📅 2024-yil 7-dekabr · Vazirlar Mahkamasi qarorlari
Rasmiy matn. Rasmiy hujjat. Tahririy izohlar kiritilmagan.
UzbekAI
📅 2024 йил 7 декабрь · Вазирлар Маҳкамаси қарорлари
Расмий матн. Расмий ҳужжат. Таҳририй изоҳлар киритилмаган.
📅 7 декабря 2024 г. · Постановления Кабинета Министров
Официальный текст. Официальный документ. Редакционные примечания не включены.
📅 7 December 2024 · Cabinet of Ministers resolutions
Official text. Official document. Editorial notes are not included.
Ўзбекистон Республикаси Вазирлар Маҳкамасининг
қарори
Туризм соҳасини рақамлаштириш ва туристик хизматларни ягона платформага бирлаштириш чора-тадбирлари тўғрисида
Ўзбекистон Республикаси Президентининг «Республикага хорижий туристлар оқимини кескин ошириш ҳамда ички туризмни янада жадаллаштириш чора-тадбирлари тўғрисида» 2024 йил 12 январдаги ПФ-9-сон Фармони ижросини таъминлаш ҳамда туризм соҳасини рақамлаштириш мақсадида Вазирлар Маҳкамаси қарор қилади:
1. Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги ҳамда Рақамли технологиялар вазирлигининг хорижий ва маҳаллий сайёҳлар учун қулайлик яратиш мақсадида масофадан туриб жойлаштириш воситаларини банд қилиш, туроператор ҳамда турагентлар томонидан таклиф этилаётган хизматлар, автотранспорт воситалари ижараси, гид-таржимон ва такси хизматлари ҳамда туризм соҳасидаги бошқа хизматлардан фойдаланиш имкониятини тақдим этувчи Миллий туризм ягона платформасини (кейинги ўринларда — платформа) ишга тушириш тўғрисидаги таклифига розилик берилсин.
2. Ўзбекистон Республикаси Экология, атроф-муҳитни муҳофаза қилиш ва иқлим ўзгариши вазирлиги Рақамли технологиялар вазирлиги ҳамда бошқа манфаатдор вазирлик ва идоралар билан биргаликда қуйидагиларни амалга ошириш имконини берувчи платформани 2025 йил 1 сентябрдан бошлаб синов тариқасида, 2025 йил 1 декабрдан бошлаб тўлиқ ишга туширилишини таъминласин:
сайёҳларга жойлаштириш воситаларини онлайн банд қилиш ва сайёҳлар томонидан баҳолаш;
республикадаги туроператорлар ва турагентлар хизматлари, шу жумладан, сайёҳларга гид, гид-таржимон, йўриқчи-йўл бошловчи, экскурсия етакчилари хизматларидан фойдаланиш;
йўналишсиз такси ва автотранспорт воситалари ижараси хизматларидан фойдаланиш;
автобус, авиа ва темир йўл чипталари, маданий мерос объектлари, музейлар ва бошқа диққатга сазовор жойларга кириш чипталарини харид қилиш;
халқаро ва миллий тўлов тизимлари орқали туристик хизматлар учун тўловларни амалга ошириш;
туризм соҳасига оид статистик ҳисоботларни юритиш ва реал вақт режимида таҳлил қилиш.
3. Белгилансинки:
Ўзбекистон Республикаси Туризм қўмитаси (кейинги ўринларда — Туризм қўмитаси) платформани ишлаб чиқиш ва жорий этиш бўйича буюртмачи ҳисобланади;
платформа оператори қонунчиликда белгиланган тартибда харид қилиш тартиб-тамойиллари натижаларига кўра танлаб олинади;
платформани ишлаб чиқиш, техник қўллаб-қувватлаш ва такомиллаштириб бориш Туризм қўмитаси ҳузуридаги бюджетдан ташқари Туризмни қўллаб-қувватлаш жамғармаси маблағлари ҳисобидан амалга оширилади;
платформада жойлаштириладиган маълумотлар базаси мутасадди вазирлик ва идораларга тегишли ахборот тизимлари ва маълумотлар базаси билан интеграциялашган ҳолда юритилади;
жисмоний ва юридик шахслар ўз хоҳишига кура платформага уланиши ва унда хизматларни жорий этиши мумкин;
платформа оператори томонидан платформа маълумотларининг 14 та хорижий тилга таржимаси таъминлаб борилади.
