sudning ajrimi nusxasi kelib tushgan vaqtdan boshlab bir ish kuni ichida tuman (shahar) ichki ishlar organi boshligʻining yozma topshirigʻi asosida “Elektron braslet” axborot tizimida ijrochi xodimlar belgilanadi.
8. Ozodlikni cheklash tarzidagi jazoni oʻtash tartibi talablarini bajarmayotgan yoki jazoni oʻtash davrida jamoat tartibini buzish bilan bogʻliq huquqbuzarliklar uchun maʼmuriy javobgarlikka tortilgan probatsiya nazoratidagi shaxsga nisbatan tuman (shahar) ichki ishlar organi probatsiya boʻlinmasi boshligʻining qarori asosida elektron braslet qoʻllaniladi.
9. Tuman (shahar) ichki ishlar organi probatsiya boʻlinmasi boshligʻining ozodlikni cheklash jazosi tayinlangan shaxsni elektron braslet orqali masofadan turib nazorat qilish toʻgʻrisidagi qarori “Elektron braslet” axborot tizimida rasmiylashtiriladi.
Qaror rasmiylashtirilgan vaqtdan boshlab bir ish kuni ichida “Elektron braslet” axborot tizimida ijrochi xodimlar belgilanadi.
10. Uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxsning familiyasi, ismi, otasining ismi, jinsi, tugʻilgan yili, jismoniy shaxsning shaxsiy identifikatsiya raqami (JSHSHIR), elektron braslet taqilgan vaqt, elektron brasletning individual raqami, ijrochi xodimlarning familiyasi, ismi, otasining ismi va telefon raqami “Elektron braslet” axborot tizimida qayd etiladi.
11. Uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxsga ijrochi xodimlar tomonidan ushbu Nizomda belgilangan huquqlari va majburiyatlari tushuntiriladi hamda bu haqida undan tilxat olinadi.
12. Yagona elektron monitoring markazi:
uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxsga elektron braslet taqilganligi haqidagi maʼlumotlar “Elektron braslet” axborot tizimiga kiritilgan vaqtdan boshlab bir ish kuni ichida elektron brasletni faollashtiradi;
uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxslarga taqilgan elektron brasletlarning texnik sozligini (faol holatda turganligini) “Elektron braslet” axborot tizimidagi maʼlumotlarni real vaqt rejimida tahlil qilib borish orqali masofadan turib nazorat qiladi;
uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxsga taqilgan elektron brasletning elektr quvvati tugaganligi, ushbu shaxs elektron brasletni yechganligi yoki elektron brasletning texnik topshirigʻida belgilangan radius oraligʻidan tashqariga chiqqanligi haqidagi onlayn xabar kelib tushganda, darhol ijrochi xodimlarni bu haqida xabardor etadi va ushbu xabarni “Elektron braslet” axborot tizimida qayd etadi.
4-bob. Elektron brasletlar bilan taʼminlash va ularni saqlash
13. Xizmat koʻrsatuvchi tashkilot haq evaziga xizmat koʻrsatish shartnomasi asosida:
tuman (shahar) ichki ishlar organlarini zarur miqdordagi elektron brasletlar bilan taʼminlaydi;
tuman (shahar) ichki ishlar organlarida saqlanayotgan nosoz holatdagi elektron brasletlarni soz holatdagi elektron brasletlarga almashtiradi;
ijrochi xodimlarning elektron brasletni qoʻllash va uning dasturiy taʼminotini ishlatish koʻnikmasini mustahkamlash boʻyicha oʻquv-amaliy seminarlar oʻtkazadi;
elektron brasletlarning dasturiy taʼminotida yuzaga keladigan texnik nosozliklarni bartaraf etadi;
elektron brasletlar va ularning dasturiy taʼminotini tizimli ravishda takomillashtirib boradi.
14. Haq evaziga xizmat koʻrsatish shartnomasi xizmat koʻrsatuvchi tashkilot (ijrochi) hamda Oʻzbekiston Respublikasi Ichki ishlar vazirligi Jamoat xavfsizligi departamenti Huquqbuzarliklar profilaktikasi xizmati va Probatsiya boshqarmasi (buyurtmachilar) oʻrtasida qonunchilikda belgilangan tartibda tuziladi.
Ushbu shartnomada belgilangan haq Oʻzbekiston Respublikasi Ichki ishlar vazirligi Jamoat xavfsizligi departamenti Huquqbuzarliklar profilaktikasi xizmatining huquqbuzarliklar profilaktikasi tizimini rivojlantirish jamgʻarmasi hamda Probatsiya boshqarmasining probatsiya xizmatini rivojlantirish jamgʻarmasidan ajratilgan mablagʻlar hisobidan toʻlanadi.
15. Uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxslarni elektron braslet orqali masofadan turib nazorat qilish boʻyicha texnik topshiriq shaxsga oid maʼlumotlarni himoya qilish, axborot xavfsizligi va jamoat xavfsizligini taʼminlash boʻyicha talablar aks ettirilgan holda, Oʻzbekiston Respublikasi Ichki ishlar vazirligi Jamoat xavfsizligi departamenti Huquqbuzarliklar profilaktikasi xizmati hamda Probatsiya boshqarmasi tomonidan ishlab chiqiladi va Oʻzbekiston Respublikasi ichki ishlar vazirining oʻrinbosari — Jamoat xavfsizligi departamenti boshligʻi tomonidan tasdiqlanadi.
16. Elektron brasletlar ichki ishlar organlarining navbatchilik qismlaridagi maxsus vositalarni saqlash xonalarida saqlanadi.
Elektron brasletlarni maxsus vositalarni saqlash xonasida saqlash tartibi Oʻzbekiston Respublikasi Ichki ishlar vazirligi tomonidan belgilanadi.
17. Tuman (shahar) ichki ishlar organi navbatchilik qismi:
xizmat koʻrsatuvchi tashkilot tomonidan taqdim etilgan elektron brasletlarni qabul qilib oladi;
elektron brasletlarni tuman (shahar) ichki ishlar organining maxsus vositalarni saqlash xonasida belgilangan tartibda saqlanishini taʼminlaydi;
elektron brasletlarning harakatini (ijrochi xodimlarga topshirish va ulardan qabul qilib olishni) “Elektron braslet” axborot tizimida yuritadi.
18. “Elektron braslet” axborot tizimining elektron brasletlar harakatini qayd etish boʻlimida quyidagi maʼlumotlar koʻrsatiladi:
elektron braslet berilgan ijrochi xodim familiyasi, ismi va otasining ismi hamda lavozimi;
berilgan elektron brasletning individual raqamlari;
elektron braslet berilgan hamda qabul qilib olingan sana va vaqt;
elektron brasletning topshirish vaqtidagi holati (soz yoki nosozligi);
elektron brasletni qabul qilib olgan va topshirgan ijrochi xodimning familiyasi, ismi va otasining ismi.
19. Elektron brasletlarning texnik sozligi, elektr quvvatining toʻliqligi tuman (shahar) ichki ishlar organi navbatchilik qismi masʼul xodimlari tomonidan doimiy ravishda nazorat qilib boriladi. Ijrochi xodimlarga nosoz yoki elektr quvvati toʻliq boʻlmagan elektron brasletlar berilishiga yoʻl qoʻyilmaydi.
20. Elektron brasletni qabul qilib olgan ijrochi xodim elektron brasletning sozligini va elektr quvvati toʻlaligini, “GPS” signali ishlayotganligini hamda maxsus tasmasi butligini tekshiradi.
Elektron brasletda nosozliklar aniqlanganda nosoz elektron braslet topshirilib, soz elektron brasletga almashtiriladi.
Elektron brasletdan foydalanishdan oldin ijrochi xodim tomonidan uning maxsus tasmasiga dezinfeksiya vositalari (antiseptik, spirt) yordamida ishlov beriladi.
21. Elektron brasletdan foydalanish yakunlangandan soʻng ijrochi xodim tomonidan maxsus tasmaga dezinfeksiya vositalari (antiseptik, spirt) yordamida ishlov berilgan holda, elektron brasletlar tegishlicha tuman (shahar) ichki ishlar organi navbatchilik qismiga topshiriladi.
22. Topshirilayotgan elektron brasletlar tuman (shahar) ichki ishlar organi navbatchilik qismi masʼul xodimlari tomonidan tashqi koʻrikdan oʻtkazilgandan soʻng “Elektron braslet” axborot tizimida qayd etish yoʻli bilan qabul qilib olinadi.
5-bob. Elektron brasletlarni qoʻllashda ijrochi xodimlarning huquqlari va majburiyatlari
23. Elektron brasletlarni qoʻllashda ijrochi xodimlar quyidagi huquqlarga ega:
uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxsdan zudlik bilan tuman (shahar) ichki ishlar organi maʼmuriy binosiga yetib kelishini soʻrash;
uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxsga ushbu Nizomda belgilangan huquqlari va majburiyatlarini tushuntirish, bu haqida undan tilxat olish;
uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxsga elektron brasletni tuman (shahar) ichki ishlar organi maʼmuriy binosida taqish;
uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxsning yozma murojaati asosida elektron brasletni jarohat mavjud boʻlgan oyoqdan yechib, sogʻ oyoqqa yoki qoʻlga taqish;
uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxsga tibbiy koʻrsatma asosida shoshilinch tibbiy yordam koʻrsatish yoki tibbiy tekshiruvdan oʻtkazish davomida undan elektron brasletni vaqtincha yechib olish va tibbiy yordam koʻrsatilganidan (tibbiy tekshiruv oʻtkazilganidan) keyin ushbu shaxsga elektron brasletni taqish.