4. Платформанинг узлуксиз ва самарали фаолият кўрсатишини таъминлаш мақсадида Туризм қўмитаси:
а) Ўзбекистон Республикаси Транспорт вазирлиги билан биргаликда «Uztrans» ягона интерактив ахборот тизими, шунингдек, «Ўзбекистон темир йўллари» АЖ, «Uzbekistan airways» АЖ ва бошқа йўловчи ташиш лицензиясига эга ташкилотларнинг электрон чипталарни харид қилиш тизимлари;
Ўзбекистон Республикаси Маданият вазирлиги ҳамда Маданий мерос агентлиги билан биргаликда маданият ташкилотлари, шу жумладан, маданий мерос объектлари, музейлар ва бошқа диққатга сазовор жойларга кириш чипталарини харид қилиш тизимлари;
Солиқ қўмитаси билан биргаликда платформани Маркетплейс реестрига киритган ҳолда Солиқ қўмитасининг тегишли ахборот тизимлари билан интеграция қилинишини;
б) платформани ишлаб чиқиш ва ишга тушириш ҳамда уни кейинчалик техник қўллаб-қувватлаш бўйича техник ҳужжатларнинг ишлаб чиқилишини ҳамда ваколатли органларда экспертизадан ўтказилишини;
жойлаштириш воситалари, туроператор ва турагентлар, гид (гид-таржимон), йўриқчи-йўл бошловчи ва экскурсия етакчилари платформа орқали ўз хизматларини йўлга қўйишлари учун барча шароитлар яратилишини;
платформани модернизация қилиш ҳамда унинг узлуксиз фаолият кўрсатишини;
туризм соҳаси субъектлари ҳамда аҳоли ўртасида платформа имкониятларини доимий тарғиб қилиб боришни таъминласин.
5. Мазкур қарорнинг бажарилишини назорат қилиш Ўзбекистон Республикаси экология, атроф-муҳитни муҳофаза қилиш ва иқлим ўзгариши вазири А.А. Абдухакимов зиммасига юклансин.
Ўзбекистон Республикасининг Бош вазири А. АРИПОВ
Тошкент ш.,
2024 йил 7 декабрь,
820-сон
Oʻzbekiston Respublikasi Vazirlar Mahkamasining
qarori
Turizm sohasini raqamlashtirish va turistik xizmatlarni yagona platformaga birlashtirish chora-tadbirlari toʻgʻrisida
Oʻzbekiston Respublikasi Prezidentining “Respublikaga xorijiy turistlar oqimini keskin oshirish hamda ichki turizmni yanada jadallashtirish chora-tadbirlari toʻgʻrisida” 2024-yil 12-yanvardagi PF-9-son Farmoni ijrosini taʼminlash hamda turizm sohasini raqamlashtirish maqsadida Vazirlar Mahkamasi qaror qiladi:
1. Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi hamda Raqamli texnologiyalar vazirligining xorijiy va mahalliy sayyohlar uchun qulaylik yaratish maqsadida masofadan turib joylashtirish vositalarini band qilish, turoperator hamda turagentlar tomonidan taklif etilayotgan xizmatlar, avtotransport vositalari ijarasi, gid-tarjimon va taksi xizmatlari hamda turizm sohasidagi boshqa xizmatlardan foydalanish imkoniyatini taqdim etuvchi Milliy turizm yagona platformasini (keyingi oʻrinlarda — platforma) ishga tushirish toʻgʻrisidagi taklifiga rozilik berilsin.