Ijrochi xodimlar qonunchilik hujjatlariga muvofiq boshqa huquqlarga ham ega boʻlishi mumkin.
24. Elektron brasletlarni qoʻllashda ijrochi xodimlar:
uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxsga elektron brasletni taqishdan oldin uning sozligini, elektr quvvati toʻlaligini va maxsus tasmasi butligini tekshirishi, elektron brasletning maxsus tasmasiga dezinfeksiya vositalari (antiseptik, spirt) yordamida ishlov berishi;
uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxsga taqilgan elektron brasletda nosozliklar aniqlanganda (elektron braslet taqilgan shaxs uni nosoz holatga keltirganda), zudlik bilan nosoz elektron brasletni soz elektron brasletga almashtirishi va bu haqda tuman (shahar) ichki ishlar organi boshligʻiga yozma axborot berishi;
uy qamogʻi ehtiyot chorasini ijro etish muddati yakunlanganda yoki ozodlikni cheklash jazosi tayinlangan shaxs probatsiya hisobidan chiqarilayotgan vaqtda yoxud jazoni oʻtash tartibiga rioya etgan va jamoat tartibini buzishga yoʻl qoʻymagan taqdirda, elektron braslet qoʻllanilgan kundan eʼtiboran uch oy oʻtgach, ushbu shaxsdan tuman (shahar) ichki ishlar organi maʼmuriy binosida elektron brasletni yechib olishi;
yechib olingan elektron brasletni uning maxsus tasmasiga dezinfeksiya vositalari (antiseptik, spirt) yordamida ishlov bergan holda, tuman (shahar) ichki ishlar organining maxsus vositalarni saqlash xonasiga topshirishi;
yagona elektron monitoring markazining elektron braslet onlayn signali ishga tushganligi haqidagi xabarini olgan vaqtdan boshlab darhol ushbu Nizomning 28 — 30-bandlarida belgilangan chora-tadbirlarni amalga oshirishi shart.
Ijrochi xodimlarning zimmasiga qonunchilik hujjatlariga muvofiq boshqa majburiyatlar yuklanishi mumkin.
6-bob. Elektron braslet qoʻllaniladigan shaxslarning huquqlari va majburiyatlari
25. Elektron braslet qoʻllaniladigan shaxslar quyidagi huquqlarga ega:
elektron braslet qoʻllanilishidan oldin ushbu Nizomda belgilangan huquqlari va majburiyatlari toʻgʻrisidagi maʼlumotlarni ijrochi xodimlardan olish;
elektron brasletni jarohat mavjud boʻlgan oyoqdan yechib, sogʻ oyoqqa yoki qoʻlga taqish boʻyicha ijrochi xodimlarga yozma murojaat qilish;
tibbiy koʻrsatma asosida shoshilinch tibbiy yordam koʻrsatish yoki tibbiy tekshiruvdan oʻtkazish davomida elektron brasletni vaqtincha yechib turishni soʻrash (tibbiy tekshiruvlar tugagunga qadar);
elektron brasletda nosozlik yuzaga kelganda, uni soz elektron brasletga almashtirish boʻyicha ijrochi xodimlarga murojaat qilish.
Elektron braslet qoʻllaniladigan shaxslar qonunchilik hujjatlariga muvofiq boshqa huquqlarga ham ega.
26. Elektron braslet qoʻllaniladigan shaxslar quyidagilarni:
elektron brasletni belgilangan vaqt ichida quvvatlab borish orqali uning elektr quvvati tugamasligini taʼminlashi;
elektron brasletni oʻzboshimchalik bilan yechmasligi;
elektron brasletga zarar yetkazish bilan bogʻliq harakatlarni amalga oshirmasligi shart.
Elektron braslet qoʻllaniladigan shaxslar qonunchilik hujjatlariga muvofiq boshqa majburiyatlarga ham ega.
7-bob. Elektron braslet orqali masofadan turib nazorat qilish tartibini buzish uchun javobgarlik
27. Quyidagilar shaxsning uy qamogʻi ehtiyot chorasi yoki ozodlikni cheklash jazosini ijro etish joyida boʻlishini elektron braslet orqali masofadan turib nazorat qilish tartibini buzish deb hisoblanadi:
uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxs oʻziga elektron braslet taqilishini rad etsa;
uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxs elektron brasletni belgilangan vaqt ichida quvvatlab bormaganligi (elektr quvvati tugaganligi) sababli yagona elektron monitoring markazi tomonidan elektron braslet onlayn signali ishga tushganligi haqida xabar berilgan boʻlsa;
uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxs elektron brasletni oʻzboshimchalik bilan yechsa;
uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxs ijrochi xodimlarning yozma ruxsatisiz elektron brasletning texnik topshirigʻida belgilangan radius oraligʻidan tashqariga chiqsa;
uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxs elektron brasletga zarar yetkazish bilan bogʻliq harakatlarni amalga oshirsa.
28. Ushbu Nizom 27-bandining ikkinchi — oltinchi xatboshilarida belgilangan holatlardan biri sodir etilganda, ijrochi xodimlar tomonidan shaxsning uy qamogʻi ehtiyot chorasi yoki ozodlikni cheklash jazosini ijro etish joyida boʻlishini elektron braslet orqali masofadan turib nazorat qilish tartibini buzganligi toʻgʻrisida dalolatnoma rasmiylashtiriladi (dalolatnoma ijrochi xodimlar va xolislar tomonidan imzolanadi).
29. Uy qamogʻi ehtiyot chorasi qoʻllanilgan shaxs ushbu Nizom 27-bandining ikkinchi — oltinchi xatboshilarida belgilangan holatlardan birini birinchi marotaba sodir etganda, unga nisbatan qonunchilikda belgilangan tartibda rasmiy ogohlantirish tarzidagi profilaktika chorasi qoʻllaniladi.
Uy qamogʻi ehtiyot chorasi qoʻllanilgan shaxs oʻziga rasmiy ogohlantirish tarzidagi profilaktika chorasi qoʻllanilganidan keyin ushbu Nizom 27-bandining ikkinchi — oltinchi xatboshilarida belgilangan holatlardan birini takroran sodir etsa, ijrochi xodimlar tomonidan ushbu shaxs oʻtayotgan ehtiyot chorasini boshqa ehtiyot chorasiga almashtirish haqida tegishli tergov organiga (sudga) taqdimnoma kiritiladi.
30. Ozodlikni cheklash jazosi tayinlangan shaxs ushbu Nizom 27-bandining ikkinchi — oltinchi xatboshilarida belgilangan holatlardan birini birinchi marotaba sodir etganda, unga nisbatan qonunchilikda belgilangan tartibda ogohlantirish tarzidagi intizomiy jazo chorasi qoʻllaniladi.
Ozodlikni cheklash jazosi tayinlangan shaxs oʻziga ogohlantirish tarzidagi intizomiy jazo chorasi qoʻllanilganidan keyin ushbu Nizom 27-bandining ikkinchi — oltinchi xatboshilarida belgilangan holatlardan birini takroran sodir etsa, ijrochi xodimlar tomonidan ushbu shaxs oʻtayotgan jazoni boshqa jazoga almashtirish haqida tegishli sudga taqdimnoma kiritiladi.
8-bob. Elektron brasletga shikast yetkazilganda yoki yoʻqotilganda moddiy zararni undirish tartibi
31. Elektron brasletning korpusida shikastlanish yoki nosozlik aniqlanganda yoki elektron braslet yoʻqotilganda, ijrochi xodimlar zudlik bilan tuman (shahar) ichki ishlar organi boshligʻiga bu haqda yozma axborot beradi.
32. Tuman (shahar) ichki ishlar organi boshligʻining yozma topshirigʻi asosida elektron brasletning shikastlanganligi, nosoz holatga kelganligi yoki yoʻqotilganligi sabablari va shart-sharoitlarini oʻrganish boʻyicha tekshiruv oʻtkaziladi.
Tekshiruv natijasiga muvofiq:
ijrochi xodimlar tomonidan elektron brasletga shikast yetkazilganligi yoki yoʻqotilganligi holati aniqlangan taqdirda, ularga nisbatan moddiy javobgarlik choralari qoʻllaniladi;
elektron brasletga uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxs qasddan shikast yetkazganligi aniqlangan hollarda, yetkazilgan moddiy zararning oʻrni ushbu shaxs tomonidan qoplanishi taʼminlanadi.
Yetkazilgan moddiy zararning miqdori tekshiruv xulosasida belgilanadi. Tekshiruv xulosasi ijrochi xodimlar va uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxsga tilxat olish yoʻli bilan eʼlon qilinadi.
33. Uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxs moddiy zararning oʻrnini bir oy muddat ichida qoplamasa, ushbu zarar sud tartibida undiriladi.
9-bob. Yakunlovchi qoidalar
34. Uy qamogʻi ehtiyot chorasi qoʻllanilgan yoki ozodlikni cheklash jazosi tayinlangan shaxs ehtiyot chorasi yoki jazoni ijro etish joyini tark etib, qochgan hollarda tuman (shahar) ichki ishlar organi xodimlari qonunchilikda belgilangan tartibda uni ushlashga qaratilgan choralarni koʻradi.
35. Ushbu Nizom talablarining buzilishida aybdor boʻlgan shaxslar qonunchilik hujjatlariga muvofiq javob beradilar.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 5-dekabr,
813-son