2. Oʻzbekiston Respublikasi Ekologiya, atrof-muhitni muhofaza qilish va iqlim oʻzgarishi vazirligi Raqamli texnologiyalar vazirligi hamda boshqa manfaatdor vazirlik va idoralar bilan birgalikda quyidagilarni amalga oshirish imkonini beruvchi platformani 2025-yil 1-sentabrdan boshlab sinov tariqasida, 2025-yil 1-dekabrdan boshlab toʻliq ishga tushirilishini taʼminlasin:
sayyohlarga joylashtirish vositalarini onlayn band qilish va sayyohlar tomonidan baholash;
respublikadagi turoperatorlar va turagentlar xizmatlari, shu jumladan, sayyohlarga gid, gid-tarjimon, yoʻriqchi-yoʻl boshlovchi, ekskursiya yetakchilari xizmatlaridan foydalanish;
yoʻnalishsiz taksi va avtotransport vositalari ijarasi xizmatlaridan foydalanish;
avtobus, avia va temir yoʻl chiptalari, madaniy meros obyektlari, muzeylar va boshqa diqqatga sazovor joylarga kirish chiptalarini xarid qilish;
xalqaro va milliy toʻlov tizimlari orqali turistik xizmatlar uchun toʻlovlarni amalga oshirish;
turizm sohasiga oid statistik hisobotlarni yuritish va real vaqt rejimida tahlil qilish.
3. Belgilansinki:
Oʻzbekiston Respublikasi Turizm qoʻmitasi (keyingi oʻrinlarda — Turizm qoʻmitasi) platformani ishlab chiqish va joriy etish boʻyicha buyurtmachi hisoblanadi;
platforma operatori qonunchilikda belgilangan tartibda xarid qilish tartib-tamoyillari natijalariga koʻra tanlab olinadi;
platformani ishlab chiqish, texnik qoʻllab-quvvatlash va takomillashtirib borish Turizm qoʻmitasi huzuridagi budjetdan tashqari Turizmni qoʻllab-quvvatlash jamgʻarmasi mablagʻlari hisobidan amalga oshiriladi;
platformada joylashtiriladigan maʼlumotlar bazasi mutasaddi vazirlik va idoralarga tegishli axborot tizimlari va maʼlumotlar bazasi bilan integratsiyalashgan holda yuritiladi;
jismoniy va yuridik shaxslar oʻz xohishiga kura platformaga ulanishi va unda xizmatlarni joriy etishi mumkin;
platforma operatori tomonidan platforma maʼlumotlarining 14 ta xorijiy tilga tarjimasi taʼminlab boriladi.
4. Platformaning uzluksiz va samarali faoliyat koʻrsatishini taʼminlash maqsadida Turizm qoʻmitasi:
a) Oʻzbekiston Respublikasi Transport vazirligi bilan birgalikda “Uztrans” yagona interaktiv axborot tizimi, shuningdek, “Oʻzbekiston temir yoʻllari” AJ, “Uzbekistan airways” AJ va boshqa yoʻlovchi tashish litsenziyasiga ega tashkilotlarning elektron chiptalarni xarid qilish tizimlari;
Oʻzbekiston Respublikasi Madaniyat vazirligi hamda Madaniy meros agentligi bilan birgalikda madaniyat tashkilotlari, shu jumladan, madaniy meros obyektlari, muzeylar va boshqa diqqatga sazovor joylarga kirish chiptalarini xarid qilish tizimlari;
Soliq qoʻmitasi bilan birgalikda platformani Marketpleys reyestriga kiritgan holda Soliq qoʻmitasining tegishli axborot tizimlari bilan integratsiya qilinishini;
b) platformani ishlab chiqish va ishga tushirish hamda uni keyinchalik texnik qoʻllab-quvvatlash boʻyicha texnik hujjatlarning ishlab chiqilishini hamda vakolatli organlarda ekspertizadan oʻtkazilishini;
joylashtirish vositalari, turoperator va turagentlar, gid (gid-tarjimon), yoʻriqchi-yoʻl boshlovchi va ekskursiya yetakchilari platforma orqali oʻz xizmatlarini yoʻlga qoʻyishlari uchun barcha sharoitlar yaratilishini;
platformani modernizatsiya qilish hamda uning uzluksiz faoliyat koʻrsatishini;
turizm sohasi subyektlari hamda aholi oʻrtasida platforma imkoniyatlarini doimiy targʻib qilib borishni taʼminlasin.
5. Mazkur qarorning bajarilishini nazorat qilish Oʻzbekiston Respublikasi ekologiya, atrof-muhitni muhofaza qilish va iqlim oʻzgarishi vaziri A.A. Abduxakimov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2024-yil 7-dekabr,
820-son